رواية لغة بلا حروف الفصل الثالث والرابع بقلم روزان مصطفى حصريه في مدونة موسوعة القصص والروايات
رواية لغة بلا حروف الفصل الثالث والرابع بقلم روزان مصطفى حصريه في مدونة موسوعة القصص والروايات
«٣»
لحظة صمت بيني وبين منصور في المُكالمة، تعدت الدقيقة، وبعدها قال بصوت رخيم: أنا جاي حالًا قوليلهُم جوزي قال هييجي دلوقتي بنفسُه.
قفل معايا من غير ما يقولي سلام، بالتأكيد عقلُه إنشغل بكلامي.. رجعت قعدت على الكُرسي وحاولت أمثِل الهدوء وأنا بقول: منصور قال جاي في السكة هيوريكُم الكاميرات بنفسُه.
هزت حماتي راسها بمعنى تمام وقعدنا، لغاية ما لقيت منصور بيتصل عليا، وقفت على جنب مرة تانية ورديت عليه: أيوة يا منصور.
منصور بنبرة غريبة: أنا تحت، إنزلي وسيبي أمي قاعدة مع الست تواسيها.
قولتله بإرتباك: حاضِر.
نزلت بعد ما قولت لحماتي، لقيتُه واقِف قُصاد بوابة العمارة وبيبُصلي بصمت، اخدني من دراعي وعداني من وسط الرجالة وهو بيقولي: إركبي.
بصيت لعادل اللي واقِف مراقبنا بعينيه، بعدها قولت لمنصور: هو مش هييجي معانا ولا إيه؟
عينين منصور برقت وهو بيقول بلهجة أمرة: بقول إركبي العربية.
ركبت في المقعد الأمامي جنبه، ولف هو وركب، بعدها ساق بينا وهو ساكِت ومغطي بوقه بصوباعين إيديه، قالي بهدوء: إيه اللي قولتيهولي في التليفون دا؟
بلعت ريقي ودعيت ربنا يسترها معايا، هقول واللي يقوله جوزي هعمله
بدأت أحكيله عن ليلتها، بالتفصيل، وقولتله كمان إن القاتِل إبن عمه اللي هيبعتوه معانا عشان يشوف الكاميرات وإني متأكدة من كدا، إنهارت وبدأت اعيط، لاحظت منصور بيضحك ضحكة اللي هو (كُنت عارِف) وقال فجأة: عشان كدا الواد مرضاش ييجي معانا.
بصيتله بإستغراب وقولتله: مش فاهمة؟
منصور بهدوء: أنا أول ما وصلت لقيته بيبصلي جامد، وبيقولي هو إنت جاي للعزا ولا مستني حد قولتله مراتي فوق وأتصلت بيا، قالي متشغلش بالك مرات عمي عقلها مش فيها من ساعة اللي حصل إحنا لا هنراجع كاميرات ولا غيره كدا كدا مش هتبين حاجة.
قولت لمنصور بزعيق: كذااب، على الأقل هتبينه قبلها بكام ساعة ماشي ناحية الأرض وبعده إبن عمه القتيل، لإن الحتة دي إحنا بس اللي مركبين كاميرات فيها بعدنا مفيش وقبلنا في كذا شارع فرعي، أنا غلطتي إني سكتت، بس والله كُنت خايفة، واللي هتقولي عليه هعمله بدون تفكير، مبقتش بعرف أنام يا منصور.
بدأ منصور يزعقلي ويقول: أنا عايز أفهم حاجة بس إزاي متحكيش ليا حاجة زي دي وتسيبيني أتصرف؟ بتخبي ليه وبتنامي جنبي في سرير واحد عادي!!!
قولتله بإنهيار: بقولك خوفت خوفت بجد معرفتش أتصرف، ما إنت عارفني.
منصور بحزم: دلوقتي هنطلع على قسم الشُرطة وتحكي كُل اللي حصل عشان حق الواد اللي مات دا، وكلمة زيادة مش عاوز.
قولتله بخضة: مش معانا اللي يثبت كلامي، أنا شوفت بس محدش هيصدقني ويمكن دا يدخلني في مشاكِل، طب على الأقل نراجِع الكاميرات الأول!
منصور بعصبية: طيب.. هلف ونرجع البيت دلوقتي، يارب الكاميرات تكون جايبة على الأقل الإتنين ماشيين في إتجاه واحِد في ميعاد مُتقارِب.
رجعنا البيت أنا ومنصور، وقعد قُصاد شاشة الكاميرات في شقتنا وهو بيراجع الليلة كُلها، لغاية ما أخيرًا لمحنا القتيل ماشي ناحية الأراضي بالفعل، بس الغريب، عادِل مظهرش خالِص!
عملت كوباية شاي لمنصور عشان طلبها مني وكان محتاج يركز، وانا بحُطها قُدامه قالي بإستغراب: شوفت يُعتبر اليوم من أوله واللي إسمُه عادِل دا معداش الجهة دي خالِص.
قعدت جنب منصور وصابتني خيبة أمل وأنا بقول: يمكِن ركِب عربية من اللي رايحين جايين بإتجاه الأراضي عشان كدا مظهرش ولما رجع من الأرض رجع مشي، أصل لو في نيته يقتل قريبه هيحرص أكيد ميظهرش.
منصور رجع ظهره لورا شوية وهو بيفكر وبيقول: طب اليوم اللي بتقولي كان واقِف قصاد البلكونة بتاعتنا تحت وباصصلك، كان يوم إيه؟
قولتله بسُرعة: اليوم اللي أم ساجدة ضربت الإنتركم فيه عشان ألِم الغسيل، يوم كذا "ذكرت اليوم"
جاب منصور كاميرات اليوم دا، وعادِل بالفعل في نِصف اليوم سند على الحيطة ووقِف يبُص على بلكونتنا كتير، شاورتلُه بصوباعي وقولتله بلهفة: أهوو شوفت بيبُص فوق كتير إزاي!!
ضيق منصور عينيه وقالي: إنتِ مُتأكِدة إنُه شافك لما كان بيتقل إبن عمُه؟
قولتله بسُرعة: أيوة عشان مج النسكافيه وقع من إيدي في البلكونة وعمل صوت، بس هموت وأعرف قتلُه ليه، ومش عارفة سكوتي صح ولا غلط..
منصور بهدوء: لا صح، أنا لما عرفت إرتبكت وكان كل همي ندخل الحكومة في الموضوع، لكن لما قولتيلي مش معانا دليل وجايز ندخل نفسنا في حوارات عرفت إن معاكِ حق، على العموم الواد دا سيبيهولي هعرف أقرره وأراقبه كويس، ومتخافيش هعمل أقفل لبوابة العمارة وكذا ترباس لباب الشقة عشان لو روحت الشُغل أتطمن عليكِ.
حسيت براحة نفسية لما منصور وقِف معايا وساندني، حضنتُه وأنا بقول بسعادة: ربنا يخليك ليا، ياريتني حكيتلك يومها بس الخوف سيطر عليا.
منصور بتعب: متخافيش طول ما أنا جنبك، أنا هقوم أريح شوية في الأوضة على ما تسخنيلي الأكل لاحسن أنا جعاان.
قومت من جنبه وأنا بقوله حاضر وراح هو ناحية الأوضة، وقفت أسخنلُه الأكل في المطبخ وأنا حاسة إن في حمل بسيط إنزاح من على قلبي، بصيت للورك بتاع الفرخه منابه وقولت أسأله أحمرهولك ولا أسيبُه مسلوق زي ما هو.
قربت من أوضة النوم لقيت بابها مردود ومنصور بيتكلم في التليفون مع حد
كتت ووقفت أسمع لقيتُه بيقول: لا إنت مش ظاهر في الكاميرات غير في اليوم اللي وقفت فيه قصاد بلكونتنا عشان تخوفها، متقلقش همسح التسجيل دا بمعرفتي سيبهالي هعرف أسكِتها..
يتبع..
«٤»
وقفت في مكاني مصدومة من اللي سمعتُه، يعني إيه!! جوزي كان بياخُدني على قد عقلي عشان يعرف مني شوفت أيه وعاوز يخليني أسكُت عشان يكتِم على الموضوع!
قفل المُكالمة فـ أنا جريت على المطبخ، مسِكت المعلقة وعملت نفسي بقلب في الطبيخ، لغاية ما جِه وقف ورايا وحضني من خصري وباس كتفي وهو بيقول: عاملة إيه دلوقتي يا حبيبي؟
بصيتلُه بطرف عيني وأنا باصة قُدامي، كُنت قرفانة منه أوي لكِن إضطريت أمثِل إني معرفتش حاجة فـ قولتله: عاملة رز وفاصوليا وفراخ.
ضحِك ضحكة خفيفة وقال: لا أقصد نفسيتك عاملة إيه؟
الخُبث تملكني، وطيت النار على الأكل ولفيت ليه وأنا بحاوط رقبتُه بإيديا وبقول بإبتسامة: لا أكيد خايفة طبعًا بس طالما إنت قولت هتتصرف يبقى خلاص، بس أنا خايفة عليك مِن اللي إسمُه عادل دا بصراحة، دا مهما كان قتال قُتلة مش سهل.
غمز بعينُه وقالي: سيبك مِنُه هو تلاقيه قتلُه بسبب غيرة مِنه أو حاجة، يعني عيل أهبل هيخاف يتكشف فـ مش هيقدر يعمل حاجة اليومين دول خصوصًا إن البلد مقلوبة زي ما إنت شايفة.
إبتسمت إبتسامة خبيثة وأنا بقوله: عندك حق طبعًا، لفيت للبوتوجاز تاني وأنا ببُص للأكل وبقوله: إنهاردة يوم السوق، هتديني فلوس أروح أجيب خضار وفاكهة للبيت.
حط سيجارة في بوقه وهو بيقولي بهدوء: عاوزة كام؟
قولتله بهزار غصب عني عشان ميحسش بحاجة: إنت وذوقك.
حط إيدُه في جيبُه وطلع ألف جنيه وإدهالي، عينيا وسعت وأنا بقوله: إيه دا كله! كل دا للخضار والفاكهة؟
قالي بهدوء: يعني لو عايزة تجيبيلك شنطة ولا توكة حاجة من حاجات الحريم دي هاتي، هستناكِ على الترابيزة عشان نتغدى.
حطيت الفلوس في صدري وبدأت أحُط الأكل في الأطباق، قعدنا نتغدى وأنا كُنت بترعش ومش حاسة بالدُنيا بس كُنت بمثل إني بخير غصب عني، مأكلتش غير معلقتين رز وإتحججت إني واخدة برد في معدتي، لميت الأكل وغسلت المواعين وأنا براقِب الأوضة وهو بيغير هدومه..
خرج مِن الأوضة وهو بيبوس راسي وبيقول: أنا نازل يا حبيبي ورايا شُغل كتير، متتأخريش في السوق وخُدي ليلى معاكِ.
قولتله بإبتسامة: حاضِر.
نزِل منصور وقفل بوابة العُمارة، بدأت ألبِس فُستان خروج والطرحة ومسكت شنطة الأيد بتاعتي الكبيرة نوعًا ما حطيت دهبي والفلوس اللي سابها منصور وتليفوني والشاحن وكل حاجتي، مقررة إني هروح محافظة أهلي وألجأ ليهُم.
لميت حاجتي كُلها ووقفت عند البلكونة، ببُص على الشارِع.. خوفت أنزل وأصادِف ليلى وتشُك فيا بسبب شنطتي، أو الأسوأ أصادِف منصور أو اللي إسمُه عادِل..
الدنيا إتزحمت شوية في الشارِع عندنا كانوا جايبين محصول من الأراضي، مشيت وسط العربيات والحناطير وجريت ناحية شارع الموقف..
لغاية ما وصلت وحمدت ربنا مصادفتش حد منهُم.
وصلت للعربية وأنا بقوله: القاهرة لو سمحت؟
السواق كان بيمسح إزاز العربية الأمامي فـ شاورلي على العربية، ركِبت جنب الشباك وأنا باخُد نفسي بالعافية، خلاص كِد هحكي لأهلي على كُل حاجة وهطلُب الطلاق وكل شيء هيتحل بالعقل.
خرجت تليفوني مِن الشنطة وقفلتُه كويس وبصيت على علبة الذهب والفلوس حمدت ربنا أني أتصرفت بذكاء
بعدها سندت راسي على الشباك وأنا بفتكِر كُل اللي حصل..
الدنيا لفت بيا، العربية إبتدت تحمِل ويركب ناس..
كان فاضل كرسي
فجأى لقيت منصور بيركب العربية وهو مثبِت نظرُه عليا ومُبتسِم أوي
برقت بخضة وأنا بترعِش، قعد جنبي لأن الكُرسي الفاضي كان جنبي
وحاوط جسمي بدراعُه وهو بيقول بثقة: إيه يا حبيبي رايحة تزوري بابا وماما وحشوكِ؟ طب مش كُنتِ تقوليلي نروح سوا يقولوا عليا إيه دلوقتي! مبفهمش في الأصول؟ مسفرك لوحدك! طب إنتِ ترضيهالي؟
سحب شنطتي من بين إيديا وأنا متصنمة باصة قُدامي وبترعش، بص جوة الشنطة شاف علبة الدهب فـ إبتسامتُه وسعت أكتر وهو بيقول: دا إنتِ كُنتِ ناوية على روحة بلا رجعة بقى.
ركِب السواق وإتحرك بالعربية، وأنا جسمي متخشِب ومحاوطه منصور بدراعُه، وفي دموع نزلت مني من غير ما ريأكشن وشي يتغير..
يتبع..
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق