 |
رواية عريس نص عمر الجزء الرابع
للكاتبة/حنان حسن
بعدما اتورطت في الجواز
من اسلام
اخدتني ام فنجان
ودخلتني غرفة العروسة...
وسابتني... ومشيت...
فا وقفت اتلفت حواليا...
وانا مرتبكة.. ومخضوضة
وفي اللحظة دي
سمعت صوت
في غرفة العريس ..
فا خوفت... وحاولت اهرب
لكن...
قبل ما اخرج من باب غرفة
العروسة...
سمعت صوت جاي من ناحية غرفة العريس
بيقولي..
رايحة علي فين يا عروسة؟
فا التفت للخلف بسرعة
عشان اتفاجئ
(بام العريس )
فا فضلت ابصلها بذهول
واستغربت... انها بتقولي يا (عروسة)
اصل المفروض انها متعرفش
اني اتجوزت ابنها
و فضلت واقفة ارتعش
بدون ما ارد عليها
ولقيتها هي كملت كلامها
وقالتلي ..
لو انتي مكسوفة تدخلي عند العريس...
انا هنادي علي العريس يجيلك لغاية عندك
وبالفعل...
فضلت ام العريس تنادي علي العريس
وهي بتبص ناحية غرفة العريس
وتقول...
تعالي يا اسلام
اخرج لعروستك احسن باين عليها مكسوفة
تدخلك....
وبالفعل...
سمعت صوت حركة في غرفة العريس
وكان واضح
ان العريس سمع كلامها ....
وخارج بالفعل
فا اتسمرت عيني علي باب غرفة العريس
عشان اشوف العريس هيخرج فعلا ؟
ولا ايه؟
وبعد لحظات
خرج العريس فعلا
ولقيت ام العريس
بتقولي...
عريسك جالك بنفسة اهوه
يا عروسة
واو ما لمحت الشخص الي خرج من الغرفة
وقفت مصدومة
لان الي خرج من الغرفة
مكنش الشخص الي كان نايم مريض
يوم وفاة هند
... لا...
الي ادامي دلوقتي
شخص لايمكن كنت اتوقع يكون هو العريس
لان الي انا شايفاه دلوقتي
هو ...(اشرف)
وفضلت اردد
مستحيل....مش ممكن ...انت......ازاي ؟
فا بصلي اشرف
وهو بيبتسم ...
ووجه لامة الحديث بهدوء
وقال...
فعلا يا امي...
كلامك عن العروسة كان صح
جدا...
جمال... ورقة
وكل حاجة كنت بتمناها لقيتها فيها
تسلميلي يا امي
...العروسة فعلا زي القمر
بصيت لاشرف
وسالتة
قلت...يعني انت اسلام العريس ؟
رد اشرف
وقالي...
ايوه... انا اسلام
عريسك ليه؟
فا بصيت لاسلام ...
وامة ..بغضب
وفي الوقت ده بس ...
فهمت الحيلة
الي اتعملت عليا
فا سالتة
وقلت...
يعني انت عملت عليا التمثيلية دي كلها؟
عشان تجبرني اوافق علي الجواز منك؟
طيب ليه ؟
رد اسلام بتعجب
وقالي..
انتي بتكلميني انا؟
قلت...ايوه انت
رد اسلام
وقال لوالدتة..
كلمي مني يا ماما ...
وشوفي مالها؟
احسن دي باين الفرحة اتسببتلها في تهيؤات
بصراحة لما سمعت تعليقة ... اتجننت
وسالتة تاني
وقلت
ممكن تقولي
ليه كدبت عليا؟
وقلتلي ان اسمك اشرف ؟
استغرب اسلام من
سؤالي
وسالني
اشرف مين؟
قلت...انت مش عرفتني علي نفسك
وقولتلي انك اسمك اشرف؟
وبالامارة بتشتغل سواق؟
رد اسلام
وقال...
بقي اسلام بيه ...
الي عنده اسطول سيارات
يشتغل سواق؟
ردت ام العريس
علي اسلام
وقالتلة..
معلش يبني
يا حبيبي الفرحة لما تكون شديدة
تعمل اكتر من كده
معذورة البنية...
مش مصدقة نفسها انها فازت بيك
من دون البنات الي كانوا بيحلموا يرتبطوا بيك
عشان كده جتلها صدمة
في اللحظة دي
بصيت لام العريس بدهشة
وسالتها بسخرية
وقلت...
عروسة مين وزفت مين؟
شرعا ابنك ميجوزليش
لان اختي هند لسة زوجتة
ردت الام
وقالت...
الف رحمة ونور عليكي يا هند
فا بصيتلها بغيظ
وقلت..
انا عارفة ان هند اختي عايشة
ومينفعش ابنك يجمع بين اختين
يعني زواجي من ابنك باطل
ردت ام اسلام
وقالتلي..
اختك ماتت يا مني
من اكتر ...من ست شهور
ادعيلها بالرحمة
قلت...لا طبعا
كلامك كدب
هند اختي عايشة
وانا شوفتها بنفسي
رد اسلام
وهو في شدة التاثر
وقالي...
هوني علي نفسك حبيبتي...
كلنا هنموت
متعمليش في نفسك كده
لما لقيت اسلام بيعاملني علي اني مجنونة
اتغظت اكتر
وبصيتلة بغضب
واستحضرت روح الشرشوحة الي جوايا
وقلتلة ...
بقولك ايه يا حيلة امك
لو كنت فاكر نفسك هتقدر تشككني في نفسي...
وتفهمني اني اتجننت...
فا تبقي غلطان
دنا ممكن اجننك ...
انت ...وامك
واجنن بلدكم كلها
رد اسلام
وقالي...طيب اهدي حبيبتي
واحنا هنعمل كل الي انتي عايزاه
وسالني
قال..
انتي عايزة ايه دلوقتي؟
قلت...انا عايزة امشي من هنا فورا
ردت ام العريس
وقالت..
مينفعش يا مني
عروسة تسيب بيت جوزها ليلة دخلتها
الناس يقولوا ايه؟
بصيتلها تاني
وقلتلها
تاني هتقولي جوزها... و دخلتها؟
دخلة مين يا ام دخلة؟
اوعي يا ولية انتي وابنك من ادامي
خلوني امشي
احسن قسما بالله ابلغ عنكم البوليس
ردت ام العريس
وقالت...
لا بقي الموضوع زاد عن حده كده يا اسلام
اتصرف انت معاها
لان انا مرراتي مش مستحملة
في اللحظة دي
بصلي العريس بضيق...
ومسك ايدي
وهو بيقولي..
تعالي معايا في غرفتنا يا مني نتكلم
وبلاش تتعبي ماما اكتر من كده
فا اللحظة دي
شديت ايدي من ايده
وبسرعة فتحت شنطتي....
وخرجت الموبيل بتاعي...
واتصلت بماما
عشان تيجي
وتجيب البوليس
لكن لسؤ الحظ
رقم ماما كان مغلق
فا اتصلت بسرعة بسعيدة
بنت عمي ...
وفضل الموبيل يرن كتير
بدون ما سعيدة ترد عليا
لكن...
الحمد لله اخيرا ردت
فا قلت...الوووه
ردت سعيدة
وقالتلي...
ايوه يا مني ازيك
رديت بلهفة وتوتر
وقلت...الحقيني يا سعيدة
انا مخطوفة...
اسلام زوج هند اختي.... واهلة خاطفيني
اتصلي بالبوليس بسرعة
وتعالي انقذيني
ردت سعيدة
وسالتني
وقالتلي..
مني حبيبتي بتقولي ايه؟
انا مش سامعة حاجة
...الشبكة بتقطع ومش سامعة حاجة
رديت عليها وانا بستغيث
وقلت..اسمعي الي هقولك علية يا سعيدة
وتعالي...
الووو....الووو
سعيدة........؟
وللاسف... اكتشفت ان الخط فصل
فا ردت ام اسلام
وهي بتبص لابنها بلوم
وقالتلة..
عجبك كده الفضايح دي يا اسلام؟
مش هي دي العروسة
الي اصريت انك تتجوزها؟
اتفضل لاحق علي الفضايح بقي
وفضل اسلام يبص لامة
باسف
وبعدين قالها
اتفضلي انتي علي غرفتك يا ماما ارتاحي
وانا هتفاهم مع عروستي
هي بس تلاقيها متوترة
عشان مكسوفة
رديت تاني بغضب
وقلت...
اسمع يبني انت وامك
هقولهالك تاني
انا مش عروسة حد
ولو مسبتنيش اخرج دلوقتي حالا
انا هاروح بنفسي للبوليس
وابلغ عنكم
فا بصلي اسلام
وقالي..اتفضلي الباب ادامك
لو عايزة تخرجي... اخرجي
فا ردت ام اسلام
وقالت..
تخرج ازاي يا اسلام؟
رد اسلام
وقالها...
سيبيها براحتها يا ماما
وطبعا... انا مصدقت سمعت تصريح الخروج اللفظي ده
وخرجت اجري...
وحاولت اهرب من البيت...
لكن...
قبل ما اوصل عند البوابة
الي كانت مازالت مفتوحة
لمحت البواب بيبص عليا
وهو بيتكلم في الموبيل
وكان شكلة بيستعد لاعتراض طريقي
وكانه بياخد اوامر منهم
وخوفت لو حاولت اجتاز البوابة
البواب يحاول يمنعني بالقوة
فا بصيت بره البوبة
الي كانت مازلت مفتوحة
فا شوفت شخص بيركن السيارة بتاعتة...
في الشارع بالصدفة
ولما نزل الراجل من العربية
حاولت استغيث به
فا ناديت عليه
ولما بص ناحيتي
قلتلة..
تعالي بسرعة لو سمحت عايزاك
بصلي الراجل الي كان خارج البوابة
وقالي...
حضرتك بتكلميني انا؟
فا رد البواب
الي كان واقف بيني وبينة
وقال...لا شكرا خلاص اتفضل بالسلامة
قلت...لا ارجوك انا محتاجة مساعدتك ...
وعايزة استغيث بيك
وعايزاك توصلني لقسم الشرطة
فا قرب الراجل من البوابة
وزاح البواب من طريقة
وقالي اهدي كده
وقوليلي حضرتك مين؟
وعايزة ايه؟
قلت...انا في مشكلة كبيرة
وعايزة اروح لاقرب قسم شرطة
حالا من فضلك
وحاول البواب يعترض تاني
ويغلوش علي كلامي
لكن...
الراجل ازاح البواب من طريقي
وقالي..
اتفضلي تعالي معايا...
وبالفعل...
ركبت مع الجار الشهم
ووصلني لغاية اقرب قسم شرطة
ودخلني ... لاحد رجال الشرطة
وشرحله الموقف
فا طلب منه الضابط
يرجع للخلف...
ويتركني انا ادلي ب اقوالي
و سالني رجل الشرط
ايه المشكلة؟
فا قلت...
انا عايزة اعمل بلاغ
فا جهز الضابط اوراقة
وبالفعل بدء باخذ اقوالي
عشان يعمل المحضر
لكن
قبل ما اعمل المحضر
لقيت اسلام داخل يجري
عليا
وهو بيسالني
وبيقولي....
ايه الي حصل يا مني حبيبتي ؟
طمنيني عليكي
انتي كويسة؟
فا شاورت علي اسلام
وقلت...لرجل الشرطة
اهو هو ده الي كان خاطفني
بص رجل الشرطة لاسلام
وطلب منه بطاقتة
فا اخرج اسلام بطاقتة بالفعل
وبعد ما اتحقق الضابط
من هويتة
طلب من اسلام
انه يرد علي اتهامي له
فا رد اسلام
وقال...
ازاي بس هخطف زوجتي يا فندم
الي ادام حضرتك دي مراتي
فبصلي رجل الشرطة
وسالني
وقال..انتي تزوحتي من الشخص ده؟
قلت..ايوه
انا اتجوزتة علي يد ماذون فعلا
الليلة
لكن الزواج باطل
لانة هو كان متزوج اختي...
واختي لسة عايشة
رد الضابط
وسال اسلام
قال..ايه رايك في الكلام ده؟
رد اسلام
وهو بيخرج ورقة من جيبة
وقال ...
دي شهادة وفاة هند شقيقتها
مذكور فيها تاريخ وفاتها
والتاريخ
من ستة اشهر
رد الضابط
وقال..ايوه فعلا دي شهادة وفاة سليمة
امال ليه المدام بتقول ان اختها مازالت عايشة؟
وانت خاطفها؟
رد اسلام
وقال..
معلش مدام مني بتعاني من حالة نفسية
بسبب فقدانها لاختها
واضاف اسلام
قائلا
يا فندم
انا اتجوزتها برضا منها...
ومن كل عيلتها
رد الضابط
وسالة...
وقال..
ولما هي حالتها النفسية صعبة كده
ليه اتجوزتها؟
رد اسلام
وقال
للاسف مكنتش اعرف بحالتها
ده غير ان الحالة دي مؤقتة
يعني... شوية وهتبقي كويسة...
وترجع تاني لطبيعيتها
رد الضابط
ووجه سؤال تاني لاسلام
وقال..
يعني انت خطبتها واتجوزتها بمعرفة اهلها؟
رد اسلام بكدبة جديدة
وقال...
ايوه طبعا
و امها وعيلتها شاهدين انها كانت راضية علي الجواز وفرحانة كمان
بصيت للضابط
واعترضت
وقلت...الكلام ده كدب
يا فندم
اهلي ميعرفوش ولا هو اتقدم لاهلي
وانا شوفت اختي امبارح
بعيني
ومتاكدة انها عايشة
وده معناه ان جوازي منه باطل
بصلي الضابط بتعجب
وسالني
شوفتي اختك فين؟
قلت..في الزجاجة
استغرب الضابط
وقالي..فين؟
قلت..اشرف اخدني لغاية المعتقل....
اقصد.... المبني الشبية بالمعتقل
وانا شوفت اختي هناك....
صدقني يا فندم اختي محبوسة
في الزجاجة
بصلي الضابط بنظرة شك
في اتزاني ...
وكانة شاكك في قوايا العقلية
وسالني وهو بيبتسم
وقال...
يعني اختك امبارح كانت في الزجاجة؟
طيب والزجاجة فين دلوقتي؟
قلت..الزجاجة كانت مسكاها ام اسلام
وشوفت هند جواها
بصلي الضابط بشفقة
وبعدها بص لاسلام
وقالة..ياريت تعالجها
ومتسيبهاش كده...
لان واضح ان حالتها متاخرة
هز اسلام راسة باسف
وقالة..حاضر
انا فعلا ناوي اعالجها
في اللحظة دي
انا فضلت اصرخ
واقول للضابط
يا فندم صدقني
انا مش مجنونة
اشرف..
اخدني معاه في العربية...
ووداني عند البيت بتاعة
وانا شوفت الساحر بعيني
وشوفت هند في الزجاجة
بصلي الضابط
وسالني
وقالي
مين اشرف ده؟
قلت..الي واقف ادامك ده قالي امبارح
انه اسمة اشرف
بصلي الضابط
وقالي..
بس البطاقة بتاعتة الي في ايدي
بتقول ان اسمة اسلام
بعد ما حسيت بعجزي في اني اثبت الحقيقة
توسلت للضابط
انه يديني فرصة اخيرة
عشان اثبتلة...
اني فعلا مش مجنونة
وكل الي بقول عليه حصل
فا قلت..
ارجوك يا حضرة الظابط
اديني الفرصة الاخيرة
ولو مجيبتش لحضرتك دليل علي صدق كلامي
ابقي احبسني عندك هنا
ابتسم الضابط
وقالي..
ماشي معاكي للاخر
فين الدليل بتاعك؟
قلت...
الدليل بتاعي هو شهادة
امي... وبنت عمي
دلوقتي حضرتك
مش اسلام بيقول ان اهلي شاهدين علي جوازي منه؟
انا بقول لحضرتك
ان الكلام ده كدب
و امي وبنت عمي هياكدولك علي كلامي ده
وهيشهدوا ان اسلام بيكدب
بصلي الضابط
وقالي..
فين رقم والدتك؟
قلت..اتفضل
وفتحت الموبيل واعطيتة رقم والدتي
وفضل الضابط يتصل بماما
لكن ...
الموبيل فضل يعطية مغلق برضوا
ولقيت الضابط بيبصلي بضيق
وهو بيهز راسة
وبيقولي...
الموبيل بتاعها مغلق
قلت.. طيب لحظة واحدة ارجوك
خد رقم بنت عمي
وبالفعل اخد الضابط رقم سعيدة
بنت عمي
وطلب منها تيجي للقسم فورا
وبعد ما قفل معاها
لقيتة بيقولي ...
انا اتصلت ببنت عمك...
وعملتلك الي انتي عايزاه
عارفة بقي...
لو بنت عمك قالت انها شاهدة علي جوازك
من الراجل ده
انا ممكن اعمل فيكي ايه؟
قلت...انا مستعدة لاي عقاب حضرتك
وفضلت منتظرة الدقايق تعدي وتمر
عشان سعيدة تيجي
وبعد مرور الوقت الثقيل
ظهرت سعيدة اخيرا عن باب القسم
ولما شافتني
لقيتها جاية ملهوفة عليا
وقبل ما سعيدة تقرب مني... ولا تاخدني في حضنها
صرخ فيها الضابط
عشان متقربش مني
وسالها....
فين بطاقتك؟
طلعت سعيدة بطاقتها
وقلتله ...اتفضل البطاقة
بصلها الضابط وشاور عليا
وسالها؟
وقالها..
تعرفي الي واقفة دي؟
ردت سعيدة
وقالت...
ايوه دي مني بنت عمي
هز الضابط راسة برضا
وقال..تمام
ورجع شاور علي اسلام
وقال...
تعرفي الشخص الي ادامك ده؟
ردت سعيدة وقالت ......
عارفين سعيدة قالت اية.......؟
لو عايز باقي احداث الرواية صلي علي النبي صلى الله عليه وسلم
تكملة الروايه من هنااااااا
اللهم صل وسلم وبارك على سيدنا محمد وعلى اله وصحبه اجمعين
ردحذفاللهم صل وسلم على سيدنا وحبيبنا محمد وعلى آله وصحبه وسلم تسليما كثيرا إلى يوم الدين
ردحذفاللهم صل وسلم وبارك على سيدنا محمد وعلى اله وصحبه وسلم تسليما كثيرا
ردحذف