 |
- انا اسف بس انا مش بحبك.
= انا عارفه.
- عارفه! عارفه ايه، عارفه اني مش بحبك ووافقتي تتجوزيني عادي؟ طب ليه تعملي ف نفسك كده؟
= ساعات بنبقي مجبورين علي حاجات ومش في ايدنا نختار غيرها يازين، انا عارفه انك مش بتحبني وانك وافقت علي الجواز مني علشان والدتك طلبت منك كده بس دا قدرنا اننا نبقي سوا.
- ساره انتي سامعه نفسك؟ قدر ايه دا احنا نعتبر دي مجرد غلطه مش اكتر وبكره اما اهلنا ييجوا هنمثل أننا مبسوطين وكام شهر ونطلق يابنت الناس انا مش هقدر اعيش معاكي.
= خلص كلامه وسابني ودخل اوضته وقفل الباب بزهق، دخلت الاوضه اللي جمب اوضته وقفلت عليا ساعتها سمحت لدموعي انها تتحرر وتنزل يمكن تخفف شويه من وجع قلبي...قلبي اللي اتكسر من كلامه، هو ازاي قاسي كده؟ ازاي محسش اني بحبه! هو انا ايه اللي يجبرني اتجوز واحد عارفه انه مش بيحبني غير اني بحبه ودايبه فيه كمان! معرفش قعدت اعيط قد ايه بس انا نمت مكاني ومصحتش غير علي صوته وهو بينادي عليا من ورا الباب.
- يابنتي انتي لو ميته هتصحي، سااارهه
= رديت عليه من ورا الباب وانا بقوم من مكاني: نعم نعمم
- قومي البسي واخرجي بسرعه اهلنا بره ومستنينك
= طيب هلبس واجي، قومت غيرت الفستان وبصيتله بوجع وخرجت لهم برا كنت مبينه اني مبسوطه وطول الوقت كنت ببتسم حتي هو استغرب اني عارفه امثل كده، غبي ميعرفش ان وجوده معايا بس بالدنيا عندي واني مش عايزه غير حُبه.
مشيوا اهلنا وانا جيت ادخل اوضتي بس وقفني صوته.
- مكنتش اعرف انك بتعرفي تمثلي كده!
= رديت ب استهزاء: انت متعرفش حاجه اصلاً.
مستنش رده ودخلت الاوضه وقفلت الباب جامد زي ما هو عمل امبارح، فضلت طول اليوم في الاوضه مخرجتش منها غير بليل اما حسيت اني جعانه، سمعته بيكلم حد ف قربت اسمع بس مسمعتش غير جملة" لا هاجي بكره دا وعد" مترددتش اني اخبط الباب وادخل اقف قدامه حسيته اتوتر وقفل الخط اول ما شافني
- انتي ازاي تدخلي كده ومن غير ما تستأذني؟
= كنت بتكلم مين؟
- مترديش علي سؤالي ب سؤال، وبعدين انتي مالك بكلم مين هيفرق معاكي ف ايه؟
= هيفرق معايا ولو سمحت ترد وتقولي كنت بتكلم مين ومش عايزني اعرف
- وانتي تعرفي ليه اصلا بصفتك ايه تسألي سؤال زي ده؟
= بصفتي مراتك!
- هه مراتي؟ احنا متفقين محدش يدخل في حياة التاني وكل واحد حر في حياته وكلها كام شهر ونطلق صح!
= صرخت فيه: لا مش صح انت اللي قولت وقررت مع نفسك وانت اللي مش بتحبني مش انا، انا مختارتش حاجه
- بصلي بصدمه: قصدك ايه؟
= قصدي اني بحبك وانت مش حاسس بيا بحبك من قبل ما نتجوز واما اتجوزنا قولت احلامي اتحققت.. كنت انت حلمي بس فوقتني منه علي كسره قلبي اما قولتلي انك مش بتحبني انا مستعده استحمل اي حاجه منك غير انك تخوني وتكلم واحده غيري يازين دي الغلطه الوحيده اللي عمري ماهسامحك عليها.
سيبته ودخلت اوضتي شويه وسمعت باب البيت بيتقفل عرفت انه خرج قعدت اعيط واستنيته بس اتأخر اوي ف نمت مكاني.
صحيت لقيته نايم في اوضته اطمنت انه بخير حتى لو بعيد عني! عدي كام يوم واحنا تقريبًا مش بنشوف بعض ولا بنتكلم مع بعض، لحد ما يوم سمعته بيزعق في الفون مع حد بس مقدرتش افهم حاجه دخلت اسأله حصل ايه مردش عليا بس بصلي بنظره غريبه معرفتش افهم دي حُزن ولا ايه! ساعه بالظبط ولقيت الباب بيخبط جيت افتح لقيته قام بسرعه كإنه مستني حد فتح هو بس دي واحده؟ لسه هقوم اشوفها يمكن غلطانه في العنوان لقيتها في حضنه وبتقوله" وحشتني اوي يازين عارفه انك مغصوب علي الجوازه دي وهتطلقها وتجوزني مقدرتش مجيش واشوفك"
=انا واقفه بس بحاول استوعب ايه ده؟ حاسه اني في عالم تاني بس فوقت ما انا لازم افوق اشوف دا حلم ولا حقيقه! بس حقيقه وهي واقفه قصاده وبتبصلي وتضحك وهو باصصلي ومش بيتكلم مستنياه بس يقول كلمة اني فاهمه غلط بس متكلمش، طلعت اجري بره الشقه وخرجت الشارع وانا بعيط ولسه بجري وهو جاي ورايا
- ياساره استني هفهمك والله انتي فاهمه غلط، سااااارههه
= مشوفتش غير نور قوي دخل عيني وبعدها معرفش حصل ايه بس انا شوفته...شوفته ماسك ايدي وبيبكي! بصيتله وأبتسمت: مكنتش عايزه قصتنا تنتهي كده كنت عايزاك تحبني ونعيش مبسوطين سوا' غمضت عيني علي صوته وهو بيقول" متسيبينيش ياساره"....
....... تابع.؟....
البارت التاني.💘
= فتحت عيني شوفت نفس النور الابيض منوّر جامد في عيني مكنتش حاسه بنفسي ولا ب حاجه حواليا بس اللي استوعبته اني في المستشفي سامعه اصوات كتير وناس بتزعق "محتاجين دم بسرعه هنفقد المريضه" نمت... نمت ومحستش ب حاجه تاني مش عارفه حصل ايه انا مُت؟ لا لا انا لسه عندي حاجات كتير اعملها لسه.. لسه مفرحتش!.
* حمد الله علي سلامتك.
= كنت بفتح عيني واغمضها تاني وارجع افتحها دماغي واجعاني فتحت عيني كان في دكتور واقف مبتسم قصادي وتقريبًا بيشوف ضغطي واول ما فتحت بٍعد وقالي حمد الله علي سلامتك بس مكنتش قادره ارد عليه اكتفيت ب هز راسي.
* حاسه ب حاجه واجعاكي؟
= ايه اللي حصل؟
*حادثه بسيطه بس الحمد لله جت سليمه شوية كسور مش اكتر وحمد الله علي سلامتك مره تانيه، انا هخرج وادخل استاذ زين علشان قلقان من امبارح وتعبنا اوي معاه.
= هو كويس؟ حصله حاجه!
*اهدي اهدي محصلش حاجه هو كويس بس كان خايف عليكي اوي اما جابك فضل يزعق في الممرضين والدكاتره وتعبنا لحد ما عرفنا نهديه هخرج افرحه انك بقيتي بخير.
مردتش عليه هزيت دماغي وبصيت الناحيه التانيه، اما هو خايف عليا كده ليه عمل كده معايا ليه خاني، انا..انا قولتله ممكن اسامح اي حاجه الا الخيانه ليه بيجرحني كده!، شويه ولقيته داخل و اول ماشافني جري قعد جمبي ومسك ايدي كان باين انه خايف بس انا مجروحه! خوفه دا مش هيخففلي وجعي
- انتي كويسه؟ مفيش حاجه واجعاكي صح
مكنتش برد عليه كنت باصه بعيد عنه وكإني في عالم تاني.
- ساره علشان خاطري ردي عليا انا عارف انك هنا بسببي واني جرحتك بس والله انتي فاهمه غلط اديني فرصه اشرحلك. ساعتها افتكرت منظرها وهي في حضنه كإني سكينه غرزت في قلبي تاني معرفتش اعمل حاجه غير اني اعيط، اعيط وبس
قام قرب مني وحضني انا مكنش عندي طاقه حتي ابعده كل اللي كنت بعمله اني بعيط واما حضَني عياطي زاد كإني بشكيله وجعي منه! فضلت وقت معرفش قد ايه اعيط بس بعدها نمت.
اما صحيت كان لسه نايم جمبي وماسك ايدي او انا اللي ماسكه ايده معرفش مين فينا كان خايف التاني يسيبه؟، بس كإني نسيت وجعي كله ساعتها وقعدت ابتسم وهو نايم واكلمه
= كان هيحصل ايه لو حبتني زي ما حبيتك او حتي اديت لعلاقتنا فرصه؟ صدقني كنت هخليك تحبني من حُبي ليك، انت متعرفش انا بحبك قد ايه، بس انت جرحتني اوي...معرفش هعرف اسامحك ولا لا وايه تبريرك اللي هتقوله ليا بس حتي الكلام اللي هتقوله مش هيريح قلبي ولا هينسيني اللي شوفته، مسحت دموعي وحاولت ابعد ايدي عن ايده بس كان ماسك فيها جامد حسيت انه صاحي اتمنيت ساعتها ميكونش سمع حاجه.
= احم لو سمحت سيب ايدي وقوم نام بعيد شويه.
مردش عليا بس شدني نيمني مكاني وحاوطني ب ايده وقالي" انا كده مرتاح نامي بقا" كل ده وهو مغمض عينه حاولت اقوم بس معرفتش، ضحكت علي قلبي اللي هيطير من الفرحه في قُربه ونسي كل اللي عمله فيه.
قعدنا اسبوع في المستشفي وكان معايا طول الوقت كان بيحاول يتكلم معايا في اي حاجه او يضحكني، بس انا كنت ثابته مش بستجيب لأي حاجه بيعملها.
- احكيلك حدوته؟
= شكرًا عايزه انام.
- طب تيجي اغنيلك لحد ما تنامي؟
= نام يا زين.
منكرش اني كنت مبسوطه من معاملته ليا وقُربه بس في حاجه جوايا مش متقبله كل ده... حاجه كل ما اجي اقرب منه تجيبلي صورته وهو في حضنها، مكنتش بسمع تبريراته خالص علي الموضوع ده اصل هسمع ايه؟ هيكون ايه تبرير انها تيجيلوا البيت وتحضنه قدامي كده غير انه بيحبها هي؟.
- نقدر نخرج النهارده من هنا بس لو حاسه انك مش كويسه ممكن نستني كمان شويه؟
= لا انا بخير مش عايزه اقعد هنا تاني.
رجعنا البيت سوا واول ما دخلنا سيبته ودخلت اوضتي وقفلت علي نفسي معرفش هعمل ايه او هعيش معاه ازاي؟ انا مش عارفه افكر، تقريبًا فضلت طول النهار في الاوضه مخرجتش غير بعد ما اخدت قراري وقررت اقوله.
= ممكن ادخل؟
- فتحلي الباب بسرعه: خير انتي كويسه؟ تعبانه او حاجه؟
= لا انا بخير، كنت عايزه اقولك علي قراري.
- بصلي ب استغراب: قرار ايه؟
= اخذت نفس طويل: طلقني يا زين.
يتبع...
التالت هيبقي الأخير ان شاء الله وشكرًا جدًا ليكوا علي دعمكوا ليا.
اعمل متابعه لصفحتي الشخصيه
عشان يصلك اشعار بالقصة بدون الحاجة للبحث عنها
يتبع.؟....
البارت التالت. 💘والاخير عايزين تفاعل عشان انزل الجديد
- لا علشان خاطري بلاش تقولي كده اديني بس فرصه.. فرصه واحده اشرحلك كل حاجه، بس متسيبينيش.
- تفهمني ايه؟ عايز تفهمني ايه وانا شايفاكوا ب عيني؟، كملت بعياط: شايفاها في حضنك يازين! عايزني افهم ايه؟
- والله انا كنت قطعت علاقتي بيها من يوم ما اتجوزتك ومكنتش حتي بشوفها لحد م.....
- مش عايزه اسمع لو سمحت...مش عايزه اعرف حاجه كفايه بقا انا تعبت، قلبي تعبت انا قولتلك..قولتلك هسامح اي غلطه إلا الخيانه يازين انا حبيتك..حبيتك من قبل ما اعرفك كنت بحلم بيك بحلم اقابلك، من اول ما شوفتك وقلبي دقلك انت مع انه صعب يحب حد بس حبك! معرفش انه هيتعذب معاك ويعذبني كده، انا كنت بحلم نعيش سوا كان عندي احلام كتير وانت دمرت كل حاجه. خلصت كلامي وقعدت علي الارض وانا بعيط نزل قعد جمبي وانا سامعه صوت نفسه اللي بيحاول يظبطه.
- علشان غبي مشوفتش كل الحب ده، مكنتش متخيل ان ممكن اتحب كده انا محبتش قبل كده ومعرفش بيحبوا ازاي بس عمري ما اذيت مشاعر حد وانا حاسس اني اذيتك غصب عني عايزك تصدقي اني مش خاين واللي شوفتيه دا كان بسببها هي.. هي اللي عملت كده قصد علشان تبعدي عني، يوم ما كنت بزعق في الفون كنت بزعق ليها اتصلت عليا وقالتلي انها تعمل اي حاجه علشان ارجعلها وتبعدك عني بس مكنتش اتخيل انها تعمل كده انا اسف انك اتأذيتي بسببي انا هعمل اي حاجه علشان تسامحيني واقدر اشيل عنك وجعك شويه.
كإن قلبي كان نفسه يسمع الكلام ده علشان يتأكد ان زين لسه ملكه ومخنهوش، معرفش ازاي قومت حضنته وانا بضحك زي الهبله وماسكه فيه كإنه هيهرب الغريبه انه حضني هو كمان.
- ممكن تدينا فرصه نحاول تاني؟، تعلميني اعرف احب زيك كده؟
= بعدت عنه وانا بمسح دموعي وببتسمله: الحُب بيجي مره واحده يا زين، خطفه كده قلبك بيدق بسرعه تحس انه اتخطف و بقي مِلك حد تاني مش مِلكك.
- وانتي حسيتي كده معايا؟
= اممم هو انت حلو ومسمسم اه بس معرفش بصراحه بحبك اوي ولا بحبك بس.
- ضحك: والله! طب ياستي الفرصه دي لينا احنا الاتنين يا انتي تخليني احبك اوي اويي يا انا اخطفك، اتفقنا؟
= اتفقنا.
طول الفتره دي زين كان معايا علي طول كنت بكتشفه من الاول وبقع في حُبه اكتر هو مكنش بيلمح انه وقع هو كمان بس انا كنت بشوف ده في عيونه ونظرته ليا.
- كانت ايه مواصفات فارس احلامك اللي اتمنيتيها؟
= مكنتش عايزه غير ان قلبه يدق علشاني انا بس.
دايمًا كان بيسألني عن احلامي وحياتي اللي اتمنيتها ميعرفش اني بنيت حياتي كلها في انتظاره لحد ما بقي ملكي.
- كنت عايز اكلمك في موضوع.
= اتكلم.
- احنا كُنا اتفقنا اتفاق سوا صح؟
= ااه!
- طب بصي انا قولتلك قبل كده اني محبتش خالص معرفش بيحبوا ازاي او المشاعر بيعبروا عنها ازاي وبيقولوا ايه والكلام الرومانسي ده معرفش عنه حاجه.
= عيني كانت بدأت تدمع اما فكرت انه ممكن ميكونش حبي بس قبل ما اتكلم قعد جمبي ومسك ايدي وكمل كلام.
- بس من يوم ما قولتيلي انك بتحبيني وانا حاسس ان في حاجه اتغيرت جوايا معرفش دا ايه بس حسيت ان قلبي فرحان! عايزك دايمًا معايا وعايزك تفضلي تحبيني علي طول، يمكن مش هعرف احبك ب الطريقه اللي بتحلمي بيها بس صدقيني هعمل اي حاجه علشان تكوني سعيده معايا، انا قلبي دق ليكي انتي.. انتي وبس.
= ضحكت: طب كده ناقص حاجه مش عايز تقولها؟
- حاجة ايه؟
= احم يعني انك...
- بحبك!
= حاسس بيها؟
- حاسس ان قلبي بيطير.
= عرفت اخليك تحبني.
- طب تعالي معايا.
= فين؟
- انتي خليتيني أحبك، وانا هخطفك يا قمريي.
= ضحكت: انت خاطفني انا و قلبي من زمان.
تمت.
"رأيتك في أحلامي حتي استيقظت علي وجودك".. 🖤
اتمني تعجبكوا ومستنيه رأيكوا. 🖤
تعليقات
إرسال تعليق