رواية عــروس الجبـــايــش الفصل التاسع والثلاثون 39بــقلم يـــاســـة الموسوي
رواية عــروس الجبـــايــش الفصل التاسع والثلاثون 39بــقلم يـــاســـة الموسوي
#عــروس_الچبـــايــش 🌼39
#بــقلم_يـــاســـة
#الحلقة (39)
إِنِّي أَرَاكِ سَلَاماً، وَكُلُّ مَا يَصِلُ إِلَيْكِ مِنِّي لَيْسَ سِوَى صَرْخَةِ رُوحٍ مَحْبُوسَةٍ. قَدْ حَمَلْتُ عِبْءَ هَذَا الْحُبِّ الْمُسْتَحِيلِ، وَتَحَدَّيْتُ كُلَّ الْقَوَاعِدِ فِي خَفَائِي، لَكِنَّنِي أُدْرِكُ أَنَّ لِلْوُجُودِ شِرْعَةً أَعْلَى مِنْ شِرْعَةِ الْقَلْبِ: وَهِيَ سَلَامُكِ.
فَإِنْ كَانَ قُرْبِي يُرْهِقُكِ وَيُسِيءُ الظَّنَّ بِكِ، وَإِنْ كَانَ ابْتِعَادِي هُوَ الْوَعْدُ الْوَحِيدُ بِأَمْنِكِ، فَاعْلَمِي أَنَّنِي سَأُحَوِّلُ الْبُعْدَ إِلَى مَوَاثِيقِ عِشْقٍ. لَنْ أَتَقَرَّبَ، لَنْ أُزْعِجَ الْهُدُوءَ فِي إِحْدَاثِيَّاتِ حَيَاتِكِ. سَأَظَلُّ النُّورَ الْخَفِيَّ الَّذِي يُشَاهِدُكِ مِنْ بَعِيدٍ، يُصَلِّي لِسَعَادَتِكِ كُلَّ يَوْم، مُعْتَبِراً صَمْتِي هُوَ الْهَدِيَّةَ الْأَثْمَنَ لِرَاحَةِ قَلْبِكِ. فَالْقُرْبُ الَّذِي يَجْلِبُ الشَّقَاءَ، لَيْسَ قُرْباً، وَالبُعْدُ الَّذِي يَحْمِي الْغَالِي، هُوَ الْحُبُّ كُلُّهُ."
..................................
يُـمن :-شنو قصدك و ليش اخذته ما فهمت
سكت ثواني وراها گال
بُـرهـان :- گعدي نحچي
رجعت گعدت بس گلبي يدگ سريع وإحس اكو غلط بالموضوع و هوَ يباوعلي وشكله توتر و مرتبك وراها تقدم للمكتب اكثر انوب رجع بالكرسي وحاير شـيسوي انوب گال
بُـرهـان :- تذكرين من حچيت وياج قبل على خوالي وگتلج عدهم الانا وشوفه الحال
-- اي
-- مع الأسف إني وراث منهم شوية من هذا الطبع وكلش كارها و ضايج منه لان لو ما هذا الطبع جان إني اليوم متزوج ومخلف و أطفالي بطولي تدرين ابد ما أهتم للمشاعر ولا افكر بالارتباط و ما يعجبني العجب والهذا السبب باقي بدون زواج وبدون ارتباط صح مرت عليه هواي بنات بس ابد ما اشوف نفسي بيهن ولا اميل الهن ولا هزني وحركن مشاعري لان إحسهن ما يؤالمن فكري وعقلي و حتى مستواي
حچى هيج وسكت وراها شلبك ادية وحده بوحده و نزل راسه شي قليل وانوب رفع راسه و كمل كلامه
-- اعرف صعب عليج الموضوع وممكن ما راح تتقبلينه بس خليني احچي و اخلص من الهم اللي شايلة خليني اخلص من القلق والتفكير الاني بيه يُـمن يشهد الله عليه ما جنت مفكر بيج بسوء ولا مباوعلج بغلط ولاعندي اي شي اتجاهج ساعدتج اي صح بس هذا الشي جان واجب عليه أمام الله وگفت وياج اي صح بس هذا بدافع إنساني صح خسرت اقرب صديق الي وصار كم سنه الوضع بين الاقارب خربان بسبب شهادتي بس كل هذا سويته لان شفتج يتميه مظلومة لا حول ولا قوة گدامي وتحتاجين المساعدة
رجع رفع راسه باوع للسكف و مسح على وجهه سريع بـ اثنين اديه و گال
-- رحتي و اطلگتي وشفتي حياتج واني اصلاً انشغلت بحياتي و بدراستي و كل الموضوع ما مار ولا خاطر على بالي وراها انخطبتي وشفتي حياتج من جديد صح سمعت بيج مخطوبة بس ابد ما همني الموضوع لان هذا الشي ما الي دخل بيه لحد ما رجعت شفتج هنا بالجامعة و صرت اتعرف عليج اكثر واسمعلج اكثر واشوفج يوم وره يوم وراها صارت السالفه مالت يُـمن سلطان من وصلتج وانوب تهديد منـاف تگدرين تگولين منا و كل وضعي اختلف وكل نضرتي تغيرت وصرت اشوف روحي بيج وإحس الاقرب العقلي وفكري هدوئج هدوئي نزاكتج أميل الها وإحس بيها صوتج تصرفاتج كلها اخذ حيز كبير من تفكيري
انصدمت من كلامه ورديت.. اكيد..
رفع ايده ما خلاني اكمل كلامي ورجع گال
-- اترجاج سمعيتي للأخير وراها احچي اللي بخاطرج
سكت ويباوعلي و عيونه صارت بيها لمحه مث الواحد مدمع يريد يبچي وراها گال
-- يمكن بكلامهم زرعوا الفكرة بالي
و نبهوني على شي ما جنت منتبه عليه
لو يبقى عليه مستحيل افكر بيه بيوم من الآيام شوفي يُـمن إني ما اكلج نبي ومعصوم ولا اريد ابرر موقفي لا بالله بس والله العظيم إني ما جنت اشوفج غير يُـمن طليقة رائـف لا اكثر ولا اقل لحد ما صارت الاحداث الأخيرة وحده وره وحده
وراها صرت اركز بيج واهتم بـ ادق تفاصيلج گمت اراقب تحركاتج لبسج كلامج لحد ما انتبهت على روحي شلون إني غركان بيج والله مو سهل عليه الموضوع وجنت ساكت و دايس على نفسي لان ادري صعب ومستحيل تتقبلينه هم انتِ وهم الناس بس مو بـ ايدي والله وهسه انجبرت احچي انجبرت اعترف لان الوضع يوم بعد يوم جاي يسوء وصار لازم اعترف بيه و اخليج بالصورة
حچى هيج و يباوع عليه وانا على طول ما جان يحچي جنت مصدومة وگلبي يدگ ومن كمل كلامة وباوعلي گمت و گفت وگفه و رديت عليه بصوت يرجف مهبوطه من اللي سمعته و گتله
-- شگد صلف وبلا غيره وشرف
نزل راسه بدون ما يرد عليه وانا افتريت
و طلعت من الغرفة سريع واحس عيوني گامت تطلع شرار تخبل هذا مستحيل اصدگ شلون يحچي هيج حچي وياي اكيد تخبل اكيد مو صاحي
نزلت الدرج وعقلي يسولف وگلبي يسولف لحد ما وصلت الاخر باية عثرت بيها بس ما طحت لزمت المحجر ضليت لازمه المحجر ومصدمه ما مستوعبه
وراها كملت طريقي وطلعت من الجامعة كلها حتى عباس ما خابرته عبرت الشارع ناسية روحي وين يلا حسيت وانتبهت
ومن شفت روحي طالعة برى كلش وما عندي استعداد ارجع للجامعة من جديد إحس منهارة على الأخير
خطيت اول خطوة وتجرأت ودست على الخوفه وأجرت تكسي و رجعت للبيت وحدي و طول الطريق صافنه ما اگدر استوعب الصدمة
الحقير يحچيها بوجهي شلون جرائه شلون امكانية لا مستحيل معقوله هيج ما يستحي و لا يفكر بالعواقب لا يخاف چا شگد صلف
وصلت للبيت امي ماكو بالصالون مدري بيت عمي مدري وين رايحة همزين عندي نسخه من المفتاح فتحت الباب وطبيت
بدلت وگعدت وإحس الصدمة كلش جبيرة عليه ما اگدر استوعبها ولا اتخيلها بيوم من الايام
شلون اكمل باقي السنه شلون اتقبلك شلون اگدر اباوع بوجهك من جديد شلون هيج تخبلت لو انتَ مخبل من زمان وانا
ما ادري بيك ليش هيج ليش
بقيت بغرفتي لحد ما اجت امي وابد ما حچيت ولا فتحت الموضوع وياها واصلاً اجت تحچيلي على ولاء خطيبها مخابرها فجأة ومحدد موعد العرس نهاية الشهر
وهسه حايرات لا مشتريت لا مجهزات
بقيت بس گاعدة واهز بـراسي انا وين وامي وين تحچي
لحد ما خلص اليوم وتعبت بيه بشكل مو طبيعي وثاني يوم صبحت مصخنه وحلگي مورم و لطمه حمه صايرة بشفتي الفوگ
واللساني مطگگ يمكن من القهره مدري من الصدمة
امي بس شافت حالتي تخبلت ركضت للصيدلية حچت للدكتور الصيدلاني الوضع
انطاها علاج كامل جابته واجت وكلتني
بـ ايدها و شربت العلاج و ما جنت احچي شي بس ابچي
ما جنت ابچي من مرض لا ابچي على حظي ابچي مقهورة على روحي شلون إذا امي سمعت شلون إذا الناس سمعت منو يرحمني منو يعتبر الموضوع عادي
راح اطلع كافرة و مرتده على الدين والمجتمع راح اطلع منحطه سافله كل اللي يخطر على بالهم راح يحچونه عليه
حتى لو حلال والله محلله ومشرع بيه راح يحرمونه عليه وراح يحملوني ذنب مو ذنبي
شلون هيج يفكر نسى هوَ بيا مجتمع عايش نسى بيا بيئة بيا عالم هوَ الاخ إذا مات
و الاخ اخذ مرته محد يرحمه وكلها تحچي عليه و اطلعه غلطان و جرئي و ما يستحي
مو عاد هسه انتَ وابن خالتك عايش
خلصتها يومين كاملات انا نايمة بالفراش وبس ابچي وامي فوگ راسي ما عايفتني
تسوي كمادات و توكلني وتنطيني علاج الوكت بوكته
باليوم الثالث صادف أربعاء والدنيا مغرب
جنت متمدده بالفراش و جسمي كله يوجعني وكارها روحي والعالم كله اجتني رساله من عنده فتحت وقريتها كاتب بيها
بُـرهـان :- إني اسف واعتذر حقج عليه غلطت بالكلام وياج و متندم ومتأسف وبعد ما تنعاد ابد انسي الموضوع وحسبي ما صار وارجعي الدوامج لا تضيعين مستقبلج بسببي
ما جاوبته ولا رديت ثواني واجت رساله ثاني كاتب بيها
-- يُـمن إني مو كامل ولا معصوم عن الغلط إني إنسان حالي من حال الناس
و مرات تحكمني عواطفي ومشاعري واتصرف تصرفات ما مقبلوله حسبيها عليه بعد ما تنعاد
نفس الشي ما ارد بس اقرأ وره ساعة اجتني رساله جديدة كاتب بيها
-- صح صعبه وتفاجأتي وانصدمتي بس لازم تعرفين هذا الشي مو غلط ولا عيب ولا حرام ما دام بشرع الله والله قابل بيه ومحلله ابد مو غلط ولا عيب ولا حرام گتلج حقج عليه وما تنعاد بعد بس إني ابد ما غلطت بحقج ولا افكر اغلط بحقج بيوم من الايام
بعدني اقرأ رجعت اجتني رساله جديدة كاتب بيها
-- يمكن وقت الاعتراف غلط و طريقة الاعتراف غلط بس الموضوع مو غلط والله مو غلط وكل اللي صار خارج عن أرادتي
يُـمن موقفي اصعب من موقفج بس مستعد اتحمل كل النتائج
قريت الرساله الاخير وإحس فد مره اختنگت و اگول بيني وبين روحي
-- لا ومصر و ماخذ الموضوع بصورة طبيعية ولا عبالك مسوي شي
رجع دز
-- يُـمن اعتذر بعد ما تنعاد وابد ما ينفتح الموضوع وياج لا تضوجين مني ولا تتحسسين حسبيني ما حچيت ولا فتح الموضوع وياج انسي لا تفكرين ولا تزعلين
نفس الشي ما ارد و طفيت النقال وميته من القهر على روحي وراها غمضت عيوني تعبانه هم من القهر والهم من المرض لحد ما غفيت
والخميس هم ما رحت وانوب جمعه وسبت و راها بالاحد صحتي صارت احسن وامي وگفت عليه الا اروح تريدني اطلع واتحرك لان الصخونه ما دام نايمة ما تفكني
وبالاصل مجبورة اروح الواجبات تراكمت عليه والغياب مو بـصالحي ولازم اروح لان هذا مستقبلي
بيومها لبست اسود من فوك ليجوة حتى الجنطه و ابد ما اهتميت المظهري ولا رتبت روحي واليشوفني عباله جنت بفاتحة منا الاسود و البهذله الانا بيها ومنا المرض وشكلي الصاير خزي
مشيت للدوام ومنو يشوفني من طلاب قاعتي يجي يسألني سلامات خو ماكو شي
لان مسودة تسود وقبلها غايبة أسبوع عبالهم عندي فاتحة ارد الهم ماكو سلامتكم
خلصا اول ما محاضرتين وراها طلعت ارتاحيت و ورود گاعدة يمي وكل شوية
وگالت اكو شي شكلج مو خالي وانا ارد لا ماكو
وراها صار وكت المحاضرة الثالثه وهنا صار الوكت الي اشوفه ويشوفني لان هاي المادة مادته ومجبورة ابقى گاعدة واكمل باقي الدوام وباقي دراستي
گعدت بمكاني وفد مره ضايجة وكارها روحي هوَ طب واول ما حط رجله بالقاعة عيونه صارت على مكاني وراها فات وسلم على الكل ورجعوا كلهم ردوا عليه السلام
نزل جنطته على المكتب و دار علينا
و بدأ يشرح عن الموضوع بس جان فد مره تعبان وما يگدر يكمل الشرح كل شوية يخطأ ويرجع يعيد وصوته حيل تعبان وعبالك بيه خنگه ورجفه اخر شي گعد على المكتب و سند روحه وگال
-- يا شباب يصير اليوم نترك المحاضرة
لان اني فد مره تعبان وما اگدر اشرح شي جديد
ردوا عليه على راحتك أستاذ و عادي ماكو مشكله المهم سلامتك بقى گاعد بمكانه وساند روحه على الكرسي انوب سحب نقاله وگعد يكتب بيه
ثواني واجتني رساله على نقالي طلعته من الجنطه لگيته هوَ دازلي
-- ليش هيج متغيرة وذبلانه ليش هذا السواد
ما جاوبت شي ولا رفعت راسي رجع دزلي
-- معقوله إني اللي وصلتج الهذا الحزن بس والله إني ما اريد زعلج كل اللي اريده ازرعلج ورد بمل طريقج واللون حياتج يُـمن إني اريد اطلعج من دائرة الاسود والابيض والله العظيم ما ناوي على أذيتج
و كل اللي افكر بيه اسعدج و اعوضج وابنيلج حياة جديدة ما جنت ادري
بـ اعترافي هيج يصير بحالج اعتذر للمره الالف
شلت نقالي ضميته بالجنطه و گمت من مكاني بسرعة باوع عليه بتوتر رجعت انا گتله
-- إذا ما راح تشرح شي جديد اگدر اطلع
ما جاوبني سكت افتريت انا وطلعت من القاعة و وراي مبأشرتاً طلعوا باقي الطلاب
نزلت گعدت وحدي مخنوگه كلش مخنوگه اجت ورود گعدت بصفي وگالت
-- شبيج يُـمن ليش إحس اكو شي موزين صاير وياج احچيلي من شنو ضايجة ومقهورة
-- كلش تعبانه
حچيتها وبچيت رجعت گالت
-- لااا ليش تبچين
-- ما اگدر اتحمل بعد إحس الدنيا متقصدة تكسرني متقصدة على أذيتي تعبت
-- احچيلي شكو
-- بيوم السفرة من رحنا هديل ما مخليه سالفه صارت هناك ما ناقلتها المناف تخيلي حتى على مخابرة أستاذ بُـرهان حاچيتله وهذا الأسبوع لگيته جاي ويحچي ويا أخت بُـرهان يحاول يكسره بيها ومن رحت حتى أحذر بُـرهان هذا الثاني طلع صفح وصدمني صدمة عمري
-- شگال
-- گال شغله مستحيل افكر بيها بيوم من الايام ومستحيل اتقبلها
-- شگال شنو الموضوع خوفتيني
-- مناف صار اكثر من مره يهدد بُـرهان عباله عندي شي وياه وبُـرهان يگلي اول تهديد ما جنت مفكر بيج ولا شايفج بس هوَ زرع الموضوع بعقلي ومن هذاك اليوم الهذا اليوم اني ما اشوف غيرج
-- عززاااا يعني يحبچ
-- اي
-- تفاجأت والله
-- اللي مخبلني شلون تجرأ واعترف هيج اعتراف
-- وليش ما يتجرأ شنو الغلط بالموضوع
-- نسيتي يصير أبن خاله رائـف
-- وشنو يعني وإذا أبن خاله رائف قابل رائف ماخذج احتكار قسمة انجبرتوا عليها اثنينكم و انتهت من سنين طويله يعني اكل وشرب عليها الزمان و مدام بشرع الله بعد وين المشكلة
-- ما اگدر واصلاً شلون مناف و امي والناس والمجمتع لااا مستحيل
-- منـاف إنسان مر بحياتج وما صارت بينكم قسمة و راح الحال سبيله ومستحيل تنجمعون بيوم من الايام اما امج فـ صدگي إذا شافت مصلحتج ويا بُـرهان راح توافق و تكيف اصلاً والمجتمع هذا ما راح يرضا عليج لو تاخذين نبي مرسل فـ لا تفكرين بـ احد ولا تشيل هم احد غير نفسج شوفي نفسج وين وتبعيها اما الباقين خليهم حافز تاخذين منهم اللي يناسبج لا اكثر ولا اقل
-- لا مستحيل ما اگدر اتقبله شلون ورود اله تخبلت إحس كارها روحي والله
-- لا تخبلتي ولا تخبلنا بعيداً كلش حلو الله احب هيج علاقات صعبة وبيها مخاطر تحسين بقيمة نفسج يبووو شلون حلوو واحد يتحدى الاهل والمجمتع الله يُـمن هيج إنسان كامل من كل شي ومستعد يتخلى عن الكل ويتحدى الكل ترى نادر والله نادر بهذا الزمان بشرفج قبلي بيه يجنن أستاذ بُرهان
باوعت عليها وابتسمت أنا وين وهيَ وين رجعت هيَ ضحكت وگالت
-- الطيبون للطيبات تدرين بُـرهان يشبهج يشبة طبعج هدوئج نزاكتج كلش احس لايگين البعض
ما جاوبتها بقيت ساكته رجعت ابتسمت وگالت
-- بس شوفي طاحت رجليه المسكين صار ساعة واگف هاي الوگفة ويباوع عليج وشكله كلش خايف عليج ومنج
درت وجهي شفته واگف من بعيد ومنتجي على الدنگه ومجتف اديه الصدرة و يباوع عليه بس من بعيد تشوف التعب واضح عليه
رجعت درت وجهي من عنده سريع و ورود گاعدة گبالي و تباوع عليه وترجع تباوع عليه لحد ما مل وراح اول ما راح گالت راح
يُـمن :- هسه انا شأسوي شلون اخليه يعوفني و انا يوميه اشوفه واگعد يمه واسمع منع ويسمع مني
-- ليش يعوفج يُـمن انتِ تعبتي بما في الكفاية وين ما تشمرينها حظج يطلع زفت ليش هسه تحچين هذا الحجي ترى بعدج بعز شبابج والف من يتمناج ليش هذا التشائم و الخوف والقهر
-- يعني من كل عقلج اتزوج واحب وانحب من جديد
-- و ليش حرام لو عيب زين اسألج سؤال بشرفج رائـف هم حاسبتة زواج مثل البشر اشو انجبرتي بيه وانجبر بيج و اتعس ايام عمرج عشتيهن وياه ومنـاف خطبج وطلع اصعب من رائـف بالف مره وما كملت الخطبة وانتهت بينكم قابل شنو انتهت الدنيا وياهم وبعد لازم تبطلين من هذا التفكير لان هذا مو منطق ولا تنسين انتِ ما عندج بهاي الدنيا غير امج والدنيا صعبة ومحد ضامنها إذا صار شي لا سامح الله عليها منو الج شلون تعيشين برأيج عمامج يعوفونج ويا هاشم و ولده مستحيل يعوفونج واصلاً يزوجونج من الصبح زواج اتعس من رائف وتبقين تترحمين على رائف وضيم رائف
-- مستحيل ما اگدر حتى اتخايل يصير بيني وبين بُـرهان شي مستحيل
-- ماكو شي مستحيل ما دام الولد يحبچ وهاويج ومستعد يكسر العادات والتقاليد ويحارب مجتمع كامل الخاطرج وين المستحيل وين الغلط هيج إنسان ما يطلع بحياة كل مرآة والله العظيم
-- لا ما اگدر
-- زين جربي تنطينه فرصه تتعرفين عليه تشوفينه من غير ناحيه وغير منظرو جوز يطلع فارس احلامج و عوضج المنتظر
-- لا ما اريد عوفيني من الزواج والرجال العمر ما مربوط برجال
-- صح ما مربوط برجال إذا جان عندج اخ او اب او عم تستندين عليهم وتميلين على كتفهم بس مربوط برجال إذا وحده مثل حالتج لا اب ولا اخ والعم مجرم كافر والام مره وحيده لا عدها اخ ولا اب يعني انتِ وامج ما تگدر على الدنيا وحدجن تحتاجن رجال بحياتج لان الدنيا صعبة والقوي بيها ياكل الضعيف
سكتت ما رديت بس الموضوع ما داخل بعقلي و ابد ما اگدر افكر بيه ولا احاول يخطر على بالي رجعت گالت
-- انطي النفسج فرصة و خلي تفكيرج اوسع من هيج صدگيني راح تشوفين الموضوع كلش طبيعي
نفس الشي ما ارد وراها گمنا طبينا محاضرة جديدة ومن خلصنا الدوام طلعت بوجهي للبيت
وخلصتها بس ساكته وعقلي احسه تعبان ما يگدر يتسقبل ويفكر وراها فتت للفيس
اگلب اريد بس شي اتسله بيه وارتاح من الهم هذا الطلع لي صفح
انوب لزمت الملزمة و بديت اقرأ لحد ما خلصت واجباتي كلها وقبل لا انام هم رجعت للنقال اگلب بيه لگيت جايتني رساله من عنده كاتب بيها
-- من أسراري العظيمة التي اخاف أن ابوح بها أمام الحاسدين المترقبين هيَ حبي لكِ يا سيدتي حبكِ كأن عقاباً يهدد قلبي كل يوم فـ أنتِ الوعد الذي لم يتحقق و الوطن الذي لا استطيع دخوله لقد أحببتك بقدر استحالت أمتلاكك حبيبتي الجميلة ها انا اليوم أعترف بـأنكِ أقرب الناس الى روحي وابعدهم عن يـدي فـ أنتِ قصيدة كتبت بلغة لا يفهمها الإ قلبـي ولا يسمح لي القدر بنطقها ولكـن مع ذلك أنـا مصر على
نيل رضاك و الفوز بقلبك الأبيض الجميل
أنـا مصر على نيـل تلك المشاعر المرهفة الحساسة و سأبقى أنتظر و أسعى حتى أصل وانألك و احتضنك بين ممتلگاتي
#يتبع..........
تكملة الرواية من هناااااااا
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق