 |
🌹البارت العاشر والحادي عشر 🌹
🌹ظلمت نفسي 🌹 بقلم ✍️ سلطان زماني
اول ما دخلت لقيت حاجتي كلها مرميه في الأرض
وكل شوية في اوضه قولتله اي ده ياحبيبي
قالي أنا كنت لوحدي ومتسربع وكسلت الصراحه وقولت
نعملهم مع بعض
دخل نصب السرير وحط المرتبة وانا خرجت الهدوم من الشنط بتاعتي وبرصها
وبطلع ملايه افرشها علي السرير لقيته هجم عليا
وزقني ع السرير ونام معايا فضلت أقوله اصبر ب بعد ما
نخلص الشقة استنا وهو مفيش خلص المهم وارتاح
ودخلت الحمام لقيت السخان بايظ والحنفايات بتنقط
والبياض متقشر وكمان مفيش اكره ولا ترباس للحمام
خلصت وطلعت فضلت الم في الشقة ع قد ما اقدر وهو نايم
اتهد حيلي في الشقة ودخلت اخدت شاور وطالعه لقيته
صحي ولا خد باله من منظر الشقة ولا قالي تسلم ايدك ولا
حتي كمان سال واهتم كلتي ولا
لبس وقالي هنزل اقعد ع القهوة شوية ولما ارجع بليل
هجيب اكل معايا قولتله أنا هنام لحد ما ترجع
قالي ماشي ياحبيبي
ودخلت نمت الساعة ١ بليل طلع وأكلنا وقولتله ع السخان الي
بايظ قالي احنا كده كده في الصيف عايزاه في ايه
قولتله الاكره طيب والترباس قالي هو احنا معانا حد غيرنا
قولتله لا بكره ننزل نشتري واحد
قالي ماشي ودخلني الاوضه ونام معايا وفضلنا ع الحال ده
شهر
بكلمه بقوله ليه مش تنزل تشتغل قالي هو انتي ناقصك
حاجه قولتله هو لازم يكون ناقصني حاجه علشان تشتغل
وبعدين الست متحبش قعدة الراجل في البيت
رد قالي أنا كان معايا تاكس وبعته ومش بشتغل عند حد
قولتله هو الشغل عند حد عيب ولا حرام قالي أنه اوقات
بيطلع شغل مع صاحبه في صيانه الاسانسيرات وبيطلع منها
بمبلغ كويس وكمان أخته متجوزة وعايشة في الكويت
وبتبعتله كل شهر مبلغ محترم قولتله ربنا يزيدك ياحبيبي
مش هنروح نزور حماتي وبالمره تعرفني عليها قالي بقولك
ايه انتي بقيتي رغايه ليه كده
ده انا كنت الاول مش بسمعلك كلمة
قولتله خلاص ياحبيبي أنا آسفه وسبته ودخلت اوضتي
لقيته بعدها بنص ساعة دخل حضني من ضهري وقالي
يابطتي أنا مش بحب حد يجبلي سيرتها قولتله سيرة مين
قالي امي مجرد ما بتيجي سيرتها بتعكنن قولتله خلاص
ياحبيبي مش هجبلك سيرتها وحضنته وعمل كده ونمنا
مرات الايام وحملت وبقيت اروح لوحدي انزل السوق لوحدي
اجيب علاج واكشف لوحدي وكان يكلمني وانا تحت افتكر
أنه بيطمن عليا
يقولي هاتيلي سجاير وانا كنت بكون
مكسوفه اوي وفي نص هدومي وانا بشتريها
في الشهر
الخامس رحت عملت صونار وطلعت حامل في تؤام وخلفت
عند امي وهو جيه يوم الولاده بليل ونام وصحي الصبح
سافر وفضلت قاعده لوحدي ولا عملهم سبوع ولا اهتم بيا ولا
بولاده
جيه خدني من عند امي بعد شهر ونص تقريبا ورجعنا
صور الولاد وبعتهم ل أخته واخته بعتتله 1500دولار نقطه
وبقا يقعد لوحده بحجه الدخان والولاد قاعد في اوضه وقافل
الباب ع طول وعلاقته بينا يطلع مره او مرتين يبص علينا
ويدخل تاني فضلنا علي الحال ده سنة لما زهقت ومليت
ومفيش حاجه مصبراني علي عيشتي غير عيالي لحد ما
شفتي اتحولت للقهوة بقا يلم صحابه ويقعدو في الصالة
يلعبو كوتشينه والدومنه وضحك وصوت عالي ودخان فظيع
وكل شوية اعملي شاي وعصير اخر ما فاض بيا قولتله
مينفعش كده انا تعبت قالي مالك في ايه ويتعلي صوتك كده
ليه يابت انتي اتجننتي
قولتله قاعد في البيت ومش بتشتغل وقولت ماشي قاعد
لوحدك ومش بنشوفك غير هما مرتين تطلع تطمن عليا
وتلعب شويه مع ولادك وقولت ماشي إنما تحولي شقتي
لغرزه
قالي شقت مين ياروح امك دي شقتي أنا ومش عايزك تنسي
نفسك وصوتك لو علي تاني عليا هغورك في داهية انتي
وعيالك بقوله انت بتقولي أنا الكلام ده قالي واقوله ل اتخن
حد في عيلتك دخلت لميت هدومي وهدوم عيالي وجيت
ونزلت الشنط تحت وطلعت اجيب عيالي وكل ده وهو قاعد
في الصاله وشايفني نزلت بلعيال وانا نزله ع السلم سمعت
رزعت الباب واحد صحبه فكرني رايحه زيارة عند اهلي عادي
قالي تعالي اوصلك للموقف وانا مش قادره امسك دموعي
سألني قالي في حاجه ولا ايه وهيثم ليه منزلش يوصلك
قولتله
يتبع .
🌹البارت الحادي عشر 🌹
قولتله لا ابدا دي ماما تعبانه شوية وانا قلقانه عليها
وهيثم نايم
قالي خير ان شاء الله اطمني وصلني لحد الموقف وطلع
الشنط ودفعلي الأجرة وراح جبلي حاجات من السوبر ماركت
قولتله مكنش ليه لزوم التعب ده كله
قالي ب ابتسامة تعبك راحه لو عوزتي اي حاجه في أي وقت كلميني
خدي الرقم خليه معاكي انتي مرات اخويا
واخد موبيلي وسجل رقمه ورن علي نفسه وقالي لما توصلي كلميني
طول الطريق وانا حسه اني عملت عملة جريمة خايفه هيثم
يعرف ده صحبه وبيقعد معه وشكيت اني ممكن يكون هيثم
متفق معه
ولما وصلت لقيت امي عند اخويا وفضلت قاعده بعيالي علي السلم مستنيها علشان المفتاح
وصلت امي وقعدت شوية ونزلت السوق تجيب اكل وحاجات
وقالتلي في ايه يابنتي مالك سكته ووشك اصفر وضعفتي
وليه خسه كده
قولتلها العيال هدين حيلي
قالتلي العيال متعملش كده في الست مالك ياحبيبتي
قولتلها تعبانه اوي ياماما وزعلانه اوي علي نفسي
وكل العياط الي كنت مش قادرة أطلعه طول الطريق طلعته
امي خدتني في حضنها وقالتلي انتي الي عملتي كده في نفسك
ياريتك كنتي سمعتي كلامي يافاطمة وكملتي مع عمر كنتي
وردة ومفتحه ومنوره وفيكي روح وانتي معه
مش مطفيه وبهتانه ودبلانه زاي الي ميتسماش هيثم ده
قولتلها أنا لسه بحبه ياماما بس معرفش ليه اتغير كده قالتلي
حب ايه وزفت ايه
عارفه يافاطمة أنا مشفتش ابوكي ده غير يوم كتب الكتاب
ولا هو كمان شافني وكان جدك الله يرحمه مش بيخرجنا من
البيت ولا عنده فترة خطوبة واني راجل غريب يدخل بيته ويقعد مع بنته لوحدهم
ابوكي يافاطمة عمره ما مد ايده عليا ولا قالي كلمة زعلتني
مفيش مره ولدت فيها الا لما كان بيسيب شغله ويفضل معايا
حتي وانا تعبانه يخدني ويجري بيا ع الدكاتره ويستلف
علشان يجبلي العلاج كانت حنيه الدنيا كلها فيه عمري ما
هونت عليه ابدا ..انا كنت مطمنه عليكي مع عمر علشان كان
راجل ومحترم كنت متاكده أنه هيحافظ عليكي وهيتقي ربنا
فيكي
أنما الي ميتسماش ده كان قلبي مقبوض والله مش مرتاحه
كنت حسه اني برمي بنتي ب أيدي للهلاك
قولتله بس ياماما أنا لسه بحبهو وهموت لو سبني هو
مشكلته أنه مش بيشتغل وصحابه الزبالة الي بيجي يقعدو عنده بالساعات دول
وكمان أخته الي بتبعتله فلوس من برا
قالتلي صحابه بيجو ويقعدو في بيتك
قولتلها اه ياماما
قالتلي في راجل يعمل كده ويعني ايه مش بيشتغ دي ..طب
ليه يابنتي متتكلميش معه براحه وبعقل
قولتله يووووووه كتير قولتله وهو عجبه حاله أنا قولت يمكن
يتغير لما اخلف ويحس بالمسؤولية شوية ويتصلح حاله
قالتلي هو عارف انك سبتي البيت قولتلها اه كان قاعد
وشايفني وصحبه الي وصلني للموقف
استغربت اوي وقالتلي هو قعد وخله صحبه يوصلك قولتلها
لا أنا نزلت الاول الشنط تحت قدام البيت وطلعت اخدت
العيال وصحبه قابلني في الشارع ووصلني
قالت لا حول ولا قوة الا بالله ودعتلي اني ربنا يهديه وقعدت
تلعب مع العيال وانا دخلت كلمت عمر علشان اشوف حمزة
وجبهولي وامي نزلت اخدته منه من تحت والواد شفني
ومستغربني مش طايق حضني وكل ما اخده يسبني ويروح
ل امي بليل فضلت بصوت ويصرخ وعايز أبوه بالعافيه سكته
وراح نام جنب امي
تاني يوم عمر جيه اخده طلع ورن الجرس وفتحتله اتخضيت
واتكسفت أنه يشوفني كده قفلت الباب شوية وقولتله ثواني
هلبس حمزة واجبهولك وندهت ع امي امي قالتله اتفضل
ياعمر ودخل وانا عماله ادعي ع امي أنها دخلته لبسته ولميت
شعري وعدلت هدومي وطلعت اسلم عليه قالي اخبارك ايه
يافطمة قولتله الحمد لله كويسة وانت قالي الحمد لله في
نعمه وفضل من الله
وهو بيتكلم ولادي سمع صوتهم وهما بيلعبو ضحك وقالي
ولادك دول قولتله اه عبدالله ومحمد قالي ماشاء الله ربنا
يباركلك فيهم دخلت جبتهم وحط ايده في جيبه وطلع لكل
واحد 200جنيه وقال ل حمزة أبسط ياعم اخواتك زادو
اتنين كمان كده بقا عندك عبدالله ومحمد وفاطمة وابراهيم
قولتله انت سميت فاطمة قالي اه سمتها علي اسم ستنا
فاطمة بنت سيدنا النبي محمد عليه افضل الصلاة والسلام
قولتله ربنا يخليهملك ويتربو في عزك
يتبع
ملحوظة مهمة جدا..أنا مش بحب احذف ولا احظر حد من صفحتي
بس حقيقي أنا بزعل وبضايق من قلة التفاعل ومن الناس الحلوه الي بتقراء وتستخصر تعلق ..اديني قولت الناس الحلوه
يلا تحياتي للجميع♥️
تعليقات
إرسال تعليق