رواية ذكرياتنا في رمضان الفصل السابع عشر 17بقلم سلسبيل احمد حصريه
رواية ذكرياتنا في رمضان الفصل السابع عشر 17بقلم سلسبيل احمد حصريه
بص ياعمى.. انا مش جاي في بالي مقدمات وانت عارفني.. انا عايز اتكلم مع حضرتك بخصوص ليان.. انا طالب ايدها.
= ليان!
- انا عارف ان ده طلب مفاجئ لحضرتك.. بحكم اننا متربين سوا.. ويعتبر زي الأخوات.. و ده الى كنت فاكره لحد ما كانت هتتخطب لحد غيري..
" عز كان ساكت و نورا كانت عارفه من ليان ولكن برضو الموضوع كان موتر "
- انا اكتشفت اني بحبها.. وكنت بس خايف اني اخد خطوة زي دي.. علشان مش آذيها بأي شكل.. وكمان مكنتش مستقر.. بس حاليا بحاول.. اخدت مكان كبير عشان ابدا فيه مشروع ورشة كبيرة و مركز صيانه للعربيات... انا الحقيقه عندي استعداد اعمل كتير اوي علشانها ياعمي..
نورا: ألف مبروك يا حبيبي فخورين بيك اوي!
مراد: الله يبارك فيكي يا مرات عمي
مراد ابتسم وبص لعز: انا عاوز حضرتك تعاملني كأني حد غريب رخم عليا لو حابب بدل السكوت ده
عز بصله: انسي انك ابن اخويا يعني؟
مراد بجديه: كأنك اول مره تشوفني..
= انت اسمك ايه وشغال ايه؟
- اسمي مراد عبدالرحمن... و شغال في ورشة حاليا. لكن مؤخرًا.. أخدت مكان بعيد عن منطقتي.. علشان افتحه ورشة كبيره وفيها أدوات.. ومركز صيانه وكده يعني حاجات عربيات لأن ده كان حلمي عشان بحب العربيات.. ومعايا شريك صغير.. كريم
نورا ابتسمت وبصتله بفرحه وهي بتبوظ الجلسه الجدية الى بدأوها
- ادبـ ـح حاجه بقا يا عيوني عشان الحسد
مراد ضحك: أكيد حاضر.
عز: كلمني شوية بقا عن موضوعك وازاي فجأه بقيت حاسس كده.
اخد نفس عميق وبصله: الحقيقة.. انا لو عندي بنت زيها مش هديها لحد ابدًا لكن انا اقدر ادي حضرتك كلمه.. اني عمري ما هعاملها اقل ما تستحق.. بقلمي سلسبيل احمد ولا عمري هزعلها.. انا بحبها ومستعد اني اعمل اي حاجه علشانها.. انا طول الوقت شايفك قدام عيني بتتعب عشانها.. وكنت متبهدل في الغربة.. عارف حضرتك بتحبها قد ايه..
اسمحلي ارجع ابن اخوك واقولك اني... اتعلمت منك كتير اوي يا عمي.. و لولا وقفتك جمبنا بعد وفاة بابا.. مكــ..
عز قاطعه: مراد متكملش كلامك انت فاهم وعارف اني مش بحب الكلام ده.. انا يحبيبي معملتش حاجه! ده واجبي تجاه عيال اخويا! معملتش حاجه تستدعي انك تكون ممتن ليها! بالعكس.. انا الى مفروض اشكرك علشان كنت راجل في غيابي! وكنت واخد بالك من اهل بيتي.. انا يا حبيبي مهما شوفت ناس كويسه عمري ما اطمن على بنتي مع حد زي ما هطمن عليها لو بقيتوا سوا..
مراد مكنش مصدق وبصله بتعجب: اعتبر دي موافقة يا عمي!؟؟
عز اتكلم وهو بيتصنع الجديه: لا طبعا.. لما نسأل عليك الأول.. و نشوف شقتك
مراد: طب ده انا شقتي قريبه الدور الرابع علطول يعني بعدك بدور .. و أتصل اجيب ياسين واحمد و مينا تسألهم عليا
عز: ده انت عامل حسابك على كل حاجه بقا.. طيب فاضل نسأل ليان
مراد: طيب بما اني خلصت موضوعي.. فا انا زهقت من زن احمد.. عاوز يتجوز ندى في اسرع وقت
نورا: ومالو و اهو تبقي الفرحة فرحتين..
عز: انا معنديش مشكلة اسأل والدتك واسأل ندي وشوف رأيهم انا من ناحيتي موافق الولد كويس و زي الفل..
مراد: طب حضرتك مش هتخليني برضو اساعد ندى! دي اختي يعني يا عمى
عز بتصميم: دي بنتي قبل ما تبقي اختك.. وبعدين ماهو صاحبك اصر يجيب معظم الحاجات!
مراد: حتي لو يعني.. خليني اعملي اي منظر
عز بمرح: هبقي اخليك تحاسب على بوكيه الورد بتاع الفرح
"نورا ضحكت ومراد ابتسم بقلة حيلة"
- ماشي.. انا هنزل عشان هو كل دماغي عاوز يطمن على ندى..
= هي كويسه؟
- اه الحمدلله بخير.
>>>>>>>>>>>>>>>>>>>>>>>>>>>>>>>>>>>
' اللهم صلِ وسلم وبارك على سيدنا محمد '
|| في بيت كوثر ||
- كانت ندى عارفه ان احمد جي فا كانت جاهزه و طلع خبط عليها..
" طق طق طق "
- ايوه؟
= خلصتي يختي؟
" فتحت الباب وخرجت "
- اه جاهزه
= قاعد عند تيته تحت هما عشر دقايق اديني نبهتك
ايه الاحمر ده يا ندي؟؟
بصتله بتعجب: فين ده؟
- في وشك اهو
= ده زبدة الكاكاو
- والله؟ روحي امسحيها بدل ما انزل اطرده
= يلهوي عليك حاضر!!
" لقي كنزي بتضحك عليها فا بصلها بتحذير "
- اسكتي يا لمضه دورك جي
" كنزي عملت حركه سوسته على بوقها وسكتت "
" نزلوا بعد هما الاتنين و فاطمه كانت بتضايف احمد "
- طب اجبلك حاجه تاكلها
= تسلم ايدك حلو لحد كده هي قهوه بس
" مراد دخل وسلم عليه وقعد وبعدين ندي قعدت "
احمد بصلها: ايه الاخبار انتي كويسه؟
- اه الحمدلله..
احمد: عملت ايه مع عمي بقا؟
مراد بخبث: مش موافق خالص.. بيقول على الأقل خطوبة سنتين
احمد ملامحه اتبدلت: نعم !!! سنتين ايه يا مراد
ندي: ازاي يعني ده هو قال لماما قبل كده سنه!!
احمد: اصبري انتي بس ولا حتي سنه
مراد كتم ضحكه: اعمل ايه يعني ؟ انت عارف كويس عمي كلامه بيمشي عليا انا ذات نفسي
احمد وقف: لا طب يلا بينا نطلع له
" مراد مقدرش يمسك نفسه وقعد يضحك على وقفة احمد و حمقته "
احمد برم شفايفه بغيظ وبصله: بتصيع عليا ها؟
مراد هز راسه: اه.. مش قادر شكلك يموت من الضحك
ندي بصتله بنص عين: طب يعني قال قد ايه؟
احمد: وافق على السنه دي؟
مراد: وافق يا معلم مبروك
احمد صْربه براحه: يأخي على تناحتك
" مراد حضنه وكان مبسوط واحمد كان طاير من الفرحه.. وكذلك ندي بس مش مبينه "
احمد: روح بقا شوفلك شغلانه ياريت
- انا رايح اعمل شاي وجايلكم
" دخل المطبخ وقتها احمد بص لندى بحب "
- مبروك علينا
" سكتت بكسوف "
- حاسه انك كويسه هتنزلي الكلية بكره؟
= اه.. انا تمام
- هفضل اوصلك و ارجعك.. انتي وليان انا اتفقت مع مراد خلاص
= هو وافق يعني
- ايوه.
= ولا تسيبك من كل ده وبلاها تعليم
- عشان عمي و مراد يقتلو..ني بقا
= لو انتي عايزه سبيهم عليا
- لا اكيد انا عايزه اكمل
اتنهد وبصلها: طب خلي بالك علي نفسك يا ندى.. انا الموضوع مضايقني ومش عايز اتكلم علشان مبقاش بضغطك
- موضوع ايه مش فاهمه
= انك عمرك ما حكيتي ليا انه ضايقك قبل كده
- والله يا احمد مكنتش اعرف انه هيتجرأ للدرجه دي انا علطول مش بديله اهتمام ولا بكلمه
لا هو ولا غيره! مراد منبه عليا
= انا مقلتش انك سمحتيله.. انا بتكلم في حته ان من اول موقف كلمك او حسيتي انه بايخ وبيتلزق تعرفيني او تعرفي مراد علشان نوقفه عند حده
- معاك حق.. بيدج الفيس بوك بتاعتي سلسبيل احمد.. انا الى متوقعتش يعمل كل ده..
وحاسه بالدْنب خصوصا علشان ليان.. من واحنا صغيرين وهي مش بتستحمل الخناقات وبتكرها
وبس اتدخلت عشاني..
= عموما حصل خير حقكم جه..
" مراد رجع لهم "
- مش كفايه كده احنا بنام بدري
احمد: الناس لسه بتصحي صباح الخير
= صباح النور يحبيبي هننزل نصتبح تحت بقا
احمد ضحك وقام: طيب يا معلم يلا
- امسك عملت لك كوباية معايا
= هات يخويا
ندي: الكوبايات لو مرجعتش سليمة طمطم هتعمل فيكم محصْر
احمد: في عنيا
مراد زقه: هخزقها لك ياض!
" نزلوا واحمد فضل يضحك وندي كانت بتكتم ضحكتها.. "
>>>>>>>>>>>>>>>>>>>>>>>>>>>>>>>>>>>
' سبحان الله وبحمده سبحان الله العظيم '
|| في بيت نورا ||
- ها قولتي ايه يا ليان
" كنت باصة لبابا وساكته مصدومه من الى قاله "
- يعني هو بدون مقدمات كده فجأة طلب ايدي
= اه.. وبعدين انا شايف انكم كويسين مع بعض
بصتله بأحراج: ماشي يعني بس.. انا اتفاجئت هو معرفنيش انه هيتقدم
- طبيعي يقولي انا الأول
= حضرتك شايف ايه
- اكيد موافق.. انا مش هلاقي لك احسن منه
نورا: انتي مالك متردده ليه
= انا مش متردده يا ماما انا بس متفاجئه..
" ماما حاولت تفهم مالي بس انا نفسي مش فاهمه.. معرفش هرموناتي ملخبطه كده ليه.. "
>>>>>>>>>>>>>>>>>>>>>>>>>>>>>>>>>>>
' لا إله إلا انت سبحانك اني كنت من الظالمين '
|| في مكان تاني بره المنطقه ||
" كانت فريده موجوده تحت بيت قديم و قدامها واحد "
- هو انت مش قولت البيت في مكان كويس؟
بصلها من فوق لتحت: ماهو كويس اهو يا ابلة
= لا.. انا قولتلك زي البيت الى في الشارع بتاعنا.. بص خلاص مش عايزه
" كانت هتمشي فا وقف قصادها "
- استنني بس.. انا لفيت و جبتلك البيت ده عايز حقي
فريده بصتله بتوتر: عاوز كام!
= خمس آلاف جنيه
- نعم! كل ده عشان جبت بيت! وبعدين هو كان عجبني ؟؟
" و لحسن حظها.. ان ياسين شافها.. واستغرب جدا وجودها مع الواد الى واقف "
" دخل على الواد و قرب له اوي "
- في حاجه يابا ؟؟؟
= لا مفيش ياعم حد كلمك !!!
" فريده كانت بصاله بتعجب و ياسين بصلها و رجع بص للولد "
- تبعي يابا خير ؟
= كانت عايزه بيت يخويا وجبتلها ومش عايزه تدفع
- بيت ايه انا مش فاهم حاجه؟؟
فريده بتوتر: مفيش حاجه انت عايز فلوسك هديهالك خلاص
ياسين بصلها: فلوس ايه؟؟
- يلا يابا من هنا
" الواد مشي لأنه اصلا كان خايف "
فريده بصتله بسرعه: متجبش سيرة لاحمد انك شوفتني هنا !
رفع حاجبه: استني هنا انتي مش شايفه انتي كنتي فين ؟؟ اكيد هعرفه انتي هتودي نفسك في مصيبه معرفش انتوا كلكوا مالكو اليومين دول!!
فريده ربعت ايديها وبصتله: مالنا !
- ولا حاجه بس انا هعرف اخوكي
= اصبر طيب !!! ملهاش لزمه انا اصلا رجعت فكلامي ومكنتش هاخد البيت
- بيت ايه
= كنت بدور على شقة في بيت يبقي قريب من شارعنا من بدري عشان كنت خايفه بابا يرجعنا بالعافية
بصلها بسخريه: ولما تشتري بيت كده يعني انتي خلاص هتفضلي هنا؟ هو انتي تقدري تقعدي لوحدك!
- انا مكنتش بفكر صح.. و خلاص انا كنت فكراه بيضحك علينا بس هو فعلا هيخلينا هنا
= لو انتي متأكده فعلا ايه جابك تقابلي الى كنتي معاه ده وتشوفي الشقة ؟؟ انتي مش شايفه منظره؟ مش عارفه تحافظي على نفسك
" فريده استغربت نرفزته ولكن هي فعلا كانت غلطانه.. بس ده ميديهوش حق يكلمها كده! "
- انا كنت هخدها لو عجبتني
مسح على وشه: لا حول ولا قوة الا بالله
- لو عايز تقوله قوله مش هتفرق
" اتحركت وياسين فضل ماشي معاها ولكن بينهم مسافة لحد ما وصلت الشارع فا مشي هو بهدوء "
>>>>>>>>>>>>>>>>>>>>>>>>>>>>>>>>>>>
' الله اكبر الحمدلله لا إله إلا الله استغفر الله '
|| بليل | في بيت ليان ||
" كانت البنات كلها متجمعه.. ندي بتشارك معاهم انها هتتجوز خلال السنه دي و ليان بتقولهم ان مراد اخيرا اتقدم.. وفريده قاعده سرحانه.. وكنزي بتنام ومريم و هاجر مركزين في الكلام "
ليان: فريده.. يابنتي ايه الصمت ده
فريده بصت لهاجر: اصل بصراحه
هاجر: ايه ده فيه ايه
مريم: قولي شكلها مصـ ـيبة
" فريده اتنهدت وحكت لهم كل حاجه "
مريم بتفكير: مش قادره احدد مهتم عشان انتي اخت صاحبه.. ولا عشانك
هاجر اتكلمت: لا عشانها
"فريده بصتلها بدهشه وهاجر كملت وهي بتضحك"
- وقت المشكلة الى حصلت في الكلية.. وياسين طلع ينادي عمو ابراهيم من عندهم شاف فريده.. فا من ساعتها وهو واقع على دماغه
فريده: يعني ايه مش فاهمه
ليان ضحكت: دي الكلمه الى هاجر بتقولها لما تشوف حد بيحب..
فريده بصدمه: بيحب !
هاجر: انا عمري ما حسيت بحاجه وطلعت غلط
فريده: مش لدرجه حب يمكن اعجاب
ندي: المهم انتي حاسه ايه
مريم: بظبط ندخل في المهم
فريده ضحكت: مش عارفه شعور غريب.. مكنش ليا اختلاط برجالة قبل كده.. وحسيت واحنا هنمسك في بعض انا وهو اني مستمتعه بالخناقه
" ضحكوا و فريده اتكسفت وبصتلهم "
- جماعه بس! مفيش حاجه اصلا اكيد بنتخيل هو مش هيعجب بيا بالسرعه دي
مريم: بما ان الموضوع كده.. في واحد في الكنيسة شافني وطلب رقم بابا
" كلهم فضلوا يصيحوا في نفس واحد بفرحه ويغمزوا لها "
مريم خبت وشها: اسكتوا بقا
هاجر: هبقي سنجل لوحدى
ندى شاورت على كنزي الى نامت: انتي وكنوزة.
ليان: بس خلي بالك.. الغلطه عندكم بفوره
" مريم ضحكت "
- لسه لسه هنشوف..
ندى: لازم نحتفل ونرقص بالاخبار الحلوة دي
ليان: انا فرحانه ان كلنا سوا وكويسين وبخير ومبسوطين.. اتمني نفضل سوا علطول!
هاجر: بأذن الله هنفضل سوا
فريده: ان شاء الله
مريم: آمين.
>>>>>>>>>>>>>>>>>>>>>>>>>>>>>>>>>>>
' اللهم صلِ وسلم على سيدنا محمد '
|| في المعرض ||
" مراد كان واقف هو ومينا و أحمد و كريم "
" كانو كلهم شغالين في المكان.. مع ان فيه ناس تانيه بتشتغل.. ولكن مراد كان عاوز يخلص بسرعه ويشغل المكان "
مينا: هاتولي مياه ريقي نشف
كريم: انا جعان مياه ايه
مراد: انا مكلم النيله ياسين قايله يجيب اكل وحاجات ويجي
أحمد: ملقتش غير البارد ده
ياسين دخل عليهم: سامعك يانجم
مينا قرب وخد منه الأكل: كلنا هناكل الا انت
مراد: هات بس العصاير والحاجات دي للرجالة
احمد: تعيش وتجيب يا برنس
" مراد وزع اكل ومشاريب على الرجالة الى شغالة عقبال لما يجهز مطبخ يقدر يعمل فيه حاجات.. "
كريم: معاد الدرس قرب هطير انا بقا
مراد: ماشي خلي بالك من نفسك محتاج حاجه؟
كريم: لا سلام
- كريم حاول تيجي بدري زي ما قولتلك
" كريم مشي و ياسين بصله "
- مندهش اني لاقيتك جايبه
= قعد يزن ويقولي مره واحده بس
ياسين ضحك: انت عارف انه كداب ولا لاء وهيقولك خليني اجي معاك تاني اساعدك
مراد ابتسم: عارف.. بس لما يمسك النجوم بقا.. انا هشده عشان يركز في دروسه
أحمد: انا عندي معاد عشان الشقة انا كمان وهمشي
ياسين: ربنا يتمم لك على خير يا حماده
احمد: اقولك حماده ده مين
مراد: متتخانقوش في المكان بتاعي لو سمحتوا
" جاله مكالمه من فاطمه فا خد جمب و رد عليها "
- ايه يحبيبي قدامكم قد ايه
= ساعه ونص ساعتين يا تيته كده
- لا مش لازم تتعبوا نفسكوا اوي كده ساعه وتعالوا احنا جهزنا كل حاجه
= والله يا فطومه انتي الى بتتعبي نفسي
- ملكش دعوة اتعب عشانكم براحتي
= الى تشوفيه
" قفل معاها وراح عند الشباب "
- تيته عامله عزومه إجباري احتفالا بأفراحنا الى كترت دي "
مينا ضحك: والله ميه ميه انا كنت عايز نعمل لكم شوية هيصه يعني ونفرح انت الحمدلله قربت تخلص المكان و تخطب و احمد هيتجوز وانا اختي جايلها حد.. ربنا يكتر من افراحنا يا معلم
مراد: حبيبي عقبال ما نفرح بيك
مينا: يعم انا لما انشن على واحده تطلع مسمله
" مراد ضحك هو وياسين وبصلهم بصمت "
- انا عايز اقول لكم حاجه..
مراد: خير
مينا: مصيبه؟
- مش عارف بس لا مش بظبط.. انا كمان شكلي هاخد خطوة ناحية حد كده.. المشكلة اني هحتاج منكم تبقوا معايا لحسن اتسلـ ـخ
= تتسلحْ من مين
- من اخوها
مراد بصله بنص عين: انا شوفت الحكاية دي فين قبل كده ؟
" مراد كان يقصد وقت لما احمد قاله انه بيحب ندي "
ياسين ضحك: لا متخفش مش طالب القرب منك في كنزي اكيد
مينا ضحك ومراد بصله: طب ريحوا وفهموني
مينا: انا زي زيك
ياسين: خلاص بعدين بقا
مراد: المهم انها مش كنزي يعني
ياسين ضحك: يعم مش كنزي !!
" خلصوا كلهم و الكل راح على البيت.. و احمد خلص مشواره و حصلهم والبنات نزلت والمره دي كانت مختلفة لأن فاطمه جهزت البيت عشان كلهم يبقوا فيه.. الستات في ناحيه ولابسين الطرح و الرجالة في ناحية.. "
" الفكره مكانتش مجرد عزومه قد ما كانت فاطمه عاوزه تفرح بيهم ويبقوا حواليها! "
" كنزي و مريم و فريده وليان وندي و هاجر "
" واحمد ومينا و ياسين و كريم ومراد "
" وفاطمه وايمان و نورا وكوثر و شهيرة وماري "
" و ابراهيم و عز و عادل و يوسف "
" وبكده كانت شجره الجيران مكتمله.. ناقصها بس والد مراد عبدالرحمن.. "
فاطمه كانت بتبص للكل بحب وبتشوف لو حد محتاج حاجه.. ومراد كل شوية يتلكك و يروح يبص على ليان في الخباثة وهي بتاخد بالها.. وتداري ضحكتها..! "
فاطمه: حد محتاج حاجه يا حبايبي؟
ايمان: تسلمي يا ماما اقعدي معانا بقا
" قعدت وسطهم وهي فرحانه.. والأخبار السعيده قعدت تتوالى بينهم و ماري قالت عن عريس مريم وفضلوا يزغرطوا لها.. و عز اتفق مع ابراهيم واحمد على معاد فرح ندى "
" اليوم كان جميل جدا ومليان دفا!
وفي اخره كانوا بيروقوا الدنيا قبل ما يمشوا..
الاعداد بدأت تقل.. والجو بدأت يهدي "
" كان فاضل نورا وكوثر و ليان ومراد "
" كله تعب وطلعوا ينامو.. والباقي روحوا.. "
" ليان راحت لمراد في اوضة الصالة وهو بيلم حاجات "
- احمم احمم.. يا أهلا بالاستاذ الى طلب ايدي من غير ما يقولي..
بصلها وابتسم ابتسامه جانبيه: مش انتي كدا كدا موافقة
= والله..؟ افرض غيرت رأيي
- متقدريش..
= ليه بقا؟
- عشان انتي بتاعتي من وانتي في اللفه.. من ايام كيكه الفانيليا
مسحت على وشها وهي بتضحك: يادي كيكه الفانيليا
= مفيش مفر يابنتي
" قاطعهم صوت كوثر وهي بتزعق وبتنادي نورا "
ليان فضلت واقفة وسمعوا زعيق مره تانيه
- يا مراد اللحقني !!!!! يا كوثر !!!!!
" مراد راح عندهم بسرعه.. لكن ليان..
فضلت متسمره مكانها.. كأنها اتجمدت و عينيها ثابته
على اوضة فاطمه.. الى كلهم جريوا عليها.. "
يتبع..
تكملة الروايه بعد قليل
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق