رواية على حافة الثأر الفصل السابع وعشرون 27بقلم زينب ماجد حصريه
رواية على حافة الثأر الفصل السابع وعشرون 27بقلم زينب ماجد حصريه
على حافة الثأر
( بقلم زينب ماجد )
الحلقة_27
احس نضربت على راسي لما طلعلي ابنه من البيت بس متهورت ولا ابديت اي تصرف حاولت على كد ما اكدر ادخل بهدوء يمكن ابنه جاي خطار وديريد يشوف ابوه !؟
ابتسمت واني اخفي بركان من نار جوايا وكتله : بابا جوا
- اي جوا
دا اريد افوت جوا وهو يصيح من الباب مال الاستقبال: منو ع الباب بابا
صرت كباله هو اهتز من طوله واجاني بكل همه : فيان !؟
- حبيت اجي وياك بس انت ما انتظرتني
اتجمد بمكانه من اتقربتله : اااا شسمه يعني لو كايلتلي .. شوفي
- شبيك ما اجيت حتى احاسبك ع التليفون اللي جوا الكشن جيت دا اشوف اهلك
- يعني انت الجنتي ماخذته
طلعت غيد وهي لابسه ملابس بيت بس فوكه حجاب ودا تصيح على ابنها انصدمت بيه كدامها .. اتجمدت بمكاني واني اشوفها
باوع وراه شاف غيد خزرها تطب جوا بسرعة فاتت
علياء طلعت وهي تكوله : حضر السيارة عباس امي جاهز.... قطعت من شافتني كدامها
حجيت : يمكن اني دخلت المكان الغلط اعتذر
ركض ورايا : فياااان اصبري
- اشششش ولا كلمة
- بس اسمعيني
- شفت كلشي ميحتاج اسمع كذب زايد
- فياااااااان
- ارجوك لتلمسني
- اسمعيني
- لا ما اريد ابتعد عني
- لازم تسمعين اني ما خاينج
- مرجعها وتكولي مخاااااااينج
- ما خاينج والله وعيونج ما خاينج
- الله يحرك كلبك مثل ما حركت گلبي
طلعت امه تلزم بيها علياء وهي تكلي : جا تريدين يعوف مرته وجهاله ويكابلج انت وامج شنهي طلعته من بطني حتى يصير من بختجن اخلف وانطي
- اخذي الج بالعافية عليج وعليه
احجي واحر بيايدي منه وهو يكلها : يمه رحمة لوالديج لتدخلين .. فووووتي
- عووووووووفني
-جاي اكلج فوتي خل نحجي
سحبت ايدي بسرعة دا اريد اضربه راشدي لزم ايدي وجتفني باديه وشالني من الكاع .. كمت ارافس بيه نزلتي وهوي دفعني ليجوا حتى يحجي
كام يصيح هرجهم كلهم حتى يطلعون وشمر سويج سيارته لمحمد كاله اخذ امي روح بس روح
- انت تعتقد اني راح اسمعلك
- غصبا ما عليج تسمعين اني ما مرجعها بس لخاطر جهالي
- تنجاز انت وجهالك اني شكوووووووو ابتعد مني
- ما راح تطلعين افتهمي
- لا ما راح افتهم ووالله لو ما تركتني راح اتصل ببابا ساعة وهالبيت يتطوق من كل مكان وكتها مو بس ارجعك لنقطة الصفر امحيك من الوجود
- اسمعيني ووكتها امحيني
- ما اريد اسمعك ما اريد ما اريد اتركني
ثقيت بيك وجبرت اهلي يدعموك ويشجعوك ومحد يمن عليك بكلمة وصايرتلك سيف وشحده اليطخك بحجاية وكبرت وكبرت تالي تكبر عليه وتخذلني انيييييييييي تخوني وترجع مرتك وتعيش اهلك ومرتك برااااااسي
انت محبيتني انت مستغلني حتى تغير واقع اهلك انت مستغلنييييييي.
- ما دام حكمتي وما رايدة تسمعين شي ما راح احجي شي اخذي راحتج ما راح اوكفج
عفته وكمت من مكاني وطلعت من البيت صعدت بسيارة بابا وكتله للسايق : ارجع لبغداد فورا ..
كعدت ورا وجبت الطريق كله ابجي ..
وصلت البيت ماما منتظرتني وابني بيدها: ها احجي
- مرحع غيد واطفاله وعايش الاخ حياته واني يا غافل الك الله ..
- صدوووووووك ؟ تعاي وين احجيلي
- مالي خلك احجي اي شي .. اتركوني لحد يتقرب مني
كمت صعدت للغرفة كمت اشمر بالغراض اكسر ابجي ..
كل اليحاول يقترب مني اطرده ..
تعبت من الصياح والبجي
بكل انهيار كعدت بالكاع ابجي بكل الم شنو القصرته وياه حتى يسوي بيه هيج !؟ قللت احترامي وياه لو ضايقته فد يوم لو مننته والله ما حجيت مرة ولا مننته وصاير عظم بحلوك اهلي حتى ميضايقوه بكلمة لو يجرحوه تالي هيج يجازيني
هيكد صعبة يحبني ويوفيلي
اشتريت البيت وسجلته باسمه يكعد اهله مفد يوم كتله بيتي وانطيني وفلوسي كلشي اكول فداه بس كون هو يمي هيج يجازيني ليش وبشنو قصرت وياه حتى يسوي بيه هيييييييج ليش .
كمت من مكاني واني احاول اقوي نفسي واكول : اني سويته وانكسر بسببه ليش مو اني اليكسرني ويعيش
جريت جنطة السفر من الكنتور وحطيت بيها كل غراضي واخذت جنطة ايد جبيرة ونزلت خليت بيها كل غراض دودو ولميتهم وامي تكولي : وين تردين بس احجيلي وين ماخذة الطفل
- اتركيني معليج ما اريد اشوووووف احد عوفينييييي
اخذت ابني والسيارة وتوجهت للمطار ..
اني ابجي وابني يبجي حجزت لاربيل موعد الرحلة بعد ساعتين .. ديسنن ومتنحس كلش .. سويتله ممه وانطيته وبقيته بعربته وامشي بيه وكلت موظف ياخذ الحنطة ويسوي جيك ان واني اكعد ..
لما رحت دا اريد امشي من الكاونتر يكولي ( وكالة سفر للطفل )
: اي وكالة !؟
- وكاله من الاب يسمحلج تسفرين ابنه
- اني رايحة لاربيل مو لاي دولة
- اجرائات هذه ست لازم وكالة
- اي اجرائات .. اني امه
- حتى لو امه لازم موافقة الاب ..
- اني دا اروح لاربيل مو وضع هذا اتأكد من مديرك وشوفه منو صيحله احجي وياه ..
اتصل واجا كالي تفضلي ست ..بس اشوفلج الموضوع
صرت على صفحة وهو يسمح للمسافرين ويدقق بجوازاتهم
اني شلت دودو من العربانة واهز بيه على كتفي
اجا حجه : خابري الاب تكدرين ؟
- لا
- ابو موجود لو متوفي
- موجود
- خابري حتى تمرين
- مراح اخابر ما اريد
- ليش ؟
- بكيفي مرايده اكوله
- ست ما يسمح بسفر الطفل بدون موافقة ابوه اذا حابة تطلعين لاربيل روحي بر ما راح يوكفوج طيران اعقد لج من البر
- طفلي صغير يعذبني بطريق ٦ ساعات من بغداد لاربيل
- اعتذر منج ست
مجان الي خلك اتعارك وياهم وابني تعبني رجعت اخذت جنطتي وجنطة ابني وارجع للكراج احطهم بالسيارة وارجع للبيت ..
لكيت سيارة عباس بالبيت تركت السيارة بالباب ودخلت ابني بأيدي صياح امي وعباس كلش عالي مجرد ما دخلت سكتوا اثنينهم
كاملي وهو يكولي: تريدين تزعلين وتطيرين ومدري وين تروحين حقج .. بس مال تاخذين ابني وياج وبدون علمي مو حقج
- دا تحاول تلوي ذراعي بأبنك وعبالك ابقالك وارضى بخيااااانتك علمود ابنا لا يحياتي انت كلش غلطاااان
اخذ ابنك حير بييييه
ردت امشي وصحت : دير بالك توصل يمي وباجر نروح سوية للمحكمة نتطلق افتهمممممت
ما رد عليه واخذ ابنه وانطاني ظهري وهو يبوس بيه .
صعدت للغرفة مترتبة والمكسر بيه مطلعي مثل المراية الطولانية .. والطابورية هم كاسرتها مطلعيها ومرتبين السرير
حاولت انام مكدرت
مشيت اخذت فاليوم شربت حبايتين وتمددت راسي احسه واح ينفجر من التفكير وكلبي حيطك من القهر
فوك شينه كوات عينه حاي بنص البيت يهددني ويحاسبني
ماكو غيري كبر راسه بس بسيطة اني الاعلمه شلون يكبر راسه .
دخت حيل ونعست على مفعول الدوا ونمت
محسيت غير ب٥ الصبح كلش عطشانة كعدت اريد اشرب مي ملكيت يم راسي .. داريد اكوم جان ينسحب الغطا مني
اندار والكا نايم يمي وكأنما مصاير شي !
دا اريد ادفع واضربه بيدي جان يشخر .. غاط بنومه
شمرت الغطا عليه وكمت من مكاني نزلت شربت مي ورحت لابني منومته ماما يمها .. واثنينهم غاطين بالنوم
بعدني دايخة واتطوطح من مفعول الفاليوم
حطيت راسي ع التخم بالصالة .. بسرعة نمت
حسيت مخدة تنحط جوا راسي واتغطى .. انداريت نمت لهناك حسيت احد كاعد وصوت التليفون يمي
فزيت عباس كاعد ع القنفة الكبالي لابس تراك اسوي وحاط رجل على رجل واستكان الجاي كدامه والجكارة بيده و التليفون بيده .
كعدت : انت شلون جرأة عندك وبعدك لحد الان هنا !؟
- ليش وين لازم اكون
- ما اريدك هنا .. اطلع منيييييي اليوم نتطلك اطلعععععع
- اول شي مكاعد ابيتج اني كاعد اشتغل وكاعد ادفع ايجار هذا البيت .. ثانيا محد لازمج اذا تريدين اتطلعين
- انت تتكبر عليه وتطردني
- شوفي منو الكاعد يطرد منو
- اني لو اعرف منيلك هالصلافة التحجي بيها انت الخايني وانت المكبررررر راسك علييييه
- ما خاينج اني مرجعها لخاطر جهالي وامي وين الخيانة .. حق اني اشتغل وعايش بخير وجهالي كاعدين بخرابة ابيت جدهم
- لان هذا واقعك وهذا مستوااااك يوم اللي اني سويتك وكبرررررت تكبر عليه
- شوفي اني جنت ناوي اتفاهم وياج واكلج شنو اللي تريدي اني حاضر بس مدام كمتي تعيريني واني صاير بفضلج لا والله لا انعل ابوج لابو الفضل التنطييناه وتمننين عليه
- تعلط علييييه وعلى ابوووووويه حيوووان
كمت دا اريد اتدافع ويايا جان يلزمني من شعري ويكلي : احترمي نفسج ولا تضربين افتهمتي لو لا مو اني التحكمني مرة
عافني وصعد ...
كتله : اليوم نتطلك خووووش هسه نروح نطلك
- طلاك ما اطلك ولان ما اطلك راح اخليج تبقين هنا واني الاطلع واعلمج منو هذا النغلطين عليه وتتجاوزين .
كام بدل وطلع .. اني كعدت ابجي لوم بحظي ..
افتر اريد مالي خلك اطلع مالي خلك اكعد ويا احد مالي خلك افتح تليفون ولا اشوف تلفزيون ولا الي خلك حتى ابني احس روحي مريضة ومعلعلة منه
فوك ما هو خايني وخاذلني هو ابو الراهي وهو ابو الحق .. مدا اعرف شلون اتعامل وياه .
يومين وخابرني بابا كالي : شصاير بينج وبين عباس
- ليش ؟
- مقدم استقالة من الشركة
- قدم استقاله !؟
- اي
-ليش
-يكول اسأل فيان اني ما اكدر ابقى بمكان اني مهان بيه
- دا تعجب بصلافته عجيب مدا اتحمله راح اطك منه
- شصاير بيناتكم
- شصاير بس خايني
- بسسس
- بابا شنو بس انت شايف الموضوع سهل
- اي بابا الرجل يغلط وتاخذه نزواته بس مو معناها خاين
- لااااه شنو نزواته شنو غزواته بابا دا اكولك خايني ومتزوج
- متزوج شنو شوكت اتزوج
- قصدي مرجع طليقته ومخليها ابيت اهله وعايش حياته
- هااا .. القرار الح بابا انتو اتفقوا بيناتكم المهم اني ما وافقت على الاستقالة كلت اخابرج
سديته من بابا ونزلت لماما كلت الها كالت : انت بطرانة عباس بعد مو بحالج
- ليش
- قدم استقاله منا وراح اتفق ويا واحد ادليمي تاجر سيارات وراح يشتغل وياه .. ذكي عرف يتخشخش ويكون صداقات ويا ناس كبار ويذبج ومو بحالج
- انت شمدريج ؟
- خابرني ديكولي حتى يوصلي معلومة هو مو بحالنا وديكولي يريد يجي اليوم حتى ينطيني مصرف ابنه ومصرفج خاف نحسسه هو ماله قيمة واحنا اللي دنصرف
- منو هذا الدليمي اللي اشتغل ويا اعرفه
- لج شبيج ابن صديقه لابوج حاتم الدليمي
- وييي لتكوليلي ابنه صادق
- عفية .. صادق صاير دهن ودبس هو وعباس وعباس معول على الله يلزمله بواحد تاجر يصادقه
- هو عباس يدري صادق كتل روحه ومعبرته لو ميدري
- هو اكو دليمي ميكتل روحه ع النسوان
-زين اذا رايد يكون نفسه ويوكف على حيله ومو بحاجتي لويش مدا يقبل يطلك .
-عباس فد واحد لوتي يريد كلشي جواه يعرفج غشيمة وكم يوم وتسامحي عادي
- لتكولين هيج
-شفتي متقبلين احجي عليه
-مو تكوليلي غشيمة مو اني طالبة الطلاق
-اي وكلي محامي خلي يرفع دعوى طلاق ودزي لاهله وخلي المحامي يثبت هو متزوج عليج من عين باجر القاضي يطلكج بس انت اللي مرايدة
-بهالسهولة اطلكه لا والله لا ما اعلعله والعب بحاله لعب ما اعوفه
-نشوف منو يلعب باحوال منو
-انت ويايا لو عليه
-اي غير الصدك عباس لوتي ومحيل تكدريله انت يلعبح ويلعب سبعة مثلج انت لو اهملج يومين ومهتملج اطكين وتموتين وهو اخر همه اذا انت خابرتي لو ما خابرتي النسوان هواي والمكان فارغ
-شنو يعني فااارغ
-مكانج
- ماما انت دا تتعمدين تضايقيني اكوم منج
كمت منها وشلت ابني رحت لغرفتي حطيته ع السرير يلعب .. واني كاعدة افكر ...
صفنت بأبني يريد يكلب مدا يكدر
بقيت مركزة وياه .. صفنت هو صار عمره ٨ اشهر ولهسه مدا يكلب عادي لو لا ؟ ما اعرف .. بقيت الاعبه واضحك وياه
لحد ما كام يبجي كمت شلته سويتله ممي وشربته وكمت افتر بالغرفة دا اغنيله حتى ينيام .. اندكت الباب ودخل عباس كبل كال : السلام عليكم
فز دودو بسرعة وشال راسه من سمع صوت ابوه
تقرب عباس وهو يتجاهلني ويمد اديه ويكله : بابا حبيبي
فز دودو لحضن ابوه بسرعة
تنهدت : تكدر تشوف ابنك ربع ساعة وبعدها تغادر
دا اريد امشي مد ايده ووكفني وتقرب باس راسي ابتعد حجه : مشتاقلج والله
- ربع ساعة
سوا حركة براسه : تمام
طلعت من الغرفة گلبي يدك .. وكفت واني الزم المحجر انتجيت عليه دا افرك وجهي طلع عباس وبيده الطفل : محتاجة شي
باوعتله مطول دقيقه يشوف ابنه وجاي ديسألني محتاجة .. حجيت : محتاجة تطلكني
- كلت الج طلاك ما راح اطلك
- بس اني رافع اوكل محامي وارفع دعوى الطلاك
- رفعي
- ها كول خايف تدفعلي المهر فرايد الطلاق يكون مني
- رايدة مهرج !؟
- رايدة طلاقي
- ما اطلك ولو مو ترفعين دعوى .. طلاك ما اطلك وماكو شي يجبرني اطلك .
- اكولك انت عبالك تكدر تمشيني بكيفك وارضى تتحكم بيه ؟!
-لا مو عبالي .. اني زوجج وامشيج بكيفي واتحكم بيج
شوفي فيان انت طيبة وبنت اصول وتحملتي وياي ايام بنت الفكر ما تتحملهن جعتي واحتريتي وما شكيتي اني كرجال رايدج وماكو واحد غشيم يفرط ببنية طيبة مثلج ويخسرها
تكولين طمعان بيه اني استقاليت من شغل ابوج .. تكولين اني مكعدج ابيت تابع لشركة ابوج كومي امشي اخذج واخليج ابيت ثاني وبمسؤليتي ..
تكولين اني كبرتك احترمي نفسج
لان اني رفضت اجي لبغداد ولان زعلتي وانت مريضة والبطنج جان عليل رضخت لرغبتج وتركت امي زعلانة وراي واجيت نفذتلح كل التريدينه واشتغلت ويا ابوج حسب طلبج انت تجين تعايريني ما مسموحلج وعليج ترجعين تعيشين ابيتي اوفرلج الامور اللي على قدر استطاعتي وهذا اتفاقنا من البداية وانت قبلتي واختلفيتي بعدين واني بكل الحالات قبلت باللي انت تريدينه تجين تعايريني
-انت دا تكلب الحق عليه ومطلعني اني اعايرك ومدا تحس على نفسك انت شمسوي
-شمسوي
-عباس دا تغشم نفسك ؟
-لا ما اغشم نفسي بس من صدك ما سويت شي شنو تنكرين اني ولا يوم رايح وبايت يم اهلي وكل ايامي مخلصها يمج ..
- هذا ما ينفي انت مرجعها ومن ورايا
- وهسه صار كدامج شنو اللي اتغير
- انت تخبلني من تحجي بهالبروووود
ضحك وهو يحاول يلمني ويشبكني بضحكه دفعته مني وهو يكول : والله انت طيبة وحبابة واني احبج وعلي نسوان الدنيا كلها ما تسوى عندي ظفرج لا تخلين فلان وعلان يغيرج عليه والله اني ما خاينج .
- وخر مني
- ما بنيتي اجبرج لو اضايقج اني رايدج تهدين على راحتج ونحجي وشوكت ما تكونين جاهزة نتفاهم
شايل دودو بايد وحدة على صدره وتقرب ديريد يبوس راسي وخرت سحب راسي وباسني ابتعدت واني اكوله : ابتعد مني ارجوك مطايقتك لتحاول
-اكو اغنية انت هواي تسمعينها اسمها (لا ترحلين) احس نغمات هالاغنية وترافتها وبرائتها تشبهج صارلي فترة من عفتج ولحد الان اسمعها الج .. اعتبريها مني الج واسمعيها ولتخلين احد يغيرج عليه
والله مشتاقلج ومالي راحة بدونج وكل اهلي والعندي والما عندي ما يغنيني عن لحظة اكضيها وياج وويا هالطفل انتم راحتي والله .. لا تخلينهم يقسون كلبج عليه لان والله ما عندي غيرج.
اخذت نفس باوعتله : محد ديقسي كلبي غيرك انت خذلتني
- والله ما خذلتج
دا اريد احجي صعدت ماما كالتله : رايد تخدعها بكلمتين وتنسيها حركة كلبها وفرفحتها من درت بيك وانت لاهي تاخذ متا وتحط بحلك ذيج براسها !؟
- انت ما مسموحلج تدخلين بيني وبين مرتي
حجيت : وانت ما مسموحلك تحجي ويا امي هشكل
تنهد : ديري بالج ع الطفل
انطانياه وباسني بخدي ومشى صاحت امي : شوف شوف الدروب يمه يبوسها عود عباله هي مدمغة وغبية راح تنسى السويته وياها ببوسة خايسة
اتجاهلها ومشى وهي اندارتلي : ولو ما استبعد يعرفج انت شنو وتنغرين وتضعفين ببوسة منه
- ماما كافي اني كتله اريد الطلاك
- كتيله اريد الطلاك وكالج تامرين صار وباسج حتى تكعدين بالليل وحداني وتحنين لبوسته وتشوفين فراشج فارغ وتبقين ادكين حتى يرجعلج مو
- ماما رجاءا شنو هالكلام المقرف .. لتحجين ويايا هشكل .
اخذت ابني ودخلت للغرفة بدلنا اني وياه واخذت جنطة صغيرة وطلعت ولا سيارة بالباب .. خابرت على بابا : الو
- ها بابا
- دزلي سيارة ولا سيارة بالباب
- وين طالعة بهيج وكت والدنيا مو امان
- لاي مكان اشتم بيه هوى اريد اخذ دودو واطلع
- حفيدي وياج وتطلعي بهيج وكت يا بنتي
- بابا الله يخليك مختنكة كلش
ردت ابجي
كال : اش اش اش هسه اني جاي لتبجين مسافة الطريق واني يمج
بقيت بالحديقة انتظره لحد ما اجا كال : شكو شصاير وياج يا بنتي ؟
حجاها وهو يتجاهلني ويشيل دودو ويكوله : جوني باشا وه وه وه .. له دلال له .
كام يبوس بيه طلعت ماما وكفت : وين ماخذة الطفل بهالحو ادخلي حوا ليتمرض
حجه بابا : هو شصاير بياتهم
- اجاها العينتين تكوله طلكني وهو يبوسها بوستين واتضايقت مني ومن كلامي وطلعت الكلب هذا ديستغلها خلاك تسوي ادمي وراح رجع مرته ويشيل بالخير من عدنا ويخلي ببطن اهله وخلفته .
- اذكري الله يا مرة .. متضايقين منه لان ينطي لاهله واطفاله قابل صارفهن ع النسوان ونلومه غير اهله الما بيه خير لاهله ما بيه خير لاحد
فزت امي : لا تكلي انت تصف وياه على بنتك
- ومنو الاعز عندي حتى اصف ويا منو اني ما تقبلته غير لعيونها بس خلينا نكون عقلانيين ومنفكر بهيج طريقة شنو الغلط اذا انفق هلى اهله
- ويرجع مرته
- هذا شأنه هو فيان لا اني ولا انت يحقلنا نحجي .. اتركيهم يحلون مشاكلهم بنفسهم
- هستوك دا تكول من يصرفهن ع النسوان نحجي
- ديكولج ام اطفاله يا نسوان بعد انت صارلي شكد مطلكج فد يوم احتاجيتي شي وكتلج لا واني متزوج وعندي بيت وعائلة غير ام اولادي ..
- لا الظاهر عباس مبخبخلكم مو معقولة كلكم مصدكينه وصافين وياه انت تفتهم شنو يعني اخذته حافي منتف وهسه كبر راسه على بنتك وديريد يستغلها
- مو هي اختارته ؟ اتركيها تقرر هي مو صغيرة وبيناتهم طفل وهالطفل محتاج اب .. ميحقلنا ندخل وهم محد منهم طالب من عدنا ندخل .
- ويييه تصطفل انت وبنتك الظاهر كدر يغشل مخك
باوع عليها بأستغراب .. هز ايده : كومي بابا اخذي هالحفيد الجميل وادخلي جوا
- مختنكة من جو البيت دا اريد اطلع لفد مكان ارتاح
- كومي خل اخذكم شوية يلا
باوعتله .. تنهدت وكمت .. هو اخذ ابني وطلع صعد يم السايق ودودو بحضنه .. واني كعدت ورا .. حجه : وين حابة تروحين بابا
- ما اعرف
- اطلع ابني لابو نؤاس
ساق واني فاتحة الجامة وعقلي يفكر بين كارهته وطالعة روحي منه ومطايقته وبين شي بداخلي مديكيدر يعوفه لو يتخلى عنه .. اريد اصير قوية واخذ خطوة واتطلق بس مهزوزة ما اعرف اخذ قرار
كاسرني فكرة يستغفلني ويرجع مرته .. يكعد وياها ويمكن يحجي ويمكن متقربلها كل هذا واني ما ادري ..
وصلت ابو نؤاس بابا وابني بقوا بالسيارة وطلب من الحارس يبقى قريب مني .. بقيت كاعدة كدام النهر وكالعادة مكدرت اخذ قرار وحالي حال النهر اللي يمشي بدجلة الروجة تجيبه يمين والهوى يدفع بيه يسار .. وباقي شي ياخذه وشي يرده .
حجه الحارس : ست الطفل ديبجي بيد الاستاذ
كمت من مكاني رحت سويت ممي واخذته من بابا رضعته وخليته بيدي بقيت اباوع بوجهه .. واتذكر بابا لما يكول لماما بيناتهم طفل وهالطفل يحتاج أب
اني بيوم الايام لما تطلقوا ماما وبابا كرهتهم اثنينهم لان مكدروا يتصافون ويبقون لخاطرنا اني هجرتهم واخوية تركهم .. محد بينا عذرهم رغم بابا جان ييخون ماما هواية بس مجنت اشوف هالموضوع عذر يكفي لحتى ماما تخدم بيتنا وتروح وتفرقنا .. جنت اكول كان الاولى بيها تتحمل لخاطرنا والا احنا ما نستحق ؟ فضلت نفسها صارت انانية مفكرت غير بنفسها !
بس طلع الشعور صعب صعب كلش .. ماما تحملت خيانات بابا كلها واتحملت تشوف بنتها تنقتل وهو يسكت ميحرك اي ساكت وتركته ..
كل عمري الومها بس .. احس دا اعذرها الشعور ما تحس بيها فقط لما تعيشه صعب كلش صعب شعور المرة اللي تحس زوجها خذلها واستغفلها.
وصلت للبيت ماما منتظرتني اخذت الطفل من ايدي وبقت تبوس بيه كالت : ارتاحيتي ؟
-لا
انطيته الها ودخلت ..
بقيت تلث ايام مدا اعرف شسوي متزوهرة ومتمرمرة ولا دا اعرف انام ولا اشوف طعم الراحة
سمعته بلش شغل ويا صادق الدليمي ..
كلت الا اروح وافشله واعلمه شلون يستغلني ويصير براسي
اخذت السيارة ورحت للمعرض مال صادق ..
دخلت معرض مال سيارات واشكال الوان السيارات الحديثة موجودة ومعروضة ..
كال العامل : تفضلي ست ..
- صادق موجود
بعدني دا احجي شافني عباس خزرني واجا كال للعامل اخذ راحتك اني اشوفها بس اندار العامل لزمني من زندي وجرني . كمت احاول اسحب نفسي من عنده واكوله : وخر ايديييك
- اسمعي لج لا تعيشيلي دور الافلام وعود جاية تفشليني بشغلي والعباس اخو زينب الزمج هنا اسحلح سحل وانعل والد والديج افتهمتي لا تخلينا فرجة لامة محمد امشي
- وخر ايدك من عندييييي
جرني بقوة وسحبني برا المعرض .. ردت افلت ايدي لزمني من شعري سحبني بقوا وبالشارع تخبلت كتله : اترك شعري انت شدا تسويييي من النااااااس دا تباوع
وخر ايده من شعري ولزم ايدي حيل جرني للسيارة صعدني وكال وعلي لو حاولتي تنزلين كدام ذولة الماس الاستحيتي اجرج من شعرج كبالهم اصلخج بالحزام والله
صفك الباب بوجهي ورجع صعد بالسيارة
ساق السيارة بسرعة عالية محجيت ولا نطقت اي كلمة بس عيوني صارت نار ..
وصلني لمدينة الالعاب ..
كال : انزلي
- ما اريد
- تنزلين وغصبا ما عليج
نزل وضرب الباب واجا اندار فتح الباب وسحبني : شتريد مني
- انت اللي شاريدك
- رايدة طلاكي
- وكلت طلاك ما اطلك
- مو على كيفك
- على كيفي ونص واعلمج منو اليمشي كلامه على منو
- بقى يمشي كدامي محاولت اتبعه اندار شافني واكفة رجع سحبني من ايدي كمت انتر : وخر ايدك اني امشيييي وخر
ما عافها كام يمشي بقوة ..
راح للديلاب الهوى .. انطى فلوس ومشينا بالسرا فارغ محد اكو .. مشى لوحدة من الخانات صعدت بيها بدون ميكول وقبل لا اباوعله اصلا احس بروحي ضايعة واتمنى استقر لقرار ..
كعدت وهو كعد كبالي ..
سكتت وهو سكت بقت بس نظراته وتنهيداته بيناتنا .. تحرك الديلاب .. اخذت نفس ووكفت هو وكف ورايا وح ايده ع الحديدة حتى لا اتحرك واوكع .. حجه : اسمعج
- اني حجيت اللي عندي انت اللي ما حجيت ولا بررت فعلتك وكأني ما استاهل تبرير منك .
- انت تستاهلين عيوني مو بس تبرير ليش شايفة نفسج قليلة عندي واني ما عندي اعز منج
صرت كباله : مواكفة حتى اسمع هالكلام المعتاد والمعاد .. اذا عندك تبرير كوله اذا ما عندك صم السانك عني واتركني بحالي
- مر يوم واحد اني بتت بيه برا بيتنا !؟ فد يوم اني اتأخرت ابيت اهلي وما رجعتلج ؟ فد يوم فضلتهم عليج لو انت وابني الكم الاولوية ؟
- واجبك مو فضل منك اذا ما عندك غير تبرير افضل تسكت
- وواجبي على ولدي كذلك
- جان تكدر تدزلهم مصرفهم وهم ابيت جدهم
- فيان اني الكعدة مال امي عفتها مريضة بالكوت واجيت وياج لبغداد كابلتج هي ام وتريد شي مني يبقالها .. تريديني يمها اني بدل ما اكابلها حطيتلها ولدي حتى تطمن اني عائلتي مخليهم يمها وما عايفها وهي بيتي
- اذا هم عائلتك وبيتك احنا شنو
- انتم اني .. جزء ما يتجزأ مني .. انتم مو واجب وفرض اودي وافتك منه انتم راحتي انتم مستقري انتم كلشي
- محض كلام ما يمت للواقع بشيء واني اشوفك ... قاطعني
- شنو هو الواقع عايفج هاملج تاركج روحي اسأليها لغيد وتحجيلج منو الهاملها وتاركها وعايفها من صدك .
- انت منو كايلك اني اقبل تجيب اسمها كدامي لو تقارني بيها ليكون منتظر تخليني افضل منها واكعد اصفكلك واااااو شكرا لان فضلتني اني ..
اخذ نفس بقوة وهو يتنهد وبملل : شتريدين كليلي
- تطلكها
- ما اطلكها
باوعتله : لا والله !؟
- اي والله ما اطلكها ام اولادي واني احترمها واقدرها وعايفها ويا اولادي تداري امي واولادي اتقربلها لا اعتبرها زوجة لا وهي قابلة بهالوضوع وهالوضع مخلي امي وجهالي مرتاحين وممأثر عليج بشي فما اطلك ..
- بالعافية عليك وعليها لتطلك اني اتطلك
- ولا اطلكج
- نشوف ..
تحركت واشرت لابو الديلاب الهوى : العفو ممكن توقفه
سحبني : راح ترضين فيان
- نام واتحلم اني راضية وعيش بهالحلم واصحى تلكيني مطلكتك
- اكلي خ** اني مو مرة واتطلكيني احترمي نفسج
- اعلمك منو التتجاوز عليها بهالالفاظ اللي تشبهك
دفع خدي بقوة : احترمي نفسج لا تتجاوزين ترا لهسه اني مقدرج
- غصبا ما على راسك تقدرني مو فضل منك لاني محترمة مو مثلي سوقي ووضيع .
لزم ركبتي : هسه ليش تخليني اذيج عود حلوة اذيج يعني
- وخر ايدك .. وخر خلي امك ومرتك يفيدوك
- حلال عليج مكعدتني ويا امج واهلج وحرام عليه اكعد ويا اهلي وعائلتي .. يعجبج يعجبج ما يعجبج اركعي راسج باقرب حايط
اختنكت العبرة ببلعومي واني اداري دموعي بعيني حتى ما تنزل واهز براسي وكوة انطق الـ : تمام
انتظرت لحد ما نزل الولاب .. انفتح الباب نزلت
هو صاح : اوكفي اوصلج
اني امشي بسرعتي
- كتلج اوكي
- ميحقلك ميحقلك كااااافي انت اختاريتها عووووفني
- اني ما اختاريتها بس ما ضارتج حتى اطلكها
- متطلكها حتى بس نتزاعل تركض يمها .. ابقى على حافة خاف تزعل وتروحلها انت من كل عقلك اني اكعد انتظرك واغريك حتى تبقااااالي
- ميحتاج تغريني اني باقيلجججج يمتى رحت حتى ابقى
- عسااااك لا بقيت روحلهممممم اني ما اريدك
- لا تصيحين احنا بنص شارع
- روحك انت وشارعك
- فيان
- عوف فياااان بحالها
- امج هاي اللي دا تخربج عليه ودا تترس بعقلح هالامور
- امي شعليها بصلافتك وقذارتك
- لا تتتجاووووووووووزين
نحجي ونتعارك واني امشي وهو يمشي بهمة ورايا وكفت فجأة - اوكي .. تمام مراح اتجاوز وانت مرتح تتبعني .. وتتركني
- تنطيني ابني
- هههههههههههه حاول بس تاخذه مني صدكني مو اني اللي راح امنعك .. لو حاولت ولو مجرد محاولة تخلي الطفل بخلافاتنا فصدكني اهلك واطفالك كلهم مراح يخلصون وتعرف اني شحجي
- كاعد تهدديني
- لا تلعب بالنار حتى لا تهددك وتأذيك اعرف حجم
- منو اليعرفني حجمي انت ؟؟؟؟؟؟
تركته ونزلت للشارع وكفت سيارة .. سحبني : امشي اني اوصلج
- وخرر
- امشي اوصلج للسيارة اباب المعرض اني راجع
رفعت اديه اثنينهم وصحت : كتلك وخررررررررر
ودفعته بقوة وفتحت باب التكسي وصعدت بسرعة وهو يكولي : بسيطة .
اخذت التكسي ورحت لمكان المعرض صعدت السيارة ومشيت بيها جنت افتر افتر عقلي كلش هوسة شي ابجي شي احترك شي انصهر من صلافته وحقارته ..
ماما تتصل ما اجاوبها .. لحد ما تعبت وقررت ارجع للبيت ابني بس ماما ويا المساعدة مموجودة ..
رجعت للبيت منهارة ضعيفة مشوشة بنفسي اخذ قرار اريد اصير قوية وما اهتم مدا اعرف شلون اصير قوية مدا اكدر اجمع نفسي وكلش كارهه ضعفي .
دخلت للبيت صاحت ماما : انت وين جنتي مو دا اخابر عليج
- ماما الله يخليج لتصيحين كلش تعبانة .. دودو وين
- داريان اجز الحقير اخذته حاولت امنعه دفعني ووكعني للكاع واخذه يكولي : الطفل ابني وابن ابوه اليمنعني منه ..... يتبع
_______
#زينب _ماجد
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق