 |
(11)
#الاسطى_حور
حور: طب يا ست الرومانسية .. سلام
دخل اياد العربيه وهو بيقول ل حور: هفسحك بس قوليلى الطريق .. انا توهت علشان اجيلك الجامعه اصلا
حور: طب ما تروح بينا على البيت اسهل .. انا تعبانه وعايزه انام
اياد:، ده فى احلامك
وساق العربيه
وسط استغراب تامر .. وغضبه .. انها ازاى سمحت لحد انه يعمل معاها كدا
بص على العربيه وهى بتتحرك ورجع عربيته وساق باقصى سرعه وهو ماشي ورا العربيه
حور: اقف عند كورنيش النيل
اياد: هنا ؟؟
حور: اه.. انزل هات حمص شام
اياد:حاضر
خرج من العربيه وراح للراجل يشترى حمص شام .. وخرجت حور وقعدت على الكورنيش وهى بتتنفس براحه ... قرب منها وهو بيديها كوباية حمص الشام وقال: لسه زعلانه
حور وهى باصه للنيل: مش مهم
اياد: مش مهم ليه ...
حور: بص يا اياد .. انت جيت بعد غيبه ..و عايز تمشي تانى ... لما روحت مع ماما زمان كان نفسي اروح معاك .. بس ماما قالت انها شهر وهترجع وسابتنى مع بابا على امل انها فى يوم ترجع بس مرجعتش واخدتك معاها فضلنا اناوبابا مستنينكم بس مجتوش ... ولما تيجى تقول انك هتمشي تانى ... تفتكر انك لما تقولى كدا هيبقى عادى بالنسبالى
اياد بحزن: سامحينى يا حور .. بس غصبن عنى
حور مسكت ايده : انا مسامحاك انت معملتش حاجه .. ويستحسن منتكلمش فى الموضوع ده .. خلى الفتره اللى هتعدى وانت قاعد معايا افتكرك بيها بحاجه كويسه
اياد ابتسملها بحنيه وهى قالت: كفاية شغل الدراما ده .. قوم نتمشي شويه
تامر شافهم قايمين يتمشوا اتدايق وركب عربيته وروح
وهى كانت ملاحظه ان عربية تامر موجوده علشان كده قامت تتمشي
فضلوا قاعدين شويه على الكورنيش وبعد كدا راحوا اكلوا ايس كريم ... وروحوا
اياد: عارف ان الفسحه مش قد كدا .. وده لانك مش عايزه تورينى الاماكن
حور: بس انا اتبسطت .. وبعدين ما انا مشيتك على الكورنيش
اياد: طب تحبى تاكلى ايه ؟؟
حور: اى حاجه .. انا اصلا مش جعانه ..
اياد:تمام . هبقى اطلب اكل لما نطلع .. يلا
____________________
حور طلعت وطلبوا اكل وكلوا وناموا
__________________ الظهر
حور اتصلت ب كارما: احنا معندناش محاضرات النهارده صح
كارما: تؤتؤ .. والبسي علشان هننزل
حور: هننزل فين؟؟
كارما: هجيب شوية حاجات للخطوبه .. وعايزاكى معايا فيه مشكله
حور: لا .. ننزل ماشي .. بس على جاي معاكى؟؟
كارما: تؤتؤ .. نص ساعه وتجهزى
حور قفلت معاها وقامت جهزت
بعد نص ساعه
حور : اياد انا هنزل مع كارما نشترى حاجات عايز حاجه من برا ؟؟
اياد: لا .. شكراً .. خلى بالك من نفسك
اه .. استنى
قام وطلع فلوس من المحفظه وقال: خليهم معاكى علشان لو حبيتى تجيبى حاجه
حور بصتله بابتسامه وقالت: احم .. شكراً .. انا معايا فلوس كفايه ..
اياد حس انها محرجه تاخد فلوس منه
كانت بتلبس الكوتشي وحاطه شنطتها جمبها .. مسك الشنطه وحط فيها الفلوس وقال بضحك: انا زى اخوكى برضوا .. ده انا كنت بجبلك بمصروفى زمان مصاصات ولبان
حور ضحكت لما افتكرت وقالت: كنت بتكلهم معايا على فكره
اياد: لسه فاكره
قامت وهى بتمسك شنطتها وقالت: فيه ذكريات مينفعش تتنسى .. لانك بتبنى عليها ذكريات تانيه يا اياد
قبل ما تخرج من البيت بصتله وقالت: صحابك من ايام ابتدائي مثلا .. سلام
____________
كارما: نص ساعه و١٠ دقايق و٢٥ ثانيه
حور: ياه .. كل ده تاخير يا كارما .. مش معقول. . يالا يا ماما هنتاخر مش كدا
كارما بصتلها بذهول وقالت: انا اللى اتاخرت
حور: هو انتى علشان عروسه تتاخرى براحتك .. فوقى يا ماما ويالا
كارما ماشيه جمبها وبتكلم نفسها: يعنى انا اللى اتأخرت مش هيا ... بت يا عطيه تعالى هنا
حور كانت عند الورشه بصت للعمال وقالت: عاملين ايه يرجاله
_ الحمد لله يا اسطى عطيه
حور: محتاجين اى مساعده .. الايراد بتاع النهارده كله قسموه على بعض من غير ما تعينوا نصيبى .. تمام .. ولما اجى بليل هكمل شغل معاكوا .. سلام
كارما: يالا .. كل ده رغى
حور بصتلها وقالت: يالا الاتوبيس هيفوتنا
كارما: اشمعنا اتنازلتى عن نصيبك النهارده
حور: قولت هما اولى وكمان وانا خارجه اياد ادانى فلوس وشكلهم كتير فقولت هيكفوا يعنى
كارما:امممم .. طيب يالا
راحو المول وبداو يشوفوا الفساتين
حور: على ما اعتقد هيكون حلو عليكى
كارما: وعليكى هيكون قمر
حور: بس انا مش هلبس فستان فى خطوبتك .. وبعدين هيكون اغلب اللى المنطقه موجودين
كارما:تمام .. هاخده .. تعالى نحاسب
بعد ما حاسبوا
حور: ها كدا خلصتى اظن
كارما: لسه هجيب فستان كمان
حور: انتى جايبه ٣ فساتين .. بطلى تبذير يا مبذرة
كارما: فستان اخير .. اخير .. اخير
حور: زن زن زن .. جايبه بنت اختى معايا .. ايه ده ... اشترى يا كارما اشترى
دخلت كارما محل ونقت فستان وجابته وخرجت
حور: اخيراً خلصنا
وهما مشيين حور لمحت بدله متعلقه على المانيكان وسعرها ١٠٠٠ جنيه
حور لكارما: ايه رايك فى البدله ديه ؟؟
كارما: حلوه .. بس لمين
حور مسكت شنطتها وطلعت الفلوس اللى اياد ادهالها .. وعدتهم طلعوا ٢٠٠٠ جنيه
حور: ده مدينى فلوس كتير اوى
كارما:انتى ناويه تجبيله البدله ديه
حور: اه .. يالا
دخلوا وجابوا البدله
حور: هتكون حلوه عليه صح؟؟
كارما: اكيد ده الاسطى عطيه هى اللى جيباها
حور بضحك: طب يالا
خرجوا من المول وجابت حور اكل وروحت البيت
__________
حور خبطت وفتح اياد وهو بيقول: ايه التاخير ده كله .. مستنيكى بقالى كتير
حور وهى ماسكه شنط كتير قعدت على اقرب كنبه وهى بتقول: كارما .. كارما لففتنى كتير اوى .. وجابت حاجات كتير اوى
اياد: اممم.. جبتى حاجه لنفسك طيب
حور:، اه .. طلعت كوتشي من الشنطه وقالت .. ايه رايك فى ده
اياد: جميل .. بس ده بس ؟؟
حور: لا .. بص هحضر خطوبة كارما ب ده
مسكت بنطلون واسع boy friend وشمييز عليه جاكت طويل
اياد: بس ده كاجول
حور: احم.. انا لبسي فى المناسبات عالطول كدا
اياد: مش هتلبسي فستان ؟؟
حور: لا.. اه .. بص كدا
طلعت البدله
هتبقى تحفه عليك
اياد: بدله!!
حور: اه .. ادخل قسها عايزه اشوفها عليك .. هتيجى معايا بيها خطوبة كارما ..
اياد: استنى
قامت زقته وهى بتقول .. يالا ادخل عايزه اشوفها عليك بقول
دخل اياد لبس البدله وخرج
حور صفرت: هنلقيلك عروسه فى الخطوبه متقلقش
اياد بضحك: هدخل اغيرها .. انا شامم ريحة اكل
حور: ايوا اطلع علشان تاكل علشان هنزل الورشه كمان شويه
حور حطت الاكل على السفره ونادت اياد
خرج وقعد قادمها وهو بيقول: ما تسيبك من الورشه
حور: وهعيش منين لما اسبنى منها
اياد: احم.. انا شغال فى شركة خالو اسسها هناك وبقبض كويس .. هبعتلك كل شهر فلوس تكفيكى
حور: لا .. انا بحب شغل الورشه .. وبعدين اكيد هتنشغل هناك ب خالو ولو اتجوزت كملت بضحك متنساش تبقى تعزمنى على فرحك
اياد: مش بهزر يا حور .. بدل تعبك فى الجامعه والشغل
حور:انا مرتاحه كدا .. معلش مضطر انزل
دخلت غيرت هدومها ونزلت الورشه
_______________
عم كمال: عامله ايه يا اسطى عطيه
حور بضحك:عم كمال .. عامل ايه ..
عم كمال: الحمد لله بخير يا بنتى
حور: هبدا شغل انا
حور وهى بتشتغل سند عم كمال على عربيه وهو بيقول: انتى فعلاً موافقه انك تتجوزى ابنى
حور وقفت وقالت: اه .. بس لما اياد يسافر
عم كمال: تمام يا بنتى
المعلم احمد قرب وهو بيقول: يا اسطى عطيه
حور: ازيك يا معلم احمد
المعلم احمد:بخير يا بنتى .. انا كنت .. يعنى
حور. بتفهم: بكرا الساعه ١٠ يا معلم احمد هروح معاك اتنازل عن القضيه
معلم احمد بفرح: ربنا يباركلك يا بنتى .. ربنا يباركلك
_______________
حور نزلت فى اليوم اللى بعده اتنازلت عن المحضر .. وبعد كدا راحت تجهز مع حور لخطوبتها بليل
كارما طلعت الفستان وهى بتقول: هيبقى تحفه عليكى
حور: انا هلبس الهدوم اللى اشتريتها .. متزنيش
كارما: هتلبسي الفستان يا حور
حور: وانا قولت لا
_____after 1 hour_________
حور بتلف فى الفستان وهى بتقول: منك لله يا كارما
كارما: قمر عليكى .. والله محتاجه صوره يا حور
حور: انا مش عارفه همشي بيه فى خطوبتك ازاى وسط المنطقه
كارما: سبيها على الله .. على حجز قاعه اصلا ياله انزلى دلوقتى شوفى هتعملى ايه
استنى .. خدى الطرحه ديه هتكون لايقه على الفستان ..
___________
نزلت حور بسرعه وخبطت على الباب جامد
فتح اياد دخلت وهى بتنهج وقفلت الباب بسرعه
اياد: مالك يا حور حد بيجرى وراكى
حور كانت بتنهج بصتله وقالت: علشان محدش يشفنى بس ..
اياد: ليه يا بنتى ..
حور: الفستان
اياد: ماله .. شكله حلو عليكى
اياد: اول مره الناس هتشفنى بفستان
اياد ضحك وقال: اول مره هيشوفوا قمر على الارص قصدك .. الخطوبه امتى ؟؟
حور بصت للساعه وقالت: كمان ساعه بالظبط ادخل البس
_______________
على اخد كارما وراحوا القاعه .. واياد مع حور فى العربيه واهل المنطقه كلهم ماجرين عربيات علشان يمشوا ورا العروسه
على بضحك: اومال لو فرح كانوا عملوا ايه
كارما: الناس بتبقى عايزه حاجه تفرحها .. خليهم يفرحوا
وصلوا القاعه ودخل على مع كارما
اياد: انزلى يا حور
حور بتهز راسها ب لا
اياد: بقولك انزلى .. خلينا ندخل
حور هزت راسها وهى بتقول لا .. مش عايزه
اياد سحبها من ايدها وقال: شغل اطفال ده يا حور .. يالا
مسكت ايده وهما داخلين القاعه
الكل كان بيبص ل حور وهى اتوترت ومسكت جامد فى ايد اياد .. قعدوا على تربيزه وبدات الاغانى تشتغل واياد شاف صحابه من ايام ابتدائى قام سلم عليهم وحور قامت وقفت جمب كارما والطلاب كلهم بيشبهوا عليها
دكتور تامر جيه يسلم على على العريس وهو بيقوله: مبروك يا على
على: الله يبارك فيك يا دكتور
تامر: مبروك يا كارما
كارما بابتسامه: الله يبارك فيك يا دكتور
تلمر بص للى واقفه جمب كارما وهو بيقول فى نفسه: هى ديه حور!!...
كارما بصتلها وقالت : عطيه ... اياد بيشاورلك تروحيله
البارت طويل اهو بجهز فيه من امبارح رايكم طبعا .. وشيروا البارت يالا .وتوقعاتكم فى اللى هيحصل فى اللى البارت الجاى
دمتم سالمين 💜🌸
(12)
#الاسطى_حور
تامر جيه يسلم على على العريس وهو بيقوله: مبروك يا على
على: الله يبارك فيك يا دكتور
تامر: مبروك يا كارما
كارما بابتسامه: الله يبارك فيك يا دكتور
تلمر بص للى واقفه جمب كارما وهو بيقول فى نفسه: هى ديه حور!!...
كارما بصتلها وقالت : عطيه ... اياد بيشاورلك تروحيله
_______________
حور بصتلها وقالت: هو واقف مع صحابه
كارما: روحيله يا حور يالا
حور بهمس فى ودنها: مش عايزه اتحرك بالفستان ده
كارما:روحى يا حور يالا ..
اياد نادى بصوت عالى: حور .. يا حور .. تعالى ثوانى
حور بصتله وهى بتقول فى نفسها: منك لله يا اياد ..
وبعدين قالت بصوت مسموع: ماشي يا كارما
مشيت باتجاه اياد تحت انظار تامر اللى متغاظ منها ..
قربت من اياد وهى بتقوله فى ودنه بهمس: قولى يا عطيه هنا .. حور ديه فى البيت بس
اياد بهمس : لا .. اسمك حور فى كل مكان مش البيت بس
بص لأصحابه وهو بيقول: معلش يا جماعه ثوانى
قعد مع حور على الترابيزه وقال: متوتره وقلقانه ليه .. اهدى واتبسطى مع صحبتك ومفيهاش حاجه لو لبستى فستان مش اول ولا اخر واحده تلبس فستان
حور بتوتر: عارفه لكن... هو بس .. اياد ... انا
اياد مسك ايدها وهو بيقول:مالك .. اهدى وخليكى عاديه جداً
حور اخدت شهيق وهى بتقول:تمام
اياد ساب ايدها تهى ابتسمت وقامت وهو رجع لاصحابه
وتامر متابع تحركاتها بعينه من ساعة ما راحت لاياد
قعد على الترابيزه ومسك كوباية الميه شربها على مره واحده
فضل يبص ل حور .. عايز يكلمها بس مش قادر او مش عارف
حور سابت كارما وقعدت على الترابيزه مسكت ازازة الميه وشربت منها شويه
جيه المعلم احمد وابنه قعدوا معاها على الترابيزه
المعلم احمد: جبتلك محمد يعتذر منك بنفسه
محمد بحزن: انا اسف يا اسطى عطيه على اللى حصل .. صدقينى مس هعمل كدا او افكر حتى اتعرضلك تانى .. انتى زى اختى الكبيره .. وانا مكنش ينفع اعمل كدا
تامر شافهم ومقدرش يتحمل اكتر من كدا وقام بسرعه وهو رايح ناحيتهم وقعد على الكرسي الكل بصوله وهو مهتمش
حور بصتله وبعد كدا بصت ل محمد وقالت: ولا يهمك يا محمد انا عارفه انك مضايق من تصرفك و ده كفايه ....
محمد بفرح: تسلم يا اسطى عطيه ... لما اروح اسلم على العريس والعروسه .
حور ضحكت على تصرفه بعد ما قام وقالت للمعلم احمد: ربنا يباركلك فيه يا معلم
معلم احمد:تسلمى يا بنتى.. هروح انا كمان ابارك للعرسان انا اول ما جيت قولت اخليه يعتذر الاول
المعلم احمد قام .. وفضل حور وتامر
حور: نعم
تامر: ايه
حور: قعدت هنا ليه
تامر رفع حاجبه وقال: مزاجى .. عندك مانع؟؟
حور نفخت بزتق وقالت: انت مستقصدنى .. مُصر تضايقنى ليه؟؟
تامر:مش مُصر اضايقك ولا حاجه انتى اللى فاكره كده مش اكتر
وتعالى هنا .. مجتيش المكتب ليه لما قولتلك .. لما اسقطك فى الماده هيعجبك كدا ؟؟ ومين اللى ركبتى معاه العربيه ونداكى هنا باسمك ومتكلمتيش ولا فتحتى بوقك
حور بصدمه: انت مراقبنى .. وبعدين كملت وقالت : لو تقدر تسقطنى اعملها وانا اوريك .. انت شكل ايدك خفت
تامر بسرعه: يعنى انتى اللى بعدتى العيال يضربونى
حور كانت هتقول لا
بس لقت خمس رجاله جايين عليها وهما بينادوا بصوت عالى يا اسطى عطيه .. يا اسطى عطيه
قربوا من الترابيزه اللى هى قاعده عليها وهما بيسلموا عليها
حور بهمس لنفسها: يا نهار ابيض .. وقتكم ده يعنى
قربوا منهم وتامر كان قاعد بالجنب بصلهم وهما وقفوا اول ما شافوه .. وبصوا ل حور اللى ضحكت ببلاهه من الموقف وتامر بصلها وابتسم وهو بيقول:كنتى عايزه تقولى حاجه
ضحكت تانى بنفس الطريقه
اول ما شافوا تامر
وقفوا مكانهم وبصوا ل حور وتامر وحور بصت ل تامر وضحكت تانى
وهو ضحك على ضحكها ...
اتنين منهم مكنوش فاهمين الموضوع وقربوا اكتر من الاسطى حور واول ما شافوا تامر واحد منهم قال: يا اسطى عطيه ده اياد اللى جيه بعد غيبه
تامر وقف ضحكه وبصلها مستنى رد منها لكنها ضحكت تانى
الثلاثه : نستأذن احنا يا اسطى عطيه سلام
وجريوا برا القاعه
الاثنين فضلوا واقفين مستنين رد من الاسطى عطيه .. لكن هى فضلت تضحك
تامر بصلها باستغراب وقال: مالك
جيه اياد وحط ايده على كتف حور وقال :حور ..
حور بصتله وضحكت تانى.
اياد بصلها باستغراب وقال:مالك يا حور .. فيكى حاجه
حور مستمره فى الصحك بطريقه هيستريه
قربلها تامر وهو بيقولها بخوف: فيكى حاجه
حور: عايزه اروح يا اياد
وضحكت تانى
اياد بصلها وقال:طب قومى معايا .. يالا
تامر مسك ايده وقاله: انت مين وتروحها ليه ؟؟ اياد بصله ورفع حاجبه وقال:وانت مالك .. بتدخل ليه اصلا.. يالا يا حور
مسك حور من ايدها تامر وقف قصادها وقال:، حور انتى تعرفيه؟؟ ماشيه معاه ليه
حور ضحكت تانى وغمضت عينها وهى بتقع على الارض اياد مسكها وقال : حور .. انتى كويسه
ناس كتير اتجمعت. وكانوا بيبصوا ل حور واياد وطلاب كتير من طلاب الجامعه كانوا بيبصوا باستغراب ل حور واياد ودكتور تامر
اياد شال حور وخرج بيها من القاعه
وتامر وراه
اياد ل تامر: افتح العربيه
تامر فتح العربيه واياد حط حور جوا العربيه
ودخل العربيه وساق بيها على البيت
وتامر خد عربيته وراح وراه
_________________
واحده همست ل كارما فى ودنها وقالت: هى صاحبتك مالها .. قعدت تضحك وبعد كدا اغمى عليها فجاءه وحد خدها ومشي
كارما: قصدك عطيه
_اه
كارما بصت ل على وهو بصلها باستغراب وقال: فيه ايه
كارما: حور.. قصدى عطيه
على: مالها
كارما: اغمى عليها
على: طب وهى فين
كارما: معرفش بس تقريبا اياد اخدها
شافت كارما عم كمال وندهت عليه
عم كمال جيه وهو بيقول:فيه حاجه يا بنتى ؟؟ مالك؟؟
كارما: الاسطى عطيه يا عم كمال .. بيقولوا انها اغمى عليها وتقريبا اياد خدها . انا نص ساعه واروح .... تعرف شوف مالها بس
عم كمال سابها بسرعه وخرج من القاعه وكذا واحد من اللى شاغلين مع حور خرجوا معاه
________________
وصل اياد البيت وشال حور وطلع بيها
فتح الباب ودخل وحطها على الكنبه
تامر طلع وراهم .. اياد كان ماسك ايدها وبيحاول يفوقها وتامر واقف على الباب مش عارف يعمل ايه ..
عم كمال وصل هو والرجاله بيت حور
دخل بسرعه وهو بيقول: حور مالها يابنى ؟؟
اياد بخوف: مش عارف يعم كمال .. فجاءه لقيتها بتضحك بهستريه و اغمى عليها
عم كمال: خير ان شاء الله يا بنى .. يمكن تعبت ونامت شيلها دخلها اوضتها وخليك معاها
واحد بص لتامر وبعد كدا ل عم كمال وقاله بهمس: الجدع اللى واقف على الباب ده كل شويه يكون مع الاسطى عطيه يا عم كمال
عم كمال بص ل تامر باستغراب وقاله: فيه حاجه يا بنى ؟؟
اياد والكل ركزوا مع تامر وهو قال بتوتر: احم .. انا كنت عايز اطمن على الانسه حور مش اكتر
عم كمال:طيب يا بنى .. هى كويسه تقدر تروح .. اخوها قاعد معاها
تامر حس بالاحراج ومشي
الكل خرج وساب حور مع اياد .. شالها و وداها اوضتها وفضل انه يسبها نايمه وميصحيهاش
________________
كارما روحت وهى طالعه شافت عم كمال
كارما بخوف: عطيه مالها يا عم كمال
عم كمال: تقريبا تعبت فى الخطوبه يا بنتى .. هى فى البيت دلوقتى ونايمه واياد معاها . اطلعى ارتاحى وبكرا ابقى شوفيها
___________الصبح_____
حور صحيت وهى ماسكه دماغها بتعب . حاولت تقوم بس كانت دايخه جامد و وقعت على السرير تانى
رايكم فى البارت وتوقعاتكم فى البارت الجديد
(13)
#الاسطى_حور
حور صحيت وهى ماسكه دماغها بتعب . حاولت تقوم بس كانت دايخه جامد و وقعت على السرير تانى
______________
مسكت دماغها ونادت على اياد بتعب
نادت كذا مره لحد ما رد عليها وجالها
اياد: الف سلامه عليكى يا حور .. مالك
حور بتعب: انا مش فاكره اى حاجه .. هو اللى حصل .. وانا جيت هنا امتى ؟؟
اياد باستغراب: انتى مش فاكره ايه اللى حصل امبارح بجد
حور: امبارح كانت خطوبة كارما وكنت قاعده مع .. مع دكتور تامر وبس .. ايه اللى حصل تانى
اياد : فضلتى تضحكى بهستريه واغمى عليكى
حور: اضحك !!
اياد: واغمى عليكى وشيلتك وجيت بيكى البيت
حور بصدمه: نعم .. كل ده حصل
اياد: انتى شربتى حاجه امبارح
حور بتفكير: شربت .. شربت ازازة عصير كانت واحدة زميلتى فى الجامعه ادتهانى .. و .. يا بنت ال ..
اياد: تبقى حطتلك حاجه فى العصير
حور: انا امنتلها وشربته وبعد كدا قعدت على الترابيزه .. والله لما اشوفها
اياد: اهدى يا حبيبتى ... اهم حاجه صحتك .. انتى كويسه دلوقتى
حور: اه ... الحمد لله
اياد:طيب ارتاحى . انا نازل مشوار وراجع تانى .. سلام
خرج اياد وحور حاولت تقوم دخلت الحمام غسلت وشها واخدت شاور وخرجت فضلت قاعده بتفتكر لما قابلت البنت ديه فى الجامعه وطلبت رقمها وهى قالت ان التليفون مش معاها
افتكرت فى الخطوبه
فلاش باك
_ عطية ازيك عامله ايه .. وحشتينى جدا
ابتسمتلها وقالت: الحمد لله بخير
_ الفستان شكله قمر عليكى ...
حور: تسلمى
_ خدى العصير ده .. انا كل ما امشي حد يدينى عصير
حور كانت عطشانه فاخدت العصير منها وفتحو الازازه مع بعض وشربوها وهما واقفين بيتكلموا وبعد كدا حور اقعدت على الترابيزه
باك
حور لنفسها بس بصوت مسموع: غبيه . انا غبيه .. مشفتهاش الا مرتين واخدت منها عصير .. انا هوريكى
الباب خبط فتحت حور وكانت كارما دخلت وهى بتقولها: اخبارك ايه .. ايه اللى حصل معاكى امبارح
حور: البت اللى شوفتيها بتكلمنى فى الجامعه ادتنى عصير واكيد فيه حاجه
كارما: وهى هتعمل كدا ليه ؟؟
حور: مش عارفه .. بس انا بما شربت العصير حصل معايا كدا بعدها
كارما: وانتى هتعملى ايه
حور: لسه مش عارفه .. بس انا هلمحلها وهعرف من طريفة كلامها
كارما: طب انتى لسه تعبانه
حور: لا .. مش تعبانه .. انا كويسه وهنزل اشتغل كمان ..
كارما: خليكى النهارده ارتاحى
حور: لا .. انا لو قعدت فى البيت اتعب ... واعملى حسابك هننزل الجامعه الامتحانات قربت ومش فاضل غير شهر واحد خليه يعدى على خير
كارما:ان شاء الله .. اخوكى هنا؟؟
حور: لا .. نزل مشوار
كارما: طب اطلعى افطرى معانا .. ماما عامله فطار ملوكى النهارده ومفيش لا علشان منديش عليها تضربك
حور بضحك: حاضر . اوامرك يا فندم
كارما: قومى وانا مستنياكى يالا
حور قامت لبست وطلعت فطرت معاهم وبعد كدا نزلت الورشه تشتغل
شافت عربية اياد
وقفت ادام الورشه ونزل منها اياد وقال: نزلتى الشغل ليه يا حور
حور: بحب اشتغل .. انت خلصت المشوار بتاعك ده
اياد: اه .. انا جبت اكل اطلعى كلى معايا
حور: هخلص العربيه ديه وهطلع .. اسبقنى انت على فوق
حور بعد نص ساعه خلصت وطلعت نادت على اياد وكان فى الحمام .. قعدت على الكنبه وبتبص على الترابيزه شافت تذكرة .. مسكتها كانت تذكرة عوده لامريكا وتاريخها بعد يومين
اتنهدت بحزن وسابتها
وهو طلع وهو بيقول: انتى. جيتى امتى؟؟
حور: لسه دلوقتى .. مسكت التذكره وقالتله اتفضل
اياد استغرب .. لا اتعصبت ولا حصل منها اى حاجه مسك التذكره ودخل الاوضه حطها فى الشنطه بتاعته وخرج تانى ... حط الاكل وكلوا مه بعض
حور: انا نازله الورشه تانى
اياد مسك ايدها وقال: حور .. انا
حور: عادى يا اياد انا عارفه انك هتسافر عاجلا ام اجلا مش هتفرق يعنى .. اهم حاجه راحتك .. انا نازله الورشه لو احتجتنى اتصل عليا .. سلام
خرجت وهو فضل قاعد يفكر هيعمل ايه مع حور
حور نزلت الورشه وفضلت تشتغل لحد الساعه ٧ وبعد كدا طلعت خبطت وفتح اياد ودخلت وبعد نص ساعه الجرس رن
قامت فتحت هى وكان تامر
حور باستغراب:دكتور تامر!!
تامر: احم.. ايوا .. هو يعنى
خرج اياد من الاوضه وهو بيقول: مين يا حور؟؟
حور بصت ل تامر وبعد كدا بصت لاياد وقالت: ده دكتور تامر .. دكتور فى الجامعه عندى
اياد بصله وقال: انت اللى امبارح كنت فى الخطوبه و
تامر بصله وقاله: احم.. ايوا انا ..
اياد: اتفضل ادخل يا استاذ تامر
تامر دخل باحراج وهو حاطط راسه فى الارض قعد على الكنبه واياد قعد قدامه
اياد ل حور: اعملى كوبيتين شاى
حور هزت راسها ب اه ودخلت المطبخ
اياد ل تامر:منور يا استاذ تامر
تامر : انا كنت جاى اطمن على الانسه حور .. لما تعبت امبارح فجاءه
اياد: لا هى متعبتش. فيه حد حطلها حاجه فى عصير شربته امبارح
تامر بصدمه:ايه!!
حور جابت الشاى وقعدت جمب اياد وهى بتبص ل تامر
تامر:احم.. عموما هبقى اشوف الموضوع ده .. كمل بفضول وهو بيقول: هو حضرتك اقرب ل حور ايه
اياد: اخوها
حور كانت ساكته وبتبص ل تامر
تامر بصلها لما لاحظ نظراتها ليه وقال لاياد:الحمد لله انى اتطمنت عليها .. سلام
راح ناحية الباب واياد معاه وفتحه وهو بيسلم على اياد بص لحور نظره اخيره وخرج
حور قعدت على الكنبه واتنهدت بتعب وهى بتقول: ايه اللى جابه ده !!
اياد رفع حاجبه وقال بخبث: بيطمن عليكى
حور : ويطمن عليا بتاع ايه ان شاء الله .. لولا انه فى بيتى كنت هزأته
اياد:حصل خير يا حور .. تعالى انا عملت اكل .. كلى وادخلى ارتاحى
اكلوا وبعد كدا حور دخلت ذاكرت شويه ونامت
______________
تامر فضل يتمشي بالعربيه شويه وهو بيفتكر اغلب المواقف اللى حصلت من يوم ما شافها لحد دلوقتى .. كان بيدندن وهو داخل بيته اول ما دخل كام ابوه قاعد على الكنبه مستنيه
ابو تامر: ما لسه بدرى
تامر ضحك وقال: عامل ايه الاول
ابو تامر: بخير والحمد لله
تامر قعد ولسه الابتسامه على وشه بصله ابو تامر وابتسم وقال: وقعت ومحدش سمَ عليك
تامر ضحك بصوت عالى وقال: طلع اخوها يا بابا .. طلع اخوها
ابو تامر: يعنى هتتقدم امتى برضوا
تامر باستغراب:اتقدم لمين ؟؟
ابو تامر:هتستهبل عليا .. هو ايه اللى هتقدم لمين .. حور هو فيه غيرها
تامر: يا بابا ديه طالبه عندى
ابو تامر: وانت اللى دكتور بحق وحقيق انت معيد مش اكتر .. واكبر منها بسنتين
تامر:ولو انا مش بفكر انى اتجوزها اصلا
ابو تامر حط رجل على رجل وقاله: مادام أصلا سيبها لحد ما حد ياخدها منك
تامر بصله وركز فى الجمله وقام
___________________
اليوم اللى بعده راحت حور مع كارما الكليه حضروا المحاضرات وهى دورت على البنت ملقتهاس فى الجامعه ركبت وروحت بيتها
____________
راحت مع كارما اليوم اللى بعده الجامعه وبعد ما خلصوا محاضرتين وقعدوا فى الكافتيريا شويه كارما قالت:انا مس هحضر المحاضره ديه يا عطيه .. احضريها انتى النهارده
حور :ليه
كارما: احم.. هخرج مع على النهارده
حور برقتلها وقالت:لوحدكم
كارما: لا طبعا .. هيجيب اخته معاه .. وهنخرج
حور: طيب .. .. هحضرها علشان حد فينا يكون فاهم .. علينا محاضرة مين دلوقتى
كارما: احم.. دكتور تامر
حور: نعم!!
كارما: الماده بتاعته صعبه يا عطيه .. لازم نذاكرها كويس .. يالا خليكى جدعه
حور: طيب يا كارما.. لما نشوف اخرة استاذ على معانا
دخلت المحاضره لوحدها وقعدت فى تانى بنش وهى مستنيه الدكتور يدخل
دخل وهو عمال يدور بعينه عليها من ورا لادام واول ما شافها ابتسم وبدا المحاضره
وكان كل مره بيبص للطلاب بيختلس نظره ليها وهى بتدون اللى بتكتبه
خرجت من المحاضره وشافت البنت بصتلها وهى بتقرب منها خبطت على كتفها وقالت: ازيك يا مى .. عامله ايه
بصتلها مى وقالت: الحمد لله ازيك يا عطيه .. اخبارك؟؟
حور: الحمد لله بخير .. تعالى نقعد فى الكافتيريا شويه كارما راحت مع خطيبها تتفسح
مى ضحكت وراحت قعدت معاها على الكافتيريا
حور بخبث: تحبى تتطلبي عصير ولا حاجه تانى
نظرات حور كانت خبيثه لدرجة ان مى اتوترت وقالت: حاجه تانى ..
حور: طيب .. انا هاخد عصير تفاح .. من ساعة ما اخدته منك فى الفرح وطعمه ركز معايا اوى .. كان حلو حدا
مى: بالهنا والشفا
طلبوا المشروبات
اول ما نزل العصير... حور حطته ادام مى وقالت:، اتفضلى
مى: شكراً . معايا كابتشينو
حور: لا مش بعزم عليكى .. بقولك خدى حطى فيه اللى حطتيهولى فى الخطوبه .. يالا
مى: قصدك ايه !!
حور بزعيق: لا اصل ولا فصل .. هتمثلى عليا .. مش انتى اللى حطتيى حبوب الهلوسه فى العصير قبل ما تدهولى
مى اتوترت وقامت وهى بتمشي حور مسكت ايدها وقالت :مش انتى اللى عملتى كدا بردو
مى: عيب عليكى الجامعه كلها بتتفرج علينا
حور بزعيق: انتى اللى حطتيه ولا لا قولى!
مى فضلت ساكته وحور ماسكه ايدها علشان متجريش منها
حور بصوت اعلى: قولى انتى ولا لا
مى بزعيق: اه .. انا ارتاحتى .. سبينى امشي بئا
حور سابت ايدها وبصتلها وقالت: كل مره بثبت لنفسي انى مينفعش اصاحب حد تانى او اثق فيه لانه فى الاخر. بيطلع خسيس زى حلاتك
وسابتها ومشيت
مى وقفت فتره بتستوعب كلمة حور اللى قالتها وبعد كدا قامت مشيت
___________________
خرجت حور من الجامعه وكانت عربية اياد واقفه برا وهو واقف مستنيها
قربت منه وهى بتقول باستغراب: ايه اللى جابك الكليه النهارده ؟؟
اياد : احم.. حور انا
اتوتر وهو بيكلمها وبعدين بص بطرف عينه وقال:، انا مسافر دلوقتى
حور. فصلت ساكته حضنها وهو بيقول: صدقينى هرجع تانى .. خلى بالك من نفسك
تامر كان واقف وشايف الموقف بس مش سامع حاجه
حور حاولت تتماسك وهى بتقول: تروح وترجع بالسلامه يا اياد ..
اياد باس راسها وقال: اشوف وشك بخير .. خلى بالك من نفسك
حور كانت ماسكه ايده وباصه لعينه هو لاحظ دموع عينها اللى مخبياها شد على ايدها وقال: خلى بالك من نفسك انا هرجع تانى ان شاء الله
حور:ان شاء الله .. سلام
اياد طلع فلوس من محفظته كتير اوى وقال لحور: خلى دول معاكى
حور بصتله وهى بتهز راسها ب لا وقالت: خليهم معاك .. مستوره والحمد لله
اياد: عارف ان اختى ب ١٠٠ راجل بس خلى دول معاكى
حور: لا .. انا مش عيزاهم .. اخظت البدله معاك صح
اياد: اه .. وسبتلك القميص اللى بيريحك
حور ضحكت وقالت:تروح وترجع بالسلامه
اياد: خدى الفلوس
حور:، لا .. مش عايزاها .. ابقى سلملى على خالو
اياد: ان شاء الله
ركب عربيته ومشي
وهى ركبت اتوبيس وصلت لحد الورشه نزلت وفضلت تشتغل عم كمال جيه وهو بيقولها: هو اياد فين؟؟
حور وهى بتشتغل: سافر يا عم كمال
عم كمال: سافر !!
حور: اه
عم كمال: طيب يا بنتى انا لسه عند كلامى لو موافقه تتجوزى ياسين
حور بصتله بتفكير وقالت: معنديش مانع يا عم كمال .. شوف عايز الخطوبه امتى.
رايكم فى البارت وتوقعاتكم البارت اللى جاى التفاعل قل اوى وانا بتعب جدا علشان اكتب البارت واكمل. فضلا ممكن رايكم بجد فى الكومنتات 💜🌸
دمتم سالمين 💚
(14)
#الاسطى_حور
كمال: طيب يا بنتى انا لسه عند كلامى لو موافقه تتجوزى ياسين
حور بصتله بتفكير وقالت: معنديش مانع يا عم كمال .. شوف عايز الخطوبه امتى.
عم كمال:متاكده يا بنتى
حور : اه يا عم كمال
كملت شغل وهى مش مهتمه اساسا بالموضوع. عم كمال فى المنطقه وبصوت عالى: بركوا للاسطى عطيه يا رجاله .. هتتخطب لياسين ابنى عن قريب ان شاء الله
الناس بدات تبارك ل حور اللى بصتلهم وهى بتتصنع الابتسامه كانت فى ايدها عدة الشغل سابتها وهى بتقول:معلش يا عم كمال هطلع ارتاح شويه
طلعت وهى بتفكر فى اللى عملته واللى قالته. سندت راسها على الحيطه وهى بتقول:انا ايه اللى عملته ده
قامت دخلت الحمام وغسلت وشها وهى متضايقه. من اللى عملته
دخلت وفضلت تذاكر علشان تنسي اللى حصل
اليوم اللى بعده راحت مع كارما الجامعه وبعد المحاضره خرجلها دكتور تامر وهو بيقول:اياد قالى ان حد حطلك حاجه فى العصير و شوفتك امبارح وانتى بتهزقى البنت ديه
حور: يعنى عايز ايه
تامر باحراج: احم.. ولا حاجه كنت عايز اقولك اتاكدتى ازاى انها هى فعلا !!
حور : طرقى الخاصه. وابعد علشان عايزه اعدى
تامر بعد من قدامها وقال : اتفضلى
وهى ماشيه من قدامه همس فى ودنها:متتعوديش على كدا .. المعامله ديه مش ليا يا حور
بصتله بطرف عينها وكملت مشي وهى مش مهتمه لكلامه
________________
كارما:كان بيقولك ايه؟؟
حور: سيبك منه انا عايزه اروح
كارما: تعالى ..اه صحيح انك هتتخطبى لابن عم كمال
حور وهى مكمله طريقها:اه يا كارما
كارما شدت دراع حور ناحيتها وقالت بصرامه: متاكده يا حور من كلامك !
حور نفضت ايدها وقالت: اه يا كارما .. ويالا نروح بعد اذنك
كارما مشيت ورا حور. وركبوا وروحوا
وصلوا مع بعض
كارما:مش هتطلعى
حور: لا .. مش هطلع .. هقعد اشتغل شويه
كارما: انتى وراحتك خلى بالك من نفسك . وفكرى فى الموضوع تانى يا حور .. شكلك متضايقه
سابتها ومشيت وحور فضلت تشتغل لحد
الساعه ٨
عم كمال: ايه يا بنتى.. كل ده ارتاحى شويه طيب
حور بتعب: فعلا ً انا هطلع ارتاح شويه .. اقفل الورشه معلش يا عم كمال
عم كمال: ماشي يا بنتى
حور طلعت ترتاح ومعملتش اى حاجه غير انها نامت
_______________
تامر روح بيته قام غرف لنفسه اكل
وقعد يفكر تصرفاته كلها تدل على انه بيحبها .. ليه مش راضي يعترف لنفسه ب كده
عمل شاى ومسك تليفونه بص فى صوره كان صورها لحور من غير ما تاخد بالها فى خطوبة كارما
ابتسم وهو بيقول:وبعدين معاكى يا حور
خرج ابوه وقال : وبعدين الجواز ولا انت شايف غير كدا
_________________
صحيت حور اليوم اللى بعده. وكانت مرهقه جدا من شغل امبارح
كارما عدت عليها علشان يروحوا الجامعه لكن هى مكنتش عايزه تروح فقعدت وكارما راحت لوحدها
فضلت فى البيت لحد الساعه ١٢ الظهر. صلت الظهر ونزلت
قعدت شويه فى الورشه من غير شغل بتكلم عم كمال
عم كمال: يعنى الخطوبه انتى عيزاها ازاى فى الاخر
حور:هعملها فى البيت .. مش شرط قاعات .. نلبس دبل وخلاص .. ومش هعزم ناس كتير اهل المنطقه اللى اعرفهم بس
عم كمال:اللى يريحك يا بنتى .. تمام
حور: ياسين موافق الاول يا عم كمال
عم كمال: طبعاً يا بنتى هو يطول يتجوزك ..
حور فى نفسها: عموماً هبقى اعرف كملت بصوت مسموع
تقدر تشوف حالك يا عم كمال .. انا هبدا شغل
قام عم كمال وحور بدات تشتغل
_______________
عدت عليها كارما بعد ما خلصت الجامعه
كارما: حور .. انتى شغاله من امتى
حور: بقالى ساعتين بس .. ليه؟؟
كارما: حور انتى شكلك مرهق اوى ... ماما عزماكى النهارده على الغدا .. تعالى دلوقتى اقعدى معايا شويه
حور: هخلص العربيه ديه واطلع طيب
كارما: لا .... علشان اديكى المحاضرات بتاعت النهارده .. يالا
حور: حاضر .. هطلع بس اغير هدومى واطلعك
كارما: اطلعى معايا علشان اضمن انك متشتغليش تانى
حور بصتلها : حاضر
يالا
خلى بالكم من الورشه يا رجاله
طلعت ودخلت بيتها غيرت هدومها وخرجت طلعت ل كارما
مامت كارما: بت يا حور . لازم نقولك علشان تطلعى
حور: معلش يا طنط .. ده انا اطلع علشانك كل يوم
مامت كارما: تسلمى يا بنتى .. سمعت انك هتتخطبى لياسين ابن عم كمال .. صح؟؟
حور: اه يا طنط
مامت كارما:، فكرتى فى الموضوع كويس يا بنتى .. ده جواز مش لعبه
حور: مش هتفرق كتير يا طنط
خرجت كارما وهى بتقول: الاكل اتحط .. يالا يا ماما يالا يا حور
قعدوا اكلوا وكانت حور اغلب الوقت شارده فى مصيرها المجهول
مامت حور لاحظت كدا بس ماتكلمتش
خلصوا اكل وشربوا شاى وتبادلوا الكلام ونزلت حور علشان تذاكر وترتاح شويه
بعد يومين كانت خطوبة حور وياسين وكانت على الضيق فى شقة حور
اخدت الدبله من ياسين ولبستها وهى فى عالم تانى
فى ظرف ساعه كان الكل مشي حتى ياسين روح
قعدت وهى بتفتكر الحدوته اللى حصلت من شويه وقالت لنفسها: هتعملى ايه تانى يا حور
قامت غسلت وشها وبصت فى المرايا واتنهدت بحزن
سمعت حد بيخبط على الباب وقامت فتحته وكانت كارما
دخلت وكان معاها صنية فيها اكل
كارما:، عملتى كدا ليه يا حور
حور: عملت ايه
كارما: انتى مبسوطه بالخطوبه ديه
حور: وايه يعنى .. مش هتفرق كتير
كارما: هتفرق يا حور هتفرق صدقينى ..
حور بصت على الدبله فى ايدها وقالت: عارفه يا كارما فيه حاجه انا مستغرباها اوى .. اى حد بحبه بيبعد عنى .. اياد بعد وبابا بعد وماما كلهم يعنى
قولت. اشوف حد مش بيحبنى ولا بحبه يمكن نقرب مره ومش يبعد
كارما: بتوهمى نفسك يا حور .. حتى ياسين مكنش مبسوط برضوا كان باين على وشه كدا علفكره .... لو فكرتى بقلبك مش بعقلك زى كل مره هتعرفى فعلاً مين بيحبك بجد .. اللى كل ما تروحى فى مكان تلاقيه وراكى وانتى مش عارفه ازاى بس بيكون وراكى .. عموما خلى بالك من نفسك .. سلام يا حور
كارما قامت فتحت باب الشقه علشان تمشي وبصت على حور بشفقه وقفلت الباب
حور سابت الاكل زى ما هو وقامت نامت
__________________
اليوم اللى بعده كارما اتفاجئت ان حور هى اللى بتخبط عليها علشان يروحوا الجامعه
كارما باستغراب:يا بنتى انتى خطوبتك كانت امبارح
حور: وهتفرق ايه يعنى .. اهم حاجه الامتحان اللى قرب .... خلصى انا مستنايكى
كارما لبست وهى مستغربه حور
راحت معاها الجامعه وكان عندهم محاضرتين حضروهم بس مكنش عليهم دكتور تامر
خرجوا سوا ودكتور تامر شاف حور مع كارما .. فضل ماشي وراهم لحد مت خرجوا من الجامعه وكان ياسين واقف
كارما بصت ل حور وقالت: مش ده ياسين يا حور ؟؟
حور بصت. بصدمه وقالت: اه .. ايه اللى جابه هنا
قرب عليهم وهو بيقول:، ازيك يا عطيه
حور بصتله وقالت:، الحمد لله .. بس انت جيت ليه ؟؟
ياسين: بابا قالى اجى اخدك النهارده
حور: اممم.. طيب
تامر كان مراقب الموقف
قرب منهم اكتر وهو بيسمع الحوار
كارما: طب هروح انا دلوقتى سلام
مشيت كارما وفضلت حور واقفه معاه
تامر قرب اكتر وحور لاحظته وقالت: فيه حاجه يا دكتور تامر !!
تامر: احم.. لا ولا حاجه
ياسين: طيب يا عطيه تعالى يالا
تامر: احم.. هو حضرتك اخو حور التانى؟؟
ياسين :نعم
تامر :، تقرب ل حور يعنى
ياسين بص ل حور وتامر وهو مستغرب السؤال
حور فضلت ساكته
وياسين قال:اخوها سافر انا خطيبها
رايكم فى بارت النهارده وتوقعاتكم. التفاعل قل اوى. حتى الكومنتات الطويله مبقتوش تعملوها هو انا قلقاسه طيب😂😂😂💜🌸
(15)
#الاسطى_حور
تامر: احم.. هو حضرتك اخو حور التانى؟؟
ياسين :نعم
تامر :، تقرب ل حور يعنى
ياسين بص ل حور وتامر وهو مستغرب السؤال
حور فضلت ساكته
وياسين قال:اخوها سافر انا خطيبها
تامر بصدمه: خطيبها!!
ياسين: اه .. فيه حاجه؟؟
تامر كان واقف مصدوم من كلامه .. هى كده خلاص ضاعت منه ياسين نادى عليه وهو بيقول: دكتور .. حضرتك معانا
حور بصتله مستنيه منه اى حاجه اى تصرف مردش عليهم ركب عربيته وفضل قاعد فيها
ياسين بص ل حور باستغراب وهو بيقول: ماله ده!!
مشي مع حور وتامر بصلهم وهما ماشيين جنب بعض وللحظه قلبه وجع على خسارتها
شافهم وهما بيركبوا تاكسي واتحرك بيهم وطيفهم مشي معاهم او طيفها هى اللى مرقبه
ساق عربيته وهو شارد وبيفتكر ياسين وهو بيقول خطيبها
الكلمه فضلت تزن فى ودانه لدرجة انه ساب الدريكسيون وحط ايده على ودنه وهو بيقول: كفايه كفايه كفايه كفايه
_____________________
عم كمال كان قاعد عند الورشه وشايف حور وياسين وهما ماشيين جنب بعض .. قربوا منه وهو كان فرحان ان علاقتهم ممكن تتحسن
ياسين قرب من عم كمال وباس راسه وهو بيقول: اخبارك ايه يا بابا ؟؟
عم كمال: الحمد لله بخير .. انتى عامله ايه يا بنتى
حور:الحمد لله يا عم كمال
بصت لواحد من العمال كان شغال وهى بتقول: بتعمل ايه هتبوظ العربيه لرجال .. ابعد كدا
سابت ياسين وعم كمال واقفين ودخلت عملت العربيه
عم كمال : يا بنتى ارتاحى الاول مشوار الجامعه بتاعتك اكيد بيتعبك ..
حور وهى لسه شغاله: معلش يا عم كمال .. ده كان هيبوظ العربيه للزبون .. هصلح ديه واطلع ارتاح وانزل تانى
ياسين: سيبها على راحتها يا بابا.
عم كمال:انت عندك شغل النهارده؟؟
ياسين: لا انا خلصت بدرى النهارده علشان اخد عطيه زى ما قالتلى .. هطلع البيت ارتاح شويه .... سلام يا بابا
ياسين طلع و حور فضلت تشتغل ومطلعتش ترتاح
عم كمال قام طلع بعد ياسين بنص ساعه علشان كدا حور فضلت شغاله مقامتش الا لما الشغل كله خلص
ياسين كان واقف يراقبها وهى شغاله من وقت ما طلع .. كان صعبان عليه انها تتعب التعب ده كله ومن فتره للتانيه يبص عليها ويرجع تانى
شافها اخر مره وهى بتقفل الورشه مع اتنين من العمال وبتطلع بيتها وهى همدانه من التعب
________________
تامر خد باله ومسك الدريكسيون لكن معرفش يتحكم فيه وخبط فى شجره
___________________
حور طلعت شقتها وقعدت على الكنبه بتعب وهى بتفتكر ردة فعل. تامر لما عرف انها مخطوبه ل ياسين وكلام كارما
فاقت من تفكيرها وهى بتقول: معقول !!
لا لا لا .. خلاص كفايه تفكير وادخلى نامى يا حور .. كفايه اوى
دخلت اوضتها فردت جسمها على السرير بتعب من غير ما تذاكر
__________________
_ استر يارب .. استر يارب
خرج الدكتور من عند تامر
ابو تامر جرى عليه بسرعه وهو بيقول: ايه اللى حصل يا دكتور .. تامر عامل ايه ؟؟
= جبسنا ايده الشمال وراسه فيها جروح بسيطة .. وهو دلوقتى فى اوضة عاديه .. الخبطه مكنتش جامده اوى ..
ابو تامر: الحمد لله .. ينفع ادخله ؟؟
الدكتور: اه طبعا .. بس هو تحت تأثير البنج دلوقتى .. ممكن تدخله لما يفوق
قعد على الكرسى وهو حاطط ايده على راسه بحزن
__________________
حاولت تنام بس كل شويه تفكر مره فى ياسين ومره فى تامر واياد وكلام كارما. تعبت من كثر التفكير .. قامت بصت فى الساعه كانت ١ بالليل
اتوضت وصلت ركعتين قيام
مسكت المصحف و قرأت قرآن لحد ما ارتاحت ..
قامت رجعت لسريرها ابتسمت براحه وحاولت تنام ونامت
________________
_ لو سمحت .. المريض فاق جوا
بص للممرض وقام وهو بيقول: ينفع ادخله دلوقتى طيب
_ الدكتور عنده وحضرتك ينفع تدخله .. اتفضل
الممرض مشي وابو تامر دخل وقعد جنبه وقال: حاسس بايه يا بنى
تامر بصله وقال: الحمد لله يا بابا .. الحمد لله
ابو تامر فضل ساكت علشان ميتعبش تامر بالكلام
تامر قاله: ارتاح يا بابا شكلك تعبان اوى
ابو تامر: لا .. انت عملت الحادثه ازاى يابنى؟
تامر: الدريكسيون فلت منى بالغلط؟؟
ابو تامر: ده ازاى يعنى؟؟
تامر: سبته بالغلط
ابو تامر بصدمه: ايه !!
تامر: اتخطبت
ابو تامر: مين اللى اتخطبت يا بنى!!
تامر:حور يا بابا .. حور
ابو تامر سكت علشان ميزودش على ابنه فى الكلام .. مدد على الكنبه اللى قصاده ونام
____________________
كارما وحور راحوا الجامعه اليوم اللى بعده
دخلوا الجامعه وكان اغلب الطلاب بيتهامسوا بكلام مش مسموع
كارما سالت واحده فيه ايه
_ دكتور تامر عمل حادثه امبارح وهو دلوقتى فى المستشفى
كارما:ايه!
حور: قالتلك ايه؟؟
كارما بصدمه: دكتور تامر عمل حادثه امبارح
حور بصدمه: ايه .. ازاى!!
كارما: مش عارفه .. بيقولوا ان فيه طلاب هيروحوا يزروه
حور:طيب .. كويس
كارما:هتروحى
حور بتفكير: مش عارفه .. هفكر .. بس فى الاغلب لا
كارما بصتلها ودخلت المحاضره وحور وراها
حضروا باقى المحاضرات وروحوا
اغلب الطلاب اللى يعرفوا دكتور تامر راحوا زروه وهو كان بيدور على حور فى وسطهم اتنهد بزعل لما ملقهاش واحد من الطلاب ساله وهو بيقول: مالك يا دكتور .. فيه حاجه مضايقك ؟
تامر: لا .. تسلموا على الزيارة .. ده انا مبسوط اوى انكم جيتم
=ده واجبنا يا دكتور ..
قعدوا شويه مع تامر وهو كان بيحاول يضحك فى وشهم علشان ميبينش انه مضايق من عدم وجودها معاهم
___________________
كارما: الراجل فى المستشفى وعلى استنانى علشان نروح نزوره
حور: طيب انتى هتروحى مع خطيبك .. اروح انا اعمل ايه
كارما: قولى لياسين وهاتيه معانا .. ده وقف معاكى كتير
حور ضحكت وقالت:كتير اوى بصراحه
كارما:مش بهزر يا حور .. سيبى الشغل ده وبصيلى
حور سابت العده من ايديها. وهى بتقول ل كارما: حاضر يا كارما .. حاضر .. هطلع اغير واجى حاضر
طلعت. حور البيت وكارما فضلت قاعده تحت لحد ما حور نزلت
كارما:هتخدى ياسين معاكى؟؟
حور: لا .. هروح معاكى من غير ياسين
كارما:تمام .. يالا. .. "على" مستنى على اول الشارع
حور مشيت مع كارما وركبوا تاكسي مع على وراحوا على المستشفى وطلعوا
على: اوضة دكتور تامر فين لو سمحت؟؟
_ اوضه رقم ٣٠٦ والزياره فضلها نص ساعه وتخلص
على: تمام .. شكرا لحضرتك
يالا يا كارما
طلعوا لاوضة تامر ومكنش حد معاه .. اغلب اللى زروه مشيوا ..
على دخل و وراه كارما وحور دخلت بعديهم. وقعدت على جنب
على: الف سلامه عليك يا دكتور
تامر وهو مركز مع حور: الله يسلمك يا على جبناك وانت لسه خاطب
على: اهم حاجه حضرتك يا دكتور
كارما: الف سلامه عليك يا دكتور تامر .. ان شاء الله هتقوم بالسلامه قريب
تامر: الله يسلمك يا كارما
فضلوا باصين ل حور مستنين انها تتكلم ..
حور لاحظت نظراتهم فقالت بارتباك: احم.. ا .. الف سلامه عليك يا دكتور
تامر بابتسامه غريبه: الله يسلمك يا حورى
حور:ايه!!
تامر بتغيير للموضوع: تعبتوا نفسكم ليه مكنش ليه لازمه كل ده
على: اهم حاجه صحتك يا دكتور .. واغلب الشيكولاتات حور اللى جايباها ..
حور بصت ل على بغيظ وتامر لاحظ كدا. وحاول يدارى ضحكته
تامر:قاعده بعيد ليه يا حور .. اقعدى جنب كارما
حور : انا مرتاحه هنا
كارما: يا ستى تعالى اقعدى جنبى شويه .. انتى فعلا قاعده بعيد اوى
حور بصت. ل كارما بغيظ وقامت قعدت جمبها
قعدوا يتكلموا شويه ...
دخلت واحده وهى ماسكه ورد و حضنت تامر وقالت: الف سلامه عليك .
هتتفاعلوا كويس بما يرضي الله ولا اموتلكم. تامر واخليكم تتحسروا عليه مع حور وهى بتلم جثته المتبعثره بما يرضي الله بردو .. ما احنا مش هنعمل حاجه بما لا يرضى بردو
رايكم فى البارت وتوقعاتكم فى البارت الجديد
 #الاسطى_حور حور: طب يا ست الرومانسية .. سلام دخل اياد العربيه وهو بيقول ل حور: هفسحك بس قوليلى الطريق .. انا توهت علشان اجيل…){kind=link}
تعليقات
إرسال تعليق