رواية ملاك الادهم الفصل الخامس عشر والسادس عشر للكاتب عادل عبد الله
رواية ملاك الادهم الفصل الخامس عشر والسادس عشر للكاتب عادل عبد الله
الحلقة ١٥
عامر : كنت فين يا ادهم ؟ و فين مراتك ؟
ادهم : معلش يا بابا ، انا طالع انام دلوقتي .
عامر : طيب طمنا الاول وبعدين اطلع نام .
أدهم : بعد اذنكم .
انصرف ادهم وصعد الدرج الداخلي للقصر الي غرفته .
هاجر : ادهم ماله يا عامر ؟؟ انا اول مرة اشوف ادهم ابني بالشكل ده !!!
عامر : شكله مصدوم !!! المهم اننا مطمنين انه وسطنا دلوقتي ، لما يقوم من نومه نبقي نشوف اللي حصل ، يلا احنا كمان لازم ننام .
نور : يلا يا تمارا نطلع ننام .
تمارا : مش هتروح الجامعة ؟؟
نور : لأ مش رايح النهاردة ، احنا منمناش طول الليل .
نانسي : هو ابيه ادهم ماله يا زياد ؟؟
زياد : انا مش فايقلك دلوقتي يا نانسي ، انا طالع انام .
شيرين : ادهم ماله يا بابا ؟؟
محمود الفيومي : مش عارف يا شوشو ، لكن واضح عليه انه فعلا مصدوم من حاجة ، هي ايه لسه معرفش !!
قبل العصر بقليل
يبدأوا جميعا في الاستيقاظ واحدا تلو الاخر ما عدا ادهم مازال نائما في غرفته !!!
عامر : معقول لسه ادهم نايم لحد دلوقتي ؟!!
هاجر : ايوه ، حاولت اصحيه من ربع ساعة مرضيش يقوم .
الجد سليمان الفيومي : اطلعي يا هاجر قولي لأدهم جدك سليمان عايزك .
تجلس العائلة كاملة ويبدو علي وجوههم الوجوم والحزن ، بينما ينزل ادهم بخطي بطيئة علي غير عادته !!!
الجد سليمان الفيومي : ايه يا ادهم النوم ده كله ؟!!
ادهم : معلش يا جدي حاسس اني تعبان شوية .
الجد : عملت ايه البارح يا ادهم ومراتك فين ؟؟
يدير ادهم وجهه " ضيقا بالسؤال " .
الجد : مالك يا ادهم ؟ فيه ايه ؟؟
ادهم : مفيش يا جدي ، بس لو سمحت مش قادر اتكلم دلوقتي .
هاجر : يعني ايه مش قادر تتكلم ؟ اتكلم وطمنا ايه اللي حصل ؟
عامر : اتكلم يا ادهم ، انا من بالليل لحد دلوقتي وانا حاسس اني تايهة ومش فاهم حاجة !!!
ادهم : يابابا ....
الجد : اتكلم يا ادهم وطلع اللي جواك ، مش هتفضل ساكت كده واحنا كلنا حواليك مش فاهمين حاجة !!
ادهم : حاضر يا جدي ، بأختصار مراتي ماتت .
عامر : اييييه !!! ماتت ازاي ؟؟؟
الجد : لا حول ولا قوة الا بالله ، ماتت ازاي يا ادهم ؟ حادثة ولا حد عمل فيها حاجة ؟؟
ادهم : لا يا جدي مش قصدي ، انا قصدي انها ماتت بالنسبالي .
الجد : ايه اللي حصل يخليك تقول كده ؟؟
ادهم : مش عايز اتكلم يا جدي بعد اذنك في الموضوع ده .
الجد : يا ادهم انت ابننا وانت بالذات لك معزة خاصة عندي ولو مش هتتكلم عن مشاكلك معانا هتتكلم مع مين !!
ادهم : انا خلاص قفلت الموضوع ده يا جدي ومش هتكلم فيه مع اي حد .
الجد : بقي كده يا ادهم ؟!!
ادهم : اسف يا جدي ، أنا اول ما اكون قادر اتكلم اول حد هتكلم معاه اكيد انت يا جدي .
الجد : مش هغصب عليك اكتر من كده .
كانت شيرين تستمع لكلمات ادهم وتري حزنه الواضح عليه مما أشعرها بسعادة بالغة لأنها ازاحت ملاك عن طريقها للوصول لقلبه .
اول من لاحظ ذلك كانت اختها تمارا التي قالت لها : حاولي تداري فرحتك دي شوية .
شيرين : ليه ؟ وفيها ايه لما افرح ان حبيبي هيرجعلي ؟!
تمارا : فيها ان شكلك هيكون وحش اوي لما ادهم يكون حزين بالشكل ده و البيت كله حزين علشانه وانتي تكوني فرحانة !! واقولك نصيحة مني يا شوشو بلاش تحاولي تقربي من ادهم علي الاقل دلوقتي .
بعد مرور عدة ايام .....
في منزل الحاج ابراهيم
الحاج ابراهيم : يارا يا بنتي .
يارا : نعم يا خالو .
الحاج ابراهيم : هتفضلي حبسه نفسك كده ولا بتخرجي من اوضتك ولا بتكلمي حد ؟!!!
يارا : معلش يا خالو لما اعصابي ترتاح هخرج .
الحاج : انا نفسي تقعدي معايا انا وهيام بنت خالك شوية نتكلم مع بعض لحد ما نلاقي الحل اللي يرضيكي ويريحك .
يارا : نتكلم في اي حاجة الا الموضوع ده .
الحاج ابراهيم : يعني انتي خلاص مش ناوية ترجعي لجوزك تاني ؟؟
يارا : ايوه يا خالو .
تدخل هيام الغرفة مسرعة تنادي يارا بلهفة...
هيام : يارا .. يارا
يارا : نعم يا هيام فيه ايه ؟
هيام : طنط نجلاء مرات عم عز الدين الله يرحمه تحت وعايزة تقابلك .
يارا : طنط نجلاء !!! و هي عرفت اني هنا ازاي ؟؟
هيام : معرفش .
الحاج ابراهيم : هتقابليها يا بنتي ولا مش عايزة تقابليها ؟؟
يارا : مش عارفة يا خالو ، انا مش عارفة هي عايزة مني ايه ؟؟
الحاج ابراهيم : مهما كان الست في بيتنا ، انا هنزل اقابلها واشوفها عايزة ايه علي ما تنزليلها .
يارا : ماشي يا خالو .
الحاج ابراهيم : يا مرحب يا مرحب ، ازيك يا نجلاء هانم .
نجلاء : ازيك انت يا حاج ابراهيم .
الحاج ابراهيم : الحمد لله في نعمة ، اولادك عاملين ايه ؟
نجلاء : الحمد لله بخير بس بنتي الكبيرة مزعلاني .
الحاج ابراهيم : بنتك جودي ؟ مش هي اسمها جودي بردو ؟
نجلاء : لا يا حاج انا مش قصدي جودي ، انا قصدي يارا ، مش يارا بردو زي بنتي ولا ايه يا حاج ابراهيم ؟
الحاج ابراهيم : ايوه طبعا زي بنتك وانا بعتبرك زي المرحومة اختي تمام .
نجلاء : انا مربية يارا وكان عمرها سنتين و اول ما كبرت وبقيت عروسة كبرت عليا ومبتسمعش كلامي وكمان بتتحداني .
تدخل اليهم يارا ومعها هيام ......
يارا : وانا عمري ما اتحديتك ابدا يا طنط وطول عمري بسمع كلامك وبعاملك علي أنك في منزلة ماما الله يرحمها .
نجلاء : بأمارة أنك بعد ما عزمت الناس علي حفلة خطوبتك سيبتي البيت وهربتي وخلتيني في نص هدومي !!!
يارا : يا طنط ما انا قولت لحضرتك كتير اني مش عايزة اتجوز جاسر !!
نجلاء : شوفت يا حاج ابراهيم بنت اختك اللي كانت لسه بتقول بتسمع كلامي بترد عليا ازاي ؟!!!
الحاج ابراهيم : يا نجلاء هانم البنت تسمع كلامك في اي حاجة الا في الجواز لازم تكون موافقة وراضية ، الشرع بيقول كده ولو بنتي نفسها رفضت عريس مش ممكن انا اجبرها عليه .
نجلاء : انت كمان بتشجعها يا حاج ؟؟
الحاج ابراهيم : انا بتكلم الكلام الصح اللي يرضي ربنا ومفيش حد يقدر يقول غيره .
نجلاء : يعني عجبك لما هربت من الفرح وفضحتنا ؟!! وكمان راحت اتجوزت من ورا اهلها ؟!! هو ده اللي يرضيك يا حاج ابراهيم ؟؟
يارا : انا معملتش حاجة غلط ، انا اتجوزت .
الحاج ابراهيم : ايوه يا نجلاء هانم يارا بنت اختي اتجوزت علي سنة الله ورسوله وكلمتني واخدت موافقتي قبل كتب الكتاب .
نظرت يارا لخالها بتعجب ثم قالت : ايوه يا طنط ، خالو ابراهيم انا اخدت موافقته ووافق علي جوازي قبل ما اتجوز .
نجلاء : وعرفت كمان انك اتطلقتي منه
يارا " بتعجب " : وعرفتي ازاي ؟
نجلاء : انا مفيش حاجة بتستخبي عني ، علي العموم احنا ممكن ننسي كل اللي فات ونبدأ صفحة جديدة يا يارا .
يارا : تقصدي ايه ؟
نجلاء : قصدي ترجعي بيتك وسط اخواتك وتتجوزي جاسر اللي بيحبك وصدقيني يا بنتي مش هتلاقي حد يحبك ويصونك زي جاسر ابني .
يارا : يا طنط ...
الحاج ابراهيم : طيب نأجل الكلام في الموضوع ده يا نجلاء هانم دلوقتي لأن يارا لسه نفسيتها واعصابها تعبانه .
نجلاء : ماشي يا حاج ابراهيم وانا هكبرك واسمع كلامك واديها مهلة اسبوعين علي ما اعصابها ترتاح .
الحاج ابراهيم : ربنا يعزك يا نجلاء هانم كلك ذوق وبتفهمي في الاصول .
نجلاء : طيب أستأذن انا بقي علشان ارجع بدري .
الحاج : لا يمكن ابدا لازم نتغدا مع بعض .
نجلاء : لا سامحني يا حاج خليها مرة تانية .
أنصرفت نجلاء من المنزل فجلس الحاج ابراهيم بالقرب من يارا وقال لها : ناوية علي ايه يا بنتي ؟
يارا : من ناحية ايه يا خالو ؟
الحاج ابراهيم : من ناحية حياتك !! يعني مش ناوية فعلا ترجعي لأدهم ؟؟
يارا : لا يا خالو .
الحاج ابراهيم : مادام كده رافضة تتجوزي جاسر ابن نجلاء ليه ، اللي اعرفه انه شاب كويس واي بنت تتمناه !!
يارا : لكن انا مش برتاحله .
الحاج ابراهيم : عايزة نصيحتي يا يارا يا بنتي ؟
يارا : اتفضل يا خالو .
الحاج ابراهيم : لو مش هترجعي لأدهم يبقي الاحسن ليكي انك تتجوزي جاسر ، الشاب ده اذا كان متمسك بيكي للدرجة دي يبقي اكيد بيحبك وهيسعدك ، ده رأيي يا بنتي والرأي الأول والأخير ليكي .
يارا : سبني افكر يا خالو .
الحاج ابراهيم : انا قولتلها تديني فرصة علشان تفكري برحتك وتاخدي القرار السليم .
بعد عدة ايام ....
في شركة الفيومي
يجلس ادهم في مكتبه و يدخل اليه صديقه نادر .
نادر : انت لسه قافل علي نفسك ومش عايز تتكلم حتي هنا في الشغل ؟!!
ادهم : انا جيت الشغل علشان اخرج من اللي انا فيه ، لكن مفيش فايدة !!
نادر : صدقني يا ادهم لو اتكلمت هترتاح ، انت دلوقتي سامع صوت عقلك وبس ، انما لو اتكلم هتسمع صوت تاني ممكن يخفف من ألمك وحزنك .
أدهم : عندك حق يا نادر ، اقفل الباب وتعالي اقعد هنا .
ذهب نادر ليغلق الباب واذا به يفاجئ بشيرين قادمة !!!!
الحلقة ١٦
نادر : صدقني يا ادهم لو اتكلمت هترتاح ، انت دلوقتي سامع صوت عقلك وبس ، انما لو اتكلمت وطلعت اللي جواك هتسمع صوت تاني ممكن يخفف من ألمك وحزنك او يظهر جانب من الموقف انت مش شايفه .
أدهم : عندك حق يا نادر ، اقفل الباب وتعالي اقعد معايا شوية .
ذهب نادر ليغلق الباب واذا به يفاجئ بشيرين قادمة !!!! وتسأله ....
شيرين : ادهم جوه يا نادر ؟؟
نادر : ايوه .
شيرين تدخل مكتب ادهم الذي يفاجئ بها ويقوم بالترحيب بها ...
ادهم : اهلا يا شيرين ، ايه المفاجئة الحلوة دي ؟!
نادر : طيب استأذن انا يا ادهم .
ادهم : ماشي يا نادر نكمل كلامنا بعدين .
شيرين : ايه يا ادهم شكلك اتفاجئت لما شوفتني !!
ادهم : لا ابدا انا بس استغربت لأنك مش بتيجي الشركة الا علي فترات بعيدة اوي !!
شيرين : حسيت نفسي زهقانة وقولت اجي اغير جو .
ادهم : تنوري طبعا ده مكانك و شركتك زي ماهي شركتنا كلنا ، انتي شوفتي عمي ولا لسه ؟
شيرين : لأ لسه .
ادهم : تحبي اكلمه واعرفه انك هنا ؟
شيرين : ياااه !! للدرجادي مش عايز تقعد معايا ؟!!!
ادهم : لا مش قصدي .
شيرين : انا بصراحة زهقانة وعايزة اخرج وقولت مفيش الا ادهم اللي اخرج معاه لأني حاسة انك متضايق واكيد لما نخرج وتغير جو هيريح اعصابك .
ادهم : نخرج !!!
شيرين : ايوه ، تعزمني علي الغدا في اي مكان مثلا .
ادهم : عندك حق انا فعلا محتاج اغير جو البيت والشركة ، ثواني هكون جاهز ننزل مع بعض .
في فيلا عز الدين
تعود نجلاء وتجد ابنها جاسر في انتظارها ...
جاسر : شوفتي يارا يا ماما ؟ لقتيها فعلا عند خالها ؟
نجلاء : ايوه .
جاسر : وليه مش رجعت معاكي ؟
نجلاء : مش عايزة ترجع .
جاسر : ليه ؟
نجلاء : علشان عارفة انها لو رجعت اكيد هنكلمها في موضوع جوازكم .
جاسر : حتي بعد طلاقها من ادهم لسه رافضة جوازنا ؟!!
نجلاء : ايوه .
جاسر : انا خلاص مش عايزها .
نجلاء : يعني ايه ؟؟ مش عايز تتجوزها ؟!
جاسر : ايوه خلاص ، انا كنت عايزها الاول انما بعد جوازها من ادهم الفيومي خلاص غيرت رأيي ومش عايز اتجوزها .
نجلاء : وكلامك مع ادهم وتحديك له كان ليه ؟؟
جاسر : مسألة عند مش اكتر كنت مش عايز احس انه اخدها مني غصب عني .
نجلاء : خايب طبعا !! يعني عايز تسيبها وتضيع فلوسها من ايديك ؟؟
جاسر : مش مهم مش عايز فلوسها ، احنا كمان عندنا فلوس .
نجلاء : لكن فلوسنا متوصلش تكون نقطة في بحر من فلوسها ، ومتنساش ان الشركة اللي احنا عايشين منها هي لوحدها ليها فيها اكتر من ٦٥% يعني تعتبر شركتها وانا وجودي ويحيي يدوب شركا صغيرين جنبها ده غير الاراضي والفلوس اللي في البنوك اغلبها ملكها .
جاسر : وانا اعمل ايه ؟؟ عايزاني اتجوزها غصب عنها ؟؟
نجلاء : لأ انا كلمتها وحاولت اقنعها واديتها فرصة اسبوعين ترد عليا وحاسة انها ممكن توافق المرة دي ، لكن اهم حاجة لو يارا وافقت عايزاك تحاول تكون رومانسي معاها وتجيبلها هدايا علشان تقدر توصل لقلبها .
جاسر : الكلام ده سهل ، انا مفيش بنت بتاخد في ايدي نص ساعة الا لما تكون وقعت في حبي .
نجلاء : ماهو باين يا فالح !!! انا بتكلم عن يارا مش اي بنت .
بعد ايام
في منزل الحاج ابراهيم
تجلس يارا مع هيام ابنة خالها ....
هيام : تعرفي يا يارا ان انا فرحانه اوي بوجوك معانا !
يارا : وانا كمان يا هيام ، انا بعتبرك زي جودي اختي بالظبط .
هيام : انا طول عمري كان نفسي يكون لي اخت ، وانا بحبك من زمان واعتبرتك اختي ، وكنت بفرح اوي واحنا صغيرين لما بابا كان ياخدني ونزوركم في القاهرة .
يارا : وانا كمان يا هيوم اعتبرتك اختي زي جودي بالظبط ، وكان نفسي اقعد معاكي اكتر من كده .
هيام : قصدك ايه ؟ انتي ناوية تمشي ؟؟
يارا : ايوه انا كنت لسه هقولك اني عايزة اقول لخالي أني همشي .
هيام : تمشي تروحي فين يا يارا ؟هترجعي لمرات ابوكي تاني ؟؟
يارا : لأ .
هيام : معقول هترجعي لأدهم ؟؟!!!!
يلرا : بردو لأ .
هيام : اومال هتمشي تروحي فين ؟ وليه اصلا عايزة تمشي ؟
يارا : انا قررت اني اعيش لوحدي واشوف شقة اقعد فيها .
هيام : ليه يا يارا ؟! في حد زعلك هنا ؟
يارا : لا بالعكس انتي زي اختي وخالي زي بابا الله يرحمه بالظبط .
هيام : اومال عايزة تمشي ليه ؟
يارا : انا مش هرجع الفيلا تاني وطبعا مستحيل اعيش عندكم علطول .
هيام : وليه لأ ؟! انتي شايفة ان انا وبابا عايشين لوحدنا بعد موت ماما وجواز اخواتي كلهم وانا لسه بقولك اني فرحانة بوجودك معانا ، يبقي ليه عايزة تمشي ؟؟!
يارا : معلش يا حبيبتي مش عايزة احس اني تقيلة عليكم .
يدخل خالها الحاج ابراهيم عليهم ويسألها : ايه اللي انا سمعه ده يا يارا ؟
يارا : ايه يا خالو ؟
الحاج ابراهيم : يعني ايه تقيلة والكلام الفارغ ده ؟!! انتي بجد عايزة تمشي ؟
يارا : ايوه يا خالو .
الحاج : ليه يا بنتي ؟ فيه حد ضايقك ؟ فيه حد زعلك ؟
يارا : لا والله بالعكس حضرتك طيب وحنين زي بابا الله يرحمه وهيام بحبها زي جودي اختي بالظبط .
الحاج ابراهيم : اومال عايزة تمشي ليه ؟
يارا : معلش يا خالو هكون مرتاحة اكتر لو قعدت لوحدي .
الحاج ابراهيم : وكمان عايزة تعيشي في بيت لوحدك ؟!!
يارا : وفيها ايه يا خالو ؟
الحاج ابراهيم : كلام الناس يا بنتي ، مينفعش بنت زيك تعيش لوحدها !!
يارا : الكلام ده لو انا هعيش هنا في المنصورة انما انا هرجع اعيش في القاهرة في حي راقي وهناك مفيش حد بيتدخل في حياة حد يعني مفيش حد هيتكلم علشان عايشة لوحدي .
الحاج ابراهيم : متزعليش يا بنتي انا مش موافق .
يارا : علشان خاطري يا خالو وافق ، لو عايز تشوفني مرتاحة وافق .
في احد المطاعم الفاخرة المطلة علي بحر الاسكندرية .....
يجلس أدهم مع شيرين يتناولون الطعام بينما هو صامت شارد الذهن تلاحقه شيرين بنظراتها وتسأله : مالك يا ادهم ؟ ساكت كده ليه ؟
ادهم : لا ابدا مفيش .
شيرين : لسه بتفكر فيها يا ادهم ؟
ادهم " بابتسامة مصطنعة " : لا لا خالص ، الموضوع ده انتهي .
شيرين : بليز يا ادهم انا مش عايزة اشوفك كده ، عايزة ارجع اشوفك قوي مفيش حاجة توجعك ، مستحيل يا ادهم تتخيل انا بتعذب ازاي علشانك !!
ادهم : بتتعذبي !!! ليه ؟
شيرين : علشان ... علشان ... انت عارف ليه .
ادهم : لا مش عارف .
شيرين : هقولك تاني وتالت ورابع علشان بحبك يا ادهم .
ادهم : بتحبيني !!! لكن انا عمري ما حسيت انك بتحبيني ولا ظهر عليكي ابدا !!
شيرين : طول عمري بحبك يا ادهم لكن انت اللي كنت مركز في شغلك وبس ومش حاسس بيا .
ادهم : شيرين انا لسه خارج من علاقة انتهت نهاية مش لطيفة واعصابي لسه تعبانة ومش مستعد دلوقتي اني ادخل اي علاقة تانية .
شيرين : برحتك يا ادهم لكن انا عايزاك تعرف حاجة واحدة بس ان عمرك ما هتلاقي واحدة ممكن تحبك وتسعدك قدي .
ادهم " بابتسامة " : طيب يلا بينا نروح .
شيرين : انت ليه كل شوية تحسسني انك زهقان مني ؟!!
ادهم : لا ابدا بالعكس ، ليه بتقولي كده ؟
شيرين : طيب خلينا قاعدين مع بعض شوية .
في قصر الفيومي
يعود ادهم مع شيرين الي القصر في حين كانت تجلس تمارا مع هاجر و تجلس بجانبهم نانسي تلعب بهاتفها ...
فيفاجئوا جميعا بعودتهم سويا !!!!
هاجر : حمدلله ع السلامة انتوا كنتوا مع بعض ولا ايه ؟؟
شيرين : ايوه يا طنط ادهم عزمني علي الغدا بره .
تضحك هاجر : وماله !! يعني خلاص اكل البيت مش عجبكوا انتوا الاتنين ؟!
ادهم : لا طبعا يا ست الكل ، شيرين عدت عليا في الشركة وكنا زهقانين قولنا نتغدا بره نغير جو .
تضحك تمارا : ماشي يا ادهم ، اهم حاجة يكون الاكل عجبك ، اكيد شيرين فتحت نفسك ع الاكل .
ادهم : ايوه طبعا طبعا .
ثم يصعد ادهم الي غرفته وتصعد ايضا شيرين الي غرفتها .
تمارا : ايه رأيك يا طنط ؟؟
هاجر : في ايه يا روح طنط ؟
تمارا : ادهم وشيرين لايقين علي بعض اوي ، مش كده ؟؟
هاجر : ياريت انا نفسي ، لكن انا عارفة ابني ادهم ، هو كان بيحب البنت اللي اسمها ملاك ودي اول مرة يحب وياعيني اتصدم وعلشان كده مش هيفكر في الحب والجواز دلوقتي خالص .
تمارا : بصراحة يا طنط شيرين اعترفتلي انها بتحب ادهم من زمان .
هاجر : معقول !! كان مش باين عليها ابدا !!!
تمارا : كانت مخبية يا طنط ومصرحتش بحبها وقالتلي الا لما اتصدمت بجوازه .
هاجر : انا فعلا مش لاحظت اهتمامها بادهم الا بعد جوازه .
تمارا : عارفة يا طنط مين اللي ممكن يخلص في الموضوع ده ويقنع ادهم ؟
هاجر : اكيد طبعا مفيش غيره ، جدك سليمان الفيومي الكبير .
تمارا : بالظبط يا طنط ، لو حضرتك كلمتيه اكيد هيفرح اوي ان حفيده هيتجوز حفيدته وكمان هيطمن ان ثروته مش هتروح لحد غريب وانا متأكدة انه هيقدر يقنع ادهم .
تتدخل ايناس في الحديث فجأة وتقول : حرام عليكو !! ابيه ادهم لسه بيحب ملاك !!
تنصدم تمارا من كلمات نانسي بينما تسألها هاجر : مين قال كده ؟؟ جبتي الكلام ده منين ؟؟!
نانسي : دي حاجة واضحة زي الشمس ، ابيه ادهم لسه بيحبها وهي اكيد بتحبه وحرام عليكم تجوزوه شيرين !!
هاجر : ادهم لازم يتجوز علشان يعدي المحنة اللي هو فيها ، ومفيش عروسة مناسبة لأدهم اكتر من شيرين .
نانسي " تبكي " : لا يا ماما حرام عليكي ابيه ادهم لازم يرجع لملاك تاني ، ملاك دي طيوبة وجميلة اوي هي فعلا ملاك واسمها ملاك .
هاجر : بطلي يا بت كلام فارغ ، انا ما صدقت خلصنا من الجوازة دي ، اول ما جدك سليمان ينزل هقعد معاه واكلمه علشان يقنع ادهم .
وبعد اقل من الساعة نزل سليمان الفيومي وكانت هاجر وتمارا مازالتا جالستين .
تمارا : نوم العافية يا جدو .
الجد " يضحك " : حبيبة جدو انتي عارفة اني بحب انام ساعتين قبل العصر ، انتوا قاعدين كده شكلوا بتتفقوا علي حاجة !!!
تندهش تمارا من فطنة جدها وتضحك هاجر : طول عمرك يا حاج لماح وزكي احنا كنا فعلا بنتفق علي حاجة .
يضحك الجد : خير ياتري بتتفقوا علي ايه ؟ ولا علي مين ؟
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق