 |
● الجزء السابع ●
حكاية_قمر 💕🌜
بقلم_ياسمين_علي ••
سهر راحت ع أوضتها وهي بتفتكر اللي حصلها من سنين ..
فلاش باك □
فاروق : اظن اللي كنتي موجودة علشانه راح خلاص .. يعني وجودك مالهوش لازمة دلوقتي
نورة : اطلعي فوق ياسهر
*سهر طلعت وقفت ع السلم واستخبت *
نورة : انت عاوز ايه يافاروق
فاروق : عاوزك تغوري من حياتي .. اللي كنتي بتتحمي في راح
نورة : انت عاوز تطردني من بيتي ..
فاروق يضحك بتريقة : بيتك ؟؟؟ بيت ايه انتي نسيتي انتي كنتي ايه .. لولا ابويا اقول ايه بقا الله يرحمه هو اللي خلاكي من ممرضة لصاحبة بيت .. بعد ماضحكتي عليه
نورة : انا مضحكتش ع حد .. ابوك كان بيحبني
فاروق : اخررسي ابويا محبش غير امي وبس .. انتي واحدة رخيصة استغليتي مرضها ورقدتها ف السرير .. استغليتي هو شخصيا .. وامي ماتت بحسرتها بسببك ..
نورة : نصيبها كدا
فاروق : صح عندك حق نصيبها .. وانتي كمان هتاخدي نصيبك
نورة : تقصد ايه
فاروق نادي ع الأمن بتوع الفيلا
نورة : انت هتعمل ايه
فاروق : خدوها برا ومتدخلش الفيلا دي تاني
نورة : انت اتجننت .. انت مالكش حق .. انا ليا ف البيت دا انا وبنتي
فاروق : حقك ؟ صح انا نسيت اقولك مش انا خليت ابويا يكتب كل حاجة باسمي قبل مايموت
نورة : انت كددااب .. استحالة يعمل كدا
فاروق مبتسم : لا عمل .. كتب كل حاجة مقابل ان اربي بنته المدللة .. يعني باعك .. زي ماباع امي زمان
نورة بصدمة : انت بتقول ايه استحالة !!!
فاروق بعصبية : خدوهاااا ع برا .. وزي ماقولت مش عاوز اشوف وشها هنا تاني .. واحمدي ربنا انك طالعة من هنا عايشة
نورة : انا مش هسيب بنتي .. انا عاوزها
فاروق : اخررسي.. واخررجي برا
سهر نازلة تجري : ماما .. ماما انتي راحة فين
فاروق مسك ايدها: اطلعي ع فوق
سهر : انا عاوزة اروح مع ماما .. اوعا ايدي انا مش بحبك انت وحش اوعا
نورة : ارجوك متحرمنيش منها يافاروق
فاروق : انتي فاكرة اني قبلت اربيها حب فيها ؟ انا وافقت بس علشان تتحرمي منها زي ماحرمتيني من امي
نورة بعياط : ارجوك سهر مالهاش ذنب ف حاجة .. ارجوك سبني حتي اسلم عليها
فاروق ساب سهر طلعت تجري حضنت نورة
سهر : ماما انتي راحة فين .. انا عاوزة اجي معاكي متسبنيش
نورة بتعيط : غصب عني ياحبيبتي .. خليبالك من نفسك ياسهر .. اسمعي كلام اخوكي
سهر : لا ياماما دا وحش انا مش عاوزة اعيش معاه خديني معاكي .. بابا سابني وانتي هتسبيني .. خديني معاكي
نورة حضنتها جامد وهي بتعيط : غصب عني ياسهر ..
فاروق شد سهر من حضن نورة : كفاية كدا .. يلا خدوها ع برا
سهر : اوعا سبني .. ماااما .. متسبنيشش
نورة : خليبالك من نفسك ياسهرر .. هتوحشينيي ياحبيبتي
سهر بعياط وبتشد نفسها من فاروق : لااا متسبنيش ياماما ... ماااامااااا
___________
سهر بتعيط : هتدوق اللي دوقته يا فاروق .. هتدوقوا
__________________________________
نعمة : سائر وصل يابيه
صافي بفرحة : سائر رجع .. انا مش مصدقة .. يلا يابابا ننزله بسرعة يلا
هدي بفرحة : حمدالله ع سلامتك ياحبيبي .. اخيرا افتكرتنا
سائر : الله يسلمك
صافي نازلة تجري حضنته : وحشتني اوووي .. كل دي غيبة ياسائر
سائر : وحشتيني يامجنونة انتي .. عاملة ايه
صافي : بقيت كويسة لما شوفتك طبعا
فاروق : حمدالله ع السلامة .. اخيرا افتكرت ان ليك اهل
سائر : انت عارف اني مكنتش راجع
فاروق : وايه رجعك
هدي : ايه اللي بتقولو دا يا فاروق.. سائر ينور ف اي وقت .. دا بيته
سائر : عارف ان دا بيتي والله من غير ماتقولي ..
فاروق : يظهر ان السفر والغربة منستكش
سائر : ولا عمري هنسا .. عن اذنكم انا راجع تعبان
صافي : رايح فين كدا .. انت فاكرني هسيبك فين الهدايا بتاعتي
سائر : طب سبيني ارتاح الأول
صافي : ابدا رجلي ع رجلك .. يلا بينا ع فوق نفتح الشنط .. طلعوا
هدي واقفة مضايقة وفاروق راحلها : متضايقيش نفسك من كلامه .. هو يومين ويرجع مكان ماجه
هدي : ومين قالك اني هبقا مبسوطة لما يمشي .. انا عاوزة يفضل عايش معانا دايما .. بس مش عارفة اعمل ايه علشان ارضيه
فاروق : متتعبيش نفسك معاه .. دا دماغه ناشفة .. المهم انتي متزعليش
هدي : ماشي يافاروق
___________________________
تونة قعدة حاطة رجل ع رجل وبتتفرج ع التلفزيون وماسكة طبق لب بتقزقز وترمي ف الأرض وليل واقفة تلم ومتغاظة منها
تونة : نضفي بضمير .. في قشرة هناك اهي
ليل : فين دي
تونة حدفت قشرة : اهي
ليل بعصبية : لا بقا كفاية كدا كتير .. انا اروح اقول لقمر بنفسي بقا اكرملي
تونة : يلا ياحبيبتي انتي تقولي اللي حصل وانا احط بهاراتي
ليل : ااه منك ياسوسة انتي ..
تونة : والله لما تيجي قمر لاقولها ع عملتك السودة
ليل : طب ابقي افتحي بقك علشان اكسر دماغك دي
تونة : طب وريني كدا علشان اطلع عينك ف ايدي
قمر دخلت : في ايه الصوت دا بتزعقوا ليه .. انتو مبتعرفوش تقعدوا كويسين مع بعض .. ايه حصل
تونة : انا اقولك اييه اللي حصل
ليل طلعت تجري حطت ايدها ع بق تونة : محصلش حاجة ياقمر . . عادي احنا توم وجيري كدا دايما نتخانق.. انتي عارفنا
قمر رفعت حاجبها : شيلي ايدك من ع بقها ياليل
ليل : مابلاش
قمر : شيلي يابت
ليل شالت ايدها وهي خايفة
تونة : اصل ليل مش عاوزني اقولك اني شوفتها وهي ....
ليل قفلت عينها وبتدعي ف سرها
قمر : انطقي مالها
تونة : شوفتها وهي كانت طالعة تتسحب برا
ليل بصوت واطي : يلاهوي هتقول
قمر : ها وبعدين
تونة : روحت اتسحبت وراها وقفشتها وهي راحة تنط بالبسين ..
ليل فتحت عينها واتنهدت : الحمدالله
قمر : بسين ايه انتي اتهبلتي ياليل
تونة : ما انا قولتلها كدا ياقمر والله ... وزعقتلها .. *بتبص ل ليل * اقولها عيب ميصحش كدا ياليل ... مستنية قمر تمشي وتلعبي بديلك من وراها .. تقولي ابدااا حرانة وعاوزة انزل
ليل : يابنت ال
تونة : بتقولي حاجة ياحبيبتشي .. مش سامعة .. مش دا اللي حصل ولا بكدب انا
ليل : انتي تكدبي ياخبر .. دا العالم كله يكدب الا انتي ياطاهرة
قمر : وانتي اتجنيتي عاوزة تنزلي فين
ليل : دانا كنت بهزار مع تونة .. انتي عارفة انا مبعرفش اعوم ..
قمر : اه بحسب
ليل : مقولتلناش بقا جبتي هدية ايه لنور
قمر : تعالوا .. تعالوا افرجكم
_____________________________
حكاية_قمر 💕🌜
بقلم_ياسمين_علي ••
كنزي : صباح الخير ياماما
نجلاء : صباح النور ياحبيبتي ايه مصحيكي بدري كدا
كنزي : قلقت قولت اصحا اساعدكم ...
عايدة : اه دا انهاردة هيبقا يوم صعب اوي اوي
نجلاء : كله يهون علشان عيون نور ..
كنزي : ماما انا كنت عاوزة اشتري فستان
عايدة : انتي عاوزة تساعدينا ولا تشتري فستان
كنزي بغيظ : الله بقا وانتي مالك
نجلاء : بنت عييب كدا .. تعالي معايا برا
كنزي : ياماما بقا سيبي ايدي في ايه انا مقولتش حاجة غلط
نجلاء : عيب تكلميها كدا أكبر منك
كنزي : ماهي كل حاجة تتدخل فيها ليه .. دي غلبت البقدونس
نجلاء : خلاص اسكتي .. خدي الفلوس اهي روحي هاتي الفستان .. وهاتي هدية لنور هاتي حاجة حلوة كدا ع ذوقك ..
كنزي : من عنيا يانوجة .. حاجة تانية
نجلاء : اه خدي حد معاكي متروحيش لوحدك لتتوههي
كنزي : هو فين بابا يوصلني ..
نجلاء : ابوكي مش هنا
كنزي : ليه راح فين دا عمو احمد مرحش الشغل
نجلاء : ابوكي راح يطمن ع عمتك .. ما هو مش علشان انتي جيتي هنا هينسا اخته
كنزي : طيب انا دلوقتي اروح مع مين
نجلاء : مش عارفة يابت ياكنزي .. اقولك متاخدي ليل معاكي ..
كنزي : اه صح اخد ليل معايا .. يلا انا هروح اللبس بقا
نجلاء: ماشي وخلي موبايلك مفتوح متقلقنيش عليكي
كنزي : حااضر
______________________________
في أوضة نور نايمة .. وزين وكريم وأسر داخلين بهدوء ورا بعض ومعاهم بلالين كتير وتورتة فيها شمع عليه رقم 25 .. اسر ولع النور .. ونور فتحت عينها
اسر وزين : هابي بيرث داي تو يوو .. هابي بيرث داي تو يو .. هابي بيرث داي تو نور .. هابي بيرث داي تو يو
*نور قامت وقفت ع السرير وهي مبسوطة *
: سنة حلوة ياجميل .. سنة حلوة يا نور سنة حلوة يااجميل
يلا حالا بالا بالا حيو ابو الفصاد .. هيكون عيد ميلاد الليلة اسعد الأعياد.. حيو ابو الفصاد
نور جاية تنفخ ف الشمع
اسر : استتني اتمني أمنية الأول
نور : تفتكر هتتحق
زين : ان شاءالله ياحبيبتي تتحقق
"نور ابتسمت وغمضت عينها واتمنت أمنية وطفيت الشمع "
اسر : ها اتمنيتي ايه بقا
زين : مالكش دعوة يارخم سبها .. حضن نور.. : كل سنة وانتي طيبة ياحبيبتي .. عقبال سنين كتير اوي وانتي منورة حياتنا
اسر : كل سنة وانتي طيبة يانوني
نور : ربنا يخليكوا ليا .. ومتحرمش منكم ابدا
كريم حضن نور وطلع علبة فيها سلسلة رقيقة جدا عطاها ل نور
نور : الله جميلة اوي ياكريم .. انا هلبسها انهاردة ياحبيبي
زين : والله عيب علينا الصغير يجيب هدية واحنا لا
اسر : اتكلم عن نفسك ياحبيبي .. انا هديتي موجودة وهي عارفها
نور ابتسمت : فستان عيد ميلادي .. كل سنة لازم يكون ع ذوقك انت .. ربنا ما يحرمني منك ابدا
زين : انا شكلي بقا وحش اوي
اسر : اوي اوي بصراحة
نور : هو بابا لسه نايم .. ولا يكون راح الشغل
زين : لا بابا قاعد تحت مستنينا ع الفطار
نور : طيب يلا ننزل
اسر : يلا
_____________________________
كنزي : انا تعبت من كتر اللف .. ومافيش حاجة عجباني
ليل : ومين سمعك بصراحة انتي مش بيعجبك حاجة خالص
كنزي : بزمتك في حاجة حلوة اصلا
ليل : بزمتي فيه كتير حلوين
كنزي : فين دول
ليل : اهو بصي طب الفستان دا حلو ازاي
كنزي : لا مش عاجبني دا
ليل : ياستي ادخلي شوفي عليكي بس ..
كنزي : ماشي هشوفوا بس لو معجبنيش هتلفي معايا
ليل : امري لله هعمل ايه .. يلا الله يهديكي ادخلي
كنزي : حاضر
______________________________
قمر : بت ياتونة .. خدي اقولك
تونة : يانعم
قمر : انتي مخبية عليا ايه
تونة : تعرفي عن تونة انها بتخبي حاجة
قمر : لا طبعا عمرك .. علطول فاضحة الناس
تونة : اومال بتسألي ليه
قمر : علشان مش مرتحالك انتي واختك . .
تونة : وانا مالي انا عملت ايه .. مترتحلهاش هي بس ..
قمر : مرتحلهاش ليه بقا.. قوليلي عملت ايه
تونة : عملها اسود ومنيل .. دي طلعت ماية من تحت تبن
قمر : في ايه ياتونة قلقتيني
تونة : ناوليني واحدة بيبسي من التلاجة
قمر : يوة ماتحكي الأول دا وقته
تونة : خلاص انا هروح اجيبها لنفسي وشوفي مين يحكيلك بقا
قمر : خلاص خلاص هجبلك
تونة : هاتيها ساقعة اوي اوي
قمر : خدي ياختي.. قولي بقا
تونة : مجبتيش فستق ليه
قمر : وبعدين بقا معاكي
تونة : خلاص تعالي هحكيلك
قمر : ها قولي
_____________________________
كنزي خرجت
ليل : طب والله حلو دا متفصل عليكي ..
كنزي : بجد .. يعني حلو عليا
ليل : اوي اوي
كنزي : انا كمان عجبني اووي ..
ليل : لولولولوولي اخيرا
كنزي ضحكت : للدرجادي زهقتي مني ..
ليل : انا .. ابد .. محصلش .. مين قال كدا بس
كنزي : لا واضح واضح .. تعالي نحاسب ..
______________________________
قمر : يعني انتي متأكدة ياتونة
تونة : اه وغلاوتك شوفتهم بعيني دول
قمر :مايمكن يكونوا أصحاب ف الكلية بس
تونة : لا ياقمر مش صحاب بس .. دا قالها بحبك
قمر : بتتكلمي جد يابت.. اوعا يكون بهاراتك دي
تونة : ابدا تعرفي عني كدا
قمر : اعرف عنك ابو كدا
تونة : خلاص مش مصدقاني براحتك ..
قمر : طيب متقوليلهاش انك عرفتيني حاجة
تونة بصوت واطي : كويس بردك علشان استغلها
قمر :بتقولي حاجة
تونة : بقولك انا هقوم اجهز نفسي للعيد ميلاد .. عاوزة حاجة مني
قمر : لا روحي
_________________________________
نجلاء : كل دا ياكنزي .. مش قولتلك متتأخريش
كنزي : معلش ياماما الدنيا زحمة اوي .. احنا رايحين نركب اهو متقلقيش
نجلاء : ماشي لما تجيلي
كنزي : ماشي ياماما سلام
ليل : الدنيا زحمة ولا انتي اللي مش عاجبك حاجة
كنزي : انتي عاوزني اقولها كدا علشان تهزقني اكتر يرضيكي
ليل : لا ياختي ميرضنيش
كنزي : احنا هنركب منين
ليل : من قدام اهو الموقف قرب
كنزي : الحمدالله احسن تعبت من الماشي
موتوسيكل معدي من جنبها .. شد الشنطة والكيسة اللي ف ايد كنزي
كنزي وليل صوتوا وطلعوا يجروا ورا الموتوسيكل
كنزي : الفستاااان
ليل : استني استني ... انا صورت الأرقام
كنزي بعياط : خد الفستااان والشنطة .. ماما هتزعقلي
ليل : اهدي هو انا ماشية مع عيلة صغيرة ..
كنزي : هنعمل ايه دلوقتي
ليل : هنروح القسم نعمل محضر
كنزي : بس كدا هنتأخر
ليل : لا ان شاءالله منتأخرش . . يلا
______________________________
تونة لبست وطالعة كالعادة طايرة بالفستان وبتلف بيه .. لمحت كريم طلعت تجري عليه
تونة بتلف قدام كريم : بص ياكريم ايه رايك ف الفستان بتاعي .. حلو صح
كريم بصلها ودير وشه
تونة : هو انت علطول ساكت .. ايه دا انت بتعمل ايه
كريم : .....
تونة : دا اسمه رسم صح .. طيب ماترسمني ..
كريم : .....
تونة : اوف بقا ماترد عليا .. طيب رد عليا ومش هقول لحد انك اتكلمت اوعدك ..
كريم : ....
تونة : يووة بقا انا همشي احسن
كريم مسك ايدها وقعدها
تونة : هترسمني .. هييييه ..
كريم شاورلها تثبت
تونة : حاضر مش هتحرك .. يلا يلا
_______________________________
حكاية_قمر 💕🌜
بقلم_ياسمين_علي ••
في القسم
كنزي بتعيط : زمان ماما قلقانة عليا ... اعمل ايه يارب .. ياريتني مانزلت
ليل : لا اله الا الله .. اهدي ياكنزي ابوس ايدك انا مش ناقصة توتر
كنزي بتعيط اكتر : انا عاوزة الفستااان ياليل
ليل : انا مش عارفة حاجة هنا اول مرة ادخل قسم ..
كنزي : كمان هنتوه ف القسم .. يلاهووي
ليل : اسكتتيي ... هنسأل مش هنتووه
ليل : لو سمحت انا كنت عاوزة اعمل محضر
حازم خارج من مكتبه ..كنزي بترفع عينها شافته طلعت تجري عليه وهي بتعيط ...حازم اتخض : يلااهوي ايه جابها دي
كنزي بعياط : حازم الحقني .. انا اتسرقت ... انت فاكرني انا اللي قلبت عليك العصير ..
حازم : ولو مش فاكرك بالعياط دا لازم افتكرك .. ادخلي
حازم : قوليلي اتسرقتي ازاي
كنزي بتعيط : كنت راحة اجيب فستان انا وليل .. وفضلنا نلف نلف نلف علشان يعجبني حاجة ولما...
حازم : انتي هتحكي قصة حياتك .. انجزي عاوز امشي
كنزي عيطت : انت بتزعقلي ليه انت قولت احكي اللي حصل وانا بسمع الكلام
حازم : ياستي ابوس ايدك ماتعيطي .. انا عاوز اعرف بس اتسرقتي ازاي
كنزي : واحد راكب موتوسيكل شد مني الشنطة و خد الفستان كمان
حازم : مخدتوش ارقام الموتوسيكل طيب
ليل : انا خدتها اهو اتفضل
حازم : تمام كدا .. دقيقة وراجعلكم
حازم : اهدي خلاص.. الحرامي وحاجاتك هيجوا دلوقتي ..
كنزي : متشكرة اوي
حازم : دا واجبي .. متقلقيش انتي بس
كنزي : حاضر
______________________________
نجلاء : يلااااهوي .. البت لسه مجتش لحد دلوقتي . . ما كانت قايلالي راحة تركب
عايدة : طب كلميها
نجلاء : بكلمها موبايلها مقفول .. انا قلقانة اوي
عايدة : مانتي غلطانة.. بتنزليها لوحدها ليه
نجلاء : مش لوحدها معاه ليل
عايدة : ماهي بنت هي كمان ياختي .. لازم كان يبقا معاهم راجل ولا حد كبير
نجلاء : انتي هتقلقيني اكتر ليه ياعايدة ..
عايدة : انا بفهمك بس .. اصل الخطف دلوقتي بقا ف كل حتة
نجلاء : بدل ماتهديني بتولعيني اكتر . . انا طالعة استناه برا بدل ماتجلط وانا واقفة منك
عايدة : يوة هو انا قولت حاجة
_______________________
حازم : شنطتك وحاجاتك اهي .. شوفي لو حاجة ناقصة
كنزي بفرحة خدتهم : لالا مافيش حاجة ناقصة .. انا متشكرة اوي اوي
حازم : العفو ياستي .. تعالوا هوصلكم ع سكتي
ليل : دا يبقا كتر خيرك والله ..
كنزي : لا مش هينفع علشان ماما متزعقليش .. لما تشوفني راكبة مع واحد غريب
ليل : امك هتزعقلك لو اتأخرنا اكتر من كدا ..
كنزي : اه صح .. خلاص هنركب معاه بس لو ماما اتكلمت
ليل : انا هفهمها ياستي يلا
كنزي : ماشي
______________________________
تونة : اوف بقا انا زهقت .. العيد ميلاد هيبدأ ويخلص وانت لسه مخلصتش
كريم : ....
تونة : طب وريني وصلت لفين .. انت مخبي الورق ليه هو احنا ف امتحان
كريم خلص رسم و لف الورقة
تونة بفرحة: الله دي حلوة اوي .. شبهي بالظبط .. زي عيني وزي مناخيري وزي شعري .. كلي كلي بالظبط .. متشكرة اوي ياكريم .. انا هروح اوريهالهم ... جت تمشي رجعت خطوتين باسته من خده وطلعت تجري بالرسمة ... وكريم واقف فرحان لفرحتها
_______________________________
نجلاء بعصبية : كل دا تأخير .. عجبك القلق اللي انا فيه .. والزفت اللي ف ايدك دا بيعمل اييه .. وهو مقفول .. انا غلطانة اني نزلتك ..
كنزي : استني ياماما هفهمك
نجلاء : قدامي ع جوا مسمعش صوتك . .
ليل : يادادة نجلاء .. انا وكنزي طلع علينا حرامي .. ولولا الظابط اللي كنزي تعرفه دا مكناش رجعنا الحاجة
نجلاء ضربت بايدها ع صدرها : يلاااهوي ظابط مين يابت اللي تعرفي دانتي مبقالكيش اسبوع هناا .. لحقتي تتعرفي ع حد ..
كنزي : والله مااعرف حد ياماما .. استني هفهمك بس
ليل : انا خربت الدنيا ولا ايه
نجلاء : تفهميني ايه انطقي
كنزي : دا الظابط صاحب زين اللي اسمو حازم ياماما .. روحنا نعمل محضر لقيته وهو ساعدني
نجلاء : مانتي ماشية زي الهبلة لازم تتسرقي
ليل : يعني الناس اللي بتتسرق كلهم هبل
نجلاء : لا بنتي لوحدها اللي هبلة
كنزي : بصي بتقول عليا ايه بصي
ليل : خلاص قلبك ابيض .. روحي اللبسي يلا وانا هروح اللبس .. احنا متأخرين اويي
كنزي : زعلانة مني ياماما
نجلاء : روحي اللبسي يلا قبل الناس ماتيجي
كنزي : يعني مش زعلانة مني
نجلاء : لا بس تاني مرة متتأخرش
كنزي باستها من خدها : من عنيا يانوجة قلبي .. اسيبك انا بقا واروح اللبس
_______________________________
حكاية_قمر 💕🌜
بقلم_ياسمين_علي ••
ليل : مساء الخير ... وحشتكم صح
قمر : اتأخرتي اوي كدا ليه
ليل : ماهو لو تعرفي الي حصلنا مش هتقولي كدا
قمر : ايه حصل ؟
ليل : مش طلع علينا حرامية وروحنا القسم .. بصي انا هدخل اخد دش و اللبس كدا واطلع احكيلك
قمر : ماشي ياليل .. بقولك مافيش حاجة عاوزة تقوليلي عليها
ليل بتوتر : ها .. حاجة زي ايه
قمر : أي حاجة عاوزة تقوليلي عليها.. انا هسمعك
ليل : لما يبقا في حاجة هقولك اكيد
قمر : ماشي ياليل
______________________________
احمد : ممكن ادخل
نور : اتفضل طبعا
احمد : الجميل خلص ولا لسه
نور : خلاص فاضلي الفستان
احمد : كل سنة وانتي طيبة ياحبيبتي ..
نور : وانت طيب يابابي .. ودايما معانا وميحرمنيش منك ابدا
احمد : يارب ياحبيبتي .. انا اسيبك تلبسي بقا علشان متتاخريش ..
نور : ماشي
_______________________________
صافي : ايه دا ياماما انتي لسه ملبستيش
هدي : لا ياحبيبتي .. روحوا انتو وانبسطوا .. انا خليني هنا
صافي : ليه كدا بس يا دودو .. تعالي غيري جو انتي مبتخرجيش خالص
هدي : المرة الجاية هاجي معاكم ان شاءالله
صافي : ماشي ع راحتك .. يلا ياسهر علشان منتاخرش ..
سهر : انا خلصت اهو .. مستعجلة ع ايه
صافي : اسر وحشني اوي عاوزة اشوفوا .. ومتشوقة اوي للحفلة اللي اتفقنا عليها
هدي : حفلة ايه
سهر : حفلة العيد ميلاد طبعا .. يلا ياصافي ياحبيبتي قبل ماتودينا ف داهية
صافي : يلا
سائر نازل ببدلة شيك جدا : استنوا انا جاي معاكم
الكل بصله باستغراب
سائر : بتبصوا كدا ليه .. بلاش اجي
سهر : لا طبعا ياحبيبي تعالي
سائر : ماشي يلا بينا
صافي : يلا
_________________________________
وليد : أيوة يا ست سارة .. كل دا بتلبسي ..
سارة : لا انا اهو داخلة ع العربية والله
وليد : فين دا ..
سارة ركبت : اهو جيت
وليد : سااعة ملطوع لحضرتك .. ماكنتي طلبتي اوبر ولا أي حاجة
سارة : كنت عاوزة اروح معاك ياوليد .. مش عاوزة امشي لوحدي
وليد : ماشي ياستي
سارة : مقولتليش ايه رايك ف الفستان
وليد مبصلهاش : اه حلو ممكن نطلع بقا
سارة اتضايقت : ماشي يلا
______________________________
" الناس جت والاغاني شغالة وكل حاجة جاهزة "
ليل واقفة هي وتونة .. اسر راحلهم
تونة : احم احم
اسر : عاملة ايه ياتونة .. وحشتيني والله
تونة : وانت كمان موحشتنيش
اسر : الله يكرم اصلك .. بقولك ايه انتي بتحبي غزل البنات
تونة : أيوة طبعا
اسر : بصي الراجل دا بيعملوا حلو اوي .. روحي خدي منه
تونة بترفع حاجبها : ماتقول انك عاوز تكلم ليل علطول .. بتلف وتدور ليه
اسر : الله ينور عليكي نبييها
تونة : مش ماشية
اسر : براحتك انا قولت اقولك قبل ما غزل البنات يخلص
تونة بصيت ع بتاع غزل البنات ضعفت : طيب انا هروح اجيب بسرعة واجي عيني عليكم
اسر : مستنيكي ياغالية
ليل جاية تمشي
اسر : استني هو انا بوزعها علشان سيادتك تمشي
ليل : عاوز ايه مني
اسر : عاوز اتفق معاكي اتفاق
ليل : اتفاق ايه
اسر : نفتح صفحة جديدة وننسا اللي فات ..
ليل : انت مجنون صح .. يعني امبارح تغلط فيا .. وأنهاردة تقولي صفحة جديدة
اسر : اه اعتبريني مجنون.. قولتي ايه
ليل : قولت بص وراك كدا
اسر بيبص لقي صافي بصاله
ليل : روح شوفها قبل ماتولع فيك .. ومشيت وسابته
صافي : الزفتة دي واقفة معاك بتعمل ايه
اسر : وانتي مالك .. انا مش قولت لما تعقلي تكلميني
صافي : انا عاقلة .. بس اعمل ايه بغير عليك
اسر : متغيريش عليا ياستي
وليد : بتزعقوا ليه كدا
اسر : الحمدالله انك جيت تعالي عاوزك .. خد وليد ومشوا
صافي بعصبية : بصي بيهرب مني ازاي
سارة : انتو متخانقين ولا ايه
صافي : تعالي معايا
سارة : ع فين
صافي : تعالي بس
_______________________________
نور بتسلم ع الناس
سائر : كل سنة وانتي طيبة يانور
نور لفت اتصدمت وعينها لمعت وساكتة .. زين شافها راحلها بسرعة
زين : اهلا وسهلا يااسائر ازيك انت رجعت امتا
سائر : لسه راجع امبارح .. انت عامل ايه يازين
زين : انا كويس ياحبيبي .. اتفضل .. اتفضل
سائر : دي حاجة بسيطة ليكي يانور يارب تعجبك
نور سرحانة
زين : نور خدي الهدية من سائر
نور : متشكرة ياسائر .. عن اذنكم
----------
زين : حازم .. ايه يابني كل دا تأخير
حازم : معلش والله السكة زحمة
سهر : ازيك ياحازم اخبار شغلك ايه
حازم : كويس الحمدالله *شاف كنزي واقفة لوحدها *
طب اسيبكم انا بقا وانطلق شوية
سهر : اتفضل
_________________
حازم : ياتري خلصتي عياط ولا لسه
كنزي اتخضت : حازم
حازم : ايه اتفجعتي
كنزي : لا عادي
حازم : واقفة لوحدك ليه
كنزي : بدور ع ليل .. مش عارفة فينها
حازم : طيب تعالي ندور عليها سوا
كنزي بكسوف : ماشي
حازم سكت دقيقة
حازم : مقولتليش بقا هو دا الفستان اللي الحرامي سرقه
كنزي : اه هو
حازم : مالهوش حق ياخده بصراحة
كنزي : ليه وحش
حازم : لا طبعا جميل اوي ولايق عليكي كمان
كنزي وشها احمر : شكرا
نجلاء : ازيك ياحازم ياحبيبي .. عن ازنك هاخد كنزي وشدتها جامد من ايدها .. قداميي ياختي
كنزي : براحة ياماما ايدي
نجلاء : تعالي هنا .. ايه موقفك مع واحد غريب
كنزي : والله ياماما هو اللي جه وقف معايا
نجلاء : وانتي ياختي متعرفيش تمشي لما يقف معاكي
كنزي : الله ياماما .. دا لسه مساعدني امشي واسيبوا عيب
نجلاء : العيب وقفتك معاه لوحدكم .. عاوزة الناس تشوفك تقول معرفتش اربي بنتي
كنزي : ياماما والله ابدا
نجلاء : تاني مرة متتكررش فاهمة
كنزي : حاضر ياماما
_______________________________
ليل واقفة وصافي وسارة جايين عليها
سارة : عاملة ايه ياليل
ليل : الحمدالله ياسارة كويسة
صافي : يارب دايما ياحبيبتي
ليل : يارب .. عن اذنكم
صافي : راحة فين .. دا احنا جايين نقف معاكي تسبينا وتمشي
ليل : معلش اصل راحة اشوف اختي فين
صافي : تصدقي ياسارة انا نفسي اكل كبدة .. متعرفيش ياليل حد بيبع كبدة حلو
ليل حسيت ان في تلقيح ف كلامها : المطاعم كتير هتلقي فيها
سارة : اكيد دا مش وقته كبدة يعني .. ع فكرة ياليل فستانك حلو اوي .. ممكن تعرفيني جايبة منين
ليل لسه هتتكلم صافي قطعتها : من الوكالة طبعا . . مش كدا ياليل
سارة : في ايه ياصافي !
ليل بتحاول تتمالك أعصابها :
انا هحترم المكان اللي انا فيه و مش هرد عليكي ..
صافي : ليكي حق تحترمي المكان دا وتقدسي كمان .. انتي كنتي تحلمي تعيشي هنا ...
ليل بعصبية : اخررسيي
صافي بعصبية : مش هسكت .. لازم اعرفك حجمك كويس اووي .. علشان متفكريش بعد كدا تبصي لحاجة مش بتاعتك ..
ليل دمعت : ومين قالك اني عاوزة الحاجة دي .. اشبعي بيها
*كريم واقف بعيد وشايفهم وتونة جت تقف جنبه *
سهر : في ايه يابنات صوتكم عالي ليه .. وبصيت لليل من فوق لتحت .. ومين دي
صافي : متشغليش بالك ياسهر .. انا كنت بعلم واحدة الادب بس
ليل : والله ماحد عاوز يتعلم الادب غيرك .. بترفع ايدها علشان تضربها بالقلم
سهر مسكت ايدها : انتي اتجرأتي تمدي ايدك ع بنت الكيلاني
سارة : سهر اهدي وسيبي ليل
سهر : استني انتي . . لازم تعرف مين بنت الكيلاني قبل ماتفكر ترفع صوباعها ف وشها بس مش ايدها
ليل : ابعدي ايدك عني
تونة لسه هتروح كريم مسكها
تونة : اوعي سيبني اقطعهم بسناني
كريم شدها وراحوا علشان ينادي ع حد
سهر : انتي بقا البنت الجربوعة اللي ساكنة ف حارة .. وجاية لجأ هنا انتي واخواتك .. بتطاولي ع اسيادك
ليل : والله ماحد جربوع غيرك انتي وعيلتك اللي فرحانة بيها دي
سهر بعصبية : انا هوريكي ازاي تغلطي .. زقتها ف البسين
ليل وقعت ومش عارفة تعوم
سارة جاية تنزل تلحقها صافي مسكتها
سارة : انتي مجنونة البنت بتغرق .. اوعي كدا
سارة نزلت تلحقها كان كريم وأسر ونور وزين ووليد وتونة جم
اسر : ايه اللي بيحصل هنا
سهر : ليل ياحبيبتي رجلها فلتت بالغلط وقعت وشكلها مبتعرفش تعوم .. وسارة نزلت تلحقها
زين : طيب امسكوها بسرعة
اسر راح يمسك ليل من سارة .. ليل طلعت زقته بعيد عنها وطلعت تجري وهي بتعيط وتونة وراها ..
اسر استغرب وشك ان في حاجة
وليد : هي مالها .. ووقعت ازاي
صافي : ماقولنا غصب عنها الله
سارة بصيتلها بقرف
نور : تعالي ياسارة معايا غيري هدومك
زين : طيب يلا ياجماعة نرجع للحفلة بدل وقفتنا هنا
سهر راحت مسكت ايده : خدني معاك يازين
______________________________
ليل داخلة منهارة وهدومها كلها ماية
قمر بخضة : ايه اللي حصصل .. في ايه
ليل داخلة الحمام ومنهارة من العياط
قمر : افتحي ياليل .. فهميني بس حصلك ايه ياحبيبتي .. ردي عليا
تونة داخلة تجري : هي فيين
قمر : حصل ايه ياتونة قوليلي
تونة : الولية الحرباية اللي برا ضربتها و زقتها ف البسين ياقمر واتلموا عليها
قمر بعصبية : مين دي انطقي
تونة : معرفهاش تعالي معايا اوريهالك
_______________________________
نور ماشية سائر مسك ايدها : نور
نور : خير ياسائر
سائر : كنت عاوز اتطمن عليكي.. انتي بتتهربي مني ليه
نور : انا مش بتهرب . . مش عادتي اني اهرب
سائر : طيب مش حابة وجودي
نور : لا طبعا تنور ف اي وقت .. بس مكنتش متوقعة انك ترجع تاني
سائر : انا كنت عاوز اتكلم معاكي يا نور
نور : بعدين ياسائر .. مش وقته
سائر : انا ماشي .. بس زي ماقولتلك لازم نتكلم .. عن ازنك
_____________________________
تونة : اهي الولية اللي واقفة مع زين دي
قمر شافتها واقفة مع زين اتعصبت اكتر وراحت ليها .. بتخبط ع كتفها
سهر لفت : افندم انتي مين
قمر : عملك الاسود ياحبيبتي .. ضربتها بالقلم وجبتها من شعرها وقعتها ف الأرض وقعدت عليها
سهر : ابعدي عني يامجنونة انتييي عاوزة مني ايه
زين بيشد قمر : انتي اتجنيتي ياقمررر .. ايه اللي بتعمليه دا
قمر زقته جامد : ابعد عن وشاااي..
سهر : اه اه .. سبيني بقا يامجنونة انا عملتلك ايه
قمر : ورحمة ستي مانا سيباكي ..
صافي جاية تجري تلحقها .. تونة مسكتها عضتها من رجلها ومش عاوزة تسيبها وصافي بتصرخ لحد ماوقعت ف الأرض وتونة مسكتها من شعرها هي كمان وصافي بتحاول تبعدها مش عارفة
والكل جه يجري يحوش .. مش عارفين ينقذوا حد فيهم ..
كنزي ونور مسكوا ف قمر بالعافية
وأسر ووليد مسكوا تونة
وزين مسك سهر وهي حضناه وبتتصنع العياط : مين الجربوعة دي يازين .. ازاي تسبها تعمل فيا كدا..
قمر : مين دي اللي جربوعة يابت .. دانتي السته منك ببلاش ف سوق الستات يازبالة .. انا هعرفك مقامك
سهر : زين انت ساكت ليه .. اطردها حالا
قمر بعصبية : دانا مش همشي من هنا غير وانا مقطعاكي بسناني .. يارخيصة يامعفنة
زين : كففااية اللي عملتيه لسه ليكي عين تتكلمي
قمر بعصبية : دانا مش هتكلم وبس دانا هعمل كمان .. وراحة تتهجم ع سهر تاني
سهر استخبت ورا زين وزين وقف قصاد قمر : انتي اتعديتي حدودك بما فيه الكفاية .. وكويس اووي اني مطردتكيش لغاية دلوقتي
احمد : تطرد مين يازين
الكل بصله
احمد : اظاهر انك نسيت كلاميي
سهر : اونكل احمد .. الحقني المجنونة دي بص عملت فيا ايه
احمد : اولا دي مسمهاش مجنونة .. ثانيا قوليلي انتي عملتي ايه يوصلها تعمل فيكي كدا
سهر بتتصنع العياط : انا معملتش حاجة .. قولو يازين
زين : سهر كانت واقفة معايا .. والأستاذة قمر جت مدت ايدها عليها
احمد : دا اللي انت شوفتو .. انما اللي حصل غير كدا .. قولي يا قمر عملتي كدا ليه
قمر : اللي تتجرأ تمد ايدها ع اختي مش اعمل فيها كدا وبس .. دانا اخنقها بايدي دول لو فكرت تلمس شعره من اختي تاني
زين : هو حد جه جنب اختك انتي هتتبلي عليها
تونة بعصبية : لا ياحبيبي مش بنتبلي ع حد .. الحربايتين دول مدوا ايدهم ع ليل ... زقوها ف البسين
زين : هنصدق واحدة كدابة زيك
تونة : سبني يااسر انا هوريلوا مين الكدابة ابو طويلة دا
احمد : انا مصدقهم .. ايه اللي هيخلي قمر تعمل كدا من غير سبب
سهر : يعني حضرتك مكدبني ومصدقها هي
احمد : قمر مبتكدبش
سهر : يبقا انا اللي بكدب .. يلا بينا ياصافي .. عن اذنكم
زين بص لابوه وقمر بغضب وراح ورا سهر
وقمر خدت تونة وراحت لليل .. والكل طلع والناس مشيت
________________________________
قمر : ليل ياحبيبتي حقك رجع ..
تونة بتضحك : داحنا ادناهم حتة علقة ..
كنزي : انا مش عارفة ايه حصل .. بس متزعليش نفسك
" ليل عيطت اكتر "
قمر حضنتها : ياحبييتي .. ونبي متعملي ف نفسك كدا .. والله اروح اضربهم تاني
تونة : خلاص بقا يابت .. طب اروح افقعلك عينها .. بس افقعلك انهو منهم دي بأربعة وأربعين
ليل ضحكة والكل ضحك
قمر : أيوة كدا .. لا عاش ولا كان اللي يزعلك وانا موجودة .. يلا قومي اغسلي وشك ..
ليل حضنت تونة وقمر : ربنا يخليكم ليا
قمر : يارب ياحبيبتي .. تعالي ياكنزي انتي كمان
كنزي طلعت تجري حضنتهم
______________________________
اسر : يعني ايه سارة مقالتلكش حاجة .. انا عاوز افهم ايه اللي حصل
وليد : معرفش يااسر متكلمتش وانا مردتش اضغط عليها علشان كان شكلها مضايق .. نبقا نعرف بعدين .. روح نام انت بقا تصبح ع خير
اسر : وانت من اهله .. سلام
______________________________
تونة : بصي ياقمر حلوة الرسمة دي
قمر : اه جميلة اوي .. دا كريم اللي رسمها
تونة : اه هو .. اتحايل عليا علشان يرسمني
قمر : يابت
تونة : مش مصدقاني ولا ايه
قمر : لا طبعا .. انا هروح اعمل حاجة نأكلها
تونة : يااريت انا جعانة
قمر : من عنيا ياحبيبتي
تونة : ليل .. بت ياليل
ليل : عاوزة ايه ياتونة .. انا مش فايقالك
تونة : لا فوقيلي ياختي .. بصي كريم رسم دي ليا وفرحت بيها .. وانا مش عارفة افرحوا ازاي فكري معايا
ليل : وانا هعرف منين
تونة : مانتي مقطعة السمكة وديلها مش عاوزة افضحك خليني ساكتة
ليل : اه وانتي يابت بتسكتي فعلا ومفضحتنيش
تونة : انا وغلاوتك ماحصل . . يلا ساعديني بقا
ليل : قومي هاتي شنطتي
تونة : خدي اهي
ليل طلعت شيكولاتة : دي كنت جيبهالك .. بس هي من نصيبوا ..
تونة : انا مش عاوزة افرحوا اوي يعني . . هاتيها ليا
ليل : هتطمعي فيها ولا ايه .. سبيها لكريم وهجبلك واحدة تانية
تونة : ماشي .. انتي بتكتبي ايه
ليل : بشكره .. كأنه انتي اللي كاتبه يعني .. قال يعني بتعرفي تكتبي ..
تونة : خلصي بقا
ليل : استني الفهالك احسن الورقة تطير .. بس كدا خدي اديهالوا
تونة : دلوقتي
ليل : اه بسرعة قبل ما قمر ترجع
تونة : ماشي هروح بسرعة واجي
____________________________
زين واقف بالعربية قدام الفيلا ومحتار مش عارف ليه ابوه بيعمل كدا مع قمر .. وليه هو بيكرهه قمر ..
نور ف اوضتها بتعيط .. وبتفتكر اللي كان بينها وبين سائر . . ومش مصدقة ان امنيتها اللي اتمنت الصبح اتحققت
اسر ف اوضته بيحاول ينام مش عارف و مضايق علشان اللي حصل مع ليل .. وحاسس ان هو السبب .. ونفسه ينزل يسألها ويعرف منها ايه اللي حصل
___________________________
تونة دخلت أوضة كريم
تونة : كريم .. كريم انت هنا .. شكله مش موجود.. انا احط الشيكولاتةة وامشي
حطيت الشيكولانة .. شافت رسمة بتمسكها
تونة : الله مين الست الحلوة دي .. بصيت حواليها .. مالكيش دعوة ياتونة .. اخرجي قبل ماحد يشوفك
بتحط الرسمة .. ايدها خبطت ف كوباية الماية وقعتها ع الرسمة باظت
تونة اتخضت : ايه اللي عملتوا دا .. اعمل ايه دلوقتي .. بتمسك الصورة تمسحها اتقطعت ف ايدها ...
كريم دخل شاف رسمة امه ف ايدها مقطوعة
___________________________
ياتري قمر هتعمل ايه ف المصيبة الجديدة اللي تونة جبتهالها ؟ ... هنعرف ف الاجزاء الجاية تابعوا
_________________________________
حكاية_قمر💕🌜
بقلم_ياسمين_علي ••
● الجزء التامن ●
حكاية_قمر 🌜💕
بقلم_ياسمين_علي ••
نسترجع مع بعض آخر أحداث الجزء اللي فات ..
تونة بخضة : ايه الي عملتو دا .. اعمل ايه دلوقتي .. بتمسك الصورة تمسحها اتقطعت ف ايدها..
كريم دخل شاف رسمة امه ف ايدها مقطوعة
كريم بعصبية خد منها الرسمة وزقها جامد .. وقعت ع الأرض .. ومسك الرسمة يبصلها و يعيط ( كان رسمها وحطيتها جنبه علشان يحس انها لسه موجودة ) افتكر الحادثة وكأن مامته راحت منه تاني ..
تونة بخوف : انا مكنش....
كريم صرخ جامد وكسر ف الحاجة
زين جاي يدخل اوضته سمع صوت كريم طلع يجري
زين مسك كريم : اهدي يااكررريم اهدي .. مالك ياحبيبي حصل ايه
وكريم مازال يصرخ ويعيط
زين لقي تونة قعدة ف الأرض خايفة .. ساب كريم وراح ع تونة والشر طالع من عينه
زين مسك تونة جامد : انتي السبب عملتيلوا ايييه ..
تونة : والله مكنش قصدي والله
زين بعصبية : اخرررسييي.. تعالي معايا .. وشدها من ايدها جامد نزل بيها
_____________________________
قمر طالعة من المطبخ وجايبة الاكل
قمر : يلا يا ليل تعالي كلي .. اومال فين البت تونة
ليل ماسكة الموبايل ومش مركزة
قمر : انتي يابنتي سيبي اللي ف ايدك وردي عليا فين اختك
ليل : ايه ياقمر .. بتقولي حاجة
قمر : يلااهوي عليا.. بقولك فين تونة
ليل بتوتر : اا .. مش عارفة ممكن تكون دخلت الحمام ولا حاجة
قمر : حمام ايه .. الحمام فاضي ..
الباب بيخبط جامد
ليل : مين هيخبط كدا !!
قمر : مش عارفة .. استني نشوف .. استر يارب
فتحت الباب
زين حدف تونة ع الأرض جامد وليل طلعت تجري حضنتها وقمر واقفة مش مستوعبة اللي بيعملوا
زين : انا صبرت عليكم بما فيها الكفاية .. انما تتعدوا حدودكم دا اللي مش هسمح بيه ابدا.. انتو فاهمين
قمر بعصبية : انت ازاي تمد ايدك ع اختي بالشكل داااا !!!
زين : لما اختك تكون مش متربية يبقا واجبي اربيها
قمر : انت انساان مرريض وانا اختي متربية غصب عنك وعن اي حد ..
زين : اتكلمي عدل احسنلكك
قمر : عاوزني اشوووفك عامل كدا ف اختي واسكتتتت .. انا كل دااا بس محترمة صاحب البيت اللي قعدة فيه
زين : وانا كلللل دا سايبكم علشان صاحب البيت .. مستحمل قرافكم وراميتكم عندنا بس علشان صاحب البيت .. بس توصل انكم تأذوا حد من اخواتي دا ساعتها مش هعمل حساب لأي حدد
قمر : محدش جه جنبك انت ولا اخواتك.. انت اللي بتتلكك .. ااه محروق اوي من اللي عملتوا ف حبيبت القلب وانت واقف تتفرج
زين : حسابك معايا ف دا بعديين .. لما اطمن ع اخويا الأول
قمر : مش هتقدر تعملي أي حاجة .. والبيت اللي بتهددنا بيه دا انا مش عاوززة ..
زين : ياااه دا احسن خبر سمعته من يوم ما دخلتوا
ليل بعصبية : انت فاكر نفسك اييه .. ازاي تعاملها بالأسلوب دا .. انت معملتش حساب ان ديي طفلة حتي ... عملت ايه لكل دااا
زين بعصبية: اساليها عملت ايييه ف كريييم .. لو حصله حاجة مش هرحمكم انتو فااهمييين .. ومشي
قمر : كرريمم !! طلعت تجري ع تونة .. انتي عملتي ايه ف كريم ياتونة ردي
تونة بتعيط : انا .. انا معملتش .. مكنش قصدي والله ياقمر .. صدقيني مش بكدب
قمر حضنتها : اهدي طيب ياحبيبتي .. محدش هيقدر يعملك حاجة انا جنبك.. اهدي .. انا عاوزة اعرف بس ايه وداكي لكريم
ليل : انا هقولك يااقمر
قمر : انتي عارفة .. قولي ساكتة ليه
_______________________________
كريم ف الأوضة بيعيط وبيبص ع الرسمة ومتعصب اوي من تونة فاكر انها قصده تضايقه وتبوظله الرسمة .. لحد ماشاف الشيكولاتة واقعة ف الأرض وعليها ورقة مكتوب فيها ( شكرا علي رسمتك ليا ياكريم )
كريم بدء يفهم ان تونة مجتش مخصوص علشان تضايقه .. وأنها جت علشان تديلوا شيكولاتة .. وزعله منها قل
زين دخل حضنه : خلاص ياحبيبي كل حاجة وحشة هتنتهي .. هيرجعوا ماكان ماجم ومش هسمح بوجودهم هنا تاني ابدا.. كل حاجة هترجع زي ماكانت واحسن لما يمشوا
كريم أتضايق من كلامه وزقه ونزل يجري
زين : كريييم . . كريييم
__________________________________
تونة : والله دا اللي حصل ياقمر ..
ليل : وهي هتبوظ رسمت مامته ليه يعني .. انا بنفسي عطيها الشيكولاتة
قمر : خلاص خلاص .. مصدقاكم .. قوموا يلا حضروا حاجتكم علشان هنمشي من هنا
ليل : هنروح فين احنا مالناش مكان غير دا
قمر : اسمعي الكلام ياليل .. انا مش هقدر استحمل اشوف البني ادم دا تاني .. قومي لمي حاجاتك
ليل : طب استني الصبح.. لما عمو احمد يقوم نقولو
قمر : لاا مش هستنا علشان مش هيخليني امشي . . وانا مبقتش قادرة استحمل .. قومي بقا
ليل : حاضر ياقمر
قمر قامت تحضر الحاجة وبدءت تعيط ع اللي بيحصل معاها هي وأخواتها ومش عارفة تعمل حاجة .. الباب خبط راحت تفتح وبتمسح دموعها
كريم دخل وزين واقف بعيد
تونة جت تجري وبتعيط : والله ياكريم مكنش قصدي انا كنت عاوزة اديك الشيكولاتة راحت الماية وقعت غصب عني والله والله .. متزعلش مني
كريم مسح دموعها و ابتسملها
تونة بفرحة : يعني انت مش زعلان مني .. بصي ياقمر هو مش زعلان مني خلاص
قمر فرحت وحضنت كريم : انا اسفة ياحبيبي لو كان وجودنا اتسببلك ف زعل .. بس والله هي مكنش قصدها .. انا محبش اشوفك زعلان ابدا .. انت عارف غلاوتك عندي ياكريم
" وزين واقف بيتفرج ومستغرب من طريقتها مع كريم وطريقته هو كمان معاها باين ان هو بيحبها "
ليل : انا حضرت حاجتي يا قمر
قمر : ماشي يا ليل .. كريم ياحبيبي خليك قاعد مع تونة .. لحد مااحضر حاجتي انا كمان ..
كريم مسك ايدها قبل ماتمشي وبصلها بزعل
قمر : انا همشي بس هاجي اطمن عليك .. مش هسيبك
كريم هز رأسه بالرفض وفضل ماسك ايد قمر
ليل : دا عاوز ايه دا انا مش فاهمة
قمر : مش عاوزنا نمشي
ليل : بجد .. طب اهو بقا حد طايقنا وعاوزنا نقعد خلينا
قمر : وبنسبة لطائر البطريق اللي بيتلككلنا دا هستحملوا ازاي
" زين سمعها وهو واقف بعيد ورفع حاجبه وكريم شافه وكتم الضحك "
ليل : ياستي كبري دماغك منه .. عمو احمد عاوزنا يبقا نقعد .. وبعدين احنا هنمشي ف الوقت دا ازاي لوحدنا
تونة : انا عاوزة افضل هنا يا قمر .. ومش هعمل حاجة تانية خالص
قمر : امري لله هقعد علشان خاطر كريم
ليل : بصي يا تونة هتقعد مش علشانا احنا
قمر : بس عندي شرط قدامكم كلكم اهو .. قريب هنمشي من هنا ..
ليل : يوووة هنرجع الحارة تاني
قمر : لا مش هنرجع الحارة . . انا هدور ع بيت تاني
ليل بفرحة : بجد ياقمر .. طب هتجيبي فلوسه منين
قمر : ربنا يحلها .. متشغليش بالك .. يلا ياكريم روح ع اوضتك علشان تنام ياحبيبي
كريم خرج
قمر : وانتي وهي يلا انتو كمان ع النوم .. مش عندك كلية بكرا
ليل : لا انا مش هروح بعد اللي حصل فيا دا
قمر : نعم ياختي دانتي تروحي وتحطي صوبعك ف عينها كمان . . دا هي اللي المفروض تتكسف مش انتي
ليل : ماشي ياقمر .. تصبحي ع خير
قمر : يلا وانتي من اهله
_________________________________
كريم ماشي جنب زين
زين : مبسوط دلوقتي .. يعني انا اعمل كل دا علشانك .. وف الاخر انت تصالحهم واطلع انا غلطان
كريم :....
زين : وبتزقني كمان علشانها .. خلاص حبك ليا قل بعد ما ست هانم دي جت وبقيت تحبها هي اكتر
كريم : ...
زين : انا مش فاهم هي عملالكم ايه علشان الكل يحبها كدا .. مش عارف العيب فيا ولا فيها بصراحة
كريم : .....
زين : ع العموم انا مش زعلان منك .. انت طلعت أجدع مني .. انا اتغبيت وكنت همشيهم ف الوقت دا لوحدهم .. بس لما شوفتك بالشكل دا مقدرتش استحمل .. وبصراحة مصدقت انفجر فيها .. يلا اطلع نام انت بقا قبل مايصحوا
كريم ابتسم ومشي
..وزين فضل قاعد منمش
______________________________
سامح : نجلاء .. اصحي يانجلاء
نجلاء : مين .. سامح .. انت جيت امتا
سامح : لسه واصل اهو
نجلاء : طب ياحبيبي تعالي ناملك شوية قبل مااستاذ احمد يصحا
سامح : لا مش عاوز .. اصحي بس انتي عاوز اتكلم معاكي
نجلاء : خير ياسامح قول
سامح : بنتك جالها عريس
نجلاء بفرحة : بجد .. دا يبقا مين بقا
سامح : ابن صفاء
نجلاء : صفاء .. صفاء مين
سامح : لا ركزي معايا شوية صفاء اخت جوز روحية اختي .. فاكرها ولالا
نجلاء: ااه صفاء .. بس اسمع ان ابنها ف الجيش
سامح : ماهو هيخلص جيشه خلاص
نجلاء : طب وانت رأيك ايه
سامح : هو انا اللي هتجوز ولا البت
نجلاء : لا اقصد يعني انت شايف ايه ..
سامح : انا عن نفسي شايف انهم ناس محترمة ومناسب وروحية كمان بتقول الواد محترم
نجلاء : وكمان كنزي هتتخرج السنادي .. يعني مافيش حاجة نرفض علشانها .. يبقا تتصل باختك دلوقتي تقولها موافقين
سامح : ايه اللي بتقوليه دا يا نجلاء .. مش لما ناخد رأي البت الأول ..
نجلاء : وايه الي هيخلي البت ترفض
سامح : نسألها بردك واللي تقولو هيمشي .. هو انا مهصدق يعني . . كنزي الف واحد يتمناها
نجلاء : ماشي ياخويا بس انا عاوزة افرح ببنتي
سامح : هنفرح لما ربنا يأذن .. المهم دلوقتي لما تصحا خديها واحدة واحدة كدا وقوليلها وشوفي رأيها ايه
نجلاء : وانا هستنا لما تصحا .. دلوقتي نصحيها
سامح : لالا .. سبيها نايمة.. لما تصحا براحتها قوليلها .. قومي حضريلي لقمة اكلها .. عبال مالاستاذ احمد يصحا
نجلاء : من عنيا
سامح : تسلميلي
______________________________
صافي : انتي منمتيش
سهر : ومين يجيلوا نوم بعد اللي حصل امبارح
صافي : ياما نفسي امسكهم كلهم اولع فيهم .. وبالذات البت الصغيرة دي .. اااه منها انا رأسي هتنفجر من امبارح .. ورجلي علمت من عضتها
سهر : عيلة صغيرة تعمل فيكي كدا
صافي : دي عيلة دي .. لا وكله كوم واونكل احمد كوم .. انتي شوفتي نصرهم علينا ازاي .. دا شوية وكان هيطردنا
سهر : ماهو انا مشيت قبل ماشكلنا يبقا وحش اكتر من كدا
صافي: وهنعمل ايه .. انا لازم اخد حقي .. انا هعرف بابا وهو يتصرف مع الأشكال دي
سهر : حيلك حيلك .. تعرفي مين انتي هبلة .. انتي عارفة فاروق لو عرف ان حصلك حاجة هيتجن.. وهيروح يتخانق مع احمد واللي شوفتوا من احمد واضح ان البت دي مكانتها كبيرة عنده يعني ممكن يخسروا بعض عادي جدا علشانها .. وساعتها بقا ياحلوة تنسي استاذ اسر بتاعك دا خالص
صافي : لا طبعا مش هنسا اسر مقدرش
سهر : يبقا تسكتي خالص ومتبينيش حاجة .. لحد ماشوف انا هعمل ايه مفهوم
صافي : حاضر .. بس انا رأسي وجعاني اويي
سهر فتحت الدرج وطلعت علبة برشام : خدي دا مسكن حلو كنت باخده .. هيريحك
صافي : متشكرة اوي يا سهورة ياحبيبتي .. انا مش عارفة ليه كل العمات ميبقوش حلوين زيك كدا
سهر : حبيبتي ربنا يخليكي ليا
صافي : انا هاخد المسكن دا وهروح انام
سهر بابتسامة : بالشفاء ياحبيبتي .. بالشفاء
________________________________
فريال : زومي .. اصحي ياحبيبي .. الضهر هيأذن
حازم بيتمطع : صباح الخير ياماما
فريال : صباح النور ياحبيبي .. يلا أصحا الفطار جاهز .. افطر معايا قبل ماتروح شغلك
حازم : لا شغل ايه انا واخد اجازة انهاردة .. هروح اشوف زين
فريال : ماله زين مش كنت معاه انبارح ف العيد ميلاد
حازم : اسكتي ياماما ع اللي حصل امبارح .. العيد ميلاد اتحول لمعركة
فريال : ياساتر يارب معركة ايه
حازم : انا هدخل اخد شاور بسرعة ولما اخلص احكيلك
فريال : طب استنا بس عاوزك
حازم : ايه ياماما خير محتاجة حاجة
فريال : اه هي حاجة واحدة محتاجها
حازم : ايه هي
فريال : نفسي اشوف عيالك قبل مااموت
حازم : بعد الشر عنك يافوفا
فريال : لا مش شر الموت علينا حق.. وانا عاوزة افرح بيك.. عجبك قعدتك دي اللي قدك متجوزين ومخلفين وعيالهم ف المدارس كمان
حازم : فين دا .. ما زين اهو زي
فريال : ماليش دعوة بزين انا ليا بيك .. عاوزة افرح بيك
حازم : ياحبيبتي ان شاءالله نفرح كلنا بس هي تيجي
فريال : وهي اللي بتيجي ولا احنا اللي بنروحلها .. لو هتستنا يبقا مش هتتجوز ..سبني انا اشوفلك واحدة .. البنات كتير قرايبنا وجيرانا .. سبني انقيلك
حازم : لا ياماما ونبي سبيني انا اختار بنفسي ..
فريال : سيبتك كتير اوي ..
حازم : حبة كمان علشاني
فريال : ماشي ياحازم بس يكون ف علمك لو مشوفتش انت واحدة بسرعة .. هترجع تلقيني عازمة الناس وجايبة المأذون والعروسة وهحطك تحت الأمر الواقع .. اه انا جبت اخري منك
حازم بيضحك : قادرة و تعمليها
فريال : مبهزارش ياحازم اديني نبهتك .. وانت حر بقا
حازم باسها : ونبي قمر وانتي متعصبة كدا .. حاضر ياستي هفرحك بيا ان شاءالله
فريال بفرحة : بجد ياحازم .. طب امتا امتا قولي وفرحني
حازم : مش عارف امتا بس هيحصل ان شاءالله .. تسمحيلي ادخل الحمام بقا
فريال : ادخل ياحبيبي
فريال بتكلم نفسها : طلما قال كدا يبقا اكيد ف حد ف دماغه اكيد ... يارب يسعدك يابني
____________________________
ليل : قمر انا راحة الكلية ها
قمر : خليبالك من نفسك ياحبيبتي
ليل : حاضر .. يلا سلام
ليل ماشية عربية اسر وقفت قصادها
ليل من غير ماتبصله : افندم
اسر : اركبي
ليل : لا
اسر نزل من العربية : عاوز اتكلم معاكي ممكن
ليل : مش عاوزة اتأخر ع الكلية
اسر : مش هأخرك اركبي يلا
ليل ركبت العربية ومشوا وقمر متابعها من بعيد
تونة : بتعملللي ايييه
قمر : ياختااي بتطلعي منين .. انتي مش كنتي نايمة
تونة : حاجة كدا قالتلي اصحي يابت ياتونة .. علشان تشوفي الكارثة دي ..
قمر : هو في كارثة غيرك هنا
تونة : بقا كدا ياقمر .. بقا انا اقولك .. علشان تمسكيها تديها قلمين .. وانتي واقفة تتفرجي عليها وهي بتركب مع الواد المز دا العربية وتجبلنا العار
قمر : عار ايه يام لسانين انتي .. وبعدين دي ركبت العربية معاه .. مش طلعت اوضته وحطيتله شيكولاتة
تونة : هاا
قمر : أيوة اعملي نفسك من بنها بقا ..
تونة : مين انا
قمر : لا انا .. حسابك معايا بعدين .. يلا علشان تفطري قدامي
تونة : حاضر
_______________________________
ليل : نعم عاوز ايه
اسر : عاوز افهم ايه حصل امبارح
ليل : لا والله متعرفش حصل ايه ..
اسر : لو اعرف هسألك ليه
ليل : صح مالكش تسالني.. روح اسأل الحلوة بتاعتك .. عن اذنك
اسر مسك ايدها قبل ماتنزل : استني .. انا لسه مخلصتش كلامي .. انا مش هكلمها ولا هسألها انا عاوز اعرف منك انتي .. صافي هي اللي زقتك امبارح ف البسين ولالا
ليل : مش صافي الزفتة اللي كانت معاها بامر منها طبعا
اسر : وهما يعملوا معاكي كدا ليه
ليل : بسببك
اسر : بسببي ليه انا مقولتش لحد يزقك
ليل : مقولتش لحد يزقني اه.. بس روحت عرفت الحلوة بتاعتك اني كدبت عليك واني من حارة
اسر : انا .. والله ماحصل محدش عرف الموضوع دا غير وليد ودا لانه صاحبي ووليد استحالة يقولها
ليل : اه فعلا استحالة يقولها وهي عرفت من الهوا .. ع العموم ميهمنيش تعرف منك ولا من غيرك انت نفسك متهمنيش لا انت ولا هي .. وفهمها انها تبعد عني احسنلها .. سلام
اسر : ليل .. ياليل .. اوووف
طلع موبايله واتصل بواليد
اسر : أيوة.. انت فين .. ف البيت .. تمام انا جيلكك .. سلام
__________________________________
حكاية_قمر 💕🌜
بقلم_ياسمين_علي ••
كنزي : صباح الخير
نجلاء وعايدة : صباح النور
كنزي مسكت خيارية تأكلها: انا جعانة اوي .. حطيلي اكل
نجلاء : عنيا ياحبيبت قلبي .. احطلك ايه
كنزي باستغراب : حبيبت قلبك ..
نجلاء : ونور عيني كمان
كنزي : حيث كدا بقا انتي تعمليلي بيض بالعجوة من ايدك الحلوة دي
نجلاء : بس كدا انتي تأمري
كنزي : آمر ! هو ف حاجة ياماما
نجلاء : حاجة .. حاجة ايه .. هو انا علشان هعملك الحاجة اللي تحبيها هيكون ف حاجة
كنزي : مش مرتاحة
عايدة : بصراحة كدا يابت يا كنزي .. انتي جيلك عريس
كنزي : نعم
نحلاء : بس يللي تتشكي ف لسانك انتي اسكتي .. تعالي ياكوكي معايا نتكلم تعالي
كنزي : عريس ايه ياماما اللي عايدة بتقول عليه
نجلاء حضنتها : كبرتي ياكنزي وأخيرا هفرح بيكي ... هتوحشيني والله
كنزي : في ايه ياماما متفهميني
نجلاء : عمتك فتحت ابوكي ف موضوع خطوبتك ع ابن صفاء .. الموضوع واقف ع موافقتك ياجميل
كنزي : ابن صفاء مين .. خالد !!
نجلاء بفرحة : أيوة خالد .. طلبك بالاسم باينه بيحبك
كنزي : بس انا مبحبهوش
نجلاء : مع الوقت ياحبيبتي هتحبيه
كنزي : لا ياماما لا .. انا اصلا مش عاوزة اتجوز
نجلاء : ليه يعني هتخللي جنبي
كنزي : اه بالظبط كدا .. عاوزة افضل جنبك.. هو انا لحقت أشبع منكم علشان ترجعوني
نجلاء : لا ياحبيبتي وانتي علشان تفضلي جنبي متتجوزيش .. لا انا عاوزة اطمن عليكي انا ليا غيرك
كنزي : وانتي هتطمني عليا لما اكون انا ف حتة وانتو ف حتة
نجلاء : هتكوني مع جوزك . . وعمتك هناك
كنزي : انا لا عاوزة دا ولا دا انا عاوزكم انتو تكونوا جنبي .. ومش هتجوز وارجع واسيبكم .. عاوزين تفرحوا بيا .. افرحوا بيا هنا
نجلاء : طيب اقولك .. انا ممكن اكلم سامح اخليه يكلمهم و يقنعهم تسكنوا هنا وتبقي جنبنا
كنزي : ها .. لا مانا مش عاوزة خالد اصلا
نجلاء : اومال عاوزة مين ياعين امك
كنزي : مش عاوزة حد ياماما
نجلاء : لا انا مبقتش فهماكي .. عملتي حجة المسافة ومش عاوزة تبعدي عننا بس الموضوع مش كدا .. الحكاية فيها آن
كنزي : مافيش حاجة ياماما .. بس انا مش عاوزة دلوقتي
نجلاء : لا لما يجي ابوكي بقا ..هو يكلمك علشان انا كدا هتشل
كنزي : طب اعمليلي البيض بالعجوة طااه
نجلاء : مافيش بيض بعجوة هو بيض سادة ان كان عجبك
كنزي : يوة يوة .. رجعتي ف كلامك ف ثانية مش كنت حبيبتك
نجلاء : حبك برص اسكتي انتي قهراني
كنزي : انا عملت حاجة ياماما
نجلاء : عايدة اعمليلها بيض
كنزي : كمان هتخليها هي تعمل
نجلاء : مش عجبك تعالي انتي اعملي
كنزي : اهئ اهئ كل دا علشان سي زفت خالد .. مش عاوزة اكل خالص ها
عايدة : هي قالتلك ايه
نجلاء : مش موافقة .. وشكلها هتتعبني معاها وانا مش ناقصة مناهدة
عايدة : وقالتلك مش موافقة ليه
نجلاء : شوية علشان المسافات وشوية مش عاوزة دلوقتي .. مش فاهملها حاجة
عايدة : ايوة أيوة .. تلقي ف حد بالها ياختي ازاي مش فاهمة
نجلاء : لا طبعا احنا معندناش الكلام دا وهي عارفة
عايدة : والله انا قولت افهمك بس .. شوفي انتي بقا
نجلاء بدءت تفكر ف كلام عايدة
نجلاء : وسعي كدا
عايدة : انتي هتعملي ايه
نجلاء : هعملها البيض بالعجوة اومال هسيبها من غير متأكل يعني
______________________________
اسر : اصحا يلا انت ليك نفس تنام
وليد : في ايه يااسر مالك
اسر : انت اللي روحت قولت لصافي ع ان ليل كذبت عليا
وليد : يوووة يااسر قولتلك قبل كدا .. انا مبقولش حاجة عنك لصافي افهم
اسر : اومال مين
وليد : انا اش عرفني هو مافيش غيري يعرف يعني ..
اسر : انا محكتش لغيرك اصلا
وليد : وانا مقولتش لحد حاجة مش مصدقني متبقاش تحكيلي حاجة طلما بتشك فيا
اسر : مش بشك فيك بس مش عارف بجد ومخنوق .. طب قولي عرفت منين .. فكر معايا ازاي صافي تعرف ان ليل من حارة ومش قريبتنا زي مافهمتها
وليد : مانت يافالح لو بتفكر هتفهم ان عرفت من سهر
اسر : سهر وهي تعرف منين سهر هي كمان
وليد : شكلك شيلت زين من حساباتك خالص
اسر : يعني زين حكي لسهر و
وليد : وسهر حكيت لصافي واتفقوا ع ليل والباقي انت عارفه
اسر : والعمل دلوقتي انا اللي شربت الليلة
وليد : ليلة ايه مش فاهم
اسر : يعني ليل مقتنعة ان انا اللي عرفت صافي .. ومش مصدقاني
وليد : وفيها ايه انت مش قولت هتكبر دماغك منها
اسر : اه هكبر دماغي منها طبعا .. بس بردك مبحبش أتفهم غلط
وليد : ماتجيلي دوغري يا اسر .. مش مرتاح لحوار أتفهم غلط دا
اسر : مافيش حاجة لو في هقولك
وليد : وانا هستنا اسمعك
اسر : قولي انت عملت ايه مع سارة
وليد : هعمل ايه يعني
اسر بيتخن صوته بتر يقة : هعمل ايه يعني ...ايه يلا التناحة دي
وليد : في ايه مالها سارة .. وصلتها امبارح وخلصنا
اسر : مش تطمن عليها يابني تعرف كويسة انهاردة ولالا
وليد : واطمن ليه انا مالي .. وهي عملت ايه علشان تبقا مش كويسة اصلا .. فكك فكك .. عاوزين نسهر بليل جهز نفسك بقالنا كتير مسهرناش
اسر : لا بقولك ايه خليها يوم تاني .. البيت متلبش لوحده اصلا .. مش ناقصة خناقات تاني مع ابويا
وليد : ماشي ظبط امورك وقولي
اسر : ماشي .. انا هخلع اروح اشوف الكلية عاملة ايه
وليد : ابقا سلملي ع الكلية
_________________________________
كنزي ماشية متضايقة ف الجنينة وحازم جاي عليها
حازم : كنزي عاملة ايه
كنزي : كويسة
حازم : هو انتي يابتعيطي ياوشك مقلوب
كنزي : اه عن اذنك بقا .. علشان ماما قالتلي عيب اقف معاك
حازم باستغراب : ماما وعيب !! انتي كام سنة ياكنزي
كنزي : عندي 22 سنة
حازم : اومال طريقتك طريقة واحدة عندها 6 سنين ليه
كنزي : يا سلام هو علشان بسمع كلام ماما ابقا صغيرة
حازم : لا مقصدش بس اصل ... ولا اقولك مع لينا .. انتي مالك بقا متضايقة ليه
كنزي : ماما مردتش تعملي بيض بالعجوة
حازم : وانتي مبتعرفيش تعملي لوحدك ياصغنن
كنزي : مش بيطلع حلو زي ماهي بتعملوا .. انا بحبه من ايدها
حازم : طيب كلي أي حاجة يمكن تعبانة مش هتقدر تعمل
كنزي : لا مش تعبانة كانت هتعملي .. بس كله من الزفت اللي اسمه خالد هو اللي خلها متعمليش
حازم : مين خالد دا اخوكي
كنزي : لا دا العريس
نجلاء طالعة بالأكل شافتهم واقفين اتضايقت وراحت عليهم
حازم : عريس ايه ؟
كنزي : العريس الل...
نجلاء قطعت كلامها : البيض بالعجوة اهو ..
كنزي حضنتها : متشكرة اوي ياماما .. انا عارفة اني مش ههون عليكي ابدا.. لسه هتأكل
نجلاء : انتي هتاكلي هنا ولا ايه .. ادخلي جوا يلا
كنزي : حاضر ياماما
نجلاء : منور ياحازم
حازم : بنورك يادادة .. هو زين صاحي
نجلاء : اه صاحي اتفضل
حازم : خليكي انا هدخل متتعبيش نفسك
نجلاء : زي ماتحب .. عن اذنك
"حازم حس انها اتضيقت من وقفته مع كنزي "
__________________________
نور : عايدة ونبي اعمليلي قهوة
عايدة: حاضر يانور هانم
نور : صباح الخير ياكيمو .. انت بترسم صورة مامي تاني ليه
موبايلها رن
نور : الو مين معايا
سائر : عاملة ايه يا نور
نور اتوترت وقامت من مكانها بعدت عن كريم وهو لأحظ
نور : سائر
سائر : كنت متأكد انك هتعرفي صوتي
نور : عاوز ايه ياسائر
سائر : قولتلك اني عاوز اتكلم معاكي
نور : كلامنا خلص من زمان
سائر : مخلصش يانور لو سمحتي وافقي
نور : ماشي بس هي ساعة واحدة بس و همشي
سائر بفرحة : موافق .. انا هلبس واجي آخدك
نور : لا . .. انا هاجي بنفسي
سائر : زي ماتحبي .. المهم نتكلم
نور : ماشي ياسائر .. باي
سائر : باي
________________________
حكاية_قمر 💕🌜
بقلم_ياسمين_علي ••
نجلاء : انا قولتلك ايه.. انتي مبتسمعيش الكلام ليه
كنزي : والله ياماما انا كنت همشي مش هقف معاه.. بس هو كان بيتكلم
نجلاء : تسبيه وتمشي بردك يتكلم مع نفسه مالكيش دعوة .. والا قسما عظما اشتكي لابوكي وهو يتصرف بقا علشان انا تعبت
كنزي : والله ياماما معملت حاجة .. وحاضر مش هقف معاه تاني خالص
نجلاء : لما اشوف
______________________________
حازم : معقولة يازين .. كنت عاوز تمشيهم من البيت ف وقت زي دا
زين : اللي حصل بقا كنت خايف ع اخويا .. انت عارف ياحازم مصدقنا بقا احسن من الأول
حازم : بردك يازين دول بنات .. ازاي كنت هتعمل كدا .. افرض حد طلع عليهم ولا حصلهم حاجة
زين : مش عاملة فيها بميت راجل .. تورينا هتعمل ايه بقا
حازم : انا مش فاهم انت حطيتها ف دماغك ليه .. وبتتلكك الموضوع مش موضوع اخوك .. انت كل حاجة تحصل مابتصدق تمسك فيها علشان يمشوا .. ماتسيبهم قعدين ف حالهم هنا
زين : مش حاطتها ف دماغي .. بس انت عارف انا مبحبش حد قد اهلي ومش هسمح لحد يأذيهم .. وطبيعي مكنش مرتاحلهم .. حط نفسك مكاني ترضا ناس غريبة يعيشوا في بيتك
حازم : والله لو يوافقوا اخدهم يعيشوا معانا حتي ابقا مطمن ع امي ومتبقاش لوحدها
زين : انت بتتكلم جد !!
حازم : اه بتكلم جد فيها ايه يعني .. مش احسن مايترموا ف الشارع .. وبعدين هما ف ازمة المفروض تقف جنبهم
زين : وانا مالي اقف جنبهم ليه من باقي اهلي
حازم : مش ابوك قال انهم بنات صاحبه
زين : وانا مش مقتنع انا عديت الموضوع وخلاص ..
حازم : بلاش دي.. مش اللي انت مش طايقها دي أنقذت اختك
زين : مايمكن تكون هي اصلا اللي عاملة كل دا
حازم : انت مصمم تكرهها وخلاص .. متنساش ان انا ظابط و ليا نظرة ف الناس .. والبنت دي شكلها محترم وجدعة وبتحب أخواتها بجد .. مش شايف عملت ايه امبارح علشان اختها
زين : شوف انت بتفكرني بافعالها ازاي .. عجبك اللي عملتوا ف سهر
حازم : اه عاجبني .. بنت جدعة خدت حق اختها
زين : حقها من ايه محدش جه جنبها
حازم : ماهي مش مجنونة يازين ولا البت الصغيرة بتكدب ولا كلام سهر دخل دماغي اصلا .. ايه هيودي ليل للبسين اساسا غير لو حد زقها وايه كان مواقفها معاهم وهي متعرفهمش .. فكر شوية هما اتفقوا ع ليل واهي قمر خدتلها حقها
زين : انا زهقت كل لما اكلم حد يدافع عنها .. مش فاهم عملالكم ايه بجد .. دا حتي كريم .. راحلها امبارح ومخلهاش تمشي
حازم : كل دا ميأكدلكش انها انسانة كويسة .. وانك ظالمها
زين : كويسة ولا مش كويسة لنفسها .. انا هبعد عنها وخلاص
حازم : خير ماعملت والله .. ريحتها
زين : انت فاضلك دقيقة وتعملها تمثال هنا
حازم بضحك : لا مش للدرجادي
زين : ياعم اسكت ..
راحة فين يانور
نور : خارجة مشوار كدا ومش هتأخر متقلقش
زين : طيب خليبالك من نفسك
نور : حاضر
زين : ومتبقيش تروحي أماكن شعبية لتجلنا بايدك فيها 3 كمان
حازم : مافيش فايدة فيك
نور : ماشي يا زين باااي بقا
زين : باي ياحبيبتي
________________________________
ليل : انت تاني
اسر : اه تاني وتالت ورابع
ليل : عاوز ايه
اسر : عاوز افهمك اني مش انا اللي قولت لصافي
ليل : يبقا وليد يعني انت السبب بردك
اسر : ولا وليد صافي عرفت من حد تاالت
ليل : اه مانت قايل لكل الناس
اسر بعصبية : يوووة بقا افهمي انا مش السبب
ليل : متتعصبش عليا
اسر : تمام مش هتعصب .. انا اهو هادي خالص .. ممكن تسمعيني بقا
ليل : اتفضل
اسر : بصي ياستي صافي عرفت من عمتها سهر ..
ليل : الحرباية اللي زقتني
اسر : بالظبط
ليل : وهي دي هتعرف منين
اسر : من زين اخويا.. علشان هما شبه بيحبوا بعض ... ف ممكن يكون حكالها ع وجودكم .. وهي حكيت ل صافي .. يعني مش مني
ليل : وانا ايه يثبتلي الكلام دا
اسر : اجبلك امضت صافي ع الكلام دا ولا اعمل ايه يعني
ليل : متعملش حاجة .. قولتلك ولا انت ولا هي تهموني
اسر بعصبية : ولا انتي تهميني .. انا بس مش عاوز أتفهم غلط
ليل : افهم صح ولا غلط مش انا مهمكش خلاص .. ابعد عن طريقي بقا علشان عاوزة امشي
اسر : اركبي انا هوصلك
ليل : لا لا لا مش هركب
اسر : احسن بردك يكش تتخطفي انا غلطان
ليل زقته ع العربية : طب عديني بقا اروح اتخطف
___________________________________
هدي : سائر انت خارج ياحبيبي
سائر : أيوة ف حاجة
هدي : رايح فين
سائر : انتي هتحققي معايا ولا هتحسبيني ع خروجاتي ؟؟؟
هدي : انا مقصدش بس
سائر : اسمعي بقا مش معني اني غيبت سنين ابقا نسيت.. انا منستش ومش هنسا ولا هبقا زي صافي تأقلمت مع الحكاية علشان كانت عيلة .. انا مجبور بس مش اكتر ف ياريت ياررريت تخليكي ف حالك وتبعدي عني .. وكفاية انك كنتي سبب ف حاجات كتير وحشة ليا ... عن اذنك
" هدي عيطت من كلامه وطلعت ع اوضتها "
______________________________
الباب بيخبط
قمر بتغسل المواعين : بت ياتونة افتحي .. انتي يابت ..
طلعت تشوفها فين ..
قمر : ملاك نايمة ملاك يااخواتي ..
الباب خبط تاني
قمر : أيوة استنا جاية
فتحت
قمر واقفة مستغربة
اسر : عاملة ايه
قمر : انا كويسة.. لو جاي لتونة .. ف تونة مش موجودة
اسر فهم قصدها : لا انا مش جاي لحد غيرك
قمر باستغراب : عاوزني انا ! خيير
_____________________________________
ياتري اسر هيكون عاوز قمر ف ايه .. هنعرف ف الاجزاء الجاية .. تابعوا
حكاية_قمر 💕🌜
بقلم_ياسمين_علي ••
تعليقات
إرسال تعليق