القائمة الرئيسية

الصفحات

translation
English French German Spain Italian Dutch Russian Portuguese Japanese Korean Arabic Chinese Simplified

رواية جيران اخر زمن الفصل الرابع 4 بقلم حبيبه منصور حصريه

 رواية جيران اخر زمن الفصل الرابع 4 بقلم حبيبه منصور حصريه






 




 رواية جيران اخر زمن الفصل الرابع 4 بقلم حبيبه منصور حصريه


البارت الرابع


ليل؟!!

قرب سيف منها بسرعة، وهو بيزعق للناس اللي اتلمّت حواليها:

- ابعدوا! ابعدوا يا جماعة، وسّعوا!

نزل على ركبته جنبها، وعينه اتعلقت بوشها اللي كان مليان دم، وحاول ينادي عليها:

- ليل... يا ليل، سامعاني؟!

مفيش أي استجابة.

بص حواليه بتوتر، فلقى الراجل اللي خبطها واقف بعيد شوية، وشه مخطوف ومش عارف يتصرف.

سيف بص له بعصبية:

- إنت واقف تتفرج ليه؟! اتصل بالإسعاف بسرعة!

الراجل اتلخبط وهو بيطلع موبايله:

- أنا... أنا هتصل أهو، والله ما شوفتها غير فجأة!

سيف رجع بص لليل، وحاول يطمن إنها بتتنفس، وبعدها رفع عينه للناس اللي حواليه:

- حد يطلب الإسعاف تاني، بسرعة!

فضل جنبها لحد ما وصلت الإسعاف، وساعد المسعفين في نقلها على الترولي، وبعدها ركب معاهم العربية، وعينه مكنتش بتفارقها طول الطريق.

كان كل شوية يبص عليها، ويحاول يطمن نفسه إنها لسه بخير.

- استحملي يا ليل... إحنا قربنا.

بعد شوية وصلوا المستشفى، واتحرك بيها المسعفين بسرعة ناحية الطوارئ.

فضل سيف واقف قدام الباب، مش عارف يعمل إيه، لحد ما خرجت ممرضة وسألته:

= حضرتك قريب الحالة؟

- اه انا جارها 

= طيب محتاجين بياناتها، واسمها بالكامل لو تعرف.

سيف طلع موبايلها اللي كان معاها، وحاول يفتحه، لكن لقى عليه كلمة سر.

- اسمها ليل... بس معرفش اسمها بالكامل، ولا رقم حد من أهلها.

الممرضة:

= طيب استنى هنا، والدكتور هيبلغك بالتفاصيل أول ما يخلص الكشف.

دخلت الممرضة، وسيف فضل واقف مكانه، بيبص على باب الطوارئ كل شوية، ومش عارف حتى يتصل بمين.

بعد دقائق خرج الدكتور.

سيف قرب منه بسرعة:

- دكتور، طمني، هي عاملة إيه؟

= الحالة عندها إصابات متفرقة، وفيه نزيف على المخ، وكمان محتاجة تدخل جراحي عاجل.

سيف اتنفس بصعوبة:

- طيب مستنيين إيه؟ اعملوا كل اللي تقدروا عليه.

الدكتور:

= هنبدأ الإجراءات، لكن محتاجين تأمين مبدئي للعملية والإقامة، اتفضل على الحسابات في آخر الممر.

سيف هز راسه واتحرك بسرعة

==================

في الصعيد

كانت سلوى قاعدة في الصالة، وفي إيدها موبايلها، بتبص عليه من وقت للتاني.

نورا خرجت من المطبخ 

- مالك يا مرات عمي؟ قاعدة ساكتة ليه؟

سلوى ابتسمت ابتسامة بسيطة:

= مفيش يا نورا، كنت بفكر في ليل.

نورا قعدت جنبها:

- خير؟ ما أنا كلمتها النهارده.

= عارفة، قالتلي هتكلمني لما تفضى، بس شكلها رجعت تعبانة ونامت.

- أيوه، أكيد يومها كان طويل. سيبيها ترتاح، وبكرة تكلمك.

سلوى بصت للموبايل بحنية:

- ربنا يطمن قلبي عليها. البنت دي مهما كبرت، برضه بفضل مستنية صوتها كل يوم.

نورا ابتسمت:

- ربنا يخليهالك يا حبيبتي، وتفرحي بيها.

سلوى حطت الموبايل جنبها وقامت تكمل اللي وراها، وهي مطمنة إن بنتها في بيتها، وإنها غالبًا نامت من التعب.

ومكانتش تعرف إن بنتها في نفس اللحظة كانت في المستشفى، وبتصارع عشان ترجع لحياتها من جديد 

====================

في عمارة 4

صوت وفاء كان جايب العمارة كلها:

- يا صاااابر! يا صاااابر!

صابر طلع من شقته بسرعة، وهو بيحاول يلقط نفسه:

- أيوه يا مدام، أيوه!

أم عبير خرجت من شقتها على صوتها، ووراها حنين.

أم عبير بخضة:

- في إيه يا وفاء؟ مالك؟

حنين:

- في إيه يا ماما؟

وفاء بصتلهم بقلق:

- بخبط على ليل من بدري ومش بترد، قلبي مش مطمن، خايفة يكون حصلها حاجة جوا!

صابر رد عليها:

- يا مدام، هي مجتش أصلًا من الصبح.

وفاء بصتله باستغراب:

- يعني إيه مجتش؟ طب راحت فين؟

حنين اتكلمت ببرود:

- هو إنتوا متأكدين أصلًا من حوار الدكتورة ده؟ ولا هي دكتورة في إيه بالظبط؟

آدم اللي كان واقف قريب منهم بص لها بنفاد صبر:

- محدش يسمحلك تتكلمي عنها بالطريقة دي على فكرة.

حنين بصتله من فوق لتحت 

- وإنت مين بقى إن شاء الله عشان تسمحلي ولا متسمحليش؟

أم عبير بصتلها بتحذير:

- خلاص يا حنين، عيب كده.

حنين تنهدت بضيق:

- هو إيه اللي عيب؟ الساعة بقت اتناشر أهو، والهانم مش هنا، دي  مغتربة لوحدها، ولا عشان أهلها مش معاها يعني محدش يسأل عليها؟

صابر اتضايق من كلامها:

- حرام يا بنتي اللي بتقوليه ده، منغتابش حد. الله أعلم هي في إيه، يمكن عندها شغل.

وفاء رفعت إيدها توقف الكلام:

- يا جماعة خلاص! إحنا مش هنفضل واقفين نتكلم، المهم نعرف البنت فين.

صابر:

- المشكلة إننا منعرفش هي شغالة فين بالظبط.

آدم طلع موبايله:

- طب استنوا، أنا هرن عليها تاني.

°==============

في المستشفى

كان سيف واقف قدام الحسابات، بيبص للموظف بعدم استيعاب.

- تلاتين ألف إيه يا فندم؟! هو أنا بدفع تمن مستشفى ولا إيه؟

الموظف بهدوء:

= يا فندم دي مستشفى خاصة، والحالة محتاجة تدخل جراحي عاجل، والمبلغ ده تأمين مبدئي للعملية والإقامة.

سيف نفخ بضيق، وطلع محفظته وبدأ يعد الفلوس اللي معاه.

بعد ما خلص، رفع عينه للموظف:

- طيب استنى شوية، هكمل المبلغ وأرجعلك.

خرج من الحسابات وهو بيطلع موبايله، واتصل بحازم.

حازم:  ألو.

- حازم، أنا محتاج منك خدمة ضروري.

حازم بقلق:

= خير يا عم؟ مالك؟

- عايزك تحولي خمسة وعشرين ألف جنيه حالًا.

حازم باستغراب:

- خمسة وعشرين ألف؟! ليه يا سيف؟!

سيف بعصبية:

= يا حازم مش وقت أسئلة، واحدة جارتي عملت حادثة ولازم تدخل عمليات، وواقفين على الفلوس.

- طب وإنت مالك تدفع ليه؟ ما أهلها فين؟

= معرفش أهلها فين، أنا لقيتها في الشارع ومكنش معاها حد، هسيبها يعني؟!

حازم سكت لحظة، وبعدها رد:

- اهدى يا سيف، هبعتلك دلوقتي.

= ماشي، مستنيك.

قفل معاه، وفضل واقف مستني رسالة التحويل، لحد ما الموبايل نور بإشعار وصول المبلغ.

اتحرك بسرعة لأقرب ماكينة، سحب الفلوس ورجع على الحسابات، دفع المبلغ كامل وأخد الإيصال.

الموظف:

= تمام يا فندم، اتفضل استنى بره، الحالة هتدخل العمليات حالًا.

سيف:

- طيب هي هتدخل إمتى بالظبط؟

= خلال دقايق إن شاء الله.

سيف هز راسه ومشي، وقبل ما يوصل لباب الطوارئ لمح الممرضين بيحركوا الترولي اللي عليه ليل.

وقف مكانه للحظة.

وشها كان شاحب، وعينيها مغمضين، ومفيش أي حركة منها.

قرب منهم خطوتين، لكن الممرضة وقفته:

= لو سمحت يا أستاذ، ابعد شوية عشان نعرف نتحرك.

رجع لورا، وفضل متابعهم بعينه لحد ما اختفوا ورا باب العمليات.

طلع نفس طويل، وراح قعد على الكرسي اللي قدام الباب.

بعد شوية موبايله رن، وكان حازم.

- ها يا سيدي، عملت إيه؟

سيف:

= دفعت، ودخلوها العمليات.

- الحمد لله، ربنا يقومها بالسلامة.

= يارب.

- طب إنت هتفضل هناك؟

= أيوه، مش هينفع أمشي دلوقتي.

- ماشي، طمني أول ما تعرف حاجة.

= حاضر، سلام.

قفل سيف وحط الموبايل في جيبه، ورجع يبص لباب العمليات.

كل شوية يبص للساعة، ويرجع يبص للباب، والدقايق كانت بتعدي عليه كأنها ساعات.

========================


في عمارة 4


وفاء لسه واقفة قدام شقة ليل، وصابر بيحاول يهديها، بينما آدم واقف بيحاول يتصل بليل للمرة الأخيرة.

وفاء بقلق:

- طب يا صابر ما تحاول ترن عليها إنت كمان، يمكن تليفونها يفتح.

صابر:

- يا مدام والله رنيت عليها كتير، مفيش فايدة.

حنين بنفاد صبر:

- يا جماعة ما يمكن البنت عندها شغل، إنتوا ليه مصممين إن لازم يكون حصلها حاجة؟

آدم بص لها بضيق:

- يا حنين مش ناقصة كلامك دلوقتي.

كان لسه هيكمل كلامه، لكن موبايله رن.

بص للشاشة، لقى سيف.

رد بسرعة

- أيوه يا سيف، إيه يا عم؟ إنت فين وسايبنا قابلين الدنيا كده؟

سيف بصوت متوتر:

= آدم، إنت فين دلوقتي؟

- في العمارة، مالك؟ صوتك ماله؟

= أنا في المستشفى... ليل عملت حادثة.

آدم سكت لحظة، وبعدين قال بعدم استيعاب:

- إيه؟! ليل؟!

سيف:

= أيوه، عربية خبطتها وأنا جبتها المستشفى، ودخلت عمليات من شوية.

آدم بصدمة:

- عمليات ليه؟! هي حصلها إيه؟!

= عندها نزيف على المخ، وكمان فيها إصابات تانية... الدكتور قال لازم تدخل عمليات بسرعة.

آدم:

- يا نهار أبيض! طب إنت في أنهي مستشفى؟!

سيف:

= في مستشفى ........، اسمعني يا آدم، أنا مش هقدر أسيبها وأرجع البيت. خلي حد يطلع يجيبلها هدوم من الشقة، أي طقم كامل وحطهم في شنطة وهاتهم معاك. احتياطي 

آدم:

- حاضر، حاضر. طب هي محتاجة حاجة تانية؟

سيف بص ناحية باب العمليات، وبعدين رد:

= مش عارف والله، دماغي مش معايا، بس تعالى بسرعة، ولو تعرف توصل لحد من أهلها يبقى كويس، أنا معرفش عنها أي حاجة.

آدم:

- خلاص أنا جاي حالًا، متقلقش.

= ماشي يا آدم.

قفل آدم المكالمة، وفضل باصص للموبايل شوية.

وفاء قربت منه ومقدرتش تستنى أكتر:

- في إيه يا آدم؟! طمني، ليل مالها؟!

آدم بص لهم:

- ليل عملت حادثة، وسيف معاها في المستشفى، ودخلت العمليات.

وفاء حطت إيدها على صدرها:

- يا مصيبتي! يا حبيبتي يا بنتي، طب هي كويسة؟!

آدم:

- معرفش يا طنط، بيقول عندها نزيف على المخ.

أم عبير بخضة:

- لا حول ولا قوة إلا بالله، طب يلا نروح لها!

صابر:

- طب استنوا، أنا جاي معاكم.

آدم:

- يلا يا جماعة، سيف مستنينا، ولازم ناخد لها هدوم من الشقة.

وفاء:

- طب هدوم إيه دلوقتي؟! هي هتخرج إمتى بس؟!

آدم: 

- معرفش يا طنط، بس سيف طلبها، خلينا نعمل اللي نقدر عليه.

حنين خرجت من شقتها وهي بتقفل الباب:

- استنوا، أنا جاية معاكم.

أم عبير:

- يلا يا حنين بسرعة.

صابر:

- طب مفتاح شقتها مع مين؟ عشان نطلع نجيب الهدوم.

آدم: 

- المفتاح معايا، خدي يا أم عبير، انتي وطنط وفاء اطلعوا هاتولها هدوم من الشقة.

دخلوا الشقة، ووفاء أول ما شافت المكان سكتت لحظة، وبعدين قالت بحزن:

- يا عيني يا بنتي... سايبة بيتها ونازلة مش عارفة هترجعله إمتى

آدم:

- طب يا جماعة خلونا نخلص بسرعة عشان نلحق سيف

وفاء بدأت تدور على هدوم مناسبة، وحنين دخلت الأوضة وجابت طقم كامل وطرحة.

أم عبير:

- حطوا معاهم حاجة تانية احتياطي.

آدم:

- كده تمام، يلا بينا.

قفلوا الشقة ونزلوا بسرعة، ووفاء طول السلم مش مبطلة دعاء.

وفاء:

- يا رب استرها معاها، يا رب متوجعش قلب أمها عليها.

آدم كان سابقهم بخطوات، وبيحاول يتصل بسيف تاني، لكن المرة دي سيف مردش.

فضل يبص للموبايل بقلق، لحد ما وصلوا للعربيات.

آدم:

- يلا يا جماعة، محدش يتأخر!

وفي لحظات كانت العمارة كلها اتحركت من مكانها، والكل رايح المستشفى على أمل يسمع خبر يطمن قلبه.

====================

في المستشفى

سيف كان لسه قاعد قدام العمليات، حاطط إيده على راسه، وعينه مش بتفارق الباب.

لحد ما الباب اتفتح أخيرًا، وخرج الدكتور.

سيف قام من مكانه بسرعة واتجه  ناحيته:

- دكتور! طمني، ليل عاملة إيه؟!

الدكتور:

= الحمد لله قدرنا نسيطر على النزيف، لكن حالتها لسه محتاجة متابعة دقيقة، وهننقلها العناية المركزة.

سيف اتنفس براحة، لكنه رجع سأله بقلق:

- يعني هي هتفوق؟!

الدكتور:

= إن شاء الله، بس مش هنقدر نحدد إمتى، الساعات الجاية مهمة جدًا.

سيف:

- طب ينفع أشوفها؟

= لما تستقر في العناية، هتقدر تطمن عليها.

- تمام يا دكتور، شكرًا.

الدكتور مشي، وسيف رجع قعد مكانه.

بعد شوية وصل آدم وباقي الجيران.

آدم:

- ها يا سيف، إيه الأخبار؟

سيف:

= الدكتور قال إنهم قدروا يسيطروا على النزيف، بس لسه حالتها محتاجة متابعة.

وفاء قربت منه بلهفة:

- طب هي فين يا ابني؟ ينفع نشوفها؟

سيف:

= لسه مدخلينها العناية، والممرضة قالت نستنى شوية.

أم عبير:

- يا حبيبتي يا ليل، ربنا يقومها بالسلامة.

آدم مد إيده بالشنطة:

- أهو جبتلها الهدوم اللي طلبتها.

سيف أخدها منه:

= تسلم يا آدم، تعبتكوا معايا.

آدم:

- تعب إيه بس؟ دي أختنا.

صابر بص حواليه:

- طب يا جماعة، هو مفيش حد من أهلها نقدر نكلمه؟

سيف هز راسه:

= أنا معرفش عنها أي حاجة، ولا معايا رقم حد من أهلها.

آدم:

- طب ما نحاول نشوف في بيانات المستشفى، أكيد هي سايبة رقم للطوارئ.

سيف:

= الممرضة قالت هتراجع الملف، بس لسه مفيش حاجة.

وفاء كانت واقفة ساكتة، وعينيها على باب العناية.

وفجأة موبايل ليل اللي كان مع سيف رن.

كلهم بصوا ناحية الصوت.

سيف طلع الموبايل من جيبه، وبص للشاشة.

ماما ❤️

فضل باصص للاسم لحظة، وبعدها رفع عينه لآدم.

آدم بص له:

- دي أمها؟

سيف هز راسه:

= أيوه... غالبًا.

وفاء قربت منه:

- أنا رأيي بلاش نرد دلوقتي، مش عايزين نقلقها قبل ما نعرف حالة البنت استقرت ولا لأ.

أم عبير

- وأنا كمان رأيي من رأيها، بس لازم نوصل لأهلها في أقرب وقت 


سيف بص للموبايل، وبعدها حطه في جيبه.

بعد دقائق خرجت الممرضة من غرفة العناية:

= مين الأستاذ سيف؟

سيف اتحرك ناحيتها بسرعة:

- أنا، خير؟

الممرضة:

= الدكتور عايز يتكلم معاك بخصوص بيانات الحالة.

سيف بص لآدم، وبعدها اتحرك معاها.

دخل معاها غرفة صغيرة جنب العناية، وكان الدكتور واقف مستنيه 

الدكتور:

= أستاذ سيف، إحنا راجعنا بيانات الحالة، وفيه حاجة محتاجين نتأكد منها.

سيف بقلق:

- خير يا دكتور؟ فيه حاجة حصلت؟

الدكتور:

= لأ، بس أثناء الفحوصات لاحظنا إن فيه مؤشر محتاج متابعة بخصوص القلب، ولسه مش هنقدر نحدد طبيعته دلوقتت

سيف:

- يعني إيه يا دكتور؟ الموضوع خطير؟

الدكتور:

= متقدرش تحكم من دلوقتي، ممكن تكون مشكلة موجودة من قبل الحادثة، وممكن نحتاج فحوصات أكتر عشان نعرف السبب. بعد ما حالتها تستقر وتتحسن، لازم تعمل فحوصات متخصصة للقلب.

سيف هز راسه بقلق:

- طب هي عندها مشكلة في القلب من قبل كده؟

الدكتور:

= ده اللي بنحاول نعرفه، وعشان كده محتاجين نتواصل مع حد من أهلها، يمكن يكون عنده معلومات عن تاريخها الصحي.

سيف:

- والله يا دكتور أنا مجرد جارها، ومعرفش عنها أي تفاصيل.

الدكتور:

= حاولوا توصلوا لأهلها في أقرب وقت، ده هيساعدنا نعرف معلومات مهمة.

سيف خرج من الغرفة وهو شايل هم جديد فوق اللي هو فيه.

آدم أول ما شافه قرب منه:

- خير يا سيف؟ الدكتور قالك إيه؟

سيف:

= بيقول إن فيه حاجة محتاجة متابعة في القلب، ولازم يعرفوا إذا كان عندها تاريخ مرضي ولا لأ.

آدم باستغراب:

- قلبها؟! طب وأهلها؟

سيف:

= لسه مش عارفين نوصل لحد.

وفاء كانت سامعة كلامهم، فقربت منهم:

- طب ما نكلم أمها يا ابني، هي أكيد أدرى الناس بحالتها.

سيف طلع الموبايل وبص للاسم اللي لسه ظاهر على الشاشة.

آدم:

- اتصل بيها يا سيف، لازم تعرف اللي حصل.

سيف ضغط على الاسم 

===========


في الصعيد

كانت سلوى قاعدة في الصالة، وفجأة موبايلها رن.

بصت للشاشة، ولما شافت اسم ليل ابتسمت وردت بسرعة:

- أيوه يا حبيبتي، كنت لسه بقول هتتصلي إمتى.

سيف اتردد لحظة قبل ما يتكلم:

- السلام عليكم يا طنط.

سلوى باستغراب:

= وعليكم السلام، مين معايا؟

- أنا سيف يا طنط، جار ليل.

سلوى اعتدلت في قعدتها:

= أهلًا يا ابني، خير؟ هو موبايل ليل معاك ليه؟ هي فين؟

سيف حاول يختار كلامه:

- بصي يا طنط، أنا مش عايز حضرتك تقلقي، بس ليل حصلها حادثة وهي دلوقتي في المستشفى.

سلوى قامت من مكانها بفزع:

= حااادثة؟! بنتي مالها يا ابني؟! حصلها إيه؟!

سيف:

- عربية خبطتها يا طنط، بس الحمد لله الدكاترة عملوا اللازم، وهي دلوقتي في العناية.

سلوى بصوت مهزوز:

= في العناية؟! يعني إيه في العناية؟! هي واعية؟ بتتكلم؟ طمني عليها يا ابني!

سيف:

- هي لسه مفاقتش يا طنط، بس لسه تعبانة شوية.

سلوى:

= طب أنا جاية على طول ، ابعتلي عنوان المستشفى 

سيف:

- حاضر يا طنط، بس فيه حاجة تانية محتاج أقولها لحضرتك.

سلوى بقلق أكبر:

= حاجة إيه؟! اتكلم يا ابني، متخوفنيش أكتر من كده!

سيف بص لآدم اللي كان واقف جنبه، وبعدها رجع اتكلم:

- الدكتور لسه بيعملها التحاليل والأشعة، بس محتاجين نعرف تاريخها المرضي 

سلوى فضلت ساكتة للحظات، وبعدها قالت بصوت متقطع:

=  هي عندها ايه دلوقت 

سيف:

- مش عارفين لسه يا طنط، الدكتور بيحاول يفهم حالتها.

سلوى بصوت مليان دموع:

= يا حبيبتي يا بنتي 

سيف:

- إن شاء الله خير يا طنط، والدكتور بيتابع حالتها.

سلوى مسحت دموعها بسرعة، وحاولت تثبت صوتها:

= ابعتلي عنوان المستشفى يا سيف، أنا هتحرك دلوقتي.

- حاضر يا طنط، وهفضل معاها لحد ما توصلي.

= ربنا يكرمك يا ابني... 

قفل سيف المكالمة، وفضل ساكت شوية.

آدم قرب منه:

- ربنا يستر يا سيف، أمها أكيد هتكون مصدومة.

سيف:

= ربنا يقويها، دي بنتها ومش سهل عليها تسمع حاجة زي دي.

وفاء كانت واقفة ودموعها في عينيها:

- يا حبيبتي يا ليل، ربنا يصبر أمها ويقومها بالسلامة.

-======================

( اللي بيقروا ف صمت دول هعملكم بلوك بس الصبر👀🤌)

======================°°

في الصعيد

سلوى كانت لسه واقفة مكانها، والموبايل في إيدها، مش قادرة تستوعب اللي سمعته.

نورا خرجت من المطبخ، وأول ما شافتها قالت:

- مالك يا مرات عمي؟ وشك متغير ليه؟

سلوى بصتلها، وعينيها مليانة دموع:

- ليل... ليل عملت حادثة يا نورا.

نورا اتخضت:

- يا ساتر يا رب! طب هي عاملة إيه؟!

سلوى بصوت مكسور:

- في المستشفى... وبيقولوا إنها عملت حادثه 

نورا قربت منها بسرعة: 

- طب اهدي يا حبيبتي، إن شاء الله خير، يلا  نقوم نجهز ونروح لها.

سلوى مسحت دموعها، واتحركت ناحية أوضتها وهي بتقول:

- أنا لازم أشوف بنتي يا نورا... لازم أشوفها.

==========================


في المستشفى

بعد شوية، سمح لهم الدكتور يدخلوا يطمنوا عليها، فدخلوا بهدوء، والدكتور معاهم.

كانت ليل نايمة على السرير، وحواليها الأجهزة، ووشها شاحب.

وفاء قربت منها بحذر، وعينيها مليانة قلق:

- حمد لله على سلامتك يا حبيبتي، ألف سلامة عليكي.

ليل فتحت عينيها بصعوبة، وبصتلها باستغراب، وردت بصوت ضعيف:

- الله يسلمك.

أم عبير قربت هي كمان:

- خوفتينا عليكي يا بنتي، ربنا يقومك بالسلامة.

ليل بصت للدكتور، وبعدها رجعت تبصلهم:

- هو... أنا أعرفكم؟

الكل سكت، وبصوا لبعض.

الدكتور اتدخل بهدوء:

= دول جيرانك يا ليل، هما اللي كانوا معاكي من أول ما وصلتي المستشفى.

ليل بصتلهم تاني:

- جيراني؟!

آدم حاول يبتسم:

- أيوه، إحنا جيرانك، متقلقيش.

ليل فضلت باصة لهم باستغراب، وبعدها سألت:

- طب... هو أنا فين؟

الدكتور:

= انتي  في المستشفى، اتعرضتي لحادثة، والحمد لله عدّينا المرحلة الأصعب

ليل عقدت حواجبها:

- حادثة؟ أنا مش فاكرة أي حاجة...

الدكتور قرب منها شوية:

= طيب يا ليل، ممكن تقوليلي اسمك بالكامل؟

سكتت شوية، وحاولت تفتكر، لكن ملامحها اتبدلت.

- مش فاكرة...

وفاء قربت منها أكتر، وصوتها بقى مليان خوف:

- طب فاكرة أنا مين يا حبيبتي؟

ليل بصتلها، وبعد لحظات هزت راسها بالنفي 

كلهم بصوا ل بعض بصدمه 


يتبع...

تكملة الرواية بعد قليل 


أنت الان في اول موضوع

تعليقات

التنقل السريع