رواية على حافة الثأر الفصل السادس وعشرون 26بقلم زينب ماجد حصريه
رواية على حافة الثأر الفصل السادس وعشرون 26بقلم زينب ماجد حصريه
على حافة الثأر
( بقلم زينب ماجد )
الحلقة_26
بعد الكف بعدني ما مستوعبة عباس ضربني وابويه لزمه .. وتلازم وياه عباس .. ابويه يكوله : لك انت تضرب بنتي ولك اليوم ادفنك جوا الكاع والله
وعباس يكله : اني ومرتي اربيها شلون ما اريد خليني محترمك ابييييتي ولا ادخل
ديحجي ابويه جابه ببوكس والحرس ادخلوا والنسوان تراكضوا دخلوا البيت على صوت ابويه ..
اني لازمة خدي وواكفة متصنمة .. بس دموعي تجري
سحبني ابويه ، وعباس يصيح : مالها طلعة .. لو طلعت من هذا البيت اندمها والله .. متطلعين
ابويه حط ايده على ظهري وحجاها بهمة : امشي بنتي
مشيت ويا بابا وعباس يصيح : اندمج والله لو روحتي فيااااااان .
مسمعتله طلعت ودموعي تجري صعدوني السيارة بابا كعد يمي .. بالي كله مشوش .. عباس بدل ميحاسب امه تعيرني بابنا يضربني ! بدل ميوكفون ويايا هيج يسوون بيه !
جانت السيارة تمشي باقصى سرعة
وكل مطب نعبره احس بألم ببطني .. بابا طلب من السايق يخفف سرعة لأنو ما احتمل المطبات .
حجه: راح نعالج لا تخافين بنتي
- راح تعالج الأمر لو تسجني حتى تغصبني
- يمتى سجنتج اني شفتيهم قيدوا اديج ؟ حطوج بزنزانة ؟
- واللي صار شنو
- اكو امور مجتمعية وسياسية انت مدا تركيها وهالشي يأذيني بيني وبين ابناء عشيرتي بنتي قلت رجل منا ومدا تكدر اسيطر عليها .. واني مكاني بالدولة بنتي تشتكي وتاخذ حقها بالقانون .. هالامور كلها دا ترجع عليه بعائد سلبي ..
بس بالنتيجة اني ما سمحت لأي احد بأذيتج
- واللي سواه شوان مكان اذية واللي دا اعيشه هسه مو نتيجة الصار
- تتوقعين اني اللي بعثت بشوان حتى يعتدي عليج !؟ ماكو اب يسويها
- بس انت سويتها
- ما سويتها .. اني بلغته وكتله روح تفاهم وياها وخليها تطاوعك هو اتصرف من راسه
- وجيته الي واني محبوسة بالمستشفى
- هو اجاج
- تنكر
- بنتي اشوان شارد ومحد ديعرف مكانه وين لان امج حاطته ابالها ودا تبلغ عليه
- يعني بس امي .. انت مهامك هو اتعدى عليه !؟
سكت ما حجه .. بعدت نفسي عنه هيج
لحد ما وصلنا لمطار بغداد .. جان محجوز تكتتات باسمائنا .. رغم اني لجايبة جوازي ولا هويتي .. بس هو مكمل الموضوع من يمه ..
بس صعدت الطيارة غفيت ..
مكعدت غير على ايد ابويه يندهني وهو يكلي : يلا بنتي وصلنا انزلي
نزلت وياه جان الحو بارد باربيل بالليل عكس الجو هناك بالكوت حار .. رغم صيف
وصلني للبيت ..
اتصل .. اجت المساعدة كاللها : شوفيها شنو تحتاج ولبيلها كل طلباتها وابقي يمها خاف تتأذى ومحد موجود .
سالتني اذا مشتهية شي
رغم قهري وكسرتي على ابني لكن كنت جوعانة جدا
فكلت الها : اريد دجاج مشوي وياريت بسرعة لإنو جوعانة حيل
فطلبت من الحرس يجيبون دجاج مشوي وباقي الامور وفتحت جنطتي رتبتها بالخانة وانطتني ملابس فضفاضة البسها ..
اخذتها ورحت اسبح
على ما كملت لكيتها ناصبة المائدة ومخلية كلشي
وهي تكولي : تفضلي ست اكلج جاهز
كعدت بسرعة واكلت بشراهة لانو كنت حيل جوعانة ..
صفنت .. اني وين .. بأي مستوى باي مرحلة .. هيج جنت شنزلني منازل صرت اتمنى الكلمة الحلوة من ام شخص ما وفر جهد يضربني باول كلمة طلعت مني لربما غلطت بيها .. لا عذر موقفي ولا قدرني !
موقفه جدا جرحني ..
مدا اعرف انقهر منه لو من وضعي وابني
شنو سويت حتى ابني يتشوه .. بعد انتظار سنين اتمنى يصير عندي طفل وعائلة اعيش بهالتشتت
تركت الاكل ورحت غسلت
انداريت المساعدة واكفة يمي دا تنطيني المنشفة
كلتلها : بابا وين
- بالصالة منتظرج
نشفت ايديه وانطيتها ومشيت للصالة هو كاعد ديخابر
: ما اكدر اليوم اجي يا نداوي ..
كعدت كدامه حجه : بعدين نحجي ان شاءلله باي .. قفل الهط بوجهه
- ندى صديقتي !
ابتسم .. رجعت اتصلت
سوا التليفون صامت : شلون صرتي ؟
- مجاوبتني
- هي
- ومرتك تدري ؟
- وتدري يعني شسويلها عاجبها تبقى معاجبها تولي
- يعني تدري وقابلة
- مغلسة هيج نساء بنتي عارضات نفسهم للمتعة مقابل المال اللي يتلموه منا ميهمها اني شأسوي لان تعرف بروحه بس تعرض تتطلق ..
- يعني دا تكول رخيصات
- هم اللي رخصوا انفسهم
- ويمكن يحبوك
- لو شفتي عباس يخون راح تغلسين
- لا ابدا ولا ممكن
- اذا القضية زواج جسدي ماله دخل بالحب والعواطف
- انت مرتاح بهشكل؟
- ربما نعم
- ربما
- الرجل بعمري يتمنى عائلة يرتاح بيها
- انت تكول هشكل !
- امج تطلقت ؟
- بعدك تحبها
- تبقى ام اولادي واولاى من غيرها
- انت مو بحساباتها
- عوفينا من هالمواضيع اني اتفقت ويا دكتور صديقي هنانه واكو دكتورة تركية شاطرة هنا اخذت موعد حتى يطلع على حالتج
سكتت بلعت ريكي وتحسست القهرة اللي بداخلي : نطقت : واذا مجان اله علاج .
- كوني مؤمنة الله حير يعطي ويهب الخير لا تنكرين ايمانج
الصراحة قلق ملازمني مدا اعرف شفكر ..
تركته وكمت رحت للغرفة .. اجتني المساعدة وهي شايلتلي حليب بالكاكو وتكولي : الحليب طبيعي مو مصنع .. حليب بقرة .. ضفتلج وياه كاكو حتى تحبيه .. اشربي
ابتسمت : شكراً
اخذته منها ..
وخليته ع الميز وكعدت مقابيلي حجيت : تكدرين تاخذين راحتج لما احتاجج راح اصيحج
كامت طلعت ..
اخذت نفس وتنهدت .. باوعت تليفوني
عباس لا حاول يتصل بيه لا يسال عني ليعاتبني .. ولا اي شي محرد مطلعت انسيت وكأني مالي وجود ولا ذكر !
لربما بعده .. زعلان بسبب السووه وياه الحرس مال بابا
شربت الحليب حاولت انام مكدرت بقيت بين افكاري للصبح يلا كدرت اغفى
بابا وصاهم محد يكعدني او يزعجني لحد العصر
طلب من المساعدة تكعدني .. اجتني ندهتني فزيت بهمة وهي تكولي : اسم الله ليش فزيتي
- اني وين
- ابيت بابا
بقيت اباوع للغرفة اتأملها لحد مستوعبت اني وين وشصار .
مديت ايدي للتليفون ماكو اي رسالة ولا مخابرة
كمت من مكاني تحممت ولبست وطلعت بابا جان منتظرني
حجيت : حتروح ويايا
- اكيد ما راح اتركج وحدج بهيج موقف
- ما عندك شغل
- ما عندي الاهم منج
ابتسمت .. شي من شعور المحبة وصلني خلاني اشعر براحة واطمئنان بظل الظرف الصعب اللي اني بيه وحدي .
رحت وياه للمستشفى ..
سوولي تحاليل كاملة ودوبلر ملون .. وفحص ..
كالوا لابويه ..
الجنين مو مشوه .. تقريبا اعضاءه ووضعه سليم بس احتمال يطلع من متلازمة داون .. بنسبة قليلة ممكن تبين على ملامحه وممكن لاء والوقت متأخر بالاكتشاف .. ميصير تنزله او اي شي لان الطفل بهيج مرحلة بدا يكتمل فتنزليه ممنوع رسميا
- وبهالحالة ؟
- الطفل احتمال يطلع سليم بس بيه خلل بسيط ممكن يكون عنده تأخر لاحقا او ما شابه بس مو شي يخوف
- شنو سبب الحالة ؟
- مو سبب علاجي .. سبب هرموني.
- يعني اكيد حيطلع بيه خلل محيطلع سليم ؟
- احتمال جبير يطلع بيه خلل لكن خلل بسيط واحتمال يطلع سليم بعد الامور بيد الله وهذا يبقى تشخيص طبي خاضع للخطأ ادعي ربج يجيب العواقب سليمة .
هزيت راسي بألم وبابا يلزم ايدي : صيري قوية ربج موجود ادعي وميضيع يمه داعي
- يارب
ساعدني اكوم وطلعني من العيادة .. اني ابجي
حجه : مو طمنج الدكتور ليش تبجين بنتي .
- بابا حياتي مدا تصفى .. مدا تمشي مثل ما اريد دائما ما تكون مشوهة اني تعبت حابة اعيش حالي حال الناس لويش اني هيجي
حضني واني ابجي وكام يمسح على راسي صعدني بالسيارة والسايق طلع بينا للبيت واني ابجي حط ايده على ايدي : لا تهتمين بابا اني يمج ريحي بالج وثقي بالله .
- بس شنو الفايدة اذا الطفل اجا مشوه واني وابوه ممستقرين ومهددين ومعايشين مع بعض مثل كل اثنين لازم يعيشون حياة طبيعية .. شكد دا احاول اعيش مدا اكدر وكأن الحياة رافضة اعيش مرتاحة اني مكتوبلي الألم بابا
- بعدج تفكرين بعباس !
- مو بيدي و ألله مو بيدي
مسحت خدي واني اجر نفس بخشمي وابعد بشعري :: بابا اني لما اكون يمه اكون مرتاحة حتى لو بأقل الامكانيات حتى لو كانت حياة بسيطة وبيت بسيط بس بوجوده اني ارتاح ..
- اي راحة وهو يمد ايده عليج ويضربج ؟
باوعتله :- تريد تقنعني بحياتك مماد ايدك على ماما وضاربها
- دا تبرريله فيان !؟
اخذت نفس وفركت وجهي بتعب : بابا اني مو بخير
- شنو الاسوي ويرضيج وتكونين بخير ؟
باوعت لزمت ايده بترجي - تسندلي عباس وتقرب منك اني مرايدة من الدنيا غيرك انت وعباس تكونون اقرب الناس اليه ومتصافين ومتبتعدون عني .. لو مهما صار بيني وبينكم انت وياه اغلى اثنين على گلبي
اتنهد بتعب وكأنه خضع لمرادي :- يقبل يجي يعيش بكردستان ؟
هزيت راسي واني اندار لشباك السيارة واجاوب بصوت خافت : لا
- ونحير بمزاجه شلون يعيش ؟
رجعت باوعتله :- مرايده منك تعيشه رايدة منك تقربه منك بس تتصالح وياه تعتبره زوجي مو عدوك ولا انسان يحاول يستغل بنتك ..
- اني مستعد اسوي اي شي يريحج بنتي .. بس اذا يستاهلج اذا ما يستاهلج لو شفت بيه انسان يستغلج ساعتها راح ابعده وبطريقتي .
ملت نفسي واني اسند راسي على چتفه واطلع تليفوني
ماكو اي رسالة ولا اي اتصال .. معقولة اني هلكد هينة عليه مكلف نفسه برسالة وشافني ما استحقها !
وصلني للبيت
دخلت البيت استقبلتني المساعدة .. اتعديتها ومشيت وهي تبعتني كعدت وهي تمد ايدها تاخذ الجنطة عني : مي بلا زحمة
كعد بابا : تبقين تريحين هنا كم يوم
- لا
- شراح تسوين
- حابة ارجع
سكت وهو يباوعلي .. كوا اتنفس من التعب ناولتني كلاص المي .. شربته وخليته ع الميز .. دنكت راسي بين رجليه واني الزم باديه دمعت .. باوعتله : معقولة ابني اللي حلمت كل عمري يصير عندي طفل ينولد مشوه !؟
شنو صار حتى هيج يصير بيه ليش مشوه
- انتو سويتوا عقد محكمة !؟ سويتوا فحص طبي قبل الزواج كل هاي الامور خضعتولها قبل لتلومين القدر ليش ديسوي بيج هيج
لتلومين القدر بااخطائج واستعجالح بنتي
لوماشية حسب الاصول ما كان صار بيج كل هاذ .. ديكولج الخلل هرموني مو طبي معناها انت ويا ممطابقين جينيا وهالشي كان يبين عندج لو سويتي فحص مبكر قبل الزواج .
-ومنو كان يسمحلي اعيش بالاصول لو ردت
ليش دا تتغافل عن الصار وتذب اللوم بيه .. منو كان يقبلي اتزوج غير شوان ..
- ويمكن لو متزوجة شوان تعيشين بحياة زوجية اهدأ واستقرار افضل .. كان انت الان مدير عام باحدى الوزارات .. والخدم والحشم تحت اقدامج وشوان بامرج مو انت بأمره .. بس لو ابقى الوم منا لباجر مراح يفيد وياج
انت اخذتي طريق غير اللي اني اتمنيته الج .. وهذه النتيجة
زوج وضيع غير محترم يعنفج ويعيشج ببيت ميعيشون بيه الخدم مالج مو انت ..
- كدرت تنسى ماما ؟
جانت مو نعم الزوجة وتركتكت واتزوجت غيرك بنفس السنة اللي اتطلقت منك كدرت تنسى كدرت تعيش حياة مستقرة وترتاح ؟
سكت ..
ليش تلومني بشعورني واني اشبهك
بس الفرق اني مو رجال واكدر اعاشر اكثر من بشر وقلبي مع انسان اخر ميستحقني .. اني انثى والانثى متكدر تنطي نفسها وشعورها الا لانسان تحبه حتى لو كان ميتساهلها .. متكدر .
تنهد بتعب : اني راح اجي وياج بكل اللي انت تريدي لكن اللي اريده منج هو شي واحد فقط ما تنسين انت منو وبنت منو قودي حياتج لا تنقادين .. لما تسمحين لغيرج يقودج راح تنطي شعور هو افضل واكبر منج وهذا راح يخلي المقابيلج يتمادى ..
ليكن بعلمج اني ما راضي بكل اللي ديصير لكن راح انزل عند رغبتج واحقق الامور اللي انت تريديها وراح اسعى احققلج الحياة اللي تتمنيها ويا زوجج بس متنسين انت منو .
بقيت اباوع بوجهه
جنت اسوفه على حق احيانا سكوتي وحبي ديعتبر خصوع وضعف مو حب وهالشي ديخليني اتأذى .. دا اقنع نفسي اتغير واكون حازمة وما اتهاون مثل ما اني عرفت نفسي والحواليا يعرفوني شكد انسانة صارمة ومو سهلة
لثاني يوم وعباس مداز اي شي ولا محاول يبادر بحرف ..
رجعنا اني وبابا لبغداد .. ماما كان بالها يمي فاستقبلتني اول ما اجيت وحضنتني ..
ودخلت للبيت كعدت ويايا وحاولت تواسيني
جانت حالتي النفسية تعبانة وصرت اكره شعوري المرتبط بعباس لما يرد عليه افرح ولما يهملني انقهر وكان بحياتي ماكو غيره واسأل نفسي ليش هلكد اني ضعيفة كدامه !؟
وما الكي جواب اجاوب بيه نفسي
بس روحي مو بالكيف تركض وراه .
طلبت من بابا ارجع لبيتي اللي بالكوت ..
كالي لباجر امنلج حارس ومساعدة منزل يرافقوج للبيت واني ادبر الوضع هنا ونتواصل حتى تنتقلون البغداد.
اقتنعت .. وانتظرت لثاني يوم
امنلي سيارة وحرس ومساعدة منزل ..
طلعت للكوت وصلني للبيت ... فتحت الباب دخلت واالحارس بقى برا .. والمساعدة تبعتني ..
طلعت علياء وهي تكول : منوووو
صرت كبالها : ها شنو اجيتي ؟
اتجاهلتها وعبرت دا تفوت المساعدة كالت : هوب هوب منو هاية المرة كرايبج غير تكليلنا .
تجاهلت كلامها وباوعت للمساعدة : تفضلي فوتي للمطبخ واخذي فرة ع البيت تعرفي ع المكان واي غرفة تعجبج اخذيها وبلغيني حتى تتجهز لاقامتج
- مشكورة ست
مشت .. وكفت ام عباس : ياهي هاي الجايبتها النا اكفي ما عدي مرة غريبة اتكابلني وتكعد .. اخذيها وطلعي يلا .
مجاوبتها ومشيت والمساعدة ورايا جرت البنية من ملابسها وصاحت عليه : بربوك مو احاجيج شني جاهل كدامج وتتجاهليني بت الجلب انعل اهلج ولج اخذيها وطلعي براااااا يلاااا
نزلت حسناء مرت محمد ونزل محمد على صوتها ..
كلت الها : مو بمزاج ارد على احد .. وميحقلج تحاسبيني ابيتي .
عفتها ومشيت وعلياء تكول : حتى زلمة بالباب يريد يدخل ياهو هذا الولد
صاح محمد : هوووب فهمينا مني المرة وياهو الزلمة الجايبته
انداريت بسرعة :- وانت منو حتى انطيك تقرير منو اجيب ومنو احط احترم نفسك لما تصيح ورايا افتهممممت
- شوفي من تعلين صوتج وياي او مو مرت اخوي انعل ..
بسرعة لزمته مرته وهو يريد يهجم عليه ويغلط
تنهدت وهزيت ايدي ومشيت تخبل هو وامه وبقوا يصيحون ورايا دخلت غرفتي .. المساعدة اجتي ورايا الغرفة كلش هوسة ملابس عباس بكل مكان وصواني الاكل بالكاع .
حجت : شنو هاي غرفة لو سوك هرج كم صينية بالكاع .. ذولة شلون عايشين
انداريت الها : اليشتغل ياريت ميسمعني صوته ورأيه مجايه هنا حتى اسمع رأيج عزيزتي اقضي واجبج بدون ضوضاء .
- العفو ست ..
كعدت ع السرير وكلت الها : افتحيلي الجنطة وطلعيلي ملابس حتى ادخل حمام وانت ابقي نظفي الغرفة
- تأمرين ست .
طلعتلياهم : روحي شوفيلي الحمام اذا نظيف واكدر اسبح بيه
- تأمرين
مشت واجت : جاهز
كمت للحمام روحي مختنكة من الثكل اولا ومن القهر ثانيا .. واني دا اتحمم سمعت صوت عباس وهو يصيح : اني احلها محمد بس اصبر ... كافي يمممه بس كاااافي .
هي تكوله : ما عدها كرامة مرة انكتلت وانطردت من البيت وترجع بلا ما واحد يجيبها .. شني من مرة غدي
وهي دا تحجي طلعت من الحمام باوعلي عباس .. تقربت من الغرفة .. هو وكف فورا .. عباله راح ارد انتبه لملابسي لابسه برمودة لحد ركبة رجلي وتيشيرت عريض حتى بطني ترتاح
بسرعة حجه : امشي فوتي غيري ملابسج بسرعة
انداريت صحت : منال
طلعت من الغرفة : امريني ست
-جيبيلي كرسي دا اكعد هناية مدا تكدر اكعد للكاع بطني تضايقني
-صار
عباس : محمد بس شوية
محمد : ما تكدرلها تغطي عيني انت شنو
-محمد رحمة لوالديك ترا واصلة بييييه ليجاااااااي
جابت كرسي وهم ديصيحون طلبت منها تحطه بوسط الغرفة وتنطيني الريموت مال التلفزيون .
علياء :الله ياخذج كون
عافت وطلعت .. ومحمد يكله : ترا واضح جاي تطردنا من بيتك وانت ما جاي. تفتح خلكك وياها وتصيح علىىىىىى اخوك .
كاموا يتحاجون بيناتهم كامت امه دا تريد تصيح عليه .. لزمها وصاح لعلياء .. اتطابخوا بيناتهم شلون يجر امه ..
اني بهالحال نزلت المنشفة من راسي وكعدت دا انشف شعري .. طلعهم كلهم وكال : امشي للغرفة خلي نحجي
- ما عندي حجي وياك
- بس اني عندي ..
حجاها وسحب ايدي .. سحبتها بقوة : احترم نفسك ولتلزمني
جرني بقوة : منو هذا اليحترم نفسه فياااان اصحي على روحج واحجي عدددددل
- طيب اترك ايدي
ترك : شتريدين فيان
- ما اعرف انت شتريد ؟ اكدر افهم ؟
- دا تحاولين تهينيني وتهين اهلي وتكولين ترا البيت بيتي واشتريته بفلوسي اذا ناسي اذكرك مو ... اني ما طلبت منج البيت ولا رضيت بشرايته انت الردتي .. ومن باجر ابيعه وترجعلج فلوسه وانعل ابو فلوسج التذليني بيها افتهمتيييي
- بوقت اللي اني امر بأصعب ظرف انت حاير تفكر بالبيت والفلوس والبيع .. مرة بحياتك اشتريني الي اني بعت كلشي لخاطرك وانت ما بعت غيري ..
- اشششششش لا تكعدين تحمليني ذنبج وكت العفتيني وراج وانسبعتي بابوج ودستي على كلمتي مو بس ابيعج وانعل ابو كلبي لو حاول يجيب سيرتج
مو اني اللي تدوس على كلمتي مرة واخضعها ولا اني اللي تمشيني مرة وبيتج هذا اللي جايبج خدامتج وتتامرين عليها بنص اهلي وشايفة روحج عليهم اشبعي بيه وخلي غرورج وتكبرج ينفعج
عافني ومشى وهو يصيح : علياءءءء .. صيحي محمد
تنهدت واني احاول اسوي نفسي ما اهتم ..وانشف بشعري
يطلب من محمد يطلع وياه يشوفون بيت ايجار ومحمد ما رضى وامه ما رضت وهو كام يتعارك وياهم ويكلهم رضيتوا والما رضيتو ساعة ما راح ابقى هنا ..
عافهم اجا مر مني خطف ديريد يطلع حجيت : اتهرب اسهل شي عليك تهرب من مسؤليتك .. اشرد هو هذا اللي يلوكك
وكف : شنو ولج
- انت جدا حقير .. حقير الى ابعد
حجيتها وكمت .. بس عيوني غركن بالدموع وصارن حمر وغصيت بعبرتي وكمت الزم بركبتي واداري بوجهي منه واكوم للغرفة .
صفكت الباب ورايا منال دا تصفط بالملابس كلت الها : بلا زحمة اخذي راحتج شوية اتركيني .
دا تريد تطلع اجا هو .. مرت من عنده سوالها مجال .. باوعلي وهو يجر ايد الباب ويسده : شكالج الدكتور
انفجرت : يهممممممك منو اني ومنو اللي ابطني حتى تهتم باخبارنا وبأمورنا .. اصلا لو نموت انت متهتم
- تمام ارتاحي واكعدي
حجاها وهو يلزم ايدي يريد يسحبني يكعدني صرخت : لتلزمني ارجوك كافي
- شتريدين
- ما اريدك
- تمام
دفعته : لتكول تمام لتكوووول
- زين اهدي حتى محجي
- مالي حجي ويا انسان عديم المسؤلية مثلك
- اني عديم مسؤلية !؟ هو منو العاف منو منو الراحت ويا ابوها وعافتني وراها بقيتي يمي وقصرت وياج وما خذتج طبيب لو ما داويتج لو ما داريتج ليش تطلعيني صفر بس لان ضايجة مني
بيش قصرت وياج ولج عمري وحياتي ملا منظف بيت ولا مشتغل شغل نسوان ووياج جنت ارجع من شغل الفرن اكعد انظف وياج واكنس واغسل اطلعني صوج وانت الصوووووج ليش ؟
- ابتعد مني
- ابتعد تبجين اقترب متقبلين اني راح اتخبل وياااااج خبلتيني شتريدييييين
- اريد تليفونك
عقد حاجبه : تليفوني شتسوين بيه
- بكيفي عاجبني اشوف تليفونك عندك اعتراض
- اسمعي اني لا حارس ولا موظف عندج واتأمريني احترمي نفسج حتى احترمج كزوجة واقدرج لان من تقللين احترامج اهينج وانعل والد والديج
- طيب زوجي العزيز ممكن تليفونك
- ما انطي
- وشنو السبب يا ترى محادثات الحبابات هواية .. اللي شاغل وقتك بيهم وملتهي بيهم عني هوااااااااااية مو
- ابقي بشكوكج وبوهواسج هذا انت مريضة
- اني مريضة وأشك اقطع شكي وانطيني التليفون
- واذا ما انطيته شيصير
- تنطينياه سواء شئت ام ابيت
- ها حلو رجعنا لصيغة الأمر شدي حيلج لعد
مديت ايدي لجيبه كام يلزم بيه .. كمت اتلاوى وياه وهو يكلي : ليش تخليني اذيج وانت حامل فيااان وخري مني
سحبت التليفون من جيبه وكتله : لتتقرب مني وخر
- لا اله الا الله فيان كافي
احاول افتح بالرمز مدا يفتح : جيد مغير الرمز
مديت التليفون : افتح الجهاز
باوعلي : واذا ما افتح شراح تسوين
- تطلكني فورا
- حاسبة الطلاك والاوامر على كيفج انت لو شنو ما اطلك وما افتح وحلكج ما تفكي خوش لو لا
- ما انطيك الجهاز وافتحه بطريقتي
- لا تنطين .. يطبج مرض
حجاها وديريد يطلع كتله : فوك البيه تدعي عليه !؟
- لانج فد وحدة ادبسز وما تستحيييين زهكتينيييييييي
شمرت التليفون : اخذه ما اريدك ولا اريد منك شي اطلع برا يلا اطلع
دفعته وكعدت للكاع كام ينفخ وتقرب : فيان لج بابا كافي الله يخليج ارحميني وارحمي اللي ابطنج مرضتينا
-ابتعد عني عوفني
كمت ابجي كمبص كبالي وجر التليفون : هاج عمي فتحناه شوفي هاج يرضيج بعد شتريدين احجي شنو المطلووووب مني
- المطلوب منك تهتم
- اهتم لما تكونين ابيتج ويمي من تضربيني بعرض الاحايط واطلعين ومتحسبين حساب والله مو ما اهتم وامحيج من بالي ابد لو مو ابني ابطنج لو روحي بيدج افتهمتي لو لا .. اعرفي اتصرفي اني مو اي واحد تديري بنفوذج .
كام وطلع من الغرفة وترك تليفونه مفتوح تعدلت واخذت التليفون واني ابعد بشعري منا ومنا .. وادور بيه دخلت على المسنجر ماكو محادثات جديدة .. رجعت للفايبر لكيت رسائل بينه وبين اصدقاءه وواقاربه .. ورسالة معلقة لنور
دخلت كاتبتله موجود ممجاوبها بس المحادثة قبلها بيها تواصل
قبل يومين كاتبتله شلون كاللها زين كايلتله ( اتصال ) كاللها يلا
ومطول الاتصال بينهم نص ساعة !
كمت من مكاني وطلعت برا هو بغرفة امه ديحجي وياها .. وكفت كباله فز استغرب : شبيج يمعووودة
-امشي كدامي
-شكوووو دوخري
سحبت ايده وجريته ويايه وهو يكلي : بس هديني خل افهم شكو سحب ايده وهو يحجي
رفعت التليفون : شعندك حاجي وياها
-هي خابرتني
-وانت ما عولت الله جابج كعدت الها نص ساعة مو
- خوما اطودها يعني
-لا طبعا
صفكت التليفون على صدره حيل صاح : اخ طايحة الحظ هاي تضربين من .
مشيت بسرعة وهو اجا ورايا دخلت الغرفة وامه تصيح : اذا صدك بيك خير دكها وانعل والديها .. صفك الباب بقوة واجا عليه : انت شبيج تخبلتي
- طلكني
- ياهوووو هم رجعنا لهالسالفة طلكني وطلكني .. والله العظيم ما عندي شي وياها
- لو اني حاجية ويا صديق تقبل
- وانت رحتي لالمانيا وحدج اني حجيت لو سكتت
- شدخل هاي بهاي
- لان واثق بيج مو بالمحيط .. اخاف عليج بس اعرفج انت شكو بس انت ما تثقين بيه
- ها حتكلبها عليه وتسويني اني مذنبة واني شكاكة وانت بريء
- هذا الصدك عاد يعجبج تصدكينه يعجبج لا راجعلج .. ومالي خلك اكعد اتعارك وجيب وودي وشكوك اطلع واخلص من هالعقد اشرفلي .
مشيت كباله صرت كدام الباب : انت شنو عبالك تشرد والله متشرد الا تكولي شعندك وياها
- معناها الف راسي وانام وصوت ما اريد اسمع
مشى للسرير وتمدد شغل المبردة وتغطى .. جريت الغطى : لتستفزني وكولي شعندك وياها
- صاحبتي
- من شوكت
اندار للجهة الثانية كمت انز بيه : اكعد دا اكولك .
جر الغطا فوك راسه .. انده بيه ميقبل يكعد تركته وبقيت افردش بتليفونه .. قهرني فكمت سويت لجهازة اعادة ضبط المصنع .. فرجع الجهاز جديد وانمسح كلشي .. اخذت السيمكارت كسرته وشمرته وكعدت يم راسه .
شمرت التليفون ع الميز وكعدت اريد اخذ مكاني بالسرير هو نايم بنص الجرباية .. دفعته : اييييي دوخر اريد انام .
ادنى واني سحبت مخدتي كمت اعدل بيها ..
هستوني تمددت .. اباوع للسكف مقهورة منه ومن تصرفاته يخابر نور وهو يعرفها هي تحوس تريد الها فحل ..
اندار عليه .. وحط ايده على بطني اللي بطني رفس بسرعة صحت : اييي وخر خنكتني وخر ما اريدك يمي .
- مشتاقلج
- انت اكبر كذاب
ابتسم : واحبج هم
- اشوفك كتلت نفسك حتى تعرف شبية اني والطفل
- حقج
- وخر من عندي
بعدت ايده اندار على ظهره .. محجه انداريت وورا شويه لكيته راجع غاط بنومته .. نام نوم الظالم عبادة نام
رجعت انداريت على جيهته اباوعله وافكر .. واني بنص تفكيري غفيت .. محسيت غير صوته بنص البيت .. باوعت مغطيني ببطانية والمكيف مشتغل .
دخلل لغرفة وهو يصيح : هذا العندي الرضيتوا والما رضيتوا
شافني دا اشيل راسي
صرخ : ارتاحيتي من فرمتي جهاز وكاسرة خطي هيج وهواسج وشكوكج بردن .. بردتي كلبج .
- راسي ديوجعني لتصيح .
كعد أنا لى طرف الجرباية وهو يكلب بالتليفونه .. شمرة : لا حول ولا قوة الا بالله
اندارلي : الحارس والخدامة الحايبتهم ما تفكرين وين ينامون اليوم !؟
انطي للحارس فلوس وخلي ياخذ تكسي يرجع ابغداد ويتركلي السيارة .. والمساعدة انطيها غرفة من الغرف
- اي غرف .. الغرف ما بيهن مراوح انت صدك تحجين
- اي صوج انت دبرها
- صوجي !؟ لا حول ولا قوة الا بالله العلي العظيم
- عوفك من موضوع المساعدة اني احتاج رعاية طبية واحتاج اكون ببغداد لانو احتمال تصير عندي ولادة مبكرة ..
- ابقي يم امج فترة
- ما ابقى وانت هنا بعد ممنوع
- فيان عندي شغل يعني اذا ما اشتغلت فلوس عمليتج منين اجيبهن هم اروح انذل لابوج حتى ينطيني
- وبفلوس الشغل هنا راح تأمن عملية
- مو شغلج ولا يحقلج تعيريني اني مو ابن وزير بس اشتغل وامن فلوس عمليتج ما يخصج شلون ادبرهن
- اني مدا اعيرك بس بابا
- ما اريد من ابوج الكوا-*
- ليش دا تتجاوز !؟
- لان هو صدك هيج
- ترا عيب هالكلام
- هسه كليلي تريدين اخليج يم امج فترة وانزلج كل اسبوع اشوفج وانطيج مصرفج لو شلون
- تنزل ويايا لبغداد وننتقل هنا وتشوف شغل هناك ..
-كلام يفيدج
-ليش
-ما اكدر
-هذا البيت بقي لاهلك اني ما اريده خلي لاخوك ومرته يعيشون هنا يرتاحون ..
-واني اصير دلدول هناك اكعد وانت وابوج تخوطون بيه
-ما راح اسوي هيج
تقربت منه .. الله يخليك اقبل
-قبل شوية تصيحين طلكني ومفرمته جهازي ولاعبة بيه فلك وهسه تكليلي فدوة
-عباس بداعتي اذا اني واللي ببطني النا يمك خاطر
ولو اي خاطر انت لهسه مسالت عن اللي بطني شبيه وشصايرة
-خابرت امج وحجتلي كلشي من يوم الرحتي
- خابرتها !؟ شو مكلتلي
-كلت الها لتكولين
-هممم زين هسه شدكول
-اكول اروح اصرف الحارس المسكين اللي صالبته من الظهر لهسه والبنية المسكينة الجايبتها ونايمة
- شو دا تحسسني اني غلطانة بحقهم بابا دزهم حتى يساعدوني وماخذين حقهم وزايد
-ترا ذولة بشر لا تكعدين تذلين بيهم على لكمتهم وراتبهم الياخذوه منج لو ما بحاجة اللكمة لا يكابلوج ولا يتحملوج
- شنو هالكلام ليش دا اذلهم كل واحد وعمله الحارس شنو وظيفته والمساعدة المنزلية شنو وظيفتها ؟
- وظيفتهم تصلبيهم بالباب
-غير يحرس لعد اشون يحرس وهو نايم هذا اشون حجي
- وليل نهار
-عباس مو دا اطلب منك تنطي فلوس التكسي ديرجع لبيته هسه حتطلعنا من موضوعنا ادخلنا بمواضيع مالها معنى
-الشبعان ما يحس بالجوعان اني اشتغلت هالشغل واعرف شكد تعب وقلة كرامة خصوصا من الواحد يشتغل عد مرة شرنفص مثلج
- طيب خلينا ناخذهم ونرجع لبغداد
-نرجع وين
-اني اخلي ماما تشوفلك وظيفة والله احسنلك من الشغل هذا
-والقضية
-بابا يحلها
-بهالسهولة
-كل الامور عنده تنتهي بهالسهولة
-لهسبب ماشي بخلك الله كتل لان وراج اليطمطم
-عباس بداعتي
-ولو ما لكيت شغل هم الله يخليكم شغلوني
-مستحييييل
- اكوم انطي الحارس فلوس التكسي
-نرجع بسيارتنا كلنا
-اسولفلج وياها عود
-عباس
عافني ومشى كمت بدلت وطلعت برا .. اهله ديتعشون
منال موجودة حجيت : اكلتي
-بلي ست سويت لفة وراح اكمل شغلي
-شنو شغلج
-الحجية طلبت مني ارتب هدومها واغسل الوصخات
-اتركي عنج وروحي ارتاحي ولتاخذين امر من غيري .. مفهوم
-مشكورة ست
راحت رجع عباس .. انداريت مشيت للحمام رجعت وكفت كدام المغسلة اغسل وجهي .. صار ورايا .. انتجى ع الحايط يباوعلي واني اغسل .. باوعته نشفت وجهي وابتعدت منه
حجه : ها انت الزعلتي هسه
-لما تفكر بيه وبمصلحتي عود احجي
-منو ممفكر بمصلحتج جاي اكلج هنا شغلي وروحي واني انزلج كل اسبوع
-سهل عندك تفاركني اصلا يخلالك الجو تكيف
-عمي ابقي واني كل اسبوع انزل واخذج للدكتور
- واني بيه حيل كل اسبوع اروح ٥ ساعات روحة رجعة حتى ازور طبيب
-احتاريت وياج
-اذا منعيش بمكان واحد ما اقبل
- اي نعيش هنا
- ووضعي
- اكو اطباء هنا ترا احنا موبصحراء
- انت تتعمد تضايقني
عفته ورحت لغرفتي كلبت وجهي عليه محجيت وياه ونا طخيت ابد .. حتى ثاني يوم لما كان بالشغل طلبت من منال تجهزله غداه بس اني مكابلته ولا اجيت يمه
هو يتشاقى يحاول يغطي ع الموضوع اني قفلت الا يقنع نرجع لبغداد .. من شافني متضايقة من الوضع وامه حاطة راسها ويايا .. وثقلي ووضعي .. اتنازل وكال بس بشرط نكعد يم امج فترة بين ما الكي بيت اجره ونكعد بيه
كلش فرحت لما وافق
بس لما كال لامه .. تضايقت وزعلت وكامت تحجي عليه وتوصفه بابشع الاوصاف .. طلي وصايرلها محبس ومن هالكلام
هاد هو تعارك وياها كاللها : كافي ترا جزعت مرتي مريضة واللي ابطنها مريض شتريدييييين هم اكعد واكابلج واطلكها واذبها هي والبطنها مثل ما سويت بالاولى ؟ .. كليلي شراييييييدة مني
ما رضت بقت تتعارك وياه ..
عاد هو طلب مني الم غراضي ووصى محمد على امه وع البيت وطلع بينا لبغداد .. وصلنا لبيت ماما طلبت من منال تجهز النا الغرفة وهي كامت جهزت الغدا جانت سالكة لحم دا تريد تسوي مركة بامية فرحت بجيتنا
طبخت وكعدنا ناكل وياها
لثاني يوم بابا اجا للبيت .. سلم على عباس وعباس عدا الموضوع وياه وطلب من عباس يروح وياه .. جنت ادعي انو بابا وعباس يتفقون وماما تطمني ..
بابا فاتح فرع ثاني لشركة الاستثمار اللي بهولير .. فرع ببغداد
فطلب من عباس يكون مدير بهذه الشركة وراح يبقى وياه واحد من اللي يثق بيهم بابا حتى يعلمه ع الشغل ويفهمه بامورها ويبقى يساعده بكلشي يخص الشغل
عباس تردد بس جان شايف بابويه ترحيب مو تمنن
لان بابا رايد يفتح صفحة جديدة لخاطري
على اساس منصبه
حصته سيارة وبيت بحي الجامعة ذني كلهن تابعات للشركة واي مدير يصير بيها هذا حقه بيهن لان بابا اغلب اللي يخليهم يديرون شغله يكونون اكراد مثل شوان وغيرهم من اقاربه فيكونون جايين من اربيل ما عدهم سكن ببغداد فالشركة توفرلهم سكن وسيارة للمناصب العليا وهذه اول مرة بابا يثق بشخص عربي ويسلمه هيج منصب بس حتى يرضيني .
فاتقلنا اني وياه بيتنا الجديد وماما مقبلت تبقى وحدها .. فانتقلت ويايا لبيتي ..وبابا صار اكثر الاحيان يجي لبيتنا يتغدا يكعد ويانا يضحك طابتله كعدتنا ولمتنا ..خصوصا ماما موجودة بعد طلاقها ديحاول يرجعها فصار يتردد على بيتنا كلش هواية
عشت يمكن اهدا واجمل فترة لأنو كلشي احبه بالحياة صار بقربي .. بابا ماما عباس .. كلهم يمي وحواليه
والديسعدني اكثر بابا حيل انعجب بعباس وشطارته ونباهته
يحول عنه شاغول وامين لا اتكالي ولا يسوف بالعمل ولا اله وجه مكروه الموظفين الي بالشركة كلش متفاعلين وياه
شكله تغير لما صار يشتغل بالشركة
ستايله تغير تسريحة شعره هندامه كله على بعضه تغير وحتى شخصيته .. صار هادى ومتزن اكثر ومرتاح نفسيا ما عنده ضغوط نفسية
راحته النفسية يعكسها ع البيت يدللني يضحك ويايا ويا امي
حتى بابا كام يجي لبيتنا اكثر من بيته ويستمتع بالسوالف والحجي وياه .
الحمل مالتي طول للشهر العاشر وابني بعده مناوي يجي
اخذت من شهر العاشر ١٠ ايام .. الدكتورة كتبتلي عملية قيصرية
فبابا اتفق ويا مدير المستشفى ان يحط افضل كادر طبي يشرف على عمليتي .. وفي حال صار اي غلط او تقصير راح يحاسب المستشفى كلها
فچان الكل متعاطف ويايا وواكفلي ويخفف عليه توتر العملية والخوف .. دخلت صالة العمليات بابا لبس ودخل ويايا ..
لازم ايدي وهو يكولي : بنتي القوية لا تخافين اني راح ابقى يمج .. ما راح اعوفج انت مو وحدج .
جنت الزم باديه حيل وايدي ترجف : لتعوفين
- يمج
حط الماسك على انفي وبابا كدامي ثواني وبعد ما حسيت
مجرد ما غفت عيني طلبوا من بابا ينتظر برا الصالة
طلع وكف برا عباس جان متوتر ويجي ويروح
وامي كاعدة ومنتظرة والمساعدة يمها والحرس برا كلهم جانوا على نار
نص ساعة تقريباً طلعوا الطفل ونقلوه للحضانة تراكضوا بابا وماما و عباس والمساعدة تنطي للسستر الملابس مال الطفل .. الممرضة كامت تنظف الطفل وتلبسه
بابا كام يبجي لاول مرة يحس بروحه صار جد وهذا اول حفيد .. جان ولد عباس خلا المجال لابويه وكاله :سمي شلون ما تحب عمي
فسماه ( داريان ) بمعني العزيز او المقرب اله ..
لبسوه وانطوه لبابا دمعت عيونه من الفرحة وهو يشوف ابني .. باسه وحضنه ويكول لامي : هذا ابن فيان شوفيه
وامي حيل فرحانة
وعباس راح يسأل عني كالوله بالافاقة تكعد ونجيبها الكم
ابويه انطى الطفل لامي .. وراح للدكتور يسأله عن وضع ابني واذا كان بيه تشوه
كاله : ما واضح عدنا شي الان كلشي سليم مثل ما اشوف .
- الحمدلله رب العالمين
بهالاثناء طلعوني من صالة العمليات كلهم تراكضوا اليه ..واني اصيح بالم وصوت خافت : عباس .. عباس لتتركني ..
لزم ايدي وهو يكلي : روحه واهله لعباس
باسني براسي وهو يعر على ايدي ويمشي ويا السديا ويكلي : يمج يبعد اهلي .
امي مسحت دموعها وهي تكول : نبجي عليها وهي تصيح عباس
وصلوني الغرفة حطوني ع السديا
كمت ابجي من الالم وبابا يم راسي ويكولهم : ليش تاركيها تتألم الطبيييييب وييييييين
حجت ماما : على كيفك طبيعي تتألم غير مسوية عملية وكاصة بطنها .. ديحطولها مغذي وترتاح
- استعجل شكللها المغذي بسرعة
- ميصير بسرعة يصير عدها خفقان اذا سرعته استاذ
- وتبقى هييييج تتألم
- دقايق ومفعول المسكن يمشي بجسمها وتهدأ وتنام
كمت بس ابجي واتألم وهم حواليا .. عباس من يساري وابويه من يميني وامي واكفة يم عباس وباقين حواليه وعباس يمسح على راسي : خلصت خلصت الحمدلله خلصتي من الثقل والم كل يوم اتحملي بس شوية وترتاحين
صدك شوية وهدأ الالم ونمت ..
كعدت لكيت عباس متمدد ع التخم اللي ساحبه كتخم وماما كاعدة ع الكرسي مال التخم ودا ترضع الطفل بممية صغيرة
كمت اجيب راسي منا وارد منا كامتلي : ها ماما فيون حبيبتي الحمدلله على سلامتج .
بقيت اباوع الها : احس بطني كلش دا تأذيني
- طبيعي بنتي غير مفتوحة ومخيطة
كام يبجي الطفل يريد يشرب .. كالتلي : تشوفي
ابتسمت : اي
كامت من مكانها كعد عباس : ها كعدت
- اي ارفع السرير من ظهرها خلي انطيها الطفل
- شلون ؟
- هاك الزم الطفل
لزمه كام يبوس بيه بخشمه
كتله : شواربك دا تضايقه لاااا
- هاااه صار اعز مني ولج .. وتخافين من شواربي تضايقه
ابتسمت : لا خطية
ماما رفعت ظهري تألمت هو قربلي الطفل بس خايفة ارفع اديه احس اي حركة ممكن تأذيني
كامي يقربه اليه ويرفع اديه .. جان طفل ابيض وحلو وملامحه كلش ناعمة بس انفه على عباس كتله : انفه يشبه انفك
- اي هاي ماركة مسجلة عدنا الما يطلع على خشومنا مو من عدنا
ابتسمت وبسته على كيف وكمت اتأمله واباوعه : معقولة هذا ابني !؟ اني صار عندي طفل وبيت وعائلة وتحققت احلامي وامنياتي
باوعت بوجه عباس واكف كدامي لابس بنطرون قماش اسود وقميص ابيض ومسرفن اردانه .. ومتجي ايده على السرير ومدنك عليه اني والطفل وعيونك مبتسمة
باوعلي : لا تخافين عليه اني سألت عليه صحته كلش زينة .
هزيت راسي دنك باسني بخدي ودنك للطفل باسه كتله : شسميته
-مو اني سميته ابوج سماه داريان
-بابا !؟
-ما حبيت افسد عليه فرحته هو بجى لما شاف حفيده ردته هو يسمي ويفرح بيه هذا اول حفيد اله
-بس مو اول ولد الك
عقد حاجبه : شنوه ؟
-امك اختك خابروك باركولك
-اني خابرتهم انطيتهم خبر بولادتج فرحتلي وباركتلي
-متأكد
- ليش تحجين هيج حتى مو وكته يا حبيبتي.
-اممم
حجت ماما : انطونيا واتركوا عنكم هالسوالف اللي لتودي ولا تجيب
عباس : اي والله
نومت ابني واني اتلوى من بطني كالتلي ماما : حاولي تكومين تمشين
عباس : كومي خل امشيج
سندني وكعدني اخذني للحمام استحيت طلبت ماما ساعدتني ورجعت كمت كوة اتحرك كأنما انسان الي .. لزم ايدي وكام يمشيني على كيف بالممر مال المستشفى
- لعبانة نفسي هنيا خلي نرجع للبيت
- لازم تبقين تحت الرعاية الطبية لحد ما الدكتور يكلج اطلعي
- خلي الدكتور يجي للبيت هنا ريحة ديتول دا تلعب نفسي
- اصبري بس يعدي على عمليتج يوم نتطمن عليج وتطلعين .
بقى يمشيني ويسولفلي شصار بعمليتي واني جوا .. رجعني انطوني مسكن ورجعت نمت ..
كعدت شفت ماما وعباس متكابلين وكاعد دياكلون ويضحكون
انتبهلي : ها يكلبي كعدتي ما تكومين تاكلين شي خفيف جبتلج شوربة دافية
- لا لعبانة نفسي
حجت امي : عوفها اني هسه اوكلها تعال كمل اكلك
بقوا ياكلون وهو يحجي ويسولفلها على موقف وياه بالشغل .. كملت عباس راح وهي حاولت توكلني وجان وضع كلش كسيف
كوة تحملت لحد مطلعوني للبيت
احس نفسيتي كلش تعبانة ممنوع استحم واحس متضايقة من وضعي من الالم .. اوكف ع المغسلة اغسل راسي امسح جسمي بس كوة اوكف وكوة اكعد
الطفل مدا اعرف ارضعه مدا يستقبل صدري ينطوه الممه يشرب انطي صدري ميعرف يرضعه ويكوم بس يبجي فكلت الها لماما انطي ممه شبعي بالممه لتخلي يبجي
فصار كله ع الممة .. ماما تبدله ماما ترضعه وماما تهتم بيه من تنام تجي المساعدة تبقى يمه لحد ما ماما ترتاح واني ابقى بس حواليها ..
بابا ذبح ذبايح لسلامتي وسلامة الطفل ووزع على كل المنطقة هو وعباس .. بس ما اعرف ليش متضايقة وكتئبة ودا احس كلشي حوالية يضايقني
خصوصا عباس دينشغل عني .. ينام بغرفتنا واني بغرفة خاصة جوا لان مريضة وهو يخلصها فوك يكعد يروح للدوام يرجع يتغدا يكعد ويايا شوية ويروح ينام يكعد .. ويطلع ويا اصدقائه .
جنت محتاجته هالفترة يبقى يمي ..
اهله محد منهم اجا ولا احد منهم خابرني لو باركلي وهو احس ممهتم .
اجا بالليل الساعة عشرة جايبلي علاكة بيده وهو يكولي : جبتلج شلون بقلاوة وزنود الست من الخاصكي الا يموت
عقدت حاجبي : انت وين چنت ؟
- ويا الولد
- اي ولد
- اصدقائي
- وكت اصدقائك هسه يعني اني بهالحال وانت تكول اصدقائي
- اي محتاجة كولي خابرتي وما اجيتج وعفتهم
-والا احتاج يلا تجيني شنو ماخذتك راس حاجة حتى دا تكولي هشكل
- جا شسوي يا عيني ما تشوفين امج والبنية والخدامة بالبيت ومكابلاتج وانت اكثر وكتج غافية ونايمة .. هم ما ياخذن راحتهن من اكعد بالبيت
- شنو متاخذ راحتك غير بيتنا قابل كاعدين ابيت احد
- عمي اني ما جاي اخذ راحتي شلون بالله اكعد اكابل النسوان خو من تريديني حتى لو ما محتاجة بس خابريني
- اهلك ليش مخابروا
- وانت شلج باهلي الخابروا والما خابروا مو هياني يمج
- جنت اتوقع اهلك يحبوك اكثر مما اهلي يحبوني ويهتمولي بس تبينلي العكس لان اهلي تقبلوا زواجنا بس اهلك لحد هسه متقبلوني
- مو بالاول انت التتقبليهم .. انت تشوفيهم مو مستواج ومفد مرة حاولتي تكسرين وياهم مثل ما اني سويت فبعد شلون يتأقلمون وياج
- اني محاولت هسه طلعت السبب بيه شوكت اني كشيت بوجهم لو طردتهم
- هواية غير انت متكعدين وياهم ولا تحسين سوالفهم تناسبج اني اعرف صح انت تختلفين عنهم اخت ربة بيت على كدها عالمها المطبخ وشكالن وشحجن الكرايب انت مو مثلهن فلا انت تقبلتيهن ولا هنا تقبلنج اني شذنبي بيناتكم
- اقلها يباركون هذه هم لازم تأقلم اسمها اصول امك لما جانت بالمستشفى اني معرفت اكعد بالبيت وبقيت وياكم هم حتى مخابروا
- يا عيني عساج ما تحتاجينهم ولا اجوج شلج بيهم مو حياتنا حلوة ومتصافين وعدنا نعمة .. ليش بعد تعدمين حياتج بامور متسوى
- اي لعد لتطلع
- عمي هاي كاعد يمج تدللين وتأمرين بعد ؟
باسني براسي وكعد يمي .. بقى يسولف ويايا اجت ماما جايبة كرزات وكالت العباس : اشتهيتهم الك
باوع : ها اي رحم الله والديج
حجيت : اشتهيتيهم بس العباس اني ما ذاكرتني يعني
-اكلي قابل لازمتج يا ما شو كدامج
عباس : اكلي حبيبي اصلا هستوني ماكل وشبعان ما اشتهي الزاد
حجت ماما ؛ شماكل
- ويا الولد
-مكتلك ويامن كتلك شماكل
- دجاج شوي
كايم ابدل واجيج
حجت ماما : نفتح فلم نباوع بما انو كاعدين
حجيت : يلا ياريت احس كلش مكتئبة
كامت ماما شغلت تلفزيون وكامت تبحث عن فلم .. عباس طول فوك كمت اصيحله .. نزل : وين جنت
- بدلت وخابرني صديقي
- صديقك بهالليل يخابر
- يا ليل ساعة ١٠ ونص
- لا ليكون دنيا صبح
- فيان شبيج
- اشوف ؟
- عاد لا تكفرينه
- انت ليش تتضايق من اكلك شوفني
- لان عيب من احجيلج كلمة تكليلي خل اشوف كاعد اجذب عليج يعني مو سالفة هااااي ترا
- اريد اشوف
- شمر التليفون عليه وكالي : اشبعي بيه وبحوشي وما اوصيج عود فرمتي حتى تغثيني
باوعتلي ماما : شبيج وياه متكوليلي انت ليش متتعاشرين
- واني شكتله هو متكهرب من يمه
- مو ديكولج صديقه
باوعته تليفونه صدك صديقه .. عفت التليفون ..
مكمت اركز بالفيلم ابد تركته وحاولت انام مكدرت ماما ما اعرف وين راحت .. الطفل كام يبجي .. كمت اصيح عليها ما هي
تلزمت كوة وكمت اجتي منال : العفو ست
ساعدتني ولزمت الطفل اخذته منها وكلتلها : سويله ممه .. ماما وين
- اعتقد نامت
- خطية هم تعبت .
نزل عباس اني كالبة وجهي ..
بقى برا .. مدا يتعود على وجود مساعدة بالبيت من تكون متواجدة بغرفة هو يستحي يكعد .. فيبقى بالمطبخ او بصالة لحد ما تبتعد من سوتلي الممة كلتلها : اخذي راحتج وصيحيلي عباس
راحت اجا عباس : ارتاحي اذا تردين اني اشربه
- ليش صعدت
- نمتلي ساعة
كعدت هو فتح التلفزيون وبقى يباوع واني لازمة الطفل رضع وبعده منايم : شو مدا ينام
- يمكن شابع نوم
- زين بهالحالة شنسوي
- خليه بمكانه اسمع امي جانت تكل لغيد لا تعلمين الجاهل ع الشيل يتعود
- خو غيد متوكع من السانك
- بابا دا اعلمج اني ياهو مالتي بغيد
كمت على كيفي وخليته بمكانه .. وكتله شلونه شغلك
كاملي وهو يباوع للطفل : زين
- مرتاح
- والله ابوج خوش ادمي ما مقصر ولا اني مقصر مرتاح
- بابا حيل حابك ومرتاحلك وهالشي ديسعدني
- الحمدلله
- اهلك دا توديلهم مصرف
- اودي لامي واوصيها باختي محمد يريد يجي لبغداد يشتغل وياي بس رفضت
- ليش
- محمد يدور دغش يروح يسويله سالفة يفشلني ويا ابوج واني ما معول حياتنا مشت ودنشتغل ومرتاحين .. هم نروح نتخارب
- بس خطية هم الكاله شغلة تفيدة
- كتله افتحلك محل انشائية ما جاي يقبل يريد يصير صاحب شغل وهو سايق مخدة وذني اثنينهن ما يرهمن
- صارلك شكد مرايح لاهلك
- ذاك الاسبوع رحتلك
- شو مكتلي
- مثل كل مرة ساعتين وارجع يعني مو شي مهم
- عادي اني ما اتضايق بس كولي
- لا هو مو حقج تتضايقين اصلا
- ليش تكول هيج
- وانت ليش تكولي عادي ما اتضايق
- اي غير دا اكولك ما اتضايق
- من الطبيعي ما تتضايقين مو فضل يعني
- ليش دا تحجي ويايا بهشكل
-خل اروح اسويلي فنجان كهوة هالولد شكله اليوم صباحي
عافني ومشى
تنهد .. واتضايقت سوا فنجان وجابلي كلاص عصير اخذته من عنده .. الطفل مدا اعرف شبيه نتقرب منه يسكت نبتعد ونكعد يكوم يتنحنح ويتنغوص
لزمه عباس وهو يعده ينغوص ومتضايق
صاح للمساعدة وراح للمطبخ كعد .. منال معرفت شبيه بدلنا حفوظته وملابسه وبعده ينغوص ومدا يقبل ينام
كلتلها كعدي ماما
كعدتها نزلت واخذته كالت : هياته بطنة منفوخة اشون ينام
كامت حللته وحطته على بطنه وتفرك بظهره ارتاح الطفل
عاد اني رحت نمت بعد مكعدت غير للصبح .
باوعت عباس نزل بكامل اناقته السترة بيده ملابسها وارباطه وملابسه مكوية والعطر صار يلف البيت ويفتر .. تقريبلي باسني وكالي : محتاجة شي حبيبتي اني رايح
- ليش تروح
- غير للشغل
- اريد تبقى يمي
- ارجع وابقى يمج تأمريني امر
- ترا انت المدير يعني بابا ما راح يحاسبك اذا ما داومت
- واذا اني مدير لازم اصفط واكعد غير عند يشغل ومسؤليات
- زين اتريك ويايا
-يلا كومي
كمت على حيلي منال سالكة بيض ومخدرة جاي .. ودا تكص جبن
كعد وهو مدنك كلت الها : حطي الاكل واخذي راحتج
راحت كمنا نتريك سوا
كتله : اريد ارجع للشغل
- كومي على حيلج واشتغلي ما بيها شي
- نشتغل سوا
- شلون نشتغل سوا !؟
-يعني بالشركة معاجبني اشتغل بالوزارة
- اذا انت تشتغلين اني اطلع منها
- اي والله
- ليش
-ما يعجبني
- طبعا البنات يمك وحواليك اكيد مراح تقبل اشتغل وياك
- بالضبططططط فهمتيني معناها اي موظفة احجي وياها اني احبها هاي غير الامور اللي اني ما ارضها
- شنو اللي ما ترضاها
- مثل ما انت ما يعجبج اوكف ويا البنات ويحجن وياي اني هم ما ارضى توكفين ويا الرياجيل ويحجون وياج كدامي حتى لو شغل اتضايق واتنرفز وما راح اكدر اشتغل ..
-يعني اذا اشتغلت بالوزارة وويايا رياجيل عادي بس كدامك لا
- اني واثق بيج واعرفج شنو وما تسمحين لاحد يقلل ادبه وياج بس كدام عيني حتى لو رجال يخطج بنظرة اني راح اترفر ما راح اكون مرتاح ومرتي كدامي تحجي وياهم وتضحك وتتامر ما راح ارتاح
- كول رايد تاخذ راحتك
- حسبيها شلون ما تريدين
كام من مكانه وهو ياخذ قطعة جبن ويكلي : نلتقي ع الغدا بااااي
بقيت كاعدة ومتضايقة اجت امي : صباح الخير يا ستار من الصبح معقوجة شكو
سولفتلها كالت : حقه رجل يتضايق يشوفج بنص الرياجيل
- واني ما اتضايق من هو بنص الموظفات ويكعدن يتلوكن ويسحلن بروحهن حتي يبهرن حضرة المدير
- مو انت ردتي هيج
- هو من غير هيج مغناطيس مال نسوان مباقية وحدة مكاتلة روحه عليه عاد مو هسه
- شلون يعني تحطي بقفص حتى محد تباوعله !؟
- لا اريد ابقى يمه
- واذا ترك الشغل وطنكر وكالج امشي نرجع نكابل امه ذاك الوكت شتسوين
- مو بكيفه
- وشتسوين اذا سوا البكيفه ؟
- انت ويايا لو وياه
- ماما انت مو صحيح ليش رريديني اوكف وياج ومن ثم بعدج مريضة اي شغل تريدين تشتغلين
- احس تعقدت من حوا البيت اريد ارجع مثل كبل اشتغل والتهي وما عندي وكت اصفن .
- كومي لحيلج وابوج ميقصر .
دنحجي بابويه سمعنا صوت سياراته اجو .. دخلوا كال : اليوم ماعدة تتريك الحلوة
حجت ماما : لو ذاكرتلي قطعة ذهب جان احسنلي
كعد كدامي وهو يكلها : ليش شكو
-بس ذكرنا اسمك اجيت
-بخير بشر
-بتك متضايقة شلون رجلها يشتغل وعده موظفات تريد تشتغل وياه
وسولفتله السالفة كلها كال : لا كملي مشروعج عوفي الشركة
-يا مشروع
-اني خصصت وفد يراجع بنود الاتفاق اللي اتفقتي عليه بالمانيا وراح نمشي الوضع تقريبا ابغداد افضل ونكدر نشتغل اسعي واشتغل على هالموضوع وخليه مشروعج الخاص ..
وهيج انت وزوجج كل واحد مرتاح بشغله وديأدي عمله
امكني اتفق ويا عباس الشغل مع بعض راح يخليكم تنقلون مشاكل العمل لداخل بيتكم وهيج ما راح ترتاحون
-بس هو مدا يفضى كل وقته للشغل وطلعاته
-كلنا يا بابا هشكل شيسوي الرجل ..
- اشوفكم اثنينكم صفيتوا وياه عليه
- لانه خوش ولد وزوجج يا بنتي واذا دا ندعمه ونوكف وياه حتى ما تخرب حياتج تريدين نكولج اي انت صدك وتصدكين نفسج انت صدك وتكعديله لحد ما يرجع تتعاركين وياه وتالي منو الحساس ومقهور ويبجي ؟
هسه اتركوني من هالحجي حفيدي وين اني اشتاقيتله
حجت ماما : يه على هالحفيد الخابصنا بيه شيب روسنا هو يصير الليل وهو فتح عيونه حالف علينا شحده الينام يلزمنا واااااا وااااا ..
- اي تروحوله فدوة اسهروا وياه ليش تنامون
اخذه وهو نايم وكام يبوس بيه ويشمه ..
ابتسمت وهو يضحك وياه ويلاعبه وفرحان عبالك الطفل ديفتهمه والطفل بس مفتح عيونه كلشي ميفتهم
فتحت ازار العملية وشوية شوية بديت استرجع عافيتي وصحتي بس دا احس جسمي مو مثل قبل مرتب احس صارتلي بطن بعد القيصرية ..
حاولت اخفيها بكوسيه بس عمليتي بعدها حديدة اتأذى من اخلي كوسيه فكمت حتى اكره الملابس شسوي حتى بطني ترجع مثل قبل مصفوطة ؟
اشكي لعباس ميفهمني
يكولي : والل تخبلي هو كله يلا كريش هاكداته حاطة عقلج وياه ليش يا عمري دعوفيه الما عنده كرش ما يسوى قرش
-ترتب بجسمك وتبرز عضلاتك ومن تجي يمي تصيح الحلاة الكرش
-عمي والله ما مرتب جسمي هو من الله هيج وحالي حالج من اكل يصيرلي كرش من اجوع
- احس سمنانة
- والله تخبلين
- اريد اضعف ملابسي وستري وبناطيري القديمة كلها مدا تجي على كدي تخيل صايرة ٦٨
- يابه والله العظيم حلوة شلون اجيب جرجف الكعبة واحلفلج بيه والله ما بيج خلل لا تركزين
- مقتنعت ومتضايقة ونفسي مو صفر تحت الصفر من جسمي ..
رجعت اشتغل ويايا بابا مبدئيا .. لان بسبب الاحداث الموافقات مدا تجينا .. فبابا طلب مني احضر وياه والزمله المكتب مالته وادير اعماله ..
من انشغلت نفسيتي صارت احسن مكمت اصفن واركز بروحي واطلع ضوجتي بعباس نرجع تعبانين ناخذ ابنا .. نبوسه نلعب وياه ونتغدا وانام نكعد هو يطلع واني ابقى ويا الطفل وع الماك اشتغل ..
ماما اعتزلت شغلها كلش صار داريان شغلها الشاغل تداري وتبقى يمه ومدبرة المنزل وياها .. مو لان اني طالبة منها بس هي قدمت على تقاعد وكالت ما اريد اشتغل اريد اكعد وارتاح بعمري الباقي اخلصه ويا حفيدي ولا بهوسة الشغل وتعبه .. انت اطلعي اشتغلي واني عوفيني لحفيدي .
عباس كل ايامه يمنا يروح لاهله كل اسبوع نص نهار ويرجع .. زين ويايا بس من رحت لمكان شغله وشفت الموظفات كل وحدة شعرها لخصرها ومكياجها مال عروس وجسمها مال عرضة ازياء لا بيه نتوئات لا زيادات لا كرش لا حبالة .. تضايقت ذني كلهن كدام عينه النهار كله اني شلون اتحمل !؟
هو تباوعه اجلح املح بس بيه جاذبيه اكبر بنية بكلمتين ادوخ بيه شلون اني ويا الاملح مالتي وين اضمه من عيون النسوان .
مرت اشهر وعباس يوم يوم يثبت جدارته بشغله وبابا يكوم يتعدق بيه اكثر وكام يقربه منه اكثر .. ويطلع وياه مؤتمرات ويعرفه على سياسيين وشركاء وتجار ونسيبي ونسيبي وعباس البك يخلي الكدامه ينسطر بكلمتين وينبهر بيه .
وصار يوم عن يوم يرتفع ..
اشترى لنفسه سيارة .. بعد ما جانت عنده سيارة الشركة .. علاقتنا اني وياه كلش ممتازة دنفتهم بعض اكثر دنحب بعض اكثر هو كام يعرف اطباعي اني هم صرت اعرف اطباعه
عايشين حياة حلوة
ماما عدنا ابنا بخير .. بيتنا كلشي بحياتنا صار حلو
واللي جنت اتمناه بحياتي اتحقق
بيت عائلة اخلي استقرار زوج احبه ويحبني وعندي طفل ومتوفقه بشغل وزوجي كذلك
بس هي الدنيا متكمل على احد
ماما صارت تنبهني وتكولي : مدا تشوفين تليفونات عباس دا تكثر ؟
- لا ممنتبهه غير شغله
- يا شغل هذا ال٢٤ ساعة يخابروه
- مشايفته يخابر ٢٤ ساعة
- اني احس تصرفاته مو طبيعية
- تحسين اني مدا احس
- واذا اكلج احساسي بمحله ؟ واني اعتقد بسيارته تليفون ثاني
- ليش دا تكولين هيج شايفة
- من لما راد يدخل اني شفته لازم تليفون كفره اسود لما دخل تليفونه كفره رصاصي انت مدا تصعدين سيارته .. ويعرفج تفتشين تليفونه ميخلي كبالج
بس كالتلي هالكلام اني اتخبلت كلت بس يرجع لا الزم سيارته افتشها ..
صدك رجع بالليل من اصدقائه دخل سيارته جوا كعد ويانا اكل وسولف وضحك ولعب ويا ابنه وكام يشاقي ويضاحكه .. لما راد ينار داريان انطانياه وصعد وغمزلي : مشتاقلج نومي اطفل وتعاليلي
ابتسمت وهو صعد .. انطيت الطفل لامي وصعدت
كعدت وياه شوية خليته يندار ينام سحبت سويج سيارته نزلت ماما منتظرتني طلعت اني وياها فردشنا سيارته جان من صدك الكا تليفون جوا الكشن مال السايق ليجوا لازم تسحب الكشن وتمد ايدك يلا تنوشه
اريد افتحه ميفتح بيه رمز والتليفون مخلي بيه صورة اولاده .. اني تخبلت ردت اصعد
كالت امي: لا .. هسه يذبها براسج ويكلبها عليج هذا حيال اصبري
- شصبر وهو حاط تليفون سري لصاحباته
- مو لصاحباته اني سمعت وعرفت هو ويامن
- شنو قصدج
- ارل شي اخذي التليفون وخلي يدور بزمانه ومن يروح لاهله روحي وراه
- اروح وياه
- مو وياه وراه
- ليش
- سمعي مني ومعليج
اخذت التليفون بقيته عندي الليل كله منمته كعد مرتاح مرتوي شابع نوم .. واني بودي اكله بسنوني
اكل شبع باسني ومشى وامي تخزرني ما احجي شي
للظهر رجع سأل المساعدة اذا احد متقرب لسيارته وكفت اني : بيش دا تسأل
- مخشوطة ومدا اعرف منو شاخطها مو معقولة بكراج الشركة اكيد هنا وانتم تنظفون او متدرون وضاربيها .
- لا حبيبي محد ضاربها
- ليش ضايجة حبيبي
- شايفني ضايجة
- هيج حسيت
- ها تمام
عافني ومشى كعد يلعب ويا ابنه
امي متقبل احجي .. ومن صدك ثاني يوم كالي اني راح اروح لاهلي
- مو صارلك ٥ ايام من رحت ..
- امي مريضة وتعبانة
طلع اني خابرت السايق مال بابا يجي وكبل طلعت وراه .. وصلنا هناك سيارته بالباب .. نزلت دكيت الباب وجان ابنه يفتحلي الباب !!!! ..... يتبع
_________
#زينب_ماجد
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق