رواية الشادر الفصل التاسع والعاشر بقلم ملك إبراهيم
رواية الشادر الفصل التاسع والعاشر بقلم ملك إبراهيم
#الفصل_التاسع
#رواية_الشادر
#ملك_إبراهيم
سبحان الله وبحمده. سبحان الله العظيم
بسم الله توكلنا على الله ❤️
_____________________________
الفصل التاسع.
بصـ له والده بحزن وخيبة امل، اتحرك بدر وترك والده لوحده ودخل غرفته وقفل على نفسه، بهتت ملامح والده بالحزن على ابنه، خايف عليه من نفسه ومن تفكيره ومن الطريق اللي هو ماشي فيه. بص على صورة زوجته اللي متعلقه علي جدار البيت، كلم الصورة واشتكى لها من ابنها اللي تاعب قلبه معاه، من يوم ما توفت من 15 سنه وهو شايل مسؤولية تربية بدر لوحده، رفض يتزوج ست تانيه وكان له الاب والام، حاول يعوضه عن فقدانه لوالدته وهو طفل، بس بدر لما كبر مقدرش تضحيات والده عشانه، مشي في الطريق اللي اختاره، وطول الوقت شايف ان هو صح وان والده افكاره قديمه وبيرفض اي نصيحه من والده، مفيش حاجه في ايد عم مهران دلوقتي غير انه يدعي له ربنا يهديه، اتنهد بحزن وقلة حيلة ودعى له من قلبه.
*****
في بيت الاسطي خيري والد أمنيه.
قعد الاسطي خيري على طاولة الفطار وهو حزين ومكسور بعد اللي حصل وبعد ما عرف اللي بنته عملته، زوجته قعدت جنبه وربتت على ضهره بحزن وقالتله:
- هون على نفسك يا ابو أمنيه
هز راسه بحزن وقالها:
- بنتك حطت وشي في الطين، لولا اللي البرنس عمله كان زمانا اتفضحنا
خفضت وشها ونزلت دمعه حزينه من عينيها وقالت بقلة حيلة:
- انا مش مصدقة ان أمنيه بنتي تعمل كده! انا مربياها كويس وعيني كانت عليها، انا خلاص هتجنن! عرفت الزفت كرم ده امتى وازاي قدر يضحك عليها ويعمل عملته دي معاها! طب امتى وفين وانا كنت فين؟!
اتكلم الاسطي خيري بغضب:
- انا لو كنت عرفت بلي هي عملته ده وهي هنا كنت قتلتها وقتلته وشربت من دمهم هما الاتنين
اتفزعت زوجته من كلامه، عرفت دلوقتي ان البرنس كان معاه حق لما معرفش حد اي حاجه لحد كتب الكتاب، ستر بنتها وجوزها وجبلها شبكها وعملها فرح حضره المنطقه كلها، اتنهدت بحزن وقالت:
- ربنا يستره البرنس سترها وسترنا، بس انا مستغربه هو ليه قال ان هو اللي عايز يتجوزها وعمل الفرح على اسمه
رد جوزها بحزن:
- شكله كان عايز كرم يصدق ان البرنس هيتجوز بنتنا حقيقي عشان يطمن وميهربش، اللي زي كرم ده جبان ولو كان البرنس واجهه كان فضحنا وهرب ومرضاش يتجوزها
حطت زوجته ايديها على خدها وسألت بقلق:
- يا تري عمل ايه معاها لما راحت معاه بيت امه، انا قلقانه علي البت وعايزه اطمن عليها
اتبدلت ملامح زوجها للغضب وقالها بصرامه:
- يعمل فيها اللي يعمله، يولعوا في بعض الاتنين، انا مبقتش عايز اسمع اسمها بعد اللي عملته
قام وقف وساب الاكل ومشي، قعدت زوجته حزينه وخايفه وقلقانه علي بنتها.
*****
في بيت والدة كرم.
صحا كرم وطلع في صالة الشقة بتاعهم، شاف أمنيه قاعده مع والدته وبيتكلموا، زعق في أمنيه واتكلم معاها بعنف:
- انتي قاعده كده ليه يا بت انتي! .. مش انا قولتلك انتي هنا خدامه، قومي جهزيلي الفطار
والدته بصت له بغضب، قامت أمنيه بسرعه وجرت على المطبخ، وقفت والدته وقربت منه وقالتله:
- لم نفسك من نحيت البت يا كرم مش ناقصين مشاكل مع البرنس، انت مش قده
زفر بعنف وصوته ارتفع وقال بحقد:
- وحياة غلاوتك عندي يا امي لأكون منتقم من البرنس ومدفعه تمن اللي عمله معايا ده غالي اوي
شرد وهو بيفكر انه ينتقم من البرنس في جميلة، هو عارف البرنس بيحبها قد ايه وانها اكتر واحده في الدنيا آذيتها بتوجعه بعد أمه واخته، فكر يأذي اخته بدل جميلة، بس لو قرب من ثريا مش هيعادي البرنس بس، بدر كمان هيكون عدوه لانه بيحب ثريا وهو مش عايز يعادي الاتنين، كفايه يتخلص منهم واحد واحد، فكر يبدأ بالبرنس الاول، لان بعد البرنس بدر هيضعف وهيبقى سهل انه يقدر يتخلص منه هو كمان، شرد في افكار كتير وكلها بهدف واحد؛ هو الانتقام من البرنس.
*****
الساعة اربعه بعد العصر.
وصل البرنس ومعاه بدر. دخلوا مصنع تبع فؤاد المنصوري، وقف بدر يبص للمصنع بانبهار واتكلم مع حمزة بهمس:
- ايه الكلام يا صحبي، الراجل ده شكله تقيل اوي
ابتسم البرنس وهو بيبص للمكان حواليه وقال بمزاح:
- عايزين نجرب اللعب مع الكبار. ايه رأيك؟
ابتسم بدر وقال بحماس:
- نجرب.. احنا هنخسر ايه يعني
اتكلم البرنس بثقة:
- مفيش خسارة تاني .. كل اللي جاي هيكون مكسب ان شاء الله
قرب منهم واحد من رجالة فؤاد المنصوري ورحب بيهم وخدهم لمكتب فؤاد، دخل البرنس الاول وبدر وراه، وقف فؤاد ورحب بهم، سلم عليه البرنس وقعد قدامه، قعد بدر جنب البرنس وهو لسه منبهر بكل الفخامة اللي حواليه، بص البرنس لـ فؤاد واتكلم معاه:
- احنا جاين النهاردة عشان استلم الشادر وأي مخازن هكون مسؤل عن تأمينها، وعايز اعرف كمية اي خشب يدخل الشادر وكمية اي خشب هيخرج منه
ابتسم فؤاد برضا وقاله:
- وانا تحت امرك، وأي شحنة هتوصل الشادر هتجيلك بورقه مني وانت تمضي بالاستلام والمسؤلية كاملة عن الشادر بكل محتوياته. وأي بضاعه هتخرج من الشادر هتخرج بأمر منك واللي هيستلمها يمضي لك ب الاستلام
هز البرنس راسه وقاله بتأكيد :
- يبقى اتفقنا
اتكلم فؤاد مرة تانيه بهدوء:
- بس في حاجة عايز اضيفها على اتفقنا
استغرب حمزة ونظر له باهتمام. اتكلم فؤاد بهدوء وقاله:
ِـ انا جايلي الفترة الجاية شحنة خشب كبيرة اوي وفي منافسين كتير عينيهم عليها وانا قلقان انهم لو مقدروش يوصلوا لها عن طريق الشادر ممكن يتعرضوا لاهل بيتي ويضغطوا عليا
اتكلم حمزة بفضول:
- وايه المطلوب مننا. عايز حراسه لاهل بيتك؟
رد فؤاد بهدوء:
- انا عندي حراسة على بيتي كفايه. بس محتاج حد يحرس بنتي صافي وهي برا البيت، فترة مؤقته بس لحد ما الاقي حد مناسب للمهمة دي
نظر حمزة لـ بدر بتفكير. اتكلم فؤاد بهدوء:
- انا عايز اقولكم ان حماية بنتي عندي اهم من حماية الشادر وكل املاكي، دي بنتي الوحيدة ومليش غيرها هي واخوها اللي بيدرس في الخارج وانا مستعد ادفع اللي تطلبوه في مقابل حمايتها
هز حمزة راسه بالايجاب وقال بثقة:
- تمام انا هقوم بالمهمة دي بنفسي لحد ما تلاقي الشخص المناسب
ابتسم فؤاد بثقة وقال:
- يبقى على بركة الله
ضغط فؤاد على زر جنب مكتبه، دخل مدير اعماله، اتكلم معاه فؤاد بالامر وقاله:
- عايزك تسلم البرنس مفاتيح الشادر الكبير وكل المخازن بتاعنا وأي بضاعة تدخل او تخرج البرنس اللي هيكون مسؤول عنها، تسلمه وتستلم منه
هز مدير اعماله راسه بالايجاب وهو بيبص للبرنس، وقف البرنس واتكلم بثقة قبل ما يمشي:
- هستلم منه المفاتيح واسلم الرجالة شغلهم ونبقى نتكلم في موضوع بنتك
هز فؤاد راسه بالايجاب وهو بيبتسم له بثقة، خرج البرنس من مكتبه هو وبدر، استرخي فؤاد على مقعده وهو بيبتسم بثقة، متأكد ان البرنس هيكون قد المسؤلية وهيقدر يحافظ على الشادر وكل شغله، واهل بيته هيكونوا في آمان وبكده يقدر يشتغل برحته ومفيش حد من منافسيه هيقدر يقف في طريقه بعد النهاردة.
*****
في نهاية اليوم.
رجع البرنس المنطقه هو وبدر، اتكلم مع بدر بهدوء وقاله:
- عايزك تجمعلي كل الرجالة اللي بيشتغلوا معانا وتعرفهم ان شغلنا القديم ده خلاص انتهى ومن النهاردة هنبدأ شغل جديد
اتكلم بدر بفضول:
- يعني خلاص هنقفل الصفح القديمة؟
رد حمزة بهدوء:
- هنقفل كل الصفح القديمة. دلوقتي جاتلنا الفرصة نشتغل شغل نضيف وهنكسب اكتر من اللي كنا بنكسبه زمان وبعدين احنا كبرنا وكفاية شقاوة بقى لحد كده عايزين نتجوز ونفتح بيوت
فكر بدر في ثريا وابتسم بهدوء لانه كان نفسه يعمل أي حاجة عشان ترضى عنه ودلوقتي جات الفرصه واكيد ثريا مش هترفضه تاني وكمان حمزة اكيد هيوافق بيه.
كمل حمزة كلامه وقال بتأكيد:
- عايزك تروح لـ كرم تبارك له، وتقوله اسبوع ويجي يستلم شغله معانا، عايزه يكون معاك انت والرجالة في حراسة الشادر وتظبطوا مع بعض ورديات صبح وليل عشان هكون انا مشغول في حراسة بنت المنصوري.
اتوتر بدر وبلع ريقه بقلق، هو عارف ان كرم غدار ومستحيل يعدي اللي البرنس عمله معاه كده بالساهل، يمكن يسكت ويبان انه استسلم للامر الواقع، بس هو قلبه اسود ومستحيل يسامح. اتكلم بدر بقلق:
- ما بلاش كرم يبقى في الشغلانه دي معانا، اصله بعد اللي حصل يعني اكيد هيبقى شايل منك
اتكلم البرنس بقوة:
- اعمل بس اللي انا قولتلك عليه يا بدر ومتقلقش، انا عارف انا بعمل ايه كويس
هز بدر راسه باستسلام، سابه البرنس ومشي، اتحرك بدر اتجاه بيت كرم عشان ينفذ اللي البرنس قال عليه.
*****
في بيت والدة كرم.
سمعوا صوت طرق على الباب. أمنيه فرحت وفكرت ان اهلها اخيرا جم عشان يباركوا لها، جرت وفتحت الباب بسرعه، لقت بدر هو اللي واقف قدامها، بهتت ملامحها بحزن، اتكلم بدر باحراج وسألها عن كرم، خرج كرم على صوت بدر، قرب منهم وزعق في أمنيه واتعامل معاها بطريقه فظه ومهينه، اتحرجت أمنيه ودخلت بسرعه وسابتهم، رحب كرم ببدر للدخول وهو بيتكلم بغضب وعصبيه. دخل بدر وقعد وهو بيبص لـ كرم بترقب، بصـ له كرم بغضب مكتوم وقاله:
- عجبك اللي البرنس عمله فيا ده يا بدر، يرضيك يدبسني التدبيسه السوده دي؟
خفض بدر وشه وهو بيسمع كرم، رفع وشه وبصـ له وقاله:
- انت اللي دبست نفسك يا كرم مش البرنس، انت اللي غلطت وكان لازم تصلح غلطتك!
هز كرم راسه بسخريه وقال بعصبيه:
- وانا هنتظر منك ايه يا بدر! ما انت طول عمرك ماشي ورا البرنس في الصح والغلط
رد بدر بغضب وقاله:
- بقولك ايه يا كرم، انت اللي غلطان، واللي انا اصلا مستغربه ولسه مش فاهمه لحد دلوقتي؛ انت ازاي كنت مبسوط وفرحان ان البرنس هو اللي كان هيتجوزها وانت عامل معاها العمله السودة دي !! ايه معقول كنت مفكر ان البرنس مش هيعرف بعملتكم دي لو كان اتجوزها بجد؟!
زفر كرم وهو بيفتكر لما أمنيه عرفته انها حامل وهو هددها وقالها لازم تنزل اللي في بطنها وتعمل عمليه وترجع بنت تاني، وبعدها قالتله انها فعلا عملت عملية اجهاض وعملية تانيه ورجعت بنت عذراء من تاني، كان مصدقها وكان فاكر ان البرنس هياخد اكبر مقلب في حياته لما يتجوزها بعد اللي كرم عمله معاها، كان فاكر ان البرنس مش هيكتشف انها عامله عمليه وكانوا هيقدروا يخدعوه، مكنش يعرف ان الخدعه الحقيقيه كانت من البرنس، هو اللي خدعه وجوزه منها غصب عنه ويبان انه برضاه قدام المنطقه كلها. خد نفس واتكلم بشرود:
- ضحكت عليا وفهمتني انها عملت عملية ورجعت بنت تاني
اتصدم بدر من ندالة كرم وقاله بشمئزاز:
- وانت طبعا كنت مطمن ان البرنس لو كان اتجوزها بجد مكنش هيكتشف حاجه، يعني هان عليك تخدع صحبك !!
اتكلم كرم بنرفره وصوت عالي:
- صحبك هو اللي خدعني وضحك عليا، بس ملحوقه، والشاطر اللي يضحك في الاخر
بص بدر لـ كرم وشاف الحقد اللي واضح في عينيه، مكنش مطمن ابدا لـ كرم، عقد ما بين حاجبيه وسأل كرم بفضول:
- يعني افهم من كلامك ده انك مش هتشتغل مع البرنس تاني؟!
بصـ له كرم بستغراب واتكلم بمكر:
- هو انا ليا شغل تاني غير شغلي مع البرنس!
بصـ له بدر باهتمام وترقب وقاله:
- يعني هتكمل شغل مع البرنس عادي؟
هز كرم راسه بثقة وقال بتأكيد:
- طبعا يا بدر، اللي حصل من البرنس ده حاجه والشغل حاجة تانيه
هز بدر راسه برضا وقاله:
- ماشي يا كرم.. عموما البرنس بعتلك معايا وبيقولك بعد اسبوع تيجي عشان تستلم شغل جديد معانا
عقد كرم ما بين حاجبيه بستغراب وسأله باهتمام:
- شغل ايه ده؟!!
اتكلم بدر بهدوء:
- حوار الشغل اللي كان قالنا عليه اللي مع جوز زوزو
هز كرم راسه بالايجاب وهو بيفكر في زوزو وجوزها، بيفتكر لما كان عند زوزو اخر مرة وقالتله على موضوع شغل البرنس مع جوزها وانها هي اللي اقترحت على جوزها ان البرنس يشتغل معاه، وقالته على سر تبع شغل جوزها ومفيش حد تاني يعرفه، وحتى جوزها ميعرفش انها تعرف انه بيتاجر في المخدرات وبيخفي تجارته دي في تجارة الخشب، وقالتله انها مقالتش للبرنس على تجارة جوزها في المخدرات، يعني البرنس فاكر انه بيحرس خشب هو ورجالته، ميعرفش انه بيحرس مخدرات جوه الخشب ده. ابتسم كرم بمكر وهز راسه بالايجاب وقال لـ بدر:
- ماشي يا بدر، بلغ البرنس اني هبقى معاكم في الشغلانه دي
بصـ له بدر بستغراب، كان شايف مكر غريب في عينيه، قام وقف وهو بيبص له وقال:
- ماشي يا كرم.. انا لازم امشي دلوقتي
وقف كرم معاه ووصله لحد الباب وقاله بسخريه:
- سلملي على البرنس واشكره على الواجب اللي عمله معايا، وقوله ان وجبه وصل، وربنا يقدرني وارد الواجب ده اضعاف
تأمله بدر بستغراب، كان حاسس بحاجه غريبه في كرم وكلامه الغامض، هو عارف ان كرم غضبان من البرنس واللي عمله فيه، وبيحاول يخفي غضبه ده بس ميعرفش ان عينيه فضحاه، هز بدر راسه بالإيجاب ومشي وهو بيفكر ان اللي كرم فيه ده مجرد غضب وهيروح لحاله ومش مستاهل انه يبلغ البرنس بعدم الراحه اللي حس بها في كلام كرم ونظراته.
قفل كرم الباب بعد ما بدر مشي، رجع وقعد يفكر بمكر، قرر انه يروح لزوزو ويفهم منها كل حاجه عن شغل جوزها بالتفصيل، افتكر ان زوزو جات فرحه وعرفت انه اتجوز واكيد مش طيقاه دلوقتي ولا هي ولا شادية، اول حاجه لازم يعملها دلوقتي انه يصالح زوزو ويفهمها ان البرنس اجبره على الجواز، لازم يقرب منها اكتر، لان علاقته بيها هتساعده يحقق هدفه وينتقم من البرنس.
______________________________
انتهاء الفصل🖤
#الفصل_العاشر
#رواية_الشادر
#ملك_إبراهيم
لا حول ولا قوة الا بالله العلي العظيم. استغفرالله العظيم واتوب اليه عدد خلقه ورضا نفسه وزنة عرشه ومداد كلماته.
بسم الله توكلنا على الله ❤️
________________________________
الفصل العاشر.
قفل كرم الباب بعد ما بدر مشي، رجع وقعد يفكر بمكر، قرر انه يروح لزوزو ويفهم منها كل حاجه عن شغل جوزها بالتفصيل، افتكر ان زوزو جات فرحه وعرفت انه اتجوز واكيد مش طيقاه دلوقتي ولا هي ولا شادية، اول حاجه لازم يعملها دلوقتي انه يصالح زوزو ويفهمها ان البرنس اجبره على الجواز، لازم يقرب منها اكتر، لان علاقته بيها هتساعده يحقق هدفه وينتقم من البرنس.
*****
صباح اليوم التالي.
بداخل بيت البرنس.
جهزت والدة حمزة الفطار وقعد حمزة يفطر مع والدته واخته، بص لاخته وسألها بهدوء:
- انتوا عندكم محاضرات النهاردة؟
هزت ثريا راسها بالايجاب و ردت بهدوء:
- اه عندنا محاضرتين النهاردة
هز راسه بالإيجاب وهو بيفكر في حبيبته جميلة، بيفكر ازاي يعرفها انه ساب شغله القديم اللي كانت رفضاه بسببه وهيشتغل مع رجل اعمال في شغل حلال. مش هينفع يقولها بنفسه ولا هينفع يجدد طلبه الجواز منها، كرامته متسمحش انه يتقدم لها وترفضه تاني. عايزها هي اللي تبدأ وتبادر المرادي. تابعته والدته وسألته بفضول:
- مالك يا حمزة؟.. بالك مشغول بإيه؟!
ابتسم لوالدته و بص لـ ثريا واتكلم بهدوء:
- مفيش يا امي، بفكر في شغلي الجديد
بصت ثريا لاخوها باهتمام وتركيز، حمزة كان عارف ومتأكد ان ثريا هي اللي هتوصل لجميلة كل اللي هو عايزها تعرفه. اتكلمت ثريا بفضول:
- شغل ايه ده يا حمزة؟!
رد حمزة بهدوء وهو متأكد من جواه ان كل كلمة هيقولها دلوقتي ثريا هتوصلها لجميلة :
- اتفقت مع رجل أعمال كبير اني هكون مسؤل عن حماية شغله والمخازن بتاعه
ابتسمت ثريا وقالت بحماس:
- حلو اوي الشغل ده يا حمزة
اتسرعت ثريا وسألته بتهور:
- هو بدر هيشتغل معاك في الشغل ده؟
بصلها حمزة بستغراب وعقد ما بين حاجبيه بدهشة، اتصدمت والدتهم من سؤال ثريا عن بدر باللهفة دي، اتوترت ثريا جدا وخفضت وشها في الارض وهي بتفكر ازاي تعالج الموقف، بص حمزة لوالدته، هزت والدته راسها بالايجاب بمعنى انها هتتكلم مع ثريا وتفهم منها سبب سؤالها عن بدر باللهفة دي، هز حمزة راسه بالايجاب، اتوترت ثريا وقامت وقفت بسرعة وقالت:
- انا لازم انزل دلوقتي، جميلة واقفه تحت
وقف حمزة واتكلم مع اخته بهدوء:
- استني انا نازل معاكي
خفضت ثريا راسها بالايجاب وسبقت حمزة. وقف حمزة يبص لوالدته. اتكلمت والدته بهدوء:
- متقلقش انا هفهم منها ايه الحكاية
هز حمزة راسه بثقة وهو متأكد من اخلاق اخته ومن امانة صاحبه.
*****
بالاسفل.
وقفت جميلة قدام البيت تنتطر ثريا، نزلت ثريا الدرج وهي متوترة بسبب تسرعها قدام والدتها وحمزة. شافتها جميلة وهي بتقرب منها وحمزة نزل وراها. قلبها دق بعنف لما شافت حمزة، شعرت بارتباك وتوتر غريب. ليه بقت حاسه فجأة ان لبسها شكله مش حلو ومش لايق عليها والحجاب بتاعها مش مظبوط! أول مرة تهتم بنظرة حمزة ليها وتسأل نفسها ياترى هو شايفيني ازاي؟ متعرفش انه بيشوفها اجمل بنت في الكون طول الوقت.
وقف حمزة قدامها وهو بيبص لها بعشق، اتكسفت من نظراته وبصت لـ ثريا واتكلمت بصوت مبحوح:
- يلا يا ثريا عشان منتأخرش
ابتسم حمزة بهدوء وقالها:
- مش تقولي صباح الخير الاول !
اتكسفت اكتر ورفعت عينيها وبصت له، تشابكة نظراتهم وقلبها دق بعنف، جف حلقها واختفى كل الكلام، ابتسم بهدوء وهو بيتابع اللي بيحصلها، فاهم وعارف هي بتشعر بإيه دلوقتي، هو اكتر انسان في الدنيا بيفهمها وبيحس بيها، مهما حاولت تداري مشاعرها، هو الوحيد اللي بيكون فاهمها وحاسس بيها دايما.
قرب منهم بدر وهو بيبص لـ ثريا بسعادة، اتوترت ثريا لما شافت بدر وخصوصا بعد الموقف اللي حصل فوق وتسرعها في السؤال عنه قدام اخوها ووالدتها.
وقف بدر قدامهم واتكلم بابتسامة:
- صباح الفل
تعمق حمزة في النظر لجميلة وهو بيرد على بدر، اتكسفت جميلة واتكلمت مع ثريا بتوتر:
- يلا يا ثريا اتأخرنا
اتحركت ثريا مع جميلة بسرعه لانها كانت عايزة تهرب هي كمان من قدام بدر واخوها، تابعهم حمزة وهما بيبعدوا من قدام عينيه، وقف بدر جنب حمزة وهو بيتابعهم بستغراب وسأل حمزة بفضول:
- هي ايه الحكاية؟
بص له حمزة وافتكر اللي ثريا عملته فوق وسؤالها عن بدر بلهفة، قرب من بدر وهو بيتعمق النظر جوه عينيه وسأله بفضول:
- قولي يا بدر.. انت مبتفكرش في الجواز؟
اتوتر بدر وبلع ريقه بسرعه وقاله:
- جواز ايه؟!
فكر بدر بسرعه في ثريا، بصـ له حمزة باهتمام وقاله:
- اصل انا بصراحه مستغرب انك عمرك ما اتكلمت في موضوع الجواز ده، ايه لسه مش لاقي اللي تخطف قلبك؟
اتوتر بدر جدا وفي اللحظة دي كان نفسه تجيله الشجاعه ويعترف لحمزة بحبه لاخته ثريا، بس خاف يخسره، خاف حمزة يرفضه ويكون الموضوع ده سبب في انتهاء صداقتهم، سكت بدر وهو شارد في افكاره وعيون حمزة كانت بتتأمله بتركيز، اتوتر بدر من نظرات حمزة وغير الموضوع واتكلم بارتباك:
- ما قولتلكش علي اللي كرم قاله امبارح
فهم حمزة ان بدر بيغير الموضوع، بصـ له باهتمام وهز راسه بالايجاب وقاله:
- لا مقولتليش.. بس مش مهم دلوقتي كرم خالص، المهم دلوقتي تجمع كل الرجال اللي قولتلك عليهم عشان افهمهم شغلهم قبل ما اروح اشوف نظام شغلي مع بنت المنصوري هيكون ازاي
اتوتر بدر وهز راسه بالايجاب، اتحرك حمزة قدامه ومشي، تابعه بدر بتوتر ومشي معاه وهو محتار وكان نفسه يعترف لحمزة بحبه لاخته ثريا.
*****
عند ثريا وجميلة وهما في طريقهم للجامعه.
اتكلمت ثريا بارتباك وتوتر وهي بتحكي لجميلة على اللي حصل قدام اخوها ووالدتها وهما قاعدين بيفطروا مع بعض وحكت لها عن شغل حمزة الجديد.
فرحت جميلة لما عرفت ان حمزة هيشتغل في الحراسه مع رجل اعمال كبير، يعني شغل حلال وبعيد عن الشغل الخطر اللي كان بيشتغل فيه، وقفت جميلة وسألت ثريا بفضول:
- يعني موضوع الشغل ده حقيقي يا ثريا؟.. انتي متأكده؟
هزت ثريا راسها بالايجاب وقالت بثقة وتأكيد:
- اه والله يا جميلة، حمزة هيكون مسؤل عن امن المخازن بتاع رجل الاعمال ده وان شاء الله بدر يكون معاه ويبعد هو كمان عن الطريق اللي هما كانوا فيه ده
ابتسمت جميلة وهي بتبص قدامها بأمل وبتقول:
- ياريت يا ثريا
ابتسمت ثريا وسألت جميلة بفضول:
- قوليلي يا جميلة.. يعني لو اتأكدتي ان حمزة ساب شغله القديم واشتغل فعلا شغل تاني وكله حلال.. هتوافقي تتجوزيه؟
اتكسفت جميلة ومقدرتش ترد عليها، فهمت ثريا ردها وفكرت تشاكسها وقالتها بمزاح:
- بس حمزة شكله نسي الموضوع ده وشاله من تفكيره خاالص
اتصدمت جميلة وانسحبت الدماء من وجهها وسألتها بصوت مبحوح:
- يعني ايه مش فاهمه؟!
ضحكت ثريا لما شافت ملامح جميلة اتخطفت قد ايه، اتغاظت منها جميلة واتكلمت معاها بنرفزه:
- ماشي يا ثريا بقى انتي تعملي فيا انا كده.. طب ماشي حلو اوي.. ابقي قابليني بقى لو حمزة وافق على سي بدر بتاعك ده
اتصدمت ثريا وقالتها برجاء:
- لا يا جميلة يا حبيبتي انا ثريا حبيبتك برضه، ومعتمدة عليكي انتي تقنعي حمزة بالموضوع ده، حمزة بيحبك ومستحيل يرفضلك اي طلب، املي انك تقنعيه يوافق، ده لو ابو الهول نطق يعني ربنا يدينا طولة العمر
ضحكت جميلة وقررت تاخد حقها منها وقالتها بمزاح:
- دا بعينك.. لو بإيدي هقنع حمزة يرفض بالتلاته
اتغاظت ثريا من جميلة وضغطت على شفايفها زي الاطفال، ضحكت جميلة وقالتلها بمزاح:
- خلاص صعبتي عليا.. خلي ابو الهول ينطق بس وسيبي حمزة عليا
ابتسمت ثريا بسعادة وقالتلها بمشاكسه:
- حبيبتي انتي يا مرات اخويا الغالي.. متحرمش منك ابدا
اتصدمت جميلة من كلام ثريا، ضحكت ثريا واتحركت بخطوات سريعه، تابعتها جميلة وهي بتضحك بمرح.
*****
بداخل فيلا فؤاد المنصوري مع زوجته الاولي ام اولاده.
قعد فؤاد بداخل غرفة مكتبه يتكلم مع مدير اعماله ويبلغه يسلم البرنس مفاتيح الشادر ويتأكد ان الحماية لكل املاكه كامله تبقى على البرنس ورجالته.
دخلت غرفة المكتب بنته "صافي" عمرها عشرين سنه. دلوعة العيلة ولها مكانه خاصه عند والدها، لانها البنت الوحيدة بعد ابنه الكبير "رامي".. صافي بتدرس في الجامعه بس مش مهتمه ابدا بالدراسة، طول النهار نايمه وطول الليل سهرانه مع اصحابها، حياتها كلها سهر وخروجات وسفر، عايشه بس عشان تصرف فلوس والدها،.. انما رامي اخوها عايش برا مصر.. بيدرس في امريكا وبيجي زيارة شهر واحد كل سنه.
دخلت صافي غرفة المكتب وهي بتبتسم لوالدها، قربت منه وقبّلت خده وقالت له بمرح:
- بابي حبيبي وحشتني اوي
ضحك والدها وهو فاهم كويس انها محتاجه فلوس، اتكلم والدها بمرح:
- قولي انك عايزة فلوس من الاخر.. وانا ولا وحشتك ولا باجي في بالك اصلا!
اتكسفت صافي وادعت الحزن واتكلمت بدلع:
- بقى كده يا بابي.. كده تظلم صافي حبيبتك!
ضحك والدها واتكلم بمشاكسة:
- وانا ميهونش عليا اظلم صافي حبيبتي، وانتي كمان وحشتيني اوي يا قلب بابي
وقف من علي مقعده وقالها بمشاكسه:
- هطلع ارتاح شويه لاني كنت سهران طول الليل
وقفت قدامه بسرعه تمنعه من الحركه وقالت بلهفة:
- تطلع فين يا بابي، انا محتاجة فلوس، الكريدت كارت مش شغاله
ضحك والدها وقالها:
- يعني انتي بقى كنتي عايزاني عشان كده!
اتكسفت وقبلته من خده، ضحك وهز راسه بالإيجاب وقالها انه هيحولها مصاريف الشهر على حسابها، قبلته مره تانيه وقالتله:
- حبيبي يا بابي.. هطلع انام شويه بقى عشان اخرج بالليل مع اصحابي
ابتسم لها والدها وقالها:
- قبل ما تخرجي بساعه ابقي بلغيني عشان في حارس شخصي هيكون معاكي الفترة دي في كل مكان تروحيه
وقفت صافي تنظر لوالدها بصدمة وقالت:
- يعني ايه الكلام ده يا بابي هو انا صغيره عشان تجيب واحد يحميني!
ابتسم والدها بهدوء وقالها:
- معلش يا صافي يا حبيبتي استحمليني بس الفترة دي لان في شحنة خشب مهمة جايه الشادر عندي وانا خايف عليكي ان حد من منافسيني يضغط عليا بيكي
زفرت صافي بضيق وقالت:
- يعني الحارس ده هيخنقني بقى يا بابي في حركتي وخروجاتي؟
اتكلم والدها بابتسامة:
- متقلقيش يا قلب بابي كلها فترة قليلة جدا وتبقي برحتك
ردت صافي بملل:
- اوك.. اللي تشوفه يا بابي
زفرت بغضب مكتوم وخرجت من غرفة المكتب. اتصل والدها على المحاسب وطلب منه يحولها مصاريف الشهر بتاعها على حسابها.
*****
في فيلا فؤاد المنصوري التانيه، عند زوجته التانيه زوزو.
وقف كرم قدام الفيلا وهو بيتصل على زوزو ومش بترد، بعد محاولات كتير ردت عليه زوزو بملل وقالتله:
- عايز ايه يا كرم؟، انت مش اتجوزت وخلصنا!
اتكلم كرم بسرعه:
- جواز ايه بس يا زوزتي دا انا ادبست تدبيسه سوده، منه لله البرنس.. انتي فين يا زوزتي وانا احكيلك كل حاجه عشان تعرفي اني مظلوم وضحية البرنس وجبروته
استغربت زوزو وحاست ان في حاجه حصلت هي متعرفهاش، فكرت انها تسمع منه وتديه فرصه وتشوف ايه اللي حصل، هي اصلا كانت قاعده زهقانه لوحدها وفؤاد في بيته التاني، ردت علي كرم بعد صمت وتفكير دام للحظات:
- ماشي يا كرم انا هديك فرصة تحكيلي ايه اللي حصل، بس اوعا تفكر اني كده اشتريت، بالعكس، انا عايزة بس اتأكد من خيانتك ليا
اتكلم كرم بمكر وهو بيدعي البراءة:
- اديني فرصة واحده بس يا زوزتي وانا افهمك اللي حصل وهتتأكدي بنفسك اني مظلوم
اتنهدت زوزو بملل وقالتله:
- ماشي يا كرم، انا قاعده في الفيلا لوحدي دلوقتي وفؤاد في بيته التاني، هستناك على بالليل وتيجي ونتكلم
رد عليها بسرعه:
- انا قدام الفيلا عندك اهو، ثانيه واحده وهتلاقيني قدامك
لحظات قليلة وسمعت صوت الجرس، اتكلم كرم في التليفون وقالها:
- افتحي يا زوزتي انا اللي واقف برا
اتفاجأت زوزو وقربت من باب الفيلا وفتحته، وقف كرم قدامها وقفل التليفون، بصتله زوزو وقالتله بغضب:
- اهلا يا عريس، بقى في واحد يسيب عروسته في اول يومين من الجواز ويجي لواحدة غيرها!
دخل كرم وقفل الباب خلفه وقرب منها وهو بيقولها بطريقه دراميه:
- بقى انتي تصدقي يا زوزتي اني اتجوز بت زي دي، بعد ما دوقت طعم الشهد اروح اكل بطيخ
ضحكت زوزو بطريقه خليعه وقالت بسخرية:
- وياترى بقى البطيخه بتاعك طلعت حمرا ولا قرعه
رد كرم بصوت غاضب وهو بيدعي الحزن وقلة الحيلة:
- دي طلعت قرعه وشايله في بطنها كمان
اتصدمت زوزو وصرخت فيه وقالتله بصوت عالي:
- نهارك اسود.. هي كمان حامل منك
قرب منها كرم وقالها بصوت قوي عشان تصدقه:
- مش مني يا زوزتي، اومال انا بقولك طلعت قرعه ليه
استغربت زوزو وبصت له باهتمام وفضول، اتنهد وقالها:
- تعالي نقعد وانا هفهمك كل حاجه
قعدت معاه وهي مركزه جدا عشان تفهم، خد نفس عميق وهو بيرتب أفكاره وكلامه عشان تصدقه، رسم الجديه على ملامحه وبدأ يتكلم وهي بتسمعه بفضول:
- البرنس غلط مع البت دي ودبسني انا فيها
استغربت زوزو وعقدت ما بين حاجبيها بدهشة، ازاي البرنس عمل كده والمنطقه كلها عارفين انه بيحب جميلة ومتعلق بيها، بنات كتير حاولوا معاه ومقدروش عليه واولهم زوزو نفسها، حاولت كتير تلفت انتباهه لكنه مكنش بيشوف غير جميلة وبس، ازاي فجأة كده غلط مع بنت تانيه وجوزها لـ كرم!!.. واشمعنا كرم!!.. بصت لـ كرم وهي بتفكر في الكلام ومش مقتنعه ان البرنس يعمل كده وخصوصا انه معروف في المنطقه كلها انه شهم وجدع ومستحيل يعمل عمله زي دي.
اتوتر كرم من شرودها وتفكيرها، اتكلم مرة تانيه وهو بيحاول يقوي من نبرة صوته عشان زوزو تصدقه:
- المنطقه كلها كانوا عارفين ان الفرح اللي اتعمل ده بتاع البرنس، هو اللي غلط وهو اللي اتقدم وخطب وجاب شبكه ودفع مهر وفي اخر لحظه، انا داخل امضي شاهد على كتب الكتاب لقيت السلاح في نص دماغي ويا امضي واتجوزها واشيل انا الليلة يا اما يقتلني
بصت له زوزو وهي بتحاول تصدقه، كلامه كان بقوة وثقة، لكن عقلها رافض يصدق ان البرنس يعمل كده، بس كرم بيتكلم بثقة اوي وده شككها انه ممكن يكون صادق، اتنهدت وسألته بفضول:
- طب اشمعنا انت يا كرم اللي دبسه في الجوازه دي؟.. ليه ملبسهاش لاي واحد تاني من المنطقه؟!
اتكلم كرم بقوة لانه كان مجهز الرد على كل اسئلتها:
- مكنش في حد قدامه ساعتها غيري انا وبدر.. وهو حاجز بدر لأخته ثريا ومكنش قدامه غيري يدبسني وخصوصا انه عارف اني رافض الجواز عشان بحب واحده متجوزه وهي مش سأله فيا ولا حاسه بالنار اللي جوايا
قال كرم جملته الاخيرة بطريقه دراميه وهو بيحاول يظهر لزوزو قد ايه هو بيحبها وكان مخلص ليها، زوزو كانت شاكه في كلامه لكن ثقته بنفسه وهو بيتكلم كانت قوية لدرجة انها بدأت تصدقه، قرب منها كرم وحط ايديه على خصرها وقربها ليه وقالها بطريقته اللي هي بتحبها:
- يا زوزتي دا انا من ساعتها وانا سايب بيت امي عشان مقعدش مع الزفته اللي اتجوزتها دي، مش قادر اتخيل ان في واحده تانيه تشيل اسمي غيرك، انا كنت عايش عشانك انتي بس، ومستني اليوم اللي جوزك يموت فيه عشان اتجوزك وتبقي حلالي
ضعفت زوزو وهي بتبص في عينيه، قدر يكسبها بكلامه وطريقته وثقته في نفسه وهو بيتكلم معاها، كان محافظ جدا على هدوئه وقدر يخدعها بسهوله، بدأ يداعبها بطريقته وهي بدأت تحن وسلمت ليه، قرب منها اكتر وهو بيداعب شعرها وبياخدها في حضنه، اتكلم بهمس وهو بيقرب من شفايفها وقالها :
- انا لازم انتقم من البرنس يا زوزو، زي ما وجع قلبي وقلبك وكان عايز يفرقنا عن بعض، وكمان انا مش هقدر اخلص من المصيبه اللي جوزهالي دي الا لو خلصت منه الاول
بصت له زوزو بصدمة وبعدت عنه شويه، عقلها كان بيحاول يستوعب هو يقصد ايه، قربها كرم له من تاني وبص في عينيها بقوة عشان يقدر يسيطر عليها وقالها:
- انا عايزك تساعديني اتخلص من البرنس
___________________________
انتهاء الفصل🖤
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق