 |
الحرمان الجزء الأول والثاني
النهارده فرح سلفي والبيت كله مليان ناس كلنا مبسوطين اخيرا حازم هيتجوز بعد ما عدى ال 35 سنه اخيرا في واحده اقنعته بيها اخيرا البيت كله فرحان وحماتي فرحانه وحمايا فرحان كلنا مبسوطين جدا.....
انا كوثر وعندي 38 سنه متجوزه من 20 سنه اتجوزت صغيره شويه لكن اراده ربنا اني مخلفش لحد دلوقتي الدكاتره اجمعوا ان احتمال اننا نخلف ضعيف جدا وانا خلاص شيلت الموضوع من دماغي لأن سني كبر ما بقتش مستحمله عمليات ولا ادويه تاني سلمت امري لربنا كان نفسي ابقى ام و احس بطعم الامومه بس ربنا عاوز كده الحمد لله على كل حال
النهارده فرح سلفي الوحيد جوزي ما عندوش اخوات غير هو...
اخيرا بيتنا هيخش له فرح بدل الكآبه اللي احنا عايشين فيها على طول ....
_ ايه القمر ده يا كوثر انتي حلوه قوي النهارده
= ما تكسفنيش بقى يا حسام انا حاسه ان الفستان بتاعي شكله مش حلو
_ بالعكس انتي زي القمر النهارده ده انتي كده هتغطي على العروسه بقى
ضحكت وكملت لبسي ولفيت الطرحه وخدني ورحنا عالفرح...
اتفاجئنا هناك ان العروسه لابسه فستان مكشوف من كل حته والغريب ان حازم كان راضي ومبسوط مع انها محجبه في الحقيقه انا قلت في بالي يمكن فرحانه وعروسه عايزه تفرح لكن من اول الفرح لما جيت اسلم عليها لقيتها بتسلم على من طراطيف صوابعها استغربت جدا خصوصا ان هي في ايام الخطوبه ما كانتش كده خالص هي هتبديها ولا ايه.....
الفرح خلص وكلنا روحنا البيت وكل واحد طلع علي بيته تاني يوم الصبح نزلت عند حماتي احضر الفطار وخبطت عالعريس عشان محضرينله فطار حلو وخليت حسام يجي معايا عشان كنت محرجه لانهم عرسان جداد اول ما خبطنا لقينا سلفتي فتحت الباب بهدوم مكشوفه قدام جوزي لقيته دور وشه وهي واقفه ولا كأن فيه راجل قدامها ...
_ احنا جينا نجيبلكم فطار صباح الخير
= شكرا تعبتوا نفسكم ...
وخدت الفطار وقفلت الباب....
_ هي ايه الي عملاه في نفسها ده ياكوثر ...
= تلاقيها مخدتش بالها يا حسام عروسه جديده بقي ...
قولت الم الموضوع لا يفتكرني غيرانه منها ولا حاجه.....
عدا اسبوع والتاني وانا الي بنزل لحماتي اخدمها واعملها الاكل وهي مش بتمد ايديها في اي حاجه بتنزل بليل كده شويه تقعد معانا ربع ساعه وتطلع تاني....
وفيوم لقيتها نازلة شبه عروسه المولد وحاطه ميكب مغرقه وشها لقيت حماتي بتقولها...
_ ايه الي حطاه في وشك ده يابسنت...
= مالي حطه ميكب ...
_ بس مش كتير شويه انتي نازلة لحماتك مش رايحه فرح....
لقيناها زعلت وهتطلع حماتي ندهتها وقالتلها
_ اعملي حسابك من بكرة هتنزلي من الصبح تساعدي كوثر مش هتشيل هي البيت لوحدها
طلعت فوق ومردتش عليها وفضلت يومين مختفيه وحماتي مبقتش طيقاها خالص وزعلانه عليا
_ هو انا قصرت معاكي في حاجه ياماما عشان تنزل تساعدني
= لا بس مش هتبقي شايله البيت لوحدك وفيه واحده تاني فالبيت ...
_ خلاص ياماما سيبيها براحتها...
لقيناها نازلة بعد اربع ايام والفرحه علي وشها وبتقولنا باركولي انا شكلي كده حامل عقبالك ياكوثر
لقيت حماتي بتعيط من الفرحه وبتحضنها وهي بتبصلي كأنها بتواسيني
انا اتقهرت مش عشان انا مش فرحانه زعلت اوي عشان انا مبحبش اصعب علي حد ....
دخلت المطبخ اكمله وسمعت حماتي بتقولها ...
_ اوعي تتحركي من مكانك حتي شقتك كوثر ال هتنضفهالك كل يوم ...
= لا يا ماما مش عاوزه اتعبها....
_ تعب ايه دي كوثر هتفرحلك اكتر مني
بصراحه اتعصبت وطلعت برة المطبخ علي شقتي هو انا هعمل ايه ولا ايه انا هقدر اخدم حماتي وبيتي وبيت سلفتي كمان لله الامر من قبل ومن بعد ....
نمت بليل وصحيت علي تليفون حماتي
_ يلا ياكوثر قومي جهزي الفطار عشان سلفتك لازم تتغذي
= حاضر ياماما
لقيت حسام صحي
_ في ايه بتقومك بدري كده ليه
= انا ملحقتش احكيلك بست تقريبا حامل ومامتك قالتلها ترتاح وانا الي هعمل كل حاجه فالبيت وفشقتها
_ ليه هما اشتروكي مش هتعملي حاجه هي حامل متشلتش
ونزل لمامته وهو متعصب وفضل يزعق وانا اهدي فيه
حماتي زعلت مني افتكرتني مسخناه ...
مشي راح شغله وانا قعدت افهمها انها فهمت غلط وعشان اثبتلها ده طلعت لسلفتي انضفلها بيتها
خبطت عليها وفتحتلي
وكانت بتمثل انها تعبانه وباين اوي عليها
عماله تقول حاسه ان نفسي بتغم عليا وراحت دخلت الحمام
دخلت الاوضه انضفها واول ما فتحت الدرج اتصدمت لما لقيت
الجزء التاني من الحرمان
فتحت الدرج عشان احط حاجات لقيت فيه برشام منع الحمل ومتاخد منه طب ازاي حامل وواخده منه ندهت عليها اسألها هو ايه ده ...
_ بسنت لو سمحتي اخرجي دلوقتي عاوزاكي....
= في ايه
_ هو انتي ازاي حامل وبتاخدي برشام منع الحمل...
= وانتي ازاي تفتشي في حاجتي وعالعموم يا كوثر انا رايحه النهاردة للدكتور تعالي معايا ....
البرشام ده خدته اول كام يوم قولت اعيش حياتي شهرين تلاته بعد كده اجيب عيال عقبالك ان شاء الله ....
فالوقت ده جوزها فتح الباب ودخل لقيتها جريت تقوله
_ اسكت ياحازم مش كوثر مش مصدقه اني حامل ...
= لا يا كوثر بسنت فعلا حامل احنا عملنا اختبار فالمعمل وهتروح للدكتور النهاردة ...
_ اه منا هاخدها معايا ...
ولو عالنضافه ياكوثر فانا مش عوزاكي تنضفيلي بيتي تاني انا هعمله واحده واحده...
= لا انا مش قصدي متزعليش مني...
كملت تنضيف والدموع في عيني ونزلت عشان احضر الغدا اول ما دخلت لقيت حماتي بتقولي..
_ مالك ياكوثر شكلك كنتي بتعيطي
= لا ياماما ابدا التراب دخل في عيني ودمعت....
_ ربنا يابنتي يجبر بخاطرك ويرزقك بالذريه الصالحه
دخلت احضر الاكل وانا مش قادرة اقف علي رجلي...
وبسنت بعدها بساعتين نزلت تتغدي اول ما نزلت قعدت عالسفرة ولا قالتلي هاتي احط طبق حتي ولقيت حماتي كلامها اتغير معاها تمامآ وبقت تعاملها حلو جدا وعماله تقولها تعالي ارتاحي حطيت الاكل ودخلت اجيب بقيت الاكل من المطبخ
لقيت حمايا خرج من اوضته و اول حاجه عملها راح بايس دماغ بسنت وقال لها اخيرا هتجيبي لي ولي العهد اللي نفسي فيه عارفه يا بسنت لو جبتي ولد هاكتب لكم كل حاجه في البيت والمحلات بتاعتي وهتبقى انتم اللي ماسكين كل حاجه انا مش ضامن عمري انتوا هيبقى لكم كل حاجه
ان شاء الله يا عمي هاجيب ولد وكمان هسميه على اسمك
بجد يا بنتي ربنا يبارك لك يا رب ويجبر بخاطرك
الكلام نزل على زي الصاعقه يعني هو قصده ايه انا هابقى في البيت خدامه وهي اللي هتبقى لها كل حاجه ليه كده انا ذنبي اني ما بخلفش انا مش عايزه اقعد في البيت ده لحظة...
حطيتلهم الاكل وقلت لهم انا هاروح البيت عندي عشان ورايا شويه حاجات وهبقى اكل بعدين
_ ماشي يا كوثر ما تنسيش هتيجي معايا عند الدكتور النهارده عشان اتطمن على البيبي
= ان شاء الله بعد المغرب كده هتلاقيني لابسه ومستنياكي ..
دخلت شقتي واترميت على السرير وفضلت اعيط كتير لقيت حسام داخل على ومخضوض...
_ مالك يا كوثر في ايه اللي حصل
= ابدا يا حسام ما فيش حاجه
_ والله لو ما قلتي في ايه هانزل تحت و هتخانق معاهم كلهم
حكيت له على كل حاجه حصلت وكلام باباه وانهم عامليني خدامه في البيت اتعصب جامد وكان عايز ينزل يمسك فيهم لكن انا هديته وقلت له انا اللي يرضيني انك تاخذ شقه بعيد عنهم احنا خلاص ما بقاش لنا حاجه هنا وهما اللي هيبقى ليهم كل حاجه
= حاضر يا حبيبتي اللي يرضيكي هاعمله
_انا دلوقتي نازله مع بسنت عند الدكتور عشان تطمن على البيبي
= لا ما تنزليش معاها تروح تاخد مامتها او جوزها
_ ما ينفعش يا حسام كده هيقولوا عليا اني غيرانه منها وانا ربنا اللي يعلم اني مش غيرانه انا بس نفسي ابقى ام
لبست واستنيتها لقيتها عدت عليا خدتها وروحنا للدكتور ودورها جه قعدت عالسونار...
اول ما قعدت لقيت الدكتور بيقول ماشاء الله يامدام حملك ثابت وكويس وفي كيسين قدامي انتي حامل في توأم ....
فايده ...
لكنه صمم يكشف عليا وصمم يساعدني اول ما قعدت عالسونار كانت المفجأه ...
يتبع الجزء الثالث والرابع والخامس الأخير بعد ساعه
تعليقات
إرسال تعليق