رواية جيران اخر زمن الفصل الثالث 3 بقلم حبيبه منصور حصريه
رواية جيران اخر زمن الفصل الثالث 3 بقلم حبيبه منصور حصريه
البارت التالت
الجيران كلهم طلعوا من شققهم على الصوت
ليلى بذهول:
ـ هي مش كانت لسه واقفه معانا دلوقت ، لحقت عملت مصيبه !!!
سيف بص لها باستغراب:
= مش عارف
عم صابر اللي طالع بينهج ، الناس اللي بتجري ومش فاهمه حاجه ، و ادم اللي بيدور على مشمش عشان يعرف يطلع من الشقه
اتجمعوا قدام الشقه كلهم
ليل خبطت على الباب جامد
ليل بصوت عالي :
= ام عبييييير..... افتحي في ايه !!!!!!
مفيش رد ، سامعين صوييت بس ، صريخ مستمر
سيف بص لهم و زقهم بعيد عن الباب :
- اوعوا يا جماعه الباب لازم يتكسر
رجع سيف ل ورا و جمع كل قوته عشان يكسر الباب ، جري على الباب و قبل ما يكسره الباب اتفتح و سيف وقع على الأرض
سيف ب وجع و برطمه:
- ياااا ام عبييييير .... بقالنا ساعه بنقول يا ام عبير يا ام عبير وجايه تفتحي دلوقت !!!!!
ليل بضحك وهي بتشده تقومه:
قووم، يا خسارتك ف المباحث
قام سيف وهو ماسك دراعه :
- طب وسعي كده يا اختي
رجع بص ل ام عبير: في ايه
ام عبير واقفة قدامهم، وشها مخطوف وعينيها مليانة دموع، وإيديها بتترعش وهي بتشاور لجوه الشقة.
بصتلهم وعيونها مليانه دموع :
ـ بنتي!!!! ، بنتي رجعت
سيف بصلها بذهول:
- كل الصوييت ده عشان بنتك رجعت !!
ليل قعدت على الكرسي بتنهد :
- مش عارفه اقولك ايه والله يا ام عبير ، انتي سيبتي اعصابنا كلنا
ام عبير بصت لهم بدموع و ماسكه بنتها ف ايدها وبتشدها نحيتهم:
- تعالي ...تعالي يا حنين سلمي عليهم
بنت قصيره شويه ، شعرها كيرلي ، بيرسنج ف مناخيرها
شاورت ام عبير على وفاء :
- دي بقى خالتك وفاء اطيب قلب ف العماره كلها ، دي كانت بتشيلك وانتي صغيره بس انتي متفتكريش
و رجعت شاورت على باقي الجيران واحد واحد تفكرها بيهم
ورجعت شاورت على سيف
- ده بقى سيف ، رئيس مباحث قد الدنيا ،لسه جديد
حنين مدت ايديها سلمت عليه ب دلع مصطنع :
- هاي ظبوطه
ليل مقدرتش تمسك نفسها من الضحك :
- كلم يا ظبوطه
سيف بص لها ب قرف
ام عبير شاورت على ليل
- و دي بقى ليل دكتورة تجميل قد الدنيا
حنين بصتلها و ضحكت بسخريه :
- تجميل؟؟ ، ده فين التجميل ده
ليل بصت لها ببرود و تجاهل :
- طيب يا جماعه تصبحوا على خير ، تصبحي على خير يا ام عبير
سيف بص ل حنين ببرود :
- استني يا ليل انا جاي معاكي
خرجوا الجيران من شقة أم عبير وهما لسه تحت آثار الصدمة، وكل واحد فيهم عنده ألف سؤال عايز يسأله.
وفاء بصت لعم صابر وهي بتظبط طرحتها:
ـ إنت كنت تعرف إن بنت أم عبير راجعة؟
عم صابر هز راسه:
ـ وأنا مالي يا ست وفاء، هو أنا بقيت مسؤول عن مواعيد رجوع البنات كمان؟
آدم كان لسه بيدور بعينه في السلم:
ـ يا جماعة حد شاف مشمش؟ أنا بقالي ساعة بدور عليها!
ليل بصتله بنفاد صبر:
ـ يا ابني قطتك دي هتطلعلي في الحلم من كتر ما بتدور عليها!
آدم:
ـ طب ما تساعديني بدل ما انتي واقفة تتريقي!
سيف وهو بيعدل هدومه:
ـ يا جماعة كل واحد يدخل شقته، الساعة بقت متأخرة.
وفاء بصت ناحية شقة أم عبير:
ـ بس البنت دي رجعت فجأة كده ليه؟ دي بقالها سنين مش بتظهر!
ليل وهي بتفتح باب شقتها:
ـ يا ست وفاء، هو إحنا هنبدأ التحقيق هنا كمان؟ سيبوا البنت ترتاح، وأمها تفرح بيها.
سيف ابتسم بخفة:
ـ أخيرًا حد قال كلمة عاقلة.
ليل بصتله:
ـ متتعودش.
سيف:
ـ تصبحي على خير يا دكتورة.
ليل بتريقه:
ـ وأنت من أهله يا ظبوطه
سيف ببرود :
نينينينيننينينينيني رخمه!!!
دخلت ليل شقتها وقفلت الباب وراها، وسيف دخل شقته، بينما صوت أم عبير كان لسه واصلهم من جوه وهي بتتكلم مع بنتها بحماس، كأنها بتحاول تعوض سنين غيابها في كام دقيقة.
==============
صباح اليوم التالي...
ليل خرجت من أوضتها وهي بتربط شعرها، ولسه بتفوق من النوم، راحت ناحية المطبخ تعمل لنفسها فنجان قهوة قبل ما تنزل شغلها
كانت لسه بتحط السكر في الفنجان لما سمعت صوت خبط على الباب.
ليل باستغراب:
ـ مين؟
ـ أنا يا دكتورة، افتحي!
ليل اتنهدت وهي بتروح تفتح الباب، لقت أم عبير واقفة قدامها ووشها كله ابتسامة.
ليل:
ـ صباح الخير يا أم عبير، خير؟
أم عبير بحماس:
ـ صباح النور يا حبيبتي، كنت عايزة أقولك إن حنين بنتي هتقعد معايا الفترة الجاية.
ليل ابتسمت:
ـ يا رب دايمًا، ربنا يخليهالك.
أم عبير:
ـ تسلمي يا حبيبتي، أصلي فرحانة بيها أوي، بقالنا كتير متجمعناش.
ليل:
ـ ربنا يديم فرحتك يا رب.
أم عبير:
ـ طب استني، عايزاكي تيجي تشربي معانا شاي قبل ما تنزلي.
ليل بصت للساعة:
ـ معلش يا أم عبير، متأخرة على شغلي، مرة تانية إن شاء الله.
أم عبير:
ـ ماشي يا حبيبتي، ربنا يقويكي
ليل قفلت الباب ورجعت تكمل قهوتها، وبعد شوية خرجت من الشقة وهي ماسكة شنطتها وموبايلها.
أول ما نزلت لقت حنين واقفة قدام باب شقة أم عبير، لابسة لبس خروج وماسكة موبايلها.د
حنين بصتلها من فوق لتحت:
ـ صباح الخير.
ليل بابتسامة بسيطة:
ـ صباح النور.
حنين:
ـ هو انتي بتنزلي كل يوم بدري كده؟
ليل بصتلها باستغراب:
ـ آه، ليه؟
حنين:
ـ لا أصل مستغربة، هو دكاترة التجميل بيشتغلوا من الفجر؟
ليل:
ـ على حسب المواعيد يا حنين.
حنين ضحكت:
ـ آه، ماشي.
ليل كانت هتكمل نزول، لكن حنين نادتها:
ـ استني بس، هو مفيش أسانسير في العمارة دي؟
ليل:
ـ لا، مفيش.
حنين بصت للسلم بضيق:
ـ يا نهار أبيض! يعني هنفضل نطلع وننزل كل ده على رجلينا؟
ليل وهي بتكمل نزول:
ـ أهو رياضة ببلاش.
حنين بصتلها وهي بتتمتم:
ـ دمها تقيل أوي.
ليل سمعتها، لكنها عملت نفسها مسمعتش وكملت طريقها.
في نفس الوقت كان سيف خارج من شقته، شاف حنين واقفة عند السلم.
سيف بص لها و مكلمهاش
حنين ابتسمت أول ما شافته:
ـ صباح النور يا ظبوطه.
سيف وقف لحظة وبصلها:
ـ اسمي سيف
حنين ضحكت:
ـ لا بقى، ظبوطه أحلى.
سيف هز راسه بيأس:
ـ براحتك.
ونزل بسرعه ورا ليل، اللي كانت وصلت لآخر السلم تقريبًا.
سيف:
ـ استني يا دكتورة، هو انتي بتجري من الصبح ليه؟
ليل من غير ما تبصله:
ـ عشان عندي شغل، مش كلنا فاضيين نوزع ألقاب على السكان.
سيف ضحك:
ـ طب صباح الخير الأول.
ليل:
ـ صباح الخير الاول
سيف
: تحبي اوصلك ف طريقي ، انتي شغاله فين صح
ليل بصتله بتوتر
- لا لا شكرا انا همشي لوحدي شكرا
==============
«في البلد – بيت البحيري»
صوت ضحك عالي كان مالي الجنينة، والستات متجمعين قدام البيت، وكل واحدة ماسكة شغل في إيدها، ما بين اللي بتنقي الرز واللي بتجهز الخضار، وصوت أم أحمد جاي من المطبخ وهي بتزعق في الخدامة.
ـ يا بت يا زينب! حطيتي الملح في الأكل ولا لسه؟ هو أنا هفضل أنادي عليكي لحد بكرة؟!
زينب من المطبخ:
ـ حطيته يا ست هانم، أهو!
في الناحية التانية، كانت نورا قاعدة على المرجيحة، ماسكة موبايلها وبتبص فيه كل شوية، لحد ما سمعت صوت عربية بتدخل من بوابة البيت.
رفعت عينيها بسرعة، وأول ما شافت أحمد نازل من العربية، ابتسمت وعدلت قعدتها.
نورا بصوت عالي:
ـ أحمد! يا أحمد!
أحمد بص ناحيتها وهو بيقفل العربية:
ـ نعم يا نورا؟
نورا:
ـ تعالى عايزاك في موضوع.
أحمد وهو بيتجه ناحية باب البيت:
ـ بعدين يا نورا، رايح أشوف أبويا.
نورا قامت من مكانها ولحقت بيه:
ـ طب خمس دقايق بس، هو أنا كل ما أكلمك تقولّي بعدين؟ وبعدين ابويا قاعد مع ابوك
أحمد وقف وبصلها:
ـ خير يا ستي، عايزة إيه؟
نورا ابتسمت:
ـ كنت عايزة أروح السوق، وقلت يمكن تيجي معايا.
أحمد:
ـ السوق؟ طب ما تروحي مع زينب.
نورا بغيظ:
ـ زينب؟! أنا عايزة أروح معاك إنت!
أحمد ضحك:
ـ طب ما تقولي من الأول إنك عايزة تتفسحي، مش لازم نلف وندور.
نورا خبطته بخفة في دراعه:
ـ اخلص
أحمد وهو بيكمل طريقه:
ـ ربنا يهديكي يا نورا.
نورا فضلت واقفة مكانها بتبصله بضيق، لحد ما سمعت صوت بنت عمها زينب من وراها:
ـ هو إنختِ مش هتزهقي؟
نورا لفتلها:
ـ أزهق من إيه؟
ـ من الجري ورا الواد ده! ده لو كنتب بتجري ورا حمار كان زمانه حن عليكي!
نورا فتحت بقها بصدمة:
ـ إنتِ بتقولي إيه يا بت؟!
ـ بقول الحقيقة، هو ف دماغه واحده،
نورا رمت عليها المخدة اللي كانت على المرجيحة:
ـ غورِي من وشي! مش نقصاكي
ضحكت بنت عمها وهي بتجري بعيد، ونورا رجعت قعدت مكانها، لكن ابتسامتها اختفت وهي بتبص ناحية باب البيت.
في نفس الوقت، كان أحمد داخل المكتب لقى أبوه قاعد بيشرب قهوته مع عمه
توفيق:
ـ تعالَ يا أحمد، كنت فين من الصبح؟
أحمد قعد قصاده:
ـ كنت في الأرض يا بوي، وبعدين عديت على المركز.
توفيق هز راسه:
ـ طيب، عايزك النهارده تروح تجيبلي شوية ورق من المكتب.
أحمد:
ـ حاضر.
توفيق بصله شوية، وبعدين قال بنبرة فيها خبث:
ـ وبالمرة عايزك تشوف موضوع جوازك ده، مش هتفضل عايش كده لحد إمتى؟
أحمد اتنهد:
ـ يا بوي، إحنا لسه هنفتح في الموضوع ده؟
خالد عمه:
ده جواز
توفيق:
ـ أمال هنفتحه إمتى؟ أنا عايز أفرح بيك.
أحمد ابتسم وهو بيقوم:
ـ ربنا يديك طولة العمر وتشوف أحفاد أحفادك كمان.
توفيق ضحك:
ـ يا ابن الكلب، بتضحك عليا وتهرب!
أحمد خرج من المكتب وهو بيضحك، لكن أول ما طلع موبايله وفتح صورة كانت عنده، اختفت الضحكة من على وشه، وفضل باصص للشاشة شوية قبل ما يقفلها ويحط الموبايل في جيبه.
ومن بعيد، كانت نورا واقفة عند باب الجنينة، شايفاه، وملامحها اتغيرت أول ما لاحظت إنه كان بيبص على صورة حد.
نورا لنفسها:
ـ يا ترى مين اللي واخد عقلك يا أحمد؟!
=======================
كانت نورا لسه قاعدة في الجنينة، ماسكة موبايلها وبتقلب فيه من غير تركيز، لحد ما وقعت عينيها على اسم ليل، فابتسمت و رنت عليها
في القاهرة، كانت ليل بتلم حاجتها من على الترابيزة، ولما شافت اسم نورا ردت:
ليل:
ـ أيوه يا ست نورا، إيه الأخبار؟
نورا بعتاب مصطنع:
ـ الله! هو انتي لسه فاكرة إن ليكي بنت عم اسمها نورا؟
ليل ضحكت:
ـ يا بنتي ما أنا بكلمك أهو، وبعدين انتي اللي مختفية.
نورا:
ـ أنا مختفية؟ ده إنتي اللي سافرتي ورميتي البلد واللي فيها ورا ضهرك!
ليل:
ـ أعمل إيه بس؟ الشغل يا ستي، وبعدين إنتِ عارفة إني مشغولة اليومين دول.
نورا:
ـ طب طمنيني عليكي، عاملة إيه؟ والدنيا معاكي في القاهرة؟
ليل:
ـ الحمد لله، كله تمام. الشغل واخد وقتي شوية، بس متعودة.
نورا:
ـ طب والسكن؟ والجيران؟ لسه مطلعين عينك ولا هديوا شوية؟
ليل ضحكت:
ـ دول حكاية لوحدهم، كل يوم عندي مصيبة شكل، بس الحمد لله بنعدّيها.
نورا:
ـ طب كويس إنك بتضحكي، كنت خايفة تكوني اتبهدلتي هناك ومش عايزة تقولي.
ليل:
ـ لا يا ستي متقلقيش، أنا كويسة. إنتِ بقى احكيلي، أخبار البلد إيه؟ وماما وعمي عاملين إيه؟ و احمد عامل ايه
نورا:
ـ كلهم كويسين، مفيش جديد غير دوشة البيت المعتادة. ماما مش بتبطل زن، وعمي طول النهار في شغله، و امك بتخانق ف البيت عادي مع زينب ، وأحمد...
سكتت لحظة، فليل سألتها باستغراب:
ليل:
ـ أحمد ماله؟
نورا بسرعة:
ـ ولا حاجة، زي ما هو يعني، داخل خارج ومشغول طول الوقت.
= طب كويس، سلميلي عليهم كلهم.
- يوصل يا ستي، وانتي كمان خلي بالك من نفسك، ومتتأخريش علينا في الزيارة دي.
=حاضر، أول ما أفضى هاجي أشوفكم.
ـ مستنياكي ، و رني عليا اما تخرجي من الشغل نكمل كلام ، سلام يا ليل
= حاضر يا قلبي،سلام
قفلت ليل المكالمة وهي بتبتسم، وحطت الموبايل في شنطتها، وبعدها بصت في الساعة واتحركت بسرعة عشان تلحق تروح
=====================
سيف كان قاعد ورا مكتبه، قدامه كذا ملف مفتوح، وبيقلّب في واحد منهم بتركيز، لحد ما خبط حازم على الباب ودخل.
حازم:
ـ لسه مخلصتش يا باشا؟
سيف من غير ما يرفع عينه:
ـ شايفني بلعب؟
حازم ضحك:
ـ لا والله، بس إحنا بقالنا ساعتين بنقولك كفاية شغل.
سيف قفل الملف وحطه على جنب:
ـ خلصتوا التحريات اللي طلبتها؟
حازم:
ـ أيوه، ودي آخر ورقة ناقصة.
مد إيده بالملف، سيف أخده وبدأ يراجعه، وبعد شوية وقف عند نقطة معينة.
ـ استنى هنا... هو مين اللي مضى على استلام المضبوطات؟
حازم:
ـ أمين المخزن.
سيف رفع عينه له:
ـ طب هو مش كان في إجازة اليوم ده؟
حازم اتردد:
ـ أيوه، بس...
سيف قاطعه:
ـ مفيش بس. عايز أعرف مين اللي استلمها فعلًا، والموضوع ده يتراجع من أوله ، عايزين نقفل القضيه دي بقى
حازم هز راسه:
ـ حاضر.
سيف رجع ضهره للكرسي، وفرك عينه بإرهاق:
ـ خلاص يا حازم، روح إنت. وأنا كمان همشي.
حازم:
ـ أخيرًا! كنت فاكر إنك هتبات هنا.
سيف ابتسم بسخرية:
ـ امشي يا حازم بدل ما أغير رأيي وأخليك تبات إنت.
ضحك حازم وخرج، وسيف لمّ الورق وحطه في الدرج، أخد مفاتيح عربيته وموبايله وخرج من المكتب.
كان اليوم طويل، وكل اللي كان عايزه إنه يرجع شقته، ياخد دش وينام كام ساعة من غير ما حد يطلب منه حاجة.
==============================
خرجت ليل من بوابة المستشفى وهي بتفك رابطة شعرها، وبتحاول تريح رقبتها بإيدها بعد يوم طويل قضته في الشغل. وقفت على الرصيف، عدّلت شنطتها على كتفها، وبصت للساعة في موبايلها.
كانت الساعه داخله على 9، والشارع قدام المستشفى مليان حركة؛ عربيات داخلة وعربيات خارجة، وأهالي واقفين قدام البوابة، وناس بتستنى تاكسي يوصلها، وصوت البياع اللي واقف على الناصية بيحاول يلم زباينه قبل ما الدنيا تزحم أكتر.
ليل أخدت نفس طويل، وفتحت موبايلها تشوف لو فيه أي رسايل، وبعدها رفعت إيدها لأول تاكسي لمحته جاي من بعيد.
التاكسي وقف قدامها، والسواق وطّى الإزاز.
السواق:
ـ أيوه يا بنتي، رايحة فين؟
ليل قربت من الشباك وادته العنوان:
السواق هز راسه:
ـ تمام، اتفضلي.
فتحت الباب الخلفي وركبت، وحطت شنطتها على الكرسي اللي جنبها، وبعدها قفلت الباب وسندت راسها لورا.
السواق اتحرك بالعربية، وليل طلعت موبايلها وفتحت المحادثات. كانت لسه بتقرا آخر رسالة من نورا لما افتكرت إنها مكنتش ردت على مكالمتها، ف اتصلت بيها
نورا:
ـ أخيرًا افتكرتي تتصلي!
ليل ضحكت:
ـ يا بنتي ما أنا كنت لسه خارجة من الشغل، هو أنا ههرب منك؟
نورا:
ـ ماشي يا ستي، حجتك معاكي. انتي فين دلوقتي؟
ليل:
ـ في تاكسي، راجعة البيت. اليوم كان طويل أوي ومش قادرة أتكلم حتى.
نورا:
ـ طب خلاص، مش هعطلك. بس أول ما توصلي ابقي طمنيني عليكي.
ليل:
ـ حاضر يا ستي، سلام
========
قفلت ليل المكالمة، وحطت الموبايل في شنطتها، ورجعت تبص من الشباك. التاكسي كان بيتحرك ببطء وسط الزحمة، والسواق كل شوية يمد رقبته يحاول يشوف الطريق قدامه.
السواق وهو بيبص في المراية:
ـ إنتب ساكنة في المنطقة دي من زمان يا بنتي؟
ليل:
ـ لأ، بقالي فترة مش كبيرة.
السواق:
ـ آه، أصل أنا حسيت إنك مش من المنطقة.
ليل ابتسمت من غير ما ترد، ورجعت تبص للطريق.
عدت دقايق، والزحمة بدأت تزيد أكتر، والعربيات واقفة صفوف طويلة، وصوت الكلاكسات مبقاش بيهدى.
السواق نفخ بضيق وقال:
ـ لا كده إحنا مش هنتحرك من هنا قبل بكره!
ليل بصت قدامها:
ـ هو الطريق واقف أوي كده؟
السواق:
ـ أمال إيه؟ ده شكله حادثة ولا حاجة قدام، بس أنا عارف شارع جانبي من هنا ممكن يختصر علينا كتير.
ليل:
ـ طب ماشي، ادخل منه.
السواق لف بالعربية ودخل شارع جانبي، وبعد ما خرجوا من الزحمة بدأت الحركة تهدى تدريجيًا. الشارع كان أضيق من الرئيسي، وعلى الجانبين عمارات سكنية قديمة، وتحتها محلات صغيرة، بعضها مقفول وبعضها لسه فاتح.
ليل رجعت تسند راسها على الشباك، وفتحت موبايلها تراجع كام رسالة، لكن بعد شوية لاحظت إن صوت الموتور اتغير، والعربية بدأت تتهز بشكل خفيف.
رفعت عينيها وبصت للسواق.
ليل:
ـ هو في حاجة في العربية؟
السواق:
ـ لا، مفيش حاجة يا بنتي، شكل الطريق بس مش كويس.
لكنه ما كملش كلامه، لأن العربية بدأت تهدى أكتر، لحد ما وقفت على جنب الطريق.
السواق حاول يدور الموتور، لكن العربية مشتغلتش
ـ يا ساتر يا رب! إيه اللي حصل ده؟
ليل اعتدلت في قعدتها:
ـ مالها؟
السواق حاول مرة تانية، وبعدها ضرب كف بكف:
ـ العربية بطلت يا بنتي، معلش استني أشوف فيها إيه.
نزل السواق وفتح الكبوت، وبدأ يفحص الموتور، وليل فضلت قاعدة مكانها وهي بتبص في الساعة. استنت شوية، لكن لما لقت إنه اتأخر، فتحت الباب ونزلت.
ليل:
ـ طب هنعمل إيه دلوقتي يا أسطى؟
السواق وهو بيبص جوه الموتور:
ـ والله مش عارف، شكلها مشكلة في البطارية، بس خليني أشوف.
ليل:
ـ يعني هتاخد وقت؟
السواق:
ـ مش كتير إن شاء الله، ولو معرفتش أشغلها هطلبلك عربية تانية.
ليل تنهدت بضيق، وطلعت موبايلها تحاول تتصل ب حد، لكن المكالمة مكنتش بتطلع.
ـ يا سلام! هو كل حاجة هتعطل النهارده؟
بعدت خطوتين عن التاكسي ورفعت الموبايل تحاول تلتقط شبكة، وبصت ناحية أول الشارع، و رجعت تبص في الشاشة.
في الناحية التانية، كان فيه عربية داخلة الشارع بسرعة، والسواق باين إنه مش واخد باله من التاكسي اللي واقف ولا من البنت اللي واقفة قدامه.
السواق بتاع التاكسي كان لسه بيحاول يشوف العطل، لكنه لمح العربية وهي داخلة بسرعة، فرفع راسه فجأة.
ـ يا بنتي! خلي بالك!
ليل رفعت عينيها على صوته، والتفتت ناحية العربية...
صوت كلاكس طويل دوّى في الشارع، وبعده صوت فرامل عنيف، وصوت ارتطام خلّى السواق يسيب الكبوت مفتوح ويجري ناحية الطريق.
ـ يا نهار أبيض!!
اتلمّ الناس من قدام المحلات والعمارات، وأصوات متداخلة بدأت تعلى في الشارع.
ـ حد يطلب الإسعاف!
ـ وسّعوا يا جماعة!
ـ يا ساتر يا رب!
============
سيف كان لسه داخل الشارع بالعربية، لكن اضطر يهدّي فجأة لما لمح تجمع ناس على الناحية التانية.
فتح الإزاز بضيق:
ـ في إيه يا جماعة؟ واقفين ليه؟
لكن عينه وقعت على شنطة مرمية في نص الطريق، وبعدها لمح السواق واقف وسط الناس ووشه مخطوف.
سيف ركن عربيته بسرعة ونزل، وشق طريقه وسط المتجمعين.
وأول ما عينه وقعت على البنت اللي على الأرض، وقف مكانه للحظة.
ـ لــــيل؟!
يتبع...
تكملة الرواية بعد قليل

تعليقات
إرسال تعليق