 |
واقف قدام أوضة العمليات مستني الجملة اللي هتغير كل حاجة في حياتي وهي "مراتك ولدت وقامت بالسلامة هي وبنتك❤️"
جوايا مشاعر كتير اوي مختلطة ، بين فرحتي اللي مش سيعاني .. أخيرا هبقى أب !!
وبين خوفي اللي ميوصفهوش كلام على مراتي اللي هي أهم وأغلى حاجة في حياتي ، وبين التشوق الفظيع إني أشوف وش بنتي في أول لحظة ليها في الدنيا واخدها في حضني واشم ريحتها 🤍
وبعد وقت صعب مليان خوف وتوتر خرج الدكتور من أوضة العمليات ... وشه مليان تعابير مش مفهومة !!
جريت عليه وبخوف : مراتي وبنتي بخير يادكتور ؟؟
الدكتور : مدام حضرتك ولدت وبنتك بخير الحمدلله يااستاذ فارس ؛ولكن ..
فارس : ولكن !! مراتي كويسة ؟؟؟
الدكتور : فيه حاجة غريبة جداً حصلت مش قادرين نلاقيلها اي تفسير
فارس : ايه اللي حصل..!
الدكتور : الحقيقة الولادة كانت صعبة جدا خصوصا وان كارمن زوجة حضرتك أصرت إنها تكون طبيعي رغم إن وضعها ووضع الجنين كان صعب .. مش دا المهم
المهم إن بعد ما الولادة تمت فعلاً وخلصنا كل الإجراءات اللي بتتعمل بعد اي ولادة طبيعي ، وبنجهز نفسنا عشان نخرج نبلغكم وتدخلوا تشوفوا الأم والطفلة .. بنتلفت على السرير ملقيناش غير الطفلة ، الام اختفت بشكل غريب جداااا
والأغرب إننا مسيبناش مكان مدورناش فيه حتى الباب الخلفي اللي صعب جدا فتحه فتحناه وخرجنا دورنا برا .. ملهاش أي اثر !!!!
سيف اخو فارس : ملهاش اي اثر ازااااي يعني يادكتور هنهزر !!!!!
فارس بيضحك بسخرية : لا لا يادكتور اكيد حضرتك اتلغبطت بينها وبين واحدة تانية مراتي عمرها ماهتختفي 😂
الدكتور : كارمن ممدوح حجازي .. دا إسم مراتك صح كلامي ؟
فارس باصصله بصدمة وصمت
سيف بصدمة فظيعة : اه هي يادكتور
الدكتور : لازم نلاقيها بأسرع وقت ممكن ، اللي بيحصل دا غلط وخطر عليها جدا
سابهم فارس وجري بسرعة دخل على الأوضة اللي كانت بتولد فيها ، بص يمين وشمال .. شاف الباب الخلفي جري فتحته ونزل على السلم وبدأ يدور عليها زي المجنون في كل مكان
*قدام الأوضة*
واقفين سيف اخو فارس وأمنية مراته ، فاطمة أم فارس ، جميلة أم كارمن
جميلة واقفة بتعيط : ازاي يعني تختفي بالمنظر دا ازااااااي انا بنتي عمرها ماتعمل كدا من نفسهاااا ياجماعة اتصرفووا ابوس ايديكوا
فاطمة أم فارس : انا عارفة من الأول خااالص إن الجوازة دي مش هتنفع قعدت اقولكوا كلكواااا كدا محدش سمع كلامي عاجبكوا السوحة اللي اتحطينا فيها دي ؟؟؟
سيف بيبرقلها : ماما عيب اللي بتقوليه دا ومش وقته خاااالص
جميلة أم كارمن : ولما انتي مكنتيش موافقة على الجوازة سمحتي إنها تتم ليه ؟ انا لحد دلوقتي سكتلك كتير اووي ياام فارس بس النهاردة انا مش هستحمل ربع كلمة عن بنتي
سابتهم وراحت آخر الطرقة تتكلم في التليفون
سيف بيحط ايده على دماغه : ايه اللي بيحصل دا انا مش فاهم حاجة ؟!!!!
أمنية مراته بتطبطب عليه : اهدى ياحبيبي ، أكيد هيلاقيها والله كارمن بنت حلال وأكيد اللي بيحصل دا فيه سوء تفاهم وهنفهمه
الممرضة خارجة : مين هيستلم الطفلة ؟؟
فاطمة أم فارس : انا هستلمها هاتيها
سيف : ازاي يعني ياامي .. أبوها وامها موجودين وهنستلمها احنا !!!
فاطمة : بقولك ااااايه بلا امها بلا ابوها .. انا وافقت بالليلة دي كلهاااااا في سبيل إني اشيل حفيدي اللي ... اللي ملقتهوش من ابني الكبير اللي متجوز بقاله فوق الخمس سنين 😏
أمنية عينيها بتدمع وبتبص في الأرض بكسرة
فاطمة دخلت تجيب الطفلة "بنت فارس وكارمن"
💛💛💛💛💛💛💛💛💛💛💛💛💛💛
فارس مازال قالب الدنيا على كارمن وبيدور في كل مكان ممكن يلاقيها فيه ، بيسأل الناس والأمن ، بيوري صورتها للي واقفين في الشارع وللمحلات
💛💛💛💛💛💛💛💛💛💛💛💛💛💛
*في بيت عم كارمن *
مصطفى عم كارمن قاعد ومعاه سليم إبنه .. سليم رايح جاي في الأوضة بتوتر رهيب
مصطفي : يابني ماتقعد بقققققققي روشتني
سليم : هقعد ازااااي يابابا وانا مش عارف ايه وضعها دلوقتي ، ولدت مولدتش كويسة ولا تعبانة
دا غير الزفت اللي زمانه لازقلها وآل ااايه بقى أبو بنتهااا
مصطفى : يمكن عشان هو فعلاً ابو بنتها ! 🤔
سليم بغيظ : انت بتستفزني ياحج !!
مصطفى : ولا بستفزك ولا حاجة ، كل الحكاية إني نفسي تكبر وتعقل بقي شوية
قولتلهالك قبل كدا وهكررهالك ، كارمن ليك ولو السما مطرت سكاكين نهايتها هتكون معاك انت
ثق في ابوك بقي شوية متبقاش تافه
سليم : انا مش تافه يابابا بس انا هستني ايه اكتر من أنها خلففففففت منه 😱😱
مصطفى : وانت عارف كويس انا خلتها تخلف منه ليه وايه مصلحتنا في كدا ، أهدى بقي واتبط شوية
ادي جميلة امها بتتصل ثواني أرد عليها
مصطفى بيرد عالتليفون.....
مصطفى : ااايه !!!!
انتي بتقولي ايه ياجميلة ، يعني ايه اختفت ؟؟؟؟
💛💛💛💛💛💛💛💛💛💛💛💛💛💛
فارس مازال بيدور عليها زي المجنون ومش قادر يفهم ولا يستوعب اللي بيحصل .. وقف في نص الشارع وهو عرقان ومتبهدل
حط ايده على دماغه
فارس : روحتي فين ياكارمن !!!!
قلبي مش مستريح وحاسس إن اللي بيحصل دا في حاجة مش طبيعية .. لو كنتي عاوزة تمشي كنتي مشيتي من زمان لكن اختفائك دا اكييييد ليه سبب
وانا مش هسيبك ياكارمن .. لو في آخر الدنيا هجيبك وهنشوف بنتنا سوا
اتعدل ومشي عشان يكمل تدوير
💛💛💛💛💛💛💛💛💛💛💛💛💛💛
*في المستشفى *
فاطمة خارجة وشايلة بيبي صغننة خالص وملفوفة بكوڤيرتة الأطفال .. محمرة خالص وملامحها صغننة وبريئة
خرجت بيها على برا .. جريت أمنية بصت عليها ، ابتسمت وعينيها دمعت من فرحتها ولسة هتاخدها منها ، زقتها فاطمة وخدت البنت ومشيت لقدام على سيف
مسكها سيف وباسها من راسها .. قرب من ودنها وبدأ يأذن بما إن ابوها مش موجود
خلص آذان .. قرب بيها من أمنية
أمنية بتبصله وعينيها مليانة دموع .. من غير مقدمات حطها في ايديها
أمنية سمت ومسكتها بالراحة خالص وبدأت تشم في ريحتها الجميلة وهي دموعها نازلة من فرحتها إنها ماسكة نعمة من نعم ربنا اللي هي محرومة منها
سيف : انا هنزل اشوف فارس فين وادور معاه على كارمن
💛💛💛💛💛💛💛💛💛💛💛💛💛💛
في شارع بعييييد عن المستشفي وفي منطقة فقيرة إلى حداً ما .. بنت ماشية بتحاول تجري ، تقع على الأرض وتقوم تاني تمد وتجري .. صوت نهجانها يسمعه حد في آخر الشارع من تعبها .. عرقانة وعيونها العسلي مدمعة سواء من التعب ، أو من الخوف إنها تتلحق ، أو من الحزن !!
شعرها الناعم مفكوك ومش متظبط ، عمال يطير على وشها من الهوا اللي بيخبط فيها
وفجأة جابت آخرها من الجري والمشي ، وقعت على الأرض جنب الحيطة ، اتعدلت بالعافية وسندت ضهرها على الحيطة وهي بتتوجع وبتعيط في نفس الوقت وبتحط ايديها على بطنها
طبعاً من الوصف فهمتوا إن البنت دي تبقى كارمن 💛بطلة روايتنا💛
ساندة على الحيطة وبتنهج وبتمسح دموعها .. حست بخطوات جاية عليها ، حطت ايديها على بوقها كتمت نفسها واللي بقى بيتحرك فيها عينيها المدمعة اللي بتبص يمين وشمال من الخوف والرعب ياترى مين الشخص اللي جاي عليا !!
💛💛💛💛💛💛💛💛💛💛💛💛💛💛
فارس ماشي في الشارع حوالين المستشفى وفجأة حس بورقة بتقع من جيبه .. وقف ووطى جاب الورقة وفتحها
" ازيك يافارس ..
إحتمال متشوفش ورقتي لأني هحطها في جيبك من غير ماتحس ، بس لو شوفتها اكيد مش هكون معاك ... انت عارف وانا كمان عارفة إن علاقتنا وجوازنا من البداية كان صفقة ، أجيب الحفيد والوريث لعيلة *الحر* واتفاق الشغل اللي بينكم وبين عمي يتم .. ووقت ما هتكون بتقرأ الورقة دي هتكون معاك بنتك
كدا انا مهمتي انتهت ..
وبالنسبة للمشاعر اللي اتكونت جواك ليا دا مكانش بمزاجي ولا كنت عاوزاه ، وهاودتك فيه للآخر لحد مااولد واشوف طريقي
طريقي مع البني آدم اللي بحبه وعاوزاه من زمان
خد بالك من بنتنا يافارس ، ولما تكبر متخليهاش تكرهني ، قولها كلمة واحدة بس
"كل اللي حصل من البداية مكانش بإرادة مامتك " "
فارس ماسك الورقة ومبرق .. عروقه كلها مزرقة وعرقان من الصدمة
نزل ايده بالورقة وكرمشها في ايديه
فارس : لا ياكارمن غلطانة .. الحكاية مش هتخلص بالبساطة دي
وبعد ٢٤ ساعة من دلوقتي لو مكنتيش معايا مبقاش انا فارس الحر .
💛🔥💛🔥💛🔥💛🔥💛🔥💛🔥💛🔥
اللي عاوز التاني يعمل متابعه من هنا
لو لقيت تفاعل حلو على البارت الاول هنزل البارت التاني في أقرب وقت 💖💖💖💖
تفاعلواااا 🔥🔥
💛وعد الحُر💛
البارت التاني من هنا
تعليقات
إرسال تعليق