رواية انكسار امرأة الفصل السادس والسابع والثامن والتاسع والعاشر بقلم محمد منصور حصريه
رواية انكسار امرأة الفصل السادس والسابع والثامن والتاسع والعاشر بقلم محمد منصور حصريه
ح(6)
انكسار امراة
من تأليفي
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
وبعدها بالظبط بيومين والصبح بدري وفي الميعاد اللي متوعدة تنزل في ضحي تروح كليتها. كانت بتتمشي في شارع من الشوارع الخالية من السكان وقت ما ظهر لها تلت شباب شكلهم يخوف و بداو يلفو حوالين منها والشر كان في عيونهم وضحي ما بقتش عارفة تعمل اية. وقالت بخوف شديد
اللي هيقرب فيكم مني هصرخ والم عليكم الناس
لكنهم قربو منها وكانو ناويين علي الشر لكن في الوقت المناسب يظهر صابر. اللي كان بيراقب بنته ويقول للثلاثة
ابعدوا عن بنتي احسن لكم
لكن واحد منهم هجم عليه وحط له المطواة في بطنة صرخت ضحي ووقع صابر سايح في دمة ولسة الثاني هيروح ناحية ضحي علشان يكتم نفسها لقيت ضحي اللي بيمسكها من ايدها ويحطها وراء ظهره وبيضرب اللي كان بيهجم عليها دة بالرجل في بطنه وهجم علي الاول ادي له لكمة كسرت له فكة من قوتها والثالت شاف المنظر جري وهو مرعوب والاثنين الثانين قامو وجريو بصت له وقالت
انت
رؤوف رد
مش وقته خلينا الاول نطمئن علي باباكي
وشال رؤوف صابر لتاني مرة،،،،،،،،
وبعدها بشوية ومن جوة مستشفي. الهام قاعدة جنب ضحي ويتبص ل رؤوف وكانت بتقول
انا حاسة ان الزمن بيتعاد.
ضحي
بس المرة دي لولا رؤوف كان موجود انا كنت موت.
ولقو رؤوف بيقوم يقف وراح ناحية الدكتور المعالج ل صابر وهما كمان قامو وبمنتهي السرعة والقلق. والدكتور قال
الحمد لله الجرح سطحي. اطمئنوا
وسابهم الدكتور ومشي وضحي قالت
ضحي
الحمد لله.
وبعدها بصت ل رؤوف وقالت
تعبناك معانا.
رؤوف
مش اول مرة انا خلاص اتعود
وابتسم و ابتسمت ضحي و قالت
بس انا مستغربه حاجة
رؤوف
ازاي ظهرت في الوقت المناسب
ضحي
كنت مراقبني صح. زي ما بابا كل يوم كان بيراقبني وفاكرني مش شايفة.
رؤوف
كنت بحميكي من رشا واللي عايزا تعمله فيكي
ضحي باستغراب
رشا
الهام
ما انت نسيت احكي لك انها وقفت معايا في يوم
وبدات الهام تحكي لها كل اللي حصل اتصدمت ضحي وقالت باستنكار
دي متخلفة انا هعمل لية فيها كدة
الهام
قولتها كدة وهي راسها والف جذمة انك انتي اللي عملتي كدة
ضحي
ولو انا اللي عملت كدة يوصل بيها الحال تسلط عليه اللي ياذيني. اية شغل البلطجة دة
رؤوف
عايزك تهدي وانا هخليها تبعد عنك.
ضحي
انا لازم ابلغ البوليس
رؤوف
مش صح. اسمعي نصيحتي وانا اوعدك انها مش هتتعرض ليكي تاني. بعد اذنكم. مضر امشي
ضحي
بسرعة كدة
رؤوف
باذن الله هبقي اجي تاني اطمئن عليه دة لو ماكنش يضايقك
ضحي ابتسمت وقالت
لا. خالص
ومشي رؤوف و ضحي فضلت باصة عليه مركزة مع كل تفاصيلة الجميلة. طايرة هي وقلبها حوالين منه نفسها تبقي في حمايته ملك ايده نفسها تبقي حبيبته الوحيدة. وهنا الهام كانت بتبص لها وبتقول
ايوة وبعدين
ضحي بصت لها وقالت
وبعدين اية
الهام
اصل انا لسة جاية من المستقبل وشايفاكي واخدة باباكي ومعاك علبه جاتو ورايحين تخطبوا رؤوف
ضحي بارتباك شديد
الهام انا مش فايقة ل هزارك دة انا قلقانة علي بابا
الهام رفعت حاجبها لان الكلام مش عاجبها وقالت
ايوة صح دة خايفة عليكي من كتر القلق اللي انتي في
بصت لها ضحي و ماعلقتش ،،،،،،،،
وترجع رشا من اوضتها تلاقي رؤوف نايم علي السرير بالجذمة اللي كلها طينه ودي كانت اكتر حركة بتكرها رشا اتعصبت وبان الغضب علي ملامحها ولسة هتتكلم قال رؤوف
صوتك لو علي اقسم برب العزه هنزل بالجذمة الوسخة دي علي دماغك. وهطلع من هنا علي القسم واقول لهم علي اللي انتي الغشم اللي انتي اجرتيهم وابوه ضحي اللي مات
رشا قفلت باب الاوضة بسرعة والخوف بان عليها وقالت
انت بتقول اية
رؤوف
واحد من الغشم. ضرب الراجل بمطواة في بطنة
رشا قعدت علي السرير مش مصدقة نفسها وقالت
يا نهار اسود. روحت في داهية يا رشا
رؤوف
دة اخرة الدماغ الوسخة. اللي بتعالج اي مشكلة عندها بطريقة امها
رشا
رؤوف ابوس ايدك ورجلك انا مش عايزا ادخل السجن.
رؤوف
سجن اية يا دكتورة. اللي عملتي دة في اعدام
رشا عيطت وقالت
اعدام.
رؤوف باستهزاء
بس. كفاية عياط. صعبتي عليه.
رشا
هو انا هعيط وبس دة انا هضرب نفسي ميت جذمة بعد اللي انا عملته دة
رؤوف
ابو ضحي سليم والجرح جه سطحي وانا خليت ضحي ما تبلغش البوليس لكن
وسكت كام ثانية وبعدها قال بلهجة تهديد
اقسم برب العزة لو قربتي منها تاني،،،،
رشا قاطعته من شدة خوفها وقالت
تاني اية دة انا لو شوفتها ماشية في شارع همشي انا من الشارع التاني،،،،،
وبعدها بشوية كان رؤوف واقف قصاد صابر اللي كان بيستعد للخروج من المستشفي وبيقول
الف حمد لله علي سلامتك
صابر بصوت تعبان
الله يسلمك. انا مش عارف يا ابني اشكرك ازاي علي اللي انت عملته معايا ومع بنتي.
ضحي
لولا رؤوف ما حدش يعرف انا وانت مصيرنا كان هيبقي اية
هنا صابر اتصدم اول ما سمع اسم رؤوف وقال
انا كنت بكذب نفسي وبقول اني سمعت صوتك قبل كدة. مش انت اللي كنت عندنا في البيت وعايز تربيني علشان اعرف اربي بنتي
رؤوف بلع ريقة بصعوبة وقال باحراج شديد
دة كان سوء تفاهم وافتكر انه عدي
صابر
تفتكر
ضحي
بابا انت دلوقتي تعبان خلينا نطمئن عليك الاول وبعدها نبقي نتكلم
صابر
نتكلم في اية. لو كان فاكر انه علشان انقذ حياتي يكون الثمن انتي يبقي غلطان
وبعدها بص صابر ل رؤوف وقال
الدكتورة ضحي عمرها ما تكون ل بلطجي سوابق. ما تزعلش مني انا احب اكون صريح
رؤوف
لما تقول الكلام دة مع واحد شالك علي ذراعه مرتين. ما افتكرش ان دي صراحة. بعد اذنكم
وسابهم رؤوف ومشي وهو هاين عليه يبكي. وبصت ضحي ل صابر اللي قال لها
هي دي الاشكال اللي بنتي خلتني اتعامل معاها
ضحي
علي فكرة يا بابا. البني ادم اللي انت جرحتة دة ابن ناس طيية ومتعلم ومعه بكاليورس تجارة وابوه هو اللي لبسة قضية السرقة بالاكراة.
صابر
وانتي بقي عرفتي دة كله منين. من كلامك معه صح. ما انتو كل يوم شكلكم كنتو بتتقابلو
ضحي
افتكر يا بابا انك مشيت وريا حوالي تلت ايام. شوفتني بكلمه او مشيت معه
صابر اتصدم انها كانت عارفة انه بيراقبها وكملت ضحي وقالت
للدرجة دي الحال وصل بينا. من كام يوم تجيب لي عريس علشان تجوزني لي وتخلص مني وبعدها تراقبني. كل دة لية علشان كنت صريحة معاك وقولت لك ،،،،،،
صابر قاطعها وقال علشان يغير الموضوع
ضحي عملتي محضر ولا لسة
ضحي
محضر اية
صابر باستغراب شديد
محضر اية. محضر تثبتي في اللي حصل لي دة كنت هموت فيها
ضحي
لا يا بابا ما عملتش
صابر
وما عملتيش لية. مستنية اية
ضحي بارتباك شديد اللي خافت تقول ان رؤوف هو اللي طلب منها ما تبلغش
قولت استني لما تقوم بالسلامة
صابر
طيب نخرج من هنا علي القسم علي طول ،،،،،،،،
والمحضر اتعمل وضحي ما قالتش ان رشا وراء اللي حصل. وتعدي الايام وضحي ما بقتش مركزة في الدراسة زي الاول والهام شافت دة فقالت لها
هتخيبي في اخر سنتين
ضحي
غصب عني مش قادرة ابطل افكر في. وكلام بابا معه كان قاسي اوي كلام يوجع القلب
الهام
بصراحة بقي عم صابر كان غلطان في اللي عمله دة. رؤوف فعلا باين عليه طيب ودة ما كنش ينفع يكون الرد علي كل اللي عمله
ضحي
الهام انا عايزا اشوفه واعتذر له
الهام
بقول لك اية. الحكاية بتاعت رؤوف دي من ساعة ما بدات ما جاش ورها الا وجع القلب ليكي
ضحي
بالعكس بقي انا قلبي ما فرحش الا لما شوفته.
الهام باستغراب
وعهد الله انتي مجنونه
ضحي
تعرفي تجيبي عنوان رشا
الهام
هتروحي له
ضحي
لا هبعت له، ،،،،،،،،،،،
وبعدها بيوم ومن قدام الكلية تقف ضحي ومعها الهام وكانت بتبص في ساعة ايدها وبتقول
هو اتاخر لية كدة. انتي متاكدة ان الواد ادي له الورقة
الهام
ايوة متاكدة ولهف مني جنية بحاله
ضحي
عارفة انك زعلانه علي الجنية
الهام
والله لو في دم تاكليني كوكو
ضحي
هاكلك بس لما اشوفه
وفعلا يوصل رؤوف. وتبتدي حكاية غير الحكاية اللي فاتت خالص.
ح(7)
انكسار امراة
من تأليفي
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
من جوة كافية. قريب من الكلية تقعد ضحي وجنب منها الهام قصاد رؤوف اللي كان بيبص للكافية وعارف انه مش هيقدر علي ثمن كوباية المية في وسمع ضحي بتقول
تشرب اية
رؤوف
ماليش نفس
ضحي
ازاي بس انت بخيل ولا اية
رؤوف
معلش ماليش نفس
الهام
باين عليك مكسوف مننا
ابتسم رؤوف وبص ل ضحي وقال
ممكن اعرف انتي طلبتي تشوفيني لية
ضحي
والله ما هتكلم غير لما تشرب حاجة
رؤوف
ما توعدش اشرب علي حساب حد.
وما توعدش اقبل عزومة ما قدرش اردها. ف من فضلك ممكن اعرف عايزا مني اية
ضحي فهمت هو يقصد اية وقالت
طيب براحتك. وانا طلبت اشوفك علشان اتاسف لك عن الكلام اللي قاله والدي
قام وقف رؤوف وقال
ما حصلش حاجة.
ضحي
وقفت لية
رؤوف
انتي عايزا تقولي حاجة تاني
ضحي
اة انا لسة ما خلصتش كلامي
رؤوف قعد تاني وبص لها وهي بصت له وما كنتش لاقية حاجة تقولها و رؤوف بص لها ومستنيها تتكلم وهي بصت ل الهام و الهام برقت لها وهي حركت دماغها بمعني اقول اية. الهام هزت دماغها ونزلت شفتها ل تحت بمعني ما عرفش. ضحي لعبت عيونها بمعني انطقي قولي اي كلام الهام هزت دماغها زي الهنود بمعني وانا مالي.
و رؤوف باصص لهم وهز دماغة بمعني انه ماشي. وقام وقف تاني هنا نطقت ضحي وقالت
رايح فين بس.
رؤوف
اصلي شايفكم بطقطقة دماغتكم ف انا ماليش في الطقطقة دي
ضحي ضحكت والهام زيها وقالت ضحي
انت اللي مصعبة علينا. ومدينا وش مش حلو خالص
قعد رؤوف وقال وهو بيضحك
حلو وش الضحك دة
ضحي
ايوة كدة نعرف نتكلم
وهنا استأذنت الهام. وضحي بصت ل رؤوف وهو بقي اللي قال
انتي عايزا اية مني بالظبط عملتي علشاني كتير
ضحي
انت كمان عملت علشاني كتير. وقدمت لي اكتر من اللي حلمت بي
رؤوف
انا ماحلتيش اي حاجة اقدمها ل حد
ضحي
انت لية شايف نفسك قليل كدة
رؤوف
علشان هي دي الحقيقية انا واحد قليل ما حلتيش اي حاجة. عارفة انا يوم ما اتهجمت عليكي في البيت عملت كل دة علشان خاطر 10 ج. حق علاج امي
ضحي
هو انت بتشتغل اية
رؤوف
كنت مساعد شيف في مركب عائم لكن بسبب القضية اللي عليه اترفد بعد ما كنت خلاص هبقي شيف مشاوي قد الدنيا
ضحي
ولما انت شيف شاطر كدة لية ما تروحش تشتغل في اي مطعم تاني
رؤوف
ما فيش فندق هينزلني من غير ما عمل فيش
ضحي
طيب ما تفتح مطعم صغير او ان شاء الله حتي عربية صغيرة تبيع فيها ساندوتشات
رؤوف
وفين بقي الفلوس اللي تعمل المطعم او حتي تشتري العربية
ضحي فكرت شوية وبعدها قالت
موجودة باذن الله، ،،،،،،،
من جوة اوضة الهام اللي كانت قاعدة قصاد ضحي وبتقول بعصبية
والله العظيم انتي مجنونه رسمي
ضحي
لية دة كله علشان ناوية اساعده
الهام
تساعدي بانك تبيع كل الذهب بتاعك وتدي له يفتح بي مطعم
ضحي
عادي يعني دة واحد وقف قدام ثلاثة بسلاح علشان ينقدني
الهام
ودة يكون المقابل بتاعة ذهبك
ضحي
الحياة اغلي ولا الذهب
الهام
ضحي للدرجة دي بتحبي
ضحي عيونها ضحكت وقالت
وعايزا يكون احسن الناس
الهام
وعم صابر لو عرف
ضحي
ما عرفش وقتها هعمل اية لكني في دلوقتي
الهام
انا مش مرتاحة ومش حابة اللي انت عايزا تعملي دة
ضحي
بس انا حابة اعمل كدة وهعمل كدة
الهام
يا بنتي والله دماغك دي هتجيب لك الكفيا، ،،،،،،،،
وبعدها ب اسبوع بالظبط كانت في عربية متجهزة في شارع جنب جامعة القاهرة والعربية واخدة ترخيص وكل اوراقها خلصانة وضحي رايحة ناحية العربية دي ومعها رؤوف استغرب رؤوف وقال
اية دي
ضحي
عربيتنا اصلي فكرت كتير افتح المشروع دة و نبقي شركاء انا براس المال وانت بالمجهود
رؤوف مستغرب جدا وقال
وانتي تعرفيني منين علشان تخليني شريك معاكي
ضحي
بقول لك اية كفاية اسئلة وشوف اية اللي ناقصك من بضاعة خلينا نجيبهم سوي
رؤوف
انتي بتعملي دة كله معايا لية
ضحي
سؤال تاني. ممكن ما ضيعش وقتنا وخلينا نبدا
رؤوف
نبدا اية انا مش فاهم حاجة
ضحي
رؤوف نفسك تشتغل وتنجح ولا تفضل علي حالك دة
رؤوف
اكيد يعني مش عايز افضل كدة
ضحي
يبقي تشتغل وتكبر العريية دي وتخليها مطعم و اتنين و تلاته.
بص رؤوف ل ضحي اوي وعيونه حضنت عيونها مش مصدق اللي هي بتعمله علشانه. وضحي حست بفرحتة وفرحت و حست باللي عمرها ما حسته.
لذعة الحب اللي بدفي البردان في ليل طوبة. ،،،،،
واشتغل رؤوف وفي فترة صغيرة بقي لي زبائن كتير. والفلوس بدات تزيد معه
وقرر يفرح امه وراح لها بعباية جديدة واستغربت كريمة وقالت
جبت منين فلوس العباية دي. انت بقالك شهر حالك مش عاجبني
رؤوف
يا اما ما انا قولت لك اني اشتغلت
كريمة
شغل اية دة اللي يمسكك كل الفلوس دي في شهر. ومين يشغلك وانت سوابق
رؤوف
كل دي اسئلة. طيب البسي العباية الجديدة دي وهاخدك ونروح مشوار صغير كدة وهناك هتعرفي كل حاجة
مين بقي كان متابع كل اللي بيحصل دة
مرات ابوه زهرة. اللي كانت مستغربه كل اللي بيتقال وبيحصل، ،،،،،،،
ومن قدام العربية يقف رؤوف ومعه امه اللي مستغربه العربية وقالت
بتاعت مين العربية دي
رؤوف
بتاعت ضحي وانا شغال معها
كريمة
اية حكاية ضحي دي
رؤوف
ما عرفش. بس بتعمل علشاني كتير
و انا يا اما نفسي تكون مراتي. بس صعب
كريمة
قول يارب والصعب يهون
ولف دخل العربية وقال
استني بقي لما اعمل لك كام ساندوتش شاورما
كريمة
واية الشاورما دي
كان بيحضر رؤوف الساندوتشات وبيقول
هتعرفيها دلوقتي ومن هنا ورايح مش هتاكلي الا الاكل دة،،،،،،،
وتلف الايام والشهور والعربية شغاله زي الفل واكتر و ما بقاش قادر يقف في العربية ل وحدة ولقي ضحي بدات تقف معه في العربية تساعده في تفتيح الفينو في تقطيع السلطة ودة بعد الكلية. و رؤوف قال لها
كدة كتير عليه اوي.
ضحي
ما فيش اي حاجة تكتر عليك
وبدا العلاقة تزيد ما بينهم والحب بيكبر ويكبر و بقت ضحي في ستة طب. وحصل اللي خلي الدنيا تنقلب لان ضحي شافت صابر واقف قدام منها وباصص لها هي و رؤوف ،،،،،،،،
خلاويص النهاردة ولو في العمر بقيا هكمل لكم الحكاية ديا سلام عليكم
ح(8)
انكسار امراة
من تأليفي
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
و بدات العلاقة تزيد ما بينهم والحب بيكبر ويكبر و بقت ضحي في ستة طب. وحصل اللي خلي الدنيا تنقلب لان ضحي شافت صابر واقف قدام منها
و باصص لها هي و رؤوف.
كتير منكم هيسال وهو عرف ازاي. تعالو اقول لكم. ،،،
مشروع العربية دي عدي عليه سنة كاملة. وكل حاجة كانت ماشية كويس لكن من تلت شهور فاتو وبالتحديد في اجازة اخر السنة. كانت زهرة متابعة العز اللي بدا يبان علي رؤوف واللي كان كل شوية يجيب حاجة ل امه. مرة عباية مرة حلق ذهب مرة سلسة ذهب ومرة غويشة راحت ل بنتها رشا
و حكيت لها و رشا كانت هاتتجن وقالت
ودة جاب الفلوس دي كلها منين وهو سوابق ومستحيل حد يشغلة عنده
زهرة
الواد شكله شغال في الممنوع
رشا
يخرب بيته دة كدة هيشبهنا
زهرة
واحنا مالنا. احنا اللي يهمنا دلوقتي ان فلوس الواد دة تبقي في حجرنا
رشا
ودة يحصل ازاي بقي
زهرة
ب الجواز يا روح امك
رشا باستنكار
نعم. انا الدكتورة رشا اتجوز الشحات دة
زهرة
مبقاش شحات واصحي كدة للكلام. انتي كلها كام سنة وتتخرجي وعلشان تعبي من العز وتكبشي لازم تفتحي عيادة ولا عايزا بعد تعب السنين دي كلها تترمي في مستشفي حتة دكتورة ب كام مليم في الشهر
رشا
يا اما دة كان بياخد مني. فلوس يجي عليه الزمن يكون دة جوزي
زهرة
بت انا مش عايزا احس اني بنتي متخلفة. هو رؤوف دلوقتي هو رؤوف بتاع زمان. ارمي الهلب عليه وهتكسبي
قبل ما تلاقي واحدة غيرك عرفت توقعه احنا اولي
رشا
يا اما دة لا انا بضيقة ولا هو بيضقني ارمي عليه الهلب ازاي
زهرة
بقيتي عجلة وما تعرفيش الست تجيب راجل ازاي. بالمرقعة يا روح امك بس اوعي تزودي المرقعة واليكي في يوم حامل منه قبل ما يكتب عليكي ،،،،،
بعدها بيوم رشا في اوضتها لابسة بالطو وقاعدة علي السرير وباب الاوضة خبط فقالت
ادخل يا رؤوف
دخل رؤوف وشاف اللي هي عاملة في شعرها وفي وشها ما ارتحش لكنها قالت
اقفل الباب وتعالي
رؤوف
فين امي وامك وابويا. الشقة فاضية لية دلوقتي
رشا قامت من فوق السرير وراحت ناحيتة وهي بتقول. بدلع مش لايق علي عقربة زيها
ابوك في الشغل ومطبق وامي خدت امك ونزلو يتسوقو
وققلت الباب وقربت اوي من رؤوف اللي قال باستغراب
ودة من امتي امك بتنزل السوق مع امي
مسكتة من ايدة وهي بتقول
من النهاردة اصل امي شافت ان الحمل بقي زيادة علي امك فقررت تساعدها. عايزا تبقي حنينة عليها
سحب رؤوف ايدة من ايد رشا وقال
وانتي كمان ناوية تبقي حنينة عليه
رشا
وفيها اية تعالي ننسي كل اللي كان بينا زمان ونبدأ من جديد
وقعدته علي السرير وحطت رجل علي رجل غطي رجلها اللي بانت وقال وهو بيقف
انا صحيح ابويا عزيز امك عرفت تجيبة بالطريقة الرخيصة دي بس انا مش زية
وسحب ملايا السرير ورماها علي رجليها وقال
غطي رجلك يا دكتورة علشان ما تبرديش ويجي لها فيها روماتيزم
وسابها وخرج من الاوضة وهي حاسة قد اية هو اهان انوثتها. وبدات تغل علي ساننها اللي كانت هتتكسر من كتر الغل وقالت بشر مخيف
انا رخيصة يا ابن كريمة طيب وحياة امك ل عرف اصل وفصل الفلوس اللي ظهرت في ايدك دي واخربها عليك اصبر عليه
وبدات فعلا رشا تدور وراء رؤوف لغاية ما وصلت لعربية الاكل وشافت ضحي واقفة معه بتساعده. وقالت
الله بقي هي الحكاية كدة. بس برضو محتاجة اعرف شوية تفاصيل. زي جاب حق العربية منين ولية ضحي واقفة معه. بس اعرف ازاي اصل الحكاية
وهنا جه في بالها الهام، ،،،،،
ومن جوة اوضة الهام تقعد رشا قصاد الهام وكانت بتقول لها
وتخيلي بقي وانا في ظهر جامعة القاهرة اشوف مين ضحي مع رؤوف. والناس كلها هناك بيقولو انهم اتجوزو وعلي طول ما بعض
الهام بتلقائية
مين دول اللي اتجوزو. دة باباها لو عرف انها بتشوف رؤوف هيخرب الدنيا
رشا
لية يعني هو رؤوف كان عمل له اية. والله العظيم رؤوف دة اطيب خلق الله دة احنا متربين سوي
الهام
هو بقي عم صابر ما بيحبوش مع انه انقذ حياته مرتين
رشا
غريبة. انما ما قولت ليش رؤوف اشتري العربية دي بالقسط زي ما الناس بتقول
الهام
قسط دة انتي طيبة اوي يا رشا
رشا
اومال اشترها ازاي
وبدات الهام تحكي وتقول وما كنتش تعرف ان العقربة بتجهز للدغة هتجيب اجل العلاقة بين ضحي و رؤوف، ،،،،،
ونرجع تاني ل صابر اللي واقف قدام العربية وبيقول ل ضحي
اشتريتي وبعتيني صح
ضحي خرجت جري من العربية وراحت ل ابوها وقالت
لا. يا بابا ما تقولش كدة
لكن صابر ما كنتش رد فعله الا قلم نزل علي وشها. وسحبها من ايدها وهنا رؤوف كان لسة هيدخل بص له بغضب شديد وقال
اوعي تنطق كلمة واحدة انا ماليش عليك لوم انا اللوم كله علي اللي ما عرفتش اربيها. واول مرة سمعت فيها صوتك كنت جاي تكسر عضمي وتربيني علشان اربيها وانا هعمل بنصيحتك وهربيها
رؤوف
طيب ممكن تسمعني
صابر بمنتهي العصبية
قولت ما فيش كلامي بيني وبينك.
ومشي خطوتين وبعدها وقف وبص ل رؤوف وقال
فضي العربية دي علشان هتتباع دي جاي لك ب ذهب بنتي اللي باعته من ورايا
اتصدم رؤوف وحس ان الدنيا كلها اسودت في وشة. وضحي بتبص له وهي بتعيط وهو بيسحبها من ايدها،،،،
ورجع رؤوف ل امه وقعد قدام منها وقال
يا اما قلقان عليها. انتي ما شوفتيش ابوها كان عامل ازاي وهو بيجرها في الشارع
كريمة
ما هي برضو غلطانة. تعمل دة كله من وراء لية
رؤوف
انا الغلطان يا اما اني خلتها تقرب مني من غير اي علاقة رسمي كان لازم اخاف عليها من يوم زي دة
كريمة
وانت بس كنت تعرف انها عملت دة كله من وراء
رؤوف
اعرف بقي ولا ما اعرفش انا هموت عليها من القلق دي اطيب خلق الله ما تستاهلش مني اللي حصل لها بسببي دة
وقام رؤوف وراح ناحية الباب. وفتحة وقالت كريمة
رايح فين
هنا يسمعوا صوت رشا جاي من وراهم
ودة سؤال برضو رايح لها طبعا
بص لها رؤوف وقال
شامم ريحتك الوسخة
رشا ضحكتك وقالت
واحدة رخيصة بقي تستني منها اية الا كدة
رؤوف
رخيصة وبجحة
رشا
روح اطمئن علي السنيورة. ولو طلعت روحها اعرف حانوتي كويس وسعره حنين
رؤوف قرر يمشي قبل ما يرتكب جريمة قتل، ،،،،،،،،
ومن جوة شقة صابر اللي كان بيقطع جسم ضحي بالحزام. ورغم بصته ليها وعياطها المكتوم اللي انه كان مكمل ضرب فيها وبلا اي رحمة وكان بيقول
دلعي ليكي وصلك لاني تكسري كلمتي. وتعملي اللي في دماغك. اي مالكيش كبير
ضحي كانت بتبص له ودموعها بتنزل وحتي ما كنتش بدافع عن نفسها بانها تحط ايدها وتحوش الحزام انه ينزل علي جسمها وفضل يضرب لغاية ما تعب وعيونه جت في عيونها ما قدرش يستحمل دة عمره ما ضربها ولا كان قاسي عليها لقي نفسه بيبكي وبيرمي الحزام علي الارض وبيسيب الاوضة وبيخرج. ويقعد علي الركنة بيبص ل ايدة مش مصدق اللي عمله وضحي خرجت وراء منه وفي ايدها الحزام وبتقول ودموعها مخلوطة بحروف كلامها
لو حاسس انك لسة ما خدش حقك كمل ضرب.
بص لها وهي قالت
غصب عني خليتك تتعصب وغصب عني حبيته
صابر
عرف يضحك عليكي ويبيعك الذهب بتاعك
ضحي
اقسم لك برب العزه ان رؤوف ما كنش يعرف ان العربية بثمن الذهب
صابر
يعني اية
ضحي
يعني انا اللي عملت دة كله علشان عايزا يكون احسن الناس
صابر بعصبية
هو اية ساحر لك
ضحي
لا. انا اللي اتسحرت بي. ومش شايفة غيره جوزي
صابر
امشي يا ضحي من قدامي ومش عايز اسمع اي كلمة منك تاني تخص رؤوف،،
وبعدها بيوم. وقت ما كان صابر قاعد في الصاله وضحي في اوضة نومها. ويرن جرس الباب يفتح صابر ويلاقي قدام منه رؤوف وفي ايدة شنطة سوداء بص له صابر بغضب وقال
عايز اية
رؤوف
انت كنت عايز تبيع عربية الاكل وانا جاي اشتريها منك
وحط شنطة الفلوس في ايد صابر مسك صابر شنطة الفلوس وقال رؤوف
كدة ثمن الذهب بتاع بنتك رجع. وبزيادة. ودي كانت اول حاجة جاي علشانها
في الوقت دة لما ضحي سمعت صوت رؤوف فتحت الباب و بصت ل رؤوف اللي كان بيقول
وتاني حاجة جاي علشانها انا جاي وطالب الحلال وعايز بنتك تكون مراتي
دمعت عيون ضحي من الفرحة وقلبها زغرط. و صابر رد. وقال ،،،،،،،،،
خلاويص النهاردة ولو في العمر بقيا هكمل لكم الحكاية ديا سلام عليكم
ح(9)
انكسار امراة
من تأليفي
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
في الوقت دة لما ضحي سمعت صوت رؤوف فتحت الباب و بصت ل رؤوف اللي كان بيقول
وتاني حاجة جاي علشانها انا جاي وطالب الحلال وعايز بنتك تكون مراتي
دمعت عيون ضحي من الفرحة وقلبها زغرط. و صابر رد. وقال
الكلام في الامور دي ما يبقاش من علي الباب
ابتسم رؤوف ووسع له صابر الطريق ودخل رؤوف وقعد علي الانترية وقال
يعني موافق
صابر وهو بيقعد قدام منه وجنب منه ضحي
طالما جيت برجلك لغاية هنا يبقي انت عايزها بجد. مش بتلعب بيها وقولت بركة انها خلصت علي كدة. وما خوفتش من اللي انا ممكن اعمله فيك
وبص ل ضحي وكمل وقال
وهي عايزاك ازاي اقف في وش سعادة بنتي. انا لو عايش دلوقتي اللي هيكمل معها مستقبلها اللي هي هتختارة بنفسها وهي كبيرة وافتكر انها تقدر تختار صح
ضحي بمنتهي الفرحة خدته في حضنها وفضلت تبوس في وهي بتبص ل رؤوف وبتعيط من شدة الفرحة. و صابر شاف فرحة بنته بكي وقال
بس ما فيش وقوف في عربية الاكل انتي تركزي في المذاكرة وبس دي كلها سنة وتيقي دكتورة
ضحي
رؤوف جاب اكتر من واحد يقف معه وكان بيسرقه وهو ما ينفعش يقف ل وحدة العربية بقي ليها زبائن كتير
صابر
انا اعرف عيل غلبان وعايز ياكل عيش. وايدة مش طويلة
رؤوف
وانا موافق. علي اي حاجة تقولها يا استاذ صابر
صابر
اية استاذ دي انت جاي تاخد درس. قولي يا عمي
رؤوف بابتسامة عريضة قال
يا عمي. ،،،،،،،،
وجت الهام جري ل ضحي لما عرفت باللي حصل وقالت الهام
وافق بسهولة كدة
ضحي
هو اية اللي بسهولة دة قبليها بيوم كان مقطع جسمي بالحزام لكن انا عارفة بابا حاسبها ازاي.
الهام
حاسبها ازاي
ضحي
حكاية رؤوف مش هتخلص بالنسبة لي لان دة اللي قلبي اختاره وهو عارف اني عندية ومجنونه. ومش هتجوز غصب عني حتي لو جالي وزير فقال ل نفسه بلاش الدنيا بينا تكون سواد ف سواد وهو مش هيحبسني في البيت اكيد. هخرج وهروح واجي. يعني سهل اشوف رؤوف طيب لية بقي كل دة يحصل من وراء ما يحصل قدام منه وهو يبقي عارف بي
الهام
ياربي علي دي حكاية معرقبة
ضحي
نصيبي وقسمتي. يكون رؤوف بكل ظروفة الملغبطة هو اللي يختارة قلبي، ،،،،،،،
وتمت الخطوبة وضحي كانت بتعيش احلي ايام حياتها. وعملو شبكة في قاعة حلوة و رشا كانت قاعدة جنب امها زهرة في القاعة وكانت زهرة بتقول
عجبك كدة بقت حتة بت نيلة زي دي تاخد منك رؤوف بكل العز اللي بقي في
رشا
والنبي ما تحسسنيش ان رؤوف دة بقي مليونير دول هما كام الف عملهم من عربية الاكل
زهرة
يا خايبة هما بتوع الاكل والشرب دول اللي واكلينها ولعه الناس عمرها ما هتبطل تاكل
رشا
امي. تعرفي تسقفي وانتي ساكتة
زهرة وهي بتبص علي العباية اللي لابساها كريمة
اسقف علي خبتي. دة لبس امة عباية ما كنتش تحلم تعدي قصاد محل بيبعها،،،،.
وبعدها ب كام شهر ووقت ما كانت ضحي بتمتحن اخر امتحان تخرج من الكلية تلاقي رؤوف قدام منها علي موتوسيكل لسة جديد استغربت وقالت
موتوسيكل مين دة
رؤوف
بتاعي اشتريته علشان اوصل بي طلبات للزبائن
ضحي
اية دة يعني الاكل يوصل ل غاية البيت
رؤوف
ايوة شغلنا يا فندم في العربية بتاعتنا خاصية الدليفري
ضحي
وسايب شغلك وجاي هنا لية دلوقتي في حد طلب منك اكل
رؤوف وهو بيبص في عيونها
لا. بس انا حسيت اني عطشان جيت اشرب
وقرب منها فقالت ل ضحي وهي بتبعد وبتبص حوالين منها
ممكن تتلم احنا في الشارع
رؤوف
اية مش خطبتي وكلها كام. شهر والنتيجة تظهر وتبقي مراتي
ضحي ضحتك وقالت
لما ابقي مراتك. بقي ابقي اشرب. ومش هيكون في الشارع يعني
رؤوف بحب شديد
امتي بقي
ضحي
هانت
رؤوف
طيب اركبي لما اخدك لفة
ضحي
لفة اية انت مجنون صح. روح يا شاطر بالفسبا دي وشوف شغلك
رؤوف
الدنيا هادية دلوقتي وجابر الواد اللي بيساعدني في العربية. شايل الشغل شيل ما تقلقيش. اركبي بقي علشان عايز افرجك علي اوضة النوم بعد ما اتشطبت
ضحي بصت للموتوسيكل
انا بخاف من البتاع دة
رؤوف
اركبي وامسكي فيا كويس ومتخافيش
ركبت واتحرك بيها ،،،،،،،،
وتم الاتفاق بين رؤوف وصابر علي ان كتب الكتاب والدخلة يكونو بعد تخرج ضحي وفعلا اتخرجت ضحي. اللي شقتها جهزت للجواز و رؤوف فتح اول مطعم في وسط البلد والدنيا بقيت حلوة معه وقرر يروح ل صابر ويتفق معه علي ميعاد الفرح. وفعلا قعد قاصد صابر وقاله
عمي خلاص بقي ضحي اتخرجت وانا شقتي بقت جاهزة يعني افتكر وبعد اذنك نتم الجواز
صابر
جواز مين
اتصدم رؤوف وقال
جواز مين. جوازي من ضحي
صابر
هو انت مصدق بجد اني ممكن اجوز بنتي ل واحد سوابق زيك
رؤوف
عمي صابر ا،،،،،،
قاطعة صابر وقال
اسمي استاذ صابر. وانا لو كنت مشيت معاك انت وبنتي في حوار الخطوبة دة ف انا مشيت علشان بنتي كان فاضل لها سنة وتتخرج. تفتكر اني كنت اسييها تضيع مستقبلها قولت اسيبها تتخطب لك علشان نخلص من وش الحب دة اللي صدعتنا بي. لكن اوعي تفتكر اني كنت هسييك تتجوز ضحي
رؤوف كان هاين عليه يكسر الدنيا وقال بصوت مخنوق
و ضحي موافقة علي الكلام دة
صابر
ضحي جوة في اوضتها لو كان الكلام مش عاجبها كانت طلعت وقالت ان الكلام مش عاجبني. لكن انا متفق معها علي كدة وقولت لها يا انا يا انت وهي اختارتني انا
رؤوف بص ل باب اوضة ضحي والكسرة في عيونه وفي قلبه مش قادر يصدق اللي سمعه وصابر شافو باصص للباب فقام وقف وراح ناحية الباب ومسك مقبض الباب وقال
تحب اخليها تخرج بنفسها وتسمعك اللي انا قولته
رؤوف ما ردتش وقام وخرج من الشقة والنار بتاكل في قلبه. ورزع الباب وراء منه وصابر فتح باب الاوضة وبص ل ضحي اللي كان مكتفها في السرير ومكمم بوقها. وكانت بتبص له ودموعها علي خدها. وقال بصوت حزين
بكره تعرفي اني عملت كدة علشان مصلحتك. اوعي تزعلي مني.
وفضلت باصة له بلوم شديد وهو قفل عليها باب الاوضة وكانه قفل باب القبر، ،،،،،،،
خلاويص النهاردة ولو في العمر بقيا هكمل لكم الحكاية ديا سلام عليكم.
ح(10)
انكسار امراة
من تأليفي
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
رؤوف ما ردتش وقام وخرج من الشقة والنار بتاكل في قلبه. ورزع الباب وراء منه وصابر فتح باب الاوضة وبص ل ضحي اللي كان مكتفها في السرير ومكمم بوقها. وكانت بتبص له ودموعها علي خدها. وقال بصوت حزين
بكره تعرفي اني عملت كدة علشان مصلحتك. اوعي تزعلي مني.
وفضلت باصة له بلوم شديد وهو قفل عليها باب الاوضة وكانه قفل باب القبر ،،،،،،
ويرجع رؤوف لشقتهم وهو بيغلي ويلاقي ابوه عزيز في ايدة رزمة فلوس وكان بيقول ل كريمة بعصبية
فلوس ابني يا ولية واخد منها اللي انا عايزة وقت ما حب. ولا انتي تلبسي وتدلعي ومراتي زهرة وبنتها يفضلو محرومين من عز رؤوف
كريمة وهي بتحاول تاخد الفلوس من ايد عزيز
ابني ملهوش ان يصرف علي العقربة مراتك وبنتها. وهات فلوس ابني اللي تعبان فيها. وعيب لما تسرق فلوس ابنك من دولابه
زقها عزيز وقعها علي الارض راح لها رؤوف وقومها و قال
انتي كويسة
كريمة هزت دماغها بمعني انها كويسة بص رؤوف ل عزيز بغل شديد وافتكر كلمة صابر
مش هجوز بنتي لواحد سوابق
وافتكر ابوه وهو بيبلغ عنه وبيتهمة بالسرقة راح ناحية عزيز وقلبه قايد نار لانه السبب في كل اللي حصل واللي بيحصل هو اللي خلي من خريج تجارة محترم المستقبل كله قدام منه ل واحد سوابق اللي زي صابر عايره بيها. وقرب من عزيز اللي كان بيقول
اية يا روح امك باصص لي ومكشر لية كدة. هتضربني ولا اية يا ابن كريمة
لكن رؤوف كان بيقرب وعزيز بيبعد من الخوف شايف الشر في عيون ابنه و كل اللي كان سمعه رؤوف كلمة صابر لي اللي بتتكرر بشكل مخيف
واحد سوابق واحد سوابق
ومسك رؤوف ايد ابوة اللي فيها فلوسة
وعيونه احمرت من القهر والظلم وكسرة النفس ولوي ايد ابوه وخد منه الفلوس بالعافية وعزيز بيضربه بايدة التانية علي وشة لكن رؤوف مش حاسس باي وجع. وصرخ عزيز لان رؤوف من غير ما يحس كسر ايد عزيز اللي ما كنتش عايزا تسيب الفلوس وزق عزيز وقعه علي الارض وبص له وقال
ابعد عني. انت فاهم. واياك تقرب مني تاني او من امي. عارف لية علشان انا بكرهك. بكرهك
وبص ل امه وقال
خشي لمي كل هدومنا علشان احنا هتسيب البيت دة مخروب علي دماغ اللي في
كريمة
هنروح فين بس
رؤوف
شقتي اللي في شارع الزهراء
كريمة
دي اللي انت هتتجوز فيها
رؤوف
خلاص يا اما مافيش جواز كل حاجة راحت
كريمة اتصدمت وقالت
كلام اية دة
رؤوف
ابوها قالي انت سوابق. ازاي تصدق اني اجوزهالك
وصرخ رؤوف وكسر الازاز اللي كان قدام منه بايدية وكمل وقال
وهي اختارت انها تكون مع ابوها لما خيرها بيني وبينها اختارته هو.
وصرخ من القهر ووجع القلب وابوه لاول مرة يحس قد اية هو ظلم ابنه الوحيد قام وراح له وحاول يواسي زقه رؤوف بعيد عنه ودموعه علي خده وقال
ابعد عني. انا مش طايقك.
ومسح الدموع اللي هربت وقال
يلا يا اما نغور من هنا
كريمة صعبت عليها ابنها وقالت
حاضر. بس اهدئة ل يحصل لك حاجة
رؤوف ضرب قلبه بايدة وقال
انا كويس. كويس اوي ومش هموت علشان هي مش معايا
وحاول يمسك دموعه لكنها هربت غصب عنه وصرخات قلبه ما كنتش عايزا تقف، ،،،،،،،،،
وبعدها ب تلت ايام كانت الهام في شقة صابر وواقفة قدام منه وبتقول له
خشها لها وخليها تاكل وتشرب صاحبتك بتموت نفسها بالبطئ
الهام
اللي حصل ما كنش شوية يا عم صابر وبصراحة بقي وما تزعلش مني انت جيت عليها اوي
صابر بعصبية
الهام انا ما طلبتكيش علشان تعرفيني انا صح ولا غلط. انا طلبتك علشان تكوني جنب صاحبتك وتعرفيها ان اللي بتعمله دة. غلط عليها
الهام
ضحي علاجها الوحيد اسمه رؤوف
صابر بمنتهي العصبية
ملعون ابوه رؤوف علي اليوم اللي شافت في رؤوف هو انا كنت بربي وكبر. علشان ابوه احفادي يكون سوابق. انتو حصل لكم اية في دماغكم بقي عادي تتجوزه من اي حد طالما شكله حلو. الجواز نسب وعصب واسم هيتشال طول العمر
الهام
يا عمي رؤوف مظلوم وابوه جني عليه زي ما انت بتجني علي بنتك دلوقتي وبتخلص عليها ب ظلمك ليها
صابر برق ل الهام وقال
انا ظالم.
الهام احرجت وقالت
ما قصدش ان،،،،،،،
صابر قاطعها وقال
دة انا اكتر اب حب بنته.
الهام
يا عمي ما تفهمنيش غلط بس ضحي مش صغيرة وهي اللي هتعيش مع رؤوف مش احنا سايبها تعيش تجربة اختيارها. مش صح ان حضرتك تحرمها من اللي اختارته بالشكل دة. دة انت قافل عليها وكانها مدفونه بالحياة
صابر
للدرجة دي انا غبي.
الهام
من فضلك يا عمي انا مش عايزاك تفهم كلامي غلط. انا بعتبرك زي بابا. وانا عيشت في البيت دة زي ما عيشت في بيتنا. ضحي اختي مش صاحبتي وبس
صابر بصوت حزين
طيب خش لها وخليها تاكل انا مش قادر استحمل اللي هي بتعمله في نفسها دة.
الهام
حاضر يا عمي هدخلها
و صابر بدا يدوخ والدنيا تلف بي وهو باصص علي الهام وهي رايحة ناحية اوضة ضحي وبمجرد ما فتحت الهام الباب. تسمع صوت ارتطام جسم صابر بالارض لفت وشها بسرعة لقت صابر علي واقع علي وشة ميت ،،،،،،،،،
جنازة صابر كانت بعد الظهر في نفس اليوم حزن ضحي والهام ماشية جنب منها في الجنازة. مع بعض ستات العائلة ورجاله العائلة في اول الجنازة.
دة كان حال وشكل المشهد في احداث مابعد موت صابر،،،،،،،،،
وبعدها ب اسبوع كانت ضحي قاعدة من الهام وبتقول لها وهي بتعيط
تعبانه اوي يا الهام ومش مصدقة لغاية دلوقتي انا بابا مات. هو انا كدة السبب في موته يا الهام
الهام
بتقولي لية كدة يا ضحي. انتي مظلومة مش ظالمة.
ضحي
والله انا ما بقتش عارفة انا ظالمة
ولا مظلومة. لكن كل اللي اعرفه ان بابا واحشني اوي ولو ما كنتش عرفت رؤوف كان زمانه لسة عايش ومعايا
الهام
ضحي هتخرفي بقي ولا اية. عم صابر من قبل ما يتولد وهو مكتوب له هيموت امتي.
ضحي وهي منهارة من العياط
برضو حاسة ان اني السبب يا الهام
واترمت في حضنها وفضلت تعيط، ،،
ومن جوة اوضة نوم رؤوف الاوضة اللي كان هيتجوز فيها كان رؤوف نايم علي الارض وجنب منه شريط برشام مخدر دخلت كريمة عليه الاوضة ولقت المنظر دة وشريط البرشام جنب منه راحت ناحية شريط البرشام ومسكت الشريط اللي كان متاخد منه 5 حبيات فضلت تقلب في الشريط حس بيها رؤوف فقام مفزوع وقال
ضحي
كريمة خدته في حضنها وقالت
قلب امك من جوة. انا امك
رؤوف وهو بيتعدل
هي ضحي لسة ما جاتش
كريمة
قطيعة تقطع سيرتها. هي السبب في كل اللي حصل لك
ورفعت شريط البرشام قصاد منه وقالت
اية البرشام دة.
خطف شريط البرشام من ايدها وهو بيقول با رتباك
دة برشام للصداع
كريمة
وهو برشام الصداع يخليك تخطف الشريط من ايدي كدة
رؤوف قام من علي الارض راح ناحية الحمام اللي في الاوضة وقال
صباح الخير يا اما. وكفاية كلام والنبي انا فيا اللي مكفيني
كريمة
وهتفضل نايم علي الارض كدة لغاية امتي. مستنيها ترجع لك وتاخدك في حضنك علي السرير بعد اللي عملته فيك هي وابوها
رد عليها وهو جوة الحمام وقال
قولت لك يا اما صباح الخير بقي
بصت كريمة ل ابنها اللي صعبان عليها اوي وقالت
حالك ما بقاش عاجبني يا ابني. منها لله اللي وصلت لك للحال دة. اشوف فيها يوم
خرج من الحمام وهو بيمسح وشه بفوطة وبيقول
ما تدعيش عليها يا اما. دي هي سبب كل الخير اللي انا في. وانا مش قليل الاصل علشان ابقي ناكر للجميل، ،،،،،
ويعدي 6 شهور وضحي بدات تتجاوز الحزن علي وفاة ابوها. وكانت مع الهام في يوم والهام بتقول لها
واخرتها اية عدي تلت شهور اهو. مش جه الوقت ترجعي ل رؤوف
ضحي
ارجع ل رؤوف ونتجوز و بابا يبقي نايم في قبره غضبان عليه
الهام
ضحي بطلي تضحكي علي نفسك بالاسطوانه دي. انتي نفسك تروحي ل رؤوف وتتجوزي دة حب عمرك
ضحي بصت لها وفضلت ساكتة والهام ضمتها ل صدرها بحنان الاخت مش الصاحبة وقالت
بصي ل نفسك في المريا. وانتي تعرفي انك بتكذبي علي نفسك غمضي عينك واول حد هتشوفي رؤوف حبيبك. عم صابر اللي كان بينك وبينه راح. تفتكري اية اللي ممكن يقف ما بينكم تاني
ضحي بصت لها
تفتكري ان دة الصح. وهو ممكن يسامحني وهو فاكر اني اخترت بابا ورفضة هو
الهام
احكي له كل اللي حصل ولو لسة بيحبك هيصدق وهيسامح،،،،،،،،
ولبست ضحي احلي طقم عندها ونزلت من شقتها قاصدة المطعم بتاع رؤوف اللي في وسط البلد وراحت المطعم ودخلت علشان تلاقي امه كريمة هي اللي موجودة وكانت لابسة اسود بصت لها ضحي واتصدمت لكنها قربت وقالت
ازيك يا ماما
بصت لها كريمة بغل شديد وقالت
انا مش امك. انا اسمي ام رؤوف
ضحي
ليكي حق تزعلي. بس لما تعرفي الظروف هتعذريني
كريمة
ولما اعرف ظروفك دة هيرجع اللي مات
ضحي اتصدمت اوي وقلبها دق جامد وقالت
هو مين اللي مات
كريمة
رؤوف ابني
برقت ضحي من شدة الصدمة، ،،،،،،،،،
تكملة الرواية من هناااااااا
تعليقات
إرسال تعليق