رواية على حافة الثأر الفصل الثامن وعشرون 28بقلم زينب ماجد حصريه
رواية على حافة الثأر الفصل الثامن وعشرون 28بقلم زينب ماجد حصريه
على حافة الثأر
( بقلم زينب ماجد )
الحلقة_28
تخبلت لما كالتلي اخذ ابني
تركت من ايدي بسرعة ورحت اركض على تليفوني ادور رقمه خابرته ما يرد .. كمت الزم براسي من القهر : ربي شسوي ويااااه شسوي
خابرت مرة ثاني يرن يرن يرن وميرد
عيوني دمعت وارجف واحس راسي حيطير من كد القهر دخانة فوكي من كد ما كلبي احترك
خابرت على بابا .. رن من ثاني رنة رد : ها بابا
- بابا عباااااس اخذ ابني
- اهدي اهدي لتبجين وين اخذه؟
- ما اعرف تعاركنا اني وياه وهددني بابني لكيته جاي للبيت وماخذه بابا الله يخليك ساعدني
- اهدي ولتبجين هسه اني اخابره واشوف شكو
- بس بسرعة واعرفلي مكانه وين .. كوله هسه يرجعلي الطفل
- لتخافين هسه اتصرف
قفلت الخط من بابا وشمرت التليفون : انت شلون تخلي ياخذه ليش ممنعتي
- اني شلون اكدر امنعه وحدي لا حرس موجودين وبس اني و هو مينلزم .. شغلة ابوج محيفيدج لازم نروح للمركز هسه ونبلغ عنه
-شبلغ
-ماخذ الطفل مو من حق اي احد حتى لو جان اب ياخذ طفل رضيع من حضن امه تبلغين هسه يطلعولج دورية تكسر خشمه وترجعلج ابنج
-بابا كال واح اتصرف
-ابقي بهالضعف لشوف ابقي .. هو مستغل ضعفج كل الديسوي بيج من ورا ضعفج هذا متكدرين توكفي عند حده شناقصج حتى توكفي مال جاه جمال لج انت كادرة تسوين كلشي مربطة نفسج بيه لييييش
-ممربطة نفسي وراح اتصرف
-ييييييه صدكت .. بكلمتين مو تلاثة حرام هواي بيج التلاثة .. بكلمتين يفرج ويرجعج اله .
كاعزة وحاطة اديه على راسي كلش تعبت نفسيا كلش
دك تليفوني كمت من مكاني بسرعة اخذت التليفون .. بابا
رديت : الو ها بابا
-خابرته كال مماخذة بس حبيت اشوف ابني واخذه لاهلي يشوفوه
-اهله وين ياخذ طفل للكووووت
-لا ديكول اهله هنا
-شنو هنا ؟
-مأجرلهم غير ما اعرف
-بابا ولا ياخذه ابني صغير وهن نساء حاقدات ما اثق شيسوون بيه هم لو يحبوه كان طلبوه من زمان اريد ابني بابا
-هسه اني جايج بالطريق
-وكوله ينطيك مكان ابني وتروح تجيبلياه فورا
-بابا انت بس اهدي ابنه مراح يأذي ابنه
-بابا اهله يكرهوني ويكرهون ابني ميعتبرررروه ابنه افهمني
-ابوه يمه بنتي
-ما اقبل ارييييييد ابني
-طيب طيب بس اهدي راح احل الوضع.
سديته منه خابرني عباس بسرعة رديت اول مكال الو اني انهديت بيه : يا حقيييير تاخذ ابني والله لا اندمك يا حيووووووان هسه ترجعلي ابني افتهمتتتتتتت
- طايحة الحظ احترمي نفسج مثل ما هو ابنج هو ابني ومن حقي اشوفه ويبقى يمي اشتاقله هو ما بس انت خلفتي
-ابني وييييين عباااااس لتحرك گلبي
-بحضن امي دياكل
-انت اخذته للكوووووت
-لا احنا ببغداد
-وين ابغداد ابني وييييييين
- لتطوليها وتعرضيها ساعة واجيبه
قفل التليفون بوجهي
اتخبلت كمت ابجي امي راحت بدلت اجا بابا كالتله : اذا ما تنبش الكاع هسه وتطلعه من جوا الكاع لا تسمي روحك اب يحرك كلبها بابنها ويبجيها ويقفل التليفون بوجهه ويلعب بمشاعرهااااا انت شنو من اب تصف ويا الرجااااال عليها
جنه نكول شوان لاعب بعقلك هسه هم صفيت ويا عباااااااس عليها شوية ثمن بنتك يا بشرررررر محترك كلبها من ورا هالساااااقط
- احترمي واكعدي كال راح ارجعه
- اكعد انت اني اذا ما انبشه وانبش امه ميهدالي بال كومي
جرت ايدي وكومتني واني ابجي وهو يكلها : اصبري تعاااي اصعدوا بالسيارة .. امشييي
جرتني صعدتني بسيارة بابا وهو صعد ليكدام خابر على عباس كاله : عمي اني ساعة واجيبه بس اتعشى
- احنا جايين بالطريق ناخذه بس انطيني عنوانك وين
اخذ عنوانه راجع مأجر بالحرية
توجه بابا لمكان بيتهم وصلنا ماما اول وحدة نزلت .. بابا كاللها : لتدخليييين اتركيهم يحلوووون مشاكلهم بنفسهم
- انت اللي خليك لا تدخل
نزلت وراها مشت بهمة ودكت الباب حيل ..
ابويه نزل بسرعة طلع عباس امي رفعت ايدها تريد تضربه عباس لزمها ودفعها ليورا وغلط : امشي لج بربو** جاي عليييييه
ابويه بعد امي ولزم عباس : احذرررررررك تتعدى حدودك
- محد متعدي احدوده غير اللي جاي يهجم على بيتي
- عباس احذرك تلعب بمشاعر فيان مو بنتي اللي يستغلها بشر .. هالمرة صارت وحركت كلبها بابنها مرة الثانية كلبك احركه .. واولادك بيهم البركة
- كاعد تهددني باولادي عمي
- دا احذرك تتلاعب بمشاعر بنتي مثل ما انت اب واني اب ما صار ولا عاش اليلمس شعرة من شعر بنتي لو من حفيدها اطمه جوا الكاع وحتى امه ما تسمع بخبره فلا تختبرني ببنتي وحفيدي احذرك تتلاعب بيهم نارهم تحركك عبااااااس
بابا لازمة من قميصه ويخزره ويحجي وياه بتهديد واني واكفة على صفحة حاطة اديه على حلكي واباوعلهم
ماما سببقتني ودخلت جوا باوعلي بابا وحجه : ادخلي اخذي ابنج بنتي .
ركضت من ورا بابا ودخلت جوا
امه لعباس شايله الطفل واكي تصيح : فكووووور صرتوا براس بنتي ودا تحركوووون كلبها .. نسيتوا من يا خيسة طلعتكمممممممم
وامه تصيح : من خيستجن يالكحاااااااااا لفيتن على ابني وخذيتنه مني والله فلا اطيجن ابنه ولننننن
علياء : عوفي الطفل لامه يمي جيبي
- فلا اطي والله
كامت امي تتعارك ويا امه وصياحهن صار شعلوه اطفال عباس وعلياء ترسوا الغرفة وغيد لهناك واكفة تباوع والبيت هوسة هستوهم منتقلين وبعدهم ممكعدين العراض .. والهوسة صارت جبيرة وابني ممتعود على هيج اجواء اخترع كام يبجي من كل كلبه
احاول اقتربله ومتنطينياه طب عباس لزم ادين امي ودفعها من امها وهو يكللها : ابني ما انطي لوحدة سز مثلج اطلعيييي منا
يحجيها وسحب الطفل من ايد امه وامي تريد تاخذ الطفل من ايده ابويه برا كام يصيح على امي كام عباس طلع امي من البيت ودفعها بابا سحبها وعباس صار بين الباب والشارع
مشيتله : الله لا ينطيك انطيني ابني حتسوي بيه حالة نفسية من وراك انطينييييي
اندار عليه ودفعلي الطفل وسد الباب والهوسة ورايا صاح بيهم : جوااااا علياء دخليهم وسدي الباااااي فوتوا
- وخر خلي اطلع
- كافي خلينا نتفاهم
- ما اريد اتفاهم وياك وخر
احجي وابني يبجي بقوة صرت احط بيه على كلبي واهزه هو جر الباب ودخلهم .. واجا عليه اخذه من ايدي : جيييبه
- لتخرعين الطفل امشي
فتح الباب وطلع طلعت وراه بابا ماكو عايفني ورايح !
كام يهدي ويكلي : ادخلي جوا
- انطيني ابني خل اروح
- هسه اني اوصلكم بس مو قبل ما نحجي
- مبقى حجي نحجي اللي سمعته يكفيني وزايد
- تسمعين تسمعين اذا مو بأرادتج غصبا عليج
- عباس الله يخليك لتأذيني كافي اني ما اريدك
حجيتها ولزمت راسي وكمت ابجي بقوة
- لج خبلة اذا انت مترديني اني اريدج لتتوقعين اتنازل عنج لاجل وحدة شايفتني مصلحة وباقية ويايا علمود جهالها والمصرف لانطي الهم لتخافين يوم اليفرغ جيبي لا تتوقعيها تبقى هنا
- اني مالي دخل بمشاكلكم انطيني ابني اريد ارووووح
- نروح سوا
- ولا سوا مو مأجرلها بيت مو حاطلك بيت بالعافية علييييك عوفني
- حاطة لاهلي امي مريضة فيان والسرطان ناخر نص جسمها تحتاج طبيب وتحتاج عملية مو مال اتركها بالكوت وامي هنا تحتاج مستشفى
- ميخصني انطيني ابني دا اروح
- الطفل سكت بيده لما طلعه برا ...
اخذ ايدي ويريد يدخلني جوا مقبل كمت اسحب ايدي منه ما اريد ادخل جوا ..
انطاني الطفل كام يبجي من شافنا ندافع .. ودخل جوا ..
كمت اهدي بأبني واريد اطلع سمعته يصيح جوا
وتمه تكوله: شرايد منه ابن الاوادم كوم اطلع منااااا امشيييي ..
وصوت غيد تبجي وتكوله عساك رحت وما اجيت شنو انت رايد تذلنيييي ما اطلعلها والله لو مو تطلكني
كام يتصايح وياها يريدها تطلعلي
اني كرهت ابقى بهيج موقف فتحت الباب وطلعت من البيت لراس الشارع ..
شوية واجا عباس وراي صف بسيارته ونزل : كافي الله يخليك كافي والله تعبت عووووفني .
- اني اللي تعبتتتتتت امشي اصعدييييي
اخذ الطفل من ايدي
- عوف ابني كااافي
سحبني وصعدني بالسيارة وخلا الطفل بحضني ..
جبت الطريق كله ابجي .. محاولت احجي ولا قبلت يحجي ما اريد اسمع شي ولا اريد اي شي كلش تعبت .
وصلني البيت اخذت ابني ونزلت استقبلتني ماما بحركة : قنعج بكلمتين فرج لو بعدج .. استغلج وسكتي
- ماما الله يخليج اتركيني اني وابني كلش تعبنا نفسيا لتزيديها عليه
- وراح تبقين تعبانة واتمرضين ابنج وياج مدام قابلتله يبقى بحياتج وما تطلكي لج فهميني انت شناقصج وترضيله
- ما راضيتله عوفيني اني ما اريد احد
- معناها من باجر اني اوكل محامي وتوقعين وتطلعي من حياتج مراح اسمحلج بعد مثل السعفة وين ما رماها الهوى مالت .
تركتها وصعدت .. دا احاول انومه للطفل مخترع مدا يقبل متنحس .. سمعت صوت ماما تتصايح جوا .. غمضت عيوني بضجر دا احس اختنكت فد مرة مدا اعرف وين اروح حتى اخلص
لازم باجر ابلغ بابا اطلع لهولير مستحيل ابقى هنانه اكثر لازم ارتاح اني وأبني .. دا افكر وحاطة ابني اجيبه منا وارجعه منا يتنغوص مدا يقبل ينام ..
دخل عباس للغرفة
باوعت بأستغراب ! هذا صدك يحجي لو يجذب .. حط سويجة وتليفونه ومحفظته ع الميز تواليت .. وديحاجيني وكأنما مصاير شي اااااااابد : شبيه الطفل ليش جاي يبجي ؟
تقرب مني ودنك للطفل شاله : انت مكافي اسلوبك هذا ترا مطايقتك
- يضربج وجع لتطيقيني
فزيت من مكاني : انت فوكاااااها تغلللللط
- بدل هوستج هاي انزلي سوي اكل للطفل خلي ياكل ما قبل ياكل هناك مخلصها بس حليب امشيييي
- انت ملك علاقة بابني جيبه
- ليش شنو نغل جايبته من غيري حتى مالي علاقة
- احترم نفسك
- عوفي البيني وبينج وبس انزلي سوي اكل للطفل جوعااان يا بشررررر
جريت ابني من عنده وكتله : اطلع برا
- كافي الطفل متعارض من المشاكل ليش تخبلينه
- انت دا تأذينه مو اني
- اني شمسوي
- انت مو طبيعي ابد اني مدا اعقل كمية الحقارة اللي بيك
- لتغلطين فيان ليش تخليني اذيج
- معناها اطلع واتركنا
- اذا طلعت يعني ترتاحين !؟ تعلميني بيج بعد ما شفتي مأجر وحاط اهلي ابيت وما اجي لهنا ابات راح ترتاحين مراح عقلج يصورلج افكار وتبقين الليل كله تبجين .. تكليلي اطلع خليني ارتاح واني اعرف ما راح ترتاحين.
- لا اطلع خليني اكرهك اكثر واشمئز منك ومن جسارتك
- ما راح اطلع وما اعوفج واعيد واكرر ما اعوف المشتريني واشتري البايعني اني مو غشيم .
- لانك حقير واستغلالي ...
اخذت ابني وطلعت .. ماما كاعدة جوا كالت : ابوج ترا صاف وياه مو وياج ابوج مو سند اخابره يدز حرس يطلعوه من البيت يكولي شنو اتطلعي من بيته من يمتى صار بيته هالحافي
- كافي امي الله يخليج دودو بعد ميتحمل صياح
- وقبلتي يبقى وهو خاينج ومتزوج غيرج وغصبا ما اليج تقبلين وميطلك وضاربج بعرض الحايط
- ماما كافي احلفج بروح جيهان كااافي اني تعبت .
تركتها ومشيت للمطبخ ..
صحت على منال اجتي كلتلها : طلعيلي قوطية الشوربة مال دودو وسويلياها
طلعتها وضافت كم مكيالة باودر .. شوربة خاصة للاطفال تحتوي على كل الفيتامينات اللي جسم الطفل يحتاجها وخفيفة على معدته متسببله نفخة او مغص ..
خلتها بمي واني اكوله : شوف شوف دود شنو سوتلك خالة .. عميه عمية لبطونة حبيبي
دخل عباس .. عيون الطفل راحت عليه وكام يذب نفسه يريد ابوه .. مد ايده عباس وهو يكله : يا بويه يابويه .. حبيب ابوه جوعان ..
اخذه من ايدي .. تركتهم وسحبت الكرسي كلش تعبت من هالجو .. دنكت وخليت اديه على راسي وافرك بشعري
حجه : بيج گمل افليلج ؟
ضحكت منال باوعت بخزرة الها : كملي اكل الطفل وروحي ارتاحي .. وانت جيب الطفل ولتحجي حجي زايد .
دخلت امي كلتلها : ارجوج امي ممنوع منعا باتا اي نقاش او صياح كدام الطفل ممستعدة اخسر ابني بسببكم .. روحوا بعيد عني واتمالخو لحالكم
جر كرسي هو وهو يكلي : من يمج انطيني مي
باوعتله بتعجب وبقرف .. انداريت عنه وندست منال : انطيني الشوربة وروحي جيبلي الكرسي مال دودو
باوعت لماما طلعت مي من الثلاجة .. شربت وكالتله : الما عنده احساس شلون يصير بعد ؟
عباس : مثل الحاط روحه بنص اثنين متزوجين .
- المتزوجة هذه بنتي ما اخلي مهتلف يستغلها
فيان : عود دا تتعاركون بهدوء يعني ؟
جابت الكرسي : بردي الشوربة خوطيها
كعدت دودو وسحبت الخرخاشة احطها بايده وتوكع .. اريده يلزمها .. ميلزمها
حجيت ويا منال : ما اعرف الطفل متضايق لو بي شي ؟
- ست مو طبيعي عمره ٨ اشهر ليكعد ليلزم الحاجة عدل مرات يكدر مرات ميعرف الطفل لازم تراجعين عليه احسه مو طبيعي
حجه عباس : لتكبروها الطفل ما بيه شي متضايق
حجت منال : بس البعمره يكعد وحتى يزحف هو بعده كوا يكلب من ينام .
حجه : لا عادي ابني الجان مثله سنة يلا زحف .. وسنة ونص يلا مشى .
يحجي وكامله : حبيبي بابا شبيك .
حجت امي : وييي مكافي علينا فگور انوب علينا امراض .
- مرض بگلبج افتهمتي لو لا
نترت : انت تدعي على اميييي شنووو وخر مناااااا
عافنا ومشى للثلاجة وامي تكوله : عديم مستحى واخلاق
- كافي ماما شلون يعني ترا والله تعبت تعبتووووني
اخذ مي من الثلاجة واني انداريت اخذ بالخاشوكة حتى اخلي بحك ادو .. ومتضايقة فوك ما الطفل تعبان هم كلهم فوك راسي : منال روحي حضريلي مميته ٤ ارقام لتكثرين بس حتى ينام
شرب مي عباس وامي كاعدة تشمر كلام .. مشت منال طلعت من المطبخ .. سد البطل واني احط بحلك دودو .. دنك باسه بخده وتقرب بنفس الوقت باسني اجت البوسة بشفتي .. وخرت راسي بسرعة
حجت امي : فالح بهالسوالف الطايح حطها تغسل بعقلها بيهن .. يا جايف
حجتها وكامت من عدنا .. هو كعد مقابيلي بمكانها ومبتسم بخبث ويباوع وراها : مكافي
- ما اعرف احجي لنفسج ما كافي مخلية امج ويانا وصالثتنا يعني حتى لو عدنا نية نتصافى ما جاي تخلينا
- ومنو كالك اني رايدة اتصافى
- وليش متتصافين يا حبيبتي واني شعني غيرج وغير هالحلو هذا شو عايف الدنيا ومكابلكم شتريدون اسوي بعد ترا والله اركض ومحد راضي امي ما راضية جيف عايفها ومكابلج وانت ما راضية جيف مكعد اهلي
قاطعته - لتتمسكن عباس انت كلش زين اني ليش ما راضية
- والله وحق هو الامام علي عليه وعلى عافيتي لو متقربلها لو واصلها والعباس علمود الجهال
- اليوم على مود الحهال باجر تكول مرتي ومن حقي
- لو كلتها ذاك الوكت حاسبيني هسه شعندي وياها وكاعدتلي وهاجرتني ودايرة عني
- لا يا حبيبي ما راح انتظر لذاك الوقت من البداية لو اني لو هي
- اروح فدوة لكلمة حبيبي التطلع من شفايفج العسل انت طبعا .. تشوفيني مختار غيرج
- اي
- والله ما اختاريت والقران ما اختاريت امي مريضة ولان عفتها وهي مريضة علمودج رادت ارجع غيد وجهالي ..
- يعني رادت تكسرني واني وافقت
- اتفقت ويا غيد كلت الها اني متزوج والي حياتي واذا اريد اوجعج فارجعج لخاطر امي والجهال لا تعتبريني رجلج ولا تحجين وياي بحقوق هي كالتلي اني من زمان معتبرتك ميت كتلها رحمة الله والديج .. راحت امي وعلياء وخابرني عمي عفكقدت عليها وخذوها وراحو بدوني للكوت اني رجعت بيومها لهنا مرحت وياهم وعيونج .
- شوكت هالحجي
- قبل ٧ اشهر تقريباً
- ٧ اشهر ومستغفلني شكد رخيصة عندك لعد
- ما عاش اليرخصج بس لو اجيت وحجيتلج عليج العباس ترضين ؟
- لا طبعا
- شفتي ؟ لهذا اني فضيت الموضوع بدون ما اكلج ادري ما راح ترضين وحتى لو رضيتي راح تكومين يرمية مألفتلج قصة من خيالج وتتخيلين اني وياها واني وياها منتهين
- شنو الجابرك تبقيها
- كرامتها المرة رجعتها مرة ولخاطرج رجعت طلكتها بدون ذنب وهسه هم اطلكها هي لا واصلتني ولا اني واصلها خو بنت الناس هم مو لعبة عندي وهي ام اولادي مو حلوة كدام ولدي يوميه هاين امهم علمود مرت ابوهم .. هم بعد يومين يكبرون ويكلولي ليش هيج سويت بامنا ماما بيش اذتك .. اني مبقيها لامي وجهالي وهي راضية
- تفكر بكرامتها واني كرامتي مو مهمة
- شلون مو مهمة لعد شكاعد اسوي هنا مو كاعد مقابيلج وجاي اترجاج واتوسل بيج انت ليش كله تاخذين دور المظلومة
- لانك ظالم من البداية اني وياك اتفقت من لما جنا بالامارات طلبت منك مترجعها وانت كلت احنا خلصانين بس غدرتني
- والعباس خلصانين والحسين ما بيناتنا شي
- عندي قاعدة اليحلف هواية كذاب فمدا اصدكك لتحاول .
حجيتها وشلت ابني وكمت غسلتله ورحت بدلتله وصعدت حتى انام .. دخل الغرفة ونام ورايا
- عباس لتجبرني
- منو يمج ؟
- محابة وجودك يمي الله يخليك اتركني
- اعذريني ما اقبل
- تمام
كمت من مكاني لزمني : اتذكر كتلج حجاية كبل من نزعل لا تخلين سالفتنا وزعلنا يطلع خارج اطار جربايتنا نزعل واحنا بداخلها لحد ما الله يهدينا لبعضنا
- ابقى بيها وحدك عسى ولعل يهديك عني
تركته واخذت ابني .. دخلت غرفة امي : ها
- دا اريد انام هنا
- عفية هي اريدج تعوفي مثل الجلب بالغرفة لا ترخصين نفسج الرخيص محد يريده والغالي كلها تتمناه ابقي اتغلي ترا بس ترخصين نفسج لا تستغربين يجيب مرته وجهاله ويحطهم كبالج وهم غصبا عليج تقبلين هذا فد واحد انتهازي واستغلالي لتخلي ياكل بعقلج حلاوة .
نومت ابني يمها ع السرير كالت : يمه هلا ويمه .. يمه شكد احبه يمممممه ..
خذته بحضنها واني اتمددت يمها وادو بيناتنا .. حجت لتفكرين بيه خيولي ميسوى ..
- احس تعبانة كلش محتاجك اروح لهولير اشتم هوى نقي اعيش بهدوء كلش تعبت من الضوضاء والحياة الصاخبة ببغداد
- اخذي ابنج وروحي ارتاحي كم يوم وتعالي
- هو هم هيج يصير الصبح وابلغ بابا يشوفلي احد من الحرس لانو طيران مدا يصير بدون موافقة الاب .
- ابوج يدبرها بالمطار بس بلغي
- ما اعرف
- دنامي امي حبيبتي لتفكرين
بقيت اتكلب منا ومنا وغمضت عيوني هروب من الواقع مو نوم .. حسيت ماما كامت من مكانها وطلعت .. فتحت عيني باوعت اخذت نفس وانداريت انام ..
مكدرت انام ..
كمت من مكاني رحت للمطبخ اريد اسويلي كوفي .. حطيت الدلة ع النار .. وحسيت البيت بيه هوى .. مشيت دار اريد اشوف باب الصالة اذا مفتوح .. نزلت ماما من فوك بس استغربتني وهي تكول : هاي شنو كاعدة
صفنت بيها !
لابسة روب حرير فوك ركبتها بشبر .. وحالة شعرها .. كلتلها : وين جنتي
- بالسطح طلعت اشوف النجوم اختنكت
- ومبردتي بهيج ملابس
- لا الجو حلو
- واني اكول الهوى منين وباب الصالة مقفول عفتي باب السطح مفتوح
- لا يمكن سديته ما ادري
- اصعد اشوفه
- لا سويلي وياج كهوة اذا سويتي اني حروح اقفله .
- تمام
سويت فنجانين .. واجتي كعدت يمي بالمطبخ كلتلها : دا ابرد واني اشوفج لابسة هيج متبردين
- يووووه شجلبتي يمعودة مرتاحة .. اكلج هذا حتخلي يبقى هنا !؟
- منو
- منو يعني ولو اكولج افضلج بقي هنا بس لترحين يمه عوفي مثل الجلب فوك وخليه يتمناج .. ترا بس تسامحي وتعديله وتضعفين بعد يومين يخليها كبالج وهم كل يوم تعالي تنازلي شوية لحد ميركب فوك راسج بقي هيج هم حارمته من ذيج الحية وامه البربوك وهم مخليته كبال عينج .
اشرب وما اجاوبها .. حجت : احجي ويا روحي !؟
- ماما تعبت من سيرته الله يخليج عوفيني منه .
كمت جبت الماك بوك كعدت اشتغل عليه ماما راحت نامت واني بقيت طلعت الشمس واني كاعدة اشتغل .. طلعت منال : صباح الخير ست
- صباح النور بيش الساعة
حجيتها وسحبت التليفون .. ب٧ وربع
- تتريكين
- لا لا دا اريد انام اذا تحبين جهزي الريوك ورجعي نامي
- اتأمريني امر بس ست رايدة اجازة
- شكد
- والله امي مريضة ومحتاجتني وياها
- تمام الله يشافيها بس شكد محتاجة
- يومين تلاثة بكيفج
- اختج مو يمها
- بس كلت اعاون اختي خطية متدري اتصير للبيت لو لامي .
- تمام مو مشكلة اخذي راحتج
- يصير اسوي الريوك واروح ؟
باوعتلها : اوكي .. على راحتج
فرحت وكامت تسوي الريوك اني بعدني اشتغل شوية ونزل عباس مبدل وريحة العطر الحاطة قوية كال :صباح الخير
مجاوبته هي ردت و حطت كدامه الريوك
حجيت : جيبلي جنطتي اللي بغرفتي فوك
- صار
ركضت جابتها واجت طلعت العندي بجيزداني ٢٠٠ حجيت : هذه انطيه لامج
- مصار اسبوع من اخذت راتبي دا تخجليني ست
- مو الج مصرف لامج وسليميلي عليها
رادت تبوس راسي كلتلها : تسلمين روحي بدلي حتى الاخ يوصلج لاقرب مكان بطريقه
هي ركضت وهو عقد حاجبة اثناء مدا ياكل : الاخ !!! هو احنا صرنا اخوان .
- ليكون بعلمك حتى متكول بعدين باكت ابني وتسويلنا فد سالفة مثل سالفة البارحة وادخل ابني بازمة راح اطلع لهولير كم يوم نريح اني وابني
- مو مشكلة اخذكم
- احنا محتاجين نرتاح منك تجي ويانا !؟
- نرتاح سوا
- ما على الرسول الا البلاغ
حجيت ودك تليفونه ما رد عليه .. وجاوب : الو
ها علياء شكو .. شبيها
باوعتله : يلا يلا مسافة الطريق واني يمكم
كام من مكانه بسرعة وطلع يركض لسيارته طلعها وراح مفهمت شكو .. وليهمني افهم .
كمت من مكاني رحت نمت ..
مكعدت غير المغرب ابني بقى ويا ماما كعدت سالتها عن عباس كالت : ماكو من الصبح مموجود .
- امه احتمال شالوها للمستشفىً
- كلشي ميصير بيها هالحية ام راسين
- الله يكومها بالسلامة لتدعين ع الناس
- وانت اشفتي خير منها حتى تدعيلها
- مريضة يعني خوما ادعي عليها
- انت نويتي تسامحي
- لا
- وشنو قرارج
- ولا شي
- هيج تبقون ؟
- اكيد هو حيسوي حل
- وليش يسوي حل وانت صامة حلكج وساكتة
- وشنو تريديني اسوي اكولك اطلك ارجع اسأل نفسي ليش لان مرجع مرته اني البارحة سمعت بجيها وصياحها وهو يطلب منها تجي تحجي ويايا تقنعني هي رفضت اني محابة ادخل بخطيتها مهما يكن هي تبقى امرأة مثلي ..
-سامحتي
- ولا كدرت .. ممتقبلها وجودها ولا اريد ادخل بخطيتها وبنفس الوقت مرايدة ابعد ابني من ابوه ..
- ولا رايدة تبتعدين عنه
- بلي رايدك بس بعد على قدر مو ابتعاد كامل
- تضحكين على نفسج ماما ؟
- تنكرين هو يحبني
- وليش وين يلكى مثلج حتى ميحبها شبيج بنتي هو لو ما انت مباوعتله يطول يلكى مثلج تباوعه حان لهسه حافي منتف هو واهله يستحدي الفلس والفلسين حتى يعيش
-اني عشت وياه بالكوت محان رايد مني شي جان يشتغل كلشي في سبيل نهاية اليوم يجيب فلوس يخليهن بيدي مفد يوم حاسبني لو كالي شكد يمج هو يكلي انطيني مصرف وقتها مجان مفكر يستغلني جان رايد نعيش بهدوء بعيد عن اهلي واهله بس امه اللي متقبل تتركه .
- رجعتي تبرريله
- هذا زواج مو عقد عمل واني بشخطة قلم بيناتنا طفل وحياة وزاد وملح
- يعني رايدة تسامحي
- هي هنا المشكلة كلبي بعده شايل عليه ومطايقته ٧ اشهر مرجعها واني نا ادري يكول ما متقربلها منو يضمن ومنو يضمنلي بالمستقبل ما يتقربلها
- لا يضمن شنو شي اكيد غير مرته ام جهاله عيني .
- وهنا ارجع لنقطة الصفر ولهالسبب مدا الكي قرار .
- اي عاشت ايدج ابقي راوحي .. وهو مستفاد براسج .
خابرت بابا كتله : اريد اطلع لهولير
- انت وامج
- لا وحدي اني وادو
- طيران لو بر الطفل ميتحمل هيج طريق ساعات
- لا ينام عادي على كد الممه
- اني باجر الصبح طالع شنو رأيج نطلع سوا منها اقضي الطريق ويا حفيدي
- تمام بابا
حضرت جنطة من الليل .. عباس رجع متأخر تعبان واضح على وجهه متأذي ... كعد بالصالة تمدد .. حجت ماما : متكوم تنام بغرفتك ليش هنا
- كلش تعبان
- متعشي
- لا والله كلشي مماكل
كامت سوتله عشى وخلت كباله استغربت موقفها ..
كلتلها : ليش دا تسويله اكل ؟
- على مودج مو احسن ميروح لذيج تسويله وتجرجره .
- مو انت اللي اتكليلي خلي مثل الجلب مدا افتهمج ؟
- هذه يسموها عين وخد شوية تكسرين راسه وشوية تجبرية حتى يبقى مجلب بذيالج مو تريدي دا اسوي على مودج اعرفج غبية لو عافج حرام هنا تكومين تترعوصين وحالتج النفسية وانهيار وييييوه بعد منخلص .
مشت من يمي هو حاط راسه ع القنفة ، حجيت : حيجي بابا نروح وياه
باوعلي : لاربيل
- اي
ما جاوبني .. ردت اسأله عن امه بس شفت زايدة مني فتركته ومشيت .. رحت بدلت كملت .. اجا بابا سلم ودخل ..
عباس كامله استقبله كاله : كالولي امك مريضة شوضعها
- اي والله كلش تعيانة هسه احا اخوي بقى يمها واني رجعت لان كلش تعبت
- سلامتها اذا محتاج شي اخذ ولا تتردد
- ممنون منك على راسي لا والله محتاجين دعاؤكم السرطان منتشر بجسمها وكلش حالتها تعبانة
- تكوم بحيل الله .. اني راح اخذ بنتي وحفيدي كم يوم ويايا لهولير عندي شغل هناك .
نزلت بابا كام واخذ ادو من ايدي عباس كامله واخذه منه باسه وحضنه وكال : جان اني اخذتهم بس امي طلعتلي صفح
بابا : سهلة ان شاءالله تكوم بالسلامة وتجيهم ..
طلع محفظته اخذ فلوس خلاها بجنطيتي : ديري بالج ع الطفل لو ماخذة منال وياج انت وحدج اتدبرين الجاهل ؟
ارتاحي ويمتى ما ارتاحيتي خابريني وطمنيني عليج .
مجاوبته تركته ومشيت ويا بابا وهو ورايا .. ماما طلعت : ها حترحون ؟
- اي
حجه بابا : ليش متبدلين وتروحين وياها
- لا يا عيني مبيه دوخة طريق
- طيارة
- ويييه انوب طيارة لا اريد ارتاح
- راح ترجعين لبيتج
- لا ارجع لبيتي ليش اسد الباب واكعد
باوع بابا : تبقين بس انت وعباس بالبيت ؟
- واكله ياكلني قابل
حجه عباس : اني فد شوية وارجع للمستشفى ما اكدر اترك امي هناك ومحمد ما اثق بيه بس يتعب يعوفهم ويرجع .
- اي زين خلي جهازك قريب منك اذا خابرتك بالمطار رد واحجي ويا الضابط خوش علمود الطفل .
- ان شاءالله عمي .
صعدت بالسيارة وهو لازم الباب فوت راسه باسني بخدي وخرت راسي وهو يكلي : ديري بالج على نفسج وع الطفل
هزيت راسي سد الباب عليه وطلعت السيارة من الكراج
وهو وراها يلوحلي جر الباب ووكف بالباب وماما لازمة طرف الباب وتباوعلنا وتلوح بيدها لادو بيد بابا .
اخذتي بابا للمطار من مطار بغداد لاربيل نزلنا وجه الفجر تقريبا جانت سيارة منتظرتنا اباب المطار رحنا بيها لبيت بابا ..
شمرنا نفسنا اني وابني مثل الموتى لا هو كعد ولا اني لحد العصر .. اجا بابا فتح البردة وكاله : جدوووو كافي اشتاقيلتك اكعد خل يشوفوك يلاعبوك تعال
ادو كعد وكام يناغي لابويه شاله ويشمر بيه للهوى ويضاحكه حجه : بيت عمج هنا باباتي اذا تحبين نزلي سلمي عليهم
- ارجوك بابا مأجيت لهنانه حتى اشوف احد واكعد اجامله واتحمله
- على راحتج بنتي .. كومي غسلي حتى تبدلين لابنج خطية
- اوكي
كمت للحمام غسلت وطلعت اخذت ملابس ادو وحاجياته ونزلت عمي كاعد واقاربنا كلت : سڵاو
ومشيت اخذت ابني وطلعت للغرفة بدلتله ووكلته بسكت ثادرته بعصرة برتقالة .. وكعدت اوكل بيه
لهنا اجا بابا كال : عمامج ديكولون حركة الطفل مو طبيعية
-ليش
-ما اعرف خوفوني والله بابا ناخذه هسه للعيادة
-هسه !
-ما عدنا شي خليني اطمن عليه بنتي من كالتلي بالله كأنما طلقة بكلبي خاف يطلع بيه شي لج بنتي خلي نروح نتطمن ما عدنا شي
-اوكي
اخذت ويبس ومسحتله وجهه ولبسته قوي لانو بهولير بالليل كلش كلش باردة .. وكمت بدلت اخذنا بابا لمستشفى خاصة بالاطفال .. دخله على طبيب مختص
كان يضحك الدكتور وياي بابا ويسلم بمجرد ما بابا كاله : جايبلك حفيدي هذا دا اريدك تشوفه
ويحجي وياه بالكردي .. الدكتور بضحكه باوعله فجأة راحت الضحكة
كاله : هذا حفيدك
-اي والله
لزم الطفل باوعله فحص ركبته حلكه كال : دائما يطلع السانه
-اي واكثر شي من يضحك ويلعب
كام يفحص جسمه ويحاول يوكفه ويثبته : يكلب يكعد يلزم اشياء
-بصعوبة يلزم وتثبت بيده بس ميكعد
حجه بابا : بيه شي دكتور ؟
-كفخص اولي ما اكذب عليك الوضع ميطمن ، عندج خلفية عن حالته الطبية من ولادته للان
حجه بابا : ببطنها كالولنا مشوه بس الحمدلله رب العالمين صحته ووضعه زين
-لا مو زين للأسف اني ما اريد اخوفكم بس ملامحه تشير الى انو هو عنده علامات من المتلازمة داون خروج السانة قصر رقبته تأخره بالنمو كل ذوله مؤشرات قوية بس يبقى التأكيد لفحص تحليل كروموسومات
-شلون هذا التحليل
-بسيط بعينة دم بسيطة نطلع على الصفات الوراثية ونعرف اذا اكو خلل جيني لو لا .. بس يتأخر الفحص
-شكد ؟
-ايام ويمكن استبيع لحد ما نتأكد من النتيجة
كتبله فحص وكاله تاخذه للمختبر
بابا حتى نسى يشكر الدكتور لو يسلم عليه اني قلبي انقبض وبابا صار وجهه اصفر.
رحنا سوينا التحليل عيوني دمعت
خابرت على عباس .. مجاوبني
خابرت اكثر من مرة مجاوب
شكد كرهته لامه واهله يركض واني اخابره ميفتح عليه خط ولا اباله .
خابرت على ماما كلت الها : عباس موجود ؟
- لا مموجود ليش ؟
- اخابر عليه مدا يجاوبني ابد ماما ابني كلش مو بخير
- اسم الله ماما حبيبتي شبيه ابني ؟
- دا يكوللنا الدكتور عنده متلازمة داون ماما كلش خايفة
- دخيلك ربي مو كالوا سليم ومبي شي
- ما اعرف ما اعرف ودا اخابره لهالحقير مدا يجاوبني ماما اني كلش خايفة على ابني
دا احجي ويا ماما اتصل عباس
رديت : انت حقير اهم شي عندك امك واهلك واني وابني لو نموت متهتم الله ياخذك ان شاءالله
- شبيييج ليش تبجين صاير شي
- اخابرك وانت مترد متكول ليش تختبرني يمك صار وياها لو ويا الطفل شي انت متفكرررررر
- وج جنت بالحمام شنو ما افكر
- يا حمام بالله !؟
- حمام شنو يا حمام
- انت يم غيد موووو ؟ معولت اطلع من البيت حتى تركضلها مووو الله ياخذك ان شاءلله
- اكلج شو اكلي نعل اكلها بالحمام تكلي يم غيد اني بالبيت
- لتجذب ماما خابرتها هسه اهااااا وكالتلي انت مموجوووود
- هي كالتلج هيج !
اصبري
صاح : خاااااالة
احا صوت ماما من جوا : خلخالة يولي شنوووو خالة احترم نفسك وضحكت .
كالي : سمعتي ؟
توقفت للحظة شديصير ماما ليش دا تكذب عليه !.... يتبع
_______
#زينب_ماجد
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق