رواية جزيرة الموت الفصل الاول1 كامله وحصريه بقلم بالميرا
رواية جزيرة الموت الفصل الاول1 كامله وحصريه بقلم بالميرا
كالعادة قمت من نومي بصرخ جامد وأنادي على ابني وجوزي اللي ماتوا في حادثة فظيعة من خمس شهور، واللي لسه لدلوقتي مش عارفة استوعب اللي حصل ولا أرجع أعيش حياتي زي الأول، أخويا جه جري هو ومراته اللي قاعدين معايا من وقت الحادثة ما سابونيش، وزي كل يوم حاولوا يهدوني لحد ما رجعت نمت تاني، قمت الصبح على دعوة جيالي من البرازيل لحضور مؤتمر هيناقشوا فيه النباتات النادرة الموجودة في غابات الأمازون واللي أنا وأصحابي كنا عاملين عليها أبحاث كتيرة ونجحت الحمدلله.
خلوني أعرفكم بنفسي أنا ندى، دخلت كلية العلوم واتخصصت في علم النبات أنا واتنين أصحابي مقربين مني أوي نورا وأمنية، كنا نعتبر شلة أحنا التلاتة وسبحان الله اتجوزنا شلة برضو تلاتة أصحاب اتنين منهم كانوا معانا في علوم عمر ومعاذ، وأحمد اللي هو جوزي كان في هندسة، بس كان طول الوقت في علوم عندنا مع أصحابه،عمر اتجوز نورا، ومعاذ اتجوز أمنية، وأنا وأحمد اتجوزنا، كنا شغالين أحنا الخمسة بعد التخرج مع بعض، وأحمد كان شغال في شركة كبيرة لأنه ما شاء الله كان مهندس شاطر أوي.
ولأن أحنا الخمسة كنا بنعمل الأبحاث مع بعض؛ فجتلنا دعوة كلنا لحضور المؤتمر وكمان الدعوة كانت مفتوحة ومتاح لينا ناخد أي حد من عيلتنا معانا.
في البداية رفضت أني أروح البرازيل؛ لأني كنت شايفة الكل متحمس وشايفين أنها رحلة وتغيير جو، أكتر من أنه شغل ودراسة، بس أخويا قالي أن مجرد وجودي في المؤتمر دا نجاح،وأن نجاحي ده هيفرح ابني وجوزي وأنهم كانوا هيحبوا يشوفوني ناجحة في حياتي وشغلي؛ فوافقت بشرط أنه ييجي معايا هو ومراته مش هو بس؛لأنه كدا كدا كان هييجي معايا ؛ فطلبت منه مراته تيجي معانا هي كمان، كتر خيرهم من خمس شهور وهم معايا وتعبتهم أوي ودي هتكون بالنسبالهم رحلة وفسحة ؛ فوافق الحمدلله ورحنا أحنا السبعة، أنا وخالد أخويا ونهى مراته، وعمر ونورا ومعاذ وأمنية.
استقبلونا استقبال حلو أوي، والجزيرة اللي استقرينا فيها واللي كان فيها المؤتمر كانت آية في الجمال، كان فيه ناس من جميع أنحاء العالم هتحضر المؤتمر، وفعلًا وجودي في المؤتمر ده كان إضافة كبيرة أوي لمسيرتي المهنية.
رحنا على الفندق اللي هنقعد فيه، ولأن الوقت كان بليل، وكنا تعبانين من السفر، رحنا على أوضنا ونمنا لحد الصبح.
قمنا اتوضينا وصلينا ولبسنا ونزلنا فطرنا، وبعدين ولأن المؤتمر كان لسه بعد بكرا بإذن الله والنهاردة وبكرا
هيكملوا استقبال لباقي الناس اللي هتحضره، قررنا أحنا نروح لأكتر حاجة كنا حابين نيجي علشانها وهي الغابة اللي فيها أندر النباتات في العالم كله.
رجعنا الفندق، وجهزنا نفسنا، وخدنا شنطنا وكل حاجة هنحتاجها هناك، وطلبنا من سواق عربية يوصلنا للغابة.
السواق وصلنا للغابة، وخدنا رقمه علشان لما نيجي مروحين نكلمه ييجي ياخدنا بإذن الله، ومشي السواق وبدأت رحلتنا مع الطبيعة، كنا مستمتعين بطريقة ما تتوصفش، أول مرة أكون في غابة حقيقية، وفي وسط نباتات نادرة بجد، واتفرج على حيوانات بالقرب ده، طبعًا مكنش فيه حيوانات مفترسة في المكان اللي كنا فيه ودا كلام المسؤولين عن المؤتمر وكل اللي سألناه أكد أن المكان آمن جدًا.
وصلنا لمكان من جماله كنت مش قادرة أغمض عنيا، خايفة لحسن يطلع حلم جميل ويختفي فجأة، كان فيه شلال حواليه زرع وورد ونباتات، شكلهم مع لون السما لا يُقاوم؛ فقررنا نخيم هنا عند الشلال وفي وسط الغابة.
نصب الشباب الخيم وحطينا فيها شنطنا وكل حاجة، وكان معانا أكل كلنا، وبعدين قررنا قبل ما النهار يخلص نروح ناخد جولة تانية في الغابة ونرجع للخيم بتاعتنا تاني بإذن الله.
مر الوقت بسرعة، قدرنا الحمدلله ناخد عينات، ومجموعة صور هتساعدنا كتير بإذن الله في الأبحاث اللي جايه، ولأن الشمس كانت بدأت تغيب، قررنا أننا نرجع لمكان الخيم اللي كنا معلمينه بمليون علامة علشان ما نتوهش في الغابة والحمد لله ما توهناش ورجعنا عند الخيم، بس ملقيناش الخيم، لقينا كل الخيم متقطعة وكل حاجتنا اختفت ولقينا مكتوب على شجرة كبيرة بالدم (أهلًا بيكم في جزيرة الموت، استمتعوا بآخر لحظات في حياتكم؛ لأن كل اللي جاي موت، بس يا ترى هتموت إزاي؟!)
تكملة الرواية من هناااااااا
تعليقات
إرسال تعليق