رواية أوتار أحد من السيف الفصل الثاني والعشرون 22بقلم زهرة الربيع حصريه في مدونة موسوعة القصص والروايات
رواية أوتار أحد من السيف الفصل الثاني والعشرون 22بقلم زهرة الربيع حصريه في مدونة موسوعة القصص والروايات
خطاب بيه ..خطاب بيه...الست اوصاف مش فوق..... مش في الدار كلها
دياب اتصدم وخطاب وقعت العصايه من ايده وقال بذهول...بتقولي ايه يا مخبوله انتي تلاقيها هنه ولا هنه دوري زين هيه مبتقعدش في مكان واحد
الخدامه قالت بخوف...والله دورت يا عمده مش لاقياها واصل
خطاب قال بزعيق وجنون...مش لقياها كيف ..انا هدور عليها اوعي من وشي
وجري بسرعه على السلم ودياب راح وراه بس مكانش قادر يجري عشان جرحه
عند اوصاف قامت من النوم وكان فياض اخيرا قدر يولع النار وقاعد جنبها وقال...صباح الخير..تعالي ادفي شويه
اوصاف جريت على النار بسرعه وقعدت جنبه وهيه بترتجف لان مفيش غطى معاهم قالت وهيه بتتنفض...براوه عليك والله انا هموت من البرد..عضمي...عضمي بيتنفض معرفاش ادفى واصل
فياض ابتسم وقال بمشاكسه....انا اعرف ادفيكي ...بس لو ربنا يهديكي
اوصاف رفعت حاجب وقالت بغيظ....دفي حالك الاول مليكش صالح بيا
فياض بصلها وقال بابتسامه..ما انا كمان كنت هدفى وياكي....ياريت اقدر اضمك دلوك بجد
اوصاف اتوترت وقالت....طب قرب كده وشوف اعمل فيك ايه
فياض ضحك وقال...ده على اساس اني خايف منك...انا لو عليك كنت عملتها ومن امبارح بالليل .بس ربنا شايفنا..واتكسف اعمل حاجه تغضبه
اوصاف ابتسمت وقالت باعجاب شديد....انا معرفاش ايه الغلطه فيك ..اللي اعرفه ان مفيش بشر كامل...بس انت مش عارفه اشوف عيوبك واصل
فياض ضحك بخفه وقال...واه ..واه ده انت بتعاكس ..بقولك ايه..ايه رايك نتجوز يا بت
اوصاف اتسعت عيونها بدهشه شديده وقالت ..ايه..نت ايه
بقلم...زهرة الربيع
في البيت عند فياض كانت والدته مستنيه عقبه واول ما خبط راحت فتحت بسرعه وقالت ..يا مرحب يا ولدي اتفضل
عقبه دخل وقال بقلق...خير يا خاله خوفتيني ..انتو كويسين فاطمه زينه مش كده
عطيات اتنهدت وقالت...لاه فاطمه مش زينه واصل يا عقبه...حالها ميسرش..البت مالها من وقت ما رجعتو سوا امبارح المغرب وهيه قافله عليها ولا اتعشت ولا اتكلمت ودلوك مرضيتش تروح مدرستها دخلت عليها لقيت عنيها عامله زي اللي بتبكي بقالها سنه..ايه اللي حصل امبارح قولي يا ولدي
عقبه اتوتر جدا وقال بارتباك...مفيش...مفيش يا خاله انتي خايفه على الفاضي..هو..هو كل الحكايه ان...ان امبارح في الدرس سرحت شويه والاستاذ كسفها قدام البنات بس كده
عطيات ابتسمت بسخريه وقالت....انت مبتعرفش تكدب يا عقبه ..بتكدب ليه...قد غضب ربنا منك
عقبه لمعت عيونه بالدموع لما قالت كده لانه مش معتاد يكدب والكلمه هزته قال بندم...استغفر الله العظيم استغفر الله
عطيات نزلت دموعها وقالت بخوف وقلق....فاطمه غيرت فستانها ليه يا عقبه...ايه اللي حصل يا ولدي راسي عماله تودي وتجيب
عقبه بصلها برجاء وقال...لو ليا خاطر عندك متسألينيش حاجه ...كفايه كده ...كل اللي عايزك تتأكدي منه انها دلوك بخير...زعلانه شويه وهتتحسن
عطيات قالت بسرعه وقلق......ياولدي انا قلقانه هموت ريح قلبي الله يريح قلبك ...البت مالها يا عقبه
عقبه اتنهد وقال...فاطمه بخير يا خاله ..اتاكدي انها بخير وهتبقى احسن ...ولو على المدرسه هتروح...ادخلي قوليلها اني هستناها بره علشان اوصلها لحد العربيه...وهتلبس وتطلع على طول ...بالاذن
قال كده وطلع بسرعه قبل ما تسأل اي حاجه وفضل مستني فاطمه بره البيت
عند خطاب كان هيتجنن وقالب الدنيا على اوصاف وعلى فياض بس ملهمش اثر
دياب قال بسخريه...اهو الراجل بتاعك اللي مفيش منيه..غفلك ورجعها كيف ما جابها
خطاب قال بغضب..لاه ..لاه اكيد فيه حاجه غلط...فياض ميعملهاش ...ميروحش يرجعها من غير امري..اكيد فيه حاجه ..اكيد البت لعبت عليه في حاجه
دياب قال بضيق....حاجة ايه ..انا اتكلمت ويا الغفر ميعرفوش اي حاجه..وفيه واحد قال راحت عليهم نومه...معقوله تروح عليهم نومه وتصدف هيه تهرب اكيد هو اللي نومهم وطلعها
خطاب قال بغضب..ماشي يا فياض...ماشي..لو كان هو اللي عملها يبقى جنى على روحه وايامه مش بس خلصت في البيت..دي خلصت من الدنيا كلها
دياب بصله بذهول لما قال كده وقال بتوتر..احم على مهلك يا ابوي..مش للدرجه هو احنا قتالين قتله...الجدع معاك بقاله عمر ودي اول غلطه ليه و...
بس خطاب بصله بغضب رهيب وقال....غلطه متتغفرش..ومهعدهاش ..على الله يطلع هو ...انا هعرف كيف اربيهم هما الاتنين
قال كده وطلع من البيت بغضب ودياب اتوتر جدا من كلامه وفتح تليفونه واتصل على نعيم فورا
بس نعيم كان متصاب في ايده ومشغولين باللي حصل ومردش عليه اتنهد بقلق وقال...استرها يا رب
عند اوصاف اتسعت عيونها بذهول شديد من جملة فياض وقالت..نت ايه..نتجوز..انت قولت نتجوز
فياض ابتسم وقال..اه نتجوز ...يعني شكلنا مشوارنا طويل سوا واهو ندفو على راحتنا
اوصاف ضحكت جامد ووقفت وقالت ...هتتجوزني لجل كده...وانا اللي قولت اني عجبتك
فياض وقف وقرب منها وقال....ومين قال انك مش عجباني ...مفيش دكر بيمشي في عروقه دم ويشوفك ومتعجبهوش ..انتي مشيفاش روحك ..ولا نعيم مكانش عنده مريات
اوصاف ابتسمت بكسوف وقالت..لا عنده وفاهمه قصدك بس ...انا مقصدش اني عجبتك ..اقصد فكرت انك حبيتني مثلا
فياض اتنهد بحزن وقال ...يلا بينا هنمشي من الناحيه دي يمكن نلاقي طريق ولا حد يدلنا
ومشي قدامها واوصاف راحت وراه وقالت بحزن بتخبيه بابتسامتها...مرديتش عليا يعني...عموما فهماك اللي زيي متتحبش ..ويمكن مفيش راجل يأمنلها بعد سمعة اهلي
فياض اتنهد بحزن وقال وهو ماشي ...انا لو شاكك انك زيهم مكنتش خاطرت وطلعتك من هناك ...الغلط من عندي... انا اللي قلبي بقى معارفش حابب مين وكاره مين
اوصاف قالت بسرعه...غفران مش كده....كنت بتحبها قوي
فياض اتنهد جامد وقال ...ما انا بقولك مبقيتش عارف
اوصاف قالت ..انا من رأي محبيتهاش والا مكنتش فرطت فيها كده...انت ودياب حزنتوها وطفيتوا فرحتها وكسرتوها من جوه....كأن مشاعركم من حجر ... واوتار قلوبكم احد من السيف....سيف قطع قلبها من غير ذنب
فياض حس بوجع لما قالت كده وقال...عمري ما قصدت اذي غفران
اوصاف ابتسمت وقالت...ولا دياب يقدر...بس انتو الاتنين اذتوها....انت هملتها وكانت فاكره انك بتحبها ...ودياب مسك يدها وهيه فاكره انو كارهها ...ولا هو عرف يوريها حبه ...ولا انت عرفت تخليها تكرهك...سبتوها تبكي وبس معلقه في النص بين وهم عشقته وعشق مشافتهوش
فياض استغرب كلامها جدا وقال ....مين ده اللي عشقها...دياب ....دياب بيرضي ابوه وبس...راضاه على حسابي انا..صاحب عمره
واتنهد بالم شديد وقال ...كنا انا وغفران مفيش زينا كل الناس عارفه اننا لبعض ...واتفقنا اجي اخطبها وكلمت خطاب بيه ورحب قوي.....وقالي هيستناني اجي اخطبها رسمي
اوصاف كانت شبه عارفه اللي حصل بس مبسوطه انو اتكلم وحابه تسمعه وتهون عليه
فياض كمل بحزن وقال..بس كل حاجه اتبدلت من غير ما افهم اي حاجه....تاني يوم كلمني وبعتني اسوان في تجاره هتاخد كام يوم...ولما رجعت كانو مستنيني باكبر طعنه خدتها في حياتي...قالي غفران اتجوزت وكل شئ نصيب
ولمعت عيونه بالدموع وقال....كنت مصدوم لما عرفت انها اتجوزت....بس مت لما عرفت اتجوزت مين....دياب...كيف....ده صاحبي...لا اخوي..ده انا كنت بنسى انو واد عمها واحكي عن عشقي ليها قدامه...كيف..كيف عمل كده كيف قدر
كنت بزعق وبغلط في الكلام وناسي نفسي...لحد ما خطاب بيه فوقني ..عايرني لاول مره بس بالذوق
اوصاف كانت بتسمعه بحزن عليه وفياض كمل بالعافيه وقال...قالي يا ولدي ابوها طلع كاتبلها فلوسه باسمها واحنا مش من عادتنا نطلعو فلوسنا بره ودي ملاين ...انا كبرتك يا فياض ...صرفت عليك وعلى اختك وعلامها وعلى علاج امك انا اتكفلت بيك وباهلك علشان خاطري انسى غفران وشيلها من راسك...دي خلاص بقت مرت صاحبك
اوصاف داست على اسنانها بغضب من خطاب وقالت ...طول عمره كلب
فياض مسح عينه قبل ما تنزل دمعته قدامها وقال بقوه مزيفه...كنت هسيب الشغل عنده واهملهم خالص ...بس بقى يتحايل عليا وانه ميقدرش يكمل شغله من غيري وان معقوله هتخلى عن راجل كيف ابوي عشان جوازه باظت....بقى يحلفني برحمة ابوي اللي كان طول عمره خدام ليهم زي تمام اني انساها ...وانا وعدته اشيلها من حساباتي...مش عشانه وبس...عشان دياب كمان ...لانها بقت مرته وعرضه ومقدرش اتجرا على اهل بيته ..حتى لو هو داس عليا وبص للي في يدي.... انا مش زيه واصل
اوصاف قالت بسرعه ودموع..لاه لاه صدقني والله دياب مش كده خطاب هو اللي...
بس قطعت كلامها وقالت بتوتر....قصدي يعني دياب كان مجبر ابوه زن عليه
فياض قال بغضب...لاه ملوش عذر كان قالوا دي تخص فياض انت وعدته ...دياب كان عارف بكل حاجه ..لو مكانش كتب عليها كنت هوقف الجوازه تحت اي ظرف ...بس هو نسيني ..نسي صحبتنا واخوتنا...لا وكمان بيلومني وهو اللي زعلان مني ضربني وبكا وسبقني واشتكى...وحتى هيه موقفتش الجوازه باي حال ...بس حقها هتقولهم ايه يعني معقوله هتسيب كل الملاين دي عشاني ...اللي زيي ملوش تمن يا اوصاف
اوصاف اتنهدت بحزن شديد وقالت ....لسه بتحبها
فياض اتنهد وقال....انا حاسس ان قلبي عمل حادث وفات فيه مقطوره ...ادشدش ومهما عملت له عمليات لسه باين عليه التعب ...فمبقيتش عارف انا حابب ايه ولا كاره ايه
والتفت لها وقال بحزن واضح..... انا بقيت خايف...لاول مره اخاف...بقيت خايف اتعود على واحده تانيه تروح مني ..مهتحملش....غفران كانت كل حاجه ليا انا عودت نفسي وقلبي واهلي كمان على انها مرتي ...مفاهمش كيف حصل كده وليه
اوصاف مسكت ايده علشان يقف وقالت بابتسامه ....انا عارفه ليه...لان ليك نصيب في مكان تاني يا ريس...فيه واحده شافت نصيبها معاك قبل ما تشوفك
فياض بصلها شويه ولسه هيرد صرخت جامد وقالت.....ناس...ناس يا فياااض
فياض اتفزع وقال بزعيق...خلعتيني الله يخلع قلبك ...فيه ايه
اوصاف مردتش عليه وجريت بسرعه ناحية الناس
كانو مجموعه مهندسين ومهندسات بيعملو مشروع تطوير في ارض الصحرا استغربو لما شافو اوصاف جايه عليهم وبتقول ...الحمد لله ناس اهم مش قولتلك يا فياض لووووولي
فياض راح وراها وهو بيضرب كف على كف من حركاتها وقال...ربنا يصبرني على الورطه دي
عند فاطمه لما دخلت لها والدتها وقالتلها ان عقبه مستنيها بره لبست وطلعت فورا وقالت بخوف...عقبه .....انت...انت جيت ليه
عقبه قال بضيق...مزعله امك ليه يا فاطمه...اهي شكت فيكي ..مش قولتلك تتصرفي طبيعي
فاطمه كانت مستنيه اي سبب علشان تبكي وقالت ببكا ....معرفاش انام معرفاش ابطل بكا..صعبانه عليا نفسي قوي
وبقت تبكي اكتر
عقبه زعل جدا عليها وقال ..استهدي بالله ....انا وياك في اي وقت ...متخافيش كل حاجه عدت...وكلنا بنغلط يا فاطمه المهم ربك سترها
فاطمه بصتلو بدموع وكسوف وقالت...حقك عليا يا عقبه...سامحني انا حاسه ان ده ذنبك
عقبه قرب خطوه واحده وقال بهمس....وانا حاسس ان دموعك دي مكانها على صدري وبس....فاجليها شويه معلش
بقلم...زهرة الربيع
فاطمه اتسعت عيونها بذهول ولسانها اتعقد معرفتش ترد
وعقبه ابتسملها ابتسامه جريئه وكانو معدين بنات نادالهم وقال...خدو فاطمه معاكم يا بنات روحو سوا
البنات اخدوها معاهم وهيه مصدومه من كلامه وكل شويه تبص وراها عليه وهيه مش مصدقه اللي سمعته
عند دياب طلع اوضته وكان رايح جاي بغضب وبيقول ...ضحكت علي..كلفتتني انا تعمل فيا كده...قالتلي الخدامه قالت انك تعرف مكان يجبلك خلقات للبيت اديني اكلمهم ممعايش غيارات واصل..وانا الغبي اديتها التلفون
وقعد جنب غفران وقالها بغضب....لا وسبتهولها ومشيت قولت يمكن تعوز تطلب حاجه وتتكسف قدامي ...راحت كلمت اهلها ..ابوي لو عرف هيربطني في الحوش مهيفتكرش اني ولده ولا هيفتكر ان مرته خلفتني من اساسه
غفران كانت منزله عيونها في الارض بكسوف ومبتردش
دياب بصلها باستغراب وقال..انتي مبترديش ليه...فيه ايه لسانك اتقطع ولا...
بس قطع جملته وضحك وقال ...ااااه افتكرت...انتي بالعه سد الحنك من ساعة اللي حصل امبارح....فيه يا بت..انا جوزك ..امال لو كنت ا...
غفران حطت ايدها على بقه بسرعه وقالت ...دياب..بس...امانه عليك
دياب باس ايدها بحنيه وسند جبينه على جبينها وقال...اه على دياب وسنينه معاكي....نفسي ترحميني وتقربي حبه معارفش ليه حاطه كل المسافات دي بينا انا تعبت
غفران قالت بكسوف...... اتكلم وياك ولا تزعق زي عادتك
دياب قال بسرعه..انتي بس اتكلمي ..اتكلمي للصبح ...وانا هسمعك اسبوع لقدام
غفران ابتسمت وقالت ...اصل يا دياب بصراحه كده انا..انا مش متعوده عليك واصل...جوازنا جه فجأه وانا عمري ما اتخيلت اني في يوم ابقى مرتك ...انت كنت كيف اخوي...كنت دايما شديد وعصبي وانا كنت اخاف منك وبس ...معرفاش ابقى طبيعيه معاك
دياب قال بضيق...اامممم..طبعا انتي اتخيلتي تبقي مرت حد تاني
غفران اتنهدت وقالت..نفس الطريقه ...هتجر شكل زي العاده...معيزاش اكمل مهتكلمش وياك واصل ...اصلا انا بحاول على الفاضي
ولسه هتمشي شدها عليه وقال بحب ...انتي حلوه قوي يا غفران...بس الجمال من غير عقل...كيف الساقيه من غير عجل
الاتنين ملهمش عازه
غفران بصتله بدهشه وهو قال بابتسامه...لو فهمتيني وشغلتي عقلك مره واحده هتعرفي ايه السيره الي تزعلنا من بعض وايه اللي ممكن اتكلم وياكي فيه عمر بحاله
غفران اتنهدت ولسه هترد ابوه خبط جامد على الباب وقال....دياب ...دياااااب افتح
دياب اتنهد و راح فتح وخطاب قال بغضب...تعالى عايزك
دياب طلع معاه وابوه قال بغضب.....انت معاك رقم حد من ناس الجبل اللي كنت بتطلع عندهم مش كده
دياب بلع ريقه بتوتر وافتكر انو عرف ان اوصاف اتكلمت من تليفونه قال بارتباك..احم..اه معاي رقم نعيم
خطاب ابتسم بخبث وقال..زين قوي ....هتطلع دلوك ويا الغفر....تروح تجيب بت الناجي الصغيره اخت فياض... وتاجي نكلمهم .....انا هخليه كيف ما وداها يجيبها بنفسه
دياب اتسعت عيونه بذهول وقال....قصدك فاطمه وووووو
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق