القائمة الرئيسية

الصفحات

translation
English French German Spain Italian Dutch Russian Portuguese Japanese Korean Arabic Chinese Simplified

سكريبت بابا كتب في القايمة مية جرام دهب. كاملة وحصريه

 

سكريبت بابا كتب في القايمة مية جرام دهب. كاملة وحصريه 




بابا كتب في القايمة مية جرام دهب.


أنا كنت قاعدة قدامه في الصالون، لابسة الدبلة اللي اخترتها بنفسي من وسط التلاتين جرام اللي آدم جابهملي.


آدم طلع فاتورة الشبكة من جيبه، فردها على الترابيزة بالراحة، ورفع عينه بصلي.


كنت عارفة هو مستني مني أقول إيه. أنا اللي أخدت الفاتورة من الصايغ واديتهاله بإيدي. وكان ممكن أمد نفس الإيد دي وأشاور لبابا على الرقم المكتوب. نزلت إيدي تحت الترابيزة وقعدت ألف الدبلة في صباعي.


يوم ما اشترينا الشبكة، كنا أنا وماما وآدم واقفين قدام الفاترينة. الصايغ طلع إسورة عريضة كانت عاجبة ماما. لبستهالي، ولما سألت على سعرها افتكرت إن آدم كان لسه مكلمني الصبح يقولي إن النجار زود تمن باب الشقة، وإننا ممكن نضطر نأجل تركيبه لحد القبض.


طلبت أقيس إسورة أرفع كنت شايفاها من أول ما دخلنا. حركت إيدي كذا مرة وهي في صباعي وبعدين أخدت بالي إني بحرك إيدي كلها عشان أبص على الإسورة، مع إنها في معصمي. كنت مبسوطة بيها. وآدم كان واقف جنبي مستنيني أختار.


قالي:


‏- إنتِ عايزة الإسورة دي بجد، ولا عشان سمعتي تمن الإسورة التانية؟


‏= عشان الاتنين. دي عجباني، وأنا عايزة أوفر معاك. لو ماكنتش عايزاها، كنت قولتلك نلف على محل تاني.


اخترت معاها دبلة وخاتم وسلسلة. الصايغ وزن الأربع قطع قدامنا وقال تلاتين جرام. ماما سألتني لو متأكدة قبل ما الراجل يحسب، فقولتلها متأكدة. وطلبت من الصايغ يسيب الدبلة بره العلبة.


آدم خدها وسألني ألبسهالك؟ مديتله إيدي. وبعد ما لبسهالي، سألني لو المقاس مريح. لفّيتها مرة في صباعي وقولتله إنها مظبوطة. وإحنا خارجين من المحل، قولتله خلي فاتورة الشبكة في الملف اللي بتحط فيه فواتير الشقة. أنا كل ما أحط ورقة في شنطتي، ألاقيها لما أكون بدور على ورقة تانية.


كنا مخطوبين بقالنا تلات سنين. آدم بيشتغل محاسب الصبح، وبعد ما يخلص من الشركة بيطلع الشقة يتابع الصنايعية. وبالليل بيشتغل أوبر على عربيته. كنت ساعات أكلمه قبل المغرب، ألاقيه لسه راكن قدام الشركة وبياكل الغدا اللي جايبه من البيت. يقولي هخلص أكل وأفتح الأبلكيشن. ولو كلمته الساعة حداشر، يقولي هخلص آخر مشوار وأروح.


في الأول، كنا لما حاجة تغلى نقول نستنى لحد الشهر الجاي. وبعد ما استنينا على الغسالة ورجعنا لقينا تمنها زاد تاني، بقينا نشتري الحاجة أول ما نحوش تمنها. حتى لو هتفضل في كرتونتها عند ماما عشان الشقة لسه مش جاهزة.


مرة آدم اتأخر عليا وإحنا رايحين ندفع عربون القاعة. بعتلي اللوكيشن عشان يوريني إنه قرب، ولما فتحته لقيته لسه بعيد بكذا شارع. أول ما وصل قولتله:


‏= إحنا هنتجوز في القاعة دي ولا هنعمل الفرح في عربية أوبر؟


ضحك وقالي:


‏- والله فكرة. نوفر تمن القاعة ونشغل كاسيت العربية.


وبعدين خد مني ورقة المعازيم وسألني أنا واقفة من إمتى. قولتله من أول مرة قولتلي خمس دقايق. اعتذرلي، ودخل جابلي شاي عشان إيدي كانت ساقعة من الوقفة بره. ولما خلصنا مع الراجل بتاع القاعة، قفل الأبلكيشن وقالي نقعد شوية. فضلنا قاعدين لحد ما الشاي برد، وأنا كنت مستغربة إننا أخيرا لقينا نص ساعة نتكلم فيها من غير ما واحد فينا يقوم يلحق مشوار.


وقبل ما ننقل العفش بأسبوع، طلعت الشقة أستنى السباك يركب حنفية المطبخ. النجار جه قبله، وقعد يستناه معايا عشان يركب الضلفة اللي تحت الحوض. السباك كان قايلي إنه على أول الشارع. لما آدم وصل من الشركة بعد ساعة، لقاني أنا والنجار واقفين عند شباك السلم، كل ما حد يعدي نبص إذا كان السباك ولا لأ.


آدم اتصل بيه. طلع الراجل لسه بيخلص شغل في حتة تانية. قفل المكالمة وقالي:


‏- بكرة لما يقولي على أول الشارع، هسأله اسم الشارع قبل ما أتحرك.


النجار كان متضايق عشان مشواره راح، فآدم اداله أجرة المشوار واتفق معاه يرجع تاني يوم. لما مشي، لقيت آدم واقف عند رخامة المطبخ بيعد الفلوس اللي فاضلة معاه. قولتله معايا الفلوس اللي محوشاها للستاير، نقدر ندفع للسباك منها ونأجل الستاير أسبوع.


رفع عينه وقالي:


‏- إنتِ كنتِ مستنية الستاير دي من أول ما دهنّا الصالة.


‏= وأنا مستنية الحنفية عشان أعرف أغسل إيدي في الشقة بعد ما أشيل التراب من على الشباك. هنجيب الستاير الأسبوع الجاي يا آدم.


قعدنا ناكل كشري على كرتونتين في الصالة قبل ما ينزل يشتغل. وبعد أسبوع اشترينا الستاير. هو كان محوش جزء من المشاوير، وأنا زودت الباقي من مرتبي. فضلنا واقفين تحت الشباك وهي بتتركب، وكل شوية واحد فينا يقرب من التاني عشان يوريه إزاي اللون بقى شكله مع نور الصالة.


في آخر يوم كنا بننقل فيه العفش للشقة، طلبت منه يقعد معايا بعد ما العمال مشيوا. كان مستعجل يجيب مامته من عند خالته. حط مفتاح العربية على ترابيزة السفرة وقعد.


عملت كوبايتين شاي. ولما قام يجيب المعالق، فتح ضلفتين غلط، فقومت وريته الدرج. ومشيت قدامه لحد السفرة وأنا بقوله تعالى نقعد خمس دقايق. أنا عايزة أشوف شكل البيت وإحنا قاعدين فيه من غير ما يبقى فيه حد مستني فلوسه أو حاجة ناقصة.


قعدنا جنب بعض. ولما خلصنا الشاي، آدم غسل الكوبايتين في الحوض اللي كنا مستنيين السباك يركب حنفيته. وأنا قفلت باب الشقة بعدها وأنا بفكر إن الفرح فاضل عليه شهر واحد.


اتفقنا نكتب القايمة يوم التلات في بيتنا. ماما كانت عاملة عشا، وأنا بعت لآدم يجيب عيش عشان الحاج محمود هييجي معاه وماما عايزاه يفضل ياكل معانا.


بابا، الحاج حسن، كان قاعد في كرسيه اللي جنب شباك الصالون. هو على المعاش، ولسه بيكوي قميصه بنفسه لما يبقى عندنا ضيوف. وكان لابس القميص اللي لبسه أول مرة آدم جه يتقدملي. يومها شاف آدم ماسك كوباية الشاي ومش عارف يحطها فين، فزق الترابيزة ناحيته وكمل كلام معاه على مهله لحد ما آدم ارتاح.


بابا هو اللي طلع استلم التلاجة لما آدم كان عنده جرد في الشركة. فضل قاعد في الشقة لحد ما آدم جه، ولما شكرته على إنه ضيع وقته هناك، قالي «ضيعت وقت إيه يا مريم؟ أنا بس كنت مستني الواد ييجي يشوف التلاجة اتحطت فين». عشان كده كنت مطمنة وأنا بدي بابا القلم.


الحاج محمود كان قاعد قصاده. آدم كان جنبي على الكنبة، وملف الفواتير على رجله. وماما قاعدة جنب الباب بعد ما حطت كوبايات الشاي.


راجعنا التلاجة والغسالة والأوضة. بابا سأل على فاتورة المرتبة، وآدم طلعها من الملف. ولما بابا وصل للدهب كتب الرقم، ورفع راسه لأبو آدم.


‏- الدهب مية جرام يا حاج محمود. والمؤخر خمسين ألف جنيه.


آدم طلع فاتورة الشبكة من جيبه. كان حاططها لوحدها عشان تبقى في إيده أول ما نوصل لسطر الدهب.


‏- اللي اتجاب تلاتين جرام يا عمي. الوزن مكتوب أهو.


بابا بص على الفاتورة وقاله:


‏- أنا عارف إنك جبت تلاتين يا آدم. بس الزمن مالوش أمان وأنا لازم أأمن بنتي. واللي شاري مايفرقش معاه أرقام.


الخمسين ألف بابا كان سألني عليهم قبل القعدة. قولتله إن الرقم مناسب ليا، وإنه لازم يسأل آدم. إنما المية جرام سمعتها في نفس اللحظة اللي آدم سمعها فيها.


بصيت لبابا وهو ماسك القلم. كنت هقوله إن أنا اللي اخترت التلاتين. وخفت لو قولتها قدام الحاج محمود يحس إني بكسفه، وهو شايف نفسه بيقف عشاني. بصيت لآدم تاني. لقيته بيشيل إيده من على الفاتورة ويطبقها على رجله. وشه كان باين عليه إنه اتوجع من كلمة «اللي شاري». أنا شوفت ده كله، وبرضه فضلت ساكتة.


الحاج محمود حط كوباية الشاي على الطبق وقال:


‏- يا أستاذ حسن، مريم غالية عليا. اكتبوا كل حاجة اتجابتلها. والدهب تلاتين جرام، زي ما هو مكتوب في الفاتورة.


بابا سأله:


‏- هو أنا هطالبه بالمية بكرة الصبح يا حاج محمود؟


الحاج محمود رد عليه من غير ما يعلي صوته:


‏- ربنا يبعد عنهم أي حاجة وحشة. بس ابني مايمضيش على دهب ماجابوش، وإحنا كلنا قاعدين وعارفين هو جاب كام.


كنت مستنية آدم يفتح سيرة تعبه في الشقة، أو يقوم من مكانه وأنا أضطر أشرح للناس هو مشي ليه. هو قفل ملف الفواتير على رجله وقال لبابا:


‏- اديني يومين أفكر يا عمي. النهارده التلات، وأنا هاجيلك الخميس وأقولك رأيي بنفسي.


بابا سأله هو إيه اللي محتاج يومين.


‏- أنا زعلان دلوقتي. وعايز أرجع أتكلم معاك وأنا هادي، عشان أعرف أقولك أنا زعلت من إيه.


بابا حط غطا القلم ووافق يستناه للخميس.


ماما قامت تقولهم إن العشا جاهز. آدم اعتذرلها، وقام مع أبوه. مشيت وراه لحد باب الشقة وناديت عليه. وقف، والحاج محمود كان نزل أول كام درجة على السلم. كان عندي فرصة أقول لآدم اللي ماعرفتش أقوله قدامهم.


قولتله ابقى طمني لما تروح.


قالي حاضر، ونزل.


دخلت أوضتي وقفلت الباب. كيس فستان الفرح كان متعلق على ضلفة الدولاب، وطرفه كان بيتزنق كل ما أقفل الضلفة. شيلته وحطيته على السرير. وبعدها نقلته تاني عشان أقعد. فضلت أحرك الفستان من مكان لمكان وأنا بتخيل إن آدم ممكن يرجع الخميس ويقول لبابا إنه مش هيكمل.


بابا خبط على الباب. مسحت وشي وقولتله يدخل. قعد على الكرسي اللي جنب التسريحة، وأنا قعدت على طرف السرير.


سألني:


‏- إنتِ زعلانة مني يا مريم؟


‏= أنا اتفاجئت يا بابا. ليه ماقولتليش إنك هتكتب مية جرام وإنت عارف إنهم تلاتين؟


بابا بص لعلبة الشبكة اللي فوق التسريحة. وبعدين سألني لو فاكرة يوم ما عمتي سناء جت عندنا بعد ما اتطلقت.


كنت فاكرة. عمتي جت هي وابنها بشنطة هدوم واحدة. فضيتلها رف في دولابي، وهي طلعت ترينج ابنها وسألتني أنهي برنامج في الغسالة بيخلص بسرعة. كان عنده تمرين الصبح، وماكنش معاه ترينج تاني.


بعدها بكام يوم، بابا رجع من عند جوزها وسألها مين اللي دفع تمن الغسالة اللي كانت في شقتها. قالتله هي اللي دفعت وإن الفاتورة لسه في درج المطبخ هناك. بابا قالها هيرجع يدور عليها. هي قالتله سيب الغسالة يا حسن. ابنها كان كل ما يشوف بابا بيجهز عشان ينزل، يسأله إنت رايح ترجعنا بيتنا؟


بابا قالي:


‏- أنا شوفت أختي بتسيب حاجتها عشان تريح ابنها وتريح نفسها. ومن يومها وأنا كل ما أفكر في جوازك أسأل نفسي لو جيتيلي في يوم قولتيلي سيب حاجتي عنده، هعملك إيه؟


‏= بس عمتي كانت محتاجة تثبت إنها جابت الغسالة يا بابا. فاتورة الشبكة بتاعتي قدامنا، ومكتوب فيها آدم جاب كام.


‏- أنا عارف. وأنا بفكر لو احتجتِ تبدأي من الأول، هتبدأي بإيه؟


سألته إذا كان شاف من آدم حاجة خلت عنده الخوف ده. قالي لأ. وقعد شوية باصص للأرض وبعدين مد إيده يمسحلي دمعة من على خدي.


افتكرت كام مرة اتأخرت في الشغل ولقيته واقف عند أول الشارع مستنيني، عشان نمشي سوا الدقيقتين اللي فاضلين للبيت. كنت بقوله اطلع يا بابا، أنا شايفة باب العمارة من هنا. وهو يقولي وأنا شايفك أهو، تعالي نمشي مع بعض. أنا عارفة هو ليه مش قادر يبطل يعمل حسابي في كل حاجة. وفي نفس الوقت شايفة آدم وهو بيعد اللي فاضل معاه على رخامة المطبخ، وبفكر إزاي قولت لنفسي الراجل ده هيتصرف لوحده وأنا قاعدة جنبه.


قولت لبابا:


‏= اسمعه يوم الخميس. هو طلب يومين عشان كان زعلان ومش عايز يغلط فيك.


بابا قالي إنه هيسمعه، وقام خرج من الأوضة.


بالليل طفيت النور وفضلت على ضهري أبص في السقف. كل ما الموبايل ينور أفتكره آدم، ولما ألاقي الرسالة من حد تاني أقلبه على وشه. بعدها بدقايق أرجع أفتحه تاني.


كتبتله «أنا معاك». مسحتها. هو كان محتاج يسمعها وأنا جنبه، وماقولتهاش.


كتبت «لو بتحبني ماتخليش اللي حصل يبوظ الجوازة». مسحتها هي كمان. بابا كان لسه قايله اللي شاري مايفرقش معاه أرقام. وأنا كنت هطلب منه يثبتلي نفس الحاجة من غير ما أقولها بنفس الكلمات.


في الآخر بعتله «أنا عارفة إني سيبتك تتكلم لوحدك. آسفة يا آدم». رد وقالي إنه وصل البيت وإننا نتكلم بكرة.


قريت الرد أكتر من مرة. كنت عايزة أكتبله «لسه عايز تتجوزني؟». قفلت الموبايل وحطيته تحت المخدة، وبعد شوية طلعته تاني. هو كان مستني مني جملة واحدة في الصالون، وأنا فضلت طول الليل مستنياه يقولي جملة تطمني.


يوم الأربع روحت الشغل وأنا مانمتش غير شوية. ندى سألتني خلصنا القايمة؟ قولتلها هنقعد تاني الخميس. سألتني ناقصكوا إيه؟ قولتلها فيه رقم مختلفين عليه. ماكنتش عارفة أشرح لها ليه رقم مكتوب على ورقة يقدر في لحظة يخليني أبص لكل صور الشقة وأفكر أنا كنت بجهزها لمين.


في البريك فتحت صورة لآدم نايم على الكنبة ولسه لابس قميص الشركة. كان نام وإحنا مستنيين الراجل بتاع الستاير. أنا صورته يومها عشان أغيظه لما يصحى وأقوله إن الراجل جه ومشي وهو ماحسش بيه. فضلت باصة للصورة لحد ما ماما بعتتلي تسألني هنجرب الفستان إمتى. قفلت الصورة ورديت عليها «لسه هشوف».


وبعدها رجعت أفكر إن آدم لو مضى، هعرف أرد على ماما وأقولها يوم السبت. فضلت بين الفكرتين لحد ما خلصت الشغل وروحت البيت.


بالليل كلمت آدم وقولتله يعدي عليا عشان نقعد شوية. ركن تحت بيتنا في الشارع الجانبي، قدام المكتبة اللي كانت مقفولة. قولت لماما إني نازلة أتكلم معاه، ونزلت بالجاكيت فوق لبس البيت.


ركبت وقعدت جنبه. كان بيراجع آخر مشوار، فقفل الأبلكيشن وحط الموبايل بين الكرسيين.


‏- قولي يا مريم.


أنا كنت محضرة اعتذار وأنا بنزل السلم. ولما شوفته، أول حاجة قولتها كانت:


‏= امضي عشان خاطري يا آدم. والله أنا عمري ما هطلب منك الدهب الزيادة. إحنا فاضلنا شهر على الفرح. أنا خايفة كل حاجة تقف.


آدم فضل باصص قدامه لحد ما عربية كانت بتعدي راحت من قدامنا. وبعدين سألني:


‏- لو إنتِ متأكدة إنك مش هتطلبي مني الزيادة، عايزاني أكتبها ليه؟


قولتله عشان بابا يطمن.


‏- وأنا أطمن إزاي يا مريم، وأنا اللي همضي؟


قالها بهدوء. كنت متخيلة إنه هيتعصب، وكنت عارفة هرد بإيه لو اتعصب. إنما هو كان مستني مني إجابة، وأنا ماعنديش إجابة غير إني مرعوبة يروح لبابا الخميس ويقوله إنه مش عايز يكمل.


لف ناحيتي شوية وقال:


‏- يوم التلات، وأنا قاعد جنبك، كنت مستنيكي تقولي إنك كنتِ معايا لما اشترينا التلاتين. ولما ناديتي عليا عند الباب، وقفت عشان افتكرت إنك هتقوليها ساعتها. ولما قولتيلي ابقى طمني لما تروح، نزلت وأنا بسأل نفسي هي مريم سكتت عشان خايفة من أبوها، ولا عشان شايفة إن عنده حق؟


قولتله لأ يا آدم. ونزلت دموعي قبل ما أعرف أكمل. مسحت عيني بإيدي، ففتح درج العربية وطلع مناديل وحطها فوق شنطتي. استناني أمسح وشي، وماسألنيش بعيط ليه.


قولتله:


‏= أنا خفت بابا يحس إني بكسفه قدام أبوك. وأنا كنت شايفاك وإنت مستنيني أتكلم، وسيبت أبوك هو اللي يرد. ولما لحقتك عند الباب، أنا كنت عارفة إني لسه أقدر أقولك إنك عندك حق، وبرضه اخترت أقولك طمني لما تروح. أنا آسفة يا آدم. وآسفة إني نزلت أطلب منك تمضي عشان أنا أرتاح.


قالي إنه كان قريب يمضي وهو قاعد في الصالون. كان بيفكر إننا أول ما نمضي هنرجع نتكلم في الفرح عادي. وبعدين تخيل نفسه قاعد معايا في بيتنا بعد الفرح، ولسه عايز يسألني إيه اللي خلاني أسيبه يتكلم لوحده.


فضلت ماسكة المنديل في إيدي. أنا كنت عايزة البيت ده بما فيه. بس ماكنتش عايزة أول ما نقعد على سفرتنا يفتكر إن آخر حاجة طلبتها منه عشان نوصل لها إنه يكتب حاجة ماعملهاش.


قولتله:


‏= أنا مش عايزاك تمضي على المية. ولما نقعد تاني، هقول لبابا إن أنا اللي اخترت التلاتين. حتى لو هو ماسألنيش.


آدم سألني عن المؤخر. قولتله إن الخمسين ألف هو الرقم اللي أنا عايزاه، وإنه لو شايف الرقم كبير عليه نتكلم سوا. قالي هيراجع حساباته بالليل، وهيروح لبابا لوحده تاني يوم عشان هو اللي وعده يرجع يقوله رأيه.


سألته:


‏= إنت لسه عايز تتجوزني يا آدم؟


بصلي وقال:


‏- أيوه يا مريم. أنا زعلان، ولسه عايز أتجوزك.


عيطت تاني. والمرة دي عرفت أقوله إني كنت محتاجة أسمع الجملة دي من امبارح. قالي هو كمان كان محتاج يسمع مني إني هتكلم. وقعدنا شوية لحد ما قدرت أطلع البيت. فضل راكن لحد ما دخلت باب العمارة.


يوم الخميس، بدلت مع زميلتي في الشغل وروحت بدري. ماما كانت عند خالتي، وبابا كان نازل يجيب خضار. فتحت الشقة بمفتاحي وحطيت شنطتي في أوضتي. كنت هكلم بابا أقوله إني رجعت، ولقيت باب الشقة بيتفتح وسمعت آدم بيقوله «هات كيس الخضار يا عمي». كانوا اتقابلوا تحت وطلعوا سوا.


كنت هخرج أسلم عليه. افتكرت إنه طلب يقعد مع بابا لوحده، ففضلت في أوضتي لحد ما سمعت بابا بيحط كوبايتين الشاي على ترابيزة الصالون. خرجت للطرقة ووقفت ورا باب الصالون. كان مفتوح حتة صغيرة، وكنت شايفة منها طرف الكنبة وجزء من الترابيزة.


آدم سأل بابا هو خايف عليا من إيه. بابا حكاله عن عمتي سناء. وبعدين قاله إن الخمسين ألف دلوقتي ممكن تجيب حاجات، وهو مش عارف هتجيب إيه بعد كام سنة لو احتجت أبدأ من الأول.


آدم استناه يخلص، وبعدين فتح ملف الفواتير.


‏- الخمسين ألف أنا حسبتهم وموافق عليهم يا عمي. مريم قالتلي إن ده المبلغ اللي هي عايزاه. نأكد الاتفاق معاها، والمبلغ يتكتب في عقد الجواز. أنا عارف إني لما أوافق عليه يبقى حقها عندي، وأنا مسؤول عن كلامي قدام ربنا.


بابا سأله:


‏- والدهب يا آدم؟


‏- نكتب التلاتين جرام اللي اتجابوا، ونراجع كل حاجة في الشقة عشان حق مريم يبقى مكتوب. بس لو مضيت على مية جرام، هبقى قولت إني جبت سبعين جرام زيادة وأنا ماجبتهمش. أنا ماينفعش أكتب حاجة ماحصلتش وأقول لربنا يباركلنا في جوازنا.


بابا فضل يحرك المعلقة في الكوباية شوية. وبعدين حطها على الطبق وقال:


‏- أنا سامعك يا آدم. بس يا تمضي على المية جرام يا كل واحد يروح لحاله.


آدم زق الكرسي وقام. شوفته بيمد إيده على الملف، وسمعته بيقول لبابا «أنا جيتلك عشان كنت فاكر إننا نقدر نتفق يا عمي».


كنت حابسة نفسي وإيدي على ضلفة الباب. في ثانية تخيلته نازل السلم، وتخيلتني راجعة أوضتي أبعتله رسالة أقوله فيها أنا ماكنتش موافقة على اللي اتقال. زي ما عملت يوم التلات. لو كنت استنيت ثانية كمان، كان هياخد الملف ويمشي.


فتحت باب الصالون.


بابا رفع راسه بسرعة وقال «مريم؟». وآدم وقف وإيده على الملف، وبص ناحية باب الشقة كأنه بيحاول يفهم أنا دخلت إمتى. قولتلهُم إني رجعت بدري وسمعت الكلام. ومشيت لحد الترابيزة.


مسكت الدبلة بصباعين. لفيتها مرة وحاولت أسحبها، فوقفت عند المفصل. فردت إيدي ولفيتها تاني لحد ما طلعت. وحطيتها على الترابيزة جنب الورقة اللي فيها المية جرام.


الدبلة خبطت في الإزاز. بابا بص لها وبعدين بصلي. وقبل ما يسألني بعمل إيه، قولتله:


‏= لو إنت شايف إن الراجل اللي شقى تلات سنين عشاني حرامي ومش أمان، يبقى أنا كمان مش أمان لنفسي ومش هتجوز أصلا لا آدم ولا غيره.


ماكنتش بعيط. كنت بقول كل كلمة وأنا باصة لبابا، عشان لأول مرة كنت عايزاه يسمع كلامي كله قبل ما يرد.


قالي:


‏- أنا ماقولتش عليه حرامي يا مريم.


‏= إنت قولتله يا يمضي على حاجة ماجابهاش يا يمشي. وأنا كنت معاه لما جاب التلاتين. لو عشان أكمل معاه لازم أطلب منه يمضي على المية، أنا اللي هوقف الفرح يا بابا. أنا عايزاه. وعشان أنا عايزاه، مش هطلب منه تاني يمضي عشان خاطري.


آدم ساب الملف مكانه. وبابا مد إيده ناحية الدبلة، وبعدين رجعها على رجله من غير ما يلمسها. فضل باصص لصباعي الفاضي. فتح بقه كأنه هيقول اسمي، وقفل بقه تاني.


بعد شوية سألني:


‏- إنتِ كنتِ هتسيبيه يمشي؟


‏= أنا سيبته يمشي يوم التلات، وفضلت ألوم نفسي من ساعتها. النهارده كان لازم يسمع مني إني عايزاه قبل ما حد يقوله يمشي.


بابا بص لآدم وقاله اقعد يا ابني. استنى لحد ما آدم رجع قعد على طرف الكنبة. وبعدين شد الورقة ناحيته، وقرا السطر اللي كاتبه بإيده.


‏- أنا طول القعدة كنت بتخيل مريم راجعة عندي زي عمتها. وبعدين لقيتها واقفة قدامي بتقلع دبلتها، عشان أنا من شوية كنت بقولك تمشي. أنا كنت هوقف جوازها بإيدي وهي بتقولي إنها عايزاك.


رفع عينه لآدم وكمل:


‏- والدهب أنا عارف إنه تلاتين يا ابني. حقك عليا. الكلمة اللي قولتهالك عن اللي شاري كانت تقيلة عليك.


آدم رد عليه:


‏- ربنا يخليك يا عمي. خلينا نكتب حق مريم كله زي ما اتفقنا.


بابا مسك الورقة من النص وقطعها نصين قدامنا. حط النصين على طرف الترابيزة وطلع ورقة جديدة من الملف. فرد فاتورة الشبكة قدامه وسألني إذا كنت أنا اللي اخترت التلاتين. قولتله أيوه. وفضلت باصة للقلم لحد ما كتب «تلاتين جرام دهب».


راجعنا معاه الفرش والأجهزة من الفواتير. وبعدها سألنا على المؤخر. قولت خمسين ألف جنيه، وآدم أكد إنه موافق. بابا كتب تحت اللي اتفقنا عليه إن المؤخر خمسين ألف جنيه، ويتكتب بنفس الرقم في عقد الجواز.


مد القلم لآدم. آدم قرا الورقة على مهله. ولما وصل لسطر الدهب، رفع عينه بصلي. حطيت إيدي فوق الترابيزة وقولتله «أيوه يا آدم، تلاتين». بص لبابا، وبابا هز راسه. آدم مضى، وبعد ما خلص رفع راسه وبص لأبويا وهو بيمدله إيده. أبويا سلم عليه وقاله «ربنا يتمملكوا على خير يا ابني».


الدبلة كانت لسه مكانها جنب فاتورة الشبكة.


آدم خدها وسألني:


‏- ألبسهالك يا مريم؟


قولتله أيوه. ومديتله إيدي قدام بابا. الدبلة وقفت عند المفصل، ففردت صباعي وهو استنى لحد ما دخلت على مهله. وبابا كان باصصلنا، ولما آدم خلص، قام حط إيده على كتفه وسأله يقدر يفضل يتعشى معانا ولا وراه مشوار.


آدم قالي «اقعدي إنتِ. أنا هساعد عمي نحط الأكل». وقام معاه. فضلت قاعدة على الكنبة شوية، ببص على الدبلة وبسمع بابا من المطبخ بيسأله الحاج محمود بيحب الشاي من غير سكر برضه ولا هو فاكر غلط.


يوم كتب الكتاب، اتكتب المؤخر خمسين ألف جنيه في العقد. المأذون قرا الرقم قدامنا، وأنا وآدم قولنا إن ده اللي اتفقنا عليه، وآدم مضى على العقد. وعملنا الفرح في معاده، واتجوزنا ونقلنا لشقتنا.


أول ليلة هناك، آدم قفل الباب ووقفنا لحظة في الصالة. كانت نفس اللمبة منورة فوق السفرة، ونفس الكراسي اللي قعدنا عليها يوم ما نقلنا العفش. حط مفتاح العربية في الدرج. ولما شافني بلف الدبلة في صباعي، قرب مني وخد إيدي.


قالي:


‏- فاكرة لما قولتي لأبوكي «أنا عايزاه» والدبلة كانت لسه على الترابيزة؟ أنا من يومها وكل ما أفتكر وشك وإنتِ بتقوليها بفرح يا مريم. أنا كنت عارف إني بحبك. بس يومها عرفت إني لو الدنيا كلها وقفت قصادي، هلاقيكي واقفة جنبي. وأنا عايزك تبقي عارفة إنك هتلاقيني جنبك إنتِ كمان، قبل حتى ما تناديني.


قولتله وأنا بضحك:


‏= طب اقعد جنبي دلوقتي. أنا مستنية القعدة دي من تلات سنين.


سحبلي الكرسي اللي جنبه وقعدنا. سندت راسي على كتفه، وحطيت إيدي اللي فيها الدبلة في إيده. ولأول مرة من ساعة ما جه اتقدملي، قعدت جنبه وأنا عارفة إن مافيش معاد لازم يقوم فيه ويروح.


‏#ZiadMohamed 


تعليقات

التنقل السريع