رواية احببت اخت زوجتي الارملة الفصل الثاني 2الاخير بقلم الكاتبة صباح عبدالله فتحي
رواية احببت اخت زوجتي الارملة الفصل الثاني 2 الأخير بقلم الكاتبة صباح عبدالله فتحي
الأطفال قاعدين على السفرة.. صوت جرس الباب. إسلام يطلع من المطبخ لابس مريلة ومبهدل ومسك معلّقة يروح ويفتح الباب يلاقي أمل. أمل أول ما تشوفه تضحك جامد.
أمل بضحك
يالهوي إيه اللي انت عملته في نفسك ده!
إسلام بزهق
وانتي إيه اللي جايبك الصبح؟ عاوزة إيه؟
أمل بزعل
لو زعلان إني جيت همشي عادي عن إذنك.
أمل تيجي تمشي، إسلام يمسك درعها وهو بيقول:
إسلام بهدوء
أنا آسف، مش قصدي، اتفضلي ادخلي.
أمل تبص له بزعل وتدخل. الأطفال يجروا عليها.
أمل بابتسامة
حبايب خالتو الحلوين، عاملين إيه؟
وتين
أنا جعانة خالص يا خالتو واتأخرت على الحضانة وبابي الحمار مش عارف يعمل حاجة.
إسلام بذهول
أنا حمار؟
أمل تضحك جامد
معلش بقى طفلة مش فاهمة حاجة.
تبص لوتين وهي بتقول
مش عيب يا وتين القمر تقول على باباها حبيبه حمار؟
وتين
أنا آسف يابابي بس أنا جعانة وانت مش عارف تعمل حاجة.
أمل تقول باستغراب
آيه صحيح، انت بتعمل إيه كده وفين الداّدة؟
إسلام بزهق
ماجتش النهارده قالت ابنها تعبان وأنا من الصبح ربنا واقف في المطبخ بعمل لهم الفطار وفي الآخر أطلع حمار.
أمل تضحك
طيب معلش تعالى قولي بتعمل إيه وانا هعمل بدلّك.
إسلام
اتفضلي والله ما أكُسفك.
الاتنين يبصّوا لبعض ويضحكوا.
ـــــــــــــــــــــــــــــــ
في المطبخ
أمل تبص بذهول على المطبخ اللي متكركب وهي بتقول:
أمل
يا نهار، مش فايت! هو انت كنت بتعمل فطار ولا بتحارب في حرب 6 أكتوبر؟
إسلام
يا خفة شوفي هتعملي إيه وانتي ساكته.
يبص لساعة بزهق وهو بيقول
أنا أتأخرت خالص على الشركة، عندي اجتماع مهم.
أمل
طيب روح أنت وانا هفضل مع العيال، هفطرهم وخدّهم الحضانة.
إسلام يبص للمطبخ وهو بيقول
والمزبلة دي مين هيّنضفها؟
أمل بضحك
لما تيجي بالسلامة تشوف إنت هتعمل إيه.
أمل تتحرك تدخل وفجأة تتزحلق. إسلام يمسكها قبل ما تقع. الاتنين يقربوا من بعض ويبصّوا لبعض. أمل بعد شوية تبعد وهي بتقول:
أمل بتوتر
هو انت كنت بتعمل فطار إيه؟
إسلام بخجل
كنت بعمل بيض، بس إنتي كويسة؟ حصلِت حاجة؟
أمل بتوتر
أيوه كويس الحمد لله ما حصلش حاجة. هروح أعمل الأكل وانت اجهز وانزل الاجتماع علشان ما تتأخرش.
أمل تدخل المطبخ وتجهز الأكل، إسلام يفضل واقف شوية يبص لها بإعجاب وبعدين يسبّها ويطلع.. أمل تحط إيدها على قلبها وهي بتقول:
أمل
هو إيه اللي بيحصلي؟ قلبي بيدق ليه كده؟
تسكت شوية وبعدين تقول
يالهوي أنا نسيت، هاخد العيال لسارة تشوفهم إزاي وأقول لإسلام ولا لأ بلاش؟
ـــــــــــــــــــــــــــــــ
في أوضة النوم
إسلام طالع من الحمام مش لابس غير بنطلون.. في نفس الوقت أمل تدخل وهي بتقول:
أمل بتوتر
إسلام كنت عاوزة أقولك...
وتسكت لما تاخد باله وتبصّ له بصدمة.
إسلام باستغراب
مش فاهم، عاوزة تقولي إيه؟
أمل تفرك في ايديها بتوتر.
أمل بكسوف
كمّل لبسك ونكمل كلامنا بعدين.
إسلام بخبث
لا، قولي، أنا مرتاح كده.
أمل
انت واحد قليل الأدب.
وتيجي تجري على برّه. بس إسلام يجري ويمسكها جامد من وسطها ويقول:
إسلام بهدوء
وانتي عنيدة أوي على فكرة.
أمل باستغراب
قصدك إيه؟ مش فاهمة.
إسلام فجأة يبوسها ويقول:
فاهمتي كده؟
أمل تبص له بصدمة وفجأة تضربه بالقلم وتجري على برّه وهي بتعيط. إسلام يجري وراها.
إسلام
أمل استني، أنا آسف.
بس أمل تطلع من الشقة وإسلام يبص لعياله وما يطلعش.
إسلام بزهق
هو إيه اللي أنا هببِّطه على عيني ده؟
ــــــــــــــــــــــــــــــ
في ملاهي أطفال
واقفة سارة وحازم. سارة بتبص حواليها هي وحازم.
حازم بزهق
هي فين أختك كل ده؟
سارة بقلق
مش عارفة، اصبر شوية أكيد هتجي، أنا متأكدة.
حازم بغضب
هتجي فين بقى؟ لينا ساعتين واقفين!
سارة بعياط
هتيجي أنا متأكدة.
حازم بزهق
طيب انتي بتعيطي ليه دلوقتي؟
سارة بدموع وقلق
خايفة تكون قالت حاجة لإسلام وخطتنا تفشل، وما شوفش عيالي تاني، وما أقدرش أخدهم.
حازم يحضنها وهو بيقول
بإذن الله مش هيحصل حاجة، اتصلي بيها كده شوفيها عملت إيه؟
سارة تبعد، تطلع التليفون باللهفة وهي بتقول
سارة
أيوه، معاك حق، هتصل بيها ثواني.
ــــــــــــــــــــــــــــ
في التاكسي
أمل قاعدة في الكرسي اللي ورا، أمل بتكلم نفسها بغضب ودموع.
أمل
حقيقي إنسان سافل، أنا دلوقتي بس فهمت ليه سارة هربت وسبته، أكيد من تصرفاته الزباله دي.
السواق باستغراب
انتي مجنونة ولا إيه؟ بتكلمي مين؟
أمل بغضب
وانت مالك؟ ما تشوف شغلك وانت ساكت!
فجأة صوت التليفون بيرن. أمل تبص له وتنفخ بزهق وهي بتقول
أمل
أووف، أنا زهقت وقرفت منك انتي والسافل اللي كان جوزك، والله مش صعبان عليا غير وتين وكريم، جبتهم على الدنيا علشان تبهدلوهم معاكم.
تقفل التليفون من غير ما ترد، التليفون يرن تاني، تفتح من غير ما تشوف مين وهي بتقول بغضب
أمل بغضب
بقولك إيه يا سارة، مش انتي تهربي مع حبيبك وتعيشي حياتك وتقرفيني انتي وجوزك وعيالك في عيشتي! عاوزه عيالك؟ تعالي خديهم من أبوهم، أنا ماليش دعوة!
صوت إسلام بغضب
انتي عارفة فين أختك وبتسغبني طول الوقت؟
أمل تفتح عيونها بصدمة.
ــــــــــــــــــــــــــــــ
في الملاهي
سارة وحازم لسه زي ما هما، سارة ماسكة التليفون وبتتصل على أمل.
حازم باستغراب
في إيه بقى؟ لك ساعة بترني!
سارة بغضب
بتقفل في وشي ومش بترد، ودلوقتي بيدي مشغول.
حازم ياخد التليفون منها بزهق وهو بيقول
حازم
طيب خلاص، ما ترنيش تاني، تعالي نمشي، أختك مش جايه.
سارة بدموع
يعني إيه؟ خطتنا هتفشل ومش هشوف عيالي تاني؟
حازم بشر
لا ما تقلقيش، أنا قولتلك كلمة وهنفذها، اثقي فيا ماشي؟ تعالي معايا دلوقتي وهنشوف مع بعض خطة غير دي.
حازم ياخدها ويمشي وهي بتعيط.
ــــــــــــــــــــــــــــــــــ
في بيت أمل
أمل تدخل تلاقي إسلام قاعد مستنيها وعيونه حمراء من كتر الغضب، وأمها جنبه. تبلع ريقها بخوف، وأمها تقوم وهي بتقول بغضب:
أم أمل
الكلام اللي إسلام بيقوله ده بجد يا أمل؟ انتي عارفة فين أختك؟
أمل بخوف
لا، ما عرفش حاجة عنها.
إسلام يقوم ويمسكها جامد من دراعها وهو بيقول بغضب
إسلام
أمل، يكون أحسن لك ما تختبريش صبري! قولي فين أختك؟ وكنتي ناوية تاخدي عيالي لها من وراي، صح؟
أمل تزقه وهي بتقول بغضب
لا مش صح! ما كنتش هعمل كده، كده جايه علشان أقولك، بس انت اللي قليت أدبك معايا!
أمها باستغراب
قل أدبه معاكي إزاي؟
إسلام بكسوف
لا، مافيش حاجة يا أمي، ده سوء تفاهم مش أكتر.
أمل تبص له بغيظ
ما تقول لها اللي عملته، زي ما قولت إني عارفة فين المحروسة اللي كانت مراتك، ولا انت مش بتقول غير اللي في صالحك!
إسلام بزهق
أمل، بقولك ده كان سوء تفاهم، أنا لحد دلوقتي مش عارف عملت كده إزاي، وبعتذر منك.
أمل تبص له بغضب، وأمها تقول باستغراب.
أمها
ما تفهموني حصل إيه؟ بدل ما أنا واقفة زي العبيطة في الزفة كده!
أمل بغيظ
اتفضل، فاهمها حصل إيه!
إسلام بخبث
ما خلص بقى يا أمل، لمي الليلة وأنا آسف يا ستي، وهصلح غلطتي وهتجوزك.
أمل تبص له بصدمة، إسلام يقول بغضب وهو بيمسكها من دراعها جامد
إسلام
بس مش قبل ما تفهميني، أختك كانت عاوزة إيه من عيالي؟ وانتي إزاي تتكلمي معاها من غير ما تقولي لحد؟
أمل بزهق
طيب سيب إيدي عشان وجعتني، ثم أنا لا بكلمها ولا زفت! أنا أصلًا لا طايقاك ولا طايقاها، انت فاهم؟
إسلام بسخرية
مش مهم تطقيني دلوقتي، أنا هعرف أرضيكي بعدين، المهم أعرف أختك كانت عاوزة إيه؟
ـــــــــــــــــــــــــــــــ
في شقة سارة وحازم
الاتنين قاعدين في الصالة.
سارة بخوف
أنت بتقول إيه يا حازم؟ لا طبعاً مستحيل أوافق دول مهما كان، عيالي أخاف يحصل لهم حاجة لا قدر الله.
حازم بخبث
يا حبيبتي هيحصل لهم إيه بس؟ ثم ما بقى قدامنا غير الحل ده.
سارة بقلق
لا يا حازم، أكيد في حلول كتير غير الخطف.
حازم
طيب ما إحنا كنا هخطفهم إيه الجديد يعني؟
سارة
في فرق بين إن أختي اللي هتجيبهم وهاخدهم في حضني من إيد أمينة، وبين اللي أنت بتقوله ده. أنت مأجر مجرمين بجد، ومخدر وخطف حقيقي، وأنا خايفة يحصل لهم حاجة.
حازم بزهق
بقولك إيه يا سارة، أنا بعمل ده كله علشانك، وأنتي مش قادرة تثقي فيا ومش مأمناني علي عيالك اللي أنا عاوز أجيبهم في حضنك. خلاص أنا مش هعمل أي حاجة بعد كده وابقى اتصرفي بمعرفتك عن إذنك.
حازم يقوم. سارة تقوم بسرعة وتحضنه من الخلف وهي بتقول:
سارة
لا والله يا روحي، مش قصدي كده خالص. خلاص حقك عليا، اعمِل اللي تشوفه صح، أنا موافقة المهم أخدهم في حضني.
حازم يبتسم بشر.
ـــــــــــــــــــــــــــــــ
في بيت أمل
إسلام بغضب
وأنتِ صدقتيها وكنتي هتاخديهم لها؟
أمل بحزن
بص يا إسلام، مهما اللي كنت هعمله كان علشانهم مش علشانِها. مهما كان دول لسه أطفال مش فاهمين حاجة، ومن حقهم يشوفوا أمهم.
إسلام بغضب وزعل
وهو لما أمهم بتحبهم وشايلة همهم أوي كده بتعمل اللي عملته ليه؟ أنا قصرت في إيه معاها علشان تبص لغيري، واحدة زي أختك؟ أنا مستحيل أثق فيها وأأمنها على عيالي تاني، أنتِ فاهمة؟
أمل بحزن
مهما كان، رد فعلك ما أقدرش ألومك عليها يا إسلام. بس عيالك لسه صغيرين وماحتاجين أم معاهم ويوم واحد الدادة ما كنتش، أنت كنت محتاس ومش عارف تعمل إيه؟
إسلام بهدوء
خلاص، وافقي نتجوز يا أمل. مش هلاقي أحن منك عليهم.
أمل تبص له وتسكت. أمها تقول:
أم أمل
إسلام معاه حق يا أمل، أنتي اللي هتقدري تعوضيهم عن حنان أمهم.
إسلام بهدوء
أنا هكون صريح معاكِ يا أمل، ومامتك مش غريبة: أنا بحبك ومش عاوز أتجوزك بس علشان الأولاد. لا، علشاني أنا كمان من أول ما أختك هربت، أنتي كنتِ في ضهري، اعتبرتي عيالي عيالك مش بس عيال أختك. وفي كل مرة كنت بكره فيها أختك كنت بشوفك إنتِ الملاك. وافقي علشاني وعلشان وتين وكريم.
أمل بحزن
إسلام لو سمحت ما تضغطش عليا، أنا لسه بحب هشام الله يرحمه ومش متخيلة واحد غيره في حياتي، هتتظلم معايا صدقني.
أمل تقوم وتجري على أوضتها وهي بتعيط. إسلام يبص لها بحزن.
أم أمل بهدوء
سبه دلوقتي يا بني، تهدى وأنا هتكلم معاها.
إسلام يبص لساعة ويقوم وهو بيقول بزعل:
إسلام
طيب يا أمي أنا همشي دلوقتي علشان معادي. طلعوا الأولاد من الحضن عن إذنك.
إسلام يبص ناحية أوضة أمل وهو بيتنهد بحزن ويمشي.
ـــــــــــــــــــــــــــــــــ
قدام الحضانة
تين وكريم واقفين.
كريم
هو بابا مش هيجي يا خدنا؟
ـ وتين:
مش عارفة... تعالي نروح إحنا، أنا عارفة البيت.
وتين تسحب كريم وتمشي. فجأة، عربية سوداء تقف قدامهم، وينزل منها ناس متكتمين يخدروهم وياخدوهم على العربية. في نفس الوقت إسلام يوصل بعربيته ويشوف اللي حصل.
إسلام بصدمة
وتيييين كريييم!
يجري ورا العربية بس مش يلحقهم. ويرجع لعربيته جري.. في العربية اللي خدت الأطفال.. الاتنين نايمين على الكرسي، والراجل بيتكلم في التليفون:
الراجل
أيوه يا حازم بيه، كل حاجة تمام والعيال معانا، بس في واحد شفنا وبين عليه أبوهم وهو ماشي ورانا، نعمل إيه؟
صوت حازم بخبث
نفذ اللي قولتلك عليه، اديهم جرعة مخدر زيادة، أنا مش عاوزهم يعيشوا.
الراجل باستغراب
طيب والمدام هتقول لها إيه؟
حازم بغضب
وأنت مالك أمك؟ شوف شغلك وأنت ساكت.
الراجل يقفل التليفون ويبص الأطفال بزعل وهو بيقول:
الراجل
هنعمل إيه يا رجالة؟ إحنا ما اتفقناش على قتل وعايزين نديهم قرعة مخدرات زيادة.
واحد تاني
بس دول لسه صغيرين، هنقتلهم إزاي؟
واحد تالت
أبوهم ماشي ورانا، وأكيد زمانه بلغ... أنا من رأيي نرميهم من العربية وخلاص، وهم وحظهم.
الراجل يفتح باب العربية ويرموا الأطفال منها. إسلام ينزل من عربيته ويجري برعب على أولاده.
ـــــــــــــــــــــــــــــــ
في المستشفى
أسلام قاعد قدام العمليات بيعيط هدومه فيها دم.. أمل وامها يجوا جري والاتنين بيعيطوا
أمل بدموع
طمنيني يا أسلام فين وتين وكريم حصل لهم اي
أسلام يبص لها بغضب وفي لحظه يمسكها جامد ويلصقها في الحيط وعيونه تحمر وهو بيقول بغضب
أسلام
كنتي تعرفي أن اختك وجوزها ناوي يخطفوا عيالي مني
أمل بوجع وصدمة
انت بتقول ايه؟ معقولة أم تعمل كده في عيالها مستحيل
أسلام بغضب
اختك وجوزها مش بشر دول شياطين بس انا هعرف ازاي اربيهم هم الاتنين وياويلك مني لو كنتي تعرفي حاجه وغبتي عني
أمل بدموع
صدقني انا ما كنتش اعرف اي حاجه حتي هي كلمتني مره واحده ومش اتصلت تاني ما عرفش عنها حاجه صدقني انا مستحيل افكر اعمل حاجه زي دي دول عيالي انا كمان معقولة اعمل فيهم كده.
أسلام يبص لها بحزن ويسبها وهو بيقول بدموع
أسلام
انا لو حصل حاجه لأولادي مش هرحمهم يا أمل مش هرحمهم
ويحضنها جامد وأمل بعد تردد تحضنه هي كمان وتقول بدموع
أمل
بأذن الله مش هيحصل لهم حاجه انا متأكده
ـــــــــــــــــــــــــــــــــ
في شقة ساره وحازم
حازم بيتكلم في التليفون بغضب
غبي غبي كلكم اغبياء
ساره تجي وهي بتقول بخوف
مالك يا حازم حصل اي عيالي حصل لهم حاجه
حازم يضربها بالقلم وهو بيقول بغضب
كله بسببك انتي وعيالك انا روحت في مصيبة بسببكم
ساره بزعيق
عيالي يا حازم عملت فيهم اي انطق
حازم بكره
عيالك ماتوا ارتحتي ويلا بسرعه علشان نمشي من هنا الحكومة زمانهم جاين
ساره تضربه وهي بتقول بغضب وزعيق
قتلت عيالي يا مجرم قتلت عيالي
صوت صفارت الشرطه.. حازم يزوقها ويجري علي بره بخوف. ساره تقع علي بطنها ما تقومش تاني والدم ينزل منها.. حازم لسه طالع يلاقي الشرطه في وشه
الظابط
علي فين يا أستاذ حازم انت والمدام مطلوب القبض عليكم
ـــــــــــــــــــــــــــــــ
في المستشفى
أسلام وأمل قاعدين قدام العمليات وأم أمل. الظابط يجي وهو بيقول
الظابط
أستاذ أسلام شكوك حضرتك كانت صح احنا قبضنا علي حازم بس المدام لقيناها ميته
الكل يبص له بصدمة. أم أمل تعيط علي بنتها وأمل تقول
أمل بدموع
الله يرحمك يا ساره بس انتي اللي خربتي بيتك بأيدك وما بقاش ينفع عليكي غير الرحمه.
تفضل تعيط أسلام يحضنها بحب وهو بيقول بحزن
أسلام
حتى الرحمه مش قادر اطلبها لها
أم أمل بدموع
سامحها يا بني علشان خاطري مهما عملت هي دلوقتي بين ايدين ربنا سامحها علشان ربنا يسامحها
أسلام بحزن
هحاول بس ما وعدكيش اللي بينكم عملته معايا مش قليل
الدكتور يجي وهو بيقول
أستاذ أسلام أولاد حضرتك فاقوا والحمد لله هم كويسين دلوقتي
أسلام وأمل بفرحة
الحمد لله يارب العالمين ألف حمد وشكر ليك يارب
أمل
ممكن نشوفهم يا دكتور من بعد اذنك
الدكتور
ايوه طبعاً اتفضلوا
أسلام وأمل يبصوا لبعض بحب والاتنين يروحوا يشوفوا الاطفال. في أوض الاطفال. أمل وأسـلام يحضنوهم بحب وهم فرحانين.
النهايه
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق