رواية معتكف ف محراب قلبي الفصل 16-17-18-19-20بقلم مى سيد (جميع الفصول من الفصل الأول إلى الفصل الأخير كامله)
رواية معتكف ف محراب قلبي الفصل 16-17-18-19-20بقلم مى سيد (جميع الفصول من الفصل الأول إلى الفصل الأخير كامله)
معتكف ف محراب قلبي
صلِّ علي رسول الله 💙
البارت السادس عشر
التفتلها بهدوء وانا برد عليها
_ نعم
اتكلمت بخجل وهي بتلعب بايديها وموطيه رأسها ، قبل م شعرها ينزل ويخبي وشها
= أنا ... شكراً
معرفش لي حسيت انها كانت هتقول حاجه تانيه ، حقيقي حسيت بكده لوهله ، كانها غيرت رايها
رديت عليها بلامبالاه " مصطنعه "
_ العفو ، انا داخل انام ، تصبحي ع خير
= وانت من أهله
قومت عشان ادخل الاوضه قبل م تنادي عليا تاني
_ نوح
= نعم
سألت وهي بتفرك ف ايديها بتوتر
_ هو مين ال اشترالي الهدوم دي
= انا
_لوحدك ؟!
= اها ، اومال مين هيبقا معايا يعني
_ عادي بسأل
هزيتلها راسي بدون م اتكلم وانا بتحرك عشان انام ،
قبل م تنادي عليا تالت
_ نوح
رديت بنفاذ صبر وانا بقعد تاني ، اما نشوف اخر الليله دي
= نععععم
_ هو انت اتجوزتني لي ؟
رديت باستغراب وانا مش مستوعب انها ممكن تكون عرفت حاجه ، ولو عرفت لي واقفت تكمل
= مش فاهم السؤال
_ قصدي انه انت انجبرت تتجوزني ؟!
= لي بتقولي كده ؟
_ عادي حاسه كده
= انتي ممكن تنجبري ع كده ؟
_ لا
= يبقي اذا كان انتي ك بنت متجبرتيش ، انا هتجبر
هزت رأسها باقتناع بدون م ترد
قبل م اسالها انا نفس سؤالها وانا تقريباً شاكك ف الإجابة
_ انتي بقا اتجوزتيني لي ؟
ردت بثبات وهي بتنزل راسها بتوتر
= عايزه احتفظ بالاجابه لنفسي ، ممكن ؟!
هزيت راسي بدون م ارد قبل م تردهالي وتعيد السؤال
= بس انت برضو مردتش ع سؤالي
_ حابب برضو احتفظ بالاجابه لنفسي ، لحد م يجي وقت واقولك
هزت راسها بشرود وسكتت قبل م اقوم انا عشان انام قبل ن اسالها
_ هو انتي مش هتنامي ؟!
= احم ، لا هنام طبعاً
هزيتلها راسي وسبتها ودخلت نمت بدون م اتكلم تاني ، الحقيقه مش فاهم ف اي
بس انا متأكد اني بعمل الصح ، مش لازم تعرف حاجه لحد م يجي وقتها ، ولحد الوقت ده لو معرفتش اكون ليها زوج بيحبها فممكن اكون اخ كويس ، لحد م هي تزهق وتقرر تبعد
غير كده الحقيقه معنديش استعداد لأي حاجه تانيه
دخلت الاوضه صليت القيام وقرات قران وطفيت النور عشان انام
قبل م اروح ف النوم حسيت بيها بتدخل الاوضه ، اتوجهت لاوضه اللبس ، وبعد كده محستش بحاجه تاني
———————————————
هو حضني بجد !! ، بجد والله حضني !!
معرفش اخد رياكشن بس مبسوطه ، مبسوطه من كل النواحي ، مبسوطه بحجات كتير اوي
مبسوطه عشان عايز يلبسني الطرحه ، مبسوطه عشان عايز يسترني ، مش عارفه ممكن عشان الدين وكده
بس طول عمري شايفه انه ال بيحبك هيداريك عن عيون الناس كلها ، هيخبيك كانك كنزه الأوحد
هو اوك انا مش كده بالنسبه لنوح ، ومش كنزه وكل الكلام ده برضو
بس طول عمري بستغرب ، بجد والله ، ازاي ممكن مثلا شخص يسيب مراته تلبس ضيق او قصير او مفتوح ،
حقيقي ازاي بجد ، مفيش حاجه اسمها سايبني ع راحتي ، اصل مهو لو بيحبني هيغير عليا ، مش هيخلي حد يبصلي نظره واحده
اوك برضو نوح مش بيغير عليا ، وجايز اكون دماغي تعبانه بسبب ال هقوله ده بس عمري م كنت هتجوز واحد ميحاولش يغير طريقه لبسي
هو باختصار شديد انا مش بحب الراجل الديوث ، ال يسيب مراته تلبس براحتها ، هو ممكن تلبس براحتها عادي ، بس يكون مخبيها
حقيقي عندي اقتناع شديد انه ال بيحبني هيغير عليا من كل حاجه ، غير كده فهو مش بيحبني ، انما عايزني امشي جمبه يفرج الناس عليا
وانا عمري م كنت هقبل بكده
انا عارفه انه عامل كده عشان ميتحاسبش عني ، وميبقاش ديوث ، بس مش مشكله ، معنديش مشكله والله
غير كده هو م اجبرنيش بالعكس ، ده اتكلم معايا بطريقه الطف من اللطف ، مسك ايدي عشان يطمني ، و
وحضني ، حضني بجد ، ضمني لحضنه
مش عارفه اعمل skip للحظه دي ، ومعتقدش اني هعرف اعمل عمري
لحظه محتاجه تتخلد ف التاريخ ، لحظه حلوه جت بعد سؤال غريب
غريبه انه يسالني عايزاه ولا لا ، مين ممكن يكون عندها الجراه وتتسال السؤال ده وتقول ايوه
وحتي لو كنت جريئه بما يكفي مكنتش هوافق ، عشان عارفه انه لسه محبنيش
مينفعش حاجه زي دي تبقي لمجرد الروتين ، لمجرد انه لازم يحصل ، لمجرد اني مراته وده حقي او حقه
ده بيبقي خيط بيربط بين اتنين ، ازاي يبقي خيط مربوط بحُب من طرف واحد بس
هيبقي ضعيف ، هيبقي هايش ، مش هيبقي له معني ولا طعم
ومش عارفه صح ال انا هعمله ده او لا بس انا مش هنام معاه ف نفس الاوضه
بيسالني اتجوزته لي ، مش عارف اني واقعه فيه ، للدرجادي مش واخد باله بس عادي انا وياه ومعاه للاخر
ومن دلوقتي بقا نبدا مشوارنا ف اننا نوقع سي نوح
ومش باللبس العريان والجو ده ، اصل اللبس العريان ميوقعش راجل ، يوقع حيوان ماشي ورا غريزته ، خاصه لو مش بيحب الست دي
انما الراجل ميوقعوش الجو ده ، ونوح راجل
دخلت انام وانا عماله ارتب هعمل اي او هتصرف ازاي ، وف كل دقيقه بفتكر لحظه م مسك ايدي وطمني ، لحظه م حضني لما بكيت ،
وحقيقي حقيقي الفرحه كانت غمراني الليله دي
————————————
من تعب اليوم نمت ، مقدرتش أصحى لصلاه الفجر ع غير العاده ، مش عارف صحيت الساعه كام
بس قومت دخلت الحمام واتوضيت وصليت الفجر والضحي وخرجت برا
خرجت وانا اصلا ناسي اني اتجوزت ، ناسي انه ف حد معايا ف نفس البيت
ناسي لدرجه اني كنت هنادي ع ماما واميره ، او ال ساعدني اكتر اني انسي اني ملقتهاش جمبي ف نفس الاوضه
بس لمحتها وهي بترص الفطار ع السفره ، واول م شفاتني ابتسمت وهي بتتوجهلي
_ صباح الخير
رديت بصوت مغلوش من اثر النوم ، بس ده ممنعهاش انها تبتسم اكتر ، وعنيها تطلع قلوب بدون م تحس
=احم ، صباح النور
اتكلمت وهي مازالت بنفس الواقفه
_ نمت كويس امبارح ؟!
= اه الحمدلله
اتكلمت وهي بتتوجه للمطبخ مره تانيه بعد م مسكت ايدي قعدتني ع السفره
_ طب اتفضل يلا عشان تفطر
حطيت ايدي ع خدي وانا براقبها مستنيها تجيب الفطار ، بس لما لقيتها محتاسه لوحدها ف المطبخ دخلتلها
لقيتها بتلتفتلي بسرعه وبنفس السرعه رجعت وشها للاكل ال ع النار تاني
_ انت اي ال جابك ؟
= هساعدِك
_ لا لا خليك انا هعرف اعمل لوحدي
رديت وانا بمد ايدي جمبها عشان اطفي النار ال هي واقفه قدامها ومش واخده بالها من الأكل ال هيتحرق
= ااه طبعاً ، مهو باين
ردت وهى بتقاوح واحنا مازلنا بنفس الوقفه
_ ع فكره كنت واخده بالي وكنت هطفي لوحدى
رديت عليها بسخريه وانا ببصلها وباخد بالي لاول مره من فرق الطول بحكم انى كنت موطي عشان ابصلها
= اها بدليل انه اتحرق ، كنتي هتستنى لامتى ، لما يولع فينا بقا !!
التفتلي بسرعه وبعنف ، كانى غلطت فيها
واتكلمت بدون م تبصلي ، دماغها يدوب عند صدري
_ ع فكره متحرقش
بصيتلها وانا رافع حاجبي بدون م اتكلم
اتكلمت هي وهي بتتنحنح بخفوت
= احم تمام ، كان هيتحرق
ابتسمت ع كلامها بدون م ارد
وهى كمان مردتش بس رفعتلي راسها وهي خجلانه ، وقبل م استغرب من سبب خجلها لاحظت القرب الشديد ال بينا ، وال يكاد يكون خطوه
وف نفس الثانيه لقيتني بعدت ، كاني كنت خايف ، بس خايف من اي ؟ معرفش ..
شالت الطبق وهي بتتلفت عشان تخرج ، ومازالت ملامحها محتل عليها اللون الأحمر
قعدنا ع الأكل وهي بدأت تاكل وبتبصلي بترقب عشان تشوف ردت فعلي ع الاكل فبدات اكل بهدوء
اتكلمت وانا بحاول اعمل مش فاهم بتبصلي لي
_ اي بتبصيلي كده لي
اتكلمت بتوتر وهي بتبصلي ببراءه
= الاكل طعمه حلو ؟
_ م تدوقي كده وشوفي
= لا لا قول انت معلش
_ اممم ، اول مره تطبخي
= احم ، يعني تقريباً
اتكلمت بمصداقيه فعلاً
_ يبقي حلو
اتكلمت بفرحه وهي بتبصلي بعدم تصديق
= بجد ؟!
_ اها ، بما انك اول مره يعني فهو حلو بس ممكن يتحسن عن كده
ردت بفرحه باينه ع ملامحها وهي بتهزر راسها بسرعه
= حاضر
خلصنا اكل وهي قامت عشان تلم الاطباق وانا قومت عشان اساعدها
دخلت عليها المطبخ بالاطباق ، اخدتهم مني وهي بتحاول تمنعني اعمل حاجه وبتطلب اني اقعد مجبش حاجه تاني
_ انت بتعمل اي ، اقعد
= هساعدك
ردت بطفوله مفرطه وهي بتاخد مني الاطباق ، زي ، زي طفله بتتسابق عشان تعمل حاجه جديده لأول مره
= لا لا خليك انا هعرف اعمل لوحدي
رديت بمشاكسه وانا ببصلها بهدوء
= اها زي البيض كده
بصيتلي بغيظ وهي بترد بطفوله
_ ع فكره متحرقش ، وبعدين هعرف الم الاكل لوحدي
= بس انا فعلاً عايز اساعدك
_ ده لي يعني
= عشان الرسول عليه الصلاة والسلام كان بيساعد زوجاته ، فانا مين بقا عشان مساعدكيش
_ طيب
جبتلها الاطباق ال ع السفره كلهم وهي وقفت تغسلهم ، قبل م ادخلها الاقيها محتاسه ومش عارفه تغسلم ازاي ، او مش عارفه تمسك سلك المواعين اصلا
قبل م الاحظ الصابون ال مبهدل وشها والميه ال غرقت شعرها ، والحقيقه مش عارف اي ال عمل فيها كده
وقبل م احاول امنع نفسي لقيتني بضحك علي شكلها ، بصوت عالي ، ع غير المعتاد وانا عمال بيتردد ف ودني صوتها وهي بترفض اساعدها ع اساس انها بتعرف تعمل لوحدها
التفتتلي بسرعه لما سمعت صوت ضحكتي ، بصتلي باستغراب قبل م تسرح فيها بدون م تتكلم
حاولت امسك نفسي عشان اتكلم انا بدون م اضحك عشان متتضايقش
اتكلمت وانا ماسك بطني من كُتر الضحك
_ انتي اي ال عامل فيكي كده ؟
بصيتلي باستغراب وهي بتبص لهدومها بتفحص
= عامل فيا اي ؟
ضحكت تاني غصب عني وانا بشاور لوشها ال كله صابون
قبل م امسك نفسي واحاول ابطل ضحك لقيتها بتحط ايدها - ال بالمناسبه مليانه صابون - ع وشها
ضحكت تاني بصوت اعلي وانا بسند ع الرخامه ، والحقيقه مش عارف ف اي ، او لي بضحك كده ، بس شكلها مازال طفولي ،
مش حاسسها والله غير طفله دخلت المطبخ تلعب ف الصابون الموجود
بطلت ضحك وانا مازلت مبتسم لما لقيتها بتبصلي وهي بتبتسم بخفوت قبل م الاحظ نظره عنيها ال متوجهالي
مش عارف ف اي ، ومش عارف هقول كده ازاي ، بس نظره عنيها خطفتني ..
نظرتها لي خطفتني ، خلتني افضل مبتسم ليها وانا ساكت
قبل م هي تنزل عنيها وتحاول تمسح وشها باديها ال مازالت كلها صابون
قبل م اتوجه ليها بهدوء واشيل ايديها عشان امسحلها وشها وهي رفعالي راسها
ومازالت بصالي بدون م تتكلم
.......
#يتبع
معتكف ف محراب قلبي
صلِّ على رسول الله 💙
البارت السابع عشر
اتكلمت انا وانا بمسح وشها وببصلها
= انتي صغيره عشان تعملي ف نفسك كده
اتخلت عن صمتها لما اتكلمت وهي بتبصلي بتفحص
_ ضحكتك حلوه اوي
مش عارف مكشرتش ، ابتسمت اكتر وانا بسالها بهدوء
= بجد ؟!
هزيتلها راسها ببراءه وهي بتبصلي ، ضحكتلها قبل م اسيبها وامشي
دخلت اوضه النوم عشان اجيب فوطه ورجعت تاني
دخلت لقيتها واقفه سانده ع الحوض ، مغمضه عنيها وبتتنفس بعنف
اتوجهتلها وانا بوطي عشان اشوفها وانا بسالها بهدوء
_ انتي كويسه ؟
هزت راسها بدون م تبصلي ومازالت ع نفس حالتها
قبل م ارفع انا راسها عشان انشف راسها عشان متاخدش برد
وللمره ال مش عارف عددها معرفش عملت كده ليه ، او اي ال خلاني اهتم ، بس حسيتها مش كانها طفله لا ، كانها بنتي والله
وللحظه اول م استوعبت الاحساس ده كنت بعدت عنها وخرجت
فضلت واقفه مكانها شويه بصالي بدون م تتحرك ، وانا خرجت قعدت ف الصاله شويه بحاول ألهي نفسي ف اي حاجه
نص ساعه ولما لقيتها لسه مخرجتش من المطبخ دخلتلها
دخلت لقيتها ف نفس الحوسه ال هي فيها ، رفعت كم التيشرت ال انا لابسه واخدت مريله للمطبخ وانا بتوجه ليها عشان اعمل مكانها
لما اخدت بالها من ال انا هعمله بصيتلي وهي بتتكلم
_ انت هتعمل اي ؟
= هغسل المواعين
_ لا انا هعملهم لوحدي
= حوراء انتي بقالك ساعه ف طبقين
اتكلمت بزعل بدون م تبصلي وهي بتحاول تغسلهم
_ عادي بنضفهم اووي يعني
= بتنضفيهم اووي يعني وهما اصلا مكانهم جبنه ومربي وحجات من دي
التفتتلي بعنف وهي بتبصلي بغيظ
اتكلمت بدون م صوتها يعلي
= انت عايز اي يعني ي نوح ؟
_ انا عايزك توعي مكانك كده عشان اغسلهم وانزل لماما
= هنزل معاك
رديت بمسايسه وانا باخد منها السلك عشان أبدأ
_ حاضر ، ممكن توعي بقا
= طب هساعدك
_ خلاص ماشي ، بصي انا هغسل وانتي نشفيهم ماشي ؟
ردت بفرحه وهي بتهز راسها
= ماشي
غسلتهم ف اقل من ربع ساعه وهي ورايا بتحاول تنشف بسرعه عشان ميتراكمش عليها
خلصنا ونشفت ايدي وقبل م نخرج من المطبخ سالتها
_هو انتي صليتي
بصيتلي باستغراب وهي بتدور بعنيها ف المكان بتوتر
= ل..لا الضهر لسه ماذنش
_ بس انا مش بتكلم ع الظهر
= اومال اصلي اي دلوقتي ؟!
_ الفجر ، الضحي
اتكلمت وهي بتحاول تبرر وتبصلي بنفس التوتر
= مانا الفجر كنت نايمه مصلتوش والضحي نسيت
رديت بهدوء عشان مكرهاش ف النصيحه او انها تاخد نصيحه مني
_ ولما صحيتي مصلتيهوش لي ؟ وبعدين مفيش حاجه اسمها نسيت ، ماشي ؟
= م..ماشي
_ بس كون انك هتصليه دلوقتي ميخلكيش تنامي وتقولي لما اصحي هصليه ، لا طبعاً ، ده ف حاله انه راح عليكي وده تحاولي تخليه ميحصلش خلاص
= ح..حاضر
اتكلمت تاني عشان اوضح معظم الحجات ال موضحتهاش امبارح
_ بصي يحوراء انا مش هسالك ع اي حاجه ف البيت لا اكل ولا طبيخ ، انا هسالك عن الصلاه ولبسك ، وده لحد م تتعودي ، بعد كده انتي ست بيت
محتاجه حد يساعدك معنديش مشاكل ، بس انا احب مراتي تبقي مسؤله عن كل حاجه ف البيت
اتكلمت وهي بتبصلي بأمل ، والحقيقه اني فاهم سبب النظره وسبب السؤال
= يعني انت متعبرني مراتك ؟
رديت ببرود وانا بتكلم طبيعي ع اساس انه سؤال عادي
_ لو مش معتبرك كده مكنتش فضلت معاكي ف نفس المكان ، مكنتش ساعدتك دلوقتي ، مكنتش فضلت انصحك ، تمام ؟
_ تمام
= يلا اتفضلي بعد اذنك صلي
قبل م تمشي رجعت تاني وهي بتتكلم بطلب
_ طب متنزلش لماما وتسيبني
= ماشي يلا
سابتني ودخلت الحمام اتوضت وخرجت ، لبست الاسدال ال كانت لبساه امبارح فوق البجامه وفرشت السجاده وبدات تصلي
وانا فضلت متابعها وهي بتصلي بدون م تاخد بالها ، عشان لو ف مشكله اقدر اصلحها معاها
وده ال حصل فعلا، بس قولت هتكلم معاها لما اطلع انا وهي من عند ماما
خلصت صلاه ولقيتها بتقلع الاسدال فسالتها وانا ببصلها باستغراب
_ انتي بتعملي اي
= هقلع الاسدال عشان ننزل لماما
_ ع اساس ان ماما دي ف الاوضه ال جمبنا ولا ايه مش فاهم
= يعني اي يعني برضو
_ هو انتي نسيتي انك المفروض اتحجبتي يبنتي
= منستش بس دي ف الدور ال تحتنا
_ وانتي محطتيش احتمال اننا ممكن نقابل حد قدام بابا الشقه ، ع السلم ، ف الاسانسير ، كل ده اي حضرتك
= م..مجاش ف بالي
_ طب ابقي خلي بالك بعد كده لو سمحتي
هزت راسها ولبست الاسدال تاني وفتحنا عشان ننزل تحت ، وبما انه دور واحد نزلنا ع السلم
وقفنا قدام الباب ورنيت الجرس فلقيتها بتبصلي باستغراب وهي بترفعلي راسها قبل م اخد بالي انها عايزه تقولي حاجه فنزلتلها انا
اتكلمت بهمس وهي بتبص بتوتر كانها هتفجر المكان مش هتدخله بس
_ مش انت معاك مفتاح ؟
سايرتها ف طريقه كلامها وانا بتكلم انا كمان بهمس
= اها
_ طب م تفتح
= مينفعش
_ لي
قبل م ارد عليها بنفس الهمس لقينا اميره بتفتح الباب وهي بتاخد جمب عشان ندخل
فوطيت عليها وانا بتكلم بهمس بعد م عدلت نفسها بشكل مضحك ع اساس تبقي هيبه وكده
_ اما نطلع هبقي اقولك
هزيتلي راسها بعد م سلمت ع اميره وهي بتدخل واميره ردت عليها ببرود
قبل م تتعلق ف رقبتي وهي بتحضني وتسلم عليا
هي دخلت جوا ، قعدت ع الركنه واستنت اننا ندخل ، دخلت قعدت ع الركنه جمبها واميره سابتنا ودخلت المطبخ
شويه ولقيتها خارجه باكل بتتوجه بيه للسفره
فسالتها وانا ببصلها باستغراب
_ انتي بتعملي اي ي اميره
= بحطلك عشان تفطر
_ لا لا حوراء عملت فطار وفطرنا
قبل م الاحظ حوراء وهي بتبتسم لقيت اميره بترد بسخريه وهي بتبصلها بامتعاض
_ هي بتعرف تحضر فطار
قبل م ارد انا عليها لقيت حوراء بترد عليها بهدوء وهي بتبصلها ببرود
= شوفتي المفاجأه !!
قبل م اميره ترد او انا احاول ارد عشان اسكتهم لقيتها هي بتبصلي وهي بتتكلم
_ هي فين ماما ، انا عايزه اشوفها
= قومي تعالي ندخلها
دخلنا اوضه ماما لقيناها لسه نايمه ، حوراء سابتني وهي بتجري عليها عشان تصحيها هي وهي بتضحك
زي ..زي طفله صحيت وحبت تصحي مامتها عشان تلعب معاها لما زهقت من اللعب لوحدها
ماما صحيت وهي بتضحكلها ، سلمت عليها وسالتها عامله اي وبعدين اتكلمت معاها عشان تشيل اي حواجز موجوده
_ قومي اسنديني عشان ادخل الحمام يرورو
= حاضر يماما ، يلا
قامو خرجو وانا قعدت افكر اني مكنتش اتخيل ان العلاقه بينهم تبقي بالشكل كده ، ماما محتضناها وهي ف امس الحاجه لده
خرجو من الحماام ال ف نفس الاوضه بعد م ماما اتوضت وقعدت عشان تصلي وهي فضلت تبصلها وهي مبتسمه
خلصت صلاه وبعدين سبحت وحوراء قامت سندتها لما قعدتها ع السرير تاني
ماما بتعرف تتحرك لوحدها ، بتمشي عادي بس هي عايزه تقرب حوراء منها اكتر ، عايزه تحسسها انه مفيش بينها وبين اميره فرق
قعدنا احنا التلاته ف الاوضه معاها وحوراء قعدت جمبها ، مسكت ايديها وبدات تتكلم معاها قدامي
_ الواد نوح عامل معاكي ااى ؟
ردت بابتسامه هاديه بدون م تبصلي
= الحمدلله
اتكلمت ماما تاني وهي بتبصلنا احنا الاتنين باستغراب
_ الا اي حكايه الاسدال دي ؟
ردت هي وهي بتبصلها بفرحه طفوليه وعماله تبص للاسدال ، كانت فخوره ، كانها عملت انجاز لوحدها وبتحكيه لمامتها
= مانا لبست الحجاب
ماما فهمتها ، ف اتكلمت معاها بفرحه وهي بتبصلها بفخر كانت محتاجه تحسه
= بجد ؟!
هزتلها رأسها بسرعه وهي بتبصلها ببراءه وبتضحك
ف ماما اتكلمت تاني وهي بتملس ع طرحه الاسدال
_ محلي شكلك اكتر مانتي حلوه
اتكلمت هي بعدم تصديق وهي بتبصلها بنفس البراءه
= بجد يماما ؟!
_ بجد يروح ماما
ضحكت اكتر وهي بتبصلي بفرحه ، ف ابتسمت لفرحتها وبعدين سكتنا
شويه وماما اتكلمت وهي بتطبطب ع كتفها وتكلمها بس بتبصلي انا
_ قومي ي رورو روحي ساعدي اميره ف المطبخ عشان نتغدي سوا
بصتلي بخضه وانا بلاحظ الرفض ف عنيها ، بس مقدرتش اقولها تقعد ، انا فاهم ان ماما عايزاني لوحدنا
اتكلمت وانا ببصلها بعد م لاحظت انها خلاص هتعيط ، هو انا اوك مش بحبها ، بس مش معني كده اني اعاملها وحش او اجبرها ع حاجه ، انا ف الاول ولا ف الاخر هتسال عنها ، وده حقها عليا ، كفايه ان قلبي مش معاها
= خلاص متروحيش ليها ، قومي اقعدي قدام الشاشه برا ، ولو عايزه تطلعي فوق وانا وقت الغدا اجيلك وننزل مفيش مشكله ، متزعليش نفسك
_ خلاص انا هقعد قدام الشاشه برا
= ماشي ال يريحك
خرجت بعد م باست دماغ ماما وبعدين ماما بصتلي كانها هتخترق اعماقي ، للحظه حاولت اثبت نفسي
اتكلمت وهي مازالت بتبصلي
_ ها اي الأخبار
رديت بخجل وانا بخبي وشي منها
= احم ، محصلش حاجه
_ عارفه انه محصلش حاجه ، ولو كان حصل حاجه كنت هشك انك تربيتي
= احم ، انا سألتها وهي قالت انه مش حابه يحصل حاجه
بصتلي بطريقه غريبه بدون م ترد ، ومرتسم ع وشها ابتسامه اغرب قبل م تتكلم بهمس سمعته
_ مش سهله حوراء
قعدنا نتكلم شويه وبعدين خرجنا من الاوضه عشان نطلع الركنه نقعد معاها عشان متقعدش لوحدها
ماما خرجت وانا خرجت وراها ، قعدنا وشويه مظهرتش خالص
فكرتها ف المطبخ مع اميره بس اميره خرجت وهي مش موجوده
قبل م اسال انا لقيت ماما كلمت اميره وهي بتسالها
_ اومال فين حوراء ي اميره ؟!
ردت بامتعاض بقا دايم كل م سيره حورا تيجي
= معرفش ي ماما ، لقيتها مره واحده خرجت من الباب الشقه بسرعه معرفش لي
استنتجت انها طلعت الشقه من الملل ففضلت مكاني قبل ماما تتكلم وهي بتوجهلي الكلام
_ قوم شوف مراتك ي بني
معرفش لي حسيت انه فيه حاجه فقومت فعلاً بدون م اجادل عشان اشوف السبب ال خلاها تطلع وهي مش معاها مفتاح اصلا
...............
#يتبع
#Mai_Sayed
#معتكف_ف_محراب_قلبي
استغفروا الله لعلها تصادف ساعة استجابه..💙
معتكف ف محراب قلبي
صلِّ علي رسول الله 💚
البارت الثامن عشر
مستنتش الاسانسير ، وده مش عشان دور واحد وكده ، انما عشان كنت حاسس انه فيه حاجه ، والغريب انه احساسي مبيخيبش
وده ال حصل المرادي فعلاً ، لقيتها واقفه قدام الشقه مش قادره تاخد نفسها وتكاد تكون دايخه
جريت عليها وانا بلحقها قبل م تقع
اتكلمت بخضه وانا بسندها بسرعه
_ ف اي ، مالك
مقدرتش ترد ، ولا تعمل حاجه ، غير انها تسند جسمها عليا ،
طلعت المفتاح من جيب البنطلون وانا بفتح بسرعه عشان ادخلها
دخلتها ، قعدتها ع اول كرسي جه قدامي ، بدأت افكلها طرحه الاسدال عشان لو مخنوقه
كل ده وانا مش فاهم ف اي ، او مالها
لاحظت انها بتشاور ع حاجه ، قبل م تبدا تتكلم ببطء وتعب
_ عايزه الحقنه
اتكلمت باستغراب وانا ناسي مرضها
= حقنه اي ؟!
_ الانسولين
ضربت بايدي ع دماغي وانا مش مستوعب ازاي مجاش ف دماغي انه ده بسبب تعبها
جريت ع اوضه النوم ، بحكم انه ف لحظه ما معرفش سببها لقيت نفسي بشتري منها عدد مش قليل احتياطي
جبت منها الحقنه ، عبيتها ورفعتلها كم الاسدال واديتهالها
بعدين شيلتها واتوجهت بيها لكنبه الركنه عشان ترتاح ، شويه وبدات تتحسن الحمدلله
اتعدلت شويه ، وقبل م اتكلم معاها لقيت انها بتعيط ودموعها بتنزل
قربت عليها اكتر مانا مقرب وبدات اتكلم معاها بالراحه وبهدوء
_ بتعيطي لي ؟
مردتش بس خبت وشها بايديها وهي بتضم لرجلها لصدرها وتحط راسها بينهم
انا اسف اني هقول كده بس للمره ال متتعدش لقيتني بتصرف بدون وعي وباخدها ف حضني وانا بطبطب عليها بدون م نتكلم
هي مخدتش اي رياكشن ، ف الاول حسيتها اتخشبت من رده فعلي بس بعدين بقا عادي
وشويه هديت ، رفعت راسها ومسحت عنيها وهي بتخبي وشها مني وبتبعد
سبتها براحتها وانا بسالها تاني بنفس الهدوء
_ ف اي ، بتعيطي لي ؟
اتكلمت وهي بتحاول متعيطش تاني
= عشان تعبت قدامك
_ طب واي المشكله ؟!
= مبحبش اتعب قدام حد
_ لي ؟
= عشان مبحبش اصعب ع حد ، مبحبش اشوف انه فيه حد شفقان عليا
قالت كده ورجعت بكت تاني وهي بتحط ايدها ع وشها
سبتها براحتها وبدات اتكلم انا
_ بس انتي مصعبتيش عليا
شالت ايديها وبدات تبصلي باستغراب وعدم تصديق بدون م تتكلم
فبدات انا اكمل كلامي وانا ببصلها
_ اها والله مصعبتيش عليا ، هتصعبي عليا لى ، انتى ربنا حب يخفف عنك ذنوبك فابتلاكي بمرض ، والحمدلله مش مرض ملوش علاج او حاجه ،
ثم انا مش بيصعب عليا بجد غير الشخص ال ناسي ربنا وشايله من حساباته
اتكلمت باستغراب وهى بتبصلي بعد فهم
= يعني اى يخفف عنى ذنوبي فابتلاني
_ الرسول عليه الصلاة والسلام قال " ما يصيب الانسان من نصب ولا وصب ولا هم ولا حزن ولا اذي ولا غم حتى الشوكه يشاكها الا كفر الله بها عن خطاياه "
يعني عارفه حتى شكه الدبوس دى بتكفر عن ذنبك ، فمبالك بالمرض ، كله تكفير وتطهير لذنوبنا
اتكلمت وهى باصه قدامها بشرود
_ الحمدلله
اتكلمت وانا بحاول افهم منها سبب ال حصل
= اي ال تعبك دلوقتي بقا
ردت بخجل وهى بتبعد بعنيها عنى
_ احم ، عشان اكلت مربي الصبح
بدات اتكلم بهزار عشان تفك من العياط ال عيطته
= امممم ، والست هانم بتاكل مربي لى وهي عارفه انها هتتعب
بصتلي ببراءه وعنيها مازال فيها اثر البكا
_ كان نفسي فيها ، وبابا مش بيسبني اكلها
اتكلمت بمرح وانا ببصلها بغصب مصطنع
= اها فضحكتي عليا انا واكلتيها
شوحت بايديها وهى بتنفي كلامي
_ والله لا ، بس..بس كان نفسي فيها فاكلتها
انا اسف تاني بس طفولتها خطر وكده مينفعش
اتكلمت المرادى بحزم وانا ببصلها بهدوء
= متتكررش تانى ، ولما يبقي نفسك ف حاجه عرفيني وانا هتصرف ، ماشي ؟
_ ماشي
سكتنا شويه وهى كل فتره يطلع منها شهقه زى بتاع الاطفال ال لسه مخلصين عياط
اتكلمت وانا بحاول افكها شويه
_ يلا ننزل تحت ؟!
= احم ، يلا
قامت عدلت هدومها ولبست الاسدال، دخلت غسلت وشها وخرجت واتوجهنا عشان ننزل تحت لماما
ونفس ال عملناه اول مره عملناه تاني مره ، لحد م ماما هي ال جت فتحتلنا
شدت حوراء وهي بتبصلها بتفحص بعد م لاحظت اثر البكا عليها
اتكلمت وهي بتبصلها وحوراء بتحاول تخبي وشها
_ انتي معيطه لى ؟ اى ال حصل
بعدين بصتلي بعنف كانها هتاكلني
_ انت عملتلها اى
رجعت خطوه لورا بخضه وانا بدافع عن نفسي زى ال خايف من تهمه
= معملتلهاش حاجه والله ي ماما
رجعت اتكلمت بحنيه مع حوراء ، كانها مش نفس الشخص ال كان هيموتنى من ثواني
_ اومال عيطتي لى يحبيبتي
رديت انا بعد م حوراء بصتلي وهى مش عارفه تتصرف
= مفيش يماما ، باباها وحشها فعشان كده طلعت كلمته وعيطت
اتكلمت وهي بتاخدها ف حضنها وتقعدها جمبها
_ معلش يحبيبتي متزعليش نفسك ، وبعدين مانا جمبك اهو ، ووقت م تحبي تروحيله روحي ف اى وقت ، انشالله لو ف نص الليل حتى ، نوح يوديكي
ببص لحوراء لقيتها خبت وشها ف حضن ماما وهي بتتمسك بيه اكتر ،
قبل م المح اميره وهي واقفه ف المطبخ بتبصلها ببرود
ماما فضلت واخداها ف حضنه وهي شويه وهديت ، خرجت من حضنها وقعدت وماما قامت تعمل ف الأكل مع اميره وسابونا لوحدنا
وهي جابت ريموت الشاشه وقلبت فيها لحد م رسيت ع قنوات الكرتون ،
مش هستغرب ، مش هستغرب والله
هي بتكمل الصوره ال ليها ف دماغي ، طفله ..
فضلت تقلب فيهم لحد م وصلت لفيلم ، اول م شافته لقيت الفرحه ظهرت ف عنيها وهي بتتعدله عشان تركز فيه اكتر
بعد م اتخلت عن طرحتها والاسدال ، وفضلت بالبيجامه ال اول مره اخد بالي منها
وال بالمناسبه عليها نفس الكرتون ال بتسمعه ، وال كان عباره عن ارنوبه بتحلم انها تبقي ظابطه ف بلد الحيوانات ال فيها بتتعايش مع بعضها عادي
مفيش فريسه ومفترس وكل الكلام ده
وطبعا الكلام ده انا معرفتوش عشان مركز ف الفيلم ، تؤتؤ انما عشان هي كانت بتشرحولي بدون م اطلب ده
فضلت تسمع فيه وهي عماله تحب ف ثعلب موجود ف الفيلم ، مش فاهم انا اتجوزت مين بجد والله
سمعته وبعدين الظهر اذن ، صلينا مع بعض وبعدين اتغدينا
بعد م خلصنا لقيتها بتميل عليا عشان تتكلم بهمس وعنيها تكاد تكون قفلت
_ انا عايزه انام
ررديت عليها بنفس همسها عشان محدش يسمع
= طب م تنامي هنا
_ لا انا مش عايزه انام هنا عشان اميرة ، انا عايزه اطلع فوق
= طيب اطلعي
اتكلمت وهي بتبصلي برجاء اني مرفضش
_ تعالي معايا
= خدي المفتاح واطلعي ، اي المشكله
_ مانا هخاف اقعد ف الشقه لوحدي
= وانا اكيد مش هفضل ع طول قاعد معاكي ، اتفضلي عشان تتعودي ، ده غير اني اصلا ممكن اخرج
بصتلي وهي زعلانه وسكتت ، وانا الحقيقه محاولتش اصلح حاجه ، سبتها وفضلت اتكلم مع ماما واميره
شويه ولقيتها بترجع راسها لورا وهي مغمضه عنيها وتكاد تكون نامت ، برضو سبتها ومحاولتش اعمل حاجه
قبل م ماما تاخد بالها وتتكلم بحنيه مُفرطه
_ يروحي مراتك نامت
بصتلها بدون م ارد فكملت كلام وهي بتبصلي بعنف ، مش فاهم لي يعني
= قوم طلعها شقتكو ، او دخلها اوضتك عشان رقبتها متوجعهاش
قومت بكسل دخلتها الاوضه ، الحقيقه كسلت اطلع فوق وانا شايلها ، اما تبقي تصحي تبقي تطلع لوحدها
شويه وصحيت لوحدها ، فاقت وطلعنا الشقه فوق ،
باليل باباها كلمها يطمن عليها وفضل يوصيني عليها لحد م هي اتكلمت واحنا قاعدين قدام التلفزيون قدام كرتون بتسمعه هي
_ هو احنا هنسافر امتي
= ف اقل من اسبوع
_ طب مش هتحجز التذاكر
= هنزل بكره احجزهم ، ابقي سبيلي الباسبور بتاعك
_طب هو احنا مش هننزل الشغل
= لا مش دلوقتي
_ اومال امتي
= هو الكلام اصلا ع مين ، عليا ولا عليكي
ردت وهي بتبصلي بترقب
_ علينا احنا الاثنين
= حته شغلك دي هنتناقش فيها بعدين ، انما انا مش هنزل الشغل دلوقتي ، اما نرجع من السفر ان شآء الله
اتكلمت برفض لكلامي بعد م ولت انتباهها ليا
_ لحظه يعني اي نتناقش فيها دي اصلا ، هو الموضوع ده فيه نقاش اساسا
رديت بنفاذ صبر بعد م بصيت قدامي
= اها فيه نقاش ، وقولت مش دلوقتي
سابتني ودخلت اوضه الاطفال بدون م ترد عليا وانا بصراحه مناقشتش تاني ، خليها براحتها
شويه وقومت نمت بعد م صليت القيام وقرات قران
صحيت ع صلاة الفجر ، فوقت واتوضيت واستعديت عشان انزل اصلي ف المسجد بما اني امام المسجد القريب مننا
وقبل م نزل دخلت الاوضه عشان اصحيها ، دخلت لقيتها نايمه بطريقه غريبه ، بس بالنسبالي مبقتش غريبه بصراحه
تصرفاتها وحركاتها وكلامها وشكلها زي الاطفال ، فمجاش بقا ع طريقه نومها لما تبقي زي الاطفال هي كمان
نايمه كل حته فيها ف حته ، رجليها كل رجل ف مكان ، وكذلك ايديها ودماغها ف مكان تاني بعيد عنهم خالص
تغاضيت عن شكلها ده وانا بتوجه جمب السرير عشان اصحيها بالراحه
ناديت عليها مردتش ، فهزيت فيها لحد م قررت اخيرا انها ترد
_ يبابا سبني انام كمان شويه والنبي
بابا!! بابا مين ؟
زهقت فاتكلمت بنفاذ صبر وانا بهز كتفها بعنف
= حورااء ، قومي بقا انا زهقت
اتفزعت فبصتلي وهي بتتعدل ع السرير وبتبعد شعرها عن عنيها
اتكلمت ببرود نتيجه اخر كلامنا امبارح
_ ف اي ، بتصحيني لي
رديت بنفس برودها وانا ببصلها بلا مبالاه
= قومي عشان تصلي الفجر
ردت بنفس المبالاه وهي بتبصلي بطرف عينها وبتتعدل عشان تكمل نوم
_ اما اصحي هبقي اصلي
محتملتش اني احايلها ببرودها ده فزعقت بصوت عالي وانا ببصلها بغضب
= حوراااء ، قولت قومي
خافت ، فلقيتها نطت من ع السرير بسرعه وهي بتبصلي وع وشك انها تعيط ، فطشنتها وانا بتوجه لباب الاوضه عشان اخرج وانزل اصلي ف المسجد
وانا نازل عديت ع ماما واتاكدت انهم صحيو واتوجهت للمسجد عشان أأذن وأصلي بالناس ، وال الحمدلله بيبقو عددهم كبير
صليت وخلصت وانا راجع قرات الاذكار لحد م وصلت البيت
طلعت الشقه لقيتها قافله باب الأوضة ع الرغم من النور قايد ، طنشت برضو دخلت الاوضه عشان انام عشان الحق مشاوير بكره
نمت وصحيت ع المنبه ال كنت ظابطه ، دخلت الحمام وطلعت لبست هدومي عشان الحق اخلص ال ورايا
خرجت من الاوضه لقيت الفطار محطوط ع السفره بس هي مش موجوده ، وقبل م اتحرك لمحت خيالها هو ال بيتحرك من تحت الباب
اوك زعلانه ، بس انا بصراحه مش هحايل ، كفايه محايله امبارح ، وال مش عارف افسرها حتي مع نفسي لحد دلوقتي
وال يزعل لوحده يصالح نفسه برضو لوحده
طنشت الاكل وانا بدخل المطبخ عشان اعملي قهوه قبل م اخرج
عملت القهوه وقبل م اخرج لقيتها واقفه ع الباب وهي بتبصلي برجاء
_ هو انت مش هتفطر
رديت ببرود وانا بتحاشي النظر ليها وبخرج من المطبخ
= لا
_ لي ؟
= كده ، وهاتي الباسبور بتاعك يلا عشان امشي
_ طب حتي كُل ساندوتش واحد ، انت هتتاخر برا وك...
زعقت وانا بقاطعها قبل م تكمل
= قولت لا ، ويلا هاتي الباسبور
بصتلي فبصتلها ، قبل م تسيبني وتمشي كنت لمحت دموعها ال اتكونت ف عنيها ، وال حاولت تخفيهم وهي بتمشي بسرعه
جابتهولي وجت ، كنت خلصت القهوه ورجعت المج المطبخ كمان
خدته منها بدون م ابصلها وسبتها عشان اخرج
............
#يتبع
معتكف ف محراب قلبي
صلِّ علي رسول الله 💜
البارت التاسع عشر
لي كده ، لي كده بجد ، لي يعشمني بحنيته وبعدين يرجع لبروده تاني ، يمكن كان يوم واحد بس انا اتعودت ع حنيته دي
ده غير اني معملتش حاجه ، انا ملحقتش اعمل حاجه ، انا لسه بتكلم معاه عادي مش فاهمه لي قفش
او مش هو ال قفش ، اوك انا ال قفشت ، بس فيها اي لما يصالحني ، فيها اي لما يحاول يرضيني
وكنت هتراضي ، والله مجرد م كان يحاول بس كنت هتراضي ، لي يرجع للاسلوب ده تاني
ده اليوم ال كان كويس فيه معايا وبيتعامل بهدوء حسيت اني مش عايزاهم ينتهو
ثم منين كان بيحضني عشان تعبت ، ويحاول يهديني ، ومنين بيتعامل كده بدون سبب وبدون مبرر
واي علاقه انه عملت الفطار ومرضاش ياكل بال هو عمله ده ، مكنش ليه اي لازمه ال حصل منه ده
ده مهانش عليا ينزل من غير فطار ، وفضلت من بعد م صليت صاحيه عشان لو نمت مش هعرف اصحي تاني
والفكره انه عدي يومين ع نفس المنوال ، مفيش بينا كلام ، وال حصل يوميها هو ال بيحصل كل يوم
المفروض انه النهارده رابع يوم ع جوازنا ، ومفيش بينا كلام ! هل ده طبيعي
طبيعي انه منتكلمش ، طبيعي اني كل يوم اعمل الفطار كل يوم قبل م يمشي وبرضو ميكلمنيش ، طبيعي اني اجي ع نفسي واصحي بدري وهو ميقدرش
يبقي ده جزاتي ؟ يكلمني بالشكل ده ، اهون عليه يسبني معيطه كل يوم كده
انا عارفه اني اتعشمت فيه زياده بس مهو من معاملته وهزاره ، مهو ال من معاملته فهمني اننا هنبقي كده
او انا ال فهمت لوحدي ، هو مش غلطان فعلاً انا ال عشمت نفسي
كفايه كده ي حوراء فوقي لنفسك
خلصت كلام مع نفسي بعد م خلصت عياط وانا بلم الاكل من ع السفره كالعاده وادخله التلاجه بدون م اكل
خلصت ال بعمله ونضفت الشقه ع السريع ودخلت نمت وانا بحاول مفكرش ف حاجه عشان معيطش تاني
معرفش نمت قد اي بس صحيت ع الجرس ع عمال يرن باستمرار بدون م يفصل
قومت وانا بحاول افوق عشان اشوف مين ع الباب ، وقبل م اتوجه افتح الباب افتكرت شعري والبجامه ال لبساهم
دخلت لبست اسدال وغسلت وشي عشان افتح الباب لل مشالش ايده من ع الجرس ، وال استبعدت انها تكون ماما صفاء من الطريقه
فتحت الباب عشان اتفاجيء باكتر اتنين استوعبت انهم يجو او اني اشوفهم تاني ، مها ومصطفي
فتحت الباب وانا ببصلهم بصدمه لجمتني عن الكلام
ف اتكلمت مها وهي بتبصلي بسماجه
_ ههه اي ي حوراء ، مش هتدخلينا ولا ايه
حاولت استجمع شتات نفسي وانا بوسعلهم عشان يدخلو
= لا لا اتفضلو
اتكلمت بعد م دخلت وهي عماله تبص حواليها بتفحص
_ شكراً ي حبيبتي
قعدتهم ف الصالون وانا لحد دلوقتي مش مستوعبه سبب وجودهم هنا دلوقتي ، خاصه بعد اخر مره اتكلمنا فيها
اتكلمت وانا بحاول ابتسم كترحيب بيهم
_ هو انتي عرفتو العنوان منين
رد مصطفي وهي بيبتسم ببرود
= من باباكي ، كلمناه ان احنا عايزين نزورك وهو ال يباركله ادانا العنوان
هزيت راسي بشرود وانا بدعي لبابا ف سري ، كان لازم يعني يقولهم ع عنوان البيت
فوقني من شرودي مصطفي ال اتكلم وهي بيبصلي بطريقة غريبه
_ الا اي ال انتي لابساه ده ي حوراء
رديت وانا بحاول اقوي نفسي واشجعها
= باين يعني انه اسدال
اتكلم تاني وهي بيبصلي بسخريه
_ هو من ناحية باين فهو باين ، انما اي علاقته بيكي يعني مش فاهم
= هو اي ال اي علاقته بيكي ، اسدال معناه اني لبست طرحه ، فين الغريب
قبل م اخلص كلامي لقيتهم بيبصو لبعض ويضحكو ، قبل م يمسكو نفسهم ومها تبصلي وهي بتتكلم
_ هو لحق يفرض سيطرته عليكي ؟
= هو مين ده ؟
رد مصطفي المرادي وهي بيتناوبو عليا
_ هيكون مين يعني ، نوح
رديت انا وانا بحاول ادافع عنه
= لا هو مفرضش سيطرته ولا حاجه ، انا ال كنت حابه ده
خلصت كلام وبصتلهم لقيتهم بيبصلو بسخريه بدون م يردو
قطعت انا النظرات دي وانا بقف وبكلمهم بهدوء
_ تشربو اي ؟
ردت مها وهي بتبصلي باستغراب
= هو انتي ال هتقدميلنا العصير ولا ايه
رديت وانا بحاول اتمالك اعصابي
_ اها ، اومال مين
= اي ده ، هو انتي معندكيش شغاله ولا ايه ؟
_ لا ، نوح مش حابب كده ، وبعدين دي مش مشكله
اتكلمت تاني وهي بتبصلي بخبث
= اها مهو أكيد مش عايز شغاله بعد م اتجوزك
رديت بعنف وانا ببصلها بغضب بعد كلامها ال بدأ يزيد عن حده
_ انتي قصدك اي ؟
اتكلمت بخبث اشد وهي بتحاول تهديني
= مقصديش حاجه انتي فهمتي اي بس
اتكلم مصطفي وهي بيبصلها بنفس طريقتها ويحاول يهدي الموقف بينا
_ اهدي ي حور هي اكيد متقصدش حاجه
اتغاضيت عن الاسم ال قاله وانا بسيبهم وبتوجه للمطبخ عشان اجبلهم حاجه يشربوها
الزياره الحقيقه مكنتش ف وقتها خالص ، انا مضغوطه بسبب ال حصل بيني وبين نوح ، مش حمل ضغط تاني منهم ،
مش حمل تعليقهم ع كل حاجه هيشوفوها مني ، مش حمل كلامهم ليا وانا لوحدي
يمكن ده اكتر وقت كنت محتاجه نوح يبقي جمبي فيه ، مش عارفه يبقي جمبي لي بس كنت محتاجه اتطمن ،
يمكن مش طبعي بس انا..انا خايفه وسطهم
محتجاه يلحقني زى م لحقني يوم م تعبت ، ينجدني ف الكلام زى م حصل مع مامته
لاحظت اني دمعت ، وعنيا بدأت تبكي ، ف حاولت استجمع شتات نفسي واهدي لحد م يمشو
اخدت العصير وخرجتلهم بيه وانا بحاول ابقي تمام
مصطفي اول م شافني خرج وهو بياخد منى العصير عشان ايده تلمس ايدي بالقصد منه
_ هاتي عنك
خده منى وانا سبتهوله وانا بتغاضي عن حركته ،
#يتبع
مُعتكف ف محراب قلبي
صلِ ع رسول الله ❤
البارت العشرين
مركزتش مع حركته ، مش عشان فرحانه بيها ، انما عشان دي مكنتش حاجه غريبه بالنسبالي ، يعني عادي
مهو اصل غصب عني ،مش من يوم وليله هتعود ع الوضع الجديد واني اخد بالي من كل حركه بعملها
اخد العصير وانا فضلت ساكته مستنيه الزياره السخيفه دي تخلص
لحد م مها قررت تقطع الصمت ، وتزود جرعة قلة الذوق واتكلمت
_ اومال نوح فين ي حوراء ؟
هو بغض النظر عن اني مش فاهمه سبب السؤال بس رديت وانا مازلت بحاول اتعامل عادي
= هو اسمه نوح عادي كده؟
_ احم ، قصدي بشمهندس نوح
= بشمهندس نوح مش هنا
كملت كلام وهى بترد بتبجح
_ اومال فين؟
= هو انتى جيالي انا ولا جايه لنوح ؟
رد مصطفي وهو بيحاول يداري ع طريقتها
_ هي مش قصدها يعني يحور ، هي بتسال عادي
= عامة هو مش هنا
اتكلمت وهى بتحاول تعمل نفسها متفاجئه
_ اى ده هو لحق يزهق بسرعه كده؟
رديت بصدمه من قله ذوقها اللامتناهيه
= اانتي قصدك اي مش فاهمه
اتكلمت وهى بتبصلي بمسكنه مصطنعه وبتحاول تقنعني
_ مقصديش حاجه انتي فهمتي اي بس ؟ بس اي يعني ال يخليه ينزل ف اول اسبوع من جوازه
رد مصطفي وهي بيبصلها بنفس طريقتها ، عشان يشقطوني لبعض
= مهو اكيد مش هيفضل قاعد جمبها يعني ي مها ، هما مش واخدين بعض عن حب يعني
طب اعيط ، بجد والله اعيط ، يعني انا اصلا نفسي اعيط ، انا اصلا نفسي اعيط من كل ال بيحصل بس مفيش فرصه ، مفيش فرصه احسن من دي
وللاسف الكلام مخلصش ع كده ، لكن مها قررت تكمل كلامها السخيف
_ ع فكره ي حوراء البتاعه ال انتي لابساها دي شكلها وحش بجد
مش لايقه عليكي كده ، مخلياكي قد جدتي
كمل مصطفي ع كلامها وهي بيبصلي بجرءه
= عندك حق والله ي مها ، ده انتي شعرك شكلو حلو حتي
مقدرتش احترم انهم ضيوف اكتر من كده
هو اوك كلامهم وجعني ، بس انا بقا مبعفرش اسكت ، هنعيط وكل حاجه بس بعد م يمشو
اتكلمت بعنف وانا ببصلهم بقوه غريبه جدا ع الضعف ال جوايا
_ ع فكره دي حاجه متخصش ولا اي حد فيكو ، دي حاجه ترجعلي انا، ومسمهاش البتاعه ال انا لابساها ، اسمه حجاب
حاولو يلاحقو ع بعض ف الكلام وهما بيردو بعد م لاحظو طريقتي العدائيه ف الكلام معاهم
ااتكلم مصطفي وهو بيحاول يلحق نفسه
= اهدي ي حوراء ف اي ، محدش قصده حاجه
لاحقته ف الكلام مها وهي بتتكلم بسرعه
= انتى مالك كده ي حوراء ، عماله تفهمينا غلط كده لي ؟
رديت بنفس العنف وانا للامانه بحاول مبكيش دلوقتى
_ بجد فاهمه غلط ، يعني مش انتو ال زودتها شويه عن حدودكو
اتكلمت مها بصدمه مصطنعه وهي بتبصلي باستغراب
= واحنا من امتى كان فيه بينا حدود ي حوراء
اتكلم مصطفي وهو بينهي كلام مالوش ريحة الفايده بعد م قام وقف
= خلاص ي مها ، حوراء شكلها متعصبه ، نجيلها ف وقت تاني
خلص كلامه واتجه للباب ومها قامت وراه وهي بتبصلي بلوم انا عافه انه كاذب
وعارفه انه ال عملته دلوقتي كانت قصداه ، وانه كل كلامهم ده كانو م رتبينو ،
زى مانا عارفه برضو ان كلامهم حقق هدفه ، وضايقونى زى م كانو عايزين
محاولتش امنعهم ، وقمت عشان اوصلهم للباب ، امنعهم ازاي وانا كنت شويه وهطردهم انا
خرجتهم لحد الباب ، مها سلمت عليا وهي عامله مقموصه
ومصطفي مد ايده يسلم عليا فمديتها عشان اسلم عليه ،
ف نقس الثانيه ال الباب اتفتح عشان نوح يدخل منه وانا مصطفي ماسك ايدي
___________________________________________
مش فاهم ف اي ؟ ومش فاهم لي بعمل كده ، المشكله اني مقتنع انها معملتش حاجه
والمشكله انه عارف انه العيب من عندي انا مش من عندها هي
المشكله الاكبر بقا اني مش عارف اي هي المشكله اصلا ، مش عارف سببها ، ومش عارف لي الموضوع ف دماغي اصلا
لي مش عارف اكبر دماغي ، لي مش عارف اطنش
انا معترف انها معملتش حاجه ، بس برضو مش عارف ف اي
طب ممكن اكون حبيتها ؟
بعيده اوي ، انا معنديش مشكله اني اكون حبيتها ، هقدر اتقبل مشاعري واتعايش معاها عادي
انما عندي مشكله اني مش مقتنع اني حبيتها ، محدش بيحب حد كان رافضه بالسرعه دي
او بمعني اصح محدش بيحب حد مجبور عليه بالسرعه دي
اوك انا عارف انلى غلطان ، غلطان عشان اخر يومين عاملتها باسلوب مش كويس
اسلوب مكنتش مظبط اني هعاملها بيه ، انا كنت مخطط اني هعاملها بالحسني ، هتقي ربنا فيها ، هديها حقها عليا الا وهو الاحترام والمعامله الحسنه
خاصه انها مقدمالي ده ،انا كنت متوقع غير كده ، كنت متوقع انها مش هتعرف تعمل حاجه ف البيت ، وانه مش هيتغير حاجه واكلي هيبقي عند ماما زي قبل م اتجوز
بس هي اثبتت العكس، هي حاولت تثبت انها ست بيت شاطره بكل الطرق ‘ حتي لحد دلوقتي لسه بتثبت ده
انا كنت ناوى اتكلم معاها بس الحقيقه بعد ال شوفته ده غيرت رائي
مستنتش لحظه وانا بجري ع السلم عشان اخطف ايديها من ايده ال ماسكها بطريقه غريبه
طريقه مغابتش عليا انا كراجل ، ده غير طريقته ال بيبصلها بيها
كل دول بدون احساس خلوني اجري عشان اخليها ورا ضهري وامد ايدي عشان اضربه ف وشه
عشان تطلع عده شهقات نتيجه صدمه ال حصل ، واحده منه بعد م وقع ع الارض ، وواحده من ال معاه
وواحده منها وهي بتحاول تتحرك عشان تسيبني و تجري عليه ، لكن بعد م لاحظت نظرتي ليها وقفت وهي بتبصلي بخوف
اتكلمت بهمس وانا ببصلها بغضب
_ لو اتحركتي من مكانك صدقيني تصرفي مش هيعجبك
مردتش عشان تخبي وشها ف ضهري وهي بتتمسك ف جاكيت البدله بخوف
اتكلمت البت ال معاه بصوت عالي وهي بتبصلي ، بس الغريب انه نظرتها مش غضبانه زي صوتها
* حرام عليك ، انت بتضربه لي
= عشان ميمدش ايده ع حاجه متخصوش
اتكلمت تاني بس وهي بتبص لحوراء بخبث ف حين انه ال معاها فضل ساكت زي م هو
* م تقول الكلم ده لمراتك ، مهى لو مش عايزه تسلم عليه مكنتش سلمت
كلامها صحيح بس حسابي انا ومراتي بعدين واكيد مش حاسب مراتي قدامهم
اتكلمت تاني بنفس البرود وانا ببصلهم برفض
_ اطلعو برا ، ومتجوش هنا تاني
الولد قام وقف ،ومسك ايد البنت ال معاه ومشي ، بعد م بص لحوراء بطريقه مغابتش عن بالي
مشيو وانا التفتلها بغضب ، مسكت ايدها بعنف وانا بشدها عشان ندخل جوا
فتحت الباب وقعدتها ع اول كرسي قابلني جمب الباب وانا بكلمها بعنف وبصوت تقريبا اول مره تسمعه وهو عالي
_ انا عايز اعرف اي ال انتى عملتيه ده
ردت وهي بتنكمش ع نفسها وتبصلي بخوف
= م.. معملتش حاجه
بصتلها بنفس الغضب ال محتلني ومش قادر اسيطر عليه
_ معملتيش حاجه ! بجد معملتيش حاجه ؟ يبقي انا ال عملت
انا ال سمحت لكلب زي ده يسلم عليكي ، انا ال سمحت لكلب زي ده يمسك ايدك
اتكلمت بنفس الخوف وهي بتبصلي وبتحاول متبكيش
= ممكن توطي صوتك
_ لا مش هوطيه ، انتي ازاي سمحتي لنفسك تقعدي معاه ف نفس المكان لوحدكو
= م .. مكناش لوحدنا ، مها كانت موجوده
_ بجد مها كانت موجوده ! مين مها دي عايزه اعرف ، اي صفتها يعني
اتكلمت بعد م فقدت سيطرتها ع نفسها وبدات تبكي
= بالله عليك وطي صوتك ، انا خايفه منك
اتكلمت بعد م هديت شويه خوفا لتتعب
_ كان المفروض تخافي من ربنا ، مش مني
= انا معملتش حاجه لكل ده
_ لا عملتى ، كون انك تسمحيله يسلم عليكي يبقي عملتي ، كون انك تدخليه البيت وانا مش موجود يبقي عملتي
= وانا مكنتش اعرف انهم جايين ، هم جم مره واحده ، كان المفروض اعمل اي ؟
_ كان المفروض يزوجه يمحترمه ترني ع جوزك تساليه تعملي اي
ردت وهي بتحاول تبرر بعد م بطلت عياط وادركت خطاها
= يعني كنت هتسيب المشوار ال انت فيه وتيجي
تبريرها عصبني اكتر بعد م كنت هديت فرجعت اعلي صوتى تانى
_ لا يست هانم مكنتش هسيب مشواري واجي ، لان انا عند ماما تحت بقالي اكتر من ساعه
= مم..مانا معرفش
_ لانك مسالتيش
= مجاش ف بالى والله ي نوح
اتكلمت بهجوم زاد عن حده، بس للاسف الوقت كان فات
_ عشان عمرك م جه ف بالك تكونى كويسه
ردت وهي بتقف من ع كرسي وبتتكلم بصدمه وتبصلي بخضه
مم.. مجاش ف بالي اكون كويسه!!! اان..انت قصدك اي ينوح -
خبيت وشى منها الناحيه التانيه بعد م ادركت ال قولته ، وال للامانه ندمت عليه للحظه ، بس خلاص الموضوع انتهي وقولته
قامت وقفت وهي بتقرب عليا عشان تمسك دراعي وهي بتتكلم برجاء بعد م بدات تبكي فعلياً
نوح ، انت قصدك اي؟ -
قصدك انى عمري م كنت كويسه ! طب لى كده ؟؟لي بتقول كده حرام عليك
بدات تبكي بعنف وانا وقفت مش عارف اعمل اي ، حاسس اني متكتف ، معرفش لي قولت كده
بس اضايقت لما لقيته ماسك ايديها ، واضايقت اكتر لما تخيلت انهم كانو قاعدين مع بعض ف نفس المكان
فضلت تعيط بعنف وانا حيطت ايدي ف جنبي ورفعت راسي وانا مخنوق ، مش عارف اتصرف
ف حاجه منعاني اني اواسيها زي كل مره
زعلان منها جدا وزعلان من نفسي ف نفس الوقت
-بطلت عياط وهي بتمسح عنيها بعنف ، عشان تتسلح بقوه مشوفتهاش منها غير مره واحده _ لما كانت بتدافع عني قدام صحابها ف المكتب
قربت وهي بتخبط ع صدري مكان قلبي بالتحديد
انا لو مكنتش كويسه مكنتش جيت اتجوزتني ، لو مكنتش كويسه مكنتش عاملت مامتك بكل حب وكنت نكرت معاملتها الكويسه ليا-
لو مكنتش كويسه مكنتش سكت لمعامله اختك ليا وال زى الزفت ،مع العلم انى اقدر ارد عليها كويس جدا
سيبك من كل ده انا لو مكنتش كويسه مكنتش اقتنعت بكلامك ولبست الحجاب عشان حبيته ، مكنتش صحيت كل يوم بدري عشان اعملك فطارك وال كل يوم بتسيبه وتنزل عادي
لو مكنتش كويسه ي نوح مكنتش قعدت ف البيت بعد معاملتك ليا ال بقت زى الزفت وبدون اى مبرر
قالت اخر جمله وبدات ف البكا تانى ، عشان ترجع تكمل كلامها وهى بتحاول تسيطر ع نفسها
ع فكره انا كويسه ، كويسه جدا كمان ي نوح -
خلصت كلامها وهي بتبصلي بلوم ، عشان استوعب انى فعلا زودتها من ساعه م بدات خصام مكنش له اي داعي
او بمعني اصح مكنش له اي مبرر، غير اني مش عارف افسر مشاعري
عاقبتها بحاجه هي ملهاش اي ذنب فيها
قربت عليها وانا ببصلها باسف وبفتح ايدي ف محاوله اني اضمها عشان اهديها ، لقيتها بتزق ايدي وهي بتبعدنيى عشان تدخل الاوضه بعد م بدات عياط تاني
#يتبع
 رواية معتكف ف محراب قلبي الفص…){kind=link}
تعليقات
إرسال تعليق