سكريبت الغيره كامل وحصري بقلم سهى طارق
سكريبت الغيره كامل وحصري بقلم سهى طارق
كنت قاعدة على السرير، المروحة بتلف ببطء، والموبايل في إيدي.
فتحت الواتس كعادتي، بدور على أي حاجة تلهيني.
لقيت رسالة من أختي، ملك.
فتحتها وأنا مش متوقعة حاجة، بس الكلام شدني من أول سطر:
شايفة ياختي مرات عمك؟ عندها علب دهب قد كده!
عمك مدلعها، مش زينا إحنا، بنشوف الدهب في المسلسلات بس.
حتى الأكل! كل يوم لحمة وحلويات،
وإحنا؟ بالعافية بنشوف اللحمة مرة في الشهر!
وقفت...
قلبي اتقبض، وبصيت في الموبايل كأني مش مصدقة.
مش مصدقة إن أختي بتفكر كده.
دماغي لفت،
إزاي بتقارن؟
إزاي بتبص للي في إيد غيرها؟
هو إحنا بقينا نحسد من غير ما نحس؟
هو النعمة بقت تتقاس بعدد العلب؟ ولا بكام مرة بناكل لحمة في الشهر؟
ما قدرتش أرد كتابة، حسيت إن الكلام مش هيوصل زي ما أنا حاسة.
قررت أكلمها،
رنّيت عليها، وأول ما ردت، قلتلها من غير مقدمات:
ليه كده يا ملك؟
ليه تبصي لغيرك؟
بابا بيكافح عشاننا، بيجيب اللي يقدر عليه،
وإحنا عايشين وسترنا ربنا، مش كفاية؟
اللي عنده دهب مش دايم،
واللي عنده صحة ورضا، عنده كنز.
ردت عليا بحدة، صوتها كان فيه وجع مش مجرد غضب:
ستر إيه؟ إحنا محرومين من كل حاجة!
مش شايفة عمك بيعمل إيه لمراته وولاده؟
ليه إحنا لأ؟ ليه إحنا دايمًا بنعد الأيام والمصاريف؟
فضلنا نشد فالكلام،
وأنا مصدومة… مش من كلامها بس،
من اللي جواها، من الغصة اللي كانت ساكنة قلبها من زمان،
من الحقد اللي معرفش دخلها إمتى،
ومن الغفلة اللي خلتها تنسى النعم اللي حوالينا.
عدّى أسبوع،
والدنيا اتشقلبت.
سمعنا إن مرات عمي تعبانة،
مرض وحش، ربنا يشفيها ويخفف عنها.
البيت كله اتقلب، والدهب بقى مرمي على الرف،
واللحمة ما بقتش تفرق،
والضحكة اختفت من وشوشهم.
كنت قاعدة جنب أختي،
وهي ساكتة، ماسكة الموبايل، بس مش قادرة تكتب.
بصيتلها، وشوفت في عينيها حاجة اتكسرت.
قولتلها بهدوء، من غير عتاب:
شفتي؟
ربنا بيدي وبيمنع،
مفيش حد واخد كل حاجة.
اللي عنده دهب، ناقصه الصحة،
واللي عنده صحة، يمكن ناقصه راحة.
اللي ظاهر قدامنا مش دايم،
واللي مستخبي جوا البيوت محدش يعرفه.
محدش كامل،
ومفيش حياة كاملة،
بس في ناس بتشكر، وفي ناس بتقارن.
وإحنا؟
لازم نختار نكون من اللي بيشكروا،
عشان اللي في إيدنا نعمة،
ويمكن غيرنا بيتمنى بس نصها.
اللي بيبص للي في إيد غيره، عمره ما هيشوف اللي في إيده.
واللي بيقارن، بيخسر راحته قبل ما يخسر أي حاجة تانية.
الرضا مش ضعف، الرضا قوة بتخليك تشوف النعمة حتى لو كانت صغيرة.
ويمكن اللي أنت شايفه قليل، يكون عند غيرك حلم بعيد.
#تمتت
#الغيره
#مشاعر_كاتبة
#سهىٰ_طارق_استيرا
تعليقات
إرسال تعليق