رواية مفيش رحمه الفصل الأربعون والحادى والأربعون بقلم لولو محمد
رواية مفيش رحمه الفصل الأربعون والحادى والأربعون بقلم لولو محمد
((((((مفيش رحمه)))))
#لولو_محمد
الحلقه الاربعون
رحمه / و ليه التاخير بقى
رحيم / انا مش من النوع اللى بيعرف يركز فى ستين حاجه فى وقت واحد و انا حاليا كدا بشرى و التدريب و البيت و المشاكل اللى لسه مفوقتش منها و كمان هنحط الحضانه اعمل ايه يا بنتى
رحمه / مانت لو سبتهم فى البنك هيجيبوا فلوس برده
رحيم / انا تايه نمت و صحيت لقيت الدنيا فوق دماغى ارتاحتى بس على الاقل خلى عندك ثقه فيا انى اكيد هلاقى حل ادينى بس فرصه يومين اجمع نفسى ادينى يومين
رحمه / اوك اوك انا اكيد واثقه فيك انا بس بحاول اساعد انا هنام
رحيم / و انا كمان تصبحى على خير
......................
تانى يوم فى المكتب
اللهام / ورينى الاسكتش ده
رحمه / ادينى ساعه زمن هرسمهولك كاد
اللهام / شغلك حلو و التقسيمه كمان شكلك شاطره
رحمه / رحيم ساعدنى كتير الصراحه
اللهام / تمام دخليه عالكاد بقى و ابعتيهولى
رحمه / اوك
تليفون رحمه يرن
رحمه / الو
رحيم / هاى ممكن نتعرف
رحمه / اسفه مبكلمش شباب
رحيم / انا اسف انى بزعجك بس حسيت فى صوتك نبره حزن
رحمه / انا هقفل على فكره
رحيم / بطلى تقل بقى لو كنتى عاوزه تقفلى كنتى قفلتى من بدرى من اول مقولت نتعرف
رحمه / اصل صوتك بيفكرنى بصوت واد حليوه اعرفه
رحيم / يا خساره كنت ناوى اعزمك عالغدى ابقى خلى الواد الحليوه بقى يغديكى
رحمه / لا هيغدينى و يعشينى و يدلعنى كمان اش فهمك انت
رحيم / طب بمناسبه الدلع بقى
رحمه توطى صوتها / ايوه
رحيم / انا بفكر خير كدا اللهم اجعله خير
رحمه / ايوه ايوه
رحيم/ اول الشهر الجاى احجز اسبوع فى اى حته تختاريها و نسافر نعمل اسبوع عسل و دلع ايه رايك
رحمه / اشمعن اول الشهر يعنى
رحيم / اهو تكونى قلعتى الاسود و عدى شهر على كل اللى حصل يعنى بحاول ادينا هدنه مش عارف انا لو عليا نسافر النهرده بس حاسس انى هبقى بضغط عليكى و عليا و مش عارف انتى ايه رايك
رحمه / انا مش عارفه ان كان الكلام فى الموضوع ده ينفع فى التليفون و لا لا
رحيم / معاكى حق بقولك ايه انا هخلص بدرى النهرده و هعدى عليكى اخدك و نتغدى بره انا عارف انك مش عامله غدى نتغدى و نروح او نروح اى حته تحبيها ايه رايك
رحمه / اوك ابقى كلمنى قبل متيجى
رحيم / اوك يلا سلام
رحمه / سلام يا حبيبى
...............
فى البيت بالليل
رحيم قاعد عاللاب و رحمه تدخل و شايله طبق الغسيل تكبه عالسرير و تقعد تطبق فيه
رحمه / بخصوص الحوار بتاع التلفون
رحيم / انهى تليفون
رحمه / اقصد السفر
رحيم يقفل اللاب و ينتبه بس رحمه ساكته
رحيم / بصى انا مش عاوز ابقى بضغط عليكى
رحمه / انا بس خايفه عالدراسه انت فاهم لو حصل حمل احنا لسه قدامنا سنتين
رحيم / لو عالموضوع ده ممكن نتصرف
رحمه / ممكن اتكلم معاك بصراحه
رحيم / هو ينفع تتكلمى معايا غير بصراحه ايه السؤال ده
رحمه / انا خايفه اوى انت عارف الحوار بتاع الدكتور و انى مبخلفش انا عاوزه بيبى طبعا انا طول عمرى نفسى اكون ماما بس انا خايفه يكون ده مش وقته و انا و انت صغيرين مش عارفه انت فاهمنى و لا لا
رحيم / فاهمك بس انا مش ملاك يا بنتى يعنى مينفعش ابقى جعان و تدينى اكتر اكله بحبها فى الدنيا و تقوليلى متمدش ايدك انا نايم جنبك بالعافيه
رحمه / عارفه والله دا حقك
رحيم / حقى ؟؟؟ لا يا ماما مش موضوع حقى انتى مش مديونالى بعشره جنيه و هاخدها منك و امشى دى حياتنا سوا كل قرار فيها لازم يبقى مدروس بينا و متفقين عليه لان النتايج مش هشيلها لوحدى هتشيليها معايا
رحمه / يا حبيبى انا معاك على اى وضع بس انا زيك بالظبط نمت صحيت لقيت الدنيا كلها ملخبطه و تايهه انت فاكرها سهله عليا انا اتحرمت من كل حاجه اتمنتيها مفضليش غيرك
رحمه تعيط و رحيم ياخدها فى حضنه
رحمه بتعيط / كل بنت فى الدنيا بتحلم ان اهلها يزفوها بفستانها الابيض لعريسها يقولوها تتصرف ازاى فى موقف زى ده يقفوا جنبها لكن انا .... الحمد لله على كل حال الحمد لله على الاقل انت موجود جنبى كل حاجه تانيه تهون بعد كدا
رحيم / انا عارف انى جيت عليكى لما قررت اننا منعملش فرح بس انا والله هعوضك انا قولتلك
رحمه / وجودك جنبى يا رحيم هو احسن حاجه ممكن تقدمهالى انا مش عاوزه منك اكتر من كدا
رحيم / و انا ليا مكان تانى غير جنبك دانا لازق فيكى اهو
رحمه / هتعمل ايه فى حوار بشره
رحيم / بشره و لا الشغل و لا التدريب و لا اعمل ايه و لا ايه
رحمه / و انت هتسيب كل ده و عاوز تسافر
رحيم / صحيح افتكرت رامى كلمنى النهرده و كان عاوز يخرج معايا بكره بعد التدريب
رحمه / وماله مفيش مشكله
رحيم / خلاص تمام انا بطمن بس
....................
فى البيت بعد اسبوع
فى بيت زينب الباب يخبط و عبير تقوم تفتح
عبير / ازيك يا رحمه ايه ده انتى مخرجتيش مع رحيم ليه تعالى تعالى
رحمه تدخل و شايله صينيه رز بلبن
رحمه / عملت رز بلبن قولت اجيبلكوا طبقين و اجى اقعد معاكوا شويه
زينب / منوره تعالى اقعدى
رحمه / عاملين ايه ايه الاخبار
زينب / الاخبار عندك انتى ايه مش هنسمع خبر حلو قريب
رحمه / ادين مستنيين النتيجه
زينب / انا مبتكلمش عالامتحانات دى انا بتكلم عالامتحان التانى
عبير / انا هقوم انا عشان تاخدوا راحتكوا فى الكلام
رحمه / امتحان ايه يا طنط
عبير / طنط تقصد الدخله
رحمه / تيته معداش على موتها عشر تيام
زينب / انا بطمن بس يعنى عشان لو فى حاجه كدا و لا كدا نلحقها
رحمه / متخافيش مفيش حاجه انا هستاذن بقى عشان ورايا تنضيف
عبير / استنى يا بنتى انتى قعدتى
رحمه / مره تانيه
رحمه تمشى و تقفل باب بيتها و تترمى عالكنبه
...........
فى المعرض
عماد واقف فى المعرض منه تدخل مدايقه
منه / انا كنت فكراك اكبر من كدا
عماد / منه ازيك اتفضلى
منه / على فكره انا مش فارضه نفسى عليك انت لو مش عاوزنى اشتغل معاكوا ممكن تقولهالى فوشى و انا مش هزعل بس اللى بتعمله ده هو اللى يزعل
عماد / طب ممكن نتكلم فى المكتب جوه
منه / ممكن اتفضل
..................
فى المكتب
عماد / ممكن تهدى بس عشان نتفاهم
منه / انت معدتش بتيجى المعرض خالص و انا هنا و لما بتصل بيك مش بترد عليا انت بتتهرب منى ليه ممكن افهم
عماد / انا مش بتهرب منك يا منه
منه / كداب يا عماد انا متربيه معاك و عرفاك زى معارفه مصطفى اخويا عنيك بتكدب
عماد يضير و يمشى خطوتين و يتنهد
منه / لو فى مشكله مع عبير و مدايقه من وجودى قولى و انا هفهم و هنسحب بكرامتى لكن اللى بتعمله ده بيهنى
عماد / عبير ملهاش دعوه بحاجه
منه / يعنى انت اللى مش عاوزنى وهو فى بينا تكليف عشان تنكسف تقولى
عماد / اولا انتى فاهمه غلط انا عاوزك هنا دورك هنا مهم اهم منى كمان انتى فنانه موهوبه و شاطره فى شغلك و بتتعلمى بسرعه و عندك كريزما مع الزباين
منه / كويس على الاقل عرفت انى مغلطش فى حاجه
عماد / لا يا منه مش انتى اللى غلطتى الغلط عندى انا و عشان كدا كان لازم احاول احط مسافه
منه / مش فاهمه
عماد / و انا مقدرش اوضح
منه / لا انا من حقى افهم ايه اللى جد انت طول عمرك تقولى انتى اختى الصغيره انتى زيك زى رحمه ايه اللى جد يا عماد
عماد / اللى جد انى .....انا حياتى كلها بقت عباره عن كتله غم و نكد المكان اللى المفروض اى راجل فى الدنيا بيلاقى فيه راحته بكره اخشه و لولا انه مينفعش كان هيبقى اهون عليا انى اعيش فى الشارع و لا اخشوش اه عارف انى متنيل متجوز عارف انها حامل بس هى مفكرتش انى محتاج ارتاح فى بيتى مفكرتش غير فى الفلوس الفلوس و بس الفلوس و انها تبص على رحمه و رحيم انت بتشتغل عشان رحمه و رحيم انت بتضيع وقتك و تعبك و فى الاخر اخوك هيقش انت طلعت بايه انت لازم تبعد عنهم لازم تنفصل بمنابك لوحدك احساسك ايه و انت حته موظف عند اخوك كلام بيحرق الدم و يخلى الواحد يندم عاليوم اللى اتجوز فيه فهمتى و لا لا
منه / افهم ايه انا ايه علاقتى بكل ده
عماد / طب افهمك ازاى منه ابوس ايدك انسى
منه / لا مش هسيبك انا جايه و لازم اعرف فى ايه
عماد / ماشى براحتك فى ان الشخص الوحيد اللى بقيت برتاح و انا بكلمه هو انتى فى انى ممبطلش تفكير فيكى و ازاى كنت غبى و مسمعتش كلام امى
منه / كلام مامتك
عماد / اعاااااااااااا مش وقت غباء منه انا بحبك ارتاحتى
منه / ايه
عماد/ اهو بقى اللى حصل انا بحبك حاولت ابعد يمكن لما تبعدى شويه عن عينى اعرف اتاقلم و اعيش
منه / انت اكيد مش طبيعى عن اذنك
عماد / منه انا اسف انى حطيتك فى موقف زى ده انا بجد اسف
منه / اسف انا اصلا مش قادره استوعب اللى انت قولته خالص بس عالعموم الكلام ده مش هيطلع بره المكتب ده لان اكيد لو طلع ساعتها هتضطر اخسرك و دى حاجه انا متاكده انها هتبقى صعبه اوى عليا
عماد/ انا بجد اسف ..... اسف انى حسبتها غلط
منه / خلاص يا عماد ... بص انا لازم امشى عن اذنك
منه تمشى و عماد بيبص عليها
..................
فى شقه عماد
عماد نايم عالسرير بيبص للسقف و سرحان عبير تيجى تقعد جنبه
عبير / بتفكر فى ايه
عماد يضير / ولا حاجه اخبار النونو ايه
عبير / كويس انت اللى اخبارك ايه من ساعه مدخلت النهرده منطقتش
عماد / احنا بقالنا قد ايه نعرف بعض
عبير / تقريبا سنه و نص كلها شهرين على عيد جوازنا ليه بتسال ليه
عماد / امال انا ليه حاسسهم اكتر من كدا يمكن من كتر الاحداث اللى حصلت فيهم
عبير / انت عارف ان الاسبوع الجاى هقفل الرابع
عماد / مبروك
عبير / عرفت صحيح مش رحمه اخيرا اتكرمت و فكرت تيجى تقعد معايا انا و امك
عماد / ياريت تكونوا استقبلتوها عدل
عبير / ايه الكلام ده و احنا يعنى كنا بنعملها ايه يعنى يا عماد
عماد / انا تعبان يا عبير و مش وقت خناق ابوس ايدك
عبير / اه مانا بقيت وش غم اقولك حاجه امسك التليفون و اتصل بمنه انا متاكده انها هتفك عنك
عماد / انا داخل استحمى عن اذنك
عماد يقوم و عبير تطفى النور و تنام
...............
فى البيت عند رحمه
رحيم / يا بنتى مانتى عارفه امى
رحمه / انا اصلا مش عارفه كنت فاكره ايه لما اروح يعنى
رحيم / على العموم تسلم ايدك عالرز بلبن كان حلو و انا متاكد انه عجبهم
تليفون رحيم يرن
رحيم / عماد خير يابنى خضيتنى ..... ايوه صاحى تعال ...... هستناك سلام
رحمه / خير
رحيم / مش عارف استنى اما اقوم افتح لعماد
رحيم يقوم يفتح الباب يلاقى عماد نازل عالسلم يدخله يقعدوا
عماد / رحمه فين
رحمه تدخل
رحمه / خير يا عماد
عماد/ كان فى حوار كدا عاوز اكلمكوا فيه
رحمه / خير يا عماد
عماد / كنا عاوزين من فتره كدا نبنى مصنع للاثاث فى اسكندريه هوفر علينا مصاريف نقل العفش من هنا لهناك و هينفع فى التوسع و بما ان بابا بقى تقريبا مقيم هناك طول الوقت فهيقدر يشرف عليه
رحمه / و انا اقدر اعمل ايه
عماد / المشروع ده كان من ايام عموا محمود الله يرحمه و هو كان ماجله عشان منحطش كل السيوله اللى معانا فى السوق بس دلوقت الوضع اختلف بس طبعا انتى مكانه و لازم توافقى
رحمه / عماد انت بتاخد رايى فى ايه انت مدام شايف ان المصلحه فى المشروع ده مش محتاج تاخد رايى
عماد / دى فلوسك يابنتى و مقدرش اتصرف فى قرش واحد منغير مشورتك
رحمه / فلوس مين يابنى انا و انت واحد و اللى انت شايفه خير اعمله
عماد يبص لرحيم
رحيم / زى مقالتلك انت اللى فاهم و انت الكبير و احنا واثقين فيك انت مش هتضرنا و لا تخسرنا
رحمه / و حتى لو احنا يابنى معاك عالحلوه و المره و لو عاوز الفلوس اللى فالبنك كمان انا ممكن بكره اعملك توكيل تسحبها كلها
عماد / لو احتجت حاجه هبقى اقولك انا بس بضمن موافقتكوا بس عشان ابدء انفذ
رحيم / تمام
عماد / اسف عالازعاج
رحيم / بطل هبل دا بيتك
..............
فى المعرض بعد فتره
محمد / الوضع مختلفش كتير يابنى الفلوس اللى معانا يادوب تشترى الارض لكن المبانى و المكن معناش
عماد / لا معانا يا بابا احنا طول عمرنا بنقسم صافى الربح على تلاته حضرتك تلت و عموا الله يرحمه تلت و التلت الباقى بنحطه فى حساب المجموعه ممكن نزود من معانا
محمد / انت قولت انك كلمت رحمه و رحبت
عماد / ايوه قالت انها موافقه
محمد / بس كدا السيوله كلها هتتحط فى المشروع ده و لو حصل اى حاجه فى السوق هنقف
عماد / يا بابا احنا معانا و زياده لو مش فلوس دهب
محمد / بتتكلم كانك تقدر حتى تحكم مراتك لو قولتلها بيعى الدهب
عماد / قصدك ايه يا بابا
محمد / انا مش هسمح ان رحمه تبيع قصقوصه دهب لو امك و مراتك مش هيحطوا قدها
عماد / نجرب
محمد / لما تبقى واثق انهم فى ضهرنا ابقى اتكلم قبل منفتح بطننا فى السوق
...............
فى البيت عند عماد
عبير / هو ده اللى خلاك تسبنى امبارح و تنزل عند اخوك
عماد / دا مشروع العمر انا متاكد انه هيفرق معانا جدا
عبير / انت من يوم معرفتك و انت بتحلم بمصنع اسكندريه و ان يبقى ليكوا فروع كتير اوى هناك زى مليكوا هنا
عماد / انا نفسى معارض الصياد تبقى فكل حته فى الجمهوريه
عبير / و المطلوب منى
عماد / انك تكونى فى ضهرى
عبير / طب مانا فى صهرك طبعا
عماد / بصى احنا معانا اللى يكفى شرا الارض و نبنى بس ساعتها كل السيوله اللى معانا هتتجمد و مش هنعرف نشترى خشب و لا ندفع مرتبات و لو حصل اى عجز فى السوق لاى سبب هنتخنق
عبير / ايوه برده اقدر اساعد بايه
عماد / انا اتفقت مع رحمه انها تدفع مبلغ كاش بس لازم بابا يحط هو كمان زى مهى هتحط بالظبط
عبير / تمام حق ربنا النص بالنص
عماد / بس بابا معهوش بابا مكنش بيعرف يكسر قرش زى عموا محمود جوازى و ادى لرحيم حقه زى مدفع فى فرحى و جوازى فانا محتاجك تساعدينى
عبير / هات مالاخر يا عماد عاوز ايه
عماد / دهبك
عبير / شبكتى عاوز تبيعنى شبكتى
عماد/ انا هستلفه بس هرجعهولك زى مكان و اكتر اوعدك جرامات مش بتمنه خدت متين جرام هرجعهم متين و زياده
عبير / و ايه يضمنلى و بعدين معلش لو عالبيع بقى فوالدتك اولى يعنى بما ان ابوك هو اللى داخل بالنص فالاولى انه ياخد دهب مراته الاول وبعدين لازم تفتكر ان ليك اخ يعنى زى مهتاخد منى و تحط فى مناب ابوك يبقى اخوك رحيم كمان لازم يحط
عماد / رحيم معاه يحط الفلوس اللى اخدها من بابا مصرفش منها حاجه لكن انا معييش
عبير / بص يا عماد انا نفسى اوى اساعدك بس فى حاجه تخصك باسمك لكن انا مقدرش ارمى دهبى و انا مش ضامنه يرجع و لا لا اديك شايف الظروف ملخبطه ازاى فى البيت ده و الدهب ده هو اللى بيامن مستقبلى
عماد / الدهب هو اللى بيامن مستقبلك
عبير / ده مش عشانى يا عماد ده عشان ابننا
عماد / امال انا بعمل كدا ليه مش عشان ابننا و بعدين مقولتلك انى هرجعهولك جرامات اول مالمرحله دى تعدى
عبير / انا اسفه يا عماد انا مقدرش زى مقولتلك طنط زينب اولى منى بالموضوع ده
عبير تقوم و تسيب عماد
...................
فى المعرض بعد فتره
رحمه تدخل
عماد / اهلا بست الكل ايه الشرف العظيم ده اتارى المعرض منور
رحمه / هى منه فين بقالى ياما مشوفتهاش
عماد يسكت
رحمه / انا قولت اول مالاجازه هتيجى هلاقيها بتنط على راسى كل يوم امال هى فين
عماد/ معدتش بتيجى
رحمه / خير فى حاجه
عماد / مفيش هو الموضوع كان كبير عليها فقعدت و انا كمان تقلت عليها اوى
رحمه / اممممم يا خساره كان نفسى اشوفها
عماد / طب متروحيلها البيت و بالمره تطمنى عليها
رحمه / والله فكره هبقى اتصل و احدد معاك
عماد / معاد ايه تعالى انا هوصلك تعالى
رحمه / بس مقولتش لرحيم انى خارجه
عماد / مش مشكله مش مشكله ابقى كلميه فى السكه يلا يلا
رحمه / طب هطلع اجيب شنطتى
عماد / يلا يا رحمه بقى
عماد يزق رحمه فى العربيه و يطلع جرى على بيت منه
.................
فى اوضه منه
رحمه / مالك بقى يا ست البنات عموا ابراهيم بره قالى انك مبتطلعيش من اوضتك و لا بتخرجى و لا بتتكلمى مع حد خالص فى ايه بقى مدام مدايقه انك سبتى الشغل ممكن ترجعيله عادى
منه تسكت
رحمه / دا الموضوع كبير اوى اوعى تكون عبير قالتلك كلمه كدا و لا كدا دايقتك هى اكيد متقصدش انتى عارفه هى نظام طنط زينب كدا قلبها طيب بس لسانها متبرى منها و بعدين يا ستى حقك عليا
منه / رحمه انتى اختى صح
رحمه / طبعا انتى هبله و لا ايه
منه / بصى انا بجد الفتره دى تعبانه اوى و تايهه و مش لاقيه حد اقدر اكلمه و يفهمنى
رحمه / و انا روحت فين احكى احكى ايه بتحبى و لا ايه
منه تبص فى الارض
رحمه / الله دا الموضوع كبير بقى احكى يا ستى فى ايه
منه / انا مش عارفه ابدء ازاى بس انا زى اى بنت يعنى جوايا مشاعر بس والله مش انا اللى بتحكم فيها و كمان انا مقدرش افرض نفسى على حد
رحمه / مش فاهمه
منه بتعيط / انا اللى طلبت من بابا انى اتمرن فى المعرض مع عماد بس هو كان طول الوقت بيقولى انتى اختى الصغيره انتى زى رحمه و مش عارفه اعمل ايه
رحمه / عماد ؟؟
منه / انتى بتحبى و هتفهمى احنا مبنخترش اللى بنحبهم بس فنفس الوقت منقدرش نجبرهم هو اختار عبير و اتجوزها و انا رضيت و سكت والله انا كنت راضيه ابقى جنب و خلاص مش عوزاه يحبنى انا بس عوزاه يبقى قدامى عاوزه اتكلم معاه اشوفه و اسمعه عمرى مفكرت انى ممكن اخرب بيته او ابعده عن مراته و ابنه انا والله عمرى مفكرت فحاجه زى دى
رحمه / انتى بتحبى عماد
منه / اكتر مبتحبى انتى رحيم
رحمه / ايوه بس حبك ده ملوش اخر يعنى عماد متجوز و كلها كام شهر و ابنه هيتولد
منه / عارفه والله بس انا اعمل ايه انا مروحتش قولتله انى بحبه انا فضلت جنبه و خلاص يا بنتى اقولك ايه بس انا حبى لعماد مش هو اللى تعبنى انا تعبت لانه بعدنى عنه معدش ينفع اقرب منه و لا اتكلم معاه معدش ينفع اشوفه
رحمه / هو عماد عرف انك بتحبيه
منه / لا ميعرفش حاجه بس هو الفتره اللى فاتت كان بيتهرب منى جامد و انا بدل مفهم و احس على دمى و ابعد من سكات والله حاولت طب والله حاولت يا بنتى بس مقدرتش مقدرتش ابعد رحلى خدتنى لعنده عشان اشوفه و اول مشوفته مقدرتش امسك لسانى و عاتبته و ياريتنى معاتبته
رحمه / ليه ايه اللى حصل
منه / قالى انى لازم ابعد عنه عشان هو بدا يحبنى يعنى حتى لما يبدء ياخد باله منى يكون اصلا الوقت فات و معدش ينفع طب ده يرضى مين يعنى افضل طول عمرى بتمنى انه يبصلى و يوم ميبصلى يكون مينفعليش ليه دايما الناس الصح بتيجى فى الوقت الغلط ليه
.................................
((((((مفيش رحمه )))))
#لولو_محمد
الحلقه الواحد و الاربعون
رحمه / هو عماد عرف انك بتحبيه
منه / لا ميعرفش حاجه بس هو الفتره اللى فاتت كان بيتهرب منى جامد و انا بدل مفهم و احس على دمى و ابعد من سكات والله حاولت طب والله حاولت يا بنتى بس مقدرتش مقدرتش ابعد رحلى خدتنى لعنده عشان اشوفه و اول مشوفته مقدرتش امسك لسانى و عاتبته و ياريتنى معاتبته
رحمه / ليه ايه اللى حصل
منه / قالى انى لازم ابعد عنه عشان هو بدا يحبنى يعنى حتى لما يبدء ياخد باله منى يكون اصلا الوقت فات و معدش ينفع طب ده يرضى مين يعنى افضل طول عمرى بتمنى انه يبصلى و يوم ميبصلى يكون مينفعليش ليه دايما الناس الصح بتيجى فى الوقت الغلط ليه
.................................
رحمه / دا نصيب يا بنتى
منه / انا مش عارفه اعمل ايه انا كل اللى عوزاه انى اشوفه بس اشوفه حتى لو من بعيد بس ازاى ازاى بعد مقالى صريحه انى لازم ابعد لازم ابعد عشان ينسانى
رحمه / و انتى كمان لازم تنسيه عماد متجوز
منه / عارفه و عشان كدا حابسه نفسى فى اوضتى يمكن اقدر انساه
رحمه / بس كدا مش هتنسيه انتى كدا مش هتبطلى تفكير فيه
منه / طب اعمل ايه طيب
رحمه / يابنتى دا اكبر منك بعشر سنين انا مش فاهمه بس انتى بصى انا عارفه انا عارفه بصى اشغلى وقتك
منه / انا لو خرجت مالبيت اول مكان رجلى بتاخدنى ليه هو عنده اعمل ايه بس
رحمه / لا يا منه بس انتى لازم تسيطرى على نفسك مش كدا
تليفون رحمه يرن
رحمه / دا عماد استنى
منه / عماد
رحمه / الو ..... ايوه ايه ده انت مستنى تحت من ساعتها ..... لا كويسه الحمد لله مفيهاش حاجه ..... انا نزلالك حاضر سلام
منه / هو عماد تحت
رحمه / عماد هو اللى جابنى عشان اطمن عليكى
منه تعيط
رحمه / منه فوقى انتى لسه صغيره و الف من يتمناكى و لو ليكى نصيب فى حاجه هتجيلك مهما كان بس لازم ترضى بنصيبك
منه تهز راسها
رحمه / انا هنزل بقى سلام
منه تهز راسها
................
فى العربيه
رحمه / انا مكنتش اعرف انك هتستنانى
عماد / انا جبتك لازم ارجعك هى عامله ايه
رحمه / كويسه صحيح انت عملت ايه فى الموضوع بتاع اسكندريه
عماد / اعمل ايه بس يا رحمه اللى كنت معتمد عليها و فاكر انها هتسندنى خافت على دهبها و قالت مش مشكلتى
رحمه / مش فاهمه دهب ايه
عماد / بابا معهوش سيوله عرضت عليه اننا نبيع دهب ماما و عبير و نحطه و لما المشروع يجيب نبقى نعوضهم بس عبير كانت اول واحده ترفض
رحمه / حقها يا عماد انت تجيبلها هديه و ترجع تاخدها تانى و بعدين الشبكه دى بتبقى ذكرى جميله عند البنت مش سهل تفرط فيها
عماد / بس انا جوزها و محتاج تقف جنبى يعنى اروح استلف مالغريب و لا اخد قرض عشان مراتى مرضيتش تقف جنبى يعنى شويه الدهب دول اهم عندها منى
رحمه / لا طبعا مش اهم بس هى بتفكر بمنظور تانى يمكن او يمكن هى
عماد/ ميمكنش خلاص مش مشكله
رحمه / طب طنط زينب قالت ايه
عماد / والله معرف بابا كلمها اصلا و لا لا
رحمه / طب على العموم يا سيدى انا عندى ليك فكره بنت لذينه
عماد / قولى يام الافكار
رحمه / دهب تيته الله يرحمها محدش هيلبسه و هو كدا كدا مركون بيعوه ماعدا القلب بتاعها انا هشتريه دا جواه صورتى انا و رحيم تمنه و شوف بكام و انا هشتريه و لو احتجتوا فلوس تانى يبقى ربنا يحلها ان شالله ابيع انا دهب ماما و اسلفك و لما ربنا يكرم و المشروع يقف على رجليه تبقى تردهملى
عماد / شوفتى الفرق بينك و بينها انتى بتحاولى تساعدى لكن هى بتقول مليش دعوه ده اصلا مش مشروعك هى مبتفكرش غير فى الفلوس و بس
رحمه / متظلمهاش انت مش فاهم ايه اللى بيدور جواها
عماد / انا تعبان يا رحمه تعبان و هى و لا حاسه باى حاجه اقولك ايه بس
رحمه / قولى كل حاجه انا اختك
عماد يتنهد / انا عاوز مشروع اسكندريه ده يبدء عشان اهج و اروح هناك اطول فتره ممكنه بعيد عن هنا يمكن ساعتها اقدر اصفى عقلى و افكر على رواقه
رحمه / ربنا يهدى بالك ادينا وصلنا انا هطلع اجيبلك صندوق الدهب من فوق دا يعمله مبلغ حلو
عماد / انا جاى معاكى
عماد و رحمه يرجعوا يلاقوا رحيم فوق
رحيم / قلقتينى عليكى لما رجعت ملقتكيش
عماد / كانت معايا بنطمن على منه
رحيم / مالها منه
رحمه / ملهاش هى بس بقالها فتره مبتجيش قولنا نطمن عليها انا والله كنت ناويه اكلمك اقولك بس عماد خدنى بسرعه فملحقتش معلش حقك عليا
رحيم / لا يا حبيبتى مفيش حاجه انا بس قلقت بس انتى مدام كويسه خلاص و لا يهمك
رحمه / طب هدخل اجيب الشكمجيه من جوه ثوانى
رحمه تدخل تفتح دولاب جدتها تلاقى الشكمجيه فاضيه تطلع تجرى
رحمه / اللحقنى يا عماد الشكمجيه فاضيه اللحقنى انا مش عارفه الدهب راح فين انا مدخلتش الاوضه من يوم متيته اتوفت انا معرفش راح فين
رحيم / طب اهدى بس هنشوف
رحمه / يعنى ايه مين اللى دخل البيت مين اللى فتح الدولاب
الباب يخبط عماد يروح يفتح
محمد / فى ايه بتزعقوا ليه انا سمعت صوتكوا من هناك
عماد / دهب تيته اتسرق
محمد/ ايه اتسرق يعنى ايه مين يقدر يدخل هنا اصلا دا بوابه عالعماره من تحت و بوابه عالدور هنا مين يقدر يدخل الشقه
زينب تدخل / فى ايه يا خويا ايه اللى اتسرق
محمد / مين دخل الشقه هنا و خد دهب امى
زينب / فى الحفظ و الصون ياخويا عندى كله
رحمه / عندك بيعمل ايه
زينب / شايفين مقصوفه الرقبه بتكلمنى ازاى اما صحيح اللى اختشوا ماتوا
رحمه / فعلا اللى اختشوا كلهم ماتوا و سابوكى انتى عايشه فوسطينا
رحيم / رحمه عيب ادخلى اوضتك لو سمحتى
زينب / شايفين ربايه ست حياه شايفين البت المتربيه بترد عليا ازاى شايفين
محمد / انتى خدتى الدهب بصفتك ايه يا زينب مين اذنلك
زينب / الله حقى و حق عيالى الله يرحمها مكنلهاش ورثه غيرك و بعدين هو انا اخدته بعته دانا اخدته عنتهولك بس محد يمد ايده عليه
محمد / روحى هاتيه و حسابى معاكى بعدين
زينب تروح تجيب علبه دهب كبيره
زينب / اهو يا خويا اديهولها اديهولها زى مديتلها نصيب ولادك فى المعرض افضل انت كدا اتنازل و هى تكوش لحد منلاقى نفسنا فى الشارع
رحمه / مش انا اللى باخد حق حد مش انا اللى بحاول احط ايدى على حاجه مش بتاعتى
زينب / اسم الله اسم الله امال عاوزه الدهب تعملى بيه ايه ياختى هو انتى ناقصك دهب و لا ناقصك دهب
محمد / خلاص يا زينب اتفضلى على شقتك
زينب / طبعا و انا كنت مستنيه منك ايه يعنى مانت لازم تقف معاها بنت حياه
محمد يزعق / قولت على شقتك يا زينب
زينب تطلع بره
محمد / الدهب اهو يا بنتى رجعيه مكنه
رحمه تفتح الدهب تدور على السلسله القلب متلاقيهاش
رحمه / قلب تيته مش موجود
محمد/ ياربى بقى عليكى يا زينب روح يا عماد اسال امك عليه و شوف فى حاجه تانيه ناقصه و لا لا
عماد يروح يسال امه
عماد / القلب بتاع تيته مش موجود هو فين
زينب / خليك انت كدا خايب خليها تحط ايدها على كل حاجه و انت اخرتك هتشتغل موظف عندها
عماد / الدهب ده كنا هناخده و نبيعه عشان نبنى مصنع اسكندريه
زينب / عليا انا الكلام ده يا خويا عليا انا و بعدين الدهب ده حقك انت و اخوك هى ملهاش فيه قصقوصه
عماد / لا ليها بحق ربنا ليها ربعه و بعدين متخافيش الدهب ده مش هيتقسم حتى القلب هيتمن عند الراجل و هى هتشتريه و تدفع فلوسه
زينب / على العموم القلب مش عندى ده عند مراتك فوق
عماد يطلع لعبير
عماد / فين الدهب اللى اخدتيه من تيته
عبير / انا ماخدتش حاجه
عماد / ماما قالت انك اخدتى السلسله القلب هى فين
عبير / هو فى ايه مالكوا بتدونى باليمين و عاوزين تاخدوا بالشمال كدا ليه
عماد / انتى اصلا ازاى تاخدى حاجه مش بتاعتك و ليه مقولتليش انك اخدتيها
عبير / انا مخدتش حاجه امك اللى ادتنى و قالتلى ان ده حقى و حق ابنى اللى فبطنى
عماد / انا تعبت منك بجد الدهب ده بتاع تيته و لولا انى كنت هاخده ابيعه عشان اكمل المشروع مكنتش عرفت انكوا قسمتوه بينكوا احنا شكلنا بقى يكسف قدام رحمه
عبير / و هى رحمه ناقصها دهب دى عندها قد العلبه دى مرتين
عماد / بطلى تبصى على اللى عند غيرك و احمدى ربنا عاللى عندك انتى ايه مبتشبعيش
عبير / انا برده اللى مبشبعش و على ايه استنى انا هجيبلك الدهب اللى اخدته من جدتك انا اصلا مرضاش اللبسه
عبير تفتح شكمجيتها و تطلع التلت غوايش و السلسله و تحدفهم تحت رجلين عماد
عبير / خدهم انا مش عاوزه منكوا حاجه انا ربنا ميحوجنى لا ليك و لا لحد
عماد / انا بس نفسى افهم ازاى مخدتش بالى منك و احنا مخطوبين ازاى كل يوم بكتشفك اوى كدا ازاى كنت مخدوع و متغمى اوى كدا
عبير / يا سلام خلاص عبير اللى كنت بتتغزل فيها معدتش عجباك البت الجدعه اللى كانت عجباك طلعت سحرالك و دلوقت شفتها على حقيقتها
عماد / انا نازل انا فعلا مش قادر ابصلك
عبير / اوعى تكون فاكرنى مش واخده بالى او مش حاسه لا فوق انا لو كنت شوفت منك امان مكنتش استخسرت فيك حاجه بس اللى تنام جنب جوزها و هو بيحلم بواحده تانيه و تسكت
عماد / واحده تانيه
عبير / طول الليل تنادى عليها منه منه منه فيها ايه ست منه فيها ايه و بعدين مدام هتموت عليها اوى كدا متجوزتهاش ليه مسمعتش كلام امك و اتجوزتها ليه متروح ياسى عماد تطلب من منه كدا تبيع دهبها عشانك كدا روح جرب يمكن ترضى
عماد / هترضى عارفه ليه عشان هى مش زيك هى بنت اصول
عبير / و انا بنت كلب مش كدا خلاص و ايه اللى جابرك طلقنى و رحلها
عماد يسيبها و ينزل
............................
فى شقه رحمه
عماد يدخل يديها الدهب
عماد / انا اسف بس ماما كانت مدياهولها
رحيم / انت كويس يا عماد
عماد / لا مش كويس انا خارج شويه عن اذنكوا
رحيم / طب استنى انا جاى معاك
رحمه تفتح السلسله
رحمه / شالت الصور
عماد يبص لرحمه و رحيم و يمشى و رحيم يجرى وراه
..............
بره
رحيم / مالك ياعم مش مشكله السيوله اتحلت كدا و لا ايه و بعدين احسبها و شوف الفرق كام عشان رحمه تحطه
عماد ساكت
رحيم / مالك يابنى فيك ايه انت شديت مع عبير و لا ايه
عماد / و من امتى كنا كويسين انا كنت غبى اوى لما اتجوزتها
رحيم / انت ايه حكايتك دانت اخترتها من وسط بنات الدنيا كلها و محدش غصبك عليها
عماد / ياريت ياخى امك كانت غصبتنى على منه بدل متسبنى اختار انا اصلا حمار والله ياعم حمار و بنهق
رحيم / ههههههههههههههههه حتى لو كنت اتجوزت منه غصب كنت هتقول كدا برده و تكره البنت و تكرهها فى عيشتها
عماد / يعنى انا السبب
رحيم / على فكره عبير كمان مش سعيده معاك حاول تتكلم معاها و تشوف هى ايه اللى ناقصها اسمعها يا اخى
عماد / مبتتكلمش غير عن الفلوس و بس و الورث و القرف
رحيم / عشان كدا مستعجل على مشروع اسكندريه
عماد / اهو اخلع شويه كام يوم بدل النكد المستمر طول الوقت
رحيم / هههههههههههههههه تفتكر انا و رحمه كمان هنتخانق كل شويه بعد الجواز
عماد / لا مش فى الاول كدا و بعدين كفايه كميه الخناقات اللى اتخانقتوها الفتره اللى فاتت
رحيم / على رايك تعال بقى اما نلحق الصاغه عشان نبيع الدهب و لا هتستنى بكره عشان تحط فلوسه فى البنك مره واحده
عماد / بكره الصبح احسن اخبارك انت ايه
رحيم / كويس بس لسه تايه
عماد / بص يابنى متحملش نفسك اكبر من حقها حط الفلوس فى البنك و عيش على قدك و ركز فى الكليه و التدريب و انت يعنى انت و رحمه هتاكلوا بكام
رحيم / انا مش عاوز احس ان رحمه هى اللى بتصرف عالبيت
عماد / انت و رحمه واحد يابنى و البيت ده شركه و بعدين الحساسيات دى مش هتلاقيها عند رحمه فمتحطهاش فى دماغك
رحيم / ربنا يسهل متاخد الفلوس دى و تحطها فى المشروع الجديد بدل محطها فى البنك
عماد / لو احتجتها هبقى اقولك يلا عشان نروح بقى
................
فى المكتب بعد فتره
رحيم / يااااه بقالنا فتره طويله منزلناش مكتب دا الواحد حاقد عالبنات يا جدع
اللهام / يا راجل ده اللى ناقص تقعدوا انتوا هنا و احنا اللى ننزل وسط العمال متقوله حاجه يا على
على / هههههههههههههههههه يا ستى مش بتطلبوا بالمساوه اشربوا بقى
اللهام / ماشى ماشى اتفضل ده الديزاين النهائى للمبنى الكليه خد صمم و جهز المقايسه
رحمه / الله امال ليه خلتينى اصممه مدام هو متصمم
اللهام / يا بنتى ده مبنى حكومى و احنا يادوب بنعيد التصميم بتاعه و نجهز المقايسه عشان ندخل فى المناقصه عليه لكن مش احنا اللى بنحط التصميم
رحمه / ايوه طب ليه خلتينى اعمل التصميم
على / عشان تتمرنى فى مبنى و تشوفى الفرق بين اللى عملتيه و اللى الحكومه عملته
اللهام / على فكره انتى تصميمك كان احلى بس نعمل ايه بقى الحكومه دايما بتختار الارخص
على / والله سبكوا مالشغل بقى و خلونا فى المفيد ايه اخبار الغدى
اللهام / انا طلبت دليفرى زمانه جاى
على / تمام ... صحيح يا رحيم انت بتعرف تشتغل ساب صح
رحيم / اه اخدت كورس بس مجربتوش
على / بتعرف تحط نظام انشائى لمبنى
رحيم / ايوه
على / خلاص خد اتمرن و جرب كدا تدخل المبنى ده ساب و وورينى هيطلعلك ايه
رحيم / ايوه بس انا مش هفهم النواتج
اللهام / طب متستغل الاجازه و تاخد كورس ديزاين عند حد و اهو كدا هتقدر تصمم كمان انشائى و تفهم
رحيم / باذن الله الاجازه الجايه بقى
على / اجازه جايه ايه يابنى لسه فاضل شهر بحاله عالدراسه اللحق نفسك بدرى بدرى عشان كل شويه هتلاقى كورس جديد بينطلك كل ده هيفيدك
رحيم / انا اتهريت يا جدعان
على / كلو فى مصلحتك والله على الاقل مش هتتعب زى و تاخد كل دول بعد التخرج
رحيم / ربنا يسهل
الفراش يدخل و شايل اكياس
اللهام / الاكل وصل اخيرا
على / انا اللى عازم المرادى
رحيم / و المره الجايه علينا انتوا اصلا متعرفوش ان معانا هنا اشطر طباخه فى مصر كلها
اللهام / شكلها يدى شاطره فى كل حاجه
رحمه / لا والله دا بيخدعكوا انا على قدى
رحيم / طب خلاص ايه رايكوا الخميس بكره تيجوا تتغدوا عندنا و هتشوفوا
على / بكره مين ياعم انت بتدبسها و لا ايه
رحيم / ياعم انا عارف انا بقول ايه هى قدها و بعدين اهو فرصه تتعرف على عيلتى
على / والله دا يشرفنى يا رحيم انا ياما سمعت كلام من دكتور اسماعيل عن عيلتك
رحيم / قشطه اتفقنا
اللهام / ادبستى يا فالحه
رحمه / لا متخافيش انا قدها و قدود
اللهام / عاش يا وحش
...............
تانى يوم
فى شقه رحمه الباب يخبط رحمه تفتح الباب رحيم يدخل و شايل اكياس بالهبل
رحمه / اخيرا جيت تعال هات الحاجه دى ووضب الصاله كدا و روقها
رحيم / انا قولت لماما و عبير اننا عازمينهم يتعرفوا على زمايلى فى الشغل
رحمه / انا مش عارفه ده صح و لا غلط بس انت عارف ان عبير مش بتحب اللهام
رحيم / هى مبتحبش حد انا عارف اخويا اتجوزها ليه
رحمه / حرام عليك دى غلبانه
رحيم / والله انتى اللى غلبانه اوعى اوى
............
بعد شويه كتير الباب يخبط رحيم يفتح الباب عبير تدخل و شايله صينيه بسبوسه
عبير / انا عملت حاجه على قدى كدا و جيت اساعد رحمه
رحيم / خشيلها المطبخ انا بوضب السفره امال ماما فين
عبير / بتلبس و جايه
عبير تدخل المطبخ لرحمه
عبير / الله الله عالروايح اساعدك و لا خلصتى
رحمه / لا خلاص انا تقريبا خلصت دوقى كدا الاكل
عبير تدوق المحشى / واو حلو اوى و ملحه مظبوط و الشربه كمان تمام اوى اوى
رحمه / انا مش عارفه كفايه كدا و لا كنت عملت حاجه كمان
عبير / هما هينهبوا دا محشى كرنب و كوسه و فلفل و طماطم وورق عنب انتى مخزنه ورق العنب ده صح
رحمه / اه كان فى الفريزر حو يعنى كفايه
عبير / اه كفايه اوى انتى هتغرفى دلوقت و لا لما الناس تيجى
جرس الباب يرن
رحمه / شكلهم وصلوا
رحمه و عبير يغرفوا و يطلعوا يحطوا الاكل عالسفره عبير تحط صينيه الفراخ عالسفره و تضير تلاقى على و اللهام فى وشها
رحمه / طبعا انتوا مش محتاجين تعريف انتوا دفعه واحده دا بقى البشمهندس
عبير من تحت الدرس/ على غنى عن التعريف
رحيم / انتو تعرفوا بعض
عبير / امال احنا دفعه
رحيم / بشمهندسه عبير تبقى مرات اخويا الكبير
عماد يدخل
رحيم / اهو وصل اهو
عماد يسلم عالناس و رحمه تدخل و عبير وراها عالمطبخ
عبير / هما دول ضيوفكوا
رحمه / دول اللى ماسكين مكتب دكتور اسماعيل و بيمرنونا مانا قيلالك
عبير / بس مقولتيش ان هما دول الى عزماهم
رحمه / هو وجودهم مدايقك و لا ايه
عبير / و يدايقنى ليه اهلا و سهلا بس على الاقل خلاص خلاص انسى هاتى اساعدك
عبير تاخد الاكل و تروح تحطه و تروح تقعد جنب عماد و زينب و محمد يدخلوا
رحيم / بابا و ماما
على / اهلا و سهلا اتشرفت بمعرفتكوا
محمد / الشرف لينا يا باشمهندس
اللهام / اساعدك فى حاجه يا رحمه
عبير / كتر خيرك احنا قمنا بالواجب
اللهام / اوك بطمن بس
رحمه / ايه يا جماعه هو محدش بيمد ايده ليه انتوا محتاجين عزومه
على / لا انا هدوق و هحكم و لعلمك انا زوقى فى الاكل صعب
عبير / مهو باين
على يبص لعبير و يسكت عبير تاخد طبق عماد و تغرفله
عبير / كل يا حبيبى الف هنا
عماد / شكرا يا حبيبتى
رحيم / النهرده عاملين اول اختبار عملى لرحمه فى العزومات
على / و من قبل مدوق واضح انها نجحت نجاح منقطع النظير
اللهام / لا و الطعم كمان تحفه الصراحه
رحمه / ميرسى كتير
عبير /انت مبتاكلش فراخ ليه يا بشمهندس
عبير تقوم تشيل حته بالمعلقه و تحطها جامد فى طبق على الصوص يبهدل هدومه
عبير / اسفه
على / حصل خير ممكن الحمام
رحيم / اتفضل
رحيم ياخد على عالحمام
عبير / مش تقومى تطمنى عليه
اللهام / كلو بيطلع فى الغسيل
عبير / لا مش كلو فى بقع بتلزق و مبتطلعش
اللهام / ساعتها هبقى اشحت الهدوم او ارميها و اجيبله جديد هديه
عبير / ازاى نسيت ان على ده طبعه يرمى و يجيب جديد
اللهام / على فكره الاكل حلو اوى يا رحمه
رحمه / ميرسى
......................
تكملة الرواية من هناااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق