سكريبت كامل وحصري لمدونة موسوعة القصص والروايات
سكريبت كامل وحصري لمدونة موسوعة القصص والروايات
= ده انا حبيتك
_ حنين.. افهميني.. أنا..
= انت كسرتني يا يونس
_ انا مكنتش أقصد
= والله!
_ صدقيني ده كان غصب عني
صرخت فيه بكل قوتي:
= غصب عنك!.. غصب عنك تكسرني يا يونس!.. انا حبيتك.. عارف يعني ايه حبيتك؟..
حسيت إن حصوني بتنهار وهو واقف ساكت.. مقدرتش اقف اكتر من كده وقعدت عالكنبه اللي انا وهو اختارناها واتشاركنا فيها زي اي ركن في البيت ده ولقيت نفسي بكمل بقهر:
_ اول ما اتقدمتلي كنت خايفه..
خايفه أوي منك..
ومن تغييرك..
مليون سيناريو حصل في دماغي..
وجع وقهر ماليين قلبي وجه في دماغي مشهد صغير وانت بتقولي فيه:
_ متخافيش.. ان شاء الله هعوضك
قولت يمكن أفكاري غلط..
مكبره المواضيع وانت غيرهم..
مش ههون عليك..
هتبقى الحنيّن اللي بدعي بيه بقالي سنين..
هتكون السند اللي هتسند عليه وقت ما انهار
لكن طلعت انت الطلقه اللي ساعدت أعدائي انهم يهدّوا حصون الدفاع بتاعتي..
انا كنت جيشي...
قولت انك هتساعدني..
بقيت انت الشوكه اللي قطمت ضهري..
ليه تعمل فيا كده ليه!!
ليه تخليني اندم اني فكرت بشكل كويس ليه؟!...
متردد.. بيحاول يجمع كلامه.. نظرة عيونه كلها حزن وندم.. بتبص لعيوني اللي كلها وجع وخذلان..
لقيت نفسي قومت وانا بتكلم بهدوء مرعب:
= انا قلبي كان فيه حته سليمه كنت مستنياك بيها وادتهالك.. و لما اديتهالك جيت انت كسرتها زيك زيهم
_ حنين استني
= ورقتي توصلني يا يونس
_ أرجوكِ..
قولتها وانا ماشيه:
= ورقتي توصلني من غير مشاكل على بيت أهلي يابن الناس
سبته ومشيت..
هو ده بجد يونس!
هو ده اللي كنت فاكره انه هيعوضني..
كنت فاكراه هيقوّمني لكنه...
لكنه داس عليا زيهم..
كنت فاكره اننا هنكمل..
لكنه زهق..
زهق وقالي انا زهقت منك..
معرفش يحتويني ولا حتى يطبطب..
دموعي نزلت وانا بفتكر اللي حصل:
Flash back
_ حبيبي انت جيت!
= اه يا حنين
_ مالك!
= مفيش
_ لا في.. قولي مالك
زعق وقالي:
= قولتلك مفيش يا حنين
_ انت بتزعق ليه!
= يوووه.. انا ماشي تاني
_ استنى بس... انت مكلتش
= مش عايز اطفح
ومشي ورزع الباب وراه جامد لدرجه خضتني..
فضلت قاعده مستنياه لحد ما جت الساعه 9 بليل.. فلقيت الباب بيتفتح..
جريت عليه بقلق وانا بسأله:
_ انت كويس!
= كويس
_ طب...
= لو سمحتِ أنا تعبان ومحتاج ارتاح
_ تعبان مالك!
= تعبان وخلاص
_ طب احكيلي يمكن اساعدك
لقيته بيضحك بسخريه:
= وانتِ هتساعديني ازاي ان شاء الله!
_ هو ايه اللي هساعدك ازاي!
= حنين ياحبيبتي انتِ لو كنتِ قادره تساعدي حد كنتِ ساعدتي نفسك
_ انت ليه بتقول كده!
= ليه!.. بجد بتسألي ليه!
انتِ حرفيًا كل ما نقعد سوا تحكيلي عن مخاوفك وتعبك وأد ايه الدنيا كانت قاسيه معاكِ، وكل مره مطلوب مني اني أراضيكِ وأخفف عنك
_ عشان ده حقي عليك
= حق ايه!.. أنا مش مسئول اني أقعد أحللك عقدك
_ عُقدي!
=..........
_ بقا انا معقده يا يونس!
حسيت انه ساعتها استوعب اللي قاله وراح باصصلي بتردد:
= حنين... انا.. انا مكنتش أقصد
Back
بقيت بالنسباله معقده!
انا عملت ايه غلط؟..
حد يفهمني...
بيقولوا إن لو في احتياجات مخدنهاش في بيت الأهل بنتعوض بيها في بنت الزوج..
وده غلط..
يونس ايوه كان بيسمع..
لكن دلوقتي..
بيقول عليا معقده وضعيفه!..
وانه زهق وخلاص مش قادر يستحملني..
ده جبر الخاطر اللي كنت مستنياه!
ده العَوض اللي كنت بتمناه!
دي دعواتي بالزوج اللي كنت بعيط وانا بقولها!؟..
في اييه بقا!
ليه بيحصل فيا كده..
كنت فاكره انه هيبقى ملجأ ليا..
طلع زي الباقي بيدوس عليا..
روحت لأهلي في وقتها..
مش هقبل اقعد معاه بعد ما عرفت نظرته ليا..
خبطت ولما لقيت أمي فتحت:
_ ايه ياحنين.. مالك!
= دخليني يا ماما انا تعبانه
_ ادخلي ادخلي
وبعد ما دخلت لقيتها جابتلي كوباية مايه وبتسأل بقلق:
= ايه يا حنين؟!.. حصل ايه!
_ محصلش حاجه يا حبيبي
= هبله انا بقا وهصدق
_......
= يونس عملك حاجه!
_.....
= يابنتي ردي عليا متوجعيش قلبي
_ انا هتطلق منه يا ماما
= يا خبر اسود!.. ليه حصل ايه!
_ طلع شايفني معقده وعاجزه عن اني أساعد نفسي حتى
= مين دي اللي معقده!.. ده انتِ زينة البنات
_ مش بالنسباله ياماما
= هو صحيح قليل الأدب وعايز رباية.. لكن الطلاق مش الحل
_ امال ايه الحل!.. عايزاني اقعد معاه وهو شايفني معقده!
= قليل الرباية هنربيه.. وعديم الأدب هنعلمهوله.. أصبري انتِ بس..
_ ازاي بقا!
= كده..
ولقيتها بتفتح الفون بتاعها وبتتصل بيه..
وأول ما فتح راحت مزعقه فيه جامد:..
_ هو انا مسلماك بنتي عشان تعمل فيها كده؟..
مين دي اللي معقده ومش قادره تساعد نفسها..
لا فوق كده واصحى للكلمتين دول..
انا بنتي ست البنات كلهم فاهم!
بقالها 4 سنين عايشه معاك بما يرضي الله....
عمرها ما قالتلي يونس زعلني بالرغم من اني متأكده انك أكيد زعلتها...
شايلاك وصايناك ولما بتغيب عنها شويه بتتشقلب من القلق عليك..
لما بتحصلك مشكله بتسندك حتى لو كانت بسيطه..
حنيّتها حتى في الكلام عنك بتبان..
انت عايز ايه يا اخي!
كل ده ومعقدة!
بنتي اللي ميقدرهاش ميستاهلهاش سمعتني!!
لو مش قادر تبقى الراجل اللي يحتوي مراته ويساعدها تتغلب على مخاوفها يبقى تسيبها وهي اكيد ربنا هيرزقها بيه..
كان ساكت طول المكالمة... وبعد ما ماما خلصت وقفلت حضنتها بتعب وقعدت أعيط..
مش عليه على اد ما هو عليا..
فلقيت ماما بتخرجني من حضنها وبتمسحلي دموعي:
_ بتعيطي على ايه يا خايبه!.. ده ميستاهلكيش
= بس انا بحبه يا ماما
_ هيرجعلك ندمان والله.. امشي ورايا انتِ بس
= اعمل ايه؟
_______________
"يونس"
حسيت بمكالمتها إن في جردل مايه ساقعه اترمى عليا..
جسمي تلّج من فكرة انها تبقى لحد غيري..
حنين مع حد غير يونس مينفعش..
قعدت حبه أفتكر مواقفنا سوا..
_______________
_يونس أنا بخاف من الأماكن العاليه أوي
= ليه دي جميله!
_ بحسها زي الأحلام.. لو بصينا منها على الواقع ممكن نقع
= يا واد انت يا عميق
_ طبعًا يابني ده انا جوايا كاتبة عميقة أوي أوي يعني
= أوي اوي يعني!
_ أفكوووورس يا ولا
_______________
_ انا فين؟
= حمدالله على سلامتك ياحبيبي انت كويس؟
_ هو انا ايه اللي حصللي؟
= لقيتك وقعت فجأه وجبتك هنا
_ انتِ كنتِ بتعيطي؟!
لما سألتها بصتلي بغضب طفولي لايق عليها وهي بتضربني في كتفي:
= أيوه عشان خضتني عليك
ضحكت عليها:
_ معلش حقك عليا
= انت ازاي يا استاذ متاكلش طول اليوم كده!
_ كنت مشغول شويه
= على الله يا يونس الاقيك مكلتش بعد كده هتضطرني أعمل حاجات انا في غنى عنها
رفعتلها حاجبي:
= لا والله!.. وحاجات زي ايه بقا!
_ هجيلك الشغل باللانش بوكس يا يويو
= حنين.. احنا فينا من الكلام ده!
_ طالما عشان صحتك يبقى اه يا عيون حنين
= لا خلاص الطيب احسن
_ تاكل كويس
= حاضر خلاااص
______________
_ يا حنين مش عايز قولت
= يلا يا يويو كُل عشان معدتك
_ ايه اللي دخّل معدتي بالرمان فهميني
= ده انت طلعت جاهل بقا
_ نعم يختي!
= ايوه هو انت متعرفش!
_ لا معرفش
= مسمعتش سيدنا علي رضي الله عنه وهو بيقول: كلُوا الرمانَ بشحمِه فإنه دباغُ المعدةِ!
_ ده اللي هو ايه شحمه ده؟
= اللي هو الغشاء الرقيق الأبيض ده يا حبيبي
_ بس...
_مبسش... يلا كل
_________________
حرفيًا حنين دي زي ما مامتها قالت.. هي كل حاجه فعلًا..
هي مغلطتش..
هي بس كانت بتشاركني..
كانت عايزاني احتويها واطمنها..
لكن انا عملت ايه؟
وجعتها زيي زي اللي وجعوها قبلي..
قررت اني خلاص هرجعلها..
حبيبتي مينفعش تبعد عني وكمان تفضل زعلانه مني..
نمت وتاني يوم..
الساعه 2 الضهر..
كنت لابس البدله اللي اختارتهالي..
والبرفيوم اللي جابتهولي هديه من غير مناسبه..
ولبست الساعه اللي جابتهالي لمجرد انها هتليق عليا!..
جبت بوكيه ورد زي ما بتحب وروحتلها..
خبطت عالباب وفتحتلي مامتها
بصتلي بعتاب ولوم..
حقها..
ابتسمتلها وعيوني كلها ندم..
واول ما دخلت لقيت آسر بن عمها موجود
الواد الغتت ده ايه اللي جابه هنا!
فاتعصبت وقولت:
_ هو الواد ده ايه اللي جابه هنا؟
لقيت مامت حنين بترد بعصبيه:
= متقولش على خطيب بنتي واد
_ بنت مين!... هو انتِ عندك غير حنين؟
#يتبع
_بنت مين؟!... هو انتِ عندك غير حنين؟
= لا يخويا معنديش غيرها
_ أمال خطيب مين؟.. انتوا هتجننوني!
= ما انا هطلقها منك وهجوزهاله
_ تجوزيها لمين؟!. دي مراتي
= الله!.. ماقولتلك هطلقها منك..
_ مستحيل..
ولف نظره ليا..
_ حنين انتِ عايزه تسيبيني!
= مرضالكش تعيش مع واحده معقده أكتر من كده
_ انا آسف... بجد مكنتش أقصد
= يونس.. متصعبش الأمور أرجوك
لقيته اتعصب وعنيه هتاكلني وهو بيرمي البوكية عالأرض:
_ مصعبش الأمور!!.. أمور ايه دي اللي مصعبهاش؟!.. انتِ مراتي فاهمه!.. وطلاق مش هطلق
لقيت ماما راحت متعصبه هي كمان:
= هو عافيه ولا ايه!
_ خليكِ محضر خير!.. دي فيها خراب بيت بنتك!
= بنتي دي اللي سيادتك وجعتها مع اني اتنيلت وفهمتك..
حنين لا يا يونس..
حنين تعبت كتير..
حنين شالت المسئولية من ابتدائي..
حنين الدنيا داست على وشها لحد ما قالت يا بس..
حنين قلبها مش مستحمل وجع وخذلان..
حنين اتخذلت واتخدعت..
حنين عاشت دنيا كلها مُر ومتخليهاش تزعل تاني الله يباركلك وعوضها..
وانت كان ردك.. حاضر يا طنط حنين دي عيوني وجوه عيوني صح ولا انا غلطانه!
= ونفذت وعدي!!.. انا بقالي 4 سنين بعمل اللي وعدتك بيه.. ليه تفتكرلي كلمة غصب عني وتنسى كل ده؟
_ عشان الكلمة دي كفيله انها تهد كل اللي انت بنيته..
الكلمة يابني بتبني وتخرب بيوت..
حنين كانت متطمنالك وبتحكيلك اللي مكانتش راضيه تحكيلي انا شخصيًا عنه.. عشان بتحبك أكتر من نفسها ومخلياك ملجأ ليها..
كانت بتحاول تساعدك!
يابني ده الرسول ﷺ قال: "خيرُكم خيرُكم لأهلِه، وأنا خيرُكم لأهلي."
هي أولى بالمعامله الحسنه..
والإنصات والحنيّة..
انت ايه؟
لسه مفهمتش انها من خوفها بتحكيلك عشان تتخطى معاك وتتشجع!
الراجل اللي مش قادر يخلي مرات تهرب ليه مش منه يبقى لازم يعرف قيمتها وقيمة وجودها
لقيته قعد عالارض باستسلام وبيهمس:
_ عرفت والله.. عرفت.. أنا بجد آسف
بصلي بنظره كلها تعب كإنه ياحبيبي منامش بقاله فتره!
انا قولت حبيبي!
اسكوزمي يا جماعه ايًّا كان ده قرة عيني..
نو كرامة..
المهم..
ماما بصت لآسر انهم يمشوا ويسيبونا وده اللي حصل بالفعل..
لفيت للبلكونه وقفت فيها وهو زي ما هو!.
قاعد عالأرض..
مستسلم..
مرهق..
وانا..
في البلكونة..
سايبه الهوا البارد ياخد راحته لي إنه يطيّر خماري..
لقيت نفسي بسأله:
_ انت بجد شايفني كده!
=....
_ لو سمحت ممكن تقولي!
= انا عمري ما شوفتك كده..
_ طب ليه!
=.....
_ ليه توجعني بالمنظر ده وتندمني اني بحكيلك عن اللي شايلاه بقالي سنين!
ليه بتخليني أتمنى إني أفضل كابته خوفي ومطلعتهوش لا ليك ولا لغيرك ليه!
أنا قصرت معاك في حاجه؟
هزار ودايمًا بهزر..
زعل منك ومش بيحصل..
ضغط عليك وبستحمل..
زعلان وبهون عليك..
عايز مني ايه تاني!
ليه حقوقي بالنسبالك بقت شكوة ملهاش لازمة!
لقيته جه من ورايا... بيقول بهمس مليان تعب:
_ عشان غبي!..
ايوه غبي..
غضب وشيطان..
انا غلطان..
أنا آسف اني حسستك بالشعور ده..
مكنتش أقصد صدقيني..
أوعدك مش هيحصل تاني..
بس متمشيش!
نبرته كانت كلها ترجّي كإنه طفل خايف مامته تسيبه وتمشي..
=.....
_ ردي عليا من فضلك
= مرضالكش تعيش مع معقده يابن الناس
_ ولا تعرفي حاجه عن التعقيد صدقيني انا اللي معقد
= انت مش معقد
_ لا انا معقد
= يا عم ماقولنا مش معقد
_ ياعم!.. في بنوته رقيقه تقول لجوزها يا عم؟
= مش انا عملت كده!
_ اه
= يبقى فيه..
_ اجابه مقنعه
= أقل حاجه عندي
وضحكنا بس بعدين رجع بصلي بهدوء بس مهزوز:
_ سامحتيني صح!
= سامحتك صح.. وعلى فكره بقا هحكيلك وهزهقك ها!!
_ ده منى عيني
لقيته نزل جاب البوكيه من الأرض اللي متبقاش فيه غير واحده سليمة!..
_ معلش بقا متبقاش غيرها اليتيمه
= ما انت هِنت اخواتها
_ حقي ولا مش حقي!
= حقك يا كبير.. محدش قال حاجه
وبعدين راح ماسكني من الكابتشو.. مخليني مفيش فرق بيني وبين حرامي الغسيل اسم الله عليه حبيبي ده..
شايفين الطيبه والإحساس ياجماعة!..
_ وبعدين تعالي هنا.. هو انتِ كنتِ هتسبيني!
= انا اقدر!
_ قدرتِ لا وكمان الواد الغتت اللي مبحبوش ده يقعد هنا!
= يعني لو كنت بتحبه كان عادي!
_ ده انا كنت دغدغت الشقه دي على دماغكم
= زوجي المحترم
_ ده أقل واجب يا زوجتي العزيزة
= ما خلاص بقا يا عم مهزأني طول الاسكريبت مش كده
_ انتشيي السبب
= دي مبقتش عيشة يعني
_ والله!
= اها
_ طب قفلي الاسكريبت وحسابنا بعدين
= طب ما تخليهم شويه انا خايفه
_ قفلي الاسكريبت بقولك
= يوووه..
وبس كده يا جماعه.. ادعولي بس اطلع عايشه بعد كل ده..
متنسوش تصلوا عالنبي عشان نُرفع عند الله...
والسلام..
تعليقات
إرسال تعليق