رواية عــروس الجبـــايــش الفصل السادس والثلاثون 36 بــقلم يـــاســـة الموسوي
رواية عــروس الجبـــايــش الفصل السادس والثلاثون 36 بــقلم يـــاســـة الموسوي
#عــروس_الچبـــايــش🌼
بــقلم يـــاســـة الحلقة (36)
اعلنتُ في هذه العيونِ هزيمتي
مستلماً في رمشها الذباحِ
وانا الذي ما خف غمد سيفة
وبسالتي خطتْ على الالواحِ
أمسيت بين جفونها كـضحيتةٍ
مأسورةٍ بلـواحـظٍ كـرِماحِ
فاتكة تلك العيـونُ وسـرها
بجراءةِ التحديـقِ والإفصاحِ
...................................
يُـمن :- أبتسمت وگمت انطيته الورقه اخذها من ايدي گتله بهدوء شكراً أستاذ رد
بُـرهان :- موفقة
طلعت من الغرفة نزلت جوى لگيت ورود گاعدة متانيتني اول ما اجيت گعدت سألتني
-- هاا بشري
-- الحمدلله جاوبت
بقينا گاعدين انا وياها نسولف شوية واجى واحد من الولد الجان يمتحن وياي گال بس سؤال بلا زحمه رفعت راسي باوعت عليه ورديت
-- تفضل
-- شلون حليتي السؤال الاول شگد طلع الناتج يمج
-- عشرة
-- لا الله عليج
-- اي
-- شو اني طلع عندي 65
ضحكت ورديت
-- شدعوة وين اكو هيج
-- شمدريني شو طلع هيج يمي يعني
هسه راحت عشر درجات حرامات
-- تعوضها ان شاءالله
-- ان شاءالله شكراً
-- العفو
الولد راح وانا و ورد گمنا طبينا للقاعة عدنا محاضرة خلصانها ورها كل وحده بينا راحت البيتها و من رجعت للبيت لگيت امي عيونها حمر شابعة بچي متت من القهر عليها بس ما بـ ايدي شي واصلاً كل المصايب من وره راسي
عاد للمغرب وخالتي ام تميم خابرت امي گالت عبير تطلگ ما تجين وياها اني ما اگدر وحدي وامها حالها من حالي تعبانه
امي ما گالت شي بسرعة بدلت و گالتلي بدلي ترحين وياي ، طلعنا اثنينه البيت عمي اول ما وصلنا لگينا عبير خطية منتهيه وامها وخالتي گاعدات يمها
شوية و زاد الوجع عدها واخذوها امي
و تميم وامها للمستشفى خالتي ما راحت ما تگدر تتعب
بقيت انا يمهم بالبيت و مراد من شافني عدهم صاح على زهراء مدري شراد منها
و شوية و طلعت گعدت يمي بس ابد ما فتحت موضوع اخوها ولا جابت طارية
حسيت مراد گالها لا تفتحين الموضوع وياها والهذا السبب صاحها قبل شوية
بقينا گاعدين وكل شوية نخابر عليهم نلگاها بعدهي عمي ما موجود جان طالع ومـراد گاعد بالديوانية واحنه بالصالة متانين
دگ نقال زهراء فزينا عبالنا خابروا على مود عبير سألتها خالتي منو گالت امي
و اخذت النقال ومشت الغرفتها شوية وطلعت والنقال بـ ايدها اجت گعدت گبالي
وابد ما ارتاحيت الها مدري ليش احس الخابر اخوها مو امها وراحت گالته انا عدهم درت وجهي اباوع على ولاء تسولف وياي و هيَ گامت من مكانها وراحت بتجاة المطبخ
وگفت قريب يم الثلاجة و گلبي لعب من وگفتها حسيتها اخذتلي صورة بس ما اگدر احچي ولا عندي دليل ولا شفتها بس مجرد احساس واخاف احچي ورجلها هنا وتصير الهم هوسه و تالي تطلع ما مصورة واتفشل گدام الناس
بقيت انحمس وحدي تالي گمت غيرت مكاني وخلصتها بس قلق ابد ما ارتاحيت وهيَ على طول الوكت نقالها بـ ايدها وتكتب هنا تأكدت جاي تراسل بـ اخوها لان ما معقولة ما شالت عيونها منه وكل شوية تجيها رساله وترجع ترد
لحد ما اجى اول ما شافني أبتسم گمت انا من مكاني سلمت عليه من بعيد ضحك
و فتح ادية و گال
-- عاد اني مزاعل امج ما مزاعلج تعالي بابا
رحت عليه بسته واگول
-- شلونك عمو
-- زين حبيبتي انتِ شلونج
-- الحمدلله
-- شعجب هنا اليوم
-- امي راحت ويا عبير للمستشفى وانا بقيت هنا
-- اي عاد امج صاحبة واجب ما تقصر
حچى هيج و راح الغرفته خالتي باوعت عليه وهزت راسها ، رجعت گعدت واكل بروحي ميته من القهر اريد احچي ويا واستحي من خالتي هسه شتگول عليه
تريده يصالح امها
بس المره طلعت اصيلة وماكو منها اثنين بحيث هيَ من وحدها يعني منها ومن كيفها گالتلي
-- گومي احچي ويا عمج بلكي يلين على امج شوية ويرجعون يتصالحون
-- شگله
-- ما ادري شتگولين گولي بس خلي يلين عليها لان اذا ضل هيج ما يريدها بعد للموت
گمت من مكاني ورحت وراه للغرفة دگيت الباب صاح منو فتحت الباب وطبيت لگيته متمدد على الجرباية اول ما شافني عدل گعدته وگال (تعالي بابا) طبيت وگفت قريب عليه ابتسم ويگول
-- گولي عمو محتاجة شي
-- اريد احچي وياك واتمنى ما تفشلني
-- احچي
-- انتَ و امي
-- عمو حبيبتي هذا الموضوع منتهي وخلصان لا تفتحينه سدية حبابة
-- صح امي غلطت بحقك و تصرفت غلط بس هي تحبك ومعترفه بغلطها و ساعة عصبية ما عرفت تفكر بيها و استعجلت سامحها
-- يعني شنو ساعة عصبية يُـمن عمو تعرفين امج شـسوت لو ما تعرفين فايته بنص المركز و مشتكية على امر المركز بكبرة و مو بس هيج من سامع بيها جاية طالع يحچي وياها زافته هذيج الزفه والغلط والعنايل والصياح گدام الضباط والجنود امج ما فاضحته وحده لا فضحتني وفضحت تميم وفضحت نفسها
سكتت ما رديت ادري بيها اذا وگع واحد باللسانها ما يخلص رجع گال
-- شگد ما مناف طايح حظ وياج شگد ما طلع أدمي وامج بحيث دايسه بطنه وفاضحته گدام العالم كلها وقدمت شكوة عليه و گدام عيونه بس ما راد عليه بحرف واحد ولا متجاوز عليها بكلمة وحده الضباط ما قابلين يقدمولها شكوة بس هوَ گايل الهم كملولها الاجراءات و وصلوها للبيت يريدها بس تطلع وتسد حلگها ماكو
بقيت ساكته ما ادري شارد حرت لان ما توقعته موجود هناك من راحت اشكت ولا توقعت متعاركة ويا كل ضني بس قدمت دعوة ورجعت
بقيت واگفه وحايرة وميت من الفشلة ومن القهـر رجع گال
-- خليها تتأدب شهر شهرين سنه سنتين الظاهر انطيتها عين زايده و دللتها فوگ اللازم الهذا السبب تمادت وگامت حتى مني ما تخاف
-- لا تگول هيج والله هيَ تحبك وتحترمك وكلش مقهور لان انتَ زعلان منها والله يومية من ارجع من الدوام الگاها شابعة بچي وحتى ما رايحة الشغلها باقية بالبيت
ما جاوبني بقى ساكت رجعت گتله
-- صح غلطت و تسرعت وسبحان الما يغلط وانتَ ابوها واخوها وزوجها هيَ ما عدها غيرك وحتى انا ما عندي غيرك لا تبقى شايل بخاطرك والله احنه بدونك ولا شي وامي تعبت كلش هواي وكل هذا الجاي تتصرفة هسه بسبب الظلم الشافته وخسران اخوي تخاف لا انا هم تخسرني واموت من اخوي
نفس الشي ساكت ما يرد من شفته ما ساكت و ما يجاوبني عفته وطلعت اول ما طلعت دگ تميم على خالتي گال جابت عبير ولد
خالتي گامت تصل على النبي فرحانة و ولاء ركضت الابوها تبشره و البيت انخبص بهذا الخبر خبص من الفرح والهلاهل
مـراد بدل وراح وراهم واحنه تعشينا بسرعة بسرعة وگمت ساعدت البنات بنتظيف البيت للعلـم عبير بيتها بيه ترميم وگاعدة بيت عمي صار مده فـ غراضها مخربطة خطيه خالتي گالت رتبت غرفتهم خطية
رتبنا الغرفة انا ولاء و جهزناها و گعدنا متانينهم لحد ما اجوا جان الوكت متأخر وانا ما قريت ولا جبت وياي الكتاب ما عبالي هيج نتأخر
اجوا طبوا امي مساعدتها تمشي بيها وامها لازم الجاهل ومراد وتميم وراهم استقبلتهم خالتي تهلهل واطش جكليت
عليهم
اجيت انا بستها تباركت الها و تباركت التميم ضحك و رد
-- عود ليش ما تبوسيني مثلها
غمزتله اريد يسكت خطية الابنية هسه جايبة اشو هذا باوع المـراد واثنيهم ماتوا من الضحك ضحكت على ضحكتهم واگول شكو
مـراد :- بله عيدي الغمزه
-- هههههه فضحتوني صدگ چذب
تميـم :- جنها سلمان المخبل من يوگف بركن المدرسة ويغمز للبنات
-- ههههههههه شگد تافها
مـراد :- هههههه لا والله مو تافها لان صدگ چنج سلمان وين اكو واخد يغمز
بـ اثنين عيونه
-- ههههه هسه وين اعرف انا مو زين وطلعت هاي بـ ايدي
طلع عمي من غرفته على الصوت امي بسرعة ابتعدت وهوَ ولا جنه شايفها اجى على عبير باسها وبارك الها ومشى گعد بالديوانية
ضلينا بغرفة عبيـر گاعدين وامها فد حبابة وفقيرة من اهل الله من هذول الناس الفقر النيتهم طيبة ومبين عليها حالتها كلش تعبانه
زهراء :- شـ سميتوا بالسلامة
مـراد :- كرار
-- عاشت الأسامي يتربة بعزكم ودلالكم
ان شاءالله
عبير :- يوم الج ان شاءالله
درت وجهي ادور على امي ماكو ما شفتها توقعتها گامت تغسل بس الظاهر راح تجيب الراس الجبير وسوالف الزعل بعد
ما تتحملها
شوية و اجت وگفت بـ باب الغرفة و گالت التميم ما توصلنا ردت خالتي
-- وين رايحات باتن هنا
-- لا مناك بيتنا فارغ ويُـمن عدها دوام
گام تميـم طلع يشغل السيارة بين ما لبسنه وطلعنا وراه اول ما مشى گال الامي
-- بشري تصالحتوا لا
-- ما يحاچيني شأسويله عوفه براحته
-- يعني حچيتي ويا و ما سمعج
سكتت ما ردت رجع هوَ گال
-- والله هاي كلها من يُـمن ام المشاكل
اول ما گال هيج ابتسمت وتذكرت بُـرهـان نفس الحچاية معقولة انا ام المشاكل وما ادري بروحي ، بقيت ساكته و همَ ساكتين لحد ما وصلنا للبيت وراح
گبل طبيت للغرفـة طلعت الكتاب وگعدت اقرأ عندي مادتين وكل مادة ورقة شطـولها لازم احفظهن
قريت اول مادة والمادة الثانية ما ضبطتها كلش لان طفيت وعيوني گامت تنقفل من وحدها نمت وانا لازمه الملزمة
والصبح گعدت من وكت اريد اكمل قراية
گمت غسلت وحطيت الجاي على النار
امي نايمة والبيت هدوء
جبت الملزمة وگعدت بالمطبخ ومشغله الهيتر و گاعدة سمعت باب الشارع انفتح گمت و گفت اباوع من الشباك شفت عمي طب بـ ايده صمون وكيمر عرب ابتسمت فرحانه واخيراً اجى و راح يتصالحون
طب للمطبخ لگاني گاعدة ابتسمت خجلان مني البارحة يبيع بطولات وما اجي وما احجي وخليها سنه وسنتين اليوم جايب كيمر وجاي اكيد يخجل صبح عليه رديت
السلام
عاف الصمون والكيمر على الكاونتر و فات جوى دقايق واجت امي واثار الصلح مبينه برگبتها هلوو هاي شنو من شوكت اجى من شوكت تصالحوا شو ما ادري
شهيناز :- صباح الخير
-- ههههه صباح النور
-- شكو عليمن تضحكين
-- فرحانه ما يصير افرح
-- هههه وشنو سبب الفرح
-- تصالحتوا
--حركت اخر ورقة عندي عوزها بعد ما يصالحني
حچت هيج وضحكت وطلعت للحوش شغلت الماطور ومن رجعت سألتها
-- شوكت اجى عمي
-- بالليل
-- عفيه شهيناز ما خليتيه يصبر للصبح والله بطلة
-- هههههه اصلاً اني عفته يزعل اسبوع لو اريد من اول يوم اخليه يرضا بس عفته بمزاجي
-- ههههه الله الله
-- وداعتج
-- شلون تصالحتوا مو گلتي ما قبل يسمع منج
-- لا سمع بس ما جاوبني ولا رد عليه
-- انوب شلون اجى
-- بالسيارة
-- هههههه لا يما عليج الله شلون اجى
-- اسرار دولة هاي خو ما انطجياهن يا الفاهية
-- يمااا احچي حبابة شلون تصالحتوا شلون اقتنع يجي وراج بيش ساعة اجى حبابه احچي
-- ههههه اجى ب3 الفجر وشلون اقتنع هاي بعد حركت ورقة من اوراقي الرابحة ورجعته
-- سويتي سحر
غمتني ودارت وجهها وتگول
-- اي مو اني فخرية واسوي سحورة
-- مو تگولين حرگت ورقة جدتي جانت هم تحرك اوراق
-- امداج وامده جدتج على هذا العقل
-- چا شلون اجى
-- خابرته حچيت وياه بـ 2 ونص ب3 هوَ يمي بالغرفة واي سؤال ثاني حظج اطيحة كافي يلا
-- ههههههه الله يسعدكم ان شاءالله والله كلش فرحت وبمناسبة هاي الفرحة ما راح اقرأ
-- انجبي و اقري يلا بين ما احظر الريوك
ضحكت و رجعت اقرأ بين ما كملت الريوگ وجابته راحت صاحت عمي اجى گعد يمنا ياكل اول ما اكلت الگمه تذكرته من گال الها حرمتي عليه مثل اختي غصيت بلگمتي
اثنينهم رفعوا راسهم عليه باوعت الهم وحرت شلون اسأل گالت امي
-- شبيج
-- ما بيه
-- لا بيج شي شكو شكلج تذكرتي مصيبة وتردين تحچينها بس تخافين
-- لا والله مو هيج بس
-- بس شنو
-- من تعاركتوا عمي مو گال صرتي مثل اختي شلون هسه تصالحتوا
امي ضحكت وهزت ايدها وعمي أبتسم ورد
-- بساعة العصبية الإنسان كلشي يطلع منه وكلامي جان تعبير مجازي لا اكثر ولا اقل يعني ما ينوخذ بيه لان هوَ حتى الطلاق بحالة العصبية ما ينوخذ بيه مو عاد كلمة مثل هاي فـ لا يضل بالج
-- زين الحمدلله طمنتوني الله يسعدكم
ان شاءالله
كملنا ريوگنا وعمي فات للغرفة اليوم حتى للدوم ما راح عريس مدري شنو وانا بقيت بالمطبخ اقرأ لحد ما صار وكت دوامي گمت الغرفتي بدلت وطلعت
هنـا جانت بداية 2015 واكو مشاكل وحرب داع11 والوضع مخربط والدنيا مگلوبة والفتوى صايرة والناس ملتحقه
بس عمـي و تميـم اول بداية ما صعدوا لان جان واجبهم بداخل الدائرة
وراها انطلب منهم يلتحقون فـ منا و گاموا يصعدون عشر ايام 15 يوم ومن يرحون لحد ما يرجعون احنه گلوبنا بـ ادينه خو امي تعلس وره عمي و الليل ونهار تبچي وتدعي
اما منـاف ما اعرف عنه شي إذا يصعد او لا بس اكيد وميه بالميه يروح يلتحق لان هوَ بالخط الاول عكس تميـم وعمي يعني لازم يلتحق
وشگد سوى وياي وأذاني بس من اصلي صلاة الليل ادعيلة الله يحفظـة ويسلمة وما يصبه شر ويرجع الابنـه بسلامة لان ادري بيه طيب و يحبني بس مكسور من الداخل وما يگدر ينسى ولا يگدر يتقبل وزلمه مثله حرام يموت على ايد حيوانات قذرة امثال داع11
بهاي الفترة زهراء جابت أبنية و تميم الخبيث طاح وسماها يُـمن بالسجل لان جان رايح ويا مراد للمستشفى ومنا ومشت على الابنية يُـمن بالسجل وبالحقيقة
عمي ما قبل عليه گاله بنتهم همَ يسمونها ليش ادور مشاكل وهوَ ولا يهمه اصلاً خربان ضحك ويگـول خلي الـ... منـاف كل ما يسمعهم يصيحون على بنت اخته يوجعه گلبه و يعض اصابعة ندم
وهيج و مشت الايام بين الدراسة و العائلة وضروف العراق ماكو اي تغير لحد ما بيـوم
جنت وحدي لان ورود ما جاية وانا بيوم الما تجي ورود اضيع عبالك بيه حاله نفسية ابقى اصفن بالوجة ولا اعرف بشر غيرها
خلصت المحاضرة و گمت طلعت وصلت النص الممر وسمعت صوت أستاذ بُـرهـان يصيح وراي يُـمن درت وجهي اباوع عليه أشرلي براسة اجي رحت عليه بوكتها انا جنت لابسه قمصله قصيرة لونها أسود القمصلة كلش قصيرة وبيها كمر وياها بنطرون ثلجي وبلوز سمائي فاتح وهوَ جان لابس كوت طويل وصلت يمه گتله نعم استاذ گال
-- فوتي للقاعة
تفاجأت بس ما حچيت شي بسرعة طبيت للقاعة طب وراي محد موجود نزع كوته وانطانيا وگـال
-- اخذي حطي عليج ومره ثانية لا تلبسين هيج للبس وانتبهي على نفسج من اطلعين وإذا ترجعين للبيت يكون افضل
ولا رديت ولا نطقت احس انخرست فد مره
حط الكوت گبالي و طلع وصل للباب ورجع گال
-- لبسي گلت لا اطلعين بدونه سمعتي
حچى هيج وراح شلت الكوت وصافنه ليش هيج يحچي وياي شبيه لبسي صدگ قمصلتي قصيرة بس انا ضعيفة وعادي كلشي اللبس ما يبين عليه شي
انوب گلت ما دام گال هيج معناها اكو شي مو زين بهذا اللبس هسه شلون اللبس الكوت ماله غير يصير عليه دشداشة انوب رجالي و الطلاب منا غير انفضج فضيحة
شلت الكوت و طلعت لازمته بـ ايدي كلت خليني ارجعه اله و اروح للبيت ما اگدر اللبسة زحمة
طلعت وراه لگيته جاي ينزل من الدرج صحت أستاذ وگف وباوع عليه من شافني بعدني ما لابسة الكوت هز راسه ما قابل وشكله ضاج گتله
-- هذا الكوت مالتك
-- لبسية يُـمن
-- لا راح اطلع للبيت
-- لج بابا ملابسج مدري شمدمره شلون تبقين تفترين بيهن ملگعات
هـو گال هيج وانا احس متت عزا بعيوني الاثنين بس لااا اكيد لا قابل ما ادري بروحي لو الهاي الدرجة غشيمة وفاهية
اجيت ابچي اله شوية رجع گال
-- روحي للبيت
حطيت الكوت عليه بدون ما اللبسه هيج بس ثبته على جتافي وطلعت بكل سرعتي
وصلت للباب وتذكرت عباس رجعت خابرته گال نص ساعة يلا يجي حارت بيه الدنيا
انوب بسرعة بسرعة رحت للحمـام اشوف الموضوع
فتت ماكو شي الامور سليمة الحمدلله زين شمدمره ليش يگال مدمره طبت ابنية ما اعرفها للحمام وگفت تغسل سألتها
-- عفية بلا زحمة بنطروني شـمدمر
باوعت عليه وردت
-- ما ادري طگعه جوزية يمكن كاكو مدري شنو
-- ياا منين اجاني الكاكو
-- ما ادري
سكتت واگول الحمدلله كاكو صخام حبر ولا غير شي لحد ما اجاني عباس طلعت
صعدت و ميت من الفشلة هسه هذا شعباله وشفكر والله عيب و قبل لا اوصل للبيت طبگت الكوت و نزلته لازمته بـ ادية
والحمدلله امي ما انتبهت عليه لو شايفته چان حققت وياي الف تحقيق و رزلتني ميت رزاله
ثاني يوم من طلعت للدوام بنص الطريق وتذكرت الكوت ما جبته وبعد ما اگدر ارجع عليه گلت خليه على باچر اجيبه مو مشكلة
فتت بوجهي للمحاضرة واليوم لابسه ملابس طويلة و غامقة حرمت على روحي اللبس بعد قصير و فاتح خاف كلشي يصير بالدنية
بيومها بُـرهان ما اجانه واصلاً بكل الجامعة ماكو ما جاي نزلت و ورد وياي نريد نرتاح شفت ريام من بعيد واگف تخابر فرحت بشوفتها ورحت عليها
بس شافتني سدت الخط و حظنتني ترحب بيه وانا نفس الشي ارحب بيها رحنا گعدنا بالكافتريا شربنا جاي وهيَ تحچيلي شلون انقبلت بالماستر و حالياً حاي تقرأ وهنا بنفس جامعتنا مقدمة بس غير اختصاص
بقينا كلش هواي نسوالف ومن بين الكلام سألتها على بُـرهان لان ما جاي اليوم گالت
-- اليوم عنده معاملة مال دكتوراة جاي يقدم على الدكتوراة
-- ما شاءالله
-- ادعيله خطية كلش تعب بالموضوع هاي السنه الثانية يقدم سودة عليه العام ما انقبل او اكو تشدد اتجاها
-- يارب يسهل عليه وينقبل ويصير اكبر دكتور والله كلش فرحتله يستاهل أستاذ بُـرهان كل الخير
-- الخير يصيبج حبيبتي ، اي احچيلي شلونكم اخباركم
-- الحمدلله على الله زينين ، هم شايفه هاله كلش مشتاقتلها
أبتسمت وسكتت بدون ما ترد وره شوية گالت
-- بصراحة يا يُـمن علاقتنا مو مثل قبل صارت رسمية فد مره وگمنا نتشاوف فقط بالمناسبات يعني امي وخالاتي واني والبنات الباقيات نتشافون بالمناسبات
اما بُـرهان انقطعت العلاقة رسمي بينه وبين رائف وحتى ويا باقي الولد صارت بحدود على گد السلام وهذا هو
سكتت ما جاوبت لان كلها بسببي ادري كلش زين وره ما شهد الصالحي بُـرهان خربوا وياه رجعت هيَ تگول
-- غادة تزوجت وصار عدها ولد وهسه سمعت حامل و هاله نفس الشي تزوجت وعدها ولد
-- ياا صدگ
-- اي والله
-- اخذمن
-- غادة تزوجت نؤفل أبن خالتي سميعة
وهالـه تزوجت ولد وياها بالجامعة
-- الله يهنيهن ان شاءالله هاله ورده تستاهل كل خير وحتى نؤفل حباب وطيب
-- اي والله نؤفل كلش حباب
-- و واثـق شخبارة
أبتسمت مجاملة وحسيت بيها مقهورة وراها ردت
-- هم تزوج
حچت هيج وضحكت بس ضحكة وحده مقهورة رديت عليها متفاجأة
-- عليج الله
-- اي والله
-- اخذمن
-- ما ادري وحده من معارف خالتي
-- تدرين تفاجأت لان ادري بيه گلب جان يمج
-- صح بس مستحيل نصير حاول بكذا طريقة بس ما صارت وخصوصاً خالتي وامي خربن هذيج الفترة وعلاقتهن هسه يمكن صار سنتين من رجع السلام بينهن ومو بس هيج وضعهم المادي فد مره تعب يعني ما يگدر يعزل خصوصاً بعد ما سوى حادث ودعم رجال فصلوا هذا الفصل المرتب باعوا البيت يلا وفوا
-- يااا يعني صدگ واثق داعم واحد
-- اي خطية وانسجن اسبوع لحد ما فصلوا يلا طلعوا من السجن
سكتت واگول بگلبي يعني مناف ما چذب من گال واثق مسوي حادث وداعم واحد
انوب رجعت سألتها
-- صار شگد من تزوج
--ما صار هواي تقريباً ست او سبع اشهر
-- الله يعوضج حبيبتي انتِ تستاهلين كل الخير
-- اني هم انخطبت بس فركشت هههه
-- لااا شنو هاي كومه احداث صايرة
-- هههههه اي لعد شعبالج
-- ههههه زين شعجب فصختي
-- اول ما اجوا يخطبون سوها علينا ماكو هيج تالي من وصلنا للزواج گال ماعندي
اجيب ذهب و ماعندي اشتري غرفة و اخوي راح ينطيني غرفته عاد بابا وبُـرهان من سمعوا بهذا الكلام فركشوا گالوا إذا امكانية للزواج ما عنده شلون يعيشش ويعيش اطفالج بعد يومين وبصراحة اني من الاول ما مقتنعه بيه واجت من الله بعد وخربتها
-- الله يعوصج بالأحسن
-- هسه اريد بس احصل الماستر وهذا يعتبر افضل عوض بالدنيه
-- ان شاءالله ماستر ودكتورة مثل اخوج
-- ان شاءالله انتِ ويانا يارب
-- امين
رجعت سكتت و ضلت بنفسي اسأل على رائف اريد اشوف رب العالمين وين وصله شلون گدر يكمل ويعيش عادي وهوَ ظلمني واخذ طفلتي من حظني وانطاها المرته بس ما سألت بقيت ساكته رجعت هيَ گالت من وحدها ويمكن قرأت افكاري
-- اما رائـف طلگ أديان من بعد ما طلع من السجن و ترك وضيفته و سافر برى العراق وگام كل سنتين يجي مره وحده ياخذله شهر او عشر ايام وراها يرجع يسافر
-- واديان وين راحت
-- مخطوبة حالياً
-- المن
-- الابن صديق ابوها گالوا على أساس ماخذها زوجة ثانية وعنده اثنين اطفال من زوجته الاولى
هزيت راسي بدون ما ارد شي رجعت گالت
-- من هاي الهوسة كلها بس بُـرهان باقي صامت لم يتزحز وينجرف الى قائمة المتزوجون
-- ههههه والله زين يسوي عاشت ايده
-- والله عازف عن الموضوع الى شعاراً اخر
باقي يقرأ من الصبح لليل حتى عمى
-- هوَ الزواج بس أذية قبله تزوجنا شحصلنا يمعودة
-- اي والله خو إني بس مهر وايععع لعبت نفسي من كل الموضوع
-- هههههه
-- ما انطيتيني رقمج
بس گالت هيج إحس حرت شلون انطيها الرقم اخاف امي ما تقبل رجعت طلعت نقالها وتگول سجلي رقمي يمج
ما گدرت احچي شي كلش انحرجت وانجبرت اخذت رقمها وانطيها رقمي وراها كل وحده بينا راحت المكانها
ومن رجعت للقاعة لگيت دكتور بهاء جاي طاب قبل دگيت الباب دار يباوع عليه
و راها گال ليش متأخرة بدينا بالأهمال يُـمن حچى بصوت عالي رديت
-- العفو منك دكتور
-- فوووتي
طبيت گعدت بمكاني واگول شكو جاي تركض انطي مجال نلحگ نرجع للقاعة ادري واگف بالباب خو ما واگف بالباب
گام يشرح ويسأل ويگوم بينا وانا اليوم جنه ناوي عليه وحاط عقله وياي بحيث حتى بالموضوع الجديد سألني عرفته ضايج على صاحبة وجاي يطلع قهره بيه ومن كمل المحاضرة قبل لا يطلع باوع عليه وگال
-- ريـام طلعت للبيت لو بعدهي بالجامعة
تفاجأت من سؤاله يعني شايفني جنت گاعدة يمها بعد شكو فشلتني ورزلتني رديت عليه
--ما ادري يمكن راحت
هز راسه وطلع اول ما طلع اجت يُـمن سلطان تضحك وتگول
-- يمكن سيادة الخطيب شايل ايده منج هاليومين بحيث دكتور بهاء منزعج فد مره
درت وجهي منها بدون ما ارد عليها رجعت ضحكت بصوت عالي ضحكة مستفزة وطلعت
ورود :- شگد ادب سزز
-- خل تولي وحده تعبانه
طلعنا گعدنا برى بعدنا ما حچينا واجانا ولد هذاك الترتيب والشياكة سلم ردينا السلام رجع گال الورود
-- ممكن بلا زحمة تعوفينا دقيقة
ورد گامت والولد باوع عليه بس مرتبك وشكلة خجلان وراها گال
-- إني أسمي أحمد مرحلة ثالثة وبصراحة من بدأت السنه لليوم متابعج ومتابع تحركاتج وتصرفاتج وعين الله عليج ابنية خلوقة ومرتبة وكل غلط ما بيج وإني ابن عشاير وباب عرب يعني ما احب اللعب ولا احب ابيع كلام على البنات لذلك اريد افوت من الأخير بدون ما اخذ وانطي زيادة اريد ادز الاهل هذا الآسبوع عليج إذا توافقين
صدگ من سمعته حسيت بروحي مرتبكه ومستحيه و فشلانه ليش ما ادري بس فد مره الموقف يخجل يمكن لان ماكو احد حاجي وياي هيج من بدأ الدوم لليوم لهذا السبب توترت
اعرف راح يصير حديث الساعة على ابو بس يُـمن مره والناس كلها تحبها وتريدها اي حقكم بس لازم يصير عدكم علم كل المروا بحياتي محد بيهم حبني رائـف انجبر بيه و سايرني الخاطر اكمل خدمتي اله والاهلها وبالاخير اصير حاضنه اطفال المرته و منـاف جان طالع من تجربه فاشلة و شافني انا العوض عن فشلة بتجربته ابنية فقيرة لا عندي نقال لا صاحبات لا اطب لا اطلع اخاف واحترم گال اي هيَ هاي الما تخون اخذها وانهي سالفتي وهذا الولد حاله من حال كل الولد الموجودين بالجامعات يا اما يريد يلعب ويتمعشك براسي يا اما صدگ راقبني وشاف ما عندي زايدة ونقاصة گال يلا خل اخطبها احسن من ما اخذ وحده عدها علاقات شو هاي صار سنه ما شفتها گعدت ويا واحد اما الحب لا شفته ولا شافني اصلاً ما يعرف طريقي وين
.... من شافني ساكته رجع گال
-- جماعتي گالوا يمكن مخطوبة الضابط بس ما اخذت بحجيهم لان ما بـ ايدج حلقة وما شايفه جاي عليج گلت تأكد منج احسن
انقهرت لان الضابط مشيع عليه خطيبي وبنفس الوقت انقهرت عليه ما ادري ليش احسه ثاق بيه و متأمل انا اله و ما اصير الغيرة وهسه هوَ بنص الموت ما انطاني گلبي ما انقهر عليه بس بنفس الوكت انا ما اريده ومستحيل نرجع بيوم من الايام ضليت ساكته ومقهورة منه وعليه انوب يلا رديت على الولد
-- اي صح مخطوبة
-- هااا تمام لعد اعتذر منج والله عبالي يجذبون عليه عذريني
-- لا عادي ما صار شي
افتر الولد وراح رجعت اجت ورود گعدت گبال وتسأل
-- جاي يصارح اكيد
-- لا فات بالغميض وخطب
-- هههه يااا هاي هيج مستعجل
-- يگول من اول السنه متابعني
-- و شگتيله
-- هوَ گال مخطوبة على اساس الضابط گتله اي عاد من سمع بسيادة الضابط افتر وراح
-- عزا بعينج تخبلتي شلون هيج تگولين وتكسرين بختج وقسمتج
-- يمعودة بس يسمعون ما مخطوبة يبقون كل يوم واحد جايني عاد خل تشيع مخطوبة مثل ما راسم الها حضره الضابط منا لمن اخلص هالكم سنه بسلام مالي خلكه يطلع بوجهي من جديد ويسويلي مشاكل جديدة
-- وهاي هيج تعتكفين عن الزواج طول العمر لان حضره الضابط ما يقبل
-- يمعودة تزوجت من قبل شنو الحصلته ما تگليلي بس طيحان الحظ اصلاً انا بعد للموت ما افكر بالموضوع
-- والله يُـمن انتِ شخاطه
-- ههههه هوَ للي يعاشر رائـف ومنـاف شيطلع
-- مخبل ههههه
-- هههههههه وانا تخبلت الله وكيلج
....
خلصنا دوامنا وطلعنا و ثاني يوم من اجيت جبت الجاكيت بعلاگه وياي والحمدلله امي ما شافتني وما ادري شلون فلتت منها وطلعت بدون ما تشوف العلاگه بـ ايدي
اول ما وصلت حرت شلون ارجعه البُـرهان إذا رحت الغرفة الاساتذة عيب منهم وإذا انطيته گدام الطلاب ما اخلص اخر شي ورود گالت شعلينا بيهم تعاي نروح اني وياج
رحنا انا و ورود للغرفة اليگعد بيها واول ما فتنا بالممر صار بوجهنا طالع من الغرفة بس شافنا ابتسم وگف سلمنا عليه رد السلام وگال سلامات محتاجين شي
يُـمن :- لا بس هذا مالتك البارحه نسيته ما جبته وياي وانتَ هم طلعت ما جاي
-- عوفيه يولي مو مشكلة
-- لا شلون غير مالك والدنيا باردة
ابتسم واخذه من ايدي رجعت گتله
-- أستاذ ترى جنت مدمره كاكو مو شي ثاني والله هاي ما ادري منو مدره المعقد وانا اجيت گعدت عليه بلا ما انتبه
أبتسم خجلان ونزل راسه يباوع للساعة مالته مبين لان جفصت و بدل ما ابرر الموقف صخمته ، رفع راسه و رد
-- اي اعرف
ورود :- أستاذ اني ما كمل البحث مالتي اليوم عادي نهاية الاسبوع اجيبه
-- اي هوَ الكم اسبوع تكملون بيه بحوثكم وراها ما استلم اي بحث
-- شكراً أستاذ جاي نتعبك ويانا
-- واجبي هذا
ترخصنا من عنده ورجعنا القاعتنا وكل الوضع مشى طبيعي لحد ما اجانا قبل المحاضرة الاخيرة سوالنا بوكتها اختبار مفاجئ لمده عشر دقايق خلانا نطگ راس براس من الصدمة وكلنا ما جاوبنه بيه خيرنا جارب نقطة وحدة
ومن كملنا گامت يُـمن سلطان تحچي وياه وتگول
-- أستاذ فدوة هذا انتَ الحباب اكيد ما راح تحسب هذه الدرجة عزا والنبي اموت مجاوبت شي
-- هوَ اني اريدج تموتين وتخلصين من الحياة ومنو يريد يموت وياج خلي يتوكل
الطلاب بس شافوا يُـمن حچت كلهم گاموا يحچون وصار اخذ وعطا ويا وشلون هيج ما تنطينا خبر وحرام عليك وما يصير عاد هوَ گعد على الكرسي و گال
-- تمام تمام هدوء
كلهم سكتوا ويباوعون عليه رجع گال
-- ماشي مثل ما تريدون هذا الاختبار ما راح احسبه وراح امشي وراه مزاكم البرتقالي واعوفه يولي واليوم محاضرة هم ماكو احسبوها ريست بس هااا باچر عندكم هاي الورقة والوراها امتحان من 15 درجة و البحث يكمل باچر لازم يعني باچر اول محاضرة اني يمكم فـ حسبوا حسابكم 25 درجة اريد منكم بهاي المحاضرة
صارت هوسه بالقاعة لا أستاذ ما نلحك وين نسيطر هوَ فتح الملزمة يگلب بيها ورجع رفع راسه وگال
-- وهاي الرسوم كلهن حفظ راح اجيب واحد منهن وخلي بالكم عليه خمس درجات يعني 30 درجة صارن
فتحت انا الملزمه باوعت للرسوم يمه شنو هاي وين اضبطهن كلهن بنفس اليوم وعدنا بعد تحضيرات غير المادة مالته رفعت راسي عليه و گتله أستاذ
ما سمعني صايرة هوسة كل واحد يهوس بصفحة رجعت گلت أستاذ نفس الشي ما يسمعني وداير وجهه على الباقين گامله يوسف الممثل ويگول
-- أستاذ الرسوم صعبة والله عاد حددلنا
-- ماكو تحديد الكل داخل
ورود :- أستاذ قبل شوية گلت النهاية الاسبوع استلم البحوث ليش هسه غيرت
-- ماكو بعد باچر كل الحچيته ناخذه
رجعت انا گتله أستاذ دار وجهه مني ما جنه يسمعني سكتت ما حچيت شي بس اعتقد جاي يسمعني ويغلس لان ما معقولة بسمع اخر واحد وانا بصفة ما يسمعني يسمع ورود الگاعدة بصفي وانا ما يسمعني مستحيل
لحد ما نهى الموضوع وگال باچر كل الطلبات اريدها وانتوا احرار تقرون تحصلون درجة ما تقرون ترسبون بالمادة
طبگ الملزمة وراد يطلع صار كلش قريب مني لان انا بجهه الباب گاعدة گتله أستاذ بسرعة باوع عليه وطلع هم غلس ما رد احس فد فشلت فشله هسه ليش ما يخليني احجي شو بس بوكت الشرح يجي يركض عليه گومي يُـمن شرحي
شلت جنطتي وملزمتي وطلعت لگيته بعده واگف بالممر والطلاب ملتمين عليه ما يخلونا يروح وهوَ ثابت على موقفة ما يهتز ورود راحت يمهم وانا تعديتهم و مشيت والله ولا اروحله شنو اتوسل بيه اقرأ العليه والله يسهل قابل شبيدي
نزلت الدرج وطلعت بوجهي للكافتريا اريد مي احس ريگي نشف من الفشلة ومن الهبطه مال الامتحان
بعدني واگفه يم الكاشير و اجى وگف بصفي بـ ايده عصير رمان حطه گبالي درت وجهي متفاجأة بيه ضحك و گال
-- ترى أسمعج من كل شوية وگلتلي أستاذ
-- چا ليش ما ترد
-- إذا رديت راح تگولين أستاذ قلل من المادة او أجلها الغير يوم وبهاي الحاله اني ما اگدر ارفضلج طلب و هنا الطلاب راح ياخذونا غيبتنا فـ الاحسن اسكت وما اگول ها يُـمن شتردين
أبتسمت ودريت
-- بس صدگ صعب الأمتحان والله ما نلحگ كلهن نقرأهن باجر وبنفس الوقت عدنا غير مواد يعني مو بس مادتك
-- ادري صعب وهذا عقاب الكم
-- لا أستاذ والله صعب ما نلحگ نهار شتاء يركض ركض
-- عدكم مجان تلحگون واللي يريد النجاح لازم يتعب نفسه شوية
-- لا والله هذا موت مو تعب
-- إذا نفس الموت التقصدة يُـمن سلطان فـ موتوا ماعندي مشكلة
-- يعني انا هم اموت حالي من حال يُـمن سلطان حرام عليك أستاذ شلون ينطيك گلبك
ضحك ورد
-- اسم الله عليج
يتبع........
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق