 |
● الجزء التالت ●
حكاية_قمر 🌜💕
بقلم_ياسمين_علي ••
نسترجع اخر أحداث الجزء الي فات ..
عربي جاي يجري : الحقي ياست قمر
قمر : فيه ايه يخربيتك اخبرك كلها سودة في ايه انطق
عربي : البيت بعربية الكبدة بيولعوا ياست قمر ومحدش عارف يطفيها
قمر : يلااااهووووووي البيت بيولع .. افتكرت ان تونة طلعت تنام .. رميت الحاجة اللي في ايدها وطلعت تجري
وعاوزة تدخل البيت والناس بيمسكوها
سيد : رايحة فين ياقمر استني هتموتي نفسك
قمر بتصرخ : سبووني فتووون جواا ... بنتي جوا ...ابعدووا عني ...
سيد بيعيط : اهدي يابنتي .. هتدخلي فين البيت كله مولع
قمر بتصرخ وتعيط : محدش ليه دعوة سبوووني انا هلحقهااا .. وبتحاول تبعد الناس عنها ...
عربي بيبص لبعيد : الحقي ياست قمر تونة راكبة العجلة ورا عم شكشك ...
الناس كلها بتبص : فينها .. فينها
عربي : اهي جاية ..
قمر قامت تجري عليها حضنتها وبتعيط : انتي كويسة .. انتي مكنتيش جوا ..الف حمد وشكر ليك يارب .. الف حمد وشكر ليك يارب
سيد : حمدالله ع سلامتك ياحبيبتي
تونة بتعيط : بيتنا بيولع ليه كدا .. مين ولعوا ياعم سيد ..
سيد : والله يابنتي مااعرف انا كنت بتغدي مشوفتش حاجة
" قمر حاضنة تونة ومش بتتكلم "
ليل جايه تجري عليهم : ايه اللي حصل يا قمر ... ازاي حصل كدا للبيت
قمر خدت تونة وليل ومشيت بيهم بعيد عن البيت وقعدوا ع رصيف ف الحارة .. والمطافي جت تطفي
______________________________
وليد : .. ماترد عليها يابني بدل ماهي عمالة تتصل كدا
آسر : مش رادد عليها
وليد : يمكن عاوزك ف حاجة مهمة
آسر : بزمتك صافي بتقول حاجة مهمة ف حياتها
وليد : بصراحة لا بس رد بردك
آسر: لا يعني لا .. اهي قفلت خلاص
وليد بيبص ف موبايله : قفلت عندك وبترن عليا .. انا هرد عليها
آسر: براحتك
وليد : ايه ياصافي في حاجة
صافي بعصبية : مبتردش ع مكالمتي ليه يازفت انت وفين آسر
وليد : انتي لسه متصلة دلوقتي
صافي : اااء متتوهش ع الموضوع فين آسر عاوزة اكلمه
وليد بص لآسر : عاوزة تكلمي آسر
آسر شاورله يقولها نايم
وليد: آسر نايم .. كان سهران انتي عارفة ..
صافي : صحيه يكلمني
وليد : اصحيه
آسر بصله بغضب
وليد : لا مش هينفع بصي انا لما يصحا هخليه يكلمك .. ماشي يلا سلام يا صافي
آسر : انسانة معندهاش دم
وليد : بتحبك يااسر وانت عارف كدا كويس
آسر : هي عارفة اننا صحاب وبس.. لو ف بالها حاجة تانية دي متخصنيش .. واقفل السيرة دي انا مش ناقصها كفاية ابويا .. ولا اروح اقعد ف اوتيل احسن
وليد : لا ياصاحبي خليك .. مش هتكلم عنها خلاص
آسر: احسن بردك
وليد : مقولتليش بقا عملت ايه مع ليل .. علشان تعتذرلها
آسر : موقف كدا هبقا احكيلك عنه بعدين.. بس انا هنام دلوقتي علشان زي ماقولتلها .. انا سهران ومنمتش .. يلا تصبح ع خير
وليد : وانت من اهله
____________________________
ليل : هنعمل ايه دلوقتي ياقمر .. هنروح فين
قمر : مش اتبطرتي ع البيت الصبح اهو راح .. ارتاحي بقا
ليل : يووة ياقمر عليكي .. خلينا ف
المهم هنعمل ايه ..
قمر : العمل عمل ربنا بقا
ليل : طب عاوزة افهم دا حصل ازاي وانتي كنتي فين.. ولما انتي بتقولي للظابط انك كنتي قافلة الأنبوبة قبل ماتمشي والموضوع مجاش من عربية الكبدة .. اومال مين عمل كدا بس
جعفر : لا اله الا الله ايه اللي حصل دا مين عمل كدا بس .. قلبي عندك ياست قمر
قمر : ياريتك جبتي سيرة حاجة عدلة .. وقامت وقفت قصاد جعفر
قمر : عاوز ايه يامعلم .. مش عملت اللي ف دماغك .. ايه جابك
جعفر : جاي نوسيكي .. ونشوفك لو عاوزة حاجة كدا ولا كدا .. انا ف الخدمة
قمر : طيب اوووي انت يامعلم جعفر .. *وعليت صوتها اكتر* لا وابن اصوووول كمان ..
*الناس واقفة تتفرج *
وجاي تشوفني محتاجة حاجة .. طبعااا بعد ماولعتلي ف بيتي ... هحتاج بيت اقعد فيه انا واخواتي .. قووم ايه بقا .. اجيلك راكعة واترجاك .. واقولك يامعلم اتجوزني وانتشلني انا واخواتي من الشارع .. مش هوووو داا اللي كنت بتفكر فيه يامعلم ... *عليت صوتها اكتر* ماتررررردد
جعفر بارتبارك : ايه اللي بتقوليه دا ياقمر ... معقولة انا اجي ع بنت حتتي ... للدرجادي شايفني وحش
قمر : وحشش لا سمح الله دانت ساووو
شوقي : ماتحسبي ع كلامك ياست انتي .. فوقي وانتي بتكلمي المعلم جعفر
قمر : اخرس انت خالص .. بدل ماانزل الشبشب ع قفاك وأخلي اللي مايشتري يتفرج عليك
شوقي بعصبية : انتي اتجننتي يابت انتي
سيد : عيب ياشوقي اللي انت بتعملوا دا مع واحدة ست .. عيب اختشي
شوقي : اقعد ياراجل انت ع جنب احسنلك
جاي يزق سيد قمر وقفت قصاده زقت ايده : عاوز تمد ايدك ع راجل قد ابوك يانطع .. ياعديم الرجولة
شوقي : وامد ايدي عليكي انتي كمان
قمر بعصبية وداخلة تضربه وليل وسيد مسكوها : تمد ايدك ع مين يللا .. دانت ارخص من الشبشب اللي هديك بيه ع دماغك
ليل : خلااص ياقمر اهدي ونبي
تونة : شيلني ياعم سيد اخزقلوا عينه الجدع الطويل دهو
ليل : اسكتي انتي متقومهاش اسكتي
شوقي : بقولك ياست انتي خدي اخواتك .. وطرقينا من هنا روحي ارمي بلاكي ف حتة تانية
جعفر بتصنع العصبية : اخررس يللا لما تكلم الست قمر تكلمها عدل .. دي ستك وست الحارة كلها
شوقي : مانتش سامع يامعلمي اللي بتقولوا .. ماهو انا مش هقف اتفرج وهي نازلة تخبيط واتهامات فينا ف وسط الحارة كدا
جعفر : مالكش دعوة انت .. كلامها معايا انا .. *وبص لقمر* لما انتي بتقولي ان انا اللي ولعتلك ف بيتك .. مشتكتنيش ليه للحكومة .. ولا جاية تتهميني كدا وخلاص .. وتكرهي الحارة فيا
قمر : لهو انت فاكرني بتهمك انا متأكدة ان انت اللي ولعت ف البيت ... واه مبلغتش عنك الحكومة .. عارف ليه.. علشان حقي هرجعه بدرااعي ياجعفر ... ورحمة الغالين ياجعفر لدفعك تمن اللي عملتوا غالي انت والكلب بتاعك دا
جعفر : وانا مستني .. وشد شوقي اللي هيموت ويضرب قمر ... امشي قدامي
قمر : غوروا جتكم غورة ... حسبي الله ونعم الوكيل فيكم ..
ليل : اوفف اخيرا مشووا ... هنعمل ايه دلوقتي ياقمر .. هنروح فين
سيد : تروحوا فين وانا موجود ازاي الكلام دا ..
قمر : لا ياعم سيد انا مش عاوزة اجبلك مشاكل انت عارفه دا راجل شراني مش بعيد لو خدتني عندك .. تصحا تلقي مولع ف دكانتك انت كمان
سيد : وانا مش هخاف وحقي عند ربنا
قمر : كتر خيرك ياعم سيد .. بس انا مش هقبل ان يعمل كدا فيك .. هو عمل كدا علشان ألجأ ليه هو مش لحد غيره
سيد : طب و هتروحي فين طيب
قمر : مش عارفة والله ياعم سيد .. انا هطلع البيت اشوفوا
ليل : تطلعي فين دا البيت فحمة
قمر : مش عارفة يا ليل مش عارفة
سيد : طيب بايتو انهاردة عندي والصباح رباح
تونة : ماتخلصونا بقا من الليلة دي عاوزة انااااام
قمر ملقتش حل تاني : ماشي ياعم سيد .. امري لله .. منك لله ياجعفر .. منك لله
___________________________________
نعمة : حمدالله ع سلامتك يا فاروق بيه
فاروق : الله يسلمك يانعمة .. حضري العشا ونادي ع هدي وصافي
( فاروق الكيلاني .. شريك الألفي ويمتلك عدة شركات اخري خارج مصر .. ويكون والد صافي وسائر وزوج هدي )
نعمة : اومرك يابيه
_______________________________
حكاية_قمر 🌜💕
بقلم_ياسمين_علي ••
قمر بتغطي تونة وهي نايمة وبتفكر هتعمل ايه
ليل : سرحانة ف ايه
قمر : ف اللي حصلنا .. فجأة كدا كل حاجة تروح.. دانا مصدقة قدرت اقف ع رجلي ..
ليل : هتعملي ايه طيب
قمر : هو دا اللي تاعبني .. انا قولت لعم سيد اننا هنقعد انهاردة بس عنده .. ومش هينفع اقعد اكتر من كدا.. بس هروح بيكم فين .. مش عارفة .. راسي هتنفجر من التفكير
ليل : انا عندي الحل
قمر : وواقفة كل دا وساكتة انطقي ايه هو
_____________________________
هدي : فاروق انت رجعت امتا .. مقولتليش يعني
فاروق : لسه راجع وهستقر هنا ف مصر خلاص مافيش سفر تاني
هدي : طب وشركاتك مين هيديرها ف غيابك ..
سهر : حمدالله ع سلامتك .. كدا متقولش انك راجع
( اخت فاروق من ام تانية .. عندها 29 سنة .. كانت مسئولة عن شركات الكيلاني داخل مصر .. ياتري هتفضل فيها ولالا ؟ )
فاروق : كويس انك جيتي ع السيرة ياسهر
سهر بقلق : خيير يا فاروق
فاروق : بصي ياسهر انتي عارفة انا بثق فيكي قد ايه .. والحاجة دي مش هأمن حد غيرك عليها . .. علشان كدا انا قررت انك انتي اللي هتديري شركاتي اللي برا مصر
سهر : ايييه !
هدي بفرحة : طيب الحمدالله انك هتستقر هنا.. دي صافي هتفرح اويي
فاروق : انا تعبت من الغربة وآن الأوان ارجع ابقا ف وسط عيالي
سهر : تبقا ف وسط عيالك وترميني انا هناك لوحدي ؟
فاروق : انا مش هلقي غيرك اثق فيه
سهر : بس انا مش عاوزة اسافر انا مرتاحة هنا
فاروق بعصبية : وانا مش بخييرك دا قرار .. تحضري حاجتك كلها وتسلميلي كل حاجة تخص الشركات هنا.. علشان خلال شهر هتكوني مسافرة
سهر : وانا قولت مش هسافر .. شوفلك حد غيري يمسك شركاتك ...مش هغيير مسار حياتي كله .. علشان قرارك .. كفاية قرارات بقا كفاية .. ومشيت
فاروق : هتنفذي الي بقولك عليه ورجلك فوق رقبتك
هدي : اهدي يا فاروق الامور دي تتاخد بالعقل
فاروق : عقل ايه بس . . عاوزني ادخل ناس غريبة تديير مالي .. ليه وهي راحت فين
هدي : واحدة واحدة واقنعها .. ماهي عندها حق بصراحة يا فاروق . . اكيد يعني مش ف يوم وليلة تغير حياتها كلها وتسافر
فاروق : اهي عندك اقنعيها انتي ... صح هي فين صافي .. مجتش تسلم عليا يعني
هدي : من ساعة مارجعت من الكلية حابسة نفسها ف الأوضة ... واللي يقرب لها تزعق وتقول سبوني لوحدي
فاروق : ليه مالها
هدي : معرفش ممكن تكون متخانقة مع آسر
فاروق : انا مش فاهم ايه سر حبها ف الولد دا
هدي : ماتسيبها تحب اللي تحبه كمان بنتك هتختارلها .. مش كفاية مش راحم اختك
فاروق : ماشي هسيبها علشان خاطر عيونك ..
_________________________________
ليل : فين الكارت اللي ابو نور عطهولك
قمر طلعت الكارت من البوك : اهو ليه ماله
ليل : هو دا الحل
قمر بصيت للكارت باستغراب : دا الحل ازاي يعني
ليل : لا ركزي معايا .. هو مش ابو نور قالك لو احتاجتي اي حاجة كلميني ! .. يبقا هو دا الحل بس مش هنكلموا احنا هنروحلهم البيت .. ونقولهم ع اللي حصل .. يمكن يرجعلك الشيك .. او يجبلنا شقة نعيش فيها
قمر : لا طبعا .. انا قولت مش هاخد مقابل اللي عملتوا ابدا.. انسي ياليل انسي
ليل : طب هتعملي ايه دلوقتي
قمر : مالكيش دعوة وادخلي نامي
ليل : تصدقي انا غلطانة .. اتصرفي انتي بقا يام العُريف
____________________________________
سيد : انتي لسه منمتيش يا نجية
نجية : انام ومين يجيلوا نوم ياسيد بعد اللي عملتوا .. انا صاحية طول الليل عيني ع الدكانة ..
سيد : ربنا الحامي يا نجية
نجية: ونعمة بالله ياخويا .. بس ربنا مقالنش نرمي نفسنا ف التهلكة ياسيد ..
سيد : عاوزني اقف اتفرج واشوف قمر وأخواتها مرمين ف الشارع يعني .. انتي ناسية قمر وقفت جنبنا قد ايه
نجية : فاكرة وعارفة ياخويا .. ومقولتش حاجة ع قمر .. بس انت كمان افتكر انك عندك عيال عاوزين يأكلوا ويشربوا ... وهو مصدر رزق واحد بس واحد بس اللي حلتنا الدكانة داهي ... ولو جعفر عرف ان قمر هنا .. هيولع فيها ومش بعيد يولع فينا احنا كمان
سيد : ايه اللي بتقولي دا ياولية اسكتي .. لحد منهم يسمعك
نجية : هسكت ياسيد هسكت .. بس لو قمر صحيت وقالت انا ماشية اوعا تمسك فيها .. انا بقولك اهو ياسيد
سيد: استغفر الله العظيم واتوب اليه
_____________________________
قمر : اصحي ياتونة .. اصحي ياليل .. فوقوا يلا
تونة بتتمطع وبتبص حواليها : هو احنا فين
قمر : احنا عند عم سيد انتي فقدتي الذاكرة ولا ايه ..
تونة بتهرش ف رأسها : هاا .. ونامت تاني
قمر : قومي طب انتي ياليل .. فوقي يلا
ليل : في ايه هو احنا لحقنا نمنا
قمر : يلا هنمشي
ليل : هنروح فين
قمر : قومي وهقولك يلا .. تونة ياتونة .. ياحبيبتي قومي
تونة صحيت : انا فين
قمر بعصبية : لا انا مش فايقلك قوومي قدامي
تونة : حاضر اهو قايمة
قمر : خشوا تشوا وشكم بماية بسرعة يلا
سيد : ع فين ياقمر .. مالسه بدري يابنتي ..نجية بتزغده
قمر : هنمشي بقا ياعم سيد كفاية كدا كتر خيرك
سيد : وليه مستعجلة.. طب هتروحي فين
قمر : متقلقش انا كلمت واحدة من معارفنا القدام .. وهنروحلها لحد مانشوف حل للبيت دا
سيد بزعل : طيب يابنتي .. اجي اوصلك
قمر : لا يا عم سيد تشكر .. خليك انت .. يلا يابنات .. مع سلامة ياعم سيد .. مع السلامة يا خالتي نجية
نجية : مع السلامة ياحبيبتي
تونة جريت حضنت سيد : هتوحشني ياعم سيد .. مش عارفة هلقي مين غيرك احور عليه
سيد ضحك : وانتي كمان هتوحشني شقاوتك .. خليبالك من قمر ومتزعلهاش
تونة : حاضر
قمر : يلا ياتونة
سيد : سلام يابنات .. خلي بالكم من نفسكم .. سلام
نجية : ماهي طلع لها معارف اهي .. اومال كنت بتقول مالهاش حد ليه
سيد بصلها ودمع : مالهاش حد يانجية مالهاش حد ... ومشي وهو بيقول .. ليه بس كدا يا نجية ليه
نجية باستغراب : ماله الراجل دا
______________________________
قمر : يلا اركبو
ليل : هي مين قريبتنا دي اللي هنروحلها .. هو احنا لينا قرايب
قمر : لا
ليل : اومال ايه اللي قولتيه لعم سيد دا
قمر : علشان يسبنا نمشي من غير ما يحس بالذنب
ليل : ماحنا كنا كدا كدا ماشين النهاردة ايه لازمة نزلولنا الصبح كدا
قمر : علشان خالتي نجية تعرف تنام وهي مرتاحة
ليل : وهي مكنتش عارفة تنام ف وجودنا يعني .. داحنا كنا كلنا ف أوضة صغيرة
قمر : اه ياليل وجودنا مش مريح ليهم .. خايفة احسن جعفر يولع ف الدكانة .. وعندها حق ودا اللي قولتو لعم سيد بس هو اللي صمم .. وانا مكنش لازم اسمع الكلام
ليل : شوفتي الخير اللي بتعملي مع غيرك بيتردلك ازاي !
قمر : الخير اللي بعملوا عند ربنا
ليل : طب واحنا هنعمل ايه دلوقتي . . ومودينا ع فين كدا
قمر : هتعرفي لما نوصل
_______________________________
عايدة : صباح الخير يا احمد بيه
احمد : صباح الخير ياعايدة .. حد من الولاد صاحي
عايدة : أيوة يابيه ومستنينك ع الفطار
احمد : طيب اعمليلي قهوة
عايدة : حاضر يابيه عن اذنك
احمد : صباح الخير يا ولاد
نور : صباح الخير يابابي ..
احمد : اومال فين زين
نور بتأكل : مش عارفة والله يابابي .. تقريبا بيجري
احمد : و آسر مرجعش
نور : لا .. قالي هيقعد عند وليد
احمد : خلي وليد ينفعه ..
زين : ايه النشاط دا صاحين بدري .. *وراح عند كريم وحضنه* صباح الخير يا حبيبي
كريم بادله الحضن وابتسامله
( كريم اكتر اتنين قريبين ليه فريدة وزين )
احمد : اقعد كل يازين .. صح فاروق بيه رجع وهيدير شاركاته بنفسه
زين بيأكل : طيب ما يديرها انا اعمله ايه
احمد : ماهو هيسفر سهر تدير شركاته اللي برا
زين اضايق : ازاي يعني .. وسهر وافقت
احمد : مالك اتضايقت ليه
زين : متضايقتش بس انا مرتاح ف الشغل مع سهر
احمد : امممم لو مرتاح اوي كدا .. اكلمهولك يخليها تفضل هنا
زين : وفاروق هيوافق
احمد : اكيد هيوافق .. لما يعرف انك عاوز تتجوزها
زين : نعععم !!
احمد : ايه مالك اتضايقت ليه
زين : انت عارف رأي ف حوار الجواز دا يابابا .. ولو سمحت مش عاوز اتكلم فيه
احمد : خلاص ع راحتك .. انا قولت اساعدك .. مقولتليش يانور عاملة ايه انهاردة..
نور : كويسة يابابي .. بس تعرف انا وحشتني قمر وتونة وليل اوي
احمد : باين عليهم بنات اصول والله .. هما فين اهلهم
نور : مش عارفة والله يابابي .. بس تقريبا قمر هي الي مربياهم
زين : اه تلقيها مسئولة عنهم وبتسرحهم
نور : ايه الكلام الي بتقولو دا يازين .. دي اختها ف كلية الهندسة
زين : بقول الحقيقة.. تقدري تقوليلي شوفتي كارنية اختها انها ف هندسة ؟؟
نور : لا
زين : شوفتي بقا .. انتي ليه مش عاوزة تفهمي انكم اتضحك عليكم من واحدة نصابة
نور: النصابة دي هي اللي انقذتني .. ياريت الناس كلها تكون زيها
زين : انقذتك وخدت عمولتها
احمد : مين قالك انها خدت عمولتها
زين : حضرتك قولت انك اديتها فلوس
نور : ومخدتهاش
زين باستغراب : ازاي !
احمد : زي ماسمعت كدا عرضت عليها مبلغ ومخدتهوش .. شوفت بقا انك كنت ظالمهم ازاي ..
نور : بابي هو انا ينفع ابقا ازورهم
زين : لا طبعا ازاي تروحي المكان دا تاني
احمد : نور انا اه متعاطف معاهم بس مرواحك هناك لا .. لو حابة تشوفيهم هبقا ابعت سامح يجيبهم ها ايه رايك
نور حضنت ابوها : ياحبيبي يابابي.. موافقة طبعا
زين : لا انتو اكيد بتهزاروا .. انتو هتدخلوا ناس زي دي البيت
نور : تاني يازين
زين : لا تاني ولا تالت ... انا قايم اللبس
_________________________________
حكاية_قمر 🌜💕
بقلم_ياسمين_علي ••
ليل : احنا رايحين فين وايه الڤيلال دي كلها..
قمر ماشية تايهه : ونبي مانا عارفة انا ماشية صح ولا غلط ... وطلعت الكارت من البوك .. اسمها فيلا الألفي
ليل بفرحة :ايه دا انتي هتودينا عند نور
قمر : مافيش حل تاني .. استني لما نسأل حد
ونبي يااخ متعرفش فين فيلا الألفي
الراجل : حضرتك شايفة السور اللي هناك دا .. هو دا سور الفيلا
قمر : تشكر ياخويا
.. يلا يا بنات
تونة : انا جعاااانة .. واكلووني
ليل بتريقة : انا جعاانة .. واكلوني ... ايه علطول همك ع بطنك كدا
تونة : اهئ اهئ عاوزة اكل .. هموت منكم اكلووونيييعع
قمر : ششش اسكتي هتفضحينا .. اصبري هجبلك اكل .. لما نشوف الأول هيحصل ايه
تونة : اهئ اهئ اهئ اهئ
البواب : انتي راحة فين ياست انتي
قمر : مش دي فيلا الألفي
البواب : أيوة فيلا الألفي .. انتي داخلة لمين
قمر : انا عاوزة الأستاذ احمد
البواب: واقولو مين
قمر : قولو الست قمر هيعرفني
البواب : ماشي خليكو هنا متتحركوش لحد ماارجع
قمر : حاضر
______________________________
احمد : هتخرجي انهاردة يانور
نور : لا يابابي انا هقضي اليوم انهاردة مع كيمو
احمد ابتسم : طيب خليبالك منه .. انا رايح الشغل
نور : مش هتستنا زين
عايدة : احمد بيه .. خليل بيقول ان في اتنين برا ومعاهم عيلة صغيرة وبيقولو عاوزين يقابلوك
احمد : مقالش مين دول
عايدة : بتقول انها اسمها الست قمر
نور نطت بفرحة : قمر برا .. دخلوهاا بسرعة مستنين ايه ..
احمد : بلغي خليل خلي يدخلهم
عايدة : حاضر يابيه
_____________________________
خليل : اتفضلوا
قمر وليل وتونة دخلوا وع وش ليل وتونة الانبهار بالمكان
تونة شهقت مرة واحدة : دا بالبلسييين ... عاوزة انزل البلبسين يااقمررررر .. ونبي ونبي
قمر بتشدها : بس ياتونة عيب كدا
تونة : انط نطاية ... انط نطاية ونبي ونبي
ليل : ماتبس بقا بلاش فضايح .. انتي المفروض كنا سبناكي ف الحارة
قمر : اسكتي ياختي انتي كمان .. خلينا نشوف اللي جايين نعملوا
نور طلعت تجري عليهم حضنتهم: مش مصدقة انتو جيتوا .. انا مبسوطة اوي .. كنت بقول لبابي عاوزة اروح عندكم .. انتو وحشتوني
احمد : اهلا اهلا البيت نور .. اتفضلوا
قمر : منور باصحابه
احمد : عايدة شوفيهم يشربوا ايه .. اتفضلوا
قمر : يزيد فضلك والله يااستاذ احمد .. انا عارفة زمانكم بتسألوا نفسكم ايه سر الزيارة دي
نور : لا طبعا انتو تيجوا ف اي وقت
قمر : تشكري ياحبيبتي.. بس بردك انا هدخل ف الموضوع علطول
احمد : اتفضلي
تونة لمحت السفرة عليها اكل مشيت براحة من جنبهم وراحت طلعت ع الطربيزة نفسها .. وقعدت تأكل وتوقع ع هدومها .. وكريم بيبصلها باستغراب و قرف
تونة لاحظت وجود كريم : مالك ياض بتبصلي كدا ليه ..
كريم بصلها بقرف وقام طلع ع اوضته
تونة : بيبصلي كدا ليه ياخواتي .. ليكون معجب بيا .. رجعت شعرها المنكوش لورا وضحكت .. اه والله بصت اعجاب دي ..وكملت اكل
قمر : دا كل اللي حصل
احمد : ياساتر يارب وهو الراجل دا عمل كدا ليه
قمر : علشان رفضت أن يتجوزني
نور : الحيوان .. بابي انت لازم تسجن الراجل دا
قمر : استني بس يانور انا لو عاوزة اسجنه .. كنت قولت للحكومة ان هو اللي ولع ف البيت
احمد : طب معملتيش كدا ليه
قمر : يومه هيجي بس مش دلوقتي ... المهم انا كنت جاية قصداك ف خدمة
احمد : انا تحت امرك .. اي حاجة عاوزها
قمر : الأمر لله .. بص يااستاذ انا كل اللي محتاجة مكان انام فيه انا واخواتي بعيد عن جعفر الكلب دا أوضة صغيرة نقعد فيها ... انا عندي استعداد اشتغل هنا ف البيت اساعد وانضف واللذي منه لحد ماارجع البيت زي ماكان ..
* ليل بتسمع وهي متغاظة من كلامها ازاي تقول كدا *
نور : ايه اللي بتقوليه دا بس ياقمر
احمد : طيب اسمعيني انا ف اللي هقولو دا .. انا مقدر ان انتي مش عاوزة تاخدي فلوس غير من تعبك .. بس انتي ليكي جميل عندي فوق رأسي انتي انقذتي بنتي . . وانا جه عليا الدور .. انا عندي استعداد اجبلكم بيت برا .. بس طلما حياتك مهددة من اللي اسمو جعفر دا .. ف خليكم هنا معانا .. وانا هبعت عمال يرجعوا بيتك زي الأول واحسن
*ليل ونور فرحوا*
قمر : بس اصل ..
احمد : لا بس ولا حاجة اسمعي الكلام ..
قمر : بس انا خايفة نضايقكم هنا
احمد : اذا كان علينا احنا ياستي مش هنتضايق من وجودكم .. المكان كبير ويكفينا وزيادة اوي .. بس لو كان ف مضايقة ليكم انتو .. ف استراحة برا هتعجبكم جدا لو حابين تكونوا فيها ع راحتكم .. ها كدا كويس ؟
قمر : انا مش عارفة اشكرك ازاي
احمد : مافيش شكر ولا حاجة .. استأذن انا بقا علشان الشغل.. وانتي يانور خليكي معاهم
نور : دول ف عنيا يابابي .. تعالوا بقا اوريكم الفيلا ..
تونة بتحط ايد ع بطنها المنفوخة من الاكل وبتضحك : انا عندي نونو ف بطني .. وخدت لقمة كبيرة ع بقها.. وقامت تنزل من ع الطربيزة اتكعبلت ف الأطباق وقعت والاطباق وقعت اتكسرت
قمر : ياساتر يارب في ايه .. بتبص حواليها .. فين تووونة
الكل جري لقوا تونة واقفة والاطباق متكسرة حواليها
قمر وليل ونور واقفين مصدومين
تونة : انا كنت نازلة لوحدي .. هما اللي جم ورايا وضحكت .. معجبين بيا
___________________________
وليد : اخيرا صحيت ..
آسر : اه في حاجة ولا ايه
وليد : صافي قرفتني مكالمات طول الليل .. بقالها ساعة مرنتش تقريبا نامت
آسر : احسن بردك
وليد : ماتكلمها ياآسر مش هتخسر حاجة ..
آسر : ماشي .. انت هتروح الكلية انهاردة
وليد : كلية ايه انا لسه منمتش
آسر : اومال مين هيجيب المحاضرات من ليل
وليد : هكلم سارة تروح تاخدهم
آسر برد سريع: لا خلي سارة انا هروح
وليد برفعة حاجب : ايه
آسر : ايه في ايه.. يعني هننزل سارة مخصوص .. وكمان علشان مقعدش لوحدي انت بتقول هتنام
وليد : اه بحسب
آسر : ظالمني انت دايما
وليد : انت ياخبر
__________________________________
قمر : انا مش عارفة اقول ايه يانور .. انا اسفة والله
نور : متتأسفيش الحمدالله ان تونة سليمة
ليل : دي زي القردة ميحصلهاش حاجة
تونة جريت تعض ليل من رجلها .. وليل تصرخ وقمر ونور بيحوشوا وصوتهم علي .. زين نزل يجري ع الصوت
ليل : اوعيي ياعضاضة ..ابعدوها عنااااايي ... خلاص انا اسفة.. انا اسفة
قمر مسكت تونة ونور مسكت ليل
تونة : سبيني عليها ياقمر ..
ليل : يلا يامعفنة يلا منكوشة
تونة : اعاااا بتغلط ف تسريحتاااييي .. ونعمة لحط صوبعي في عينهاااا
زين بزعيييق : بااااااااس ... اييه اللي بيحصل هنا
الكل بص وتنح ..
تونة برقتله وصفرت : ياحلاوة بتوع التلافزيووه .. نزليني يا قمر بسرعة
زين : انتو مين وبتعملوا ايه هنا ... مين دول يانور !!!
نور بارتباك : اااء طيب روحوا انتو خليل هيوصلكم .. وانت يازين تعالي هفهمك
زين : تفهميني ايه بقولك مين دول .. ويروحوا فين
نور شدته : تعالي نتكلم جوا طيب .. تعالي
قمر ملامحها اتغيرت واتضايقت وحسيت أن وجودهم مش الكل هيتقبلوا
تونة : شوف البت خدت الواد من وسطنا ازاي
خليل : هتفضلوا واقفين ولا ايه .. اتفضلوا
قمر : حاضر .. يلا يابنات
_____________________________
زين : ممكن تفهميني بقا .. مين دول .. وبيعملوا ايه هنا
نور : دي قمر وأخواتها
زين : قمر مين .. اااه البطلة اللي انقذتك ... ايه جابها هنا
نور بارتباك : جت علشان...
زين : علشان ايه ؟
نور : اصل هي كانت في حاجات كدا حصلت و...
زين : ماتتكلمي علطول
نور : بصراحة كدا يازين قمر وأخواتها هيعيشوا معانا
زين : نعمممم !!!!!
________________________________
صافي نايمة باهمال والموبايل ف ايدها رن .. قامت مفجوعة
صافي بفرحة : دا آسر .. ردت.. أيوة ياآسر.. فينك كل دا من امبارح .. كنت عاوزة اكلمك .. انا اسفة اوي ياآسر لو زعلتك ... قولي انت فين واجيلك
آسر : اهدي في ايه .. انا مش زعلان منك اصلا
صافي : اومال مكنتش عاوز تكلمني ليه
آسر : كنت نايم .. انتي كنتي بتكلميني عاوزة حاجة
صافي : اه عاوزة اشوفك ياآسر .. تعالي نقضي اليوم مع بعض
آسر : لا مش هينفع انهاردة .. انا ف الكلية
صافي : بتعمل ايه هناك
آسر : روحت اخد المحاضرات من ليل
صافي بعصبية : قول كدا بقا مش عاوز تقابلني .. علشان ست زفتة ليل
آسر بعصبية : والله انا نازل علشان المحاضرات اللي اعتذرت بسببها انبارح .. مش علشان ليل
صافي : طيب خلاص متزعلش .. خدت منها المحاضرات
آسر : مش لقيها اصلا شكلها مجتش
صافي : اه من اولها بقا هتغيب
آسر : معاكي رقمها طب اشوفها فين
صافي : كمااان عاوز رقمها
آسر : خلاص ياستي مش عاوز حاجة .. اقفلي يا صافي .. اقفلي
صافي بتنفخ وبتحدف الموبايل : وبعدين بقا ياآسر .. هتفضل كدا لحد امتا
_________________________________
زين : هيعيشوا ازاي مش فاهم ..
نور : يازين بيتهم ولع امبارح و ..
زين ضحك جامد : لا جامدة بجد القصة بيتهم ولع ومش لاقين حتة يقعدوا فيها وساعدينا يانور داحنا انقذناكي انبارح ... ونور زي الهبلة صدقت
نور بعصبية : انا مش هبلة ياا زين .. مش زنبي انك شايف كل الناس وحشة ..
زين : انتي متعرفيش الناس اساسا علشان تعرفي تحكمي عليهم اذا كانوا وحشين ولالا
نور : ولا انت تعرفهم .. صدقني لما تعرفهم هتغير رايك .. انا اعرفهم من انبارح بس والله حسيت بدفي وسطيهم غريب ..
زين : يابنتي دول ناس متمكنة ف الحاجات دي .. الناس دول مينفعش تثقي فيهم.. وازاي تسمحيلهم يعيشوا هنا ..
نور : انا واثقة في كلامهم .. ع العموم بابا هيتاكد من حوار بيتهم دا .. لو البيت مولعش هنعرف .. ساعتها يكون ليك حق تتكلم
زين :هو بابا كمان عرف
نور : هو اللي قالها هتقعد معانا هنا .. لحد مايجددلهم بيتهم
زين : ياحلااااووة ... البيت اتجنن اقسم بالله
___________________________
ليل : المكان هنا حلو اوي .. بس هنحتاج نجيب هدوم بدل اللي اتحرقت طبعا
تونة : البيت اتحرق اهئ اهئ اهئ
ليل حضنتها : خلاص ياتونة متعيطيش بقا .. اهو احنا ف بيت احسن
تونة : الشكلاطة والجلاطة و الحاجات الحلوة كلها ولعت ياليل اهئ اهئ اهئ
ليل زقتها : غوري يابت من قدامي
تونة : غوري انتي
قمر سرحانة ومبتتكلمش
ليل وتونة بصوا لبعض
ليل : دي سرحانة ف ايه دي
تونة: اقطع دراعي من هنا اهوت ان مكانت بتفكر ف الموز
ليل : بس يابت اسكتي .. قمر .. يااااااقمر .. ياااقمررررر
قمر بخضة : في ايه يا ليل بتزعقي ليه .. انتو كنتو بتقولو حاجة
ليل : انتي مش سمعنا كل دا
قمر : عاوزة ايه
ليل : مالك مش مبسوطة ليه
قمر : وايه اللي يبسطني .. بيتنا ولع وشق عمري راح.. والشارع وجيرانا وحبايبنا ... كل دول راحوا ف غمضة عين .. وحياتنا اتشقلبت .. وبقينا لجأين عند الناس .. بعد ماقولت انا مباخدش مقابل جدعنتي .. اديني خدته اهو .. كل دا و مش عاوزني ازعل ولا حتي أفكر فيه
ليل : انتي نسيتي حاجة مهمة سبب ف انك تفرحي .. ان رغم كل حاجة راحت .. احنا لسه مع بعض .. تفتكري لو واحدة فينا كانت جوا البيت كنتي هتزعلي عليها ولا ع البيت
قمر : لا يا ليل متقوليش كدا .. انا كل لما افتكر ان تونة كانت ممكن تكون جوا .. احس ان قلبي بيتشال من مكانه .. بعد الشر عنكم .. يارب مشوفش فيكم حاجة وحشة ابدا
ليل : يارب ياحبيبتي .. ممكن بقا تنبسطي كدا احنا مع بعض .. وتونة اهي زي القردة معانا
تونة : هاااااا
ليل : اقصد زي الغزالة معانا .. زي النسمة معانا .. ملاك يااخواتي ملاك
قمر ضحكت : ربنا يخليكوا ليا .. الحمدالله ان محدش منكم جراله حاجة
ليل : احم طيب استأذن انا بقا علشان هروح الكلية
قمر : ماتخليكي انهاردة ياليل
ليل : لا مش هينفع كفاية ف محاضرة راحت عليا .. يلا عن اذنكم
_______________________________________
في الشركة
زين : ادخل
سهر : زين عاوزة كل الملفات اللي تخصني هنا لو سمحت
زين : تمام .. شكلك زعلان في حاجة
سهر : يعني انت معرفتش ان فاروق قرر يسفرني
زين : طيب ماترفضي عادي .. اكيد مش هيجبرك
سهر : لا هيجبرني يازين .. انت متعرفهوش .. طول عمره بيجبرني ع كل حاجة
زين : طيب اهدي .. انا هخلي بابا يكلموا متزعليش نفسك
سهر : ياريت يازين حد يكلموا .. انا مش عاوزة امشي من مصر .. انا عاوزة افضل جنبك
زين بعد واتضايق
سهر : اقصد جنب كل اللي بحبهم انت ونور وفاروق وصافي .. مش عاوزة ابقا لوحدي ف غربة
زين : متقلقيش يا سهر هخلي بابا يحاول ولو اضطريت اكلم فاروق بنفسي هكلموا ..
__________________________________
آسر : وليد انا زهقت
وليد : انت متأكد يابني .. انها مش موجودة ف الكلية
آسر : أيوة يابني ودخلت المحاضرة مش موجودة .. هي شكلها مش جاية .. انا همش .... ايه دا استنا .. دي جت اهي .. اقفل اقفل
آسر راحلها : ايه آخرك كدا ياليل
ليل اتخضت : انت كنت مستنيني ولا ايه
آسر : انتي نسيتي الاتفاق
ليل : لا فاكرة بس متوقعتش ان انت اللي تيجي يعني
آسر : عادي محدش منهم فاضي .. اتضايقتي ولا ايه
ليل : لا وهضايق ليه يعني
آسر : تعالي نقعد ف الكافية طيب لحد معاد المحاضرة
ليل باستغراب : انت هتحضرها
آسر : اه
ليل : غريبة يعني
آسر: هي ايه اللي غريبة
ليل : انك تحضر اومال عاوزين تاخدوا المحاضرات ليه مني
آسر : ماهو انا مش هحضر كله دا علشان زهقان بس .. قولت اجي .. المهم انتي جاية متأخر ليه
ليل : بتسأل ليه
آسر : عادي يعني مش بقينا أصحاب .. وبعدين انتي فوتي محاضرة
ليل : غصب عني والله معلش
آسر : حصل ايه طيب
ليل : للاسف حصل حريقة ف بيتنا امبارح
آسر : بجد طب حد حصله حاجة ..
ليل : لا الحمدالله انا واخواتي كويسين
آسر: وباباكي ومامتك ؟
ليل لسه هتقول ان ابوها وأمها مايتين اصلا افتكرت انها كدبت عليه
ليل: لا اصل بابا وماما عايشين برا وانا عايشة مع أخواتي
آسر : بيشتغلوا يعني
ليل : اه اه بيشتغلوا
آسر : طيب انتو قعدين فين دلوقتي
ليل : احنا روحنا قعدنا عند عمي ف الفيلا بتاعته
آسر : طيب كويس .. فينها الفيلا دي
ليل : ف **********
آسر : بجد انا ساكن هناك .. حلو علشان لما تحبي تروحي اوصلك .. انتي ف فيلا ايه بقا
ليل : فيلا الألفي..
آسر : ايه ؟؟
_________________________________
( ليل عارفة ان ابوها وأمها ماتوا متعرفش انهم عايشين ورامينهم )
ياتري ايه رد فعل آسر لما يعرف انها بتكدب .. هنعرف ف الأجزاء الجاية تابعوا ❤️
حكاية_قمر🌜
بقلم_ياسمين_علي••
● الجزء الرابع ●
حكاية_قمر 🌜💕
بقلم_ياسمين_علي ••
نسترجع أحداث الجزء اللي فات مع بعض
آسر : طيب انتو قعدين فين دلوقتي
ليل : احنا روحنا قعدنا عند عمي ف الفيلا بتاعته
آسر : طيب كويس.. فينها الفيلا دي
ليل : في *******
آسر : بجد انا ساكن هناك .. حلو اوي علشان لما تحبي تروحي اوصلك .. انتي في فيلا ايه بقا
ليل : فيلا الألفي
آسر : ايه ؟؟
ليل : ايه تعرفها !!
آسر بإنكار : اه اه اعرفها طبعا دي فيلا قريبة من فيلاتنا
ليل بابتسامة : طب كويس
آسر : مقولتليش بقا تشربي ايه
ليل : لا مش وقته علشان منتأخرش ع المحاضرة
آسر : طب روحي انتي وانا هعمل مكالمة وجاي وراكي
ليل : ماشي
( آسر مستغرب ازاي بتقول ع ابوه عمها وهو مالهوش عمام اصلا !! )
اتصل بزين
آسر : زين عامل ايه
زين : اهلا اهلا .. بالبيه اللي سايبنا ف القرف ومشي
آسر قلق اكتر : ليه حصل ايه ؟
زين : البيت اتجنن خلاص وبقا لا يطاق ..
آسر: فاهمني طب حصل ايه
زين : ابوك ونور جايبين ناس من الشارع تعيش معانا ف الفيلا .. انت لازم ترجع علشان نشوف حل للموضوع دا
آسر : من الشارع ازاي.. انا مش فاهم حاجة
زين : هحكيلك.....
_______________________________
نور بتخبط الباب : احم احم ممكن ادخل
قمر : طبعا يانور ... دا بيتك ياحبيبتي اتفضلي
نور : عاملة ايه بقا .. مرتاحة ف المكان دا ولا تخليكي معانا .. جوا
قمر : بيني مابينك يانور انا حاسة اني مش مرتاحة ف وجودي وحاسة اني تقيلة كدا .. انتو كتر خيركم والله اذا كان انتي ولا استاذ احمد ربنا يبارك ف عمره .. بس حاسة ان باقي البيت مش هيتحملونا .. متعودتش اكون تقيلة ع حد .. انتي فاهمني يانور
نور : فاهماكي ياقمر بس صدقيني انتو مش مضايقنا خالص والله .. بالعكس انا حاسة ان البيت هيكون ليه روح بوجودكم بعد ما بقا مطفي من وقت موت ماما ..
قمر : ربنا يرحمها ياحبيبتي .. بس انا اسفة يعني ف اللي هقولو .. بس اخوكي شكل روحه ف مناخيره وحاسة مش طايقنا خالص
نور بتضحك: زين فعلا روحه ف مناخيره وعصبي دايما .. بس طيب اوي والله .. هو بس علشان لسه متعاملش معاكم لو اتعامل هيحبكم زي مانا اتعاملت معاكم وحقيقي.. انتو ناس جميلة اوي
قمر : دا من ذوقك ياحبيبتي والله .. الا صحيح كنت عاوزة اسألك ع حاجة
نور : اتفضلي
قمر : انا من ساعة ماجيت وانا شايفة اخوكي الصغير قاعد لوحده مش بيتكلم مع حد ..
نور بصيت ع كريم بزعل : لا كريم مبيتكلمش اصلا
قمر : ياحبيبي اخرس ربنا يشيل عنه
نور : لا مش اخرس بس هو منع الكلام عن نفسه من وقت موت ماما
قمر : ياحبيبي يظهر كان متعلق بيها اوي .. طب مودتهوش لدكتور
نور : راح لدكاترة كتير اوي وكلهم اجمعوا ع ان النطق متوقف عليه هو .. لما من نفسه يحب يتكلم هيتكلم
قمر : طب هو انا لو قعدت معاه وكدا عادي
نور : هو عادي بس هو مش هيرد عليكي مهما عملتي
قمر : نجرب مش هنخسر حاجة
نور : ياريت والله ياقمر دا بابا هيفرح اوي لو كريم رجع اتكلم
قمر : بإذن الله يانور قولي يارب
نور : يارب
_______________________________
ليل : كل دا بتتكلم
آسر : اه في حاجة
ليل : لا مافيش
آسر : ماشي
ليل : هو انت عندك اخوات
آسر كان هيقول افتكر اللي هيعملوا : لا معنديش
ليل : عايش مع مامتك وباباك بس
آسر : مامتي متوفية..
ليل اتضايقت : انا اسفة فكرتك بيها
آسر بعصبية : ومين قالك اني نسيها اصلا
ليل : مش قصدي كدا .. انا اقصد
آسر : مش عاوز افهم قصدك ايه .. ركزي الدكتور جه
ليل بصيت باستغراب ايه يخلي يقلب فجأة !!
___________________________________
تونة : انا زهقت .. عاوزة انزل بالبسين
قمر : اقعدي هنا متتحركيش من جنبي كفاية المصيبة اللي عملتيها الصبح الله يباركلك
تونة : ماليش دعوة عاوزة انزل بالبسين
قمر : مافيش نزول يعني مافيش نزول فاهمة ولالا
تونة حطيت ايدها ف وسطها ونفخت : طااايب هتشوفي
_________________________________
هدي : خير يا صافي بتلبسي وراحة فين
صافي : راحة اقابل آسر ياماما عاوزة حاجة
هدي : انتو اتصالحتو
صافي : احنا من امتا بنتخاصم اصلا .. آسر مبيعرفش يزعل مني ..
هدي : ياسلام اومال كنتي متجننة علينا ليه امبارح .. وابعدوو عني محدش يدخل الأوضة.. كان علشان ايه الجنان دا كله
صافي بتضحك: علشان مكلمنيش .. بس طلع كان نايم واول لما صحا كلمني
هدي : طيب ياحبيبتي ربنا يهديكم
صافي : يارب ياماما .. اسيبك انا بقا علشان متاخرش عليه .. بااااي
هدي : باي يامجنونة
______________________________
ليل : ممكن اعرف ايه سبب تغيرك فجأة دا ..
آسر : ولا حاجة بس المكالمة ضايقتني شوية
ليل : لو حابب تحكيلي عادي احكي هسمعك..
آسر بصلها بنظرة استغربتها : قريب هتعرفي
صافي شافتهم من بعيد اتغاظت بس كتمت غيظها وراحت سلمت ع آسر وحضنته
صافي : وحشتني اووي يابيبي .. لو مكنتش جيت شوفتك كان هيجرالي حاجة .. وبصيت لليل : هااي ليل
ليل باستحقار : هااي
آسر واقف هينفجر من اللي صافي عملته بس مش عاوز يحرجها قدام ليل
ليل بصيت لآسر : المحاضرات معاك .. عن اذنكم ..
صافي بتريقة : متخليكي شوية يالولو ملحقتش اشبع منك
ليل مردتش عليها
آسر : استني هوصلك
صافي بصيتله بغيظ
ليل : لا شكرا خليك .. ومشيت
آسر زق صافي بعدها عنه وشدها من ايدها وركبها العربية وركب
آسر بعصبية : انا قولتلك ايه مليون مرة.. مبحبش طريقتك دي انتي ايه مبتفهميش
صافي : ياسلام بقا وانت عاوزني اشوفك معاها واسكت يعني
آسر : لا ازاي تعملي حركات مبحبهاش علشان خاطر تضايقها .. شغل كيد النسا دا انا مبحبهوش
صافي : انت بتزعقلي علشانها ياآسر
آسر بعصبية : لا علشانها ولا علشان غيرها علشاني انا ومتتكررش فاهمة ولالا !!!
صافي : ولو اتكررت
آسر : يبقا تنسيني خالص
صافي : عاوز تنهي الي بينا علشانها .. هونت عليك
آسر : انتي اللي بتهديها بتصرفاتك
صافي : بس انا بحبك ياآسر
آسر : يووووة مش هنخلص من ام الحوار دا ... قولتلك ميت مرة انا وانتي صحاب وبس
صافي بتعيط : وانا مش شايفة كدا انا بحبك ياآسر ليه مش حاسس بيا
( آسر غمض عينه واتضايق من طريقته .. كل العصبية اللي جواه دي مكنتش صافي المقصودة بيها بس حظها طلعها عليها )
آسر : بصي يا صافي وافهميني انا مش عاوز اخسرك والله .. انتي عارفة انتي قريبة بنسبالي ازاي .. احنا صحاب من صغرنا ومتربين مع بعض .. ومحبش اني اخسرك كصاحبة واخت .. لو سمحتي بلاش تصرفاتك دي علشان بتضايقني
صافي: حاضر هبطلها .. بس اوعدني انك تفكر فيا وف حبي ليك .. محدش هيحبك زيي والله
آسر بيحاول ميتعصبش : انتي رايحة فين اوصلك
صافي : كنت جاية اخرج معاك
آسر : معلش ياصافي انا هوصلك علشان تعبان وعاوز اروح
صافي اتضايقت : ماشي ياآسر اللي تشوفوا
__________________________________
تونة قعدة ومشمرة البنطلون وحط رجلها ف البسين وتطرطش الماية برا وعمالة تغني : مشربش الشاي اشرب ازوزة انا مشربش الشااي .. مشربش الشاي اشرب ازوزة انا مشربش الشااي .. وعطاني مرواحة الله الله
زين بعصبية : ايه اللي بيحصل هنا داا .. ايه اللي بتعمليه دا قومي
تونة بتتجاهله : مشربش الشاي اشرب ازوزة انا مشربش الشااي
زين : انا بكلمك ردي عليا يابتاعة انتي
تونة رفعت عينها فجأة برقتله
زين : ايه هتتحولي
تونة قامت وقفت قدامه : عاوز ايه ياجدع انت .. وبصوت عالي.. فييي حااااجة
زين : جدع انت !! بقولك ايه يابتاعة انتي .. روحي مكان مانتو قعدين . . متخرجيش خالص فاهمة
تونة بتبرقله : ولو خرجت هتعمل ايه
قمر شافتهم جت تجري مسكت تونة : في ايه يابت عملتي ايه
تونة : معملتش حاجة لسه بس هعمل لو الجدع دا مختفاش من قدامي
زين : انتي ازاي طفلة بجد ..
نور : في ايه ياجماعة خير .. مالك يازين
زين : فاهمي ضيوفك يانور ان يقعدوا هنا باحترامهم
قمر : لامؤخذة يا نور ياختي .. بقولك ايه يااستاذ انت روحك ف مناخيرك من الصبح وساكتة .. شايفك بتزعق للبت الصغيرة وجيت قولت اسمع اللي حصل قبل مااحكم .. انما توصل لكدا لااا .. احنا محترمين غصب عن عين التخين ..
زين : ايه الأسلوب داا انتي فاكرة نفسك ف الحارة !! لا وانا اللي كنت مستغرب ازاي طفلة طريقتها كدا .. ماهي تربيتك
قمر : مالها تربيتي ياحبيبي .. لا اقف معوج واتكلم عدل ..
نور وقفت ف النص : اهدوووا .. قمر علشان خاطري متزعليش ثواني وهرجعلك وشديت زين
نور : اددخل يلاا
زين : هرجعلك وهوريكي ازاي تتكلمي معايا كويس
نور : امشي بقا
قمر : مستنياك ياحبيبي .. وبصيت لتونة .. وقلعت شبشبها
قمر بتحدف الشبشب بغيظ وتونة بتجري : عجبك كددداااا
__________________________________
زين بعصبية : انا مش فاهم انتي مسكتيني ليه .. كنت طردتهم وخلصنا .. انسانة متخلفة
نور : انت بتقول ايه .. الناس ف بيتك عيب .. انا لما روحت عندهم شالوني فوق رأسهم.. وانت تعاملهم كدا ليه
زين : لما يبقوا ناس من الشارع اعاملهم اكتر من كدا
نور :ناس من الشارع .. ناس من الشارع .. مين قالك انهم من الشارع .. هما كان ليهم بيت والظروف حكمت عليهم بكدا .. لجأولنا ايه مش عاوزنا نمدلهم ايدنا بعد الي عملوا معايا .. دا يبقا معندناش اصل والله
نجلاء : نور عندها حق يازين .. انا عمري ماشوفتك بتتعامل مع حد بالشكل دا ايه حصل.. طول عمرك ذوق
زين : حتي انتي يادادة موافقة ع قرارهم دا .. انا الوحيد المعترض ع وجودهم
نجلاء : وايه يخليك تعترض طيب قولي
زين : ليه ندخل حد غريب وسطنا .. لا وكمان ناس مش شبهنا اصلا ..
نجلاء : .. ظروف يابني اتفرضت عليهم يعملوا ايه يعني .. الناس جت لبيتك تستغيث بيك وانت عاوز تطردهم
زين : وهو مافيش غيرنا يستغيثوا بيه
نور : مالهمش اهل يا زين افهم ..
زين : تمام انا هسكت .. بس مش عاوز اشوف حد منهم قدامي.. ياريت يخليهم ف المكان اللي خدوه
نور : يعني نمنعهم من حريتهم
زين : أيوة دا اللي عندي
نجلاء غمزت لنور : خلاص يانور اخوكي عنده حق .. يلا ياحبيبي اطلع غير هدومك انت راجع تعبان
زين : ماشي يادادة خلي عايدة تبعتلي القهوة ع اوضتي
نجلاء : حاضر ياحبيبي
نور بغيظ : وافقتي ع كلامه كدا برده يادادة
نجلاء : علشان مصدقنا ان هو وافق ع وجودهم .. ف خلاص نقولو اه ع كلامه وخلاص انتي عارفة زين عيندي ازااي ..
نور : يعني اروح اقولهم متخرجوش ف حتة علشان خاطر زين عيندي ..
نجلاء : لا تقولي ولا تعيدي .. انتي تعتذرلها وخلاص .. لحد مازين يتعود ع وجودهم
نور :حاضر يادادة .. عن اذنك
__________________________________
قمر بتكلم نفسها : ماشي يا تونة ماشي .. بقا تخليني اقف قصاد قليل الذوق دا .. وتخليه يقول عليا معرفتش اربيكي .. اللي مكتفني بس اننا في بيتهم ..
تونة : ماخلاص بقا ياقمر .. رايحة جاية ...رايحة جاية اييه خيلتيني
قمر : كمان ليكي عين تتكلمي .. وجاية تحدف الشبشب عليها نور دخلت لبس فيها
نور : ااه
قمر : انا اسفة والله يانور.. كان قصدي ع ام لسانين دي
تونة : دا علشان انا بركة بس
قمر : اسكوووتيي
نور : ولا يهمك خلاص .. انا جاية اعتذرلك ع اللي زين عملوا .. متزعليش منه هو لسه مش واخد ع وجودكم بس
قمر بتريقة : لا وازعل ليه هو قال حاجة .. دا حتي ذوق
تونة بتريقة : اوووي .. اوووي يا ذوق
نور بتضحك : والله يابنتي زين كويس .. بس معرفش ماله .. المهم انك مش زعلانة
قمر : ولا يهمك خلاص .. احنا برده جينا فجأة .. ان شاءالله البيت يخلص بسرعة ونمشي
نور : ياحبيبتي تيجوا في اي وقت
قمر : متشكرة يانور
نور : طيب اسيبك انا بقا علشان اروح اشوف كريم
ليل دخلت ومتكلمتش وحدفت حاجتها وقعدت وقمر متابعها
قمر : لا ياحبيبتي متحرمش اتفضلي .. وقفلت الباب وراحت ل ليل
قمر : مالك .. حد ضربك ولا ايه
ليل : مافيش
قمر : ماهو باين ع وشك .. قولي مالك
ليل : ماافيش ياقمر قولت .. مااافيش اوووف وقامت وسابتها
قمر : اختك مالها متعرفيش
تونة : تلقي المز زعلها
قمر : مز ايه يابت .. اختك مالهاش ف الكلام دا
تونة : اسمعي مني بس .. هو المز
قمر سرحت وبتكلم نفسها: والله ممكن .. بتتت ياليييلل
________________________________
وليد : جبت المحاضرات
آسر : ااه
وليد : مالك مضروب ولا ايه
آسر : مش فايق لهزارك والله
وليد : طيب قولي مالك .. اتخنقت مع ابوك تاني
آسر : لا حوار تاني كدا .. انا راجع الفيلا بكرا
وليد : انت لحقت تقعد
آسر : ف حاجة عاوز افهمها بس وممكن ارجع
وليد : ماشي ياآسر ع راحتك
______________________________
قمر: بت ياليل انتي ف حد في حياتك
ليل : مين قالك كدا
قمر : البت تونة
ليل : وانتي بتصدقي كلام عيلة يعني
قمر : تونة مبتقولش حاجة غير لما بتكون شافت
ليل : قصدك ايه يعني اني كدابة .. خلاص صدقيها هي
قمر : ياحبيبتي مش قصدي اكدبك .. انا عارفة ان من حقك تحبي وتتحبي .. بس خلي بالك من نفسك .. الحب مش دايما حلو حتي لو بانلك ف البداية عكس كدا .. احيانا نهايته بتكون أسوأ
ليل : ليه وانتي جربتيه ولا ايه
قمر اتوترت : هاا .. لا طبعا ايه اللي بتقوليه دا .. احب فين وانا كنت معاكم دايما
ليل : مش مرتحالك
قمر : ااه دا نظام قلب الطربيزة صح .. انطقي يابت
ليل : احكي وانا هحكي غير كدا مش هقول
قمر : مافيش حاجة علشان احكيها
ليل : عينك بتقول غير كدا ..
قمر سرحت
ليل : روحتي فين !!
قمر : لما كنت بتعلم أيام إعدادي .. كان في ولد ف مدرسة الثانوي اللي جنبنا .. كان ابن عم صاحبتي .. كان بيجي يوصلها .. كانت نظراته ليا غريبة مكنتش بفهمها
ليل : كملي
قمر: جه ف مرة قالي ان هو بيحبني .. صديته .. بس اكتشفت ان انا كمان حبيته .. حاول تاني كان بيبعتلي جوابات مع صاحبتي .. لحد مااتكلمنا .. كلامه حببني فيه اكتر .. كان دايما يقولي بحب عيونك ورقتك .. كان بيشبهني بالملاك .. كنا بنشجع بعض ع المذاكرة.. كان بيقولي ان هيدخل هندسة .. وأن هو مش هيقبل باقل من دكتورة ..
ليل : وبعدين ايه حصل .. وهو فين
قمر : لما ماما ماتت .. طبعا قعدت من المدرسة وبقيت ادور ع شغل ومن شغل لشغل اتلهيت بس منستوش كنت كل لما ازهق .. وابقا عاوزة ارجع للدراسة علشان اشوفوا .. اقول لا انا هكمل ف الطريق دا وكنت بعاهد نفسي اني اوصلك للي موصلتلهوش انا
ليل : يعني كل السنين دي مشوفتوش بعض
قمر ضحكت: لا شوفته مرة من سنتين كدا .. بعد ماكنت اتغيرت عن قمر اللي كان يعرفها .. كنت بجري ورا البت تونة وبزعقلها ف الشارع .. وصدفة وقفنا قدام عربيته .. نزل من العربية بصلي باستغراب وبص لتونة وركب العربية ومشي ..
ليل ضحكت : زمانه فكرك اتجوزتي وتونة بنتك
قمر : يفتكر زي مايفتكر خلاص .. مبقاش فارق معايا حد غيركم ..
ليل : ياسيدي ع الحنية
قمر : احكي بقا انتي مالك في حد ف حياتك صح
ليل : امم بصي مش هقدر اقولك ان اكيد في حد في حياتي بس مش عارفة
قمر : دا اللي هو ازاي يعني
ليل: يعني ف احساس غريب اول مرة احسه .. حاسة ان مشدوده لحد كدا .. ف نفس الوقت حاسة ف حاجز بينا كدا .. بصي انا مش فاهمني .. ولا عارفة احدد مشاعري تجاه الشخص دا
قمر : المهم عندي تخلي بالك من نفسك ياليل
ليل ابتسمتلها : متخافيش عليا ..
قمر : و انا واثقة فيكي ياحبيبتي .. يلا ادخلي نامي علشان تعرفي تصحي
ليل : حاضر تصبحي ع خير
____________________________________
نجلاء : اخيرا رجعت ياحبيبي .. أيوة كدا مالكش غير بيتك
آسر : هو انا رجعت بس مش ضامن هقعد كتير ولالا
نجلاء : اهون عليك تسبني
آسر : والله يادادة ابدا بس اعمل ايه ف ابويا
نجلاء : اتأسفله وخلاص .. انت عارف احمد بيحبك وخايف ع مصلحتك
آسر : حاضر .. هما فين
نجلاء : تلقيهم نازلين علشان يفطروا
آسر: انا هستناهم ع الفطار
نجلاء : ماشي ياحبيبي .. متجمعين دايما ان شاءالله
كريم نزل حضن آسر وقعد جنبه ونور بعده نزلت وزين وبعدين احمد
احمد : ايه القعدة عند صاحبك معجبتكش
زين : لا انا اللي خليته يجي
احمد : ليه في حاجة
زين : اه علشان يعرف اللي حصل
احمد : هو ايه حصل .. في حاجة حصلت
زين : الكارثة اللي بقيت في بيتنا
نور : انت مبتزهقش من الكلام ف نفس الموضوع .. انت مش وافقت امبارح بترجع ف كلامك ليه دلوقتي
احمد : القرار قراري .. ناس لجأتلي انا و خليتهم ف بيتي .. في حاجة يااستاذ زين
زين : القرار قرارنا كلنا .. ماتقول حاجة ياآسر
آسر : انا بقول الناس ف بيتنا عيب لما نفطر وميجوش يفطروا معانا ... ياعاااااايدة
احمد ونور فرحوا
زين : نعمم !! هو انا جيبك علشان تقول كدا
اسر : اتقل يا زين
عايدة : خير ياآسر بيه
آسر: نادي ع الضيوف يجوا يفطروا معانا
عايدة : عيوني حاضر
_________________________________
تونة بتتمطع كالعادة ومنكوشة : انا جعااانة ياقمر .. هما الناس دول مبياكلوش
قمر : اصبري هروح اجبلك اكل من اي حتة برا .. عاوزة حاجة انتي كمان ياليل
ليل : اه هاتي اي حاجة اكلها قبل مااروح الكلية
عايدة : البيه طلب مني اجي اقولكم ان الفطار جاهز وهما مستنينكم
قمر : أيوة بس ...
ليل : مبسش روحي انتي واحنا هنيجي وراكي
عايدة : حاضر
قمر : هتروحي فين انتي
ليل : هنروح نفطر معاهم ..
قمر : ياليل كفاية نتقل ع الناس
ليل : احنا في بيتهم ياقمر . . يعني لو هما ف بيتنا مش هتأكليهم
قمر : هأكلهم بس انا مش عاوزة ادخل اقعد معاهم بصراحة بعد اللي حصل امبارح
ليل : حصل ايه
تونة بعصبية : انتو هتقعدوا تتكلموا كتير انا جعاااااانععع
قمر : خدي اختك وروحوا طيب
ليل : وانتي
قمر : هبقا اجيب حاجة اكلها
ليل : ماشي.. قدامي يافضيحة
________________________________
احمد : قولتلهم ياعايدة
عايدة: أيوة يابيه وزمانهم جايين ورايا
زين : ناقصهم هي
نور : بس يازين احسن يسمعوك
زين : ياريت ... اهي امنا الغولة جت
تونة و ليل داخلين : صباح الخير
الكل ماعدا زين : صباح النور
ليل شافت آسر اتصدمت .. وتونة طلعت تجري قعدة جنب كريم .. وليل جنبها وأسر بيبصلها وع وشه ابتسامة عريضة
احمد : اومال فين قمر
تونة : مردتش تيجي
احمد : ليه كدا
تونة : مش عاوزة تشوف خلقة ابنك
ليل زغدتها
تونة: اي بتضربيني لييه .. مش دي الحقيقة
احمد بيضحك : مش عاوز تشوف ابني مين فيهم بقا .. زين ولا آسر
ليل شرقت لما سمعت ان آسر ابنه ... وتونة طلعت ع الكرسي وعمالة تضربها ع ضهرها
زين : انتي كدا هتموتيها.. اديها ماية احسن
آسر بيدي ل ليل مايه ومبتسم : سلامتك
احمد : بقيتي كويسة
ليل صوتها محشور : أه
احمد : طيب الحمدالله ...اتفضلوا كلو متتكسفوش ..
زين بص لتونة اللي بقها كله اتملي اكل : لا متقلقش دي مش بتتكسف
تونة بصيتله بغيظ
نور : الف هنا ياحبيبتي .. معلش عمو زين بيهزار معاكي
زين : عمو !!!
تونة : هزار يا حلو انت بس لما افتح دماغك نصين متزعلش
زين : ايييه .. مش ممكن بجد .. انتي حد كبير مسخوط صح
تونة : والله احدف الطبق دا ف نفوخك لو ماسكت
ليل بعصبية : بس يافتوون اسكتي بقا
احمد : سبيها ياليل براحتها .. وانت يازين كل وانت ساكت
آسر بص ل ليل : معرفتونيش يعني ع الضيوف .. ع العموم انا هعرف نفسي بنفسي .. انا آسر احمد الألفي ..
ليل بصوت واطي : وانا ليل
تونة والاكل ف بقها : وانا فشون
زين وكريم بصلها بقرف
آسر : اهلا وسهلا بيكم
نور : ع فكرة ياآسر ليل معاك ف الكلية
آسر : بجد انتي ف كلية الهندسة
ليل مستغربة تصرفاته : أه
احمد : ياريت يا ليل يابنتي .. تبقا تساعدي آسر اصل بقاله سنتين بيعيد اولي
ليل : حاضر
آسر اتعصب بس مسك نفسه: صح يابابا مقولتليش هو انت ليك اخوات
احمد : لا مانت عارف
آسر بيبص ل ليل : يعني انا ماليش عم كدا ولا كدا
احمد : ماليش اخوات هيكون ليك عم منين .. وبعدين ايه الأسئلة دي
آسر : بستفسر بس مش اكتر .. يمكن يكون طالعلي عم فجأة
احمد : في ايه ياآسر مالك
ليل قامت : عن اذنكم .. شبعت .. قومي ياتونة يلا
تونة : اقوم ليه انا لسه مشبعتش
ليل : بقولك قومي
نور : في ايه ياليل سبيها تأكل .. وبعدين انتي مكلتيش حاجة علشان تشبعي
ليل : معلش مش عاوزة اتاخر ع الكلية .. ومشيت
آسر بص ف ساعته: تصدقوا ليل فكرتني .. انا كمان عندي كلية اسيبكم انا بقا
زين قاعد متابع وحاسس ان ف حاجة بينهم او يعرفوا بعض .. وخصوصا انهم ف نفس الكلية
آسر طلع يجري ورا ليل : استني هنا رايحة فين
ليل ماشية مبتردش
آسر مسك ايدها وقفها : بقولك استني .. مش هتهربي غير لما تفهميني بتكدبي ليه
ليل بتشد ايدها : أبعد عني .. انت مالك اهرب ولا مهربش .. مالكش دعوة بيا
آسر : مش هسيبك غير لما اعرف ليه كدبتي عليا .. ليه بتكدبي اصلا فاهميني
ليل : انت مبتسمعش بقولك انت مالك .. اكدب ولا مكدبش مالكش علاقة بيا ولا بحياتي.. انت فاهم
آسر : لما الكدب يبقا عليا يبقا ليا علاقة .. ليه قولتي كدا فهميني وفين اهلك اصلا
ليل : مااتو ارتحت أبعد عني بقا ..وشدت ايدها ومشيت
وهو واقف بردك مش فاهم ليه كدبت !!
_________________________________
احمد : الحمد الله .. هتيجي معايا يازين ولا اسبقك
زين : هاجي معاك .. ورجع بص ل تونة .. بقك هينفجر
نور : كملي ياحبيبتي اكل متركزيش معاه
تونة بلعت الاكل : لو ركزت معاه هخلي ميشوفش
زين : قد كف الايد وطلعلها صوت
تونة : صبرني يارب... هات يابني الطبق اللي جنبك دا
كريم بصلها ومردش
تونة : انت هتنحلي انت كمان.. هات الطبق
كريم خد الطبق و مشي بيه ع اوضته
تونة وقفت ع الكرسي تتنطط وتعيط : مرديييش يدييينييي مننننهههه اهئ اهئ
زين : احسن احسن جدع ياكريم
نور حضنتها : متعيطيش انا هجبلك طبق كبير اوي ليكي لوحدك ..
تونة مسحت دموعها وحضنت نور وباستها : انا بحبك اووي يانور.. وبصيت لزين وطلعتله لسانها
______________________________
ف الشركة
السكرتيرة: رأفت مستني حضرتك برا
احمد : دخليه
رأفت : ازاي حضرتك يافندم
احمد : انا كويس ..عملت اللي قولتلك عليه
رأفت : جمعتلك أكبر عدد من المعلومات عنها وعن حياتها ف الملف دا .. وبعت ناس ف المكان اللي قولت ساكنة فيه واتأكدوا من ان بيتها فعلا ولع .. وخليتهم يسألوا الناس عن سبب الحريق .. ناس قالت إنها سابت الأنبوبة مفتوحة وناس تانية قالت ان في واحد اسمه جعفر هو السبب
احمد : كويس اوي انا كنت متأكد انها مش بتكدب ... طيب سيب الملف هنا هشوفوا بنفسي
رأفت : اتفضل يافندم .. عن اذنك
احمد بيفتح الملف .. اول حاجة عينه جت عليها اسمها .. قمر عبد الحميد صالح
احمد بصدمة : عبد الحميد صالح !!!!
_________________________________
ياتري ايه علاقة احمد ب ابو قمر وليل هنعرف ف الاجزاء الجاية تابعوا ...
حكاية_قمر 💕🌜
بقلم_ياسمين_علي ••
تعليقات
إرسال تعليق