مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية عــروس الجبـــايــش الفصل الثامن وعشرون28 بــقلم يـــاســـة الموسوي 

رواية عــروس الجبـــايــش الفصل الثامن وعشرون28 بــقلم يـــاســـة الموسوي 

#البارت__28                                                    

#عــروس_الچبـــايــش🌼

#بــقلم يـــاســـة 

#الحلقة (28)

وَأُنْزِّهُ اسْمَكِ أَنْ تَمُرَّ حُرُوفُهُ

مِنْ غَيْرَتِي بِمَسَامِعِ الْجُلَّاسِ

​فَأَقُولُ بَعْضُ النَّاسِ عَنْكِ كِنَايَةً

خَوْفَ الْوُشَاةِ وَأَنْتِ كُلُّ النَّاسِ

........... 

يُـمن :- من سألني هيج لابسة گدام بيت عمي صفنت بوجهه هذا صدگ جاي يحچي يعني معقوله ما يعرفني لو يغار زايد لو يشك لو شبيه بالضبط ما رديت بقيت بمكاني و صافنة صار كلش قريب مني ورجع عاد عليه نفس السؤال

-- هيج لابسة گدام بيت أبو تميـم

يُـمن :- جاي تحچي صدگ ؟

-- ليش شحچيت جاي اسألج سؤال ردي على السؤال بـ اي او لا

-- اعتقد انتَ تعرفني كلش وماكو داعي تسألني هيج سؤال لان كلش عيب بحقك وبحقي

عفته وافتريت اريد انزل بسرعة لزم ايدي ويگول

-- بس اوگفي شبيج زعلتي

جريت ايدي من عنده ورجعت امشي سحبني قوي من ايد درت عليه و اگول

-- وخرررر

-- يا يابة زعلت

-- ما زعلت بس تصرفاتك مالها داعي ساعة تسألني على تميم ساعة تلبسني عباية وهسه ترجع تسأل هيج سؤال وانتَ متأكد اني ما اللبس هيج لبس

-- حقج عليه صح طوختها شوية بس هذا من حرصي عليج

-- انا حريصة على نفسي من قبل لا اعرف ومستحيل اغلط بحق نفسي ما يحتاج الحرصك الزايد

جنت احچي وياه وأنا مقهورة و احس العبرة خانگتني أبتسم و تقرب عليه اكثر وشالني احس گلبي طاح بالگاع تخبل هذا

يُـمن :- نزززلني شبيك

ما يرد عليه شايلني ويمشي رجعت اگول

-- نززلني وين ماخذني عيب عليك نزلني

طببني الغرفته وسد الباب رجعت گتله نزلني وبچيت هوَ بسرعة نزلني ويگول

-- ليش تبچين

مسح عيوني بـ اصابعه و باس گصتي

منـاف :- لا تبچين اعتذر والله مو قصدي احچي شيء يضوجج كافي

يُـمن :- بس وخر اريد انزل الناس شتگول علينا

-- تگول اليعجبها حبيبتي و خطيبتي

-- امي هنا هسه تدور عليه وتبقى تحچي

ما جاوبني تقرب عليه اكثر وباسني رجليه خرطت وبعد ما گدرت اوگف عليهن

وكل ما اوخره يتقرب اكثر نفسي انگطع

گام يتمادى اكثر دفعته قوي لزم ايدي

قوي وعضني من رگبتي جريته من شعره حيل يلا انتبه على روحه و وخر مني

باوع عليه وملامحه كلها باهته  گعدني على الجرباية و گعد مقابيلي وبقى يمرر اصابعة بشعري ويحچي بهدوء

                                            

              

                    

-- اني أحبچ كلش هواي

ما ارد ميته بدمي خجلانه منه و بنفس الوكت بالي يم امي هسه تلعب بيه جوله رجع دنگ على رگبتي وباس مكان الاثر خفيف وراها گال

-- شلون راح تنزلين هيج

بقيت ابچي من صدگ فشلانه من عنده ومن الناس ومن امي شاگلها ضحكت وحطني ويگول

-- هسه ليش البچي يا عيني

-- شلون انزل والناس وامي

-- غير تنبهيني شمدريني والله ما انتبهت

-- سبعين دفعه دفعتك شأسويلك بعد

جنت احچي وياه و امسح بعيوني رجع هوَ سحب شعري كله و داره على الجهه الثانية

نزله على رگبتي و يگول

-- راحت متبين بعد

حچى هيج وضحك گمت و گفت گام وگف وراي و يگول

-- راح امر عليكم عگب باچر وره الزفة حتى نحدد موعد الزواج

-- لا

-- شنو الاا ما اگدر اتحمل بعد اريدج يمي وگبال عيني طول الوقت

-- احنه متفقين ناخذ فترة خطوبة اتعرف عليك وتتعرف عليه واحد يتعود على الثاني 

-- اني اعرفج اكثر من ما اعرف نفسي ما يحتاج اتعرف عليج

-- بس اني اريد اتعرف عليك اكثر

-- ما اتحمل ما عندي صبر يوم واحد بعد والله رايدج وميت بيج

-- اي ادري بس بعد وكت خلينا فترة مخطوبين

سكت ما حچى بعد وانا فتحت الباب وطلعت طلع وراي نزلت من الدرج وايدي على شعري خاف احد يشوفني رفعت راسي ليفوگ وانا انزل من الدرج شفته يباوع من المحجز بس شافني اباوعله غمزلي أبتسمت ورجعت انزل

لگيت امي واگفه قريب على الدرج شكلها متانيتني وضايجة كلش بس صرت قريب منها گـالت بصوت ناصي

-- شعندج صاعدة يمه

-- خالتهم گالت روحي جيبي الشاحنة وصعدت اجيبها لگيته فوگ

-- من شفتي فوگ ما تعرفين تفترين وترجعين

-- ما خلاني

حچيتها ونزلت راسي فشلانه

-- گدامي يلااا

مشيت گدامها وهيَ وراي طبينا للديوانية

البنات مشغلات اغاني و يرگصن اجيت

گعدت و كل شوية اتأكد من شعري خاف رايح من رگبتي لحد ما گالوا يلا نرجع

گمت بسرعة لبست و طلعت وياهم

رجعنا البيت عمي هاشم والولد بالليل مسوين حفلة خلصنا الحفلة و طلعنا البيتنا بوكتها عمي گال باتوا هنا بس امي ما قبلت و بنفس الوكت هدومنا مال العرس بالبيت ما جايبينهن ويانا

اخذنا تميم وصلنا واول ما فتت للبيت

بسرعة بدلت و تمددت بفراشي تعبانة

سمعت باب الغرفة انفتح فتحت عيوني منتهيه من النعاس شفت امي طبت والنقال بـ ايدها وتگول نايمة

            

              

                    

حاولت اگعد بس ما گدرت النعاس غلبني

وبقيت على نومتي لحد الصبح گوه گعدتني أمي گمت جسمي مكسر ما بيه حيل احركه 

گمت بوجهي للحمام سبحت وطلعت مشطت و اجيت للمطبخ لگيت أمي محضره الريوك اجيت گعدت اريد اتريك صبتلي جاي وگعدت وياي تتريك ثواني ونزلت الصمونه من ايدها و گالت

-- شنووو هااااي 

-- شنو 

-- هااا البرگبتج 

غصيت ما گدرت ابلع الگمه شلون نسيتها رجعت گالت 

-- يُـمن 

حچت هيج و صفنت عليه ما راضية وانا بقيت ساكته ما اگدر ارد 

شهيناز :- هااي هيج طاح حظي وبعد ما خليتي النفسج احترام 

--لا والله مو هيج 

-- شنو مو هيج يُـمن گتلج ثگلي نفسج

و خلي يحترمج ويعرف قيمتج تالي تصعدين الغرفته وتنزلين بهذا المنظر السخيف

-- والله انا ما صعدت خالته گالت جيبي الشاحنة ومن صعدت لگيته و ما خلاني انزل 

-- صح خطيبج و عاقدين و كل هذا حلال بينكم بس الدنيا ما تتأمن والزلم مو اودام منو يگول راح يبقى نفس ما هوَ يجوز لا سامح الله يتغير عليج لو تصير مشاكل بينكم وما يكمل الزواج بينكم بهذاك الوقت شـراح تسوين 

بقيت ساكته استحي ارد رجعت گالت

-- شلون راح تروحين گدام الناس هيج

-- راح اللبس حجاب ما انزعه 

عافتني و گامت ضايجة وانا نفس الشي شلت الاكل بلاية ما اتريگ و طبيت للغرفه بعد ما طلعت منها للظهر وصاحت عليه حتى نروح البيت عمي هاشم 

گمت بدلت و لبست حجابي وطلعت من شافتني كلشي ما حاطه بوجهي گالت تعالي وراي  رحت وراها الغرفتها مكيجتني 

وسوتلي لفة بالحجاب حلوة و لبست العباية وطلعنا اجى علينا عمي اخذنا 

من وصلنا لگيتنا الحفلة تخبل عدهم والاغاني بكل علوها والولد مبدلين ويخبلون طالعين و عمي نفس الشي بدل والبنات وخالتي ام تميم والمعازيم الكل طالع حلو ومرتب 

اخذوا زفه جبيـرة عبارة عن سيارات صغار عاليات تميـم ما مخلي واحد عنده سيارة صغيرة عالية ما عازمة 

توزعنا بالسيارات امي و خالتي ام تميم ومها ويا عمي بسيارتـه مراد مزورق سيارته

ومحد صاعد بيها بس هوَ و تميم مصعد 

خالاته ومرته ويا

بقينا انا و سحر و ولاء بنات عمي هاشم 

رجل سحر صعدنا بسيارتـه اخو لان سيارته بيها ولد گعدت سحر بالصدر يم حماها وانا ولاء وره 

والنسوان الباقيات من طرف العمام والخوال كلمن بسيارته رجلها صعدت يعني كلش جبيرة زفتهم عمي ما قابل عليها لان ماخذين الناس كلها بس تميم عاند اله تروح كل العالم و بشرط سيارات راقية مدري شيفكر بس صارت كلش حلوة 

            

              

                    

مشينا والطريق صار يخبل من گد ما صوت الاغاني بالسيارة عالي و الولد اسمه علي فد حباب ومرتب دره مثل اخو رجل سحر حتى ينطيه شبه بالشكل

البنات خلصن الطريق كله يرگصن عادي عدهن بس انا استحي حتى ما اصفگ 

بس گاعدة و اباوع عليهن وعلى السيارات الباقية وكلش متونسة 

لحد ما وصلنا البيتهم طبگت السيارات 

و محد بينا نزل احنه البنات نزلت بس امي وخالتي ام تميم و اثنين اخواتها ويا مـراد 

درت وجهي على بيتهم ادور عليه شو گال ما طالع من البيت اليوم يريد يسلم اخته

بـ ايد رجلها بس ما شفته بقيت ادور بوجهي كل شوية المكان ماكو 

الولد كلها نزلت تركص بـبابهم و بس النسوان بقت بالسيارات درت وجهي احچي ويا ولاء شفتها عيونها صار على الشارع و ضحكت وراها أشرتلي تريدني ادور وجهي وراي 

بسرعة درت شفته جاي علينا و منزل راسه للسيارة بس شافني باوعتله غمزلي أبتسمت سلم على البنات السلام عليكم ردن عليه وراها گال بصوت ناصي

-- شلونج حبيبتي 

-- زينه 

-- متنزلين 

-- لا ما يرضون 

-- صار ساعة افتر على السيارات ما اندل وينج لحد ما سألت تميم 

-- هنا ويا البنات 

-- ماشي عمري ديري بالج على نفسج اجيت اشوفج 

ودعني ورجع طب جوه لحد ما طلعوا العرسان شفته طلع وراهم هوَ وابو 

وابنه بـ ايده لازمـه 

رجعوا الولد كل واحد صعد بسيارته حتى نرجع ويا ما صعد علي يريد يمشي شفته اجى علينا وأشر العلي بـ ايده يوگف علي وگف وهوَ افتر و راح على سيارة عمي مد راسه الهم وما ادري شيحچي وياهم الزفه كلها وگفت منتظرين عمي يمشي يلا يطلعون وراه و هـوَ وگفه و ما ادري يحچي وياه طول شفت ابو اجى عليه و هوَ رفع روحه من السيارة و ما ادري شگال الابو بس بعصبية و كلش ضايج 

سحر :- شكوو يا ستار 

ولاء :- بس لا گلب عليه يسويها الحظ 

علي :- اخوها هذا 

سحر :- اي 

نزل تميم اجى عليهم مدري شحچى ويا تميم و يأشر بـ ايده وصار نار خرطت انا العافية گلت لعب عليهم وراح ينزل اخته عاد هوَ ما عنده لحيه مسرحة صاحب سوابق بهاي السالفه وراها شفته اجى على سيارتنا يمشي بهمه 

سحر :- يمه جنها السالفه تخصج ولج 

يُـمن :- ما سويت شيء والله 

علي :-دخت شيصير منها 

-- خطيبها 

وصل يمنا و ابو و تميم يمشون وراه فتح الباب عليه و گال 

            

              

                    

-- انزززلي 

بس شنو بصوت عالي و بعصبيه جمد دمي نزلت ورجليه ماتن من الهبطه ما ادري شكو هسه جان ما بيه شي ليش هيج تحول فجأة ويا ما نزلت الفت رجلي بالعباية وعثرت لزمني ما خلاني اوگع رفعت روحي وباوعت عليه و سألته بصوت ناصي

-- شكو

-- امشيي 

باوعت التميم لازم اعصابة گوه بعد شوية وينفجر بيه مشيت وراه و تميم سبقنا

و راح على سيارته عمي نزل مها وصعدني بمكانها صعدت گعدت بصف امي وهـوَ سد باب السيارة كلش قوي 

عمي ما حچى هيج و تميم دار عليه و گاله

-- احنه مو بالدوام حتى تتصرف ويانا بهاي التصرفات وتشوف روحك قائد علينا احترم شوية 

دار على تميم و ردله 

-- توكل 

-- والله العظيم فلا تستحي 

عمي نزل و جر تميم السيارته ويگول

-- الخاطر اخوك اسكت وامشيي

-- ما تشوفه عبالك متمنن علينااا منطينه اخته صار ساعة يدوس بالكلام داسسس بطنااا 

-- كافيييي 

عمي اخذ تميم  و هوَ سكت ما حچى شيء بس احتقن بشكل مو طبيعي ودار وجهه عليه باوعلي بنظره متت ولا شعور لزمت ايدي امي خايفة امي طبطبت على رجلي بهدوء و ردت سهلة لان شافته شلون باوعلي 

رجع عمي شغل  ومشى و هوَ على وگفته وره ما مشت سيارة عمي تحركت باقي السيارات 

هاشـم :- طايح الحظظظ

ما حدد منو بس ميه بالميه يقصد عليه خالتي ام تميم دارت على امي وگالت الها

ام تميم :- عبري النهر ما دامه ضيگ

امي ما ردت و عمي وخالتي رجعوا سكتوا دگ نقال عمي جاوبه بسرعة النقال مشكل بسماعة السيارة خطية يمكن جانوا مشغل اغاني عليه ومن اجاهم طفوها اول ما رد عمي اجانه صوت تميم يگول

-- ليشش لاصمنييي على حلگي ما تخلينييي ارددد

-- لا تصيح طايح الحظ تريد تسويلك مشكلة بهيج ساعة 

-- ما سمعته شلون اكل.... وما رديناا وتالي يسد الباب هييييج ما يحترم احد شايف روحه علينااا لو شنووو فلمه 

-- تميم روح من وجهههي 

-- شنو روح من وجهي قابل بهذا التجاوززز شكوو بيهااا إذا صعد بسيارة علي المريض

-- كافي اسكت سد الموضوع و خابر الولد يرجعون النسوان للبيت جيب بس سيارة اخواتك ورانا للمصور 

سده تميم و وانا درت على امي و اگول

-- شكو شبيه هستوه اجاني وسلم عليه ما بيه شيء ليش هيج تعاركوا ونزلني

            

              

                    

شهيناز :- الظاهر ما عنده ثقه بنفسه وسالفه طليقته ما متخطيها لهسه 

ام تميم :- ما متوازين عليه يمة موديه المسكينة هاي الهيج بشر 

-- سهلة بس خل نخلص العرس بسلامة والله كـريم 

رجعوا سكتوا بس كلهم ضايجين و انا احس انفشخت براسي و انشلت ونركعت من الصدمة من اول يوم الزيارة وانا گلت راح اكلها 

نزلونا كلنا للتصوير بس لا انا ولا امي رضينا نصور بس عمي خطية ضل واگف علينا الا نصور ويا العرسان 

انا احس دمعتي واگفه على الحافة اريد ابچي و اختنگت ما اگدر بعد گوه لزمت روحي 

تميـم اجى يمي بالاستديو وضحك ويگول

-- يا الططوه وين ما تذبينها سودة مصخمة 

أبتسمت مقهور بدون ما ارد رجع يگول

-- يلا خل يولي عوفي اني اتزوجج إذا كلش كلش اضطر الأمر 

ام تميم :- اسكت ولك مرتك لا تسمع انوب تشد ويا المسكينة والبيها كافية

باس امه ويگلها

-- كون كل النسوان مثلج و مثل گلبج الطيب افيشششش يريحة الجنة شحلاتج 

-- ههههه يمة من سوالفك يمة 

طلعنا من المصور رجعنا للبيت البنات بقن يهوسن و يرگصن و زهراء ضايجة وامها نفس الشي انوب أشرلتي اجي يمها اجيتها 

أمل :- حبيبتي ابنيتي لا تضوجين وتنقهرين من منـاف ضاج لان اول مرة يشوف الولد الصاعدة ويا و مبدلة ومكيجة غار عليج

يُـمن :- وين التبديل خاله وانا العباية ما طايحة من راسي ما يصير هيج هاي مو غيرة هاي قله ثقة وكل هاي الهوسه لان

ما صاعدة ويا امي وعمـي شافني صاعدة وحدي ويا الولد شو البنات اثنينهن وياي 

مو عيب هيج يفضحنا گدام العالم انوب

ما ادري شـ متجاوز على عمي وسد باب السيارة بقوة ويخزر بيه 

سكتت ما جاوبتني و زهراء نفس الشيء ساكته عفتهن ورحت الغير مكان روحي مختنگه احس اريد ابچي بس وين اگعد وابچي 

شوية وشفتها اجت تدور عليه لگتني گاعدة على الدرج وصلت يمي وانطتني النقال 

مالها وتگول 

-- مناف يريد يحچي وياج 

-- من نرجع للبيت انا اخابره

رجعت ردت عليه و گالتله من ترجع تخابرك ما ادري شگالها لان شكلها تغير وضلت بس تگول اي اي يلا يلا تريد بس تسده يمكن يغلط عليه مدري عليها 

اخذت النقال على اذانها و طلعت من الصالة 

العرس طلع من خشمي بعد لا شفت ناس ولا حسيت بـ أحد اختنگت خنگ لحد ما صبوا العشة عشوا المعازيم ما تعشيت 

ولا الي خلگ شيء بعد 

لليل مراد أخذ زهراء وراح للفندق امه واخواته راحن وياهم وانا وامي بقينا بالبيت المعازيم كلها راحت ضلن اثنين

من اخوات خالتي ام تميم يمنا ساعدنا عزلنا البيت ونظفنا كله 

            

              

                    

لحد ما وصلوهم ورجعوا حظرن البنات العشة عازلينه من العرس لان لا عمي ولا تميم ولا البنات متعشيات جابنه للصاله وكلهم گعدوا امي جابتني گعدتني غصبًا عليه گعدتني و تگول من الصبح الهسه

لا اكل ولا شرب أگعدي

بين ما تعشينا و رجعنا للبيت طبيت للحمام سبحت و رجعت للغرفـه تغطيت ونمت و بگلبي هالگد قهر الصبح من گعدنا امي حچت وياي 

-- البارحه منـاف حچى حچي لو واحد غير عمج يخرب العرس بكبره بس الله انطاه صبر و سكت 

-- شگالكم

-- اجى علينا مد راسه من الجام ويصيح بصوت عالي و يگول

-- بناتك الشابات احق من نسوانك الكبار  يگعدن يمك بسيارتك زحمة عليك مگعدهن ويا الغربة محمرات ومكحلات 

عمج انصدم متفاجى واني وخالتي نفس الشي انوب باوع عليه ويگلي 

-- يُـمن امانة بس هالكم شهر يمج مو من حقج تگعدينا يم احد غريب

-- وين گاعدة غير سيارة زفة وياها البنات اثنينهن شو مدري شلون تحچي

-- بنتج تگعد يمج ما تگعد يم احد ثاني من عفتها تحظر العرس ادري بيج عينج عليها ما ادري عايفتها 

-- وين عايفتها غير ويانا البنات 

-- لو تنزلين يمها لو تجيبيها يمج 

اجيت اطگ وياه و اسويها هوسة بس شفت تميم اجى وخفت لا تصير هوسة ويخرب عرس الولد 

-- يُـمن :- هاي مو اول مره هيج يتصرف انا سكتت ما حچيت ولا شكيت گلت يجوز ماله قصد بس ما دام صار اكثر من مرة يتصرف بنفس التصرف ونفس ردات الفعل معناها واحد شكاك 

-- ليش شـسوى قبل هاي المرة

-- من رحنا للزيارة اول فقرة لبسني العباية وانا ما حچيت گلت حلو الستر شكو بيها 

و تيهت مكانه وسألت موظف العتبة وما قبل و بقى يحچي عليه شلون اسأل ولد ومن وصلني وشاف تميم خابر يسأل شعنده جاي 

-- ليش ما حچيتي 

-- گلت يجوز ماله قصد وما ردت اكبر الموضوع بس البارحة هوَ كبره و خلاني تأكد منه ما يثق و يشك 

-- والله يا يُـمن حيرني الرجال هذا البارحه الليل الطويل يدگ علية ما جاوبته وامه باست الگاعد هناك بس تتعذر وتبررله شهم واهله اوادم واخو اخيته و انتِ عندي هوَ شال مسؤوليتج بس كل هذا ما يغفر أذا صدگ يطلع يشك وما يثق بالنسوان

-- والحل شني يما انا ما اگدر اعيش نفس العشته گبل 

-- ولا اني اقبل تعيشين هيج بس خلينا ننتظر يجي ونحچي ويا متأكدة اليوم إذا ما رديت عليه راح يجي 

خلصت الوكت كله ضايجة ومالي خلگ وامي نفس الشيء ضايجة بس ما تبين نقالها ما سكت كل شوية يدگ بس ما نرد عليه حتى امه دگت على امي وما جاوبناها

            

              

                    

وصدگ مثل ما گالت امي من شاف محد رد عليه المغرب اجى اول شي عبالنا عمي هاشم لو تميم بس من راحت امي فتحت اجت گالت منـاف بدلي و تعالي 

لا بدلت ولا رتبت والله فوگاها ابدل واعدل وهوَ فاضحني گدام الناس حتى ما رحت يمهم ضل گاعد بالديوانية وامي گاعدة يمة 

كل شوية تصيح عليه تريدني اجي بس ما رحت 

اخر شيء اجى هو جنت بغرفتي دگ الباب وطب بسرعة عدلت گعدتي فات وسد الباب وراه بدون اجى گعد صفي وراها گال

-- ليش ما تجين ومن البارحة لليوم ادگ ما تردين 

باوعت عليه مستغربة عبالك ما مسوي شيء واصلا مستغربة من جيته للبيت من بعد مشكلته ويا تميم و تجاوزه گدام عمي رديت

-- تسأل ليش ما اجي وما ارد يعني ما مسوي شيء

-- شمسوي ؟ 

-- صدگ لو جاي تشاقى وياي

-- يُـمن الولد الصاعدة ويا ما اعرفه ولا شايفة من قبل ومن سألتج ويامن تجين للزفه گلتي ويا امي يعني من حقي اضوج 

-- لا مو من حقك انا صدگ اول مرة جاي اصعد ويا امي بس ما كفت السيارة والولد مو غريب حمى سحر وسحر ولاء گاعدات وياي ما صاعدة وحدي واجيت وشفتنا گاعدين سوى تروح تسويها هوسة گدام الناس مو عيب

-- سيارته تشبه سيارة عمج عبالي صاعدة ويا عمج من شفت عمج صعد بسيارته

و امج ويا استغربت بعدين شفته اجى صعد ضجت لان ما عندي علم راح تصعدين بغير سيارة

-- ويحتاج هاي الهوسة 

-- ما سويت هوسة ولا شيء اجيت الامج گلت الها بنتج ليش مو وياج و نزلتج صعدتج يمها تميم الكبر المشكلة بعدين حبيبتي ومن حقي اخاف عليج واغار عليج ما غلطت بشيء

-- يعني هسه أنتَ تغار 

-- اي اكيد اغار والما يغار على عرضه لا خير البي

-- زين انا هسه رضيت وصدگتك وسكتت بس صدگني وحقك إذا تغار عليه بس خلي بالك إذا طلعت تشك ما ابقى وياك دقيقة وحدهة 

سكت ما حچى بقى بس يباوع عليه وراها اخذ ايدي باسها ويعتذر ماله قصد وهذا من دافعه حبه وبعد ما يسوي هيج تصرفات و گال بدلي نروح البيت ابو تميم خاف صار بالهم عليه ولو تميم طول اللسانه بس الخاطرج طايحة 

يُـمن :- والله تميم حباب و طيب بس انتَ صار اكثر من مرة تتصرف وياهم بـ اسلوب يضوج ومن حقه هيج يرد 

هز راسه بدون ما يرد و گام گال راح انتظرج بين ما تبدلين 

-- وامي 

-- شبيها امج 

-- خاف ما تقبل اروح 

-- حچيت وياها وتفاهمنا وعدها علم راح نروح البيت ابو تميم يلا عمري بدلي 

            

              

                    

حچى هيج وطلع بس كلش ضايج ويحاول يمشي الامور وانا ادوي ومتأكدة من عنده يشك ويغار و ما يثق كلهن بنفس الوكت بس سكتت وعبرت هاي المرة حتى لا اظلمة واظلم روحي وبعد يومين اتندم گلت انطيه فرصة واشوفه الولد كلش يحبني ليش اخسر بـ اول غلط 

بدلت هدومي ولبست عباتي و طلعت لگيته گاعد يم امي بالصالة اول ما شافتني أمي طلعت اشرتلي براسها تريدني ما اضوج هيج فهمت من حركتها 

طلعنا صعدنا بالسيارة اثنينا ساكتين مشينا مسافـة ضحك و گال

-- صابتني العدوى وصرت ساكت شوكت ما تجيني 

ما رديت رجع سحب ايدي باسها ويگول

-- والله العظيم وداعت فهد اموت عليج ومالي قصد بـ اي حركة سخيفة صارت وداعتج مالي قصد بشيء و تصرفت هيج بدون ما افكر ساعة عصبية اعذريني بعد ما تنعاد 

-- اتمنى ما تنعاد لان كلشي ولا الشك وانعدام الثقه يدخل بين المتزوجين معناها دمار للأثنين 

ما جاوبني بقى ساكت شوية وطبگ وفتحت الصندوگ مدري شيسمونه يصير يم الكرسي مالي وطلع من عنده علاگه مال هداية صغيرة فتحها و طلع منها محبس كلش حلو و سألني 

-- حلو 

-- اي 

-- اخذته اليوم الزهراء هدية زواجها امي تگول حلو بس اني ما عاجبني شتگولين انتِ

-- حلو 

-- يعني عجبج لو يعني 

-- لا كلش حلو 

رجع ضمه وطلع علبه ثانية فتحها وطلع نفس المحبس نفس المديل وسحب ايدي لبسنياه وباس ايدي ويگول

-- هدية اعتذار من الموقف السخيف الحطيتج بيه البارحة گدام الناس 

-- انا ما اريد ذهب ولا اريد فلوس ولا اريد اعتذارات كل الاريده تثق بيه و تقدرني وتحترمني هذا اغلى من كل الهدايا وكل الذهب والفلوس اريدك تبني علاقتنا بالاحترام و التقدير والثقة والمحبه ما اريدك تبنيها على الاخطاء وراها تجيب هدية وتعتذر كثره الاخطااء والاعتذارات 

تقلل المحب و الفرص والاحترام 

ابتسم و رد

-- كل هداية الدنيا ما توصل الكلمة من كلماتج الكلها حكم وكل اعذار الدنيا ما تكفي إذا غلطت بحقج بيوم من الايام شوفي خليني اعترف و ارتاح 

حچى هيج و ذب حسره قوية وراها نزل الجام وشغل چگارة و بدأ يدخـن ورجع يباوعلي ويگول

-- التجربة المريت بيها مستحيل اگدر اوصفها واتمنى اگدر احذفها من عمري بس ما اگدر ، تعرفين شنو الرجال ينخان تعرفين يعني تنهان رجولته اصعب من الموت عندي لو ميت ولا صاير بيه هيج لو ميت فهودي ودافنه بـ ايدية ولا انحط بهذا الموقف القذر سنين واني اتعذب واصارع ما عدا عليه يوم إذا ما حقدت على نسوان 

وكرهت اكثر واكثر ما عدا عليه يوم إذا كرهت نفسي وكل ما اتذكر هذاك اليوم الزمتها بيه تخابر اللوم نفسي واحملها ذنب 

شلون عفتها عايشة وما كتلتها امي ما گمت اثق بيها اختي ما اثق بيها النسوان الاشوفهن بالشارع لا اعرفهن ولا يعرفني احس بيهن كلهن قذرات وخاينات والزاد الوضع سوء فوگ سوء وظيفتي يومية تمر علينا حالة جديدة وخيانة جديدة ونموذج قذر جديد بحيث گمت ما اتقرب حتى من امي وما استنظف اي مرة وحتى اكل ما اكل من ايدها اگوم اني اسوي النفسي لو اطلع اكل من بره من ايد رجال الهاي الدرجة وصلت بيـه تخيلي فهـودي الاعز من روحي اجتني فترة من الفترات گمت اشك بيه مو أبني لحد ما سويت تحليل اثبات نسب وتأكد منه يلا وهذا الموضوع محد يعرف بيه حتى امي وابوي انتِ اول وحدة احچيلها ، منا وقيسي حالتي وضعي 

            

              

                    

سكت ثواني و يدخن بقهر يسحب النفس بحرگة وراها كمل كلامه و يگول

-- لحد ما اجيتي الحياتي وشفتج اجذب عليج إذا اگلج حبيتج من اول لحظة بس احساس غريب حسيت من شفتج ويا عمج 

تذكرين اول مرة من شفتكم بالممر مال المركز 

هزيت راسي بـ اي رجع يگول

-- مو احساس حب واعجاب ومشاعر لا بس ما اعرف شنو وما اعرف شلون اوصف واشرحة ومن عمج حچالي قصتج وطلب المساعدة صح وعدته اتكفل الموضوع بس ما تعاطفت وياج لان كل جنس حواء بنظري نفس الشي لحد ما اجيتوا للمركز وحچيت وياج تذكرين 

-- اي 

-- اول مره توقعتج تمثلين دور البريئة الحبابة لان كلش هواي يمرن عليه هذن اليمثلن دور البراءه ومن حچيتي ويا طليقج بالتليفون حتى نحصل موقعه رجع احساس تطور 

حچى هيج وضحك ورد

-- يعني مو اطور حبيتج لا تطور انو انتِ يمكن حبابه ما يصير اظلمج وراها لگيتج باب المركز وحدج وصحتي وراي اگلك 

اني هنا ضعت 

ضحك واني ابتسمت ويا رجع يگول

-- وراها شفتج صعدتي ويا مراد ورها دخت شنو الموضوع تستحي لو تبيع سوالف العيد علينا لو شنو وضعها وراها عزمتونا ودخلتي يم ابوي من فتي وگعدتي احس توترت ما ادري شبيه وصوتج وانتِ تحچين ويا ابوي عبالك مي و سال فوگ كل عضو صخب بيه احس گلبي يدگ ويا كل كلمة تطلع منج خلصتها لازم تليفوني واحاول ما اسمع ولا انتبه عليه بس ما اگدر هيج لازمه بالي مو يمه اصلاً بالي كله يمج 

وراها بعد ما شفتج وسمعت بـ بنتج متوفية كلش تأثرت وانقهرت والاول مرة انقهر على بنية واتأثر الحزنها 

بعدين اجيتي تردين تتازلين عن الدعوة وگمت تخطبين باللسانج الحلو فوگ راسي عاد اني هنا لاااا بعد خرط گلبي 

يُـمن :- هههههه

-- اروح فدوة الهاي الضحكة 

-- اي وبعد 

-- هههههه شكلج حبيتي الموضوع 

-- ههههه غير الصدگ اي حبيت 

-- والله محد حاب بگدي 

سكت و شغل رجعت گتله وبعدين كمل 

-- هههههه لا كافي مو هيج بعد تروح الهيبة خلي شوية هيبة ما يصير من اول موقف انزعها واگوم 

-- ههههههه لا الله عليك كمل 

-- شتنطيني إذا كملت 

جنت مبتسمه واباوعله من گال هيج بسرعة تغيرت ملامحي ورجعت جدية ضحك بصوت عالي و يگول

-- شايفة هذا الشكل المعبوس اموووت على ربه 

سكتت بدون ما ارد شي و هوَ ضحك و گال

-- اكمل 

-- لا 

-- هههههههه تعرفين ام البنين 

            

              

                    

-- اي عليها السلام

-- وام البنين احبچ

-- بصراحه اني هم بديت احبك واتعود عليك 

-- فدوة اروح الگلبج 

رجعت اباوع للمحبس وابتسمت رفعت راسي وگتله

-- تعرف ذوقك حلو 

-- اي اعرف 

-- زين واثق من نفسك 

-- اي كلش واثق والدليل لو ما ذوقي حلو ما جان صام و اشمئز سنين طويلة ومن شافج تغير و اقتنع وحب

-- عفية انا ما اعرف ارد من تحچي وياي هيج لا تضوج إذا بقيت ساكته

-- دخيل الخلقج واني غير هذا السكوت اموت عليه 

وصلنا قريب على الفرع مال بيت عمي اكو اسواق كلش جبير تصير على الشارع نزل 

هوَ للاسواق وانا بقيت بالسيارة شوية وشفت تميم و رجل سحر اثنينهم طلعوا من الفرع واجوا يمشون على الشارع تميم مو عيونه طايره ويلقط بالرايح والراجع شافني من بعيد استغرب واجى عليه ضحكت وانا اشوفه شلون اجى يمشي سريع نزلت الجامة نزل راسه عليه ويگول

-- شنو هاي سيارة مناف وانتِ گاعدة بيها وبشارعنا يعني تصالحتوا 

-- ههههه وجايين نصالحكم ويانا 

-- امشي لج اخذي و هرولوا إذا فات للبيت اكسر رجله 

-- هذا انتَ ابو گلب الطيب هيج تگول

--.... على گلبي

-- لا حشاك والله هوَ گال جاي يعتذر منكم 

-- اني بالنسبة الي ما اريد اشوفه ما اريد اشوفه اصلاً 

-- لا الخاطري اني جاية ويا وهيج تسوي والله ازعل منك 

-- ديلا على اساس شلون شخصية مرموقة وجاية وياه لا وعايشة اللحظة 

-- ههههه 

-- باعي الخاطرج راح افتر و ارجع للبيت واستقبله عادي بس مرة ثانية صدگ اخرب ويا 

-- الله يخليك ويحفظك 

-- من تفوتون للبيت سوي نفسج ما شايفتني 

-- ههههه

-- وين راح 

-- بالاسواق 

-- خليني اروح قبل لا يطلع 

افتر ورجع للفرع ضحكت ودرت وجهي ابارع عليه شلون راح طلع مناف من الاسواق واجى بـ ايده هواي غراض متسوگ الاخته يمكن صعدهن وره وصعد باوع عليه وگال

-- عليمن تضحكين 

-- ها

-- من طلعت من الاسواق شفتج تضحكين وحدج عليمن تضحكين 

-- لا هيج تذكرت موضوع وابتسمت عليه عادي 

دار وجهه بدون ما يرد عليه وشغل ومشى ومن وصلنا البيت عمي ما تفاجأوا الظاهر عدهم خبر اما تميم او امي انطوهم خبر 

استقبلونا بكل احترام ولا عبالك صار شيء البارحة ويا منـاف انوب اجت زهراء تركض 

حظنت اخوها وتبچي شو هذا رجع ليوره وجهه انعقج صح بقت بحظنه بس وضعه تغير شلون الواحد لعبانة نفسه هيج شكله صار بقيت اباوعله مستغربة وضعه هذا صدگ تلعب نفسه من النسوان حتى اخته يكش منها مثل ما گال چا ليش شو انا واگعلي بوس

لزمها من راسها بـاسها بـراسها و رجعت هيَ تمسح بـدموعها و اجت عليه باستني 

وگعدنا سوى بالديوانية 

منـاف اعتذر من الموقف الصار وگالهم حقكم عليه صار سوء فهم وساعة شيطان وتميـم نفس الشيء رجع اعتذر لان تجاوز عليه للعلم منـاف سكت عن تجاوز تميم لان يدري بروحه هوَ الغلط بحقهم 

وراها طلع المحبس انطاه الاخته حتى ما لبسه الها وخطية هيَ مكيفه طايرة من الفرح وتتشكر من عنده و الغراض الجايبة من الاسواق نفس الشيء نزلهن انطاهن الها 

متسوگ الها مسواگ كامل ما عايف شيء ما جايبة 

طلعنا منهم راح گبل على مطعم اخذ عشه ورجعني للبيت ما نزل بس وصلني للباب وانطاني العشه والحلويات طلع جايبلي مثل ما جايب الزهراء 

بس نزلت وامي اتلگتني تسأل شحچينا وشگلنا وانا احچيلها لحد ما تعشينه و كملنا واحنا نسولف بنفس الموضوع وهيَ تنصحني وتعلمني وراها نمت

مشى الوضع مثل ما هوَ هادئ وكل حلو وكله حب وغزل ماكو شيء يضوج لان انا گاعدة وساكته لا اطلع ولا اطب و مالي صوت ولا اذية 

شهر تقريبًا وبهذا الشهر اجانا اكثر من مرة و كل مرة اتعلق بيه اكثر و احبه اكثر وهوَ كلمة يحبني قليله لحد ما مرة خابرني بالليل گال باچر راح اجي نروح الظهر الكربلاء نزور ونرجع

رحت حچيت الامي ما قبلت شلون نروح وحدنا والطريق طويل وبعيد رجعت انطيته خبر امي ما تقبل نروح گال جايكم 

وساعة واجى گعد ويا امي و قنعها وبسالفة الاقناع يعجب ويقنع اكبر واحد حتى ما ياخذ وكت ويا المقابل مدري شلون عنده هاي القابلية 

وثاني يوم الظهر اجى عليه وامي توصي بيه ديري بالج و لا تسوين هيج ولا تگولين هيج وهذا وذاك لحد ما طلعت وهيَ توصي بيه وانوب طلعت وصته عليه وهوَ يردلها بعيوني 

جان جايب فهد ويا و الطريق بطوله متونسة وفرحانة بسوالفه الكلها حب وبسوالف ابنه التخبل لحد ما وصلنا اخذ ابنه و وصفلي مكان من اطلع اتانيه بيه

بعدني هسه مشيت من عنده كم خطوة وصاروا گبالي وجه بوجه رائـف و واثـق 

يتبع ........ 

يــاســة 🌱

 تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا