رواية على حافة الثأر الفصل الخامس وعشرون 25بقلم زينب ماجد حصريه
رواية على حافة الثأر الفصل الخامس وعشرون 25بقلم زينب ماجد حصريه
#على_حافة_الثأر
#الـبارت__25
#بقلم_زينب_ماجد
تنهدت وكتله : اتفضل
شمرت الوصلة الدا امسح بيها السنك من ايدي ومشيت للغرفة وهو يكللها : يمه يمه كولي يالله جا هو هيج هستوج واصلة تتعاركين وياها
- يالنذل وانا المتعاركة وياها لو هي الجاي تطردني من بيت ابني ..
-هسه اني وياها يا يمه .. ياهو الطاردج وكايلح اطلعي .. الله يخليج يمه اذا من بدايتها هيج ترا ما يصير
- ها لا ابالك تطردك امك يالارعن ؟
- اهيييييي يمه الحجي وياج ما منه فايدة
عافها واجا وراي .. اني دا اسد الشباك مال المبردة وارجع البردة .. تقرب مني : فيان نكدر نكعد ونحجي
- ليش اجيت مسبقا لحتى نتكلم دا تجي هسسسسسه تكولي نحجي لنفرض حجينا شحيفيد وانت ماخذ قرار وجايبهم كلهم
- ما جايبهم والله ورسله وكتبه والقران امي خابرتني صايرة مشكلة ويا محمد وكالتلي راح اجيب مرت محمد واجيكم
- يعني افتهم من كلامك مؤقت
- يعني اذا مو مؤقت هم ادخل باحراج وياج وويا اهلي لا اكدر اطردهم ولا اكدر ابقيهم وانت ما ترضين كليلي شسوي بهالحالة
- عباس امك متحبني
- ولا انت تحبيها
- منو يحب انسان بالطالع والنازل يهينه ويقلل منه اني ممأذية والدتك بشي بس هي دا تأذيني
- انت تشوفينها هيج هي ما تحسبها هيج .. تشوفج ماخذتني منها وكالبه عقلي وامشينني بكيفج واني صاير لا احل ولا اربط وراكض ورا وحدة كاتلة واحد وشاردة من السجن امي شايفتني بورطة وياج وخايفة عليه حطي نفسج مكانها لو وحدة بنفسج وضعج ابنج ماشي وراها تعتقدين ابنج صح وترضيلا ؟
- اني مجابرتك
- ومنو كايل انت جابرتني امي شايفتج لاعبة بعقلي اني كعدتها الصغير مالها لو هسه اصير بعمر نوح تشوفني ذاك الجاهل الحافي اليركض بلعب بالشوارع ما تشوفني چبير .. وهي مرة مريضة شيريني وكليلي شسوي
- مو شغلتي اكولك شتسوي اني ما اكدر اتحملها وبس ارجوك عباس هيج وضع مينعاش واحد ببيته ميرتاح وين يرتاح لعد واني حامل !
- اكعدي بغرفتج وارتاحي
- واحبس نفسي فوك هالحبسة اللي عايشتها هناية ! هذا مو كلام
- شنو اللي تريدي
- تلكالك طريقة تعتذر بيها منهم
- ان شاءالله بس بداعتي لا تضوجين
- اشون يعني امثل عليك واكولك فرحانة جديات لا
- لخاطري
- اوكي حبقى هنا .. انت ابقى وياهم
- بس هم خطارج اليوم اكرام الخطار واحب
- واذا جان هالخطار مدا يحترم يا غريب كون اديب حتى نكرمه
- قابل هم غربة اهلي
- اهلك ومدا يحترمون شسوي
- جاي اكلج لخاطري
- شمطلوب مني اسوي
-بس تكعدين يمهم وتعاملينهم طبيعي بس وشتسمعين لا تجادلين كليلي واني اتصرف خوش
- كونهم ضيوف حسكت واتعامل وياهم بأصلي لخاطرك بس ضيوف انتبه
- الله مريم
.. طلع هو .. صاح على اخته ومرت اخوه يحضرون وياه الغدا .. يسولفون واخته تشاقي وتضحك وياه .. فكلت خلي اكسر هم واقع والواقع ما منه مهرب ..
طلعت يمهم بالمطبخ حجت حسناء زوجة محمد : صلاوات طلعتي خية شو من شفتينا كرصتي بس لا ما رايدتنا هنا
كرصتها علياء .. وعباس كاللها : هسه شلج بهالحجي هذا يا حسناء طاردينج عمي مقصرين وياكم
علياء : لا الله يحفظك خوية .. ما تقصرون
حجيت : الاولاد كملوا مدرسة
- اي صالهم شهر من خلصوا
-نجحوا ؟
- الجبير باثنين طالع والزغير لا الحمدلله ناجح
عباس : عبودي مو مال مدرسة هي كوة هذا على خاله عباس اختصاص شوارع مو دراسة
-والله خوية طكت روحي بالعباس كلت هالسنة ابطلنه بعد عليمن هالمرمطة وهو ما مدبرها
فيان : بس هالشي مو صحيح هذا مستقبله وهو صغير مدا يعرف مصلحته واجبج تحثي وتشددين عليه
- ميفيد جربت ما فاد
- بالمتابعة ومنع الخروج للشارع ينجبر بالقراءة
حسناء : بعد ابنها واعرف بمصلحته قابل تخافين على ابنها ازود منها
- مو بصدد اخاف بالتأكيد الأم اعرف واصلح انما نصيحة علها تنفع .
كامن يباوعن بوجه بعض ويتبسمن من جرا لجوا .. مفتهمت شبيهن .. طلعت لبرا حتى اخلي هدوم عباس بالغسالة ينغسلون افضل مما تبقى ملابسه وسخة .
رجعت لكيت حسناء تقلد وتكلها : ولج علياء احنا مو بصدد هالاموووور عيني احنا بصدد غير امور
وضحكن .. عرفتهم ديتهكمون باسلوبي وطريقة كلامي
مدا اتعمد بس الساني ماخذ هالكلام بسبب شغلي .. هم يسخرون منه ويعتبروني غريبة الأطوار
مع ان اني ايضا مرات استغرب لهجتهم وكلماتهم لكن ما استهزأ لإنو مو صحيح اهزء بطريقة كلام احد .. لإنو لهجة كل انسان هي وليدة بيئته مو هو اختارها او انتقى لهجته من بين اللهجات واللغات ..
الصراحة اذا كان بداخلي نسبة قليلة من تقبل وجودهم الان تحولت النسبة الى العدم .. فاعتزلت المكان ورجعت كعدت بغرفتي
كملوا وفرشوا السفرة
صاحلي عباس تحججت انو نعسانة بس مقبل رادني اتغدا
رحت كعدت يمه بعدني دا اريد اكعد حجت امه : كصصيلي بصل وحطي عليه سماك
عقدت حاجبي لانو بعدني مكعدت
عباس كاللها : هذا بصل يمه
قدملها بصل محطوط ويا الدجاج الشوي
- لا هذا بيه ريحة طرشي ما اريدنه تلعب نفسي
باوعلي عباس غمزلي بمعنى مشي .. مشيت رحت اكصص البصلة .. سماك مموجود جبتلها صحت بصل كالت : مو كتلج حطي عليه سماك شني تتعاجزين لو تستنكفين
- مموجود سماك
عباس : ما جايبة
- عبن مكضينها كله اكل شارع مبين بطنك خاشت من اكل الشوارع
- لا خطية كاعد تتعلم وتطبخ
- وخطية عليش راح تبجي كاطعة كلبك خطية ابو كلب الرهيف يعابيك ويعابي حالك شمالك تغيرت تتذكر لو اذكرنك شجنت تعمل بحالها المسكينة من تجي وتلاكي اكلك بعده ما جهز شكثر ترغي وتدرم
حجيت : منو هذه المسكينة؟
- مرتة الاولى جانت تركضله وما راضي هالله كاله دتاني وشوف شطيك الما رضه بجزة رضى بجزة وبعير
- مو من اللائق تذكرين طليقته واحنا كاعدين اعتقد هالشي بيه قلة احترام لوجودي
- اشوف الاحترام يخرخر منج خاطر ادورينه من احيت وليجاي ختلتي بغرفتج ما شوفتينا طولج
ندسني عباس وهو يكول : راح تخلصون العشا مناكر شنو السالفة
حاولت اكل كأنما نفسي انسدت بسبب هالمجادلات بالكلام عباس انتبه سوالي لفة وحطها بيدي .. هي كامت تتنحنح وتكول : ااااايه حظ الكبايح بالسما لايح وحظ الملايح بالكاع طايح .
اخذت نفس .. هو كام يتنهد ويهز راسه عرفته ما بيده شي .. فردت اريحه انتيجيت عليه هو باوعلي ابتسمتله .. ابتسم : تعبانة
- لا بس مختنكة
-من الجاهل تلكينه صاعد على زردومج
علياء : بيا شهر هسه انت
- دخلت السادس
- اخذتي سونار !؟
- الصراحة لا .. مأخذت ما اعرف مو لازم نروح ؟
- الوضع هسه يخوف بس شوية يهدا اخذج لبغداد لو لكربلاء يمكن احسن
علياء : عمي بغداد شبيها داعش ما وصل اطرافها والفتوى مال السيد خو ردتها رجعت الحياة طبيعية
- بس ديكولون حالة اقتصادية صعبة رواتب ماكو
- وين احنا عدنا رواتب حتى نخاف .. من يوم يومنا مالنا لا ناكة ولا جمل بهالبلد
- ما اعرف اذا الوضع حيستقر او لا .. بس اجا من صالحي لانو حامل ما اكدر ابلش شغلي بلكي الله لما اكمل ولادة يكون الوضع مستقر نوعا ما .. واذا منجح الموضوع اشتغل ع الوكالة بهولير
غمزلي ونسدني عباس : ان شاءالله
امه : يا وكالة يا شغل
عباس : يخص شغلها
- جا مرة تجيب شني تعرف فروخها وتشتغل غير تركد على جهالها
- هسه الله كريم يا يمة ..
- لا احاول اشوفلي مساعدة منزل عباس ضروري لما اجيب ما اعتقد اني اكدر اربي طفل لوحدي .
- الله كريم
امه : مساعدة منزل شنو النوبة
علياء : يعني خدامة يمه
- ما تبتي من الخدامات ما عدج ايد ما عدج رجل مو هالخلفينا وكبرنا لا جبنا خدامات ولا احتاجينا احد ..
- اذا كانت الخلفة بس تكبريهم .. فمعناها مستقبلهم وامرهم مجهول .. الطفل اليجي لابد نصنعله بيئة ومستقبل يلاىمة ..
عباس : اكلكم شني انتم ما تكضي سوالفكم هسه مو جاي ناكل وحدة ترشك اللخ بالحجي من انعل حتى اليكعد وياكم
عاف من ايده وكام ..
كمت اباوع وراه .. اكلت لكمة للمجاملة ورحت غسلت ومشيتلا
العرفته هو متضايق من وجودهم بس مدا يكدر يسوي شي .. مجبر يتحملهم
مر اليوم واني احاول اتحملهم
شو ثاني يوم .. محمد اجا وعباس بالشغل ..
مرته فتحتلا اللباب وسلم على امه .. وكعدوا يسولفون ويخططون ويوزعون الغرف مال البيت على كيفهم .. غرفة علياء واطفالها وغرفة محمد ومرته وديتفق اطفاله ينامون بالصالة جوا كبروا بعد مو مال ينامون ويانا يكولون .. وام عباس تكله اي اي هنا ينامون يمي ..
كلش تضايقت الصراحة ..
اجا من الشغل سلم على محمد وكعد وياهم شوية شافني مطلعت اجا جان كلش تعبان دخل باس راسي كالي : شبيج حبيبتي متضايقة وكاعدة وحدج احد مضايقج ؟
باوعتله اخذت نفس : لا حبيبي بس شوية مختنكة من الحمل ثكلانة
- ارتاحي لتكومين .. اتمددي هنا وارتاحي
-اتغديت
-لا والله غير اكل وياج
ابتسمتله وكمت لكيت علياء طابخة هي وحسناء بس شو ممبقين اني الظهر شفتهم ديطلعون من الثلاجة ويطبخون فمحبيت امنعهم لو اضايقهم واحسسهم بشي محلو تركتهم يطبخون معقولة طابخين بس على كدهم !
فتحت الطباخ لكيت جدورة صغار معزول اكل .. كلت هم زين ذاكرينا، كمت حميت وصبيت .. اخذت صينية وكعدنا ناكل جان تندك الباب .. صاح عباس : تفضل
دخلت حسنا : جدورة صغار اكل محمد عازلته مدا الكاه
باوعلي : صبيته
- يا صدك تحجين جا غير عازلته لمحمد جاي من درب بعيد هسه شسويله بالله
عباس : ما ضال اكل
- لا حرام اكلنا وما بقى
- منو سوا اكل
فيان : هم محبيت اضايقهم وامنعهم من المطبخ عبالي تاركين الاكل النا
عباس : جا من طابخات ما حاسباتنا بحسابجن
- ما ندري والله شمدرينا تاكلون
- جا فضائيين عايشين ع الاوكسجين
هزت ايدها وطلعت سدت الباب وراها بقوة معاجبها .. شمر الخاشوكة من ايده وكال : لا حول ولا قوة الا بالله متفض والعباس ما تفض شيخلصهااااااا دخيلك يا علي
- سمعتهم بلا قصد بس جان هدوء ديوزعون الغرف بينهم اعتقد ناوين يبقون
- حجت وياي امي وكتلها اني ما اكدر .. ضلت تغلط وتدعي وما بيك خير وخيرك لمرتك ومن هالحجي الجايف شسوي بالقران احتاريت الجنت غاد ما خلصت والشردت ما خلصت حملوا واجوني بخويطهم
- والحل
- ما ادري والله .. شسوي جا هو اخوي عزم روحه ابيتي بكلمة من امي لا شارني لا استسمح مني شكله اكوم اطرده هم مصيبة
- لتتعب نفسك ارتاح حبيبي .. والله كريم تنحل .
باوعلي وابتسم .. مد ايده ولاعب خدي : انت نعمة جبيرة بت خير وبت اصول .. الغيرج جان علت صوتها وكالت البيت مشتريته بفلوسي كوم اطردهن وعيوت وخبصت الجو ..
- همي انت مو الفلوس ولا البيت .. يهمني نكون مرتاحين مع بعض مو بدون بعض بقية الامور مو ابالي .
- الله يحفظج اليه .
كمل اكل ردت اشيل الصينية مقبل شالها هو كال: كافي عليج بطنج .
رحت غسلت صاحلي عباس : تليفونج يدك
مشيت اخذت التليفون .. باوعته ماما
رديت : الو ماما
- هلو فيون شونج ماما
- زينة
- ماما خابري ابوج ترا تعاركت وراه بسببج .. خلصيني منه بنتي
- شبيه
- متعرفي من يوم مصارت هاي الاحداث وهو يريدج تطلعين يكول خابريها تجي لاربيل البارحة هددني يكلي اذا ما دليتيني مكانها راح ابلغ عليج واذب براسج تهم بمية سنة ما تطلعين منها خلاني خوش اقسمله هالفاين هذا
- تعتقدي رايدني اطلع لاربيل فعلاً .. لو ديريد يعرف مكاني
- والله يابنتي ما اعرف ابوج بعد السوالف السواها كلها مينحزر اذا فعلا خايف عليج لو خايف على مصالحه ومسوي هالفلم حجة
- بعد اخر شي سواه ويايا ما بنفسي احجي وياه ابدا .. مو ابويه اللي يخلي ركبتي بأيد واحد اعتدى عليه ودنس حرمة جسمي .. ما اكدر اثق بيه ولا احتاجه .
- حقج بنتي بس هيج مراح يفك مني هو ديذبها براسي .. والا اكلج هو حاط عينه ع الوكالة رايدها اله وشوفي
- ما اعرف اني كلش تعبانة هالفترة
- مرحتي دكتور
- لا دا اريد اروح وكل ما اكول اجلها ما ادري شوكت التفت لنفسي بس عباس خطية مدا يفرغ بس يوم الجمعة عطلته وما اكدر اطلعه يوم عطلته واساسا ماكو دكتور يوم الجمعة
- شدا يشتغل هسه هو
- مقاول بناء
- مقاول يولي لو جاي تكبرين بيه وييطلع عامل
- المهم ديشتغل وممعتمد على اخد يوكله ويشربه
- وكاعد ابيتج مو ..
- هالموضوع ما احب نحجي بيه .. ما بيناتنا هالامور .. اني المضايقني هالفترة غير موضوع
- شنو هو ؟
- امه واخته واخوه وعواىلهم اجوي يمنا
- وين يمكم !!؟
- بالبيت
- ضيوف يعني
- لا ناوين يعيشون هناية بدون مياخذون رأيه لو يبلغونه
- صدك تحجين !
- اي والله
- ومطرديتهم
- اطرد اهله
- وانزعلهم القندرة وعلى وجوهم صدك تحجين انت
- ماما اني حاطة عباس بعين الاعتبار شنو موقفه وياهم لو اني اتصرفت تصرف سلبي اتجاهم
- وما يفكر بيج هو ويطردهم
- ميكدر
- مسكين سودة عليه لج شافج غشيمة وديعيش براسج هو واهله الفگور
- ماما اني احتاج حل مدا احتاج تحريض وكراهية بيني وبينه
- انزول عليج طلعتيني احرضج
- شنو اللي لازم اسوي
- تكوليله يتصرف فورا مو حالة هذه بيتج ومترتاحين بيه .. البيت بيت ابونا والغربة ناشبونا مصايرة
- واذا مكدر يتفاشل وياهم
- ميكدر شنو .. تحجين صدك اهله ميكدر يحطلهم حد
اخذت نفس شفت انو كلامها مدا ينفعني بشي لحل مشكلتي فكلتلها : ان شاءالله اكوله .. لتهتمين اني اتصرف ويا بابا ..
- كوليله ليخابرني وليسمعني صوته ابداً
- تمام
قفلت الخط منها .. طلعت رقم بابا الخط جديد كتبت منه ( اذا عندك شي ويايا لتتهجم على امي واتمنى تحسبني متت مثل اختي ومتفكر تتواصل ويانا مرة ثانية انكسفت الاقنعة والمواقف تبين معادن البشر ومعدنك يا بابا بين باخر موقف اعتبرني مسجونة او ميتة باللي يناسبك واتركني اعيش واتأقلم ويا حياتي الجديدة )
كتبت الكلمات وعيوني غرغرت بدموعها
الصراحة من داخلي احن اله واحبه لكن حرحني جدا بموقفه المشين خلاني اتخبى عند الاغراب حتى ميعرف مكاني ويسجني ..
دزيتها الها ..
ما مرت خمس دقايق .. اتصل بيه
انطيته رفض وخليته بالقاىمة السوداء للمكالمات يعني شوكت ميتصل بعد يكوله هذا الرقم غير متاح حاليا .
للمغرب كعد عباس ..
اهله ماخذين البيت فلاحة ملاچة مثل ميكولون محاسبين اله حساب مدا اعرف هم تصرفهم هشكل لو استفزاز .. لو شنو
مع هذا سمعت عباس وهو يطلب امه للغرفة بعيد عن حسناء و محمد كاللها : يمه تعالي رايدج بشغلة
اجت للغرفة كاللها : يمه انت امي وتاج راسي والله يطمني يوم الاتعب منج لو احاجيج بحرف البيت الج والنا الباب .. بس يمه اني مرتي تريد تاخذ راحتها والبيت اشترته بفلوسها وكلاوات تكول اقساط لهسه ما جاي انطي منه فلس لان جاي ادفع اقساط الغراض الاشتريتهن .. كعدتكم هنا شنو حتى افتهم ..
- اخيك متعارك وهددينه شلون يضل غاد
- يمه قابل اول مرة محمد يتعارك كضينا عمرنا نتعارك ونهد ونتوازه ما عفنا بيوتنا
- جا عاف شغله منين يطي ايجار
- وعاف شغله يعيش عليه
- ينذل تطرد اخيك لجل ترتاح مرتك ولك شو انت صاير اخو مريتك كلش
- يمه مثل ما هو عده مرة اني هم عدي ومرتي تريد تحلل تلبس خاط اخوي وياي بالبيت شنو
- اطي الفوك وهله يكعد هو وعايلته
- وبيت الخلفني اني واطي بكيفي يمه البيت اشتريته بفلوسها
- وانت مالك سلطة عليها تتحكم بيك
- واتسلط عليها اجيب اهلي واعيشهم براسها شلون حجي هذا يمه
- شوف عبيس اني القنعت اخوك يجي ليجاي ونلتم كلنا ابيت واحد من اسمعنك مخشن كلبه بكلمه لو محاجي والله والثلاث اسم الله اطلع منا وادعي عليك ويا عباس كلبي وربي غاضبين عليك الى يوم الدين
- يمه هي مو هيج جا اني المن صحتج حاجي وكليليه اذا يريد نشوفله بيت ايجار قريب ياجر ويطلع
- جا خل يكعد يستراح اليوم وصل بالليل تطرده
- يمه اني ما طارده بس مال توعدينه يجي يعيش ابيتي بدون ما تبلغيني ما مقبول ولا ارضى
- لانك دثو
- دثو مو خوش زلمة كولي اليعجبج .. اني الوضع هاذ ما اتحمله
- احجي وياي عدل لا اخذ اخيك هسه واهجن والله ويحرم عليه بيتك هاذ
- اني يمه ما موجهلج الحجي ولا ماسج بس لا تختبرين صبري اني ومرتين كاعدين مرتاحين لا تخربينها علي
- يااااااااااع اني اخرب بيتك ولك اني طلعت اخرب .. تكول على امك هيج ولك عباس عاي تالية تعبي وشيبي طلعت اخرب بيتك بالعباس الليلة ما اضلن ولا سويعة هنا هسه اكومن وامش وانعل ابو اليطب بيتك بعد يالنذل
- يمه اني ما ما طاردج بس تصرفاتج هاي جاي تموتني طلكت وحدة وهجمت بيت كبل حتى ترضين بس مو كل مرة اسويها هليني اعيش ابوس ايدج
- امداك وامداها والله ياخذكم كون ءءءءءء يا عباس ناخية كلمن عده جاه الما يحطلكم حجر على حجر التذب امك على مود *****
- يمه منا جاهل لا تفشرين ..
- امشي مني ما اظلن اليوم والله
- يمه جا هي لو تكبين لو نا تتفاهمين
محمد : شكو شكو
- امي باليتني بلوة خوية البيت مو بيتي .. المرة هي اشترته وحطته باسمي اني على يا مال احيب واحط اهلي بدون رضاها
- ها كلامك هذا معناها اطلع من البيت
- خوية خطاري وعلى عيني وعلى راسي ولو بيتي تاخذه مني واني اكعد بالشارع بس البيت مو بيتي تفتهمني لو لا
- خطارك شنو .. اني سلمت بيتي مال الايجار غاد وخليت الغراض كلهن باجر اجيبهن تلعبون علي
-لا لا يمه امشنا امشنا النذل هاذ كام يطرد خاطر يراضي مرته
عباس : يمه بس اكعدي رحمة لوالديج هو الحجي مو مصايح
- ما اكعد ولا ساعة وحدة
يريد يهديها وما تقبل كامت تلف بحجابها وتريد تطلع .. ومحمد يتعارك ويتحاجيى ويا عباس .. حسناء واطفالها واكفين بصفحة يباوعون وعلياء تجر بامها
حجت حسناء : ارتاحيتي هسه من سويتي الگوم دماية
باوعتلها : العفو !
رفعت حاجبها وسوت حركة بحلكها واندارت عني
بهالاثناء امه تخربطت وكلهم ركضولها .. الصراحة اني بقيت متصنمة بمكاني معرفت شنو اسوي لو شنو لازم اتصرف
خفت اتقرب منهم وهم بعصبية وصياح واحد منهم يتحرك او ايده تشمر وتضرب بطني فبقيت بعيدة عنهم اتفرج عليهم
شالوا امه للمستشفى ..
وطلعوا كلهم بقت بس حسناء واطفالها .. اجتني كالت : تكدرين تحسبيها مثل امج ترا باجر عكبة من يصيرون عدج جهال يذبونج مثل ما هسه تطلبين من عباس يذب امه
- ومنو كالج اني طلبت منه يشمر امه
- جا عليمن تعاركو
- ما اعرف روحي اسأليهم اذا حابة تعرفين
- صياحهم وصل لاخر جار تكله تطردني ما اضل ابيتك
- ام وأبنها عادي .. تصير بينهم مشاحنات
- انت منين تجيبن هالحجي تمالخوا والمرة طاحت علينا وهي تكول مشاحنات .
اخذت نفس تركتها ورحت كعدت بغرفتي ..
لساعتين رجع عباس وجايبين انه صاعد ضغطها ومتخربطة وكايليله لازم تاخذها فحص .. حالتها مبينه مو زينة لان هي عدها كانسر بس سوت عملية وزالت الورم بقت تحت المعاينة حتى تسيطر ع الوضع
رجع كلش تعبان ومتأذي نفسيا
محاولت اسآله او اغثه بشي بس اخذت ايده ونمت يمه بدون ما احجي ..
ثاني يوم خابرني الظهر كال : راح اخذ امي للمجمع بالولاية حضري نفسج تروحين ويانا
- لويش
- حتى تسوين فحص للطفل .. هم نجيك حالتج افضل
- تمام
اهله كانوا مقاطعيني كلهم ..
المشكلة اكو امور ابالي احجي واردد بيها واصنع ردود لكن من اجي للواقع احس ميليق بيه اتعارك واتهجم بهالطريقة .. ميطلع مني هالتصرف فدا اسكت والسكوت ديسببلي كتم وبغتة بداخلي مدا افضفض مدا احجي مدا ارتاح
ضيف لها الحمل وثقله وهرموناته .. غير الحبسة بهالبيت والبيئة العشائرية الصعبة هنا واللي ممنوع مرة تمد راسها من البيت المرة عيب يطلع شعرها المرة عيب تلبس ملابسها العادية لازم عباية او جبة عريضة .. احس مثل السمكة التعودت تعيش بمي وطلعت دا تعيش ع البر وتجاهد حتى تبقى صامدة كل هذا لانو احب عباس مدا اكدر اتحمل اغثه او اضايقه حتى لو بفضفضه .. اكول هو يرجع تعبان من العمل الصعب الديشتغله .. اجي اني ازيد عليه اذا اني ما ارحمه واهله ميرحموه والدنيا مترحمه هم خطية .. فاسكت
رجع من الشغل صبيتله الاكل تغدا كال: انام ساعة وكعديني على ما تكملين
فرحت تحممت وحضرت نفسي لحد مكملت كتله
بلغ علياء حتى تروح ويانا
احر تكسي اخذنا يسموها الولاية
مدا افتهم حاليا المصطلحات ليش يسموها ولاية بس هشكل تتسمى
خلى علياء ويا امه ع الفحص يم الدكتور وحجزلي عند دكتورة نسائية ، اول مدخلت طلبت مني انام ع السديا .. نمت سألتني : يا طفل هذا
- مفهمت !
- اول طفل ثاني
- اول
- كم سونار مسوية
- اول مرة
- اول مرة يعني اول طفل وهسه داخله السادس ومتعرفين حنس الطفل ولا مسوية سونار لويش هاملة نفسج هلكد
- هيج صار
كامت تدوس بالسونار عدل .. تغيرت ملامحها
انت مرتكبة جريمة بحق نفسج وبحق الطفل اللي ابطنج ليش هيج
- ليش
- الطفل اللي ابداخلج ع الاغلب يطلع مشوه او مثل ما يكولون منغولي
حجتها مباشر بدون مقدمات ولا اي مراعاة
بقيت متصنمة كدامها !
- شدا تحجين
- يحتاجلج دوبلر ملون ..
- شلون مشوه
- ما اعرف لازم تسوين هذه الفحوصات اللي كتبتها الج وترجعيلي ..
- قبل الفحوصات انت متأكدة الطفل مشوه
- غالبا نعم مشوه ما اعرف اذا ماخذه اثناء الفترة الاولى ادوية او متعرضة لاشعة لازم نشوف الفحوصات كاملة حتى نفحص
اخذت الورقة منها اريد اوكف على رجلية مدا اكدر
بالموت وكفت على عيني .. غوشت مدا اشوف شي مجرد بس طلعت من باب غرفة الدكتورة اغمى عليه معرفت بعدها شنو صار
غير اني ع السديا وعباس يصفك بوجهي والدكتورة تحاول تصحيني
كامت تحجيله وتكوله .. وهو انسطر معرف يحتار بيه لو بالخبر ..
كعد بالكاع ولزم راسه .. دخلت علياء لزمته وكالتله : شكو عباس شصاير ويا فيان
كالتلها الدكتور : انت تقريبلا
- اخته
- اخذي زوجته ساعديها تكعد بفد مكان جيبلها عصير خلي تستعيد وعيها وهم يكولولج ولازم يسوون الفحوصات
كاملي عباس وهو يساعدني
مدا تطلع من عيني ولا دمعة بس عباس عيونه صارن جمر .. وهو يفرك بعينه حتى لا يبين هو يبجي
حجه لاخته كامت تبجي وتباوعلي وتفرك بأيدي : كلها بيد ربج لا تحسبين وربج ذبيها على الله وهو اليدبرها
راح عباس جابلي عصير شربني كوة
كتله : اريد ارجع للبيت تعبت
- الفحوصات
- غير يوم مدا اكدر اوكف على رجليه اريد ارجع
اخذلي تكسي وبقى علياء ويا امه
صفت التكسي مقابيل بابنا جانت سيارتين تاهو من بعيد عرفتهم سيارات والدي
بس شاف عباس نزل من التكسي نزل من السيارة هو وتوجه بعصبية عباس ما منتبهله بس اني لاحظته بسرعة
بدون وعي وكأني واخيرا شفت واحد مني و يشبهني
رحت شامرك نفسي على ابويه وصرخت بقوة ( بابا )
هو بعز عصبيته توقف ولزمني بقوة وارتعد من صوتي لما سمعني صرختها واني ابجي
اريد اجمع الكلمات مدا تنجمع بلساني
اريد اسيطر على دموعي مدا اكدر .. كل اللي صار ويايا انهاريت بحضن ابويه
هو احتضني بقوة وهو يكلي : بابا فيان باوعيلي بنتي شنو صاير وياج .. انت شنو مسويلها لو مأذيها بقيد شعره بالله اطير ركبتك من راسك وما تشتم الهوى شمسويلها
- الطفل اللي ابطنها مشوه هيج دا تكول الدكتورة
- شلون هيج !
كمت انحب من كل گلبي واني احتضنه بقوة
كام يمسح على راسي : فيان بابا .. باوعيلي لتخافين اني اسفرج لافضل الدول حتى نعالج الموضوع الطب متطور ويمكن اله حل فيان بابا باوعيلي
- بابا ابني مشوه بابا .. اني راح اخلف طفل مشوه
حجيتها ورفعت راسي لوجه واني اكلمه لكيت عيونه مدمعه باسني براسي وكالي ( لا تهتمين ولا تشيلين هم اني راح اتواصل ويا افضل الاطباء حتى نعالج)
مشى عباس فتح البيت دخلوا بابا والحماية مالته
بابا يباوع للبيت .. بسيط اثاث اقل من البسيط ويكاد يكون معدوم لان ما عدنا تخم مجرد زولية .
بقى بس يباوع للبيت واني بحالة انهيار تام
رجع باوعلي صفن بيه همسلي : هو يسوى تعيشين هالعيشة وهالالم بسببه
سحبت ايدي من ايده وهو لازمني : لتشيل همي اذا اتطمنت عليه الان تكدر ترتاح وتتركني اعيش لانو ابني تشوه بسببك وبسبب الحالة العيشتونياها واني حامل ببدايتي ما راح اسامحك طول عمري
- اني سبب تشويه ابنج
- نسيت كمية الادوية الاخذته اثناء فترة الحمل لما سمحت للكلب يتعدى عليه
- متى اني سمحت افضل ما نتكلم بهالموضوع الان .. كومي هذا المكان مو مكانج البيت هو بيتج سواء اختلفنا او اتفقنا تكدرين تعيشين بيه انت وزوجج بدل معايشين بهذا البيت
- محروح وياك لاي مكان هذا بيتي وهنانه راح ابقى
- ماشي انت اهدي وارتاحي وكلي ينحل بابا بس لتقهرين نفسج واتعبين .
كمت اتحرك ابتعد شوية مني كمت من مكاني رحت لغرفتي
هو لزم عباس كاله : واجبك تقنعها اخذها لهولير .. حتى اذا ما لكيت الها علاج هناك اطلعها لتركيا او اشوف اي دولة ممكن تعالجها
عباس : اني راح اخ.....
- لا تتمرجل براسي مو وكت تثبت لروحك لو تثبتلها انت رجال كافي معيشها بهيج بيت ميعيش بيه حتى الحيوان تاخذ مني بنية حاطها بنص قاصة مثل الالماس تجيبها نحطها بوسط الحضيرة اني لو اتكلم لباجر ما راح يبرد كلبي من هالوضع المعيش بنتي بيه
- بنتك قانعة وراضية بوضعي واحنا متفاهمين
- مو موضعي هذا موضوعي تقنعها نعالجها بافضل الامكانيات
- ما راح ارتاح تبقى بعيدة عني ..
اجا عباس كال : حبيبتي اني افضل تبقين يمي .. بس كلام ابوج صحيح احتمال اللي هو يكدر يوفله من علاج متطور اني ما اكدر شنو رأيج نخلي الكرامات والخلافات على جنب ونفكر بمصلحة الطفل
- بشرط تروح ويايا
- ما عندي مشكلة شتريدين اني خادم المهم عندي انت تكونين بخير .
جمعت ملابسي كامل وملابس عباس وكملت جنطنا اجتي علياء وامه كام يحجي وياهم عباس .. امه صارت تذب كلام كدام ابويه وتتشمت تكوله : حيل الله ما قصر حوبة كلبي شعملت بيه على بزري هالحرك كلبك ببزرك
اني تخبلت هنا مكدرت اسكت
طلعت واني اكولها : كافي انت يمتى تقدرين عمرج وشيباتج وتسكتين ملي اني تعبت منج تعبتتتتتتتتت
عباس : كافي عوفيها امي مريضة فيان .. كافي عوفيها تحيج
- اني هماتين مريضة مو بس امك .. دا تتشمت بيه .. وبابنا هذا حفيدها لو اني جايبته من الشارع
جاوبتني : اسالي روحج منين جايبته من اتعدوا عليج يطلع الجاهل وسويله نحليل ابن ابني لو ابن غيره
بابا تخبل وعباس كامي صيح عليها ويتجاوز واني متحملت كلتلها : عمري متشمتت بيج وكلت الله خلا بيج مرض خبيث من اعمالج رغم كل السويتي بيه .. بس هسه من صدك اكولج تستاهلين السرطان واكثر
بمجرد مكلتها ما احس الا راشدي من عباس بكل قوته يضربني وهو يكلي : تتشمتين بمرض امي كلببببببه ...
هنا بابا انجن .....
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق