رواية ذكرياتنا في رمضان الفصل الثامن 8 بقلم سلسبيل احمد حصريه
رواية ذكرياتنا في رمضان الفصل الثامن 8 بقلم سلسبيل احمد حصريه
عز: بعد يومين فيه واحد صاحبي نازل مصر ومعاه ابنه.. هما من كلامي عن ليان كتير طلب مني يجوا البيت.. والولاد تتعرف على بعض.. ايه رأيكم؟
" حسيت ان فيه جردل مياه ساقعه ادلق على وشي "
كوثر: يجوا كا زيارة يعني ولا ده كده عريس
متقدم لـ ليان؟
عز: أكيد مش مجرد زياره يعني.. عاوزين الولاد يشوفوا بعض.. ايه رأيك يا ماما.. وانت يا مراد
مراد: البركه في وجود حضرتك ياعمي أكيد.. وطالما شايفهم كويسين يبقوا يجوا.
فاطمه: ينورو يابني.
" مكنتش مصدقه وحاسه اني بحلم.. ده مش حلم ده كابوس يعني! "
ليان: هو انا ليه محدش بياخد رأيي!
عز: حببتي ده مجرد تعارف انتى عندك مانع؟
" عيني راحت تلقائي على مراد.. الى رد فعله صدمني حقيقي احنا مفيش حاجه بينا.. بس معرفش انا ليه مش مصدقه الى بيحصل ده.. ! "
اتنهدت وانا بأكد على كلامه: لا طبعا.. مراد معاه حق.. طالما حضرتك شايفهم كويسين يبقي نقابلهم.
مراد: طيب بعد اذنكم هنزل..
" هو نزل وانا خرجت البلاكونه شوية ولقيت ندى جت وقفت قدامي "
- انا معرفش هو بيعمل كده ليه.. بس انا كنت حاسه انه بيحبك..
بصتلها: عشان احنا مجرد اخوات يا ندى.. وانا قولتلك كده ميت مره..
= يعني انتي برضو مش بتحبيه؟
جاوبت بدون تفكير: لاء مش بحبه!
قعدت قدامي بزهق: طب هتعملي ايه مع العريس
- عادي هنقعد يمكن يطلع كويس
>>>>>>>>>>>>>>>>>>>>>>>>>>>>>>>>>>>
' اللهم صلِ وسلم وبارك على سيدنا محمد '
"اللهم إن كانت هذه ليلة القدر، فاجعل نصيبنا فيها أوفر النصيب من الخير والبركة"
|| بعد مرور يومين | الساعه 11 الضهر ||
" محصلش احداث كتير اليومين الى فاتو.. بخلاف ان ليان مش بتتكلم مع مراد خالص.. وهو كان مضغوط ومش بيتكلم مع حد اصلا.. "
" كان تحت العربية و شغال تصليح.. وبعدين حس بحد دخل الورشة.. ولأنه متوقع مين فا كمل شغله بدون ما يدي اي اهتمام.."
- مراد..
" مراد وقف شغل ومكنش عارف يعمل ايه.. طلع من تحت العربية وحتي مبصش ناحيته.. "
= انا مش عايز اشوف خلقتك تاني يا كريم
- والله العظيم دي كانت اول مره.. وانا.. انا مكنتش بشرب انت عارف!!
= لا معرفش.. ومش عايز اعرف..
" مراد لف وبصله بعدين خبط على كتفه وهو بيتكلم "
= امشي بدماغك يانجم واعمل الى انت عايزة
" نهي كلامه وهو بيشاور على راسه و كريم كان واقف مش بيتحرك.. "
- انت قولتلي قبل كده لما اغلط اجيلك!
مراد قرب منه واتكلم بهدوء مرعب: و هو انت جيت لي؟ انت عبرتني؟ عملت حسابي؟ طب بلاش انا يا معلم عملت حساب امك؟ ولا هربت زي الـ.......
" سكت و وطي راسه فالأرض فا مراد مسك راسه ورفعها بعصبيه "
- لا بصلي و رد عليا مش عاملي فيها دكر ؟؟ استرجل كده ورد عليا سمعني
"عينه دمعت و رجع وطي راسه تاني"
= انا غلطان.. بس متسبنيش انت اخويا..
وانا مليش غيرك
" مراد سكت وساب له الورشة وخرج.. "
>>>>>>>>>>>>>>>>>>>>>>>>>>>>>>>>>>>
' سبحان الله وبحمده سبحان الله العظيم '
" فضل ماشي لآخر الشارع.. لقي عم جابر فا شد كرسي وقعد جنبه "
- تلعب طاوله
= والله انا مش فايق يعم جابر معلش
- خلاص غور من جمبي جاي تقعد معايا ليه
مراد ضحك بقلة حيلة: يلا هي جت عليك
- خد هنا ياواد انت فيه ايه امك ضربتك؟
= امي ضربتني ايه بس..
- استحمل انت مش راجل
= مانا مستحمل اهو.. الحمدلله
- انا سمعت انك ضربت الواد كريم.. انا صحيح مش بحبه وعلطول مصدعني.. بس هو بيحبك ضربته ليه
" مراد اتنهد وبصله "
- لما يبقي عندك ابن او اخ بتحبه.. بقلمي سلسبيل احمد وعاوزة يبقي كويس وفجأة تلاقيه ماشي في سكه مش شبهو ولا تنفعه سكه هتجيب اجله.. هتعمل ايه ساعتها
= هرجعه غصب عنه
- وبعد لما ترجعه؟ هو خان ثقتك.. وضحك عليك
= يتربي من اول وجديد
- مانا كنت بربيه
= مش كده
- امال ازاي
= حسسه بغلطته وساعده من غير قسوه..
لو كررها وقتها يبقي فيه تصرف تاني
- هو يعم جابر لسه هستني لو كررها!
= مش هيكررها.. اسمع مني
- ماشي الى تشوفه..
>>>>>>>>>>>>>>>>>>>>>>>>>>>>>>>>>>>
' لا إله إلا انت سبحانك اني كنت من الظالمين '
|| بداخل إحدى الجامعات ||
" كانت ندى قاعده بملل بتفكر في احمد.. "
- ندى..
= خير يا سلمى
- فيه واحد قمر بره بيسأل عليكي
بصتلها بدهشه: ايه ده! مين
= مش عارفه..
- الدكتوره شوية وهتدخل وبعدين انا مش بتكلم مع حد وانتى عارفه.. متقفيش مع حد تاني انتي كمان..
" وفعلا كملوا المحاضرة.. وبعدين خرجت مع صاحبتها.. علشان تتصدم بـ احمد واقف جمب عربيته "
سلمي: هو ده الى كان بيسأل عليكي
ندى: طب وسعى اوعى
" ندى راحت عنده وهي مش مستوعبه "
- انت بتعمل ايه هنا !
= جاي اشوفك
" فتحت عينيها بتعجب "
- انت مجنون؟
= اه
" فضلت واقفة مش مستوعبه وقبل ما تمشي وقف قدامها "
- استني! عايز اتكلم معاكي
= ومراد عارف بحاجه زي دي؟
نفخ بضيق: ممكن نتكلم الأول وبعدين نعرف مراد الى انتى عاوزاه! اركبي العربية...
" فضلت واقفة بصاله بتردد "
- اركبي ياندي مش هحْطفك
" ركبت وبعدين هو ركب ومكانتش مرتاحه للي بيحصل.. لكنها عايزه تعرف عاوز ايه! "
- انت عرفت ازاي انا فين
= مهارات خاصة
- انا مش بحب الهزار
= عرفت وخلاص.. المهم اني عرفت اقابلك
- وبعدين؟ عاوز تتكلم عن ايه بقا
= عنك.. انتى عارفه ان من واحنا صغيرين.. كنا يعني قريبين لبعض صح؟
بصتله بتوتر: كنا صغيرين بقا
- وانا كنت بحبك
" مكنتش عارفه ارد كنت حاسه اني اتجمدت! هو ليه رماها فجأة كده في وشي "
= احمد هو انت عايز ايه!
- عايز ناخد فرصة.. ونعرف بعض.. انا لسه عندي مشاعر ليكى.. وبالرغم اني كنت بعيد بس عمري ما نسيتك.. بقلمي سلسبيل احمد عشان انتى مختلفة عن اي بنت عرفتها.. انا عايز اكلم مراد واقوله.. بس عايز اعرف رأيك انتى الأول.. انتي لسه شيفاني زي زمان؟ ولا في حياتك حد تانى
= مش عارفه معرفش!
فتح عينه بدهشه: في حياتك يعني ولا لاء!
- مفيش!
= طيب يعني انتى نسيتي كل المواقف الى كانت بينا واحنا صغيرين
- اه مش فاكره.. ومش عارفه ده مش وقته ولا ده مكان مناسب
- طب فكري وقوليلي.. انا هستني ردك
= انا لازم انزل.. ومتكررش الحركه تاني..
والا هقول لمراد
احمد ابتسم: كنتي قولتي له عن الفانوس
بصتله: انت رخم وبارد..!
" ضحك وهي نزلت وسابته و احمد فضل باصص عليها.. "
- شكلك كده القمور وقعك
= بس يا سلمي ده صاحب مراد.. وجارنا
- ومالو ومالو.. بس انا خت بالي واحد صاحبنا تاني كان متابع الموقف
= مين؟
- أدهم عمران.. انتي عارفه انه معجب بيكى.
= معجب مع نفسه انا اصلا مركزه في دراستي وقولتها له بدل المره ميه!!
>>>>>>>>>>>>>>>>>>>>>>>>>>>>>>>>>>
' اللهم إنك عفو تحب العفو فاعفُ عنى '
|| في البيت عند ليان | على السطح ||
" كنت واقفة افكر حاسه اني عايزه ارمي نفسي من كتر التفكير.. مش عارفه استوعب لو احنا فعلا مجرد اخوات ليه علطول كنت بحس بغيرته لو حد قرب لي.. بيدج الفيس بوك بتاعتي سلسبيل احمد
كمان موقف مينا وقد ايه كان مضايق هل دي فعلا كانت مجرد معامله اخوات عاديه وانا فهمت غلط؟ ولو طلعت كده.. يبقي انا كمان هبطل احبه؟ مش قادره افهم ليه حبيته.. وليه متعلقة بيه.. طول سنين الكلية محدش عرف يلفت نظري.. كنت بشوف كل الولاد عاديه! مش معجبه بيهم حتي كلهم بالنسبالي عادي! الا مراد.. "
- ليان؟
" لفيت وبصيت بستغراب لما لاقيته "
= ايه!
- بتعملي ايه هنا؟
= مفيش.. عادى.. انا نازله اصلا
" اتحركت وهو سكت فا لفيت بغيظ "
- انت الى بتعمل ايه هنا؟
= الدش بتاع تيته باظ طالع اظبطه
- اه... طب وعملت ايه مع كريم..؟
= ولا حاجه
- تمام..
بصتله وابتسمت بالعافية: متنساش بقا بكره معاد العريس انت عارف انك اخويا وكده.. لازم تشوفه و تقولي رأيك
= حاضر عنيا انزلي بقا يحببتي قبل ما يجيلك ضربة شمس ومتعرفيش تقابليه
" كنت حاسه اني عايزه امسك طوبة من الى مرمين على الأرض واديه بيها في دماغه اعجنه !!! "
" بس نزلت وسيبته وانا بفكر استفزه ازاي انا كمان
علشان هو شغال حرق في دمي! "
>>>>>>>>>>>>>>>>>>>>>>>>>>>>>>>>>>>
' الله اكبر الحمدلله استغفر الله لا إله إلا الله '
"اللهم إني أسألك حسن الصيام وحسن الختام، ولا تجعلنا من الخاسرين في رمضان، واجعلنا ممن تدركهم الرحمة والمغفرة والعتق من النار".
|| وقت الفطار | عند فاطمه ||
كنزي: هو مش ده اكل امبارح برضو
فاطمه: ماله يا ست كنزي غيرك مش لاقي
ندى ضحكت: اصل فيه وليمه هتتعمل بكره فا خلينا فى الخفيف انهارده
فاطمه: طبعا امال شكلنا يبقي ايه قدام الناس
نورا: دايما عامر يا ماما..
ليان: انا بفكر نعمل حلويات برضو.. لو هنلحق
كوثر: متقلقيش دي عليا انا
ليان ابتسمت: حببتي يا كوكي بس خليني اساعدك برضو واعمل كيكه مثلا
" ليان ابتسمت.. و مراد كان بيشرب وحط الكوباية وهو بيسمع بهدوء "
ندى ضحكت: كيكه فانيليا مثلا؟
ليان: اه انتوا عارفين اني بعملها حلو.. وممكن نزود كيكه شوكولاته برضو اصل مش كل الناس بتحب الفانيليا..
كنزي: انا بحبها.. و مراد برضو
" مراد ابتسم وهو بيحاول ميبقاش مضايق "
عز: اهم حاجه بس لو مرتحتيش ياحببتي متبينيش..
نورا: اه اكيد مش هنحرج الناس يعني
ليان: حاضر يا بابا فاهمه..
>>>>>>>>>>>>>>>>>>>>>>>>>>>>>>>>>>>
" بعت على الجروب بتاعنا للبنات وطلعنا اتجمعنا في البيت عندي و كنت بتكلم معاهم عن موضوع العريس "
هاجر بدهشه: انتي بتهزري طب ومراد
فريده: ايوه!!! ومراد؟
بصتلهم بستغراب: هو مين قال اني مع مراد اصلا
مريم: من وانتوا صغيرين وكلنا عارفين!! انتي نسيتي لما مينا اخويا جابلكم فوانيس اخر مره وقاله متعملهاش تاني
ندي ضحكت: قولولها يجماعه
ليان: يقولوا ايه؟ كفايه الى هو قاله! هو يعتبر بيقولي يلا اتجوزي
هاجر: غريبة اوي يابنات؟
فريده: بصراحه اه.. الرجاله كلها توكسيك اولهم اخويا
ندي كحت وبصتلها: ايه.. اشمعنا؟
فريده: طول عمره بتاع بنات ولعبي!
" ليان بصت لندى.. وندي مكانتش لسه حكت لها عن موضوع الكلية وانه راح لها! "
هاجر: طيب هتوافقي؟
ليان: لو طلع كويس ليه لا
فريده: اممم انتوا هتفضلوا تعاندوا قصاد بعض!
ليان: مش عناد ولا حاجه.. جماعه احنا حقيقي زي الاخوات..
مريم: يمكن.
>>>>>>>>>>>>>>>>>>>>>>>>>>>>>>>>>>
"اللهم ارزقنا عملًا صالحًا يُقرّبنا إلى رحمتك، ولسانًا ذاكرًا شاكرًا لنعمتك".
|| في ورشة مراد ||
" كان واقف بيشرب كوباية شاي قبل ما ياسين يقاطعه هو واحمد "
- ايه ياباشا
مراد فهمه وحط الكوباية: ملكش دعوة بالحوار نهائي اديني عرفتك اهو
احمد: حوار ايه؟
ياسين: اصبر عشان فايتك كتير..
بص لمراد: بص يا مراد.. انت عارف انه عيل وغلط بلاش جحود بقا وبراحه عليه..
مراد بصله: وهو راح يعيط لك؟
ياسين: يعم لا.. بس انت مقفلها معاه
مراد: عشان يستاهل.. واعمل حسابك بليل هنروح لعم فتحي وننهي الحوار ده وهخليه يديني كلمه ان العيال دي ملهاش دعوة بينا ولا بحد يخصنا
احمد: ما تفهموني يجماعه
"ياسين فضل يحكي له"
احمد بصله: ده كان يوم لما خرجنا وبعدين فركشتو الخروجه طب هو ليه محدش قالي يرجالة اجي معاكم؟
ياسين: احنا قولنا انت متعرفش الدنيا لسه وكده فا بلاش ندخلك حورات
"احمد سكت حاول ميبينش زعله انهم علطول سوا من غيره في اي حاجه بيدج الفيس بوك بتاعتي Slsbell Ahmed .."
احمد: ماشي يسطا..
" و شوية و مراد لقي مينا داخل ومعاه كريم "
مينا: السلام عليكم يرجالة
"مراد بصلهم وسكت"
مينا بتمثيل الجديه: ما ترد السلام بتاع ربنا يعم !!
مراد: انا عندي شغل يرجالة ممكن تمشوا؟
مينا: صلي على النبي بس كده واركن الشغل دلوقتي
احمد ضحك: عليه الصلاة والسلام..
مينا: انا جاي انجز الحوار ده دلوقتي كفاية كده قولنا ميت مره لا يحل للمسلم ان يهجر اخاه فوق ثلاث
احمد: جماعه هو مينا اسلم وانا مسافر؟
ياسين: لا هو كده
مينا: اطلع بره ياض منك لي
" وفعلا خرج ياسين واحمد "
مينا: ممكن تتكلموا بقا..؟ كريم محقوق لك يعم.. بس اسمع الى عنده انا عندي مشوار وخارج.. ارجع الاقيكم في حضن بعض ولو محصلش هنادي عم جابر يرزعكم عكازين.. امين؟
" مينا خرج و مراد مكنش باصص ناحيته.. "
كريم اتكلم بهزار: يعني انت قولت لي الصبح براحتك.. معناها لو شربت تاني مش هتيجي تصْربني وتبهدلني.. انا حتي وشي لسه الكدمه معلمه فيه.. ايدك تقيله يسطا..
مراد بصله: جرب يا كريم.. والمره الجاية هعجزك خالص
كريم: حقك ياعم لو كررتها حقك
- انت عارف اني مش بيضحك عليا بكلمتين.. انت مستوعب يلا الى عملته؟؟؟ في اول رمضان ؟؟ انت فاهم ان ده مش شيطان؟؟ دي دماغك وانت الى اخترت؟ اديني سبب واحد خلاك تعمل كده؟
كريم اتنهد وبصله: انت علطول بتقولي الغلط ملهوش مبرر.. عشان كده معنديش كلام اقوله ادافع بيه عني نفسي.. انا غلطت الأول قالو لي اشرب سجاير وعود نفسك على الدحْـ ـان.. وبعدها خلوني اجرب معاهم حاجات تانيه.. وانا كنت خايف ارجع لحسن تعرف.. معرفش ازاي شدوني معاهم... بس برضو انت كنت صح.. الصاحب ساحب.. ومينفعش اصاحب عيال شمال.. وانا فاكر انهم مش هيأثرو عليا
مراد مسح على وشه وبصله بقلة حيله لما لقاه ندمان: انت عارف اني عمري ما بمد ايدي على اي حد
- عارف.. بس انا الى استاهل
رفع وشه ناحيته وبصله: طب ايه ايدي تقيلة اوي؟
- اوي يسطا.. انا مفروض مكنتش احس وحسيت
مراد بحده: تستاهل! وبعدين متمثلش اصلا ملحقتش اعملك حاجه لحقوك من إيدي
كريم ضحك: انت عارف انك خربشت مينا؟
مراد: مقاليش.. منك لله
ضحك تاني وبعدين بصله: مش زعلان مني خلاص؟
- لا زعلان وهفضل مش طايقك لحد ما اشوفك اتغيرت بجد من نفسك..
= هرجع ثقتك فيا.. و بديك كلمه.. وانا مش برجع في كلمتي.. اخويا علمني كده
- اضحك عليا ياولا حلو صايع!
كريم حضنه وباس على دماغه: متزعلش بقا.. هنفتح الورشة سوا صح؟
مراد: سبني افكر..
" ضحكوا الاتنين و مراد صْربه بهزار.. "
" مراد يومها طلع البيت مرتاح نوعا ما.. بس لما افتكر موضوع ليان والعريس والكيكه اتعكنن تاني. "
>>>>>>>>>>>>>>>>>>>>>>>>>>>>>>>>>>
"اللهم إنك حسبي ووكيلي وقوتي وضعفي، اللهم إنك أنت جابر كسرى وأنت من يطيب جرحي، لا
تجعل حاجتي بيد أحد من خلقك"
|| تاني يوم الصبح ||
" اليوم كان مليان توتر بشكل واضح.. ليان كانت اكتر واحده بيطلبوا منها متعملش حاجه.. وبس تهتم بنفسها ودي كانت حاجه مخليها عايزه تصوت! "
كوثر: ما كنتي سبيني انا اعمل الكيكه
ليان: انتم مش مخليني اعمل حاجه خالص سبوني بقا يا كوكي
" وفعلا عملت الكيكه و كنت حريصه مراد يعرف اني عملتها.. فضلت مستنيا وانا مش طايقه اشوف العريس بصراحه.! "
" لحد لما وصلوا!! شوفته بصراحه كان باين كويس!! الفطار وقتها كان في بيتنا عشان عندنا اوضة سفرة تكفي الكل.. "
" قعدنا قبل الفطار بساعه كلنا واتعرفنا يعتبر على بعض كلنا كان معاه والده بس..! "
" كان باين انه ذوق.. و طويل و شعره ناعم.. مكنتش لايقه حاجه اتريق عليها مع البنات بعد لما يمشي! "
" المغرب اذن وبدأنا ناكل وانا معرفتش اكل من حفلة التوتر الى كانت في معدتي "
" وفجاة والدة بدء يكلمني "
- بس واضح بابا بيحبك اوي يا ليان
ابتسمت: حبيبي.. انا كمان بحبه اوي
عز: بس بقا علشان انا متجوز..
" ضحكنا كلنا وبعدين اتوجهلي تاني سؤال من العريس.. عمر.. "
- واضح إنك مدخلتيش اي علاقة قبل كده
" مكنتش عارفه ايه السؤال ده ولا ارد اقول ايه علشان اتفاجى بمراد بيرد عليه "
- لا خالص.. اصلنا لسه ملقناش حد يستاهل..
" وفجأة سمعنا صوت صرصور الحقل والكل سكت "
يتبع..
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق