سكريبت حدث في الأكاديمية كامله
سكريبت حدث في الأكاديمية كامله
° اه يعني انتي جاية تقنعيني اقنع باباكي تدخلي الجيش؟؟
_ أكاديمية
° هتفرق؟ مهي اكاديمية حربية!
_ بالله عليكي يا ليلي ساعديني ، مش كفاية عاوزين يجوزوني جوازة مش عوزاها! ، اهو اعمل الحاجة الوحيدة الي عاوزة اعملها قبل ما اتجوز
° مش هيوافق بسهولة أبداً
اتنهدت وسكتت ، كان معاها حق يمكن مستحيل بابا يوافق! ، بس دا حلمي بقالي سنتين بقنع فيهم كلكم في البيت ، لكن ؟ العيلة كلها مش موافقة ، ازاي؟ انتي عاوزة تسترجلي؟ ، ازاي عاوزة تعملي كده الحاجات دي للرجالة ، طب والمجتمع الي احنا فيه ؟ ، كده مش هيجيلك عرسان وهيطفشوا من طريقتك الناشفة ، كل دا كان كلام بيتقال لكن تأثيره كان بيجي ب العكس ، رغبتي كانت بتزيد اكتر! ، جمعت طول السنتين دول كل المعلومات الي عوزاها عن الأكاديمية دي ، لحد ما وصلت لدرجة اني لو مدخلتهاش هحس اني فوتت فرصة العمر ، فرصة اني ارضي نفسي ولو لمرة واحدة!
_ بابا ، ليلي كانت عاوزة تفاتح حضرتك في حاجة
° ها؟
زقيت أيدها = قولي يا ليلي يحبيبتي عاوزة أي ؟
° اه ، عاوزة من حضرتك توافق إن مريم تروح الأكاديمية الي نفسها فيها ، ارجوك يعمي متمنعهاش
= طول عمري بقول عليكي عاقلة لكن شكلها هبت منك وبقيتي زيها
° اصل بنتك فكرة والفكرة لا تموت ، دي ما شاء الله ممكن تغيرنا كلنا في يومين
= هو معتش ورايا غير سيرة الأكاديمية دي؟ في أي يمريم مبتزهقيش ؟
_ لاء يبابا وهفضل اقنع حضرتك لحد ما توافق
مسك الجورنال = ابعدوا عني الساعة دي ، دي الساعة الي برتاح فيها من وجع الدماغ بتاع الشغل
_ ارجوك يا بابا ، وافق وانا مستعدة اعمل ل حضرتك الي انت عاوزه
بصلي هتوافقي = علي يوسف؟؟
_..
= راكبة دماغك وانا مينفعنيش كده ، مينفعش الدنيا حواليكي تمشي زي ما انتي عاوزة وبس!
_ بس دي حياتي يبابا! ، الجواز عشان يتم لازم يبقي فيه تفاهم ، أنا مش عارفة افهم يوسف ولا هو قادر يفهمني
= بالعِشرة هتقدروا تفهموا بعض ، لو كله فكر زيك كده محدش كان هيتجوز
_ طيب ، يعني لو وافقت علي يوسف هتوافق اروح الأكاديمية ؟
= والجواز يبقي لما ترجعي علي طول؟
سكتت وانا بفكر _ ماشي ، اهو علي الاقل اكون عملت الحاجة الوحيدة الي نفسي فيها ، ها موافق؟
= هتفضلي هناك قد اي؟
_ ست شهور
= نعم ؟؟؟؟
_ فيه اجازات مش هقعدهم كلهم هناك ، عشان خاطري يبابا ، ها قولت اي ؟
بصلي = هتسافري أمتي؟
اتنطط مكاني من الفرحة وروحت حضنته وانا مش مصدقة _ شكراً ، شكراً اوي يبابا
كان نفسه دايما يشوفني عروسة هو وماما ، حقهم! ، بس هما مش شايفين غير إن يوسف عريس لقطة مينفعش يترفض ، لكن أنا عمري ما حسيت بمشاعر تجاه أي راجل ، يمكن المشكلة مش في يوسف بس! ، بس الجواز مصير اي بنت ، يمكن لما اجرب تبقي جوازة ناجحة ونعرف نفهم بعض بعد الجواز .
بدأت أنا وليلي نحضر الشنطة مع بعض
° أهدي طيب بالراحة
_ مش مصدقة نفسي يا ليلي ، حاسه اني بحلم ومش عاوزة اصحي ابدا
° يعني كل البنات عاوزة تتستت وتقعد في البيت وانتي عاوزة تروحي يطلع عينك هناك تدريبات وتمارين وزحف علي الأرض!
= اكيد هرجع واحدة تانية ، فاهمة الدنيا اكتر وعندي خبرة في الحياة اكبر ، اكيد تفكيري هيتغير بسبب التجربة دي
° خلي بالك من نفسك ، هتوحشيني اوي
حضنتها وودعتها ، كانت هي صحبتي الوحيدة ، بنت عمي الي بعتبرها اكتر من اختي ، ودعت بابا وماما وروحت محطة المترو ، ركبت المترو وبعد نص ساعة كنت قدام الأكاديمية ، خدت نفس طويل وطلعته بالراحة ، دخلت وقعدت في استراحة ، كان فيه بنات كتير موجودة في الساحة ، وعلي الجانب التاني كان الرجالة بلبس حربي
° النهارده حر موت ، حد معاه صن بلوك يبنات؟ بتاعي خلص
' اه طبعا اتفضلي ، فيه حد فيكم معاه مرطب؟
* أي رأيكم في النيلز بتاعتي الجديدة ؟
° واو دي خطيرة عملاها فين؟
كنت حاسه نفسي في حنة ام سماح! ، دي بنات جاية تعمل اسكين كير واتلغبطوا وجم هنا ولا اي؟ اللهم اجرني في مصيبتي
طلعت النوتس بتاعتي وبدأت اكتب عن اني جيت هنا ، الورق فجأة طار مني ف قومت بسرعة اجيبه ف خبطت في واحد
_ مش تحاسب!
= أنا الي احاسب؟ مش انتي الي عامية يعني ومحتاجة تغيري نضارتك؟
عدلت نضارتي وانا متعصبة _ انت قليل الذوق! ، وبعدين تخلي بالك وانت ماشي ، انت مش ماشي علي الارض لوحدك
= وهتعملي أي يعني لو مخدتش بالي؟
_ هوريك الوش التاني وبلاش عشان هيبقي صعب عليك اوي!
جه اتنين وقفوا جمبه وضحكوا بسخرية
° اوف ، أي دا يا احمد دا الناس الجديدة شكلها داخلة سخنة!
" اهو أنا الي كنت خايف منه إنه يجيبوا بنات ويعملوا فيها سبع رجالة في بعض
_ خلصتوا؟ ، خد صحابك وامشوا عشان مش فضيالكم
وقف قدامي = ولو ممشيناش؟ ، أخرك أي يعني؟
البنات والرجالة اتلمت حاولينا
بنت من الي كانوا موجودين اتكلمت ° خلاص يا شباب هي اكيد مش قصدها
_ لاء قصدي ، استني انتي ، دول فاكرين أن المكان تحت أمرهم باين
= طب منتي اخرك مطبخ! ، المكان دا مش ليكم وانتوا كمالة عدد والسلام
_ امممم ، طب ما توريني كده ممكن تعمل اي ؟
= أنا ؟ اكيد مش همد أيدي علي ست
_ لاء لاء أنا الي بقولك ، لو عرفت تمد مد
= نعم؟؟؟؟ ، انتي متاخديش في ايدي دقيقه
_ طيب!!! ، ها هنفضل طول اليوم هنا ولا اي؟
اتعصب ورفع أيده ف لورتها وراه _ لاء فيه احسن ، جرب تاني
زقيته ف بصلي ووشه مليان غضب ، حاول يضربني بس كنت بتفادي أي ضربة بيعملها ، زقيته ف وقع علي الارض
_ نقطة ومن اول السطر ، بالشفا
قام وزعق = انتيييييي..
كانوا كلهم باصين ليا وفاتحين بوقهم! ، قام وجه نحيتي ف صحابه مسكوه ' خلاص يا احمد مش عاوزين مشاكل احنا لسه بنقول يا هادي
القائد جه وزعق ° أي الي بيحصل هنا؟ انتباه
وقفنا كلنا صف واحد ، كان جمبي وبيبصلي ب نفاذ صبر
° أهلاً بيكم كلكم ، احب اقول التعليمات عشان تبقي واضحة للكل ، هتروحوا تسجلوا اسمائكم دلوقتي ب البطايق الي معاكم ، هتتوزعوا ف اوض علي حسب العدد بتاعكم والصحيان هيبقي من ستة الصبح ، هنعمل تمارين وتدريبات هتتعلموها زي الطلق الناري والزحف علي الرمل والقفز من الطيارات والجري في الصحرا وغيره ، مدة التمرين ست شهور وفيه إجازة يومين في الشهر ، الي هيخالف أو هتخالف القواعد هيبقي برا ، مفهوم؟
البنات بدأت تبص لبعض ، مكنتش متفاجأة عشان كنت عارفة دا كله بحكم اني قارئة عن الأكاديمية من زمان ، روحنا سجلنا اسمائنا واتعمل كشف ، حطينا شنطنا كلنا في مكان واحد لحد ما يوزعونا علي الاوض واتجمعنا في الساحة تاني
° هتطلعوا فوق دلوقتي وتمسكوا الحديدة الي في الحبل وتوصلوا بيها علي الارض ، اتحركوا
طلعنا وبدأنا نمسك الحديدة الي كانت مربوطة في الحبل
بدأت البنت الي جمبي تتكلم ' احمممم لو سمحت ، اكيد طبعا فيه صيانة معمولة والحبل دا آمن مية في المية صح ؟
° أيوة طبعاً معمولها صيانة من سنتين
' طب الحمد لله واييييي؟؟؟
زقها من فوق ف نزلت وهي مغمي عليها ف فتحت بوقي
° دورك
بصيت للمسافة وانا بحاول اتماسك ، غمضت عيني وزقني ، وصلت وانا رجلي ماسكة الأرض ،اخيرا!
بصيت للبنت الي كان أغمي عليها _ أنتي كويسة؟
' اه الحمد لله ، القائد طردني سجدة شكر لله ، ربنا معاكم
مشيت وهي مبسوطة ف رجعت بصيت ب استغراب للبنات التانية ، بدأت كل واحدة تنزل من فوق ، كانوا بيصوتوا وفيه منهم مشي اول ما رجلها لمست الارض!
= مش قولتلك اخركم مطبخ؟
بصيت جمبي _ أنت تاني؟
= مخوفتيش زيهم ، غريبة
ربعت أيدي _ لي كنت شوفتني خوفت وانت علي الارض من شويه؟
ربع قبضه أيده وبصلي ب غضب ومشي ، مغرور!
خلص التمرين واتجمعنا تاني في الساحة
° دلوقتي تمرين التشابك ، كل اتنين يبدأوا يتشابكوا مع بعض ، ابدأوا
بصيت للبنت الي جمبي ' هاي؟
_ ازيك عاملة اي؟ اجيب لمون ونتعرف؟
' ها؟
_ التمرين!
' اه تمام
رفعت أيدي ف صوتت ' انتي هتعملي اي؟
_ هو نتشابك دي مفهومها أي بالنسبالك؟ انتي مش شايفة الرجالة عادمين بعض العافية ازاي؟
' لاء مهو انتي اكيد مش هتتضربيني!
رفعت حاجبي ووقعتها علي الأرض ' ضافري اتكسرت ، ضافريييييي يقادرة
قامت وعيطت ومشت ، دا أي البنات دي والله! ، أنا فين أنا ؟
بصيت جمبي لقيت الشاب الي حصل بينا خلاف ضارب خمسه ، القائد شكر فيه وفي قوته ،
اليوم اخيرا خلص ، اتوزعنا في الاوض ودخلت علي السرير ونمت من كتر التعب ، صحيت علي صوت المشرفة وهي بتصحينا الساعة ستة الا ربع ، قومت بسرعة وبدأت اجهز ، روحت الساحة اول واحدة ف قعدت في الاستراحة اكتب كل حاجة حصلت ، فوني رن ف رديت أيوة ييوسف
° ازيك عاملة اي؟ باباكي قالي انك روحتي أكاديمية حربية
_ أيوة دا صحيح ،فيه حاجة ؟
° كنت اتمني تعرفيني يعني حاجة زي دي
_ جت فجأة مكنتش اعرف إن بابا هيوافق ، وأديك عرفت في الأخر اهو ف زي بعضه
° ابقي خلي بالك من نفسك
_ طيب وانت كمان ،هقفل عشان عندي تمارين هتبدأ دلوقتي
قفلت الفون وحطيته في جيبي ، القائد جه وكلنا اتجمعنا من تاني ° هنبدأ ب تمرين سهل ، الثبات ، اقفوا كلكم علي رجل واحدة
دا الي سهل !!!! جايبين لينا قائد متحضنش وهو صغير؟
° الي رجله هتفلت منكم هيلف المبني عشر مرات ، ابدأوا
كلنا وقفنا على رجل واحدة ، مرت دقيقه والاغلب كانت رجليه فلتت ، كنت مدربة علي التمرين دا بالذات عشان توازني مكنش احسن حاجة لحد ما بقي لا بأس بيه في الأخر ، بعد دقيقتين مفضلش غيري في البنات الي ثابتة
° برافو عليكي ، ارتاحي انتي لحد ما يلفوا العشر لفات ونكمل
قعدت وطلعت ازازة ميا شربتها ، طلعت فوطة وبدأت امسح وشي ، بصيت علي مجموعة الرجالة الي مفضلش منها حد محافظ علي ثباته غيره! ، خلصوا وكلهم بدأوا يجروا وهو جه قعد جمبي وهو بينهج
مديت أيدي قدامه ب ازازة ميا كانت معايا ، بصلي
= أنا مش محتاج منك حاجة
_ تصدق اني غلطانة؟ أنا قولت ألحقك بدل ما انت مش عارف تاخد نفسك
= انتي فاكرة نفسك جامدة بقي وكده؟
_ أنا عارفة مش مستنياك تقولي ، وياريت ميبقاش بينا حوار ، نقعد وأحنا ساكتين
= لاء بالله عليكي اتكلمي معايا اصل هموت وادردش مع سيادتك
_ يفتاح يعليم!! انت عاوز اي؟
= عاوزك تعتذري علي الفصل الي عملتيه فيا امبارح عشان لولا أنك بنت كنت عرفت شغلي معاكي بس هكتفي ب اعتذارك
ضحكت _ انت دمك خفيف علي فكرة
بصلي ب عصبيه = انتي اكيد مش عارفة انا مين ؟
_ هتبقي مين يعني؟
بنت جت ووقفت قدامنا ° أي دا ازيك يا احمد ؟
بصلها ورجع بصلي بنفس الغضب الي كان عليه ف بصيت علي البنت _ صحيح؟ انتي عرفاه؟ مين حضرته؟
° دا ظابط معانا
_ ها؟؟؟
يتبع..
حدث في الأكاديمية 🤍.
مريم سمير 🤍.
_ الجزء التاني _
بصيت علي البنت _ صحيح؟ انتي عرفاه؟ مين حضرته؟
° دا ظابط معانا
_ ها؟؟؟
رجعت بصيتله = أيوة يعني عشان انت ظابط تعمل الي يعجبك ولا اي؟ وبعدين اي جابك هنا مدام ظابط ؟
= تدريب يا ام العريف ، معاكي ٤٨ ساعة تكوني معتذرة فيهم ، اظن كلامي واضح ؟
مشي قبل ما اعمل اي رد فعل ، دا مين المغرور الي مش شايف حد دا؟ ، رجعت بصيت علي البنت
_ بقولك اي؟ ، دا ظابط أكيد ؟
° وابن القائد
_ افندم ؟؟؟
° اه والله ، بس مش القائد دا ، لسه باباه مجاش بس كان بيدرب للدفع الي قبل كده ، احمد اشطر راجل هنا وفي شغله كمان بيمسك قواضي تقيلة ، انتي اي وقعك معاه في حوار بس!
_ هيعمل أي يعني؟
° هو اكيد مبيسيبش حقه ، ف نصيحة مني اعتذري وخلاص ومشي الدنيا
_ أنا اعتدز منه؟ مستحيل
° خلاص يبقي استني رد فعله الي كمان يومين
سكتت وبصيت قدامي ، هو ممكن يخليني اطرد من هنا؟ بعد كل دا؟ ، فوني رن كانت ليلي ف رديت
_ أي مصحيكي بدري كده؟
° قولت اطمن عليكي ، عاملة اي ؟
_ عاملة مصيبة يا ليلي مصيبة
° في أي بس؟ حصل اي؟
_ حصل خلاف بيني وبين راجل هنا
° ما دا المتوقع يمريم هو انتي بتهمدي!
_ احممم ، طلع ظابط وأبوه قائد مشترك هنا
° ها؟
_ وهددني لو معتذرتش هيوريني كمان يومين ، تخيلي أنا بتهدد؟ ولما اقوم اعدمه العافية ؟
° اهدي طيب اهدي ، تلاشيه ولو حكمت اوي تعتذري اعتذري
_ طب اقفلي واصطبحي وقولي يصبح
قفلت الفون وانا متعصبة ، أنا مستحيل اعتذرله ، أنا أعتذر للمغرور دا؟؟؟
° اتجمعوا كلكم عشان جه وقت ضرب النار
قومت وانا متحمسة ، كنت مستنية التدريب دا من اول ما جيت ، روحت مسكت مسدس والقائد بدأ يتكلم
° كله يركز علي الهدف ، أمسكوا السلاح كويس واضربوا ، ابدأوا
سمعت صويت جاي من جمبي " يمامي ، إلحقوني
القائد وقف قدامها ° في اي؟
" مش عارفة امسكه يفندم ، مش هيجيلي قلب أطلق نار
° مش مشكلة ، مش بتعرفي تمسكي السلاح؟ بتعرفي تمسكي شنطتك؟
" نعم؟
° شنطتك وارجعي مكان ما جيتي بقي زي الشاطرة
كنت فاتحة بوقي وببلع ريقي بصعوبة ، بدأت ابص علي الهدف تاني وانا بجمع كل قوتي ، فلت مني اول طلقتين في الرمل ، خدت نفس طويل وطلعته بالراحة وضغطت علي الزناد ، جت في الخشبة الي فيها الهدف بس كانت بعيدة عنها
القائد جه وقف جمبي ° كويس مش بطال ك أول مرة ، بكرة اليوم كله هيبقي طلق ناري
هزيت راسي بتفهم ، بصيت جمبي لقيت الي اسمه احمد جايب الست رصاصات في الهدف بالظبط! بصيت ب اندهاش ، دا طلع شاطر اوي فعلاً! ، جت بنت وقفت جنبه بعد ما خلص
° ممكن تعلمني؟
= طب ما ممكن القائد يعلمك! ، بعد اذنك
صحابها جم وقفوا جمبها وهما بيضحكوا
' قولنالك صعب ومحدش يعرف يكلمه
° بس علي مين؟ مش علي نانسي ، مصيره يقع
كنت باصة ب ملل لمحاولاتهم ل لفت نظره! ، نظرات البنات كلها كانت عليه ، بيراقبوا كل حركاته ومتراهنين بين بعض مين هتعرف تخليه ياخد باله منها أو يعجب بيها!! دا أي فيلم المراهقات الي وقعت فيه دا ؟
جه ميعاد الغدا وقعدنا كلنا في مكان عشان ناكل ، كان القائد قاعد في مقدمة المكان وكلنا بنبص للأكل ، كانت مكرونة بس شكلها مش مشجع خالص ، الرجالة بدأت تاكل ولما خلصوا بصولنا وهما بيتريقوا
' لو سمحت يفندم هو مفيش اكل تاني ؟
قائد وقف ° هو احنا في فندق؟ دا الموجود لو مش عاجبك ممكن جدا ترجعي ل اكل البيت
البنت بصتله وسكتت ، بدأت أكل وانا بقول في دماغي ماشي! مش هيبقي أسوأ من مكرونة ليلي الي عملنا بسببها غسيل معدة قبل كده!
خلصنا أكل واتجمعنا في الساحة تاني ، نار كتير بدأت تولع ف شهقنا ' هو في أي يفندم؟
° هتنطوا من فوق النار ، هتمسكوا الخشب الي فوق وتعدوا عليه من فوق النار
' ها؟؟؟؟؟؟
بصينا كلنا لبعض ف وقف قدامنا ° ها مين هيبدأ؟
كلنا خدنا خطوة ل ورا واحنا مستوعبين خطر التمرين دا = انا يفندم ممكن أبدأ
بصينا كلنا ل مصدر الصوت كان احمد! ، بدأ يطلع ل قدام وعمل التمرين في دقيقة ، قدر يحافظ علي ثباته الانفعالي وكأن النار تحته تلج ، منكرش أنه كان مثير للاهتمام والكل كان باصصله ب اعجاب ، تعجب ، ذهول!!
° برافو يبطل ، ها مين الجاي فيكم؟
رجع بص ل جزء البنات ' ممكن يفندم بلاش التمرين دا؟ يعني لو واحدة وقعت وبقت وجبة العشا دلوقتي ؟
° الي مش هتقدر تعمله هخليها تلف الساحة عشرين مرة لحد ما الليل يليل علينا
_ أنا يفندم عاوزة اجرب
بصولي بتعجب ' نعم يختي؟ انتي هتطلعي!!
_ ولي لاء؟
القائد بصلي ° انتي اسمك اي؟
_ مريم يفندم
° تمام يمريم ، اطلعي
وقفت قدام المكان ، بصيت علي النار وخدت نفس عميق ، انتي هتقدري؟ ، انتي الي كنتي عاوزة تيجي هنا مش كده؟ دا حلمك ، اثبتي نفسك .
بدأت امسك الخشبة وأمسك التانية وانا تحتي النار ، فكرت في حاجات كتير غير النار الي كان بيني وبينها مسافة قليلة وبعد شوية كنت خلصت التمرين وانا مش مصدقة ، وقفت علي رجلي وانا بترعش شوية وبعد كده وقفت ب ثبات ورجعت مكاني
° هايل يمريم ، ها محدش فيكم هيعملوا تاني؟
بصلهم ف ملقاش رد ° ابدأوا جري ، كملوا انتوا يرجالة
روحت قعدت علي الاستراحة وانا باخد نفسي ، مش مصدقة أني عرفت اعمل كده! ، جه قعد في نفس الاستراحة ب حكم أنه خلاص خلص التمرين زيي
= كويس ، مش بطالة
كان بيتكلم وهو باصص قدامه ، رفعت حاجبي
_ نعم؟
= يعني كويس إن ست زيك عرفت تعمل كده ، مع اني كنت فاكر انك هتجري معاهم
_ وانا مش زي حد ، ومحدش طلب منك تقيمني!
= اظبطي طريقة كلامك معايا ، أنا محدش يعرف يكلمني كده
_ وانا لسه قيلالك اني مش زي حد
بصلي ب عصبية ورجع بص قدامه وهو بيحاول يهدي ، كنت خايفة؟ منكرش ، بس بحاول ابان عكس كده ، كنت عاوزة اخليه يتخلي عن غروره شوية ، يمكن عرفت اعمل كده؟
= النهارده خلص ، لسالك كام ساعة وبس
_ نعم؟
= علي انك تعتذري
_ شيل الفكرة دي من دماغك نهائي ، أنا مش هعتذرلك مهما حصل
= هنشوف ، ساعتها متلومنيش علي رد فعلي
بلعت ريقي وسكتت ، كنت حاسة أنه هيقوم يكسر عليا الأكاديمية بس معنديش دليل ،
القائد جمعنا بليل وولعنا نار عشان الدنيا كانت برد ، جه راجل قعد جنب القائد وسلم عليه ، كان لابس زيه ف عرفنا تلقائي أنه القائد المشترك ، كان احمد نسخة مصغرة منه! ، بس الفرق إن باباه كان شكله لطيف ، بدأ القائد سعد وعاصم باباه يحكولنا حكاياتهم في الجيش وخبرتهم فيه ، وأنهم صحاب فكرة إن الأكاديمية دي تبقي موجودة ، أنها خدت كل وقتهم!
أحمد قام من مكانه = أنا هتمشي شويه
° لاء خليك ، عاوزك في دور شطرنج وبلاش تقول لاء دا أمر يحضرت الظابط
ضحك = تمام يفندم
جابوا الشطرنج وطربيزة وكرسيين وبدأوا يلعبوها ، كانوا الاتنين مركزين وأحنا حواليهم
= كش ملك يفندم
قالها وهو بيضحك ف بصينا كلنا علي القائد
° هو انا مش هغلبك فيها ابدا؟؟
= استحالة
بدأ يلعب مع الرجالة الي موجودين وكانت النتيجة واحدة! بيكسبهم كلهم
قال ب غرور = ها حد عاوز يلعب تاني قبل ما اقفلها؟
_ هو ينفع ألعب دور؟
بصلي ورفع حاجبه = انتي؟ بتعرفي تلعبيها؟
_ أيوة
قعدت قدامه وبدأنا نلعب ، كنت مركزة اوي خصوصاً اني بحب اللعب دي جدا من وانا صغيرة وبابا معلمهالي ، قولت وانا برجع ضهري ل ورا ب أريحية
_ كش ملك
' برافو عليكي يمريم شطورة
بدأت البنات تصقفلي ف ضحكت ، قومت من قدامه وكانت لسه نظراته عليا! ،
الوقت عدي بسرعة ، بين حكاوي وهزار وكلام كتير من كل حد فينا ، خلصنا اليوم وكل واحد راح علي أوضته ، نمت من كتر التعب وصحيت علي صوت المشرفة ، قومنا وفطرنا وروحنا الساحة ، قعدنا علي الاستراحة لحد ما كلنا نتجمع
جه القائد عاصم ووقف قدامنا ° النهارده شامل طلق ناري زي ما سعد قالكم امبارح ، اتحركوا للموقع
بدأنا نتحرك علي هناك ، وقفت ف جه وقف في المكان الي جمبي بصيتله وبعد كده اتجاهلت وجوده ، نانسي جت وقفت في الجنب التاني نحيته
' هاي يا احمد ، المرادي بقي لازم تعلمني
= طيب ، خلي بالك من الي هعمله
بدأ يشرحلها ازاي بيضرب نار بالظبط ، بدأت اسمعه وانا عاملة نفسي مش واخدة بالي وانفذ كل الي بيقول عليه ، ضربت نار وجت في الهدف!
بصلي ب استغراب ورجعنا كملنا ضرب نار ، متأكدة أنه دا هيبقي يوم من احلي الايام الي هقضيها هنا ومستحيل أنساه ، خلصنا المغرب وكلنا كنا اتهلكنا ، اتغدينا وخلصنا اكل ، القائد طلب مننا نطلع الاوض عشان معتش تمارين النهارده ، حسيت ب نسمة هوا جاية من برا ، بصيت لقيته بحر جمب الأكاديمية علي طول ، بصيت حواليا ملقتش حد ، كان كله طلع الاوض ، لو طلعت خمس دقايق اكيد مش هيحصل حاجة! ، اتسحبت علي برا وقربت من البحر ، بخاف منه بس بحبه ، حطيت رجلي فيه وانا مغمضة عنيا وفاردة ضهري ل ورا وباخد نفس ب أريحية ، سمعت بعدها صوت جاي من البحر ف قطع شرودي ، اتجاهلت الصوت بس رجع يتكرر
_ فيه حد هنا؟
بدأت ادخل ل جوا شوية وانا ببص يمين وشمال ، جيت اطلع بعدها من البحر بس الموجة فجأة علت وسحبتني ل جوا ، بدأت اصوت وانا ببدل ب ايديا في الميا بس كنت بنزل ل تحت ، حاولت اطلع من الميا بس كل موجة كانت بتيجي كانت اقوي وأشد
_ إلحقوني ، إلحقونييييي
بدأت اعيط وانا حاسة إن قلبي هيقف من الخوف ، يمكن دي النهاية؟ ، مكنتش عاوزة تبقي كده!! ، غمضت عيني وانا شبه مستسلمة ، رجلي جالي فيها شد عصبي من كتر منا شادة نفسي ، فجأة حد سحبني ، معرفتش افتح عيني ، كنت مغمضة وانا حاسة إن كل دا حلم ، بتمني أفوق منه ، بتمني مكنش يحصل .
= مريم؟؟ ، مريم ردي عليا ؟؟؟
فتحت عيني وانا بكح ، ميا كتير بتخرج من بوقي
مسك أيدي وقعدني كنت لسه بكح = حاولي تاخدي نفسك ، مفيش حاجة انتي خلاص طلعتي
بدأت اخد نفسي واعمل تمارين تنفس ، استوعبت أنه هو! كان احمد!!
_ أنا..
قام من مكانه وهو بيزعق = انتي كنتي هتغرقي! ، لو مكنتش جيت كان زمانك ميتة
_ أنا بس كنت عاوزة..
= أي مخرجك اصلا ؟ ، انتي مبتفكريش لي؟ أي حاجة بتيجي في دماغك بتعمليها وخلاص؟ ، انتي مستوعبة انك كنتي هتغرقي؟ البحر مبيرحمش حد
كان بتكلم وفيه خنقة في صوته ف عيطت
_ أنا سمعت صوت فجأة وجيت اطلع الموجة سحبتني ، أنا مكنش قصدي ، أنا آسفة
مشي من قدامي ، قعدت علي الشط وانا بحاول أهدي واستوعب كل الي حصل ، موقف صعب اوي ، يمكن كان ينتهي بنهايتي أنا!
رجع تاني وهو معاه بطانية = لفي دي عليكي واطلعي بسرعة غيري هدومك دي
كنت بصاله وانا مش مستوعبة أنه نفس الشخص المغرور الي شخصيته بيتخاف منها ومحدش يعرف يتكلم معاه!
_ شكرا ، شكراً اوي يا احمد
بدأت امشي معاه ل جوا = استني
دخل بص من البوابة لو حد موجود او لاء ورجع بصلي
= يلا
دخلنا وطلعنا الأوض ، دخلت اوضتي وانا بترعش من كتر الخوف ، غيرت هدومي بسرعة وقعدت علي سريري وانا بفتكر كل الي حصل ، لي كان خايف كده؟ لي كل الوجع الي كان في صوته وهو بيتكلم؟
منمتش! ، كنت كل لما انام احلم ب الموقف في اصحي مفزوعة ، المرادي نزلت لوحدي مستنتش المشرفة تصحيني ، قعدت علي الاستراحة وانا بكتب في النوتس بتاعتي اصعب موقف اتعرضتله ، جه قعد علي الاستراحة ف ابتسمتله _ ازيك؟
=..
_ أنا مش عارفة اشكرك ازاي ، ومش عارفة اقولك أي ، لولا انت بعد ربنا أنا مكنتش هبقي موجودة دلوقتي
=..
_ هو أنا فعلاً مبفكرش في الحاجة قبل ما اعملها مكنتش اعرف إن كل دا هيحصل
=..
_ انت مضايق من حاجة؟
= لاء ابدا اضايق من أي يعني؟
_ انت كنت خايف لي امبارح؟
رد بسخرية = اصل كنتي في مسابقة عوم امبارح ، انتي شكلك مش مستوعبة الي انتي كنتي فيه
_ مش قصدي بس..
قام مشي! ، كان بيتجنب يبصلي طول اليوم ، كان تمارين النهارده زحف علي الارض والنط من طيارة ، كنت أنا وهو ومعانا تلاتة كمان في الطيارة فوق
° استعدوا ، لما اشاور تنطوا وتفتحوا المظلة في الوقت المظبوط ، كنت لابسة الشنطة الي فيها المظلة علي ضهري وشاورلنا ونطينا ، غمضت عيني وانا بحاول مفكرش في أي حاجة ، فتحت المظلة ووصلت بيها علي الارض ، حطيت ايدي علي قلبي الي كان بيدق جامد
= انتي كويسة؟
فتحت عيني وانا ببصله _ أنا كويسة
= طيب
بعد خطوات عني وراح نحية الرجالة الي كانوا واقفين ، خلصنا التمارين والقائد جمعنا
° أنا مبسوط منكم اوي النهارده، وعشان كده قررت انكم تخرجوا شويه
الكل بدأ يهلهل ° استنوا ، مش اوي كده ، هما ساعتين وترجعوا ، الي هيتأخر ميرجعش
روحت جبت شنطتي ونزلت ، كنت فرحانة كأني كنت محبوسة في مكان وجه الوقت اني أخرج منه! ، مع انهم اربع ايام بس اكتسبت فيهم حاجات لو فضلت سنين مكنتش هعرف أعملها ، عمري ما هندم اني جيت هنا برغم الخوف الي اتعرضتله .
روحنا مكان كان سوق واسع ، بدأنا كلنا نشتري حاجات ، البنات بدأت تشتري ميكب واسكين كير والرجالة بيشتروا لبس ولوازم تانية
° أنا نانسي
_ ازيك وانا مريم
° وانا جيجي
اتعرفنا احنا التلاتة ومشينا مع بعض ، جم معايا اشتري رواية من مكتبة صغيرة كانت موجودة ، فضلنا ندردش طول الطريق ، فجأة طلع اربع رجالة وقفوا قدامنا
° علي فين؟
بصتله بطرف عيني _ تسمح توسع عشان نعدي؟
° ازاي بس؟ قبل ما نعمل معاكم الواجب؟ انتوا شكلكم جديد هنا ، مشوفناش احنا الحلاوة دي قبل كده
_ انتوا عاوزين اي؟
° هنخرج في سهرة حلوة وبعدها نرجعكم مكان منتوا عاوزين
نانسي وجيجي رجعوا خطوة ل ورا
' أبعدوا عننا بدل ما نطلبلكم البوليس
الأربعة ضحكوا علي كلام نانسي وواحد مسك أيديها ف مسكت أيدها التانية وسحبتها نحيتي ووقفت قدامهم
_ لو لمست واحدة فيهم تاني هقطعلك إيدك
° بجد؟ أنا اعز النوع الي مبيخافش دا علي فكرة
_ هديلك فرصة أخيرة تمشي علي رجليك
بدأوا التلت رجالة التانيين يبصوله ويضحكوا
' اي يقيادة الهيبة كده هتضيع!
بصلي ب غضب ورفع أيده ف مسكتها وزقيته
= أنتوا أي الي جابكم من الطريق دا؟
_ أحمد!!
نانسي اتكلمت ب خوف ' أحمد إلحقنا عاوزين يخدونا بالعافية
= ارجعوا انتوا التلاتة ل ورا
رجعنا وبصيتله ، الأربعة عملوا دايرة حواليه
= امشوا دلوقتي ، حالاً
روحت وقفت جنبه _ خد انت اتنين وانا اتنين متبقاش اناني
= مريم!!! ارجعي مكانك
_ بالله عليك أنا مصدقت هتدرب علي جتة حقيقية
= جتة ايييي بقولك ارجعي
_ الكترة بتغلب الشجاعة ، سيبك انت
بصلي بغضب ورجع بصلهم
= هتمشوا ولا عاوزين مشاكل؟
واحد فيهم كان ضخم ف وقف قدام احمد وضربه
_ أحمد!!!!
يتبع..
حدث في الأكاديمية 🤍.
مريم سمير 🤍.
_ الجزء التالت _
حدث في الأكاديمية
روحت وقفت جنبه _ خد انت اتنين وانا اتنين متبقاش اناني
= مريم!!! ارجعي مكانك
_ بالله عليك أنا مصدقت هتدرب علي جتة حقيقية
= جتة ايييي بقولك ارجعي
_ الكترة بتغلب الشجاعة ، سيبك انت
بصلي بغضب ورجع بصلهم
= هتمشوا ولا عاوزين مشاكل؟
واحد فيهم كان ضخم ف وقف قدام احمد وضربه
_ أحمد!!!!
نزلت لمستواه _ أنت كويس ؟
قام ف بدأنا نضربه احنا الاتنين نظراً لحجمه ، وقع في نطيت ب انتصار هو _ دا الكلام عد جثث عوزاك تعد الجثث
بصلي بطرف عينه _ احممم اه مش وقته ؟ ، الي بعده
التلات رجالة التانيين بصوا لبعض ورجعوا بصولنا
واحد فيهم جه نحيتي وواحد نحية احمد ، بدأت اضربه واتفادي أي ضربة بيعملها ، وقع ف عدلت الكاب بتاعي
سمعت صوت نانسي ° سيبني ، سيبني بقولك
كان الراجل الرابع مسكها وهي بتضربه ضربات خفيفة علي أيده
روحت وقفت قدامهم _ فعلا!! ، لا كتر خيرك يحبيبتي
مسكته وضربته ف وقع علي الارض ، بصيت ل أحمد الي كان باصصلي وفاتح بوقه
= انتي بتعرفي تضربي حلو أوي!
_ شكراً ، أتدربت كتير قبل كده علي مانيكان
رجع كشر تاني = انتي اي ممشيكي من المكان دا؟ مكان ضلمة تمشي فيه لي؟ انتي غاوية مشاكل وخلاص!
_ وأنا أعرف منين ؟؟ ، احنا يدوب خلصنا وكنا مروحين ف طلعوا في طريقنا
° برافو عليكي يمريم دا انتي طلعتي جامدة اوي
' محدش هيعرف يجي علي سكتك بعد كده
ضحكت وبصيت جمبي كان موجود تقريباً كل الي كانوا في الأكاديمية اتجمعوا علي صوت الضرب ، اتشافت وانا بضرب راجلين! طب دي اصول يعني يجدعان؟
_ احممم يلا عشان ميعاد رجوعنا قرب
مشينا كلنا كان الرجالة قدام والبنات وراهم
' انتي لازم تعلميني بتضربي كويس كده ازاي عشان ابقي زيك
_ اكيد إن شاء الله
° بتدربي بقالك مدة ولا دي فطرة؟
_ فطرة أي يجماعة هو انا رفاعة الدسوقي! ، بتدرب بقالي سنتين
* واو ، لازم تعلمينا كلنا
_ في أقرب فرصة
بصيت علي نانسي وجيجي _ انتوا كويسين؟
نانسي ردت ° اه الحمد لله ، بس شوفتوا احمد وهو بيضربهم؟ كان يجنن
_ مهو طول ما انتوا كده مش هنشوف مكسب
° هو يومين كمان وهتشوفوه واقع ازاي وساعتها كلكم هتباركولي
' دا مين دا ؟ احمد؟ كان غيرك أشطر دا قفل ومحدش يعرف يتكلم معاه
ردت ب غرور ° يستي هحاول ، وبعدين الي فاتوا مكنش فيهم نانسي ف اكيد معرفوش يأثروا فيه!
بصيتلها بملل ورجعت بصيتله ، كان قدامنا ب شوية ، هو فعلاً كان كويس اوي لدرجة أنهم كلهم عاوزينه؟؟ ، راجل لقطة زي ما بيقولوا؟ ، يمكن ، بس الي متأكدة أنه من بعد ما انقذني من الغرق أنه رغم الشدة الي ظاهرة عليه من برا إلا أنه طيب اوي .
وصلنا الأكاديمية ولقينا باباه واقف علي البوابة
° في أي يا احمد؟ مال عينك وارمة وهدومك متقطعة كده لي؟
= مفيش يفندم كان اشتباك بس وخلص
° وطمني النتيجة كام؟
= عيب عليك بعون الله أربعة صفر
ضحكت ودخلنا كلنا ، قعدت علي الاستراحة اكتب الحاجات الي حصلت النهارده ، ظهر ضل راجل ف اتخضيت
' متخافيش ، اسف لو خضيتك
_ لاء مفيش حاجة
' عبدالله
_ مريم
قعد علي الاستراحة ' شوفتك وانتي بتضربي قطاع الطرق من شوية ، الصراحة كنتي تحفه
_ افندم؟
' قصدي يعني بتعرفي تضربي وتتفادي الضربات كويس
_ اه ، متشكرة اوي
' انتي كويسة اهم حاجة ؟
_ اه الحمد لله محصلش حاجة
= انت فين يعم انت؟
' اه ازيك يا احمد ، فيه حاجة؟
= بيدوروا عليك فوق ، عاوزينك
' ماشي انا طالع ، بعد اذنك يمريم ، تصبحي علي خير
_ وانت من اهله
عبدالله مشي وفضل احمد واقف ف فلتت مني ضحكة
= بتضحكي علي اي؟
_ لاء مفيش ، مش هتطلع ؟
= اكيد هطلع ، أي هيوقفني يعني؟
_ طب استني أنا عاوزة اتكلم معاك
=..
_ احنا البداية بينا مكنتش ألذ حاجة ، بس بجد أنا مش عارفة اشكرك ازاي علي انك خرجتني من البحر ، أنا مش عارفة لولا انت كنت موجود ساعتها كان ممكن يحصل أي ، شكراً اوي يا احمد
قعد جمبي = ابقي خلي بالك المرة الجاية ، ياريت ميبقاش فيه مرة جاية اصلا عشان انتي دماغك مسوحاكي
ضحكت _ بس أنت ما شاء الله بتعوم كويس اوي
= أنا مبحبش البحر ، منزلتوش من خمس سنين
_نعم؟ ازاي ؟ انت كنت بتعوم كويس وخرجتني بسرعة ، لي منزلتش من خمس سنين ؟
=..
_ لو مش حابب تتكلم براحتك
خد نفس وبص قدامه = صاحبي غرق من خمس سنين ، كنا في البحر سوا وفجأة ملقتوش ، فضلت ادور عليه بس لما طلع ، طلع ساعتها غرقان ، أنا الي كنت قايله ننزل ، لو مكنش نزل كان زمانه عايش ، أنا السبب في موته ، أكيد أنا الي شخص وحش هو مكنش يستاهل الي حصل بسببي
_ متقولش كده ، دا عمره ، لو مكنش غرق كان بردو اتوفي بطريقة تانية ، متلومش نفسك في حاجة قدرية انت ملكش ذنب فيها ، ربنا يرحمه يارب
=..
_ انت حتي وانت خايف من البحر ومنزلتوش من خمس سنين نزلت عشان تحاول تطلعني منه ، متلومش نفسك ، انت طيب يا احمد مش وحش
=..
_ مع إن شخصيتك ساعات بتبقي لا تطاق الصراحة!
ضحك ومسح وشه = وبالنسبة ل عنيا الي نورت بسببك؟
_ منتا الي قاعد تقاوح وهما قدامنا هو انت بتعزم في مين هيدفع فينا الأجرة؟ دا احنا في خناقة!
= منا مكنتش اعرف انك كده ، كنت فاكرك هتاخدي ضربة تمددك علي الارض
ضحكت _ كده الي هو ازاي ؟
= يعني ، بنت شجاعة ، قوية ، وبتعرف تعمل كل حاجة ، بتضرب نار وتضرب وتنط من فوق النار ، عمري ما شوفت بنت زيك ، لا هنا في الأكاديمية ولا برا
كان بيبصلي ف بصيت قدامي _ ياه دا الوقت اتأخر ، احنا لازم نطلع دلوقتي ، تصبح على خير
قومت ومشيت بسرعة ، أنا لي ارتبكت؟ يمكن عشان اول مرة راجل يقولي كده؟ كان أي راجل يشوفني بعمل حاجة من دول يشوفني غريبة!
طلعت الأوضة ونمت من كتر التعب ، صحيت علي صوت المشرفة ، نزلت الساحة وبدأت اعمل تمارين تفك جسمي لحد ما كله يتجمع
' صباح الخير ، ازيك يا مريم ؟
_ الحمد لله ، ازيك يا عبدالله
أ' نا تمام ، نازلة بقالك كتير؟
_ لاء من شوية ، باقي البنات نازلين ورايا
' مش مهم باقي البنات
بصيتله ب استغراب وانا برفع حاجبي _ ها؟
' قصدي ، الكل نازل دلوقتي يعني؟ خلاص ماشي
مشي وهو متوتر ف ضحكت رجعت بصيت قدامي لقيت _ _ احمد خضتنييييي!!!!!
= روحي اقعدي لحد ما الكل ينزل
_ ايوة بس انا..
= اسمعي الكلام وكني في جمب لو سمحتي
مشي من قدامي ف ضحكت تاني ، ماله دا؟
روحت قعدت في الاستراحة والبنات بدأوا يجوا يقعدوا جمبي لحد ما كله ينزل ، الرجالة بدأوا يعملوا تمارين لحد ما نبدأ تدريب
° زمانه عطشان أنا هروح اديله ميا
نانسي خدت ميا وراحت نحيته
° هاي يا احمد ، ميا؟
= متشكر
خد منها الميا وشرب ° بالمناسبة أنا نانسي ، فاكرني؟
= انا فعلا كنت ناسي اسمك
أداها الميا ف خدتها وجت قعدت وهي مكشرة
' مش قولنالك شايف نفسه ومش بيكلم أي بنت؟
° بيقول أنه ناسي اسمي! ، أنا يتقالي كده؟
' خلاص ينانسي شيليه من دماغك ، صعب عليكي دا
° مفيش حاجة صعبة عليا وهتشوفوا
اتجمعنا كلنا في الساحة
" هتزحفوا علي الارض وبعدها هتدربوا علي الضرب الجسدي علي مجسمات لكن بكرة هيبقي فيه تشابك بينكم مش هيبقي فيه مجسمات ، يلا نبدأ
نزلنا علي الارض وبدأنا نزحف علي الرمل ، أنا لو بزحف علي اكل عيشي مش هتعب كده! ، خلصنا أخيراً وروحنا أوضة واسعة فيها مجسمات كتير ، القائد بدأ يشرحلنا الحركات الي هنعملها ، كنت عرفاها كلها ف نفخت براحة ، اخيرا تمرين من غير تعب! ، القائد قعد في مقدمة الاوضه علي كرسي وسابنا نبدأ ، البنات بدأوا يضربوا المجسم ف واحدة فيهم صوتت
' دا مجسم ولا حديد!! أنا أيدي وقفت
بصتلها _ اضربي بالراحة وبعد كده زودي
عبدالله جه وقف جمبي ° بتعرفي تعملي الي قال عليه دا؟
_ أيوة ، لي؟
° تعلميني؟
هزيت راسي ب الموافقة وبدأت اشرحله كل ضربه بتتعمل ازاي ، بعد ساعتين كنا مخلصين التمرين وخدنا استراحة نص ساعة ، البنات قعدوا في زاوية والرجالة في زاوية واحنا كلنا بناخد نفسنا بصعوبة من كتر التعب ، شربت ميا وطلعت من شنطة الضهر بتاعتي الرواية الي اشتريتها امبارح وبدأت اقرأ فيها
° عصير؟
رفعت وشي _ شكراً يعبدالله بس مبشربش سكريات كتير ، تسلم
° العفو ، تحبي نتمشي شوية لحد ما نبدأ التدريب الي بعد كده؟
قبل ما ارد احمد جه وقف قدامي = مريم ، عاوزك
كل البنات بصولي ف رجعت بصيتله _ أنا ؟
= أيوة عاوزك في حاجة مهمة
_ طيب
قومت من مكاني وطلعنا برا ، اتمشينا شويه وكان لسه متكلمش في ولا كلمة!
_ أحمد ؟
= نعم
_ كنت عاوزني!! في اي؟
= اه ، كنت عاوز.. ، اعرف اسم الكتاب الي بتقرأيه
بصتله ب استغراب _ هو دا الموضوع المهم؟
=..
_ في أي أنا مش فاهمة؟
= أصل عبدالله..
_ ماله عبدالله ؟
= بيحاول يقرب منك ، انتي مش واخدة بالك ؟
مشيت كذه خطوة _ مش عارفة ، أظن أنه شاب لطيف يعني ، مكنش عارف يعمل التمرين ازاي ف ساعدته
وقف قدامي = واشمعنا طلب منك انتي !!!
_ وقت الاستراحة خلص ، ندخل جوا بقي عشان مش طالبة خالص ألف الساحة عشر مرات!
دخلت جوا ، كنت مستغرباه! مستغربة رد فعله وهو واخد باله من حاجات يمكن أنا مش واخدة بالي منها! طب حتي لو عبدالله بيعمل كده ، أي الي يضايقه؟
اتغدينا وكملنا تمارين لحد بليل ، خلصنا وطلعت قعدت برا ، شوفت القائد عاصم وجه وقف قدامي ° خلصتوا؟
_ أيوة يفندم ، القائد سعد جوا لو عاوزه
° تمام انا داخله
خد كام خطوة ووقف ، صوت نفسه علي ووقع فجأة علي الارض ، جريت عليه
_ انت كويس ؟؟
صوت نفسه بدأ يعلي اكتر ، كل الي كان جوا خرج ، أحمد اتخض وجري عليه
= مالك يبابا؟؟ في أي ؟؟
عدلت قعدته بحيث يعرف يتنفس احسن وفكيت اول زرارين من قميصه ، طلعت من شنطتي بخاختي وادتهاله
_ احسن يفندم؟ انت سامعني؟
هز راسه ب أيوة ° قوموني
أحمد قومه وقعده علي الاستراحة
= انت كويس ؟ يلا نروح المستشفى
° أنا بقيت كويس ، أنا بس نسيت اخد البخاخة النهارده
الاتنين بصولي = هي دي؟
_ أنا بردو بتجيلي الأزمة دي ساعات ف لازم امشي بيها في شنطتي علي طول ، الحمد لله انك بقيت كويس يفندم ، حمدالله على السلامه
° متشكر اوي ، سيبني يبني خلاص أنا بقيت كويس والله ، سيبني بدل ما امد ايدي عليك
كلنا ضحكنا وباباه قام دخل جوا
= أنا مش عارف اقولك اي
_ ولا اي حاجة ، معملتش غير واجبي
ابتسملي وفضل باصصلي ، رجعت بصيت علي الدفعة الي كانت تقريباً كلها قدامنا
' أي يا عم أحمد ؟ مش خير ؟
= يا عم يلا عشان نطلع
طلعنا كلنا الاوض ، رنيت علي ليلي وبدأت احكيلها كل حاجة حصلت معايا
_ و اه ، فاكرة الي قولتلك هددني قبل كده ؟
° أي نفذ تهديده؟ اتطردتي؟
_ لا لا ، طلع طيب اوي ، واه ضربت راجلين اتعرضولي بردو
° انتي مش هتتغيري ، انتي مفيش فايدة
_ بقولك قطاع طرق!
° اقفلي ضغطي علي
ضحكت _ وحشتوني اوي ، البيت عامل أي من غيري؟
° لو اوصفلك كم الهدوء الي بقينا فيه يمريم مش هتتخيلي
_ طب اقفلي واتمسي وقولي يا مسا
° لاء والله وحشتينا كلنا ، اوعي متجيش في أقرب فرصة عشان نشوفك
_ إن شاء الله يحبيبتي
° خلي بالك من نفسك يمريم ، انتي ما شاء الله مفيش يوم معملتيش فيه مشكلة
قولت بتلقائية _ امال لو عرفتي اني كنت هغرق بقي و..
° اييي؟ قولتي اي؟
_ انا لازم اقفل عشان ميعاد نومي جه
قفلت معاها وحطيت أيدي علي وشي ، أنا طلعت مبفكرش فعلا في أي حاجة! ، نمت وصحيت الصبح ، نزلت الساحة وقعدت كالعادة علي الاستراحة لحد ما كلنا نتجمع ، ظهر قدامي أحمد ونانسي قريبه منه! ، حاولت اتجاهلهم بس لي أنا مضايقة؟ ، لي اصلا في دماغي!!
وقفت قدامهم _ احمممم ، صحيح باباك عامل أي دلوقتي ؟
° دا وقته يعني يمريم ؟
_ ها؟ معلش مش قصدي
= استني يمريم ، انتي ممكن تمشي دلوقتي ينانسي وهفكر في الي قولتهولي
بصتلي ورجعت قعدت علي الاستراحة ف بصتله
_ بعد اذنك
= استني! مش انتي جاية تسألني عن والدي؟
_ أيوة ، أحسن ؟
= اه الحمد لله ، انتي ازاي عرفتي ازاي نقعده كده والحاجات الي عملتيها دي ؟
_ قرأت كتب عن طب وتمريض كتير
بصيت علي نانسي ورجعت بصتله _ بس انت شكلك كنت مشغول من شوية
= اه علي نانسي يعني؟ مفيش ، كانت بتقولي انها معجبة بيا
_ افندم ؟
=..
_ اكيد تعبانة في دماغها ، ثواني هديها دكتور مخ واعصاب كويس
= استني ، انتي شايفة كده؟
_ نانسي بنت جميلة ولذيذة و.. أي دا ازيك يا عبدالله؟
' ازيك يمريم عاملة اي
_ أنا الحمد لله كويسة
رجعت بصيت علي أحمد = ارجعي مكانك هناك
_ لاء أنا هقف شويه
= بقولك ارجعي بدل ما افرج عليكي الدفعة ارجعي
رجعت عشان اكتشفت اني عاوزة اقعد مش عشان خايفة ، حاجة غريبة بتحصل! ، مش عارفة أي هي بس حاسة ب حاجة لأول مرة احس بيها! ، لي مضايقة إن نانسي قالتله كده؟
التمرين التاني أننا نتشابك مع بعض ، اليوم كله!
' بصي يمريم عارفين انك لو مسكتي واحدة فيها هتعدميها العافية
_ امممم
' ف اضربي بالراحة عشان مش عاوزين نطرد من هنا
_ متخاوفوش يا بنات بجد
وقفت قدام واحدة في ابتسمتلي ' هاي ؟
_ هاي يحبيبت قلبي
' أنا مركبة ضوافر دافعة فيها الي ورايا وقدامي
_ اه
' مينفعش تتكسر
_ اه
' و..
بعد ثانيتين كانت في الأرض بعد ما اتشابكت معاها ، بصتلها وضحكت ، القائد جه وقف قدامي
° كويس اوي ، ها يبنات مين هتدخل معاها جولة تاني ؟
كلهم رجعوا ل ورا ف رجع بصلي
° انتي مربيالهم الرعب؟ امال وشك طيب لي؟
_ أنا يفندم؟ أنا مبعملش أي حاجة خالص
= لاء صادقة
بصيت لمصدر الصوت ف لقيته احمد ف ضحكت ، كملنا التمرين ، فوني رن ف رديت
_ أيوة يا يوسف؟
° ازيك يمريم ؟
_ أنا الحمد لله ، وأنت ؟
° الحمد لله كويس اوي ، تخيلي أنا فين دلوقتي ؟
_ يا تري فين؟
° برا الأكاديمية بتاعك
_ نعم؟ أكيد بتهزر
سكت ف قفلت الفون ، اتقدمت خطوات ل قدام ف لقيته قدام العربية بتاعته
_ يوسف؟ أي الي جابك ؟
° جاي اخطبك
_ ايه ؟؟؟؟؟
° أيه!!!
حدث في الأكاديمية 🤍.
مريم سمير 🤍.
_ الجزء الرابع _
حدث في الأكاديمية
_ يوسف ، اي الي جابك ؟
° جاي اخطبك
_ اييييه ؟؟؟
° ايه !!!!
_ شايف ان دا وقته يعني ؟ دا الوقت المناسب؟ ، المكان المناسب ؟ احنا بنطحن جوا صباح الفل يعني
° محستيش ب اي حاجة !!!
_ حاسه ب التأبيدة الي هاخدها لو اتكشفت اني هنا مش جوا
° احنا هنتجوز بعد ما تخلصي الاكاديميه دي ، يعني بعد أقل من ست شهور ، واحنا لسه مش في حكم المخطوبين حتي!
_ عشان احنا الاتنين عارفين إنه جواز تقليدي عشان العيلتين صحاب من زمان ، واحنا بردو عارفين كويس إن لا أنا ولا انت فاهمين بعض
° ماشي يمريم مهو احنا كده كده هنعرف بعض بعدين
_ بعدين امتي؟ بعد ما نتجوز ؟ افرض متفهمناش؟ افرض مثلا حصل طلاق؟ هتبقي بالنسبالك تجربة بس بالنسبالي انا هبقي في المجتمع دا مطلقة! ، يوسف انت محاولتش تفهمني ولو مرة واحدة!
° انا مش عارف ارضيكي ازاي
_ تشتغل ، انا مش هتقبل أبدا فكرة إن باباك الي هيصرف علينا ، حالكم متيسر؟ علي عيني وراسي بس انا مش هبقي مرتاحة
° طيب يمريم ممكن نأجل كلام في الموضوع دا؟
_ ماشي يا يوسف حاضر ، عاوز اي دلوقتي ؟
طلع علبة من جيبه ° مهو اكيد الدبلة مش بفلوس حرام!
خدت العلبة _ ماشي يا يوسف مقبولة ، متشكرة اوي ، أنا لازم ادخل دلوقتي
° خلي بالك من نفسك
_ وانت كمان
° اشوفك بعدين
_ مع السلامة
ساق ، كنت لسه باصة علي الطريق
= مين دا؟؟
صوتت _ اي يا احمد اي؟ انت لازم تخضني؟
= معلش مش قصدي ، ها خلصتي؟ مين دا؟
_ لي؟
= عادي بسأل ، القائد سأل عليكي جوا ف جيت لقيتك واقفة معاه ، خير؟
جه القائد وقف قدامنا ° حبايب قلبي ، اي الاخبار
= احنا كنا داخلين ل حضرتك دلوقتي يا فندم و..
° لاء يا احمد وتدخلوا لي؟ يلا لفوا عشر مرات وادخلولي جوا
= ايوه يا فندم بس..
° مسمعتنيش يا ابو حميد ولا اي؟ يلا يا بطل ابدأوا
سابنا ودخل ف احمد رجع بصلي
= شوفتي؟ انتي السبب ، كالعادة يعني
ضحكت _ معلش والله انا اسفة مش قصدي ، وانت الي جيت تندهلي كان يجي يندهلي حد تاني وخلاص
= تاني ؟؟ هلاقيها من مين ولا مين ، الرحمة يارب
بدأنا نجري ، كان بيبصلي ويرجع يبص قدامه
_ اسأل يا احمد السؤال الي تاعبك
= انا؟ إطلاقاً يبنتي ، مين دا بقي؟
وقفت _ صديق العيلة
= اه ، بعد العشر لفات فكريني اقولك حاجة
خلصنا لف ووقفنا واحنا بننهج
_ قول بسرعة عشان ندخل هو زمانه علي اخره مننا
= بصي.. ، يا مريم كنت عاوز اقول اني..
_ ايوه ؟
= هو يعني الموضوع وما فيه أنه..
_ أحمد انت بتعلق؟ مفيش وقت بقولك ، قول علي طول
=..
_ طيب لازم ندخل حالا ، يلا ؟
كان بيبصلي ب غضب ف رديت ب استغراب
_ هو انا عملت اي تاني؟
= بصي ، انا مش بعرف اتكلم اوي ومش عارف ليه عاوز اقولك ، انا مشوفتش بنت زيك ، يمكن في الاول فعلاً كان بينا عداوة ، لكن بعد كده ؟ لما كسبتيني في الشطرنج ، خلتيني ارجع ادخل البحر من تاني ، خلتيني افهم إن الي حصل مع صاحبي زمان مش بسببي ، لما ضربتي معايا الرجالة ولما خليتي ابويا ياخد نفسه تاني ، كل حاجة بتعمليها بتخليني.. ، اول مرة يحصل معايا كده
_ انا مش فاهمة حاجة!
= نعم ؟ مريم انتي مبتفهميش؟
ضحكت _ كلامك حلو اوي يا احمد
ضحك = والله؟ ، انتي بجد مفهمتيش؟
_ الي فهماه أننا لازم ندخل بدل ما نبقي عبرة للدفعة كلها
° القائد عاوزكم جوا
بصيت لقيت عبدالله في ابتسمتله _ اه احنا كنا داخلين
° ميا؟ شكلك تعبانة من الجري
خدت منه الازازة ف احمد وقعها من ايدي
= اي دا معلش غصب عني
_ انا كنت عطشانة و..
زغرلي = بتقولي حاجة؟
° ممكن اجيبلك واحدة تانية ، ثانية واحدة
= لاء احنا داخلين يا حبيب قلبي ، تبقي تشرب جوا هي
دخلنا وانا قلبي لأول مرة يدق جامد مش عارفة اي السبب! كنت حاسه ب حاجة غريبة ، هو كان عاوز يقول اي؟ لي نظراته بتوترني؟ لي هو أول راجل يوترني؟
دخلنا كلنا وكملنا تدريب وخلصنا ، طلعت علي اوضتي ومسكت النوتس بتاعتي ، كتبت كل حاجة حصلت النهارده ، كل كلامه كان لغز بالنسبالي ، مش بيعرف يعبر ولا يقول اي حاجة بوضوح ، طب انا مش قادرة افهم لي؟ عشان اول مرة اسمع الكلام دا؟ طب ما أسأله كان قصده اي؟
الصبح نزلت بدري استنيت علي الاستراحة ، جه وقعد جمبي ، خدت نفس طويل وطلعته وانا بغمض عنيا وبزعق _ بص بقي أنا مفهمتش أي حاجة من امبارح وانا هتفهمني حالا
فتحت عيني ف لقيته رافع حاجبه = خلصتي؟
_ أيوة
= مسمعش صوتك بقي تاني النهارده
_ يعني مش هتفهمني؟
= انتي هتفهمي لوحدك ، فعلا ربنا مبيديش كل حاجة
_ أنا مش غبية!
= يشيخة !!!!!
مش عارفة ازاي الوقت مر علي وجودي هنا! ، كم الحاجات الي اكتسبتها مش عارفة أعدها من كترها ، بقيت صبورة اكتر ، بتحمل اكتر ، مفيش حاجة بخاف منها! ، تمارين وتدريبات علمتني إن مش كل حاجة فيها رفاهية ، أننا المفروض نبقي قد الحاجة الي اتحطينا فيها ، كان احسن قرار في حياتي اني اجي هنا .
° يومين الإجازة ، وضبوا شنطكم عشان تلحقوا المترو
بدأ كل حد فينا يجهز شنطته ، نزلنا كانت الساحة وبدأنا نطلع من البوابات ، لمحت احمد واقف بعيد جوا ف دخلت تاني
_ احممم ، انت مش ماشي؟
= لاء ، هفضل هنا
_ لي؟ دا كله كان مستني يومين الإجازة دول من اول ما بدأنا
= الي ماشي ماشي عشان يقضي اليومين مع عيلته ، انا والدي هنا ووالدتي مسافرة في شغل ف هقعد مع مين؟
سكتت وبصتله _ طيب ، عاوز اي أكلة اعملهالك وانا جاية بدل الاكل الي هنعمل بسبب غسيل معدة في مرة هنا ؟
= انتي بتعرفي تطبخي؟
_ يعم أيوة انت فاكرني ست بيت فاشلة ولا اي؟ قول نفسك تاكل اي وهجبهولك وانا جاية
= بتعرفي تعملي بشاميل؟
_ هتبقي تحكم انت ، حاول تقعد مع باباك اليومين دول ، اشوفك علي خير يا احمد
= خلي بالك من نفسك
ابتسمتله ولفيت لقيت في وشي يوسف ف عيني وسعت
_ يوسف !!!!
° عارف إن اجازتك النهارده قولت اجي اوصلك بدل ما تيجي مواصلات
_ اه ، طيب ، امممم يوسف احمد ، احمد يوسف
سلموا علي بعض _ دا احمد معايا هنا في الأكاديمية
° أهلاً وسهلاً ، يلا يمريم ؟
أحمد ميل عليا = خلي صديق العيلة دا يهدي شويه بدل ما اغتاله
ضحكت _ سلام يا احمد
مشينا وركبت العربية ووصلنا البيت ، حضنت بابا وماما وندهت علي ليلي ودخلنا الأوضة
° لازم تحكيلي كل حاجة ، بالتفصيل
_ ماشي يستي ، عاوزة تعرفي اي؟
° مريم انتي بجد كنتي هتغرقي؟
ابتسمت وانا بفتكر _ بس ربنا بعتلي طوق نجاه ، سحبني من البحر ، كنت هموت من الخوف يا ليلي ، الدنيا كانت ضلمة ، جسمي كله كان متجمد كنت فاكرة إني خلاص مش هعرف اخد نفسي تاني ، لكن احمد جه وشدني رغم أنه بيخاف من البحر ، ولما قطاع الطرق الي قولتلك عليهم طلعوا علينا كان هو بردو موجود في الوقت المناسب ، هي شخصيته متتفهمش بس هو راجل طيب وشهم وجدع ولذيذ موت
° ها؟
_ في اي مالك؟
حطت أيدها علي جبهتي ° انتي بتشكري في راجل؟ انتي سخنة؟
بصتلي وضيقت عينها ° مريم ؟؟؟؟؟؟
_ مش الي في دماغك
° يعني مش بتحبيه؟
_ أحب مين ؟
° أحمد
_ لاء طبعاً ، انا عمري ما حبيت حد
° مهو عشان عمرك ما حبيتي ف مش فاهمة مشاعرك يا ام العريف ، انتي بجد مش قادرة تميزي انك معجبة بيه؟ دي واضحة اوي !!!!!
_ معجبة ب مين؟
° اصوت؟؟؟ احمد
_ يا بنتي بقولك مش في دماغي
° اه اه ، طيب بكرة نشوف
_ اه صحيح بمناسبة بكرة ، فكريني نعمل بشاميل اصل احمد طلبها و..
بصتلي ورفعت حاجبها ° مش انتي مبتطبخيش غير بمزاج ؟ ل القريبين ليكي بس؟ مريم هو انتي مش..
_ ليلي اطلعي برا واطفي النور عشان أنام!
ضحكت وقفلت الباب ، أنا بحبه؟؟ ، ليلي كانت عقلي الي بفكر بيه ساعات كتير ، لما أعجز عن فهم أي حاجة بتدور حواليا كنت بسألها هي وهي بتجاوب ، معقول كل حاجة حسيتها اتجاه احمد كانت حب؟ ، كلامه ليا كان قصده بيه أنه بيحبني!!!!!
بعدها بيوم بليل كنت بجهز البشاميل وليلي واقفة معايا ، خلصتها وحطيتها في علبة وحضرت شنطتي من جديد ، ودعتهم وركبت المترو ووصلت الصبح بدري ، قعدت علي الاستراحة وانا بتلفت لأي حد يجي ، جه قعد علي الاستراحة اخيرا
_ازيك يا احمد ؟
=..
_ عملت حاجة الإجازة دي ولا فضلت هنا؟
= ..
_ انت كويس؟
= أيوة انا تمام
طلعت من شنطتي العلبة بتاعتي _ اتفضل
= اي دا؟
_ البشاميل! يلا دوق وقولي رأيك
= لاء متشكر مش عاوز حاجة ، تسلمي
_ مالك يا احمد؟ فيه حاجة ؟
=..
_ انت لي بقت معاملتك زي الزفت ؟
= افندم؟
_ أيوة رجعت ل معاملتك الي زي الأول ، الي بتعاملها ل اي بنت ، كنت بتعاملني حلو شويه عنهم و..
= انتي مكنتيش زي اي بنت يمريم ، عشان كده مكنش ينفع اعاملك بطريقتي مع الكل
_ ها؟
وقفت قدامه _ استني يا احمد ، انت بترمي كلام وتخليني افضل اتسحل فيه ومش بلاقي اي رد وبفضل اسأل نفسي وادور علي اجابات ومش بعرف ف انت مينفعش تدخل دلوقتي عشان انا عاوزة افهم انت..
= انا بحبك يا مريم
_ ها؟
= خلاص كده فهمتي؟
سابني ومشي!! ، بيحبني؟ دا الي كان بيحاول يقوله قبل كده؟ بدأ نفسي يعلي ف طلعت بخاختي وخدتها اهو دا الي بيجيلنا من أحمد!
بدأنا تمارين وفي وقت الغدا طلعت العلبة وحطيتها قدامه
= انا مكنش قصدي اي حاجة من الي قولتها
_ اه
= اي كلام في اي كلام بجد مكنش اعرف بقول اي
_ اه
= لما عقلي بيقف مبفكرش في اي حاجة
_ اه
= يعني فهمتي أنه كان غصب عني؟
_ اه
= طيب ، بعد اذنك
_ أحمد
وقف وبصلي ف ضحكت _ الي عرفاه إن ممكن العقل يفلت منه حاجات غصب عننا ، لكن عينك؟ معتقدش
فتح العلبة وهو متوتر وبدأ ياكل = تسلم ايدك ، طعمها حلو اوي ، متشكر
خلصنا تمارين والقائد سمحلنا ب ساعتين نخرج فيهم ، روحنا السوق الكبير وبدأ كل جروب يمشي مع بعضه، روحت المكتبة واشتريت كتاب جديد وطلعت ، جبت عناب وقعدت علي مصطبة عشان اشربه
° أنا اسفة يطنط
بنت صغيرة كانت بتجري ف خبطت فيا ف وقع علي بلوزتي _ لا يحبيبت قلبي العصير وقع عادي ، طنط دي الي زعلتني
ضحكت ° انا بجد اسفة ، مكنش قصدي
_ ولا يهمك يكتكوتة ، مامتك فين؟
° جاية ورايا
_ تحبي اجيبلك عصير وتستنيها هنا؟
هزت راسها ف روحت جبت اتنين تانيين _ ألف هنا يحبيبتي
= مريم ؟ اي الي حصل؟
_ مفيش ، كانت بتلعب ف خبطت فيا
= مش هينفع تمشي كده خالص ، استني
قلع الجاكت بتاعه = إلبسي دا
خدته لبسته وقفلته _ شكراً
قعدنا ، مامت البنت جت وخدتها ف بقينا لوحدنا
= جبتي كتاب جديد؟
_ اه
= اه ، كويس
_ امممم
= نبطل استعباط بقي ياريت ؟
_ افندم؟
= أنا كنت قاصد كل حاجة قولتهالك قبل كده ، مريم أنا بحبك ، انا محبتش حد غيرك ، طول الوقت كنت في مأموريات بين الشغل وتدريبات في الأكاديمية ، كانت دايما طريقتي ناشفة ومش بعرف اتكلم ولا عاوز اقرب من حد ، لكن معاكي انتي؟ عاوز أفضل جمبك علي طول
بصيت الناحية التانية وانا بخرج نفسي ورجعت بصيتله
= ضايقتك؟
_ انت الراجل الوحيد الي مستحيل تضايقني يا احمد
بصلي = بجد!!!!
بصيت علي الساعة بتاعتي _ يا خبر يلا بينا بسرعة نرجع انا معتش فيا صحة ل اللف حوالين السور تاني
انا كمان مكنتش عارفة افكر في الكلام ، كنت معاه بقول الكلام وخلاص! ، اكتشفت بعد الليلة دي اني انا كمان بحبه ، كان أول راجل أحبه ، اول راجل مخافش منه ، اول راجل احب وجوده ، اول مرة كنت اشوف راجل وسيم ، سوي ، طيب ، كويس ، كان احمد .
رنيت علي ليلي وظهرت الفرحة في صوتي
_ احمد قال إنه بيحبني !!!!
صوتت ° متهزريش! مش قولتلك ؟ أخيرا دا انتوا حجر
صوتها ارتخي _ في أي يا ليلي مالك؟
° مريم ، طب ويوسف؟؟ وجوازك؟ انتي نسيتي ؟
سكت وانا باخد نفسي ، ازاي انسي حاجة زي دي؟ ، أنا كنت واعدة بابا! ، كنا خلاص متفقين!! ، ازاي هخلف وعدي معاه !
_ اقفلي دلوقتي يا ليلي عشان محتاجة أنام
قفلت معاها وقعدت علي السرير ، دماغي سحلتني في ميت سيناريو كان كلهم اسوأ من بعض لو اتجوزت يوسف ، لو متجوزتش الراجل الي بحبه!
الصبح نزلت علي الاستراحة ، مكنتش نمت ف كان باين عليا الإرهاق
° مريم؟ ازيك ؟
_ اه ازيك يا عبدالله
° الحمد لله ، مالك ؟ شكلك متغير
_ منمتش كويس بس امبارح ، بس أنا تمام
° تحبي اجيبلك فطار معايا؟
_ تسلم يا عبدالله متشكرة
= حبيب قلبي بقت تخص دلوقتي
_ احمد!!!!
= استني انتي
عبدالله رجع بصله ° تخص يعني اي؟
= يعني زي ما فهمت ، مرات اخوك
° انت ومريم !!!!
= عقبالك
° الف مبروك ، بعد اذنك
عبدالله مشي وأحمد قعد جمبي وهو بيرجع ضهره ل ورا
ضحكت _ انت مستحيل تبقي طبيعي!
= قولت اجيبهاله من الآخر عشان لو لقيتكم انتوا الاتنين سوا في مكان أو قريب منك ب خمسه متر هديكم رصاصتين تمددكم ويبقي عداني العيب ساعتها
_ أحمد انت بجد عاوز تتجوزني؟
= طب اي؟ اتسلي؟
_ أنا بتكلم بجد
= اه والله عاوز اتجوزك ، نخلص بس الكام شهر بتوع الأكاديمية دول وهاجي اقابل أهلك
_..
= انتي مش مبسوطة ؟؟
_..
= مالك يا مريم ؟ حصل حاجة ؟
صاحبه نده عليه = أيوة جاي ، بقولك أي هروح اشوفه عاوز اي وجايلك ، هجيبلك اكل وعصير عشان تفوقي
قام من مكانه _ احمد أنا مخطوبة
رجع بصلي = انتي بتقولي ايه !!!
حدث في الأكاديمية 🤍.
مريم سمير 🤍.
_ الجزء الخامس والاخير _
_ احمد أنا مخطوبة
رجع بصلي = انتي بتقولي ايه !!!
_..
قعد جمبي = بتهزري صح؟ ، مهو اكيد بتهزري
_ أنا هفهمك علي كل حاجة
= تفهميني! تفهميني اي؟ انتي مخطوبة فعلاً ؟
_ أيوة بس انا..
= أنتي اي؟ مقولتليش لي قبل كده؟ مجتش قدامك فرصة واحدة تقوليلي فيها انك مخطوبة!!!
_ انت لو قولت اي حاجة هيبقي معاك حق فيها ، بس كل دا كان غصب عني
= يوسف؟ الي قولتيلي أنه صديق العيلة؟
_..
= أنا بجد مش مصدق ، انتي كدبتي عليا ؟
_ أنا مكنش قصدي ، أنا معرفتش اقولك وقتها عشان..
= أنا مش هصدقك في أي كلمة هتقوليها تاني!
قام مشي من قدامي ، كان عنده حق ميسمعنيش! ، يمكن دا الصح؟ ، كان بابا دايما محافظ علي اتفاقاته ، كلمتي ليه كانت زي السيف مينفعش ارجع فيها ، لكن المرادي الاتفاق علي حياتي! وحبي الأول الي محستش زيه قبل كده؟
وقفت بعيد واتصلت ب ليلي
_ أنا قولت ل احمد اني مخطوبة
° طب اهدي ، أهدي وبطلي عياط هنلاقي حل
_ خلاص كده كل حاجة انتهت
° حاولي مع باباكي ، يمكن يقتنع وتخلصي من الي انتي فيه دا
_ تفتكري؟
° اول مرة تاخدي إجازة هنكلمه احنا الاتنين ، بس انتي اهدي ومعتيش تعيطي ، افضلي دايما جاحدة زي منتي
ضحكت _ دا وقته؟
° اهدي وكل حاجة هتبقي تمام
_ ان شاء الله ، هقفل معاكي عشان القائد جه
° ماشي يحبيبتي خلي بالك من نفسك
قفلت معاها ووقفت في الطابور
° هنبدأ تشابك وبعد كده هتضربوا نار ، المرادي مش تشابك بين بنات مع بعض ورجالة مع بعض ، لا كلهم مع بعض
البنات رجعت ل ورا ' قصد حضرتك إني هتشابك مع راجل ؟
° ولي لاء؟ لازم تتعودي علي كل الظروف ، مهو قطاع الطرق والمجرمين معظمهم رجالة ، تقدري تقوليلي لو اتعرضي للموقف دا هتعملي اي!!
'..
° حلو ، يبقي كده متفقين ، أبدأوا
كان قصادي احمد ، وشه عابس و جد ، رجع زي اول مرة شوفته فيها ! ، القائد ادي الاشارة ووقفت قدامه ، بصيتله ف بص بعيد
_ لو مش حابب ندرب سوا ممكن اندهلك بنت تانية
= أيوة مش حابب
نانسي جت وقفت جمبي ° طب وأنا ؟
= ماشي ، ممكن نبدأ ؟
رجعت خطوات ل ورا ف خبطت في عبدالله
_ أنا آسفة معلش مخدش بالي
° ولا يهمك ، انتي ملكيش شريك ؟
_ لاء
° طب تعالي نبدأ سوا ، اه استني ، أحمد..
_ عادي لو بقينا سوا
° أيوة بس هو قال إنكم هتتجوزوا و..
_ ممكن نبدأ ؟ أنا مش عاوزة اتكلم في أي حاجة
هز راسه ب تفهم وبدأنا تدريب ، مكنتش مركزة نهائي معرفتش اتفادي ولو حركة واحدة!!
° أي حصلك يمريم؟ انتي كنتي اشطر واحدة هنا
_ أنا اسفة يفندم معلش ، تعبانة شوية
° روحي اقعدي علي الاستراحة لحد ما نخلص ، بس هتبقي في تدريب الطلق الناري
_ متشكرة يفندم
روحت قعدت علي الاستراحة وانا عيني عليه ، كانت نانسي بتقرب منه وهو بيبعد ك عادته مع أي بنت ، مكنش عارف يعمل أي ف ضحكت! ، كنت فعلا البنت الوحيدة الي بيعرف يتعامل معاها! ، كل تصرفاته وكل كلام البنات عليه بس كان بيجي عندي ويفصل ، يقول كل الي في دماغه ، يبان علي عينه قبل ما ينطق ، يارتني كنت قابلته من زمان! كانوا دايما بيقولوا الحب حلو بس لازم تعيش بسببه في قلق طول الوقت ، دلوقتي بس فهمت يعني اي .
عبدالله جه وقعد علي الاستراحة معايا
° انتي كويسة ؟
_ اه الحمد لله ، شوية إرهاق بس
° مبتعرفيش تكدبي يمريم ، هو انتي زعلانة من حاجة ؟
_..
بص علي نانسي وأحمد ورجع بصلي
° أحمد مش كده؟ ، انتوا اتخانقتوا ؟
_ يمكن مينفعش يبقي بينا حاجة
° لي ؟ انتي مش بتحبيه؟
_..
° هو بيحبك أنا متأكد ، لما كان بيشوف راجل قريب منك ب خمسة متر مكنتيش بتشوفي نظراته وتصرفاته عاملة ازاي ، كنت فاكر أنه عادي لحد ما قال من شويه أنه هيتجوزك ف فهمت كل الي كان بيعمله ، انتوا الاتنين شبه بعض ، انتي عرفتي تحركي الحجر وهو عرف يخليكي تحبي
_ عرفت منين أنه بحبه؟
° يجدعان بيبان والله ، أنا استاذ في الحاجات دي
ضحكت _ بس حكايتنا معقدة اوي ، صعب
° ولا صعب ولا حاجة ، إن شاء الله هتتحل
_ إن شاء الله ، متشكرة اوي يا عبدالله ، انت طيب اوي
° وانتي كمان طيبة ، معلش لو جيت عليكي في التدريب
_ انت عارف اني لو كنت فيقالك كان زماني عدماك العافية
ضحكنا احنا الاتنين ، احمد جه وقف في اخر الاستراحة وهو بيمسح جسمه بالفوطة ، كان باصصلنا وهو متعصب ف سكتت ° بقولك أي أنا هقوم أنا لو وقعت تحت أيده هيسكني المستشفى
قام ف رجعت بصيت ل احمد ، بص قدامه كانت نانسي
° هتعلمني بقي المرادي ازاي أطلق نار احسن من المرة الي فاتت
= طيب
قومت من مكاني وانا متعصبة ، هو الي بيحصل دا هيخلص أمتي!! ، روحنا الموقع ووقفنا كلنا نضرب نار ، كانوا هما الاتنين جمبي ، حاولت اتجاهل تصرفات نانسي لحد ما مسكت أيده! ، السلاح وقع منه وهو متوتر
_ خلاص يا نانسي! في أي ؟
° هو أي الي في أي ؟ حد كلمك؟
_ اي مبتعرفيش تتعلمي شفوي؟ لازم يعني تمسكي الزناد معاه؟
° دا انتي غريبة اوي! حد اشتكالك؟
_ أيوة بس..
= محدش قالك اني مضايق عشان تبدأي دفاع!
_ لاء انت مضايق
= وانا بقولك مش مضايق هتضايقيني بالعافية!!
بصيت قدامي وانا متعصبة ، بدأت اضرب نار بسرعة ، كان كل الطلقات بتيجي علي الهدف ، خلصت ولقيت الكل باصصلي ، القائد شكر فيا وخلصنا تدريب وروحنا كلنا ، خلصنا أكل وطلعنا كلنا علي الساحة نقعد لحد ما القائد يجيلنا علي برا
_ أحمد ، كنت عاوزة اتكلم معاك
° مش هينفع خالص دلوقتي يا مريم عشان بنتكلم في موضوع مهم
بصتلها بملل ورجعت بصيتله _ لو سمحت يا احمد قوم معايا ، أنا محتاجة اكلمك في حاجة مهمة
= أنا مش فاضي
بصيتله ب غضب وقولت ب انفعال
_ لاء مهو مش بمزاجك! ، أنا قولت انا عاوزة اتكلم يعني هتكلم
قام وقف قدامي = عاوزة اي؟
شاورتله نبعد شويه ، مشيت ف جه ورايا
وقفت وانا مربعة أيدي _ هو أي الي بتعمله دا؟
= أي الي بعمله؟
_ نانسي!!
= مالها ؟
_ أحمد بطل طريقتك دي
= انتي ملكيش دعوة بيا ، أي حاجة بعملها متخصكيش
_..
= مريم احنا مينفعش يبقي لينا علاقة ببعض ، انسي أي حاجة أنا قولتها قبل كده ، أنا مكنش عارف أنا بقول ايه ، لا عارف معني الكلام ولا حاسه ولا كنت عارف بقوله ازاي اصلا
جه يمشي ف وقفت قدامه _ يعني انت مش بتحبني؟
=..
_ مكنتش حاسس ب الكلام الي بتقولهولي؟
= أيوة
_ انت كداب
= وانتي كمان كدابة! ، وفوق كل دا ضحكتي عليا
_ أنا عمري ما كان قصدي اضحك عليك يا احمد ، كل حاجة مش ب أيدي والله ما ب أيدي
= أنا مش عاوز افتح الموضوع دا تاني
_ بطل تصرفاتك مع نانسي أنا عارفة انك مش مبسوط وانت بتعمل كده وبتعمل كده عشان تبعدني عنك
= غلطانة ، أنا بعمل كده عشان عاوز اعمل كده
_ كان بان عليك!
= انتي عاوزة أي يمريم؟ عاوزة مني اي!!
سكتت وبصيتله وخدت نفسي = الواضح إن معندكيش أي إجابة ف أنتي..
_ أنا بحبك
= ايه ؟؟
القائد نده علينا كلنا عشان نتجمع في الساحة تاني ، روحنا واحنا الاتنين مش مستوعبين الي قولته! منا لو التربية عدت من قدام شارعنا مكنتش عملت كده .
كملنا تدريبات لحد بليل ، خلصنا وبدأنا كل واحد يطلع علي الأوض ، كنت حاسه اني مخنوقة ف طلعت برا الأكاديمية ، تاني!
روحت قعدت علي الشط ، رجعت ضهري ل ورا وانا بفكر في كل حاجة حصلت من اول ما جيت هنا ، قطع شرودي = انتي ناوية تخليني انزل البحر تاني!
_ أحمد ؟
= أي الي جابك هنا؟
قومت من مكاني وبصيتله _ دا انت مراقبني بقي!
= ها؟ بالصدفة
_ يا راجل!!
= مش هتدخلي؟
خليني شويه أنا محتاجة اشم هوا ، قعدنا علي الشط
فضلنا ساكتين شويه ف بصلي = كنتي قولتي أي قبل ما القائد ينده علينا ؟
_ الجو برد اوي ، يلا ندخل
= مريم؟
_..
= خلصي بدل ما ازعلك
ضحكت _ هي دي طريقة كلام مع بنت؟
= ..
بصيت قدامي _ بابا عاوز يجوزني يوسف عشان شايف أنه عريس كويس ،عارفه وعارف باباه من زمان بحكم انهم صحاب ، يوسف مكنش اختيار بالنسبالي ، أنا كبرت لقيته قدامي ، كانوا دايماً بيقولوا قدامنا مريم ل يوسف ويوسف ل مريم ، مكنتش بحس ب أي حاجة ، كنت عاوزة ابقي عروسة مبسوطة مش عروسة متجوزة جوازة تتحسد عليها ، عشان اجي هنا اتفقت مع بابا اني موافقة علي جوازي من يوسف ، كنت شايفة إن مدام جيت الأكاديمية اني خلاص مش هعوز حاجة تاني ، مكنتش اعرف اني هشوفك ، اني هخبط فيك ونتخانق ، انك هتنقذ حياتي وتخرجني من قلب البحر ، انك كنت دايما بتسمعني وجمبي ، لو كنت اعرف مكنتش وافقت ، مكنش اتفرض عليا ، مش عارفة المفروض اعمل اي لما ارجع مع بابا ، دماغي بتاخدني وتجيبني وانا في النص مش عارفة اعمل ايه ، انا مش عاوزة اتجوزه
طلع منديل من جيبه وادهولي = اهدي طيب
مسحت وشي وبصيتله = يعني انتي بتحبيني؟
_ يعني مش هندخل بردو يجدعان؟
ضحك = أنا هعمل أي حاجة عشان متعمليش حاجة غصب عنك
_ بجد؟
= بجد ، بس ساعتها هتتجوزيني
سكتت ، ياه ، عقاب صعب جدا ربنا يكتبه علينا
فضلنا يومها نضحك ونتكلم كتير ، كان الوقت معاه لذيذ ، خفيف ، مش عوزاه يخلص ابدا ،
الشروق ظهر ف بصينا لبعض
_ يا نهار أبيض !!!!!!
طلعنا نجري وكل واحد وصل ل اوضته ودخلها ، معرفتش انام ف طلعت النوتس ادون فيها كل حاجة حصلت ،
من بعدها كل البنات تقريباً خدوا بالهم أنه بيحبني أنا ، الحب عاوز شجاعة اه بس دا فضحنا من غير ما يقصد ، مش عارفة ازاي خلصنا الأكاديمية! ، مرت ست شهور ، احسن ست شهور في حياتي ، بقيت واحدة تانية ، فاهمة اكتر ، احسن ، عندها خبرة لأي حاجة ممكن تواجهها بعد كده .
رجعت البيت بعد ما اتفقت مع احمد اني هكلم بابا ف موضوعنا ، سلمت عليهم وخدت ليلي ودخلت الأوضة
_ هنكلمه النهارده ؟
° أيوة ، مكنتش متخيلة اني ممكن اشوفك في يوم واقعة
_ خلاص يا ليلي
° مش كنتي بتقولي الرجالة صنف ميتعاشرش
_ خلاص يا حبيبتي
° هبلة مين الي تحب راجل وتثق فيه
_ أنا الهبلة يا ليلي ارحميني وخلصيني
° طب تعالي نطلعله
طلعنا وقعدت قدامه ، ساب الجرنال وبصلي
' ها يستي ارتاحي لما عملتي الي عوزاه؟
_ اه يا حبيبي متحرمش منك ابدا
' ابو يوسف اتصل بيا من شوية عشان نحدد ميعاد كتب الكتاب
_ أيه؟؟؟؟
' ايه !!!! مالك؟
_ بص يا بابا ، أنا مش موافقة ، أنا مش عاوزة اتجوز يوسف ، لا هو شبهي ولا أنا شبهه ، ومش بحبه و..
' أي الي بتقوليه دا؟ حب أي ؟ الراجل جاهز وانا خلاص اديتله كلمتي ، ابقي حبيه بعد الجواز محدش منعك
_ بابا افهمني عشان خاطري
' انتي من أمتي بتخلفي كلامك معايا أو مش بتنفذي الي بقول عليه؟
_ مينفعش المرادي ، انا كده الي هدفع تمن كل حاجة ، مش هعرف اراضيك علي حساب عمري الجاي ، أنا اسفة يا بابا مش هقدر
' أنا مش عاوز دلع بنات ، أنا قولت الي عندي والي هيحصل ، انتي خلاص هتتجوزيه
قام ومشي ، عيطت _ مستحيل اعمل الي هو عاوزه ، مستحيل
° طب اهدي اهدي سنحاول معاه تاني يمكن مضغوط من الشغل او حاجة
فوني رن كان أحمد ف رديت _ أيوة يا احمد
= صوتك ماله؟
_ بابا مقتنعش ب أي كلام قولته
= أنا هكلمه
_ لاء لاء ارجوك يا احمد بلاش دلوقتي ، أنا هحاول مرة كمان
= طب اهدي طيب ، هنلاقي طريقة إن شاء الله
قفلت معاه ورجعت بصيت ل ليلي
° طب لي منخليش يوسف الي ميكونش عاوز يتجوزك؟
_ نعم؟
° يعني لو هو مرضاش يتجوزك مش هيبقي فيه جواز مش أصله!!
_ يبنت اللعيبة ، طب المفروض اعملها ازاي؟
° أنا الي هقولك؟ دا انتي تطفشي بلد
_ حبيبت قلبي متحرمش منك
مسكت الفون وكلمت يوسف قولتله ننزل نشرب قهوة فيه كافيه ، قومت لبست ونزلت
° ازيك يا مريم عاملة اي؟
_ الحمد لله كويسة ، انت أي الاخبار
° تمام والله ، خلصتي كده الأكاديمية مش كده ؟
_ أيوة
° كويس ، والدي كلم باباكي عشان..
_ كتب الكتاب
° هو قالك؟ طب كويس
_ أنت مقتنع أننا مع بعض هنعرف ننجح في الجواز ؟
° هي عملية؟ لي بتتكلمي أنها هتبقي بالقلم والورقة؟
_ عشان هي هتبقي فعلا كده يا يوسف! ، مفيش بينا مشاعر عشان نقدر نعدي بيها أي حاجة ممكن تقابلنا ، أنا لو قصرت في حاجة هتشوف اني غلطت لكن لو بتحبني هتعدهالي ، مع كل غلطة هيبقي بينا مسافة أوسع
° مفيش جواز من غير مشاكل!
_ معاك حق ، بس فيه ناس بتعرف تتعامل مع المشاكل ، المشاكل بتقربهم مبتبعدهومش
° أنا مبفهمش في الفلسفة دي
_ طيب يا يوسف ، هجبهالك علي بلاطة؟ أنا مبحبكش ، ومش عاوزة اتجوزك
زعق ° مش عاوزة اي؟ ، انتي بتقوليلي أنا الكلام دا؟ ، مفيش واحدة تعرف ترفضني انتي كنتي تحلمي ب واحد زيي اصلا ؟ أنا قاعد اقول هعدي هعدي لكن انتي زوديها اوي ومحتاجة تفوقي
رفع أيده ف غمضت عيني ب خوف ، فتحت عيني لقيت احمد ماسك أيده ولويها وراه ، أنا ببعتله اللوكيشن لي والله ؟ أنا بعرفه كل حاجة بعملها ليييييي
= انت هتعمل اي؟ انت هتمد ايدك علي مين؟ دا انا امشيك من غير دراع يالا
° انت بتعمل اي؟ أنا هعرفك ازاي تعمل كده
= أنتي مقولتلوش اني ظابط؟
_ مجتش مناسبة
= بتسقطي حاجات مهمة يا مريم طب لي كده؟
يوسف سكتت ف ساب أيده = احمد ربنا اني هسيبك تمشي علي رجليك ، لو فكرت تبصلها تاني هندمك انت سامع؟
بصله ب غصب ورجع بصلي _ يعني ، هذا هو ذوقي ، بس ابويا لو عرف في ميدان عام واحنا الاتنين هنتشنق فيه
وصلني على البيت _ امشي انت ، هكلمك لو حصل أي حاجة جديدة
= طب خلي بالك من نفسك
_ حاضر وانت كمان
طلعت لقيت بابا موجود ف قعدت قدامه
_ بابا ، أنا كنت مع يوسف دلوقتي ، كان هيمد أيده عليا
° اي؟ بتقولي اي؟
_ كان هيمد أيده عليا ولسه مبقاش بينا حاجة ، دا انت عمرك ما مديت ايدك عليا
بابا مسك الفون بتاعه وهو متعصب وكلم باباه ، حصلت خناقة بينهم علي الفون انتهت ب فسخ خطوبتي ، طب لي كده يجماعة؟
° معلش يا حبيبتي ، دي غلطتي
_ ولا يهمك يبابا ، كده كده مش عوزاه ف عادي
° ربنا يعوضك خير
_ عوضني خلاص ، بقولك أي فيه واحد كان معايا في الأكاديمية عاوز يجي يتقدملي
° نعم يختي؟ ، واحد دا مين دا ؟
الباب خبط ف فتحه لقيته احمد
_ انت مكنتش مشيت !!!!
= صوت ابوكي كان مسمع ل تحت ف قولت اطلع اخلص فيكي
° مين حضرته؟
= معاك الظابط احمد عاصم
° خير يباشا؟
_ اتلم دا ابويا
= جاي اتقدم ل بنت حضرتك
بابا بصلي ° هو دا؟
هزيت راسي ب اه ° طب اتفضل جوا
دخلوا هما الاتنين الصالون ، كلمت ليلي تنزلي ودخلتلي الأوضة
_ قاعد مع بابا برا
صوتت ° أيوة شوفته ، أنا مش مصدقة
اتنطط _ أخيراً ، دا كان كابوس
أخيرا! قاعدة دلوقتي مع الراجل الوحيد الي حبيته ، بننقي الشبكة في منتهي الهدوء والحب
= انتي لو مخلصتيش هكسر عليكي المحل
_ انت بتكلم مين كده؟
= دا رابع محل دهب ندخله ، ورايا مأمورية هتفصل بسببك
_ بقولك شبكتنا ولازم نختارها بالراحة
= بقولك هترفد وهنشحت
_ انت العيشة معاك بقت لاء تطاق ، أنا مش هشتري حاجة
طلع المسدس حطه علي دماغي = بتقولي حاجة ؟
_ الدبلة دي لو سمحت والخاتم دا ، لفهم في ورقة وهاتهم
= اه بحسب
عملنا خطوبة مرت محدش حس بيها ، أنا نقطة ضعفي البساطة _ شماريخ؟ شماريخ يا احمد
= جايب طلق معايا في المسدس هحي الليلة بيه
_ هي دي الخطوبة الي في السمبلة منه؟
= مع نفسك بقي دا انا مصدقت
تمت 🤍.
حدث في الأكاديمية 🤍.
مريم سمير 🤍.
تعليقات
إرسال تعليق