مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

حبيبي وفانزاتي العزيزات.. 

الحلقه الخامسه

#إنسان# سافل # بس#محترم

أحمد ..-:(ندى انا عاوز انام معاكى )) قال الجمله دي بهدوء و رجع بيبص للبحر تاني  وكأنه بيسالها مثلا الساعه كام 

ندى اتخضت جدا من كلامه على الرغم انها كانت متوقعه منه حاجه ذي كده لكن لأن كلماته و حكايته  أثرت فيها لم تتوقع ابدا ان تسمع منه الجمله دي في هذا التوقيت تحديدا 

فاقت من الصدمه وبصتله وقررت تكون مثله هاديه أو بارده 

وقالت ندى :_.بص يا احمد اقسم بالله لو فكرت حتى انك تكرر الجمله دي تاني صدقني هتلاقى منى رد فعل لا انا ولا انت نتوقعه ولا حتى تقدر عليه

 ((قالتها بهدوء لكن لغه التحذير والوعيد كانت وضحه في نبره صوتها ))

أحمد ضحك جدا وقالها:- ...عاارف يا ندى من غير ما تقولي ولا انا محتاج منك تهديد كل ما في الموضوع كنت بنكشك شويه 

ندى ماعرفتش تكمل الهدوء المصطنع وبصتله باستغراب 

أحمد :_..تعرفى يا ندى من أول يوم شوفتك فيه لما سالتيني على مكان الحمام وبعد شويه سمعتك بتعيطي حسيت من ناحيتك بحاجه غريبه بتشدني ..وبعد ما اتعاملت معاكى ومع بنتك اكتشفت ان فيكي حاجات كتير شبه جدتي وأن ليلى فيها منى شبهي و شبه ظروفي ..يعني أبويا وامي سابوني في سن صغير وسافروا وجدتي هي اللي قامت بالمهمه كامله .انتي بردوا بتعملي كده مع بنتك بتقومي بنفس مهمه جدتي مع بنتك

ندى .:- اولا فيه ستات كتير جدا بيعملوا كده مع ولادهم اشمعنا انا بالذات

ثانيا، سمعتني وانا بعيط.. معلش مش فاهمه الجمله دي انا كنت في حمام السيدات يعني انتي دخلت ورايا الحمام

احمد:- يالهوي انتى مش بتفوتي حاجه خالص 😂

هريحك مع اني مش بعملها كتير

ندي :- هي  ايه دي اللي انت مش بتعملها

أحمد :- انى مش بريح حد في الكلام اسيبه كده يلف ويدور وانا مطنشه 😂

(ندي اضيقت منه وضربته في كتفه ولفت علشان تمشي بس احمد وقفها وهو بيضحك علي طريقتها)

احمد:خلاص ياستي متبقيش طفله صغيره هقولك بس اقسم بالله اللي هقوله ليكي هي الحقيقه... انا من اول يوم شوفتك حسيت انك مش غريبه عليا والله العظيم ياندي ما هو كلام ولا حوارات ولا اي حاجه من اللي انت ممكن تتخيليها من كلام راجل بيقوله لست .. ابدا بس حسيت انك مش  غريبه بيني وما بينك معرفه .راحه نفسيه حاجه مش فاهمها ولا عارف اوصلها    ده اللي خلاني وبصراحه شديده اول مره اعملها اني اتابع واحده بعينها فضلت واقف قدام باب الحمام وفجاه لقيت تليفونك بيرن ولقيتك بتعيطي معرفش ليه حسيت ان ما ينفعش انك تعيطي ...ده اللي حصل يا ندى اقسم لك بالله ان كل كلمه قلتها صادق فيها وعلى فكره سواء صدقتيني وما صدقتنيش مش هيفرق معايا كثير عارفه ليه لاني اصلا بني ادم ما ينفعش يتصدق المهم ما علينا ما تشغليش نفسك بيا

ندى:- انت شايفاني بعد اللي انت قلته ده مش هشغل نفسي

بيك قصدي يعني مش هشغل نفسي من الكلام اللي انت حكيته انت غريب قوي يا احمد انت كل حاجه وعكسها فى وقت واحد هو انت برج الجوزاء ولا ايه 

احمد 😂:_لا يا ستي انا برج القاهره

ندي :_على فكره يا احمد انا مش مستغربه الدنيا نفسها بقيت كل حاجه وعكسها فى وقت واحد مش انت بس

أحمد ..صحيح بس انتي تحديدا  لا مش ذي الدنيا دي او بمعنى تاني مش ذي الناس اللي قابلتهم في دنياتي شفت فيكي تصرفات شبه اللي جدتي كانت بتعملها معايا وشفت في بنتك فرحه في عنيها وصوت ضحكتها كانت شبه اللي بيحصلي لما تتحقق ليا امنيه بحلم بيها. وأنا في سنها ...عيلتك الصغيره يا ندى شبه عيلتي زمان 

ندى حاولت تفهم احمد وسألت نفسها-: ( يا تري انت عاوز مني ايه يا احمد) بس ما اخدتش بالها أن صوتها كان عالي وأنه سمعها) 

أحمد بصلها وقال :_انا مش عاوز منك حاجه يا ندى غير أننا نكون  أصحاب وأصحاب رجاله كمان .انتي لما بتتكلمي معايا بتتكلمي بعفويه مش بتدوري على الكلام ولا على طريقه توصلي بيها كلامك  حتى صمتك بيكون أبلغ من أي كلام ... ابتسم وقالها بطريقه مضحكه .......(ممكن نكون أصحاب يا رمضان)

ندى ضحكت على طريقته ((رمضان مين))

أحمد:_ ...انتي صديقي رمضان ولا تحبي اسم تاني ماعنديش مانع 

ندى:_ ....اوك رمضان حلو هات ايدك سلام الأصحاب .

ولكن بمجرد أن مد يده لها فاجاه سحبت ايديها وأحمد استغرب من تصرفها وقال (مالك يا رمضان اتكهربت )

ندى:_ ...استنى هنا يعني ايه أصحاب رجاله. انت ممكن تتكلم معايا عن علاقاتك اللي هيه لا مؤاخذه

أحمد ضحك جدا وبكل صوته .-:.اللي هيه ايه (وكمل ضحك وسط ذهولها الشديد من رد فعله )

أحمد:_ ...أيوه طبعا هحكيلك يا رمضان عن كل حاجه مش احنا أصحاب (وانتهت نوبه الضحك  فاكمل )

ندى على فكره انا معنديش أصحاب نهائي ولا راجل ولا ست كل اللي حواليا معارف زمايل إي حاجه لكن أصحاب فعلا يبقى لأ ماعنديش 

ندى:_ ...انا مقدرش يا احمد  ده انا لما دخلت على صفحتك وقرأت كلامك على البيدج حسيت اني دُخت جدا فازاي اسمع منك الكلام كده عادي يعني

أحمد ضحك تاني:- ...يا خبيثه انتي دخلتي علي صفحتي انتي بتدوري عليا(وبصلها جامد في عنيها )

ندى حست فاجاه أنها سخنت جدا على الرغم انها قاعده قدام البحر لكن العرق ظهر بغزاره على وشها احمد  شاف ده وكان سعيد اد ايه هى فعلا عفويه جدا وخجوله 

ندى لم تنطق حرفا واحد بل حاولت أن تقوم من مكانها وأحمد لم يمانع .بس وهي ماشيه قلها:-.شوفي يا ندى منظر شروق الشمس رائع ازاي 

ندى بصت في اتجاه البحر وانتبهت أن الوقت فعلا عدا بسرعه 

ندى .:-...اه فعلا المنظر أكثر من رائع...(كانت تنظر للشروق وكانت مبهره جدا  لأن دي اول مره ندى تشوف الشروق بالجمال ده  ويبدوا كدا ان كل ما يحدث لندي حاليا هو لأول مره

أحمد:- ...يلا اطلعي ارتاحي الساعه بقت 5 والفطار. هيبدا من 7...ابتسم وهو بيقولها (هستناك يا رمضان في المطعم ) 

قال الجمله دي وهو يبتعد عنها متجه الي الفندق تاركا ندى أمام البحر تتابع الشمس ولكنه لا يعلم أن ندى تفكر بعمق وتتسال (هل اقتنعت بكلام احمد عن تفسيره لسؤ أخلاقه هل ظروف نشأته هي السبب في ما هو عليه الآن كما قال

{لا أظن} قالتها ندى......هناك الكثير ممن لهم ظروف احمد بل إن احمد نفسه كان أكثر حظا منهم وأفضل حالا ولو قليلا على الأقل كان لديه جده ترعاه حتى لو كانت مسنه كان لديه بيت يحميه من برد الشتاء وشمس الصيف  وعلى الجانب الآخر كان غيره يحتمي من ظروف الشارع بصنديق القمامه في ملجأه وايضا مكان طعامه بالتأكيد لا احد يعلم تفاصيل حياتهم وما وصلوا إليه ولكن بالتأكيد أيضا أن احمد كان الأكثر حظا منهم يكفي أن احمد كان لديه  أحد في حياته ويكفي أيضا أنه حصل على تعليم جامعي راقي واستطاع أن يحصل على عمل راقي جدا وكل هذا وهو في سن صغير ..

(لا يا احمد) هكذا ردت على نفسها (انت تضع لنفسك الحجج وتستمتع بدور الضحيه )

بعد قليل ذهبت إلى غرفتها ووجدت والداتها مستيقظه تنظر إليها 

الأم :-....كنتي فين يا ندى 

ندى:_ ....على البحر يا ماما 

الام.:_. كل ده حرام عليكي انا اتخضيت عليكي وسايبه تليفونك كمان 

ندى:_ ...اسفه يا ماما بس انتي عارفه دي اول مره اخد اجازه ما كنتش عاوزه اضيع إي وقت من غير ما أستمتع بيها وكمان الاجازه صغيره 

الأم .:_...انا مامنعتكيش بس كنتي تعرفيني 

ندى:_ حاضر يا امي عن اذنك بقى اتوضي وأصلي 

بالفعل ندى توضات وصلت فرضها ولكن في البلكونه وهي لا تعلم أن احمد أيضا كان في البلكونه وقد رائها وبعد الصلاه جلست تفكر فيما حدث لها اليوم 

أتى ميعاد الفطار واتجهوا للمطعم وتقابلت مع اصدقائها وجلسوا جميعا على طاوله طويله وكان الجو مليان ضحك وهزار..ندى وجدت رساله على تليفونها مبعوثه من احمد:- 

((ازيك يا رمضان فيه رحله الساعه 1هتعجبك جدا حاول تخلص فطار بسرعه واجهزوا علشان المركب مش هتستني حد )

ابتسمت ندى على اسم رمضان وذهبوا جميعا إلى رحله المركب واتغدوا على المركب وكانت رحله رائعة بجد ..بعد شويه رجعوا الاوتيل وراحت ندى وعيلتها على البسين 

ليلى لعبت في البسين مع الولاد والبنات اللي في سنها واتفجوا أن احمد نزل معاهم في حمام السباحه الخاص للاطفال وكان بيلعب مع ليلى بسعاده كبيره ندى ومامتها وبعض صديقاتها اكتفوا بالجلوس والاستمتاع بالمنظر 

بعد العشا نامت الجده وليلى من تعب واجهاد اليوم

 أما ندى فعلي الرغم من أنها لم تنم ليله أمس إلا أنها نزلت وجلست أمام البسيين على الشيزلونج واستخدمت تليفونها لسماع الراديو لأن ندى من عشاقه وبالفعل ظلت تسمع الراديو حتى غفت على نفسها . استيقظت بعد ساعتين لتجد احمد جلس بجانبها على الكرسي الآخر يعبث في هاتفه اما تليفونها بجانبها مغلق 

ندى اتخضت وكادت تصرخ لكن احمد ضحك وقال-: (بس يا ندى اهدي فيه ايه شوفتي عفريت ) 

flash back

أحمد بعد العشا كان يبحث عن ندى فلم يجدها قرر انتظارها في البلكونه وقد رائها وهي تنزل وتجلس أمام حمام السباحه فكر ان ينزل إليها حتى جاءه تليفون عمل بعد أن انهاه عاد البلكونه فلاحظ ان ندى قد غفت على الشيزلونج فقرر النزول 

اتجه احمد إلى ندى فتأكد أنها نائمه فأزال السماعات من اذنها واخذه الفضول للاستماع االي تليفونها فتفاجا ان ندي  تسمع الراديو ابتسم وو قال

احمد -:  (يا ياندي دانتي قديمه اوى )

وتذكر كلامها حينما قالت انا وبنتي كلاسيكي شويه و بنحب كل حاجه قديمه واصيله 

أحمد:- ..فعلا يا ندى انتي بجد مافيش ذيك قديمه فى تفكيرك واصيله 

جلس أمامها وتفقدها بعينيه وكاد أن يسرح فيها وفي جسدها ولكنه فاجاه ابتعد وكشر بوجه و غضب من تصرفه هذا ..ابدا يا حمد ما ينفعش ...هكذا تحدث لنفسه 

جلس على الشيزلونج بجانبها وقرر أن يبقى هكذا حتى تستيقظ لوحدها فهو حقا لا يريد أن يتركها هو دائم البحث عن مكان يجمعهما حتى وإن لم يتحدثوا مع بعض فقط يريد رؤيتها ليطمئن عليها أو بالأحرى ليطمئن هو على نفسه بجوارها 

((((عوده للحاضر)))))

ندى .....انا بقالي قد ايه نايمه كده (قالت جملتها وهي تعتدل في جلستها وتحاول ان تهندم من نفسها )

أحمد ...ماعرفش انا هنا من فتره بسيطه

ندى ...تمام طيب عن اذنك يا احمد 

أحمد ...اتفضلي يا ندي 

أحمد ....بقولك يا ندى المساعد بتاعي عنده ظرف طارق واضطر يسافر القاهره النهارده وانا عاوزك تكوني المساعد بتاعي في ايام الرحله وليكي فيها فلوس كويسه كمان 

انا هكلم الاستاذ عبد العزيز وهو مش هيرفض. ايه رأيك يا ندي 

ندى ...رأي في ايه انا مش فاهمه مساعد ازاي 

أحمد ...بصي يا ستي انا عندي جروب ألماني موجود في الغردقه هكون معاه وعاوزك تكوني معايا في الجروب من بكره لأن الجروب كبير 

ندى ...بس انا معرفش الماني

أحمد ....فيهم بيتكلم انجليزي يا ندي وبعدين انا معاكي 

ندى ...طيب ممكن امشي دلوقتي لاني تعبانه اوي من النومه علي الكرسي ده 

أحمد....اوك يا ندي تصبحي علي خير ونكمل بكره 

ندى مشيت من قدام احمد ومارديتش 

تاني يوم قبل ميعاد الفطار رن تليفون ندى  وكان المتصل الأستاذ عبد العزيز وطلب يقابلها في اللوبي بتاع الاوتيل 

ندى .......  صباح. الخير. استاذ. عبد العزيز

بكره نكمل يا قمرات 😘😘

#رانيا #محمود

الحلقه السادسه

#إنسان# سافل # بس#محترم

عبد العزيز.:-..صباح الخير يا ندى .بصي بقى يا بنتي عاوزك تكوني مع احمد زيدان كمساعد ليه لأن المساعد بتاعه أعتذر واضطر يرجع القاهره وعلى فكره الموضوع ده فيه فلوس حلوه يعني تقدري تقولي كده هتبقي فسحه مدفوعه الأجر كمان ايه رأيك 

ندى وبهدوء شديد ّ:_...وليه انا بالذات يا استاذ عبد العزيز تقريبا موظفات العلاقات العامه كلهم معانا في الرحله ليه ندى تحديدا 

عبد العزيز:-....لسببين اتنين  يا ندى ملهمش تالت 

.اولا .لأنك بنت مؤدبه جدا واخلاقك راقيه وبتجيدي الانجليزيه وشكلك وجهه مشرفه للشركه لأن الجماعه الألمان أهم حاجه عندهم في التعامل هي الأخلاق والمعامله الصح والجاده وانتى متوفر فيكي ده وعلى فكره كلامي مش معناه أن باقي موظفات الشركه مش متوفر فيهم الصفات دي لا سمح الله 

ندى قطعته ..-:يبقى هو السبب الثاني اللي خلاك تخترني يا استاذ عبد العزيز وأنا بقى عاوزه أسمعه اتفضل 

عبد العزيز أحس فجاه باحراج شديد وكأنه اخد دش ساقع وسخن ورا بعض ...:_بصي يا ندى انتي الموظفه الوحيده اللي معانا ومعندهاش ارتباطات عائليه يعني انتي ووالدتك وبنتك وطبعا والدتك تقدر تاخد بالها من ليلى ويعنى انتي .احم يعني  قصدي مافيش  زوج معاكى و انتي عارفه بقى كلكيع الرجاله يا ندى 

ندى ابتسمت بسخريه:_ ....كلكيع الرجاله علشان هنزل شغل مع احمد زيدان  صحيح ماهو مافيش راجل هيرضي ان مراته تشتغل تحت ايد وعين احمد زيدان لكن ندى مباحه😠

عبد العزيز بغضب من نفسه أكثر من غضبه من كلام ندى :_....لا يا ندى اوعى تقولي كده وعلى العموم انا اسف اقسملك انا بعتبرك  زي بنتي  وعلى فكره احمد شخص محترم جدا في شغله ومن وقت احمد ما اشتغل في الشركه ما جاتلي إي شكوي منه وخصوصا شكوي بتخص أخلاقه أما عن حياته الشخصية احمد عمره ما خلطها مع شغله  وحياته الخاصه هو حر فيها طالما بعيده عن الشركه والشغل وعموما يا ندى انا سحبت كلامي ويالا بينا علشان نلحق الفطار 

ندى بهدوء وإصرار كانوا واضحين في نبره صوتها :_....انا موافقه يا استاذ عبد العزيز هبدا امتى 

عبد العزيز وهو بينظر لندي نظره اسف حقيقي:_ ....بعد الفطار يا ندى 

ندى وعبد العزيز اتجهوا للمطعم وندي قاعدت جنب بنتها ومارفعتش وشها من أمام الاطباق نهائي احمد لاحظ كده وكان مشغول عليها 

بعد الفطار ندى اتكلمت مع مامتها على موضوع الشغل

الام:_ يعني يا بنتي انت جايه الرحله علشان ترتاحي فيها وتفرجي عن نفسك وعن  بنتك و تفسحيها في اماكن جديده عمرها ما شفتها وتكوني معها ولا ايه انتي بردوا جايه تشتغلي وتسيبيها، يا بنتي ما ينفعش كده بصي لنفسك وبنتك

ندي :_يا ماما انا معكم وبعدين كل الحكايه كم ساعه بس بتوع الصبح وهبقى طول اليوم معكم  وبعدين يا حبيبه قلبي ربنا يخليك لي يا أمي

الام:_ يا بنتي انا مش عايشه لك خلي في  جسر بينك وبين بنتك علشان  تعرف انك انتي امها متخليهاش تتعود على عدم وجودك في حياتها الدنيا والزمن بيتغيروا انتي كده مش هتعرفي تكوني صاحبتها هتحسك غريبه عليها... ياندي ليلي محتاجه لك اكتر من انها محتاجه لي

ندي :_ حاضر يا أمي أنا اوعدك اني مش هتاخر وقبل ميعاد الغدا هتلاقيني معاكم... اتفقنا يا كبيره 😘(وباست ايد مامتها وحضنتها وامها بتدعلها ان ربنا يبارك لها فيها وفي بنتها ويرزقها الزوج الصالح اللي يعوضها عن اللي فات

ندي :انا هلبس وانزل بقي ياجميل

الام :_هتشتغلي مع احمد زيدان

ندي :_ايوه يا ماما

الام:_والله الشاب ده ابن حلال وقلبي ارتحله وقلبي وجعني عليه لما عرفت انه يتيم ام وأب من سنين

(مامتها من ساعت ما طلعت الرحله وهي مبسوطة من احمد لأنها كانت بتشوف معاملته الجميله مع ليلى) .

ندي "_😕😒اصلك طيبه اوي يا ماما

الام :_نعم يا ندي بتقولي ايه

ندي :_لا يا حبيبتي مش بقول حاجه. المهم تعالي هنا قوليلي وانتي يا مزه ياقمر انتي عرفتي عنه الحاجات دي امتي وازاي

الام:_ لما كان بيكلم ليلي كنت باخد منها التليفون وندردش انا وهو

" ندي :_يا حلاوتكم ليلي تتكلم مع احمد والحاجه الكبيره تدردش... لا كده البيت باظ

الام :_😂الله يخربيت شيطانك انتي يابنت ندي بتجيبي الكلام ده منين

ندي :_من عند أبو حسين 😁المهم قوليلي انتي بقي مصدقاه مش يمكن بيسرح بيكي

الام :_ايه يا بنت بيسرح دي هو انا معزه قدامه بيسرح بيها طول اليوم

ندي 😂😂:_اقسم لك مش قصدي 😂😂😂بس حلوه والله مش قادره اوقف ضحك

الام :_خلاص يا حبيبتي قومي شوفي اللي وراكي علشان متتاخريش

ندي :_، حاضر يا مزه 😘 😘

الأم :_يحضرلك الخير يا عيون المزه

ندي قامت وفتحت دولابها تدور على هدومها ومامتها قامت تصلي الضحى وهي بتجيب سجاده الصلاه "_:_على فكره الواد ده غلبان اوي وضعيف اوي ومش كداب هو مليان عيوب بس يا ندى ومين فينا خالي من العيوب  يا بنتي

ندي :_ماما انتي بتقولي ايه

الام :_الله أكبر (وتبدء في صلاتها) 

بعد شويه ليلى وجدتها راحوا يقضوا وقتهم في البسين أما ندى غيرت هدومها ولبست فستان off white رقيق جدا من الحرير الناعم و حجاب كشمير كانت في لبسها زي الأميرات في منتهى الرقه في منتهى الجمال وكان مكياجها ناعم وبرفيوم بردوا ناعم جدا كان مظهرها مناسب جدا للرحله ولفتره بعد الظهر 

ندى اتجهت للوبي وأحمد وعبد العزيز شوفوها احمد حقيقي كان منبهر بندي اد ايه هى بسيطه بس رائعه 

ندى .:_..صباح الخير يا جماعه انا جهزه 

أحمد:_ ...طيب بعد اذنك يا استاذ عبد العزيز انا هاخد ندى علشان اتاخرنا على الجروب وفي الطريق هفهمها طبيعه الشغل

 (احمد كان مبهور بشكل ندي اوي مره يشوفها بفستان

وتتخلي عن الجينز والبنطلون.. حقيقي قمر في ليله تمامه بس ماحبش. يظهر ده وخصوصا قدام الاستاذ عبد العزيز 

Flash back

أحمد كان عارف انه عنده شغل في الغردقه وأنه هيفضل وقت طويل مش هيشوف فيها ندى علشان كده عمل موضوع المساعد ده على الرغم أنه مابيكونش معاه مساعدين بس المره دي اتحجج لعبد العزيز أن الجروب كبير ومحتاج مساعد معاه وأقترح عليه أكثر من اسم بس احمد رمى جمله ان ندى أفضل لأنها هاديه وهتقدر تساعد وبعدين مؤدبه و الألمان بيحبوا التعامل الراقي وبيركزوا اوى على الأخلاق وحسن الخلق في التعاملات أما موضوع ان ندى مش متجوزه أو بالمعنى الحرفي للكلمه مالهاش راجل فالاستاذ عبد العزيز حب يجود شويه من عنده 

ندى عرفت المطلوب منها كويس وجابت الاجنده بتعتها ودونت الملاحظات اللي احمد قال عليها وابتدوا الشغل وحقيقي ندى كانت مبسوطه جدا لأن دي اول مره تتعامل مع أجانب كانت مبهوره بطريقه احمد في التعامل مع الجروب وكأنه مش المرشد بتاعهم لا ده صديق كمان وكان الجو مليان ضحك ..أحمد كان زي الأستاذ اللي بيوضحلها أمور كتير وكان حقيقي بيديها من خبرته وكأنه كورس مكثف وعودها على كام كلمه ألماني  وكل ده في أول يوم 

احمد -: ندي ردي على تليفونك ..مابطلش رن 

ندي -: دي ماما اكيد بتتصل بيا علشان تطمن وكمان انا اتأخرت عليهم 

احمد -: معلش يا ندي بس انتي شايفه لازم نعقد نتغدا مع الجروب..بس اوعدك وقت العشا هتكوني مع ماما وليلي 

يلا ردي عليها علشان ماتفضلش قلقانه كتير 

ندى كانت اتصلت  بمامتها كل شويه تتطمن عليهم وعرفتها أنها في الاوتيل جنبهم وأنها مش هتقدر تتغدي معاهم بس هتتعشي معاهم 

ندى وأحمد قاعدين في المطعم مع الجروب الألماني وفيه واحده من الجروب مالت ناحيه احمد  فاحمد بص لندي وابتسم واتكلم معاها

....ندى حست ان الكلام عليها وشها احمر خجلا وبصت في طبقها 

أحمد .-:.تعرفى الست دي كانت بتقولي ايه 

ندى .-:.تقريبا كده بتقول حاجه عني 

أحمد .-:فعلا كانت بتقول لي أن الانسه اللي معايا دي رقيقه جدا وهاديه اوى حتى أن حجابها و فستانها محسسني أنها من اميرات الحواديت 

ندى سكتت وكأن الكلام دي ما سمعتهوش 

أحمد استغرب من رد فعلها وأنها حتى معلقتش فأعتقد أنها مش مصدقه كلامه 

أحمد -:.اقسملك بالله ده كلامها انا مش بكدب 

ندى ..-:.اوك يا احمد 

أحمد ..-:.انا مش بعكسك يا ندى انا .....

ندى مقاطعه احمد -:.انت ليه اخترتني أكون مساعده ليك علشان انا فعلا أخلاقي كويسه ومؤدبه ولا لأن ندى مالهاش راجل على اساس ان المطلقه دي بتكون منحرفة وسهله صح 

أحمد بغضب شديد -:مين الحمار اللي قالك الكلام الفارغ ده 

ندى .-:الأستاذ عبد العزيز واظن أنه مش معقول يقول الكلام ده من فراغ صح ولا ايه يا أستاذ أحمد 

أحمد بنبره صوت حاسمه -:..انا ما قولتش لعبد العزيز الكلام الاهبل ده وعلى فكره يا ندي انا مابكدبش ومابخافش من حد ولما عاوز اقول لحد حاجه بقولها إذا كان انا بقول للكل إني راجل بحب الستات وعندي استعداد إني يكون عندي علاقات وانتى شوفتي وسمعتي الكلام ده وانا ما انكرتش ده أكثر من كده وضوح بقى انا مابكدبش ولو قولت الكلام ده هقولك على طول 

ندى ..-:يعني الكلام ده افتكاسه من الأستاذ عبد العزيز 

أحمد بصلها وطلع تليفونه وطلب عبد العزيز وفتح ال speaker, كمان 

أحمد .-:.الو أستاذ عبد العزيز هو انا قولت لحضرتك ايه عن ندى علشان تكون المساعده معايا 

عبد العزيز  اتحرج جدا و استوعب ان ندي ماقبلتش اعتذاره وأن الكلام اللي قاله ليها مأثر فيها جدا 

عبد العزيز ..-:..قولت يا احمد  انها على أخلاق عاليه وهاديه وهتكون وجهه مشرفه للشركه قدام الألمان لأنهم بيهتموا جدا بالجانب الأخلاقي و.....

أحمد مقاطعا..-:طب ايه حكايه ان مالهاش زوج وأنها طالما مالهاش راجل فده يخليها سهله و........

عبد العزيز بإنفعال  .-:.ايه الكلام ده يا احمد انا ماقولتش كده ولا أقصد الكلام الفارغ ده

أحمد.-:يعني انت اللي قولت الكلام ده من دماغك 

عبد العزيز  -:.أيوه يا احمد بس اسمعني علشان تفهم 

أحمد بيبص لندي اللي كانت مكسوفه من احمد جدا 

عبد العزيز كمل كلامه -:..بص يا احمد كان قصدي ان الموظفات الموجودين معانا في الرحله كلهم معاهم ازواجعم ومافيش زوج هيرضي يكون في اجازه ومراته تسيبه وتروح شغل أما ندى لأن مافيش عندها العائق ده فينفع تشتغل مش علشان أي سبب غير أخلاقي احنا لسه بنقول اختيارنا ليها لأنها هتكون وجهه مشرفه للشركه نقول بعد كده أنها معندهاش أخلاق ارجوك يا احمد فهم ندى لأني حسيت اني ديقتها بس هي ماديتنيش فرصه افهمها اقسم بالله إني حاولت افهمها بس هي مشيت من قدامى ورفضت تسمعني 

أحمد .-:.خلاص يا استاذ عبد العزيز ندى قعده قدامي وأنا كمان فاتح ال speaker

وهي سمعت كل كلامك 

عبد العزيز ..-:.طيب تمام .ندى يا بنتي 

ندى بهدؤ .-:.ايوه يا استاذ عبد العزيز

عبد العزيز ....-:..انا. اسف. يا بنتي

ندى ....-:..حصل خير يا فندم حضرتك في مقام والدي وليك نفس المعزه 

عبد العزيز..-:شكرا يا ندى ودلوقتي اسيبكم تكملوا شغلكم ونتقابل على العشا 

وانتهت المكالمه أما احمد فبص لندي وابتسم وقالها -" . خلاص بقى يا رمضان فك بقى الموضوع خلص عندنا شغل ..

ندي ابتسمت بس لسه من جواها موجوع و .مشيوا مع بعض بس كان باين عليها اوي الزعل 

 وأحمد -: ايه تاني بتفكري في ايه 

ندى ...:_.ليه الناس بتتوقع الست المطلقه أنها مش مظبوطه وأن اخلاقها زباله 

أحمد .:_...على فكره يا ندى اللي عاوز ينحرف بيكون عاوز كده الظروف مش هي اللي بتعمل الشخص المنحرف هو اللي بيكون عاوز الطريق ده بتكون الست متجوزه وحامل كمان ومع ذالك مش فارق معاها وبتخون جوزها وحتى لو بنت الظروف دي مجرد حجج

هنا وقفت ندى ونظرت في عين احمد مباشرا وقالت

ندى:_ يعني الكلام اللي قولتهولي عن ظروف تربيتك وأن اهلك ومعاملتهم القاسيه ليك واهملهم وكمان حب عمرك اللي ماتت قدام عينيك  هو السبب في اللي انت فيه يعني انت يا احمد اللي عاوز الطريق ده بمزاجك محدش اللي اجبرك تمشي فيه ..انت بتتحجج وبس

 

أحمد حس فاجاه انه اتعري قدام نفسه نعم هو من قال هذا لندي وها هو الآن الذي يقدم لها دليل إدانته على طبق من فضه 

أحمد :_.....بعد اذنك يا ندي نتقابل بكره هنا في اللوبي الساعه 9الصبح 

مشي احمد وترك. ندى التي ألقت أول حجر على معبد احمد الزجاجي والغريب أنه هو من اعطاها الحجر احمد بداخله كل مشاعر الغضب أنه غاضب من نفسه نعم لأول مره يعترف احمد أنه شخص كاذب وهو الذي كان يتباهى أنه صريح إلى أبعد الحدود 

يا تري ماذا سيفعل احمد مع ندى اللتي دائما ماتظهره على حقيقته والاهم من ذالك ماذا سيفعل احمد مع احمد

الحلقه السابعه

#إنسان# سافل # بس#محترم 

خلال الفترة اللي ندى اشتغلت فيه مساعد لأحمد زيدان لاحظت أن فيه ستات من الجروب الألماني بيحاولوا يقربوا لأحمد بشكل ملحوظ حتى أن فيهم من طلب علاقه صراحه مع احمد لكن الغريب أنه هو اللي بيرفض وكانت ندى مش فاهمه حاجه وقالت في نفسها

ندي -:  اكيد الراجل ده يا مجنون يا عاوز يجنني ..

عقل ندى ابتدى يقف عن التفكير وديما بيسال هو احمد زيدان سافل و لا محترم  بس هي ماستنتش اجابه  وطلبت من احمد أنهم يتكلموا  وكان ده آخر يوم ليهم في الشغل مع الجروب والرحله كمان 

ندي -: ابو اذيك يا احمد ..فينك ماكنتش علي العشا النهارده 

احمد -: اذيك يا ندي ..انا كنت بجهز الشنط خلاص الاجازه خلصت ياخساره و كمان كنت بخلص شويه اجراءات بالاوتيل و الجروب الألماني  

ندي -: اوك تمام 

احمد -: ايه هو اللي اوك تمام انتي كنتي متصله بيا علشان تسأليني علي العشا 

ندي -: لا مش للدرجه دي انا بس كنت عاوزه اتكلم معاك في موضع كده ..بره الشغل 

احمد -: امممممم ماشي يا رمضان تعالي نقف في البلكونه نتكلم 

ندي -: واشمعني البلكونه...ما تيجي ننزل نتمشى تحت علي البحر 

احمد -: لا ياستي لازم ننام بدري علشان هنسافر من الفجر انتي ناسيه ولا ايه 

ندي -: ماشي يا احمد باشا انا هستناك في البلكونه سلام 

اتجه احمد وندي للبلكونه الخاصه بكلامنها قي غرفته بالفندق 

أحمد بهزار:_ ...خير يا رمضان

ندى :-..خير يا احمد و كويس انكقولتلي يارمضان يبقي كده احنا خرجنا من دايره الشغل و دخلنا دايره الصداقه . .ممكن اسالك يا احمد  بس لو سمحت تكون صريح  معايا يعني مش انت معتبرني صاحبك يعني رجاله ذي، بعض

أحمد مبتسما:_طبعا ياابو صيام اتفضل يا باشا انا سمعك

ندي :_بصراحه كده فيه حاجه لاحظتها ومستغربها شويه

فيه  ستات من الجروب شفتهم وهما بيتوددوا ليك بشكل ملفت وملحوظ حتى امبارح لما كنت بتغني  كان فيه واحده من ستات الجروب غنت معاك ورقصتم مع بعض كان واضح اوى أنها بتحاول.... يعني قصدي.... 🙄((اتكسفت وجدا ولم تستطيع أن تكمل ))

أحمد كان فاهم هي عاوزه تقول ايه من أول كلمه قالتها 

أحمد.:_... خلاص يا رمضان  انا فهمت ..(وضحك جامد جدا ) ..انا مش عارف يا خويا رجاله ايه دي اللي بتتكسف

 

 ندى بصتله جامد:_ ..يا دي النيله  لتكون ناوي فعلا تتعامل معايا كراجل وتنسي اني انثي وبتكسف 

أحمد 😂كان بيضحك جامد جدا..-:.ايه مش اتفقنا انك راجل زي زيك ايه هنرجع في كلامنا وبعدين على رأي عبد الفتاح القصري ((لامؤاخذه انا مش شايف أيتها انثي)) 

ندى كانت هتضربه بزجاجه المياه اللي معاها ...

أحمد ..'-خلاص خلاص.. 😂لا انتي اجمل وارق أنثى انا بهزر والله... وهقولك اللي انتي عاوزه تعرفيه ومطير النوم من عينك.

ندي -" لا استني هنا ايه اللي مطير النوم من عيني ..علي فكره عادي ده كان مجرد استفسار .وبعدين لو مش عاوز تقول اوك براحتك والله 

احمد -: طب عيني في عينك الحلوه  

ندي -: اتلم يا احمد 

احمد -: خلاص يا كبيره قلبك ابيض ..المهم بصي يا ست الكل  انا قولتلك قبل كده ان الجنس عندي مهم جدا بس لا يمكن يكون كده من الباب للطاق انا لازم اعرف شخصيه وطبيعه الست اللي هنام معاها  انا مش حيوان ولا أحب اللي  هنام معاها تكون حيوانه ما ينفعش اقضي ليله وثاني يوم مع السلامه .تقدر يا رمضان تقول كده فكره ال boy  friend و girl friendبالظبط اللي عند الاجانب 

ندى بتبصله وهي مخضوضه.

...أحمد كمل كلامه-:  (على فكره انا اساسا في حياتي girl friend...واسمها مي و كمان  بقالنا 6شهور نعرف بعض فيس بوك بس اتقابلنا من شهرين

ندي بتبلع ريقها بصعوبه من اللي سمعته و مش عارفه تستوعب كلام أحمد-: انت بتحب ياأحمد 

احمد -: لا مش الحب بتاع الارتباط ..انا و مي بيجمعنا العلاقه وبس  تخيلي واحده تثق فيا وتكلمني عن نفسها لمده 4شهور  من غير صوره ليا ولا تشوفني  وبعد كده اتقابلنا كنت سعيد بيها جدا .الثقه الثقه العمياء يا رمضان  انا لازم احس ان اللي قدامي بيحبني ومايقدرش يستغنى عني واكون كل شي في حياته ولازم يثبت ده 

ندى مقاطعه :_....في مقابل ايه.... يعني ايه اللي انت هتقدموه لها .... ما هو لازم فيه مقابل الحياه خد و هات ولا انت من النوع هات بس 

أحمد :_...لأ طبعا هديها إحساس عمرها ما حسته في حياتها حتى و هي مع جوزها بردوا مش هيكون زيي

ندى اتكسفت.جدا وكمان كلام. أحمد نرفزها فزاد وشها احمرار وكانت ناويه تنهي الحوار بس احمد قالها كلمه في آخر الجمله خلاها قعدت تاني وسألته 

ندى ّ.:-..هي متجوزه

أحمد ...:_..أيوه 

ندى:- ....انت عارف ان ده اسمه زنا وده أمر ملعون 

أحمد ..:_.طيب كده بقى اقول تصبحي علي خير يا استاذه ندى 

ندى باستغراب ..:_...ندى ليه دلوقتي ما انا كنت رمضان 

أحمد ..:-......لا رمضان مش موجود لأن صاحبي هيسمعني مش هيتهمني ولا ينتقدني ولا يديني نصايح ويعملي فيها شيخ 

ندى .:-...صديقك من صادقك..(ندى سكتت شويه ثم ضخمت صوتها مثل الرجال وحاولت ترجع الحوار لمساره (خلاص يا احمد اقعد )

أحمد كان فعلا مضايق من ندي و مقدرش يكمل كلامه معاها وقال ..(-.مش بالصوت ولا بالصوره يا ندى  انا مش بهتم بالشكل قد مابهتم بالجوهر على فكره انتي مش بتسمعيني دلوقتي على انك رمضان انتي دلوقتي ندى وده مش عاوزه 

(سكت شويه وكمل) 

انتي بنفسك لاحظتي ان فيه ستات أجانب هنا عاوزين انام معاهم وشوفتي جمالهم الغير طبيعي هما اكيد اجمل من مي بكثير بس انا ماحبتش غير مي وبس لأن نظام.ليله وشكرا بيكون في بيوت الدعاره اللي عمرى دخلتها ولا هدخولها 

ندى ...خلاص يا احمد يلا نكمل 

أحمد ...لا يا ندى كفايه كده لازم ننام عندنا سفر الصبح بدري لما نرجع القاهره نكمل ده لو رمضان لسه عاوز يكمل ..المهم يلا  تصبحي على خير 

ندي :_وانت من اهل الخير

ندى كالعاده عقلها لا يستطيع التوقف عن التفكير في أمر احمد لكنها تذكرت بسرعه ما قالتها سلمى ان اي ست سوف تدخل حياه احمد لابد أن تلغي نفسها وتكون فقط خادمه له تدور فقط في فلكه حتى تستطيع أن تحتفظ به أما المرأه الغربيه في لا يمكن أن تلغي نفسها من أجل أحد حتى ولو أطفالها

الام :يا بنتي مش هتنامي بكره سفر طويل

ندي :- خضيتيني يا ماما

الام :- ليه بقي كنتي سرحانه فى ايه.. شاغله بالك بمين يا ست البنات 

ندي :مافيش يا كبيره بس مش جيلي نوم

الام :استعيذي بالله ويلا يا بنتي قومي نامي

ندي :- حاضر (يارب ارحمني حتي النوم بالعافيه)

في غرفه احمد

أحمد :الو مي اذيك يا مزتي 

مي :-"انا تمام يا ميدو وحشتني . خلاص جهزت نفسك

احمد :_ايوه وكلها كام ساعه ونسافر

مي :-" اوك وانت بتتحرك من عندك ابقي كلمني

أحمد :اوك يا ندى

مي :_مين ندي دي

أحمد. 😕:_مين قال ندي انا بقول اوك يا مي

مي :_لا انا سمعت كويس... اااه تلاقيها واحده من اياهم

أحمد :وبعدين بقى انا قولتلك الف مره انا مش بتاع واحده والسلام انتي موجوده في حياتي ومافيش غيرك يعني لما تخرجي من حياتي ممكن وقتها ابقي ادور علي غيرك

مي :هو انا ممكن اخرج من حياتك

أحمد :_ممكن كل شي في الدنيا دي ممكنه مافيش حاجه مستحيله

مي :_يعني ايه ياسي احمد🤨

أحمد :_يعني تصبحي على خير يا ندي 😂😜

مي :_يالهوي ندي تاني 😡😡

أحمد :_يابنتي بطلي هبل شويه اعقلي يا مجنونه 

مي :_ما انا بحبك اعمل ايه بس في نفسي

أحمد بيكلم نفسه :_(بتحبيني وانتي بتنامي في حضن جوزك)

مي:_احمد انت فين ...سرحت مني فين 

احمد :_معلش يا مي نمت منك.. النهارده كان يوم طويل يلا تصبحي علي خير

مي :_وانت من اهل الخير يا قلبى 😘

أحمد قام وولع سيجاره ووقف في البلكونه :ايه يا احمد بيه مالك بقيت تتكلم مع نفسك كتير وتفكر في اللي بتعمله مش انت احمد اللي متعود عليه انت دايما بتعمل اي حاجه ولا عمرك فكرت قبلها ولا بعدها اول مره من سنين طويله يجيلك أرق ومتعرفش تنام

في الاوتيل 

ندي :_الو سلمي اذيك ايه لسه صاحيه

سلمي ":_لا ياندي نايمه وبكلمك من الحلم كمان 😂 عاوزه ايه انا يادوبك قفلت الشنط واميره وباباه ناموا وسابوني بجهز الحاجات يعني عادي سيبيني لوحدي

ندي :_يعني انا معطلاكي

سلمي :_لا ياندي خلصت خلاص خير فيه حاجه

ندي :_" لا اصل كنت عاوزه اقولك علي حاجه شوفتها ومعرفتش افسرها

سلمي :_حاجه ايه

ندي :_انتي عارفه اني بقالي كام يوم بشتغل مع احمد تبع الجماعه الألمان دول 

سلمي :_تصدقي اننا كنا عاوزين نسألك علي الموضوع ده

ندي :انتم مين؟

سلمي :_شله الأنس هو فيه غيرنا

ندي :- تسألوا علي ايه يارب استر لما تتجمعوا علي حد

سلمي :_😁اصلنا بجد عاوزين نعرف شكل الشغل مع احمد ذيدان ايه اصل عمره ماخلي حد يشتغل معاه

ندي :_اذاي ده هو قال لي هو و الاستاذ عبد العزيز كان في واحد بيشتغل معه مساعد وجات له  ظروف اضطر  يسافر  واحمد دلوقت محتاج حد يشتغل  معها علشان كده اختارني والاستاذ عبد العزيز طلب من  اكون مع احمد بدل المساعد بتاعه ... ازاي بقى تقولي ان ما فيش احد كان بيشتغل معه!!

سلمى:_ ما اعرفش يا ستي يمكن يكون بيشتغل معامل من  الباطن  في الرحلات الخارجيه لكن اللي اعرفه ان في الشركه ما حدش بيشتغل معاه وهو بيشتغل لوحده المهم سيبك من ده كله شكل شغل مع احمد زيدان ازاي يعني عايزه اعرف هو بيعمل ايه مع ستات في الجروب الألماني  يعني بيتحرش بيهم ولا ايه النظام وانتي يعني احمد. ماحاولش يتحرش بكي  يا ندى ولا ايه اللي حصل

ندي :_ايه يتحرش بيا انتي بتقولي ايه يا سلمي

سلمي :_بهزر ايه مالك براحه شويه قصدي يعني ماحاولش انه يلفت انتباهك مثلا

ندي :_انتي غريبه اوي يا سلمي انتي بنفسك كنتي بتقولي أن أحمد في الشغل ذي السيف ومن ساعه ما اشتغلتي في الشركه مع احمد عمرك ماسمعتي عنه انه بني آدم وقح او ان ليه علاقات مع موظفات الشركه وان حياته الخاصه بره الشغل ف اذاي تقولي كده

سلمي :_خلاص ياستي بلاش المحاضره الطويله دي المهم دلوقتي هو كان بيتعامل مع الستات الاجانب اذاي يعني ماكنش فيه حاجه هاكا ولا هاكا 😜😂

ندي :_يخربيت الأفلام اللي واكله دماغك... لا ياستي ده حتي حصل حاجه غريبه انا بسببها بكلمك

سلمي :_حصل ايه يا لمبي 😂

ندي :_بصي ياستي كان فيه يومين الاوتيل عامل فيها حفله في الديسكو وكان فيه واحده من الجروب بصراحه مزه ماكنه ألماني رهييييبه .المهم  كانت لازقه لأحمد طول الوقت وتشد فيه علشان يقوم يرقص معاها واحمد يجاريها وهي ترقص وتشرب وحاجه اخر زفت علي دماغها انا قولت خلاص كده اكتملت أركان الجريمه واحمد سمعته ماتتوصش بقى ..لكن اللي حصل ان احمد ابتدي يبعد عنها ورفض دعواتها.... بصراحه. انا استغربت ماهو مش يوسف الصديق اساسا ده فلاتي وبتاع نسوان اصلا

سلمي :_😂😂 يخربيتك ايه الكلام ده القطه المغمضه فتحت يااا ناااس

ندي:_بتضحكي علي ايه فصلتيني

سلمي :_بضحك عليكي أصلك ماكنتش بتعرفي تقولي كلمتني علي بعض دلوقتي بتقولي بتاع نسوان 😂😂أسماها بتاع نساء يا وليه 😂 

ندي :_هو احنا في حصه لغه عربيه المهم قوليلي تفسري ده بأيه

سلمي :_بصي اولا انتي شاغله دماغك ليه... ثانيا بتسألني ليه ماعندك احمد نفسه وانتي بتشوفيه كتير وكمان شغاله معاه

ثالثا انتي لسه مجاوبه علي السؤال لما قولتلك هو ماحاولش يتحرش بيكي قولتي ان احمد معروف عنه ان  الشغل بيفصله  تماما عن حياته الخاصه والستات في الجروب دول شغل ....نرجع بقي ل اولا انتي شاغله بالك ليه 

ندي :_هه😕

سلمي :_جتك هوا.. نامي ياست انتي... السفر بكره طويييل ابقى تسأليه براحتك تصبحي على خير

ندي قفلت السكه وهي تايهه من كلام سلمي.. (انتي شاغله بالك ليه.... صحيح انا شاغله بالي ليه)

تاني يوم......

ندي واحمد اتقابلوا.. ندي كانت مبتسمه في وش احمد بتحاول تكون طبيعيه اما احمد كان واضح عليه الإرهاق او الذعل من ندي.. هي مش عارفه ايه اللي فيه

ندي :صباح الخير يا كبير

احمد :_"صباح الخير

ندي :_ياساتر سجاير وبلاك كوفي على الصبح

أحمد :_عاوزه ايه ياندي

ندي :_رمضان بيصبح عليك ويقولك ممكن ماتزعلش

احمد:_هو فين رمضآن ده ماخلاص مشي

ندي :_لا موجود في اي وقت حابب تتكلم فيه هتلاقي رمضان موجود.... وبصت له وهي مبتسمه كأنها بتطمنه انها مش هتتغير وهتكون الصديق اللي بيدور عليه....

ندي بتكلم نفسها :_لازم ياندي تشيلي اي افكار تجاه احمد لازم تتعلمي معاه علي الحياد وبس احمد انسان مريض محتاج اللي يسانده مش اللي يتخانق معاه ايوه احمد مدمن والمدمن علاجه طويله ربنا يقدرني اني اقدر اسعده يعرف طريق العلاج..... 

نعم احمد مليان تناقض ولكن كيف سيكون القادم والاهم الآن عند ندى من هي مي !!!!!???😉

الحلقه الثامنه

#إنسان# سافل # بس#محترم

أحمد وندي رجعوا القاهره وندي أول ما وصلت الشركه دخلت مكتبها كل أصحابها موجودين ما عدا أمينه

ندي -: صباح الخير يا سيداتي الجميلات ...امال فين امينه .نموسيتها كحلي ولا ايه 

نهي -" وليه ماتكونش بمبي مسخسخ و كلها فراشات ملونه ..هييييح بقى 

سلمي -: يخربيت تشبيهاتك ..انتي مسخره 

ندي -": اتلمي يا نهي هانم عيب كده 

نهي بضحك -: الله بقى هو انا قولت حاجه ماهي اكيد في حضن جوزها .فأكيد بردوا ليلتها بمبي ..انتوا اللي نيتكم وحشه 

سلمي -: عم سعيد والنبي هاتلي واحد نسكافيه وهات للاستاذه نهي واحد بوليس آداب 

عدي اليوم عادي بين ضحك الأصدقاء...

ندي  توقعت أن أمينه  راجعه من الرحله تعبانه واكيد اخدت اجازه 

ثاني يوم ثالث يوم عدى وامينه غايبه  وكل ما أصحابها يتصلوا بيها مامتها تقولهم أنها تعبانه ونايمه

 

أحمد وندي كانوا بيتكلموا عادي وكمان احمد ساعات بيتصل بندي مباشرا من غير ما يكلمها على تليفون ليلى وطبعا كان بيتكلم معاها على أنها رمضان ويحكلها كل حاجه عن طبيعه علاقته ب مي واكيد طبعا تفاصيل العلاقه وكانت ندى بتندهش وبتحاول أنها تهرب من الكلام ده احمد كان ملاحظ وفعلا حس أنها مش عاوزه تسمع تفصيل بالشكل ده وهو راعي خجلها وكان بيتكلم معاها في علاقته الانسانيه بس مع مي 

وفي مره وهو بيحكي قالها:_ امبارح و انا بتكلم مع  مي قالتلي انها  قررت  تطلق من جوزها و اناخايف ليكون وجودي في حياه مي هو السبب 

ندى شهقت من اللي سمعته بصوت عالي 😲😱....نعم هو انت عاوز ايه بعد العلاقه دي طبعا لازم طول الوقت هتكون انت و جوزها في وضع مقارنه دائم قدام عنيها وفي خيالها كمان ** المهم دلوقتي انت بقى ناوي على ايه لما هي تتطلق  هتتجوزها يعني! ّ! 

أحمد  وكأن وقع كلمه جواز بالنسبه له كوقع السكين في القلب 

بعد فتره صمت قصيرة 

ندى:_ ّ..الو أحمد انت معايا 

أحمد .:_.. ندى معلش انا مضطر اقفل دلوقتي هكلمك تاني 

ندى -:(أحمد بيقولي يا ندى يبقى كلامي جه على الجرح وماكانش على هواه) 

ندى لسه بتكلم نفسها ..:_..وبعدين معاكى بقى يا ست ندى فوقي كده الراجل ده ناوي يخدك. على فين ..انك تسمحي لنفسك تسمعيله ده حرام وخصوصا كلامه عن علاقاته  والفاظه دي حرام ياندي ده بيتكلم معاكى عن تفاصيل علاقته المحرمه مع واحده متجوزه وحتى لو مش متجوزه ازاي ده مالوش غير اسم واحد زنا وبس انتي حطه نفسك معاهم ليه فوقي بقى 

______________________________________________

فاقت ندى من شرودها على تليفون وكان المتصل أمينه وهي استغربت لأنهم كانوا بيطمنوا عليها من تليفون مامتها ودايما بتقول انها نايمه..

ردت ندى :_الو ازيك. يا ميمي ألف سلامه وحشاني هتيجي امتى الشركه 

أمينه بصوت مليان دموع .:_..ازيك يا ندى عاوزه اشوفك ينفع النهارده  

ندى بصت في ساعتها كانت الساعه 6 المغرب الوقت بدري  

:_اه ينفع نتقابل فين 

أمينه ..:_انا تحت البيت عندك ممكن أطلع 

ندى .:_..يا خبر انتي بتستاذني اطلعي على طول 

أمينه طلعت وخبطت على الباب وندى لما فتحت لاقت وشها وعنيها وارمين من العياط جامد اتخضت جدا على صحبتها ودخلوا  غرفه ندى وطلبت من مامتها ماحدش يدخل عليهم 

ندى :_...الأول يا أمينه تعالى اغسلي وشك وبعدين نتكلم 

أمينه دخلت الحمام غسلت وشها حست فعلا أنها فايقه وتقدر تتكلم بهدوء

ندى جابت ميه و فنجان نعناع ليها ولصاحبتها علشان تهدي وتعرف تتكلم 

ندى :_..أهدى خالص ولما يبقى عندك استعداد تتكلمي انا سمعاكي 

بعد دقيقه أمينه ابتدت تحكي 

أمينه .:_..انا مش عارفه أشكرك ازاي يا ندى معلش هتعبك معايا بس لو ماتكلمتش ما حد انا هموت (ورجعت تعيط تاني ندى اخذتها في حضنها وطبطبت عليها) 

ندى:_ وبعدين يا بنتي اقسملك بالله مافيش حاجه فى الدنيا دي تستاهل تعملي كده 

أمينه بصوت مكسور مليان دموع ..:_..انا مش هخلف يا ندى 

ندى سكتت وقالتلها -:طيب اهدي واحكيلي بالتفصيل لو تقدري تتكلمي 

أمينه .:_..انتي عارفه انا وطارق جوزي بقالنا 4سنين متجوزين رحنا لدكاتره وكل واحد يطلع برأي بس في العموم بيقولوا مافيش موانع عن حد  فينا.. لكن قبل سفرنا لرحله الشركه بتاعت الغردقه بشهر. أحمد عرف من صديق ليه ان اخو صديقه  يعرف دكتور نسا عبقري في كندا وأنه لو حابب يقدر يساعدنا وطبعا طارق كان هيتجنن على الخلفه أكثر مني ماعترضش اتوصلنا مع الدكتور في كندا وهو كان مصرى مقيم هناك من سنين. طلب مننا تحاليل واشعه جديده لكن كانت مختلفة المره دي عن التحاليل  اللي عملناها قبل كده وفعلا بعد ما خلصنا بعتناها. وجه موضوع الرحله قولنا نروح نستجم ونتبسط واجلنا معرفه أخبار التحليل لحد ما نرجع 

ندي -: طيب وبعدين ..بس ماتعيطيش

امينه بتحاول تهدي و تمسح دموعها -:  ولما وصلنا القاهره طارق مرداش يأجل الاتصال بالدكتور شويه بالعكس أول ما حطينا شنطنا في البيت كلم.الدكتور وكانت المصيبه اللي دمرت حياتي ...وبكت بكاء هستيري 

ندى :_..اهدي تحبي اسيبك شويه 

أمينه .:_.لا يا ندى انا هكون كويسه ..((وكملت)) ...عرفت من الدكتور ان عندي مشكله في الرحم وكمان فيه الجهاز المناعي عندي اللي بيعتبر ان اي حيوان منوي يدخل الرحم أنه فيرس بيهجمه فورا وبيقتله ومش بيخلي فيه حمل يحصل واني مش ممكن هقدر أخلف 

لأني مش هقدر اغير الجهاز المناعي وحتى لو عمالنا تلقيح بردوا الجهاز المناعي هيقتل الجنين لأنه جسم غريب عن جسمي ..يعني مافيش فايده خلاص يا ندى

واستمرت في بكائها 

ندى..:_... وطارق عمل ايه؟؟ 

أمينه .:_....من غير ما يفكر اظاهر كده كان واخد قرار مع مامته وقالي

((فلاش باك)) 

طارق...:_... بصي يا أمينه احنا كبار ونضجين كفايه وأنا بحبك بجد بس نفسي في طفل من صلبي ارجوكي من غير غضب وانفعالات تعالي نفكر بهدؤ.

أمينه :_...انت عاوزتتجوز يا طارق 

طارق'_ ....طيب ايه الحل انا مش هتبني طفل من الشارع انا راجل وبصحتي واقدر أخلف 

أمينه .:_..طب لو قالبنا الموضوع وطلع انت مش بتخلف كنت هقول ايه انا ست وماعنديش مشكله طلقني علشان اتجوز غيرك واخلف 

طارق :_.....لا يا امينه الراجل يقدر يجمع أكثر من ست إنما الست ما ينفعش ..((حط ايده على وشها .)).حبيبتي انا مش هطلقك مش هسيبك انا معاكي كل ما في الموضوع انا بس هتجوز اجيب طفل ليا انا حتى مش هدور لأني مش عاوز حبيبه انا عاوز واحده أخلف منها. بصي انا هخلي امي تشفلي بنت صغيره من البلد هتجوزها وخلاص وحتى هخليها تعيش مع ماما في بيتها ...والبلد عندنا مليانه بنات في سن الجواز وعلى اد حالهم يعني مافيش مشكله 

أمينه مصدومه بقى ده معقول تفكير واحد آبن ناس خريج هندسه بيشتغل في شركه اتصالات كبيره ده تربيه المدارس الاجنبيه وجريج الجامعه الألمانية مش ممكن 

أمينه .:_.وأن رفضت كلامك يا طارق 

طارق:_ يبقى انتي اللي بتكتبي النهايه بايدك 

________________

ندى ..:_....وعملتي ايه بعد كده 

أمينه :_اخدت شنطيتي ورحت لبيت بابا ...(.اخدت نفس عميق جدا.وكملت) تعرفى ياندي ايه المصيبه في الموضوع إني بابا وماما موافقين جدا على الموضوع ده بيقولوا. وايه يعني طالما مش هيقصر معاكى وبعدين ده هيجيب بنت صغيره هتبقي تحت رجلين أمه مش هتغلبك ولا هتعيش معاكى وطارق بيحبك يعني اللي هيتجوزها هتكون زي مفرخه الكتاكيت وبس ..انتي اللي في قلبه

ندي :_وانتي عامله ايه دلوقتي مع طارق

أمينه :_طبعا الكام يوم اللي فاتوا كان طارق وأهلي وأهله بيقنعوني وبشده ..تخيلي ياندي الكل عاوز مني اوافق ان جوزي يتجوز عليا ماحدش حتى طبطب عليا و مسح دموعي أو اخد باله اني بتوجع علشان مش ممكن هبقي ام مش ممكن هبقي أم (.بكت بحرقه) شوفتي ياندي انا بموت كل لحظه ومافيش حد حاسس بيا خالص( واخدت ندى أمينه في حضنها) 

أمينه :_لو سمحتي يا ندى أنا عاوزه اطلب منك طلب ممكن ابات  عندك علشان مش عاوزه ارجع البيت دلوقتي مش عاوزه افضل اسمع كلام ماما وبابا كفايه انا اكتفيت منهم  

ندى:_انتي عبيطه انتي بتستاذني ده بيتك

 امينه:_طيب انا هكلم ماما وهعرفها اني بايته عندك علشان مش تقلق عليا

ندي -: طبعا يا حبيبتي..انا هخرج ثواني وانتي خليكي علي راحتك خالص 

امينه :_الو ماما

ام امينه :_انتي فين يا بنتي تليفونك من ساعت ماخرجتي مقفول... يابنتي ابوس ايدك بلاش تصرفاتك دي انا بقلق عليكي

امينه :_"ماتقلقيش يا ماما مش هنتحر ولا هعمل في نفسي حاجه انا الحمد لله كويسه بس مش طايقه قعده البيت

ام امينه :_طيب يا حبيبتي بس بلاش تقفلي تليفونك.. انا هستناكي نتغدى مع بعض انا ماكلتش من الصبح مستنياكي

امينه :_لا يا حبيبتي اتغدى انتي انا عندي ندي صحبتي وهبات عندها

ام امينه :_استني هنا هو ايه الكلام ده انتي بتقولي ايه تباتي  بره البيت ازاي انا مش موافقه

ام امينه :_ارجوكي يا ماما بلاش تضغطي على اعصابي انا مش طفله صغيره ارجوكي..... انا مش هتخطف وبعدين انا كنت حكتلك ان ندي عايشه مع مامتها وبنتها بس متخافيش

ام امينه :_يا بنتي انتي مرتبكه نفسيا ومش مقدره اللي انتي فيه وعماله تخدي في قرارات غريبه يا ميمي تعالي حبيبتي لحضن امك واوعدك اني مش هتكلم معاكي في اي حاجه اقسم بالله ماهفتح بقي معاكي في اي كلام يضايقك بس تعالي لحضني

امينه 😢:_حبيبتي يا أمي دموعك غاليه على قلبى لو بتحبيني سبيني النهارده ارتاح بعيد عن أي حاجه يمكن اعرف انام يا ماما انا بقالي 4ايام مش عارفه انام.. انا هموت وانام ومش عاوزه ألجأ للمنوم او المهدأت... حبيبتي انتي امى واكيد حاسه بيا

ام امينه :_خلاص ياقلبي خليكي براحتك لو هترتاحي بس ارجوكي سيبي تليفونك مفتوح

امينه :_ماما انتي تامري مش تترجى.. حاضر يا حبيبتي وانا اللي ارجوكي متزعليش مني يا حبيبتي 😘

ام امينه :_تصبحي على خير يا نور عيني

امينه :_وانتي من اهل الخير يا أمي

مامت ندى عرفت ان أمينه هتبات مع بنتها رحبت جدا

بعد شويه

ام ندى :_يلا ياحبيبي العشا جاهز

امينه :_معلش ياطنط انا لخبطت الدنيا وبتاسف علي تطفلي

ندي :_تطفل ايه اتلمي لحسن اخطفك ومتروحيش 😂يلا بينا انا هسباقك علشان هموت من الجوع 

  أمينه ماكالتش كتير لأنها عيطت كتير وكانت عاوزه تنام

ندى بعد ما اطمأنت على امينه صلت العشا وقعدت تدعى لأمينه ولاحمد ولمي ولطارق جوز أمينه دعت وبكت جامد ماكانتش عارفه بتعيط ليه حست ان قلبها مقبوض وأن الصلاه هي اللي هتهديها وتريحها 

ندى قررت تقطع الكلام مع احمد لأنها ابتدت تتعب أعصابها تبوظ مش عارفه ليه جواها مشاعر كثيره متلخبطه مش قادره حتى تطلعاها ولا قادره تحكي لحد بس قررت تحط حدود مع حكايه احمد مسكت تليفونها وبعتت رساله لاحمد بتقوله:_احمد انا مش عاوزه اتكلم تاني معاك علي اساس اني رمضآن لان دي مش شخصيتي انا المفروض اسمع واتناقش معاك بس انت عاوزني اسمع بس ...بحس اني زي جهاز التسجيل يسمع  وبس ارجوك يا احمد وكفايه لحد كده 

أحمد حقيقي قلبه وجعه لما قرأ الرساله وبعتلها هو كمان رساله قالها فيها 

(انا اسف يا ندي إني اتسببتلك في زعل او ضيق انا بجد اسف وتمام وصلت رسالتك) 

ندى برضوا زي احمد قلبها وجعها من الرساله دي وكانت مش عارفه هي ليه زعلانه يمكن العشره اللي بينهم صحيح صغيره بس كانت مؤثره عليها 

يا تري يا ندى قرارك صح ولا هياثر عليكي بالسلب 

وانتى يا امينه هتعملي ايه الأيام هتعمل معاكى وفيكي ايه 

أحمد هيصر على إلى هو فيه هل عدم وجود ندى في حياته مش هياثر عليه 

الأيام الجايه هيكون فيها اجابه كل الاسئله دي

أتمنى اقرأ من حضرتكم توقعات وهل هتكونوا زي وهتشفوا أبطال حكايتي بنفس نظرتي فيهم ولا هيكون عندكم رأي تاني يا ريت نفتح باب المناقشه اشكركم على وقتكم واتمنى بجد حكايتي تعجبكم

تكملة الروايه بعدقليل