مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية عــروس الجبـــايــش الفصل التاسع وعشرون29 بــقلم يـــاســـة الموسوي 

رواية عــروس الجبـــايــش الفصل التاسع وعشرون29 بــقلم يـــاســـة الموسوي 

#عــروس_الچبـــايــش 🌼

بــقلم يـــاســـة الحلقة (29)

انا كـ بلدي سيء الحظ في كليتهما

الحـب والسعـادة 

افترسنا الاعداء لاننا طيبان 

...................... 

يُـمـن :- رائـف و واثـق صاروا وياي وجه بوجه وانا لا ارادين درت اباوع على مناف خفت لا يشوفهم شفته مدنگ على أبنه ويحچي وياه ما منتبه رجعت مشيت سريع و تعديتهم بدون ما احچي وياهم بس شني گلبي طلع من صدري

وانا اشوفهم وبنفس الوكت منـاف قريب منهم لا يروح يشوفهم وهسه لو اللزم الشباك واحلف بيه هاي صدفه ما يصدگني

سمعت رائـف يگل الواثق هاي يُـمن لو اتخايلها

-- اي هيَ

-- وحدها جاية

-- اكيد لا عوف الابنية و امشي لا تسويلنا مشكلة 

بس هذا السمعته بعد ما سمعت شي

لحد ما صرت بعيده عليهم وگفت بمكاني ما يشوفني بقيت اباوع عليهم بعدهم على وگفتهم رجعت درت وجهي ادور على مناف ماكو رايح ماكو بمكانه 

رديت الحمدلله يارب و طبيت للأمام العباس ما اندل اول مره ازور بحياتي

صدگ جنه الارض المكان الريحة الأمن الأمان تجنن تجنن شعور غريب كله أمن وأمان 

 زرت مال عمر كامل وصليت هواي وقريت الزيارة و ضليت گاعدة بالصحن مده وراها حسيت بروحي نعست بسرعة گمت 

گلت خل اطلع لا اغفه و اضل هنا وهذاك يتخبل عباله شردت حچيت هيج بگلبي وأبتسمت بيني وبين روحي

مشيت للمكان الوصاني اوگف يمه وگفت ومتانيته هسه يطلع هسه يجي ماكو ساعة ساعتين وهوَ ماكو رحت يمنى يسرى رجعت افتريت ماكو فص ملح وذاب انوب لا عندي نقال لا حافظه رقم احد و لا اندل 

گعدت بالگاع ودموعي گامت تصب واباوع للأمام واگول دخيلك مؤلاي لا تخليني وحدي لا اندل ولا اعرف احد هنا 

بقيت من العصر للمغرب انا بنفس المكان العالم تروح وتجي و الدنيا بدأت تظلم وصوت الإذان وصارت صلاة المغرب وانا إحس انهاريت وبعد ما گدرت متت من البچي وين راح عافني ضعت منه وما اندل 

لحد وره صلاة المغرب وانا ما ضلت بيه عافية ريگي يبس و حلگي نشف عيوني ورمت من گد ما بچيت انوب خاصرتي موتتني مدري شبيها 

لزمت خاصرتي متوجعه منها وگلت خليني اروح الموظفين العتبة شلون ابقى هيج لا نقال لا اندل ولا اسأل والله ما يرضا اسأل 

ولا يرضا قابل اضل هنا 

اثنين ولد گاعدين على كراسي اجيت سلمت عليهم ردوا السلام وبعد ما گدرت احچي نطيت من البچي خطية بس شافوني ابچي تخبلوا شبيج خوية محتاجة شي بيج شي يوجعج شي اهلج وين وحدج جاية 

رديت لا ويا خطيبي وطبيت للأمام زرت ومتفقين بهذاك المكان نتلاگه ومن العصر الهسه انا متانيته وماكو 

-- عندج تليفون خابري

-- لا ما عندي ولا حافظه رقمه 

-- زين رقم اي احد من اهلج احنه نخابرهم

-- ولا حافظه رقم 

-- شأسمه خطيبج تعاي نادي عليه بمركز المفقودين 

-- لا ما اگدر اروح وياكم 

حچيتها و رفعت ردن العباية امسح بعيوني جاوبني واحد منهم

-- هذاك المركز امشي خوية چا تبقين ضايعه 

مشيت وياهم وگلبي يدگ وعيوني الما بطلت سألوني على إسمه ومن يا محافظه

وبقوا ينادون الى الزائر منـاف ابو فهد من اهالي بغداد الرجاء التوجه الى مركز المفقودين خطيبتك بالأنتظار 

مره مرتين ثلاث مرات نادوا ماكو اخر شي گالوا گعدي هنا هسه يجي وين يروح قابل 

حطولي كرسي وگعدوني و الولد ابو المنادى كل شوية ويرجع يصيح بـ إسمه من جديد

صار الليل عليه والدنيه ظلمت گطعت الامل وگلت خلص هذا هوَ عافني ورجع بقيت گاعدة يم المركز ساعة وربع تقريباً

والولد كل شوية ومنادي لحد ما شفته اجى من بعيـد يمشي بتجاهنا انا شفته وانا 

الدموع عشرة عشرة گمت وگفت وهوَ شافني من بعيد اسرع بخطواته عليه 

مشيت بتجاها سريع و بلا شعور حظنته 

وميته من البچي وهوَ فتح إديه اثنينهن وضمني بحظنه وما يحچي شي بس حاظني قوي وانا الناس كلها سمعت صوت بچيي 

انوب باسني براسي ويگول

-- كافي عمري انتِ كافي 

وخرت من حظنه و اسأل بيه 

-- وين جنت من العصر الهسه واگفه بمكاني وانتِ ماكو اتفقت وياي ساعة وتطلع وين رحت 

مسح دموعي ورد 

-- صارت مشكلة بسيطة تعاي 

لزمني من إيدي وابنه وياه بالايد الثانيـة لازمة و طلعنا من بين الحرمين گال

-- تعاي للحمامات غسلي 

-- لا ما اريد بس رجعني للبيت 

-- هوَ راح نرجع بس غسلي يلا عمري راح انتظرج هنا شوفي شصاير بحالج 

-- لا تروح 

-- ما اروح يلا حبيبتي

طبيت للحمام نزعت العباية وغسلت وجهي و رگبتي وبللت شعري ورجعت توضيت من جديد ولبست وطلعت لگيته گاعد نص گعده بمستوى ابنه ويحچي ويا والولد يبچي بس شافني طلعت گام و ابنه بـ ايده يبچي اجيت عليهم گال

-- صرتي زينه 

-- اي 

-- تعاي اكلي شوية

-- لا ما اريد

-- بس شوية 

-- ما اريد ما اشتهي بس رجعني 

-- زين بس نوكل فهـد جاي يبچي جوعان خطية 

باوعت للجاهل يبچي سكتت ما حچيت  مشى وانا ويا طبينا للمطعم گعدنا وراح يحچي وياهم الولد يباوع عليه ومبرطم متت من القهر عليه لزمت ايده واحچي ويا

-- ليش زعلان حبيبي 

-- جوعان 

-- هسه راح ناكل لا تزعل انتَ بطل والبطل ما يزعل مو صح

-- اي إني بطل مثل بابا اصير ضابط واكتل الاشرار 

أبتسمت و رديت 

-- عفيه بالضابط البطل 

-- بابا كتلهم كلهم بس لزموه 

صفنت عليه مدري شجاي يحچي رجعت سألته

-- كتلمن 

-- الاشرار 

رجع اجى منـاف جر الكرسي وگعد ساكت ويدخن وضايج فد مره ومبين عليه كلش صاير اعصاب بس يحاول يهدي روحه 

يُـمن :- وين رحت وعفتني وحدي وتدري بيه ما عندي نقال ولا اندل

مـناف :- صار سوء فهم بيني وبين واحد من موظفين العتبة و رحت وياهم حليناها

-- تعاركت 

-- لا هيج بس سوء فهم بسيط وخابروا على الأمن مال العتبه واجوا اخذونا اثنينه وهناك تأخرت بعدين حليتها وياهم ورجعت ، اعتذر خليتج تنتظرين وتخافين الشغله صارت خارج عن ارادتي 

-- لا ما صار شي المهم انتَ سالم وحليت المشكلة وما تأذيت 

-- اسف 

حچى هيج و باوعلي كلش مقهور ما ادري شبيه و شصاير ويا وليش تعارك ولا اريد اعرف اصلاً البيه كافيني ما دام رجع بسلامة ما اريد اعرف شي المهم هسه ارجع للبيت وهذا هو، جسمي لحد هسه يرجف من الهبطه والخوف 

هوَ ساكت وانا ساكته وكل شوية يباوعلي ومن اباوع عليه يدور وجهه سريع ابنه خبصنا جوعان وجوعان ويبچي وحقه طفل وجاع ما يگدر يسيطر على روحه گام وگف فوك الكرسي ويبچي بصوت عالي 

منـاف بحركة سريعة لزمه قوي وفره وگعده على الكرسي حيل و صاح بيه بصوت عالي انا من يمي فزيت وخفت

والولد گعد بمكانه ما تحرك بعد رجع گاله

-- ابن الكلب قليل التربية گتلك صبررر

يُـمن :- على كيفك ويا شمفهمه 

ما جاوبني رجع طلع جكارة ثانية و يدخن لحد ما جابوا الاكل گام يوكل بـ ابنه وانا غصب ما عليه اكلت لان منزلي عشة 

و وگف عليه اله اكل ، صح اكلت بس شي قليل بس حتى يسكت من عندي وهوَ ابد ما حط لگمه بحلگه بس وكل ابنه وراها طلعنا گال تزورين الأمام الحسين 

-- وانتَ تروح وياي

باوع عليه مقهور على حالتي لان كلش منتهيه وخايفه ورد 

-- اگعدلج بالباب ما اتحرك من مكاني

-- مو تروح 

-- لا ابد يلا تعاي 

اخذني ورحنا للأمام طبيت وهوَ ضلت برى من فتت للأمام جنت تعبانه و ما عندي كل طاقه كل قوتي فقدتها من الخوفه والهبطه سلمت وزرت و صليت وگعدت ادعي ربي واستغفر ودموعي تصب

احس مقهورة وما مرتاحه وحسره بگلبي 

شوية وگمت طلعت وقبل لا اطلع من الصحن درت سلمت على الأمام و گتله

-- مؤلاي أنا اول مره اجيك واطبلك وبجيتي هاي خفت وانهبطت وانكسر خاطري مؤلاي اريد من الله ومنك وانتَ وسيلتي عند الله كون اخلص من همي وقهري وأذيتي يا ابا عبدالله انتَ الاقرب مني لله اريدك تدعيلي يسهل امري وتتغير حياتي للأفضل اريدك تبعد عني كل اذيه عشتها

 يا حسين تعبت وبعد ما اگدر اعيش نفس العشته رايده من الله ومنك الحياة الصالحة والسعادة التوفيق بدراستي والعوض الجميل 

سلمت وبست الباب وطلعت و اول ما طلعت لگيته گاعد قريب يم الباب ويدخن وابنه يلعب بـ سيارة صغيرة يمكن رايح مشتريله بس شافني گام واجى عليه ويگول

-- الزيارة مقبوله 

-- قبل الله اعمالك 

-- نرجع 

-- اي 

طلعنا من بين الحرمين للشارع هوَ بـ ايده غراض شايلهن وانا لزمت فهـد لحد ما وصلنا للگراج صعدنا بالسيارة شغل ومشى 

حطيت راسي على الجام و غمضت عيوني

انعس وتعبانه 

غفيت بس مو هذيج النومه لا جنت احس بالحواليه و اسمع بس تعبانه ما اگدر افتح 

مده طويله انا هيج لحد ما دگ نقاله هنا صحيت اكثر من الصوت بس بقيت مغمضه راسي يوجعني سمعته يحچي

 ويا امي ويگول 

-- اقل الساعة و ندخل بغداد  

-- لا ماكو شي ليش تسألين 

-- ما بيها شي نايمة شكو 

-- هاا زين تمام الله وياج 

من قفله سمعته ذب حسره قويه ويگول 

اووووف ربي اوووف 

فتحت عيوني وعدلت گعدتي باوع عليه وأبتسم ويگول 

-- صح النوم 

-- راسي يوجعني 

-- من البچي عبالك طفل حالج من حال فهودي بسرعة يتعب وبسرعة يبچي 

و بسرعة ينام 

حچى هيج وضحك أبتسمت بدون ما ارد 

رجع يگـول 

-- اگول عمري

درت وجهي اباوع عليه ورديت گول 

منـاف :- بيت عمج حاكم بعد هم شفتيهم 

اجوا عليكم خابروكم 

تفاجأت من السؤال و احس توترت وخفت يمكن شافهم لو ما شايفهم ما يسأل عليهم قابل شذكره بيهم رجع يباوع عليه منتظرني ارد جاوبته 

يُـمن :- لا ما اجونا ولا شفناهم ليش تسأل

-- هيج سؤال عادي 

-- شذكرك بيهم 

-- ما ادري بس هيج خطروا على بالي 

حچى هيج و دار وجهه للشارع وبعد ما رد ولا گال شي وانا نفس الشي سكتت ابنه نايم وره وانا وجهي للشارع و هوَ ساكت وملتهي بالطريق لحد ما وصلنا البيتنا 

وصلني للباب ونزل وياي نزل الغراض تفاجأت بيهن انا شفته شايلهن بس ما عبالي الي عبالي غراضه سألته

يُِـمن :- شني هذن

-- غراضج 

فتحت امي الباب سلمنا عليها وهيَ ترد علينا الزيارة مقبوله بس ضايجة وتباوع علينا وعبالك صاير شي وجانت خايفة منه ودعنا مناف و راح 

طبيت للبيت و امي تمشي وراي لگيت عمي بالصاله سلمت عليه رد السلام ونفس الشي ضايج قلقوني شبيهم بس ما حچيت طبيت الغرفتي اجت امي وراي طبت وسدت الباب وراها وتسأل

-- شنو الموضوع

-- يا موضوع 

-- وين شفتوا رائف و واثق 

باوعت عليها متفاجأة شعرفها بسرعة رديت

-- شمدريج شفناهم

-- شمدريني شنو الدنيا محتركة والشرطة ما خذتهم وحاكم يخابر ومحمد يخابر والامه العربية كلها تدري وترديني ما ادري 

-- يا شرطة الماخذتهم وعمي حاكم ليش يخابر عليكم

-- غير متعاركين همَ ومناف و أمن العتبة ماخذهم كلهم 

-- صخااام يعني منـاف متعارك وياهم وشايفهم وما گالي وانا اگول وين عافني واختفى ومن سألته يگلي صار سوء فهم ويا موظف العتبة 

-- يعني ما تدرين 

-- لا طبيت ازور ومن طلعت ما لگيته بقيت متانيته هواي ومن رجع گال صار سوء فهم ويا واحد من الموظفين 

-- همَ حچى وياج لو ضوجج بشي

-- لا ابد ما حچى اصلاً بقى يعتذر لان تأخر عليه 

-- انشوف تاليتها ويا

حچت هيج وطلعت وانا صفنت ، اگول سألني عليهم إذا شايفتهم لو لا اثار شايفهم ويريد يتأكد مني شفتهم لو ما شفتهم 

بدلت وطلع للحمام سبحت و من طلعت سمعت عمي يحچي بالنقال ويگول

-- عيب هاي التصرفات المفروض تصير اعقل منهم هاي انتَ الكبير العاقل 

-- اي 

-- شلون حچي هذا يا ابني ناس بحالهم وانتَ بحالك شلون يعني تريدهم يغادرون الكوكب حتى ما يلتقون وياك وياها مو حچي هذا 

-- الموضوع كلش زاد عن حده رجاءً منـاف انتبه التصرفاتك وخليلنا احترام 

-- زين زين الله وياك 

بقيت واگف واسمع بالمكالمة ومن خلص 

گال الامي

-- هسه اني شلون احلها ويا

-- ما يقبل يتنازل لو شنو الموضوع

-- لا مطلعينهم لان موظفين العتبة شايفينه شلون هوَ البادي بالمشكلة ومتجاوز عليهم وعلى الموظفين بس واثق و رائـف يردونها تصير عشائرياً

-- وانتَ شعليكم اشو مناف لا من عشيرتك ولا من اهلك هوَ وياهم يتجازا شعلينا بيهم 

-- غير حسـن توسطني افوت بينهم بس ابنه واحد مشكلجي وفد مره تعبان وما يسمع ولا يحترم 

دارت امي عليه وتباوع وراها گالت

-- الشفيه متعارك وياهم بدون سبب وماخذينهم الأمن كلهم ولان عنده هوية مطلعينهم كلهم و من طالعين مهددهم وصايره بالنعل بينهم تدرين بهذا الحچي

 لو مطفيه من الرئيسي

-- ما ادري ما حچالي 

-- وهسه اني حچيتلج بله شوفينه شـراح تسوين 

-- انا شعليه واسوي لا وياي ولا يمي الطلابه شعليه واروح ادخل وهوَ حتى ما حچالي بعد عليمن مدخل روحي 

هاشـم :- يعني ما تعرفين عليمن تعاركوا

-- لا وحتى ما گال شايفهم  

-- ما دام ما فتح وياج موضوع لا تتدخلين 

سكتت وطبيت الغرفتي بقيت بالغرفه ساعة حايرة و صفنه تاخذني وصفنه تجيبني عليمن تعاركوا وليش هيج صار وليش ما حچالي اكيد صار شي بيناتهم زين هوَ مو گال واثق داعم واحد ومسجون شو اليوم شفته طالع 

إحس تعبت ما اگدر افكر بعد اخر شي ما تحملت اصبر اكثر گمت للصاله اخذت نقال امي و دگيت عليه ما جاوبني رجعت دگيت مره ثانية ماكو ما يرد

دزيتله رساله.. وينك.. وصلت بس ما خابر 

اخر شي تعبت و غفيت للوحده ونص بالليل دگ نقال امي فزيت وباوعت للساعة والمتصل منـاف بسرعه جاوبته 

يُـمن :- الو 

منـاف :- هلا حبيبتي 

-- ادگ عليك ماكو 

-- جنت طالع عندي شغل محتاجة شي 

-- امي وعمي گالوا متعارك ويا الولد صدگ هذا الحچي 

-- وانتِ شدخلج ومخابره تسألين عليهم بنص الليل 

فتحت عيوني مصدومه شنو شو هذا فرها عليه لو شنو رجع گـال

-- ليش تسألين عليهم 

-- اسأل لان عفتني مشتوله ورحت تتعارك وياهم وما فكرت عايف مره وراك ما تندل ولا عدها نقال ولا حتى تعرف تسولف وتوصف وين بيتها اسأل لان من رجعت چذبت عليه وگلت سوء فهم ويا موظف العتبه وما حچيتلي 

-- إني چذاب 

-- ما گلت چذاب مو تلزم السالفه من ذيلها وتريد تفرها عليه ترى مو وضع هذا 

-- شلون شلون ولج شو صايرة اللسان 

-- چا تريدني اسكت وانتَ تفر المواضيع براسي وتتخيل شغلات ما صايره 

-- روحي نامي باچر نحچي 

عود جاي ارد عليه واگله منـاف ما يصير هيج لازم تعوف رائـف وما تفكر بيه لان انا الك  وهذاك الشي ماضي وانتهى، من گد ما ثوله وما اعرف احچي غلطت بـ اسمه

 و بدل ما اگول منـاف گلت رائـف هو سمعني گلت رائـف وهوَ تسودن بسرعة ردلي 

-- شلوووون شلووون

-- عود جاي اگول منـاف عوف رائـف والله 

-- والله من انعل ابوج لابو رائـف لابو منـاف  بنت الكلب بوجهي وتغلطين بـ إسمه وراي شتسوين 

بسرعة سدت الخط بوجهه رجع دگ ما جاوبت بقى يفصل ويرجع يدگ من جديد مره واثتين وثلاثه اخر شي قفلت نقال امي 

وللصبح ما نمت طلعت للحوش گعدت ودموعي تصب على حظي هذا هيج من اول إذا رحت يمه شيسوي بيه الله يعلم

صليت الصبح بالحوش و گعدت على سجادتي واشكي وادعي وابچي الربي لحد ما تعبت و گمت طبيت تغطيت وغمضت عيوني وهم ما گدرت انام بعدين ما ادري شلون غفيت 

والصبح الساعة بالعشرة گعدتني أمي گالت منـاف عدنا گـومي گمت للحمام غسلت ورجعت للغرفـه لبست حجابي و انا ناوية اروح واحچي ويا إذا يبقى هيج كل واحد يروح الحاله انا ما مستعده ارجع النفس الدائرة 

بس بعدين گلت لا ما اروحله ولا اشوفه وجهي خلي يوم يومين يحس بروحه غلطان بحقي وبعدين اگعد واحچي ويا 

اجت امي عليه مره ثانية گلت الها ما اروح گليله نايمـة ردت 

-- شكو متعاركين 

-- بعدين احچيلج

-- لا هسه تحچين حتى اعرف اتصرف ويا 

-- عصبي و يشك و ما يثق حتى بروحه وكل كلمه احچيها ياخذها البعيد وفوگاها البارحه تجاوز عليه 

-- احچيلي بالمضبوط ما اريد هيج اريد تفاصيل كامله 

حچيت الها كلشي رد عليه

-- لا تجين ابقي هنا 

گامت راحت عليه وانا گمت و گفت يم باب الديوانية من جهه الصاله اريد بس اسمع ماكو صوتهم ناصي رجعت الغرفتي گعدت انوب گمت رجعت بلكي اسمع ماكو نفس الشي ما اسمع رجعت طلعت بالمطبخ وميته التفكير موتني شوية وشفته طلع

وجهه محتقن و معصب و يمشي سريع 

طلع من البيت وسد الباب وراه وامي اجت 

يمي وتگول

-- والله حباب و يحبج بس ما ادري شنو قصته 

-- ادري بيه حباب وادري يحبني بس ما يثق ويشك والحب ويا الشك ما يصير ولا ينجح 

-- عوفيه كم يوم لا تحچين ويا وراها اني اتصرف عوفيها عليه بس اني الگى حل للموضوع 

خلص هذا اليوم كلش كأيب عليه ومالي خلك والزاد الكأبه عمي هاشم من رجع بالليل وسولف سبب المشكلة 

الولد فايتين وهوَ جاي عليهم من وره 

وضارب رائـف بجتفه بحجه ما يدري ومن رائـف گايله انتبه ما تشوف شايل منـاف ايده وضارب رائـف بوكس بنص الشارع 

واثق فازع الاخو و صايرة بيناتهم هوسه كلش جبير مدخلين بيها أمن العتبة

و ماخذينهم وهناك بالمركز راجع متجاوز على رائـف ويگله عيونك اشلعهن إذا شفتك تباوع الها مره ثانية 

الفهمته شايفهم من شايفيني و خلاني اروح وجاي عليهم متحارش بيهم

 و متضاربين 

بعدين مطلع هويته مشوفها الهم و صايره اتصالات بينه وبين مسؤولين هناك بكربلاء

و مطلعينه و رائـف و واثـق مطلعينهم وراه مباشرتاً لان هوَ البادي والعايل بيهم 

من راجعين البغداد مخابرين على عمي ماخذين رقم ابو و عنوان بيتهم وصايره هسه بينهم هوسه و ابو مخابر على عمي يريده يصير واسطه خير بينهم

ومن هاي الهوسه كلها عمي يگول ولا هامه ولا عبالك مسوي شي وكلش ما يحترم ويباوع للناس بالعين الصغيرة واصلاً ما گاعد يمهم ولا ملتقي بيهم وباقي ابو و اخواله حايرين بالسالفه 

وابو خطيه ما مخبر اخوته لان مو هذيج العلاقة القوية بينهم وباقين بس رسميات بينهم مضطر مخابر على اخواله

يومين مرن الوضع كلش مزعج والقهر اكلني اكل  و التفكير موتني و هوَ بعد ما اجى ولا خابر باليوم الثالث يلا اجى وعمي وامي جبروني اروح اشوفه واتفاهم ويا 

امي تريدني اسوي حل وتريدني ابقى ويا يعني باقيه تكسر وتجبر بس عمي فد مره ضايج منه ومن تصرفاته

طبيت للديوانية لگيته گاعد فتت گعدت بدون ما اسلم هوَ يباوع عليه من اول ما طبيت لحد ما گعدت گـال

-- هيج صارت حتى السلام عليكم ماكو 

-- منـاف من الأخير العشته گبل ما اگدر اعيشه مره ثانية وضعك مو طبيعي تشك

بـ اضافرك وما تثق لا بيه ولا بروحك عصبي زيادة عن اللزوم وبالاخير گـمت تتجاوز هيج شي انا ما اريده 

سكت ما جاوبني رجعت اكمل كلامي

-- تحبني على عيني وراسي بس الحب وحده مو كافي إذا ماكو ثقه بعمرنا ما نرتاح ولا ننجح بحياتنا الزوجيـة إذا ماكو احترام طول العمر نبقى بدون احترام الزوج مو احبك وتحبني وانا مو جديدة عليه حتى اعدي و امشي لان انا عشته وجربته وشفت ظيمه و ما مستعده ارجع اجرب نفس الظيم من جديد گتلي راح اصيرلج سند وأمن وامان تالي بعدنا بالبر و گمت تنعل بيه وبـ ابوي   

منـاف :- الإنسان مو معصوم لازم تجيله ساعة عصبيه يفقد بيها سيطرته على نفسه وانتِ ضوجتيني بسؤالج عليهم بالليل وراها غلطتي بـ إسمه گدامي حقي انفعل

-- من حقك تنفعل بس مو من حقك تتجاوز عليه وبعدين أنا ما غلطت بـ إسمه انا جاي اگلك ما بينا شي وانسى ولا تفكر وصار إسمه گبال إسمك قابل جرمت وهيج تتخبل عليه

-- صارت بعد اعتذر 

-- يوميه صارت واعتذر وبعد ما تنعاد وترجع تتصرف بتصرف اغرب واصعب

-- هاي اخر مره وداعتج 

سكتت ما ادري شو شـأكول شكله متندم وحاس بغلطه بس شنو الفايدة طبت امي يمنا گعدت وبقت تسولف سوالف عادية وهوَ يرد عليها بس باله يمي وكل شوية يباوعلي اخر شي امي فجرت القنبله وگالتله 

-- منا وجاي إني عندي شغل هواي فـ اكثر وقتي راح يصير بالصالون ويُـمن تبقى وحدها بالبيت ولازم اخذ موبايلي وياي

 فـ اشتريت الها موبايل خاص بيها يبقى يمها على طول 

رفع راسه باوع الامي متفاجئ ورجع باوعلي بس ابد ما حچى شي وراها گال

-- ليش كلفتي نفسج إني ناوي اجيب الها بس نتزوج 

-- لا ماكو تكلفه هيَ بنتي ومسؤوليتها من واجبي من تتزوجون عود بهذاك الوقت إني بعد ما اجيب الها شي

هز راسه بدون ما يرد بس شكله توتر وضاج بس يحاول يصير طبيعي ويسطر على نفسه حتى ما تأخر بسرعة استأذن وراح اول ما راح امي گالت

-- نشوف التالية وين تصير 

-- ليش گتيله هيج

-- عبالج إني غشيمة عليه بس ساكته الهسه ما اريد اظلمه واظلمج 

سكتت وطلعت رجعت الغرفتي لليل وخابرني من نقال امي اول ما سلم گال 

دزيلي رقمج حرت شـگول وأنا چذب ما مشترية ضليت اگول الو الو عود ما اسمع وگطعته وطلعت الامي اركض 

يُـمن :- يريد رقمي 

شهيناز :- گليله بعدني ما مشغلته مقفول وباچر اروح اخذلج موبايل ودزيله الرقم عود 

-- هسه ليش الچذب 

-- انجبي و لا تتدخلين بشغلي 

رجع دگ مره ثانية جاوبته ونفس الشي گال دزي رقمج رديت بعده مقفول ما فاتحته باچر عمي يسويليا من واخابرك منه رجع گال

-- اگول حبيبتي شأسوين بيه خل يولي

-- مو امي تطلع للشغل وابقى وحدي وخاف احتاج شي اخابرها من يمه

سكت ما رد ونفس الشي نهى الاتصال بسرعة وثاني يوم امي راحت اشترتلي نقال وشريحه و رصيد و رتبته وفعلت الرصيد وگالت گومي خابري من عنده خابرته من عنده وبس گتله هذا رقمي جاوبني

-- بيها الخير 

منا واتصالاته زادت و اسألته زادت وصار عصبي ومتوتر شوكت ما تجيله انوب گام كل ربع ساعه يدگ ويفصله بحچه بالغلط

 لو مشتاقلج لو مو النقال بـ ايد فهد ودگ عليج ما يعرف 

هنا تأكدت ميه بالميه هوَ يخابر بس يريد يتأكد إذا مشغول لو لا وحچيت الامي على تصرفاته بس امي دائماً تسكتني وتگول انطي مجال انطي صبر 

لحد ما بيوم امي جانت طالعه هيَ وعمي وكت مغرب وخابرتني تريد تجيب وياها عشة ومن سديته لگيته داگ عليه وحارك النقال حرك بالمخابرة وبس خلصت مكالمتي ويا امي رجع دگ من جديد انا گلت الو جاوبني بدون سلام 

-- ويامن جنتي تحچين 

-- ويا امي 

-- وكل هذا الوقت ويا امج

-- ما تأخرت بسرعة بس سألتني على العشة

-- وامج وين 

-- طالعه هيَ وعمي 

-- وحدج بالبيت 

-- اي 

-- يلا عندي شغل من ارجع للبيت اخابرج 

قفله وره خمس دقايق رجع دگ رديت اول ما گلت الو گطعه بوكتها انقهرت قهره احس متت هذا جاي يتأكد خاف رجعت اخابر يعني شلون اخلصها ويا إذا يبقى هيج يموتني 

من رجعت امي سولفت الها گالت عوفيه احنه النا الصافي وحده راح يخرب على روحه بس ابقي ساكته هالايام 

انا جنت اموت من القهر لان بديت اتعلق بيه واحب احچي ويا واشتاقله من يتأخر

ما يجي علينا وبنفس الوكت اخاف من عنده ما عنده تفاهم واعصابه زايده 

ثاني يوم اجى و گعد ويا امي يريد يقدم موعد العرس ردت عليه امي 

-- البارحه حچينا بهذا الموضوع إني ويُـمن وگلنا وره امتحانات السادس عود

-- يعني سنه ونص بعد  

حچى هيج وضحك

-- اي غمض فتح بسرعة تخلص

-- مو منطق هذا يعني بس خطبتي سنتين وين اكو هيج 

-- من الاول احنه حاچين وياكم الخطبة تتأخر حتى تتعرفون واحد على الثاني 

-- اي بس مو سنتين 

-- اريدها تكمل السادس 

-- تكمل يمي وين المشكلة

-- ما تلحگ تقرأ بعد يصير عدها بيت وزوج ومسؤوليه ما تجيب معدل زين 

-- ليش هيَ ناوية تفوت جامعة حتى تردينها تجيب معدل زين 

امي باوعت عليه ورجعت باوعتلي ورد

-- اكيد لعد المن تدرس وتتعب غير حتى تاخذ شهادة بيها خير 

سكت ما رد على موضوع الجامعة غلس ورجع يگول

-- بيتنا فارغ مثل بيتكم وما عدنا شي تگدر تقرأ براحتها 

-- الله كريم هسه خليها هالشهرين تعدل نفسها وترتب وضعها وسهلة ان شاءالله 

حچت هيج و گامت عافتنا گاعدين وحدنا اجى گعد بصفي و لزم ايدي باسها ويگول

-- ليش هالعناد خلينا نخلص ونتزوج ونستقر والله تعبت اريدج يمي

ما اجاوب لان ما ادري شبيه احس إذا وافقت واستعجلت بالزواج راح اموت وانا عدله بقى يسولف وياي و يتغزل بيه وسوالفه تخبل و توگع اكبر وحده مو عاد انا الفطيرة بسرعة اتقشمر 

انوب راد من عندي جاي گمت سويتله واجيت من طبيت لگيته لازم نقالي وفاتحه يباوع بيه بس شافني طبيت قفله ونزله على الطبله غلست ما حچيت وهوَ اصلاً غلس وما برر ولا گال ليش جان يدور بيه و شوية وراح البيتهم بدون اي تبرير 

حچيت الامي ردت اعرف بيه راح يدوره زين والحل شنو تسكت ما تجاوبني وانا باقيه اموت كل يوم موته 

مرت الايام وبخصوص موضوع المشكلة مالت رائـف و واثق انا بعد ابد ما سألته ولا فتحت موضوعهم ويا بس عمي هاشـم جان يحچيلنا على أساس السالفه انحلت مدخلين بيها ناس كبار وفاضينها وعرفت

بـ رائـف جان برى العراق

 ومن اول ما طالع من السجن مطلگ أديـان ومسافر وراجع قبل المشكلة

 بـ اسبوع يشوف اهله و جاي يزور هوَ واخو وعلى حظي شافني وشفته وصارت هاي الطلابة  

عدت الايام والوضع بين الطبيعي وبين المتوتر انا عندي طبيعي وهوَ عنده متوتر 

لان كل شوية يدگ صارت بيه حاله نفسه 

خاف اخابر من وراه وكل مره اگول الامي وتسكتني بحجه انتظري التالية لا تستعجلين ما ادري شتفكر وليش هيج ساكته عنه لا تخليني احچي ويا ولا هيَ تحچي 

عدا شهر جديد وهنا گام يضغط علينا يريد يحدد موعد العرس و امه اجت هيَ وابو يردونا نوافق على الزواج ونحدد الموعد باقرب وقت وهوَ حچى ويا عمي و يتصل عليه ويروح ويرجع وصار كلش ضغط علينا وبعد ماكو مبرر نرفض لان اول واخر راح نتزوج ماكو شي يمنع 

لحد ما اتفق ويا وامي بداية الشهر الجديد الزواج جنت خايفه ومتوتره و اصلاً ابد ما فرحانه احس غصه بگلبي اريد انهي هاي العلاقة وبنفس الوكت اريده ما اگدر اعوفه 

جاب فلوس النيشان والذهب حتى نروح نجهز و انا ابد ما رحت ولا مشيت ولا اشتريت جنت مقهورة وشعور ما اعرف اوصفه بداخلي ما مرتاحه 

امي گامت تروح بمكاني كل يوم تجهز شي وترجع حتى الذهب هيَ اشترته على ذوقها ما رحت انا ولا ادخلت  

وكل يوم يخابرني ومن يسأل على امي اردله راحت تكمل النيشان ويرجع يسألني نفس السؤال وانتِ ليش ما ترحين وياها ليش باقيه بالبيت 

يُـمن :- هيَ تجيب على ذوقها ما يحتاج اروح

منـاف :- احسج ضايجة وما فرحانه

-- لا مو هيج 

-- لعد شبيج احس بيج شي شكو عمري 

-- خايفه 

-- من شنو خايفه 

-- ما ادري 

-- حبيبة گلبي تخاف واني عايش تخاف واني يمها مع الأسف 

-- الله يحفظ ويخليك 

حچيت هيج وسكتت ورجعت اگول بگلبي

ما تدري انا خايفه منك رجع گال

منـاف :- من شنو خايفه من الزواج لو شنو 

-- احس ما راح ارتاح وراح اتعب 

-- شلون حچي هذا هيج ازعل منج يعني معقوله تفكرين وتحسين هيج و إني اموت بيج ومستعد انطي من عمري العمرج وداعتج إني احبج ومستعد اشتريلج سعادة الدنيه كلها واحطها بين اديج ليش هذا التشائم والفال المو حلو گولي يا الله 

-- يا الله 

بقى يحچي وياي ويهدي بيه وشلون من نتزوج راح نگعد سوى ونسولف على طول اليوم و نتشارك بكلشي يحاول يشيل الافكار المو حلوة من بالي بس انا گلبي مقبوض 

لحد كملت امي كل شي وجهزنا كل شي وما بقى للعرس غير اربع ايام بهاي الايام 

سويت شعري غير لون و سويت تنظيف وتقشير و ما بقت سالفه حلوة ما سويتها

امي ما خلت شي يعتب عليها ما سوتليا

من صدگ تحظيرات عروس حظرت 

الغراض كلها كملتها والنيشان كملته والتحظيرات كملت وهوَ نفس الشي جايب غرفه و مجهز كل شي محددين موعد العرس يصادف يوم الجمعه واليوم احـنه الثلاثاء بالليل بوكتها جنت هسه راجعه من الصالون و راسي يوجعني بسرعة نمت من وجع راسي هوَ داگ عليه اكثر من مره وانا ما ادري بروحي جنت افز ارفضه وارجع انام 

انوب مخابر على امي وهم مجاوبته هيَ  نايمة سألها عليه گايلته نايمة من اول ما رجعت ما حاچي ولا گايل شي ناهي الاتصال وساكت 

ثاني يوم اجى علينا الصبح بهدوم الدوام 

طب للديوانية اجتني امي گالت منتظرج بالأستقبال بسرعه رجت عليه متفاجأة شعجب جاي هيج وكت 

 من شافني اجيت ابتسم على شكلي الجديد لان ما شايف لون شعري الجديد   فتح اديه اثنينهن رحت عليه حظني قوي وباسني 

ما وخرته مني لان تعودت عليه والامر صار عندي طبيعي من گد ما يجينا ومن ابتعد مني رفع شعري من وجهي و گال 

-- شصايرة تشقين 

ضحكت وهوَ نفس الشي يضحك گعد وگعدني على رجله ويگول

-- جنت خفر وهسه طلعت واجيت بوجهي عليكم مشتاقلج 

-- انا هم مشتاقتلك 

رجع باسني وراها گال

-- شيجيب الجمعه ويابة غير راح اموت

-- اسم الله عليك 

-- اروح فدوة الگلبج الطيب ، جبتلج رصيد وياي جيبي تليفونج 

رحت جبت النقال واجيت انطيته اله فتحه وشدلي الرصيد وبقى يگلب بيه عفته براحته ما دام ما عندي شي خليه يدور للصبح شوية ورفع راسه وگال منو هذا 

يُـمن :- منو 

-- هذا الرقم الغريب الداگ عليج منو 

-- ما ادري 

-- شنو ما تدرين داگ عليج ومجاوبته دقيقتين ونص

-- بله اشوفه 

حچيتها واحس خرطت العافية يا رقم  اجيت اباوع للرقم صدگ هذا رقم غريب دائ وانا مجاوبته بقى لازم النقال بـ ايده وصاير كتله من الاعصاب ويباوع عليه منتطرني ارد رجع گال منووو 

-- ما ادري

-- ما تدررررين شلوووون وهوَ داگ عليج ومجاوبته دقيقتين ونص

-- لا تصيح بس انطيني مجال 

گام من مكانه بسرعة گمت ويا من گد خفت ورجعت ليوزة اجى عليه و يگول

-- منو هذا اخر مره اسأل

-- ما ادري والله

-- يا الله هذاااا التحلفين بيههههه 

-- لا تصيييح

-- يُـمن دگي عليه اشوفه منو

رفعت راسي مصدومة بيه مستحيل هذا مو طبيعي رديت

-- ما ادگ وجيب النقال واستحي على روحك

-- دگي اگلجججج

-- ما ادگ وجيب النقال 

حچيت هيج و جريت النقال من ايده شو هذا بس اخذته من اديه اجى عليه واشتغلني راشديات بالاربع راشديت ضربني فقد اعصابه وملخني من شعري وراشديات 

رجعت ليورة وايدي فوك وجهي اريد احمي روحي منه وعلى صوته فتحت امي الباب وطبت   

يتبع....... 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا