رواية غرام السلطان الفصل الرابع4 للكاتب عادل عبد الله
رواية غرام السلطان الفصل الرابع 4للكاتب عادل عبد الله
#رواية_غرام_السلطان
#للكاتب_عادل_عبد_الله
الحلقة ٤
شهد : اخبار الحمل ايه ؟ حصل حمل ولا لسه ؟
جميلة : لسه يا هانم .
شهد : لسه !!!! ليه ؟؟
جميلة : ارادة ربنا يا هانم ، الحاجات دي بارادة ربنا ، وقت ما يريد هيحصل .
شهد : قوليلي يا شهد هو سلطان بيه لما بيكون معاكي مش بيحصل بينكم حاجة ؟؟
نظرت جميلة الي الارض خجلا وقالت : بيحصل يا هانم .
شهد : طيب عايزة أشوف شطارتك يا جميلة .
جميلة " بتعجب " : ازاي مش فاهمة ؟!!
شهد : يعني عايزين نفرح باولاد سلطان في اقرب وقت .
وأنا في ايدي ايه اعمله يا هانم ؟!!
شهد " بعصبية " : طيب خلاص خلاص روحي شوفي اللي وراكي في المطبخ .
للكاتب عادل عبد الله
عاد سلطان مساءا الي المنزل فوجد شهد يبدو عليها التوتر والقلق !!
سلطان : مساء الخير يا حبيبتي .
شهد : مساء النور ، تعالي يا سلطان اقعد عايزاك .
سلطان : خير يا حبيبتي فيه ايه ؟؟
شهد : يا سلطان النهاردة عدا اكتر من شهر علي جوازك من البنت جميلة ولسه مفيش حمل !!!
سلطان : مش لازم يحصل من اول شهر ، ممكن بعد شهر اتنين تلاتة وممكن بعد سنة او اكتر ، عادي يعني يا شهد .
شهد : لأ احنا بكره الصبح لازم نروح لدكتور ويكشف عليكم انتوا الاتنين .
سلطان : وهيكشف عليا انا ليه ؟ ما انا كشفت كتير قبل كده وتحاليلي كلها سليمة وعارف ان مفيش موانع عندي للانجاب !!!
شهد : بردو تعيد الكشف تاني يمكن الخصوبة عندك ضعفت ؟؟
سلطان : انا تمام وزي الفل يا شهد وانتي عارفة كده كويس !!
شهد : يا حبيبي عارفاك راجل وسيد الرجالة لكن انا بتكلم عن الخصوبة ، وده عادي ملهاش علاقة باللي في دماغك .
سلطان : اوكي زي ما تحبي يا حبيبتي ، نروح للدكتور .
بعد عدة ايام
في معمل التحاليل تتسلم شهد ومعها جميلة التحاليل الطبية التي تؤكد سلامة جميلة وسلطان وتؤكد قدرتهما علي الانجاب .
تتصل شهد هاتفيا بسلطان ...
شهد : الحمد لله يا حبيبي التحاليل طلعت سليمة وانتوا الانتين كويسين .
سلطان : انا قولتلك يا شهد بلاش استعجال ، هيحصل الحمل وقت ما ربنا يريد .
شهد : ونعم بالله ، انا حبيت اتصل و اطمنك .
سلطان : يا حبيبتي انا مطمن طول ما انتي جنبي ومعايا .
شيئا فشيئا بدأت شهد تشعر بفتور مشاعر سلطان تجاهها !!
فلم تعد لهفته عليها كسابق عهده !!
فكثيرا ما يعود من عمله متأخرا في ايامها ويتعلل بأشغاله في العمل او بلقاء احد اصدقاؤه القدامي ، اما في ايام جميلة فيعود دائما في وقت مبكر !!
اصبحت جميلة اكثر اهتماما بمظهرها في المنزل عن ذي قبل !!
اصبحت اعين سلطان تلاحق جميلة في المنزل كلما أتت او راحت !!
كل ذلك جعل مشاعر الغيرة تستعر في قلب شهد خاصة مع محاولاتها الظهور امامه في ابهي صورة واجمل حلة !!
حتي عاد سلطان يوما من عمله و بدل ملابسه ثم عاد وجلس علي السفرة .
أتت جميلة بالطعام ووضعته امامهما ثم انصرفت بينما نظرات سلطان مازالت تلاحقها مما استفز مشاعر شهد وجعلها تواجهه في الحال ...
شهد : عينك يا سلطان !!!
سلطان " بارتباك " : ايييه ؟ في ايه ؟ مالها عيني ؟؟
شهد : عينك مش بتنزل من عليها !! للدرجادي مش صابر علي ما يتقفل عليكم باب ؟!!
سلطان " يبتسم " : ايه اللي بتقوليه ده يا شوشو !! انتي عارفة ومتأكدة جدا ان مفيش في القلب غيرك ومفيش واحدة تملي عيني غيرك .
شهد : كان ، كان يا سلطان ، كان مفيش واحدة تملي عينك غيري ، لكن دلوقتي لأ ، بقي فيه جميلة هي اللي مالية عينيك ولما بتشوفها بتخليك مش علي بعضك !!!
سلطان : لأ انا كده ازعل ، بجد انا كده هزعل منك ، اللي بتقوليه ده مش حقيقي ابدا يا شهد ، صدقيني كل دي اوهام في دماغك .
شهد : اوهام ؟؟
سلطان : اكيد اوهام يا شهد .
شهد : ورجوعك بدري في ايامها بردو اوهام ؟؟ وعينيك اللي من ساعة ما اتجوزتها مش بتنزل من عليها بردو اوهام ؟؟
سلطان " بارتباك " : مفيش حاجة من دي حقيقة ، ولو أتأخرت بتكون صدفة من اكتر ، يا شهد معقول لسه لحد دلوقتي مش عارفة حبي ليكي ؟!!!
شهد : عارفة يا سلطان بس حبك ليا قل عن الاول ، قل كتير قوي ، وخايفة في يوم يروح خالص من قلبك وارجع اندم علي تضحيتي علشانك .
سلطان : طيب اعمل ايه علشان تصدقي ان حبك في قلبي كل يوم بيزيد مش بيقل ؟؟
شهد : اثبتلي يا سلطان ، اثبتلي بأي طريقة ، المهم تثبتلي .
سلطان : حاضر يا شهد هثبتلك ومسير الايام تثبتلك وتأكدلك .
بعد شهرين من زواج سلطان وجميلة ، دخلت جميلة علي شهد وقالت......
جميلة : فيه حاجة يا هانم كنت عايزة اقولك عليها .
شهد : قولي يا جميلة .
جميلة : أنااا
شهد : مالك يا جميلة ؟
جميلة : انااا حامل .
شهد : بتتكلمي جد ؟؟ بجد يا جميلة انتي حامل ؟؟
جميلة " بفرحة " : ايوه يا هانم .
شهد : طيب تعالي ننزل نروح نعمل تحليل دلوقتي ونتأكد .
جميلة : عملت تحليل واتأكدت يا هانم .
شهد : ننزل نتأكد تاني .
في معمل التحاليل الطبية
بمجرد تأكدهم من حدوث الحمل اتصلت شهد بسلطان .......
شهد : انت فين يا حبيبي ؟
سلطان : في الشغل طبعا يا شهد .
شهد : طيب انا عندي خبر بمليون جنية .
سلطان : مليون جنية ؟!! قولي يا ستي ، انا وفلوسي وكل حاجة ملك ايديكي .
شهد : ربنا يخليك ليا يا حبيبي ويخليك لابنك .
سلطان : ابني ؟ ابني !!!!! قصدك ان .....
تقاطعه شهد : ايوه يا حبيبي جميلة حامل .
سلطان " تنساب دموعه فرحا " : بتتكلمي بجد يا شهد ؟ جميلة حامل ؟
شهد : ايوه جميلة حامل .
سلطان : متأكدة ؟؟ اوعي تكوني بتهزري ؟؟ اوعي تلعبي بأعصابي ؟؟
شهد" تضحك " : لأ مش بهزر يا حبيبي الف مبروك يا قلبي هتبقي اب .
سلطان : طيب انا جاي حالا .
اغلق سلطان المكالمة ثم ارتدي جاكيت بذلته وانصرف من شركته سريعا .
في المنزل
بمجرد دخول سلطان المنزل يجد شهد امامه فيهرول اليها ويحت.ضنها ...
سلطان : جميلة حامل بجد يا شهد ؟
شهد " بفرحة " : ايوه يا حبيبي .
سلطان : انا بحبك قوي يا شهد .
شهد : الف مبروك يا حبيبي ، تعيش وتشيله وتفرح به .
سلطان : هب فين جميلة ؟
شهد : في المطبخ يا روحي .
سلطان " بعصبية " : لأااااا ، من النهاردة جميلة تفضل نايمة في السرير ، فاهمة يا شهد ؟ جميلة تفضل نايمة لحد ما تقوم بالسلامة .
ثم دخل سلطان سريعا الي المطبخ وخلفه شهد .
ما ان رأي جميلة حتي اقبل عليها واحت.ضنها وقال : ألف مبروك يا جميلة ، الف مبروك يا حبيبتي .
جميلة : الله يبارك فيك يا ح....
ثم نظرت الي شهد و لم تكمل .
شعرت شهد بغصة في قلبها جراء احت.ضان سلطان لجميلة وفرحته العارمة وكلمة بحبك التي قالها لها امامها !!
رجعت شهد خطوات الي الخلف وخرجت بهدوء تحاول ان تحبس دموعها .
خرج سلطان ساندا لجميلة التي كاد قلبها ان يطير في عنان السماء فرحا .
ثم ساعدها سلطان علي الجلوس وقال موجها كلماته لهما ....
سلطان : بصوا بقي يا جماعة من النهاردة انتي يا جميلة مش هتقومي من السرير لحد ما تولدي بالسلامة .
جميلة : حاضر ، بس شغل البيت مين ال......
سلطان : ملكيش دعوة بشغل البيت لحد ما تقومي بالسلامة يا جميلة ، وانتي يا شهد بعد اذنك انتي اللي هتقومي بشغل البيت الكام شهر لحد ما جميلة تولد بالسلامة .
شهد : أنا ؟؟؟
سلطان : ايوه يا شهد انتي ، و لا ايه رأيكم اجيبلكم واحدة تخدمكم انتوا الاتنين ؟؟
جميلة تنظر له بأندهاش غير مصدقة للفرحة العارمة التي تبدو علي سلطان ولكلماته التي لم تتوقعها !!!
شهد : لأ يا سلطان انا تتفق مع واحدة تيجي كل يوم ساعتين الصبح تغسل وتعمل شغل البيت وسيب طبخ الاكل عليا انا .
سلطان : ماشي يا جميلة،،،،، اسف يا حبيبتي ، ماشي يا شهد .
عندما ناداها سلطان خاطئا باسم جميلة زادت الغصة في قلب شهد !!!
شهد : انا داخلة ارتاح لأني حاسة اني تعبانة شوية .
دخلت شهد غرفتها واحكمت غلقها ثم جلست علي فراشها تبكي وظلت الافكار المبعثرة تقتحم خيالها .....
سلطان هينساني !!!
فرحة سلطان بحمل جميلة هيغيره من ناحيتي !!!
سلطان اتلخبطت في اسمي وناداني باسمها !!!
جميلة البنت الخدامة اللي كانت بتخدمني هتبقي زيها زيي بالظبط بالعكس كمان ده ممكن هي اللي هتبقي الكل في الكل !!!
جميلة اكيد هتتغير لما تحس انها حققت لسلطان حلم عمره !!!
سلطان من دلوقتي ابتدا يريحها ويحض.نها قدامي وكأني مش موجودة !!! اومال لما تولد وتجيب له عيلين تلاتة هيعمل ايه !!!!
يا تري انا غلطت لما جوزته علشان يحقق حلمه !!!!
وظلت الافكار تطاردها وهي تتخيل حالها وحال سلطان وجميلة في المستقبل حتي فتح سلطان باب الغرفة ودخل فجأة فحاولت شهد أن تخفي دموعها وابتسمت : الف مبروك يا روحي يتربي في عزك ان شاء الله .
سلطان : الله يبارك فيكي يا حبيبتي ، معقول يا شهد أشوف دموعك في يوم زي ده ؟!!
شهد : لا يا حبيبي دي دموع الفرحة .
سلطان : بجد يا شهد ؟؟
شهد : ايوه يا روحي .
سلطان : انتي زعلتي لما غلطت وقولتلك يا جميلة ؟ انا اسف بس الفرحة طيرت عقلي عايز اطير من الفرحة ، أنا أسف .
شهد : لا يا روحي ولا يهمك ، اهم حاجة انك تحقق اللي نفسك فيه .
شعرت شهد بارتياح كثيرا بعد كلمات سلطان التي اعادت اليها عقلها المسلوب .
جهز سلطان غرفة جميلة بكل ادوات الترفية ، شاشة تلفاز كبيرة ، تكييف ، هاتف محمول حديث به الكثير من الالعاب ووسائل السوشيال ميديا ، كتيبات صغيرة للقصص والروايات الصغيرة ، اسكتش رسم وجميع ادوات الرسم .
تفاجئت جميلة بكل ذلك وسألته : ايه ده كله يا حبيبي ؟ لمين الحاجات دي كلها ؟؟
سلطان : ليكي انتي يا حبيبتي ، كل حاجة جنبك وتحت ايديكي علشان مش تحتاجي تتحركي ابدا ، حتي الاكل شهد هتجيبه لحد عندك .
جميلة : معقول شهد هانم تجيبلي الاكل لحد عندي هنا وانا نايمة ؟!!!
سلطان : ايوه يا قلبي وكلنا هنخدمك لحد ما تقومي بالسلامة .
جميلة : انا فرحتي فرحتين فرحتي الاولي باني هكون ام واحققلك اللي نفسك فيه وفرحتي التانية أني عايشة مع ناس طيبين بيحبوني زيك انت و شهد هانم .
سلطان : احنا كمان فرحانين بيكي قوي يا حبيبتي .
مرت عدة اسابيع وجميلة تكاد لا تغادر فراشها الا لدخول الحمام بينما شهد وسلطان يقومان علي خدمتها وراحتها .
كانت اسعد ايام حياتها وهي تري نفسها تعيش وسط هذا الكم الهائل من الحب
حتي جاء صباح يوم و شعرت جميلة بحاجتها للذهاب للحمام فقامت وكانت تشعر بدوار شديد وحاولت الوصول الي الحمام ولكنها لم تشعر الا وهي تسقط مغشيا عليها !!!
قامت شهد من نومها علي صوت سقوط جميلة أرضا !!!
خرجت شهد لتري جميلة تفترش الارض فاقدة الوعي !!!
الاحداث التالية غير متوقعة تماما !!!
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق