رواية موسى الفصل الثانى عشر والثالث عشر للكاتبه فريده الحلواني حصريه
روايه موسى البارت الثاني عشر بقلم فريده الحلواني
حينما تأخذنا الدنيا ونتوه في ملذاتها يمهلنا الله بلطفه, يعطينا الكثير من الفرص كي نعود إلى طريقه.. واحدة تلو الأخرى وحينما يجدنا نصر على ما نحن فيه يصفعنا بقوة علنا نفيق.. فهل نستحق من الخالق كل تلك الفرص التي يمنحنا إياها كي نعود إلى طريقه المستقيم؟!
غافل القلب فقط هو مَن لا يرى كل تلك الرحمات التي يرسلها لنا الخالق في وسط البلاء.. الذي يكون أوله محنة وآخره منحة
توقفت الأصوات الصاخبة والكل يتساءل ماذا حدث؟!
الجميع يهرول خلفه ولكن لم يلحقه أحد.. الأم تصرخ باسم وحيدتها والأب يعتذر للحضور وينهي الحفل
أما العروس فلم تهتم بزينتها ولا ثوبها الكبير بل ظلت تبكي وتتوسل زوجها أن تذهب خلف أختها
ماجدة بحكمة: يا بنتي مينفعش اطلعي انتي وعريسك واحنا هنطمنك اول ما نوصل والله
سمر بغل لأمها: شوفي البت! خربت الفرح.. تلاقي كل ده فيلم عملاه
لواحظ بخبث: فيلم ولا مش فيلم المهم دلوقت كانت فين هي وجوزك يا بت الموكوسه؟ جاي يجري بيها من ناحيه البيت.. يبقى كانو بيعملو ايه؟!
ضربت سمر فوق صدرها بقوة وهي تقول: يا مصبتي! يكونش حصل بينهم حاجه واتغابى عليها زي عوايده؟ طب وعزة جلال الله لو ده حصل لكون اكلاها بسناني
صف سيارته أمام أحد المشافي الكبيرة.. هبط سريعا مهرولا إلى الداخل وهو يحملها ويصرخ بالمارة: دكتوور.. عايز دكتور يا جدعاان
أوقفه أحد الممرضين وقال بشفقة: تعالي يابني الطوارئ من هنا, اطمن خير ان شاء الله
تركها فوق فراش الكشف وبشق الأنفس وافق على الخروج حتى يتم فحصها من قبل طبيب الطوارئ وبرغم رفضه كونه رجلا إلا أنه نحى غيرته جانبا الأهم هي حتى لو احترقت أنا.
رد أخيرا على أحد اتصالات عائلته الكثيرة وأطلعهم على مكانه وفي غضون النصف ساعة كان الجميع يقف معه أمام الغرفة التي ما زالت بداخلها
*
في شقة سيد وحياة
بمجرد أن أغلق الباب عليها وجدها تقول له بتوسل: والنبي يا سيد لو ليا غلاوه عندك خلينا نروح نطمن عالبت, انا قلبي مقبوض مش مطمنه
وقف ينظر لها بحيرة وإشفاق.. هل يتنازل عن اليوم الذي تمناه كثيرا وينصاع لرغبتها أم يحاول إقناعها بالبقاء؟!
*
خرج الطبيب أخيرا مغلقا الباب خلفه وقبل أن يصل إليه أحد كان هو يقف أمامه بعدما كان ملتصقا بالحائط
موسى: خير يا دكتور, مالها؟ فاقت؟
لم يهتم بإخفاء لهفته بل كان الرعب مرسوما فوق ملامحه بوضوح
الطبيب بعدم ارتياح: الحاله العامه من الكشف المبديء اجهاد.. بس انا هعملها اشعه وتحاليل عشان نطمن اكتر
أكمل بوجل: هي مكنتش بتشتكي من حاجه؟ يعني ده حصل فجاه؟
فاطمة بدموع: لا يا دكتور دي كانت زي الفل وكنا في فرح اختها
نظر لها موسى بغيظ ثم قال: جنبها كان بيوجعها من وقت للتاني بقالها فتره بس كانت بتاخد مسكنات ومن حوالي تلت اربع شهور تعبت شويه والدكتوره قالت لغبطه هرمونات وممشياها على علاج
نظر له الجميع بذهول! كيف يعلم كل هذا وأمها نفسها والتي من المفترض أن تكون هي مَن تعلم كل ذلك؟!
حقا لم يهتم بل صبّ كل اهتمامه مع الطبيب وهو يخرج هاتفه ويعبث به قليلا.. بعدها وضعه أمامه وهو يقول: ده العلاج الي بتاخده.. انا مصوره عشان لو خلص وانا بره اجبهولها
فتح الطبيب الصور ثم قال: تمام.. احنا هنحجزها هنا يومين لحد ما نعمل كل الي قولتلك عليه وان شاء الله خير
صرخت سمر بغِل: وانت ايش عرفك بكل ده؟ اذا كان امها معندهاش خبر بيه
تطلع لها بغضب جم ثم قال: لو مش عايزاني اقل منك قدام الخلق افتحي بوقك بكلمه
فاطمة بصدمة: انا الي بسالك يابني ازاي بنتي تكون تعبانه وانا معرفش!
في نفس لحظة وصول سيد وحياة إليهم كان يقول: اسالي نفسك الاول اخر مره دخلتي اوضه بنتك كان امته؟ ولا حتى تعرفي عنها ايه وليه منعتها تطلع فوق؟!
محمد: فهمنا يابني مش وقت عتاب
رد على أبيه كذبا: في يوم كنت طالع اخد بضاعه من فوق السطوح سمعتها بتعيط.. دخلت عليها لقتها تعبانه نزلت بيها قرب الفجر روحنا المستشفى وبعد الكشف الدكتوره قلتلها تعب في حاجات كده وبعدها حجزتلها عند دكتوره كبيره ومشتها على علاج.
*
مر يومان لم يبرح فيهما المشفى, ظل جانبها.. المحنة ترينا من يحبنا حقا ومن يجب أن نخرجه من حياتنا.
الكل أيقن عشقه لها من خوفه وجنونه عليها.. رفض تركها وبرغم أن أمها تبيت معها إلا أنه يظل طيلة الليل خارج غرفتها
لم يقوَ أحد على التحدث معه ولا معارضته في مساعدتها وهي تتلقى العلاج.. وبينما كانت تتناول أحد العقاقير نظرت له بوهن ثم قالت: يا رتني تعبت من زمان عشان تدلعوني كده
ملس على شعرها بحنان أمام الجميع ثم قال: قوم بس يا صغنن وانا اوريك الدلع على اصوله.. يا بت دانتي اخر عنقود عيله النجار مال على أذنها وأكمل: وقلب وعقل ودنيت زعيم عيله النجار
كادت أن تبتسم إلا أنها صرخت بألم لم تقوَ على تحمله
وقع قلبه في قدمه رعبا عليها وصرخ بالممرضة: انتي ادتلها ايه؟ مالهااا؟
ارتعبت الفتاة وقالت: العلاج الي الدكتور كتبه.. تحركت سريعا وهي تقول: انا هروح اندهه بسرعه
في لحظة تشعر أن عالمك قد هدم فوق رأسك.. لا تعلم كيف ستخرج من تحت ركامه الذي من ثقله أشعرك حقا أنك عاجز عن الحركة
هذا كان شعوره هو خاصة ومعه الجميع بعدما تم نقلها إلى غرفة العناية المركزة والطبيب يقف بينهم يطلعهم على مالا توقعوه أبدا
الطبيب: بعد ما عملنا التحاليل والاشاعات اكتشفت ان الكليه اليمين حصلها ضمور كامل والكليه الشمال شغاله بكفائه خمسه فالميه وده مش فاضله كتير وهيبقى عندها فشل كلوي
كل ما شعر به أن الدنيا تدور من حوله والجميع يشهق يتساءل, يستنكر, وهو في عالم آخر! حبيبته ستضيع منه صغيرته سترحل!
أفاقه من تلك الحالة سؤال أبيه: يعني كده هتدخل في غسيل كلى يا دكتور؟
الطبيب: للاسف.. بس برده ده مش حل لان جسمها ضعيف ومش هيتحمل جلسات الغسيل
لم يشعر بحاله إلا وهو يمسكه من تلابيبه ويصرخ به بجنون: يعني عايز تقول انها بتمووت؟ دانا اقتلك واشرب من دمك.. شووف حل
ارتعب الطبيب من ذلك الهجوم ولكنه قدر موقفه فقال سريعا: الحل الوحيد ان حد يتبرعلها بكليه
والعاشق لم يتردد لحظة وهو يقول بحسم: خد الكليتين الي عندي المهم انها تعيش.. تركه وأكمل بضعف وتوسل أصاب الجميع بصدمة: ابوس ايدك يا دكتور اعمل اي حاجه بس خليها تعيش, اطلب الي عايزه.. خد كل الي املكه بس خليها تعيش
أشفق الطبيب عليه وقال بأمل: ان شاء الله خير ويا ريت لو في حد تاني عنده استعداد للتبرع بكليه يجي معاك عشان نعمل التحاليل اللازمه
رد برفض: محدش هيتبرع غيري
الطبيب بتعقل: يا استاذ ده لصالح المريضه.. ممكن انسجتك متتوافقش معاه يبقى نعمل حسابنا عشان الوقت مش في صالحنا
فاطمة: انا امها خد مني
حياة: وانا اختها هاجي معاكم
محمد: وانا كمان.. الكل يعمل تحاليل ونشوف الي ينفع
الطبيب: تمام اتفضلو معايا
موسى برجاء: ينفع اشوفها؟
رد عليه بأسف: حاليا اخده مسكنات قويه ونايمه
يومان آخران مرا عليهم, الأميرة النائمة بالداخل لا تشعر بأميرها الذي لا يزيح عينيه عنها من خلف الزجاج.. اشتاقها حد الجحيم توسلها داخله أن تبقى معه ولأجله
شعر أن الهواء نفذ من حوله أراد أن يتنفس فتحرك أخيرا من أمام الغرفة وهو يقول: هطلع اشرب سيجاره وجاي.. لو صحت رنو عليا
انطلق للخارج سريعا وظل يسير حول المشفى في الشوارع الخالية يشعر أن الدنيا ضاقت عليه.. جلس على أحد الأرصفة ولم ينتبه أن بجانبه مسجد.. وجد دموعه تسيل لأول مرة في حياته لا يعلم ماذا يفعل؟! حقا يشعر بعجز تام
ولأن لنا ربنا رحيم لا يأخذنا بذنوبنا أرسل له رجلا صالحا علّه يأخذ بيده.. انتبه على يد تربت فوق كتفه بحنو.. نظر للأعلى وهو يمسح دموعه سريعا
ابتسم الرجل ببشاشة وقال: مالك يابني؟ فيك حاجه؟ محتاج حاجه
رد عليه بتيه: محتاج حد يرجعلي روحي.. تعرف حد يردلي روحي يا حاج؟
جلس الرجل جانبه ثم قال: الي خلقها
نظر له موسى بعدم استيعاب فأكمل: الي خلقها قادر يردهالك يابني.. بس انت اطلبها منه
ارتعش جسده بقوة بعدما سمع هذا الحديث وقال بيأس: هو انا ليا عين اطلب منه حاجه؟ دا انا مخلتش حاجه حرام غير لما عملتها
ربت الرجل على يده وقال بحنو: بسم الله الرحمن الرحيم "قل يا عبادي الذين أسرفوا على أنفسهم لا تقنطوا من رحمة الله, إن الله يغفر الذنوب جميعا" صدق الله العظيم.. ربنا بيقول متياسش من رحمتي تعال بس واستغفرني وانا هسامحك
موسى بيأس: بس انا مش هقدر اطلب منه بعد كل الي عملته.. انت مش عارف حاجه يا حاج
الرجل بحسم: انت كفرت بربك؟ اشركت بيه؟
رد سريعا: لا الاه الا الله.. لا طبعا
ابتسم الرجل وقال بيقين: الايه دي نزلت لاحد الصحابه.. الي بعد ما امنو بالرسول صلى الله عليه وسلم رجعو تاني للكفر بعدها ندمو بس مكنوش قادرين يواجهو النبي ولا عارفين يعملو ايه ربنا نزل الايه دي عشان يعرفهم انه غفور ورحيم وهيقبلهم تاني لما يخبطو على باب التوبه الي مش بيتقفل ابدا غير بطلوع الروح
أمسك بيده مع ارتفاع صوت الآذان وهو يقول: تعالي نصلي الفجر واسجد وادعي وابكي.. هيسمعك وهيرحمك ومش هيقفل بابه في وشك ابااا
وقف معه وقال بخزي وعينين لامعتين بدموع الندم: بس انا عمري ما ركعتها ولا حتى اعرف اتوضى
ابتسم الرجل وقال: تعال نتوضى سوا وهعلمك تصلي ازاي واحنا بنصلي ركعتين السنه.. مش انت طاهر ولا جنب؟
موسى: لا طاهر.. لسه اخد دش من شويه يبقى طاهر صح؟
سجد لأول مرة في حياته.. شاكيًا باكياً لرب رحيم.. ظل يتفوه بكلمات خرجت من القلب الذي غمره الندم
بكى بحرة وهو يقول: يااارب.. اشفهالي.. رجعهالي يا رب.. والله العظيم انا هتوب..لا انا توبت, مش هعمل اي حاجه حرام, طب لو رجعت تاني للحرام عاقبني باي حاجه انا راضي.. والنبي يا رب بلاش تكون هي تمن السواد الي عملته.. انت زرعت حبها فقلبي مش هقدر اعيش من غيرها والنبي يا رب.. انا معملتش حاجه كويسه اترجاك بيها.. بس طمعان في رحمتك.. يااااارب
ظل يدعو ويشهق مثل الطفل الصغير إلى أن أفرغ كل ما بداخله
انتهى من صلاته وقبل أن يستشعر تلك الراحة التي احتلت كيانه وجد هاتفه يصدح
رد سريعا وجد علاء يقول: انت فين؟
موسى بقلق: في ايه شهد مالها؟
علاء: فاقت من شويه ومنهاره.. كل الي طالع عليها عايزه موسى
وموسى لم ينتظر ليسمع أكثر من ذلك.. بل هرول بكل ما أوتي من قوة حتى وصل إليها
وبأنفاس لاهثة سألها برعب: مالك يا قلب موسى؟ حاسه بايه؟
بكت بوهن وهي تقول: كنت عايزه اشوفك قبل ما اموت
صرخ بجنون وهو يكوب وجهها: اااخرسي.. متنطقيش الكلمه دي تاني.. هتعيشي, الموت نفسه مش هيقدر ياخدك مني
بكت بقوة وهي تحاول أن تشرح له ما رأته أثناء غفوتها: اسمعني, انا شوفتهم, كانو بياخدوني للنار.. نار كبيره اوي يا موسى.. كنت بصرخ وبحاول اخليهم يسيبوني بس كانو ماسكني جامد.. انا خايفه يا موسى قول لربنا يسامحني
بكى معها وهو يقول بيقين: هتعيشي وهيسامحك يا بت.. بس اجدعني وخليكي جامده.. انا بستقوى بيكي يا شهد.. متكسرنيش
هتعملي العمليه وهتخفي وتبقي زي القرده تاني
شهد: مش هعملها.. نظر لها بصدمة فأكملت: مش هتعالج بفلوس حرام.. كفايه لحد كده
نظر لها بتمعن ثم قال بثقة: مفيش قرش حرام هدخله فعلاجك
ابتسمت باستهزاء ثم قالت: وهو احنا عمرنا مسكنا قرش حلال؟ خلاص يا موسي خلصت
رد برفض قاطع: لااا.. مفيش حاجه خلصت اقسم بالله.. هقولك سر محدش يعرفه
نظرت له بوهن فأكمل: جدي الله يرحمه قبل ما يموت كان لسه عندي اربعتاشر سنه قالي انه ندمان على كل المال الحرام الي كسبه واكلنا منه.. قالي انه اول ما بدا اشترى دكان صغير من شغله الحلال قبل ما يدخل فالحرام.. كان حاسس ان الحرام اخرته وحشه.. خلى الدكان ده شغله لوحده حتى مكسبه كان بيشيلو لوحده كتبه باسمي ووصاني مخلطش الحرام بالحلال.. قالي خاليه هيجيلك وقت تحتاج فيه قرش نضيف وانا عملت بوصيته.. شغلت الدكان بعيد عن العيله وكبرته وبقى صاله موبيليا كبيره وكل الي بيجي منه بشيله في شقه محدش يعرف عنها حاجه.. حتى مرضتش احط الفلوس فالبنك.. كانت ديما كلمت جدي بترن في ودني هيجيلك وقت تحتاج للقرش الحلال واهو جه وقته
ابتسمت له بفرحة وراحة وهي تقول بتوسل: ياااا رب
كاد أن يحتضنها إلا أنها منعته بضعف وهي تقول: لاااا.. متلمسنيش, كفايه حرام لحد كده.. عشان لو ربنا كتبلي الموت ميكونش اخر حاجه عملتها حرام.. عشان خاطري يا موسى
وموسى لن يرد لها طلبا بل قرر ونفذ دون أن يخبرها حتى عما انتواه.. تحرك للخارج فوجد الجميع يتطلع له بقلق تحول لصدمة حينما وجدوه يقول بأمر: علاااء.. روح هات عم عمران المأذون دلوقت حالا
أول مَن استوعب الحديث أبوه فسأله بذهول: مأذون ايه يابني في وقت زي ده ولمين؟!
نظر إلى أبيه بقوة وقال: ليا.. انا هكتب على شهد دلوقت
صرخت فاطمة بجنون: على جثتي.. انت عايز تاخد تمن كليتك بجوازك منها؟ انا عندي تموت ولا تكون ليك ساااامع؟
ورده عليها كان أكثر قوة وتصميم إذ زأر كأسد مجروح: هتجوزها.. هتبات انهارده على ذمتي والا وعزة جلال الله لاخدها واختفي ومحدش هيعرفلنا طريق..
أعقب قوله بضرب الحائط بقبضته وهو يصرخ بأحقيته بها إلى أن نزفت دما.. أمسكه حسين وسيد بصعوبة كي يمنعاه من أذيه نفسه أكثر وفي وسط كل هذا الهياج ومسئولوا الأمن يحاولون أن يهدئوا الوضع قال محمد بحسم: علااء اعمل الي اخوك قال عليه بسرعه
فاطمة بغضب: الماذون الي هيكتب على بنتي يطلقني
لم يهتم بحديثها الآن لكل وقت أذان كما يقولون.
ومن بين كل هذا كان منعم يتخذ جانبا بعيدا عن كل هذا الصخب اتصل بزوجته وحينما ردت عليه بنعاس قال: فوقي يا وليه وشوفي النصيبه الي حطت على دماغ بتك
انتبهت كل حواسها وقالت: خير كفي الله الشر مصيبه ايه يا جلاب المصايب انت؟
منعم: جوز بتك بعت يجيب المأذون.. هيكتب على شهد دلوقت ياختي.. خليكي انتي وبتك نايمين فالعسل
لواحظ بنواح: يا مصبتي.. عملتها بت فاطمه, اقلب القدره على فمها تطلع البت لامها
منعم: هتعملو ايه؟
لواحظ: وانت متكلمتش ليه يا سبع البرومبه؟
منعم: هو حد قدر ينطق؟ ده اول ما امها اعترضت بقى عامل زي الطور الهايج.. روحي صحي بتك وشوفو هتعملو ايه
وصل المأذون فبكت فاطمه بقهر.. جلس أمام أبيه بما أنه وكيلها.. وضع يده بيده ومع كل كلمة يتفوه بها ليتم عقد قرانه عليها كانت عيناه المثبتتان داخل خاصتها الباكية تصرخ بألف كلمة عشق وألف وعد أنه لن يتركها والكثير من الرجاء أن تتمسك بالحياة لأجله هو فقط.
مع انتهاء المأذون وإطلاقه كلماته الشهيرة كانت بمثابة بداية حياة جديدة تمناها كثيرا ولكن لم يحلم أن تتم بتلك الطريقة.. وقف أمام أبيه والمأذون وحسين وعلاء اللذين شهدا على العقد وقال بوقاحة: اطلعو بره.. نظر لها وأكمل مستشعرا حلاوة الكلمة: سيبوني مع مراتي
وفي لحظة إغلاق الباب عليهما كانت سمر وأمها قد وصلا وتصرخان بجنون.. والعاشقان انفصلا عن العالم أجمع.. صُمّت آذانهما فلم يسمعا غير دقات قلبيهما المتعالية بصخب
كوب وجهها بجموح حاني واقترب منها بهدوء مجنون تطلع لها بعينين لامعتين قبلها برقة ثم ابتعد وقال: مراتي.. حلالي, الحلال طعمه احلى يا قلب موسى
ماذا سيحدث يا تري
سنري
الفصل الثالث عشر
بقلم فريده الحلواني
في وقت المحنة تظهر معادن الأشخاص.. المحنة مثل ماء المطر تهطل عليه كي نعلم مَن هو الصلب ومن هو مليء بالشوائب من أقل كمية مياه قد ظهر صدؤه!
وموسى برغم كل عيوبه إلا أن بداخله معدن أصيل صلب تعتمد عليه.. بل تستند عليه وقت الشدائد وأنت مطمئن أنك لن تقع أبدا بعد ذهاب المأذون وحضور سمر وأمها اللتين قلبتا المشفى رأسا على عقب وملأ صراخهما أرجاء المشفى أصر أفراد الأمن ومعهم سيد وحسين أن يخرجاهم بالقوة..
ظلت تسب وتدعو عليهما بحرقة إلى أن ضربها أخوها فوق كتفها بقوة كي تصمت وهو يقول بغضب: اخرسي بقى لميتي علينا الناس.. دفعها داخل السيارة وهو يكمل: خشي وانتي ياما بدل ما تعقليها جايه تساعديها عالفضايح دي؟
لواحظ بغِل: امال اسكت زيك انت وابوك واسيب الي الهي ما توعى تقوم منها تخطف جوز اختك؟
سمر بغباء: لا هتقوم ياما, الباشا هيتبرع بكليته.. الهي يصيبه الي صابها وميلاقي الي ينجده.. الهي يرجعلي جثه وادفنه بايدي
صرخ أخوها بجنون وهو يقود السيارة حينما آلمه قلبه من هذا الدعاء: ااخرسي يا بت ال... بتدعي على جوزك ابو عيالك؟ بتتمنيلو الموت يا جاحده؟!
سمر بغل: ايوه.. يدخل قبره ولا يدخل على واحده غيري
السيد: احنا هنعملوهم على بعض؟ ماهو كان كل يوم والتاني مع واحده واتنين غيرك وكنتي عارفه وحاطه الجزمه فبوقك وسكته لا وراضيه كمان.. وافقتي بالحرام ولما جابها بالحلال بتدعي عليه؟!
سمر: ايوه كت عارفه وراضيه عشان كلهم نسوان شمال.. ديتهم معاه ليله ولا ليلتين.. كنت بقول يخفو من عليا غبائه وضربه كل ما يجي...
أسكتها بسرعة: باااس.. بس الله يحرقك انتي هتحكيلي الي بيحصل بينك بين جوزك
لواحظ: يووه.. مالدنيا كلها عارفه.. كانت الاول بتتباها قدام النسوان انما لما زودها معاها بقت تشتكي.. يعني تعمل ايه تكتم في نفسها وتتقهر يا عين امها؟!
هز رأسه بيأس فالحديث لن يجدي نفعا معهما ولكن برقت عيناه حينما وجد سمر تقول بحسم: انا هطلق منه وانت كمان تطلق اخته
أصدر صوتا ينم عن غضبه الجم ثم قال: لاا انتي مخك اتلحس عالاخر.. اطلق مين؟ وانا مالي؟ اخرب بيتي ليه الي لسه متعمرش حتى؟
لواحظ: اااه يا واطي.. مش تاخد حق اختك منه؟
سيد بحكمة رغم غضبه: ملهاش حق غير يا تقبل يكون ليها ضره وانا عارف ان موسى هيعدل.. يا اما تطلق هي حره.. بس انا مش هسيب مراتي احنا مكناش متفقين على البدل عشان اعمل كده
**
لم يبرح مكانه الملتصق به حتى أتى الصباح.. فاق من غفوته حينما دلف عليهم الطبيب وقال ببشاشة ومزاح: صباح الخير يا عريس.. قفلت على نفسك وكبرت دماغك وسبت الدنيا تولع بره, عملتها ازاي دي يا راجل؟ احنا لازم نقتدي بيك
ضحك بهدوء ثم قال بصدق وهو ينظر لصغيرته الغافية: لما تحب بجد.. هتلاقي نفسك قادر تهد الدنيا عشان تبقى ليك
ابتسم الطبيب وقال: ربنا يخليكو لبعض.. نتيجه التحاليل ظهرت
انتفض من مجلسه وقال بلهفة مع بدء استيقاظها: طمني الله يخليك
الطبيب: انت ومدام حياه ووالدتها انسجتكم تطابقت معاها
موسى بحسم: يبقى هتاخد مني انا.. وانا همضيلك اقرار لو عايز تاخد الكليتين معنديش مانع.. نظر لها بعشق وأكمل: المهم هي تعيش
الممرضة بهيام: يا لهوووي.. هو في كده يا ناس!
والصغيرة رغم مرضها لن تقبل أن تنظر إليه أنثى غيرها فأمسكت بكفه كي تقوم رغم عدم قدرتها وهي تقول بوهن: قومني يا موسى
اعتقد أنها تريد شيئا فمال عليها وقال بلهفة: مالك يا حبيبي؟ فيكي حاجه؟ محتاجه حاجه؟
تطلعت لغريمتها كما اعتقدت وقالت بغل: ساعدني اقوم اجيبها من شعرها الي بتتسهوك دي
رغم صدمة ثلاثتهم إلا أنهم لم يتمالكوا حالهم من الضحك أما هي نظرت له بدموع وقالت: بتضحك عليا معاهم يا موسى عشان تعبانه ومش اضربها!
رسم الجدية وهو يقبل رأسها بحنو ثم قال: لا يا قلبه مقدرش وربنا
نظر للممرضة ثم غمز لها في الخفاء وقال بجدية زائفة: عيب يا حاجه انتي.. بتعاكسيني قدام مراتي حببتي؟
الطبيب بمزاح كي يخفف حدة الموقف على تلك الغيورة فالعامل النفسي أهم شيء للمريض: يعني تعاكسك من وراها عادي؟
قبل أن تحاول القيام مرة أخرى.. رد بنبرة تقطر عشقا وهو ينظر لها: ولا قدامها ولا وراها.. انا خلاص اكتفيت بيها عن الدنيا وكل الي طالبه من ربنا انه يشحتهالي.. حتى لو هياخد من عمري ويديها
**
في اليوم التالي.. كان الوضع على شفا قيام حرب ضروس داخل منزل آل النجار
ماجدة بحكمة: قومي البسي يا بطه.. فاضل ساعتين والعيال يدخلو العمليات
فاطمة بعناد: ولا رايحه ولا جايه خالي الي فضلته على امها ينفعها
كتمت ماجدة غيظها وقالت: هيجيلك قلب تسيبي بتك الوحيده في اكتر وقت محتجاكي فيه؟
فاطمة بغل: معاها الي لحس عقلها ياختي.. مش محتجاني فحاجه.. ربيتها وعلمتها وخلتها تحلم تبقى دكتوره عشان تتجوز دكتور زيها وتطلع من ام الحاره والقرف ده.. بس هي عاجبها القرف ووحلت نفسها فيه
دلفت عليهما سمر وقالت بجنون: عشان هي مقرفه من اساسه, حد يقدر يقولي كانو فين هما الاتنين وسايبين الفرح بالي فيه.. كان بيحصل ايه بينهم خلاها تقع من طولها؟ وتلاقيه عمل حجه العمليه عشان يستر عليها
كادت أن تهجم عليها إلا أن وقوف تهاني في اتقي شر الحليم إذا غضب
صرخت في الجميع ليصمتوا ثم قالت بغضب حاسم: اخرسي قطع لسانك.. شهد مهما كانت متدلعه ولا مجنونه عمرها ما توصل انها تفرط في شرفها.. وموسي راجل من ضهر راجل مش هو الي ياخد بت عمه غدر.. اياك يا بت تكوني فاكره اني مصدقه الشويتين الي عملاهم دول؟ دانتي كنتي بتتباهي قدامنا ان جوزك بتاع نسوان, لا دانتي كنتي بتجهزيلو لبسه الي هيسهر بيه مع غيرك واقطع دراعي من هنا ان ما كنتي هتوافقي على جوازه من اي واحده تانيه بس شهد بالذات لا.. عارفه ليه؟ لانك طول عمرك حطاها على راسك ولا هي شبهك ولا من سنك تغيري منها ليه
نظرت لفاطمة وأكملت: وانتي ياختي مش عشان خلفتيها وربتيها عايزاها تعمل الي انتي مقدرتيش تعمليه, مش هتحقق احلامك هي لمجرد انها بنتك
فاطمة بوجل: قصدك ايه
تهاني: قصدي انتي عارفاه كويس داحنا صحاب من صغرنا.. فاكره لما كتي بتشتغلي ممرضه كان حلم حياتك تتجوزي دكتور عشان الناس تقول مرات الدكتور راحت مرات الدكتور جت واحلامك كلها بقت سراب لما ابوكي اجبرك تتجوزي المرحوم الله يرحمه, منكرش انك اتعذبتي معاه بس ربنا عوضك بالحاج الي بيتمنالك الرضى ترضي.. اتقو الله في عيالكو مش معنى انكم خلفتوهم يبقو عبيد عندكم.. وكل الي نفسه في حاجه ومعرفش يعملها عايز ابنه يحققها.. دول بنادمين زينا ليهم رأي وليهم احلام من حقهم يعيشوها.. ماجده, جهزي الحاجه الي هناخدها معانا السيد راح يجيب العربيه وشويه حاجات وهيعدي ياخدنا الي عايز يجي اهلا وسهلا والي مش عايز ان شالله عنه ما جه بلاش قله ادب.. نسوان عايزه الحرق
**
يأتي علينا وقت نتوه فيه, نحتاج مَن يأخذ بيدنا ليدلنا على الطريق الصحيح يصبح أمامنا خياران.. إما أن نكابر أو أن نتشبث بتلك اليد لنصل إلى بر الأمان
بينما كان حسين يخرج من الحارة شارد الذهن لمح حبيبته تقف في مكان قريب ومن الواضح أنها تنتظر أحدا.. اشتعلت الغيرة داخل صدره واتجه إليها بغضب
وقف قبالتها وقال بحدة: السنيوره واقفه كده ليه عالصبح؟ انتي مروحتيش شغلك ليه يا بت لحد دلوقت واقفه مستنيه مين؟
نظرت له بغضب وقالت: صدق بالله كل مره بتخليني اندم اني حنيت ليك ولا حبيت اطمن عليك الله يحرق دمك زي ما حرقتلي دمي عالصبح
لانت ملامحه وقال بعدم تصديق: قصدك كنتي مستنياني؟ وحيات امك جد يا عسليه؟
ردت عليه بغيظ: للاسف اااه.. عارفه ان معاد العمليه دلوقت قولت اكيد هتروح بدري خدت اجازه من الشغل وقولت اجي معاك اطمن عالبت
حسين: طول عمرك جدعه واصيله.. نظر لها بشك وأكمل: انتي جايه من وري ابوكي صح؟
شيماء: لا نور يا واد.. فهمتها لوحدك؟ اكيد مرضاش لما قولتله قالي لما يطلعو بالسلامه امك تبقى تروحلهم البيت وخلاص
كاد أن يسب أباها إلا أنها حذرته قائلة: اياااك.. فاهم؟ لم لسانك الزفر ده متخلنيش اندم اني مسمعتش كلامه
بينما كان يقود السيارة وهي جانبه وجدها تقول بحيرة: الا صحيح يا حسين الي الناس بتقوله ده؟
حسين: وهو ايه الي بيتقال؟
شيماء: ان الزعيم اتجوز شهد وقال بيحبو بعض من زمان.. لا الي مش قادره اصدقه انه هيتوب بيقولو خايف مالموت
حسين: ولا هيتوب ولا حاجه هو بس الموقف كان صعب واثر فيه
شيماء بأمل: طب وليه لا يا حسين؟ مش يمكن ربنا عمل كل ده عشان يخليه يفوق ويرجع عن السكه الي ماشي فيها.. ربنا بيسبب الاسباب ولما بيريد لعبده الخير بيخلق الف طريقه عشان يجيبو بيها
رد عليها بحيرة: اقولك الصراحه الي حصل ده هزنا كلنا.. الي هو ازاي اصغر واحده في العيله تبقى بين الحياه والموت! شهد دي بنعتبرها فاكهه العيله الكل بيدلعها.. مكنتش بتبطل ضحك ولا لماضه ومناكفه فينا.. فجاه تبقي بين الحياه والموت
شيماء بحكمة: لعله خير.. ربنا ليه حكمه في كل حاجه, احنا بس نرضى بيها وهو هيدبرها لوحده
**
دلفت الممرضة إليها كي تجهزها لدخول العمليات
فقالت ببشاشة: تعالي يا شوشو اغيرلك.. خلاص يا حببتي اوضته العمليات جهزت
نظرت لها برعب بينما حبيبها رد مسرعا: هاتي البس وانا هغيرلها.. اطلعي بره وخدي الباب في ايدك ولما نجهز انا وهي هندهلك
اعتادت عليهما لذا لم تغضب من وقاحته بل ردت مازحة: من عونيه.. مش هستغرب خلاص اتعودت على غيرتك عليها.. ده الدكاتره بيخافو يدخلولها.. مصدرين دكتور امير.. بيقولو انت راجل كباره مش هيعملك حاجه
ضحك معها وتابعها إلى أن أغلقت الباب خلفها نظر لشهده وقال بعشق: عاجبك كده يا صغنن؟ اتجننت بسببك
ابتسمت له بعشق وقالت: مانت جننت الصغنن قبلك ومعترضتش عادي
ضمها بحنان ثم قال: ربنا يخليلي الصغنن ويرجع يملا الدنيا ضحك تاني
ضمته بقوة واهيه وقالت: انا خايفه.. عليك مش عليا
بكت فاحتواها ورد بيقين: انا دعيت ربنا وهو مش هيخذلني.. أبعدها برفق وقال: ودلوقت هصلي ركعتين عشان اتحايل عليه يردك ليا
نظرت له بتعجب وقالت: تصلي؟!
وجوابه كان سجده بعد وضوء وهمس مليء بالدموع وحروف خرجت من القلب شقت عنان السماء: يارب.. لو مكتوب تاخد حد خدني انا ونجيها.. خد من عمري واديها يا رب.. بس انا عشمان فيك يا رب.. اديني فرصه اكفر عالي عملته ولو كاتبلي عمر هعيشه وانا بستسمحك عالي عملته, يا رب عشمان في رحمتك وطمعان في كرمك
تمت العملية بنجاح وقد مر أسبوعان بعدها.. صمم موسي المكوث سويا داخل حجرة واحدة وقد بدآ يتعافيان إذ بقي يومان على خروجهما من المشفى بسلام
دلف الطبيب المشرف على حالتهما من بادئ الأمر
ابتسم وقال بمزاح: انا بقول كفايه اسبوعين عسل هنا وتكملو بره ولا ايه
موسى: انا بقول كده برده.. السرير هنا مش مريح وصغير
هز الطبيب رأسه بيأس من وقاحته التي اعتاد عليها ثم قال بجدية: ربنا يهديك ويخليكو لبعض.. احمد ربنا انه نجاها
شهد بقلق: حاسه ان في حاجه يا دكتور.. طب ربنا نجاني موسى كويس ولا العمليه اثرت عليه في حاجه؟
ابتسم الطبيب على تلك العاشقة الصغيرة وقال: اطمني حبيبك زي الفل.. انا بتكلم عنك انتي ربنا كتبلك عمر جديد يا بتي
نظرا له بقلق وعدم فهم فأكمل: لما استاصلنا الكليتين لقينا جوا واحده فيهم والي كانت لسه شغاله حاجه غريبه ..زي حبايه صغيره كده عملنلها تحاليل طلع خليه سرطانيه من نوع نادر بيكبر وينتشر فالجسم كله من غير ما المريض يحس غير وهو خلاص بيموت.. يعني لولا ان اكتشفنا الفشل الكلوي الي جالك ولولا ان جوزك اتبرعلك بكليته
لم يستطع إكمال تلك الجملة المعروفة حينما وجدها تبكي وحبيبها يضمها برعب وكأنه سيمنع عنها ملك الموت.. تركهما الطبيب احتراما لتلك اللحظة فظلا متشبثين ببعضهما البعض ومرت فترة لا بأس بها فسمعته يقول: اللهم لك الحمد
شهد: كنت هموت!
موسى: وربنا نجاكي نحمده ونشكر فضله
مهما تغيرت ستظل روحها الشقية بداخلها.. حدثت حالها بداخلها أن يكفي حزنا.. حبيبها يستحق رسم البسمة على وجهه وبما أنها بين يديه قررت مشاكسته قليلا
دفنت رأسها داخل عنقه فابتعد سريعا وقال: بتعملي ايه يا بت؟ هو ده وقته؟!
ردت بغيظ: هو ده كمان له مواعيد؟ وحشتني يا واد
موسى: انتي اكتر اقسم بالله يا قلب الواد.. بس نتلم ونهدى شويه عشان جرحك ميفكش ماشي
شهد: متخافش مخيطينو كويس.. هو انا موحشتكش؟
رد باشتياق أهلكه: هتجنن عليكي بس مينفعش
شهد: وايه الي قل نفعه داحنا كنا خاربينها؟ عايزه اجربك وانت جوزي والنبي
ضحك برجولة ثم قال: يخربيتك هو انا خلاط؟!
غمزت له بشقاوة وقالت: دانت ميكسر والله.. شوف بقى لما نتحط احنا الاتنين فيه ايه الي هيحصل
شعر أنها تجره معها إلى النقطة التي يريدها وبشدة.. أجلى صوته وقال بجدية: تخفي بس واطمن عليكي ونبقى نشوف الموضوع ده
نظرت له بشك ثم قالت بوقاحة: ولااا.. هو في ايه بالظبط؟! هما اديهم سرحت فالعمليات وال ايه؟!
حقا صدم ولكن مع ضحكاته الصاخبة كان رده أكثر وقاحة منها
نظرت له بعشق خالص ثم قالت بتمني أهلك قلبها: امتى بقى اكون معاك؟ بعشقك يا موسى, بعشقك
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق