 |
● الجزء الثالت عشر ●
حكاية_قمر 🌜💕
بقلم_ياسمين_علي ••
نسترجع أحداث الجزء اللي فات مع بعض ..
قمر : مش خلاص عرفتي اللي عاوزة تعرفيه .. اتفضلي روحي ماكان ماجيتي .. وانسي انك شوفتيني
هدي : قمر اسمعيني
فاروق نادي تاني
قمر ديرت وشها : مش عاوزة اسمع اتفضلي ماكان ماجيتي
هدي خرجت
" وقمر زقت الحاجات اللي قدامها كسرتها وانفجرت من العياط "
زين دخل بسرعة مسكها : اهدي انتي كويسة
قمر بتعيط: مش كويسة .. لييه عملت كداا فينااا ليه اتخلت عننا .. انا عاوزة اعرف ليييه سابتنا ليه بعدوا عننا كلهم .. ليه استحمل كل دا لوحدددي انا تعبتتت
زين : انا حاسس بيكي .. بس اهدي هيجرالك حاجة
عايدة داخلة تلطم : يلاااهوووي الحقييييييي ياااقمر تونة واقفة ع السطح و عاوزة ترمي نفسهاااا
قمر بخضة : ايييه !!!!!!
زين : انتي بتقولي ايييه ياعايدة .. ايه اللي طلع تونة ع السطح
عايدة : والله مااعرف يا استاذ زين .. تعالي ياقمر الحقيها بسرعة
_______________________
تونة قعدة ع حرف سطح الفيلا بتعيط
كنزي بخوف : تونة يا حبيبتي انزلي لتقعي
نجلاء : اطلع ياخليل بسرعة نزلها
تونة : محدش يطلع سبوونيي
كنزي : طب انزلي بس وقوليلنا مين زعلك ..
ليل جاية تجري : يلاااهوي تونة ايه طلعك فوققق انزززليييي
قمر بخوف : تونة !! تونة انزلي لتقعي
اسر واحمد خرجوا ع صوت الدوشة
احمد : ياساتر يارب .. ايه اللي بيحصل دا
تونة بتعيط : مش هنزل انا مش عاوزة اعيش خلاص
قمر : لا متقوليش كدا ونبي .. طب مين زعلك قوليلي انا زعلتك انا اسفة بس انزلي وانا هعمل كل اللي انتي عايزه
تونة بتعيط : ليه كدبتي عليا .. ليه فهمتيني اني اختك .. انا ماليش ام ولا اب .. ليه رموني ف الشارع .. انا مش عاوزة اعيش .. ابعدوا عني .. امشوا يلا امشوا انتو مش اخواتي انتو كدبتوا عليا.. انا ماليش اهل
قمر منهارة : لا متقوليش كدا يا فتون انا اهلك كلهم .. انا كدبت عليكي انا اسفة بس علشان خاطري متعمليش كدا ف نفسك .. انا ماليش غيرك انتي وليل .. انتي بنتي يا فتون .. انا اللي ربيتك انا اللي استحق ابقا امك مش حد تاني .. متوجعيش قلبي وانزلي .. علشان خاطري يا فتون انزلي ياحبيبتي انا مش هستحمل حاجة تحصلك
" الكل واقف بيعيط وخايف عليها لتقع ومصدومين "
تونة : انتي بتقولي كدا علشان مزعلش .. انا سمعتها وهي بتقول اني مش بنتها .. انا مش اختك .. وليل مش اختي .. ليه رموني ف الشارع ليه هو انا وحشة
زين : لا يا تونة انتي جميلة .. وكلنا بنحبك كمان مين قال انك وحشة .. انتي شايفة اخواتك عاملين ازاي وخايفين عليكي ... ازاي عاوزة تسبيهم ليه . . انتي اختهم ودول عيلتك يلا ياحبيبتي انزلي
ليل بتعيط : يلا ياتونة انزلي وانا هجبلك كل الحاجات اللي بتحبيها ومش هتعارك معاكي تاني انا اسفة .. يلا علشان خاطري انزلي . . بلاش علشان خاطري انا .. علشان خاطر قمر .. مش انتي قولتيلي قبل كدا انك مش بتحبي تشوفيها زعلانة .. بصي قمر زعلانة ازاي علشانك .. انزلي وفرحيها يلا
الكل : يلا ياتونة انزلي كلنا بنحبك يلا
تونة بصيتلهم كلهم وبصيت لقمر ومسحت دموعها : ماشي هنزل .. بتقوم تقف
قمر بخوف : خليبالك .. خليبالك
زين : استننيي متتحركيش انا هطلع اجيبك متتحركيش
تونة واقفة ع السور وجاية بتلف رجلها كانت هتفلت .. الكل صرخ .. وحد شد تونة والكل طلع يجري ع السطح
زين وصل اول واحد و قمر وراه والباقي وراهم
كريم ماسك تونة جامد وواقعين ف الارض
قمر طلعت تجري ع تونة و زين ع كريم
قمر حضنت تونة : ياحبيبتي اوعي تعملي كدا تاني
كريم بخوف وبيترعش : مش عاوزها تموت .. مش عاوزها تموت
زين : كريم انت بتتكلم !!!
اسر واحمد طلعوا يجروا عليه بفرحة
نجلاء : الف حمد وشكر ليك يارب
كريم : مش كل لما اتعلق بحاجة تروح .. ماما ماتت قدامي ومقدرتش انقذها .. مش هسيبها تضيع هي كمان ..
زين : اهدي ياكريم .. اهدي تونة مجرلهاش حاجة .. انت انقذتها
احمد بيعيط : انا اسف يابني اني مقدرتش اعمل زيك .. انا اسف
كريم حضنه : انا اللي اسف يابابا .. متزعلش مني
احمد : ازعل منك ايه يابني .. دانا مصدقة سمعت صوتك .. علشان خاطري يابني متحرمنيش منه تاني
كريم : حاضر يابابا
"اتطمنوا ع تونة وكريم وكل واحد نزل ع بيته "
______________________
قمر شايلة تونة حضنها ودخلت الأوضة تنيمها
تونة مسكت ايدها وبتعيط : انا اسفة اني زعلتك مني
قمر باستها : عمري ماازعل منك ياحبيبتي .. بس متعمليش كدا تاني علشان مش هقدر اعيش من غيرك .. مسحت دموعها.. يلا نامي دلوقتي وارتاحي ومتفكريش ف اي حاجة وحشة تاني
تونة: حاضر
قمر : تصبحي ع خير ياحبيبتي
________________________
زين : اييه اللي بتقولو دا يابابا معقول فاروق يطلب كدا
احمد : أيوة يا زين زي ماسمعت فاروق طلب اسر ل صافي
زين : ايه البجاحة دي هي وصلت لكدا
احمد : مش بس كدا دا حط جوازة نور من سائر قدام جوازة اخوك من بنته
زين : واسر عمل ايه
احمد : مش اسر اللي عمل دي نور نفسها اللي رفضت
زين : نور رفضت !! دي روحها ف سائر ازاي تعمل كدا
احمد : محبتش اخوك يتدبس ف جوازة مش عاوزها بسببها
زين : طب وهي عاملة ايه دلوقتي
احمد : مش عارف يازين .. هي من ساعة مامشوا وهي ف اوضتها .. اطلع اتكلم معاها يابني .. انت الوحيد اللي تقدر تخرجها من اللي هي فيه دا
زين : حاضر انا هروحلها متقلقش
_____________________
ليل : تونة نامت
قمر : أيوة نامت .. تعالي ياليل عاوزكي
ليل : خير ياقمر
قمر بتوتر : انتي شوفتي اللي حصل .. وسمعتي اللي تونة قالته .. واكيد بتسألي نفسك عرفت ازاي ومين الست اللي اتكلمت عليها وانا ..
ليل : لا ياقمر مش بسأل نفسي مين الست دي .. علشان انا عارفة هي مين
قمر باستغراب : عارفة ايه ؟
ليل : عارفة ان الست دي تبقا امنا اللي سبتنا واتجوزت .. واللي كدبتي عليا انتي وتيتا وقولتي انها ماتت
قمر : انتي عرفتي منين الكلام دا
ليل : سمعتك لما كنتي بتتفقي مع تيتا ع انك تقوليلي ان ماما ماتت زي ما قولتو ان بابا كمان مات .. و الحقيقة هي انهم سابونا ومشوا
قمر : انا كدبت عليكي علشان متتوجعيش زيي
ليل :لو كنت اكتشفت الكدبة دي دلوقتي كان هيحصلي زي ماحصل ل فتون واكتر
قمر : لا لا بعد الشر عليكي ياحبيبتي اوعي تقولي كدا تاني
ليل دمعت : احساس صعب اوي لما تشوفيها قدامك ومتقدريش تحضنيها وتعاتبيها وتقوليلها وحشتيني ليه سبتيني لوحدي انا كنت محتاجاكي اكتر من أي حد
قمر : انتي شوفتيها ياليل
ليل : تخيلي ومعرفتنيش .. كانت جاية توصي اسر ع صافي .. طلعت مربية اكتر بنت بتكرهني .. سابتنا علشان تربي غيرنا وتديهم كل الحب والحنان اللي احنا كنا نستحقه .. نفسي اعرف ليه عملت كدا !! انا حتي مش عارفة أكرهها انا لسه بحبها رغم اللي عملتوا
قمر : اوعي تكرهيها ياليل .. ماما كانت احسن واحدة ف الدنيا.. هي استحملت حاجات محدش يقدر يتحملها .. صحيح انا مش قادرة اعرف سبب انها تسيبنا بس انا متأكدة انها عملت كدا غصب عنها .. انا نفسي اعاتبها زي زيك بس عمري ماافكر اكرهها .. وانتي كمان ياليل اوعي تكرهيها ياحبيبتي ..
ليل : حاضر ياقمر
قمر : في حاجة كمان عاوزة اقولك عليها بخصوص ابونا
ليل : ايه هو كمان طلع عايش
قمر : لا هو مات
ليل : عرفتي منين
قمر : من استاذ احمد
ليل : استاذ احمد ايه علاقته ب بابا ؟
قمر : هحكيلك ...
_________________________________
سائر بعصبية : ممكن افهم ايه اللي حصل دااا .. انت ازاي تعمل كدا
فاروق : وطي صوتك وانت بتكلمني
سهر : اهدوا ياجماعة انا مصدقه صافي خدت المهدأ ونامت .. اهدوا وفهموني ايه حصل
سائر : قولها عملت ايه .. قولها ازاي بوظت فرحت ابنك
فاروق : انا بقولك وطي صوتك .. وبعدين انا مبوظتش فرحتك .. انا قولت بدل الفرحة تبقا اتنين .. اختك كمان من حقها تفرح
سائر : انت كدا بترخصها مش بتفرحها
فاروق : قطع لسان اللي يقول ع بنتي كدا
سائر : واللي انت عملتوا دا اسمه ايه .. رايح تطلب ايد اسر ليها وتقول مش بترخصها
سهر بصدمة : اييه !
فاروق بتوتر : انا معملتش حاجة غلط .. هما بيحبوا بعض ليه لا
سائر : انتو مصدقين نفسكم .. اسر مبيحبهاااش افهموا بقا .. بنتك محتاجة تتعرض ع دكتور نفسي .. اللي صافي في دا مش طبيعي
فاروق: اخررس انا بنتي زي الفل .. انت اللي اناني مش بتحب غير نفسك وبس
سائر : الانانية اللي انتو عملتوها .. بوظت فرحتي وضيعت مني الحاجة الوحيدة اللي صح ف حياتي واللي بتفرحني .. بسبب انانيتك .. طول عمرك تعمل الي انت عاوزه مش اللي انا عاوزه .. بتفضل صافي عني بوظت فرحتي علشان ترضيها بحاجة مش عاوزها اصلا ... بس انا مش هسيب نور مهما حصل .. واه انت بالي بتعملوا دا مش بترضي صافي انت بتدمرها .. عن اذنك
سهر : معلش يافاروق .. دا اكيد شيطان ودخل بينكم متزعلش ياخويا ياحبيبي
فاروق : روحي روحي مش عاوز اشوف حد قدامي رووحي
سهر : حاضر
ماشية بتكلم نفسها : يخربيتك يابت ياصافي بقا جنانك يوصلك تبوظي فرحة اخوكي .. ونبي كان عندي حق لما قولت ابدء بيكي .. انتي لو اتسابتي شوية هيبقا عندنا اتنين فاروق مش واحد
__________________________
قمر : هو دا كل اللي حصل .. انا مردتش اقولك ف الأول علشان مكنتش عارفة اذا كنت هاخد الفلوس دي ولالا.. بس اكتشفت اننا محتاجينها .. احنا مبقاش عندنا حاجة .. وصعب ابدء من الصفر تاني
*موبايلها رن *
قمر : دا عربي
ليل: عربي هيكلمك ليه
قمر : اصل انا كنت طالبة منه حاجة .. استني ارد
الو .. ياعربي .. ازيك ياخويا عامل ايه
عربي : الحمد الله ياقمر .. مال صوتك ياقمر انتو كويسين
قمر : ماليش .. احنا كويسين كلنا .. المهم قولي عملت ايه ف اللي طلبته منك
عربي : لقيتلك شقة حلوة اوي وجاهزة من مجاميعه .. وف منطقة نضيفة .. بس تمنها غالي حبة
قمر : متشغليش بالك بالفلوس ياعربي .. المهم هنروح نشوفها امتا
عربي : من بكرا لو عاوزة ..
قمر : طب حلو اويي .. بكرا تعدي عليا ف الفيلا تاخدني نروح نشوفها والي فيه الخير يقدمه ربنا
عربي : ان شاءالله بكرا الساعة 5 هكون عندك
قمر : ماشي ياخويا هستناك .. سلام سلام
ليل : في ايه يا قمر خير
قمر : اصل انا كنت موصيه الواد عربي يشوفلنا شقة حلوة كدا علشان ننقل فيها وهو لقالي واحدة وهنروح نشوفها بكرا
ليل : بجد .. طب انا عاوزة اروح معاكم
قمر : ومين يقعد مع فتون .. خليكي انتي متقلقيش هختار حاجة نضيفة
ليل : ماشي
كنزي : ممكن ادخل
قمر : تعالي يا حبيبتي اتفضلي
كنزي : تونة عاملة ايه دلوقتي ياقمر
قمر : الحمدالله ع كل حال .. هي نامت دلوقتي ان شاءالله تصحا كويسة
كنزي : ان شاءالله
قمر : طب اسيبكم تقعدوا مع بعض وانا هروح للاستاذ احمد .. عينك ع فتون ياليل
ليل : حاضر
ليل: مالك ياكنزي شكلك مضايقة
كنزي : بتصل بحازم من بدري مش بيرد عليا
ليل : يمكن مش فاضي يرد
كنزي : لا هو المفروض خلص شغله ..
ليل : يمكن روح نام
كنزي : مش عارفة بس قلقانة
ليل : طيب بقولك ايه ماتكلمي امه وتعرفي اذا كان ف البيت ولالا
كنزي : تصدقي فكرة استني هكلمها
ليل : ها ردت
كنزي : لا لسه بيرن .. اهي .. الو .. أيوة ياماما
فريال : الوو .. مين معايا
كنزي : انا كنزي
فريال : اااه كنزي .. ازيك ياحبيبتي
كنزي : انا كويسة الحمدالله ياماما .. حضرتك عاملة ايه
فريال : الحمدالله ياحبيبتي بخير ..
كنزي : يارب دايما ياماما .. هو حازم عندك ف البيت
فريال : حازم.. يعني كنتي بتتصلي تسألي ع حازم مش عليا
كنزي بتوتر : لالا طبعا ازاي انا كنت بتصل أسأل عليكي انتي .. ماهو انا لو عاوزة حازم اكيد هكلموا هو
فريال : ماهو علشان نايم ومبيردش عليكي قولتي تكلميني انا تعرفي مني
كنزي : لالا حضرتك فاهمة غلط خالص .. انا كنت اقصد
فريال : لا قصدك ولا مقصدكيش خلاص .. هو نايم لما يبقا يصحا تكلميه .. سلام
ليل : في ايه مالك
كنزي : قفلت السكة ف وشي
ليل : دي ولية قليلة الذوق بصحيح
كنزي : اعمل ايه دلوقتي.. اهي زعلت ومدتنيش فرصة ارد .. انا خايفة حازم كمان يزعل مني .. ياريتني مااتصلت
ليل : يزعل منك ليه انتي معملتيش حاجة غلط .. الحق عليكي انك بتطمني عليه يعني ..
كنزي : طب اعمل ايه دلوقتي
ليل : متعمليش حاجة مش اطمنتي ان هو نايم .. هو لما يصحا هيكلمك من نفسه .. وشوفي بقا هي هتحكيلوا ولالا
كنزي : حاضر
________________________
قمر بتخبط ع باب المكتب : ممكن ادخل
احمد : اتفضلي يابنتي
قمر : انا جاية اعتذر عن اللي حصل انهاردة بسببنا .. وبوظنا فرحتكم .. اوعدك مش هتتكرر تاني
احمد : فرحة ايه بقا مافيش فرحة اصلا .. انتي مالكيش ذنب ف حاجة
قمر : يعني ايه الكلام دا .. مش قراية فاتحة نور كانت انهاردة
احمد : الموضوع انتهي من قبل مايبدأ
قمر : ايه الي حصل بس
احمد : فاروق بيه طلب ايد نور لسائر واسر لصافي .. يا كدا يابلاش .. قولنا بلاش
قمر : لا حول ولا قوة الا بالله .. طب وذنب نور وسائر ايه بس .. يبوظ فرحة ابنه كدا
احمد : علشان كدا بقولك انتي مالكيش ذنب .. بل بالعكس بسبب اللي حصل لتونة دا كريم اتكلم .. ودي احسن حاجة حصلتلي من وقت موت امهم
قمر : ربنا يرحمها يارب ... المهم نور عاملة ايه دلوقتي
احمد : ان شاءالله تتجاوز الموضوع زي مااتجاوزته قبل كدا
قمر : باذن الله ..
احمد : خير ياقمر انتي كنتي جاية تقولي حاجة
قمر بتوتر : لا مش وقته بقا
احمد : ايه اللي بتقولي دا بس ياقمر .. انتي تقولي اللي عاوزه ف اي وقت .. خير محتاجة حاجة
قمر : لا الحمدالله مستورة .. انا بس كنت خليت حد يشوفلي بيت كدا ليا ولاخواتي احنا تقلنا عليكم اوي
احمد : متقوليش كدا انتو بقيتوا من العيلة خلاص .. المهم انتي سامحتيه
قمر : مكدبش عليك يااستاذ احمد . . انا مش هقدر اسامحه بسهولة كدا
احمد : سامحيه يابنتي .. ابوكي كان ندمان آخر مرة شوفته .. ياريتك كنتي شوفتيه ساعتها
قمر : حاضر هحاول .. ربنا يرحمه بقا .. المهم انا كنت جاية اخد موافقتك بس ..
احمد : لو دا هيريحكم انا مش هعترض .. بس افتكري ان البيت دا مفتوح ليكم ف اي وقت تحتاجه حاجة انا موجود
قمر : ربنا يخليك يااستاذ احمد ويديك ع قد طيبتك دي .. يلا استأذن انا
احمد : اتفضلي يابنتي
________________________
سهر ف العربية سرحانة وبتفتكر
فلاش باك ●
سهر ع سرير ف المستشفي : بنتي .. بنتي
الممرضة : حمدالله ع سلامتك
سهر : بنتي .. بنتي فين
الممرضة : بنتك زي الفل الحمدالله
سهر : فينها عاوزة اشوفها
الممرضة : فاروق بيه جه خدها .. وقال لما تقومي بالسلامة تبقا تروحي البيت هتلقيها
سهر : ايييييه فارروق خدهاا .. اززززاييي
الممرضة : اهدي ياحبيبتي مينفعش العصبية دي انتي لسه تعبانة
سهر : اززاااي بنتي حد ياخدها غيرري .. انا هوديكم ف ستين داهيةةة
الممرضة : دا اخو حضرتك وهو خاف للبنت تتلغبط ف طلب ياخدها والمستشفي اديتهالوا .. اهدي بس كدا ولما تقومي روحي خديها منه
سهر : ابعدي عني انا عاااوزة بنتي هاتوهالي دلوقتي
الدكتور : ايه الصوت دا .. ايه اللي مقومها من السرير .. وانتي ازاي سايبها كدا
الممرضة : والله يادكتور بحاول امنعها مش عارفة .. عاوزه بنتها
الدكتور : وفين بنتها
الممرضة : اخوها خدها
الدكتور : هاتي المهدأ بسرعة
سهر : سبوونييي انا عاوزة بننتتيي ... ازاي تسبوا ياخدها حرام عليكم . . ابعدوا عنييي .. ابعدوا ...
الدكتور : خلاص هي كدا نامت .. خليبالك منها .. لو حصلها كدا تاني لما تفوق ناديني
الممرضة : حاضر يادكتور
______
السواق : يااستاذه يااستاذة
سهر : ها .. بتقول حاجة
السواق : دا العنوان اللي حضرتك عطتهوني
سهر : متأكد
السواق : أيوة متأكد
سهر : طيب شكرا ..
_______________
... : سهر !!
سهر دخلت : كويس انك لسه فاكرني
سليم : انتي عرفتي منين اني رجعت .. انتي بترقبيني
سهر : انا مش براقبك .. انت الي بتتهرب مني مش عارفة ليه .. بدل ماتقف جنبي ونحاول نرجع بنتنا سوا
سليم : نرجعها .. وهنرجعها ازاي بقا ان شاءالله .. انتي بعد كل السنين دي عرفتي ترجعيها
سهر : لا بس قريب هرجعها ..
سليم : بجد والله .. طب عاوزة مني ايه دلوقتي
سهر : انا جاية علشان اقولك اننا اول لما نرجع بنتنا واخلص من فاروق .. نرجع لبعض .. انت وحشتني اوي ياسليم
سليم بعد عنها : تخلصي من فاروق مرة واحدة .. انتي فاكرة بقربك منه وانك تعملي دور الاخت الطيبة .. دا كدا هيخليكي تخلصي منه ... انتي شكل الانتقام عمي عنيكي ونساكي فاروق يقدر يعمل فيكي ايه
سهر : مش هيقدر يعمل معايا حاجة . . انا بلعب ع نقطة ضعفه .. بنته الوحيدة.. هدمره عن طريقها .. صدقني فاروق متعلق ببنته بطريقة متتخيلهاش .. هي دي طريقي اللي ماشية فيه
سليم : انا زهقت من الشر اللي جوا العيلة دي .. انا خلاص طلقتك من زمان خلاص انا وانتي مبقاش ف حاجة تربطنا ببعض
سهر : لا ياسليم بنتنا بتربطنا ببعض . . صدقني ياسليم انا مش شر .. هو اللي عمل فيا كدا ووصلني لكدا .. مش هرتاح غير اما اخد حقي وحق امي وحق بنتي وحق حبنا اللي ضيعوا .. فاروق عمل فيا كتير اويي .. مش عاوزني اردله جزء من اللي عملوا فيا
سليم : قولتلك زمان نتجوز ونسافر وهبعدك عن كل دا وتنسي فاروق وحقك .. انتي عاندتي وقولتي مش هتمشي غير لما تاخدي حقك .. لحد ما خد بنتك منك .. انتي اللي جواكي الانتقام .. وانا استحالة اعيش حياتي ف وسط كل العك دا .. انا خلاص نسيت كل حاجة .. ابعدي عني روحي شوفي انتقامك اللي مش هيخلص غير لما يخلص عليكي
سهر : ماشي .. انا همشي .. بس مش هستسلم ياسليم وهوريك اني هقدر اخد حقي من فاروق .. ومش هسيب انتقامي يخلص عليا .. انا مش هموت غير لما اخد حقي كله من فاروق .. هتشوف يا سليم .. عن اذنك
______________________
○ في اسكندرية ○
مني : ريم انا نازلة السوق اجيب حاجات .. لما سارة تصحا عرفيها ان الفطار بتاعها محضره ف التلاجة
ريم : حاضر ياماما
مني : متنسيش ياريم علشان انا ممكن اتأخر
ريم : يووة قولتلك حاضر بقا
مني : ماشي يلا سلام
ريم : سلام ..
" ونطيت دخلت الأوضة بسرعة فتحت البلكونة تبص ع مامتها ولما اتاكدت انها مشيت طلعت تجري فتحت الباب وخرجت "
سارة قامت من النوم بتدور ع حد ف البيت : ماما .. ريم .. هما راحوا فين
عديت من جنب الباب .. سمعت صوت
ريم : بقولك ايه بقا انا مش هعرف اشوفك كتير ..
عمرو : ليه بس كدا ياحبيبتي
ريم : اصل اختي جت وهتقعد معانا ومش هعرف اخلع منها هي وماما.. دانا مصدقة انها نايمة علشان اطلع اشوفك
عمرو : وبعدين بقا اتصرفي يعني ايه مش هشوفك ...
ريم : اعمل ايه يعني معنديش حل تاني يا عموري
عمرو : انا عندي الحل ..
ريم : ايه هو
عمرو : نتكلم فيديو
ريم : لا طبعا مش هينفع
عمرو : ليه بس يا ريري ياحبيبتي
ريم : كدا وخلاص قولتلك مليون مرة لا ياعمرو
عمرو : تبقا مش بتحبيني زي مانا مابحبك
ريم : ايه اللي بتقولو دا ياعمرو .. انا بحبك ومقدرش اعيش من غيرك
عمرو : يبقا حاولي .. ماهو انا مش هقدر مشوفش القمر دا كل يوم ..
ريم ابتسمت : حاضر هحاول بس موعدكش
عمرو مسك ايدها : لا هتوعديني
ريم : اوعا ياعمرو لحد يشوفنا
" سارة فتحت الباب فجأة "
ريم بتوتر وخوف : ساررة !!
عمرو : طب استأذن انا بقا .. "طلع يجري "
سارة : ادخلي قدامي
ريم دخلت
سارة : ممكن افهم ايه اللي انا شوفته دا .. انتي ازاي تعملي كدا ..
ريم : انا .. انا بصراحة انا وعمرو مرتبطين وبنحب بعض
سارة : نعم !! ارتباط ايه .. انتي عارفة عندك كام سنة
ريم : الحب مش بالسن ..
سارة : ريم افهمي .. انتي صغيرة .. حتي لو مش صغيرة .. ملقتيش غير الطريقة دي اللي تحبي بيها .. وملقتيش غير الشخص دا
ريم : انا مش هسمحلك تتكلمي عنه وحش
سارة : عاوزني اقولك ايه بعد اللي سمعته .. دا انسان كداب وبيتسلي .. انتي شايفة اول لما شافني طلع يجري ازاي وسابك
ريم : قولتلك متغلطيش فيه . . هو مش كداب ولا بيتسلي بيا .. واذا كنتي انتي عرفتي واحد واتسلي بيكي ف دي مش مشكلتي .. متطلعيش عقدك عليا . . عن اذنك
_________________________
بعد مرور أيام ▪
اسر : يعني خلاص هتمشوا
ليل : اه قمر بتجهز حاجتنا .. والعربية زمانها جاية
اسر : وكان فيها ايه يعني لو فضلتوا معانا
ليل : قمر مش عاوزة تتقل ع عمو احمد اكتر من كدا ..
اسر : ومين كان اشتكي بس ..اووف .. طيب هشوفك ازاي
ليل : ف الكلية بقا
أسر : كل يوم هاجي آخدك ونروح مع بعض ماشي
ليل : هفكر
اسر : مش كفاية تفكير بقا
ليل بخبث : ف ايه
اسر : لا والله ولا حاجة
ليل : اه بحسب .. المهم نور عاملة ايه
اسر : بتحاول تتعامل معانا عادي وتبين أن مافيش حاجة .. بس انا متاكد انها مش كويسة .. ومش عارف اعمل ايه حاسس اني انا السبب
ليل : انت السبب ليه .. هي الزفتة دي اللي بوظت كل حاجة .. عاوزة تاخد مني كل حاجة مش كفاية اللي خدته
اسر : صحيح انتي محكتليش ليه ساعتها ان مامت صافي .. تبقا مامتك
ليل : مافيش حاجة اسمها مامت صافي هي مامتي انا بس وهي خدتها .. واحكيلك اقولك ايه اقولك انها سابتنا .. وتقولي سابتكم ليه ومعرفش ارد . . اذا كان انا نفسي معرفش سابتنا ليه
اسر : طيب اهدي خلاص .. ان شاءالله الامور تتصلح وترجع لكم
ليل : ان شاءالله
قمر طالعة بالشنط : تعالي ياليل خدي مني .. وانت ياخويا بطل نحنحة وتعالي ساعدني
اسر : نحنحة ايه بس .. هي ليل تعرف حاجة غير النكد
ليل : افندم بتقول حاجة
اسر : لا مبقولش
قمر : بس انت وهي بقا .. اهي العربية شكلها وصلت روحوا ودوا الشنط وانا هروح اسلم عليهم قبل ماامشي
ليل : حاضر
اسر : يلا قدامي
" قمر دخلت الفيلا هي وتونة "
نور واحمد وكريم قعدين ..
تونة طلعت تجري تحضن نور
نور : خلاص ناويته تمشوا وتسبوني
" زين نزل وقف ع السلم "
قمر : ع عيني اسيبك والله يانور .. بس انتي طبعا هتجيلنا كل يوم ومش هتسبينا
احمد : مع السلامة يابنتي .. خليبالك من اخواتك .. و زي ماقولتلك بيتي مفتوح ليكم ف اي وقت
قمر : كتر خيرك يااستاذ احمد .. انا متشكرة اوي ع كل اللي عملتوا معانا ... لو بابا كان موجود مكنش عمل معايا ربع اللي عملتو
احمد : انا معملتش حاجة ياقمر .. انتي زي نور بالظبط
قمر حضنت كريم : هتوحشني ياحبيبي
كريم : خلاص كدا مش هلاقي حد يقعد يتكلم معايا زي ماكنتي بتعملي
قمر : ياحبيبي كلهم حواليك وانا مش هسيبك وهجيلك .. وانت كل لما نور تجيلنا تيجي معاها اتفقنا
كريم : اتفقنا
قمر : يلا بينا ياتونة
زين : ايه ياتونة هتمشي من غير ماتوديعيني انا كمان
زين نزل وطي قعد ع ركبه علشان يبقا طول تونة : انا عارف اني كنت برخم عليكي .. وانتي مش بتطيقيني شوية
تونة : لا كتير مش شوية
زين : ماشي ياستي كتير اوي كمان .. بس انتي عارفة انك هتوحشيني وهتوحشني شقاوتك
تونة حضنته جامد وهي فرحانة : وانت كمان يازين متزعلش مني لو كنت عملت حاجة تضايقك
زين ضحك : لا مش زعلان منك ياصغنن انت
قمر بصلهم وهي فرحانة : يلا بينا ياتونة
تونة : لا خليني شوية
"كريم بصلها وهو متغاظ .. راح طلع ع اوضته وهو طالع خبط كتفه ف تونة"
تونة بعصبية : بيزقني ليه دا .. ومسلمش عليا كمان
الكل بص لبعضه وضحك
قمر : متزعليش هو خبطك غصب عنه
تونة : لا انا طالعة اتعارك معاه
قمر مسكتها : لا تعالي وخلي ختامها مسك .. انتي هتتعاركي واحنا ماشين يلا ياختي قدامي ..
احمد : زين روح وصلهم
زين : حاضر
قمر : لا خليه .. انا جايبة عربية برا
احمد : يابنتي علشان يبقا معاكم راجل
قمر : متقلقش معانا عربي .. يلا عن اذنكم
احمد : مع سلامة يابنتي
زين بيبصلهم : مين عربي دا ؟
نور : انا عن نفسي معرفهوش
احمد : مسألتهاش ليه هي .. بتسألنا احنا ليه
زين : واسألها ليه انا مالي .. انا اروح اشوف شغلي . . انا اصلا مكنتش فاضي اوصلهم .. كويس انها جت من عندها ورفضت .. عن اذنكم
احمد: اتفضل
نور بصيت لاحمد وضحكوا
_________________________
فاروق بعصبية : هددديي .. هددديي
هدي : في ايه يا فاروق بتزعق ليه
فاروق مسكها من ايدها : تعالي هنا ياهانم ..
هدي : ايه اللي بتعملوا دا يافاروق انت ازاي تمسكني بالشكل دا
فاروق : فاكرني مش هعرف اللي انتي مخبية . . وانا اقول ايه اللي مخليكي تايهه وسرحانة طول الوقت اتاري من عملتلك السودة
هدي : ايه الطريقة اللي بتتكلم بيها دي انا عملت ايه
فاروق : مش عارفة عملتي ايه . . اقولك ياهانم عملتي ايه . . استغفلتيني وطلعتي بتقابلي بناتك
هدي : بناتي .. انت عرفت منين
فاروق: انتي فكراني نايم ع ودني .. هو دا كان اتفقنا
هدي : انا مخلفتش الاتفاق .. انا قبلتهم صدفة
فاروق : الظاهر انك نسيتي انا ممكن اعمل فيهم ايه
هدي : مش هتقدر تعمل فيهم حاجة .. ربنا قدر يحميهم كل الفترة دي ف غيابي .. قادر يحميهم منك
فاروق : وياتري بتكلميهم من امتا ومستغفلاني
هدي : انا بقولك مستغفلتكش .. انا قبلتهم صدفة انا مش بكدب عليك .. اعمل ايه علشان تصدق ..
فاروق : عاوزني اصدقك.. تروحي دلوقتي لبنتك وتجبريها تبعد عن اسر .. علشان يتجوز بنتي ..
هدي : ايه الانانية اللي فيك دي .. عاوزني احرم بنتي من الشخص اللي بتحبه علشان خاطر بنتك تعيش مبسوطة وانا بنتي تعيش تعيسة .. مش كفاية حرمتهم من امهم .. مش كفاية يتمت بناتي وهما صغيرين.. انت ايه يااخي مش مكفيك كل اللي حصل ف بناتي .. حتي الفرحة مستكترها عليهم
فاروق : بنتي عندي اهم من أي حد خلقه ربنا
هدي : وانا كمان بناتي اهم من أي حد ومنك انت كمان .. انا مبقتش غادة بتاعت زمان اللي استغليت ضعفها واجبرتها ع الجواز منك وهددتها ببناتها انك هتأذيهم لو موافقتش .. وانا زي الغبية وافقت اني اسيب عيالي وفاكره ان كدا بحميهم .. بناتي الي انت حرمتني من اني حتي اشوفهم من بعيد . . القدر جمعني بيهم تاني .. مش هنسا نظره بنتي ليا وكرهها اللي بان ف عينها.. بسبب اللي انت عملته .. كنت زمان جاية الجألك من الحيوان اللي اسمه جعفر علشان تحميني وتسد ديني اللي كان هيدخلني بيه السجن .. اتاريني كنت بتحمي ف ديب سعران زيك ..
فاروق : انتي اتجرأتي تقوليلي الكلام دا .. * جاي بيرفع ايده يضربها*
سائر جه مسك ايده ووقف قصاده : اياك تمد ايدك عليها
فاروق بصدمة : انت بتقف قصادي علشانها .. انت اتجننت
سائر : انا عقلت .. وشوفت الحقيقة .. انت كل دا يطلع منك .. انت تعمل فيها كل دا .. وانا بغبائي كنت بكرهها وشايف قال ايه انها خدت مكان امي .. وانت اللي كنت جابرها وحرمها من بنتها .. انت ليه مصمم تدمر كل اللي حواليك .. وتكرههم فيك .. انت ليه بتعمل كدا .. وفوق كل دا عاوزها تبعد بنتها عن اللي بتحبه زي مابعدتني عن نور .. كل دا علشان صاااافي ..
هدي : اهدي ياسائر
فاروق : اخرسي انتي ... أيوة علشان بنتي .. واعمل كل حاجة علشان اشوفها فرحانة
سائر : واحنا ايه مالناش حق نفرح .. الدنيا كلها تدمر علشان خاطر بنتك .. بس انا مش هدمر نفسي علشانك ولا علشانها . . أنانية بانانية بقا انا هتجوز نور برضاك أو غصب عنك هتجوزها
فاروق : ساعتها تبقا لا ابني ولا اعرفك
سائر : وانا موافق .. "مسك ايد هدي" يلا بينا
هدي : استني .. طلقني يا فاروق
فاروق: روحي وانتي طااالق طااالق طااالق ...
سائر وهدي خرجوا
فاروق : غوروووا كلكم مش عاوزة اشوفكم غورووا
____________________
●ف العربية ●
سائر بيعيط : انا اسف اني كنت بضايقك .. انا اسف والله سامحيني
هدي مسحت دموعه : انا مسمحاك ياحبيبي وعمري مازعلت منك
سائر : مكنتش شايفك صح .. انا اسف
هدي : متعتذرش خلاص .. انا محبش اشوفك ف الحالة دي .. وكمان مش عاوزك تبعد عن ابوك
سائر : متخافيش انا مبعدتش عنه بسببك .. انا كان لازم اعمل كدا من زمان .. انا مش محتاج منه حاجة .. انا قادر ابدء حياتي لوحدي .. بس الاهم من كل دا اني ارجع نور واقنعهم اني اتجوزها
هدي : متقلقش انا هقف جنبك مش هسيبك
سائر : طيب انتي هتروحي فين دلوقتي
هدي : مش عارفة ياسائر
_______________________
ريم بتكلم صاحبتها ف الموبايل
ريم : مش عارفة يا سلمي اعمل ايه .. انا خايفة تقول لماما
سلمي : متقلقيش طلما مقالتلهاش لغاية دلوقتي يبقا مش هتقول
ريم : انتي ايه عرفك ياختي ما يمكن بتعمل كدا علشان تطلب مني حاجة او تذلني
سلمي : اكيد لا ياريم مافيش الكلام دا بين الاخوات
ريم : اخوات من الأم بس ياختي .. يعني اكيد مش بتحبني ..
سلمي : انا مش عارفة بصراحة انا متعاملتش مع سارة دي علشان اعرف اذا كانت كويسة ولالا .. المهم انتي عملتي ايه مع عمرو
ريم : مش عارفة اعمل معاه ايه مصمم نتكلم فيديو
سلمي: الولا دا انا مش مرتحاله ياريم متكبري دماغك منه
ريم : حتي انتي يا سلمي.. هتقولي زي ما سارة قالت .. لا ياستي عمرو بيحبني
سلمي : وايه اللي مخليكي مصدقة اوي كدا لو بيحبك يجي يتقدملك
ريم : لا طبعا مش هينفع دلوقتي.. انا لسه صغيرة .. وهو كمان اهله مش هيوافقوا دلوقتي
سلمي : يعني انتي هتفضلي كدا لحد ما اهله يوافقوا
ريم : انتي شايفني بكلموا اوي يعني ياختي .. مانا بقولك هو مش عاوز نتكلم غير فيديو و ... بقولك ايه اقفلي علشان شكل سارة جاية
سلمي : طيب كلميها
ريم : لا
سلمي : بقولك كلميها
ريم: قولت لا .. سلام سلام
" سارة دخلت تجيب هدوم من الدولاب "
ريم : احم احم ... سارة
سارة : نعم
ريم : متزعليش مني
سارة : ماشي
ريم : ايه ماشي دي الحق عليا اني بصالحك
سارة : اعملك ايه يعني مانا بقولك ماشي
ريم : يعني مش هتقولي لماما حاجة
سارة : لو كنت عاوزة اقولها كنت قولتلها من بدري .. بس دا مش معناه اني موافقة ع اللي بتعمليه.. ولا الكلمتين اللي قولتيهملي دول سكتوني .. انا عيني عليكي فاهمة
ريم : يعني ايه يعني
سارة : يعني انتي مش هتقابلي الولد دا تاني وهتقطعي علاقتك بيه
ريم : دا امر بقا ولا ايه . . ولا تكوني بتهدديني ياكدا يا هتقولي لماما .. اه انا كنت عارفة انك هتهدديني
سارة: اهددك ايه يا ريم .. ممكن تهدي وتسمعيني .. انا هستغيد ايه لما اهددك يعني .. انا عاوزة مصلحتك .. انا اكبرمنك وفاهمة .. الولد دا مش كويس ومش بيحبك
ريم : لا بيحبني
سارة : طيب قوليلي عمل ايه يثبتلك فيها ان هو بيحبك
ريم اتوترت : ااء .. عمل ايه .. هو قالي ان هو بيحبني
سارة : هو علشان قالك بحبك يبقا هو بيحبك ..
ريم : اومال ايه يعني هيقولها وهو بيكدب
سارة : طبعا ياريم .. دا بيتسلي ياحبيبتي .. انتي لسه صغيرة ع الحب .. لما هتكبري هتكتشفي ان كل دا كان هبل .. ركزي ف دراستك احسن .. ومتخسريش ثقة مامتك فيكي
ريم : طيب وعمرو
سارة : يادي عمرو .. طيب بصي هتفق معاكي اتفاق انتي هتبطلي تكلميه لمدة اسبوع بالظبط حلو .. وشوفي بعد اسبوع لو ملقتيش ارتبط بغيرك ونساكي اصلا ابقي ياستي حبيه وكلميه زي مانتي عايزة وانا مش هعترض .. موافقة
ريم : موافقة كدا كدا هو مش بيكلمني
سارة : ليه
ريم : علشان عاوز يكلمني فيديو وانا رافضة
سارة : لا اله الا الله .. وكل دا ولسه مقتنعة ان هو بيحبك
ريم : مش عارفة بقا .. انا هعمل اللي قولتي وهشوف
سارة: ماشي ياستي.. هتشوفي اني عندي حق
ريم: استني انتي راحة فين
سارة : داخلة اخد شاور في ايه
ريم : لا ياحبيبتي يعني انتي تقرريني وتمشي كدا .. مش لازم اعرف انتي كمان مالك وايه حكايتك
سارة : طيب ممكن احكي بعد الشاور
ريم : لا دلوقتي
سارة ابتسمت : ماشي هقولك
___________________
قمر ماسكة صنية فيها سندوتشات وطالعة بيهم
تونة : بس ياستي .. وراح زققني ف كتفي جامد ومشي
قمر : يوة ياتونة ماقولتلك مكنش يقصد ..
ليل بتضحك : ياخبر ليه كدا .. دا حتي كريم بيحبك .. دانا اول مرة اشوف حد بيحبك
تونة : ماتحترمي نفسك بدل مااخزقلك عينك دي
ليل : انتي لسه فيكي العادة دي وانا اللي فكرت ربنا هداكي
تونة : وانا هبقا هادية ازاي طول مانا بكلم اشكالك دي تطلع الواحد عن شعوره
قمر : ششش انتي وهي .. خدوا كلوا وانتو ساكتين
ليل : الله سيبي الفيلم دا حلو
تونة : لا هغيره علشان انتي عاوزه
ليل : بت انتي هاتي الفيلم بدل مااقوم اجيبك من شعرك
تونة : وريني كدا انتي شكلك عاوزة تتهزقي انهاردة .. ونطت ع ليل
قمر : يخربيتكم .. اعقلوا بقا
" قمر جاية تحوش مابينهم الجرس رن "
الكل بص لبعض
قمر : مين هيجلنا دلوقتي
ليل : مش عارفة .. شوفي مين
قمر راحت تفتح الباب لقيت هدي
.. قمر اتصدمت وليل وتونة واقفوا جنب بعض
هدي : انا اسفة .. سامحوني
_______________________
ياتري ليل وقمر هيسامحوها ويتقبلوها تاني ولالا .. وايه هيحصل مع فاروق وصافي بعد ما بقوا لوحدهم مع سهر .. هنعرف ف الأجزاء الجاية تابعوا .. وقولو توقعاتكم
حكاية_قمر 💕🌜
بقلم_ياسمين_علي ••
● الجزء الرابع عشر ●
حكاية_قمر 💕🌜
بقلم_ياسمين_علي
نسترجع اخر احداث الجزء اللي فات مع بعض ...
ليل : الله سيبي الفيلم دا حلو
تونة : لا هغيره علشان انتي عاوزه
ليل : بت انتي هاتي الفيلم بدل مااقوم اجيبك من شعرك
تونة : وريني كدا انتي شكلك عاوزة تتهزقي انهاردة .. ونطت ع ليل
قمر : يخربيتكم .. اعقلوا بقا
" قمر جاية تحوش مابينهم الجرس رن "
الكل بس لبعض
قمر : مين هيجلنا دلوقتي
ليل : مش عارفة .. شوفي مين
قمر راحت تفتح الباب لقيت هدي
.. قمر اتصدمت وليل وتونة واقفوا جنب بعض
هدي : انا اسفة .. سامحوني...انا عارفة انكم كرهتوني ومش طايقين تبصوا ف وشي .. بس والله انتو فاهمين غلط .. انا بعدت علشان احميكم
ليل : الحماية بنسبالك ف البعد عننا .. عن بناتك ؟
هدي : كان غصب عني والله غصب عني يابنتي
ليل : مافيش حاجة كانت غصب عنك كل حاجة كانت بارادتك ... جوازك وتربيتك لولاد مش ولادك .. وبعدك عن بناتك .. كله كان بارادتك .. كان هيحصل ايه يعني ايه يعني كانوا هيموتونا مثلا .. كان هيبقا اهون عليا اموت وانا ف حضنك .. ولا اني اشوف واحدة غيري بتقولك ياماما .. "مشيت"
هدي بتعيط : ليل .. ليل استني
قمر مسكتها : سبيها دلوقتي تهدأ وانا هبقا اكلمها ..
هدي : انا قلقانة عليها اوي ..
قمر : متقلقيش علي ليل .. هي كان لازم تطلع الي جواها الاول مش هتسامحك وهي جواها حاجة .. انا عارفها كويس
هدي : انا كنت غلطانة وغبية فعلا اني بعدت عنكم .. انا اسفة ياقمر .. انا عارفة أن انتي كمان مش مسمحاني .. انتي اكتر واحدة اتأذت سوء مني او من ابوكي
قمر سكتت وبصيت ع شنطة الهدوم : ادخلي ارتاحي دلوقتي شكلك تعبان .. تونة تعالي وصليها ع الاوضة .. وانا هروح احضرلك الاكل
تونة : حاضر
" قمر دخلت المطبخ بتجهز الاكل وبتعيط بس المرة دي كانت دموع الفرحة برجوع امها ليهم .. كانت متأكدة ان هيجي يوم و يتجمعوا تاني "
____________________________
سارة : بس كدا ياستي دي حكايتي كلها
ريم : ليه استحملتي كل دا
سارة : كان عندي امل ان هيجي يوم ويتغير فيه ويبعد عن كل اللي حواليه .. و كنت بحبه
ريم : كنتي بتحبيه ! يعني دلوقتي مش بتحبيه
سارة : هكدب لو قولتلك اني مبقتش احبه .. صعب اطلع من جوايا حب سنين بسهولة كدا ..
ريم : طيب بعدتي عنه ليه لما انتي بتحبيه
سارة : كان لازم ابعد عنه كفاية اوي اللي استحملته .. ابعد عنه وانا جوايا حب ليه احسن ماابعد وانا كرهه
مني : احم احم .. خير متجمعين كدا بتتكلموا ع مين
ريم : دي سارة بتحكيلي عن صحابها ..
مني : صح يا سارة صافي صاحبتك عاملة ايه
سارة : معرفش عنها حاجة بقالها كتير مكلمتنيش
مني : ليه كدا انتو زعلانين من بعض
سارة : لا بس صافي اتغيرت اوي .. ومبقتش متقبلة تصرفاتها
مني : بردك يابنتي دي صاحبتك اتصلي اتطمني عليها
سارة : حاضر ياماما .. هدخل اخد شاور بقا عن اذنكم
مني راحت وراها : استني ياسارة
سارة : خير ياماما في حاجة
مني : اه ياحبيبتي كنت عاوزة اقولك متزعليش من ريم
سارة : مش زعلانه منها ريم اختي
مني : ايوة هو دا اللي عاوزة اسمعه منك .. ريم اختك .. بالرغم انها مش من ابوكي .. و برغم المسافة اللي كانت بينكم .. هي هتفضل اختك الصغيرة .. انا فرحانة بقربكم من بعض دا .. وانك عرفتي تحتوي ريم كدا .. خليبالك منها وانصحيها لو لزم الامر .. واستحمليها انا عارفة طبع ريم
سارة : متقلقيش ياماما انا عارفة اتعامل ازاي مع ريم .. متشغليش بالك
________________________________
قمر : تونة روحي قوليلها الاكل جاهز و انا هدخل اشوف ليل
تونة : حاضر
قمر : تعالي ياتونة مالك
تونة : ماليش ياقمر
قمر : شكلك زعلان ف حاجة حصلت ؟
تونة : لا مش زعلانة .. انا عاوزة انام بس
قمر : طيب ياحبيبتي روحي ناديها وادخلي نامي
تونة : حاضر
قمر دخلت ل ليل
قمر : ليل انتي نايمة
ليل : لا
قمر : طيب ممكن اتكلم معاكي
ليل : انا مش عاوزة اسمع حاجة ياقمر
قمر : وبعدين معاكي بقا مش كفاية عيند
ليل : انا مش بعاند حد
قمر : انتي بتعاندي نفسك ياليل .. انتي عاوزها بس بتقاوحي
ليل : حتي لو عاوزها .. ع الاقل من حقي اعاتبها واخرج اللي جوايا .. لازم تعرف انها غلطانة مكنش المفروض تسبنا ابدا ابدا
قمر : وهي عارفة وندمانة كمان
ليل : انتي ازاي ياقمر بتتكلمي بالبرود دا .. كأنه عادي بنسبالك رجوعها .. انا بس اللي مضايقة وزعلانة ع بعدها .. اه طبعا وانتي تزعلي ليه ماهي عاشت معاكي كتير انا اللي سابتني ف وقت كنت محتاجة وجودها فيه ..
قمر : ومين قالك ان احتياجنا للام بيبقا بالسن ياليل .. احنا طول الوقت ومهما كبرنا بنفضل محتاجين و متعلقين بامنا .. بعدها عني مش سهل ياليل .. انا مش بس اتأثرت ببعدها لا .. انا حياتي اتغيرت 180 درجة من بعد مامشيت وسبتني اواجه الحياة لوحدي .. مش سهل عليا انا كمان .. بس ف الاول والاخر دي امنا .. مينفعش لما تحتاجنا نديها ضهرنا ونمشي زي ماعملتي .. لازم نقف جنبها وخصوصا لو كنا احنا كمان محتاجين وجودها ف حياتنا .. ايوة بعدها عننا كان غصب عنها انا واثقة ومصدقه كلامها حتي لو معرفش ايه السبب .. بس لازم نقف جنبها
ليل : وانتي ايه ٱكدلك انها هتفضل معانا ومش هتمشي وتسبنا تاني
هدي دخلت : صدقيني ياليل انا مش هبعد عنكم تاني ابدا .. انا اسفة يابنتي حقك عليا
" قمر بصيت ل ليل "
ليل : يعني مش هترجعي تاني لصافي
هدي : لا مش هرجع البيت تاني .. انا خليت فاروق يطلقني
قمر بفرحة : بجدد ؟؟
هدي : ايوة بجد
" ليل وقمر بصوا لبعض وطلعوا يجروا ع هدي حضنوها وهما فرحانين "
ليل : وحشتيني اووي اوي ياماما .. انا اسفة لو كلمتك وحش .. انا بحبك اوي وعمري ماكرهتك .. ولا اقدر اكرهك
هدي : وانا كمان بحبكم اوي اوي ..
" تونة واقفة مستخبية بتبص عليهم وزعلانة "
هدي شافتها : فتون تعالي
تونة : نعم
هدي : واقفة بعيد ليه ..
تونة ساكتة
هدي : طيب هما سامحوني وانتي مش عاوزة تسامحيني ليه انتي كمان وتحضنيني زيهم
تونة : اسامحك ع ايه .. انتي مامتهم هما مش انا ..
هدي : طيب احضنيني ممكن
" تونة هزت رأسها بالموافقة وحضنتها وعيطت "
هدي : ايه دا بتعيطي ليه .. هو انا حضني وحش كدا
تونة بتعيط : حضنك جميل اوي
هدي بتمسح دموعها : طيب بتعيطي ليه بس
تونة : عاوزكي تبقا ماما انا كمان زيهم
"ليل وقمر دمعوا "
هدي : بس كدا ياحبيبتي هو انا اطول ابقا مامتك ..
تونة : يعني موافقة اقولك ماما
هدي : اكيد طبعا
" تونة حضنتها جامد"
ليل : نمشي احنا بقا مبقاش لينا لازمة ياقمر .. اهي تونة هتاخد الدلع كله لوحدها
قمر : لا طلما الدلع رايح لتونة انا موافقة
هدي : الدلع ليكم انتو التلاتة .. يااحلي تلت بنات ف الدنيا .. ربنا يخليكم ليا
الكل : يارب
تونة : هو انتي ممكن تحكيلي حدوتة قبل ماانام
هدي : واغنيلك كمان
تونة : قمر كمان بتغني
هدي : بنتي وطلعالي بقا
تونة : طيب يلا .. انا هنام جنبك انهاردة وتحكيلي حدوتة وتغنيلي وكله كله
هدي : يلا بينا
____________________________
نور : عايدة ونبي النسكافية بتاعي بسرعة .. صباح الخير يابابي
احمد : صباح النور ياحبيبتي .. مستعجلة كدا شكلك خارجة .. ع فين
نور : هروح عند قمر انا وكنزي يابابي
احمد : ماشي خليبالكم ع نفسكم .. و ابقي سلميلي عليها
نور : حاضر يابابي
احمد : يلا انا خارج رايح الشغل .. عاوزين حاجة
نور : لا يابابي ميرسي
كريم قرب من نور : نور نور
نور : ايه ياكريم في حاجة
كريم : انا عاوز اجي معاكي اشوف قمر
نور : عاوز تشوف قمر بس
كريم : وليل
نور بخبث : ومين تاني
كريم : مافيش
نور : بقا كدا يعني مش عاوز تشوف تونة .. طيب انا هقولها لما نروح
كريم : قوليلها وانا هخاف منها يعني .. انا اصلا مبتكلمش معاها
نور : ياواد ياجامد انت .. يلا اطلع اللبس بقا علشان زمان كنزي مستنيانا
كريم : حاضر
نور : متتأخررش
كريم : حااااااضر
______________________________
سهر : ممكن ادخل
صافي : تعالي ياسهر
سهر : شكلك كويسة انهاردة
صافي : اهو بحاول
سهر : طيب مش عاوزة تخرجي بقا مش كفاية عليكي حبسة
صافي : ماليش نفس اروح ف حتة ولا اشوف حد
سهر : انتي كلمتي اسر
صافي : لا بس بابا وعدني ان هيخليه يجي لحد عندي ويعتذر وهو اللي يطلب يتجوزني كمان
سهر : وهتوافقي بقا ولا هتعملي زيه
صافي : هوافق طبعا
سهر : طب تعرفي ان اسر مع ليل دلوقتي
صافي : عارفة خليها تشبع بيه شوية .. كدا كدا هيرجعلي هو مالهوش غيري .. انتي عارفة اسر بيلف يلف ويرجعلي
سهر مستغربة هدوئها : هو انتي بتاخدي العلاج
صافي : بقاله اسبوعين خالص وانا نسيت اقولك .. وكمان حاسة اني مش محتاجه
سهر اتعصبت : لا ازاي مش محتاجة.. لازم يكون معاكي وتاخدي دايما
صافي : مالك ياسهر ؟
سهر : ها لا اقصد اني خايفة عليكي .. انتي بتتعبي دائما ولازم يكون معاكي .. دا اللي أقصده .. ع العموم متشغليش بالك انا هجبهولك
صافي : مش عاوزة اتعبك .. انتي بتقولي بيجيلك من برا مخصوص
سهر : تعب ايه بس تعبك راحة .. دانتي بنت الغالي
صافي : تعرفي يا سهر انا بستغربك اوي
سهر بقلق : بتستغربيني ليه ؟
صافي : يعني بالرغم من طريقة بابا معاكي .. وبردك انتي واقفة جنبه وبتساعديه وتساعديني ... انتي طيبة اوي ياسهر مش عارفة من غيرك كنت عملت ايه
سهر بابتسامة : ياحبيبتي انتي مش بس بنت اخويا .. انتي اختي الصغيرة .. وفاروق انا واخدة ع طبعه اتعودت عليه خلاص .. مش هنسا ان هو اللي مربيني .. واللي بعملوا معاكي دا جزء صغير من اللي عملوا معايا
صافي : ربنا يخليكم لبعض
سهر : يارب .. يلا اسيبك انا بقا علشان متاخرش على الشغل
صافي : ربنا معاكي ياحبيبتي
________________________________
تونة بتفتح الباب لقيت كريم ف وشها
تونة : ايه اللي جابك عندنا
كريم : انا جاي عند قمر مش عندك وسعي كدا من طريقي (زقها)
تونة جاية تجري وراه نور مسكتها : تعالي راحة فين مش تسلمي عليا ..
تونة : شوفتي بيزقني ازاي
كنزي : معلش ياتونة بيهزار معاكي ..
هدي : يااهلا وسهلا يااهلا .. اتفضلوا اتفضلوا .. انتي مواقفهم ع الباب ليه ياتونة مش تدخليهم
تونة : وانا مالي انا هما الي واقفين .. اشيلهم ادخلهم يعني
هدي : عيب كدا ياتونة ..
نور : اومال قمر وليل فينهم
هدي : قمر نزلت تشتري حاجات زمانها جاية وليل نايمة لسه مصحتش
كنزي : انا هدخل اغلس عليها واصحيها
نور : خديني معاكي
هدي : اتفضلوا يا حبايبي البيت بيتكم .. انا هقوم احضر الفطار .. مش عاوزة شقاوة ياتونة ها فهماني طبعا
تونة : حاضر ياماما
________________________________
سارة بتفتح الباب
مني : مين ياسارة
سارة : مش عارفة ياماما
سلمي : انا سلمي ياطنط
مني : سلمي تعالي ياحبيبتي اتفضلي .. ريم زمانها بتلبس .. انتو رايحين الدرس مع بعض
سلمي : اه ياطنط .. هي فضلها كتير
مني : مش عارفة ياحبيبتي هدخل اشوفهالك .. ادخلي ياسلمي متقفيش ع الباب
سلمي : حاضر
سارة : انا اسفة اني معرفتكيش والله بس انا اول مرة اشوفك
سلمي : انتي سارة اخت ريم صح
سارة : صح
مني : ريم خلصتي لبس ولا ايه سلمي صاحبتك مستنياكي برا
ريم : اه ياماما خلصت خلاص
مني : طب يلا
سلمي : اهي ريم جت اهي مخلصناش كلمنا .. هجيلك تاني نقعد نرغي براحتنا
سارة : وانا مستنياكي
ريم : انتو اتعرفتوا ع بعض
سلمي : اه دي بقيت صاحبتي كمان
ريم : اكيد كلتي دماغها انا عرفاكي رغاية
سلمي : بزمتك انا رغاية ياسارة
سارة بتضحك : لا خالص
ريم : طيب يلا علشان منتاخرش بقا
سلمي : ماشي يلا
مني : خليبالكم من نفسكم يابنات .. وانتي يا سارة مش هتروحي الكلية
سارة : هقوم اللبس واروح
مني : ماشي ياحبيبتي ربنا يوفقك
سارة : يارب ياماما
_____________________________
هدي ف المطبخ وتونة دخللها
تونة : ماما ماما
هدي : نعم ياروح ماما
تونة : انا عاوزة طبق كبيرررر اوي فيه فاكهة كتيررر
هدي : بس كدا من عنيا .. انا هحطلك حاجات حلوة ليكي انتي وكريم وانا هبقا ادخل للبنات ماشي
تونة : لا مش ماشي .. انا عاوزة لوحدي
هدي : حاضر هحطلك انتي لوحدك وهو لوحده
تونة : لا انا عاوزة لوحدي بس هو لا
هدي : ليه كدا ياتونة .. عيب دا ضيف عندنا
تونة : لا بردك انا مش بكلمه
هدي : ليه مش بتكلميه دا كريم جميل ومؤدب
تونة : هاهاهي مؤدب وبيزقني ليه المؤدب
هدي بتضحك : معلش يمكن مش قصده
تونة : مش قصده ف المرتين .. لا دا يقصد يعصبني وانا مش عاوزة امد ايدي عليه كل دا وساكتة
هدي : تمدي ايدك عليه ايه ياتونة مينفعش انتي بنوتة جميلة ... مينفعش تمدي ايدك ع حد
تونة : حاضر حاضر
هدي : اهي قمر شكلها جت كمان .. روحي ساعديها وهاتيلي الحاجات اللي جابتها يلا بسرعة
تونة : حاضر
______________
كريم جري حضن قمر اول ماشافها
قمر : وحشتني اوي يا كيمو ... بقا كدا اسبوعين بحالهم متسألش عليا
كريم : وانتي كمان وحشتيني .. انا اول لما عرفت ان نور جيالك لبست وجيت معاها علطول
تونة بتتريق : وانتي كمان وحشتيني .. انا اول لما عرفت ان نور جيالك لبست وجيت معاها علطول
قمر : عيب كدا ياتونة .. اعتذريله يلا
تونة بعصبية : لا
قمر : تونة هزعل منك يلا اعتذري
تونة : هو يعتذر الاول علشان زقني
كريم : انا اسف متزعليش
قمر : ها يلا دورك انتي
تونة : جبتيلي المشرميلو اللي بحبها
قمر : جبتلك مارشميلوا ومتتوهيش ع الموضوع يلا اعتذري
تونة : اسفة .. خلاص بقا ممكن اخد المشرميلو بتاعتي
قمر : خدي الحاجة دي ودخليها عند ماما جوا وهتلقي فيهم المارشميلوا وابقي اعزمي ع كريم
تونة : ماشي
قمر : اومال فين نور وكنزي وليل
كريم : ف اوضة ليل جوا
قمر : طب انا هدخلهم وانت اقعد مع تونة
كريم بص لتونة
تونة : ايه عندك مانع ولا حاجة
كريم : هقعد و امري لله
تونة : شيل وتعالي ورايا
كريم : نعم !
تونة ابتسمت : نعم الله عليك .. شيل معايا يلا
كريم : حاضر
________________________________
" قمر دخلت سلمت ع البنات "
قمر : وحشني اوي اوي بجد .. عاملين ايه
كنزي : احنا كويسين ياقمر
قمر : والاستاذ احمد و نوجة وكلكم كويسين
نور : كلهم بيسلموا عليكي والله .. البيت بقا وحش من بعد مامشيتوا اصلا .. كنت واخدة ع وجودكم رجعت بقيت لوحدي تاني
كنزي : بقا كدا يانور وانا ايه بقا ان شاءالله
نور : انتي كمان ياستي هتسبيني كمان كام شهر ولا ايه يا عروسة
كنزي بزعل : مش باينلها
قمر : ايه دا في ايه مالك ياكنزي
نور : هو حصل حاجة بينك انتي وحازم
كنزي : لا والله حازم كويس معايا اوي وبيحبني
ليل : يبقا اكيد العقربة امه ... مش مرتحالها
كنزي : بحاول اريحها ع قد مااقدر ومزعلهاش بس بتزعل بردك .. وبتشتكي لحازم مني انا عارفة ان هو مش بيتأثر بالكلام وبيتعامل معايا عادي .. بس خايفة يزهق ويسبني
ليل : هو كان يطول دانتي نجوزك سيد سيده
قمر : بس ياليل .. بصي يا كنزي ياحبيبتي انتي كل الافكار دي ف دماغك انتي بس .. حازم بيحبك ومش هيسيبك ابدا .. ومتزعليش من كلامها هي ام وحازم ابنها الوحيد .. ف هي تلقيها غيرانه شوية عليه ف بتحاول تتعامل معاكي كدا .. انتي اعتبريها زي نوجة .. انتي بتزعلي من نوجة .. اكيد لا ف انتي متزعليش من مامت حازم ..
نور : وطلما حازم كويس معاكي خلاص انتي ليكي بحازم مش مامته
قمر : بالظبط كدا
كنزي : طب هي ممكن مع الوقت تحبني وتتعود عليا ولا هتفضل كدا
قمر : ان شاءالله لما تعيشي معاها وتتقربوا من بعض هتحبك متقلقيش
كنزي : يارب كلامك يكون صح ياقمر و يكون احساسي غلط
قمر : ان شاءالله ياحبيبتي .. انتي مش بتشوفيها
كنزي : لا مش كتير بس هشوفها انهاردة ..
ليل : هتشوفيها فين
كنزي : خارجين بليل انا وماما وحازم ومامته هنشوف الاجهزة وكدا
نور : طيب استغلي الفرصة دي وهتيلها هدية وانتي راحلها
كنزي : كنت بفكر اعمل كدا .. ان شاءالله تجيب نتيجة
قمر : ان شاءالله .. المهم بقا عاوزكم ف موضوع .. كنت بفكر اعمل عربية الكبدة من اول وجديد
ليل : عربية كبدة تاني ياقمر
قمر : مالها عربية الكبدة ياليل .. ماهي اللي كنا عايشين عليها
ليل : مالهاش لازمة بصراحة .. واحنا مبقناش محتاجينلها
قمر : علشان بقا معانا فلوس خلاص .. ماهي الفلوس مسيرها تخلص .. وبعدين انا مبحبش قعدة البيت انا عاوزة اشتغل كفاية اوي كل الوقت اللي قعدته
ليل : ياستي اشتغلي اي حاجة تانية غير الكبدة والكلام دا
نور : اهدوا ياجماعة مش كدا
ليل : مش سامعة بتقول ايه
قمر : ماله اللي بقولو بقا
نور : بصي ياقمر ليل عندها حق
قمر : عندها حق ف ايه
نور : يعني دي مش شغلانة تليق بست .. اشتغلي اي حاجة تانية
قمر : مانا كنت شغالة كدا زمان كنت راجل ساعتها يعني
ليل : زمان غير دلوقتي احنا كنا محتاجينها انما دلوقتي مش مناسبة ليكي
قمر : وانا عاوزة اشتغل
نور : لو ع الشغل بسيطة اكلمك بابي يشغلك فالشركة
قمر : شركة ايه يانور وهيقبلوني ازاي اصلا وانا مش مكملة تعليم
نور : كل حاجة هتتحل بالكورسات
ليل : دي فكرة هايلة والله
قمر : كورسات ايه بس هو بعد ماشاب ودوه الكتاب
كنزي : شاب ايه بس دانتي لسه صغيرة وزي القمر كمان .. وهما كلامهم صح شغلك ف الشركة هيكون احسن ليكي بكتير
قمر : بس انا مبفهمش حاجة ف شغل الشركات دا .. لا دا مسئولية كبيرة اوي عليا
ليل : ويعني هما اللي اشتغلوا ف شركة كانوا نازلين من بطن امهم بيفهموا ف الشركات .. مااكيد بيتعلموا ف الاول
نور : ايوة طبعا .. زين كل اللي درسه ف حياته اصلا مكنش ليه علاقة بشغل بابا .. واتعلم واهو بقا هو اللي ماسك كل حاجة
كنزي : متخافيش انتي بالتدريب والكورسات كل حاجة هتتحل
قمر : بس دا هياخد وقت كبير
نور : مافيش الكلام دا ف شهور يخلص و بايدك تقصري المدي كمان
ليل : قمر كانت شاطرة جدا يانور .. انا شوفت شهادات كانت بتطلع من الاوائل .. يعني اكيد مش هتاخد وقت وتتعلم بسرعة
نور : يبقا اتفقنا انا هكلم بابا وزين انهاردة
قمر : لالا .. انا لسه مخدتش قرار
نور : فكري براحتك يا قمر .. بس دي فرصة ليكي تغيري حياتك وتخليها احسن
قمر : حاضر ..
____________________________________
ريم : ياااه اخيرا الدرس خلص .. انا مش فاهمة هو المستر دا بيستحمل يقعد كل الوقت دا ازاي .. انا تعبت اوي وجعت
سلمي : ومين سمعك انا كمان جعانة .. ماتيجي نجيب اكل
ريم : وع ايه .. انا كدا كدا هروح القي ماما عاملة اكل
سلمي بابتسامة : ربنا يخليهالك
" ريم حسيت انها ضايقت سلمي علشان مامتها متوفية "
ريم : هو انتي وراكي حاجة مهمة هتعمليها
سلمي : لا هروح انام .. بابا عنده شغل وهيجي متأخر
ريم : طيب ايه رايك تيجي تتغدي معانا وبالمرة تتعرفي ع سارة وترغي معاها براحتك
سلمي : لا بلاش علشان متقلش عليكم
ريم : تتقلي ع مين ياعبيطة دا بيتك .. وانتي اختي وماما بتحبك وسارة هتحبك .. يبقا تيجي ومسمعش منك اي عذر امين
سلمي بتضحك : امين ياشبح
"ريم ضحكت وبتلف وشها شافت عمرو ماشي مع واحدة ضحكتها اختفت "
سلمي : في ايه وقفتي ليه
ريم : سارة كان عندها حق
سلمي بتبص شافته هي كمان : الحمدالله انك شوفتي بعينك علشان تصدقي انه كداب
عمرو جه عليهم وباصص ل ريم وبتفاخر : شوفتي بقا وصلتيني لايه .. علشان تبقا متسمعيش الكلام بعد كدا .. ومش دي بس اللي بكلمها انا بكلم غيرها كتير .. علشان لما اقولك ع حاجة بعد كدا تنفذيها من سكات
سلمي مسكت ريم : يلا بينا نمشي ياريم
ريم : استني .. انا مردتش لسه ع البيه اللي فاكر نفسه توم كروز .. وفاكرني مثلا هتضايق لما اشوف واقف مع واحدة مثلا .. وبعدين انت مين قالك اصلا ان هيبقى فيه بينا بعد كدا علشان انفذ كلامك .. انا سيباك من يوم مابطلت اكلمك .. يعني الحركات اللي بتعملها دي مش فارقة معايا .. انا سيباك بمزاجي ياعموري
عمرو : بقا كدا ياريم .. ماشي
ريم : بالسلامة ياحبيبي والقلب دعيلك
سلمي بتسقف : عظمة ع عظمة يابت ياريم .. عجبتيني يستاهل .. هو فاكر نفسه ايه دا .. هو ليه عين يتكلم اصلا .. بس هو صحيح انتي مفرقش معاكي ومش زعلانة
ريم : ابقا كدابة لو قولتلك مش زعلانة .. انا زعلانة بس مش عليه
سلمي : اومال ع مين
ريم : ع سزاجتي وهبلي واني كنت مصدقة ... وبدافع عنه اوي قدام سارة .. وهي بتقنعني انه كداب وبيتسلي وانا بقنعها انه بيحبني
سلمي : المهم انك اتعلمتي يا ريم .. واكيد مش هتكرري الغلط دا تاني
ريم : اكيد .. يلا بينا بقا علشان انا عصافير بطني بتصوصو
سلمي : وانا والله .. يلا
___________________________
كنزي : ماما ايه رايك حلو الفستان دا صح
نجلاء : حلو ياحبيبتي وخلصي بقا .. انتي بقالك ساعتين بتلبسي
كنزي : يوة ياماما متستعجلنيش علشان بتوتر .. طيب بصي الميك اب كدا حلو ولا امسحه
نجلاء : جميل ياكنزي يلا بقا
كنزي : حاضر حاضر .. اه صح ماما متنسيش ناخد الهدية اللي جبتها لمامت حازم
نجلاء : جيبلها هدية بمناسبة ايه
كنزي بتلقائية : عاوزها تحبني ياماما
نجلاء : نعم ياحبيبتي وهي مبتحبكيش ولا ايه ان شاءالله ..
كنزي : لالا ياماما مقصدش انها مش بتحبني .. اااه .. انا كنت بهزار معاكي اصلا .. الهدية دي
بمناسبة عيد ميلادها
نجلاء : اه بحسب
كنزي بصوت واطي : الحمدالله
نجلاء : بتقولي حاجة
كنزي : لا مبقولش .. يلا بينا نمشي انا خلصت
نجلاء : يلا ياختي قدامي
___________________________________
" نور داخلة هي وكريم الفيلا وبيضحكوا ومبسوطين "
احمد : اتأخرتوا ليه كدا يانور
نور : معلش يابابي اتلهينا ف الكلام بقا وهما كانوا وحشني اوي
احمد : طيب يلا علشان تتعشوا
نور : حاضر يابابي هنطلع بس نغيير ونيجي
_____________________________
نجلاء : هو فين كل دا
كنزي : جاي ياماما تلقي السكة زحمة
نجلاء : ماكنا روحنا احنا لازم يجي يوصلنا يعني
كنزي : الحق عليه انه مش عاوزنا نتبهدل ف المواصلات يعني
نجلاء : من دلوقتي بتدافعيلوا
كنزي : يوة ياماما بقا .. اهو جه .. اوعي ياماما تقولي حاجة تزعلهم
نجلاء : انا مش هتكلم ماشي
" حازم نزل من العربية هو وفريال وسلموا عليهم "
كنزي : ازاي حضرتك ياطنط .. اقصد ياماما
فريال : كويسة
كنزي : اتفضلي الهدية دي علشانك
فريال : بجد دي علشاني .. ميرسي اوي
كنزي ابتسمت وراحت لحازم
حازم : وحشتيني اوي
كنزي : وانت كمان ياحازم
حازم : انا كمان ايه ياقلب حازم ها
نجلاء : كل سنة وانتي طيبة ياحبيبتي
فريال باستغراب : وانتي طيبة بس ع ايه
نجلاء : ع عيد ميلادك هيكون ع ايه
فريال : عيد ميلادي !
كنزي : انا بقول يلا بينا نروح علشان منتأخرش ..
حازم : ماشي يلا اركبوا
كنزي راحة تقعد جنب حازم
فريال : معلش ياحبيبتي اقعدي مع ماما ورا علشان انا مش بستريح غير ف الكرسي دا
كنزي اتكسفت و حازم بص لفريال : غريبة يعني ياماما انتي طول عمرك متحبيش غير تقعدي ورا
فريال : القعدة ورا بتتعبني ياحازم الله .. خلاص مش عاوزني اقعد هنا خلاص هرجع اقعد ورا خلي ضهري ورجلي يتعبوني بقا المهم كنزي متزعلش
كنزي : لا لا اتفضلي اقعدي مش زعلانة انا المهم راحت حضرتك
فريال : شوفت اهي مش زعلانة .. متبصليش بقا علشان بخاف
حازم : هتروحوا مكان معين
كنزي : انا كنت عاوزة ...
فريال قطعت كلامها : امشي ع طريق البيت ياحازم ف محل كبير لسه فاتح نروح نتفرج هناك
حازم : استني ياماما .. كنتي عاوزة تروحي فين ياكنزي في حاجة ف دماغك
فريال : نروح اللي عندنا الاول بعدين نشوف اللي هي عاوزة ولا ايه رايك ياكنزي
" نجلاء بتبصلها ومتغاظة وعاوزة ترد "
كنزي : اللي حضرتك تشوفيه
فريال : جميلة كنزي يازين مااختارت يا حازم .. يلا بقا اطلع زي ماقولت
حازم : ماشي
__________________________________
احمد : مقولتليش عملتوا ايه انهاردة
نور : قعدنا نرغي كتير اوي اوي
زين : ليه انتو كنتو فين
كريم : كنا عند قمر وتونة وانا اتصالحت مع تونة
زين : طب كويس .. هما عاملين ايه
نور : كلهم كويسين .. وطنط هدي رجعتلهم الحمدالله
احمد : ايوة عرفت ان فاروق طلقها
نور : انا مش فاهمة اونكل فاروق بيعمل كدا ليه مع اللي حواليه
احمد : مالناش دعوة .. كل واحد حر .. وهي بناتها محتاجينها اكتر من اي حد
نور : المهم انا كنت عاوزك ف موضوع
احمد : خير يانور قولي .. محتاجة حاجة
نور : اه يابابا عاوزك تشغل قمر ف الشركة
زين : نعم ازاي يعني تشتغل ف الشركة
نور : وفيها ايه يعني .. وبعدين انت بعد كل دا ولسه حاطتها ف دماغك ومضطهدها ..
زين : مش فكرة ف دماغي .. بس ازاي يعني لا أسلوبها ولا استايلها ينفعوا .. دا غير ان ع حد علمي هي مش متعلمة اصلا
نور : مكنتش اعرف يابابي انكم بتشغلوا الناس ف الشركة ع اساس الاستايل .. بس ماشي انا قادرة اخليها تحسن كل دا بسهولة جدا .. وهخليها تبدء كورسات وتنزل تدريبات تفهمها طبيعة شغلكم .. بس بليز يابابي توافق ومتصغرنيش انا اديتها كلمة
زين : انتي بتتصرفي من دماغك ومبترجعيش لاي حد فينا خالص كدا
نور : مانا بقولكم اهو .. ها يابابي قولت ايه
احمد : انا مش عارف يابنتي .. بس لو هتقدري تعملي اللي قولتي عليه دا .. وهي موافقة انا كمان هبقا موافق
نور حضنت ابوها وباسته : ياحبيبي يابابي
زين : موافق ع ايه انت اكيد بتهزار
احمد : الشغل مافيهوش هزار
زين : ولا في وسطة .. الشغل شغل .. اللي ياخد وظيفة لازم يكون يستحقها بجد
نور : وانا هثبتلك ان قمر تستحق تشتغل ف الشركة دي زي اي حد مش مجرد واسطة وهتشوف
زين : ماشي يانور وانا مستني اشوف
_____________________________________
سامح : كويس انكم جيتوا .. يلا يانجلاء ادخلي حضريلنا نأكل
نجلاء : انا تعبانة ومش فايقة اعمل حاجة .. سابني ياسامح الله يباركلك
سامح : في ايه يانجلاء مالك داخلة بزعبيبك ليه كدا .. هو حصل حاجة
نجلاء : اسأل بنتك متسألنيش انا
سامح : طب قولي انتي ياكنزي ايه حصل
كنزي : محصلش حاجة يابابا
نجلاء : كل دا ومحصلش حاجة بنسبالك
كنزي : في ايه ياماما مش خلاص جبنا الاجهزة والحاجة اللي احنا عاوزينها .. . المفروض نفرح بقا
نجلاء : قصدك تقولي اللي هي عاوزها .. مش اللي احنا عاوزينها .. دي معطتناش فرصة خالص .. دي محددة كل حاجة كأنها كانت نازلة قبلنا وشايفة وعارفة هتجيب ايه ..
كنزي : خلاص ياماما حصل خير .. واساسا الحاجات اللي نقتها حلوة وعجبتني ..
نجلاء : دانتي فرساني .. دانا كنت عاوزة اجيب اللي ف رجلي واديكي بيه ع بوقك وانتي كل حاجة تقوليلها اللي تشوفيه ياماما .. كتك ماو انتي وهي بنت مالكيش شخصية بصحيح
كنزي : عاوزني اعمل ايه يعني اتعارك معاها واقولها لا وتزعل مني
نجلاء : تزعل ليه الحق ميزعلش ودا حقك انك تختاري جهازك بنفسك
سامح : خلاص يانجلاء بنتك قالت الحاجة عجبتها عدي اليوم بقا
كنزي : صحيح يابابا روحنا بيتهم وشوفنا الشقة .. وطلعت حلوة اوي غير. اللي كنت متخيلها وكنت مفكرة هظبطها ازاي ..
نجلاء : ابقي قابليني لو خلتك تعملي حاجة فيها ع مزاجك .. اهي روحتي ولا جيتي ف الاخر شقتها
كنزي : في حاجة تانية عاوزة تزعليني بيها لسه مقولتهاش ياماما
نجلاء : انا خلصت اللي عندي
كنزي : ماشي تصبحوا ع خير.
سامح : عجبك كدا .. عكننتي عليها اهي هتنام معيطة بسببك
نجلاء : من قهرتي عليها ياسامح .. انت مشوفتش الست دي بتعاملها ازاي .. لا انا مش مطمنة ولا مرتاحة للجوازة دي
سامح : مش مطمنة ولا اللي امي عملته زمان هيخليكي تبوظي فرحت بنتك
نجلاء : انا عاوزة ابوظ فرحت بنتي يا سامح انا
سامح : ايوة .. بنتك مبسوطة وراضية ليه تقوليلها كلام زي دا
نجلاء : بنتي هبلة مش مبسوطة .. راضية علشان بتحبه
سامح : اديكي قولتي بتحبه .. وهو كمان بيحبها وانسان محترم .. يبقا مالناش دعوة بامه .. بنتك هتعرف تتعامل اخرجي انتي منها .. وانسي اللي حصلك زمان
نجلاء : ماشي يا سامح انا همشي ورا كلامك وهنسا اللي حصل .. ومش هعكنن عليها تاني ..و لا هتدخل ف حاجة لما نشوف اخرتها
سامح : اخرتها فرح ان شاءالله .. اما اروح الحقها اصالحها قبل مااتنام
_________________________________
هدي : ليل نامت
قمر : اه ياماما وتونة كمان
هدي : طيب تعالي اقعدي نتكلم
قمر : خير ياماما
هدي : انتي مالك حساكي مش متظبطة كدا وسرحانة من ساعة مامشوا
قمر : بفكر ف عرض الشغل اللي نور قالتلي عليه
هدي : شغل ايه
قمر : اشتغل ف الشركة بتاعت استاذ احمد
هدي : طيب مستنية ايه اتكلي ع الله ووافقي
قمر : انتي بتتكلمي جد ياماما
هدي : اه طبعا بتكلم جد .. قلقانة من ايه .. علشان مش مكملة تعليمك يعني
قمر : لا هما قالولي اني اقدر اخد كورسات واعوض اللي فاتني .. بس حاسة اني دي مسئولية كبيرة عليا .. انا عمري مااشتغلت ف شركة وحاسة اني هفشل
هدي : مسئولية ايه ياقمر .. انتي اللي بتتكلمي عن المسئولية .. انتي اتحملتي مسئولية اكبر من دي بكتير من وانتي عندك 13 سنة .. ودلوقتي بتقولي ع شغل الشركة مسئولية كبيرة
قمر : مش عارفة ياماما محتارة وخايفة بعد مااعمل كل دا ف الاخر متقبلش وافشل
هدي : انا متأكدة انك مش هتفشلي ابدا .. بس لو فشلتي مش مهم المهم انك جربتي حاجة جديدة واتعلمتي مش هتخسري حاجة يا قمر صدقيني جربي .. وانا واخواتك هنفضل معاكي وف ضهرك وندعمك ف كل خطوة مش هتكوني لوحدك .. ولا هنخليكي تحسي بأي خوف او ضعف
قمر حضنتها بفرحة : بشكر ربنا انه رجعك ليا .. وجودك جنبي بيقويني دايما .. اوعي تبعدي عني تاني
هدي : مش هيحصل أبدا .. انا مصدقت رجعت لحضنكم تاني .. المهم بقا قوليلي هتعملي ايه ف الشغل
قمر : هكلم نور
هدي : هتقوليلها ايه
قمر بفرحة : هقولها موافقة
____________________________________
{ بعد مرور شهور }
نور نازلة تجري ع السلم : كريم مشوفتش زين فين
كريم : لسه خارج دلوقتي الحقيه
نور طلعت بسرعة : زين .. زين
زين : ايه يانور في حاجة
نور : كنت عاوزة اقولك انهاردة مقابلة قمر متنساش .. انت اللي تقابلها مش حد تاني
زين : اشمعنا انا يعني
نور : علشان تتأكد بنفسك انها تستحق الشغل
زين : ماشي ياستي ولا واني اشك
نور : اه وخليك لطيف معاها ياريت
زين : امسكها الشركة مكاني احسن بقا
نور : مش قصدي كدا .. اقصد طريقتك متحسسهاش انك مش عاوزها ف الشغل ..
زين : ماشي ياستي حاجة تانية عاوزة تكلميني ... فيها عن قمر علشان اتعطل اكتر عن الشغل
نور : لا خلاص ياروحي اتفضل
زين : ماشي
________________________________
وليد قاعد سرحان
اسر : وليد انت هنا من بدري ولا ايه
وليد : اه لقيت نفسي مخنوق شوية قولت انزل الكافية اغير جو
اسر : اه تغيير جو .. طب اقوم انا بقا
وليد : رايح فين خليك
اسر : اخليني ايه بقا .. ماهي زمانها جاية
وليد : هي مين
اسر : اللي هتغير جو معاها
وليد : اقعد يااسر
اسر : لا ياعم احسن ليل تعرف وتزعل بلاش
وليد : مافيش حد جاي اقعد بقا
اسر : بتتكلم جد .. انت نازل من غير مايكون معاك واحدة .. لا انا مش مصدق .. انت شكلك سخن
وليد : لا صدق خلاص قطعت علاقتي مع كله
اسر : جاي تقطع علاقتك مع كله دلوقتي .. ماشي ياوليد الي يريحك
وليد : انت تعرف حاجة عن سارة
اسر : اه ليل بتكلمها دايما .. هي كويسة
وليد : عملت ايه ف الامتحانات
اسر : ليل قالتلي حليت كويس وف انتظار النتيجة زينا
وليد : ربنا يوفقها .. ابقي طمني عليها
اسر : طيب ماتكلمها انت وتسأل عليها
وليد : بزمتك بعد اللي حصل اخر مرة هتكون عاوزة تكلمني
اسر : بصراحة ولا تتف ف وشك حتي .. بس جرب بردك
وليد : لا بلاش علشان مرجعش اعلقها تاني بحاجة .. هي بعدت كدا كويس ليها
اسر : تقصد كويس ليك انت
وليد بزعل : اه كويس ليا .. انا اللي اختارت كدا عندك حق
__________________________________
هدي : فتون ادخلي صحي قمر .. احسن تتأخر ع المقابلة انهاردة
تونة : حاضر ياماما
قمر( لابسة لبس مناسب للشغل وهيلز عالية ولامة شعرها لفوق وحاطة ميك اب سيمبل ) خرجت : انا صاحية ياماما وجاهزة كمان
هدي : بسم الله مشاءالله عليكي .. زي القمر ياحبيبتي
تونة : زي ايه دي هي القمر نفسه ياماما
ليل خارجة من الاوضة صفرت اول لما شافت قمر : ايه الحلاوة دي ياقمر .. انتي ناوية تبقي صاحبة الشركة ولا ايه
هدي : وليه لا .. قمر قدها وبقا معاها شهادات غيرها بياخدها ف سنين وهي قدرت تاخدها ف شهور بس .. علشان تعرفي اختك لما بتحط حاجة فدماغها بتعملها
قمر : لولا وقفتكم جنبي مكنتش هوصل للي وصلتله دا
هدي : انتي اللي عملتي ياقمر احنا كنا بندعمك بس ..
قمر : ودا بنسبالي حاجة كبيرة اوي .. انتو ساهمتوا بجزء كبير اوي ف اللي وصلتله ..
هدي : وهنفضل جنبك وندعمك دائما لحد ماتوصلي لاحسن مكانة ياحبيبتي
ليل : ايه دا انتو هتعيطوا ولا ايه لا .. كدا الميك اب يسيح .. يلا ياحبيبتي روحي ع مقابلتك ولما ترجعي نعيط كلنا سوا
هدي : لا لما ترجع هنفرح كلنا مش هنعيط ان شاءالله
قمر : انا همشي علشان متأخرش ..ادعولي
هدي : دعيالك ياحبيبتي .. ربنا هيوفقك ان شاءالله
______________________________________
سارة : ياماما قولتلك مليون مرة متفتحيش معايا موضوع دا .. انا مش بفكر ف الارتباط نهائي
مني : ليه يعني مش زي بقيت البنات انتي ولازم تتخطبي وتتجوزي ويبقالك بيت
سارة : لا ياماما مش زي بقيت البنات .. انا مش عاوزة لا اتخطب ولا اتجوز انا حرة
مني : استغفرالله العظيم يارب .. طيب اديلو فرصة بس اتقابلوا مش يمكن تغيري رايك
سارة : مش هغيروا ياماما انا عارفة نفسي
مني : جربي مش هتخسري حاجة
سارة : مش هجرب حاجة عارفة نتيجتها ايه ..
مني : انا مش فاهمة مالو وائل ابن خالتك مش عجبك في ايه
سارة : لا عاجبني ولا مش عاجبني .. انا رافضة الموضوع وخلاص
مني : والسبب
سارة : من غير اسباب ياماما .. عن اذنك انا داخلة انام
مني : انتي لسه صاحية انتي لحقتي
سارة : اه هنام تاني
________________________________
السكرتيرة : استاذ زين في واحدة اسمها قمر .. بتقول ان عندها مقابلة معاك انهاردة
زين : اه .. هي جت من امتي
السكرتيرة : من نص ساعة بس حضرتك كنت ف الاجتماع
زين : طيب دخليها وابعتيلي القهوة بتاعتي
السكرتيرة : حاضر يافندم
___________________
" قمر دخلت وزين مركز ف الورق اللي ف ايده ومش باصصلها "
قمر : ازيك يازين
" زين شافها قام وقف وفضل باصصلها ومش مصدق ان دي قمر "
قمر : زين انت سامعني
زين بتوتر : اه .. اه اتفضلي تشربي ايه
قمر : ميرسي يازين مش عاوزة .. انا بقول نركز ف اللي جاية علشانه الاول .. بص دا ملف في كل الاوراق المطلوبة زي ما نور قالتلي .. ودول الشهادات اللي انا واخدها .. و..
"قمر بتتكلم وزين سرح فيها ومش مصدق انها اتغيرت 180 درجة ف الفترة القصيرة دي طريقتها ولبسها واسلوبها حاسس انه اول مرة يتعامل معاها "
قمر : ودلوقتي تقدر تسألني اللي انت عاوزه
زين بص ف الورق : كل حاجة تمام .. مافيش حاجة عاوزة اسألها .. انتي هتشتغلي معانا
قمر بفرحة : بجد يعني اتقبلت
زين : عاوزة بعد كل دا ومتتقبليش
" قمر سكتت "
زين : ثواني خليكي معايا .. خير ياعلا
علا : المهندس سليم مستني حضرتك برا
زين : طيب شوفي يشرب ايه .. لحد مااخلص المقابلة
علا : تحت امرك يافندم
قمر : مافيش داعي تعطل شغلك .. انا كدا كدا همشي
زين : لا خليكي
قمر : !!
زين : اقصد يعني لو حابة تستني اوصلك
قمر : لا متقلقش عربي مستنيني تحت هيوصلني
زين قلب وشه : عربي ! طيب اتفضلي هوصلك لحد استاذ عربي
قمر ابتسمت : ماشي
" خرجوا من المكتب "
زين : ابقي سلميلي ع ليل ومدام هدي .. وتونة
قمر : حاضر هسلم عليهم
زين : وابقوا تعالو بقا انتو بطلتوا تيجوا ..
قمر باستغراب : تمام هشوف وهنيجي
زين : أمتي
قمر : مش عارفة يازين هشوف
سليم : زيين .. ياجدع بقا بعد كل الغيبة دي وتسبني ملطوع كل دا برا
زين حضنه : واحشني والله ياسليم ..
" قمر سمعت اسم سليم بصيت اتصدمت وعينها لمعت وديرت وشها بسرعة "
سليم : لا واضح اني وحشك فعلا
زين : بص خمس دقايق بس ..هوصل قمر بس وهاجي نرغي مع بعض براحتنا ... قمر تعالي .. قمررر بكلمك
قمر بتحاول تستجمع نفسها وراحت لزين و بعده عينها عن سليم : نعم يازين
سليم شافها : قمرر !!!
___________________________________
ياتري ايه علاقة قمر ب سليم وتعرفوا منين .. هنعرف ف الاجزاء الجاية تابعوا .. احب اسمع توقعاتكم
حكاية_قمر 🌝💕
بقلم_ياسمين_علي ••
تعليقات
إرسال تعليق