مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت مازن وشهد كامل ورووووعه شهد صلاح 

 *مازن هو انت بجد بتحبي

"طبعاً ي عيوني مبحبش قدك

صوته كان غالب عليه النوم والارهاق بعد يوم شغل طويل وكذا مشوار بعده مع باباه بس مش بيهون عليه يسيبني وينام وهو عارف ان الوقت بالنسبالي بدري وكالعاده لسه عندي سهره طويله للصبح بقضيها في اللاشيء متخرجه بقي ومفيش شغل ففاضيه وكمان معنديش حد غيره اقعد اتكلم معاه صحابي كتير بس مفيش حد قريب نتكلم بشكل يومي بأختصار يعني صاحبه الكل اللي معرفتش تعمل صاحبه قريبه تفضل جمبها وكمان مليش غير اخت واحده متجوزه وابنها صغير مطلع عينيها معندناش ي حبيبتي وقت تتنفس حتي

"ها ي شهدي محكتليش عن الروايه الجديده اللي جبتيها

*بكره إن شاء الله اكون خلصتها واحكيهالك كلها ودلوقتي نام بقي وارتاح علشان تعرف تصحي بدري وانا كمان هحاول يمكن تحصل المعجزه و نومي يتظبط

مكنش راضي وحاول يقنعني أنه فايق وهيسهر معايا وهو في الحقيقة بيحارب أنه مينامش وهو بيكلمني أصلاً لحد ما اقنعته اني فعلاً مش زعلانه وبجد هحاول .أنام

جميل اوي مازن هديه كبيره من ربنا بحاول بكل طاقتي اني احافظ عليها وطول الوقت مرعوبه افشل

''بعد كام يوم كانت خطوبه صاحبه لبست دريس اسود وطرحه وهيلز لونهم برجندي وهو كان لابس بدله سوده تجنن عليه وكنت حاسه شكلنا حلو اوي وحقيقي كنت مبسوطه اوي واحنا رايحين وقعدت اتصور كتير في الطريق وأصور فيه وهو سايق وطبعاً لما وصلنا على باب القاعه مردتش ادخل قبل ما ناخد سوي صور كتير حلوه والحمدلله اني اخدتهم بجد علشان من بعدها للأسف حالتي اتغيرت 180 درجه واكيد العياط بتاع اخر اليوم مكنش يسمح معاه صور إطلاقاً

*جميله اوي سلمي دي

"مفيش اجمل منك يا حبيبتي

ابتسمت ببهوت علي جملته السريعه والتلقائيه بس احساسي الداخلي بالغضب وبطني اللي بدأت توجعني وعيوني اللي بتهددني أنها سيكا وهتدمع كلها حاجات خليتني مسكتش علي كده وإلا احتمال كبير على بالليل اكون فرقعت

*لا بس شكلكوا صحاب يعني حبيبتي طول الخطوبه مقامتش من جمبنا

"لا عادي كل الحكايه أنها ملهاش كلام كتير مع حد تاني في الشركه هي يدوب مبقلهاش كام شهر ومن ساعه ما جت وهي شغلها معايا أنا ويونس بس واحنا زمايل مش اكتر وكل كلامنا في الشغل حتي هي عرفت بالصدفه أنه عامل خطوبته فعزمها من باب الذوق يعني ومتوقعناش أنها تيجي أصلاً

*امممم لا جدعه و واضح انها شاطره اوي كمان طول ما انت مع يونس ماسكه الموبايل بتاعها وساكته ولما بتيجي تقعد معايا تروح سايباه وتمسكك رغي عن الشغل

"مش مقصوده اكيد ي حبيبتي انتي عارفه أننا الفتره دي مطغوطين جامد وبنجهز لكذا حاجه شغالين عليها سوي

*فحبكت يعني

اتكلمت بنرفزه وأنا بلف ابصله وهو سايق لأول مرة من ساعه ما اتحركنا وفي اللحظه ده دور وشه وبصلي بهدوء وصمت وهو رافع حواجبه بمنتهي الاستنكار لطريقتي وأسلوبي العصبي اللي بيضايقه بزياده وانا كمان بكرهه نفسي لما اعصابي بتفلت وبظهر شخصيتي العصبيه الشعنونه دي قدامه وبخاف يقرر في مره يبعد عني ويشوف أننا مينفعش نكون مع بعض فتلقائي أنا اللي بعيط وبنهار وهو للحق أكتر شخص متفاهم وهادي قابلته في حياتي وكمان حنيه الدنيا كلها فيه وبصراحه

عمري ما هونت عليه

زي دلوقتى كده لما دموعي نزلت تلقائي اول ما بصيت جامد في عيونه وشوفت زعله اللي ابتدأ يظهر فيهم

*أنا بحبك يا مازن وبغير عليك وهي حلوه وعينها خضرا وما شاء الله شاطره وناجحه يعني ممكن تعجب بيها

عياطي زاد وصوتي اتخنق وانا بعبر عن غيرتي وغيظي من واحده اول ما شوفتها حسيت انها مصدر تهديد ليا رغم اني عارفه مازن كويس وعارفه اخلاقه بس المشكله عندي أنا وأنا مُدركه ده

"اهدي طيب وكفايه عياط ممكن

قالها بتنهيده وهدوء وهو بيوقف العربيه عند الاشاره وبيدَور يسألني بعتاب حسيته بوضوح في نبره صوته

"أنتي ليه دايماً مش مقتنعه بحبي ليكي ليه طول الوقت مصممه تقللي من الحب ده ومش متقبله أنه موجود وكبير وانك عندي اغلي مما تتصوري ومهمه في حياتي زي النفس اللي بتنفسه أنا مفيش واحده تقدر تملي عيني غيرك

الاشاره فتحت واضطر يتحرك وانا لسه بعيط واكتر كمان بعد كلامه وكل اللي قدرت أنطقه كان سؤال واحد قولته بوجع قديم كبر جوايا سنين وخسرت معاه كل ثقتي في نفسي

*ليه ي مازن ليه انا وليه بتحبي كده؟

"لأنك شهد ومش محتاجه تكوني اكتر من كده علشان احبك

وكأنه حط التلج علي ناري سكت تماماً و بطلت عياط وبصيتله بصمت واستغراب وكأني اول مره اشوفه ومن جوايا بسأل ربنا معقول عوضك لقلبي جميل كده ورغم اني كنت سامعه وسواسي وهو بيقولي أن مسيره يزهق ويمشي وعمره ما هيقدر يكمل بس في اللحظه دي معطتلوش اهميه وحبيت احس بحنيه كلامه وهو كمان وقتها متكلمش تاني سابني اهدأ و أُدرك صدقه وكل ثواني عيونه تطمن علي عيوني فقلبي يهدي ويرتاح

فات شهر على اليوم ده اتعامل معايا عادي بعدها ومفتحش الحوار تاني وحتي لما جيت اراضيه قالي أنه ميقدرش يزعل مني وقفل الموضوع خالص

*أنا عاوزه افهم انت ليه مش موافق علي الشغل انت عاوزني افضل قاعده كده

"ي شهد أفهمي أنا مش معترض علي فكره الشغل بالعكس بس تكون حاجه مناسبه ليكي

*وماله الشغل ده

"أولاً مواعيده مش مناسبه نهائي انتي كده هتبقي طول اليوم لحد باليل بره البيت واحنا خلاص كلها كام شهر ونتجوز وانا شايف انك يوم ما تفكري تشتغلي المفروض تكون حاجه بشهادتك وتخصصك ومواعيد مناسبه لحياتك زي مامتك ومامتي كده لكن انتي بالشكل ده عاوزه تبهدلي نفسك على الفاضي وأنا مرضاش ليكي بكده

*يعني أنا كنت لقيت حاجه تانيه وقولت لا

"يستي إن شاء الله هنلاقي بأذن الله كده الجواز يكون وشه حلو عليكي وربنا يرزقك بالوظيفة اللي تستحقيها

*مازن أنا اصلا عاوزه أأجل الفرح

مش عارفه ازاي قولت كده بمنتهي الاندفاع اللي عاوزه اضرب راسي دلوقتي في الحيط بسببه خصوصاً وأنا شايفه الصدمه وخيبه الامل اللي اترسمت علي وش مازن في اللحظه دي وسكوته اللي طَول لدقايق طويله لدرجه اني تخيلته وهو بيقلع الدبله وبيسبني ويمشي بعد ما فقد قدرته اني يتحملني اكتر من كده لحد ما سمعته اتكلم بهدوء وتعب

"ليه ي شهد...بجد ليه ولا انتي لسه مش واثقه في اختيارك ليا

*لا واثقه بس ..بس خايفه

"خايفه مني

*ومني ...خايفه منك ومني ومن الدنيا و اللي ممكن تعمله فينا خايفه...خايفه يجي يوم وتنسي إزاي كنت بتحبني خايفه تبطل تحبني وتبطل تحس بيا و بوجودي ويجي اليوم اللي أبقي فيه مجرد أم اولادك اللي يارب ينعم علينا بيهم ربنا طبعاً ..خايفه نوصل للوقت اللي اجي فيه في نهايه اليوم اقعد جمبك وأنا بتنهد بتعب وبقولك قد ايه أنا تعبت طول اليوم فتقولي معلش سلامتك أنا طالع بقي انام من غير ما يخطر على بالك تسألني طب حاسه بأيه ولا تهتم تعرف يومي مشي إزاي عملت ايه في حاجه محتاجه احكيهالك ولا لا واكيد هبقي محتاجه خايفه تنسي شهد اللي مهما كبرت هتفضل محتجالك تشاركها كل تفاصيل حياتها أنا امي لحد دلوقتي مش بتعمل ايه حاجه غير لما تتشاور مع بابا وتاخد رأيه وعمرها ما بطلت تحكيله كل حاجه حصلت في غيابه سواء معاها أو معانا..وأنا كده شبهها وزيها بزياده أنا مفتقده بشكل ما لكل ده أصلا أنا طول الوقت محتاجه اهتمام وحنيه وحب تخصني انا لوحدي بيه أنا خايفه اصلا أبقي حمل عليك دلوقتي اكتر من لما اكبر كمان والعكس بردو أنا دايماً ببقي محتاجه احس انك جاي تحكيلي أنا بالذات عن يومك وحياتك واي حاجه بتحصل معاك دي بتبقي من اكتر الأوقات المميزه بالنسبالي وببقي فرحانه فرحه عمرك ما هتصدقها لما بتاخد رأيي في أي حاجه تخصك حتي لو لبس هتشتريه بيبقي كفايه بالنسبالي اني الشخص اللي انت بتسأله وبتتكلم معاه... مازن أنا عمر ما حد حبني زي ما انت عملت ولا حسيت اني مهمه في حياه حد قد ما بحس وأنا معاك

وأخيراً قدرت اصارحه بمخاوفي واقوله كتير من اللي حابساه جوايا لأن لمليون أسف أنا شخص دماغه بتسوحه لأقصي درجه وكل يوم عندي فقره ليليه كده انا وهي بطلع منها خسرانه ودموعي مشاركاني خسارتي وحقيقي ومن كل قلبي نفسي اخف من الخوف والقلق الزياده ده ومن غير ما حد يقولي عارفه بردو ان ثقتي في نفسي محتاجه تزيد شويتين تلاته وأصدق حب مازن واخلص بقي من مشاكل الثقه اللي هتخلص عليا دي مازن اصلاً ميستاهلش مني كده أبداً وأنا كل يوم بتأكد من ده وبزعل اوي لما بزعله زي دلوقتى كده من غير قصد للأسف مني وخصوصاً أنه كل مره بيكسفني من نفسي ومن مخاوفي دي

"اللي بيحب بجد ي شهد عمره ما يزهق من اللي بيحبه عمره ما يمل حتي ولو بقي عنده ميه سنه هيبقي عاوز حبيبه جمبه يتونس بيه اللي بيحب لا يمكن يهون عليه وجع ولا تعب اللي بيحبه بالعكس بيبقي دايماً نفسه يشيل عنه كل تعب الدنيا علشان يشوف الراحه في عينيه وأنا بحبك بجد بحبك من كل قلبي بكل تفصيله فيكي ومن ساعه ما حبيتك وانا مبقتش اتمني حاجه من الدنيا غير سعادتك نفسي تعيشي معايا لأخر ثانيه في عمري وأنتي مبسوطه بدعي ربنا في كل وقت اني اكون سبب في سعادتك وأنه يقدرني اكون زوج صالح ليكي وأنا بوعدك ي شهد اني اتقي ربنا فيكي وافضل احاول طول عمري بكل الطرق اني اقتدي بسيدنا محمد عليه افضل الصلاه والسلام في تعاملي معاكي وأنتي تستاهلي ده يا شهدي

*أنا بحبك اوي اوي يا مازن

قولتها وأنا حاسه قلبي هيخرج من ضلوعي خلاص وابتسامتي ماليه وشي وده ممنعش طبعاً دموعي اللي مش عاوزه تقف بس اللحظه دي كانت دموع فرحه بكل كلمه قالها وارتاح بيها قلبي

"وأنا بموت فيكي ي ضي عيني...ها هنحدد معاد الفرح بقي ولا ايه

*نحدد معاد الفرح بس انت اللي هتختارلي الفستان

"أنا ليه ده فستانك أنتي

*بس أنا عاوزاك انت اللي تختاره

"أنا عيوني ليكي طبعاً بس كل بنت بيبقي عندها تصور واحلام بالنسبة لفستان فرحها وأنا عاوزك تحققي كل احلامك معايا ومنهم فستانك اللي واثق انك هتبقي اميره فيه

*من وأنا صغيره وأنا بتفرج علي فساتين الافراح وبحتفظ بصورهم وبنبهر بكتير منهم كل واحد فيهم مش شبه التاني بس عمري ما تخيلت نفسي بجد في ولا واحد عمري ما تخيلت نفسي وانا عروسه اصلا دايماً هواجسي أن يومها الميكب هيطلع وحش والصور مش هتبقي حلوه وهزعل اكبر بكتير للأسف من اي تخيل حلو

سخريه كبيره سيطرت علي صوتي وزعل من نفسي وأفكاري التشاؤميه

"عمرك ما تخيلتي شكلك وأنتي عروسه لأني واثق ومتأكد بأذن الرحمن أنه هيكون مبهر اكتر مليون مره تصورك أو تصور اي حد اصلا علشان كده خيالك مش جايب التحفه اللي هتبقي فيها بس الصراحه أنا بالذات مش هستغرب لأني شايفك عبارة عن تحفه من اول لحظه عيني وقعت فيها عليكي أنا بجد شايف كل حاجه وكل صفه فيكي جميله ومبهره ي شهد

ولأول مره احس بالراحه والأمان اللي حساهم دلوقتى كل الدوشه اللي في دماغي سكتت خالص وقلبي هدي واتطمن وكأنه كان مستني وعوده وتأكيده لحبه للمره اللي مش عارفه الكام بصراحه لكن بجد مازن تعب معايا اوي طول خطوبتنا وكان بيحارب مخاوفي اللي مكنتش بتكلم عنها كل يوم وعمره ما زهق وبصراحه هو يستاهل كل خير الدنيا ليه لوحده وكل ذره حب في قلبي لأخر عمري

بعد سبع سنين

*يااه اخيراً استاذ يحيي استسلم ونام

"طب الحمدلله يستي سيبيلي ليل بقي انيمها أنا وادخلي أنتي حضريلنا سندويتشين وكوبايتين شاي بالنعناع وادخلي بيهم البلكونه لحد ما اجي

*اتفقنا ربنا معاك بقي

يدوب حطيت الشاي قدامي و لقيته داخل وبيقعد جمبي كان الجو تحفه والهوا الساقع بتاع الخريف كفيل يفرحني بجد بس طبعاً مش ربع فرحتني وهو جمبي يعني

*ايه ده ما شاء الله بالسرعه دي

"عيب عليكي حبيبه ابوها دي اول ما تيجي في حضني لازم تنام على طول

*طب ي حبيبي ربنا يهني احنا قولنا حاجه

قولتلها وانا بعمل نفسي متغاظه وببص في الموبايل ولأنه مازن حبيب عيوني ورغم أنه متأكد اني بهزر بس برضو لازم يراضيني والحقيقه أنه طول السبع سنين اللي فاتوا عمره ما فوت اي فرصه يثبتلي فيها حبه ليا ويطمني علي مكانتي وحبي في قلبه في كل يوم عدي علينا زي دلوقتى كده وهو بيبوس باطن ايدي بكل الحب والحنيه اللي كانت طول الوقت من اروع صفاته

"أنتي أساس كل حب في حياتي ي شهد أنا بعشق يحيي وليل علشان أنتي مامتهم وعلشان هما ولادي منك انتي انتوا التلاته الدنيا بالنسبالي الدنيا اللي عمري ما هبطل أشكر ربنا في كل ثانيه أنه رزقني بيها

*بحبك اوي ي مازن بحبك اوي اوي

"وأنا بموت فيكي ي شَهدَة أيامي

#شهد_صلاح