رواية ملاك الادهم الفصل السابع عشر والثامن عشر للكاتب عادل عبد الله
رواية ملاك الادهم الفصل السابع عشر والثامن عشر للكاتب عادل عبد الله
الحلقة ١٧
تندهش تمارا من فطنة جدها وتضحك هاجر : طول عمرك يا حاج لماح وذكي احنا كنا فعلا بنتفق علي حاجة .
يضحك الجد : خير ياتري بتتفقوا علي ايه ؟ ولا علي مين ؟؟
تضحك هاجر : بنتفق علي حفيدك ادهم عايزبن نجوزه .
الجد : لااا ، الا ادهم !! ادهم ده الفيومي الصغير اوعوا حد يزعله !!!!
هاجر : لا يا حاج ده احنا عايزين نجوزه .
الجد : دلوقتي ؟ وهو لسه في الظروف دي ؟!!! وياتري عايزين تجوزوه مين ؟
هاجر : عايزين نجوزه شيرين .
الجد : شيرين بنت محمود ؟؟
هاجر : ايوه يا حاج .
الجد : مش هينفعوا مع بعض .
هاجر : ليه يا حاج ؟!!
الجد : دول احفادي وانا اللي مربيهم وعارفهم كويس ، ادهم وشيرين مستحيل ينفعوا زوجين .
تمارا : ليه يا جدي ؟ ما انا ونور متجوزين وعايشين كويس اوي الحمد لله مع بعض .
الجد : انتي ونور حاجة وادهم وشيرين حاجة تانية ، هما الاتنين مش هينفعوا مع بعض .
ينتهي النقاش علي اصرار الجد علي عدم رضاؤه بفكرة هاجر وتمارا عن زواج ادهم من شيرين .
حين عودة عامر مساء
عامر : مالك يا هاجر شكلك متضايقة ليه ؟
هاجر : النهاردة ادهم وشيرين اتغدوا بره ورجعوا مع بعض فاتكلمت انا وتمارا وفكرنا اننا نجوزهم لبعض وعرضنا الفكرة علي الحاج علشان يكلم ادهم ويقنعوا .
عامر : وبعدين ؟ اكيد ابويا رفض .
هاجر : ايوه رفض وبحجة انهم مش هينفعوا مع بعض .
عامر : وانتي زعلانه ليه ؟
هاجر : مش بنت اخوك احسن من البنت اللي دخلت علينا ولا كنا نعرف عنها ولا عن اهلها حاجة !! علي الاقل شيرين بنتنا ومتربية قصدنا قدام عنينا ، انا معرفش الحاج بيقول انهم مش هينفعوا مع بعض ليه ؟؟!!
عامر : بالعكس انا شايف انهم هيكونوا سعداء مع بعض .
هاجر : طيب ما اتكلم ابوك واقنعه .
عامر : لأ انا هكلم ادهم ولو ادهم اقتنع ابويا اكيد مش هيرفض .
في المنصورة
الحاج ابراهيم : متزعليش يا بنتي انا مش موافق انك تعيشي لوحدك .
يارا : علشان خاطري يا خالو وافق ، لو عايز تشوفني مرتاحة وافق .
الحاج ابراهيم : لا طبعا مش موافق ، وبعدين انا عايز اعرف هتوافقي علي العريس اللي متقدملك ولا لأ ؟
يارا : قصدك جاسر ؟
الحاج ابراهيم : ايوه جاسر ابن نجلاء .
يارا : يا خالو انا مش بحبه .
الحاج ابراهيم : واحنا اخدنا ايه من الحب ؟!! اذا كان اللي حبك جرحك !! اسمعي كلامي وافقي عليه ، الولد كويس و الحب ييجي بعدين .
هيام : بابا عنده حق يا يارا ، متخليش حياتك تقف عند تجربة ادهم ، وانا شايفة جاسر ده شكله كويس .
يارا : خلاص يا خالو اللي تشوفه .
الحاج ابراهيم : يبقي هتصل بمدام نجلاء وابلغها .
في فيلا عز الدين
نجلاء تغلق هاتفها وتنادي علي جاسر الجالس في الحديقة .
جاسر : ايوه يا ماما فيه ايه ؟
نجلاء : عندي خبر لك بمليار جنيه .
جاسر : فيه ايه اللي حصل ؟
نجلاء : يارا وافقت .
جاسر : بتتكلمي جد ؟؟؟ والله بجد يارا وافقت تتجوزني ؟؟
نجلاء : ايوه وافقت ، انا كده عملت اللي عليا وخلتها توافق مبدئيا وفلوسها هتبقي تحت ايديك ، الباقي عليك انت بقي تخليها تحبك وتسلمك قلبها وفلوسها ، واعتقد دلوقتي مش هتكون حاجة صعبة عليك .
جاسر : مفهوم يا ماما ، وهي هترجع امتي ؟
نجلاء : لسه مش عارفة .
جاسر : انا عايز اشوفها دلوقتي .
نجلاء : جهز نفسك بكره نروح نزورها وتاخد هدية حلوة معاك .
في اليوم التالي
تذهب نجلاء وجاسر وجودي ويحيي الي منزل الحاج ابراهيم .
الحاج ابراهيم : يا اهلا وسهلا ، نورتي يا مدام نجلاء نورتنا يا استاذ جاسر .
نجلاء : النور نورك يا حاج ابراهيم ، اومال عروستنا فين ؟
الحاج ابراهيم : يعني هي العروسة غريبة عليكم ؟! العروسة بنتك والعريس كمان ابنك .
نجلاء : طبعا طبعا يا حاج .
جودي : بعد اذنك يا عمو كنت عايزة ادخل ليارا .
الحاج ابراهيم : اتفضلي يا بنتي اطلعيلها فوق بيتك ومطرحك .
صعدت جودي ليارا التي فوجئت بها واخذتها بين احض.انها .
يارا : وحشتيني اوي يا جوجو .
جودي : انتي اكتر يا قلبي ، انتي صحيح وافقتي علي جاسر ؟؟
يارا " بحزن " : ايوه .
جودي : ازاي ؟!! انتي طول عمرك مش بتحبيه !!!
يارا : يمكن احبه بعد الجواز .
جودي : مالك يا يارا ؟؟ انتي متغيرة اوي !!! شكلك زي ما تكوني مكسورة !!
يارا : قلبي اللي مكسور يا جودي .
جودي : ياااه !! للدرجادي ؟؟
يارا : للدرجادي ايه ؟؟
جودي : للدرجة دي كنتي بتحبي ادهم ؟؟
يارا : ارجوكي يا جودي متجبيش سيرته .
جودي : ليه ؟ حصل ايه لكل ده ؟؟
يارا : ارجوكي مش عايزة اتكلم عليه .
جودي : انا اختك حبيبتك ولازم تقوليلي عمل ايه علشان قلبك ينكسر منه بالشكل ده ؟!!
يارا " بدموع " : لسه كنت بعترف له اني خبيت عنه ان الذاكرة رجعتلي وانا في المستشفي رفض يسمعني للأخر وقالي كلام جرحني اوي " ثم نزلت دموعها بغزارة " .
جودي : وانتي خبيتي عنه ليه ان الذاكرة رجعتلك قبل ما تخرجي من المستشفي ؟
يارا : انا هقولك الحقيقة يا جودي اللي مفيش حد يعرفها وكان نفسي ادهم يسمعني للأخر علشان يعرفها لكن هو اتسرع وظلمني .
جودي : قولي يا يارا .
يارا : انا بعد ايام من الحادثة رجعتلي الذاكرة وعرفت ان ادهم هو اللي صدمني بعربية ووصلني المستشفي وقعد جنبي علشان يطمن عليا وقالهم انه جوزي ، ولما عرفته حبيته من اول يوم وحسيت انه فارس احلامي اللي حلمت به طول عمري و خوفت اقوله ان الذاكرة رجعتلي يبعد عني ويسيبني ويرجع لحياته وارجع انا ومفيش قدامي الا جاسر !! مثلت عليه اني لسه فاقدة الذاكرة علشان بحبه وعلشان مرجعش لجاسر تاني .
جودي : وبعد كل ده وافقتي تترتبطي بجاسر ؟!!!
يارا : الظاهر ان جاسر هو اللي مكتوب لي !!
جودي : لا يا يارا ، انا مش موافقة انك تتجوزي بالشكل ده .
يدق باب الغرفة ...
يارا : مين ؟
الحاج ابراهيم : يلا يا بنتي انزلي ، الناس قاعدين تحت من بدري !! ميصحش كده !!
يارا : حاضر يا خالو نازلة حالا .
جودي : هتنزلي وهتقوليلهم انك موافقة بردو ؟؟؟
يارا : ايوه يا جوجو ، خالو اعطاهم كلمة ، زي ما قولتلك الظاهر ان اخوكي جاسر هو حظي ونصيبي .
تنزل يارا وتجلس وسط العائلة وهي تنظر الي جاسر والدموع في عينيها تحاول ان تداريها وهي تتذكر حبها لأدهم !!!
بينما يجلس جاسر في سعادة ويشعر بأن يارا بجمالها واموالها اصبحا ملكا له !!
في قصر الفيومي
يعود ادهم ليلا فيجد والده عامر في انتظاره ...
عامر : أتأخرت ليه يا ادهم ؟
ادهم : ابدا يا بابا ، كنت زهقان شوية وبشم هواء ، خير شكلك قاعد مستنيني من بدري !!
عامر : ايوه يا ادهم .
ادهم : فيه ايه ؟
عامر : قولي يا ادهم انت ناوي علي ايه ؟
ادهم : بالنسبة لأيه مش فاهم ؟
عامر : بالنسبة لحياتك يا ادهم .
ادهم : مالها حياتي ، وضح يا بابا حضرتك تقصد ايه ؟
عامر : قصدي انك عديت ال٣٠ سنة ولازم تتجوز .
ادهم : اتجوز !!! ما انا اتجوزت فعلا !!
عامر : اتجوزت والتجربة فشلت يبقي لازم تبدأ من تاني وتتجوز في اسرع وقت .
ادهم : لا يا بابا اسمحلي مش متفق معاك ، انا مش هفكر في الجواز تاني خالص علي الاقل في الوقت الحالي .
عامر : لا يا ادهم ، لازم تفكر وفي اقرب وقت ، ومتخليش تجربة فشلة تأثر علي حياتك .
ادهم : حاضر يا بابا ، بس مش وقته دلوقتي سيبها للظروف لما اقابل بنت الحلال .
عامر : بنت الحلال موجودة ولازم تلحقها قبل ما تضيع من ايديك .
ادهم " يبتسم " : موجودة ؟!! ده حضرتك مرتب بقي كل حاجة ؟؟
عامر " يضحك ": من غير كلام كتير يا ادهم ، شيرين بنت عمك .
ادهم : شيرين !!! وليه شيرين بالتحديد ؟ وكمان بسرعة ؟!! فيه ايه يا بابا ؟؟
عامر : شيرين اكتر واحدة مناسبة لك وانتوا الاتنين لايقين علي بعض .
ادهم : لكن انا ....
عامر : انت مش اخدت رأينا في جوازتك اللي فاتت وفشلت يبقي المرة دي تسمع كلامنا .
ادهم : كلامكم !!! ده فيه اتفاق بقي ؟!!
عامر " يضحك " : حاجة زي كده ، وبعدين هقولك من الاخر البت بتحبك ومن ناحية الانوثة البت حلوة وهتدلعك عايز ايه تاني يا طماع ؟!! مال وجمال و دلع ، فيه حد يلاقي كده ويرفض ؟!!
ادهم : طيب سيبني افكر .
عامر : مفيش تفكير ، انا هروح اقول لامك انك وافقت و بكره الصبح هكلم شيرين وعمك محمود علشان نتفق علي ميعاد الخطوبة .
يدخل اليهم اخيه نور
نور : خطوبة مين يا تري ؟ مساء الخير الاول .
عامر : مساء النور ، خطوبة اخوك ادهم يا نور .
نور : الف مبروك ، هتخطب مين ؟
عامر : هيخطب شيرين .
ادهم : استني يا بابا انا لسه موافقتش .
نور : متوافقش علي ايه يا ادهم !! شيرين بتحبك وبصراحة انا مأيد الجوازة دي جدا ، علي الاقل هبقي انا وانت عدايل .
ادهم : هو ده كل اللي همك ؟!!
نور : لأ انا بتكلم بجد ، شيرين مناسبة لك اوي .
الحلقة ١٨
نور : لأ انا بتكلم بجد يا ادهم شيرين مناسبة لك اوي .
ادهم : لا يا نور انا مش بفكر في الجواز دلوقتي ولا شيرين ولا غيرها .
عامر : يا ابني انت ليه عنيد بالشكل ده ؟!! انت كده بتعاند نفسك مش اكتر ، واذا كان رفضك بسبب تجربتك مع ملاك فأسمع مني انا اكبر منك وليا تجارب عنك ، مش هتنسي واحدة حبيتها الا لما تحب واحدة غيرها .
يضحك نور : اسمع كلام ابوك يا ادهم ، ده ابوك ده حبيب قديم .
عامر " يضحك " : وطي صوتك يا نور احسن امك تسمعك وتبقي مشكلة .
ادهم " بغيظ " : يعني انتوا كلكم متفقين عليا ؟
عامر : لمصلحتك يا ادهم .
ادهم : طيب خلاص اللي تشوفوه .
عامر : مبروك يا ادهم ، بكره الصبح هكلم عمك محمود علشان ياخد رأي العروسة ونحدد ميعاد الخطوبة .
ادهم : شيرين هتوافق من غير ما تسألوها .
نور : و ايه الثقة دي كلها ؟!!
عامر : الظاهر ان اخوك ادهم عارف انها بتحبه .
نور : طيب يا ادهم ، عايز ايه اكتر من كده يا عم !! عروسة قمر وغنية وبتحبك كمان .
في منزل الحاج ابراهيم
تأتي مدام نجلاء وتطلب منه ان تذهب يارا الي الفيلا .
الحاج ابراهيم : يا نجلاء هانم حضرتك ست العارفين مينفعش البنت تعيش مع خطيبها في بيت واحد وهما مخطوبين !!
نجلاء : يا حاج ابراهيم الكلام ده لما تكون يارا هتعيش في بيته ، انما انا عايزاها ترجع تعيش في بيتها .
الحاج ابراهيم : يا نجلاء هانم جاسر خطيبها عايش في نفس البيت ، هيعيشوا هما الاتنين في بيت واحد ازاي وهما لسه مخطوبين ؟!
نجلاء : هما مش هيعيشوا لوحدهم في الفيلا ، انا والولاد موجودين معاهم .
الحاج ابراهيم : بردو ميصحش يا هانم ، خصوصا ان جاسر دلوقتي نظرته ليارا بنت اختي مش مجرد نظرة انها اخت لأخواته ، هو دلوقتي نظرته لها انها خطيبته اللي هتبقي مراته وممكن ...
نجلاء : مفيش ممكن يا حاج ابراهيم ، جاسر ابني متربي كويس وكمان يارا متربية كويس ومفيش اي حاجة من اللي بتفكر فيها ممكن تحصل .
الحاج ابراهيم : طيب ناخد رأي البنت نفسها ، ايه رأيك يا يارا يا بنتي عايزة تفضلي قاعدة هنا معززة مكرمة لحد ميعاد الجواز ولا ترجعي الفيلا دلوقتي ؟
يارا " تفكر قليلا انها لا تريد ان تكون عبأ علي خالها لفترة اخري فتقول " : لا يا خالي انا عايزة ارجع الفيلا .
نجلاء : طيب الحمد لله البنت نفسها عايزة ترجع بيتها يا حاج .
الحاج ابراهيم : طيب خلاص اللي تشوفوه مادام يارا هتبقي مرتاحة .
غادرت يارا منزل خالها مع زوجة ابيها عائدة الي الفيلا ، وهناك استقبلتها جودي بفرحة كبيرة ، ولكن فرحة جاسر كانت اكبر !!
ظلت يارا لأيام تحاول اقناع نفسها بجاسر و تحاول تقبله كعريس لها .
في تلك الايام كان جاسر شغله الشاغل هو محاولة تغيير طبيعته القاسية امامها واظهار قدر كبير من اللطف والرومانسية حتي يستطيع التقرب منها .
اصبح جاسر يغدق عليها بالهدايا والورود كل صباح .
كما كانت نجلاء تغيب عن المنزل حتي تفسح مساحة كبيرة للتقريب بينهما .
كلما وجد جاسر الفرصة سانحة كان يتقرب من يارا ويحاول مغازلتها و ايضا التحر.ش بها !! لكنها كانت تتهرب منه دوما .
الا ان جودي لاحظت ذلك فأصبحت ملازمة لاختها يارا دوما .
زادت محاولات جاسر الفاشلة دوما حتي جاءت ليلة كانت لهيب اشواقه لها مشتعلة فتربص حتي تأكد من نوم كل العائلة وقرر دخول غرفتها خلسة !!
بدأ جاسر يطمئن تماما ان الكل نيام فذهب الي غرفة نومها وبدأ يفتح الباب برفق حتي لا يحدث ضجيجا !!
وما ان فتح الباب حتي وجد مالم يتوقعه ابدا !!!!!!!
يارا جالسة علي فراشها وبجوارها اختها جودي !!!
يارا : انت ايه اللي جابك هنا دلوقتي ؟!!
جاسر : اناااا...
جودي : انت بتفتح باب الاوضة كده ليه ؟؟ وفي الوقت ده !!!!
جاسر : كنتتتت ... كنت عايز اقول ليارا حاجة .
جودي : دلوقتي ؟؟؟
جاسر : ايوه كنت هقولها حاجة دلوقتي .
يارا : واللي عايز يقول حاجة ييجي في نص الليل و يتسحب و يفتح الباب كده بدون حتي ما يخبط او يستأذن ؟؟!!!
جودي : انا رايحة اقول لماما .
جاسر : لااا لا خلاص انا اسف .
جودي : لأ ، لازم اقول لماما .
جاسر : خلاص يا جودي قولت انا اسف .
جودي : طيب يلا اتفضل واوعي تعمل كده تاني .
خرج جاسر واغلق باب الغرفة يجر اذيال الخيبة !!
يارا : اخوكي شكله اتجنن في عقله ولا ايه ؟
جودي : انا كنت عايزة اروح اقول لماما .
يارا : قوليلها الصبح علشان تبقي شاهدة عليه وميعملش كده تاني .
في صباح اليوم التالي
كان خبر خطوبة ادهم وشيرين ملأ السمع والبصر في كافة وسائل الاعلام والسوشيال ميديا .
استيقظت يارا مبكرا والتقطت هاتفها وما ان بدأت في التصفح حتي رأت خبر خطوبة ادهم وشيرين !!!
كادت الصد.مة ان تفقدها عقلها فألقت بهاتفها بعيدا وظلت تبكي بصوت عال .
استيقظت جودي علي صوت بكاء يارا المرير وفزعت حين رأتها تبكي بحرارة .
جودي : فيه ايه يا يارا ؟ مالك ؟
يارا تبكي ولا تستطيع الكلام !!
فتسألها جودي : جاسر دخل الاوضة تاني وانا نايمة ؟؟
يارا مازالت تبكي بحرارة ولا تجيبها !!!
تحاول جودي تهدئتها كثيرا حتي تهدا قليلا فتعيد عليها السؤال مرة اخري...
جودي : اهدي يا حبيبتي وقوليلي فيه ايه ؟ جاسر عمل حاجة ؟؟
يارا : لأ .
جودي : اومال مالك ؟ بتبكي كده ليه ؟!!
يارا : ادهم يا جودي .
جودي : ماله ادهم ؟؟
يارا : ادهم خطب شيرين بنت عمه وهيتجوزها !!!
جودي : طيب معلش يا يارا ، مش انتي كنتي بتقولي انك خلاص نسيتيه ؟ زعلانة ليه دلوقتي ؟!!
يارا : انا قولت كده لكن انا لسه بحبه .
جودي : بتحبيه وهتتجوزي جاسر ؟!! انتي شايفة ان ده صح ؟
يارا : انا مكنتش عايزة اتجوز جاسر لكن مامتك وخالي وكلهم قالولي اني هحبه بعد ما نتجوز علشان كده وافقت ، وقولت يمكن انسي حبي لأدهم .
جودي : الصراحة يا يارا زي ما انتي وافقتي تتجوزي جاسر ، ادهم كمان هيتجوز ، زعلانة انتي ليه دلوقتي ؟!!
يارا : مش متخيلة ان ادهم يكون لوحده تانية !! مش متخيلة انه يكون فعلا بطل يحبني وحب واحدة غيري !!
جودي : اختي يا حبيبتي المفروض مادام قررتي تتجوزي حد تاني تنسي ادهم خالص ومتفكريش فيه ابدا ، هو حر في حياته واكيد كان لازم يتجوز سواء دلوقتي او في اي وقت بعد كده .
يارا " بدموع " : مش قادرة يا جودي ، اول ما شوفت الخبر انهارت !! مش عارفة انا هعمل ايه دلوقتي ؟!
جودي : لازم تنسيه .
صمتت يارا قليلا وشرد ذهنها وهي صامتة لا تتكلم !!
جودي : سمعاني يا يارا ؟ لازم تنسي ادهم .
يارا مازالت شاردة !!
جودي : انتي سمعاني يا يارا ؟؟ مش بتردي عليا ليه ؟!!
يارا لا تجيبها !!!
جودي : يارا !! مالك ؟ ساكتة ليه ؟؟
تنهض يارا قائمة ثم تنزل الي نجلاء وجاسر الجالسين يتناولون افطارهم
بمجرد ان يراها جاسر ينقبض قلبه خائفا ويقف الطعام في يده ينتظر !!
تفاجئهم يارا قائلة : أنتوا حددتوا مع خالي ميعاد الفرح أمتي ؟؟
يتعجب جاسر ونجلاء من سؤالها المفاجئ الغير متوقع او مبرر !!!!!
نجلاء : صباح الخير يا حبيبتي ، حددنا ميعاد الفرح بعد اربع شهور من دلوقتي ، ليه يا بارا انتي عايزة تغيري ميعاد الفرح ؟
يارا : أيوه .
تمتزج مشاعر اندهاش جاسر بالغضب !!
نجلاء : عايزة تأجلي الفرح ؟
يارا : لأ ، عايزة فرحنا بعد شهر !!!!
"" تنزل جودي خلفها وتنصد.م حين تسمع كلامها ""
يفتح جاسر عينيه عن اخرهما من هول المفاجئة ثم يبتسم !!!
نجلاء " تبتسم " : وليه الاستعجال ده ؟
يارا : خلاص يا طنط نجلاء بلاش خالص ونفسخ الخطوبة .
نجلاء : لا لا لا ، خلاص مادام انتي عايزة الفرح بعد شهر يبقي بعد شهر ، الف مبروك يا ولاد .
جاسر : الله يبارك فيكي يا ماما ، الف مبروك يا يارا يا حبيبتي .
تنظر له يارا وتبتسم باستخفاف ثم تنصرف .
تصعد يارا وتعود الي غرفتها وتصعد خلفها جودي .
بمجرد ان تغلق جودي باب الغرفة ...
جودي : انتي اتجننتي يا يارا ؟؟
يارا : انتي ايه اللي بتقوليه ده يا جودي ؟! انا اختك الكبيرة !!
جودي : سورري اسفة ، بس ازاي قولتي انك عايزة الفرح بعد شهر ؟!!
يارا : عادي وفيها ايه ؟
جودي : انتي لسه من ربع ساعة كنتي بتعيطي لما عرفتي ان ادهم خطب وقولتي انك لسه بتحبيه !! ازاي بعد دقايق عايزة تعجلي بجوازك من جاسر ؟!
يارا : ادهم خلاص كده بالنسبالي مادام ظلمني وكمان فكر انه يرتبط بواحدة غيري يبقي انتهي وعلشان مفكرش فيه تاني طلبت ان فرحي علي اخوكي يكون في اسرع وقت .
جودي : انا صحيح اختك الصغيرة لكن بقولك يا يارا قرارك ده هتندمي عليه طول عمرك وللأسف وقتها الندم مش هيفيدك !!
ياتري شايفين قرار يارا ( ملاك ) صح ولا غلط ؟ وهل فعلا هتندم عليه طول عمرها ؟؟ منتظر تعليقاتكم .
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق