 |
سكريبت ( ختاني سبب طلاقي )
انا نوال عمري ٢٣ سنه عاوزه احكيلكم حكايتي ومش خايفه اني افضح نفسي او تعرضي للتنمر من قبل المجتمع على قد ما أنا عايزه انصح ناس كتير مش عايزه الأهالي يغلطوا غلطت اهلي ويعرضو بناتهم للخطر ده
كان وقتها عندي ١٣ سنه وبدأت ملامحي تتغير وانوثتي تظهر ماما وبابا اخدوني في أجازت نص السنه علشان بقالنا كتير ماروحناش عند جددتي في سوهاج ولما وصلنا استلموني كلهم بعنيهم
مرات عمي : نوال ازيك يانونا عامله اي حاسه اني بقالي كتير ماشفتكيش ماشاء الله ياحببتي خراط البنات خرطك اهو
انا وقتها ماكنتش فاهمه يعني ايه خراط البنات خرطني لكن ماما ردت عليها
اه يا أم محمد انتي عارفه بقى البنات كباره وبتفور بسرعه
مرات عمى : شكلك عملتيها يا ام نوال هي هي
ماما : لا والله يا ام محمد الدكتور قال مش محتاجه
أم محمد: لا ياحببتي مالناش دعوه بالدكاتره احنا .......هما اصلا بيقولوا كده علشان الحكومه عامله حملات توعيه وبتحبس اي حد يعمل كدا
ماما : لا يا أم محمد انا اخاف على بنتي لاحسن لاقدر الله يحصلها نزيف ولا يحصل حاجه مادام الدكتور قال بلاش يبقى بلاش
امي خدتني من قدامها ومن عنيها ا للي هاتطلع عليا وعلي أنوثتي وروحنا على اوضه جدتي وسلمنا عليها وحضنتني اوي لاني كنت وحشاها
جدتي : ماشاء الله يانوال بقيتي عروسه يابنتي النبي حرسك وصاينك لبسيها الطرحه بقا يا سنيه ( امي سنيه ) خليها محتشمه كده علشان العين وحشه يابنتي
ماما: حاضر يا حاجه بس لما تخلص الاعداديه هاحجبها حاضر
خلص اليوم بعد التهاني والسلامات وطلعنا الهدوم اللي معانا وحطناها في الدولاب واستعدينا كالعاده لقضاء اسبوعين الاجازه وسط جو ريفي جميل زي كل سنه لكن ماكنتش اعرف ان مرات عمى وجددتي مش هايسييوني في حالي
بعد ماعدى كام يوم وانا كالعاده بلعب مع ولاد عمى ومبسوطه بالأرض وجمالها وكمان بطلع وانزل من علي الشجر بخفه وبركب عجل زي الصبيان اللي في البلد وكل العين كانت عليا زي مايكون بعمل حاجه غلط
رجعت البيت لاقيت مرات عمى وجددتي قاعدين مع ماما وبابا ومصممين علي ختاني ومصممين علي الختان وماما كل ماتقول بلاش انا خايفه عليها يقول لها لا علشان البنت تفور اكتر وتبقى كلها عفه وتكون محترمه
بابا بعد إلحاح شديد منهم وافق وهو كمان كان خايف عليا بس هما كانو بيخوفوه ويقولولو أنها لما تكبر اكتر هاتمشي على حل شعرها وتبقى زي الأجانب ومش هاتقدر عليها وكلام من ده كتيير
ماما ومرات عمي لاقوني واقفه بعيد بسمع وخايفه جم بسرعه واخدوني بعيد عن بابا وجدتي
مرات عمى : بصي يانوال انتي كبرتي ياحببتي ولا لازم تعمل عمليه كل البنات الحلوين بيعملوها لما ولما بيعملوها بيكبرو ويبقو انسات حلوين ويتجوزو ويبقو قمرات مش انتي عاوزه تبقى كبيره وحلوه كده وقمر
انا : ايوه انا نفسي اكبر وأبقى عروسه وأبقى حلوه كمان وماشي هاعمل العمليه علشان ابقى حلوه
ثقافتي زمان عن كل حاجه كانت معدومه وتفكيري كان محدود جدا كنت طفله وماكنش في نت زي دلوقتي اتعرف على ناس واعرف حاجات زي اي حد لا كان كل اللي يهمنى بابا وماما والأكل والشرب واللبس زي اي طفل
ماما : طيب ياحببتي اوعى تقولى حد علي حاجه خالي الموضوع ده سر بينا والسر يانوال لازم يكون فين
انا : في بير بإ ماما
ماما : شاطره يانونا
خرجت ماما وطنت ماجده ( ام محمد )
ماجده : بصي ياحببتي علشان السين والجيم احنا هانروح عند ام ذينب الدايه وهي بتعمل الموضوع ده في الدرا اتعلمت من جوزها المزين ( الحلاق ) وماتخالفيش البلد كلها بتروح عندها
بصتها امي وهي حزينه
حببتي ماتخافيش بنتك هي بنتي
سلمت ماما أمرها لله وهي خايفه عليا اوي وبتقول ربنا يسترها
جه اليوم التاني بسرعه واخدوني عند الدايه ام ذينب ورحبت بينا جدا لان طبعا ده رزق ليها مش علشان بتحبنا ولا حاجه
ام ذينب : اهلا اهلا .....اهلا وسهلا نورتونا اتفضلو تعالو
وبصت عليا
تعالي ياكتكوته ياصوغننه انتي اي دا ماشاء الله انتي عروسه وهاتبقى احلى عروسه ياترى مين ابن المحظوظه اللي هايتجوزك
بعد كده دخلوني اوضه شكلها غريب وفيها سرير وكان في واحده قاعده وجمبيها مقصات صغيره مشهد عمرى مانساه كأنه امبارح
ماما كانت عايزه تدخل معايا ام ذينب منعتها قالتلها انتي هاتخوفيها من خوفك عليها
ماما قربت مني وحضنتني وقالتلي : ماتخافيش ياحببتي طنت هاتخلص بسرعه وهاتطلعي وهاجبلك الايس كريم اللي انتي بتحبيه
انا بفرحه : بجد طب يلا ياطنت ام ذينب بسرعه علشان نفسي في ايس كريم
اخدتني الدايه ام ذينب ودخلنا الاوضه الغريبه دي
نمت علي السرير زي الهبله وفاكره اني العمليه اللي بيقولوا عليها دي في أيدي أو في بوقي زي اللوز كده ماكنتش اعرف انها في اكتر مكان بخاف منه وممكن يكون سبب في موتي
ام ذينب : يلا ياكتكوته نامي ياحلوه وافتحي رجلك وماتخافيش علشان نخلص بسرعه
انا بعياك : اي ده انتو هاتعملو فيا ايه ........لا ابعدو عني .....ابعدو عني ......ماماااااااااااا ماما انا خايفه تعالي خديني ماماااااااااااا
بعدها اغم عليا ومادرتش بنفسي
ياريت تقولولي في التعليق رايكم وانزل الجزء الثاني ولا بلاش اكتب اصلا في الموضوع ده ؟؟!!!!,
سكريبت الختان سبب طلاقي الجزء الثاني 👇
لما فوقت لاقيت نفسي في المستشفي وفي محاليل في أيدي وماما كانت قاعده جمبي وشكلها حزينه عليا وندمانه من اللي عملتو فيا قولتلها : ماما انتي بتعيطي ليه .....وانا هنا في المستشفى ليه ؟؟!!!!!
ماما : لا ياحببتي مش بعيط ولا حاجه الكحل ساح بس وانتي دلوقتي في المستشفى علشان ........علشان ...؟.........
انا : علشان ايه ياماما ......انا امبارح الست اللي كنا عندها كانت عايزه تعورني وانا خفت منها اوي ياماما
ماما حضنتني بسرعه : لا ياضنايا ماتخافيش انا هنا جمبك اهو متخافيش
وحاولت اقوم من على السرير بس حسيت بألم في نفس المكان اللي كنت خايفه منه
انا : اي ده ؟؟؟؟؟!!!!!
انا مش قادره اقوم من مكاني انتي سيبتيها تعورني بردو ياماما
وبعياط ودموعي نازله من عيوني وانا مش حاسه بيها ومنهاره من الصدمه ومش قادره اصدق مش قادر اصدق ان أهلي اللي وثقت فيهم يعملو فيا كده
قولت لماما وانا بعيط : لا يا ماما ابعدى عني أنا مش بحبك ليه عملتى فيا كده ليه ياماما ليه
وبعدها خرجت من المستشفى وتم شفاءي وكملت حياتي بعديها عادي بس من المنظر اللي شوفته لما روحت عند الدايه ولما صحيت في المستشفى وانصدمت من اللي حصل فيا الموقف فضل ملازمنى في حياتي اللي عشتها بعد كده وفضلت اخاف اوي على نفسي ومن المنطقه دي بالذات وبطلت ركوب عجل بسبب الفوبيا اللي بقت عندي
كبرت وبقى عندى ٢٠ سنه وبقيت في تانيه جامعه وكل البنات بتتجوز قدامي وانا بقى يتقدملي عرسان كتيير وانا كنت برفض بسبب الفوبيا دي
لحد مافي يوم من الأيام اتقدملي شخص كويس جدا وكان من الصعب اني ارفضه و ماما اتخانقت معايا وقالتلي لو ماوفقتيش عالجواز من كريم انا هاجوزك من البلد وتعيشي هناك طول عمرك فهمتى
انا : تاني يا ماما هانعيدو تاني البلد وجهل البلد عايزه تجوزني من هناك علشان لو خلفت بنت يحكمو عليها باللي حصل فيا انتي ايه مكفاكيش اللي حصل ياشيخه حرام عليكي دا انا مش قادره انسي كل اللي حصل زمان عايزاني اعيده تاني
امي بصتلي بحزن واسف وهي فعلا ندمانه وقالتلي
بصي ياحبيبتي اوعي تكوني فاكره أن نسيت اللي حصل أو إن ضميري بطل يؤنبني من اللي عملته معاكي انا ساعتها ضحكو عليا انا وابوكي ماكنتش اعرف ان الموضوع هايعملك فوبيا أو تخافي من الجواز بس صدقيني كريم انسان كويس وهايفهمك وانا مستعده اقعد معاه وافهمه كل حاجه وهو هيكون حنين عليكي وهاينسيكي اي حاجه حصلت زمان صدقيني وكمان هو شخص متحضر والدنيا دلوقتي مش زي زمان ومستحيل يوافق أنه يحصل كده لبنتكم
متخافيش يانوال سيبيها على الله يابنتي
ووافقت على الجواز من كريم وجه ميعاد الفرح وزي اي عروسه كنت فرحانه وخايفه ومتوتره من ليله دخلتي
كريم كان فعلا انسان لطيف وهادي ورقيق جدا معايا من اول يوم حسيت أن هو ده اللي هيعوضني عن اللي شفته في حياتي وان حياتي هاتكون كويسه معاه ومليانه حب وتفاهم قعد معايا واتكلمنا مع بعض شويه
كريم : صدقيني انا متفهم خوفك وتوترك ده كويس اوي وانا عمري ماهكون اسي عليكي أوثق فيا
بصتله بحنان ووافقت أنه يقرب مني ويلمسني وانا من جوا قلبي مطمنه بس ............بس ماكنتش حاسه معاه بأي شيء معاه اثناء العلاقه وكأني متخدره ........
ماكنتش حاسه اني كأنثى محتاجه أن جوزي يقرب مني زي اي ست ماكنش نفسي أبوسه أو احضنه لمسني زي مالمسنيش عدى اكتر من ٣ شهور واحنا على نفس الحال الموضوع بالنسباله بقي تقيل اوي بس هو معذور هو محتاج ست تحس بيه بجد وتكون ليها مشاعر مش عندها برود
الموضوع فاض بيه وخلاص اتخنق مني وأنا ديما كنت حاسه انتي تقيله اوي عليه كريم اتغير وبقى يدخل على مواقع اباحيه علشان ترضيه
ويلاقي هناك اللي ملاقهوش معايا
وفي يوم من الايام اتكلم معايا في الموضوع
كريم : نوال انا زهقت احنا لازم نروح لدكتور
انا : دكتور ايه .........انا كويسه ومافيش حاجه
كريم : كويسه اه هههههه....... هو انتي فاكره اني هاوديكي عند دكتور برد ولا كحه لا ياماما الموضوع كبير وبقى رخم اوي ولازم نشوف حل وانا خلاص مابقتش قادر اتحمل
بصتله بكسره ووجع كبير من جوايه هو بيكلمني وفاكر أنه بمزاجي
هو ازاي كده هو ليه بيعاملني بالقسوه دي
نفذ كلامه واخدني عند دكتور نسا كبير ولما فحصني قالنا
الدكتور : احممم ......
كريم : خير يادكتور طمنا
الدكتور : خير ان شاء الله ......الحقيقه المدام عندها برود جنسي وده يرجع لعمليه ختان اتعملت بالغلط المتخلف اللي عمل العمليه شال جزء كبير اكبر من اللي المفروض يتشال وده طبعا اثر علي شهوتها بشكل عام وادى البرود الجنسي وهي اصلا من الواضح أنها ماكنتش محتاجه للختان اصلا .........عاعموم انا هاكتبلها على شويه ادويه وفيتامينات وان شاء الله خير
مشينا من عند الدكتور وانا على وشك الإنهيار وحابسه دموعى في عيوني وخايفه انزلها مالقيش حد يطبطب عليا اصل الحنيه مابتتشحتش وكريم معدوم الإحساس كل اللي يهمه متعته وبس
عدى شهر وانا بستخدم العلاج من غير فائده كأني مبخدش حاجه وانا بحاول أمثل علشان ارضي جوزي بس بردو ماكنش بيبقى مبسوط وبيقعد لوحده كتير وانا طبعا عارفه هو بيعمل ايه
زهقت منه وقررت اني اطلب الطلاق والغربيه اني اول مافتحته في الموضوع كأنه كان مستني ووافقني وماحاولش يتمسك بيا حتى لو تمثيل انا كدا كدا كنت هاسيبه بس كان نفسي اشوف في عنيه نظره حنان واني كنت غاليه عنده حتى علشان لما افتكره بعد كده ماكرهوش بس هو قالي انا مش هقدر اجبرك تعيشي معايا غصب عنك وكل حقوقك هاتوصلك انا مش هاظلمك
ودا كان آخر كلام بينا وبعدها روحت عند اهلي وجبنا المأذون وقالي انتي طالق بكل برود
بعدها بشهر ظهرت اعراض غريبه عليا ماما قالتلى انتي حامل وفعلا عملت تحليل واتأكدت اني حامل وكريم حتى بعد ماعرف مافكرش أنه يرجعلي ..........
ناس كتير قالتلي انزل البيبي علشان مايكونش في حاجه تانيه تفكرني بيه بس انا رفضت وصممت اني احتفظ بالبيبي لاني كنت ناويه اني ماتجوزش تاني واتعرض لنفس التجربه المره اللي عشتها
ربنا رزقني ببنوته زي القمر شبهي وسمرا زي باباها وحمدت ربنا جدا اني رزقني بيها
وقررت اني اعيش واربيها وانسى فكرت الجواز واربي بنتي اكويس واحميها واكون سند وضهر ليها طول العمر
دي كانت حكايتي مع الختان انا اسفه لو كنت قولت حاجه ماكنش ينفع اقولها أو اتكلمت في موضوع ناس كتير بتتكسف تتكلم فيه بس القضيه مش قضيتي لوحدي ياما بنات تدمرت حياتها بسبب الختان ياما بنات أطلقت زي وياما بنات حصلها نزيف أثناء العمليه وماتت دي مشكله مجتمع وشعب وافكار سلبيه وبدع اخترعوها اجدادنا علشان يحافظو على بناتهم بنات كتير حصل معاها زي ومسألت الختان مالهاش علاقه بالأديان و لا عقوبات القانون اهم شيء التربيه لازم تكون واثق في تربيك لبنتك ولازم قبل خطوه زي دي تفكر في مستقبلها وأنها ممكن تكون سبب تعاستها مش صيانتها
ياريت تقولولي في الكومنتات رأيكم من فضلكم 👇
 انا نوال عمري ٢٣ سنه عاوزه احكيلكم حكايتي ومش خايفه اني افضح نفسي او تعرضي للتنمر من قبل المجتمع على قد ما أنا…){kind=link}
تعليقات
إرسال تعليق