● الجزء الأول ●
حكاية_قمر 🌜🤍
بقلم_ياسمين_علي ••
قمر بتفتح عربية الكبدة : يافتاح ياعليم يارزاق ياكريم .. استعنا ع الشقا بالله ..
....: صباح الخير ياقمر الحتة
قمر : صباح الخير يا عم سيد .. نازل بدري يعني مش عوايدك
سيد : والله ياقمر المصاريف كترت .. قولت انزل افتح الدكانة .. اهو و اللي يجي كله رزق ربنا
قمر : يا عم سيد انت راجل طيب وربنا هيكرمك بإذن الله ... وسع كدا ارفعلك باب الدكانة
سيد : لا خليكي مش عاوز اتعبك ..
قمر : تعبك راحة .. معاوزش حاجة تانية اعملهالك ..
سيد : كتر خيرك ياقمر .. روحي ع عربيتك يلا علشان ف زباين مستنينك
قمر : وشك حلو ياعم سيد والرزق جه اهو .. عن اذنك بقا
سيد : اتفضلي يابنتي
_______________________
في فيلا الألفي ▪
احمد : صباح الخير يا ولاد
(احمد دياب الألفي صاحب مجموعة شركات الألفي للمقاولات )
نور : صباح الخير يابابي
احمد : صباح النور ياحبيبت بابي .. انتو بس اللي صحيتوا .. اومال فين الباقي
نور : أسر نايم كالعادة يابابي ..
( نور احمد الألفي .. 25 سنة .. متخرجة من كلية الالسن .. تتميز بالرقة ف الملامح والأسلوب .. طويلة القامة و نحيفة بعض الشئ .. ذات شعر قصير بني وعيون عسلي )
احمد : نايم لحد دلوقتي هو مش عنده كلية انهاردة .. ولا هو ناوي يسقط السنة دي كمان زي كل مرة ... استغفر الله العظيم واتوب اليه .. اطلع ياكريم صحي اخوك
* كريم مردش *
نور : بابي خلي كريم انا هطلع اصحيه
احمد بنظرة حزن ع كريم : ماشي يابنتي .. وشوفي زين صحي ولالا
زين بيلبس الچاكيت ونازل ع السلم : انا صحيت اهو ..
( زين احمد الألفي .. الابن الأكبر لعيلة الألفي .. 31 سنة .. يدير شركات الألفي بجانب والده .. طويل القامة .. وجسم رياضي ... وذات ملامح رجولية .. وعيون بنية .. يتميز بحنيته ع اخواته ولكن شديد العصبية ... يعشق السباحة وركوب الخيل .. يحب عائلته جدا .. ).
زين : صباح الخير يابطل
..كريم بابتسامة لزين ك رد ع كلامه
زين : يلا بينا يابابا ع الشركة
احمد : مش هتفطر الأول يا بني
زين : ف الشركة علشان منتأخرش بقا ..
احمد : ماشي يابني يلا بينا ... وبص ل كريم اللي قاعد يرسم وساكت ورجع بص للدادة ... خليبالك منه يا نجلاء
نجلاء : ف عيوني متقلقش
( كريم الالفي .. الابن الاصغر لعيلة الالفي .. 9 سنوات .. يحب الرسم .. ويمارس هذه الهواية باستمرار .. يمتلك عيون خضراء مثل والدته وشعر بني كثيف طويل .. توفت والدته ف حادث امام عيناه منذو سنتين .. من شدة تعلقه بها امتنع عن الكلام ) .
___________________________
قمر : خد دول السندوتشات اللي طلبتهم
الزبون : كام كدا
قمر : كدا خمستاشر جنية
الزبون : اتفضلي
قمر : تسلم .. الف هنا
.... : اييدك ع المصروف
قمر بخضة : تف تف تف .. ف ايه ياليل ماتكحي ياحبيبتي خضتيني ... وبعدين الناس تصحا تقول صباح الخير .. مش ايدك ع المصروف
( ليل اخت قمر .. 19 سنة .. تمتلك ملامح بيضاء وعيون خضراء .. وشعر طويل .. اول سنة ليها ف كلية الهندسة )
ليل : متتوهيش ع الموضوع ياقمر .. ايدك ع المصروف يلا مش عاوزة اتأخر ع المحاضرات
قمر بفرحة : فرحانة بيكي كبرتي وبقيتي ف كلية ياليل .. اللهم صلي علي النبي ... اللهم صلي علي النبي .. استني اجيب البخور وابخرك .. قل أعوذ برب الفلق .. من عيون الحارة كلها ومن عين ذكية المستقوية .. و
ليل بتكح جامد: كفاية بخور مش قادرة اخد نفسي
قمر بعدت البخور عنها وجريت عليها : ياحبيبتي خلاص شيلته .. انتي كويسة
ليل بتاخد نفسها : ااه ... ايه لازمة كل دا هو انا اول واحدة ادخل كلية
قمر : ومش اي كلية .. دي كلية الهندسة .. حلمي اتحقق .. اللي مكملتهوش انتي كملتيه وهتوصلي بإذن الله... خليبالك من نفسك ياليل واي حد يقربلك ارقعي بالصوت ولمي عليه الناس .. او اقلعي اللي ف رجلك وع قفاه .. ولا اقولك بلاش انتي خليكي بهيبتك وحلاوتك .. واندهيلي انا اجي اديلو علي قفاه هو وعيلته نفر نفر
ليل بتضحك : متخافيش محدش هيقربلي طول مانتي اختي .. يلا بقا هاتي المصروف
قمر : خدي ياحبيبتي الخمستاشر جنية دول
ليل : ايه دا ياقمر حرام عليكي... انا لازم مصروفي يزيد انا بقيت ف كلية
قمر : ليه يابت ماهما حلوين اهم آجرة اتوبيس رايح جاي وهاتيلك واحدة بببس بلي ريقك وحوشي الباقي
ليل : بيبس واتوبيس ! لا لا ياقمر ماليش دعوة افرضي جوعت اعمل ايه
قمر : اصبوري اعملك سندوتشات كبدة تاخديها معاكي
ليل بزعل : كبدة ايه بس .. آخر كلام لو المصروف مزدش مش رايحة هاا بقا
قمر : خلاص متزعليش ياليل .. زعلك غالي عندي خدي ياحبيبتي دول كمان وهاتي اللي نفسك فيه
ليل بفرحة: ربنا يخليكي ليا
قمر : ويخليكي ليا ياحبيبت اختك .. تعالي ف حضني
تونة طالعة منكوشة من الشباك : الله الله احضان ع الصبح وانا كمان عاوزة المصروف
ليل : ام لسانين صحيت اخلع انا بقا
قمر بضحك : طب روحي ربنا معاكي .. خليبالك من نفسك ياليل
تونة : سمعتك والله لما ترجعيلي ماشي .. هتروحي مني فين يعني
قمر : شش عيب كدا
تونة : بتقول عليا بلسانين يرضيكي
قمر : لا غلطت علشان انتي بأربعة مش باتنين
تونة بطلع لسانها: واحط بش ااوه وهلهيه
قمر : بتقولي ايه انتي
تونة دخلت لسانها : بقولك عندي لسان واحد بس اهو والله
قمر : لا في تاني مستخبي .. صح افتكرت يالي جيبالي الكلام من اللي متسواش .. كدا تخلي ذكية ام أربعة وأربعين صوتها يعلي عليا امبارح بسبب اللي عملتيه ف ابنها
تونة : ما قولتلك اخزقلها عنيها الاتنين مسكتيني ...
قمر : تخزقي ايه يخربيتك .. دانتي فاتحة دماغ ابنها
تونة : هو السبب حد قاله يتحمرش بيا
ليل : يتحمرش بيكي ايه يامفعوصة انتي
تونة : ونبي لاطلع اكيبك من شعرك يابت ايتي علشان غيظاني
قمر : بس ياتونة عيب قولت .. وانتي ايه رجعك
ليل : نسيت السندويتشات
قمر : ماشي خديهم وروحي ع كليتك يلا علشان متتأخريش
ليل : حاضر ياقمر .. وبتطلع لسانها لتونة .. سلام يامفعوصة
تونة بعصبية : بورصي بقا يا قمر .. والله لاخزقلها عينها لما تيجي
قمر بتضحك : هو انتي كل حاجة كدا تخزيق العين .. او فتح دماغ لازم تعملي عاهه مستديمة
تونة : اه علشان يفتكروني بيها
قمر : لا ياشيخة
تونة : انا جعانه اوي .. اعمليلي شندوتش كبدة وشندوتش سجق
قمر : بس كدا عيوني ليكي .. مقولتليش بقا فتحتي دماغ الولا ليه
تونة : عيل رخم بقولو ركبني معاك العجلة .. يقولي لا .. اقولو علشان خاطري .. دانا حبيبتك .. راح قالي لا انا مبحبكيش ... روحت جبت توبة كبيرة وف دماغه .. لقيت امه بتصوت علشان نزل دم .. غريبة طلع عنده دم
قمر : يلااهوي ياقادرة عملتي كدا ف الولا علشان مركبكيش العجلة
تونة بزعل : لا علشان قال مبيحبنيش .. هو انا وحشة
قمر حضنتها : لا ياحبيبتي هو انتي في فجمالك .. وحلاوتك
تونة حطت رجل ع رجل وبترفع رأسها لفوق : انا عارفة اني قمر اصلا .. بس ماما مكنتش تعرف انها هتجيب ف حلاوتي ف سميتك انتي قمر .. وسمتني فتون
*قمر سرحت ف كلامها*
تونة : روحتي فين الكبدة هتتحرق منك
قمر : ها .. ولا حاجة .. خدي ياتونة الشندوتشين اهم كليهم هنا .. متمشيش من قدام عيني
تونة : هاتي مصروفي انا كمان.. عاوزة اجيب جلاطة من عند عم السيد واروح آجر عجلة .. بدل ماافتح دماغ حد تاني
قمر : خدي مصروفك اهو كملي اكلك .. وروحي آجري عجلة من عند عم شكشك .. متروحيش عند ذكية تاني مش عاوزة مشاكل
تونة : حاضر عاوزة حاجة تانية
قمر ابتسمت : عاوزة سلامتك ياحبيبتي
_____________________________________
#حكاية_قمر 🌜🤍
#بقلم_ياسمين_علي ••
ف فيلا الألفي ▪
نور : آسر ... ياآسر .. اصحا يلا ..
آسر بنوم : في ايه يانور ع الصبح .. عاوز انام انا سهران طول الليل
( آسر احمد الألفي .. 21 سنة ... طويل القامة ... شعر طوبل وعيون بنيه .. يدرس ف كليه الهندسة .. بعد وفاه والدته اهمل ف دراسته و كل حياته بقيت سهر وسفر مع أصحابه بس ) .
نور : ايه ياآسر معقولة مش عارف ان انهاردة اول يوم كلية
آسر : عارف ومش رايح
نور : لا يا آسر بابي هيزعل كدا .. دي تاني سنة ليك تعيدها .. قوم يلا علشان خاطري
آسر : حاضر اهو قايم علشان خاطرك .. بس هما ساعتين وهرجع
نور بفرحة : ماشي ياحبيبي .. اسيبك تغير بقا
___________________________
قمر بتعمل الكبدة وبتغني مع نفسها : وحياه عينيك و فداها عينيه .. انا بحبك قد عينيا
لا قد روحى .. لا لا شويه .. طب قد عمرى .. بردو شويه
حيرتنى .. توهتنى .. غلبتنى و ياك كده ليه .. نستنى كنت هقولك ايه آه
و حياه عينيك و فداها عينيه .. انا بحبك قد عينيا
و لا حد قبلك .. فات على قلبى .. و لا حد بعدك يملا عينيه يا عنيه
كنت بخاف من حبك من ظلمك لحبايبك .. لكن غصبن عنى قلبى عملها و حبك
ما اقدرش ما احبكش و حياتك ما اقدرش
فى ايديك قوه تهد جبال .. فى ايديك قوه
و عليك صبر وطولة بال .. و عينيك حلوه
ما اقدرش ما احبكش و حياتك ما اقدرش
عايز تخاصمنى خاصمنى .. بس اوعه تبعد عنى
عايز تصالحنى تعالى .. قبل الشوق ما يجننى
...... : انا اهو جيتلك ياجميل يانوارة الحتة
قمر بخضة : تفتفتف ف اي يا راجل خضتني ... ماتكح ولا تقول ايوتها حاجة
المعلم جعفر : سلامتك مالخضة يا وردة بلدي ... ونفسي اخدها وبيقرب منها
قمر زقته جامد : طب حاسب للوردة دي تشكك وتخليك تجيب دم من كل حتة فيك ... سمعني ولا اعلي صوتي وافرج عليك الحارة كلها .. وافضحك قدام مراتك وعيالك
جعفر : الله ليه كدا ياست قمر .. دانا رايدك ف الحلال .. علي سنه الله ورسوله
قمر : حلال ايه ياراجل دانا من دور عيالك
جعفر : وماله مدام لسه بصحتي
قمر : واناقولتلك بدل المرة الف معاوزكشي يا راجل حل عني بقا
جعفر : يعني دا اخر كلام عندك ياقمرر
قمر : لا ماخرهوش .. ف تاني
جعفر بفرحة : ايه هو ياست الستات قولي
قمر : تتفضل تخرج برا ومشوفش وشك تاني
جعفر بغضب : ماشي ياقمر ماشي متبقيش
تزعلي بقا
قمر : غور جتك الهم .. فورت دمي .. نسيتني كنت بقول ايه .. اه ورجعت ابتسمت وحيات عينك وفداها عنيا انا بحبك قد عنيا
_____________________________________
* ف المحاضرة *
الباب خبط .. آسر دخل
آسر : سوري يادكتور .. الطريق و
الدكتور قطع كلامه : اتفضل وياريت ميبقاش ف تأخير تاني
آسر بيبرطم : دا لو جيت تاني بقا وراح قعد
ليل بعدت عنه بحيث تخلي ف مساحة بينهم
آسر بصلها بستغرب : اه دي بينها سنة مايعلم بيها الا ربنا
ليل : افندم ؟
آسر : ولا حاجة
__________________________________
تونة : عم شكشك .. عم شكشك .. عم شكشك .. عاوزة آجر عجلة ياعم شكشك .. ياعم شكشك
شكشك : ياساتر يارب هو انتي .. اتهدي شوية لما العجلة اللي هناك تخلص ابقا خديها
تونة : ليه يعني ماهو العجل كتير اهو ..
شكشك : هو كدا مش عجبك متأجريش آجري من حتة تانية ... روحي عند ذكية مش دي حبيبتك بتروحي عندها دايما
تونة : لهو انت مسمعتش اللي حصل
شكشك : حصل ايه
تونة : مش فتحت دماغ ابنها امبارح
شكشك : الله الله ليه كدا كف الله الشر
تونة : اصلي كنت عاوزة آجر عجلة وراح قالي نفس اللي قولتو كدا روحت ناويلته بطوبة ف دماغه ..
شكشك بخوف : اييه .. طب ادخلي خدي اي عجلة تعجبك
تونة بصتله بقرف: ناس تخاف متختشيش بصحيح
_____________________________
ليل : انت .. ياانت
آسر : صباح الخير .. النسكافيه بتاعي ونبي يا عايدة بسرعة
ليل باستغراب : نسكافيه ايه .. حضرتك انت ف المحاضرة و خلصت و انا عاوزة امشي
آسر فاق : طب ماتمشي هو انا مسكك
ليل : حضرتك كنت نايم .. اطير من فوقك يعني ؟؟
آسر : لا عدي من الناحية التانية عادي جدا
ليل بعصبية : صبرني يارب ... ممكن توسع بعد اذنك
آسر : مش موسع وعدي من الناحية التانية
ليل : انت عبيط ولا ايه مش شايف مسافة كبيرة عديني من هنا اقرب للباب كمان
آسر : علشان طولة لسانك دي .. مش قايم عدي من هناك بقا
ليل بعصبية قامت طلعت ع البانش ولسه بتنزل اتكعبلت وقعت وأسر لحقها بسرعة
ليل اتكسفت وزقته : اوعا كدا .. أبعد عني .. وطلعت تجري خبطت ف صافي
صافي : مالها دي
وليد : ايه ياعم ... دانا قولت مش هتيجي
( وليد وصافي الانتيم بتوع آسر .. صافي بنت صاحب وشريك احمد الألفي ف شركاته .. مغرورة فوق الوصف .. وبتحب آسر اووي ولزقاله دايما .. وهي بنسباله صاحبته وبس )
صافي : استنا بس لما يقول مين دي وبتجري ليه كدا
آسر : متشغليش بالك ب دي .. قولولي هتسهروا فين انهاردة
وليد : عندي ليك حتة سهرة برا انما ايه هتعجبك
صافي : انا هاجي معاكم
وليد : لا دي لينا احنا مش ليكي
صافي : يبقا اكيد فيها بنات .. آسر انت استحالة تروحها انت فاهم
آسر : بنات ايه بس احنا بتوع كدا بردك وغمز لوليد .. هي قعدة شباب كدا ومينفعش تكوني فيها
صافي : اذا كان كدا ماشي
______________________________________
قمر : هو دا كل الي حصل ياعم سيد ... وانا مسكتلهوش عرفته مقامه .. ووقفته عند حده ... اه هو فاكرني مش هقف قصاده يعني علشان معلم ... انا اقف قصاد التخين .
سيد : يااه ياقمر كان نفسي يكون عندي بنت زيك ف شجاعتك وجدعنتك دي ..
قمر : تشكر يا عم سيد والله انت ف مقام ابويا واكتر ... بس كان ف حاجة قلقاني كدا
سيد : ايه قلقك ياقمر
قمر : كلامه كان ف تهديد ليا.. حاسة ناوي ع نية شر اللهي تتقلب عليه البعيد
سيد : متخافيش انتي بميت راجل
قمر : ان كان عليا انا مش خايفة ع نفسي .. انا بالي مشغول ع أخواتي.. ليعملهم حاجة يلوي دراعي بيها وانا مش هستحمل .. واحدة فيهم يجرالها حاجة .. دانا اروح فيها والله
سيد : بعد الشر ياقمر .. ان شاءالله ميصبهمش سوء ابدا
قمر : يارب يا عم سيد يارب ... يلا اسيبك انا بقا علشان اطلع اعمل الاكل لتونة وليل قبل مايرجعوا .. يلا فوتك بعافية
سيد : الله يعافيكي يا قمر
_________________________________
قمر واقفة ف المطبخ بتعمل اكل وبتكلم نفسها :
ياتري عملتي ايه ياليل انهاردة .. يارب يكون اليوم كان حلو عليكي .. هي الساعة كام دلوقتي .. ٧ هي اتأخرت كدا ليه.. الغايب حجته معاه .. يلاهوي لاحسن يكون جعفر الكلب عملها حاجة .. بتشيل غطا الحلة كان سخن اتلسعت حدفت الغطا : اااع سيرتك زفت ع دماغك ياجعفر روح منك لله يشيخ ... حسبي الله ونعم الوكيل
ليل : بخ ..
قمر : انا ناقصاكي انتي كمان .. كنتي فين
ليل : كنت ف الكلية هكون فين يعني .. واقفة تكلمي نفسك وتحسبني ع مين
قمر : بحسبن ع حظي الاسود ...
ليل : ااه يبقا شوفتي المعلم جعفر وهو اللي عصبك كدا
قمر : بت انتي متجبيش سيرة الجدع دا هنا علشان انا ع اخري منه .
ليل : طب اهدي طب وفهميني عملك حاجة
قمر : هو كان يستجرأ دانا كنت نزلت الشبشب ع دماغه
ليل : اومال في اييه
تونة راكبة عجلة : بيب بيب بببي بيب بيب بربببيبي ... وسع وسع وسع ... اقعد يلا ع جنب بيب بيب بيب
قمر طلعت من الشباك : ايه كل الي انتي راكبة دا .. انزلي لتقعي
تونة : لا مش هقع متخافيش
قمر : اسمعي الكلام ياتونة .. مين عطيكي العجلة دي كلها
تونة : عم شكشك خاف افتحله دماغه قالي خدي العجلة الي تعجبك .. روحت خدت عجلته
قمر : طب روحي رجعهالوا يلا وتعالي علشان تأكلي كفاية كدا
تونة : لا مش هرجعهالوا .. هو انا لحقت .. دا هما 5 ساعات بس
قمر : يخربيتك واخدة العجلة بقالك 5 ساعات .. روحي يابت رجعيها للراجل واطلعي بدل ماانزلك
تونة : يووة ماتقولها حاجة ياعم سيد
سيد بيضحك : بصراحة ياقمر انتي غلطانة
تونة : ياحبيبي ياعم سيد
سيد : غلطانة انك بتدي تونة مصروف
تونة : ونعمة انت لو ماكنت راجل كبير كنت نزلت خزقتلك عينك ..
قمر بتضحك : يابت لمي لسانك دا .. يلا روحي رجعي العجلة بدل مااقول مش هتاخدي مصروف
تونة : ماشي ماشي ... والله ماناجايبة من عندك جلاطة تاني .. يلا بيب بيب بيببي
قمر وسيد بيضحكوا عليها
قمر : معلش ياعم سيد متزعلش منها لسانها طويل انت عارف
سيد : تونة دي سكرة الحتة والله ميتزعلش منها
قمر : ربنا يخليك ويديك الصحة ياعم سيد
______________________________________
نور : بابي حمدالله ع السلامة .. اومال فين زين
احمد : هيقعد ف الشركة شوية يخلص كام حاجة كدا وهيجي ..
نور : طيب هكلم عايدة اخليها تحضر الأكل
احمد : ماشي وانا هطلع انادي ع كريم
احمد خبط ع الباب ودخل
احمد : حبيب بابا عامل ايه
كريم بصله ودير وشه وكمل رسمه : ....
احمد بزعل : انا كنت جاي عاوزك تنزل تأكل معايا
كريم : ....
أحمد : هتفضل ساكت لحد امتي يابني .. وحشني صوتك نفسي اسمعه
كريم قام خد رسمته وراح عند ابوه ورهالوا وهو ع وشه الضيق والزعل
احمد بص ع الرسمة وهو مصدوم : انا قاتل ياكريم !
_____________________________________
ياتري ايه سبب سكوت كريم .. وايه الرسمة اللي صدمة احمد وليه بيقول ان هو قاتل .. هنعرف ف الاجزء الجاية تابعوا 💙
حكاية_قمر 🌜🤍
بقلم_ياسمين_علي ••
● الجزء الثاني ●
حكاية_قمر🌜💕
بقلم_ياسمين_علي ••
نسترجع مع بعض اخر أحداث الجزء اللي فات ...
احمد خبط ع الباب ودخل
احمد : حبيب بابا عامل ايه
كريم بصله ودير وشه وكمل رسمه : ....
احمد بزعل : انا كنت جاي عاوزك تنزل تأكل معايا
كريم : ....
أحمد : هتفضل ساكت لحد امتي يابني .. وحشني صوتك نفسي اسمعه
كريم قام خد رسمته وراح عند ابوه ورهالوا وهو ع وشه الضيق والزعل
احمد بص ع الرسمة وهو مصدوم
أحمد بحزن وصدمة : انا بنسبالك قاتل ياكريم.. انا يابني ليه عملت ايه علشان تشوفني قاتل .. انا مقتلتهاش ياكريم صح انا كنت اناني ف اختياري بس صدقني لو كنت اختارتها هي وسيبتك مكنتش هتسامحني !!
( طبعا مش فاهمين حاجة ..
من سنتين احمد كان واخد فريدة مراته وكريم يفسحهم .. وللاسف عملوا حادثة العربية اتقلبت بيهم وكان نص العربيه ع جبل عالي ... احمد قدر يخرج منها .. وكان قدامه اختيارين ياما يطلع فريدة الأول وف احتمال كبير العربية تقع و هي فيها كريم ياما يطلع كريم وبعدين ينقذ فريدة ... وهو اختار يخرج كريم الأول .. وكريم بيخرج من العربية سمع امه وهي بتقول "متسبنيش اموت يااحمد " واول لما خرج كريم ملحقش احمد وكانت العربية وقعت بفريدة وماتت وكريم من وقتها امتنع عن الكلام بأرادته )
"الرسمة عبارة عن الحادث اللي حصل وراسم ابوه وكاتب عليه قاتل "
أحمد : عمرها ماكانت هتسامحني لو كان جرالك حاجة ... انا اسف اني حرمتك منها واتحرمت انا كمان منها ... بس صدقني يابني انا مكنتش اقدر منقذكش ... لما تكبر وتبقى اب هتفهم ..
كريم بصله بصة لوم وغضب وراح عند الرسمة وجاب قلم وشخبط ع ابوه ف الرسمة
أحمد بصله بحزن وطلع من الاوضة .. وكريم جري ع السرير وحط رأسه تحت مخدة وفضل يعيط بحرقة
________________________________
ليل : خلصتي لك تعالي حطيلي اكل بقا
قمر : حاضر ياحبيبتي .. تأكلي وتحكيلي عملتي ايه وحصل ايه وقبلتي مين وحد كلمك ولالا واتعرفتي ع أصحاب جديدة ولالا ولو اتعرفتي اسمهم ايه و....
ليل : ايييه حيلك حيلك كل دا هيحصل ف يوم ... محصلش حاجة تتحكي اصلا.. ويلا بقا حطيلي اكل
قمر : ماشي ياليل بس هتحكيلي بردك
ليل : ااه ان شاء الله ويكون ف علمك بقا انا عاوزة انزل اشتري هدوم
قمر : انتي مش لسه جايبة فستانين
ليل : فساتين ايه بس مش هيكفوا كل يوم انا عاوزة اشتري حاجات تانية وميك اب وشنط وجزم
قمر : حيلك عليا ياليل شوية انتي شايفة اللي جاي ع قد اللي رايح
ليل : يعني عاوزني ابقا اقل من اللي ف الكلية
قمر : لا ياحبيبتي بس واحدة واحدة انتي عارفة ظروفنا وعربية الكبدة يادوب بتطلع مصروفنا اليومي
ليل بتتصنع الزعل : يعني تقصدي مش هتجبيلي حاجة ماشي ياقمر متجبليش خليني ابقا اقل منهم علشان ترتاحي و دخلت ع الأوضة
قمر بتكلم نفسها : يووة عليكي ياقمر كدا تخليها تزعل .. دي حتي ماكلتش .. ادخليلها قبل ماتنام هي ليها غيرك
قمر : ليل انتي نمتي
ليل : ....
قمر : هتنامي من غير اكل .. طب خلاص متزعليش .. هجبلك اللي انتي عاوزة .. بس اصبري شوية لحد مااقبض الجمعية من ام شلبي
ليل نطت من ع السرير بفرحة: بجد ياقمر يعني هتجبيلي كل اللي انا عاوزة
*قمر هزت رأسها بالموافقة *
ليل نطت عليها وقعدت تبوسها : ياحبيبتي ياقمر .. انا بحبك اوي
قمر بفرحة : هتوقعيني يخربيتك .. يلا بقا تعالي اكلي .. قبل ما الاكل يبرد
تونة : انا جيييييتتت
قمر : نورتي البيييييت .. يلا اغسلي ايدك علشان تأكلي يلا
_____________________________
نور : بابي انت منمتش
احمد قاعد مهموم : لا يانور ياحبيبتي.. انتي لابسة كدا ع فين
نور : عيد ميلاد ماجي انهاردة وعاملة بارتي ... وهنسهر للصبح
احمد : خليبالك من نفسك يا نور وحاولي متتأخريش ..
نور باسته : حاضر يابابي يلا باي .. ورجعت تاني خطوة .. بابي متزعلش من كريم ..
احمد : انا زعلان من نفسي .. ياريتني كنت انا مكان فريدة
نور : بعد الشر يابابي عليك .. تفتكر مامي الله يرحمها كانت هتبقا مبسوطة .. بكرا كريم يكبر ويفهم دا .. بس متضايقش انت عارف مش بحب اشوفك كدا
احمد ابتسم : حاضر ياحبيبتي .. يلا روحي الحفلة
نور : باايي
_______________________________
قمر : ليل قومي حمي اختك
تونة : لا انا مش عاوزة استحما ..
ليل : ومين قالك اني هحميكي اصلا ياجربانة انتي
تونة طلعت ع الكرسي ومسكت شعر ليل : انا شكتالك من الصبح وانتي عاوزة تتهزقي عاوزة تتهزقي .. وراحت عضت ليل
ليل : اااه ياعضاضة اوعي كدا
قمر : بااس انتي وهي .. تونة قولتلك مليون مرة اختك أكبر منك عيب ..
تونة بتدبدب ع الارض برجلها : كل حاجة تونة عيب تونة عيب وهي ايه .. دي عيشة تطهق والمصحف لاطفش
قمر : خدي هنا يابت متسرحيش بيا انجري ع الحمام انا اللي هحميكي ...
وانتي يا كبيرة يا عاقلة خفي شوية عليها
ليل : انا داخلة انام احسن
تونة : احسن بردك
ليل طلعتلها لسانها : كوبة
قمر : مولودين فوق رأس بعض يارب صبرني
______________________________
" ليل دخلت تنام وافتكرت الشخص الرزل اللي رخم عليها الصبح ف اول يوم ليها ف الكلية ... ليل بابتسامة : صحيح رخم .. بس لذيذ ... مسكت موبايلها وفتحت الفيس وعملت سيرش ع اسم اسر دياب .. وطبعا عرفت اسمه من الكتاب اللي كان معاه .. وبسهولة لقيته .. دخلت تتفرج ع صوره اللي اغلبها كانت مع صافي
ليل : مالها المعفنة دي لزقاله كدا ليه .. ليكونوا مرتبطين .. لا الحمدالله كاتب سينجل اهو ..
قفلت الموبايل وغمضت عينها .. : ياتري هشوفوا تاني ولالا ... وراحت ف الأحلام
________________________________
حكاية_قمر🌜💕
بقلم_ياسمين_علي ••
زين : ايه دا معقولة يابابا انت لسه منمتش .. احنا بقينا وش الصبح
احمد : مستني اخواتك
زين : أخواتي ليه فينهم
احمد : نور ف حفلة عيد ميلاد صاحبتها
زين : نعم !! لحد دلوقتي
احمد : قالت الحفلة هتقعد للصبح
زين : طيب انا هكلمها تيجي كفاية كدا .. والأستاذ آسر بردك سهران
احمد : الولد دا انا تعبت منه خلاص .. شوفلك حل معاه يازين انت اخوه الكبير .. فهموا ان اللي بيعملوا دا غلط .. لازم ينتبه لدراسته .. من ساعة مانجح ف الثانوية العامة ودخل الكلية اللي هو عاوزها .. وانا مبشوفهوش بينجح كل سنة يسقط .. وسهر وخروج وقرف .. كلموا يابني
زين : حاضر يابابا
احمد : انا مش عاوز اخسر عيالي كلهم .. كفاية واحد كرهني
زين : تقصد كريم .. هو ف حاجة حصلت ؟
احمد : مافيش يابني .. مافيش ومشي وسابه
زين بيكلم نور
زين : نور فينك كل دا .. معقول يانور تسهري برا
نور : ايه يازين انا جاية اهو ف الطريق ياحبيبي متقلقش
زين : ماشي خليبالك من نفسك .. وياريت متتكررش
نور : حاضر ياحبيبي باي
ايه دا .. لا لا مش وقتك تعطلي هنا .. اجبلك مين يصلحك دلوقتي ..
" نزلت من العربية وبتحاول تصلحها مش عارفة "
نور : اوف اعمل ايه دلوقتي .. والموبايل كمان فصل شحن ..قفلت العربية وحاولت تدور ع ميكانيكي يصلح لها العربية
_______________________________________
قمر : ليل .. ليل فوقي
ليل بنوم : ايه بقا عاوزة انام
قمر : ركزي معايا انا نازلة راحة مشوار كدا ع السريع مش هغيب .. خدي بالك من تونة
ليل بنوم : اخد بالي من مين دي هي اللي تاخد بالها مني .. دي زي القطط بسبع ترواح
"تونة بتتقلب لطشتها بالقلم ف عز نومها فوقتها "
ليل اتفجعت : ايه دا حصل ايه في ايه
قمر بتكتم الضحكة : مافيش حاجة .. نامي نامي
ليل كملت نوم .. وقمر خرجت
____________________________
نور شافت ولد صغير
نور : حبيبي تعالي .. أيوة انت
الولد : نعم
نور : حبيبي تعرف حد هنا بيصلح عربيات ولالا ..
الولد بيشاورلها : بصي امشي الشارع دا طوالي .. ف آخر الشارع هتلقي ميكانيكي
نور : ميرسي ياحبيبي
نور مشيت من الشارع فاضي وهي خايفة .. والحمد الله لقيت اتنين واقفين بعيد راحتلهم وهي مبتسمة وبتخبط ع ضهر الراجل
نور : لو سمحت فين الميكانيكي اللي هنا
واحد محشش لف وشه ليها : هاا .. ايه دا ايه دا هو احنا بليل ولا الصبح ولا ايه معقول القمر طلعلي الصبح .. انا مش مصدق نفسي .. اخبطني بحاجة ف دماغي ياقط .. عاوز افوق
قط : لا ياض فوق كدا وصحصح من الصنف الي شاربه دا .. واتفرج ع البونبونية .. انا مش لسه يلا قايلاك هتفرج .. اهي فرجة ياعم .. كنتي بتسألي ع ايه بقا ياحلوة .. عاوزة ميكانيكي .. تعالي اوصلك انا عارف مكانه
نور بترجع بضهرها وخايفة وبتعيط : لالا لا شكرا مش عاوزة .. و جريت وهي بتصرخ والقط وراها .. ومسكها
القط : لا شكر ايه بس هو احنا لسه قومنا بالواجب
نور منهارة : ارجوك سيبني ارجوك ... هديك اللي انت عاوزه .. بس سبني .. عربيتي برا خدها مش عاوزة بس خليني امشي ارجوك
القط : مانا هاخد كل اللي انا عاوزة تعالي .. وبيشدها وهي بتصرخ
قمر من بعيد : ياساتر يارب ايه صوت الصريخ دا جاي منين
القط فتح مطوة : اخرسي يابت بدل ماادفنك مكانك
نور بنهيارر : سااعدووني
المحشش : دي هتفضحنا ياقط خلص عليها
قمر : يخلص ع مين ياض يابن المبقعه منك ليه ... مين دي الله يخربيتكم انطقوا
القط : ست قمر مالكيش دعوة بالليلة دي مصلحة تخصني وهخلصها .. روحي ياما انتي طريقك اخضر
المحشش: اااه طريقك اخضر
نور : ارجوكي متسبنيش معاهم
قمر قلعت الشبشب : دانا هخلص عليكم انتو الجوز يابهايم الزرايب يا كلاب الشوارع انتو .. ونبي مانا سيباكم... ونزلت فيهم ضرب بالشبشب.. بتتكتروا ع واحدة ست يلمامة منك ليه ..صحيح هقول ايه ابن فوزية القرعة هيطلع دكتور ..
القط: اي اي خلاص بقا ياست قمر هنسيبها مش هنغتصبها بس تدينا فلوس
نور : هديكم اللي انتو عاوزينه بس سبوني
قمر : ولا مليم هياخدوا الجرابيع دول ولا مليم
المحشش : خلاص انا عاوز اغتصبها يا ست قمر
قمر نازلة ع قفا المحشش بالشبشب وبتديلوا بالدماغ : عاوز ايه يا ولا انطق .. بتقول عاوز ايه .. قول علشان اقطعلك لسانك
المحشش : اااه اااه خلاص يا ست قمر مش عاوز حاجة.. انا اسف ياستي وادي خدك ابوسو
قمر : باسك قطر ٦ الصبح يابعيد ...غور يلا انت وهو غور
ونزلت الشبشب تلبسه وبتعدل الطرحة: جتكم الهم عكرتوا مزاجي ع الصبح ... ولفت وشها ابتسمت ل نور
قمر : تعالي ياحلوة انتي متخافيش .. تعالي
نور : انا مش عارفة اشكرك ازاي .. انتي انقذتيني من المجرمين دول .. كانوا هيموتوني .. انا كنت خايفة منهم اوي
قمر : تخافي من مين دول عندنا بنديهم بالشبشب
نور ضحكت : مانا شوفت بعيني
قمر : تعالي طب نطلع عندي ف البيت واحكيلي ايه وصلك ليهم
نور باحراج : مش حابة اتقل عليكي بس انا كنت عاوزة ميكانيكي يصلح عربيتي
قمر : اولا ياستي الميكانيكي يفتح الساعة 10 واحنا لسه الساعة 7 ثانيا لما تيجي عندي مش هتتقلي عليا .. دي تونة وليل هيفرحوا بيكي اوي
نور ابتسمت : ماشي يلا
قمر : تنوريني والله
___________________________
احمد : عايدة .. يا عايدة
عايدة : اوامرك يابيه
احمد : حد من الولاد رجعوا
عايدة : محدش جه يابيه غير الأستاذ زين وطلع نام
احمد بقلق : ازاي يعني نور مرجعتش لحد دلوقتي !!
عايدة : لا يابيه مجتش
احمد : ازاي بس انا متأكد ان زين كلمها وقالت جاية ..يمكن مشوفتهاش اطلعي اتاكدي انها مش ف اوضتها
عايدة : حاضر يابيه هشوفها
احمد : بسرعة يا عايدة .. يارب استرها
______________________________
قمر : اتفضلي ياحبيبتي أهلا وسهلا .. والله نورتيني .. لا مؤاخذة بس البيت مكركب شوية
نور بابتسامة : انا اللي بعتذر والله اني جيت ف وقت زي دا
قمر : لا لا متقوليش كدا انتي تنوري ف اي وقت .. عن اذنك بس اصحي البنات
نور : اتفضلي
___________________________________
عايدة : مش موجودة يابيه ف اوضتها ولا ف الفيلا
احمد : دورتي كويس يا عايدة
عايدة : أيوة يابيه مافيش حد
احمد : هتكون راحت فين يعني
نجلاء : اهدي يااحمد بيه الغايب حجته معاه
( نجلاء مربية الأولاد وليها مكانه ف البيت ...والولاد بيحبوها جدا وبيسمعوا كلامها .. هي ف مقام امهم التانية )
احمد : اهدا ازاي يا نجلاء .. اهدا ازاي نور عمرها مااتأخرت كدا .. انا قلقان عليها اوي ..( اتعصب) .. وادي الموبايل كمان مقفول .. انا مش عارف اتصرف ازاي .. ومشي
نجلاء : خير يارب رجعها واحميها ..
______________________________
قمر : بت ياتونة .. انتي يابت اصحي ... ياليل يلا فوقي .. عندنا ضيفة قوموا
ليل : ضيفت مين احنا حد يعرفنا .. سبيني انام شوية قبل الكلية
قمر : قومي ياختي معاد كليتك قرب
ليل بخضة قامت : بجد .. بجد الساعة كام
قمر : معرفش قومي شوفيها لنفسك
ليل بتتمطع : ممم كنتي بتقولي حد عندنا مين جيلنا ع الصبح كدا
قمر : روحي اغسلي وشك وهعرفك عليها
ليل : ماشي
قمر : وانتي ياعم المقتول انتي اصحيلي .. انتي يابت انا عارفة انك صاحية .. بتهز ف تونة كأنها ميته مبتتحركش *فهمت انها بتستعبط* طب خلاص انتي شكلك نايمة بقا .. اصلي كنت عاوزة اديكي فلوس تجيب حاجات حلوة ليكي من عند عم سيد . *تونة فتحت عين وعين لا*
خلاص بقا مش لازم مالكيش ف الطيب نصيب
تونة نطت من ع السرير : انا صاحية اهو والله وبرقت عينها الاتنين .. اهو عيني مفتوحة اهو
قمر : مانا عارفة ياختي انك صاحية .. انزلي هاتيلي ماية معدنية وواحدة حاجة ساقعة ... يلا انزلي
تونة حطيت ايدها ف وسطها : لمين بقا الحاجة الساقعة ان شاءالله
قمر حطيت ايدها ف وسطها وضيقت عينها : للضيفة للي عندنا بقا ان شاءالله
تونة : يعني كنتي بتضحكي عليا ومش هتجبيلي حاجة حلوة
قمر : اه بضحك عليكي.. ويلا بلاش كتر كلام انزلي هاتي الحاجة.. لما اطلع اشوف البنية اللي برا
تونة : طاايب مااشي .. مااشي
قمر طلعت لنور
قمر : اهلا ياحبيبتي والله منورة
نور : ميرسي .. هو انا ممكن اطلب منك طلب
قمر : اؤمري ياحبيبتي
نور : انا عاوزة موبايل بس اكلم اخويا
قمر : من عنيا .. هااااتي يابت ياتونة الموبايل من تحت المخدة
تونة قالبة وشها وبتديها الموبايل: اتفضلي .. بتلف وشها شافت نور
تونة شهقة جامد : ايه دا ايه دا مشاءالله مشاءالله دي زي اللي بنشوفها ف التلافزيوه *وعمالة تمسك ف نور ف هدومها*
نور بتضحك وف نفس الوقت خايفة
تونة مسكت شعرها : الله دي نضيفة و بتسرح شعرها كمان ..
قمر شدت تونة وبتضحك : اتلمي بقا وانزلي هاتي الحاجة ومتغلسيش عليها
تونة : مش لما اعرف ياهانم مين اللي جاب بتوع التلافزيوه بيتنا .. هيييه اوعي ياقمر لتكوني هتبيعي نفسك لبتوع التلافزيوه ... لا ياختي انتي تتجوزي المعلم غدنفر احسن
قمر قلعت الشبشب ولسه بتحدفه تونة طلعت تجري تنزل : انا هطلع الغدنفرات كلها ع جتتك لما تجيلي
نور عمالة تضحك عليهم : لذيذة اوي
قمر بغيظ : اووي اووي
ليل : صوتك عالي ليه اكيد مع ام لسانين
قمر : قولي تلاتة اربعة ستة مش اتنين لا
ليل : طب مش تعرفيني بقا
قمر مبتسمة : دي ليل اختي ف كلية الهندسة .. ودي نور لسه عارفها من نص ساعة بس
ليل : عرفتيها ازاي بقا
قمر بتضحك : الواد القط هو والشمام اللي معاه كانوا خطفينها .. والعبد لله انقذها
ليل بتريقة : انقذتيها ازاي بقا يا سوبر وامان
قمر رفعت رجلها وبتشاور ع الشبشب : شايفة دا ولا مش مالي عينك .. تحبي تجربيه !
ليل ضحكت : لا ميرسي .. جربته كتير اوي
________________________
تونة بترقص : سيد ياسييد
سيد بيطبل : سيد ياسيد
تونة : ونبي ياعم سيد
سيد : سيد يا سيد
تونة : عاوزة حاجات ياعم سيد
سيد: سيد ياسيد
تونة : بسرعة ياعم سيد
سيد بيطبل : سيد ياسيد
تونة بترقص: عندنا ضيوف يا عم سيد
سيد : عندكم ضيوف غريبة يعني
تونة : بوظت الغنوة ونعمة ماهغني معاك تاني
سيد : خلاص ياستي متزعليش .. قوليلي بقا مين جيلكم
تونة بصيت يمين وشمال وقربت عليه : تعالي هات ودنك متخافش ..سيد قرب ودنو .
تونة : تووووووووووووووتت .. وقعدت تضحك
سيد : كدا ياتونة ماشي .. متكلمنيش تاني بقا
تونة بتضحك : خلاص خلاص آخر مرة خلاص تعالي هقولك
تونة بتبص يمين وشمال تاني
سيد : فيه ايه انتي متراقبة
تونة : ششش هات ودنك
سيد : خدي اهي وقرب عليها
تونة بتبص لودنه : انت كنت فيل وانت صغير ياعم سيد
سيد : يابت بطلي طوله لسان وانطقي
تونة وطيت صوتها خالص : اصل احنا عندنا بتوع التلااافزيوه
سيد : ايه مش سامع عالي صوتك
تونة بصوت عالي: عندنا بتوع التلاافزيوووه .. التلاافزيوووه
سيد : ايه التلفزيوه دا
تونة شاورت ع التليفزيون اللي عنده : ماهو عندك ياعم سيد التلافزيوه .. بتجيب حاجة متعرفش اسمها
سيد : اسمه تليفزيون ياتونة تليفزيون
تونة: هو تلافزيوووه .. انت اللي سمعك تقيل
سيد باستغراب : والله تصدقي فعلا ممكن اكون بسمع اسمه غلط .. المهم احكيلي ايه بقا عندكم بيعملوا ايه
تونة لميت كام شيكوتة من عنده و تفتح فيهم وتأكل : احكيلك بقا ياعم سيد عندنا بيعملوا ايه .. بس دا سر
سيد : احكي
_____________________________
نور : زين مش بيرد عليا
قمر : معلش ياحبيبتي يمكن مش واخد باله جربي تاني
نور : انا خايفة اكلم بابي وهو نايم اقلقه
قمر : اكيد هو قلقان دلوقتي ومش جايله نوم طلما انتي مش موجودة
نور : انتي شايفة كدا
قمر : أيوة طبعا كلميه
نور اتصلت بأبوها
احمد بلهفة : نور انتي فين يابنتي .. قلقتيني عليكي .. موبايل مين دا اللي بتتكلمي منه
نور عيطت : انا كنت هتخطف يابابي .. بس قمر انقذتني
احمد : ايييه .. ازاي دا حصل .. انتي فين قوليلي
نور : انا مش عارفة يابابي خد قمر تقولك
احمد : قمر مين.. الو ... نور روحتي فين
قمر : اطمن يااستاذ بنتك عندي ف الحفظ والصون .. ومحدش يقدر يقربلها
احمد : انا متشكر جدا يابنتي .. قوليلي انتو فين اجي أخدها
قمر : لا شكر ع واجب .. تعرف ال ******** اسأل ع الست قمر هيدلوك ع بيتي
احمد : أيوة أيوة.. مسافة السكة وهجيلكم
قمر : بالسلامة .. يلا سلام
ليل : اهدي خلاص باباكي جاي اهو
قمر : متعيطيش بقا ياحبيبتي خلاص حصل خير ... الله هو صحيح البت تونة اتأخرت ليه كدا
ليل : يمكن عم سيد قافل راحت حتة تانية
قمر : لا انا مسلمة عليه وانا نازلة وكان فاتح
______________________________
تونة ماسكة شيكولاتة وبتاكل فيها : قوم ايه بقا ياعم سيد ...
جعفر : ناولني علبة سجاير ياسيد .. ايه دا تونة انتي هنا .. ايه اللي ف وشك دا
تونة بقرف : دي شكلاطة تدوووق وبتحط الشيكولاتة ف وشها
جعفر : لا كليها انتي مش عاوز .. الا قوليلي يابت ياتونة هي اختك قمر عاملة ايه
تونة : عاملة محشي تأكل
جعفر : نفسي والله اكل محشي من ايدها
سيد بضيق: خد يمعلم طلبك .. حاجة تاني
جعفر : اه شوف تونة عاوزة ايه ع حسابي
سيد : متشيلش هم انت قمر محسباني ع طلب تونة .. خلي فلوسك
سيد : بتقطع برزقها ليه بس .. جاب شيكولاتة كبيرة وحطها قدام عين تونة زغللها .. خدي دي وسلميلي ع اختك
تونة شدتها منه : وهي كمان بتسلم عليك يامعلم غدنفر ... دي حتي مبتنمش طول الليل .. بتفكر فيك و ..
سيد بيبصلها ومبرقلها
تونة : طب روح انت ياغدنفورة وانا هبقا اجيلك .. ومشي
سيد بيبصلها ومبرقلها
تونة : ف حاجة ياعم سيد
سيد : مش عيب كدا ياتونة انتي عارفة اختك مبتطقهوش وانتي بتاخدي منه حاجة
تونة : انا ضحكت عليه وخدت الشكلاطة منه
سيد : هي يعني قمر حرماكي
قمر : يا عم سيد .. تونة فين ابعتها بالحاجة
سيد : حاضر ياقمر طالعة اهي ... خدي اهي الكيسة الي طلبتيها .
تونة : حطيت الماية المعدية
سيد : معدنية .. مانتي لو بتروحي المدرسة هتعدلي كلامك دا
تونة : ليه ماله كلامي
سيد : عامل حادثة .. خدي خدي ويلا روحي لأختك .. دانتي بهدلتي الدكانة
تونة : اهئ اهئ بتكرشني ياعم سيد ماشي ماشي
___________________________
احمد : بسرعة شوية يا سامح
سامح : اهدا يااحمد بيه .. مش كلمتك وطمنتك عليها
( سامح يبقا جوز نجلاء والسواق الخاص بتاع احمد الألفي.. بس احمد مش بيعتبروا سواق بس بيعتبروا صاحبه وبيحكيلوا ع كل حاجة مزعله علشان بيثق فيه)
احمد : قلقان بردك ياسامح المكان دا مينفعش نور تفضل فيه .. انا مش عارف ايه وداها لحد هناك.. انا خايف عليها اوي
سامح : مش بتقول ان الست اللي انقذتها كلمتك وطمنتك ان مش هيحصل لنور حاجة
احمد : أه بس مش هطمن غير وبنتي ف حضني .. سوق بسرعة انت بس
_____________________________
قمر بتفتح الباب شهقت : يامصبتي ايه اللي ف وشك دا
تونة : شكلاااطة
قمر : كل دا .. وايه اللي ف ايدك دا كله
*تونة ماسكة كيسة مليانة حاجات حلوة *
تونة : مش انتي قولتيلي اصحي ياتونة هاتيلك حاجات حلوة
قمر : كل داا .. ادخلي دانا هقطم رقبتك بس البت تمشي
"تونة بترجع شعرها المنكوش لورا ووشها كله شيكولاتة وماشية بألطة قدام نور وراحت قعدة وحطيت رجل ع رجل .. نور بتضحك علي الي بتعملوا "
ليل زقت رجل تونة : اقعدي عدل يامفعوصة
تونة جاية تقوم تنط علي ليل وليل استخبت ورا نور و قمر مسكت تونة : معلش امسحيها فيا انا ياغالية ..
تونة بعصبية : سبييني والله لقطع شعرها ف ايدي
قمر : خلاص انتي الكبيرة معلش عيلة وغلطت معلش
تونة هديت : ماشي علشان الست المحترمة اللي قعدة دي بس هسكت
نور بتضحك : ربنا يخليكي ياحبيبتي
الباب خبط
نور : دا اكيد بابي
قمر : روحي افتحي ياليل عبال مااجيب الحاجة الساقعة
ليل فتحت : اتفضلوا
احمد : فين بنتي .. نور
نور جريت حضنته : بابي .. كنت خايفة مشوفكش تاني
احمد : بعد الشر عليكي ياحبيبتي
سامح : حمدالله ع سلامتك يانور
نور : الله يسلمك ياعمو سامح
قمر : نورتوني والله ..
نور : هي دي قمر اللي انقذتني يابابي
احمد : مش عارف اشكرك ازاي ع اللي عملتيه والله .. * طلع شيك من جيبه* اتفضلي دا مبلغ بسيط انتي تستحقي
ليل فرحت
قمر بضيق : انا معملتش غير واجبي يااستاذ غيري كان هيعمل زي .. ونور بنتك زي أخواتي بالظبط .. الخير اللي عملته عاوزة يعود ليا فيهم .. تيجي تقولي خدي المقابل.. لا يااستاذ مش هقبل حاجة زي دي
*ليل قلبت وشها *
احمد : بس دا مش مقابل اعتبري هدية مني ...
قمر : متكملش يااستاذ انا مش هاخد حاجة .. انا هديتي اني اتعرفت ع الجميلة دي .. ربنا يحرسهالك ومتشوفش فيها حاجة وحشة ابدا
احمد : يارب يابنتي .. مش يلا بينا يانور
قمر : دي الحاجة الساقعة زي ماهي
احمد : مرة تانية معلش .. اتفضلي دا الكارت بتاعي احتاجتي اي حاجة .. اي حاجة متتردديش انك تكلميني
قمر خدت الكارت: ان شاءالله كل خير .. مع السلامة.. مع السلامة
بتلف وشها لقيت ليل قالبة وشها
ليل : انتي ازاي متاخديش منه الفلوس
قمر : متعودتش اخد من حد فلوس .. فلوسي انا اجيبها من نفسي
ليل : بس دا حقك بنته كان ممكن تموت وانتي لحقتيها
قمر : ربنا هو اللي بعتني ليها وانا معملتش حاجة غيراللي ربنا قدرني عليه .. يعني الفلوس مش حقي .. واقفلي الموضوع ع كدا بقا ياليل .. هاتي يابت ياتونة احسب الحاجات اللي جبتيها علشان احاسب عم سيد
ليل : هتفضلي معيشانا ف الفقر دا لحد امتا
قمر : فقر !!! انا معيشكي ف فقر ليه طلبتي ايه وقولتلك عليه لا .. دانا كل حاجة بعملهالك .. ماتردي
ليل : أيوة فقر انتي شايفة البيت اللي هيقع ع دماغنا دا .. كانت الفلوس دي ممكن تعمل حاجة
قمر : مااحنا طول عمرنا فيه عمرنا مااشتكينا من حاجة..
ليل : علشان مكنش معانا
قمر : ولسه زي ماحنا مافيش حاجة اتغيرت ياليل
ليل : كان حاجات هتتغير بس انتي كل حاجة ترفضيها ..
قمر : وانا رفضت ايه تاني
تونة : متحسبيش الشكلاطة دي دفعت حقها
قمر : وانتي جبتي حقها منين ؟؟
تونة : مش انا دا المعلم غدنفر دفع حقها وبيسلم عليكي
قمر ضربت ايدها ع صدرها : يلاهوي اهو دا اللي كنت خايفة منه .. بيلف عليكم واحد واحد ... ورحمة ستي مانا سايبه
______________________________________________
حكاية_قمر 🌛🥀
بقلم_ياسمين_علي••
نجلاء بتحضن نور : حمدالله ع سلامتك ياحبيبتي
نور: الله يسلمك يادادة .. اومال زين فين .. هو معرفش
نجلاء: لا ياحبيبتي هو نايم
احمد : آسر جه
نجلاء بتوتر : لا مجاش لسه
احمد بعصبية : مجاش اززييييي
*الجرس رن *
نجلاء : اجري ياعايدة افتحي
اسر : عايدة ونبي اعمليلي اي حاجة علشان دماغي هتتفرتك .. وهاتيها ع الأوضة
احمد : اهلااا .. اهلا بالصايع .. اللي بيسهرلي لوش الصبح .. لا وكمان جاي سكران
اسر : انا عاوز انام
احمد : استنى عندك .. فاكرها وكالة من غير بواب ولا ايه ..
نور : بابي خلاص سيبوا يطلع ينام
احمد : مافيش نوم .. هفضل لحد امتا شايفه بيضيع نفسه بنفسه كدا وانا قاعد اتفرج
اسر : والله اديك قولت بضيع نفسي .. مش بضيع حد غيري .. سبوني بقا براحتي
نجلاء : اتكلم عدل مع ابوك ياآسر
احمد : وانتي مستنية ايه من واحد بقا صايع زي دا ... انت فاكر ان اخبارك مش بتوصلي وحركاتك كلها عارفها
اسر : طبعا من الجواسيس اللي ممشيها ورايا تراقبني
نور : بابي خايف عليك ياآسر
اسر : اخرتها هتطلعوني انام ولا ايه
احمد : اخرتها تسيبك من القرف اللي انت فيه دا وترجع تاني لدراستك
آسر : وايه المقابل بقا .. هترجعلي امي اللي اتحرمت منها !
نجلاء: ايه اللي بتقولو دا ياآسر .. فريدة الله يرحمها عند ربنا دلوقتي .. ابوك بايده ايه يعملوا
*كريم واقف بيتفرج*
آسر بعصبية : كان بايده .. كان بايده وسابها تموت قصاد عينه.. علشان هو اناني مبيحبش الا نفسه وبس
*احمد ضربه بالقلم *
نور بتعيط : بابي ارجوك متعملش كدا
آسر بعصبية : انت بتضربني علشان بقول الحقيقة
احمد : الظاهر ان انا معرفتش اربيك كويس .. انا اناني وسيبت امكم تموت علشان انقذ اخوكم وبيشاور ع كريم .. مش بايدي عمرها كدا .. اعمل اييه حاوللت .. بتلموني ع حاجة مش بايديي ..
زين نزل يجري ع صوتهم
احمد بيشاور عليهم كلهم : كنتو فين انتو واختكم كانت هتضيع مننا انهاردة ؟؟ كنتو فين واحد نايم والتاني سهررران والتالت بيرسم ... كنتو مستنينها تضيع علشان تيجوا تلموني .. وتقولو انا السبب .. انت السبب انت ازي متنقذش اختنا .. صحح !!!
اسر مشي خالص ونور طلعت تجري ورا
زين : نور مالها حصلها ايه
احمد : اختك كانت هتتخطف وستر ربنا اتلحقت
زين : حصل ازاي دا
احمد : ناس طلعوا عليها وفيه واحدة لحقتها وهي دي اللي كانت عندها
زين : وطبعا اديتها فلوس مقابل انها أنقذت بنتك
احمد : أيوة اديتها فلوس و...
زين قاطعه بضحكة تريقة : وانت دخل عليك الحوار دا
احمد : قصدك ايه
زين : اقصد ان دا حوار بيتعمل اتنين يخطفوا وواحدة تنقذ وتبان انها بطلة ف الموضوع
نور : بس هي انقذتني فعلا وضربت اللي خطفوني
زين ضحك جامد : كمان ضربتهم لا دي تلقيها جامدة اوي
نور : انت بتتريق
زين : اومال بتكلم جد .. فوقي يانور دي ناس فاهمة وعارفة كويس اوي ازاي تنصب ع الناس بالطريقة.. انتي بس اللي متعاملتيش مع الناس دي وفاكرهم طيبين
نور : هما طيبين فعلا وقمر مش زي مانت بتقول قمر جدعة بجد . . انت بس علشان متعرفهاش بتقول كدا .. دول ناس جميلة اوي هي وليل وتونة
زين : تونة ! تصدقي جعت
نور : لو كانت هنا كانت كلتك بجد
زين : مين دي
نور : تونة
زين : انا طالع انام علشان انتي شكلك اتجنيتي
_______________________________
قمر عينها بتطق شرشر وجايه ع جعفر وهو قاعد
جعفر: اهلا بست الكل .. حاجة ساقعة يلا للست قمر
قمر حدفت الشيكولاتة ف وشه : لو فاكر انك بفلوسك الحرام هتعرف تأثر ع أخواتي يأثروا عليا تبقا غلطان .. انت لو آخر راجل ف العالم ولا حتي هبص ف وشك .. حط الكلمتين دول حلقة ف ودنك وافتكرهم قبل ماتحاول تقرب ليا او لحد من اخواتي .. فاهم ومشيت
جعفر بعصبية : شوووووووووقي
شوقي: اوامرك يامعلمي
جعفر : نفذ اللي قولتلك عليه .. الليلة
شوقي : حاضر يامعلمي
____________________________
قمر رجعت بتبرطم : كنت نقصاك انا ع الصبح ياجعفر الكلب انت .. قال هاتولها حاجة ساقعة .. دانا عاوزة اشرب قهوة ع روحه ان شاءالله
ليل بتسقف : برفوا .... روحتي ضربتيه ولا هزقتيه
قمر : ونبي ي ليل ابعدي عن دماغي انا فيا اللي مكفيني
ليل : عرفتي بقا ان كل فرصة تجلنا ترفضيها
قمر : انتي تقصدي ايه ؟
ليل : اقصد الشيك اللي مردتيش تاخدي .. وجعفر اللي بترفضيه وهو هيموت عليكي وقادر يعيشنا عيشة احسن من دي
قمر : انتي اتجنيتي عاوزة تبيعيني لجعفر علشان تعيشي عيشة احسن .. طب هتعيشي العيشة الاحسن ازاي دا فلوسه كلها حرام
ليل : مين قالك انها حرام .. دا معلم وتاجر كبير
قمر : ف المخدرات ياحبيبتي بيتاجر ف المخدرات .. عاوزني اتجوزه .. بلاش دي عاوزني ارمي نفسي مع واحد أكبر مني ومتجوز مرتين
ليل : مش احسن ماتتجوزي واحد بلطجي
قمر : وليه اتجوز دا ودا مااتجوز الاحسن منهم
ليل : وانتي فاكرة ان هيجيلك دكتور يعني ..
قمر عينها اتملت دموع : انتي شايفة ان انا مستحقهوش الدكتور .. عندك حق انا واحدة طالعة من الإعدادية مكملتهاش حتي .. وببيع كبدة .. هيجيلي دكتور ليه .. دانا احمد ربنا ع المعلم ان هو قبل بيا .. عندك حق
ليل : انا مقصدش اللي فهمتي ياقمر
قمر : لا انتي صح ياليل انتي صح .. انا نازلة بقا اشوف عربية الكبدة .. عن اذنكم
ليل : انا مكنش قصدي ازعلها ..
تونة بصيت لليل ونزلت ورا قمر
تونة : انتي بتعيطي
قمر مسحت دموعها بسرعة : بس ياهبلة اعيط ايه... مبعيطش
تونة حضنت قمر : متزعليش انتي جميلة وهتتجوزي واحد جميل زيك .. وهي نجوزها لغدنفر المعفنة دي
قمر : عيب ياتونة وبعدين انا مش زعلانة منها هي بس .. انا زعلانة منك انتي كمان بتاخدي منه حاجة ليه
تونة شهقت : انا اخد منه حاجة محصلش دا هو اللي اتحايل عليا وانا اقولو لا راح حطهالي ف الكيسة وانا مش واخدة بالي
قمر : كنتي خدتيها ورمتيها ف وشه .. ولا كنتي خزقتيلوا عينه ... اشمعنا دا مبتفتحليهوش دماغه
تونة شاورت ع عيونها : من عيوني وجت تمشي
قمر مسكتها: راحة فين
تونة : راحة اخزقلوا عينه زي ماقولتي
قمر ضحكت وحضنت تونة وتونة حضنتها
ليل : قمر انا اسفة.. والله مكنش قصدي كدا
تونة : لا خاصم خاصم ياكتكوت مش هنكلمك احنا الاتنين
قمر : هنصالحها المرة دي بس
تونة: لاا
ليل : علشان خاطري ياتونة
تونة : علشان خاطرك لا لا مش لا واحدة
قمر : طب علشان خاطري انا
تونة : علشان خاطرك بس .. غير كدا كنت هقصلها شعرها وهي نايمة
ليل جريت حضنتهم وقمر ف النص حضناهم ومبسوطة: يارب يخليكم ليا وميحرمني منكم ابدا
ليل : يارب .. انا اروح الكلية بقا .
قمر: خليبالك من نفسك ياحبيبتي
ليل : حاضر .. يلا باي
______________________________________
سارة : ايه دا بصي دا آسر جاي
صافي بفرحة جريت حضنت آسر : مش معقول .. انا كنت فاكرة مش هتيجي
آسر: ايه اللي بتعملي دا انتي مش واخدة بالك اننا ف كلية ولا ايه
صافي : في ايه ياحبيبي .. عادي يعني
أسر : لا مش عادي ومتتكررش
سارة: مالك ياآسر انت زعلان من حاجة
اسر : مافيش هو وليد لسه مجاش
سارة : مظنش ان هو يجي هو كان سهران معاك
اسر : انا كلمته ف السكة وقالي جاي
صافي : اهو جاي
آسر بيبص شاف ليل وهي شافته وديرت وشها
وليد : مالك ياعم قلقتني .. حصل ايه
صافي بقلق : في حاجة يا آسر
آسر: اه اتخانقت مع ابويا و هاجي اقعد عندك يومين
وليد : تنورني ياصاحبي
صافي : اتخانقت مع اونكل ليه
آسر: علشان مهمل ف دراستي
سارة : طيب ماهو عنده حق
وليد وصافي بصلها
سارة: متبصوليش انا بقول الصراحة آسر لازم يركز السنادي
وليد : لا وانتي يابت بتطلعي الأولي كل سنة .. ماكلنا بنسقط
سارة: مانا هركز انا كمان وعندي الحل
الكل : ايه
سارة : شايفين البنت اللي هناك دي
الكل بص وليل شافتهم وهما بيبصلها واستغربت وبصيت ف الكتاب تاني
آسر : مالها
سارة : البت دي شوفتها ف كذا محاضرة مبتعملش حاجة غير انها بتكتب كلام الدكاترة ومركزة جدا وشكلها دحيحة وهتنفعنا ...
وليد : هتذاكرلنا يعني
سارة : ليه لا او تدينا الي بتكتبوا
صافي بتريقة: هنجيب عيلة تذاكرلنا بقا
سارة : انتي خسرانةايه مش عاوزة تنجحي
صافي : اه جدا بابا مواعدني يسفرني لو نجحت
سارة : يبقا تسمعوا الكلام
صافي : هتعملي ايه
سارة : هجيبها تقعد معانا ونتصاحب
صافي : لا طبعا متبقاش صاحبتنا
وليد بتريقة : علشان متبقاش ف واحدة احلي منها ف الشلة
صافي : دييي احلي مني انا ..
سارة : خلاص طلما واثقة ف نفسك هجيبها
صافي بغيظ : ماشي
سارة: ممكن اتكلم معاكي
ليل: اتفضلي
سارة : انا اسمي سارة وانتي
ليل : وانا ليل
سارة : بصي ياستي دول صحابي وكلنا بقالنا سنتين بنعيد سنة اولي .. محتاجين مساعدتك
ليل: وانا هعملكم ايه يعني
سارة : انتي بتكتبي ورا الدكاترة كل حاجة صح
ليل: اه
سارة : دا الي احنا عاوزينه اللي بتكتبيه بس ..
ليل بصيت لآسر : موافقة بس عندي شرط
سارة : شرط ايه
ليل قامت : نتعرف عليهم بعدين اقول شرطي
سارة باستغراب : ماشي تعالي
سارة : ليل ياجماعة وافقت
صافي: اسمها ليل
ليل : اه عندك اعتراض ع الاسم
وليد : لا اتفضلي انا وليد .. ودا آسر ودي صافي
سارة : ها قولي بقا شرطك
الكل : شرط ايه
صافي: هي كمان هتتشرط من اولها
ليل: ايه مش عجبك .. ؟
صافي بغيظ : لا مش عاجبني
ليل: شايفة الحيطة اللي هناك دي .. عارفة هتعملي ايه صح
صافي : شايفة مجايبك ياست سارة
وليد : استهدوا بالله يجماعة ..
آسر : ايه هو شرطك
ليل: تعتذرلي ع اللي عملتوا انبارح
صافي : لا دا انتي اتجنيتي رسمي بقا .. مين انتي علشان آسر يعتذرلك اصلا
آسر بص ل ليل : انا اسف حاجة تاني
ليل اتصدمت مكنتش متوقعة السرعة دي : لا خلاص كدا .. كل يوم حد يجي ياخد مني المحاضرات يصورها .. عن اذنكم
صافي واقفة مصدومة : انت ازاي تعتذرلها بسهولة كدا
آسر : علشان مصلحتنا .. وانا غلطت وبعتذر
صافي : من امتا آسر الألفي بيعتذر لحد دانت عمرك مااعتذرتلي ..
آسر : علشان انا مغلطش قبل كدا علشان اعتذرلك
صافي : وانت عملتلها ايه بقا ان شاءالله
آسر : بقولك ايه انا مش عاوز صداع .. انا قايم
وليد: انا جاي معاك
صافي واقفة متغاظة : بصي بيمشي ويسبني ازاي
سارة : يابنتي اهدي بيقولك متخانق وسايب البيت تنكدي عليه اكتر
صافي : صح عندك حق .. انا نسيت .. بسبب الزفتة دي عصبتني .. هكلموا اصالحه
___________________________
قمر : بت ياتونة مالك قعدة بتنامي ع نفسك ليه كدا .. اطلعي نامي فوق يلا
تونة : لا مش بنام .. انا هقعد معاكي
قمر : لا اطلعي نامي وانا هخطف رجلي بسرعة اروح المشوار اللي كنت راحة الصبح دا ..
تونة بنوم : ماشي هطلع انام
قمر باستها : مش عاوزة حاجة اجبهالك وانا جاية
تونة : اه تفاحح
قمر : عيوني ليكي تفاح وعنب كمان
تونة : هييييييه
قمر : .. يلا ياحبيبتي انا ماشية خليبالك من نفسك .. سلام
____________________________
آسر ركب هو ووليد العربية
وليد: ليل واقفة اهي
آسر ماشي بالعربيه لغاية عندها
آسر نزل راحلها : تعالي نوصلك
ليل : لا شكرا اتفضل امشي انت
آسر : شكلك مقبلتيش الاعتذار
ليل : لا قبلته بس
آسر: بس ايه مستنية حد
ليل: اه مستنية
آسر : حبيبك ؟
ليل: لا طبعا ... انا مستنية .. مستنية السواق بتاعي هيجي يوصلني مينفعش امشي من غيره علشان بابا ميزعقليش ... اهو جه .. يلا سلام
راحت ركبت العربية (اوبر طبعا)
آسر : سلام وركب عربيته ...
وليد : لو صافي شافتك كانت قتلتك
آسر ضحك : لو بقا .. ومشوا
______________________________
حكاية_قمر🌜💕
بقلم_ياسمين_علي ••
قمر راجعة وماشية فرحانة وبتكلم نفسها : دي البت تونة لما تعرف اني جبتلها مانجا كمان .. هتفرح مش بعيد من فرحتها تخزقلي عيني ..
بتدخل الشارع لقيت زحمة والناس بتجري
قمر وشها قلب : ياساتر يارب في ايه
عربي جاي يجري : الحقي ياست قمر
قمر : فيه ايه يخربيتك اخبارك كلها سودة في ايه انطق
عربي : البيت بعربية الكبدة بيولعوا ياست قمر ومحدش عارف يطفيها
قمر : يلااااهووووووي البيت بيولع .. افتكرت ان تونة طلعت تنام .. رميت الحاجة اللي في ايدها وطلعت تجري
وعاوزة تدخل البيت والناس بيمسكوها
سيد : رايحة فين ياقمر استني هتموتي نفسك
قمر بتصرخ : سبووني فتووون جواا ... بنتي جوا
___________________________________
حكاية_قمر 🌜💕
بقلم_ياسمين_علي ••
تعليقات
إرسال تعليق