روايةكشف حقائق وأسرار الفصل الثالث 3 للكاتب احمدحسن حصريه في مدونة موسوعة القصص والروايات
روايةكشف حقائق وأسرار الفصل الثالث 3 للكاتب احمدحسن حصريه في مدونة موسوعة القصص والروايات
حتى يوم ولادتي اللي كنت بقول هما بيكرهوني بس لما يشوفوا حفيدهم قلبهم هيرق عليا وعليه
بس للأسف عمرها شجرة المر ما تطرح حلو ابدا
اليوم ده حسيت إن في عزا في البيت رغم إني ربنا كرمني بالواد اللي نفسهم فيه وصالح سماه وهدان على أسم عيلتهم عشان يحببهم فيه !
بعد الولادة بأسبوع صالح راح دبح وعمل عقيقة السبوع وكان طاير من الفرحة وانا كنت ببص عليه من ورا الشباك وشايفة الناس بتبارك وهو بيهزر ويضحك مع الناس لحد مافي لحظة سمعنا صوت تلات رصاصات !!!
كلنا اتخضينا واستخبيت في الشباك ورجعت ابص شفت صالح واقع عالأرض والناس حواليه اتخضيت عليه وبقيت بجري عليه اقوم واقع ورجلي مش شايلاني لحد ما وصلتله خدته في حضني واصرررخ واقوله قوم ياصالح
وهو بيلفظ انفاسه الأخيرة وصاني على ابننا وقالي الواد ياأصيلة ووصى ابوه وقاله اصيلة وابني في رقبتك يابوي
وبعدها رمى راسه على حجري ومات يابيه
وانا اترجاه واقوله قوم ياصالح ابنك لسه مشبعش منك قوم ياصالح انا مليش غيرك هتسيبني لمين
قوم ياصالح قوم ...... ( دخلت أصيلة في حالة إنهيار من البكاء )
القاضي .. إهدي ياأصيلة ، هاتولها كوباية مية وقعدوها ترتاح شوية
(وأعلن القاضي عن استراحة مدتها ساعة ثم يعود لتكملة الجلسة )
ـــــــــــــــــ #كشف_حقائق_وأسرار_بقلم_أحمدحسن
القاضي .. ها ياأصيلة ارتاحتي شوية
أصيلة .. الحمدلله يابيه
القاضي .. كملي ياأصيلة حصل إيه بعد رحيل زوجك
أصيلة .. أم صالح جاتلها جلطة لا بتصد ولا بترد وكنت دايما معاها لأنها بتحتاج لرعاية خاصة وانا اللي طلبت أكون جنبها لأنها أم الغالي وعمري ما أنسا وقفتها جنبنا لما حامد وأمه وقفوا في وشنا انا وصالح
القاضي .. طب وسماح عملت إيه ؟
أصيلة .. سماح راحت بيت ابوها بعد وفاة صالح بشهر وبعد مرور 3 شهور البيت كله إتفاجئ بسماح داخلة البيت وهي بتزغرط
القاضي .. بتزغرط ؟!!!!
أصيلة .. كلنا إستغربنا يابيه ولما طلعنا نجري نشوف إيه اللي حصل
ــــ
حامد .. بتزغرطي على إيه يابنت المركوب انتي !!
سماح .. اللي خلف ما ماتش ياعمي اللي خلف ماماتش ياجدتي صالح نفسوا لسه في الدنيا
حامد .. ايه الجنان ده عاد !! انتي اتخبلتي في مخك ولا إيه يابت أخوي ؟!!!
سماح .. أنا حامل ياعمي لسه راجعة انا وامي من المستوصف والدكتور قالي إني حامل في الشهر الرابع وهجيب الواد اللي يستاهل يكون إبن صالح ولد حامد وهدان
أم حامد .. أنتي بتتكلمي جد يابت ياسماح
سماح .. وهي دي فيها كدب ياجدتي
أصيلة .. مبروك ياسماح ربنا يتم فرحتك على خير
سماح .. من قلبك ياأصيلة هههه
أصيلة .. من قلبي والله ياسماح وانا هكرهلك الخير ليه عالأقل وهدان ولدي يكون ليه أخ يسنده بدل ما يطلع وحيد في دنيته
سماح .. كل واحد بيسند روحه، ماهي صوابعك مش زي بعض ياأصيلة ولا إيه
سماح قالت الكلمتين دول وهي بتبصلي من فوق لتحت وبصراحة انا عملت نفسي مش فاهمة قصدها وسبتهم ومشيت رحت على أوضتي وقعدت ابص على إبني وأبكي وأنا بقوله ،، حقك علي ياأبني أتكتب عليك أبقا أمك ، كرهوك على كرههم ليا وأنت ياعيني طفل بريئ ملكش ذنب
بس عارف ياوهدان انا متأملة فيك خير وحاسة إنك إن شاء الله هتبقا عوضي عن كل اللي فات ، اوعاك ياولدي تشرب من طبعهم
خليك زي المرحوم ابوك كان صالح وهو صالح ، كان فرحان بيك قوي ياوهدان ،،،ولما تكبر ياولدي عامل الناس باللين وحط ربنا دايما بين عنيك وخليك حلو في أخوك مهما قسوه عليك ، أخوك هو سندك ياولدييي ( قالت كده وهي بتنفجر من البكاء عشان حاسة وعارفة إن إبن سماح هيرضع كره وحقد لأخوه وعمره ماهيكون سند لإبنها )
القاضي .. وسماح جابت الواد زي ما قالت ؟
أصيلة .. جابت الواد يابيه وكنا فرحانين وتصدق بالله أنا عمري ماكنت أتخيل إني هبقا فرحانة بالشكل ده يوم ما تولد سماح
اصل حتت إنك تحس إن ليك أخ حتى لو هيكون مش حلو
بتطمنك وتحسسك بالأمان ،وفي اللحظة دي مكدبش عليك أنا كنت فرحانة لأبني إن ربنا خاواه اكتر ما فرحانة لولادة سماح
القاضي .. عجيب امرك ياأصيلة ! فرحانة رغم إنك عارفة إن بيتولد عدو جديد لإبنك !!
أصيلة .. متستغربش يابيه يمكن حضرتك اتولدت في أسرة مستقرة وربنا ما يكتب عليك الوحش ، بس في بيوت الأخوات فيها أعداء بس عند المحن والشدة الدم بيحن ولو مش هيقف جنب أخوه عشان عرق الأخوة والمحبة هيقف جنبه عشان اللوم وكلام الناس وانا عارفة سلسال عيلة وهدان رغم إنهم فيهم العبر بس شدين في الكبر ويحبه المنظرة ويخافوا من كلام الناس
القاضي .. طب ومعاملة أهل جوزك ليكي كان شكلها إزاي بعد وفاة صالح
أصيلة .. بصراحة هما مكانوش حلوين ولا وحشين
كنت غريبة في وسطهم يعني لو بيتكلمو اول ما أحضر يسكتوا لو قعدت معاهم بحس إنهم مش شايفيني
لو مرضت محدش بيسأل عليا لحد ما أخف وأخرج من أوضتي لوحدي
القاضي .. أظن بالنسبالك دي حاجة كويسة وانتي مكنتيش عايزة أكتر من إنهم يسيبوكي في حالك ومحدش يأذيكي
أصيلة .. ما خفي كان أعظم يابيه
القاضي .. يعني إيه ؟!
أصيلة .. في يوم كنت خارجة من أوضتي بالصدفة وسمعت حامد بيتكلم مع أمه بيقولها ليه ياأمي البت ملهاش ذنب ومتنسيش ولدي وصاني عليها قبل ما يموت..
أم حامد .. مالك ياواد هو انا بقولك نقتلها !
حامد .. ماهو أنتي لما تطلبي مني بعد ما أصيلة تفطم الواد عن الرضاعة ناخده ونبعتها عند أهلها يبقا كده بنقت،لها ياأمي !
أم حامد .. ياأخي أنت جنسك إيه ! مغمي عينك وماشي في الدنيا بضهرك ليه !! أسمع ياابو مخ تخين ، انا شاكة إن اصيلة ليها يد في قت،ل صالح عشان تورث بالواد ، ومنها تبقا إ,نتقمت لأبوها ، ماهو محدش في الدنيا له مصلحة في قتل صالح غير أصيلة وإخواتها ، ماهو مش معقول بردو تلف على صالح ولدك وتحمل منه وتخليه يدخلها تعيش معانا في البيت بالسرعة دي ولا ايييه ؟
حامد .. ها !!
( في اللحظة دي حسيت إن حامد هيقتنع بكلام أمه دخلت عليهم وكنت منهارة من البكاء لما حسيت إن الموضوع يوصل بيهم لدرجة الشك فيا إني أقت،ل صالح جوزي أو اشارك في قت،له )
---
حامد .. إيه ده !! أصيلة !!؟؟
أم حامد .. أنتي بتتصنتي علينا ولا إيه يابنت عوض
أصيلة .. دا ربنا اللي ساقني عليكم لاجل ما اسمع نواياكي الخبيثة ، ياولية أنتي رجلك والقبر ولساكي على حالك ضميرك مش خالص ونيتك دايما سودة !!
حامد .. اخرسي يابنت الكلب انتي بتخترفي تقولي ايه !!
أصيلة .. مين اللي بيخترف في الكلام انا ولا أمك اللي بتوذك عشان تحرم عيل من أمه وتحرمني من أبني
انا نفسي أعرف أنتي خلفتي وجربتي الضنة كيف ياولية أنتي ؟!!!
وبعدين صالح مين اللي أقتله !!؟؟
يعني الراجل جابني من الزريبة وحطني فوق راسه
في الوقت اللي كنتم كلكم حاطيني تحت رجليكم
وستتني ورجعني للحياة تاني وعايشني في امان
وكان حاميني من الدنيا كلها وأولها أنتم وافعالكم
وخلفت منه ابني نور عيني اقوم في النهاية أقتله !!
او حتى أوذ حد من إخواتي يقتله ؟!!!!
نفسي اعرف أنتي بتفكري كيف ؟!!
أيه اللي بيدور في دماغك !!؟
عايزين مني إيه أكتر من 11 سنة ضاعوا من عمري في زريبة تحت رجلين المواشي غير الذل والإهانة !!
دا كله مش مكفيكم وعايزين كمان تحرموني من ولدي ؟!!
بس دا بعدكم ، يوم ما هخرج من البيت ده هخرج بإبني لو حتى هيكون فيها مو،تي فاهمين؟!
ــــــــ #كشف_حقائق_وأسرار_بقلم_أحمدحسن
في الليلة دي كنت مرعوبة وجسمي بيترعش ومش عارفة أنام وحاسة إني لو نمت هييجوا ياخدو إبني من جنبي
القاضي .. للدرجادي ياأصيلة ؟!
أصيلة .. أصعب حاجة في الدنيا يابيه إنك تحس بقلة الأمان وإنك عايش في غابة كلها وحوش وأنت لوحدك وجناحك مكسور ومع أول موقف يقابلك هتسلم وهترضى بالأمر الواقع غصب عنك
القاضي .. طب بعيدا عنك تفتكري حامد وأمه عندهم حق في حتت إن إخواتك ممكن يكون ليهم يد في قت،ل جوزك ؟
أصيلة .. صالح جوزي مكانش ليه عداوة مع حد وعشان كده كنت شاكه إن إخواتي اللي عملوها يابيه لأن في اثناء حملي كانت بتوصلني تهديدات من إخواتي بقت،لي لو كملت الحمل لأنهم مش عايزين يتجدد نسل وهدان تاني والرسالة جاتني صريحة ..
(متخلفيش من بيت وهدان عشان ميتقالش بعد اكده الخال قت،ل ابن إخته )
وقتها عرفت إن إخواتي قلوبهم شايلة ولسه الموضوع عندهم منتهاش وإنهم ناويين على الغدر بس تهديدهم كان بقت،لي أو قت،ل ولدي أما موضوع قت،ل صالح مجاش في كلامهم نهائي
القاضي .. أعتقد كلمة شك بتوحي إن في حد تاني كنتي شاكه فيه وألا كنتي اتهمتي أخواتك مباشرة ولا إيه ؟
أصيلة .. مظبوط يابيه
القاضي .. قوليلي كنتي شاكة في مين تاني
أصيلة .. بصراحة كنت شاكة في أهل سماح مراته
هما قرايبه أه ، بس محروقين من اللي حصل منه في جوازه مني وكانوا دايما بيعتبرو إن ده عار كبير للعيلة واللي زاد الطينة بلة إنه إتجوزني على أختهم
القاضي .. وعملتي إيه بعدها
أصيلة .. بصراحة أنا فكرت كتير إني أخد إبني وأهرب بيه من البلد وأعلمه أحسن علام وأبعده عن التا,ر والد,م ووجع القلب , بس لما قعدت مع نفسي وحسبتها لقيت إن إخواتي وعيلة وهدان مش هيسيبوني في حالي وعلى الأقل وانا في وسطهم إبني محمي من شر إخواتي ، وبصراحة حامد اتأثر بموت إبنه وكان دايما ييجي أوضتي ياخد الواد يلاعبه شوية ويرجعه وده اللي خلاني أبعد فكرة الهروب من دماغي
القاضي .. طب بعد ما سماح ولدت وفي خلال الخمس سنين اللي قبل الواقعة علاقتكم كانت ماشية إزاي ؟
أصيلة .. أول سنتين مرت عليا أنا وإبني صعبة قوي يعني مثلا شغل مكايدة ستات ورمي كلام وقدرت سماح إنها تسيطر على اللي في البيت بإبنها لدرجة إن حامد بطل ييجي يشيل إبني ويلاعبه خوف من سماح وغيرتها
كل المكايدة والكلام السم اللي كانت بتقوله ليا مكانش فارق معايا ، الحاجة الوحيدة اللي كانت كاسراني هو إبني ياعيني اللي في الوقت ده كان عنده 4 سنين وحضرتك عارف العيل في السن ده بيبقا عايز يلعب ويجري ، كان كل ما ييجي جنب جده حامد في حضور سماح كنت بشوف جده بيهمل حركات ويقومه من على حجره عشان يشيل إبن سماح
رغم إنه يادوب 4 سنين بس الكسرة كانت بتبان على وشه
خصوصا إن أم حامد كانت بتكره إبني وميحلاش ليها ملاعبة إبن سماح غير وانا قاعدة أنا وإبني
أنا فاكرة في مرة حامد كان جاي من برة في العيد وجايب لعب لإبني وإبن سماح وأول ما سماح شافته قامت تجري عليه وتقوله ربنا يخليك ياعم حامد كل دي لعب جايبها للواد وخدت لعب إبني وإديتها لإبنها وإبني جالي قعد على حجري ياكل في ضوافره وعينه مرغرغة بالدموع
عارفة إن الكلام اللي بقوله يابيه ممكن حضرتك تشوفه تافه بس دي حاجات بتوجع قلب الست خصوصا لو كانت أم
القاضي .. طب أنتي قلتي إن ده كان بيحصل في أول سنتين أفهم مم كده إن في حاجة مختلفة حصلت في التلات سنين الباقية ؟
أصيلة .. ايوة السنتين التانيين بقيت انا وسماح اصحاب وعيالنا بيلعبوا مع بعض وكانت بتقف معايا في حاجات كتير
القاضي .. لا بقا إهدي كده وبراحة وقوليلي ايه اللي قلب الموازين كده !!؟
أصيلة .. في يوم الواد إبني سخن بالليل وحامد مكانش موجود في البيت وفي صيدلية في وش بيتنا علطول
خرجت أجري أجيب أي حاجة للواد سمعت لامؤاخذة المواشي بتزعق وأنا عشان عيشت في وسطهم 11 سنة فبقيت عارفة تفاصيلهم وعارفة إن عمرهم ما يعملوا كده غير لما يكون في حد دخل الزريبة وهما مش متعودين عليه
بصراحة قلقت وقلت أشوف مين اللي في الزريبة
أتسحبت واحدة واحدة وبصيت من ضهر الزريبة شفت حاجة خلتني ثبت في مكاني وبقيت مش مصدقة عنيا !!!
القاضي .. شفتي إيه ؟!!
أصيلة .. ( شفت سماح واقفة مع أخويا )
يتبع...
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق