 |
التاسع عشروالعشرين 😲🔥🔥
فؤاد يُعلق صورة رشا علي الحائط بجوار الكثير من الصور المعلقة وعليها شريطه سوداء مثلهم ثم ينظر اليها ويبتسم ابتسامته الخبيثة فرحا بانضمام ضحية جديدة الي قائمة ضحاياه .. ونذهب الي سلمي وانهار وسهام بنات رضوي حيث يجلسون في شقتهم بعد ان اصابهم الهم والالم جراء ما حدث لأمهم ..
سلمي .. ايه يا بنات مش جعانين ولا ايه ؟!
انهار .. لا .. ملناش نفس !!
سلمي .. انتوا من امبارح ما اكلتيش حاجة لا انتي ولا سهام !!
سهام .. انا مش عاوزة اكل .. انا عايزة ماما
سلمي .. ماما في المستشفي يا سهام عشان تتعالج وتخف وترجعلنا احسن من الاول
انهار .. ياتري اللي احنا عملناه ده صح ولا غلط ؟!
سلمي .. تقصدي ايه ؟!
انهار .. اننا دخلنا ماما مصحة نفسية من غير حتي ما ناخد رأيها !!
سلمي .. وانتي لو كنتي اخدتي رأيها كانت وافقت ؟! اكيد لا طبعا .. انتي ماشوفتيش رد فعلها كان ايه لما عرفت انها في مصحة نفسية !!
انهار .. انا حزينة اوي علي ماما واللي بيحصلها ده .. انا مش عرفة ايه السبب اللي خلاها بقت كده ؟!
سلمي .. الدكتور بيقول انها ضغوط نفسية شديدة .. وانتي طبعا عارفة الظروف السودا اللي احنا عايشينها تخلي اللي ميتجننش يتجنن !! كتر خير ماما انها استحملت السنين دي كلها
انهار .. طب يا تري هاتخف وترجع زي الاول ولا هتفضل كده علطول ؟!
سلمي .. ان شاء الله هاتخف وتبقي احسن من الاول كمان ..
انهار تبكي .. انا ماما صعبانه عليا اوي يا سلمي
سلمي .. صعبانه علينا كلنا اكيد .. بس هنعمل ايه بقي .. ربنا يشفيها .. بصوا انا جيبتلكم ايه ؟.. دا تفاح وموز وعنب .. الحاجات دي احنا عمرنا ما اكلناها يا بنات !!
انهار .. طب جيبتيهم من الفلوس اللي اديهالك عمو فؤاد ؟!
سلمي .. ايوا دا ادالي فلوس كتير اوي واديكم شايفين وقفتوا جمب ماما في محنتها .. الراجل دا حنين اوي يا بنات
سهام .. هو شلكه وحش اوي .. بس اه حنين .. انا كنت خايفة منه في الاول بس حبيته بعد كده
انهار .. وانا كمان حبيته جدا .. حاساه انه واحد قريب مننا .. هي ليه ماما مش عاوزانا نروح نقعد عنده في القصر ؟!
سلمي .. بتقول انها مش مرتحاله ومش هتطمن علينا واحنا عنده !!
انهار .. غريبة .. مع انه بيعاملنا معاملة جميلة اوي .. دي لو كنا بناته مكنش هيعاملنا بالطريقة دي !!
سلمي .. فعلا .. انا عمري ما شفت حد حنين بالشكل ده !! طب يلا بقي انا جعانه جدا .. يلا بينا ناكل عشان نروح ل ماما المستشفي
ونذهب الي ام نيفين التي ذهبت الي فؤاد القصر ومعها ابنتاها نيفين وسعاد وفي انتظار نزول فؤاد لمقابلتهم .. نيفين تشرب من عصير جريب فروت ثم تقول
نيفين .. الله .. العصير دا حلو اوي يا ماما .. دا عصير ايه ده ؟!
ام نيفين .. السفرجي قال اسمه ايه ؟! اه .. عصير جريب فروت
سعاد .. وعبارة عن ايه الجريب فروت ده يا ماما ؟!
ام نيفين .. وانا ايشعرفني ؟!
نيفين .. اومال طلبتيه ليه وانتي مش عرفة دا عبارة ايه ؟!
ام نيفين .. وانا مالي .. مش السفرجي جه قدامكم وقال تشربوا ايه ؟ وسألته عندك ايه بتشرب ؟ راح قال كذا حاجة كده .. مفهمتش منهم غير كلمة جريب فروت !! ف رحت قلتله هاتلنا عصير جريب فروت .. بس علي ما اظن هي فاكهة وكده يعني
نيفين .. شايفة الابهه والعز يا ماما ؟! دا احنا مدفونين بالحيا والله !!
ام نيفين .. هنعمل ايه طب يابنتي .. ربنا خلقنا فقرا .. نحمده علي كل حال
سعاد .. اوحش حاجة في الدنيا الفقر !! ربنا يخلصنا منه بقي .. عشان انا خلاص اتخنقت !!
ام نيفين .. ربنا يسهل ويوافق ياخدكم عنده .. اهو تبقي طاقة القدر واتفتحتلنا انا وانتم ونقب بقي علي وش الدنيا
نيفين .. يارب يا ماما يوافق ياخدنا عنده هنا في القصر .. يا سلام ده هتبقي عيشة ولا في الاحلام
سعاد .. بس ايه صور البنات الكتيرة اوي دي اللي معلقها في كل حته ؟!
نيفين .. وكلهم ايه بقي .. ملكات جمال !! بسم الله ما شاء الله
ام نيفين .. دول اكيد البنات اللي بيربيها عنده
نيفين .. بس هما فين انا مش شايفة اي بنات هنا في القصر ؟!
ام نيفين .. تلاقيهم هنا ولا هنا .. ما هو بسم الله ما شاء الله قصر طويل عريض مالوش اول من اخر !!
نيفين .. بس عشان شكله نازل
وينزل فؤاد من الطابق الاعلي متوجها نحو ام نيفين وبناتها ويحمل كالمعتاد القط جيمي المكبل بالقيود وعندما ينظر الي بناتها يصيبه الاشمئزاز لقباحة منظرهم ويبدوا ذلك علي وجهه
نيفين .. هو وشه اتقلب ليه كده لما شافنا !! انتي واخدة بالك ؟!
ام نيفين .. ما هو ده اللي انا عاملة حسابة وخايفة منه ؟!
نيفين لا تفهم مقصد امها .. قصدك ايه ؟!
ويقترب فؤاد منهم وعندما تراه سعاد بهذا الشكل البشع تصرخ قائلة
سعاد .. يا ماما ..
ام نيفين .. مالك يا بت في ايه ؟!
سعاد .. الراجل ده وحش اوي !!
ام نيفين .. عيب يا كلبة انتي .. فيه حد يقول كده برضوا ؟! انا اسفة يا بيه
فؤاد .. سيبيها براحتها .. هي مغلطتش في حاجة .. انا فعلا منظري بشع .. بس قلبي من اجمل القلوب اللي في العالم كله !! اسمك ايه بقي ؟
سعاد .. اسمي سعاد
فؤاد .. وانتي يا امورة اسمك ايه ؟
نيفين .. اسمي نيفين
فؤاد .. تمام .. تمام
ام نيفين ..دول بناتي ايه رأيك فيهم بقي ؟!
فؤاد .. كويسين ما شاء الله
ام نيفين .. يعني هتاخدهم عندك خلاص ؟!
فؤاد .. لا للأسف .. اظن انك بعتيلي صورهم ع الماسنجر وانا قلتلك مش هينفعوا !!
ام نيفين .. ليه بس ؟! مش عاجبينك ولا ايه ؟!
فؤاد .. بالعكس دول لطاف جدا .. بس انتي عارفة ذوقي كويس .. انا لسة مواصفات معينة في البنت اللي انا عايزها وانا شرحتهالك قبل كده
ام نيفين .. ايوه شرحتهالي فعلا .. بس انا قلت يمكن لما تشوفهم ع الطبيعة يعجبوك وتوافق تتكفل بيهم
فؤاد .. انا بعتذر بجد
ام نيفين .. لا علي ايه حضرتك .. انا اللي حظي نحس دايما .. يلا ملناش نصيب بقي
فؤاد .. اعملي انتي بس اللي قلتلك عليه وانا هابسطك اوي
ام نيفين .. عنيا حاضر .. حضرتك اللي بتطلبه مني انا بعمله وان شاء الله مش هيعدي الاسبوع الا وبنات رضوي هيكونوا عندك هنا في القصر
فؤاد .. تمام .. تمام
نيفين .. قلي يا عمو هو حضرتك البنت دي كلها عندك هنا في القصر بتربيها ؟!
فؤاد .. ايوا
نيفين .. دول بنات كتير اوي !! طب هما فين ؟! انا مش شايفة حد منهم ولا سامعه حتي صوت واحدة منهم ؟!
فؤاد .. هما نايمين
نيفين .. نايمين ولا ميتين ؟! اصل حضرتك حاطط شريطة سودا علي كل صورة منهم .. ودي بيحطوها علي صور الميتين علي ما اظن ؟!
فؤاد يغضب .. لا نايمين قلتلك !!
نيفين .. اها .. طيب .. طب حضرتك ليه رابط رجلين القط ده ؟! ده حتي حرام انت كده بتعذبه ؟!
ام نيفين .. خلاص يا نيفين بقي !!
فؤاد .. سيبيها براحتها .. عندك حق هو المفروض ما اربطوش بالشكل ده .. بس اعمل ايه لو فكيت قيوده هايسيبني ويطفش !!
نيفين .. ليه هو مش القط بتاعك ؟!
فؤاد .. ايوه القط بتاعي طبعا
نيفين .. طب هيطفش ويسيبك ليه بقي الا اذا كنت بتعاملة معاملة مش كويسة !! عشان كده عايز يهرب
فؤاد .. بالعكس .. انا بعاملة احسن معاملة .. احسن اكل واحسن شرب وجايبلة دكتور مخصوص عشان يعتني بيه .. بس للأسف واطي وقليل اصل !!
نيفين مندهشة .. ايه ؟! اول مرة اسمع ان فيه قط بالصفات دي !!
فؤاد .. زي ما البني آدمين فيهم الاصيل وفيهم الخثيث .. برضوا الحيوانات فيهم الاصيل وفيهم الخثيث !!
نيفين .. طب معلش يعني .. هو فيه الصفات دي ليه حضرتك محتفظ بيه ؟!
فؤاد .. لأني بحبه ومقدرش استغني عنه .. ولأنه كمان نوع نادر جدا من القطط وغالي اوي كمان
نيفين .. اها .. عشان كده .. بس انا شايفة انه مسكين جدا ومسالم اهوه .. ممكن اشيلة بعد اذنك ؟
فؤاد .. اتفضلي طبعا
وتمسك نيفين بالقط وتمسح بيدها علي رأسه فيشعر بالحنان ويغمض عينية
نيفين .. حرام عليك يا عمو .. بقي ده قط وحش ؟! بعد اذنك انا هفك الرباط ده انا مش قادرة استحمل اشوفه بالمنظر ده
ثم تفك قيودة وفجأة يزوم القط ويهجم علي وجه نيفين ليمزقه بمخالبه تاركا جروح متفرقة علي وجهها
نيفين تصرخ .. الحقيني يا ماما .. اه
الام تحاول ابعاد القط الهائج عن وجه ابنتها
ام نيفين .. ابعد عن البنت يخرب بيتك !!
نيفين .. اه يا وشي .. ده عورني جامد يخرب بيته !! فعلا قط غدار !!
فؤاد يضحك ساخرا .. ههههههه .. مش قلتلك انتي واطي وخثيث !!
نيفين .. هو فعلا كده !! يلا بينا يا ماما
ام نيفين .. انتي اتعورتي جامد يا بنتي !! ايه قط مسعور ده ولا ايه ؟!
وبعد ان تنصرف ام نيفين وبناتها .. القط يجري نحو فؤاد ليحمله علي يده ويمسح علي رأسة قائلا .. برافو يا جيمي ..
ماذا حدث بعد ذلك ؟
دا اللي هنعرفه في اللي جاي
العشرون 😲😲
ام نيفين تعود الي منزلها بعد زيارتها ل فؤاد وحدث ما حدث لأبنتها نيفين .. الام تطهر الجروح التي في وجه ابنتها بالمطهر ونيفين تتألم من تلك الجروح
نيفين .. اه .. بالراحة يا ماما والنبي
ام نيفين .. معلش يا نيفين استحملي شوية
نيفين .. استحمل ايه بس يا ماما ؟! انا وشي بقي شوارع
ام نيفين .. قط مسعور ابن اللذين ده ؟!
نيفين .. مع انك لما تشوفيه تقولي عليه هادي وغلبان !! قليلي هي الحاجات دي لما تخف هاتسيب اثر في وشي ؟!
ام نيفين .. ان شاء الله لا
نيفين .. دي تبقي مصيبة لو سابت اثر في وشي !! منك لله يا بعيد .. علي فكرة اللي اسمه فؤاد ده انا مش مرتحاله
ام نيفين .. مش مرتحاله ليه ؟!
فؤاد .. راجل غامض كده وتصرفاته غريبة !! وبعدين ايه صور البنات دي كلها اللي مالي بيها حيطان القصر بتاعه والعجيب ان كلهم اموات !!
ام نيفين .. وانتي عرفتي ازاي انهم اموات ؟!
نيفين .. من الشريطة السودا اللي الموجودة علي كل صورة منهم
ام نيفين .. بس انتي سألتيه عنهم وقالك انهم نايمين ؟!
نيفين .. نايمين ايه بس ياماما ؟! انتي صدقتي الكلام ده ؟!
ام نيفين .. وهو هيكدب ليه بس يا بنتي ؟!
نيفين .. لا بيكدب .. صدقيني الراجل ده دحلاب ومش ساهل !!
ام نيفين .. عيب الكلام ده !!
نيفين .. دي الحقيقة والايام واللي يحيرك اكتر اشمعني كلهم ملكات جمال ؟! عشان كده رفض ياخدنا عنده لأن جمالنا عادي جدا مش هو اللي بيدور عليه .. هو كان عايزنا زي بنات طنط رضوي
ام نيفين .. وهي فين رضوي دلوقتي ؟! ربنا يشفيها وتخرج من المكان اللي هي فيه بالسلامة
نيفين .. يارب .. انتي عرفة بعد ما قابلت الراجل ده .. لو كان وافق انه ياخدنا عنده .. انا كنت رفضت !!
ام نيفين .. اتنيلي بس .. هو انتي تطولي ؟!
نيفين .. لا مش عاوزة اطول ياختي .. انا كده كويسة اوي .. كفاية اللي حصل لوشي بسبب القط المتوحش بتاعة
ام نيفين .. اهو ما اخديش لا انتي ولا اختك .. اسكتي بقي .. طول عمركم فقر زي ابوكم !!
ونذهب الي رضوي والتي ما زالت تمكث داخل المصحة النفسية حيث اصابها الهزال والضعف بسبب المهدئات التي تتناولها يوميا وقلة تناولها للطعام .. والطبيب يدخل اليها للأطمئنان عليها ..فيلاحظ ان طعام الافطار كما هو فيندهش
الطبيب .. صباح الخير يا مدام رضوي
رضوي .. صباح النور
الطبيب .. ايه ده !! ده الاكل زي ما هو ؟! انتي لسة مفطرتيش ولا ايه ؟!
رضوي .. ماليش نفس
الطبيب .. لا مينفعش الكلام ده يا مدام رضوي .. احنا كده ممكن ندخل في مشكلة تانية وبعدين انتي بتاخدي علاج قوي ولازم تاكلي كويس ..
رضوي .. ماليش نفس اكل حاجة خالص !!
الطبيب .. معلش اضغطي علي نفسك شوية وبعد كده الامور هترجع لطبيعتها ان شاء الله .. بعد اذنك افحصك بس
الطبيب يفحص عيناها بالنظر اليهما ثم بعد ذلك يضع السماعة علي قلبها ليسمع دقاته .. ثم يقول
الطبيب .. ارتاحي بس عشان اقيس الضغط بتاعك
ثم يقيس لها الضغط ثم يقول
الطبيب .. الامور تمام الحمد لله .. بس وشك باهت شوية وده بسبب قلة الاكل طبعا .. انا هاكتبلك علي شوية فيتامينات بس لازم تاكلي يا مدام رضوي
رضوي .. انا عايزة اخرج من هنا من فضلك
الطبيب .. طب مش لما حالتك تتحسن الاول ؟!
رضوي .. انا خلاص بقيت كويسة
الطبيب .. انتي زهقتي مننا ولا ايه ؟!
رضوي .. لا .. بس عايزة ارجع بيتي وشغلي .. انا مش مرتاحة هنا !!
الطبيب .. ان شاء الله هتخرجي قريب بس انتي لازم تساعدينا وتسمعي الكلام عشان تخفي بسرعة وترجعي لبيتك وشغلك وتمارسي حياتك بشكل طبيعي .. اسيبك عشان تفطري .. بعد اذنك
وينصرف الطبيب .. بعدها تفكر رضوي في كلام الطبيب من ناحية انها لابد من ان تتغذي جيدا ويبدوا انها اقتنعت بهذا الكلام فتقرر ان تأكل وبالفعل جذبت اليها صينية الطعام التي كانت بعيدة عنها لتصبح امامها مباشرة وبعد ان نظرت الي اطباق الطعام اصابتها الصدمة حيث وجدت بداخلها اشياء غريبة .. وجدت حشرات كالصراصير والخنافس في احدهم وفي طبق اخر توجد ابراص وسحالي وفي طبق اخر ثعبان كبير ملتف حول نفسة وكلهم احياء يتحركون داخل تلك الاطباق .. رضوي يصيبها الهلع من هذا المنظر ..
رضوي .. ايه ده ؟! هو ده الاكل اللي عاوزني اكله ؟!
فجأة تجد الصراصير والخنافس تسير علي ملابسها فتنفضها بسرعة وترمي بالصينية بعيدا عنها فتقع علي الارض محدثة صوت عالي فيدخل التمرجي الذي يدعي عاطف منزعجا من هذا الصوت فيجد رضوي قد القت الصينية وما بها من طعام علي الارض
عاطف .. ايه فيه ايه ؟!
رضوي غاضبة .. عايزين تأكلوني صراصير وسحالي ؟! انتوا ايه معندكمش رحمه ولا دين ؟!
عاطف .. صراصير وسحالي ؟! هي فين دي ؟!
رضوي .. اهه ماشية ع الارض قدامك يا بني آدم !!
عاطف .. لا حول ولا قوة الا بالله .. بالله عليكي يا شيخة احنا برضوا هنأكلك حاجات زي دي ؟!
رضوي .. انت هاتستعبط ؟! ماهي قدامك اهه !! انتوا ليه بتعملوا معايا كده ؟! انا مأذتش حد فيكم عشان تعاملوني بالطريقة دي !! وصلت انكم عايزين تأكلوني حشرات يا ولاد الكلب !!
عاطف .. طب اهدي بس .. انا هاجيبلك فطار غيره
رضوي .. عايز تجيبلي ايه تاني المره دي ؟! اوعي تكون ناوي تجيبلي فيران ؟!
عاطف .. فيران ايه بس يا ست رضوي ما تعقلي اومال ؟!
رضوي .. انا مش مجنونة عشان تقلي اعقلي .. انتوا اللي عايزين تجننوني ومش عارفة ليه ؟! حرام عليكم اللي بتعملوه فيا ده .. حراام !! انا تعبت .. تعبت .. تعبت
عاطف .. اه .. شكل الحالة هاتشتغل معاكي ؟! ع العموم الحقنه جاهزة اهه .. تعالي اما اديهالك
رضوي .. ابعد عني .. انا مش عايزة حقن تاني .. كفاية حرام عليك انا تعبت من الحقن دي !!
عاطف .. تعالي بس متتعبنيش معاكي ولا انده علي اسماعيل ؟!
رضوي .. ابعد عني مش عاوزة حقن
وفجأة يدخل فؤاد وهو يحمل القط جيمي علي يده ثم يقول
فؤاد .. سيبها يا عاطف .. ملهاش لزوم الحقنة دلوقتي !!
رضوي تنظر اليه والي القط الذي يحمله في دهشة شديدة ..
ماذا حدث ؟؟ هنعرفه في اللي جاي
البارت 21_22من هنا تكملة الروايه
تعليقات
إرسال تعليق