مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت❤

-أنت مشوهة يا حبيبتي يعني يوسف قريب هيطفش منك. 

قالتها ليلي وهي بتبتسم... كنت متغاظة منها أنها بتعايرني.... معقول في أخت تعمل كده في اختها!! ... بصتلها وقولت:

-يوسف قالي أنه مش هيتخلي عني ابدا 

ضحكت بتريقة... ضحكتها كانت مقرفة... شريرة وقالت :

-كدب يا حبيبتي الرجالة بيهتموا بالمظهر والجمال... وانتي جمالك راح في الحريقة  بقيتي شبه الوحوش... الناس كلها بتخاف منك وتقرف منك... وحتي يوسف قريب لما يشوف الاجمل هيرميكي 

-قصدك ايه؟! 

ضحكت بشر وقربت مني وقالت :

-قصدي أنه. لما يلاقي واحدة جميلة زيي وشبه حبيبته اللي النار أكلت وشها أكيد هينجذب ليا وهيسيبك. 

بعدت وقولت :

-مستحيل يوسف يعمل كده 

-لا هيعمل... وعد مني يا سندس هاخده منك... يوسف هيحبني أنا ويتجوزني أنا  وهتشوفي

 وبعدين سابتني ومشيت.... قعدت علي السرير وأنا ببكي... ليلي بتكون أختي اللي أصغر مني كنا أنا وهي قريبين من بعض اووي وشبه بعض لدرجة أن كانوا بيفكرونا توأم. .. بس بعد ما اتخطبت ليوسف ومعاملتها اتغيرت... بعدت عني وبقت باردة وبعد ما وشي اتحرق بقت أسوأ.... كل شوية تعايرني بيه... كنت كل أما اشتكي لأهلي كانوا يسكتوا وميعملوش حاجة.... احيانا كنت بحسهم بيحبوها أكتر مني.. بس كفاية كده مش هسمحلها تتمادي... يوسف بيحبني هو قال ميهمهوش الحرق اللي في وشي وأنه متقبلني بكل حالاتي... وده مفروض يبسطني أن رغم جمال ليلي مقدرتش تجذب يوسف ليها.. ابتسمت بحب... يوسف طلب يقابلني النهاردة في مكانا المفضل... لبست الفستان الطويل اللي بيحبه وغطيت وشي بشال... مكنتش مستعدة أن ألمح نظرات الرعب في عيون حد من شكلي وروحت ليوسف. 

........ 

علي البحر. 

كنا قاعدين أنا وهو لما قولت فجأة 

-يوسف هو انت بتحبني؟! 

-أكيد طبعا يا سندس... وبحبك جدا كمان. 

بصيت للارض وكملت:

-يعني مش هامك شكلي ولا الحروق اللي في وشي 

مسك أيدي وقال :

-سندس أنا بحبك... بحب مرحك  وطيبة قلبك وحبك ليا فمستحيل شوية حروق ممكن تتعالج تأثر فيا 

-طيب لو ما اتعالجتش 

-مش مهم ده مش هيغير مشاعري 

-طيب اوعدني أنك عمرك ما هتتخلي عني ولا تسيبني

-أوعدك 

ابتسمت وأنا مطمنة.... أنا بثق في يوسف مستحيل يخوني أو يكسر قلبي... 

حطيت راسي علي كتفه وقولت :

-ربنا يخليك ليا 

-ويخليكي ليا. 

سبت يوسف وقولتله إني رايحة الدكتورة عشان تشوف وشي وتكشف عليه... حاول يروح معايا وانا رفضت بالرغم أن يوسف قبلني بوضعي بس بخاف اكشف وشي قدامه!! 

....... 

-بعد ساعتين 

رجعت من عند الدكتورة وأنا محبطة الحروق أصعب مما كنت أتخيل... لسه هنادي لماما بس افتكرت أنها وبابا راحوا لقرايبنا 

-يادي القرف هقعد مع البت الباردة اللي اسمها ليلي دي؟! 

لسه هتحرك لما سمعت صوت جاي من اوضتنا أنا وهي... اتحركت براحة وفتحت الباب ولقيت منظر عمري ما هنساه... أختي مع يوسف خطيبي... بيخونوني!! 

يتبع 

الجزء الثاني ❤

حسيت وكأن مية ساقعة اتكبت عليا.... دموعي نزلت لوحدها... كان نفسي ادخل وأصرخ فيهم بس مكانش عندي الشجاعة.... ليلي قدرت تسرقه مني.... طلعت من البيت من غير ما أحس... طلعت ولأول مرة بوشي... كنت ماشية في الشارع بلا هدف... دموعي بتنزل.... وقلبي واجعني.... معقول أختي تعمل فيا كده... أنا افتكرت أنها بتهدد بس السؤال الأكبر ازاي يوسف يعمل كده.... ازاي يوهمني أنه مستحيل يتخلي عني بعدين الاقيه مع أختي... الناس كانت بتبصلي بخوف وانا ببكي... فجأة قعدت علي  الأرض قلبي كان واجعني أن تحس أنك منبوذ من الكل ده أسوأ شعور ممكن تحسه... يوسف الوحيد اللي قولت انه مش هينبذني بس للاسف هو كمان نبذني.... هو كمان أختار ليلي زي ما اهلي حبوها أكتر مني.... بس هي السبب هي صممت تاخد كل حاجة أنا بحبها.... هي من زمان كده رغم أنها كان بتبين قدامي أنها بتحبني بس كنت عارفة أنها بتغير مني لأني كنت اشطر  منها.... واحلي منها.... اكيد استغلت الفرصة دلوقتي عشان تحس انها اجمل مني... عايزة تسرق حياتي وتنسبها ليها.... حسيت اني ضعيفة اووي وان هي اقوي مني بكتير... حسيت ان الكل باعني عشانها.... هو انا عشان فقدت جمالي هيعاملوني بالشكل ده... مش اهلي ويوسف قالوا هيتقبلوني مهما حصل... ليه دلوقتي اتخلوا عني... ليه فضلوا ليلي عليا... قعدت أبكي تاني... قربت مني ست كبيرة وقالت بطيبة :

-أنت كويسة يا بنتي. 

اتنفضت بخوف وبعدين قومت وجريت

......... 

وصلت البيت وأنا ناوية فعلا اواجهها... كفاية استهتار بيا كده... ليلي هتدفع تمن اللي عملته فيا.... هتدفع تمن أنها سرقت مني يوسف 

كانت بتدندن وهي واقفة قدام المرايا بتلعب في شعرها وبتبص لنفسها ولجمالها بفخر.... وقفت وراها فبصتلي وضحكت وهي بتقول:

-صعب عليكي أنك تشوفيني بالجمال ده وانتي مشوهة صح... علي فكرة لولا إني أختك كنت قرفت من منظرك بس مبحبش اجرح حد. 

ابتسمت وقولت بطريقة :.

-يا طيبة قلبك... ده انتي طلعتي ملاك علي كده 

-طبعا يا قلبي 

بصتلها بحقد وكره وقولت :

-أنا شوفتك انتي ويوسف... مبروك قدرتي تسرقيه 

بصتلي بخبث وقالت:

-عارفة أن انتي شوفتينا سوا... متتخيليش كنت فرحانة قد ايه وانا بشوف دموعك... استنيت كتير اووي عشان أشوف كسرتك يا سندس وأخيرا كسرتك. 

بصتلها بصدمة وأنا بقول :

-ليه بتكرهيني بالشكل ده... أنا عملتلك ايه أنا اذيتك في ايه... حرام عليكي يا ليلي احنا كنا أخوات.... كنا زي روح واحدة في جسدين... أما كنت بحبك اووي وبدافع عنك .. فليه تعملي كده.... ايه اللي حصل وخلاكي تكرهيني بالشكل ده... أنا حتي عمري ما اذيتك... ولا عمري فكرت اعمل كده

بصتلي بحقد لدرجة أن ملامح وشها الرقيقة بقت حادة وهي بتقول :

-عشان انتي اخدتي مني كل حاجة... اخدتي اهتمام أهلي وحبهم حتي يوسف الراجل الوحيد اللي حبيته انتي اخدتيه.... كنتي كل مرة بتحاولي تظهري احلي مني  وتجرحيني بكلامك

-محصلش! 

-لا حصل... كنت دايما بتحبي تظهري احلي مني... كنتي دايما بتجرحيني... بس خلاص يا سندس انتي انتهيتي... أنا أخدت جمالك لما عملت الحريقة دي... أيوة مصدومة ليه نسيتي أن أنا وانتي ساعتها اللي كنا بس في البيت الريفي... أنا اللي عملت الحريقة وهربت... وكمان أخدت خطيبك. 

-انتي حيوانة

صرخت وانا بزقها علي المرايا وقعدت اضرب فيها.... بعدت وايدي كلها دم... أنا قتلتها 

-سندس بنتي جريت ماما عليا فوقعت علي الأرض وأنا بقول :

-أنا قتلت ليلي يا ماما 

ماما بكت بس بابا كان غاضب وزعق :

-كفاية جنان بقا يا سندس مفيش حاجة اسمها قتلتي ليلي لأن ليلي مش موجودة أصلا... ليلي في خيالك المريض بس انتي ملكيش أخت حتي... بصتله بصدمه... وبصيت لجثة ليلي لقيتها اختفت... بصيت لبابا بصدمة... حضنتني ماما وقالت:

-هنروح تاني للدكتور وهتخفي.... متخافيش يا حبيبتي 

بصيت للمرايا المكسورة وأنا ببكي وشوفت وش ليلي بيبصلي بحقد وبيضحك 

يتبع 

الجزء الاخير شكرا لتفاعلكم القمر❤

كنت قاعدة قدام الدكتورة النفسية وأنا مصدومة... بسمع بهدوء اللي بتقوله... يعني كل ده كان وهم... أنا معنديش أخت... بصيت لأمي اللي بتبكي بحزن وابويا المتوتر وقولت:

-مستحيل أنا كنت باجي بنفسي واشتكيلكم منها... بقولكم قد ايه هي بتضايقني وانتوا كنتوا بتسكتوا 

بابا اتكلم وقال بتوتر:

-عشان انتي كنتي بتتوهميها فكنا بنسكت مرضناش نقولك الحقيقة لتتصدمي... كنا اتفقنا

مع الدكتورة أننا نجيبك ونقولك هنا زي المرة اللي فاتت. 

-المرة اللي فاتت؟!. 

-أيوة انتي جيتي هنا كتير قبل كده وكل مرة بنقولك أن مفيش حد إسمه ليلي وبتاخدي ادوية وتتحسني وترجعي تنتكسي تاني. 

هزيت رأسي وأنا بقول:

-لا انتوا كدابين.... ليلي موجودة... حتي هطلع موبايلي قبل ما اتشوه اتصورت معاها كتير 

طلعت موبايلي وبصيت علي الصور لقيت نفسي متصورة لوحدي... قعدت ادور في الصور بجنون وأنا بعيط... 

بصيت لأهلي وأنا بقول :

-ازاي 

بصتلي الدكتورة بشفقة وقالت :

-انتي عندك نوع من أنواع الذهان وهلوسات شديدة  من صغرك خلتك تخلقي جوا مخك اخت ليكي اسمها ليلي حالتك كانت بسيطة لحد ما حصلك التشوه وحالتك ساءت... عشان كده انا واهلك اتفقنا ان... 

سكتت الدكتورة فقولت 

-اتفقتوا علي ايه 

-اتفقنا أننا نوديكي المصح. هيعرفوا يتعاملوا مع حالتك هناك. 

عيوني دمعت فقربت مني ماما وقالت :

-صدقيني يا حبيبتي هي ست شهور وهتتعافي تماما وتخرجي تتجوزي يوسف حب حياتك اللي استحمل كتير معانا... وافقي يا سندس عشان خاطري. 

هزيت رأسي ووافقت. 

..... 

كان أول يوم ليا في المصحة صعب... كنت ببكي من غير ما اوقف... بس مر أسبوع واسبوعين واتعودت الدكاترة والممرضين كانوا بيعاملوني معاملة كويسة 

مرت الست شهور بسرعة وخفيت خالص وسمحولي إطلع...  وفورا اتجوزت يوسف في حفلة كبيرة.. كمان قدرت اعمل عملية تجميل .... كنت مبسوطة اووي.. مرت الايام والشهور وليلي مظهرتش في حياتي بس في يوم وانا واقفة قدام المرايا ببص علي بطني اللي بدأت تكبر بحب خلاص كلها كام شهر وتشرف بنتي لقيت ليلي بتبصلي بحزن... اتخضيت في الأول بس ابتسمت لما افتكرت أتعامل معاها ازاي 

-خلاص عرفتي إني وهم... إني مش موجودة ومش هقدر أذيكي 

ابتسمت وقولت:

-أيوة وعارفة كمان أن حاليا انتي مش موجودة ولازم اتجاهلك بس حابة اقولك حاجة... أنا قررت اسمي بنتي ليلي... مهما حصل انتي كأخت أنا صنعتها جوا دماغي لينا ذكريات حلوة مع بعض. 

ابتسمت وأنا ابتسمت وفجأة اختفت... كنت عارفة هتعامل معاها ازاي تاني لو ظهرت هتجاهلها ببساطة... جه يوسف من ورايا وحضني وقال :

-فيه مامي حلوة كده 

-أيوة فيه أنا 

-بحبك يا أجمل مامي 

-وأنا كمان يا أجمل بابي 

تمت ❤

شكرا علي تفاعلكم القمر ده ❤❤ ولو عجبتكم فكرة الغموض قولولي ونلتقي في سكريبت جديد بإسم هاجر اجهزي يا هاجر❤