سكريبت إطلعي يا حنين كامله
سكريبت إطلعي يا حنين كامله
_ إطلعي يا حنين
= مش طالعة
_ بقولك اطلعي
= وأنا بقولك مش طالعة
_ مش هتطلعي بمزاجك يعني!
= ما انت مالكش أمان وغدار
_ ده أقل واجب قصاد اللي بتعمليه
= أنا مبعلمش حاجه على فكرة
_ انا اللي قليل الأدب وبعمل
= نص الرجوع عن الغلط الإعتراف بيه على فكرة
_ اطلعيلي بقولك بدل ما ادغدغ الباب ده فوق دماغك
= في ايه يا يوسف؟!.. ماكنش حتت تيشيرت حرقتهولك يعني
_ ده التيشيرت اللي بحبه يا قادرة
= ما انا قولتلك إني مبعرفش أكوي وانت عامللي فيها سي السيد يوه
_ يوه!
= خلاص بقا بالله عليك خليني أطلع.. العيال جايين وشكلي هيبقى وحش
_ انتِ اللي عملتِ كده في نفسك
= هديك تعويض
_ مليش في العَوض
= طب ولو لمون بالنعناع!
_ أفكر
= وجمبه حبت كوكيز
_ عرض مُغري بصراحة
= ووافقت!
_ لا
= يوه بقا
_ كان زمانك خدتي العلقة والحوار خلص
= يرضيك أتأوّه من الألم!
_ تـ إيه يعنيا!
= أتأوّه من الألم بقولك
_ لا مش هخليك تحسي بألم
= ده ازاي علقة بدون ألم!
_ إطلعي بس وهنكتشف سوا
= ما خلاص بقا طلعت عيني ياللي منك لله
_ زوّدي في حسابك زوّدي
= يارب يجيلك مشوار مفاجئ
_ لا.. مهو..
وقبل ما يكمل كلامه كان تليفونه رن..
= بت يا حنين
_ عايز إيه!
= سر السرعة يا فنانة
_ غلبانة وربك مبيحبش الظلم
= طب ما تدعيلي اتجوزها يا بركة
_ وهتسيبني بدون خدش!
= بدون خدش
_ يارب تتجوز البنت أمينة يارب
= خلاص كده الدار أمان
_ أطلع يعني!
= آطلعي مش هعمل حاجه
_ متأكد!
= أنا عمري قولتلك حاجه ومعملتهاش!
_ انت عمرك ما قولتلي حاجه وعملتها يا يوسف فوق
= احم احم.. إيه الإحراج ده؟
_ خلاص بقا امشي.. العيال شوية وهلاقيهم فوق دماغي
= بيطلعوا عليكِ ذنوبك
_ دي حقيقة
وبالفعل أخيرًا مشي.. ودي معجزة من عند الله بجد..
المهم بقا طلعت لقيت الولاد بيوصلوا واحد ورا التاني..
منك لله يا يوسف معرفتش آكل ورك الفرخة اللي مخبياه.. يوووه بقا عليا..
ودخل عليا سليم وأخته سلسبيل..
توأم إنما إيه.. اللهم بارك كتاكيت كدهوون
_ السلام عليكم ورحمة الله وبركاته
= وعليكم السلام ورحمة الله وبركاته
_ عاملة إيه يا مس؟
= الحمدلله يا عيونها.. انتم عاملين إيه!
_ الحمدلله بخير
= حافظين ولا هنفرج الناس علينا؟
_ لا طبعًا
اتنهدت براحة:
_ الحمدلله
= هنفرج الناس علينا
وقعدنا نضحك كلنا.. بحبهم أوي، بحس إن في إيدي إني أكوّن شخصية صالحة وإني أساعدها إنها تتخطى مصاعب الحياة حتى لو كانوا أطفال..
المهم بقا.. خلصنا تسميع ودخلنا للفقرة المحببة لينا..
قصة نبي..
بذاكر القصة قبل ما ييجوا وبحكيها ليهم فبالتالي أنا وهم بنعرفها سوا..
_ يلا بقا.. هنحكي قصة سيدنا صالح انهاردة يا ولاد..
= بتاع معجزة الناقة صح؟
_ أيوه صح.. يلا نبدأ!
= يلا بينااا..
_بصـوا مبدئيًـا كـده صلـوا عالنبـي ﷺ.
= اللهـم صـل وسلـم وبـارك علـى سيـدنا محمـد
_قـوم سيـدنا صـالح عليه السلام كـان اسمهـم قـوم "ثمود" اللـي بعـد قـوم عـاد..
كانـوا عايشيـن فـي منطقـة مـا بيـن بـلاد الحجـاز وبـلاد الشـام واسمـها "الحجْـر"...
ربنـا أنعـم علـى القبيلـة دي بنعـم كتيـرة..
(كانـوا بينحتـوا بيـوت ليهـم فـي قمـم الجبـال عشـان تحميهـم مـن المطـر، وفـي الصيـف كانـوا بيبنـوا قصـور عشـان يتمتعـوا بالهـوا الحلـو والمنـاظر.
النعـم دي تعـددت مـن..
مايـة عذبـة،..
جنايـن فيـها كـل أنـواع الثمـار،..
رزق طيـب ووفيـر..
لكـن مـع كـل ده كانـوا برضـو كفـار وبيعبـدوا الأصنـام...
ومكتفـوش بكـده بـس..
لا ده كمـان كانـوا بيقتـلوا النـاس بـدون وجـه حـق، ونهـب أمـوال، ونشـر الفسـاد فـي الأرض..
ربنـا اصطفـى راجـل منهـم طيـب الخُلـق، حسـن السيـرة، مشهـور بينهـم بحكمتـه ورجاحـة عقلـه، وكانـوا عارفينـه كويـس وهـو سيـدنا "صالـح عليـه السـلام"..
قعـد يدعـي قومـه لعبـادة الله وحـده، وإن عبـادة الأصنـام دي لا بتنفـع ولا بتضـر، ويحذرهـم مـن الشيطـان ولكـن كالعـادة كانـوا بيتهمـوه بالجنـون والسحـر..
فانقسمـوا لفريقيـن..
1/الفقـراء والمساكيـن ءامنـوا بيـه وصدقـوه
2/ والأغنيـاء كفـروا بيـه وكدبـوه، مـش بـس كـده لا ده اتهمـوه بالجنـون وإن هـو والقـوم بتاعـه كانوا سبـب النحـس والشـؤم اللـي هـم فيـه..
اجتمـع الكفـار فـي النـادي بتاعهـم عشـان يطلبـوا مـن سيـدنا صالـح برهـان علـى النبـوة، وقـرروا يطلبـوا منـه طلـب مستحيـل عشـان ميقـدرش ينفـذه وكـل ده يخلـص...
فالكفـار شـاوروا علـى صخـرة فـي الجبـل وطلبـوا منـه إنـه يخـرج منهـا ناقـة عظيمـة، وقعـدو يقولـوا المواصفـات اللـي هـم عايزينـها فيهـا..
فقـال لهـم: هتؤمنـوا لـو المعجـزة دي حصلـت؟
فقالـوا: أيـوه هنؤمـن كلـنا
فسيدنـا صالـح قـام صلـى ودعـا ربنـا وهـو واثـق وعلـى يقيـن مـن يسـر تحقيقـها عليـه سبحـانه وتعـالى...
فحقـق ربنـا المعجـزة فعـلًا والناقـة خرجـت مـن الصخـرة، فإيـه اللـي حصـل؟
فـي مجموعـة كبيـرة آمنـت ومجموعـة لا...
بـس سيدنـا صالـح اشتـرط عليـهم إن محـدش يإذيـها وإنـها هتشـرب الميـاه كلهـا فـي يـوم وهـم هيشربـوا فـي اليـوم اللـي بعـده..
وفـي اليـوم اللـي هـي كانـت بتشـرب فيـه المايـه كلهـا كانـوا بيحلبـوها واللبـن يكفيهـم كلهـم..
استمـر الحـال ده لفتـرة طويـلة، وكـل يـوم اللـي بيؤمنـوا يزيـدوا عشـان ده أصـلًا دليـل علـى وجـود ربنـا ﷻ
اجتمـع بقـا كفـار ثمـود بليـل لإنهـم مكانـش عاجبهـم الحـال، واختـاروا 9 أقويـاء منهـم واتفقـوا إنهـم يقتلـ..ـوا الناقـة دي ويرتاحـوا منـها، بالرغـم مـن إن سيـدنا صالـح عليـه السـلام حذرهـم مـن إن حـد يمسـها بسـوء، وإن لـو ده حصـل هيحـل عليهـم عـذاب أليـم مـن ربـنا...
طلعـوا القـوم دول بقيـادة أشقـى واحـد فيـهم كـان قـوي وعزيـز واسمـه كـان "قِـدار بـن سالـف"، واستنـوا مـرور الناقـة، دي فواحـد رماها بسهـم في رجليـها فوقعـت، فـراح الراجـل ده بالسيـف بتاعـه والباقـي ساعـدوه وبالفعـل قتلـ..ـوا الناقـة..
فـسيدنا صالـح قالـهم إن هيحـل عليهم عـذاب أليـم فـي خـلال 3 أيـام..
فـي نـاس ندمـت إنهـم ساعـدوا فـي قتـ..ـلـها وفـي نـاس بقـا سخـرت مـن الموضـوع ده كعادتهـم..
فـي اليـوم الأول: كـان فـي خـوف شديـد وهلـع
والتـاني: زاد فيـه الخـوف الشديـد
التالـت: وشوشهـم اسـودّت
وفـي اليـوم الرابـع الصبـح بعـد انتهاء المهلـة، فضلـوا قاعديـن مستنييـن مصيرهـم...
فجاتلهـم صاعقـة مـن قوفيهـم،ورجفـة مـن تحـت أرجلهـم، فبقـول جثـث هامـدة..
بعـد مـا الكافريـن هلكـوا، رجـع سيـدنا صالـح عليـه السـلام واللـي ءامنـوا معـاه قريِتـهم، فلمـا لقـوا العـذاب ده اللـي حـل بالكفـار سيدنـا صالـح قالهـم: يَا قَوْمِ لَقَدْ أَبْلَغْتُكُمْ رِسَالَةَ رَبِّي وَنَصَحْتُ لَكُمْ وَلَٰكِن لَّا تُحِبُّونَ النَّاصِحِينَ..
بعديـن خـد المؤمنيـن وارتحلـوا لمكـان تانـي، ويـقال إن سيدنـا صالـح عليـه السـلام ارتحـل بيهـم "للحـرم"، قعـدوا يعبـدوا ربنـا فيـه لحـد مـا مـات سيـدنا صالـح عليـه السـلام..
وبس كده يا حبايبي
_ أنا كتبتها وراكِ يا مس عشان أروح أحكيها ليونس وماما
= حبيبت عيني يا بيلا منحرمش
وبس خلصت الحلقة مشيوا..
جيت بقا قررت من حيث لا أدري جه على بالي آكل كريب..
هتقولولي طب وورك الفرخة..
هقولكم هيجيله وقته..
نزلت لمطعم لسه فاتح جديد جنبنا..
طلبت الأوردر وقاعدة مستنية..
فلما روحت عشان أستلمه لقيت واحد جه بيزعق من ورايا..
_ لو سمحت انا جيت الأول...
= أوردر حضرتك بيخلص يا فندم
_ والله!.. يعني الاوردر بتاعي أنا اللي مخلصش وهي اول ما جت كده أوردرها خلص
مقدرتش اسكت من طريقتة اللي مفيهاش ريحة الادب دي..
_ هو حضرتك بتتكلم كده ليه!
= انا موجهتلكيش كلام
_ ده على اساس إنك بتتكلم عن حد غيري مثلًا!
= حضرتك انا بتكلم عالمبدا نفسه
_ يبقى بأدب
= نعم!
_ اللي سمعته
= انتِ هتعلميني الأدب ولا إيه!!
_ لو في مقدرتي إيه اللي يمنع
بتاع المحل كان بيحاول يهدي الدنيا:
= خلاص يا فندم حصل خير
راح رد عليه بعصبية أكتر:
_ لا معلش محصلش خير
مديتوش أي اهتمام وكلمت بتاع الأوردر:
= ممكن الأوردر لو سمحت
_ اتفضلي يا فندم
= تسلم
وسيبته ومشيت وحاسه إني شامة ريحة شياط خارجة منه..
روحت قعدت عند الكورنيش آكل.. لقيت صوت من ورايا..
_ لو سمحتِ ده مكاني
= انت تاني!
_ هو في ايه بجد!
= في ايه انت!.. هو ايه اللي مكانك!
_ هي ليها معنى تاني ولا ايه!
= إيه شغل تالتة رابع ده!
_ لاحظي إنك بتخبطي في الكلام
= انا بقول الحقيقة.. واتفضل شوف مكان تاني عشان مش هقوم
_ يعني إيه مش هتقومي؟
= اللي سمعته.. وعن إذنك بقا من هنا عشان مينفعش أتكلم معاك أكتر من كده
_ ده على أساس إن أنا اللي هموت وأكلمك!
= خلاص يبقى امشي.. لا إله إلا الله!
_ ماشي ماشي
ومشي أخيرًا.. ايه الولا اللي مشمّش ريحة الرباية ده!
شوية كده وسمعت صوت كإن حد بيخبط في حاجة..
لفيت أشوف في إيه لقيته نفس الشخص..
بس المرة دي كان مدروخ ومش قادر يقف..
بالرغم من إنه قليل الأدب وعايز كورس في كيفية التعامل مع الناس إلى إني مقدرتش اسيبه وهو هيقع من طوله كده.. خاصةً إن كل واحد مشغول باللي معاه وعايشين في دنيا تانية..
_ انت كويس!
= أنا... أنا كويس
_ متأكد
= لا
ولقيته قعد عالأرض مقدِرش.. كان معايا بونبوني بشيله دايمًا في شنطتي فخليته ياكلها..
وبعد دقيقة.. اتنين.. بدأ يفوق
_ بقيت أحسن!
= الحمدلله
_ هو حضرتك مريض سكر!
= عرفتي منين!
_ أصل غالبًا دي أعراض غيبوبة الأنسولين وريحة الأسيتون وكده
= شكلك دارسة
_ دي حقيقة.. عن إذنك
= استني!
_ نعم!
= شكرًا.. وآسف
_ ولا يهمك في الحالتين.. سلام عليكم..
سبته ومشيت وتعدي الأيام وأنا مش في دماغي..
جه يوم فيه حلقة برضو..
لقيت سليم بيقولي إنه نسي حاجته فأخوه هيجبهاله..
وأول ما الباب خبط.. سليم راح يفتح..
فماما سألت:
_ مين يا سليم؟
= ده يونس أخويا يا طنط
_ خليه يتفضل يا حبيبي
حاول يعتذر.. مكنش واصللي النبرة على أد ما واصللي الكلام..
بس طبعًا ماما أصرت يدخل يرتاح شوية من المشوار وأول ما دخل وشوفته..
_ انتِ!
= انتَ!
#يتبع
_انتَ إيه اللي جابك في بيتي؟!
= بيت مين يا حجة!... دي المقرأة اللي اخواتي بياخدوا فيها
_ هو انت يونس؟!
= انتِ عرفتي منين؟
لقيت سليم اداني الكراسة بتاعته:
_ كراستي أهي يا مس حنين
لقيته بيبصلي بصدمة كده:
= هو انتِ المس بتاعتهم؟
_ أيوه أنا
= بقا انتِ اللي بتديهم قصص الأنبياء وبتشرحيها؟
_ أيوه أنا... خير!
= متوقعتش الحقيقة
_ مش فارقة
لقيت ماما بتزغرلي:
= عيب كده يا حنين
_ عيب ايه يا ماما!.. ده مستهزأ بيا من أول ما دخل
= ميقصدش يابنتي
_ لا يقصد
لقيت ماما بتحاول تهدي الدنيا وبتقول:
= تشرب إيه يا يونس؟!
_ ولا حاجة يا طنط
= لا ازاي!.. مش هينفع
_ أنا بس مش عايز أتعبك
= ولا تعب ولا حاجة.. ده انت زي يوسف ابني
لقيت يوسف خارج من الأوضة:
_ أنا سمعت إسمي
= انت رامي ودانك دي هنا ولا ايه!
_ ماما!.. عيب عليكِ.. ده انا رادار أرضي جوي
= عارفة يا أخويا! عارفة..
_ لما السمعة بجد
= حصل يا غالي... يلا اقعد مع يونس عقبال ما أعملكم العصير
_ يونس مين؟
= اتنيل أقعد عشان تتعرف
وماما سابتنا ومشيِت فيوسف بص ليونس بتأكيد:
_ بتمووت فيا كده
= خدت بالي
_ أقعد يا غالي خلينا نتنيل نتعرف على رأي الوالدة
= أديني قعدت أهو
_ أنا يوسف
= وأنا يونس
_ تشرفنا يا أخويا.. ايه اللي جابك هنا بقا؟
= كنت جايب لسليم حاجته عشان نسيها
_ هو انت تقرب للتوأم الملتصق دول!
= أه أنا أخوهم
_ ده الله يكون في عونك
= ليه بس!
_ يابني.. جيت في يوم أسمعلهم عشان حنين كانت لسه مجتش ماشي!
= ماشي
_ فالمهم الولا سليم مكنش حافظ كويس حلو!
= حلو
_ فروحت بقوله إنه مش حافظ كويس وهياخد إعادة
= وبعدين
_ وعينك ما تشوف الا النور يا جدع... الولا قلب تنين مجنح وشوية وهيطلعلي نار من بقه..
فسمعت ضحكت البيه على كلام يوسف:
= هو سليم بس مش بيحب ياخد إعادة
_ دي إعادة مش وصمة عار
= بالنسباله وصمة
_ الله يكون في عونك في التعامل معاه
= آمين يارب.. الدور والباقي على بيلا بقا
_ بيلا أه... البنت دي مش طفلة
= أمال ايه!
_ دي ولية أرشانة في جسم طفلة
= عملت ايه هي كمان؟
_ جيت في يوم اتنيلت سمعتلها هي كمان وكان حافظة كويس
= امممم
_ فكتبتلها 9 من عشرة عشان التجويد كان بعافية حبة
= كمل يا أخويا
_ راحت واقفة كده وهي أصلًا يادوب وصلالي وهي واقفة
= بس انت طويل
_ مهو أنا كنت ساعتها قاعد عالأرض
= ايوه ايوه
_ فراحت مسكتني من وداني وبتهز دماغي زي الكورة الكفر وتقعد تقولي هو مش انا سمعت كويس!
أقولها أه
تقولي أمال مش كاتبلي 10 ليييييه!
أقولها التجويد محتاج يتحسن
تقولي مش مبرر
أقولها يا ولية دماغي وجعتني
تقولي انت اللي جبته لنفسك
أقولها بطلي لماضة
تقولي انت اللي بتطلعني عن شعوري وانا جوايا ست مؤدبة.. يرضيك يا باشا اللي بيحصل فيا ده!
_ ياعيني يابني!
= شوفت!
_ وفي الآخر الهانم أختي هي كمان مش عاجبها
= وهي من امتى بيعجبها حاجة
أول ما لقيت إن الحفلة هتبدأ عليا روحت قايمالهم...:
_ هو في إيه!!.. ما كل واحد يخليه في حاله
= في ايه يا حنين؟
_ إيه يا يوسف!.. ده أنت هتحفل عليا
= أنا يا بنتي!
_ لا أنا
= إنتِ أدرى
_ يوسف... اتفضل خد الضيافة انت والأستاذ وتطلعوا عشان أعرف أكمل مع الولاد
= ما تاخديهم في الأوضة
_ مينفعش.. الاوضة فيها حاجات تبع بروچكت الجامعة
= بتطردينا يعني!
_ بالظبط
وخدوا العصير ومشيوا.. المهم بقا بدأت أرتل مع الولاد عشان يقرأوا ورايا.. وأنا لما برتّل بنسى نفسي وصوتي بيعلي غصب عني..
فالمهم وأنا برتّـل بقدرة قادر لقيته قدامي..
هو.. البيه اللي اسمه يونس..
واقف مصدوم مكانه وأنا كنت هعيط..
ازاي يسمعنيييي!
فحمحت بإحراج:
_ خير يا أستاذ يونس!.. في حاجة تانية!
= هو ده صوتك بجد ولا جرافيك!
_ نعم!
= آسف بس يعني...
لقيت سلسبيل بتقول:
_ ده صوتها بجد يا يونس.. ده أنا بحاول أتدرب عشان صوتي لما أكبر يبقى حلو كده
= هو حلو فعلًا
وانا ساعتها كنت أتمنى الأرض تنشق وتبلعني من كتر الإحراج وهعيط يعني هعيط..
فطلع ناسي مفاتيحة في الصالون ورجع ياخدها..
يعني حبكِت!..
طب ايه بقا!
الولا قال على صوتي حلو!
لا لا استغفر الله..
المهم يا اخواتي الأيام تعدي وألاقي الباب بيخبط..
لبست الإسدال وطلعت..
ألاقي سليم وسلسبيل وماما كمان!
_ إيه اللي لم الشامي عالمغربي!
= تعالي بس كده!
_ إيه بس يا ماما!
= تعالي قيسي ده كده
_ إيه ده؟
= يلا يا مس حنين مفيش وقت
_ مفيش وقت على إيه يا بيلا!
= عالفرح
_ فرح!.. فرح إيه؟
= انتِ هتاخدي على كلامها!.. البسي بس كده
_ طب فهميني طيب!
= يلا هبقى أفهمك بعدين
_ ازاي طيب؟
= يلا بقا انجزي
_ طب براحة.. متزوقيش كده
كان لونه بيبي بلو ورقيق لدرجة تخبل!..
المهم لبست وظبطت خماري..
وبعد ما طلعت..
_ اديني لبست أهو.. فهميني بقا
= اسم عليكِ ياحبيبي زي القمر
_ تسلميلي يارب..هاا
= ها ايه!
_ ماما.. فهميني لبستيني البتاع ده ليه!
= تعالي بس ورانا مشوار مهم
_ مشوار إيه ده؟
= تعالي بس وهتفهمي
_ يا خوفي!
وبعدين بقا لما نزلنا لقيت أوبر ولما وصلنا..
كان مكان جميل اوي!
كله زرع وشجر..
رقيق بشكل!..
أول ما وصلت لقيت ترابيزات كتير وناس أكتر!
مأذون وورد أبيض..
ايه ده ثانية!...
يوسف أخويا أهو..
_ يوسف!.. انت بتعمل ايه هنا!
= أهلًا بحبيبي
_ اوعى تقولي انك هتتجوز البت ريماس
لقيت ماما داخلة من ورايا..
_ ريماس مين؟
= ريماس دي...
كنت هقول ولقيته قاطعني:
_ اسكتي فضحتيني
= يعني انت مش جاي تتجوز البت ريماس؟
_ لا مش هتنيل
= ولا ولاء؟
_ لا
= ولا البت ياسمين!
_ لا.. أسكتي بقا هتجيبي أجلي قريب ياللي منك لله
= أمال ايه اللي جابك هنا!
= ايه!.. مش عايزاني أحضر فرح أختي؟
_ أخت مين يلا.. انت عندك أخت غيري!
= ااااه.. ماما انتِ مقولتلهاش!
_ لا لسه
= انتِ هتتجوزي انهاردة
_ لا والله!
= أها
_ يا جدع بطل هزار
= أنا عمري هزرت معاكِ!
_ يوسف انت بتتكلم بجد!
= اه يا عيونه
روحت مزعقة:
_ وانتوا ازاي تعملوا كده من ورايا!
= اهدي يا حنين
_ أهدى إيه!.. انتوا مش شايفين بتقولوا إيه!
= هو مش لما نلاقي من نرضاه دينًا وخُلقًا نجوزه!
_ ومين بقا ده؟
سمعت صوته من ورايا:
_ أنا
= انت اللي هتتجوزني!
_ إيه!.. منفعش؟
= طب ورأيي!
_ صدقيني مش هندمك
= وانت يا يوسف.. هو انت تعرف عنه حاجه عشان تجوزله أختك!
_ عيب عليكِ... أعرف كل حاجة
= طب ما تعرفني.. ده انا زي المتنيلة العروسة
_ يونس عبد الرحمن..
23 سنة..
خريج هندسة..
صوته حلو اللهم بارك..
إمام مسجد كمان..
خاتم بـ 3 قراءات وفي طريقه للتكملة..
بار بأبوه وأمه..
وأعتقد انك عارفه أهله كويس..
= بس انا معرفوش
_ هتعرفيني وهتتطمنيلي
= وده من امتى!.. ده انا بمجرد ما بتلمحني بتتخانق معايا
_ مهي دي لغة الحب
= يا جدع!
_ حصل
= طب...
_ متقلقيش خلاص..
= طب ليه أنا!
_ مش عارف..
= هتقعدني مكانك عالكورنيش!
_ حنين انتِ بتقعدي فيه غصب عني كده كده
= ايه يا جدع قلة الأدب دي؟
_ بقا أنا قليل الأدب!
= مهوو..
_ بعد كتب الكتاب هوريكِ
= انا بس مكنتش عايزة أقفل الاسكريبت كده
_ هخليكِ تقولي ياريتني قفلته.. أصبري عليا
= خلاص انت مش قليل الأدب.. انت دبش بس
_ دبش!
= معقد طيب!
_ كمان معقد!
= متهور!
_قفلي الاسكريلت بدل ما أفشفش دماغك حالًا
= طب...
_ قفليه يا حنيييين.
وبس كده عزيزي القارئ..
توتة توتة.. فرغت الحدوتة..
تعليقات
إرسال تعليق