 |
البارت التاني 💖💖💖
" ازيك يافارس ..
إحتمال متشوفش ورقتي لأني هحطها في جيبك من غير ماتحس ، بس لو شوفتها اكيد مش هكون معاك ... انت عارف وانا كمان عارفة إن علاقتنا وجوازنا من البداية كان صفقة ، أجيب الحفيد والوريث لعيلة الحر واتفاق الشغل اللي بينكم وبين عمي يتم .. ووقت ما هتكون بتقرأ الورقة دي هتكون معاك بنتك
كدا انا مهمتي انتهت ..
وبالنسبة للمشاعر اللي اتكونت جواك ليا دا مكانش بمزاجي ولا كنت عاوزاه ، وهاودتك فيه للآخر لحد مااولد واشوف طريقي
طريقي مع البني آدم اللي بحبه وعاوزاه من زمان
خد بالك من بنتنا يافارس ، ولما تكبر متخليهاش تكرهني ، قولها كلمة واحدة بس
"كل اللي حصل من البداية مكانش بإرادة مامتك " "
فارس ماسك الورقة ومبرق .. عروقه كلها مزرقة وعرقان من الصدمة
نزل ايده بالورقة وكرمشها في ايديه
فارس : لا ياكارمن غلطانة .. الحكاية مش هتخلص بالبساطة دي
وبعد ٢٤ ساعة من دلوقتي لو مكنتيش معايا مبقاش انا فارس الحر .
-نتعرف بفارس 💛البطل💛
شاب عنده 30 سنة .. خريج وشغال في سلسلة مصانع أبوه الله يرحمه هو واخوه وصلاح خاله ووليد ابن خاله
مفيش داعي نوصف شكله لأنه واضح من الصورة ...
طبعه قاسي وحاد جداً .. وفي نفس الوقت عاطفي ودا مبيظهرش غير في أوقات معينة لناس معينة
عايش في ڤيلا كبيرة مع أمه *فاطمة* وأخوه ومراته *سيف وأمنية* ، وخاله وابن خاله ، وقبل ماكارمن تختفي كانو متجوزين بقالهم سنة وعايشين في أوضة كبيرة جدا داخل الڤيلا
💛🤍💛🤍💛🤍💛🤍💛🤍💛🤍💛🤍
كارمن ساندة على الحيطة وبتنهج وبتمسح دموعها .. حست بخطوات جاية عليها ، حطت ايديها على بوقها كتمت نفسها واللي بقى بيتحرك فيها عينيها المدمعة اللي بتبص يمين وشمال من الخوف والرعب ياترى مين الشخص اللي جاي عليا !!
راجل كبير سناً وغلبان داخل عليها وبيبصلها باستغراب
الراجل : ايه يابنتي اللي مقعدك كدا في عز البرد دا ؟؟
أول ما شافته وعرفت إنه شخص غريب ومش عارفها شالت ايديها من على بوقها وغمضت عينيها خدت نفسها ودموعها نازلة
الراجل : انتي بتعيطي كمان ؟!!
لا قومي قومي معايا يابنتي انا بيتي هنا اهو .. عارف أنه صغير وفقير وباين عليكي بنت ناس بس اهو اربع حيطان يحموكي من قرصة البرد
كارمن بتحاول تقوم تقف ومش قادرة من التعب .. الراجل اتقدم عليها وحاول يساعدها تقوم تقف رغم إن هو كمان تعبان وعلي قد حاله .. قومها وسندها تدخل البيت عنده
دخلت قعدت على الكنبة وسندت راسها لورا
الراجل : ثواني يابنتي هجيبلك اي غطا تحطيه عليكي بس لبس المستشفيات الخفيف دا
كارمن : لا لا ياحج انا تمام
الراجل : متقلقيش .. بنتي قبل ماتتجوز كانت في سنك وعندي ليها هدوم هتيجي على مقاسك
تلبسيها لحد مانقعد نتكلم ونشوف ايه حكايتك
💛💛💛💛💛💛💛💛💛💛💛💛💛💛
نتعرف بكارمن 💖البطلة💖
بنت عندها 23 سنة .. متخرجة من كلية آداب علم نفس ، اللي موجود من عيلتها أمها *جميلة* وأختها *داليا* اللي عايشين في نفس العمارة مع عمها *مصطفى* وابن عمها *سليم* ومرات عمها *ناهد*
كارمن بنت عيونها عسلية وملامحها بريئة براءة الأطفال .. شعرها لونه بندقي و ناعم زي بشرتها البيضا زي ما بردو واضح في الصورة 🤍🤍
صفاتها ممزوجة بين البراءة والطيبة ، وبين الشقاوة والجنان
متجوزة فارس الحر بقالها سنة بالظبط .. ومع بعض هنعرف حكايتهم بدأت ازاي وايه وصلها لكدا
💛💛💛💛💛💛💛💛💛💛💛💛💛💛
سيف نزل وقعد يدور كتير لحد ما لقى فارس واقف على جنب ووشه جايب ألوان .. جري عليه
سيف : ايه يابني انت فين قلبت عليك الدنيا
فارس باصص قدامه وساكت ... سيف حضنه وبدأ يدب على كتفه وكأنه بيقويه
سيف : اجمد ياخويا ، اجمد واصلب طولك
هنلاقيها هنلاقيها هتروح فين يعني !
بعد عنه شوية وطبطب على كتفه : يلا يافارس تعالي اطلع المستشفي معايا شيل بنتك وحسسها بوجود حد فيكو , وبعدها هننزل نقلب الدنيااااااا عاليها واطيها لحد مانلاقي أمها
فارس بينزل ايد سيف : مش هيحصل ياسيف
سيف : هو ايه اللي مش هيحصل
فارس : مش هبص في وشها قبل ماامها تكون موجودة ، جبناها سوا وعملنا كللللل دا عشان خاطرها ومش من حقي امسكها ولا اشوفها ولا حتى اشم ريحتها قبل ماامها تشوفها
سيف : لا يااخويا مش صح .. بنتك محتاجالك دلوقتي ، امها الله أعلم راحت فين وايه حكايتها بس الأهم في اللحظة دي انك تطمن بنتك وبعدها تعمل اللي انت عايزه
فارس : وانا قولتلك اللي فيها ياسيف ، واظن انت اكتر واحد عارف أخوك لما بيعند في حاجة
بيطبطب علي كتفه : اطلع ياسيف ادي البنت لمراتك وخليها تاخدها في حضنها وتعتبرها بنتها ومن دمها لحد ما امها ترجع .. فرصتها وجاتلها
أما بالنسبة لكارمن .. وحياة دم الحر اللي بيجري في عروقي ما هيعدي ٢٤ ساعة غير وهي معايا
نزل ايده وبيلف عشان يمشي سيف مسكه : استني يافارس انا جاي معاك
فارس : لا لا خليك معاهم .. في غيابي لازم يكون حد موجود مع كل الحريم دي ، متقلقش عليا
سابه وركب العربية واتحرك .. على فين ؟ ناوي علي ايه ؟
لسة مش عارفين
💛💛💛💛💛💛💛💛💛💛💛💛💛💛
*في البيت الفقير *
كارمن قاعدة لابسة الهدوم اللي جابها ليها الراجل العجوز .. عينيها مدمعة ووشها واضح عليه معالم التعب والألم
الراجل داخل عليها : سلام عليكم
كارمن : عليكم السلام .. تعالي ياحج انا لبست خلاص
الراجل : قوليلي بقى .. حكايتك ايه وليه كنتي لابسة هدوم مستشفي وواضح إنك هربانة من حاجة ؟
كارمن : دي حكاية يطول شرحها اوي .. خليني احكيلك وقت تاني
الراجل : بصي يابنتي
انا مش هضغط عليكي تحكي حاجة طبعاً لأن ديني كمسلم بيوجب عليا مسألش ضيفي عن اي حاجة ٣ أيام متتاليين واليوم الرابع اسأله .. ولكن انا عاوز أساعدك ف ع الأقل قوليلي كنتي في المستشفي ليه
كارمن : مفيش كنت تعبانة شوية وعملت عملية بسيطة كدا وخرجت
الراجل : يعني العملية دي مش ولادة ؟؟ لو هي ولادة قوليلي عندنا حكما كتير حوالينا اخليهم يساعدوكي
كارمن بتوتر : لا لا ولادة ايه .. يعني هو انا لو والدة كنت هسيب بنتي كدا واهرب !
الراجل باستغراب : وانتي عرفتي منين انك لو ولدتي هتجيبي بنت
كارمن عرقت واتوترت زيادة : اصل ا .... اصل من وانا صغيرة وانا نفسي لما احمل واخلف اجيب بنوته بتبتسم بكسرة وهي بتفتكر وش بنتها البرئ لحظة ماولدتها
مسحت دموعها وكملت كلامها : وكان نفسي اسميها وعد كمان
Flash back 📸🔙
كارمن حامل وقاعدة على الانتريه وفارس جنبها .. وطى وباس بطنها
كارمن : فرحان إنك هتبقى أب ؟
فارس : يااااه .. مفيش اي كلام يوصف إحساسي اقسم بالله ، خصوصاً وإن الطفل دا هيكون من أحلى بنت في الدنيا ❤️❤️
كارمن : عارف .. على قد فرحتي بالروح البريئة اللي هجيبها للدنيا واكون امها ، على قد خوفي
فارس : خوفك من ايه بس ياحبيبتي
كارمن : خوفي عليها من الدنيا ، خوفي إنها تطلع ومتلاقيش ابوها وامها مع بعض لأي سبب ودا يخلق جواها فجوة كبيرة وتحس إحساسي وتتوجع الوجع اللي عيشته طول حياتي
فارس : طول مانا عايش على وش الدنيا وانتي كمان عايشة مش هخلي حاجة في دنيا تحسسها بدا .. ودا لأني هفضل شايل امها في عيني طوووول حياتي ، وحتى بعد مااموت هفضل بحبها
كارمن : وعد يافارس ؟؟
فارس : وعد ياروح قلب فارس
هما الاتنين ركزوا في نفس اللحظة وهما مبتسمين .. وفي نفس اللحظة قالوا نفس الكلمة
فارس * كارمن : وعد الحر 😍😍😍
كارمن بتضحك جامد : ربنا بعتلنا الإسم المناسب في الوقت المناسب *وعد فارس الحر* 🙈🙈🙈
فارس : ربنا يجيبها على الدنيا بالسلامة وتتربي في حضننا يارب .. واوعدك بعد ما تتولد هغير اسم سلسلة مصانع الحر لـ *وعد الحر* ❤️❤️
رجعت كارمن من الفلاش باك على صوت الراجل
الراجل : ربنا يعترك في إبن الحلال اللي يصونك وبعدها تسمي كل الأسماء اللي انتي عاوزاها
كارمن : ربنا يكرمك .. انا هقوم أمشي بقي كتر خيرك لحد كدا
الراجل : لااااا تمشي ايه دا انا لسة هقوم اعملك لقمة ترم عضمك يابنتي اقعدي
كارمن : لا لا بالله عليك مش قادرة اكل اي حاجة انا هقوم امشي بس
الراجل : طيب تعالي نتفق اتفاق .. انا هقوم اجهزلك لقمة حلوة على ماتنامي في الفرشة دي شوية وتريحي جتتك من الطريق والجري
ومتخافيش الدار أمان وانتي زي بنتي
كارمن بتبتسم : كتر خيرك ياحج
الراجل : يلا ريحي على ماارجعلك بالاكل
خرج من الاوضة ورد الباب وراه .. لقى ابنه في وشه
الراجل : ايه ياخالد واقف كدا ليه !!
خالد بيبص ع الاوضة : احنا عندنا ضيوف يابا ولا ايه
الراجل : ملكش صالح عندنا ايه .. خش غير الهدمة اللي عليك واخرج كمل اكل عيشك
خالد : يعني هي الضيوف تقعد في الاوضة اللي لماني وتقولي ملكش صالح !!
الراجل : البيت دا بيتي واجيب فيه اللي اعوز اجيبه ، مش عاجبك شوفلك مطرح تاني اتلقح فيه اتفضل
خالد : خلاص يابا اديني اتكتمت
💛💛💛💛💛💛💛💛💛💛💛💛💛💛
*في قسم الشرطة*
فارس داخل .. قام الظابط جري ياخده بالحضن
الظابط : اهلاااااااااا ابو الفرسااان
فارس : ازيك ياعاصم عامل ايه
الظابط : زي الفل يابرنس انت اخبارك ايه .. وفينك كدا هناخد مواعيد عشان نشوفك ولا ايه
ياعم هو مين فينا اللي ظابط 😂😂
فارس : دوامة ياعاصم والله ، الواحد عايش في دوامات طول الوقت
الظابط : الله يعينك ياصاحبي .. ايه خير
مجيتك ووشك مخطوف دي مش مريحاني
فارس : عاوزك في موضوع مهم اوي ياعاصم وعارف ان مفيش غيرك هيعرف يساعدني في حاجة زي دي
الظابط : خير ياصاحبي رقابتي دا انت خيرك عليا من زمااان
فارس : مراتي
الظابط : مالها مراتك !!
فارس : كانت بتولد النهاردة وكل حاجة كانت ماشية طبيعي .. وبعد الولادة بلحظات اختفت اختفاء غريب ومن ساعتها قالب الدنيااااا كلها عليها مش لاقيلها أثر
الظابط : ايه دا غريبة دي ؟؟؟
بس المشكلة ان انت بتقول الموضوع لسة النهاردة يعني لسة معداش ٢٤ ساعة على وقعة الاختفاء عشان نبدأ ندور
فارس : أيوة بس انا مش حد غريب ياعاصم !
انا مش هينفع بأي شكل استني ٢٤ ساعة انا هتجننننننننن
عاصم : طب خلاص اهدي اهدي ، انا هحاول الاقيهالك
فارس : يعني اثق في كلامك ولا هتنساني ؟؟؟
عاصم : ياعم عيب اللي بتقوله دا انا عاصم
فارس : ودا العشم ياصاحبي .. هستني منك تليفون
عاصم : تمام ابعتلي صورتها عشان نبدأ ندور
💛💛💛💛💛💛💛💛💛💛💛💛💛💛
*في المستشفى *
سيف داخل عليهم الطرقة .. قدمت فاطمة
فاطمة : لقيت اخوك ؟
سيف : اه لقيته بس مرضيش يطلع
فاطمة : ليه ؟؟؟
سيف : مش عايز يشوف البنت قبل ما يلاقي مراته
فاطمة : صبرني ياااااارب
دخل سيف على الأوضة .. أمنية قاعدة على السرير حاطة البيبي على رجلها وعمالة تحسس على وشها وهي ضحكتها من الودن للودن
دخل وقف قدامها وبصلها شوية .. وطي باس دماغها
سيف : قريب هيتعاد نفس المشهد دا بس هتكون من دمك ياحبيبتي
أمنية : والله مبقاش فارق معايا من دمي ولا لا ، البصة في وش البنوتة دي تسوى الدنيا وما فيها
سمى سيف ومسك البنت بص في وشها
سيف بفخر : وعد فارس الحر .. نايمة ومش حاسة بأي حاجة حواليكي
بس انا متأكد إنك هتكوني سبب في صلاح اي حاجة بايظة ، وتجميع اي حاجة متفرقة
باس على دماغها واداها تاني لامنية
أمنية : ها وصلتوا لحاجة عن كارمن ؟
سيف : مفيش ولا حس ولا خبر وفارس قالب الدنيا .. انا بس نفسي اي راجل ييجي يقف معاكو عشان أنزل انا كمان أدور عليها مع فارس
وهو بيتكلم سمع صوت جاي من برا خرج بسرعة
مصطفى عم كارمن داخل عليهم ومعاه سليم إبنه
مصطفي : اللي انا سمعته دا ياجميلة ؟!!!
جميلة : اه للأسف بجد ياحج .. انا ندهتلك تتصرف بما إنك مكان أبوها عشان انا مش عارفة اعمل ايه
سليم بخضة : هو ايه اللي يتصرف !!! انتو ازاااااي تسيبوها تهرب وتختفي بالشكل دا يعني معندكوش عينين
سيف بصوت عالي : لا حيلك حيلك ياسليم اتكلم عدل عشان الواحد خلقه في مناخيره ومش ناقصاك ... واكيد كارمن مخرجتش من وسطنا وقولنالها يلا ياحبيبتي طريق السلامة
هي اختفت بطريقة عجيبة بعد الولادة بلحظات
مصطفي : ازاااي يعني الكلام دا وفين جوزها ان شاء الله ؟؟؟؟؟؟؟!!!
فاطمة : جوزها نزل من ساعتها وقالب عليها الدنيا
وبراحة علينا شوية ياخويا احنا زينا زيك
مصطفى : انا هعمل إتصالات واخرب الدنيا لحد ماالاقيها .. بس بعد ما الاقيها هيكون لينا كلام تاني
مصطفى طلع تليفونه و خرج على برا
سليم : كارمن لو جرالها حاجة انا مش هسامح حد فيكو .. انتو فاهمين ؟؟؟؟؟؟
سيف : في ايه ياسليم ما تتكلم عدل انا ساكتلك من الصبح
باستغراب : ثم انك ايه اللي حامقك اوووووي كدا يعني ؟!!!!
سليم : ايه اللي هيحمقني يعني هي دي مش بنت عمي يعني لحمي ودمي !!!
سيف : لحمك ودمك ها ..
تمام ، انا هنزل أشوف فارس راح فين ياجماعة .. عن اذنكو
💛💛💛💛💛💛💛💛💛💛💛💛💛💛
بعد ٧ ساعات ...
فارس ماشي عمال يعدي على اي حد يعرف كارمن من اهلها لاصحابها لمعارفها .. ووسط دا كله تليفونه رن
فارس : أيوة ياخالي
صلاح : ايه يافارس عملت ايه
فارس : ولا اي جديد
صلاح : لسة ملقتهاش لحد دلوقتي ؟؟؟
فارس : للأسف
صلاح : امممم .. طيب انا هعمل اتصالات وهخلي الرجالة ينزلوا يدوروا هما كمان ، وهتابع المصانع لحد ماتلاقيها وتقف على رجليك
فارس : دا العشم بردو ياخالي .. معلش هتعبك بقي واشيلك شغلي فوق شغلك
صلاح : من امتى في بيننا الكلام دا يافارس انت ابني وانت عارف دا كويس .. اللي يفرق معايا دلوقتي تلاقي مراتك وترجعها بيتها وأيا كان اللي بينكم يتحل تحت سقف بيتكم
فارس : والله ياخالي ما فيه بيننا غير كل حب ومودة وخير بس وعشان كدا انا هتجنن
صلاح : خير يابني .. خير متفقدش الأمل وخليك وراها لحد ما تلاقيها
فارس : حاضر ياخالي
قفل فارس المكالمة ولسة هيحط الفون في جيبه لقاه بيرن تاني "عاصم الظابط"
فارس بيرد بسرعة : الو ...
عاصم : ايه يافارس .. احنا تقريباً كدا عرفنا مكان كارمن مراتك ، تعالى على المكان اللي هقولك عليه بسرعة
💛💛💛💛💛💛💛💛💛💛💛💛💛💛
*في البيت الفقير *
كارمن من التعب والإرهاق اللي مرت بيهم اليوم كله غفلت وراحت في النوم .. خالد ابن الراجل بيفتح الباب ببطئ وداخل عليها في غفلة أبوه مش موجود فيها
بدأ يتسحب ويدخل واحدة واحدة لحد ما بقى واقف قدامها .. بص على جسمها كله بطريقة قذرة
وفجأة قرب منها وحاول يتهجم عليها ولكن ....
💛💛💛💛💛💛💛💛💛💛💛💛💛💛
هنعرف ايه اللي حصل البارت الجاي .. قولوا توقعاتكم ورأيكم في البارت ❤️❤️
هنزل البارت التالت لما تعملوا متابعه للمدونه من هنا 🔥
البارت التالت من هنا
تعليقات
إرسال تعليق