سكريبت دعوة لا ترد كاملة بقلم بالميرا حصريه
سكريبت دعوة لا ترد كاملة بقلم بالميرا حصريه
-افتحولي الباب، أرجوكم ابني بيموت، افتحولي الباب خلوني أقابل الملك، ساعدوني، خلوني أقابل الملك.
وقفت ست فقيرة تصرخ في حراس قصر الملك وتستنجد بيهم؛ علشان يفتحولها باب القصر وتطلب من الملك ينقذ ابنها الصغير اللي لسه مولود، واللي تعب فجأة وبيموت قدام عنيها.
الست كانت بتصرخ جامد وتعيط؛ فخرج لها واحد من الحرس وقالها:
-أمشي من هنا وما تتعبيش نفسك الملك مش بيقابل الفقراء ومش هيسمع شكوتك.
وفي نفس الوقت ده، صرخ الطفل اللي كان في حضن الست صرخة جامدة وبعدين سكت خالص، حطت الست أيدها على قلب ابنها فلقته وقف، ووقف معاه الوقت بالنسبالها.
بصت للحارس بعيون كلها ألم ووجع وقلب انفطر على موت طفلها وجت باصه للسماء وقالت:
-يارب يا ملك الملوك ياللي دايمًا بابك مفتوح شكتلك ملك ظالم ودعيتك دعوة مظلوم يارب في اللحظة اللي مات فيها ابني نسله كله يقف فيها،
زي ما مات ابني يموت كل نسله اللي جاي بنفس المرض ونفس الوقت ومن غير ما يعرف السبب ولا يلاقي علاج، وكفاية عليه التلت صبيان اللي عنده واللي بإذن الله مش هيكون ليهم نسل هما كمان.
في الوقت ده رعد قوي هز السماء والأرض ونزل مطر غزير وكأنها إشارة من الرحمن بقبول الدعاء، الحارس بعد ما سمع دعوة الست قلبه انقبض أوي وحس بخوف رهيب منها، بس مقدرش يقول حاجة.
مرت الأيام، ومرات الملك كانت حامل في طفلها الرابع وجه وقت ولادتها، وولدت ولد جميل أوي، وفجأه الطفل تعب ومات، حزن الملك وكل اللي في القصر، بس الحارس هو الوحيد اللي افتكر وقتها دعاء الست الفقيرة واللي مقدرش يوصله للملك طبعًا.
مرت خمستاشر سنة وفي كل مرة بتحمل فيها الملكة وتولد بيموت الطفل زي اللي قبله، الملك كان هيتجنن ومراته خلاص تعبت من الحمل والولادة وموت ولادها وكبرت في السن.
كان التلت شباب ولاد الملك كبروا؛ فقرر الملك يجوزهم هما التلاتة وعمل حفلة كبيرة أوي وجوزهم لبنات من عائلات كبيرة.
مرت سنة واتنين وتلاتة وكل ما تحمل منهم واحدة وتولد طفلها يموت، نفس وضع الملكة بالظبط، الملك خلا ولاده يطلقوا زوجاتهم وعمل حفلة كبيرة تاني وجوز ولاده من بنات تاني من عائلات كبيرة ومهمة في البلد، بس نفس الوضع كان بيحصل، كل ما يتولد طفل يموت بعدها على طول.
وفي يوم اشتد المرض على الحارس اللي خاف يموت وهو الوحيد اللي عارف دعاء الست الفقيرة اللي اتقبل وقلب حياة الملك وأولاده في لحظة.
فطلب أن الملك يجيله وهو على فراش الموت؛ فرفض الملك المغرور يروح أوضة حارس ملهوش لازمة بالنسباله؛ فطلب الحارس من مراته تكتب كل اللي هيقولها عليه، وفعلًا كتبت في رسالة كل اللي حصل في اليوم ده، بداية من طلب الست الفقيرة أنها تقابل الملك وموت ابنها بين أيديها لحد دعائها على الملك وأولاده وهي قلبها مكسور وقالها توصل الرسالة دي للملك بسرعة.
راحت مرات الحارس للملك وعطته الرسالة؛ فخدها وأول ما قراها اتصدم وطلع يجري على أوضة الحارس علشان يعرف منه مين الست دي ويحاول يوصلها بس للأسف كان الحارس مات….
استدعى الملك حكيم المملكة ووراله الرسالة؛ فقاله الحكيم:
-.............
*************
🔥تم بحمد الله وفضله.
استدعى الملك حكيم المملكة ووراله الرسالة؛ فقاله الحكيم:
-يا جلالة الملك الحل اللي أنا شايفة أنك تفتح بابك للفقراء، وتسمع شكواهم وتساعدهم وتديهم من اللي ربنا من عليك بيه،
وسمعت أنك خليت ولادك يطلقوا زوجاتهم للمرة التانية، وبتدور لهم على زوجات برضو من عائلات غنية ومهمة في البلد، اللي أنا شايفة أنك المرادي خليهم يختاروا زوجاتهم من عائلات فقيرة وناس بسيطة تعرف ربنا وتتقيه فيهم وبإذن الله ربنا يبارك في زواجهم ويرزقهم بالذرية الصالحة، بس قبل كل ده، أنت محتاج تتوب لربنا وترجعله رجوع محب راغب في قربه سبحانه، وطمعان في عفوه وتطلب منه يعينك تلاقي الست الفقيرة دي وتطلب منها تسامحك.
بدأ الندم يتسرب لقلب الملك، وبدأ يحس بغلطه، وقد أيه الإنسان ضعيف وملهوش غير ربه وأنه عمره ما هيحس بالسعادة والرضا غير لما يقرب من ربنا.
جري بسرعة وفتح باب قصره على مصراعيه وقال للحراس لفوا في كل المملكة وقولوا للناس اللي ليه حق عند الملك ييجي ياخده، وبيطلب منكم السماح.
وبدأ الملك فعلًا يقرب من ربنا ويسمع للفقراء، ويحل مشاكلهم ويساعدهم؛ فلاحظ وقتها أنه كل ما يساعد حد ويفك كربه يحس وكأن الجبل اللي على قلبه والهم اللي حاسس بيه بيزول شوية بشوية.
وفي يوم قرر الملك يلبس ملابس بسيطة ونزل يشوف الشعب في مملكته عايش إزاي، وهو بيتفقد الشعب شاف تلت بنات فقراء كل واحدة فيهم بتكافح علشان تصرف على عيلتها، ولما سأل كويس اتأكد أن البنات دي فعلًا حالتهم المادية صعبة أوي، وأنهم مكافحين بشكل أثار إعجابه؛ فراح لولاده التلاتة وعرض عليهم أن كل واحد فيهم يتجوز بنت من البنات دي؛ فوافقوا والبنات كمان وافقوا.
حفل الزفاف المرادي كان بسيط، ومليان ناس قلوبها جميلة وراضية، كانت القلوب صافية، والفرحة حقيقية على الوجوه.
بعد سنة من الجواز، واحدة من البنات ولدت ولد، والتانية ولدت بنت أما التالتة فلسه ما أردش الله بالحمل.
البنت اللي لسه مولودة ماتت زي كل الأطفال اللي قبلها فحزن الملك أوي، بس الولد لسه عايش، ودا خلا جواهم أمل كبير، شهر ورا شهر وما شاء الله الطفل بيكبر وعايش وصحته كويسة؛ فالملك فرح وكل اللي في القصر قالوا الحمدلله كدا خلاص بإذن الله النسل هيرجع تاني.
وفي يوم البنت اللي لسه ما حملتش سمعت حد بيهدد البنت أم الولد بأنه هيعرف الملك بأنها خدعته وضحكت عليه وأن ابنها مات زي كل نسل الملك ما بيموت وأنها خدت طفل من ناس فقراء على أساس أنه ابنها علشان الملك ميخليش ابنه يطلقها.
راحت البنت للملك وحكتله كل اللي سمعته؛ فالملك اتصدم وبعد ما اتأكد من أن الولد ده فعلًا مش من نسله واعترفت البنت اللي المفروض أنها أم الولد باللي عملته حزن الملك أوي وتعب واشتد عليه المرض؛ فقرر ولاده التلاتة أنهم يطلقوا زوجاتهم فرفض الملك، وقال أن البنت اللي ظلمتهم وكذبت عليهم هي بس اللي تطلق، أما الاتنين التانيين فملهمش ذنب، وقال لولاده يرضوا بنصيبهم ويتقوا الله في زوجاتهم.
بعدها طلبت والدة البنت اللي لسه ما حملتش أنها تقابل الملك اللي كان تعبان أوي، وأول ما شافته قالتله:
-أنا الست اللي كنت بتدور عليها، أنا أم الطفل اللي مات قدام باب قصرك وأنا واللي بعد سنين طويلة جيت لحد عندها وطلبت بنتي علشان تتجوز ابنك، النهاردة بس أنا سامحتك ورضيت بقضاء الله وقدره، سامحتك لأنك مظلمتش بنتي وخليت ابنك يطلقها بذنب البنت التانية، أنا جاية أقولك أني خلاص سامحتك، وابشرك بأن بنتي حامل من ابنك وبإذن الله ربنا هيبارك في نسلك وتفرح بيه.
مرت شهور الحمل بسرعة واتملى القصر بصراخ التوأم اللي بمجرد ما سمع الملك صوتهم بكى وحمد ربنا، وبعد شهور وسنين، قعد الملك في جنينة القصر وهو بيبص لأحفاده اللي ما شاء الله بقوا ماليين القصر بضحكاتهم وقلبه بيحمد ربنا على واسع فضله، ودايمًا كان بيجمع أحفاده ويقولهم
(احذروا من دعوة لا ترد)
***************
🔥تم بحمد الله وفضله.
🔥استنوني في اسكريبت جديد بإذن الله يعجبكم.
🔥صلوا على نبينا محمد عليه أفضل الصلاة والسلام.
#بالميرا
#الجزء_الثاني_والأخير
تعليقات
إرسال تعليق