رواية على حافة الثأر الفصل التاسع وعشرون 29بقلم زينب ماجد حصريه
رواية على حافة الثأر الفصل التاسع وعشرون 29بقلم زينب ماجد حصريه
على حافة الثأر
( بقلم زينب ماجد )
الحلقة_29
حجيت : بس هي كالتلي انت مموجود ليش دا تكولي هيج ؟
-اتسالينيي اني روحي اسألي امج البربوك
- انت ليش تتجاوز يا اخي انتقي كلماتك ما اسمحلك تغلط على ماما لانو ماما مسوت وياك اللي سوته امك بيه
- والله تروح فدوة لامي
- انت دا تحاول تستفزني
- هسه عوفي الحجي الماصخ هذا وكليلي شصاير شبيك گابة
- ادو مو زين
حجيتها وخفت صوتي
هو هبط بسرعة كال : شنو مو زين ولج
بجيت حجه : لا تبجين شنو زين احجي
- ع الاكثر عنده متلازمة داون
- لا ما عنده بابا الطفل شكله طبيعي مو مال منغولي
- الدكتور ديكول ميبين بوجه الطفل من يكبر تبين ملامحه بس ديكول كل المؤشرات دا تشير عنده بس يبقى الفحص نتأكد
- يا مؤشرات لحظة فيان اني راسي اشتعل شنو شكاللكم احجيلي ابني شبيه
- ديكول قصر الرقبة عنده وتأخر النمو وحتى اللسانه اللي ديطلعة حبيبي كل ذولة مؤشرات
- انت وين هسه ؟
- باربيل
- لا حول ولا قوة الا بالله .
دا يحجي اجا بابا كال : فيان بابا خابرت صديقي
شافني ابجي
قطع كلامه : لا تبجين بابا كولي يا الله هسه اني خابرت صديقي كال نوديه للمختبر الوصفليته كلش ممتاز وعالمي وتحاليله دقيقة وممكن يتساهل النا ويسرع النا بالنتيجة متطول
- وهم ياخذون منه بعد دم ! ؟
- اي غير حتى نتطمن على صحته يابابا خوما نتركه هيج
- بابا حاسة ابني مو بخير
- لا تكولين هيج بنتي اذكري الله كلشي بيده وكلشي منه نعمة
كمت ابجي وعباس ع الخط .. اخذت التليفون كتله : لازم اروح باي .
قفلت الخط منه ردنا نروح للمختبر .. جانت الساعة ١٠ وقفل كال باجر العصر تعالوا
فرجعنا للبيت .. عباس مخابرني ابد بعد
بقيت الليل كله حاطة ابني كبالي وابجي ودموعي تجري معقولة ابني يعيش مشوه ومو طبيعي !
بقيت حاطته كبالي ع الجرباية نايم وغاط بنومته واني لامة رجلية وحاطة ايدي على خدي وكاعدة اتفرجله وابجي
دك تليفوني .. باوعته عباس
رديت. :الو
- كاعدة
- شرايد ؟
- افتحيلي الباب اني جوا
فزيت من مكاني رحت للشباك بسرعة باوعت من فوك صدك صاف بسيارته بالباب .. نزلت ركض فتحت الباب الداخلي وطلعت فتحت الباب الخارجي ..
- ليش اجيت
جان عاقد حواجبه : تحاسبيني انت شنو ليش اجيت
حجاها وفات .. فتت وراه : محد مأذينا اني وابنك كدك
- كافي تاكلين خر!
- لا تغلط يا روح منريد جيتك روح اطلع
احجيها وابجي
لزم اديه : ترا تعبان وروح روحي طافرة بالعباس اكضج اهفج بالحايط وانعل والد والديج عوفيني ترا واصلة وياي لهامتي
دفعني حيل : سوقي وحقير وبيئة الله لا ينطيك .
دخل للبيت سديت البا وراه ومشيت كباله صعدت الدرج لحكني .. دخلت الغرفة دخل شمر سويجة ومحفظته وغراضه على صفحة وهو يباوع لادو نايم بنص السرير
تقرب للجرباية كعد ودنكله باسه وكام يشتم بيه وبكصته
كعدت على طارف السرير وتجيت ظهري ع التاج واني اباوعه ..
كام يمسح على شعره يباوع بوجه فجأة كمت اشوف الدموع من عيونة كامن ينزلن بحرار ع الفراش يمسح بيهن وهو منتحي على ايد وحدة ومتمدد يباوع لابنه .
- شوكت يطلع التحليل
- حتسويله تحليل لاخ صديق بابا كال ادق واسرع
- شوكت
- اليوم العصر
- معناها نامي اذا كعد وانت سهرانة وتعبانة منو راح يداريه
- مدا يجيني نوم
كام من مكانه وهو يكلي: تمددي وغمضي عيونج وانت تنامين .. حجاها وهو ينزع قميصه ويصطلع يغسل .. دخل نزع بنطرونه بقى بالشورت والكيمونة جر مخدة وكسرها وانتجى يباوعله .
كعدت اباوعلهم اثنينهم عيونه حيل حمر الضاهر جان جايب الطريق بچي .. كام يغفي ودخل بنومته بسرعة .. باوعت هو وابنه اثنينهم فاتحين حلكهم وهم نايمين نفس النومة اخذت نفس واني اباوعهم كدامي ..
يمكن مرت ساعة اني بس صافنة بيهم
الجو بيه برودة واني مغطية ادو ببطانية مال طفل عباس كام يحاول يتغطى ويا ادو ببطانيته عرفته برد ..
كمت من مكاني جبت ديباج حرير وغطيته سحبه بسرعة وكمل نومته .. اضطريت اخذ المخدة واخلي بالعرض ع الجرباية واتمدد مثلهم .. بقيت صافنة بيهم وموجات موجات من الافكار تاخذني وتودني ..
الصبح ادو كعد بس اني وعباس منايمين فباقي يناغي ويصيح وحده واحنا كل واحد بينا منطي ظهره
بابا سامع صوت ادو عباله اني نايمة وحدي فاجا فتح الباب بلا ميدكه وفتح الضوا وهو يصيح : هلا بصوتك جد .. انصدم بعباس نايم يمنا وعباس فز بسرعة واستحى لان نايم بشورت وفانيله
بابا بسرعة اعتذر ورجع سد الباب
عباس ندهني : فيان فيان
- ها
- دكومي ابوج عيب طبلنا ميدري اني هنا
- وشسوي
- كومي الطفل يريد حليب
- كوم سويله حليب انت راسي حيل يوجعني
- اني وين اعرف شوي حتى حفاضته مليانة دكومي
كمت راسي كلش مأذيني شلت ادو واخذتله ملابس ورحت غسلتله باجي جانت موجودة اجا بابا كال: عباس شوكت اجا
- الفجر
- خطية حقه الضنا عزيز يا بابا ..
اندار لباجي كاللها : اخذي الطفل من عدها مبينة نعسانة روحي نامي بابا احنا نعتني بيه
- اي والله كلش نعسانة
- دروحي باباتي حتى تكعدين ناخذه للمختبر روحي
عفته يمهم وصعدت عباس راحع على نومته البالعرض ندهته : عباس كوم نام بالعدلة والله تكسرت من هالنوم دكوم
وهو نايم كام يسحل بروحه حتى يعدل روحه خربط الفراش كله هزيت ايدي وكمت اسحب بالغطا من جوا وانام على طرف الجرباية صفح
هستوني غفيت حسيته يتسحب ويدنى يمي وينام على مخدتي ويدخل ايده جوا راسي وايده الثانية شبكها على خصري ويتچي راسه على كتفي ..
تركته بهالحالة ورجعت لنومتي ..
ما اعرف شكد مر .. حسيت تليفون ديدوك فتحت عيني هو نايم على ظهره واني مرجعة ظهري ومتجيه على صدرك وشعري متبدي عليه
شلت راسي باوعته نايم
كمت من مكاني اريد اشوف التليفون اليدك وين مكانه
كمت من مكاني اتبع الصوت ..
حاط غراضك ع الزاوية .. اخذت التليفون رقم مكتوب عليه ( ام فيان ) جاوبت بسرعة .. حجت امي : الووووو
- ها ماما
فزت : فيان!
- اي
- عباس يمج
- بلي
- وينه لعد
- هياته نايم
- شنو تصالحتوا ؟
- لا
- لعد شمنومه يمج باربيل
- على مود ادو اجا الفجر وصل
- يا مو هذا واحد صديقه دك الباب عباله موجود فردت اكوله
- منو صديقه
- احمد شبيج
- يا احمد ؟
- كليله وهو يعرف عوفيني هسه من ادو اشون صار
- نفسه ما بيه شي يعاني بس هي اعراض تكول عنده تشوه
- لتخافين بنتي ان شاءالله ماكو شي
- ان شاءللله
- عود طمنيني عليه مو تنسين
- ان شاءالله
قفلته من عدها .. بالاشعارات مكالمة فائته من ( ام مصطفى ) اخذت التليفون وندهته : افتحلي التليفون
شال راسه : نفس الرمز ما مغيرة
- طبعا متغيرة حاط تليفون ثاني تخابر بيه اكيد جبت ثاني مو
- صحيح
احجي واني احاول بالرمز من كالها باوعتله : شكلت ؟
مط جسمه : فيان تعبان وراسي يوجعني عوفينا من هالسوالف هسه الجاهل وين ؟
- حلو من تلكالك حجة تسوف بيها المواضيع .
كام من مكانه وهو عاقج وجهه دورت بتليفونه ماكو محادثة بينه وبين غيد .. اكيد ميخابرها هنا اني حتى ذاك التليفون ولا اخذت رمزه ولا فتحته .
تركت تليفونه ونزلت لابني باجي كالت : مسوية اشون دولمة بيضة تاكلين اصابيعج بعدها
-ممشتهية نفسي مسدودة
-زين صبلي لزوجج خاف ينزل يتغدا
-ينزل هو ويصب لروحه
-عيب هو ضيف ما يصير المرة تقلل من زوجها كدام اي احد
-باجي اني حايرة بمصيبتي ما اكعد احير بيه
-لا هذا مو كلام كل وتحد عنده مصيبه ميحترم ناسه ميصير
تركتها واخذت ابني بدلت اله ونزلت لكيت عباس كاعد بالصالة وحده وصافن صبيتلا غدا صينية وردت اخليها كدامه ماكو طبلة خليتها ع التخم يمه باوعلي : رحم الله والديج
رحت جبتلا طبلة صغيرة وحطيتها كدامه كال : مشكورة
وحطيت ابني يم باجي ورحت بدلت .. اجيت لكيته مماكل من الاكل شي .. باجي حجت وياه كاللها : والله يا خالة مالي نفس من ورا هالجاهل هذا وامي مناك .. روحي طالعة بالحسين .
ديحجي باوعلي لابسة بلوزة قصيرة لحد كمر البنطرون والبنطرون جينز ضيق .. حجه : ملابسج غيريها
باوعت : شبيهم !؟
- غيريهم
- كلشي ما بيهم حتى البلوزة اردان وبنطرون طويل
- تسمعين لو طرشة
- ليش دا تتجاوز ؟
صاح بصوت عالي : فوتي غيرييييييييهن اعلي بعد لو سمعتي
طلع بابا كال : خير شديصير يمعودين
حجت باجي : على ملابسها يكولها غيريهم
باوعلي : شبيها ملابسها
- بعدج واكفة !؟ شمنتظرة ابوج يكلج ابقي بيهن !؟
مناقشته بعد صعدت بدلت ببلوزة طويلة .. نزلت ما باوعلي ولا حجه بس عاقد حواجبه ووجه عصبي
طلعنا على اساس بسيارة بابا ياخذنا السايق بس صعدنا ويا عباس وبابا بسيارته
صف بالكراج ونزلنا هو اخذ مني الطفل شاله عاد تركت العربانة مالته منزلتها .. مشينا سووله التحليل واتفقوا ١٠ ايام ويطلع ..
عباس جان متوتر كلش وخايف
يحاجي ابو التحليل يكله : يعني تكول زين لو مو زين
ابو المختبر يحجي عربي مكسر كاله : اني ما يعرف يطلع نعرف
هز ايده عباس : هسه هذا شلون اثق بيه يفتهم وهو حجي ما يعرف يحجي
اتنرفزت كتله : اذا ميعرف لغتك مو معناها ميفتهم عايف الفهم الك ولربعك.
-نصي صوتج لا ابتلي بيج
-اكولك انت دا تدورلك حجة
-نرجع لمي الغراض حتى نرجع ما نبقى اليوم هنا امي مناك
-انت ارجع اني اريد ابقى
-لا كافي صارلج يومين ارجعي البيت مناك فارغ
-اكولك شعليك انت اني دا ارتاح منك اجيت لحكتني لهنا تنرفزني وتقهرني بسوالفك
لزم بايدي قوي :منو الشعليه .. منوووو
ويخزر
وكف بابا : ها سويتو
وهو خازني نزل ايده ووخر من بنرزفه وهو يكله اي وينفض اديه ، حجه ابويه : انتم شبيكم اليوم
-ماكو شي بس لازم نرجع لبغداد
-بغداد شنو غير تنتظرون التحليل
-لا يابه عشرة ايام يلا يطلع التحليل
- اي اركها هنا ترتاح هي وابنها تكمل التحلييل وترجع
- لا لا نروح
حجيت : اني ما اريد
- ديلا استعجلي لا الوقت يتأخر
- انت شبيك اليوم شنو جاي متحامي
مجاوبني شال الطفل ومشى بيه حجيت : جيب الطفل انت وين رايح
حجه ابويه : عباس اصبر هم جايين ويايا
- وراح يرجعون وياي عمي
- ما يرجعون اني من ارجع ارجعهم سوا
- انت اخذ راحتك عمي لا تشغل فكرك بيهم
- ما تاخذها اوكف
- مع السلامة عمي
خزرني وعافني يم ابويه واخذ الطفل ومشى ابويه راد يمشي وهو يكول : الضاهر هذا اخذ عين زايدة
مشى ابويه واني مشيت ورا بابا بهمة ..
وكفه يم السيارة كام يحجي ابويه : انطي الطفل لامه !
- يعني قصدك مالي كلمة عليها !؟
- لا مالك كلمة عليها بحضوري
- زين ما طول وصلت هيج عمي اني اعوف الحجي للكبار يتفاهمون وياك ..
-دا تهددني انتتتتتتت
-لا حشى بس اني ما اكدر اتطاول عليك انت عمي واضل اني اصغر منك والك مني كل الاحترام بس الي يمكم حك عمامي يحاجونك بيه ان شاءالله .
لزم سيارته ومشى وبابا انطاني الطفل : زين من ورطتينا ويا هيج ملة لج انت شجابج ع العرب وتتزوجين منهم ذولة عدهم المرة تطيع وتسكت لا الها رأي ولا الها حق تناقش وتجادل غبيييية
- بابا اني تعبت منه كلش فوك غلطه هو صاحب الحق ومحسسني اني المو زينة واني العنيدة اكوله طلق ميطلقها ولا يطلقني اكوله اتركني ميترك بس يأمر ويتأمر مدا اعرف بأي طريقة اتفاهم وياه .
- امشي خلي نرجع للبيت
رجعت اني وبابا للبيت بس جانت نفسيتي صفر من صدك اريد افتهم شعنده اجا وشعنده راح اجا بس حتى ينرفزني ويضايقني حتى من اريد ارتاح منه وابتعد مدا يخليني لا وهو اليصيح ويخبص الدنيا ومعاجبه ..
كلش تعبني أسلوبه وهمجيته
كعدت اوكل ابني الاعبه وعيوني مدمعة عليه كلش تعبانة نفسيا .. ومن كلشي حواليا
ثاني يوم العشر عم عباس خابر على ابويه كاله : باجر احنا جايينكم ورايدين نحجي وياكم .
ابويه كله : كل الهلا بس اني ممتواجد ببغداد بس اجي بعيني احطكم
- سالمة عينك الله يحفظك ما طولك ما تكدر تحي لبغداد معناتها دزلنا وليدنا الزلمة ابنه مريض وباله يمه يريد يداوي ياخذه
- الطفل وامه يمي باربيل
- هو راضي بروحتها لاربيل يا خوية !؟ شلون ترضاها وانت خوش زلمة وطيب
- هم بيناتهم مشاكل وهي اجت لبيتها هنا
- المشاكل بيناتهم الجاهل ماله غرض بينهم .. دزلنا الجاهل بعد اخوك وهي خليها على راحتها يمتى ما تريد تجي بكيفها عدك ومالنا راي عليها
-بس الطفل مريض ويرضع ويحتاج امه
- جا مريض غير نداوي ولا تخاف الحليب شكثره ضال بالاسواق والحبايب هواي يصيرن امهاته .. انه باجر امرلكم خلهم يجهزون الجاهل لبوه .. يلا اودعناك .
سده بوجه ابويه
اجا بابا متخبل حجالي : خل يولون لا ارجع ولا اطيهم ابني
- ويهدون على مكتبي مثل ذيج المرة واختزي كدام اصدقائنا ومعارفنا ونصير على كل السان
- شلون كولي يعني ما ارتاح منه مدا يخليني اتنفس كتله ارتاح منك يومين يدز عمامه يحاربني بالطفل شنو من بشر
ش بعد هذا الجنيتيه لنفسج ياما حجينا وحذرنا لا فاد حجي ولا فاد شي .
اخذت التليفون خابرته مرة واثنين وتلاثة مجاوبني
كتبتله جريدة شطولها شعرضها حجي وعتاب ورزايل لا شافها ولا فتح الرسالة
ثاني يوم من الصبح اني وابويه توجهنا لبغداد .. دخلت البيت ماما مموجودة .. شمرت جنطتي وكعدت بلا تبديل وحدي متضايقة وروحي طالعة ..
رحت ارتاح زدت فوك همي اجبال من الهم
خابرت ماما كالت : يم صديقتي اخلص واجيج
خابرت على منال تجي وانتظرتها لحد مجتي انطيتها الطفل ورحت لغرفتي بدلت وكعدت لوحدي .. شوية وجابتلياه نايم نومته بسريره وطلعت ..
للعصر اجوي اثنين من عمام عباس وهو وياهم ..
استقبلهم بابا وصاحلي .. نزلت سلمت عليهم وكعدت .. قدمت الهم منال حاي كام عباس اخذه منها وانطى لابوه وعمامه وحط كدامه رغم حاسبتني وبقى استكانين بس محط الصينية كبالي ..
يشربون جاي ويسولفون ويا بابا بسوالف بعيدة عن الموضوع عن الشغل والوضع ود١عش .. قاطعتهم : العفو اني اجيت لانو كالولي عندكم موضوع ويايا اذا موضوعكم يخص الامن ود١عش فاكوم واخذوا راحتكم
حسيتهم تفشلوا لان قطعت سالفتهم عمه اندار لعباس وكاله : شني من مرة هاي التكطع سالفة زلم .
صفنت يربي شنو من بشر ..
شنو زلم شنو نسوان هم شايفين نفسهم احسن واعلى يعني حتى مستصغريني وواحدهم ما احطه موظف عندي مو يكعد كبالي يحجي ويصستصغرني شنو من مرة بس لزمت اعصابي وبقيت منظرة يحجون
كال : احنا جايين نشوف مطالبج عمي شنهو التريدينه نريد نسمعج
تنهدت واني اعدل ظهري بملل : مطالبي كلتها وهو يعرفها
- ميخالف ما بيها شي لو حجيتها واحنا وابوج نعرف خاطر نسعى نصاح المايل بيكم
- يا يطلكني يا يطلكها
- ذيج مرته ام جهاله وانت مرته ام ابنه وعزيزة عليه وغالية وما يكدر يطلكج والرجال رايدج
- كلامي واضح
- انت بويه ليش تحاجين الناس من كفى خشمج ترا بس الله الحبير بنيتي حطي رجليج بالكاع كلنا تاليتنا شبر واربع اصابع .
- انت سألتني شنو اللي تريدي واني جاوبتك
- وانا كتلج الزلمة ما يريد يطلك
- اذن مفهمت سبب جيتك لهنا شنو حتى تقنعني اتنازل عن حقي
- لا مو حقج زلممممممة وحك.... قاطعته
- ارجوك استاذ لا تكعد تكولي زلمة وما زلمه مثل ما هو رجل بشري من دم ولحم واله حق اني كذلك والي حق وحقي عليه من اول ما اتزوجنا اتفقت وياه ميرجعها .. وهو خلف بوعده
حجه عباس : اني ما خلفت والمرة اني هاجرها لا جاي يمها ولا داري عنها
- هذا مو مبرر اني ما اقبل اكون زوجة على ذمة رجل متزوج بأمرأة اخرى ..
- ما طول هيج بويه وما ترضين يعني رايدة الطلاك !؟
- اذا ما طلكها نعم
- لا والله حتى لو راد اعبيس يطلك انا ما ارضى فوك ما هاجر مرته ام جهاله وذابها هالذبة هاي وانت مكعدج هنا ومكابلج وشتريدين يكلج على امرج ومراعيج ومداريج شنهو التردينه بويه تركبينه وادندلين رجليج اعلى اجتفاه ما عدنا زلمة تركبه مرة والمرة تبيعة رجلها ترضى ترضى ما ترضى بعد بكيفها احنا ما نجبرها تطينا وليدنا بويه .. وتطينا اغريضاته ويا دار ما دخلج شر
حجه بابا : هذا الكلام ما يجوز الطفل رضيع ويحتاج امه
- ويحتاج ابوه وامه ما راضية اضل شلون بويه ابنه يعوف ابنه
حجيت : ابني ما انطي ورجعة ما ارجع وياه اذا هو ما طلك ..
- حجيج هاذ نكعي بويه واشربي ميه تكولين اصيرن مرة حوك واصبر وي رجلي واصونه واداري واستر على بيتي نكلج اي وبارك الله بيج تكولين لا والله وتعلين اخشيمج وتكولين ما ارجع وما اطي ابني غلطانة .. وليدنا وباسمنا وماكو واحد يمنعنا ناخذه .
- قانونيا من حقي
ضحك : ناخذه وذيج هي المحكمة وروحيلها ولو جان الشرطي ودك بابنا وتعدانه هم وراه عمام ونكاومه .. اوليدنا ما نطي عاد انت وقانونج تفهموا بيناتكم
وها خل يكون بعلمج
لو حاولتي تشردين وتاخذين الجاهل ابوج هو المسؤل كدامنا .. نتجازه وياه
كام ابويه يحجي وهم يصيحون بشكل عالي بحيث صوت ابويه اختفى بنص اصواتهم .. بابا بحكم عمله اكثر كلامه بالفصيح ويخلط كلمات كردي فدا يكولهم : تدخلكم هذا غير مقبول كون هم بالغين وبامكانهم يحلون مشاكلهم بنفسهم اني وانت غير معنيين بحل مشاكلهم
عمه كام يعيب على ابويه شلون يحاجي بالفصيح ويقلد بحلكه : غير معنيين هي مالت فصحى خوية غير معنييين شني تحرمون زلمه من فريخه م صايره هااااي بويه .
اني تعبت نفسياً كلش كمت وبنص الكعدة كلت : - عفوا منكم ابويه لحظة احجي وياك اخيييي
سكتوا وهم يريدون يسمعولي كلت الهم : هذا بيت مقتدر مو سوق ابدا ولا هو كراج حتى تتكلمون بيه بهالطريق الغير مهذبة .. اذا خلصتوا كلمكم البيت يتعذركم ونعتذر منكم .. ياريت تتفضلون .
اني حجيت هالشكل لو هم تخبلوا كاموا يصيحون ( ااااخ خاب مرة تطردنا بووووويه) ويا فزتهم فز عباس وهو يدفعني: اتطردين عمامي ووووووولج
بسرعة ضربني راشدي كدامهم
وابويه تخبل كام يتعارك وياهم .. الحرس بسرعة اتدخلوا .. وكاموا يصيرون بين ابويه وعباس وعمامه .
تركتهم وفتت جوا شوية ودخل ابويه مشتاط : انت شلون هيج اطرديهم وهم ضيوف
-اي ضيوف مشفتهم اشون اشون يهينون بالكلام ويعيبون يا غريب كون اديب وهم كل ادب ما عدهم
- هذا اختيارج اللي ياما حذرناح منه .. معرفتي عشايرهم وعاداتهم فوك القانون وفوك المناصب اني شريد اواجه عشيرة عندي جيش اني كوليلي اروح اشتهر على ابو كاكا دلشاد كذا صار ويا ويشمت بيه الغريب والقريب .. انت ليش متفكرين بيه مو هذا اللي اتهزمتي مني حتى تتزوجيييي مو هذا اللي عفتينا كله حتى تااااااخذي
شنو كان ابالج الزواج خمس كلمات حب وفراش وجربااااااية مفكرتي اذا صار عندج اطفال منه شلون تتعلكين بيه شنو مصير اولادج ويا هيييج ناس كل هذا مفكرتي بيه هسه تعال بابا خلصني اريد اتطلك وما اريد انطي ابنيييي
- مرايد تدخل اني اعرف شلون احل امري وياهم والله لا اندمهم
- ندمي العندج بالبداية وبعدين كدريلهم لج بابا ذولة ناس ميشبهونا لا من ثوبنا ولا من ملتنا .. هذا لو شوان مكان كسرتلج راسه وراس اهله ومحد كدر يفك حلكه وياج .. عشر سنوات انت تهينين بيهم واتطردين بيهم محد منهم حاول يتعرضلج لو يغصبج لو يأذيج عشر سنوات وهو محترم ارادتج شسويتييييي بدلتي بواحد ما يعرف معنى الاحترااااام شايفة مرة تطيع وتسكت مالها اي كلمة عليييه هذا اختياااارج .
كعدت ع التخم حطيت ايدي على راسي وكمت ابجي .. نزلت منال ابني بيدها اخذته منها وحضنته ابجي ..
كتله : هسه اشووون ؟
- اني ما اعرف ليش كل هذا التدخل بين اثنين متزوجين الصوج من عباس من هو ميعرف يتفاهم وياج يجيب عمامه يتفاهمون .. شنو الطريقة والحل وياهم مدا نعرف .
كعد حابر خابر على صديقه مقرب عربي .. كاله : لا تشيل هم اني اجيب عمامي ونطب طبابين خير ..ويصير خير .
ثاني يوم بابا عزمهم ببيته وخابروا على عم عباس .. وراحوا حولوا يمهم وطبوا طبابين خير .. وابويه كان رايد الطلاق حتى يخلص من هالملة كال اللهم الاتفاق نريده بس ع الطفل الطفل ما دامه صغير فيبقى عند امه عود لما تريد تتزوج من حقه يطالب بيها .. وسمعنا هو عنده اولاد من زوجته الكان مطلقها عايف اولاده عند امهم .. وهذا اللي يصير تجيبون الشيخ وتجون تطلقون المرة .
اجا بابا كال حلينا الموضوع ..
حددنا يوم الطلاق والطفل راح يبقى عندج ويا دار مدخلح شر هاي كافي عليج ابنج خل يولي خلي اهله يفيدوه
من حجالي ما اعرف شي بداخلي انعصر بس ما جنت حابة اعارض هلكد ما تعبت .. كل الاريده تنتهي المشاكل وبس مدا افكر بشي اخر مرض ابني وخيانة عباس كانوا مثل الضربتين ع الراس .. مدا ابلع ولا اسامح ولا اكدر اعدي واسوي نفسي ما دريت مدا اكدر عزت نفسي مدا اتقبل الوضوع نهائي .
ماما جانت كلش فرحانة بالقرار
وكالت احسنلج وتخلصين وهذا مو ثوبج وهذا مو مستواج وانت وانت وبقت تعدلي وتصفطلي الكلام المعتاد .
اخذت ابني وانسحبت بغرفتي ..
يومين اني مطلعت ولا عديت باب غرفتي ياخذون ابني شوية ويرجعولياه ..
صح اني تعبت بس شي بداخلي حيل مكسور
جنت كلش متعشمة بيه وجان يكولي مستحيل ابيع المشتريني واشتري البايعني تالي يطلكني حتى ليطلك غيد ! هلكد اني رخيصة !
جانت ماما تكولي .. وتحذرني منه بس اني كلبي غشيم ومصدكة .. عشت خيبة امل كلش جبيرة بداخلي
انكسرت جدا وانهاريت ..
اجا يوم الطلاق وكانوا الأهل متفقين .. على ان الساعة ٣ يجيبون الشيخ او نروح للشيخ ونتطلق .
صعدتلي ماما كالت : ها شلونها المعنويات كلها ازمة يومين وتعدي بعدها تكونين حرة لا عباس ولا قيوده ولا اقبل ما اقبل تعيشين حرة يولي ..
شفتي من حنت اكولج مستغلج متصدكيني لح ماما حان ماخذة راس مال بعد ما رتب اموره ودوزن حاله شمرج ومباوعلج اصلا .. رجع مرته وكعد اهله وعمرلهم بيت واخذلهم بيت وسجله باسمه بجالج بعد شيسوي بيج خلصت فايدتج
لج اني واحد يضربني كدام الناس ويهيني واسكت .. لج غير اطلكه على القندرة والله مو ابجيله دمعه على شنو متضايقة اصلا فرصة ناخذلنا فترة نسافر بيها اني وياج لتركيا ونتونس .
- كومي كومي غسلي بسرعة يلا ..
كامت اني دفنت راسي بالمخدة عيوني جمر العبرة خانكتني خنك اريدلي حجة حتى انفجر وابجي واطلع كل البداخلي ..
متكعورك بفراشي ودافنة وجهي بالمخدة ومغطية راسي بالغطا اتمنى اختفي اتمنى اموت ولا اعيش هالشعور مدا اكدر اتحمل .. احس كل دقيقة تمر تاخذ مني ومن صحتي وحيلي ..
انفتح الباب عبالي امي رجعت .. مغمضة عيوني حيل واعصر بكلبي الم .. انسد الباب وانقفل ! .. بقت اذني متنبهه صوت سويج و مفاتيح وغراض انحطت ع الميز ..
عقدت حاجبي
حسيت احد كعد ع الجرباية وصار يتسحب وادنه يمي .. حط راسه على راسي تجمدت بمكاني .. من راسي لجعب رجلي كلها كبت احساس وتنمل .. همس بأذني : طلكتها
رفعت راسي وجريت البطانية بسرعة عباس كدامي .. حجه : من گتلج انت اغلى شي عندي بهالدنيا ما اجذب ما عندي شي اغلى منج ومن ادو انتو كلشي بالنسبة اليه اني بلياكم ما اكدر اعيش ما اكدر انتم راحتي ما اكدر اطلكج لاي سبب كان لانو ماكو سبب بهالدنيا يخليني اعوفك ولا عندي شي بالدنيا اهم منج ومن ابنا
يحجيها وهو يباوع بوجهي ويبعد بخصلات شعري بدون تردد فزيت واخذته بأثنين ادية وهنا صارتلي حجة حتى انفجر وابجي بحضنه من كل كلبي ..... يتبع
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق