سكريبت آلاء بقلم أية موسي كامل وحصري
سكريبت آلاء بقلم أية موسي كامل وحصري
أنا مش ضد الحب.
بس ضد إنه يستخبى، يتخبى، يتكتم، كأنه غلط.
أنا بحب من سنين، بس ما قلتش.
مش علشان خايفة، بس علشان اللي بحبه مش جاهز يسمع، أو يمكن مش عايز يسمع.
كريم... ابن عمي، أول حد ضحكت له وأنا صغيرة
بحبه، بس ما مش عارفة إذا كان حب، ولا تعوّد، ولا أمل.
بس بحبه.
وأمي؟ كانت دايمًا تقول:
"اللي يحبك يتقدملك، مش يدوّرك في السر."
وأنا؟ كنت بسكت، وبحب في السر.
بس لما كنت أسمع حبيبة، صاحبتي، وهي بتحكيلي عن آدم، ابن عمها، وعن أمها اللي بتقولها:
"آدم محترم، ولو بيحبك، خليه يقول."
كنت بحس إن في فرق بين أم بتخاف على بنتها، وأم بتخوف بنتها من كل حاجة.
مع ان ادم مش معبر حبيبة ولا مكلمها واصلا لما يشوفها بالكلية يلف وشو .. بس دايما عندها امل .. زي كدا
بس كريم قالها ... قالها النهاردة لما جه عندنا
كان قاعد بالجنينة هو واخويا .. قام اخويا يجبله شاي .. انا كنت قاعدة بعيد عنهم .. بكتب في مذكرتي الي حتشوفوها كتير معايا .. لقيته نده عليا .. رحتله بإستغراب
- نعم
- الاء .. انا بحبك
سكتت بصدمة ... متوقعتش يوم ما يجي يقولها يقولها بالشكل ده
- انا خايفة
- خايفة من ايه
- خايفة منك يا كريم ... انت سمعتك بالعيلة مش افضل حاجة .. وما بتصليش
- حتغير علىشانك
ابتسمت وفعلا
بدانا نحب بعض انا وكريم بالسر .. مكالمات .. رسايل .. ضحكة بعزومة
كنت بحبه .. وحبيته اكتر
في يوم بعد شهرين من الكلام ده كنت قاعدة على الموبيل .. بيشوف اخر فضيحة لمشاهير لقيت حبيبة داخلة عليا .. واول حاجة سالتها
- طابخين ايه النهاردة
- صينية بطاطش وفراخ
- انا حتغدى عندكم ..ماما طابخة سبانخ .. وانا ما بحبوش
ضحكت عليها وجات قعدت وفتحت اللبتوب بتاعها
- بصي منازلة فليم تحفة
- حنحضر هاري بوتر
- يا الاء حرام عليكي .. دي المرة التامنة الي نحضر فيها السبع اجزاء
- خليها التاسعة
وطبعا انا الي كسبت وفتحنا هاري بوتر
بعدها بيومين كنت قاعدة في بلوكنة اوضتي .. بقرا قران .. كانت الدنيا الصبح ما بعد الفجر بشوية ... الفترة الي فيها نور بس مش طالعة الشمس .. كان صوت عصافير خفيف حوليا.. والورود حواليا .. هي اه بدات تدبل ... لاني مابهتمش فيها .. بس لسا جميلة .. اجواء شاعرية
يقطعها صوت رنة موبيلي وكانت حبيبة
-ايوه يا حبيبة قلبي
- اسمعي في حاجة غربية حصلت
- في ايه
- ادم كلمني من شوية وبيقولي اسف اني كلمتك في وقت زي ده بس عاوزك النهاردة ضروري انتي والاء في كافيتريا الجامعة
قلتلها بحماس
- اكيد حيعترف بحبه ليكي
- او في مصيبة
- مالك كئيبة كدا
- يا حبيبتي ده ادم .. ادم الي لو نادينا عليه حيمسك نفسه ويجري .. انا اصلا مش عارفة نمرة موبيلي منين
- تفألو خيراً تجدوه ... اقري اذكارك والبسي .. اشوفك في جامعة يا حلوة
قفلت معها وقمت البس وجهزت ووصلني اخويا على الجامعة وشفت حبيبة وبدانا محاضرات وانا بفكر ادم حيكون عاوز ايه
خلصنا ورحنا نجري حرفيا على الكافتريا .. لقيناه مستنينا وعلى وشه ابتسامة .. حيعترف .. حيعترف
وصلنا لقيناه بيبص علينا شوية انا وشوية حبيبة واحنا قااعدين بنستنى يقول حاجة
- ادم .. هو انت جايبنا تتامل في وشوشنا .. في ايه
قعد ساكت برضو وهو محرج
- في ايه يا ادم
- الاء
قولتله بملل
- نعم
- بحبك .. وعاوز اتقدم
كاان نفسي اقوله حبك برص يا بعيد .. بس كنت ماسكة نفسي بالعافية بعد ما شفت تعابير وش حبيبة
- احمم .. بص يا ادم .. انت شب كويس وكل حاجة .. بس انا قلبي مع حد تاني ..عن اذنك
مسكت نفسي وخرجت بسرعة وانا بجر ورايا حبيبة زي البهيمة وهي مش مستوعبة لسا
طلعنا من الجامعة وهي منهارة ..دخلنا كافيه جمب الجامعة .. قعدنا .. طلبت اتنين مانجا
- ما تزعليش .. انت عارفة اني ما كنتش اعرف
- عارفة
- وعارفة اني بحبك اكتر من ماما
- عارفة من غير ما تقولي
وصل العصير وكانت بتبص ليه وبتحركه بهدوء .. بتحاول تلقي تفسير
- يختي والله الرجالة دول عاوزين الحرق
- حتى كريم
- لا كرومي غير
- ايوه بقا
ضحكت ولقيتها فجاء بتقول
- تصدقي انا وادم كنت عارفة اننا مستحيل لبعض .. بس كان عندي شوية امل
- يختي اتجوزي الي بيحبك وما تجوزيش الي بتحبيه
- صدقتي
انا قاعدة بخطط لحاجات ... محدش يتوقعني
خرجنا واحنا بنضحك ..لكن شفت حاجة يمكن تموتني من لقهر
شفت كريم وهو بيركب بنت العربية ... البنت دي من دفعتي .. كان بيفتحلها بابا العربية وكان بيبصلها بنظرة.. نفس النظرة الي بيبصها ليا
لف يركب فشافني بس انا لفيت ومشيت
- كرومي غير
- ده اول واحد عاوز حرق
قلتها بقهر وانا شوية وحعيط
مشينا ووصلت لبيت وقبل ما ادق الباب رن كريم
فتحت المكالمة بسخرية
- اهلا استاذ كريم.. ازاي طلعتك مع سنيوريتا ملك .. اخدتها فين
- الاء الموضوع مش كدا
- اومال ازاي .. لما اشوفك قدام باب جامعتي يا بجح ماسك ايد واحدة وبتفتح الباب .. رومانسي يالا .. حافظ موعيدي اكتر مني .. جاي بعد ما اروح
- اسمعني
- اسمعك ازاي وانا شيفاك بتبصلها نفس ما بتبصلي .. مشاعرك كدابة .. كلامك كله كدب .. حتى نظراتك تمثيل
- حبيبتي
- بلا حبيبتي بلا زفت .. رقمي تمسحوا .. انا لوشفت وشك حقسموا نصين .. تعرف اني حروح على أي تجمع عائلي ما تجيش .. بيتنا ما تعتبوش .. لا بيتنا ايه .. الشارع الي فيه بيتنا لو فكرت تيجي حتلاقني مستنياك على اوله ومعايا الخرطوم الي امك شهيرة كانت بتضربك فيه في الحارة يا معفن ..ومن غير سلام
قفلت وحظرته من كل حاجة دقيت الباب فتحولي ودخلت بهدوء طلعت على اوضتي غيرت وقعدت على سريري ومسكت دفتري وكتبت
أنا مش ضعيفة… بس اتكسرت.
مش علشان كريم، ولا علشان الحب اللي ما كانش حب، بس علشان أنا صدّقت.
صدّقت إن في حد ممكن يحبني زي ما أنا، من غير ما يجرحني، من غير ما يكسّرني.
بس اتعلمت.
اتعلمت إن مش كل كلمة "بحبك" معناها أمان، وإن مش كل ضحكة معناها صدق.
أنا دلوقتي مش بحاول أنسى كريم… أنا بحاول أفتكر نفسي.
أنا مش ضد الحب، بس ضد إني أضيع علشانه.
قمت بصيت لنفسي .. شيء مقرف.. مقرف جدا انك تدي مشاعرك لحد ما يستهالكاش .. تدي كلام ومشاعر وحب وقرف لشخص زي كريم .. اني اغضب ربنا واخون ثقة اهلي علشانه شيء مقزز .. ليه رخصت نفسي وكلمت واحد بدون علم اهلي بمسمى " الحب " بلا حب بلا قرف
كنت بعيط .. انا مقهورة ..نفسي انساه .. نفسي اشيل حبه من قلبي
دق باب ودخلت ماما وفي ايدها صنية اكل حطتهاا على المكتب ووقفت ورايا وقالت بكل حنية الارض
" مالك يا حبيبة ماما ؟"
انا لفيت لماما وحضنتها بهدوء ... عاوزة بس احضنها ..مش عاوزة لوم ولا عتاب ..مر خمس دقايق وبس صوت شهقاتي الي طالع
-خانني يا ماما
- كريم
سالتها بلا مبالاه ..كانه عادي !!
- اه يا ماما
- طبيعي شخص زيه يعمل كدا .. تعالي كلي بعدين نتكلم
اكلت شوية وطلبت منها تشيلها وجات بعدها نتكلم
- طب ليه عمل كدا .. انا بنت عمه ... يعني المفروض يحميني بدل ما يضرني
- سمعتي بالمثل " خاف من عدوك مرة ومن صديقك الف مرة " هو كدا
- ماما انا تعبانة .. حبوه تعبني .. منظره وهو بيضحكلها قاهرني
طبطبت على ايدي
- معلش .. فترة وتعدي .. اعتبري كريم صفحة واتقفلت .. ودرس نتعلم منه
-معاكي حق .. ماما ... عاوزة انام
- تعالي نامي
نمت في حضنها وهي بتقرأعلى دماغي ونمت ..صحيت المغرب صليت وقعدت اسبح في البلوكنة بتاعتي .. ببص على الورد الي بدا يدبل .. زي .. الورد بيشبهني .. اهملت لما كنت مهتمة بكريم .. مش قادرة ارجع زي ما رويات بتكتب .. في يوم وليلة ارجع .. اكتشف انه شخص ما يستهلنيش وخلاص .. اقرر . اعيش حياة بدونه .. مش قادرة
كلمت حبيبة وفضلت ل2باليل مش عارفة انام .. صليت الفجر ونمت ..ما صحيتش غير على اذان العصر
صليت ودعيت ربنا دعوتين
يشيل حب كريم من قلبي
ويبعتلي زوج يصب علي الحب صبا
زي ما دعت بنت ابي بكر ...بعد ما رفضت امير المومنين ( عمر بن الخطاب )
بعد خمس ايام .. كنت ملازمة اوضتي .. باكل قليل .. بنام كتير .. بعيط اكتر .. بدعي ربنا .. بس النهاردة لازم اطلع في رسالة لازم اوصلها
لبست ونزلت ورحت على بيت خالتي .. لمقابلة سيف
سيف ابن خالتي .. معنا بالدفعة .. كانا انا وحبيبة صحابه الوحدين . يقعد اخر مقعد .. وكل يوم كانت لازم حبيبة تلاقي ورقة حب .. بلغات مختلفة .. كانت تستعين بتشات جي بي تي علشان تعرف مكتوب ايه وانا ابص لسيف ونكون حنضحك .. كنت عارفة انه الي بيكتبها .. وهوعارف اني عارفة .. هو بيحب يتعلم لغات .. بس ولا مرة حبيبة فكرت انه هو !!
لما عرف انها بتحب ادم .. قرر يبعد
غير الكلية والصحاب وكله .. علشانها
دقيت جامد وفتحت بنت خالتي ودخلت متحمسة اشوف ردة فعل سيف
- سيييييف .... سييييف
- اهلا بالاء
- عندي ليك خبر بمليون جنيه
- ايه ؟
- حبيبة
قام مخضوض
-مالها حبيبة
- اهدى كويسة وبتسلم عليك ..
بصراحة مش عارفة ازاي فهمته وازاي زبطت الكلام ما عليكم
رحت بعدها عندهم علشان اجس نبض
ونا طالعة لقيت ادم نازل .. ابتسملي ونزل
طلعت فتحتلي مامت حبيبة ورحبت فيا ودخل لهبلة حبيبة
- سبرايز
- الاء
قامت حضنتني
- انا متوقعتش تيجي الفترة دي
- ليه يعني .. ده كله كريم ..مش حد ازعل عليه اكتر من اسبوع
ضحكنا
- هاتي كاستين شاي .. بالنعناع مش بالقرفة يا حبيبة .. وعلى البلوكنة
- عنيا يا ست البنات
وقاممت تجري قعدت اضحك ودخلت البلوكنة
كانت منطقة مسلية ... ما بين الرقي والشعبي .. احنا منطقتنا هادية لدرجة تخوف ..دي احلى .. لما اتجوز عاوزة هنا
دخلت حبيبة بكستين الشاي
- بصي بقا يا ستي .. سيف بيحبك وعاوز يتقدم .. ايه رايك
- ايه
- فاكرة لما كنتي كل يوم تلقي ورقة .. كان سيف بيكتبهم
- وليه ما قولتليش
- كدا .. كيفي
- كيفك ..طب تعالي اوريكي
هي اينعم عجنتني ضرب بس قالت
" يتقدم ونشوف "
علشان بس يشهد التاريخ انا ضحيت بايه علشان ابن خالتي ...ضحيت بايدي اليمين وعيني الشمال
حعيط يا جدعان ..حبيبة معاها الحزام الاسود وبتستقوى عليا علشاني بنت غلبانة
اتقدم ووافقت والخطوبة بعد 3 ايام
مسكت دفتري وكتبت
ثلاث أيام… وتبدأ حكاية جديدة لحبيبة.
أنا مبسوطة، والله مبسوطة… بس في حاجة جوّا قلبي مش مفهومة.
كل الناس بتجهز، بتضحك، بتخطط، وأنا؟ قاعدة في البلكونة ببص على وردي اللي دبل، وبفكر.
حبيبة حتتخطب… وسيف، ابن خالتي، اللي كان دايمًا ساكت، حيبقى عريس.
أنا كنت السبب، وأنا اللي جمعتهم، وأنا اللي شجعت، بس ليه حاسة إني بخسرهم؟
مش بخسرهم بمعنى يبعدوا، بس بخسر اللحظات اللي كانت تجمعنا، الضحكة اللي كانت تطلع من غير تفكير، السهرات اللي كانت تنتهي بدعاء.
أنا مش ضد الفرح، بس ضد الوحدة اللي بتجي بعده.
كنت أتمنى أكون أنا اللي بتجهز، أنا اللي بختار فستان، بس مش علشان أتجوز، علشان أحس إني مهمة لحد.
بس خلاص… أنا آلاء، اللي بتفرح للي بتحبهم، حتى لو قلبها بيتوجع.
ثلاث أيام… وحتبدأ حكايتهم، وأنا حبدأ أكتب حكايتي من جديد.
بس المرة دي، حكتبها لنفسي… مش لحد تاني.
وقمت علشان اشوف ححط ايه بخطوبتها اغنية .. بفكر باجدع صحاب !؟
بالخطوبة .. المكان مليان .. سيف طاير من الفرحوحبيبة عادي .. انا كنت سعيدة وحزينة .. سعيدة على اني جمعت اكتر اتنين بحبهم مع بعض .. وحزينة ان حبيبة حتجوز وتسيبني .. مش حكاية حقيم عندهم .. هو مش ابن خالتي زي اخويا .. وحبيبة اختي .. خلاص حنعمل عقد اقامة عندهم
كنت مخنوقة من دموعي الي حبسها ...خرجت براسندت على عربية اخويا وحطيت اييدي على وشي وبدات اعيط .. اعيط .. حاسة نفسي وحيدة .. كنت بستنى الي حنكون انا وكريم زيهم .. بس لاسف ده احلام العصر
-دموعك دي غالية اووي
لفيت لقيته ادم
اداني منديل شكرته ورجعت اعيط
- بتعيطي ليه دلوقتي
- حاسة نفسي وحيدة ..حبيبة حتسيبني وتجوز .. انا بجد مخنوقة من الفكرة .. انا سعيدة ليها .. بس مش عاوزة تسيبني
- انا جمبك
كلمها قالها ادم .. بس صدق نبرته خلاني احس بامان اكتر من لما كريم قال " حتغير علشانك "
بس انا كدا بخون حبيبة
- استاذ ادم ممكن تشوف حياتك بعيد عني
وقحة صح .. وقليلة زوق ..بس معرفتش اقول ايه
- انا مش حشوفها غير جمبك .. صحيح اخبار كريم ايه
- كريم !!.. كريم مين ؟!!
آيـــة موســـى
بتبع
- انا حبيبة قلتلي على كل حاجة
- ماشي .. اعمل ايه
سكت هو بس لقينا سيف وحبيبة خارجين برا الصالة واول ما شافتني جريت عليا
- انتي فين ياهبلة .. حبيبة لفيفتنا عليكي كل الصالة وشوية وحتعيط
حضنتها وانا بكتم دموعي
- الاء بس خاايفة تسيبها
- انا !! اسيبك انا .. ده انا اسيب سيف ولا اسيبك
- اه ما هو سيف الكلب بتاعها
قالها سيف بغيظ
- ما تقصدش يا سيف
- يلا احنا عاملين فقرة مخصوص ليكي
- انا
- ايوه ... هو انتي قليلة .. يلا
كانت بتجري وبتشد ايدي وانا بحاول اجري وراها بس تقريبا هي بتجرني .. الحماس عند حبيبة النهاردة مليون
كان يوم لطيف .. فيه حزن .. وفرح ..ودموع
مسكت دفتري ..وانا حاسة ظهري مليون حتة
كتبت
أنا مش ضد الحب، بس ضد الوجع اللي بييجي بعده.
النهاردة ضحكت، وبكيت، وركضت، وسكت… بس أكتر حاجة حسيتها، إني لوحدي.
ظهري بيوجعني، بس قلبي أكتر.
كنت فاكرة إن الحب بيخليني قوية، بس اكتشفت إنه ساعات بيكسرني أكتر من أي حاجة.
حبيبة اتخطبت، وسيف فرحان، وآدم بيحاول، وكريم؟ صفحة واتقفلت، بس لسه بتوجعني لما أفتحها.
أنا مش ضعيفة، بس تعبت.
نفسي أرجع آلاء اللي كانت بتضحك من قلبها، مش آلاء اللي بتضحك علشان ما تبكيش.
يا رب، اشفِ قلبي قبل ظهري، وابعثلي حب ما يوجعنيش، حب يخليني أزهر زي ورد البلكونة لما كنت بسقيه وأنا فرحانة
ونمت وصحيت بالعافية على الجامعة
قمت ولبست وخرجت
النهاردة ما كانتش معايا حبيبة ... غايبة الست
خلصت المحاضرات وقعدت بالكافيتريا مع كاسة النسكافيه ... علشان اعرف اكمل اليوم
كنت بقلب على الموبايل لقيت حد قعد قدامي
كنت حهزقه بس طلع ادم
- خير
-ممكن اتكلم
- طبعا اتفضل
قلتها ورجعت اقلب
- هو انتي ليه مش عاوزة تدي فرصة لعلاقتنا
- فرصة ..فرصة ايه الي عاوزني اعطهالك .. طالما عارف حصل ايه معايا ومع كريم .. يبقى عارف اني مش مستعدة اقيم علاقة فاشلة لمرة التانية
- بس انا صادق .. وبجد انا بحبك .. وعاوز تكون جزء من حياتي
- صدقيني في واحد كان قاعد زيك وقال نفس كلامك وخان
- بس انا مش كريم
سكتت .. ما لقتش جواب بس قلت بقوة
- انا مستحيل اخون حبيبة
ضحك وقال
- حبيبة ..مالها حبيبة
- حبيبة ...
- كانت بتحبني .. عارف .. وهي الي قالتها بالسانها ليا وقالتلي اني اجي واحاول معك .. لحد ما توافقي
- صدقيني مش قادرة دلوقتي .. لما اتعافى وقتها حشوف ..عن اذنك
- مش عايزة تروحي لحبيبة
- اه حروح .. ليه
- انا حوصلك
- لا شكرا
- انا الي حوصلك .. غير كدا خليكي في الجامعة
بصتله بتعب .. مش قادرة اجادل .. وهو لاحظ ذلك
- يلا اتفضلي
مشيت وراه
وصلنا البيت ونزلت وشكرته ومشيت
رحت لحبية اديتها الملخصات ونزلت بسرعة لقيته واقف كانه مستانيني .. مشيت من قدامه ولا كاني شايفاه
- الاء
لفيت لقيته فتحلي الباب الي وراه
- اتفضلي
- شكرا ..انا عاوزة اتمشى
- خلي التمشية ليوم تاني .. اتفضلي
- لا شكرا بجد مش عاوزة ..ولا قادرة اجادل
احترم رايي وقفل الباب
مشيت ووصلت البيت ومر يوم طبيعي متعب
تاني يوم كانت حبيبة معايا ورحنا الكافتريا وكانت مصرة نقعد مع ادم في تربيزته
- ازيك يا ادم
- اهلا يا حبيبة
- بص في ناس مش عاوزين يفهموا اني خلاص ما بقاش فارق معايا انت
- ربنا يهديهم
لقينا سيف جه وقعد جمب ادم
- ايه قولتولها
- يقولولي ايه يا سيف
- احم .. ولا حاجة
- اوكي انا تعبانة وعاوزة اروح
- خليني اوصلك
- لا انا حوصل الاء ..وصل حبيبة انت
فعلا رحت مع سيف ركبت وكنت ساكتة
- انت عارفة ان ادم كلمني بموضوعكم
قلتله بسخرية
- ليه .. بصفتك ايه
- بصفتي اخوكي الكبير
- ماشي يا اخويا
- ليه رافضة
- بص انا تعبانة الفترة دي ومش مستعدة اتعب نفسيتي اكتر
- هو ارتباطك لادم تعب
- اه تعب بالنسبالي
ولحظي كنا وصلنا
- تعال اشرب شاي مع خالتك يا سيف
- حنزل ..وحقولها
-فكر ..فكر تقولها وشوف حعمل ايه .. انا مش ناقصني زن
سبته ودخلت جوا وانا دماغي مصدعة
رن باليل موبيلي رديت
- استاذة الاء معايا
- ايوه
- معاكي مركز الدكتورة هالة الالفي ... لطب النفسي
- خير حضرتك ..بتكلمني ليه
- هو في حد حجز ليكي جلسات مع الدكتورة هالة
- مين ده ؟
- رفض نقولك اسمه .. بكرا اول جلسة ليكي الساعة 5
- شكرا
وقفلت الخط
مين حيعمل كدا ... ثواني هو انا مجنونة علشان اروح لدكتور نفسي !!
كلمت حبيبة و قلتلها
- الاء .. مش المجانين الي بيرحوا لدكتور النفسي .. الي بيروح الشخص الي عاوز يفضفض ويتكلم مع حد مش مهم بالنسباله حيكون منظره قدام الشخص ده ايه .. وكمان علشان الدكتور النفسي يفهم مشكلته ويحلها ويرتبله حياته
بصراحة كلامها اقنعني
وفعلا رحت على اول جلسة
كنت متوترة، قلبي بيدق بسرعة، ودماغي فيها ألف صوت.
دخلت، لقيت الدكتورة هالة...ست في الخمسينات...ملامحها هادية...وعينيها فيها دفء غريب.
قالتلي:
– اتفضلي يا آلاء.. خدي وقتك...إحنا هنا علشانك.
قعدت، وسكت…
وبعدين لقيتني بقول
– أنا مش مجنونة، بس قلبي وجعني
– اللي قلبه بيوجعه، محتاج يسمع نفسه… مش يبرر نفسه
ومن هنا بدأت الحكاية…
كل جلسة كانت زي ورقة جديدة في دفتري
ورقة بكتب فيها مشاعري... بس المرة دي مش لوحدي.
كنت بحكي، وهي تسمع...تسأل... وأنا أجاوب
وأحيانًا كنت بسكت وهي تسكت معايا…
بس كنت بحس إن في حد شايفني
بجد
بعد أسبوعين، كنت قاعدة في البلكونة
الورد بدأ يفتح تاني، وأنا بدأت أتنفس
مش علشان نسيت كريم
بس علشان بدأت أحب نفسي أكتر من أي حد....
كنت بروح الكلية بقعد وبضحك وبتكلم ..
عملت صحبات كتير
كنت ممكن اعملها من زمان
بس وجهت كل المشاعر الي جوايا بالمكان الغلط
ادم .. بقا زي زمان
بيشوفنا ..بيختفي
واكتشفت انه زيه زي كريم .. بس ما اهتمتش
في يوم، كنت قاعدة مع حبيبة،
بنضحك على سيف وهو بيحاول يطبخ،
قالتلي فجأة:
– الاء، انتي بقيتي غير…
– غير إزاي؟
– بقيتي أهدى… وأقوى… وعينيكي فيها نور.
ضحكت، وقلت:
– يمكن علشان بدأت أحب نفسي
وبطلت أستنى حد يحبني علشان أحس إني أستاهل
لقينا سيف الي بدا يصقف على كلامي ونسي الاكل
- يالهوي .. الاكل بيتحرق يا سيف
رجعله بتوتر وهو مش عارف يعمل ايه
قامت حبيبة ساعدته وهي بتبرطم وانا بضحك عليها
- بتزقف على كلامي .. ده خالتي حتزقف على وشك بس تعرف ان حلتها اتحرقت
- ربنا يستر
قعدنا نضحك ونغلس على سيف
دخلت العيادة
الجلسة الخامسة
كنت أهدى شوية
بس لسه في وجع جوّا
الدكتورة هالة كانت قاعدة بتكتب ملاحظات، ولما شافتني ابتسمت وقالت:
– آلاء، قبل ما نبدأ، في حد طلب يحضر الجلسة دي، بس لو انتي موافقة.
– مين؟
– آدم.
اتجمدت لحظة، قلبي دق بسرعة، بس قلت:
– يدخل.
دخل آدم، شكله مرتبك، بس عينيه فيها إصرار.
قعد، وسكتنا كلنا شوية، لحد ما الدكتورة قالت
– آدم هو اللي حجزلك الجلسات، وهو اللي بيدفعها، من أول يوم
– ليه؟
– لأنه بيحبك، وعاوزك تتعافي، حتى لو ما كنتيش معاه
بصيت له، وقلت:
– ليه عملت كدا؟
– علشان بحبك، وبحترمك، ومش عاوزك تكرهي الحب علشان حد خانك.
– بس أنا مش جاهزة.
– أنا مش مستعجل، بس كنت عاوزك تعرفي إنك مش لوحدك.
سكت، وأنا حسيت إن في حاجة بتتغير جوايا.
مش حب، مش ارتباط، بس أمان…
أمان إن في حد شايفني... وبيحترمني.... وبيحبني من غير شروط.
ابتسمتله وقعد ادم ساكت بيتابع الجلسة وخلصت وخرجت
- اظن مش لطيف انك تروحي لوحدك والدنيا مغرب
- لا لطيف عادي
- طب يلا قدامي على العربية
ركبت وراء وكنت طول الطريق اسبح واستغفر وانا باصة لشباك وبتامل نعم ربنا الكتيرة عليا
تاني يوم .. كنت مصدعة وداخلة على الجامعة مش قادرة ابدا اليوم اصلا
لقيت ادم في وشي ومعاه كاستين نسكافيه
- اتفضلي
- ايه ده
- نسكافيه .. علشان تبدي يومك .. حبيبة قالتي انك مصدعة
بقا كدا ..حبيبة الجسوسة بتاعته
- شكرا .. انا فعلا كنت محتجاها
- عفوا
- عن اذنك..عندي سيكشن
وفعلا مشيت وانا ماسكة كاسة النسكافيه وسعيدة فيها
روحت مشي على البيت وكنت رايقة .. بعد كاسة النسكافيه بتاعت ادم .. لكن في حاجة عكرت عليا .. كريم
- ايه ده .. انت ايه الي جايبك هنا .. هو انت يالا مش قولتلك ما شوفش وشك
-جاي اشوف الهانم الي سابتني علشان واحد زي ادم .. هو ده الي نفسك تقضي حياتك معاه
- سابتك !!! .. انت الي سبت وخنت ياكريم .. ما تعملش فيها دور الضحية علشان انا حموت واضربك
- تضربي مين ده محدش حيضرب غيرك
وفعلا اداني قلم على وشي بس اول ما لمست ايده وشي كان اخويا وبابا وماما طالعين برا
- بتضرب اختي يا كريم .. باي حق تضربها
ومسكته اخويا وطحنه ضرب
وانا ماسكة في ماما وبعيط وحموت واضحك على شكله بس لازم نثبت
قام كريم بعد ما تم طحنه وعجنه
- بتضربني انا بدل ما تضرب اختك .. الي ماشية مع كل شباب الجامعة
توقعت قلم تاني على وشي .. بس الحقيقة لما لقيت اخويا بيلعب بحواجبه باستفزاز وبيقول
- عارفين وعاجيبنا ...الدور والباقي على البيه الي بيضحك على بنت عمه الصغيرة .
- امشي يا كريم .. امشي يا ابني ..وكلامي مع ابوك
واحد الاء ...صفر كريم
دخلنا جوا وتوقعت زعيق وكدا بس لقيت بابا بيقولي
- غيري وتعالي اتغدي يا حبيبتي
طلعت وانا مستغربة منهم ..هما دول اهلي ؟
لبست ونزلت اتغديت بهدوء
بعد الغداء قعدنا
- ممكن يا منال تعمليلنا 3 شاي
- عنيا
قامت بابا ولقيت بابا لف عليا
- قوليلي بقا يا الاء ..الحكاية من الالف لياء
اخدت نفس وبصيت لاخويا الي كان بيبصلي بتركيز
- اناحقولك يا بابا
قلت كل حاجة .. اعترافه .. كلامنا الي بالسر .. اعتراف ادم .. اكتشافي لخيانته .. لغيه من حياتي .. الدكتورة النفسية .. و الي حصل النهاردة
كان بابا هادي وساكت اما اخويا كانت تعبير وشه بتغير .. غضب ..حزن .. استنكار .. حجات كتيرة
- طيب بصي يا الاء .. لو ادم فعلا بيحبك ... حيتقدم..مش يدورك بالسر
بصتله بصدمة وبصيت لماما وهي بتبصله بصدمة .. دي كلمتها ازاي يسرقها !!
- احم .. بابا هو قال قبل كدا .. بس انا رفضت .. حكلمه بكرا
- قبل ما تكلميه.. هل انتي جاهزة
-يمكن ..حفكر واشوف .. عن اذنكم
تاني يوم جه سيف اخدني انا وحبيبة ورحنا على الكلية واول ما دخلنا كن هو في وشي نت ماسكة بايد حبيبة جامد بس هي سابتها وعملت نفسها مش منتبهة وسابتني لوحدي قدامه ... خاينة بتشتغل لصالح ابن عمها .. طب والله انا بشتغل ضد سيف لصالحها
- ازيك يا الاء
- الحمد الله
- عاملة ايه
- كويسة
- اخبارماما وبابا ايه
- كويسين
-واخوكي
- بيسلم عليك
- وسيف
- كويس
- وحبيبة ينت عمي
بصراحة هنا ضحكت
- ايه يا ادم .. ما عندكاش حاجة تقولها سيبني امشي
- لا عندي .. تعالي على الكافتريا
رحنا وقعدت
- ها ؟؟
- بصي .. انا كلمت الدكتورة هالة وقالتلي اني دلوقتي انتي ممكن توافقي
- اوافق على ايه ؟؟
- توافقي على ..على .. على ارتبطنا .. انا بحبك
كنت مترددة اقول .. لسا جرحي ما تعافى
بس شفت ملك .. البنت الي كان كريم مصاحبها ..حسيت دي اشارة وقولت
- الي يحب يتقدم .. مش يدور بالسر
- يعني موافقة اتقدم
قالها بسعادة
- ايوه موافقة .. عن اذنك
مشيت وانا سعيدة .. اووي ..لا اووي اووي
اتقدم ووافقنا وطلب نكتب كتاب اول ما نخطب علشان يمسك ايدي.. رومانسي الواد
في يوم من ايام الشتاء .. كانت الدنيا بتمطر .. واووي وانا كنت بردانة وبرجف ..كنا انا وادم قاعدين
لقيته شال ايده من جيوبه ومسك ايديا .. ايديه دافيه ..اديه بتديني دفء وهو بياخد برودة ايديا لما بقوا دافيين
- احسن
هزيت راسي وانا بفركهم في بعض
سابني ومشى ..ورجع باتنين هوت شوكلت
- ده لاحلى لولو شفتها في حياتي
ابتسمت بحب واخدتها منه وقولت بعد ما شربت منها
- عارف يا ادم .. انا كنت بدعي بيك
- بيا !!
- اه .. كنت بقول ربنا ارزقني بزوج يصب علي الحب صبا
- وانا كدا
- انت اكتر من كدا ... ربنا يخليك ليا يا حبيبي وتفضل تدفي ايدي
- ويخليكي ليا يا حبيبتي
مسكت دفتري وكتبت
"أنا مش ضد الحب…
أنا ضد الحب اللي يوجع، اللي يستخبى، اللي يخليني أشك في نفسي.
بس آدم؟
حبّه ما وجعنيش، حبّه طبطب على قلبي،
حبّه جه بعد ما دعيت، بعد ما بكيت، بعد ما فهمت إني أستاهل أكتر.
أنا مش ناسية كريم، بس ما عدتش بعيط عليه.
أنا مش ناسية الوجع، بس ما عدتش أعيشه.
أنا دلوقتي ببتسم، وبحمد ربنا على كل حاجة راحت، وكل حاجة جت.
آدم مش بس حب، آدم أمان.
مش بس كلمة "بحبك"، آدم فعل، آدم دعوة استُجيبت.
أنا آلاء…
اللي اتعلمت إن الحب مش لازم يكون حرب،
وإن اللي يستاهل قلبي، حيخاف عليه، مش يكسره.
ودي مش نهاية الرواية…
دي بداية حياة، فيها حب، فيها رضا، وفيها أنا…
أنا اللي رجعت لنفسي، وارتبطت بحد شافني زي ما أنا،
مش زي ما هو عاوزني أكون."
تمت .
آيـــة موســـى
تعليقات
إرسال تعليق