رواية عــروس الجبـــايــش الفصل السابع والاربعون 47الاخير بــقلم يـــاســـة الموسوي
رواية عــروس الجبـــايــش الفصل السابع والاربعون 47الاخير بــقلم يـــاســـة الموسوي
#عــروس_الچبـــايــش 🌼
بــقلم يـــاســـة الحلقة (47)
#والأخيــرة 🥹♥️
"عندما رأيتها أول مرة في قاعة المحاضرات لم تكن مجرد طالبة
كانت حكاية مكتملة الفصول
تحمل على كتفيها ظل زواج سابق انتهى وثقل قرابتها البعيدة من ذاك الرجل
الذي كان يوماً زوجها
والأدهى أنني كنت أنا الأستاذ أحد أفراد تلك العائلة التي تحمل جزءًا من تاريخها المؤلم، كيف لي أن أدرّسها وأنا أقرأ في عينيها أعمق قصائد الحزن والأمل؟
كان حبي لها أشبه بالولادة وسط العاصفة فكلما اقتربتُ شعرتُ بأصابع العادات تخنقني، كان الأهالي ينظرون إليّ بنظرة تقول: أين وفاؤك لـ قرابتك؟
أين احترامك لماضٍ نعرف تفاصيله؟
لكنني كنت أنظر إليها وأرى
أين وفائي لقلبي؟
أين احترامي للمستقبل الذي تستحقه؟ لقد كانت هذه العلاقة خيانة للتقاليد وإخلاصاً للحياة.
..................
يُـمـن :- الإنسان الصح من يدخل بحياتك لا اردياً حياتك تصير صح و خطواتك صح تصرفاتك صح تفكيرك صح وعقلك صح
و بُـرهـان الصح اللي دخل حياتي و غيرها
ايامي ويا صارت كلها حب و حنان
قيمتي كبرت بعين نفسي وحبيت روحي
و شكلي تصرفاتي هدوئي سكوتي وكلامي القليل، حبيت ذاتي و حتى اخطائي گمت احبها لان وره كل خطاء اسمع منه محاضره طويلة تخليني افتح عيوني على شغلات بعمري كله ما ماره عليه ولا سامعتها
صح چنت ما رايدته ومتخوفه من هذا الزواج و مجبورة بيه لان جان الحل الخلاص من جدتي وعمامي بس من بعد فترت الخطوبة الدامت ما يقارب السنه وبعد الزواج تعلقت بيه بشكل فضيع
و حبيته وعرفت ويا الحب شنو و عرفت روحي وعرفت الدنيا و عرفت كل اللي مريت بيه بالماضي هوَ اختبار الصبر حتى احصل هذه الجبر العظيـم
إذا اگـول إنسان كامل والكمال لله يمكن ابخس حقه إذا اگول عوض عن العشته ممكن كلمة عوض قليلة بحقـه إذا اگـول سنـد و أمان وحظن دافـي و روح طيبة
يمكن ما تكفي كل هذه الكلمات
كل اللي عشته قبله بكفه واللي جاي اعيشه ويا بكفه من بعد سنين طويلة من التعب والبچي والخوف والحرمان والعذاب والأذية والكسرة اليوم والاول مره انام وانا
مرتاحه وسعيدة و مطمئنه
كلشي ويا عشته حسيت اول مره اعيشة كلشي ويا شفته حسيت اول مره يمر عليه واشوفـه حتـى العلاقة الزوجية حسيتها شي جديد وغريب عليه و للعلـم هاي مو اول مره امر بالعلاقة بحكم انا جنت متزوجة گبل بس الاول مره إحس بروحي انثى المفروض تدلل و تحس وتنحس
شفت ويا روحي محترمة مو مجرد غريزة بين إدية و تنتهي ويا ما نتهتي العلاقـة الزوجية
بُـرهـان جان الإنسـان الوحيـد اللي عرفته بحياتي و كل اللي مروا بحياتي همَ حيوانات بشريـة تحكمهم غريزتهم لا اكثـر ولا اقل
خلصت ليلة العمر و تأكـدت بيها الحب مو بس كلام الحب افعال الحب تقدير الحب حنان و امان الحب لمسـه رقيقـه حظن دافي ضحكة صادقـة خجل و تقدير
والصبح من گعدنا ما قبل نرجع للبيت
گال هسه كلها بيت اهلي عمامي و خوالي وادري بيج تستحين منهم خلينا اليوم نبقى هنـا و باچر من يرحون وتقل الناس نرجع نزل دفع مال اليـوم ثانـي وبقينا هذا اليوم بالفندق من جديد
امي خابرتني وامه خابرته و صار عدهم خبر اليوم ما نجي
و الليلة الثانية ما تختلف عن الليلة الزواج الاولى وكل اللحظات البيها حلوة وحنونه مثل القبلها لحد ما طلعنا من الفنـدق البيت اهلـه
و اول ما فتنا للبيت ذبحوا خروف جوى رجلينا و خالتي و ريام لازمات الچكليت ويطشن علينا ويهلهلن و عمي استقبلنا فرحان و يبوس بينا اثنينه
گعدنا يمهم بالصالـة و انا إحس بروحي خجلانا منهم و هوَ طاير من الفرح بيه
بقينا يمها گاعدين وراها صعدنا الغرفتنا
اول ما فتنا سحبني عليه وباسني بخشمي
و ضحك و گال
-- مصقوله مو خشم
ضحكت بدون ما ارد رجع گال
-- تدرين البارحه كم مره گعدت بس حتى اتأكد هاي صدگ انتِ يمي لو جاي احلم والله ما مصدگ الحلم صار حقيقـه لا والله ما مصدگ ، اووف واويلي شگد احبچ
-- والله انا استحي من تحچي وياي هيج
و اضل ساكته ما اعرف ارد عليك
-- ههههه يا بعـد عيونـي الاشوف بيهن فدوة لليستحي ، لا تحچين ولا تردين گعدتج هاي بين إدية كلش كافيـة عندي
سحبني الحظنه و حظني قوي بـادلته الحظن وسألته
-- بُـرهـان
-- عمري
-- هاي صدگ هيج تحبني وما يضوجك بيوم من الايام جنت
ما خلاني اكمل كلامي بسرعة نزل راسه عليه وباسني قوي وراها رد
-- قالوا: كيف تحضن امرأة تحمل في ثناياها ماضينا؟
فقلت لهم ببرود الواثق:
الماضي ليس وصمة بل هو مِعراج الصدق!ماضيها جعلها أكثر قوة وأكثر نقاء وأكثر استحقاقاً للبدايات التي لا تُدنس
لقد رفضتُ أن أكون حارساً لأوهامكم القديمة واخترت أن أكون باني أحلامها الجديدة. و ما بيني وبينها ليس مجرد حب عاطفي، بل تعهد فلسفي أن الحياة يجب أن تنتصر على الركام وكل من عارضنا لم يعارض زواجاً بل عارض قوة القدر حين يختار أن يُصلح كسور الروح بيد الحب.
يُـمـن :- ابتعدت من حظنه وانا مبتسة ورديت
هاي شلون هيج تحچي منين جيب هذا الكلام يعني انتَ تكتبه لو احد كاتبة قبلك
بُـرهـان :- إني اكتبه
-- الله عليك
-- اي
-- كلش حلو من شوكت تكتب
-- من زمان كلش جنت اكتب بعد انشغلت بالدراسة و امور الدنيا فـ تركت الكتابة
و من بعد ما حبيتج رجعت للكتابة من جديد ورجعت أكتب احلى الكلام يعني طورت كتابتي اكثر من قبل
-- كلش حلوة الكلمات زين شنو اول شي كتبته من بعد انقطاعك عن الكتابة
سكت شويـة وغمض عين وحده يحاول يتذكر وراها گام للخانه فتحها وطلع منها دفتر يصير غلافـة من كارتون يعني مثل المسودة صغير واجى گعد مقابيلي
و فتحـه وباوعلي و بدأ يقرأ
-- سنوات صمتي لم تكن هروباً، بل كانت استسلاماً لقسوة ما لا يُكتب.
وحين رأيتُكِ لم أجد فيكِ فتاة أحلامي العادية بل وجدتُ المعركة التي تستحق أن أموت لأجلها. نعم كل شيء في هذا العالم يقف حائلاً بيننا: العادات، والأسوار، ونظرة المجتمع الحادة.
لقد همسوا لي بأن حبكِ مستحيل
وأن قلمي لن يجرؤ على رسم هذه الملامح في وجه الريح
ولكنني اليوم بعد هذا الغياب الطويل
أعود لأكتب لا قصائد غزل رقيقة
بل مانيفستو التحدي.
أنتِ لستِ إلهامي فحسب
بل أنتِ تمرّدي الجميل على كل ما هو مألوف ومرفوض
إذا كان هذا الحُب هو خطيئتي الوحيدة
فدعوا حبري يشهد بأنني مستعد لدفع ثمنها بصدق كلمة لم تُقال من قبلي قط
بُـرهـان :- هذه اول شي كتبته و منا وگمت ما اسيطر على عقلي بحيث كل ساعة كاتب اقتباس جديد نزار قباني ما گام يلحگني
-- هههههه عاشت ايدك وقلمك الحلو كلش حبيت والله
-- والله عاد محد حاب بگدي تردين اعلمج تكتبين
-- ههههه شلون مو يراد موهبه قابل اي احد يگدر يكتب
-- اي عادي كل واحد بينا يگدر يكتب مو شرط الموهبه إذا تحبين اني اعلمج تكتبين شي جديد ما يحتاج موهبه ولا اي تكليف
-- شلون
-- گوليلي شتحسين من تشوفيني و شنو اعنيلج و شگد تحبيني واني اعلمج الكتابة
أبتسمت ورديت
-- من اشوفك گلبي يبقى يدگ قوي و اتوتر و ابتسم هيج بدون سبب هيج لا اردياً وشنو تعنيلي إحسك تعنيلي الأمان اللي جنت ادور عليه من زمان وإحسك الشي الصح بحياتي و القوى والسند والعوض
أما شگد أحبك فـ ما اعرف شگد لان انا بس وياك عرفت قيمة نفسي وعرفت شلون يصير الحب أمان
-- كلش زين اخذت الجواب اللي جنت ادور عليه شكراً الجهودج طلعتي بسرعة تتقشمرين ههههههه
-- شنو يعني
-- هههههه منتظر هذا الاعتراف من زمان بس انتِ متعبه ما تحچين ولا تهتزين وتعترفين وهسه تقشمرتي وكتيتي الاول والاخير شكراً تعبتج ههههههه
-- هههههههههه
-- اموت عليج
-- إني هم احبك
تقرب عليه جاي يبوسني دگت ريام الباب وتگول
-- بُـرهـان عمامي هنا يردونك
رجع باسني وگام نزل يم عمامه وانا بدلت وخابرت امي گتلها رجعنا للبيت بقيت گاعدة بالغرفة وحدي خجلت انزل يمهم ساعة و اجتني رساله من عنده كاتب بيها
-- نمتي ؟
-- لا گاعدة
-- تعالي نزلي ليش وحدج
-- استحي انزل
-- اجي انزلج
-- بكيفك
رجع صعدت و فتح الباب مبتسم گمت مدلي ايده لزمته من ايده و نزلنا سوى
ماكو احد عمامه رايحين و باقين بس اهله
گعدنا يمهم و اندمجت ويا ريـام هي تسولف وانا اسمع الها بعدين خالتي كملت الغده وريـام گامت تساعدها گمت وياهن
ما اسوي شي هيج بس واگفه يمهن لان استحيت ابقى گاعدة وهنَ يشتغلن
تغدينا بسفره وحده و راها صعدنا الغرفتنا
ساعة واجت امي و خالتي ام تميم وعمي
بس سمعت صوتهم نزلت ركض حظنت امي وهيَ حاظنتني وتباركلي
بقوا يمنا ساعتين وراها خالتي أم تميم طلعت سنسله تصير صغيرة بس تجنن كلش نازكة انطتنياها گالت هاي هدية زواجج وامي جايبتلي سوارات هم لبستنياهن وراحوا
أسبوع مر على الزواج ومن صدگ جنت عروس ومن صدگ مدلله و مشيوله على كفوف الراحـه وبيـوم السابع سوينا حفله بسيطة بيناتنا
ريـام عزمت اثنين من صاحباتها وانا عزمت ورود و نسوان عمامهم وامي و عبير
و بنات عمي هاشـم بس البنات ما اجن
ما يگدرن اجت بس خالتي و عبير
شگد تونست بيها و شگد حبيتها جانت حفله بسيطة بس تجنن لحد الليل و احنه بعدنا نحتفل وراهـا صاحبات ريام وبيت عمهم راحن بقن بس امي و خالتي وعبيـر لبسن جاي يطلعن و يا طلعتهن بُـرهـان تلاگه وياهن بالباب مال الحوش ما خلاهن يرحن رجعهن للعشة
تعشن و واخذهن وصلحهن ورجع وباقي الايام مشت علينا كلش طبيعية ما بيها احداث تذكر غير بس كلام بُـرهـان وحنيته وخوفه عليه وأسلوبة و معاملته التجنن
مر شهـر تقريباً والوضع كلش تمام و هدوء
واليـوم الصبح گعدت ويا بُـرهـان من وكت على مود الحجز مالت السفر سويتله ريوك تريك وطلع و انا بقيت اعزل بالبيت
و غسلت الحوش ورشيت الحديقـة انوب گعدت خالتي وعمي حضرت ريوگهم
وخالتي طايرة بيه من الفرح تباوع عليه وتضحك وين ما اروح عيونها عليه ومن اجيت جايبة صينية الريـوك الهم يا فرحتها هيَ وعمـي تگول نازله عليـهم من السما
گعدوا يتريگون وانا صعـدت انظف بغرفتي
الساعة بالعشرة تقريباً عزلتها ولميت الملابس و غيرت النـزله و بالي كلش صافي ومـرتاح و وجهي مبتسم وحده هيج بدون سبب ومن خلصت من ترتيب الغرفـه اجيت للنقال اريد اخابر امـي
اول ما فتحته لگيت رسـاله من رقـم غريب واصلتني الساعـة بالاربعة الفجر مكتوب بيها
-- ايـام طويلة وسنين طويلة إني كاره الناس والعالم و الدنيا و روحي و كلشي حوالية جان اللي جنت عايشة جان غلط بلغط جنت عايش جسد بله روح ضايع تايها مكسور و مهزوز لحد ما دخلتي حياتي هنا يله شفت الدنيا شلون حلوة وشفت الناس شلون طيبة حسيتج رحمة و نزلت على روحي حسيتج دوه لجروحي ، تثقين بالله إني حبيتج من نص روحي وحبيت شكو شي متعلق بيج اسمج صوتج شكلج ضحكتج هدوئج زعلج بس بالأخير خسرتج وخسرت كل هذه الاطباع الحلوة البيج وخسرت روحـي وياج صح غلطت بحقج وأأذيتج كلش هواي بدون ما احس على نفسي بس والله هذا الشي جان من دافع حبي و حرصي عليج جنت خايف اخسرج خايف تضيعين من ايدي خايف من الناس ياخذونج مني لحد ما خوفي تحقق وخوفتج مني بدل ما إحسسج بالأمان و ضعتي من بين اديه، شگد حاولت اصلح الوضع وشگد حاولت ادوس على روحي و اتغير بس مع الأسف لليوم ما تغيرت ولا يمكن اتغير بيوم من الأيام و حالتـي يوم بعد يوم جاي تسوء اكثر من قبل وهذا الاعتراف جاي اعترف بيه الج وحدج لان ما اريدج تكرهيني ما اريدج تكرهين اللحظات الجمعتنا سوى ، يُـمـن البارحه عرفت بيج تزوجتي ومن البارحه لليوم اني ما نايم من البارحه لليوم اني بس ساكت و صافن
يعني صدك رحتي و خلص انتهى كلشي وانگطع املي و هسه إني لازم انساج و لازم اتقبل انتِ الغيري شلون يُـمـن شلون وإني ما اغفى وعيوني ما تشوف النوم إذا ما اتخيل شكلج الحلو گبال وصوتج الدافي
بـ إذني زين هسـه إني شنو اسوي اعتب عليج لو على روحي لو على گلبي لو أأذيج وأأذي اللي اخذج يُـمـن الموت اهون عليه من اتخايل صرتي الغيري الموت اهون من اتخايل گعدتي ويا حچيتي ويا ضحكتي ويا عشتي حياتج ويا لج دعيت ربي اموت وما يصبح عليه صبح بس ما متت الهسه عايش الهسه گاعد اتخايل انتِ يمه وبحظن يُـمـن جاي اموت والله جاي اموت
يُـمـن :- قريت الرساله وانا اديه ضلت ترجف و غصيت إحس عيوني گامت تحرگني اختنگت هذا منـاف يا الله من جاب رقمي
رجعت رفعت الرساله ليفوك شفت رساله ثانية جاية وره نص ساعة من الرساله الاولى مكتوب بيها
-- تدرين بيه من گد ما احبچ سكتت وما سويت شي ولا أأذيتج ولا أذيته ولا افكر اوصل يمكم و أأذيكم تدرين بيه من گد
ما أحبج راح اتنازل وادوس على روحي
وادعيلج بالسعادة
يا حبيبتي الحبيتها وإني بعز انكساري
يا حبيبتي الحبيتها وإني بـ أصعب ضروفي يا حبيبتي الحبيت الدنيا بوجودها
يا حبيبتي الحبيت روحي الاجل صوتها الدافي و ضحكتها الحلوة وعيونها الاموت بيهن ، مبـروك عليج واتمنى من ربي و هذا الدعاء طالع من نص گلبي كون يسعدج ويهنيج و يعوضج عن تعبج و حزنج
يُـمـن روحي ونبض گلبي تستاهل تعيش بسعادة و تستاهل تضحك وترتاح
أمانه سامحيني على كل دمعه زعل نزلت من عيونج الحلوة بسببي و ادعيلي أنساج و اتقبل فكرة خسارتج أدعي الگلبي تبرد نارة وادعي لعيوني تشوف النوم وتغمض
گعدت بالگاع وهيج عيوني گامت تصب
باللحظتها متت و ليش هيج تاثرت ما ادري بس كلش قهرني كلامة
بقيت كل شوية امسح وجهي وعيوني واحاول اسكت بس ارجع انهار من جديد
لحد ما رجع بُـرهـان لگاني منتهيه
تخبل من شافني هالگد باجيه بقى يسأل شبيج منو وياج شكو ما اگدر احچي شي
او بالاصح شگول رديت بطني ترجعني هوَ صح بطني بوقتها وجعتني بس مو بهاي الطريقة اللي تخليني انهار هذا الانهيار
حاول ينزلني يم اهلها بس ما نزلت حاولت ياخذني دكتور ما قبلت بعدين صعدت ريـام جابت الغده و گعد مقابيلي و يوكلني
بـ ايده انوب كل ما ينطيني لگمه تأنيب الضمير يموتني و ارجع ازيد بالبچي اكثر يعني انا ما مسوية شي ولا جاوبته ولا رديت عليه بس حسيت غلطت بحق بُـرهـان لان انقهرت وتعاطفت ويا رسائل منـاف
للعصر واخذني طلعني فر بيه بغداد كلها واخذلي مسكن و مررني على امي ورجعنا اخذنا عشة ويانا وتعشينه وانوب صعدني للغرفة وهيج حظني من گلبه لحد ما نمت
وباليوم الثاني رجعت كلش طبيعية والموضوع مر وانتهى و كل الكلام اللي قريته البارحه راح وخلص وانتهى بالنسبة الي ودعيتله الله يريح باله ويعوضه ويسعده ورجعت كملت حياتي من جديد
عشر ايام تقريباً وراها جهزنا وانطلقنا للسفر جان الاتفاق اول ما يخلص دراسته نرجع لان اني الوحيدة الامي وما تگدر على فراگي وهوَ الوحيد الاهله وصعب يعوفها وحدهم و يستقر برى
وقبل السفر بيـوم رحنا ودعنا امي وبيت عمي هاشـم وبيوم السفر طيارتنا جانت الساعه عشرة الصبح من رحنا للمطار اجوا ورانا امي وعمي هاشـم ودعت امي وحظنتها وداع اخير ما ادري وره اذا ارجع او لا
صعدنا بالطيارة وطرنا البلد جيد وانا عن نفسي جان كلشي جديد بالنسبة الي جديد الناس المطار الأجراءات الكعده المشية
و من صفنت على روحي عبالك جنت محبوسه بقفص واليوم فكوني ولا عبالك درست وطلعت وتعلمت ابد كلشي ماكو طلطميسه ما يعرف جمعته من خميسه بس اباوع بعيوني و كلش ماكو وكلش فقيرة
واول ما طارت بينا الطيارة بُـرهـان لزم ايدي وباسها و گال
-- رايد اوعدج وعد بين السماء وبين الگاع من هاي اللحظة وأنتِ راح تصيرين يُـمـن ثانيـة يُـمـن قويـة شجاعـة بطلـة ما تخاف ولا تهتز ولا تبچي وبنفس الوقت اريد منج كلمة و وعد تنطيني كون تتغيرين
و تساعدين نفسج و تساعديني حتى من يجون اطفالنا يلگون أب وأم اقوياء يگدرون يعتمدون عليهم ويسندون نفسهم عليهم
-- ان شاء الله اوعدك انا اصلاً اريد اتغير ما اريد ابقى هيج ضعيفه
-- فدوة للحلو اليسمع الكلام ويريد يتغير عمري وگلبي انتِ مو ضعيفه انتِ اقوى مرآه شافتها عيوني بس انتِ طيبة زيادة وطيبتج هاي هي مأثرة عليج
أبتسمت و خليت راسي على جتفه رجع گال
-- تشوفين السماء شگد عالية وبعيـدة عن الارض و شگد ما صعدتي ما توصلين الها
-- اي
-- إني أحبج بگــد بعـد السماء عن الارض
-- إني هم كلش أحبـك و إحسك مو بس زوجي لا إحسك صديقـي المقرب
-- و إني فعلاً صديقج و زوجج و سندج وقوتج وكلشي بالدنيـا واتمنى الاخر العمر ابقى هيج
-- الله لا يحرمني منك
رجع باس إيدي من جديد ورد ولا منج
لحد ما وصلنا وكملنا اجراءات المطر
و گبل للشقـة مالته ومنـا وبلشت حياة جديدة و ضع جديـد و مو بس هيج لا
لبشت رحلة دراسـية جديـدة قدمت ماجستير على حسابي الخاص و انقبلت من اول التقـديم الحمدلله
وهنا حياتنا صار عبارة عن دراسة الليل ونهار نقرأ الليل ونهار ندرس اكثر من مره انام على القنفه بدون ما إحس على روحي من گد ما اتعب ويجي يلگاني نايمة يشيلني
و يغطيني وينام بصفي و يعوف دراسته ومن يگعد يشمرها براسي ويگول كله من وراج نمت وما كملت دراستي
ما جان عدنا وقت نطلع ولا نتونس كل وقتنا نكتب نقرأ نراجع بس ومع كل هذا التعب جان مغرنگني حب وكل للحظة
ال تمر لازم يتغزل بيـه خـو إذا طلبت منه مساعدة بالدراسة يستغل الفرصة
و يتغزل و يشعر ويتحرش أكثر من ما يشرح واضطر اعوفه واروح اقرأ وحدي ويرجع يجي وراي يضحك ويگول يلا بعد
ما اسوي شي تعاي شعندج خليني اشرحلج وجذاب اصلاً ما يشرح يخلصها تزغلط بتزغلط
امي كل يوم تخابرني واهله نفس الشي كل يوم يخابرهم ويسأل عليهـم و حياتنا ماشية
كلش حلـوة لحد ما خلصت السنه الاول ونجحت الحمدلله وطول الفترة جنه مأجلين موضوع الطفل لحد ما نخلص دراستنا يله
بس اللي صار بهاي السنه فايروس كارونا انتشر انتشار مخيف وتوقف العالـم بكملة
عن الحركة وصار نادر جداً الطلعـة من البيت واللي يطلع فقط للضروريات واكيد هنا حضرت الدكتور خربط علينا نظامنا
وغلط بحسابة و انزرعت بداخل روحـي روح جديدة وثمره حب عظيمة وتأكدت من بعد الفحص حامل ولله الحمد
اول مره اثنينا ضجنا لان الوضع جان مريب ومخيف و على ساعة ننصاب و نخاف لا يطلع الطفل بيـه مشكلة بسبب الوضع اللي يمر بيه العالم لا سامح الله
بس ارادت الله اكبر واعظم وارحم من كل المواقف والتوقعات و رزقـه مقدر ومكتوب
ان يجي بهذا الوقت وبهذه الضروف
اشهر الحمل مرت كلش صعبـة عليه والسبب الخوف الجان متربع بگلبي جنت اخاف على طفلي من الوباء و اخاف على زوجي لان يطلع يجيب احتياجاتنا وبنفس الوقت دراستي وصعوبتها و وقتها الحرج
وحالياً احنه سنه 20 سنه التحديات والمصاعب جانت سنـه حلوة وصعبة وبيها ذكرى كلش كلش حلوة ولادة أبني حبيبي مجـد ونجاحي من السنه الاولى من دراسة الماجستير
مجـد صار بـ اصعب الايام والضروف وطلع تعبان بشكل فضيع بحيث انطونا نسبة 60٪ يبقى عايـش بس الحمدلله والشكـر أبني طلع قوي و تحدى كل الصعاب و قاوم و عاش بفضل الله
خالتـي جانت كل يـوم تخابر ساعة وساعتين وثلاثـة وتبقى بس تباوع عليه وميته بيه تريد بس تحضنه بس الضروف جانت كلش صعبة ورجعتنا للعراق مستحيلة بهذاك الوقت
وبنفس هذا الوقـت ريـام انخطبـت واكيد ما سوت حفله قويـة ولا عرس ومعازيـم
بس بين اهلها وبين اهل الولد ، والـولد جان من معارف عمـي أبن صديقـه يصير
من عائله ميسوره وبنفس الوقت هوَ خريج وموظف يعني مستوى نفس مستوى ريـام
واكيد ريـام تستاهل كل الخيـر
أنا و بُـرهـان ما حضرنا لا مهرها ولا عرسها بس شفناها على النت ودزت النا كل اللحظات صورة وصوت عبالك موجودين وياهم
الأيام تمشي والوضع بيني وبين بُـرهـان ما اله كلمة توصفـه لان حياتنا ينطبق عليها كلمة الحياة المثاليـة و هوَ الرجل المثالي وكل ما اگعد ويا روحي واصفن على السنوات المرت والعذاب اللي تعذبته وبعدين اشوف حاضري اللي جاي اعيش احمد ربي واشكره الف مره
امي من تخابرني وتسألني شلون بُـرهـان ارد الها لا تسألين عليه لان طلعلي بالحظ يا نصيب ترجع تضحك و تگول صلِ على النبي لا تحسدينه
سنـه 2020 صح خلصنا محجورين وما نطلع غير بس للضروريات وبنفس الوقت جانت سنه الحمل الولادة يعني كل ايامي انا بالبيت بس سنه 2019 هي الانتقاله القوية بحياتي
بهاي السنه صرت إنسانه جديدة وكل الخوف الجان مزروع بداخلي انتهى وتغلبت عليه لان گمت اطلع واطب
و اتسوك واروح للجامعة وارجع و صارت عندي علاقات ويا بعض الجيـران وصرت اجتماعيـة ارد واحچي و اشارك والخوف والسكوت صاروا من الماضـي
بُـرهـان بهـاي السنـه تقصد يشمر كل المسؤولية عليه بحيـث صرت اعتمد على روحي بكل شي وحتـى مرات إذا ما عندي شي وهوَ بدوامه اللبس واروح وراه اسويلة مفاجأة يعني صرت اطلع وحدي وامشي وحدي واخلص كل اموري وحدي
وراها طلعت حامل وصار الوباء و انجرنا وبعد ما طلعت اما بعد الولادة و تحس الوضع رجعت اطلع و اقوم بحتياجاتي واحتياجات ابني وبيتي و قليل كلش احتاج مساعدة بُـرهـان
وبسنـه 2021 حصلت على الماجستير والفضل الاول الله سبحانه وتعالى والبُـرهـان اللي بذل كل جهده حتى ارصل الهذا الحال وهذا المستوى وصرف دم گلبه بس حتى احصل الشهادة واتوفق بيها
من بعد وگفت ناقشت واخذت الماجستير بتقدير عالي جداً رجعت بذاكرتي للسنوات
الجنت بيهن اضم الخبزة بصدري حتى اكلها من اجوع رجعت الايام الكتل اللي انكتله و ايام رائـف و أديان والعرك على الليالي و السحلات والجلاليق أيام منـاف والشك وعدم الثق والتجاوزات الما الها اي مبرر واي داعي رجعت الايام ضعفي ودموعي وعذابي وسهر ليلي على سجادة الصلاة اشكي الربي أذيتي غمضت عيوني
و نزلت دمعتي وانا اردد بين وبين روحي
--وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ}
رجعت فتحت عيوني ومسحت عيوني لگيت بُـرهـان گاعد ويباوعلي وهوَ مبتسم ابتسامة فخر رجعت ابتسمتله
و اگول الحمدلله ربي ما عافني ونجاني ونصرني و وفقني فعلاً من كان مع الله كان الله معَ وانا جنت ويا ربي بكل للحظاتي وبعمري ما أيست من رحمته وعطفه وحنانه عليه واليوم ربي وياي و مغرگني بنعمة العظيمة الف الحمدلله
وهنا خلصت اربع سنوات من عمري وانا بالغربة بس ولا مره حسيت بروحي غريبة وما عندي احد لان زوجي جان اهلي وكل الناس
اما مجد ابني فـ هذا عالم ثاني كائن ما اگدر اوصفه او ما اعرف اوصفه يشبهني كلش هواي وشكلـة عبالك ابنيـة وشعره كيرلي بس تصرفاته تصرفات ابو و حركاته حركات ابو واصلاً متعلق بـ ابو بشكل غريب وابو متعلق بيه بشكل اغرب ما شايفـه مثلهم من قبل تگول عبالك اصدقاء من زمن طويل واحد يعرف الثاني
وهاي اذكر من عرفنا الجنس بعيادة الدكتورة بُـرهـان گال
-- مجـد راح يصـير صديقي المفضل
-- مجـد منو
-- أبنه
-- راح تسميه مجـد
-- كلش عاجبني هذا الأسم تعرفين ليش
-- ليش
-- يذكرني بالرسام واللوحـه
-- يا رسام يا للوحه
-- تذكرين قصة اللوحـه الحچيت الكم عليها بالمحاضرة
صفنت اريد اتذكرها وهوَ يباوعلي منتظرني اتذكر وراها رديت
-- هاا اي اتذكرت هاي بيوم العترف تحبني
-- هههه اي عاد صدقة الهذيج الايام شگد جنت اخاف منج
-- ههههه
-- المهم الرسام جان أسمه مجـد ومن ساعة ما قريت قصـته و قررت اضيف الها واحورها حتى اعبرلج بيها عن حبي واعجابي و إني حاب هذا الاسم
-- يعني أنتَ ابو مجد من يوم قصة اللوحة
-- وانتِ ام مجد من هذيج اللحظة
-- فدوة المجد وابو
-- وامه وشكلها الحلو
أبتسمت رجع گال
-- بس إذا ما عاجبج و بـبالج أسم ثاني عادي ما عندي مشكلة انسمي الطفل الثاني مجـد مو مشكلة المهـم موافقج وقناعتج بالموضوع
-- لا حلو حبيته
-- هذا هو لعد متفقين وان شاء الله يجي بصحة و سلامة ويحفظكم الي من كل سوء
-- إن شاء الله ويحفظك النا
أبتسمت وانا اتذكر هذه التفاصيل الحلوة و الذكريات الحلوة وكل اللحظات الحلوة العشتها بالبنان حتى الوباء شگد ما جان خطر ومخيف بس حلو بالنسبة الي لان لليل ونهار احنه سوى لحد نهايـة الـ 2022 حجزنا و جهزنا نفسنا ورجعنا البلدنا
من بعد فراق اربع سنـوات
رجعنـا ويانا أبنه عمره سنتين ثمره حبنا وصبرنا و تحدياتنا وضروفنا الصعبـة
نزلنا بالمطار لگينا امـي و خالتي وعمي
ينتظرونا شافهم بُـرهـان من بعيد و اشرلي عليهم لحد ما وصلنا يمهم شعور اللقاء من بعد الفراك شعور عظيـم وبالاخص من حظنت امي وشميت ريحتها من بعد فرك اربع سنوات ومن شفتها شلون شالت أبني وحظنته وتبوس بيه وتبچي متت انهاريت صدك ماكو اغلى من حظن الام وماكو اقوي من حنانها لو مهما مر الزمان عليك
رجعنا البيتنا وعمـي خطية جايب اثنين خرفان واحد على رجعتنا وسلامتنا والثاني المجـد
ومـجد ويا مجـد مدلل العائله جميل العشيرة على گولت ريـام
وها ريـام من بهاي الفترة خلفت ولـد وابنها و أبني واحد يغار من الثاني لان
مجـد يريد جده وبيبته بس اله و أبنها يريد جده وببيته بس اله وهاي احنه باقين على نفس الرنه من تجي لحد ما تروح واحد لازم شعر الثاني لو واحد يعض بالثاني
وبالأخير ينتهي النزاع من ياخذهم جدهم للأسواق يشتريلهم ويرجعهم
......
بيت عمي حاكم ابد ما شفتهم ولا شافوني ولا حاولت اعرف اخبارهم و بيت سمعية نفس الوضع العلاقـة شبة مقطوعة بيناتنا وحتى مواصل بين الاخوات ماكو بس إذا تلاگوا بمكان وحده تسلم على الثانيـة وهذا هو
اما رائـف ما رجع للعراق نهائياً وخاف جان يجي بالسنه مره هسه هاي حتى المره گطعها ومن زواجي لليوم ما جاي للعراق ولا شايف اهله و العرفته عنه بعده لحد الأن ما متزوج
اما تميـم صار عنده ولـد ثالث و مـراد صارت عنده أبنية ثانيـة يعني تميم حالياً عنده ثلاث اولاد و مراد عنده اثنين بنات ولد
و امي وعمي هاشـم طيور الحب وعلاقتهم
تخبل و عمي لحـد علاقتهم مثل ما هيَ وعمي نعمة العم ونعمة السند وحتـى أبني يحبه ويعامله بكل حب مثل ما يحبني ويعاملني
و اجدادي ما عندي وياهم شي ولا شفتهم
ولا شافوني بس سمعت عمـي الوسطاني متوفي بفترة كارونا و جدتي حالتها الصحية باقيـه بـ ايد الرحمن الرحيـم
اما منـاف بعد لا راسلني ولا خابر ولا سمعت منه اي كلمـة و السنه الفاتت سمعت على آساس متزوج من أبنية يتيمة وعايشة بيت عمها ومع الأسف علاقتهم الزوجيه كلش مدهورة لان هوَ كلش مشدد وياها و الابنية لليوم ما عدها تليفون ولا طبه ولا طلعه ولا تشوف احد ولا احد يشوفها بحيث حتى بيت عمها ما تروح عليها ابد و صار سنه من متزوج وهي بهاي السنه ما رايحه غير مره وحده وره ما عازمينها عزيمة العرس وما يريد اطفال ومن الاول متفق ويا عمها ما يريد خلفه وماكو طلعه و طبه و صديقات موبايل وعمها موافق على الاتفاق والشروط لان يتيمة و ما عدها احد يريد بس يخلص من مسؤوليتها يعني بصريح العبارة شمرها شمر يريد بس يخلص منها
انا سمعت هاي اخر الأخبار والمعلومات من ولاء بنت عمي هاشـم لان مره صايرة مشكلة بينه وبين مرته و ضاربها و زهراء جانت بيت اهلها فايته تحاميلها على أساس فـ ضارب زهراء وياه ومطردها ومن راجعه زهراء البيت عمي هاشم راجعه مقهورة من عنده وكاته الاكو والماكو وحاچيه الولاء والخالتي عليه وعلى
علاقته بمرته
وهسـه الهنا وبعد ماكو شي يستحق يتذكر كل المريت بيه شاركتكم بيـه وحچيته الكم
و رجعت عشته وياكـم من جـديد و المغزي من سرد قصة حياتي بتفاصيلها الحلوة والمره هوَ رحمة الله وعوضه لو بعد الف سنه و بُـرهـان على رغـم من كل الاتهامات اللي توجهتله وكل الضروف اللي صارت ضده وكل الموقف الصعبة المر بيها وكل الأذية اللي تأذها صار العوض الجميل اللي انتشلني من الظلمات الى النـور العوض المسح كل دمعه وكل حزن وكل أذية بُـرهـان اليـوم ثبتلي قبل لا يثبت للعالم هوَ الصح من بين كل الاخطاء العشتها قبله هوَ الأمن والأمان من بعد كل الخوف والرهبه الحانت الساكنه گلبي هوَ السلام الداخلي ومكافئة عن ايامي الصعبـة
اتمنى جنت خفيفه ضل عليكم وحبيتوني مثل ما حبيتكم وشكراً من القلب على كل كلمة حلوة وكل دعاء صادق دعيتولي بيه
.............
اما بعد فقد جف القلـم و انطوى الكتاب ونال صاحب الصبر الطويل عوضه الجميل
وفي يـوم الجمعة المصادف 5 /12 /2025 تم الختام شكـراً جزيلاً متابعينا الاكرام اتمنى ان تكون هذه الروايـة البسيطـة
نالت اعجابكم ♥️
والشكر كل الشكر الأدموناتي وحبيباتي وصديقاتي ( أيات، رنا، حوراء) على مساندتهم الي على طول فترة النشر ♥️
الى هنـا اعزائي المتابعين انتهى مشوار عــروس الچبـــايــش واعتذر منكم إذا طولتها أو تأخرت عليكم التقيكم بـأذن الله بـ بروايـة جديدة واحداث جديدة وابطال جدد كل الحب الكم يــاســة 🌱
اما الأن ستكـون الختاميـة بُـرهـانيـة جميلـة خطت بـحروفه الصادقـة ودون
بها أنتصارة والتحديات ♥️
-- إلى رفيقة روحي وأم طفلي التي علّمتني
أن الحبّ هو أعلى درجات العلم
حين أرى هذا الكائن الصغير ينام بين ذراعيك ثمرة لقصتنا التي تحدّت كل شيء أعود بذاكرتي إلى تلك الأيام التي كنّا فيها أنا الأستاذ وأنتِ الطالبة
لم يكن الفرق بيننا مجرّد سنوات
بل كان فجوة كاملة من التقاليد
النظرات الرافضة، والهمسات التي كانت تقول: هذا مستحيل هذا غير لائق هذا ضدّ العُرف. أذكر جيدًا كيف كانت عيناكِ تلمعان بين الرفض والتردّد لا خوفًا مني
بل خوفًا عليّ وعلى تلك الصورة التي رسمها لي المجتمع في برجي العاجي
لقد كنتِ بصمتكِ ترفضين لا الحب بل صعوبة الطريق واليوم وبعد أن تجاوزنا كل جدار وكسرنا كل قيدٍ أُسري أو اجتماعي وبعد أن أثبتنا للجميع أن قواعد الحياة تكتبها القلوب الشجاعة وليس الألسنة الفارغة ، أدركت أن أصعب المحاضرات التي قدمتها لم تكن على لوحٍ أسود بل كانت في إقناع روحينا بأننا نستحق هذه النهاية. لقد كان رفضكِ الأوليّ هو الحافز لأؤكد لكِ وللعالم أن الحبّ الحقيقي لا يعترف بمسمى أستاذ وطالبة واقارب اهل إنه يعترف فقط بمسمى روحان توحّدتا
و طفلنا هذا يا حبيبتي ليس مجرّد مولود إنه البرهان الحيّ على أن الحب إذا صدق فإنه يهدم عروش التقاليد البالية ويبني بدلاً منها مملكة صغيرة من الدفء والسكينة شكرًا لكِ على جرأتكِ في النهاية
وشكرًا على الإيمان الذي لم يمت رغم كل المعارضة أنتِ درسي الأجمل الذي لا أريد أن ينتهي و ما مررنا به لم يكن مجرّد قصة حبّ عادية بل كان ثورة هادئة في وجه كل من وضع الحبّ في إطارات ضيّقة
زواجنا لم يكن مجرّد عقد بل كان توقيعًا على وثيقة الشجاعة والتمرد النبيل
وها نحن اليوم نحمل في أيدينا ثمرة هذا التحدي طفلٌ يجمع ملامحكِ التي لطال ما حلمت بها و يروي بوجوده حكاية انتصار الإرادة على الرفض
و كلما رأيتُكِ تحملينه أيقنتُ
أن أرقى مراتب العلم ليس في الكتب
بل في فهم أن الاحتواء أقوى من العادات والرحمة أعمق من التقاليد.
لقد رفضنا أن نكون مجرّد قصّة تنتهي بالخضوع و اخترنا أن نكون القصّة التي تبدأ بعد الرفض لم يعد هذا المنزل مجرّد مسكن، إنه الملاذ الذي برهن للعالم أن العشق لا يعرف فصولًا دراسية أو فروقات اجتماعية. وعادات وتقاليد خرافية
دائمًا وأبدًا، أنتِ انتصاري الأعظم
والدرس الذي لا يُنسى...
النهـايـــة....
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق